انثنى غيم نجد لخد الحجاز النرجسيه

٤٢

رفع راسه بهاج يناظر فهد اللي متوتر والتفت يناظر عمر اللي عينه عليه ونطق:فهد بيعطيكم خبر
رفع راسه فهد له وبلع ريقه
وعقد حاجبه زيد:وش عندك؟
فهد:اء انا ودي يعني
سكت بتردد ورفع راسه لبهاج وبهاج التفت عليهم
:فهد طالب ريوف على سنة الله ورسوله يبيها وهي تبيه
لف عمر يناظره:انا ماقلت تعقب !
بلع ريقه فهد ولف بهاج لعمر:الشور ماهو شورك
رَده:البنت بنته
بهاج:اذا كان يدري عنها تصير بنته ، لكنه ما يدري عن احد
عمر:لو مخلي بناتي عندي !
بهاج:كان ماتوا من الهمّ
رَده:بهاج لا تتدخل عمر يعطي
بهاج:عمر يدري ان امس بنته بالمستشفى ؟ يدري عن وجعها ؟
رَده لف لعمر اللي استغرب:من هي ؟
رَده:ماتعرف ؟ بهاج خرج قبل الصبح بزوجته
عمر لف يناظر رَده ورجع يناظر بهاج وبلع ريقه
تنهد رَده يلف لبهاج اللي نطق:الاثنين يبون بعض بالحلال ونيتهم زينه ليه نوقف بطريقهم ؟
زيد:انطق انت
فهد التفت عليه:نفس ماقال بهاج
زيد:ليه ماتقول من قبل ؟
فهد:هذاني الحين
زيد لف لعمر:عمر !
عمر لف يناظر زيد اللي ينتظر منه جواب وسكت
رَده:بيعطي دامها لولد اخوه والا ياعمر ؟
عمر رفع راسه لبهاج:وش ناوي عليه انت ؟
بهاج:انا مانويت شي ، اثنينهم نووا وعلموني وانا جيت اعطي خبر
عمر:وان رديته ؟
بهاج رفت كتوفه:هذا ولد اخوك واخوك جنبك وعمي زيد اللي بينرد ماهو انا
لف زيد على عمر وتلونت وجيه الباقي
ولف عبدالله يمسح على شنبه يناظر زيد اللي ساكت
رَده:بيعطي
عمر لف لابوه وهز راسه رَده:مابترد ولد اخوك
لف عمر يناظر بهاج اللي مبتسم وشد على قبضة يده والتفت لزيد:ان شاء الله خير
رَده:عطيت ؟
لف عمر يناظرهم ولف فهد يناظر سلطان وبهاج اللي جالسين جنبه ورجع ناظر عمر اللي هز راسه:عطيت
ابتسم بهاج يناظر وجه عمر اللي تلون بالغضب ولف لفهد:مبروك
ناظره فهد بحده وابتسم بهاج يسلم عليه
رَده:وشكله ما بيتزوج فهد لوحده بيجينا زواج جديد
بهاج رجع ظهره لورا يناظرهم وابتسم عمر يلف على عبدالله؛زين ما اختار والله
ضحك عبدالله ولف رَده عليه:متى بغيت تقول ؟
عقد حاجبينه وهو يشوفهم يناظرونه:اقول وش ؟
رَده:انك تبي بنت عبدالله
جمد وجهه وناظر عبدالله اللي مبتسم:ولدي يابهاج خير ما نختار
لف سلطان يناظر بهاج اللي مصدوم ولف لابوه:وش العلم؟
عبدالله:مع انها خرجت من حريم لكن دام تكلمنا عن فهد بنقولها سوا ، بهاج يبي اختك شموخ
لف بهاج يناظر عمر بصدمه والتفتوا عليه يناظرون صدمته وسكوته
ابتسم زيد:يصير الزواج زواجين
ضحك عبدالله:الله الله
لف بهاج لسلطان يناظره بصدمه وبلع ريقه سلطان من تحول الحوار لخطبه ماقدر يرفض وينكر مايقدر ينطق بحرف من صدمته من ابتسامة عمر من الضغط اللي حسّه من كلام امه
هو كل اللي شافه بين عيونه أنهار ماتوقع بيقدرون يفرقونهم ماتوقع بيقدر أحد يغيّر كل اللي رسمه
ماتوقع ان هذا بيصير كل شي يصير من دون شوره من دون ما ينطق
ورفع راسه لعمر اللي ابتسم:بهاج كان من البدايه يبي بنت عمه اللي ربت معه وربى معها لكن تعقدت الامور والحين هو جاهز
نشف الدم فيه من شاف عبدالله يهز راسه لعمر ويبتسم وكان بيقوم لكن شدّه سلطان من ذراعه
جلس ولف لسلطان اللي همس:اقعد
،
لبست عبايتها واخذت جوالها وخرجت تلبس شوزها لفت ريوف:وين ؟
رفعت راسها:بمشي شوي
فتحت الباب وخرجت مشت تاخذ نفس متجهه لملحق ابوها وزوجة ابوها اللي وقفت قدامها لدرجة صابتها بالضغط النفسي وصار الوقت تواجهها
دخلت الملحق وسمعت صوت بالمطبخ ومشت تدخل لفت حليمه ووقفت محلها ثواني وابتسمت
:شعندك ؟
أنهار:جيت اتكلم معاك
حليمه تقدمت لها؛بيننا كلام ؟
أنهار اخذت نفس بهدوء:وقفي اللي قاعده تسوينه لانه بيغير ولدك عليك ، لا تخلينه بحركاتك هذي يهجرك ويستقر بعيد عنك
ضحكت حليمه؛ولدي ما يبتعد عني ، انتي وش يهمك فيه؟
أنهار رفعت حاجبها وابتسمت حليمه:اخوك وتهتمين له يعني ؟
أنهار؛زوجي وكاتبين عقد نكاح اذا ناسيه
حليمه تكتفت:عشان خواتك وعشانكم سوا كخواته وبس
تنهدت حليمه:تدرين أنهار انك كاسره خاطري لان هذا الدرب ماهو نفس ما تتخيلينه ، اي يمكن يعجبك بهاج ومن ما يعجبها بهاج ؟ شيخ الرجال كلهم لكن ما تلوقون ولا بتلوقون على بعض
ابتسمت بهدوء:وببارك على الخطوبه من بدري
أنهار:لا تجربين تتدخلين بفهد وريوف وخطبتهم كمان !
عقدت حاجبينها حليمه:فهد وريوف ؟ اي خطبه ؟
سكتت أنهار ثواني:مين تقصدين أجل ؟
دخل عمر ووقف من شاف أنهار بالمطبخ وابتسمت حليمه:بهاج خطب شموخ بنت عمه قبل شوي بالمجلس مع الرجال ، هذا ابوك وراك اسأليه
جمدت ملامحها تناظر حليمه اللي مبتسمه ولفت تناظر ابوها اللي واقف
ناظرته ولمعت عيونها من دموعها من شافته
كان يختلف صار هزيل عاقد حجاجه طول الوقت مسوّد وجهه ولا كأنه أبوها اللي تعرفه
بلعت ريقها تخفي دموعها ومشت تخرج من الملحق وقفلت الباب خلفه بقوه ومشت للبيت تمشي بسرعه
وقف عند باب الملحق يناظرها تمشي والتفت لسلطان وبهاج اللي جايين له وهمس:أنهار كانت داخل
التفت بهاج:وين ؟
فهد:عند امك
غمض عيونه يمسك اعصابه ودق الباب بقوه ومسكه سلطان:اهدأ
بهاج:وش الخطبه هذي اللي تصير وانا مدري ؟ وش قصدها تحطني بهالموقف مع عمي ؟
سلطان:انا اتكلم مع ابوي خلاص
خرج عمر وناظرهم:خير ؟
بهاج:ناد أمي
عمر:مشغوله
بهاج تقدم له ومسكه فهد يمنعه وناظره بهاج:نادها عشان لا أدخل انا
ابتسم عمر:تبيها من الله يعني ؟
بهاج مارد عليه ينادي امه بصوته وخرجت:بهاج عشاي على النار ياعيوني تعال وقت ثاني
ماتركت له مجال يتكلم ودخلت وناظر عمر اللي واقف وابتسم وقفل الباب
لف فهد يناظر بهاج اللي جامد محله يتمالك اعصابه وهز راسه بتكرار
سلطان:محلوله يارجال محد بيزوجك غصب المهم اني انا فاهم وبتكلم مع اهلي
بهاج مارد ومشى تاركهم يدخل البيت
دخل وناظرهم:وين أنهار ؟
نورا:فيها شي ؟
هز راسه بالنفي ومشى للغرفه دق الباب وفتحه ولفت عليه تناظره وعقدت حاجبينها بخوف
تقدم ودخلت خلفه نورا ناظرها:ليش رحتي لها؟
أنهار:وش صار غير خطبة ريوف ؟
بهاج:لا تسألين انتي تعرفين وعلمتك صح ؟ داري انها بتسوي كذا وتعقد الأمور
ناظرتهم نورا:احد يفهمني
أنهار اخذت نفس:بهاج ماشاء الله خطبوا له شموخ اخت سلطان
نورا لفت تناظر بهاج ودخلت ريوف:منجد؟
نورا لفت لأنهار:طيب عادي
لف بهاج يناظر نورا اللي رفعت كتوفها:اكيد ما بنوقف بطريق بهاج وبيتزوج اللي يبغاها مستحيل يعيش معانا لوحده طول عمره
لف على أنهار اللي هزت راسها بتكرار تصد عندهم
بهاج:لا انا ماودي امي سوت كل شي بدون علمي
ريوف:ماعلمتك ؟
هز راسه بالنفي:لكن بقولهم اني ماودي
لفت عليه أنهار:باقي ماقلت لا ؟
سكت يناظرها واخذت تفس تصد عنهم وترفع شعرها تخفي توترها
نورا:ليش ماتبغاها ؟ احس لايقه عليك وتعرفون بعض
غمضت عيونها أنهار وهي صاده عنهم ولف بهاج:ما تلوق ولا ودي بها
ريوف:ولا انا ودي بشليويح هذا اللي بتلصقوني فيه
اخذ نفس بهاج:ترا وافقوا وبتروحين نهاية الاسبوع معه للرياض
ريوف تأففت وضحكت نورا:مو لايق
لفت عليهم أنهار تناظرهم والتفت عليها من لفت:كنتي بتتمشين برا ؟
أنهار هزت راسها ورجع للخلف:تعالي طيب
اخذت نفس وخرجت تدري انه يبي يتكلم معها ولف بهاج عليهم:اذا مليتوا اطلعوا
نورا:ماعليك شوي واجي انا بس بسوي لي قهوه
هز راسه وخرج يمشي خلفها من مشت لممر النوير وتكتفت وهمست:كرهته
رفع حاجبه ومشى جنبها:وشهو ؟
أنهار:الممر هذا
لف يناظره وبعد تفكير وهم يمشون التفت عليها وابتسم:تغارين ؟
وقفت ولف عليها وناظرت ابتسامته:مبسوط ؟
بهاج:ان كانت غيره منك اي مبسوط
أنهار:امك ماراح ترتاح لين تدخل بيننا الشرّ وبداية الشرّ تدخل بنت بيننا
بهاج اخذ نفس وكملت أنهار:بتوقف بطريقنا كثير
بهاج؛محد بيجبرني على شي مابيه ، ان قلت لا فهو لا
أنهار ماردت تصد عنه وكمل يبتسم:بالله وشهي هذي غيره صدق ؟
لفت تناظر ابتسامته:مع الأسف ، عندك غاليين كثير على قلبك لدرجة ما أقدر ارتاح
عقد حاجبه بإبتسامه:منهم ؟
أنهار تكتفت ترفع حاجبينها:نسيت حبيبتك ؟
زاد من استغرابه وكملت:اللي تحبها أكثر مني ، النايفه
اتسع مبسمه بوسعه من كانت جادّه بكلامها وبقى كلامهم عن النايفه بقلبها وصدقت ان ناقه تشاركها بقلبه وناظرته مبتسم يناظرها:لا تضحك ، تحبها اكثر مني ادري
تقدم يمسكها من ذراعها وهو مبتسم:زين تدرين اني أحبك
رجف قلبها من نطقها بالصريح وجمدت ملامحها بصدمه وظلت تناظره مبتسم وماسكها من ذراعها بقوه كانت بتهرب لوهله لكن كان ماسكها يدري فيها
ظلت تناظره بإرتباك وبلعت ريقها لانها كانت تحس فيها تحس بأحبك بكل أفعاله معها وكل كلامه معها لكن نطقها بالصريح دمّرها تركها تغرق وتشتت قدامه تتلون بالإحمرار
وشافها تمطر وترعد وتتشكل بالفصول الأربعه قدامه لمده طويله وابتسم يكمل:بس أحبك أكثر من النايفه وأكثر من أي احد ، ميتٍ فيك أنا وحيّ ما أشوف غيرك ، ووالله مافيهم من لونك لازين أوصاف ولا مذهب إنتي اغلى وإنتي أحلى منهم وإنتي أعذب ، ضمى سنيني رويتيه غيرك مارواه
اخذت نفس تهدي نفسها من كلامه اللي ماسمعت أعذب منه يزجل كأنه يكتب شعر وهي تحب ، تحب تنحب بهالطريقه الكثيفه ينهمر عليها بغزل ماسمعته من قبل ولاقدرت ماتبتسم وهي تناظر عيونه اللي تتأملها وابتسم من ابتسامتها
توترت من فرط اعجابها به هي تنجذب له هي تنغمر بكل هذي الخشونه والرجوله والقوه والفصاحه بكل نظراته لها وتأمله هي تعجب فيه
رفع حاجبيه ينتظرها تتكلم:ما بتقولين شي ؟
بلعت ريقها تناظره:ما اعرف اقول زيك
ابتسم لها:لا تقولين كثير الكلام
سحبت ذراعها من كفه بربكه وصدت بعيونها:مو وقته
ناظرها ترجع بخطواتها للخلف وهي تناظره وتبتسم وصدت تعطيه ظهرها وترجع
ابتسم يناظرها تمشي عضت شفتها من لفت عنه ترفع كفها لصدرها تمسك قلبها وغمضت عيونها بقوه تضحك
ضحكت تتمنى لو قدرت تسجل كل كلامه وترجع تسمعه عشان تصدق ، تصدق ان كل هذا الحب لها
اما عنه هو فعقد حاجبه يمشي لحوض النياق ووقف من شاف النايفه من بينهم وضحك يتأملها ويطلع من جيبه سيقاره يثبتها بثغره
،
دخلت وشافتها تبكي بحضن أنهار واخذت نفس:ريوف لا تصعبين الموضوع هذا عشانك
أنهار:اتركيها على راحتها
نورا:لا طبعاً تبكي كأنها رايحه للموت ، مو أول وحده تزوجت غصب عنها وعشان مصلحتها حتى انتي اخذتي بهاج غصب عنك وعنه عشان ايش ؟ عشان مصلحتنا كلنا
نزلت انظارها أنهار وبعدت عنها ريوف:لو انتي تزوجتي غصب ما بتقولين كذا ، انا بعيش معاه ببيت انتي متخيله !
نورا تنهدت:ادرسي ريوف مالك شغل فيه ادرسي ومتى ما مليتي تجينا مو بعيدين عنك
ريوف تنهدت تناظرهم ومسكت كفوفها أنهار:وانا اجيك متى ما بغيتي كمان
ريوف:كل ماطلعتي مع بهاج جاتنا مصيبه مو ناقصين
نورا:الحين كيف وافقوا ؟
أنهار:بهاج يقول انحط تحت الأمر الواقع ماقدر يرفض
نورا:ولا بيقدر كنت هالمره انا بسوي فضيحه
لفت ريوف:شقال لك كمان بهاج؟
جمدت ملامحها تناظر ريوف وبربكه نطقت:ايش ؟
ريوف:متى كتب الكتاب وكل شي
اخذت نفس:اها ، ما اعرف اسأليه
نورا:اذا خلصنا من موضوع ريوف بنشوف شقاعد يصير ياست أنهار
لفت عليها:شصاير ؟
نورا:ما اعرف تروحين بدون ماتعطيني خبر وتشوفين ام بهاج ، شعليك منها ؟
أنهار صدت ولاردت
وناظرتها ريوف:اذا نشبت لك نورا اهربي انتي وبهاج
ضحكت أنهار وهزت راسها نورا:اضحكوا ياستات اضحكوا
خرجت تاركتهم ولفت من سمعت نورا:بهاج جيت؟
صدت تناظر ريوف اللي قامت تاخذ عبايتها وتخرج من الغرفه والتفت بهاج:بكره ريوف
ريوف:بسم الله اش يعني بكره ؟ بهاج ! تصرفوني انتوا ؟
بهاج:اذا دوامك الاحد متى تبين نخلص الموضوع ؟
ريوف:بس مو بكره بهاج
بهاج:لنا اسبوع فاتحين الموضوع تقبليه
نورا لفت عليه:احنا لنا اسبوع ما شفناك فينك مختفي ؟
بهاج:مع العيال دبرت شغل لفهد وقاعد اشوف وش يحتاج بعد
نورا:نشبت مع ريوف وفهد كمان !
بهاج:مانشبت ولاشي
نورا:من فين لك كل هذي المصاريف ؟
بهاج:ساعدت فهد بشوي لين يستقر ويدبر اموره بنفسه
ريوف:بهاج اذا ازعجني شليويح بتصل عليك تجيني ماراح تقول لا
بهاج ابتسم:طيب
ريوف:وتجي مع أنهار
لف يناظر نورا اللي تكتفت:ليش حياتي مصدقه انهم متزوجين ؟ رجلي على رجلهم
صد يناظر الغرفه بهاج من شاف الباب مفتوح هو له أيام ما التقى فيها ولا تكلموا بعد ممر النوير وانشغل ومع انه مشغول اشتاق لها يبي يشوفها لكن دق جواله يخرجه ويرد:هلا سلطان
خرج تاركهم وعقد حاجبيه:جايك جايك بس حدّها زين ماهو عندهم حدّها بعيد عنها
سلطان:تعال اخلص لا تنشبني انا
بهاج:بكلم فهد وجايك
قفل ومشى للدكه وناظر فهد قاعد يقهويهم:فهد قوم عاوني
رفع راسه رَده:وش عندكم ؟
بهاج:بذكي صدقه عن أبوي لبكره ان شاء الله
عبدالله:ودها المصلخ
بهاج:لا انا والعيال نتعاون
زيد:وش تبي تبلش عمرك ؟
رَده:خلهم وش عليك ؟ رجال يذكونها بعشر دقايق ، رح مع بهاج انت
وقف فهد وخرج بهاج مشى فهد:يعني عريس شتبي تبلشني مع ذبايحك ؟
لف عليه بهاج وضحك:امش يالعريس
ضحك فهد ولف من شاف سلطان يحدّ السكاكين وتقدم بهاج:ماقلت لا تحدها عند الحوض ياخي حرام
سلطان:ماني عندهم
بهاج:بالله ؟ لا تحدها تخرعها
سلطان رفع راسه وهو مشمر أكمامه:اي وحده ؟
بهاج لف يناظر الحوض وابتسم:النايفه
سلطان:ياليل اخلص بهاج انكسر ظهري من الحين
بهاج:علامك ؟ قلت لك النايفه
سكتوا يناظرونه وضحك:اخلصوا
فهد:بتذكي النايفه ؟
هز راسه بهاج:اي مشتهي اكل لحمها مقلقل
سلطان:اعوذ بالله من قسوة القلب هذي كنت تنام عند رجلينها
بهاج عقد حاجبينه:تعقب
فهد:بالله منجدك ؟
بهاج:ياخي اقسم بالله ابي أذكيها شعليكم
سلطان:مالنا شغل بس انت تعزها وش جاك
بهاج:عشان اعزها بذكيها قبل يذكيها احد
رفع ثوبه يربطه على خصره وشمّر أكمامه وفصخ شوزه ودخل يسحب النايفه معه
فهد:عزتي عنك يالنايفه تمشي معك ماتدري ان موتها على يدك
ضحك بهاج وهو يمسح عليها ومن ابتعدوا وجهها للقبله وسمى بالله ونحرها بمساعدة سلطان وفهد
،
ريوف:بصير من بنات الرياض بتعرف على بنات جدد بجيكم ماتعرفوني
أنهار:اذا تخلصتي من الرهاب الاجتماعي اللي جاك من الوحده هنا ، على خير ان شاء الله
ضحكت ريوف:كلبه
نورا:اش قاعدين يسوون هذولا
رفعت راسها أنهار تناظرها واقفه عند الشباك:مين ؟
نورا:بهاج وفهد وسلطان
مشت أنهار توقف جنبها وتناظرهم يشيلون قدور ويدخلونها لبيت جمعه وملابسهم معدومه دم
ريوف:شكلهم بيذبحون شليويح ويخلصوني منه حمدلله
ضحكت نورا ولفت أنهار تناظرها:شوفيه معاهم مالك خلاص منه
نورا مشت تاخذ عبايتها وناظرتها أنهار:وين؟
نورا:بشوف اش عندهم
ريوف:ملقوفه
مشت تلبس معاها عبايتها وضحكت ريوف:وانا زيك
أنهار:طيب لا تخلوني
خرجت نورا وفتحت الباب وخرجت معها ريوف ناظرتهم خارجين ونطقت نورا:مين ذابحين انتوا ؟
ابتسم بهاج من خرجت معاهم
فهد:افا العروس طالعه ؟ يقولون مو زين تشوفين العريس قبلها بليله يجلب الشؤم
كشرت ريوف:الشؤم اني اخترتك والله
ضحك بهاج وضرب كتفه سلطان:يعوضك الله محد يبيه حتى امه وابوه مبسوطين انه بيبتعد عنهم
فهد:اوريك ياسلطان
نورا ناظرت بهاج:اش تسوون بهاج ؟
بهاج ناظر يدينه اللي معدومه دم:نجهز ذبايح بكره ، ذبايح عرس فهد وريوف
ضحك فهد:لا تغثها
ريوف:بهاج !
بهاج:والله صادق ، ادخلوا عاونوهم داخل
نورا:تعالوا نتفرج
ريوف:نتفرج ؟ انتي شايفه من قبل لحم اصلاً ؟
ابتسمت تناظره عينه عليها وصدت تخبي وجهها عنه وتمنع ابتسامتها ولفت من مشوا:وين ؟
نورا:بنشوف تعالي
مشت خلفهم ولف يناظرها تمشي:أنهار
لفت عليه بربكه ورجفت من مشوا البنات وناظرته
بهاج عقد حاجبه وابتسم:ماشفتك من فتره
أنهار:انت مشغول
بهاج هز راسه:طيب انتظريني بجيب لك شي وجاي
أنهار:شي ايش ؟
بهاج؛انتظري عندك
مشى عنها وعضت شفتها تناظر حوالينها لفت خلفها تشوف انعكاسها بالشباك وعدلت شعرها ولفت تنتظره
مشى وبيده صحن وسكين وعقدت حاجبينها تناظره جاي
شافته يتقدم لها وهمست:اش هذا ؟
جلس على رجلينه بالارض وحط الصحن عنده:كبده
كشرت تناظره يقطع من الكبده جزء بسيط ويمدها لها:تستهبل !
بهاج:ليه ؟ ترا ياكلونها نيّه ، هاك ذوقيها
أنهار:يع بهاج تكفى
بهاج قرب بياكلها هو ومسكت كفه وصرخت:يع
ضحك يبعد يدها:معدتي انا ! شعليك
أنهار:لا تاكلها نيّه
بهاج:اجلسي طيب
اشر لها بالسكين وجلست:بعد السكين اخاف تنحط كبدتي جنب كبدة الغنمه الحين
ضحك بهاج:ماهي غنمه
رفعت عيونها:اجل !
بهاج:ناقه
نزلت انظارها للكبده ورفعت راسها تناظر سكوته وابتسامته وظلت تناظره مبتسم لين جمدت ملامحها وابتسمت:قول والله ؟
ضحك لانها فهمت عليه:وشو والله ؟
أنهار:بهاج قول والله انها كبدة النايفه هذي
ضحك بصوت عالي ومسكته من طرف ثوبه بذراعه:بهاج
بهاج ناظرها:هي والله انها النايفه
أنهار ابتسمت:لا تكذب ترا اعرف شكلها
بهاج:طيب ذوقي كبدتها يمكن تعرفينها بعد
ضحكت أنهار:والله النايفه ؟
هز راسه:والله النايفه ، وش بكذب عليك انا يوم اني اقولك ماهي أغلى منك عندي ؟ افا انا احب ناقه اكثر منك ؟
ابتسمت تناظره ولف بهاج يناظر سلطان وفهد جايين بقدر:اخر واحد ؟
هز راسه سلطان ودخلوا البيت ولف بهاج يناظرها تناظره وابتسم:بلعتي لسانك ؟ عادي نبدله لك بلسان النايفه
ضحكت ولفت تناظر البيت خلفهم ورجعت تلف عليه وتحضنه وجلس من حضنته ورفع يدينه عنها:بعدمك
ماردت عليه وهي تحاوط رقبته ورجع يدينه على الارض للخلف يتماسك وابتسم من سمعها تضحك
كانت تضحك وهي حاضنته ومن فرط حبها له ومن ضحى بأكثر ناقه يحبها عشانها
بهاج نطق:طيب بعدي لا اعدمك والله ثوبي معدوم
غمضت عيونها بقوه:بهاج
ضحك يحاول يعتدل بجلسته:بنت فكيني طيب
ماردت وابتسمت:بهاج أحُبَك مره
ارتخى وتلاشت ابتسامته يحاول يستوعب ورجعت على وراها وناظرته وهي مبتسمه:أحُبَك مره
اعتدل يناظرها بذهول ويتأمل ابتسامتها واتسع مبسمه بوسع ثغره وقرب يشدها بكفه:عيدي اسمعها
ضحكت تناظر كفه:بتعدمني !
هزها عشان تناظره:أنهار عيديها
صدت عنه تضحك وقرب يناظرها:والله ما أفكك
رجعت للخلف تناظره وضحكت:قلت مرتين
هز راسه:اي ابي الثالثه
لفت من خرجوا فهد وسلطان ومسكت كفه:فكني بهاج
بهاج:اخلصي عيديها
ناظرته بصدمه وهي تضحك وفلت يدها يناظرها توقف وتدخل ولف لسلطان وفهد وابتسم:باقي الكبده
فهد:دخلها جدتي تبيك تقسمها بعد
بهاج وقف وناظرهم:كان واحد قسمها فيكم
سلطان؛عاد عاوناك بقي التقسيم قسمها انت صدقتنا والا صدقتك ؟
بهاج هز راسه وشال الكبده بيده والسكينه ودخل يتنحنح
عضت شفتها من عرفت انه هو ووقفت جنب ريوف ونورا اللي واقفين بالمطبخ وحوالينهم كل الحريم
لفت جمعه:تعال
دخل بهاج يناظر اللحم بالقدور بالأرض
جمعه:تقسمها على صحنين العشاء ؟ والا وش بتسوي ؟
بهاج:ماهي اثنين ثلاثه عندنا واثنين عندكم
جمعه:هي هاتي ياشموخ من وراك الصحون عاوني بهاج
بهاج نزل انظاره من سمع اسمها ولف يناظرهم واقفين:نورا تعالي
تقدمت له تدخل بينه وبين شموخ وتجلس جنبه
لف للحم يناظره:حطي الصحن قريب مني
رفعت راسها شموخ تناظر حليمه اللي واقفه ومشت توقف جنبها
حط اللحم تحت أنظار أنهار اللي مو قادره تخبي ابتسامتها ومد يده يقطع من الكبده وحطها بالصحن ورفع راسه يدورها بعيونه وابتسم من شافها:بتاكلينها بكره وقولي لا !
ضحكت أنهار وابتسم بهاج يكمل يوزع ولفت ريوف على بهاج:محد ياكل منا لحم غنم بهاج
بهاج:ماهي غنمه هذي النايفه
لفت جمعه عليه:اسألك بالله ؟
هز راسه بهاج وهو يوزع اللحم وعقدت حاجبينها حليمه:ليه ؟
بهاج رفع راسه يناظرها:وليه لا ؟ عادي
حليمه:تعزها انت وكان يعزها ابوك
بهاج:ناقه مردها بالصحون
ابتسمت أنهار تناظر دهشتهم ورفعت حاجبينها
بهاج:خلاص الباقي حطوه بأكياس وتوازعوه
جمعه:خله البنات يكملونه الله يعافيك
وقف ياخذ نفس بتعب:ويعافيك
حليمه ناظرته يوقف وتوقف معه نورا:وين رايح؟
بهاج:بتروش واغير ملابسي
مشت وناظرتها أنهار ومشت مع ريوف خلفها
خرج يمشي معها ولفت عليه:ليه اخترت النايفه؟
بهاج:قايل داخل
حليمه:غريب وش غير كلامك ؟
بهاج:كل شي يتغير حتى انتي تغيرتي
سكتت حليمه وكمل بهاج:بنتكلم باللي سويتيه وباللي قررتيه من وراي ، هربتي مني كثير وتعذرتي لكن ما بيقعد معلق ، بجيك ونتكلم
حليمه:انا اجيك لا تجي
بهاج:لا بنتكلم لوحدنا
حليمه رفعت انظارها تناظر البنات يدخلون ومشى بهاج يدخل واخذ منشفته ودخل الحمام
خرجت من الغرفه بعد ما حطت عبايتها وابتسمت مشت للمطبخ وهي مبتسمه وحطت كوبها تسوي لها قهوه واخذت نفس طويل هي ماتوقعت انها بتصرّح له بالحب ولا بتقولها وبتخاف تصرّح له لكنها ماقدرت تناثر الحب من اطراف قلبها وطفح
غمضت عيونها لثواني تتذكر دهشته منها وضحكت تناظر كوبها ولفت وتلاشت ابتسامتها من دخلت نورا ونطقت:بسم الله تضحكين لحالك ؟
أنهار:تذكرت شي
نورا:طيب سوي لي قهوه تكفين أنهار تكفين انتي احسن قهوه بالعالم بس سوي لي ومستعده اسوي لك مساج لين تنامين
ابتسمت أنهار:طيب
نورا:والله ؟
هزت راسها تطلع كوب ثاني وناظرتها نورا:غريبه العاده نجلس نتفاوض عشان كوب
أنهار ابتسمت ولفت عليها ورجعت تسوي لها قهوه
-
-
( تفاصيل الروايه والتشبيهات موجوده بحسابي بالاستقرام r_55shog )