انثنى غيم نجد لخد الحجاز النرجسيه

٥٢

يناظر الاشاره اللي تعج بالسيارات والزحمه والتفت لسلطان اللي يناظر الطريق:العلوم ؟
التفت سلطان عليه:العلوم عندك
اخذ نفس بهاج ونطق سلطان:زانت أمورك
بهاج:ان شاء الله
سلطان:يعني تراجعت عن الزواج اكيد
بهاج تنهد:شوف سلطان ترا مالعب لعب عيال انا وكنت ناويها صدق لكن
سلطان:لكن كل ما تهاوشت مع أنهار حطيت شموخ اختي بوجه المدفع ، وشو بطلوا يروحون ديرتهم وبطلت انت ؟
بهاج:لا ياخي ماهي كذا
سلطان:من حرق المستودع ؟
بهاج ناظره ورجع يصد للطريق وتنهد
وهز راسه سلطان:أنهار عشان ماتتزوج صح ؟
بهاج:سلطان !
سلطان:ياخي قلت لك من البدايه قلت بهاج هذي اختي لا تدخلها بحياتك وانت تبي وحده ثانيه
بهاج مارد وهو يسمع سلطان وكمل سلطان
:زين انها حرقته اجل قبل تاخذها
بهاج:طيب ابيك تقنع اهلك قول اي شي قول ماني كفو ماني مستاهلها اي شي
سلطان:بالله ؟ ادخلك واطلعك انا ؟ خلك قدها وكلم ابوي انت
بهاج:تكفى سلطان انا بكلمه بس انت عطه تلميح
سلطان:لا
بهاج:سلطان تكفى ما بتخليني لوحدي
سلطان التفت يناظره بحده وابتسم بهاج:وأزوجك اللي تبيها
رفع حاجبه سلطان وضحك بهاج:مسكين مسكين من قد بلي بالغرام
ناظره بحده سلطان ومشى بهاج وعض شفته يشوف نظراته الحاده وابتسم ولف عليه
:بتاكلني بعيونك كل ذا عشان قلت ازوجك نورا
سلطان:انكتم بهاج
بهاج:سمّ
لف سلطان للطريق وابتسم بهاج من دخل الحيّ ووقف عند بيته والتفت عليه سلطان:علامك وقفت
بهاج:تشوف هذا البيت
لف سلطان على البيت يناظره:شفيه ؟
لف سلطان على بهاج اللي ابتسم يرفع مفتاح وعقد حاجبينه:وشو ؟
بهاج:حياك في بيت ابو سعود
ناظره بصدمه سلطان وضحك بهاج من شاف وجهه ونزل:اخلص انزل
نزل سلطان:اسألك بالله !
ضحك وعض شفته يفتح الباب تحت نظرات سلطان المصدومه ودخل بهاج يناظر البيت وهو مبتسم ومبسوط والتفت يشوف نظرات سلطان اللي دخل مذهول ومصدوم
وحط ذراعه بهاج على كتوف سلطان:بعزمك انت بأول عزيمه في مجلسي
سلطان:يا كلب شلون شريته ؟
بهاج:بحلالي
سلطان:متى ؟ ليه ماعلمتنا ؟ وش بتقول لهم ؟
بهاج:ماعلي بأحد اللي بيسكن هنا انا وزوجتي أم سعود أنهار
ابتسم من نطق جملته وهو يرسم احلامه من خلالها
وضحك سلطان بصدمه:مو صاحي وربي
بهاج ضحك:ماخلصته من داخل والا كان وريتك
سلطان:ومبسح وقعده وحديقه ! تبي تغلب الشيبه بهالزرع
بهاج:اي بحط نياقي هنا
ضحك سلطان وابتسم بهاج:ماقلت الا لك انت محد عنده علم
سلطان ابتسم يناظره:الله يجعله بيت عامر ، متى بتهج ؟
بهاج:بعد مانزوجك ان شاء الله
لف يناظره بحده سلطان وضحك بهاج يبتعد عنه:ياخي ياثقل دمك ياسلطان امزح معك
سلطان:امش بس لا اغرقك بذا المسبح
ضحك بهاج وخرج من البيت وركب بهاج سيارته وابتسم يناظر بيته وحرك مع سلطان وهو يدندن براحه ولف لسلطان:بغيتك تساعدني بشغله
سلطان:داري ما طلعتني معك الا وانت ملغم مصايب وش مسوي بعد ؟
ضحك بهاج:ابي اشتري شي لأم سعود
ضحك سلطان يهز راسه بأسف ولف عليه بهاج
:علامك تضحك ؟ بشتري هديه لزوجتي ناقدني ؟
سلطان:طايح على وجهك ؟
بهاج:اي شعليك ؟ فداها حلالي
سلطان رفع حاجبه يضحك وابتسم بهاج:اقسم بالله يوم تناديني بهاج ان اسمي يختلف عنكم يوم انكم تنادوني ، ياشيخ رقه عذوبه
تنهد:اهخ بس
سلطان:الرقه بيطلعها من عينك ابوها
بهاج كشر:يعقب بس
سلطان:وش تبي تشتري طيب ؟ لا يكون عماره
بهاج:بالله ؟
سلطان:مدري قلت يمكن تلعب عالثقيل بعد هالفله
ضحك بهاج:لا بشتري شي هي تحبه لكني مدري القاه والا لا
سلطان:وشنهو
بهاج:اي هنا السؤال ابيك تكلم نورا تسألها
سلطان:ياليل
بهاج:ياخي منجدي اتكلم لو سألتها انا بتفهمها شي ثاني اسأل انت كأنك تدردش معها كالعاده
ناظره سلطان بنص عين وابتسم بهاج:اخلص
سلطان اخذ جواله:وش اقول ؟
بهاج:اسألها وش المحل الاحمر اللي يشترون منه مجوهراتهم
سلطان:بالله ؟
بهاج تأفف:اخلص سلطان بتعطلنا ويصكون
سلطان اخذ نفس يرسل وابتسم بهاج يناظر وهقته كان يتعرق ومتوتر يسألها ووقف بهاج والتفت يشوفه مركز ويكتب ويمسح وضحك
لف سلطان:ماقدرت اسألها ياخي
بهاج ضحك بعلو صوته:انزل بس
سلطان:وين ؟
رفع راسه يناظر المول اللي وقفوا عنده والتفت لبهاج اللي نزل:اعرفه بس قلت اوهقك
سلطان:الله لا يبارك فيك يابهاج
قفل بابه بهاج ونزل ومشى خلفه سلطان:بلعن والديك ان مسكتك
بهاج التفت عليه يشوفه يمشي خلفه وضحك:امش بس
دخل المحل بهاج وناظر الموظف اللي تقدم له
:تفضل
بهاج:زاد فضلك ، ابي اشتري شي لزوجتي
ابتسم الموظف:تفضل حياك حاب شي معين
تقدم سلطان يناظرهم وابتسم بهاج للموظف
:أندر قطعه وأحلاها وأثمنها
ضحك الموظف وهز راسه:حياك تفضل اجيب لك قطع تشوفها
هز راسه بهاج وجلس على الكرسي وجلس قدامه سلطان:شايفه أندر قطع مسوي بتجيب راسها ؟ محد طايح على وجهه غيرك
بهاج:انكتم بس
ناظره سلطان بحده وناظر الموظف جاي له بقطع وابتسم يمسك الخاتم بيده ويتأمله
الموظف:لمتيد اديشن عندنا هذا
رفع راسه بهاج:منهو؟
ضحك سلطان وابتسم الموظف:يعني راح تكون قطعه نادره لزوجتك
بهاج ابتسم يناظر الخاتم:اي حلو
لفه على سلطان:شرايك ؟
سلطان هز راسه:زين
بهاج رفع راسه للموظف:وابي طقم يتكلمون فيه كل بنات السعوديه
ضحك الموظف:ابشر
ابتسم بهاج وحط رجل على رجل يناظر المحل
سلطان:الله يالدنيا مادخلت هالمحلات الا بعد ما عرفت بنت عمر
بهاج:تمشيني وين ماتبي ام سعود
سلطان:اثقل اثقل حتى الموظف ناقدك يالمشفوح
بهاج مارد عليه يشوف الاطقم اللي تقدمت له ووقف سلطان من دق فهد عليه وخرج
:هلا فهد
فهد:انتم بتذبحون ذبيحه ؟
سلطان:لا الحمار بهاج يبي يخلص شغله ونجي
فهد:ياخي ومخليني لوحدي مع ذولا شوي وينتفون شعري
سلطان:انت قلت ماتبي تروح اقعد احسن لك
فهد:هيا بالله لا تطولون
سلطان:طيب جايين مو مبطين
قفل من فهد وشاف بهاج اللي مدّ بطاقته يدفع وهو جالس
ابتسم الموظف:تمام نحطها لك بكيسه واجيبها لك
هز راسه بهاج وجلس سلطان:اخلص فهد دق سأل
بهاج:قوله مشغولين هالبثر
سلطان:سبحان الله الفلوس تغير النفوس دافع ببطاقه بمحل كذا اكيد تقول عن فهد بثر
ضحك بهاج:ياثقل دمك ياسلطان
وقف بهاج يمشي وضحك سلطان واخذ اكياسه بهاج وخرج
سلطان:فسفست حلال ابوك
بهاج:تستاهل ام سعود
سلطان:ان شاء الله انها تستاهل
ركب سيارته بهاج وحط الاكياس خلفه وشغل سيارته وحرك
سلطان:متى بتعطيها ؟ خل نشوفك وانت خروف
بهاج:مو عشاني اخذتك نشتري سوا يعني تدخل بالامور اللي اكبر منك ، اسرار عائليه اذا تزوجت تفهم
سلطان ضحك وابتسم بهاج يسوق سيارته
'
لفت من دخلوا بأكياس الاكل:اخيراً
ريوف:انتوا افتحتم المطعم معاهم والا ايش ؟
بهاج:زحمه زحمه
نورا:كل هذا ؟
حط الاكياس قدامهم وجلس وشال شماغه عن راسه يحطه على ذراع الكنبه
وجلس سلطان وفتح الاكياس ياخذ اكله
فهد ناظر الاكل:افا انا قلت بس بيذبحون لي ذبيحه ببيتي جايب برقر ؟
بهاج:كل ولا يكثر
بهاج:اخذت من اطباعهم انتبه اليوم تشتري برقر بكره يلبسونك شورت
ضحك سلطان شماته ولف بهاج يناظره بحده
ورفعت راسها ريوف:واذا لبس شورت اش المشكله ؟
بهاج التفت لريوف:اعقب
رفعت حاجبها أنهار:ليش ان شاء الله ؟ انت شايف دولابك كله ثياب اصلاً
بهاج:لبس رجال
نورا ضحكت:تو ماتش بهاج !
بهاج:وانا صادق ما يلبس هالملابس غير الورعان
سلطان هز راسه:لا تقولها لا تقولها على الاقل عشان لا تتفشل بعدين ان لبستها غصب
بهاج:من يلبسني غصب ؟
ضحك سلطان:الكيس الاحمر
عض شفته يضحك بهاج ويناظر بحده
والتفت فهد:تتكلمون بألغاز ما افهمها ؟ ترا تركتم ساعتين لوحدكم
مارد بهاج واخذ اكله ياكل ورفع راسه سلطان
:وانتي بالرجعه انا بركب قدام
أنهار رفعت حاجبها:عندي إسم !
سلطان:اللي هو تركبين ورا مع اختك
لفت نورا تناظره وهزت راسها أنهار:تحدي يعني ؟
سلطان:مكان الرجال قدام
لفت أنهار تناظر بهاج اللي ياكل ويناظر اكله:بهاج !
بهاج اخذ نفس وناظرها:خرجيني منها
سلطان:ليه ؟ ماتبي تردها يعني ؟ اي قولها سلطان بيركب قدام وانتي اركبي ورا
أنهار:بهاج !
بهاج ناظرها وتنهد يشوف نظراتها له ببراءه ورمشت بهدوء وهمست:ابغى اركب جنبك
بهاج لف لسلطان:بتركب ورا المره الجايه اخليك قدام وعد رجال ، خلاص انت رجال كبير سلطان كبر عقلك
ضحك فهد وهو ياكل وناظره سلطان:وعد رجال اجل !
أنهار:اسكت سلطان لقافه خلاص انا بركب قدام سيارة زوجي
سكتوا ورفع جسده بهاج وابتسم يناظرها هو انتبه انها تورطت من نقطت بكلمة زوجي بينهم بعفويه وعض شفته يناظرها
ووزعت نظراتها عليهم وضحكت نورا:مو لايق
ضحكت ريوف:لو ماقلتي زوجي ماكان تذكرت انكم متزوجين
ناظرهم بهاج وناظر كيف تغير لون وجهها تناظر اكلها
فهد رفع راسه:والله لو ما اعرفهم قلت انهم متزوجين مناسبين بعض
نورا رفعت راسها له بصدمه:خير ليش هذا الكلام ؟
فهد:وانا صادق
نورا:بهاج اخوها ! اعرف تكلم فهد لا ترمي كلام ماله داعي
رفع راسه سلطان من رجع ظهره لورا بهاج
ونطق سلطان:وش فيه كلام فهد ؟
ناظرته نورا:غلط بغلط لا يقول كذا ويخرب علاقتنا ببعض بهاج اخونا كلنا وأنهار لو وقعت على عقد نكاح ترا بس عشان الظروف وحتى فهد وريوف هذا الكلام ما يعجبني وماله داعي
ريوف نطقت وهي تاكل:غير ان بهاج مو ستايلها
رفعت نظرها لبهاج ريوف وضحكت:سوري بهاج
مارد عليها وكمل سلطان:لا تتكلمون بلسان احد
ريوف لفت لأنهار:مو صح ؟
تنهدت وحطت أكلها على الطاوله وقامت تاركتهم
رفعت راسها نورا تراقبها تدخل ولفت عليهم:قلت لكم فهد ما يعرف يسولف
فهد:ترا زعلت منك ماهو مني روحي اسأليها
نورا:ليش تزعل مني ؟ هي تذكرت الظروف اللي خلتها ترتبط ببهاج وبهاج بحسبة اخوها
سلطان:ماهو اخوها تراهم متزوجين صحصحوا
نورا وقفت وناظرتهم:لا تجنوني وتدخلون هذي الفكره بروسكم الوسخه ، بهاج قول شي
مارد عليها وهو صاد والتفت عليهم:ليتكم تاكلون وانتم سكوت بس وتريحونا
وقف ماشي لأنهار ولفت نورا تناظره ورجعت تجلس
ريوف:منجد اش هذي السالفه اللي فتحتوها فجأه
فهد:انتي كلي وفكينا
ريوف:خير !
ناظرها بحده ورجع ياكل ورفع نظره سلطان يناظرها صاده تاركه اكلها قدامها
'
دخل وفتح الباب بهدوء ورفعت راسها تناظره ورجعت تصد تقدم وقفل الباب خلفه
حط يدينه بجيوبه ومشى لها وتكلمت وهي صاده
:وتقولي قولي لخواتك
رفعت راسها:سمعت كيف يتكلمون علينا ؟
اخذ نفس وجلس جنبها وكملت أنهار:مو طبيعي كيف تنكدت خلاص مو قادره
بهاج ناظرها والتفتت له لانه ساكت وناظرته:حتى انت ما تكلمت لا عاد تقول عني خوافه
بهاج اخذ نفس:انا ماعلي في أحد ولا علي برايهم
أنهار ماردت وصدت عنه لقدام وابتسم يناظرها
:بس كيف قلتي قدامهم زوجي كذا ؟
أنهار:لاني غبيه مادريت انهم بيقلبونها نكاده
بهاج ابتسم ورفع ذراعه خلف ظهرها يسحبها ولفت له تناظر ابتسامته
ورمش بهدوء يطمنها:تعالي بحضني
أنهار:بهاج ! ترا تأثرت مره ما امزح
بهاج مارد وهو يسحبها لحضنه وتقدمت له شبه تجلس بحضنه وابتسم:اقسم بالله ما يهموني وسكت عشانك لاني ابيك انتي تتكلمين وقت ما انتي تبين تتكلمين ماهو عشاني اشوف كلامهم مهم من هم يقولون انك تلوقين علي والا ماتلوقين ؟
ناظرته أنهار بنظرات هاديه وابتسم يرفع انظاره على شعرها يبعده ورا اذنها:انا لعيونك معرّض نفسي لدرب الهلاك لكن والله اللي بقي من عمري واللي راح منه انه فدا
أنهار ميلت شفايفها تناظره يطمنها وابتسم
:ابي اسرقك منهم الحين تروحين تشوفين بيتنا
ابتسمت له وهز راسه:بقول لهم أنهار زعلانه زعلانه مره وتبي تطلع مع زوجها وتقولكم ما أحوبكم
ضحكت تصد عنه من مزحه وابتسم:وش قولك؟
أنهار:اوكيه
وقف بيمشي وابتسمت:بهاج
لف عليها ووقفت تمشي له وابتسمت له تمسك دقنه وتبوس خده
وابتسم يبتعد عنها:ابوي انتي
ابتسمت:بلبس عبايتي
هز راسه وخرج من الغرفه ولفوا عليه:طالعين ننبسط بس تبون النكاده
نورا:اشبها !
بهاج:شفيها يعني ؟ نكدتوا عليها بهالمواضيع
ريوف:بسم الله نسولف عادي
بهاج:لا ماهو عادي ، باخذها تطلع تاخذ لفتين تروق وتفك
ضحك سلطان ولف بهاج عليه بحده يناظره وسكت
نورا ناظرتهم:مافهمت صراحه ليش زعلت ماقلنا حاجه تزعل !
بهاج:ضيقتوا صدرها ماكان له داعي
رفعت كتوفها بإستغراب وخرجت أنهار وناظرتهم
ولف بهاج:شوي ونرجع ان شاء الله ، يالله أنهار
ناظروها ومشت تخرج مع بهاج وقفل باب الشقه وابتسمت له وضحك يمسك كفها وينزل معها للسياره
فتح لها الباب وركبت وركب جنبها وشغل سيارته
:الواحد يتعب لين يختلي بزوجته
ابتسمت تناظر الطريق ولف عليها يناظر ابتسامتها
دخل الحيّ ووقف عند بيتهم:تفضلي يا أم سعود اسبقيني والحين اجيك
لفت عليه:وين رايح ؟
بهاج:بوقف سيارتي زين ادخلي انتي ماعليك انا جايك بس طرفي الباب
ناظرته وهزت راسها واخذت المفتاح من يده ونزلت
دخلت وابتسمت بوسع ثغرها من شافت الحديقه والمسبح والممرات لبيتهم وتقدمت تشوفهم وهمست:خيال
تأملت المكان نفس ما طلبته من المصممه وأحلى
مشت تدخل البيت وابتسمت تفتح أنواره
تناظر جدرانه وانشراحه تحس ان هذا البيت الجماد الوحيد اللي يبتسم ويرحب فيها ويدللها ، الجماد اللي يعشقها وتعشقه
كل خطوه تخطيها وتسمع صوت صداها تعرف ان حتى البيت مشتاق لخطواتها
لمست دربزان الدرج بيدينها الثنتين وهي ترفع راسها تناظره بوسعه ، الأيام اللي جربتها هِنا تخليها تتمنى تعيش فيه أكثر
تدري ان السعاده بتكمن هِنا ، ببيت يحتويها هي وبهاج اللي مجتمعها كله يرفض كونهم لبعض الا هو
الا هو واقف على حيله يصد عن قلبها كل كلمه وكل جمله ، كان يوقف قدام كلامهم كلمه كلمه ويقول لا تصدقينه لا تسمعينه
ودها يشوف الكل بهاج وأنهار نفس ماهي تشوفهم سوا ، كيف يتقاسم اللقمه بينهم ويرضيها ويدللها وكيف يناظرها بنظرات المهتوي العاشق ، كيف يمسح على حزنها بحنيّته يضمد كل جرح قبل تحس بوجعه حتى ، كيف انه يتقاسم الحلوه معها يشاركها كل سرّه وجهره ، يسبق خطاويه لها وما يردها
ابتسمت من دخلت غرفتهم سوا تناظر سريرهم اللي ناموا فيه ليله بحضن بعض تتمنى لو تعيدها بكل لياليها الجايه
تنهدت تخرج للبلكونه وتفتح ابوابها وتخرج تاخذ بوسع رئتها نفس وتغمض عيونها بهدوء يشبه سكون الليل اللي تعيشه حالياً
رفع راسه من شافها بالبلكونه وابتسم يدخل البيت ظلت تناظر الحديقه من مكانها مبتسمه
كل اللي تتخيله وجود بهاج فيها ومراقبته من مكانها هِنا ينتشي من دخانه عدة نفثات
ابتسمت من تخيلاتها اللي ودتها لمكان هادي ولفت من حست فيه يدخل البلكونه ونزلت انظارها للاكياس اللي معاه وعقدت حاجبينها
ابتسم من انتبه لنظرات الاستغراب اللي تعتلي وجهها ورجعت تناظره:اش هذا اللي معاك؟
بهاج تقدم لها ووقف قدامها يناظر الاكياس:انتي أخبر مني فيه
رفع راسه؛تعرفينه وودك تشترين منه خاتم
رفعت راسها بصدمه تناظره وابتسم يناظر صدمتها وحط الكيس على طرف البلكونه يطلع منه العلبه الصغيره وهو مبتسم وهمس:جبت لك الخاتم لكن أحلى وأغلى وأبهى
التفت وهو يفتح العلبه لها:شريتها دبله
رفعت عيونها لعيونه بوسعها مذهوله ونزلت انظارها من فتح العلبه قدامها ورفعت كفها على فمها بذهول وابتسم يتقدم لها ومسك كفها يزيحها عن فمها:ترا مالك نصيب الا نصيبي ، ان قالوا ما يلوق مدي كفك لهم
ناظر اصبعها واخذ الدبله يلبسها وكمل:قولي ماتفهمون
ابتسمت تناظر اصبعها والدبله اللي توسطت كفها وابتسم من شافها تناسب كفها ولها من دون ماتكون بكف احد غيرها هي وحدها
رفع كفها يبوسه وناظرت الخاتم من قرب ورفعت نظرها له:بهاج !
ضحك لانها بتبكي لان الدموع تشكلت بعيونها ونطق:اذا بتبكين بعد هالبكاء كله فرح ! ماني رادك
تقدمت بهدوء وهي تتنهد ورفعت ذراعينها تحاوط عنقه وتبوس خده بهدوء و تحضنه واخذ نفس يغمض عيونه:اييه مابي أكثر من هالحضن ادفنيني هنا
شدت عليه تحاوطه بذراعينها تحس بالخنقه لانها تلوم الكل تلوم الدنيا تلوم الظروف ليش ما يشوفونا سوا ؟
فتحت عيونها تناظر اصبعها اللي يزينه دبله وحطت راسها:حتى لو قالوا ما يلوق وما يصير وغلط ! انا ابغاك بهاج حتى لو يشوفونه غرق انا ابغاك ، اموت غرقانه فيك ، حنانك علي بحر ابغى اغرق فيه ما أنجو
بعدت عنه تناظر ابتسامته اللي على وجهه وناظرت عيونه اللي تتأملها ومسكت كفوفه:لا تتركني
ناظرها وعقد حجاجه:افا من جاب طاري الفراق ؟
أنهار هزت راسها بالنفي:ما ابغى اعيش يوم بدونك انت ساكن فيني بهاج
ابتسم لها يناظر تعبيرها وعيونها اللي تلمع وشدت عليه بخوف:أعشقك
بهاج رفع راسه يغمض عيونه ويتنهد ورجع ناظرها
:وان عشقتيني أنا ما ابي من الناس ناس
ابتسمت له ولف يناظر الكيس الثاني:هذا لبعدين
ضحكت:بتوريني بهاج
بهاج:لا
ناظرته:بهاج ! مستحيل ارجع ماشفت اشفيه من الفضول
لف عليها وناظرته:اموت من فضولي
بهاج:موتي فيني بس
ابتسمت وهز راسه بالنفي:بتركه هِنا ان جيتي معي المره الجايه وريتك
أنهار:بهاج !
تقدم لها يكسر مسافتهم ويثبتها على باب البلكونه ويمسك وجهها بكفوفه يردها وراها ناظرها قريبه منه وهمس:ما أجيك صاحي وأعود سليم ! تدهورين حالي
ابتسمت تشوف نظراته ورفعت كفوفها لكفوفه اللي على وجهها وضحكت لانها تشوفه يندفع لها ينوي جنونه
ابتسم من ضحكتها وحط جبينه على جبينها
:لا تضحكين وتهزميني ، تمسي امي محرومه على أبوك ونصبح على جيّة سعود
ناظرته بربكه من نطق بنيته وغمضت عيونها من باسها
رجفت بين يدينه من مشاعره اللي يشكلها بقبلاته ما كانت تحس غير انها تبيه بقد ماهو يبيها وكل اللي تعيشه حالياً ودها تعيشه للأبد ، بدون خوف بدون قيود
-
جالسه على جوالها بالصاله ورفعت نظرها من قام فهد واخذت ريوف الاكياس تلمهم ومشت للمطبخ
لفت تناظر سلطان اللي يناظر فنجان شاهيه ورفع نظره من انتبه لها واعتدلت بجلوسها
:مافهمت رسايلك اليوم ، اش بغيت مني ؟
سلطان تنهد من تذكر بهاج ونذالته:مابغيت شي
نورا:الا ناديتني وبعدها قلت بسألك ولا رديت علي
سلطان:خلاص تذكرت اللي بغيت اسألك عنه
نورا:اش هو ؟
سلطان اخذ نفس وحط شاهيه وناظرها:انتي بتظلين كذا ؟ تصدين عني عشان لا يطيح بيننا كلام ؟ تناسين اللي صار ؟
نورا عقدت حاجبينها تناظره وكمل سلطان
:اعتبريني ماقلت شي يومها واعتبري الجرح بكفك خدش سكين
نورا ماردت عليه ووقف يتركها وناظرته رايح ورجعت تناظر فنجانه اللي ماشرب منه شي
اخذ نفس وهو قاعد بالمجلس لوحده وطلع جواله بيتصل على بهاج والتفت من شافها تدخل وبيدها الفنجان
نزل انظاره للنفجان ورجع ناظرها
تقدمت ومدت له الفنجان واخذه من يدها وناظرته نورا بهدوء:لا تهاوشني كل ما شفتني
رفع نظره لها وكملت نورا:اذا بتقول كلامك هذا وانت معصب ماراح استوعبه
اخذ نفس سلطان وناظرته نورا:كل كلامك هواش ومعصب ولازم تعلي صوتك علي !
سلطان:انا حار وماكان ودي التفت لكن شديتيني
ناظرته بهدوء وحط فنجانه سلطان والتفت عليها
:ماني كذا تعرفين كيف كنت بأول جيّتكم وكيف صرت الحين
نورا:صرت عصبي وما تخلي الانسان يتكلم معاك
سلطان ناظرها بحده:لو كان هالانسان يفهم ! يسمع ويشوف ! ويجاوب ويرد ويقول وش يبي
ناظرته نورا بصدمه وكمل سلطان:علمنا ما تتعلمين قلنا اقعدي لمي طيوفك اللي رسمتيها ورا الخكري هذاك ، قلنا تلفتي حولك شوفي وش دونك وعندك ما تشوفين
تكتفت نورا تصد عنه وناظرها سلطان بحده ونطق بعصبيه:وتقولين ليش تعصب ؟
نورا عقدت حاجبينها من عصبيته:سلطان !
سلطان ناظرها بحده وعقدت حاجبينها تناظره
:فهمت وشفت خلاص
ناظرها:وش فهمتي ؟
ناظرته ونزلت انظارها:اللي تبغى تقوله
سلطان:ووش رايك ؟
بلعت ريقها تصد عنه ورجعت ناظرته:انت حار لدرجة تبغاني فجأه اشوفك شخص غير اللي كنت اشوفه
سلطان:لا بنعطيك مجال تقيمينا طال عمرك
ناظرت سخريته ونطقت:ما ادري ليش اتكلم معاك وهذا راسك
مشت تاركته واخذ نفس بتأفف هي تسوي نفسها غبيه وتتصدد عنه تاركته حايّر
هو يكمل يخطي لها ولا بيظل بنفس المكان ؟
هي تقوى تنسى حبها الأولي والا بتقعد تهوجس ؟
'
راكبه جنبه بالسياره مبتسم ماسكه كفه وتشوفه يدندن بصوته مع الاغنيه ويرفع كفه يغني وهو فاتح شبابيكهم ويسوق:سيّر علينا ياهوى سيّر علينا
ابتسمت تناظره وتشوف ابتسامته على وجهه
ناظرت دبلتها اللي بإصبعها اللي بكفه وعضت شفتها تناظر الطريق وتتنهد
هي بأحلى أيام حياتها وبأجمل أوقاتها تحلف يمين انها ليله مستحيل تنساها بحياتها كلها
هي قضت الوقت وهي بحضنه تسولف معاه يبوسها ويدللها ويشرح لها حجم حبها في صدره ، مرّ الوقت وهي تلمس بكفوفها شاربه ودقنه وتبوس خده بكل رقه
خفض صوت الاغاني والتفت عليها:تؤمنين بالله ان من كثر ما صدري رحب لو جمعت كل سكان الرياض فيه ما تزاحموا ؟
ابتسمت تناظره ورجعت راسها للخلف تميل راسها تتامله ولف يناظر الطريق وباس كفها والتفت عليها
:ابي اسمعها
ضحكت لانها تفهمه والتفت يناظر ضحكتها:أبي اسمع احلى أحبك بحياتي كلها
أنهار:ماراح تسمعها من احد غيري
بهاج تلفت عاقد حاجبينه:هو في غيرك اصلاً ؟
ابتسمت له:أحُبك مره بهاج
رفع راسه وضحكت من تنهد يشد كفها لصدره وحطت كفها الثاني تحت دقنها تتكي تناظره
:لو تظل تحبني كذا طول عمري بصير نرجسيه !
بهاج ابتسم:كل شي فيني يحبك
ابتسمت له والتفت بهاج يناظر الطريق ووقف قدام العماره ولفت أنهار تسحب كفها منه ورفعت راسها للشقه ونزلت نظرها لدبلتها
قفل السياره وهو يناظرها تناظر دبلتها
وتكلم بهدوء:لو ماودك يشوفونها ويسألونك وما انتي مستعده نزليها
لفت عليه:ما راح تزعل مني ؟
عقد حاجبينه بإستنكار ومسكت كفه:بهاج كل شي مكركب بحياتي مو جاهزه اتكلم مع خواتي انت فاهمني صح ؟
بهاج:فاهمك يا ابوي فاهمك
ابتسمت له ولفت تنزل الدبله وتحطها بشنطتها ونزل من السياره ونزلت معاه ودخلت الشقه ابتسمت تناظرهم جالسين سوا ولفوا عليها من دخلت
جلست وناظرتها نورا:رايقه !
ابتسمت أنهار:حمدلله
نورا:منجدك كنتي زعلانه ؟
جلس بهاج جنب أنهار اللي نطقت:ما ابغى نبدأ من جديد
ريوف ناظرتهم وهي على جوالها:وين رحتوا ؟
نطق بهاج بنفس وقت أنهار لكن اختلف كلامه عنها
بهاج:بالسياره
أنهار:مطعم
التفت يناظر انهار اللي ناظرته ولفت عليهم
:مقفل كان المطعم
نورا:واكلتي ؟
نطقوا سوا ونفت الاجابه بـ:لا
وقال بهاج:اي
لفت أنهار عليه:شرايك تخليني انا اتكلم لحالي ؟
حك جبينه بهاج يناظرهم ولفت أنهار
:شرا لي بهاج اكل بس ما اكلته كله
ريوف؛ترا اكلك بالمطبخ ماخلصتيه
أنهار:مو مشتهيته خليه عندك
فهد:خليه انا اكله
ريوف؛وانت على طول ؟ جاهز ؟ طيب اصبر لين يروحون بسم الله
فهد:اخاف تاكلينه قبلي
ريوف؛مو فيل انا اكل وجبتين
بهاج:ما بتمشون ؟
سلطان:الا تأخر الوقت
بهاج:مشينا اجل
وقف بهاج وقاموا سوا ومشت نورا لأنهار ومسكت ذراعها:تعالي جنبي بليز
أنهار:ليش ؟
نورا:مو مرتاحه
هزت راسها:اوكيه
لفت لريوف:انتبهي على نفسك
ابتسمت ريوف:وانتوا كمان
سلمت عليهم وخرجوا وقفلت باب الشقه وراهم
ولفت ماحصلت فهد ومشت للمطبخ شافته ياكل
:شليويح !
فهد لف وهو ياكل:لا تشاركيني الاكل
ريوف مشت وناظرته:بالعافيه بس لا تغص محد لاحقك
فهد مارد وهو ياكل واخذت نفس:بتكلم معاك بموضوع جدي
رفع حاجبه ووقف مضغ يناظرها بصدمه:انا ؟
ريوف؛كل اللي بفمك وبعدين تكلم كم مره اقولك ؟ايو
فهد اكل وهو يناظرها وبلع لقمته:وش صاير ؟
اخذت نفس:مدري خايفه اتكلم
فهد:اخلصي لا تخرعيني وش فيك ؟ بنت علامك؟
ريوف:شفت يوم جاني ابويه هنا وتكلمنا سوا واخذني معاه للمزرعه ؟
هز راسه فهد كملت ريوف:قالي كلام يخوف
فهد:وشنهو ؟
ريوف؛قال انه مسحور
كح فهد وناظرها بصدمه:هاه !
ريوف:مدري كيف متأكد وليش قالي بس فهد لو تلاحظه هنا غير عن المزرعه
فهد:انتي تسمعين وش تقولين ؟
ريوف:ادري فهد حتى انا مو مستوعبه بس انا شفته بالمزرعه كان غير في شي يضغط عليه هناك انه يكون معصب وما يبغانا وينفر منا
فهد ناظرها بصدمه:ومن ساحره ؟
ريوف رفعت كتوفه:ما اعرف بس هو متأكد من وضعه وانا ملاحظه فهد ابوي تعبان
فهد:اعوذ بالله
ريوف:ابغاك تساعدني ابغى نحلها
فهد:وش احل ؟
ريوف:ابغى اعرف مين ساحره وفين السحر
فهد:لا تدخليني بسواليف سحره يرحم والديك يكفي ديني ماهو زود
ريوف:فهد محد معاي يساعدني ما اقدر اقول لخواتي
فهد:وش تبين اسوي ؟
ريوف:تسأل خواتك امك من ممكن يسحره ؟
فهد سكت يناظرها ونطقت ريوف:مين وده ابوي يتغير علينا ؟
فهد:لا ياشيخه يمكن تتوهمين
ريوف:فهد لا تجنني ! قاعده اقولك هو قالي كأنه يبغاني اساعده
فهد بلع ريقه ونطق:جدتي يمكن
ريوف ناظرته وتقدمت بإهتمام:ليش يمكن؟
فهد:مدري بس زمان كانت راعية هالأمور
ريوف:صح انا سمعتها سمعتها تقول انه جابت عمر للعجوز
فهد:ماودي احط بذمتي لكن تسويها
عقدت حاجبينها ريوف بحزن:وليش تسوي كذا؟
فهد:ما افهم والله بس يمكن تلم شمله معهم
ريوف:كذا ؟
فهد:المهم طلعيني منها هذاني قلت لك
ريوف:ماراح تخليني لحالي
فهد:ريوف !
ريوف ناظرته:فهد ماراح تخليني لحالي
اخذ نفس يصد عنها وناظرته ريوف وهو صاد
:بندور عليه ونفك السحر
لف بصدمه:صاحيه انتي وش نفكه ؟
ريوف:نوديه لشيخ يفكه فهد ماراح اخلي ابويه كذا !
فهد:لا حول ولا قوة الا بالله
ريوف:تكفى فهد
ناظرها وتنهد وهز راسه:طيب يصير خير
ريوف مشت تاركته وخرجت من المطبخ
ناظر المطبخ وخرج:بنت
لفت عليه قبل تدخل الغرفه وبلع ريقه:بتنامين ؟
ريوف:ايوا
فهد:اقعدي شوي
ريوف عقدت حاجبينها:ليش ؟
رفع كفه يحك شعره:مافيني نوم
ريوف لفت تناظر الغرفه:خايف ؟
فهد:اعقبي من وشو اخاف
ريوف:اوف فهد
قفلت غرفتها ومشت الصاله:انا خايفه بس كنت بروح انام عشان لا تطقطق علي
فهد:من وشو تخافين مافي شي يخوف ابوك مسحور مو احنا
بلعت ريقها وجلست على الكنبه تناظره ولف عليها
وفزّ يأشر خلفها وصرخ
ونطت من محلها له تتمسك فيه وضربته من شافته يضحك:مريض تقهر معتوه
ضحك عليها بصوت عالي وناظرته بقهر ورجعت تجلس:غبي
لفت عليه:طلقني يامريض
ضحك وجلس جنبها:ياخوافه
لفت عليه:على اساس انت مو خايف من بعد ماعرفت السالفه ؟
فهد:انا ما اخاف
ريوف رفعت حاجبينها:صدقت
فهد:جالس عشانك والا كان دخلت غرفتي من اول ونمت
حطت راسها على ذراع الكنبه ولفت تناظر التلفزيون
لف عليها يناظرها ورجع ظهره لورا وتكتف يناظر التلفزيون معها
'
سلطان:هذا مكانك اصلاً
أنهار:ترا رجعت ورا عشان نورا طلبتني والا كنت بجلس قدام غصب عنك
لف سلطان يناظر نورا ورجع التفت لقدامه
بهاج تثاوب بنعاس:كان سقت عني وخليت الهرج
سلطان:نعسان لو سقت وديتكم بداهيه
بهاج:على اساس انا مصحصح
أنهار:خذ لك قهوه بهاج قبل ندخل الخط
بهاج:لا ماعليك انتي سولفي وانا اصحصح
ابتسمت له ولفت تناظر نورا:نورا بتشغل لنا اغاني احب ذوقها
نورا ابتسمت لها لانها تبي تغير جوها وتقدمت نورا تمد ذراعها للراديو والتفت سلطان يناظرها
رجعت ذراعها من لف عليها وهمست:اضغطه
رفع اصبعه يشغله ورجعت مكانها تفتح جوالها
بدت تشغل اغاني ما يكررها غيرها هي وأنهار وسلطان وبهاج ساكتين يسمعون دندتهم مع الاغاني
ضحك بهاج لانه ماهو عربي اللي يغنونه ويحفظونه عن ظهر غيب
رفعت جوالها أنهار تتصور مع نورا وهم يغنون وابتسمت بوسع ثغرها للكاميرا
هي عاشت من جديد أجمل ايامها لكن هالمره مع بهاج وخواتها
رفعت نظرها للمرايه تشوفه يناظرها مبتسم وابتسمت له
رجع يناظر الطريق وهو مبتسم
وقف عند المزرعه وفتح البوابه عبدلي ودخل بهاج بسيارته ووقفها
سلطان:بشويش تراهم نيّام
نزلوا من السياره ومشت لبابه اللي فاتحه بينزل ووقفت عنده ولفت لنورا:جايه
هزت راسها نورا ومشت تاركتهم ولفت تناظر بهاج اللي جالس بمقعده يناظرها وابتسم:بتنام على طول ؟
بهاج غمض عيونه:نعسان وعندي دوام بكره
أنهار:عادي احضر عنك
بهاج:لا يا ابوي انتي نامي وش لك بالتعب !
ابتسمت تناظر نعاسه على وجهه وبصوته ومسكت كفوفه الاثنين:تعبك راحه
ابتسم لها وشدها من كفوفها بهدوء تقرب منه وباس خدها برقه ابتسمت وابتعدت عنه تناظره
وهمس وهو يناظرها:نامي ابي اقوم الاقيك
هزت راسها له وناظر عيونها:تصبحين على خير
ابتسمت:وانت من اهله
تركت كفوفه ومشت رايحه للملحق وظل يناظرها محله وتنهد بوسع رئته يناظرها تدخل الملحق
رفع كفه على صدره يتحسس نبضات قلبه ونزل من السياره ماشي لبيته دخل ورمى مفتاحه على الكنبه ودخل وهو يفتح ازارير ثوبه بنعاس وتعب
تنهد من شاف فراشه وقفل الانوار وانسدح وغمض عيونه يشم ريحتها بثوبه بروحه بجوفه وبين ضلوعه هي سكنت داخله هي كل يوم تزيد بغلاها ، كل ما غمض عيونه شافها هي شاف ابتساماتها بوساتها وضحكاتها كانت ماترده عنها كل ماقرب لها
كانت تبيه قد ماهو يبيها قبل يخرجون من بيتهم هي مسكت ثوبه ترده ماتبي تترك البيت وتتركه
لكنه كان مجبور يخرج من البيت يجيبها لهالمزرعه وتنام هي بمكان وهو بمكان
كل عذابه انها تحرم عليه لا هو قادر يطولها ولا قادر يتوب عنها كل ماقرب لها ينرّد