انثنى غيم نجد لخد الحجاز النرجسيه

النهايه

دخل بهاج البيت على صوت سعود وألعابه وابتسم:سعود
لف وابتسم من شاف بهاج وخرجت من المطبخ أنهار:جيت بدري بهاج
هز راسه وهو ياخذ سعود من الارض:ارحب سعود
أنهار ابتسمت ترجع للمطبخ وطلع جواله بهاج من جيبه يجلس سعود بحضنه ورد:هلا فهد
فهد:اي هلا ريوف بتولد مدري وش اسوي
بهاج:وينك انت؟
فهد:بالحمام انحشت خليتها بالصاله خفت يطلع لي راس البنت ويغمى علي
بهاج:حمار انت ؟ ودها ما بتولد الحين ودها وجاي
خرجت أنهار وناظرته بإستغراب
فهد:ياخي بهاج متوتر مدري تعال تكفى ودها انت
بهاج:يرحم امك فهد مو وقت هبالك
أنهار جلست جنبه:بتولد؟
بهاج هز راسه وقفل:حمار فهد اقسم بالله
أنهار:بتروح
حط سعود بحضنها:بروح فهد حابس نفسه بالحمام الرخمه بشوف ريوف واوديها
أنهار:طيب بجي معاك
بهاج:لا خلك ما بطول بوديها المستشفى واجي نتغدا بتبطي لين تولد يمدي نقيل حتى
ضحكت لانها تذكرت ولادتها وكيف طولت وخرج بهاج من البيت ولفت أنهار لسعود اللي بحضنها تلعبه ولفت من دخلت حليمه:سعودي امي
حكت جبينها أنهار تصد ودخلت حليمه بأكياسها:كيف حال حفيدي ولدي
اخذته من حضن انهار وجلست:حران ياحبيبي ؟ ملبسته شراريب ليه ؟ تكتمين رجله تطلع له فطريات او تضايقه شعره ما تشوفينها نزلي شراريبه ولبسيه عند النوم
ناظرت سعود اللي بحضنها:امي سعود اشتقت لجده جبت لك العاب وملابس ، شريت له جاكيت عن البرد ان طلعتوا لبسيه دايم ملابسه خفاف وشريت له معه قبوع على راسه عشان لا يدخله برد
لفت لأنهار اللي ساكته:شفيك ساكته؟
أنهار:وعليكم السلام ورحمة الله وبركاته
حليمه:لهيت مع سعود
وقفت أنهار وناظرتها حليمه:مسوين غدا !
ناظرتها انهار:مسوين
حليمه:اي زين جيت ما تغديت بس وين بهاج؟
أنهار:عنده شغل بيخلص ويجي
حليمه هزت راسها تلعب سعود
-
بهاج دق باب الحمام:فهد ياحمار اطلع
طلع فهد وناظره:من فتح لك ؟
بهاج:ريوف فتحت لي عبالك تطلق بتموت بدري تدلع ريوف
فهد:اسألك بالله دلع ؟ صرخت بإذني بهاج اي دلع
لف بهاج من صرخت ريوف وخرج لها:ريوف
ريوف:بهاج يجيني ألم ويروح اففف
بهاج:بنوديك الحين خلاص لاتصرخين
لفت من ناظرت فهد:انت اذلف كله منك الان تطلقني تفهم
فهد:طيب ابشري بس روحي اولدي خلصيني
بهاج اخذ الشنطه الصغيره وخرج مع ريوف وركبت قدام وفهد ورا يسمعها تتألم
بهاج لف لها:نزلت موية الجنين ؟
ريوف:لا بس ألم ألم
بهاج اخذ نفس بهدوء:سهالات ريوف لا تشيلين هم
ريوف لفت عليه:بهاج اذا ولدت ابغى سياره لا يدخل علي بدون سياره
فهد:انتي فيك حيل تطلبين سياره ؟ اذكري الله بينك وبين الموت شعره
لف بهاج بحده:ولد
ريوف لفت بخوف:بهاج !
بهاج:حمار ماتعرف تسولف
فهد:وانا صادق اللي تولد ترجع من الموت
بكت ريوف بخوف ولف بهاج يبي يضربه وابتعد فهد وضحك:ريف قلبي امزح معك ابشري بجيب لك سياره بس وانتي تولدين ادعي لي دعاء الولاده مستجاب
بهاج:متعلم كل شي الا انك ترافق مع زوجتك بولادتها
فهد:لا تكفى انا يجيني هبوط من هذي المواقف
بهاج وقف عند المستشفى ودخلوا سوا مع ريوف وناظرها بهاج:برجع البيت انا اذا دخلوها تولد اتصل علي
فهد همس:لا تخليني معها
بهاج:اعقل اعقل شوي وتصير أب
فهد:سمّ
خرج بهاج ولف فهد لريوف:ليش واقف ؟ روح اشتري لي سياره استناك ما بولد لين تجي
فهد:ريف قلبي اجيب لك سياره بس اولدي
ريوف:ريف قلبي وريف قلبي بعد ما خليتني اتألم واسـ
صرخت من تألمت وعقد حاجبينه فهد:وش اسوي وش اسوي
ريوف رجعت تصرخ لين نزلت موية الجنين وناظرها فهد وطاح مغشي عليه ورفعت صوتها ريوف:الله ياخذك ياشليويح
دخلت ممرضه وناظرت فهد واشرت لها ريوف:حطوه بالسرير اللي جنبي
رجعت تصرخ بألم تشوفهم يحاولون يفيقون فهد
-
دخل وناظرها واقفه ولابسه فستان ابيض وابتسم
نورا:غمض عيونك
ضحك سلطان يغمض عيونه:وش المناسبه ؟
نورا مسكت ذراعه تمشي معاه:لا تفتح سلطان ياويلك
سلطان:مغمض والله
دخلته الغرفه ووقفت جنبه:فتح
فتح وناظر الحفله اللي مسويتها بالغرفه وضحك:وش المناسبه ؟
تقدمت توقف عند السرير ومشى لها سلطان:اذا عيد ميلادي فماني حاسب له مدري متـ
سكت من ناظر لبس البيبي اللي على السرير وعقد حاجبينه
عضت شفتها نورا تمد تحليل الحمل واخذه سلطان وناظرها بصدمه:احلفي
نورا ضحكت:والله
سلطان جلس على السرير:نورا لا تمزحين قولي والله
نورا:والله والله حامل
ابتسم سلطان ورجع يوقف يحضنها وضحكت وغمض عيونه:حمدلله اخيراً
ضحكت نورا وعضت شفتها:ماعلمت احد انت اول واحد
ناظر يدينها اللي ترجف ومسكها بقوه:والله اعيشك انتي وعيالك ملوك
ضحكت نورا وناظرها سلطان:وش تشتهين ؟ تبين تطلعين ! تبين اطبخ لك ؟ وش تبين اسوي قولي لي
نورا ضحكت:بتدلعني؟
سلطان:عيوني لك اقسم بالله مو مصدق كنت اشوف بهاج معه سعود وفهد معه رفيف وأبي أبي اصير بابا
نورا ابتسمت:ان شاء الله ، بنروح لريوف ؟
سلطان:جيت اخذك
نورا:بعلمهم هناك
سلطان هز راسه وخرجت معاه لين وصلوا لبيت عمر ونزلوا يسمعون صوت بكاء الرضيعه رفيف
وابتسم عمر من دخلوا:ياهلا
سلطان:ماشاء الله مبروك
فهد ابتسم وهو شايل رفيف:تعال شوف قاعده تصيح
سلطان:اكيد تصيح طيب وش الابتكار والا عشانها بنتك؟
فهد:والله احلى بنت
عمر:وين بهاج ؟
نورا:سيارتهم ورانا كانت اكيد جايين
دخلت أنهار وهي شايله ورد وبهاج خلفها شايل سعود وملبسينه ثوب
وضحك عمر:حيّ الشيخ سعود
ابتسم بهاج يسلم عليه وجلست أنهار عند ريوف:تعبانه ؟
ريوف:اذا حملت مره ثانيه هاوشوني
ضحكت نورا:لا تخوفوني باقي ماجربت
عمر:ان شاء الله الله يرزقكم
سلطان ابتسم وضحكت نورا بربكه:احسبوا من الان لـ ٩ شهور
سكتوا ولفت ريوف عليها:ياويلك
ضحكت أنهار:احلفي نورا
غطت وجهها نورا وصرخت أنهار توقف تحضنها ولف بهاج لسلطان:والله صادقه ؟
سلطان:اي والله
عمر:ماشاء الله كل ٩ شهور يجينا طفل ؟
ضحك بهاج:الله يقومها بالسلامه ان شاء الله
سلطان:بنجيب هالمره خوي لسعود
فهد:مسكينه بنتي يبي لنا نجيب لها اخت
ريوف:نعم ؟ ما اسمع اخ شليويح
فهد:ولاشي اقول ياحلو رفيف
ريوف:دايخ ابتلشوا فيه بولادتي
عمر ضحك ولف لسعود اللي جلس بحضنه
بهاج:حمار اقوله ادخل مع ريوف يقول مافقت ومنسدح بسرير ريوف
ضحكت أنهار:حرام متوتر طيب
ريوف:انا الحامل هو شدخله
سلطان:بس بالله كيف مشاعرك وانت اب ؟ ما بنسأل بهاج من يومه أبو سعود
ابتسم فهد:شعور غريب ياخي تخيل هذي بنتي شايله اسمي وبتناديني بابا
ريوف:لا بتناديك شليويح ما تستاهل تقولك بابا وانت دايخ بولادتها
ضحك فهد:والله لتحبني اكثر منك
لف بهاج لسعود اللي نزل رجوله بالارض وجلس بالارض وهو ماسك الكنبه
سكت بهاج يراقبه وابتسم من لف عليه سعود يحاول يوقف بتوازن
ولف سلطان:امش يا بطل
بعد يدينه سعود وهو يناظر بهاج ويحاول يروح له لين وقف على رجلينه ورافع يدينه وابتسم وسع مبسمه بهاج
وهمس عمر:ماشاء الله عليه
بهاج رفع كفينه:تعال
رفع قدمه وتعثر وطاح وضحك بهاج وابتسمت أنهار:مستعجل الا يبغى يمشي
ضحك بهاج يشيله من الارض ويجلسه بحضنه
-
ببيت بهاج بالرياض وبعد مرور زمن
لفت بعيونها تناظرهم يلعبون بالرمل ولفت للجهه الثانيه تشوف سعود على الدراجه وبهاج يدفعه وابتسمت تشوف فهد يصور سعود ويصرخ يعزز له:سعود طاره
ضحك بهاج يفلت كفوفه وكمل يسوق سعود الدراجه لوحده ولفت من صفقت نورا:بطل دودي بطل
سلطان لف عليها وهو يشرب قهوه:ناديه سعود وش دودي
نورا:اوف سلطان خلينا ندلعه
سلطان لف ينادي:عزيز
اشر له يجي ومشى يجري وضحك سلطان يفتح ذراعينه ويجلسه بحضنه ويشربه من الفنجان شويه قهوه
لفت نورا:سلطان ! لا تعطيه مو كويس كافيين اشبك ؟
سلطان:عشان يصير فصيح وشاعر
نورا:بليز سلطان !
سلطان التفت من جلس بهاج بتعب:عزيز قم صب لعمك
ضحك بهاج وناظر عزيز اللي جالس يشرب من الفنجان وناظر نورا سلطان:ولدك عمره ٥ سنين ولين الحين ما يقلط عمامه !
نورا:كمان لولو شوفها بسريرها نايمه عمرها سنه المفروض قاعده تحط مناكير لريوف وأنهار
ركضت ريوف وهي شايله رفيف ووقفت:اسمعوا رفيف عندها اغنيه قولي مامي
رفيف ابتسمت تناظرهم ونزلتها ريوف بالارض وحطت يدينها على خصرها رفيف تغني اغنيه وتدور وناظرها فهد:اعقب ترقصين ؟ من علمك ؟
ريوف:مامي قولي لبابا اغنيه توينكل توينكل
رقصت رفيف قدام فهد ويوم خلصتها شالها بقوه يبوسها وضحكت وهي بحضنه
ابتسمت أنهار ولفت من شافت سعود جاي يركض وتقدم:ماما سيف اخذ لعبة شدن
ولفت تنادي:سيوفي
لف وهو يبكي ويأشر على اللعبه واشرت له:تعال مامي
بهاج لف:سيف ولد ، تعال
وقف ومشى لين عندهم يبكي وشالته:اش اللعبه اللي يبغاها ؟
سعود نطق كلمه انقليزي ولف من شاف سلطان يخزه وهمس:بابا
لف بهاج:خله سلطان
سلطان:قولها بالعربي اسمع
سعود لف لأنهار اللي سيف بحضنها:مامي كيف اقول ريد كار ؟
أنهار ضحكت ونطق بهاج:سياره حمرا
سعود لف لسلطان:سياره حمرا
سلطان:كفو ياعمي كفو
وقفت أنهار وهي شايله سيف ومشت لين العابهم ولف بهاج يناظر رفيف ترقص على الطاوله بشعرها وفهد وريوف يصفقون لها
بهاج:جيبوا لها اخت تلعب معها
ريوف:عندها شدن بنتك
بهاج لف لشدن:لا اخت تنفعها احسن
ريوف:رفيف مبسوطه شوف
صفقت لها ورجعت ترقص من جديد وضحك بهاج
وقفت نورا من بكت لولو وشالتها من سريرها تسوي لها رضاعه وجلست أنهار وبحضنها شدن باللعبه وسيف وتقدم سعود يجلس جنب بهاج
وابتسم بهاج يرفع ذراعه لسعود ويحضنه ولف سيف من شافهم:بابا
قام من حضن أنهار وجلس بين سعود وبهاج ونطق بهاج:ونعم
سلطان:لا عاد تشتري شي لسعود تبلشنا مع عزيز كل ماشاف شي قال ابي نفسه
بهاج:جب له ياخي ليه نحيس ؟
سلطان:التربيه زينه اربيه مو كل شي يشوفه يطوله
نورا لفت لعزيز:مامي اي حاجه تبغاه قول اي ود لايك واجيبه
سلطان:يعقب قول ابوي ما يقصر لكن انا رجال مابي العاب
عزيز:بابا تجيب لي نفس سعود دراجه ؟
سلطان:ولا يهمك اشتري لك مرسدس اذا ودك بعد
ضحك بهاج من طنازة سلطان ولف يشوف شدن اللي بفمها مصاصه وتلعب بلعبه بحضن أنهار وانحنى يبوس خدها وضحكت تضربه بالسياره وعقد حاجبينه وفلتت المصاصه تضحك ورجعت تكرر الحركه وعاد حركات وجهه بهاج عشان تضحك وابتسمت أنهار من ضحك شدن وتقدم بهاج يبوس شدن بقوه وابتعد:سارقه عطر امك ؟
ضحكت أنهار وناظرها بهاج:بنتي راعية مسك وعنبر من وهي صغيره
أنهار:بنت أنهار
مدت كف شدن له وناظر المناكير وضحك يبوس يد شدن
ناظر حديقة بيته اللي مليانه العاب ودراجات لسعود والجلسه كلها شبسات وبساكيت وسلطان بحضنه عزيز ويتكلم معه ونورا بحضنها لولو وريوف وفهد يغنون لرفيف اللي ترقص
وأول حب بحياته وأجمل نصيبه وأغلى وأثمن أمنياته ، زوجته أم سعود بجانبه وبحضنها شدن وبجانبها سعود وسيف ماسكين ايباد واحد يتفرجون كان الجو مزعج بالأصوات والألعاب وبكاء الاطفال وسواليفهم مع بعض وهذا كان حلم من أحلام بهاج وقدر يحققه وعاشه ومبسوط
مبتسم يناظرهم جميع ويرسم صورة المستقبل يكبرون وتكبر الجمعه اكثر
لفت أنهار بهدوء:بهاج ياحبيبي
التفت عليها وتقدم لها:ابوي !
أنهار:امك دقت عليك وجوالك داخل اذا دخلت شيك عليه
بهاج:اكيد تبي العيال بكره امرها العصر معهم ان شاء الله
أنهار:اش سويت براعي المزرعه ؟
بهاج حط كفه على راس سعود اللي بجانبه:كلمته وعطيته سعر وقلت شاور عيالك ورد لي وماكلمني للحين
أنهار:تتوقع يبيعها ؟
بهاج:خسران لو رفض السعر ما يسوى عليها حتى لكني ابيها وميت عليها عشان ابوي بس
أنهار ناظرته مصرّ وهزت راسها:ان شاء الله يوافق
بهاج لف من تقدمت الخدامه تاخذ شدن من حضن أنهار ورفعت شعرها أنهار بتعب ودبلتها بأصبعها ماشالتها وابتسم بهاج من لمح اصبعها
لفت لسيف:سيوفي مامي خلاص ايباد شوف رفيف وعزيز هناك يلعبون روح معاهم
سيوفي:نو
أنهار:دودي قفل الايباد وروح العب مع عزيز هناك
سعود قفل الايباد ومشى يركض ولف سيوفي لأنهار يتعلق برقبتها
وناظره بهاج:وش هالدلع ؟ لا انت الكبير ولا الصغير على من كل هالدلع ؟
أنهار ابتسمت تبوس خده وحضنها سيف بيدينه
بهاج:سيف مين تحب اكثر ماما والا بابا ؟
سيف:مامي
بهاج عض شفته:افا
ضحكت أنهار تحضن سيف:عيون المامي عيوني
بهاج:خل اشوفك تطلب لعبه ما ادفع ريال
أنهار:لا بهاج ، سيوفي مامي قول سوري لبابا
ابتسم سيف يتقدم ويبوس خد بهاج وضحك بهاج يحضنه وناظره سيف:اي لوف يو بابا
بهاج:تسلك لي !
ضحكت أنهار وابتسم بهاج يبوس سيف
فهد:تحدي
لف بهاج عليه ونطق سلطان:على ايش ؟
فهد مسك رفيف:بنتي رفيف اللي يفوز ياخذها
ضحك بهاج ولفت ريوف تضربه وضحكت رفيف
فهد:لا صادق تحدي واللي يفوز بهاج يعطيه سياره
بهاج؛تعقب
سلطان ضحك:التحدي على كل شي المهم مو فلوس
فهد:مطفر شريت للمعزبه شنطه بعيد ميلادها والحين الديانه يطلبوني
ضحكت ريوف ورفعت الشنطه؛استاهل
نورا؛خياال اللون ريوف خيال ماشاء الله
ريوف لفت لأنهار:زوجك جاب لك كل شي الا شنطتي الايرميز
ضحكت أنهار:ما ابغاها حياتي عليك بالعافيه
فهد:تحدي
بهاج؛ياليل
سلطان؛علق
فهد:المسبح ذا اللي يطب ويفوز روحه ورجعه المركز الثالث يدفع خمس الاف
بهاج:والله ؟
سلطان؛خلك قدها
فهد؛والله
بهاج وقف وناظرته أنهار؛ملابسك بهاج؟
نزل جواله ومفتاحه سلطان ورمى تيشيرته ينط ولحقه بهاج بسرعه ولحقهم فهد وضحكوا البنات
وقفت ريوف تصورهم وصرخوا الاطفال يشجعونهم ووقفت أنهار ونورا جنبها شايله لولو
اخذ المركز الاول سلطان وبعده بهاج وفهد الاخير ويوم شافهم وصلوا مثل انه غرقان
ضحك بهاج يرفع شعره؛ماتغرق ياحمار طلع الخمسه
سلطان؛يموت بس ما يدفع
ريوف؛تكفون الحين يبيع شنطتي
بهاج لف؛ادعي ما يبيع رفيف بس
ضحك سلطان يطلعه من المسبح وضحك فهد:بس كيف الفعاليه بالله ؟
ضحك بهاج يطلع من المسبح وصرخ سعود يصفق له وابتسم من شاف سيف يصفق معه ولف لفهد؛فايدة الورعان الكثيرين يصفقون لي وانا المركز الثاني
سلطان؛حتى عزيز يصفق لك هذا ان قالوا لك الأب الروحي
ضحك بهاج وخرجت أنهار بالمناشف ومدت منشفه لبهاج اللي دخل البيت يضحك وعطت فهد وسلطان
ولفت نورا من دق الباب ولفت لأنهار:أنهار الباب يدق
مشت أنهار وفتحته ودخل عمر وابتسمت:هلا بابا
عمر:صاحين الصغار؟
أنهار ابتسمت:تعال ادخل
دخل ومعاه اكياس وضحكت:دايماً كذا ؟
عمر دخل وناظر الصغار ووقفوا يسلمون عليه وناظرتهم ريوف بحده ورفعت حاجبها:اش يعني بس الصغار لهم هدايا وشبس ؟
عمر:عطيت بنتك
ريوف:وانا ؟
عمر هز راسه ولف فهد وهو ينشف شعره:حاسده بنتك ؟ انتي أم ؟
ريوف:شوف جايب لها الشيبس اللي احبه ، بنت رفيف عطيني معاك
هزت راسها بالنفي رفيف وانحنى يبوسها عمر وباسته رفيف
ورفعت حاجبها ريوف:ليش تبوسين بابتي
مشى فهد ووقف جنبها يضحك وناظرتها رفيف:انتي كمان تبوسين بابتـ
وغطى فمها بسرعه فهد يسحبها من حضن عمر وضحكت أنهار:تعرف ترد وتعطيك ميوت
ريوف ضحكت بإحراج:كلبه
نورا ضحكت تعض شفتها وجلس عمر يناظر لولو بحضن نورا:نزلت حرارتها ؟
نورا:ايوا امس سلطان بالليل جاب لها فيفادول عطيتها ونزلت اليوم احسن حمدلله
عمر رفع يده يلمس جبين لولو وهز راسه:حمدلله
تقدم سعود يركض:جدي شوف صرت اعرف اركب الدراجه
عزيز:جدي سعود عنده دراجه انا ماعندي
عمر:اجيب لك انا ولا يهمك
نورا:لا بابا سلطان بيجيب له
عمر:قولي له لا يجيب شريتها خلاص
ضحكت نورا:بابا !
خرج بهاج ولفت أنهار:وصل العشاء ؟
بهاج ناظر جواله:كلمي آني تخرج تجيبه تدخله
وقفت أنهار ومشى سيف يلحقها ودخلت ترتب الطاوله وتسمع سيف يناديها يبغاها تشيله
شالته ولفت لبهاج اللي شايل صحن كبير وحطه بنص الطاوله والخدامه حطت باقي الصحون الصغار
وكشف عن صحن اللحم وابتسم:ايباه
ضحكت وهي شايله سيف وابتسم بهاج يخرج لهم:حياكم على العشاء
دخلوا يجلسون على الطاوله وجلست أنهار وهي تحط شدن بكرسيها وتأكلها
بهاج:امي كانت بتجي بس معزومه عند زوجة ابراهيم
عمر هز راسه وهو ياكل وناظر أنهار:أنهار كلي اول وبعدين عطيها
أنهار:بتزعجني ما بتخليني
بهاج:لقمه انا ولقمه انتي
ضحكت ولفت نورا:عطيها الخدامه
أنهار:تاكل
ريوف ناظرت رفيف اللي جالسه على الطاوله:الكراسي صنعناها عشان كل الاطفال يجلسون عليها الا رفيف
رفيف:مامي ( اي كانت سي )
ريوف جلستها بحضنها وهي تبعد شعرها:انا اعطيك مو لازم تشوفين
لفت أنهار لسعود جنبها ياكل وتقدمت:سيوفي مامي اعطيك عصير ؟
سيف هز راسه وصبت له تمد له الكاس
وقفت وهي تشيل شدن وتودع نورا اللي شايله لولو وعزيز يمشي مع سلطان طالعين
ابتسمت نورا لأنهار:اذا بتودون دودي يلعب بأي وقت كلميني يصير ارسل عزيز لانه يجلس طفشان بالبيت
هزت راسها أنهار وسلموا على بعض وخرجت نورا مع سلطان
لف سلطان لنورا يفتح لها الباب وناظره بهاج:لقيته اتصل علي بعد العشاء الحين بشوف وش يقول
سلطان:دام دق يعني يبي يبيع
بهاج:والله مدري عنه
سلطان:ان كلمته طمني
بهاج:ان شاء الله
سلطان:عزيز مشينا
مشى عزيز يركض وابتسم بهاج ينزل لمستواه ويسلم عليه
عزيز:عمي اذا سعود وسيف بيطلعون يلعبون بجي معاهم
بهاج:على خشمي
عزيز ركب وقفل الباب بهاج وراهم ودخل
ووقف بالحوش يدق على صاحب المزرعه
لفت أنهار تناظره يكلم:يكلم بهاج بالحوش
فهد:اجل بروح انا خلاص دامه مشغول
ريوف:تعال شيل رفيف
فهد انحنى يشيل رفيف اللي نايمه وتقدمت ريوف تبوس راس عمر:لا تخاف بابا بكره بنجيك انا وفهد
عمر:انتم كل يوم تجوني اصلاً
ضحكت أنهار ومشت ريوف تخرج مع فهد ووقف عمر:تبين شي ؟
ابتسمت أنهار وهي تهز شدن بحضنها:سلامتك
عمر:سلام
خرج من البيت وطلت أنهار:دودي
التفت سعود وهو يلعب بالدراجه:تعال يالله ناخذ شاور عشان ننام
ركض ووقف سيف يلحقه ودخل سعود يركض لفوق
مسكت كف سيف يطلع الدرج معاها ودخلت غرفة شدن وحطتها بسريرها
ودخلت غرفة سيف وغيرت ملابسه:بكره بنروح عند جده حليمه ان شاء الله
كشر سيف وضحكت أنهار:ليش ؟
سيف:تعطيني اكل ما احُبُه
ضحكت أنهار تقلده:ماتحوبه طيب أنا أحوبك
انسدح سيف وباسته أنهار:غمض عيونك وقول بسم الله
غطته ومشت تخرج من غرفته وتدخل لسعود اللي دخل الحمام:دودي
ناظرته يلعب بالمويه:قلت لك لا تفتح المويه لين اجيك
سعود:اعرف اعرف والله
تقدمت تحط له صابون وشامبوا وغطته بمنشفه وخرج للغرفه
مشت تطلع له ملابس وتلبسه
سعود:ماما
أنهار لفت وهي تجمع ملابسه من الارض:عيوني
سعود:أحبك
ابتسمت له لانه ينطقها زي نطق بهاج ولفت تمشي له وتبوسه:وأنا كمان
سعود دخل بسريره:تصبحين على خير
أنهار ابتسمت وقفلت باب غرفته ومشت بتعب تلم الالعاب اللي بالارض وغيرت ملابسها تلبس قميص نومها وخرجت للبلكونه تشوف بهاج يكلم
بهاج:ان شاء الله ماقصرت أبو بدر ، اللهم امين ، تصبح على خير سلام عليكم
قفل جواله وابتسم من لمحها بالبلكونه ورفع صوته:بيبيع
أنهار ابتسمت:والله ؟
هز راسه بهاج وهو يدخل البيت طلع ومشى لها بالبلكونه ولفت عله
أنهار:ومتى بتروح له ؟
بهاج تقدم يحاوط كتوفها:بشوف اذا بكره امداني بعد ما ارجع من عند امي او بعده ، بس بنشغل بالمزرعه ذي الله يعين برممها زين ويبي لي اعدل حوض النياق
لف لها يشرح لها بكفه:بخلي الحوض اسطبل خيول وبزاويه ثانيه يحط ملعب كرة سره وتصير المزرعه لنا كل ماجات اجازه رحنا لها
ابتسمت أنهار:ان شاء الله
بهاج:ناموا الصغار ؟
أنهار:ناموا
بهاج:بشوفهم واجيك
وقفت عند باب غرفتهم وناظرته يفتح غرفة سعود ويدخل وتعرف انه يغطيه ويبوسه ويخرج ويدخل لسيف يغطيه ويبوسه ويدخل لشدن ويبوسها ويغطيها وهو كل يوم ما يبطل عادته هذي
ابتسمت من قفل غرفة شدن:باقي بوستي انا
ضحك يتقدم لها ورفعت ذراعينها لرقبته وتقدم يبوسها ويرجعها للخلف
دخلت الغرفه وقفل الباب بهاج وهو يبتعد عنها ورجع يبوسها لين استراحت تجلس على السرير ووقف قدامها يمسك وجهها بيدينه يناظرها جالسه قدامه
كانت بقُبله واحده منها ترممه من جديد وتحييه ، قبلاتها ما تنتهي ورغبته دائماً تزيد لقبلاتها
انحنى يبوس عنقها ويشم ريحة عطرها ، عطرها اللي يذهب العقل كما الخمر ، نعومة جسدها ولمسات كفوفها وكيف تحتويه بكل مره يجيها وبكل نهاية يوم ووسط هدوء البيت عقب الضوضاء يستريح هو بحضنها
انسدح وهو يحضنها وناظرته تلعب بشعره مرت فيها سنين معاه قضتها كل ليله كأنها اول ليله بينهم نفس اللهفه والحب والشعور ، كل مازاد فرد بعائلتهم كان يزيد الحب ما يقل ، سعود وسيف وشدن هم ورود حبهم وهي طول وجودها معاه كانت تسقي حبهم واليوم عندها من بهاج أحلى ورود وهي تعرف انهم بيكبرون وبتمر سنين أكثر لكن العمر مع بهاج ماهو خساره العمر معاه ربح تربح الضحكات والحنيه وصوره ببرواز يتعلق بصالتهم
غمضت عيونها تستريح معاه وكأن السنين مروا بلمح البصر وصحت على صوت سعود:عزيز
لفت تناظرهم يلعبون سَله قدام عيونها وابتسمت تشوف طولهم وضحكهم ولعبهم سعود وعزيز وسيف وولد فهد محسن
التفتت تسمع اللي تناديها:ماما اصب لك كرك ؟
هزت راسها وتقدمت وهي تغطي نفسها بوشاحها وتجلس جنب شدن اللي تضحك:انا حاولت ببابا كثير لين ماما اقنعته واخيراً
نورا:بتخلينها تروح أنهار؟
تنهدت أنهار:اش اسوي ؟
رفيف:بليز خاله أنهار اقنعي بابا كمان والله بخاطري مره
أنهار:ريوف كلميه ، ما بيطولون اربع ايام وقريب منا هنا بالبحرين ينبسطون
ريوف ناظرت رفيف اللي ابتسمت:بليز اقنعيه
ريوف:طيب
رفيف ضحكت ولفت لولو تناظر اللي يلعبون سله وابتسمت تتأمله يلعب بحماس ولابس تيشيرت وشورت ويضحك مع عزيز وسيف ومحسن
وصدت من نادتها نورا:لولو
ناظرتها:هلا
نورا:شوفي اختك اش تسوي ارسلتها تجيب جوالي
لولو:اوكيه
وقفت تدخل وهي تنادي:دانه
فتحت المطبخ تشوفها تاكل:ماما تدور عليك ، وي اش قاعده تسوين
دانه:باكل واجي او خذي جوالها عطيها
لولو تقدمت تاخذ الجوال من دانه اللي تاكل وخرجت من المطبخ ووقفت من شافته يدخل يضحك ولف من شافها وابتسم
ابتسمت تشد على جوال نورا بيدها وتقدم سعود لها لين دخل عزيز:ولد سعود
مشت لولو بتخرج ولف عزيز:لولو قولي لامي عزيز بيطلع
لولو:قول لها انت والا عشان تهاوشني انا
عزيز رفع ذراعه بيحضنها وكشرت:معرق بعد عني
عزيز:تكفين لولو والله أردها لك
لولو:تبغى تكلمها شوفها هناك جالسه لا تدخلني
خرجت ودخل سعود الغرفه ياخذ منشفته وناظره عزيز:بيسافرون دريت
سعود:اي قالت لي شدن
عزيز:ابوي يدوخ ان طلبته لولو شي لكن انا تقوم القيامه لو قلت بروح الشرقيه ليله
سعود ابتسم وناظره عزيز:شفيك تتبوسم !
ناظره سعود ودخل الحمام
-
بهاج لف لحليمه:اقول سعود سعود تخرج من الطب صار دكتور
حليمه تقدمت:هاه !
بهاج:سعود صار دكتور
سلطان:بالله ما بقي له سنه يابهاج ؟ اذكر باقي سنه
بهاج لف:لا والله حمدلله اخذ السبع سنوات كامله
فهد:ماشاء الله عليه سعود حيّ
بهاج:وسيف حيّ والله لكنه يبي القانون اشغله هالقانون
سلطان:زين ان عندهم طموح اعرف لك واحد دخلناه بفلوس
بهاج:انت شاد على عزيز لو تخليه على راحته سلك
سلطان:مدلع ياشيخ يبي الدشره وبس
فهد:وش تقول عن محسن تخرج من المتوسط بعد ما طلع روح ريوف
لف من دخلت شدن:بابا امي تقول تعالوا هناك بالجلسه
هز راسه بهاج يقوم وانحنى يعطي حليمه عصاتها ومشى معها يقودها للجلسه
ابتسم بهاج يشوف الكيكه بالنص والبنات متجمعين ووقف:وين صاحب الحفله ؟
أنهار:دودي
بهاج:وش دودي ؟ متخرج كبر البغل تنادينه دودي !
ضحكت أنهار:دودي بعيني لو صار عمره ٤٠
ابتسم بهاج من خرج سعود ووراه عزيز وابتسم بإحراج من اشتغلت الاغاني وصفقوا له وولعوا الشموع
تقدم لبهاج وحضنه بهاج وضحك سعود وتقدم لأنهار اللي باسته وحضنته:مبروك يا أمي
سعود ناظر الكيكه:الله يبارك فيك
شدن:بصوركم دقيقه
وقفوا أنهار وبهاج بجانب سعود اللي رفع ذراعينه وابتسم للكاميرا وابتسمت شدن تصورهم
ودخل وجهه عزيز وضحكت تناظر الصوره ورفعت نظرها شدن له من ابتعد يضحك وصدت عنه تخفي ابتسامتها
أنهار لفت لسيف وحضنته بجانبها وتجمعوا يقطعون الكيكه
عمر ابتسم وهو جالس:عقبال تفرحون به عريس
بهاج ابتسم:الله كريم
أنهار:ان شاء الله وعروسته عليّ
ابتسم بتوتر سعود والتفت يناظر لولو اللي تناظره من بعيد
وجلست أنهار بجانب عمر وحضنت كفه اللي تجعد من سِنّه وحطت راسها على كتفه تشوف بهاج واقف جنب سعود وسيف اللي صاروا بطوله وبجانبه ولشدن اللي حاطها تحت ذراعه يبوس راسها وضحكت من فهد وريوف اللي جلسوا بجانب بعض ورفيف تحاول بفهد من جديد والتفتت لسعود اللي مبتسم يطالع بمكان آخر ولفت تشوف لولو اللي جالسه بين البنات ومبتسمه له
وابتسمت تلف لبهاج اللي ناظرها يدورها ونطق:يالشيخه أم سعود
اتسع مبسمها ورفع كفه:تعالي قهويني ما تزين الا من يدينك
سلطان:عسى القهوه مو من يدين نورا
نورا ضحكت:لا ما سويت قهوه من اخر مره ذقتها ابشرك
ضحك سلطان ووقفت أنهار تصب له فنجان قهوه وجلست شدن بجانب بهاج وجلسوا جميعهم بالجلسه ياكلون
فهد:وش مخططين لعيد الأضحى ان شاء الله؟
سلطان:هنا بالمزرعه شرايك يا أبو سعود ؟
بهاج هز راسه وهو يشرب قهوته:ان شاء الله ونذبح الذبيحه هنا يعاونوني العيال
عزيز:ابلش عمي طلعني منها تكفى
سلطان:اعقب !
عزيز:والله ما اعرف
سلطان:تعلم
عزيز:سمّ
لف سلطان لفهد:رباتك طالع عليك
فهد:احسن العيال عزيز دامه رباتي
ضحك عزيز ولف لشدن اللي جالسه جنب بهاج وابتسم يناظرها
شدن:بابا بنركب خيول انا والبنات
بهاج:روحوا بس لا تتعورون
أنهار:امي سعود روحوا معهم لا يتعورون
سعود لف لشدن اللي غمزت له وضحك يضرب راسها ومسكت ذراعه:عشان اللولو
سعود:اسكتي لا يسمعك ابوي ياويلك
شدن ضحكت تمشي معاه للخيول وتقدمت أنهار تجلس بجانب بهاج وابتسمت:لمحت ؟
ضحك بهاج وهز راسه:لمحت ، بس انتظره يجي وينطق
أنهار:تلقاه خجلان يتكلم بس بقعد معه الليله واشوف وده بلولو صادق والا لا
بهاج هز راسه وابتسم يناظر فنجانه وحضنت كفه أنهار بحب
ولف لها يناظرها بنظراته كله إمتنان وكله طمأنينه ان سنينه تركض به وكف أنهار بكفه وابتسمت تشوف نظراته وتدري بمشاعره وهمست:أحُبَك
ضحك بهدوء ورفع ذراعه ورا ظهرها ولفت تسمع سوالفهم كانت ليله ما تتمنى يطلع فجرها من حنيّة القعده والأشخاص
-
ولكنها ليله وإنتهت ماهي الا بدايه لقصه جديده بمكان وزمان آخر ، قصة بنت الحجاز وولد نجد اللي جمع بين كفينه الحنيّه وعطاها لها بدون قلق وخوف وحطها بوجهه وخباها ورا ظهره عن الظروف وطوال الأشناب واللّحى اللي كانت له ربيع بوسط غبار الصيف وقيظ شمسه اللي عاش معها العيد بكل يوم ودموع عيونهم شهود على قوة حبهم ، يرجع كل مره لحضنها عودة الطفل لحضن أمه يغرق بعطرها من جديد ولا يملّ من عطرها ، تحط براسها على مَتنه ويحس ان الحياه ترجع تبتدي من جديد من يوم شافها وبدأ قصة غرامه معها ، عزوته وذراه وراس ماله وزوجته وأم عياله اللي عطته أحلى السنين بدون مِنّه اللي سدت مكان أبوه بقلبه وعطته اللي يحتاجه بدون ما تتكلف ، أنهار بنت الحجاز النرجسيه اللي استوطنت قلب بهاج بن سعود وبهاج بن سعود راعي وهاوي قلب أنهار .
-
النهايه ♡
١٨ - فبراير - ٢٠٢٣