انثنى غيم نجد لخد الحجاز النرجسيه

٧٣

منسدح وعاقد حاجبينه ويناظر الإبره اللي بيده ساهي يتذكر شكلها وبكاها وبطنها نظراتها وعتابها لف من دق باب غرفته وحط الابره يمينه ووقف مشى وفتح الباب وناظر سلطان
سلطان:كنت ادري مانمت وش العلم؟
ترك الباب بهاج ودخل ودخل خلفه سلطان وناظره
بهاج:وش ظنك ؟
سلطان؛ماعليه معصبه وبتشفي غليلها مردها تلين وانت تعرف أنهار محد بيعلمك بها
نزل نظره لكفه:وش صار لك انت تهاوشت مع همومها ؟
بهاج ناظر كفه:ماعمري شفت من عيونها كل ذا الزعل انا اشك ان بيني وبين المغفره المستحيل
سلطان:يابهاج تراك راجع بعد ثمان شهور وتغير كل شي بهالثمان شهور ظنك ترجع الامور بذي البساطه
بهاج تنهد وجلس ومسك راسه وكمل سلطان
:انت ما انت نايم يارجال بتقعد كذا لين متى ؟ ريّح والامور بتنحل ان شاء الله
بهاج:مو جايني نوم
سلطان:بيجيك انسدح وارتاح وبتنام
بهاج ناظره وهز راسه سلطان:ان صحيت بنحلّها سوا
بهاج:ترجع لي ؟
سلطان ابتسم بضحكه:متى راحت عنك اصلاً !
تنهد بهاج ووقف ومشى للسرير وانسدح بتعب وناظره سلطان وخرج من غرفة بهاج ودخل غرفته
-
ركبت ورا وشدت ثوب فهد ولف لها:علامك
ناظرته بحده:اشبك ؟
فهد:انتي اللي علامك تجريني ؟
ريوف:ما تعرف يعني اشبك ؟
فهد تطنز يقلد لهجتها:لا ما اعرف إشبي ياهوه
ناظرته بحده:خير فهد مخليني ثلاث ايام انام لوحدي خير ان شاء الله !
فهد ابتسم ولف لها:اشتقتي لي ؟
ريوف:لا
فهد:طيب اقربي بسرعه قبل يجي ابوك ويركب
ريوف تكتفت:لا
فهد:وشلون اراضيك يعني ؟ اقربي
ناظرته ثواني وابتسمت تخفي ضحكتها وتقدمت له ومسك وجهها يبوس خدها وضحكت تبعد كفه:غبي
ابتعد عنها وضحك وناظرته بزعل
فهد:ابوي ياخي يبيني حوالينه ونمت عندهم وش اسوي اجي اقولهم زوجتي تبيني
ريوف:قالوا لك متى بيجون الرياض ؟
فهد:اي ينتظرون شركة نقل تجي بكره وبعدها بيجون
ريوف:بيسكنون قريب منا ؟
فهد:لا بس عمي زيد اخذ البيت اللي جنب بيت ابوي بالرياض
ريوف تنهدت براحه:يعني اخيراً بيطلع الكل من المزرعه
فهد ناظر المزرعه:رغم اسوأ ايامها الا ان مو هاين علي تنباع
ريوف:يهون ياحبيبي يهون عشنا فيها اخس ايامنا
فهد ابتسم والتفت عليها:حبيبي ياسلام
ابتسمت بضحكه:طالع قدام بس
فتح الباب يمين فهد عمر وركب:توكلنا على الله
ريوف:بابا طولت اشبك
عمر:تفقدت البيت وخرجت
حرك فهد خارج من المزرعه ولف عمر:قلتي للبنات اننا جايين ؟
ريوف:ايوا كلمتني نورا قبل شوي تسأل
عمر:وكيف أنهار ؟
ريوف:كويسه
-
منسدحه وتناظر السقف بهدوء ولفت من انفتح الباب وناظرته واقف عند الباب
ابتسمت وتقدم لها بهدوء لين جلس عندها وجلست بإعتدال ورفعت ذراعينه تحضنه:وحشتني
ابتسم عمر يحضنها:ليه ما استقبلتينا مع نورا ؟
أنهار غمضت عيونها وهي حاضنته ولاردت ومسح على ظهرها:كيفك ؟
أنهار بعدت عنه وهزت راسها
عمر:ريوف برا تبي تشوفك
أنهار:عادي اطلبك طلب ؟
عمر اخذ كفها وحط اصبعها على عيونه الثنتين وابتسمت له وباس يدها وناظرها:اللي ودك
أنهار:نخرج سوا انا وإياك
عمر:البحر ؟
أنهار هزت راسها واخذ نفس عمر:قومي اجل
وقفت:بلبس واجيك
مشى وخرج من غرفتها وطلع لهم وناظرهم بالحوش جالسين وفهد عندهم:انا طالع مع أنهار
نورا:فين رايحين ؟
عمر:بطلّع أنهار تتمشى شويه ونرجع
ريوف:وليش بس تتمشى انهار وانا مالي رب ؟
عمر:يمشيك اللي جنبك
لفت لفهد اللي ساكت ورجعت ناظرت عمر:بابا !
نورا:طيب تعبان بابا دوبك راجع كان خليته وقت ثاني
عمر:طلبتني أنهار مابردها
تنهدت نورا وخرج عمر من البيت وهمس فهد:اي احسن عشان بهاج وسلطان يجون
ريوف:انت اشبك ساكت كذا ؟
فهد:شدراني ابوك موجود اكيد ماتبيني استهبل وهو موجود
ريوف:اها عرفت اش اللي يخليك تصير عاقل شليويح
نورا:ليش بيجي سلطان ؟
فهد:بيخطبك
جمد وجه نورا وضحكت ريوف:يمزح غبي
ضحك فهد:شوفي وجهها
ضحكوا وناظرتهم بحده نورا:انا ليش جالسه معاكم؟
وقفت ودخلت البيت على خروج أنهار:رايحه؟
أنهار هزت راسها:تبغين شي !
نورا:انتبهي على نفسك
خرجت أنهار وركبت السياره مع عمر وحرك
تكت براسها تناظر الطريق من شباكها وفتحته تغمض عيونه وتاخذ نفس ومشت فيها الذكريات من صوت بكاها وصراخها له وصوت الزجاج اللي تكسّر وريحة عطرها اللي تناثر بالغرفه ونشر معه كل ذكرياتها معه ، حضنه الأول نظراته وحتى جيّاته بممر النوير حريق المستودع الأول وإعترافه بالحب أجمل نياقه اللي ضحّى فيها ، اول خطواتها لبيتهم سوا وأول بوسه وأول شعور بينهم ، رحلة أبوظبي الفارقه اللي كانت سبب في وصلهم واختلاط أرواحهم سوا ، تكرر براسها مو بس صور الذكريات حتى اصواتهم ضحكاتهم اغانيهم كلامه ومناداته لها
بهاج سوا لها ايام حلوه وعطاها اللي تستحقه من الدلال واكثر ورغم انها غلطت اكثر منه الا انه غفر لها قبل التوبه
عقدت حاجبينها وفتحت عيونها من لمس كفها عمر والتفتت له وناظرت البحر قدامهم
عمر:تنزلين تمشين ؟
هزت راسها ونزلوا ومشى عمر ولف لها تمشي معاه ومد ذراعه وحضنت ذراعه تناظر البحر وهي تمشي بهدوء
عمر:على هذا المشي اللي تمشينه بتولدين بدري
ضحكت وشدت على ذراعه:طيب انا ودي أولد بدري من الحين واحشني البيبي
عمر ناظرها:كلمتي بهاج ؟
اخذت نفس وناظرته:عنده خبر
عمر:من قاله؟
أنهار رفعت كتفها وناظر خطاويهم بهدوء:وش بيصير ؟
أنهار:جاني أمس
لف لها عمر يناظرها وكملت أنهار وهي تمشي:بس ماقدرت اعدي كل شي مو قادره انسى الشهور الطويله اللي عشتها ادور عليه واسأل عليه وادق عليه وهو متجاهلني ، ما ابغى احس ان فكرة رجوعه الحين عشان البيبي مو عشاني
عمر:لا تكثرين على نفسك بالكلام ، الأهم انتي تبغينه؟
لفت تناظر عمر ثواني وهمست:ابغاه
ابتسم بهدوء عمر من تأكيدها بدون ما ياخذها التردد والشك بجوابها وصد يناظر البحر
أنهار:بس زعلانه في الف شي وشي يخليني أردّه
عمر:طيب خذي وقتك بالزعل ليه لا ؟
أنهار تنهدت تنزل راسها لخطواتها وكمل عمر
:بس لا تاخذين وقتك بالزعل لوحدك افتحي له الباب واسمعي منه اعتذاراته لين يلين قلبك ، ودي يتحسّن كل شي قبل تولدين
أنهار ناظرته وهز راسه عمر:خليه يجي على الدنيا والدنيا راضيه عليه
لفت أنهار تناظر البحر بهدوء وسكت عمر يدخل يدينه بجيوبه:ما بيفيد كلامي شي بس ان كل وحده منكم اخذت واحد من عيال عمها مافكرت فيها
أنهار ناظرته وكمل عمر:يوم رحت مع فهد وريوف الرياض اشوفهم يسولفون بإندماج كأنهم أصحاب أخوان مو بس أزواج
ابتسمت أنهار:ريوف وفهد من اول جيتنا للرياض كانوا لبعض حتى لو انكروا
عمر التفت لها من شاف ابتسامتها وحاوط كتوفها يبوس راسها وهو يمشي وشدت على ذراعه وابتسمت بإتساع ثغرها
-
وقف بهاج عند البيت ولف لسلطان:مابنطول ونرجع قبل يجي ابوهم
سلطان:ماعليك
نزلوا من السياره ودخل بهاج ووراه سلطان وناظرهم فهد اللي بالحوش:ارحبوا عيال عمي ارحبوا
وقف يسلم عليهم وابتسمت ريوف تناظرهم:عروستك داخل
ابتسم سلطان
بهاج:وين أنهار ؟
ريوف:برا مع بابا
سكت بهاج وجلس سلطان ومد رجله وناظره فهد:انت بتقعد برجل وحده لين متى ؟
سلطان:لحد يفتح معي الموضوع يكفي نفسيتي
ريوف:سلطان شوف دكتور كويس طيب طولت منجد
بهاج:بنغير له المستشفى لين يقوم على حيله
سلطان:نبي من طبك ودواك اللي اخذته بينفعنا
ابتسم بهاج من تذكر انه يعني بالطب والدواء الحب ولف سلطان من خرجت من البيت نورا وابتسمت
فهد:وش ابتسامات العرسان ذي ؟
ريوف:حددتوا الزواج والا باقي ماتكلمتوا ؟
تقدمت نورا بربكه:تو ماتش ريوف
جلست ولف عليها بهاج يناظرها وناظرته بهدوء وصدت
بهاج:تاخذين مني موقف دايم
نورا:سوري مو قادر يغيب عن بالي اللي عاشته أنهار
بهاج:أنهار تزعل بكيفها انتي ليه ؟
نورا:مو يمكن لأني انا مع أنهار تركتني ؟
بهاج صد بضيقه وسكتوا ولفت ريوف:كلنا انحدينا على هذي الشهور وعشناه بشي ما نبغاه بس راحوا اللي حدونا وبهاج سوا اللي سويناه كلنا ، ترا حتى انا تركتكم شهور !
فهد؛ترا انا بعد تركت اهلي امي وابوي وهذاني رجعت لهم والامور زينه
نورا:لحد يتكلم عن اللي صار وهو مو أنهار
بهاج دخل يده بجيبه وطلع منها ابره ومدها:هذا من اللي عاشته ؟
نورا ناظرت الابره وهزت راسها وهمس:وشهو ؟
نورا نطقت بهدوء:كان البيبي معرّض للإجهاض لان عندها أجسام مضاده تحارب البيبي واضطرت تاخذ الإبر هذي يومياً لين تولد
سكت بهاج وكملت نورا بعد ثواني:يعني حاربت أنهار عشان البيبي ما يصير له شي يابهاج
بهاج:ولد ؟
لفوا يناظرون نورا وناظرت عيون بهاج اللي تتأمل إجابه واحده وهمست:اسألها هي
صد بهدوء ونزل انظاره للإبره اللي بيده يناظرها ووقف:اخذت اللي ابي اسمعه والباقي عند أنهار
سلطان:برجع مع فهد
بهاج هز راسه وفتح الباب وناظر السياره اللي توقف عند الباب وناظر اللي ينزل ومعه باقة ورد وعقد حاجبينه:هلا يالطيب
تقدم له:بيت أنهار عمر ؟
عقد حاجبينه:وصلت
مد البوكيه:انا مندوب توصيل وهذي هديه لأنهار عمر
اخذ الورد وناظره:من من ؟
المندوب:في كرت ياحبيبي ، يعطيك العافيه
ركب سيارته وحرك وناظر الورد بهاج وفتح الكرت اللي كان مضمونه " ماتشوفين شرّ أنهار ، وليد "
عقد حاجبينه ورجع يفتح الباب ويدخل ولفوا عليه
فهد:امداك تشتري ورد ؟
مسك الكرت بيده وناظر نورا:من وليد ؟
نورا:مافهمت
ناظر الكرت بهاج يقراه:ماتشوفين شر أنهار ، وليد
لف لنورا:من وليد
ابتسمت نورا تشوف نظرات الغضب بعيونه ورفعت كتفها:واحد عاجبته أنهار
بهاج تقدم بغضب:تكلمي زين
نورا:والله هذا مديري بالشغل وشاف أنهار بالمستشفى وحاب يتحمد لها بالسلامه
بهاج:ووليد ما يشوف كرشة أنهار قبلها مترين ؟
نورا:مو يمكن ما لقي مع الكرشه ابو ؟
لف سلطان يناظر وجه بهاج وسكت بهاج وصد ياخذ نفس يهدي عصبيته وهز راسه وخرج من البيت بالبوكيه
ريوف:غثيتيه نورا
نورا:عشان يعرف حجم هجر أنهار
سلطان:ماهجرها قاصد حتى لو ما تركها بعد الطلاق ما كان بيتركه الشيبه
نورا ناظرته:اي وعشان استسلم يستاهل اللي يجيه يا يحارب ويحاول يا بلاش من الحب
سلطان:انا اشهد خليتيني وراك طرطور لين لان راسك
ضحكت وضحك فهد:هذي راسها اعند من الحجر زينه ريوف عندها
ريوف:انا كيوت بسرعه ألين
فهد:اي صح والدليل عباياتك ذي اللي باقي تلبسينها وسيارتي اللي صارت لك
ريوف ناظرت نورا وضحكت:اشبهك يعني ؟
ضحكت نورا:انتي بنتي بنتي تربيتي
ضحكت ريوف ورمت لها بوسه بالهواء
-
ظل يناظر الكرت ويقراه والنار تشتعل داخل صدره ورفع عيونه لمرايته يناظر سيارة عمر توقف خلفه
نزلت أنهار وهي تشوف سيارة بهاج عند الباب قدامهم هي تعرف سيارته وكيف ماتعرفها وهي اختارتها معاه ونزل عمر وناظر سيارة بهاج وفتح الباب ودخلت أنهار ولف بهاج يناظر عمر اللي واقف عند الباب وهز راسه يسلم عليه
ورفع كفه عمر يرد السلام ودخل وحرك بهاج سيارته
دخل وناظر سلطان اللي وقف وتقدم له:حياك الله
سلطان:الله يبقيك
تقدم وسلم عليه وناظرتهم أنهار وبلعت ريقها نورا من نطق سلطان:كنت بإنتظارك معي موضوع
عمر ناظر نورا اللي صاده:حياك اقلط بالمجلس
وقف فهد مع سلطان ومشى يدخل وناظر نورا عمر ورفعت راسها تناظره وهمس:قهوه
هزت راسها له ومشى عمر يدخل وابتسمت نورا وعضت شفتها تناظر البنات
ريوف:سلطان يقول معي موضوع يعني غامض وكلنا ندري انه بيخطب نورا
ابتسمت أنهار تجلس على طرف الكنبه:ونعم الخطبه كان تاكي معاها بالحوش قبل شويه
نورا:يخطبني من ابوي عن الضمير بس
ضحكت ريوف وابتسمت أنهار ولفت نورا عليها:جاك بوكيه ورد
تلاشت ابتسامتها:من مين ؟
نورا:وليد
عقدت حاجبينها أنهار:ليش؟
نورا:اتوقع عشان شافك بالمستشفى فبيسوي ظريف
أنهار تنهدت بإنزعاج:فين البوكيه ؟
ريوف:اخذه بهاج
لفت تناظر ريوف:بهاج؟
ريوف:كان جالس معانا هنا طلع قبل تجون بشويه اوف أنهار ياليت شفتي وجهه يوم وصل البوكيه اول مره بحياتي اشوف بهاج غيران
نورا:صراحه حتى انا كان وجهه أحمر وانا زدتها عليه اكثر
صدت بهدوء أنهار ونطقت نورا:كنت اتوقع ان بهاج عاقل وما يغار بس اليوم عرفت ان كل الرجال صنف واحد
ريوف:منجدك ؟ واحد جايب لزوجته ورد كيف ما يغار ؟ لو ما غار هنا التعجب
أنهار اخذت نفس بهدوء؛القهوه ياعروسه
نورا وقفت بسرعه ودخلت البيت ونزلت انظارها لاصابعها أنهار وهي ساهيه وتقدمت ريوف تجلس جنبها:أنهار
أنهار:ريوف اعرف اش بتقولين وادري تحبين بهاج اكثر مني حتى بس مو رايقه
ريوف:احبك واحب بهاج كمان زي ما اشوفك اختي اشوفه اخويه ، أنهار ما يسوى خلاص جاك وتكلم معاك وباين عليه الندم وبحاجه لك ليش تصدينه
أنهار:عشان انا أنهار
ضحكت ريوف:المغروره النرجسيه ؟ نسينا نقول لبهاج ان رضاك اصعب من زعلك
ابتسمت أنهار لها وكملت ريوف:اوكيه ننتظر بهاج يجيب لك شي بغلاوتك عنده
أنهار رفعت كتفها:يمكن ما يجيب
ريوف:أنهار ترا الثمان شهور ما نقصتك عند بهاج ، زادتك عنده
أنهار:شاكه
ريوف:مستحيل لو ما تهمينه ماكان الإبره حقتك معاه وشايل هم صحتك يسألنا عنها
عقدت حاجبينها:إبرة ايش ؟
ريوف:معاه بجيب ثوبه إبره من إبر الحمل حقتك وسأل نورا عنها
سكتت أنهار وكملت ريوف:يعشقك
اخذت نفس توقف أنهار وتمسك ظهرها:نشوف
دخلت البيت تاركه ريوف بالحوش
-
يناظر رقم ابراهيم ويسوق ودق وهو يمشي بهدوء
ابراهيم:ارحب ابو سعود
بهاج:الله يبقيك كيف الحال؟
ابراهيم:ابد نسأل عليك
بهاج:حمدلله كل الأمور زينه
ابراهيم:آمر
بهاج:ما يامر عليك قبل فتره قلت لي عن شركة وليد اللي قابلته بجِده
ابراهيم:الله الله
بهاج:عطني له عنوان اي مكان القاه فيه
ابراهيم:ما اعرف الا دوامه والله
بهاج:عطني اشوفه
ابراهيم:ليه صار شي ؟
بهاج:بنفك الشراكه وياخذ اسهمه وانا اسد مكانه
ابراهيم:ليه وش صار ؟
بهاج:ما جاز لي
ابراهيم:بهاج وش السالفه؟
بهاج:ان تقابلنا كلمتك بس مكان وليد ذا بسده انا ضبط الامور على ذا الاساس
ابراهيم:طيب نشوف
بهاج قفل جواله وناظر العنوان بالرساله ومشى لين وصل وناظر المبنى وناظر ساعته والوقت المتأخر على العمل
نزل والبوكيه بيده والكرت بيده وتقدم يشوف ضابط الامن:سلام عليكم
ضابط الامن:وعليكم السلام آمرني
بهاج:بغيت وليد مدير الشركه اللي بالمبنى
ضابط الامن:موجود بالدور التاسع بس انتهى وقت الدوام ما اقدر ادخلك اعذرني
بهاج ناظر التلفون اللي عنده وفتح السماعه:لا تقدر تقدر دق عليه قوله بهاج بن سعود يبيك
ضابط الامن ناظره واتصل وفتح زرار ثوبه بهاج ولف للضابط:حيّاك
تقدم يدخل وطلع لين وصل للشركه ودخل وناظر المكاتب فارغه من الموظفين ووليد بمكتب قزاز على لابتوبه
مشى وفتح الباب ورفع راسه وليد بإستغراب:ارحب
بهاج تقدم ورمى البوكيه على مكتبه وعقد حاجبينه وليد ورفع راسه لبهاج:مافهمت ! هذا وش
بهاج:انا بعلمك على الهديه اللي مرسلها لزوجتي ؟
وليد رفع حاجبه:زوجتك ؟
وقف وناظر بهاج:انت مو بهاج شريك ابراهيم ؟ مو جاي شغل ؟
بهاج:جاي شغل بس شغل ماهو من شغلك
وليد ناظر الورد وتقدم له بهاج ورفع الكرت وقراه وليد وناظر بهاج بصدمه:كيف زوجتك؟
بهاج:زوجتي يبي لها تفسير اكثر ؟ يوم ترسل لها ورد ما تشوف بطنها قبلها شبرين ؟
وليد:اشوف لكني سألت قبل اقدم وقالت ابوه ماهو موجود
شد على فكه بهاج من نطق وليد بكلام أنهار ومسكه من ياقته:من اللي مو موجود
دفعه وليد:احترم نفسك انت بمكان شغلي ، لا تمد يدك اخليهم يجرونك الحين
بهاج دفعه من صدره على الكرسي:والله لأخليك تقابل جدان أبوك تفهم ؟ ابتعد عن دربها والا والله لأندمك حياتك كلها تقول ليتني كلب ولا قابلت بهاج بن سعود
وليد:روح طلع جنانك بالشوارع هذا المكان محترم
بهاج طلع اسنانه من غضبه وضربه على وجهه ووقف وليد يدفعه ويتهاوشون سوا
حط راس وليد على المكتب:انا ما امد يدي ولا حتى على رجال لكنك من اشباه الرجال ويجوز فيك الإهانه ، لا اشوف لك درب تفهم ؟
ابتعد عن وليد واخذ وليد التلفون:والله لأربيك يا كلب
بهاج رفع ذراعه:بلّط البحر والله ان طلعت في دربي يوم وشفت وجهك هديت فكك ذا
وليد مارد عليه وهو يتصل وقفل ازرار ثوبه بهاج يعدل شكله والتفت قبل يفتح الباب:عرفت الحين وين أبو سعود ؟ موجود واسمه بهاج بن سعود
فتح باب مكتبه وخرج وهو معصب ونزل يركب سيارته ويحرك
-
سلطان شرب من الفنجان وعقد حاجبينه من طعمها وناظره عمر:ماجازت لك ؟
رفع راسه بسرعه:لا والله جازت لي أكرمك الله
عمر:سوتها نورا وادري انها ماتعرف تسويها ، وان شربت فنجانك واستصغت اول عيوبها فهي لك
ابتسم سلطان يكمل بقية فنجانه وضحك فهد:لا تاكل الفنجان مع القهوه
حط الفنجان سلطان وناظر عمر:انا اعرف راي نورا لكن ما بتعداك انت ابوها ويهمني جوابك
عمر هز راسه بهدوء:ونعم بك
ابتسم سلطان وكمل عمر:جب أهلك متى ما يناسبهم
سلطان:ومعي الشيخ ؟
ضحك فهد وابتسم عمر من ضحكة فهد:ومعك الشيخ
ابتسم سلطان بوسع مبسمه وهز راسه ووقف:نشوفك على خير
عمر:حياك الله
وقف فهد وحط فنجانه وخرجوا ووقفت ريوف:بجلس هنا فهد
فهد:متى اجيك؟
ريوف:اكلمك انا
خرج عمر وراهم:خلها تنام هنا بسولف معها
ابتسمت ريوف:اوكيه نسهر سوا
فهد هز راسه وخرج مع سلطان ومشت ريوف تحضن عمر ودخل معها البيت وهي بحضنه
نورا:بابا شربتوا القهوه ؟
عمر:ماتنشرب يابابا محد شربها
كشرت بضيق:ليش تقولي اسويها طيب؟
عمر:عشان اذا شربها سلطان ادري انه بيصبر على راسك العنيد وقهوتك الشينه
ابتسمت بحيا:وشربها ؟
ناظرها وابتسم ولفت أنهار تناظره تنتظر جوابه وضحكت ريوف:اكيد ما شربها
نورا ناظرته وتلاشت ابتسامتها:بابا !
عمر:شربها
ضحكت أنهار وابتسمت نورا تصد تحك جبينها ومشى عمر يجلس:قلت له هذي قهوة نورا وشربها
ريوف:حركات يتحمل قهوتك الخايسه
نورا:بطلي حركاتك ريوف
أنهار:حددتوا يوم ؟
عمر:قلت له على شور اهله
ريوف:خطبه ؟
عمر:كتب كتاب
شهقت نورا ولفت أنهار عليها وابتسمت:ليش شهقتي ؟ المفروض من جيتنا مستعده لزواجك
نورا:مو مجهزه شي !
ريوف:اخس اطلالاتك شافها سلطان ما يحتاج الكلافه
تقدمت نورا تقرصها بغضب وضحكت ريوف تدفها:لا تعوريني فيني هبوط من القهوه دايخه والله
عمر:شربتي ؟
ريوف:قبل اجي مع فهد بالمطار شاربتها بدون فطور عشان كذا احس بهبوط
عمر:شاطره وتعترف
ريوف ضحكت وسكتت
-
بهاج ناظر سلطان اللي يسولف قدامه وشغل زيقارته هو ناوي يرجع اليوم من جديد لأنهار
لف لسلطان اللي نطق:معزومين كلكم حياكم الله على كتب كتابي
ضحك فهد:اقول عالج رجلك بس وريحنا
بهاج وقف ومسك رجله:وش قال الدكتور الاول ؟
سلطان:يقول انت كسول ما تمشي عليها والا مافيها مشاكل
بهاج ضرب رجله وصرخ سلطان:كسر
بهاج ضحك:قوم بس وقف عليها
سلطان:والله توجعني يابهاج
بهاج مسك كفوفه يقومه:قم
وقف سلطان وعقد حاجبينه يعرج وناظره بهاج:وقف عليها
سلطان:توجع ياخي
فهد:توجعك لانك ماتحركها
بهاج:امش
سلطان؛مسوي دكتور على راسي ؟
بهاج:امش لامشيك بكف الحين امش ريحنا رافقت معك ٧ شهور اخلص امش
سلطان ناظر رجله ووقف عليها وعقد حاجبينه بألم واخذ نفس بهاج؛امش مرتين بالغرفه وتصير حصان
شال كفوفه وجلس بهاج وناظره سلطان:بهاج !
فهد ضحك ناظر سلطان واقف بنص الغرفه:نذل ابو سعود
ابتسم بهاج يناظر سلطان:امش
بدأ يمشي سلطان وهو يعرج وهمس:يجي سعود وأعذبه اوريك فيه
بهاج ابتسم:خله يجي
فهد:بهاج بطلبك ماعليك أمر سعود يجيني يومين بالاسبوع مو كثيره يومين بس
سلطان؛وانا يومين ما بنكلف عليك باقي الاسبوع ولدك
بهاج ابتسم بوسع مبسمه وكمل فهد:والله احبه قبل يجي
ضحك بهاج لانهم يوصفون مشاعرهم وابتسم سلطان وهو يمشي بالغرفه:ولو طلعت بنت بحبها زود
نزل انظاره بهدوء بهاج:ما ظنتي بتعلمني
تنهد وابتسم:لكن ان جات بنت والا جات ولد اقسم بالله حلمٍ تمنيته
ابتسم فهد وطلع جواله اللي يدق فهد وعقد حاجبينه:هلا نورا
لف سلطان عليه وناظرت ريوف نورا:فينك ؟
فهد:عند بهاج وسلطان علامك ؟
نورا:ريوف تعبت شوي ووديناها المستشفى ولو صحت وانت مو موجود صدقني بتطلب الطلاق
فهد عقد حاجبينه ووقف:وش جاها ؟
ناظره بهاج بإستغراب ونطقت نورا:ما فطرت كويس وجاها هبوط بالضغط
فهد:طيب جاي
قفل وناظره بهاج:وش صار ؟
فهد:ريوف طاحت عليهم مو فاطره وشاربه طن لتر قهوه امس الحماره
ضحك سلطان لانه يناديها حماره كأنها اعز أصحابه
بهاج:طيب اصبر بجي معك بغير واجيك
فهد:اخلص قبل تقوم وما تلقاني وتتحول لشخص ثاني
مشى بهاج ودخل الحمام ولف سلطان عليه:تعال ساعدني تكفى
فهد:جرب روح بدون عكازه عشان نورا تبطل تتزوجك يالأعرج
سلطان:تناديني أعرج وتبوني اطيب
خرج بهاج وهو يلبس تيشيرته:امش
فهد خرج ومشى معه بهاج ووراهم سلطان
-
دخل عمر:ريوف بجيب التحاليل واجيك
ريوف:بابا خلصوا دمي كله
عمر:لو ماكله ماكان طحتي
خرج وقفل باب الغرفه وتكتفت نورا تناظرها:ولا كأنك متزوجه نونو انتي ؟
ريوف:ترا قد صارت لأنهار كمان شربت قهوه لين طاحت ريحوني
أنهار سكتت تتذكر كانت بهذيك الفتره تنتظر زواج بهاج من شموخ ومن فرط تعاستها كانت تتغذا على القهوه لين طاحت
تكت براسها على يدها وهي ساهيه ولفت من انفتح الباب ودخل فهد:اسم الله على زوجتي عسى ماشر
ابتسمت أنهار تناظر طنازة فهد على ريوف وتلاشت ابتسامتها من دخل خلفه بهاج وجمد وجهها تناظره نزلت انظارها لتيشيرته اللي اختارته له من أبو ظبي ورجعت تناظره يناظرها
ريوف:بهاج !
لفت نورا ودخل سلطان وناظر ريوف:شعندك انتي تدلعين علينا ؟
ريوف:ادري اصلاً لا انت ولا شليويح فيكم ذرة حنان زي بهاج
بهاج:وش جاك ؟
ريوف:هبوط بس من القهوه
بهاج:لعد تعيدينها وانتبهي لاكلك زين
ريوف لفت لفهد:تعلم ياناشف
فهد:هذا لسانك وتبيني اخاف عليك ؟
صدت أنهار واخذت نفس وهي تسمعه يكلم ريوف
ودخل عمر ولفوا له وناظرهم:ياهلا
وقف فهد واعتدل بوقفته ودخل ومعه ورقة التحليل وناظر ريوف:اقري شوفي تصدقين والا زيي كذبتهم
عقدت حاجبينها ومد لها الورقه وتقدم فهد يناظر الكلام الانقليزي ولفت ريوف بصدمه تناظر عمر وضحك يهز راسه بالنفي بعدم تصديق
وناظرتهم نورا:اشبكم
فهد لف على ريوف:وشو ؟
سحبت الورقه نورا وقرتها ولفت بصدمه لريوف:تستهبلين ؟
عمر ضحك واعتدلت أنهار:اشبكم ؟
فهد:وشفيكم احد يتكلم
عمر:حامل
لفوا بصدمه لريوف وناظرها فهد بصدمه
وضحك عمر من ردة فعل فهد:هذا أب هذا ؟
ابتسم وسع مبسمه بهاج بفرحه:فهد ! مبروك
فهد:اصبر يا اخوي على وش تبارك
ريوف:بابا اكيد غلطانين صح ؟ والا انا اصير أم ؟
فهد:بالله منجدكم ؟
نورا ابتسمت:وناسه بيجينا بيبي ثاني
لفت ريوف على أنهار:خذيه أنهار تكفين
ضحكت أنهار:غبيه
عمر:اجلسي بتجيك دكتوره تشوف امورك وبعدها نطلع سوا
اعتدلت أنهار:انا بروح مع نورا عندي شغله بنخلصها وبنروح للبيت على طول
نورا:خذي سيارتي انا بجلس مع ريوف
عمر:لا تسوقين لوحدك اجي معاك
أنهار:لا لا عادي انا اروح لحالي مو مشكله
وقفت ومدت لها المفتاح نورا وناظرها بهاج وتنحنح سلطان ولف عليه بهاج وغمز له سلطان ولف بهاج:استأذن انا مبروك ريوف بنلاقي لسعود صديق يلعب معه
خرجت أنهار وهي تسمعه يجيب طاري سعود ومشى بهاج خلفها ولف عمر يناظره يخرج ورا أنهار ورجع لف لهم
-
ضغطت المصعد وهي تنتظره ونزلت انظارها تناظره يوقف جنبها وبلعت ريقها تخفي ربكتها وانفتح المصعد ودخلت ودخل معها
صدت عنه ورفع انظاره يناظر المصعد ولف عليها:وش شغلك اللي مستعجله عليه ؟
تكلمت بهدوء بدون تلف عليه:طالبه سرير وبيوصل
بهاج:سرير سعود ؟
انفتح المصعد وخرجت ومشى معها:كم دفعتي ؟ انا بدفع
لفت عليه ووقفت ووقف يناظرها
أنهار:تعرف لدور الأب كويس من زمان
بهاج تنهد وتقدمت تمشي ومشى خلفها:خلي سيارة نورا تعالي معي
ماردت عليه وفتحت السياره وركبت وجات بتقفل الباب ومسكه ولفت عليه تناظره:بمشي
بهاج:بنتكلم ، انزلي وتعالي معي بسيارتي
صدت وهي تسحب الباب وتقدم لها:أنهار !
لفت تناظره بحده:ما ابغى اتكلم
بهاج:وشلون ارضيك اذا كل ماجيتك اتكلم ترديني ؟
أنهار:مو انا اللي اعلمك كيف ترضيني
سكت بهاج وصدت أنهار وهز راسه بهاج وابتعد عن الباب وقفلته ومشى لسيارته يركب ومشى خلفها وهي تسوق
ناظرته بالمرايه وعضت شفتها هي تبغاه يلحقها ويمشي خلفها ويحاولها هي تبي تاخذ حق الثمان شهور اللي هجرها فيها ولو ان اللي يسكن داخلها الشوق والحب واللهفه اللي يغلب زعلها وعتابها الا انها تبي تشوف بهاج يحاولها
وقفت عند المستودع واخذت شنطتها تلم اغراضها وجات تفتح الباب وناظرته يقفل بابها ويدخل المستودع
دخل وناظرته يتكلم معهم دقايق وطلع من جيبه بطاقته واخذت نفس تصد
ومشى لسيارته يركب وناظرت العمال يركبون السرير ويحركون ومشت تحرك وتخطاها بهاج بسيارته ووقفوا عند البيت ونزلت تسمعه ينزل من سيارته يسأل:بعدين عادي اشحنه على الرياض مافي مشكله ؟
صدت من سمعت تلميحته ودخلت البيت وفتحت الباب كله ودخلوا العمال بالسرير يركبونه بغرفتها
ووقف جنبها يناظرهم يركبونه وتكلم بهدوء:مو جيّده جودته لارحنا الرياض نشتري غيره
لفت تناظره وهمست:اذا رحت انت لحالك
لف بهاج من خرجوا العمال ومشى خلفهم ودخلت الغرفه تناظر السرير
قفل الباب خلفهم ودخل الغرفه يناظرها واقفه عند السرير ولفت له:تقدر تروح الحين تطمنت على سرير ولدك
بهاج تقدم لها ولانت ملامحه:ولد ؟
أنهار سكتت وهمس بهاج:جاوبيني
أنهار:اذا ناسي انا طليقتك
بهاج:يعقب من يقول انتي حليلتي من يوم اقبلتي علي وما طلقتك الا مجبور وحدّوني وللحين انتي زوجتي وراس مالي والشيخه أم سعود
أنهار هزت راسها:اجبروك وانت رضيت
بهاج:ماني راضي ، الا غصب تخليني غلطان تراني ضحيه معك
تخطته تبتعد ومشى خلفها:أنهار
ماردت عليه وتقدم يمسك ذراعها ولفت عليه تناظره تقدم لها يناظر نظراتها كانت ساكته وتناظره وكل عيونها عتاب وشوق ولهفه وهمس:عاتبيني وابكي عليّ مشتاق اشوف غلاتي عندك
ظلت تناظره واقف قدامها وهزت راسها بالنفي : ماكنت قد الأمل اللي زرعته فيني انت اول شخص عطيته قلبي واول شخص يعوره ، انت اللي كنت أجوبه لكل شي خليتني تحت رحمة اسئله اجوبتها بين يديك ، كيف عشت بدوني ؟
بهاج:عشت بين حطام جدراني ، ضلوعي العوجا استقامت من قوة التنبيش بذكرياتك ، انا عشت بين انفاسي اللي تسكنها عطورك ، ادخل غرفتي وانا ذرب ومرتب وزين وان داهمتني ذكرياتك خرجت منها وغترتي فوق متني ، أنهار انا ما بكيت من الشوق الا مرتين مرّه على أبوي ومرّه عليك ، انا من قوة حريقي داخلي ما ترحمت للحين على اللي سبب هذا كله
سكت من نزلت دموعها وهي تناظره وتقدم لها:هذي اول مره اقولك ان دموعك ريحتني ما تعبتني ، تبكين يعني تحبيني يعني تبيني
أنهار هزت راسها بالنفي تبكي وتقدم يمسك وجهها:والله انك تحبيني ، وتعرفين انك اول ضحكه تطلق حجاجي عن التعقيد وأول امنيه تقطع خشوعي وانا مصلي انتي اول ليله قمرا بعد عتمة سنيني ، انتي اول انتي الاول من كل شي ، اطلبي مني حياتي وابشري باللي تبينه
بعدت كفوفه عن وجهها وهي تبكي وناظرها بضيق
:هالمره ينثني غيم نجد والحجاز لخد بنت الحجاز النرجسيه ، ينثني لأجلك
بكت بصوت وهي تبعده بزعل من الشوق اللي داخلها لكلامه وتقدم لها:ابوي انتي يا أنهار وش انا دون أبوي ؟
هزت راسها وهي تبكي:خليتنا انا وسعود خليتنا
تنهد من نطقت بسعود معها وتقدم لها بحرقه:عسى الله لا يسامحني
نزلت راسها تبكي وتقدم لها بهدوء يحضنها وبكت من حست بحضنه وارتفع صوت بكاها
غمض عيونه ياخذ اول انفاسه من بعد صبره ثمان شهور يشد عليها بقوه لضلوع صدره ويدفن وجهه بعنقها يشم فيها عذابه وأول سبايب غرامه وميّل راسها يبوس نحرها
بكت وهي فالته ذراعينها من حضنه ووسط بكاها طيّحت باب الكبرياء ونطقت:وحشتني
غمض عيونه يشدها ورفعت ذراعينها تحضنه وردها خلفها لين استراحت على الجدار
بهاج:ثمان شهور الارض ضيقه لو هي فسيحه ، ثمان شهور راحت من عمري خساير ، تكلمي قولي انك تحتريني زي ما انا احتريتك قولي انك تحبيني زي ما أنا أحبك
سكت يسمعها تبكي ورجع يتكلم بعد ثواني:ما تخيلت ان ممكن تضيعين من يدي ولو حدّوني ، ماحدّوني بك الا لأنك في عيوني واضحه ولكني بكابد وأعاند لأجل أرجع احظى بك من جديد
ابتعد عنها يناظرها تبكي ومسك وجهها:ضامي ما ارتويت يائس ماعشت الأمل ، قولي اللي تبينه اسمعك بتحمل عتابك وابي اعرف اذا باقي في بحرك موج اكسر فيه مجدافي وابي اعرف اذا باقي في صدرك هم ما شالته أكتافي ، انا كلي ذنوب وانتي التوبه ، تكفين ابي بعد ماشفت حزنك اكون دمعه وحياتي مسافة خد ، انتي رفيقة عمري وانتي غنايم حياتي ، تعالي تعالي نربي سعود سوا تعالي لحضني العطشان
رفعت كفوفها على صدره وهي تبكي غرقت من بكاها ودموعها تسمع كلامه تعبه ووجعه وناظر دموعها بهاج والتفت من سمع الباب ينفتح وابتعد يلقط انفاسه بتعب ومسحت عيونها أنهار ودخلت الغرفه ونزل راسه بهدوء بهاج ودخلت نورا وهمست:بهاج
دخل عمر وناظره ووقف بإعتدال ونطق بهدوء:جبت العمال
تعداهم يخرج وناظر فهد وريوف اللي داخلين ووقفوا وناظرته ريوف:بهاج
مارد يتعداهم ولف فهد:علامك ؟
خرج وركب سيارته وغمض عيونه يحط راسه على الدركسون بتعب ورفع راسه من اندق شباكه وناظر عمر واقف وفتح الشباك له
ناظر حاله عمر ونطق بهدوء:صلح كل شي من جديد
سكت بهاج وكمل عمر:برضاها ورضاي ورضى امك
مارد بهاج ورجع خطوه لورا عمر:موفق
مشى يرجع يدخل البيت وقفل شباكه بهاج وفهم كلام عمر ولمس فيه اللي يلمح له
جيّاته لأنهار كذا وهو يتخطى وجوده ماهو راضي عليها ويبي يصحّ الاعتذار ويبتدي منه من أبوها