انثنى غيم نجد لخد الحجاز النرجسيه

٥٦

كشر بألم وتقدم سلطان يناظره والدكتور نطق
:بنعطيه مسكن بيتألم
سلطان:مافيه شي ؟ متأكد مافيه شي يأذيه ؟
الدكتور:اذا صحى بنسوي له اشعه ونطمن عليه بس الواضح لنا رضوض عميقه بذراعه اليسرى وكدمات كانت بتنكسر يده لكن حمدلله جات رضوض بالعظم ممكن تتعبه فتره لكن بيرتاح هنا تحت المراقبه وان شاء الله تلمه السلامه
سلطان هز راسه ولف يناظر وجه بهاج اللي امتلأ بالخدوش والكدمات وراسه اللي تغطى بشاش من جديد
فتح عيونه بهاج ورجع يكشر كان يحرك راسه بألم وعجز وتقدم له سلطان:ارتاح ارتاح
بهاج:اهخ
تألم وحاول يتقلب من ألمه لكنه عجز ولف لسلطان:الموت سلطان
سلطان:الله يبعده عنك ، وش تحس ؟
بهاج:ذراعي بينقسم نصين
سلطان: الحين يخف ان شاء الله
رفع راسه بهاج وهو يوّن واخذ نفس سلطان بتعب
لف بهاج يناظر الممرضه تحط له محلول بالوريد ورفع نظره لسلطان:وش صار ؟
سلطان:لحقتك ولقيتك قدامي بالدرب
بهاج صد بنظره يتذكر اخر شي شافه بعيونه وعقد حاجبينه من تكرر عليه كل شي ضيقته وهمّه وأمه
ولف لسلطان:احد يدري ؟
سلطان:فهد بس
بهاج:البنات !
سلطان:ماكان عندهم قالي لوحده
بهاج:لا يخليهم ويجي خله يقعد عندهم
سلطان ناظره يتألم:انت استريح لا تفكر بشي
بهاج غمض عيونه بتعب واخذ نفس سلطان يخرج من الغرفه واخذ جواله ودق على فهد
رد فهد وهو متوهق:هلا
سلطان عقد حاجبينه:من عندك ؟
فهد ناظر البنات اللي معه بالسياره كانوا يبكون كانوا يجهشون بالبكاء بدون توقف بكل خوف
خوفاً على بهاج
فهد:من يعني ؟
سلطان:ونعم يافهد ونعم ياتبن ونعم ماقلت لي انك لوحدك
فهد:ياخي شدراني
سلطان:لا تجيبهم لا تجي تفهم
فهد:انا بالطريق معهم
سلطان:ارجع فهد واقعد معهم ارجع
فهد:ياخي بشوف بهاج ماني راجع صحى ؟ كلمك ؟
سلطان:بخير طيب بس ارجعوا
فهد تنهد وهو يهدي سرعته ولفت أنهار عليه
:ما بنرجع الحين توديني اشوفه الحين
فهد قفل جواله وعكس طريقه:قالي سلطان طيب مابه شي
أنهار شدته من ثوبه وهي تبكي:بتوديني والا والله لأرمي نفسي من الباب
مسك راسه بتعب وتقدمت نورا:تكفى فهد بنشوفه تكفى
أنهار هزت راسها بالنفي هي مو مصدقه أقاويلهم هي تبي تشوفه بعيونها ، هي ودعته قبل يروح طلب يحضنها كان يوادعها ، كان متلبسه الخوف والهمّ وكان واضح عليه وقالها برجع برجع لك
خافت انه ما يرجع بدون سبب من قبضة صدرها خافت عليه لكن الحين عرفت انه كان رايح للموت
تبغى تشوفه تبغى تطمن عليه تبغى تسكن خوفها من انها تفقده
بهاج والموت وهي دون بهاج ميّته
فتحت بابها ونزلت تركض دخلت المستشفى وهي تنادي اسمه بهمس بخوف
تسمع صوت نبضاتها ما تسمع اصواتهم خلفها تقدمت لممر الطوارئ وتلفتت تناظر حوالينها بضياع
لين شافت سلطان اللي انتبه لها وتنهد بتعب
مشت له تجرّ خطواتها ومسكت ذراعه وهمست:وين بهاج؟
سلطان ناظر فهد والبنات خلفها:بهاج طيب طيب
أنهار:بشوفه
سلطان:نايم داخل
تعدته تفتح الباب وتدخل وبكت وهي تشوفه يفتح عيونه يناظرها
شهقت تغطي فمها تشوف شكله ومن ناظرها انصدم وهمس:أنهار
بكت وهي تناظر جروحه وخدوشه وكدماته وجبيرته وتعب أكثر زود على تعبه
ماكان وده تدري به ما كان وده يشوف كل هالدموع والخوف اللي سببه لها
دخلت وراها نورا وناظرته بخوف:بهاج
رف ذراعه اليمين بهاج يناديها له وتقدمت له تحضنه وعقد حجاجه بقوه من تعوّر وتألم
كان صدره يوجعه وكل عضلات صدره ووّنّ بألم
وظل رافع ذراعه ما يقدر يشد عليها ولا يحضنها ولا يقدر حتى يمسح على ظهرها كل اللي يسمعه بكاها وكل اللي يحسه ألمه ووجعه
ناظرتهم نورا وهي تسمع نحيب أنهار وتقدمت لبهاج تناظر أنهار بحضنه وتسمع صوت بكاها وهمست:أنهار تعورينه
ماردت وهي تبكي ولف بهاج لها وهمست نورا وهي تناظره بخوف:انت طيب ؟
غمض عيونه يطمنها ودخل فهد يناظره:ابو سعود
ريوف دخلت وهي تمسح دموعها ومن شافته بكت بدون صوت بخوف من شكله وناظرت أنهار اللي بحضنه
ودخل سلطان وناظره وتقدم:أنهار الرجال متعوّر خليه
بهاج:خلها
لفت نورا على سلطان ورجعت ناظرت بهاج
فهد:حمدلله على السلامه
هز راسه بهدوء بهاج هو يحس بدموعها اللي بللت صدره لكنه تاركها تاركها تداويه هي ولو انه بيموت من أوجاعه
نورا:اش قالوا لك ؟
سلطان:رضوض بذراعه اليسار بس مابه شي كدمات بسيطه
نورا ناظرت وجهه وهي تتفقده متخدش ومتجرّح:تعورت مره بهاج
لف فهد لريوف:خلاص لا تبكين هذا هو حيّ قدامك
ريوف ماردت عليه ولف فهد يناظره:كيف صار الحادث ؟
سلطان:ياخي فهد ماهو وقتك
ناظره بحده يناظر البنات اللي موجودين وتنهد فهد
:السياره طيب وش سويت فيها ؟
بهاج همس:تالف
شهق فهد:اح ربي سلمك اجل
رفعت راسها أنهار تناظره وهمست:يعني ايش
سلطان تنهد وناظرها بهاج ولارد وهو يرمش بتعب
نورا:خلاص خلوه يرتاح ، بهاج اعدل لك مخدتك اسوي لك شي ؟
هز راسه بالنفي بألم وغمض عيونه هو يحلف انه ينازع أشد سكرات موته
رفع يده وتقدم سلطان له وشد بهاج على كفه ولف سلطان؛اطلعوا خلوه يرتاح
ناظرته أنهار وهزت راسها بالنفي ومشت لها نورا
:أنهار عورتيه خلاص خليه يرتاح بنجلس برا ننتظره
لفت عليها أنهار وهي تبكي:لا قلت ماتفهمون ؟
سلطان ناظر نورا اللي تناظر أنهار بهدوء وهز راسه لها وخرجت نورا مع ريوف وفهد
ونطق بهاج:كلمهم يجون
سلطان:وش تحس ؟
بهاج؛احس بموتي
شدت على كفها وهي تسمعه وتشوفه ولف سلطان يناظرها وخرج
تقدمت أنهار له ومسكت ذراعه اليمين وفتح عينه لها:بطيب بطيب
أنهار هزت راسها بالنفي:خايفه بهاج
بهاج مارد وعقد حجاجه وهمس:اهخ
كانت تشوفه يوّن بتعب ورجفت بخوف من دخلت الممرضه وابتعدت عنهم تناظرهم ودخل الدكتوره
:هاه بهاج
بهاج:يدي يدي
الدكتور:طيب خلني اشوفها
تقدم لذراعه اليسرى ونطق الدكتور:لف رقبتك نطمن على كتفك
لف بهاج اقصى يمينه ومسك ذراعه الدكتور وصرخ بهاج بألم
وبكت أنهار بخوف وسحبها سلطان برا وخرج وقفل الباب
ريوف وقفت بخوف؛اشفيه ؟
سلطان:اشغلتنا يافهد اقسم بالله نفسي انهيك الحين
فهد:ياخي خلاص لا تحملني كل شي
سلطان لف لهم وناظر نورا اللي ساكنه محلها بربكه ووقف معهم برا يسمع آهات بهاج
جلست على الكرسي وهي تبكي كانت مو قادره توقف دموعها مو قادره تسكت خوفها حزنها ضيقها هي لو يمسه اصغر شي طاحت ولا قامت ، هي تشوفه طايح بسرير ابيض يوّن ممتلي بالكدمات والجروح وينازع ألآم ما يقدر عليها احد
بكت تغطي وجهها تبغاه طيّب تبغاه جنبها تبغاه يقوم على حيله
لفت تناظر الباب وهي تبكي وناظرتها نورا من محلها وهي هاديه ورجعت ناظرت سلطان اللي يراقبها
-