انثنى غيم نجد لخد الحجاز النرجسيه

٦١

جالسه قدامه تناظر الممرضه عنده والدكتور ولفت لريوف اللي دق جوالها وهمست:اكيد شليويح
اخذت جوالها وخرجت برا وردت:خير ؟
فهد:انتي ماخذه سيارتي ؟
ريوف:ايوا
فهد:تعانديني انتي تعانديني تبين اكسر راسك اليابس هذا ؟ وشو هذا يعني عقاب لي عشان كسرت راس ابن كلب تعرض لك ؟ متى تفهمين انتي متى تستوعبين وتبطلين عناد ؟
عقدت حاجبينها وهي تسمعه يهاوش:ريلاكس شليويح
فهد:شليويح بيرمي نفسه ويفتك من راسك اليابس
ريوف:اوف لو تسكت شوي تفهم سلطان ياخي تكهرب علينا ووديته
فهد جمد وجهه:هاه !
ريوف:ايوا انت لازم الواحد يلخمك عشان تستوعب
فهد:علامه سلطان ؟وينه ؟
ريوف:بالمستشفى كان يصلح سخانة المطبخ وتكهرب
فهد:شصار عليه طيب ؟
ريوف:طيب طيب بس جبناه نشوف وضعه
فهد:بجيكم طيب
ريوف:لا تجي خلاص راجعين
فهد:بتسوقين انتي ؟ اهد فيك ؟
ريوف:اوف شلويح خلاص عاد سقت اش المشكله ؟
فهد:لا ترجعون انا بجي اخذكم
ريوف:هذا اذا عرفت فين احنا اصلاً
قفلت منه ودخلت تاركته يغلي محله يموت من قهره ومن عنادها
ناظرت سلطان اللي جالس:كيف صرت ؟
هز راسه سلطان:حمدلله
ريوف:نرجع البيت ؟ قبل شليويح يهد فينا
سلطان وقف ووقفت نورا تناظره وهمست ريوف:اساعدك ؟
سلطان:لا لا طيب انا امشي انا بسوق
ريوف:لا عناد بس بشليويح انا بسوق
سلطان:ياخي بيمتحنك بعمرك
ريوف:ماعليك نتفاهم
سلطان لف لنورا اللي تمشي وراهم بهدوء:علامك؟
نورا رفعت كتفها:امشي معاكم
سلطان مارد ولف قدامه يمشي وركب جنب ريوف وابتسمت ريوف وهي تسوق:من زمان ماسقت
سلطان:لا تدخلينا بتريله واللي يرحم والديك توني خارج من الموت
ضحكت ريوف:راح تتمنى انك مت متكهرب
نورا عقدت حاجبينها:شهالسواليف ؟
التفت سلطان عليها وتوترت من التفت وناظرت ريوف:كلمتك أنهار ؟
ريوف:لا ولا صورت شي غريب مره
التفت سلطان للطريق:شهر العسل حقهم ماهم فاضين يصورون لكم
ناظرته بحده نورا ولفت ريوف عليه:صح ما اتخيل بس ماراح ادخل
سلطان:على اساس بياخذون بكلامكم أنهار وبهاج ؟ انهار وبهاج من زمان وهم يبون بعض زين ماعرفتوا من بطن أنهار
همست نورا:تو ماتش !
سلطان مارد عليها ولفت ريوف للطريق ووقفت تنزل ريوف وهمست:ياليل اكيد فهد موجود
فتحت نورا بابها وناظرتها بينزل وهمست:اساعدك؟
هز راسه بالنفي ونزل:مافيني شي
دخلوا الشقه وجلست نورا على الكنب بتعب ولفت تناظر فهد وريوف اللي يتهاوشون واصابعها على فمها تفكر غرقت بتفكيرها من لحظة وصولها ولفت تناظر سلطان اللي جالس على الكنبه يناظر فهد وريوف وساهي
هي كل اللي تحسه ان لو كانت تملك مشاعر لسلطان فهي زائله ماهي ابديه كل ظنها ان انهار لجأت لبهاج بوقت ضعفها ولا ودها هي تلجأ لسلطان بوقت ضعف وحاجه هي ماودها تختار بلحظة ضعف
التفت بالوقت اللي كانت تناظره ومن شافته يناظرها ارتبكت هي فعلاً كانت ساهيه فيه وتفكر وصدت عنه وحك شاربه سلطان يصد لفهد اللي واقف
فهد:هذا هذا مفتاح لو تمسكينه قصيت يدك
ريوف:يالله بس مابقي الا ذكر يقص اصبع من اصابعي توكل
فهد:ريوف لا تعاندين
ريوف:سواقه وبسوق وسياره بتجيب لي غصب واذا ماجبتها انا اعرف اجيبها
قرب منها فهد:بكسر راسك
ريوف:بالله ؟ وبعدين جيب لي كرتون ايسكريم عشان تراضيني !
سلطان:لكم ساعه تتهاوشون ما طفشتم ؟ دوختونا كأنكم بزران
فهد:عقلها واسكت
ريوف:عاقله قبل اعرفك
سلطان:انت شعندك مكثر طلعات اصحاب واصحاب منين لك هالاصحاب ؟
ناظرته ريوف:جاوب استاذ شليويح خل نشوف شعندك
فهد:عيال معي بالدوام خرجت اتابع مباراه معهم
سلطان:عرفني عليهم اعرفك ماعندك ذوق
فهد:صادق والا ماكان اخترت ذي
اشر على ريوف اللي ابتسمت:ما اخترتني انجبرت علي لانك قليل عقل لو فاهم كان اخترتني بنفسك
نورا:اف ريوف خلاص منجد ترا اذيتونا
ريوف صدت تفتح جوالها وجلس فهد وشهقت ريوف ترفع راسها:شفتيهم ؟
نورا عقدت حاجبينها:مين ؟
ريوف:انهار وبهاج شفتيهم ؟
وقفت ريوف بسرعه تمشي لنورا ووقف فهد:وينهم ؟
تقدم سلطان لجنب نورا وتجمعوا على جوال ريوف يناظرون صورة بهاج وأنهار بالمرايه سوا
كان محاوط خصر أنهار وأنهار مبتسمه وهو مبتسم وحاطه فلتر أبوظبي
كانت لابسه فستان تحت عبايتها ويزين عنقها عقد بارز بالصوره بشكل واضح وبهاج لابس شماغه وثوبه اول مره يشوفونهم سوا
اول مره يشوفونهم لوحدهم ، ماكانوا يتخيلون وجودهم سوا لكن اليوم صورتهم منسجمه كانوا من شدة التناغم يشبهون بعض وفيهم لمحات من بعض السعاده واحده والحب واحد
ابتسم سلطان يناظر ردة فعل نورا اللي جنبه وكيف منذهله وهمس:ما تنلام أنهار يازين بهاج ويازين رباته
ضحك فهد يبعد راس ريوف براسه:العب يا ابو سعود اخذها شهر العسل ساحب على الشيبه وعياله
ريوف:كيوت صراحه
اخذت الجوال ريوف تجلس:شكل انهار خيال من فين لها العقد اللي لابسته ؟
رفعت كتفها نورا وهي ساكته وابتسم سلطان:من بهاج شريناه سوا هديه
لفت نورا عليه وكمل سلطان:نعرف الذوق محنا بدو
فهد:والله لعيب بهاج
ريوف ابتسمت:ولابسه دبله انتبهتي ؟ ياحياتي انهار احسها مبسوطه
لفت لنورا اللي ساكته وكملت:افف ما اعرف صراحه بس احس دامهم مبسوطين يارب محد يوقف بوجههم
اخذت جوالها نورا تفتحه وتشوف صورتهم من جوالها
ووقف سلطان يمشي للمطبخ وقفلت جوالها نورا وهي تسمع سوالف فهد وريوف ولفت من خرج سلطان وهو يشرب مويه
مشى لها وقرب وهو واقف يناظرها جالسه ونطق بهدوء:قومي معي
عقدت حاجبينها:وين ؟
سلطان ناظر فهد وريوف:نطلع برا
نورا رفعت حاجبينها بذهول:انا وانت ؟
هز راسه سلطان:بتقروشيني بسحب عليك
نورا:لا اوكيه اخرج بس فين
سلطان:مدري ، استناك تحت
مشى ولف فهد:وين رايح؟
سلطان:بنجيب اغراض وراجعين
لفت ريوف لنورا اللي وقفت ومشت الغرفه
خرج سلطان ولفت ريوف لفهد:اشبهم ؟
ضحك فهد:حمار سلطان ما يعرف يصرف عمره ، وش مقاضيه الحين ؟
ريوف قربت منه:يفضفض لك عن نورا ؟
فهد لف عليها:والله هو ما يفضفض بس مفضوح مدري كانه قايل شي لبهاج والا لا
ميلت شفايفها ريوف بتفكير وهمس فهد:انتي قالت لك شي نورا ؟
هزت راسها ريوف:ايوا تكلمت والله ما اعرف نورا كذا تعيش تناقض دايماً محد يفهمها ، يعني تتكلم عن سلطان بشي كويس بس ماودها تخطي خطوه معاه
فهد:تتوقعين يخطبها ؟ يسويها ؟
ريوف:حتى لو خطبها شايف الوضع انت كيف ؟ بهاج وأنهار ما سلموا من الوضع والهدوء هذا مو مريحني
فهد؛تتوقعين يخلونا بحالنا نحنا ؟
ريوف ناظرته:انت ودك ؟ انا احس ودك تفتك مني احس لو رَده همشنا راح تقعد تأشر له لين يفهم ويخلصك مني
فهد:شوفي هو العشره معك ثقيله صراحه
ريوف:اي باين وحاسه والشعور متبادل
فهد:بس لا ما اسويها
ابتسمت له ريوف:ماتقصر شليويح عزيز وغالي
فهد:ما افرط في دراستك تخرجي وبعدين نروح جميع لرَده
ريوف:طيب ليش نروح لرَده يعني احنا نحلها بشكل ودي كذا سوا مع بعض ونهاية دراستي بالتخرج تهديني كرتون ايسكريم جوكلت
فهد مد كفه يصافحها:والله عشرتك صعبه بس تراك سلسه بالتعامل
صافحته ريوف وابتسمت له ابتسامه كانت مختلفه عن الهزل اللي كانوا فيه كانت جديّه بابتسامتها له ونظرتها وهو لمس هالشي وتكلم بهدوء:بتبكين علي ؟ اوصي سلطان بايسكريم ؟
ريوف رجعت راسها للخلف وصدت عنه لقدام
:تتوقع جاينا شي اكثر ؟
فهد ناظرها واخذ نفس:الله العالم
ريوف لفت عليه:ما نقدر نلاقي السحر انا واياك ونفكه سوا ؟
فهد:اي لاني انا شيخ سابقاً بس تايب
ريوف:تايب ؟ قصدك صرت داشر
فهد:الله الله
ريوف جلست باعتدال ولفت له:لا منجد فهد شرايك نحلها انا وانت ؟ صح ما منا رجاء بس خل نصدمهم نفك سحر ابويه ونرجعه طيب
فهد:نتعامل مع منجم يعلمنا مكان السحر ؟ نكفر عشان نكشف الكافر ؟
ريوف:افف فهد ياخي نلاقي حل ليش لا ؟ مو صعبه انت ذكي وفطين وعندك سرعة بديهه تحلها
ابتسم فهد:يازينك يوم تمدحيني والله ان المدح منك غير
ريوف:لا المدح مني مو غير انت محد يمدحك غيري وكله تسليك
فهد:كملي جميلك ياخي
ريوف:فهد تكفى لا تستهبل خل نفكر سوا
فهد تنهد وصد وخرجت نورا وهي ماسكه شنطتها:ريوف تبغين حاجه ؟
ريوف:لا حياتي انجوي
رمت لها بوسه نورا وردتها ريوف لها وخرجت نورا
التفت فهد لها:شفتي ذي البوسه اللي بالهواء ؟
ريوف هزت راسها وكمل فهد:لو تجيني بالهواء منك بحفر مزرعة جدي لين اطلع سحور الجماعه كلها
ضحكت منه لانه ضحكها فعلاً وكان يطلبها ورجعت ظهرها على ذراع الكنبه ورفعت رجلينها على فخوذه
:طيب الحين لو انفصلنا ورجعت جده تصير صاحبي ؟ البستي حقي
فهد:افا عليك احلى صحباتك انا
ضحكت:شليويح !
ابتسم لها وناظر رجلينها عليه وسكت ثواني ونطق بعد مده:تروحون جده ؟
لف لها وناظرته يسألها بجديّه ورفعت كتفها
صد فهد لثواني ورفع رجلينها عنه وقام:نفتك منك يالله حمدلله
تركها يدخل الغرفه ورفعت راسها تستند على الكنبه بتفكير هي ماتعرف لو هذا الهدوء مستمر او لا
ماتعرف وش الجاي وليه فجأه الوضع استتب
'
أبوظبي - الساعه ٨:٠٠ ص
ابتسمت وهي مغمضه عيونها وتحس بيده تلعب بشعرها لمست صدره بكفها وفتحت عيونها كانت تدري انه صاحي وقاعد يلعب بشعرها ينتظرها تقوم لكن من حياها ماتحركت
ناظرها ترمش وهمس:صباح الخير
ابتسمت لانه يشوفها على صدره لكن هي ماتشوفه وابتسم لانها ساكته وابتعد يناظر وجهها:أنهار
ناظرته ومن ناظر وجهها ضحك:علامك ؟
صدت بوجهها عنه وتقدم يقوم وهو يضحك وتركها يدخل الحمام لفت تناظر محله وانسدحت على ظهرها تناظر السقف وابتسمت
بللت شفايفها تعضها بحيا ولفت تاخذ جوالها وناظرت الرسايل ودخلت تشوف كلام صديقاتها عن الصوره ورجعت تناظر صورتهم سوا وابتسمت
لفت تناظر فستانها على الكرسي وثوبه وشماغه جنبه
تذكرت وعده لها امس وكيف قال لها:بترجعين الرياض زوجتي تسكنين بيتي وتنامين بغرفتي وبحضني الكل يدري والكل يحترم قرارنا سوا ، ان ما شافوك تناسبيني اخذنا برايهم بعرض الحايط ، بيجينا سعود ونعيشه عيشه هنيّه
اخذت نفس وهي منسدحه تناظر فستانها وثوبه وساهيه لين خرج من الحمام منشفته على رقبته وابتسم لها
صدت تناظر جوالها تخفي ابتسامتها وتقدم ياخذ جواله ودخانه:قومي عشان نفطر
مشى تاركها ودخل البلكونه وابتسمت تناظره يجلس فيها وقامت دخلت الحمام وقفلت الباب وناظرت شكلها بالمرايه
رفعت شعرها وسحبت الفرشاه والمعجون وفرشت اسنانها وهي تناظر وجهها المنور وابتسامتها ولمعة عيونها تشوف اثار حبه على عنقها 
فتحت المويه وعلقت روبها واخذت شاور وكان ينتظرها وهو بالبلكونه يدخن وعينه على صورتهم سوا بسنابها
ابتسم يرفع راسه وهو يدخن كل ما تذكرها زادت ابتسامته
لف من طلعت لابسه روب الترويش ودخل وصدت عنه تفتح شنطتها:ما بتصدين عني كذا طول السفره اكيد صح !
ضحكت وهي صاده عنه ومسك ذراعها وهي جالسه ووقفها ووقفت قدامه تناظره وابتسمت
ابتسم لها يناظر ابتسامتها وشعرها المبلول:من زين المبسم تركت زيقارتي
ماردت عليه تصد بنظراتها للبلكونه اللي ترك فيها زيقارته مولعه ورجعت ناظرته يبتسم
وتكلم بهدوء:من وشو تهربين ؟ عني ؟
ماردت عليه ونقلت نظراتها لثوبه اللي يلبسه وفاتح ازاريره وعرف انها تخجل وزاد تبسمه
:الخجل باهله شكوك الا انت يقينه ، تخجلين مني ؟
كانت تحس بالضغط من اصراره عليها بالكلام لانها تستحي ولا تقدر تمد بالنظر لعيونه ابد وهذا اللي يدمره:ترفقي فيني يكفي ان الغنج والخجل منك مورّث وملموس
رفعت يدينها بتوتر تقفل ازارير ثوبه وتتجاهل نظراته ورفع كفوفه يلمس كفوفها اللي عليه:تكفين طالبك تكملين اللي بديناه وتقوليناها
رفعت نظرها له وتقدم لها:قوليها لي
همست بربكه:بهاج
بهاج:بهاج وابوه وديرته عليهم عوض ربي
رفعت نظرها له ومن ناظرته ابتسمت وابتسم ينتظرها تتكلم وناظرت عيونه ونظراته لها شافت الحب واللهفه شافت ان اللي يستحق يصير انها تفصح وتعبر عن مشاعرها الحقيقه فعلاً
هي تحبه ويزيد حبه يوم بعد يوم ، هي صارت ماتبي يفوتها لحظه بدون تستغلها معه هي تدري ان لو رجعوا بتفقد كل الحميميه اللي بينهم شدت على كفوفه وهي تعنيها فعلاً بثغر حجازي:أحُبَك
تفجر من صدره عشّ حمام وفراش يشك انه تطاير قدام ابصاره بعد ما نطقت بها
ظلت تناظر نظراته وهو ساكت وهمست:قول وأنا كمان
هز راسه يتأمل عيونها:عرشك هِنا
حط بكفوفها اللي بين كفوفه على صدره وكمل
:بين عرقين ووريد
ابتسمت له وقطع حبل افكارها من نطق:البسي بنطلع نفرّ المكان فرّ
نزلت كفوفها عن كفوفه وابتعدت ثواني:والله ؟
بهاج هز راسه:بسوي لك جدول ماجربتيه بسفراتك كلها
ابتسمت له وهز راسه:بس استعجلي
جلست على الكرسي تنشف شعرها:اوكيه
وتجهزت بسرعه ولبست اخذت شنطتها تخرج له بالبلكونه وابتسمت:جاهزه
وقف ياخذ جواله:مشينا
ركب سيارته وركبت جنبه وحرك ومد كفه لكفها وابتسمت تتقدم تشغل أغنيه بالسياره
حركت راسها تدندن بالاغنيه ورفعت جوالها تتصور وتصور شوارع أبوظبي وتتصور معاه
تجولت معاه كل الأماكن اللي تنحط برفوف ذكرياتهم كانت تستغل كل دقيقه وهي معاه من الاغاني اللي يشغلونها بسيارتهم ومن تجولهم ومن الصور اللي ياخذونها ذكرى ، كفها ما انزاح من كفه طول وقتهم
ناظر ساعته وهو يشوفها تتسوق ومدت اصبعها:عطري
ابتسم من شافه معروض وضحكت أنهار:نشتريه لك ؟ عشان طلع في احد يستخدمه معاي
بهاج:لا احبه فيك انتي
ضحكت وهي تمشي معاه:طيب اطلبك طلب وما تقول لا
بهاج:ما اردك
أنهار:تكفى بهاج خل اشتري لك طقم حلو تيشيرت وشـ
قاطعها وهو يهز راسه بالنفي:فكينا تكفين
أنهار تعلقت بيده:تكفى بهاج والله يطلع حلو عليك ما جربت كل حياتك بالثياب بس جرب والله يطلع حلو انا ذوقي حلو
بهاج:ذوقك حلو بس انا ما ارتاح الا بثوبي
أنهار:البسه هنا واذا رجعنا الرياض عادي ارميه بالزباله كمان راضيه
بهاج تنهد:يا أنهار ما ارتاح ما اعرف لها هالملابس
مسكت كفه تدخل المحل:نختار سوا تعال شوف
دخلت المحل وهي تناظر الملابس الرجاليه وتنقي منها واخذت تيشيرت تحطه على صدر بهاج
وتنقي له وهو واقف بالأكياس ينتظرها تختار ولا له نيّه ابد
تخيرت له قطع وهي تقرب منه تشوف مقاسه وابتسمت:بتطلع حلو
بهاج:ماني حلو ؟
ناظرت الملابس تنقي له:انت حبيبي كيف ماتكون حلو ؟
ابتسم من كلامها وتقدم لها:ليتنا لوحدنا
لفت عليه تناظره وضحكت تصد عنه وعض شفته يمشي خلفها:ماتقولين لي حبيبي لوحدنا !
أنهار ماردت وهي مبتسم وتنقي له وكمل بهاج
:بتقولينها لي اذا رجعنا ؟
لفت عليه تحط على صدره التيشريت:هذا حلو لونه عليك بناخذه
بهاج ناظره:خذي واحد كل هذولا لمن ؟
أنهار:بهاج حلوه عليك خذها تكفى
بهاج:لا واحد انا قلت لك ماني لابسها اصلاً
أنهار ناظرته وعقدت حاجبينها:بتلبسها
بهاج:على خشمي
ابتسمت تمشي قبله وحاسب عليهم وطلعوا
بهاج:يا أنهار بنرجع الفندق وراي موعد مع الرجال بالشركه ، تجين معي ؟
أنهار وهي تناظر المحلات:لا في صالون قريب من الفندق توديني ؟
لفت عليه وناظرها:صالون لوش؟
أنهار:بغير لون شعري واعدل اظافري لين تخلص
ناظر شعرها ورجع ناظرها:لا تلعبين بنفسك
ضحكت لانه فعلاً خاف:بصبغ احمر مو حلو ؟
بهاج وقف:ابو سعود
لفت له:مو حلو علي ؟ اها قول انا ماني حلوه اصلاً
بهاج:يا أنهار يا ابوي انتي حلوه وزينه لكن وش تبين بالاحمر بشعرك وش زينك الحين
ابتسمت له تمسك ذراعه:امزح معاك بس بقص اطرافه واسوي له رنساج
بهاج:عاد معرف علومك بس ابشري
ابتسمت له ولفت تناظر السياره اللي وصلوا لها وركبت جنبه وحط اغراضهم بالخلف
ركب وطلع بوكه وحط بطاقته بحضنها:اذا خلصتي كلميني
أنهار ناظرت بطاقته بحضنها ولفت عليه هو عطاها حلاله لانها صارت حلاله هي بنفسها ، شعور انها معه يتسوقون وعايشين سوا لوحدهم يصرف عليها ويدللها شعور يغمرها بالسعاده والامتنان
'
قبل ٦ ساعات قبل الشروق - الرياض
تناظر الطريق وهدوء الشوارع وسكون الجو بينهم
لف يناظرها سلطان وهو يسوق بهدوء ووقف قدام المباني الطوال الشاهقه ولفت له:هنا ؟
سلطان:وش ظنيتي ؟
اخذت نفس ولاردت عليه فك حزامه ولف لها:افصحي لي يانورا ، ارعدي واعصفي فيني بس لا تخليني كذا
لفت له تناظره وكمل سلطان:تمليني بالاسئله ، من تكونين ؟ وش تعيشين ؟
ظلت تناظره يسألها وملتفت بكل جسده لها وصدت لقدام بهدوء ونزلت نظراتها لكفوفها:ما اعرف
سكتت وسكت ينتظرها تتكلم وبعد دقايق تكلمت
:من يوم طلعنا من جده وركبنا طياره ونزلنا للرياض ماصرت اعرف مين انا مين ابوي مين أنهار مين انتوا
لفت له تناظره؛على قد ماقلت اعرف ابوي انصدمت فيه وعلى قد ماقلت اعرف أنهار شوف أنهار وش تعيش ، والحين انا ما اعرف مين أكون حتى صرت ما اعرف وش نيتي لمستقبلي لراحتي ؟ ماصرت افكر لو ابوي يتغير ويرجع لنا ويرجع كل شي قبل ولا صرت افكر في لو اني اتخطاه واعيش حياه ثانيه مارسمتها ولا خططت لها ، جاهله كل شي
رجعت تلف عليه:بتنصدم لو اقولك احس اني وحيده !
سكت عنها وكملت نورا:كنت أوّد بهاج واشوفه اخوي فعلاً بس الحين تغير عندي كل ما اعرف انه هو وأنهار سوا ما اشوفه الا زوج اختي وبس عجزت ارجع اشوفه نفس قبل
هزت راسها له:شفت يوم اقولك اجهل كل شي حولي ؟
سلطان:وأنا ؟ بكل الوضوح اللي أمامك تجهليني ؟
ناظرته ثواني نورا:اخاف منك
عقد حاجبينه وكملت نورا وهي تناظره:اخاف اعطيك فرصه واندم بعدين وانصدم اني فعلاً ماعرفتك ، ادري انك قاعد تحاول ومره تكابر وتبتعد ومره ترجع لأقرب من قبل بس انا صاكه الباب في وجهك ولا لي نيّه افكه لأي أحد
سلطان تقدم لها:ماني أي أحد ، نورا طالعي حولك كل شي تغير الا انتي ثابته محلك ريوف وأنهار وكل وحده اختارت طريقه تعيش فيها الا انتي كل وحده عبرت عن حزنها وتعبت وطاحت ورجعت تقوم الا انتي
لفت له تناظره هي فعلاً ماتغير فيها شي وريوف وأنهار طاحوا مرار وتكرار وقاموا وتعايشوا وتغيرت حياتهم الا هي لفت بخوف للأمام من حست بالغصه تحرق حنجرتها
سلطان:يوم قلت لك تلفتي حولك كنت اعني سلطان اللي وقف عن قيظ الشمس يظلك وانتي ما تشعرين ، اللي هز لك ذراعك بمنتصف هوشة طويلين الشوارب ولا شفتيه ، اللي يوم حرق ذراعه بُن قهوتك وهيلها ما لمحتيه ، اللي تلفت يدورك ويحن لك وملهوف عليك اللي يفصح لك ويطاردك ويدعس كرامته وانتي تردينه ، هذا سلطان ، سلطان اللي لأول مره يعشق سواد الليل وظلمته من شامتك يوم ما انتبهتي انا كنت غرقان ، هذا سلطان
نزلت راسها من حست بدموعها تنزل بهدوء منها وكمل سلطان:انا لو ادري انك فعلاً ماتبيني ماجيتك بكثره لكن ادري ان انتي تتجاهلين
كان ودها تتكلم بس تخاف تبكي وتماسكت ولفت له:طيب وفتحنا باب ؟ ما بيهدونه نفس ما يهدون ببهاج وأنهار ؟
سلطان:وينهم بهاج وأنهار ؟ استسلموا ؟ شوفيهم تركوا كل شي وافصحوا بالعلن واخذها من يدها طرق وغصب
سكتت نورا تصد عنه وكمل سلطان وهو يشوف صدودها وتنهد بهدوء:مابي اعورك بس هذي اخر مره بتشوفين فيها وجهي لو قلتي لا
لفت له تناظره وكمل سلطان:اخر مره اقولك ان ما بتلقين احد يحبك اكثر من سلطان
شدت على كفوفها من أفصح بالصراحه وبالحب لها وهو يعنيها وظلت تناظره كيف يناظرها يرتجي منها كلمه وحده تقولها
لفت لقدامها وهي تمسح دموعها بثبات هي متأكده انها لو تفتح هالباب بتنتثر منه كل الامها اوجاعها خذلانها وهي ماتحب ضعفها ولاتبي شخص يشوفه
تقدم وناظر كفوفها اللي تفركهم ببعض ومسكها ورجفت من حست بكفه ونزلت انظارها تناظر كفه ولفت له
من لفت له وشافها من قريب وشاف السيول اللي ودها تفيض من عيونها لكنها ثابته عرف انها تقاوم تقاوم فيضان لا ينفجر عرف انها تكتم وانها ماهي بخير ولو مثلت ذلك
سلطان شد على كفوفها:لا تخلينها كفوف الوداع
بكت وهي كاتمه صوتها ونزلت دموعها وهي ترجف تحت كفه كفوفها وتناظره هي كانت تكتم ويوم لقت احد يسألها عن حالها تفجر كل شي منها
ناظر دموعها وعيونها ورجفة فكها
نورا:انا مو كذا سلطان مو سيئه مو قاصده اعورك مو قاصده أصدك انا ماعاد فيني أمان صرت اخاف من كل شي اخاف يتغير كل شي واتعب انا ماتخطيت شي ولو تظاهرت ، سلطان انا ما تخطيت شي
لفت عليه وهي تبكي وسكت يناظرها وكملت نورا
:اخاف منك ، اخاف من بهاج واخاف من فهد واخاف من ابويه اخاف من اي احد ممكن يعورني من جديد ويخذلني او يخذل خواتي ، قاعده اعيش خوف ماعمره سكن صدر احد
سلطان ناظرها تسكت وهي تبكي وشد على كفوفها
:نذر علي اني ماني اي احد ، انا الوحيد اللي آمني بي ولا تخافينه ولا تحذرين منه
اخذت نفس تهدي نفسها ولفت له تناظره ورفع انظاره لابصارها اللي تحط عليه ولمس كفوفها بكفه
:وعشان ادري يغلبك الظن والشك والريبه ، نورا تتزوجيني ؟