انثنى غيم نجد لخد الحجاز النرجسيه

٦٢

مدت اصابعها تشوف المناكير اللي اختارتها وابتسمت تتأمل شكلها وقفت تحرك شعرها بيدها كيف قصت شعرها وغيرت لونه واخذت جوالها ترد:الو
بهاج:اقسم بالله مبسوط
أنهار:خرجت من عندهم ؟
لف بالسياره وهو يناظر الطريق:خرجت ومعي عقد يثمّن ويسعرّ اني اصير بعد سنتين مليونير
ابتسمت بضحكه:طيب وبتجيني نحتفل سوا ؟
بهاج:اجيك هو أنا وين ألد غير لطريقك ؟
بللت شفايفها تعضها وجلست:استناك
اخذت نفس من قفل ورفعت جوالها تتصور لين دق عليها واخذت شنطتها وخرجت من الصالون
تقدمت لسيارته ونزل راسه يناظرها وعقد حاجبينه ركبت جنبه بربكه وابتسم بذهول ولفت له وضحكت:ايش ؟
ناظر شعرها ورجع ناظرها:احس انك غلطانه بالسياره اختي ؟
صدت لقدام ترفع شعرها بإرتباك وحيا ورجعت ناظرته:واذا غلطانه ليش تطالع فيني كذا ؟ انا يحبني رجال يمكن يعور عيونك
حط يده تحت دقنه وبيده الثانيه ماسك الدركسون ويناظرها:منهو هذا اللي تعرفينه وتحبينه ؟
لفت تناظره:بهاج
بهاج عقد حاجبينه؛ولد سعود ؟
هزت راسها وعض شفته بهاج:ايا المحظوظ ياولد سعود
ضحكت تصد عنه وميل راسه يقرب لها وهمس:قربي مني شوي
لفت له تشوفه مميل راسه وميلت خدها له وباس عنقها وشدت على كفوفها ببعضها وابتعد عنها ولف وهو يناظر مبسمها وهمس:دايخ أنا
لفت عليه وضحكت:بهاج !
حط يده تحت دقنه:عيديها مره ثانيه
حطت يدها تحت دقنها تقلده:بهاج
عض شفته وهو مبتسم وهز راسه يلف يناظر الطريق
ابتسمت بإرتباك واخذت نفس من حرك ومد كفه لها ومسكته وناظر الطريق:جيعانه واجد؟
أنهار:يعني
بهاج:نمر نشوف لي سياره ؟
لفت له أنهار:من هنا ؟
بهاج؛اي
أنهار:اوكيه
وقف سيارته ونزلت معاه تشوف المعرض والسيارات اللي قدامها وماسكه شنطتها بيدينها الثنتين
اختار سيارة أحلامه السياره اللي كان ما يتوقع يقدر يجيبها ويسوقها ويشتريها ، الأحلام اللي كانت مطرّفه من صعوبتها قاعد يعيشها حالياً
لف لها يناظرها واقفه بشنطتها تناظره مبتسمه وهو يجرب السياره وراكبها التفت يناظر السياره بعدم تصديق وإمتنان للرب
نزل من السياره يصافح الرجل اللي بيده أوراق السياره وابتسم من سمعه ينطق له:مبروك
مشت معاه من خرج والاوراق معاه وركبت جنبه والتفت يحط اوراقه بالخلف وناظرت ابتسامته:مبروك
بهاج ابتسم:باركي لي اذا وصلت للرياض وركبتي معي ، انتي اول وحده بتركبين يميني
أنهار:يعني راجع الرياض بسياره وعقد شغل وزوجه جديده ؟
ضحك:لا زوجتي مو جديده بس صبغت شعرها
ابتسمت ولفت للطريق ونطق بهدوء:شريت لي بيت بالرياض
لفت له وعقدت حاجبينها:ليش ؟
بهاج:لأمي
سكتت تناظره وكمل بهاج وهو يسوق:ما بخليها تقعد هناك مالها أحد
أنهار:واذا مارضت تجي ؟
بهاج:ما بتخليني
أنهار ناظرته كان متمسك بأمل ان امه فعلاً ما تخليه بس هي تشوف معاملة حليمه تشوف تعاملها جفاها وهجرانها
ولف يبتسم:واذا ماجات اخليه ايجار ينفعني
ابتسمت بهدوء وتلاشت ابتسامتها من صد للطريق هو بوسط نجاحه وصعوده طرت عليه أمه وتشوف فيه كيف تغيرت ملامحه من طرت عليه
وقف عند الفندق ونزلت معاه ومد كفه لها وتقدمت له تدخل الفندق دخلت المصعد معاه وابتسمت من شافتهم سوا بالمرايه ورفعت جوالها تتصور معاه ابتسم لها من شافها بتصور
وحاوطها يبوس خدها وناظر الصوره:ريحتك تخترقني حد العظم
ميلت راسها تناظر انعكاسه وابتسمت من وقف يخرج من المصعد ماسك كفها وهي تمشي معاه
فتح باب غرفته والتفت يناظرها وعرفت ان نظرته نظرة الهالك المنتشي
دخلت معه تناظره كفوفه بكفوفها يرجع وراه وعينه على خواتمها بيدها ينزعها من اصابعها وهي تمشي معه
رفع عيونه لها وتقدم ينزل عبايتها عنها وهو يهمس
:انتي فيك من النار واللهب اكثر مافيك من الطين
رفعت عيونها له وبلعت ريقها:نجلس نسولف بالبلكونه ؟
بهاج:اي سوالف واي بلكونه يا أم سعود الصبر ملّ حيله
رفعت كفها لصدره من قرب منها ونزل انظاره لثغرها لجمرها للمُهلك النَدي:جمر وجهك يحرقني ويغرقني أموت عشان أوصله ، كيف يكون الشي جامع للنار والماء بنفس الوقت ؟
ابتسمت من رجعها وراها:اذا جلسنا بالبلكونه سوا وعد بقولك حبيبي وأدلعك
نزل راسه ورجع ناظرها:انتي مصرّه على البلكونه هذي ؟
ابتسمت له وهزت راسها بربكه ومد ذراعه لظهرها يناظر ابتسامتها وتقدم يبوس عنقها ورجفت بين ذراعينه وابتعد عنها وهمس بصوته الحنون:ما ينفع تدلعيني هنا ؟ ناديني حبيبي
ضحكت بغنج وعض شفته يناظر ضحكتها وخجلها
وهمس وهو يهز راسه:انتي هلاك ولد سعود وأبو سعود
قرب يقبّل جمرها ويحررها من الحرير اللي تلبسه
'
دخل المزرعه وهو منزل راسه وعاقد حاجبينه مفتاح سيارته بيده ويمشي وهو يناظر خطواته رفع راسه من جا بيفتح باب بيته وخرجت أمه منيره
وناظرها:هلا يمه
منيره:وش جابك ؟ جاي لوحدك؟
عقد حاجبينه يدخل مفتاحه بجيبه:اي ليه
منيره:بهاج وينه ؟
سلطان:علامك وش صاير ؟
منيره:اسمع ابوك يتكلم عن قضيه وماقضيه وشموخ بيدخلونها فيها
عقد حاجبينه سلطان:شموخ وش مسويه ؟
دخل البيت وهو يسمعها تمشي خلفه:ظنتي حريق المستودع
سلطان:اي وش دخلها طيب شموخ ؟
تقدم لين شاف شموخ:وش السالفه ؟
شموخ:قلتي له على طول ؟
منيره:هذا موضوع يتخبى عن اخوك
سلطان:وش صاير احد ينطق
شموخ:جدي بياخذ حقه بس
سلطان؛حقه من من ؟
شموخ:من اللي حرق مستودعه
سلطان؛وانتي شدخلك ؟
شموخ:شاهد
سلطان رفع حاجبه:شموخ !
شموخ:اي شفت بعيني أنهار وهي تحرق المستودع
سلطان ناظرها بحده:لا تكذبين
شموخ:ماكذبت سمعتها بإذني تقول انها حرقته
سلطان وقف:سمعتيها ما شفتيها ، اخرجي من مشاكل جدي احسن لك
شموخ:انت ماقدرت تاخذ بحق سمعتي من بهاج انا باخذها
سلطان؛بهاج شدخله بأنهار لا تشهدين زور
شموخ؛احرق قلبه بأنهار الدلوعه اللي يوم زعلت ولعت بالدنيا وطيحت جدي بالمستشفى
تقدم لها سلطان بعصبيه ومسكته منيره:يا سلطان
شموخ:ماراح توقفني ياسلطان وبشهد مع جدي
سلطان:وانا بوقف ضدك واشوف لك حس تنطقينه ، تشهدين زور اخر عمرك !
منيره:ابوك معها
سلطان:وابوي فقد عقله مع عمر ؟ علامكم انتم ؟
شموخ:لازم تاخذ حقها وتنسجن حرقت مستودع جدي وطيحته بالمستشفى
سلطان:بنشوف ياشموخ تقدرين تنطقين والا لا اكسر ذا الراس ان شفتك تدخلين
منيره مشت خلفه وهو طالع:سلطان يا أمي
لف عليها:امسكيها لا افتري فيها
منيره؛بتقول لبهاج ؟
سلطان طلع جواله:مدري مدري
لف يناظر الدكه من بعيد وهمست منيره:تكفى لا تدخل بينهم
سلطان:عقلي اللي داخل اجل
منيره:ماهو مني ابوك معها
سلطان اخذ نفس بغضب ورفع جواله يتصل وابتعد عنها رفع يده على جبينه ينتظر رد
'
كان جالس على الكنبه وهي جالسه بحضنه
رفع شعرها بيدينه الثنتين وهو يناظر وجهها:بقي شي ماشفناه هنا ؟ ما مليتي ؟
أنهار نزلت كفوفها لأزارير ثوبه:انا صار ودي نعيش هنا
سكت يناظرها وكملت وهي تناظر دقنه اللي تكثف من جديد ولمسته بكفوفها ورجعت تناظر عيونه
:ماودي نرجع
بهاج:لو رجعنا رجعنا زوجين ومحد له كلمه علينا
أنهار:بتجيب امك الرياض
اخذ نفس من طاري امه وحك شاربه يصد بنظره
:بس ما بتدخل بيني وبينك
أنهار:واذا أحد جرب يبعدك عني بزعله
ابتسم لها وكملت أنهار:بحرق الدنيا ولي سوابق
ضحك وابتسمت من ضحكته وناظرت عيونه بترجي:ما ابغى ابعد عنك
بهاج لف وجهه:بوسيني
ضحكت تناظر ابتسامته وخده اللي قدامها وتقدمت تبوس خده وحاوط خصرها بذراعينه:انا احاوط عقالي ما احاوط خصرك
ابتعدت عنه من لف وجهه وهو مقربها لحضنه وابتسمت تميل كتفها ورفع شعرها:ولابسه فوشي ؟ انتي الفوشي حلو والاحمر حلو والازرق حلو انتي كل الالوان تحلينها ما تحلو عليك
ضحكت وهي تلمس دقنه:لابسته عشان تقول اني دلوعه
ضحك لها وهز راسه:يا دلوعتي
لف من دق جواله وناظره على السرير وقامت من حضنه تمشي لجواله وناظرت الاسم:سلطان داق سناب
مدته له واخذه ورد:هلا
سلطان:لوحدك ؟
سكت بهاج ثواني:لا ليه ؟
سلطان:ابتعد بكلمك
لف لأنهار يناظرها واقفه وابتسم يوقف ويبعد الجوال عن اذنه ويبوسها ابتسمت من ابتعد يحط جواله ويخرج للبلكونه:وش العلم ؟
سلطان:ان قدرت ترجع الليله ارجع
بهاج:وش صاير لا تخرعني
سلطان:جدك مشتكي على أنهار وبياخذ شموخ شاهد عيان بيتعقد الموضوع بهاج
سكت بهاج وجمد وجهه ثواني ولف خلفه يشوفها جالسه على جوالها ورجع صد:الله يلعن الشيطان
سلطان:بحاول اهجد شموخ ادري فيها محروقه وزادوها بس ارجع وهدّ الموضوع
بهاج:طيب
سلطان:محلوله ان شاء الله لا تبطي
بهاج قفل جواله وظل يناظر المنظر قدامه وعقد حاجبينه ونزل نظره لجواله وهو يدق
انتظر ثواني وابتسم يرد:السلام عليكم ، كيف الحال ابو احمد ؟ ما كفتنا الشراكه نبيك بخدمه ، ماتقصر ، ابي استشاره قانونيه عند محامي هنا بأبوظبي الليله اذا تقدر ضروري ، ابي احلها قبل ارجع السعوديه ، ماتقصر دبرني وعطني علم ، ماقصرت تسلم
قفل جواله وعض شفته التفت يناظرها منسدحه على جوالها وتلعب بشعرها بيدها هم بيعورونه بها ولا يقوى ما يقوى وهي ماتقوى
نزل انظاره يفتح جواله ويدخل على رقم امه دق عليها وهو يناظر أنهار وصد من ردت
نزل راسه:يمه
سكتت حليمه من عرفت صوته ونطقت بعد ثواني:ماهو رقمك
بهاج:وش قاعدين تسوون ؟
حليمه:وصلك جديد الشيبه؟
بهاج:ليه طيب ؟ هم افهم وش يبون انتي ليه يمه ؟
حليمه:عرفت يوم اقولك طريقها ماهو سهل ؟ عرفت انها مابتصير قوه لك بتصير ضعفه ؟
بهاج:مادريت ان الواحد ينلام على حبه ؟
حليمه:هذا ماهو حب هذا طيش وجهل منك ماتعرف وين حطيت نفسك يوم حطيت البنات برقبتك تحسب انك اقوى من عمر وابوه ؟ ، بهاج تراهم بدوا ينهشون لحوم بعضهم البعض لا تدخل بينهم
بهاج تلفت بجنون:وقفيهم انتي وقفي قدامهم امنعيهم قاعدين يأذون ولدك ، ياخي مره وحده ابي احس انك امي
سكتت حليمه وكمل بعصبيه:ليه تسكتين عندي ؟ ليه دافعتي عن زواجك وعن عمر وعن نفسك ويوم جيتي لي سكتي ؟ من لي انا اذا انتي معهم ؟ مره وحده قولي بمشي مع شوره ورايه وهو وش يبي
حليمه:والله ما بيخلونك لو وقف قدامهم من يوقف ، بيسمعون مني يعني ؟
بهاج:على الاقل ادري انك وقفتي
ماردت عليه وسكت بهاج وهز راسه ثواني وبلل شفايفه:محد يطلب الحب ولاني طالبك اياه بجي وأهدّ المزرعه باللي فيها وبيعطيك سلطان مفتاح بيتك بالرياض شاريه لك وعشانك لان مالك مكان عندهم ، اسكني فيه وتنعمي بس لا تدوريني
شد على قبضة كفه وتمسك بدربزان البلكونه:فمان الله
قفل منها لأول مره يحس وده يبكي وده يحلق الشارب اللي يمنعه يبكي وده يرمي بعرض الحايط رجولته ويبكي يبكي لانها امه لان ان جات على امه هو طفل هو ضعيف هو وحيد هو هشّ ونحيل
نزل انظاره يناظر الكوب اللي انحط عند ذراعه والتفت عليها ماسكه كوبها ولابسه روبها الحرير:صار شي ؟
التفت واخذ نفس:لا
ناظرته بتوتر:بهاج !
بهاج لف عليها:امي بس
ما كمل كلامه يجلس ولا ضغطت عليه من ناظرت حاله وعقدة حجاجه وجاته رساله وفتح جواله يقراها ورفع راسه لها:تبين تطلعين ؟
أنهار:اذا ودك
بهاج؛تجهزي نخرج
هزت راسها تحط كوبها على الطاوله ومشت له وناظرها تنحني له تبوس خده وتمسح على ظهره بذراعها
رقّ قلبه بضعف من شم ريحة عطرها من قربها ورفع ذراعينه يحضنها وجلست جنبه من حضنها ورفعت ذراعينها تحضنه وعقدت حاجبينها من سكوته ومن حاله ومن حضنه
لمست شعره وكتوفه بخوف وهمست:حبيبي
تنهد من نطقت وابتسم يبتعد عنها وابتسمت من ابتسامته
بهاج؛انتي ناديني حبيبي دايم والأمور زينه
أنهار:اذا بغيت تقول شي اسمعك
بهاج؛ادري بك
ظلت تناظره يناظرها بتأمل وساكت وعرفت انه ماراح يتكلم ووقفت تدخل داخل
رجع ظهره لورا وغمض عيونه يتنهد بتعب
-
دخل وشافها لابسه وحاطه ملابسه على السرير وناظر الملابس وتنهد:أنهار تكفين
أنهار:بتلبسها حلوه عليك بهاج والله تكفى عشاني
بهاج:والله ماني كذا ماني كذا
أنهار:جرب طيب بس بهذي الطلعه بليز بهاج
لف يناظرها وميلت شفايفها تناظره وابتسمت
:بليز حبيبي
سحب ملابسه من السرير:ابو سعود
ضحكت وابتسم من ضحكتها ومشى للحمام واخذت شنطتها تعدل شكلها وتلبس اكسسواراتها وساعتها وتنتظره يخرج
وفتح الحمام وطلت وغطت فمها تصرخ:بهاج
ناظرها بحده ووقفت:ياناسو بهاج
رفع حاجبه لها ومشت تسحبه من ذراعه للمرايه:تكفى شوف كيف التيشيرت مبين جسمك حلو مبين عمرك
ناظر شكله وعض شفته:هذا شكل رجال ؟
أنهار حضنت ظهره من وراه وابتسمت:والله قمر بهاج حلو عليك ، نتصور ؟
بهاج لف عليها:ياويلك بتفضحيني عند العربان
ضحكت تسحبه من ذراعه:بليز بهاج والله حلو شكلك ليش مو راضي تقتنع
بهاج:لا تحاولين
أنهار:طيب واذا قلت حبيبي مره ثانيه ؟
ناظرها بحده وابتسمت تناظر حدة نظراته:حبيبي وحياتي وعيوني الثنتين وروحي كمان
وكملت كلامها بالانقليزي وعض شفته يناظرها تدلل وهي ماسكه ذراعه ومسكها من فكها:لا تطلعيني خفيف
ضحكت تاخذ جوالها وتوقف جنبه ووقف واخذ نفس وتصورت معاه وهددها بإصبعه:لا تنزلينها بمكان ياويلك
مشى ياخذ جواله وبكت دخانه وناظرت الصوره وابتسمت:اوكيه حبيبي
لف عليها يناظر انشغالها بجوالها وهز راسه بأسف وحط الزيقاره بفمه ومشى ولبست عبايتها قدامه وخرجت معاه
اخذ نفس يناظر ساعة يده هو مواعد المحامي ولاوده يبطي عليه حك شاربه يركب السياره وركبت جنبه أنهار
كانت في أسعد لحظاتها ابتسامتها ماغابت عن ثغرها تسمع اغاني تحت مسامعه وتغني معاها وتتصور وتحرك شعرها اللي لونته وصارت أحلى من قبل مايدري هي آثار السعاده حلتها والا حبها له ؟ لكن ماوده يغيب المبسم الذبّاح
تلف عليه بالجوال وتغني له ويبتسم لها وتبدل الاغاني طول طريقهم وقف عند المطعم ونزلت معاه
جلست على الطاوله وهي تختار لها طبق تاكله وناظر جواله اللي دق ورد:هلا ، طيب استريح انا جايك
رفعت عيونها له وقف وناظرها:ابوي أنهار ماني مبطي اطلبي لي ولك بقابل واحد بالشغل هنا وجايك
أنهار عقدت حاجبينها:بتطول ؟
بهاج وقف:لا لا اطلبي واجيك
تركها ومشى ينزل للدور الارضي وناظر اللي جالس على طاوله لوحده وتقدم:حميد ؟
التفت ووقف وابتسم يصافحه:اهلاً بهاج
بهاج ابتسم:كيف الحال ؟
جلس قدامه وجلس حميد:حمدلله منور أبوظبي
بهاج:بأهلها ماقصرت ادري اشغلتك وتعبتك بالجيّه
حميد:عمي أبو أحمد طلبني ومستحيل ارده
بهاج:لا هان ابو احمد ولا هنت
حميد:وش الموضوع ؟
بهاج اخذ نفس:في قضيه مرفوعه على زوجتي بالسعوديه وودي اعرف الاجراءات قبل ما ارجع
حميد:بخصوص ؟
بهاج:زوجتي حرقت مستودع يخص جدي ومحد عرف بهالشي ولاحد شافها وقريب عرف ورفع قضيه لكن مع شهود عيّان زور ، لو تنكر بيفيد شي ؟
حميد:هي فعلت الجُرم يابهاج
بهاج:عارف عارف لكن مافي دليل عليها
حميد سكت ثواني:اذا مافي دليل ممكن تخفف عقوبتها وممكن يساعدك محامي شاطر ويخليها تحاكم وهي حرّه لكن مع الشهود اتوقع انها بتحاكم وهي مسجونه والمده اللي بيسجنونها فيها بتكون كافيه لين إصدار الحكم وممكن يطلب تعويض مادي زياده لو في ضرر كبير
رجع ظهره لورا بهاج بضيقه وعقد حاجبينه
وناظره حميد:بس دامكم أهل أنا أشوف تسير حق يدك وتقنعه وتعتذر منه وتعوضه
بهاج نزل انظاره يفكر وكمل حميد:اذا تبي اعطيك رقم محامي بالسعوديه اعرفه !
بهاج هز راسه:ياليت
حميد:تمام ارسله لك على رقمك وانت تواصل وياه وان شاء الله محلوله
بهاج:طيب تعرف كم مدة العقوبه ؟
حميد:يختلف ياخوي هني عندنا بالامارات وعندكم غير يبي لك تستشير محامي سعودي
بهاج هز رجله بتوتر وناظره:ماقصرت اخذت من وقتك
حميد:ابد
وقف حميد تاركه وظل يهز رجله ويناظر الفراغ وساهي بيضطر انه يترجى جده وينذل تحت رجول عمر عشان محد يمس من أنهار شعره لكنه ما يقوى
بلل شفايفه وهو عاقد حجاجه من الضيق وده ينزع هدومه اللي عليه ، هو في جوفه ضيق ما ينشاف ولا يجيب له طاري لها مع انها بتدري
نزل انظاره لجواله من شاف سلطان يتصل ورد عليه
سلطان:وش صار معك ؟
بهاج هز راسه بتكرار:ضاقت ياسلطان
سلطان:اسمع بهاج ماتضيق الا وتفرج صدقني محلوله
بهاج:وش صار معك انت ؟ كلمت احد ؟
سلطان رفع انظاره لمراية سيارته يناظر جرح حاجبه
:متى راجع انت ؟
بهاج:بكره ان شاء الله ماني مطول
سلطان:طيب ان جيت نتكلم ان شاء الله
بهاج تنهد وسمع تنهيدته سلطان ونطق بهدوء
:معك أنا ماني مخليك بتهون وأنا أخوك
بهاج نزل نظره:ان شاء الله
قفل من سلطان ومسك راسه بيدينه الثنتين واخذ نفس يوقف يرجع لها
رفعت راسها وهي تكلم:رجع بهاج
ناظرها وجلس قدامها وكملت أنهار:ما أعرف ريوف متى نرجع صراحه
بهاج اشر لها ببكره ورفعت حاجبينها بذهول
ريوف:وحشتيني لا تطولين بشوف لون شعرك بالحقيقه كيف
ابتسمت أنهار:اوكيه ان شاء الله
قفلت من ريوف وناظرته:مافهمت
بهاج:بكره راجعين ان شاء الله
أنهار:ليش ؟
بهاج اخذ نفس:شغلي بالرياض لازم احله ولازم اسلم العقد لإبراهيم الناس تنتظر
أنهار:ماقلت لي
بهاج:اي يوم تكلمت الحين مع الرجال ذا عرفت
لازم ارجع بكره وغير محاضراتي اللي ساحب عليها
أنهار:ريوف قاعده تحضرها مو ساحب عليها
بهاج:بس لازم نرجع
أنهار:صار شي بالشغل يعني ؟
بهاج:لا لا امورنا زينه
أنهار:ما اعرف احسك متضايق
رفع نظره عليها ثواني وأبتسم:منين يجي الضيق وانا معك لابوه من ضاق صدره وهو معك
ابتسمت له تناظر عيونه ونزل انظاره للاكل يكمل يسألها وهي ساهيه تناظر حاله نزلت نظرها ليدينها اللي كانت ترجف بخفوت ولعيونه اللي صدت عنها
هو من يوم كلم سلطان اختلف حاله ماتعرف لو امه فعلاً ضغطت عليه او رفضت وهذا سبب اختلافه او في شي أكبر
'
وقف عند البيت وعقد حاجبينه يناظر جرحه ونزل من السياره ومشى يدخل البيت وقف عند الباب بالحديقه واخذ جواله يتصل عليها
جلست من شافت اتصاله وردت بهدوء:الو
سلطان:افتحي لي الباب نورا انا برا
لفت تناظر الحديقه ونزلت انظارها للبسها وعضت شفتها:برا فين ؟
سلطان:بالحديقه
ارتبكت ووقفت ترفع شعرها:طيب سلطان عادي تخرج شوي لين افتح الباب
عقد حاجبه:ليه ؟
نورا:انا بالحديقه بدخل البس وافتح لك
لف يناظر الحديقه ونزل من الدرج بخطوات هاديه وهو يمشي:بالحديقه لوحدك ؟
اخذت نفس وهي تكلمه وتناظر المسبح اللي امامها
:حلو الجو وخرجت اتنفس شوي
تقدم من لمحها من بعيد تكلمه وهمس:تفكرين بكلامي ؟
نورا غمضت عيونها بقوه وانحنت تلبس شوزها:سلطان انت قلت بترجع المزرعه ليش جيت اليوم ؟
سلطان سكت وهو يتقدم لها ووقفت من لبست شوزها ولفت تاخذ ايبادها وجوالها على اذنها ولفت بترجع وجمدت محلها من شافته واقف ويتقدم لها بهدوء
ارتبكت من قفل جواله وعينه عليها وناظرته لين وقف قدامها وبلعت ريقها:قلت لك لا تجي
سلطان نزل انظاره لشامتها الواضحه بسبب بلوزتها العاريه والشورت اللي لابسته هي كانت أمامه شبه عاريه ولأول مره يشوفها كذا ، عنقها الطويل وشامتها اللي تزيّنه وطولها وخصرها هو لمس نعومتها من أبصاره فقط
توترت من طال بالنظر وتدري ان عيونه طايحه على شامة عنقها لكنها ارتبكت لان لبسها ماهو محتشم
مشت من جنبه بتبتعد لكنه مسكها من ذراعها ولفت عليه وناظرها من قريب
:مادام النظر مسموح !
ناظرت عيونه ونظراته لها بإرتباك والتفت بكل جسمها لها ونزل انظاره لشامتها:بعيد تلوينها من جديد ماجاز لي ان السواد يتلون فيك اني ما تلونين الا بالورد
نورا:بدخل سلطان
سلطان:ليه ؟ انتي قلتي لي انك موافقه
نورا:قلت لك اوكيه بس ماتزوجنا ترا !
سلطان:متى ؟ ترا شمس بهاج وأنهار غاربه
نورا عقدت حاجبينها:ليه اش صار ؟
سلطان رفع اصبعه لحاجبه:ما لمحتيه ؟
نورا:من ايش ؟
سلطان:مطرود من المزرعه عشان كذا عودت
نورا:اوكيه اجلس دقايق واجيك
فلتت ذراعها منه وتنهد منها وجلس ينتظرها
دخلت وبلعت ريقها وغيرت ملابسها واخذت عبايتها وخرجت من غرفتها طلعت له ومشت وجلست جنبه
:اش صار ؟ مين طردك ؟
سلطان:الشيبه
نورا:عشان ايش ؟
سلطان التفت عليها:يبون يخربون بين بهاج وأنهار وما سكت تهاوشت معهم وطالت اصواتنا وما لقيت الا عصاته على وجهي يطردني
عقدت حاجبينها:مجنون هذا ؟
سلطان رجع ظهره لورا:المشكله حتى ابوي معهم هم ناوين الفرقى لهم وانا ادري لكن وش بيدي اسوي ؟
نورا:خلاص ياخي لين متى يتدخلون بحياتنا مو معقول يوم وصلهم خبر ان بهاج وأنهار مسافرين يبغون يعكرون عليهم حياتهم ؟
سلطان:مايدرون زين انهم ما يدرون اجل وش بيصير
نورا:بهاج دام اختار أنهار وأنهار تبغاه محد يقدر يغلبهم خلاص
سلطان:تقولينها ؟ يعني حبل الحب ما ينقطع ؟
ناظرته من لمح لها وصدت عنه وكمل وهو يناظرها
:امهليني عمر لين الله يجيب الكلام
نورا:قلت لأهلك ؟
سلطان هز راسه بالنفي وناظرته صاد والتفت عليها
:بيّن ماراح يوافقون علينا اصلاً
ماردت عليه وكمل سلطان:ومعد اهتم لرايهم ان كنت باخذك فباخذك من بهاج
نورا شدت على كفوفها بربكه:سلطان لا نتكلم عن الموضوع هذا يعني بدري
سلطان:ليلنا طويل ان قعدنا على شورك
نورا:شوف المصايب كيف حوالين بهاج وأنهار ! مو وقتنا احنا كمان نتكلم بالموضوع
سلطان ناظرها:بتخبين عن خواتك انتي بعد نفس اختك ؟ انتم وش عندكم بالخبايا ؟ تستحين تقولين ابي سلطان ؟
نورا:سلطان لا تعصب علي
ناظرها بحده:الا بعصب وش له الخبايا وبعدين يا سلطان وبعدين ؟ اي بنص النيران باخذك ونتزوج وش عندك
سكتت من عصبيته وهمست:بعيد النظر بقراري طلعت عصبي
لف عليها بحده وناظرها صاده عنه بزعل وكملت وهي تهمس:وترفع صوتك كمان
سلطان:اي سلطان ماهو متوازن وخشن وجلمود لكنه يلين ويلين معك
ناظرته:واضحه ليونتك حاسه فيها
عرف انها تهزأ منه واخذ نفس يصد وبلل شفايفه والتفت لها بجسمه كله وناظرته ونطق:وانتي مدلعه
رفعت حاجبينها بصدمه وكمل:اي لا تطالعيني كذا مدلعه تبين كل شي على شورك
نورا:الشرهه علي جالسه معاك
وقفت بتقوم وسحب ذراعها:اقعدي
ناظرته:ماراح اجلس
سحبها وناظرها بغضب:اقعدي قلت
صدت عنه بحده وجلست وتكتفت تصد عنه بزعل
وهمس بكبرياء:اسف
ماردت عليه وكمل:انتي مفتاح ارتياحي انتي لا روّق مزاجك مزاجي معك راق ، ماني معصب عليك ناوليني باللين وبلين معك
لفت عليه:اها خفيف يعني
ناظرها بحده:اعقب
صد عنها من ضحكت تستفزه وهمس:صبرك يارب
نورا ربتت على كتفه:بدوي وخشن وعصبي بالنهايه مفتاحك عندي
سلطان:انتي ما ينقال لك شي ؟ منتي وجه مراضاه
نورا:مراضاه ؟ لا اذا بنجي على المراضاه ما يرضيني كلمتين
رفع حاجبه يناظرها وكملت تعدد على اصابعها
:ورد وهدايا وسفر وعزايم بعدين الكلام
صد عنها وابتسمت من حست انها تستفزه والتفت عليها:ليه الكلافه ؟ انتي ينقلب حالك بكلمه
نورا ضحكت:انا ؟ استحاله انا ثقيله ترا
سلطان ابتسم من ثقتها ومن ضحكتها ومن انتهت من ضحكتها نطق:أحبك يا أول عناقيد البنات
ناظرته وهدوئه وابتسامته وصدت عنه تخفي ابتسامتها بكبرياء وضحك لانه يدري بها وصد عنها وهو مبتسم
'
ركبت جنبه:بسرعه لا نتأخر
فهد حرك:انا مدري ليش طاوعتك وش يدخلنا عند شيخ ببيته يمكنه ساحر ويضحك علينا ونبتلش احنا بعد
ريوف:يسحرنا كيف بالله فهد ؟ بعني حمار وتسولف
فهد:استهبلي علي لين تستنزلين عنده
ضربته بخوف:لا تخوفني
فهد:شوفي العنوان بس
وصفت له الطريق لين وصلوا لحاره وهمست:يخوف شليويح
فهد:شليويح بيديور شكله
ريوف لفت له وبلعت ريقها:خايف ؟
فهد:اي خايف بقولك لا والله ركبي تصاقع ببعضها
ريوف:تكفى فهد خل نحلها ونخلص ماراح نطول
وقف عند البيت ونزلوا ومشت معاه تمسكت بذراعه ودخلوا العماره وطلعت الدرج وهي تهمس
:الدور الاخير يقول
فهد ناظر الدرج الصغير والطويل وناظرها متمسكه فيه وهمس:انتي لازم تخافين عشان تكونين قريبه مني هالقد ؟
ريوف ناظرته وهي تمشي:مو وقتك شليويح
فهد:صادقه
وقف عند الباب وهي متمسكه فيه ولفت له:ظلام ياخي ليش مافي اضاءه
فزّ يأشر خلفها وصرخت تحضنه وضحك بعلو صوته وضربته بقوه وابتعد عنها وهو يضحك
صرخت في وجهه:غبي وثقيل دم طلقني الحين بسرعه
ضحك وهو يناظرها وناظرته بحده:بخلعك لو عدتها
فهد التفت من انفك الباب وهمس:بسم الله
بلعت ريقها ريوف وهي تناظر الحرمه اللي متغطيه
فهد:سلام
:وعليكم السلام ورحمة الله وبركاته
فهد:الشيخ نبي الشيخ
:من مسحور فيكم ؟
ريوف:بسم الله علينا
فهد:لا طال عمرك نبي نستشيره بسالفه بس
ريوف:انا كلمته واتس اب قالي تعالي
هزت راسها تناظرهم:ادخلوا
بلع ريقه فهد يمشي معها ودخلوا لين توسطوا الصاله وناظروا الشيخ اللي قاعد
رفع راسه وهمس فهد:سلام عليكم
هز راسه يرد السلام واشر لهم يقعدون قدامه ومشت ريوف تجلس جنب فهد تناظر الشيخ وناظرها الشيخ ورجع ناظر فهد:ماعندك غيره على زوجتك يا أخي
فهد:الا والله بس وش نسوي براسها اليابس ياشيخ ماعندك شي يهجدها ، زيت حوايج اللي هو
دفته ريوف بقوه وناظرها ورجع ناظر الشيخ
:ياشيخ عندنا واحد بالعايله مسحور ولاندري وين سحره عشان نفكه
الشيخ:ما أدراك ؟
فهد:وشو ما أدراني معي علم
ريوف:هو قالي ياشيخ
الشيخ:اتحدث مع زوجك لو سمحتي
ناظرها فهد وضحك بدون صوت ولف للشيخ:اسلم ياشيخ
الشيخ:ما الاعراض
فهد:والله ياشيخ هو قال انه مسحور يقول انه ان طلع من البيت اللي هو فيه يختلف حاله ويكره بناته ما يدانيهم وكل ماطلعت وحده بوجه ضربها والا صرخ بوجهها وتعرض لهم اخر مره بالضرب لين اغمى عليه وطاح
الشيخ هز راسه:مسحور
فهد:وش جبت شي جديد ياشيخ الله يصلحك
الشيخ:والسحر في البيت
ريوف:فين ؟
الشيخ:ما أدراني
فهد لف عليها:ماهو ساحر يعلمنا علامك انتي
الشيخ:اذا خرج من منزله يتعب ؟
فهد هز راسه:اي ياشيخ تجيه حراره ويمرض
الشيخ:اذا في المنزل السحر ابحثوا عنه تحت المخاد عند عتبة المنزل ، عندكم حيوانات بالمنزل ؟
فهد:مزرعة الشيبه فيها كل الحيوانات بكل الانواع اولها بهاج وسلطان
ضربته ريوف وابتسم فهد للشيخ اللي هز راسه
:ان كان في حيوانات ابحثوا في اعشاشها في الزروعات مدفونه
فهد لف لريوف من ناظرته وهز راسه فهد:ماقصرت ياشيخ ان لقيناه بنجيك تفكه له وتقرأ عليه
هز راسه الشيخ ووقف فهد ووقفت معه ريوف وخرجت معه
نزلوا ركض يدفعون بعض بالدرج وصرخت تلحقه من خرج قبلها وركبت السياره وحرك فهد
ولفت له ريوف:بنروح المزرعه نحفر ؟
فهد:ما أدراني
ضحكت من استهباله وهمست:شليويح !
فهد ضحك من ضحكتها ولف للطريق:غاببه من محاضرتك ومأخرتني عن دوامي وتبين أحفّر تراب مزرعة الشيبه اللي كبر الرياض وماتحبيني للحين ؟ ماعندك سالفه
رفعت حاجبها وابتسمت بذهول ولف لها وضحك ولارد يناظر الطريق
وقق عند الجامعه ولف عليها:تنثبرين داخل لين اجيك
لمت اغراضها وهي تلبس نظارتها ورفع عيونها لها
:بنت
ريوف:اوكيه فهمت شليويح حياتي فهمت توكل
رفع حاجبه من نطقت حياتي وابتسم بدون ما يبدي اسنانه ولفت عليه وضحكت:مو مقصوده توكل
ضحك وفتحت الباب تنزل ومشت تدخل الجامعه ومشى للشركه وعض شفته:وربك مقصوده مقصوده
وقف بالمواقف ومشى يدخل دخل يجلس على مكتبه ودخل صاحبه وابتسم:ارحب
:اسمع بغيب عشر دقايق سدّ عني يرحم والديك
فهد:ياليل بتقروشني كل يوم انت ؟
:بس هالمره تكفى فهد طالبك
فهد هز راسه:اول مره واخر مره
:هاك ذا الملف ترا محد يدري انه عندك
فهد:خلاص امش
اخذ الملف من يده وناظره بيده وفتحه يقرأ الأوراق
نزل انظاره للتوقعين اللي جانب بعض
ابراهيم وجنبه توقيع المدير التنفيذي بهاج بن سعود
عقد حاجبه وهو يقرأ وفتح باقي الأوراق يشوف اسم بهاج وتوقعياته هم ماكانوا يعطونه الا بيانات داخليه بس
اخذ جواله وصور الورقه وارسلها لسلطان وحك دقنه ينتظر جوابه
'
مدت له كوب وناظره:وش قهوته ذي ؟
نورا:تركيه
سلطان:لا ماودي بها
نورا:سوري ماعندنا بُن عربي وهيل يناسب ذوقك
سلطان:قولي ماتعرفين ليه تقولين ماعندنا
نورا:اوكيه ماعندنا وما اعرف
سلطان لف لجواله وناظر رسالة فهد وفتح الصوره وعقد حاجبه وقرأ رسالة فهد : عندك علم ؟
حط الكوب قدامها ووقف وهو يدق وهمست:سلطان
سلطان:دقايق
ابتعد عنها واخذت جوالها وابتسمت ترسل لريوف:اذا خلصتي دوامك مريني البيت ضروري مو موضوع يخوف لا تخافين
قفلت جوالها وابتسمت تناظر محل سلطان وش افضل من انها تكون مرغوبه هالقد من شخص قاسي ما مال لأي أنثى قبلها ، حاولها مرات كثيره وشافت فيه محاولاته ورغم خوفها انها تختار غلط اختارته بالنهايه
سلطان ابتعد عنها:وش العلم؟
فهد:الشركه ماهي لإبراهيم اللي نعرفه الشركه لبهاج ولد عمك بعد
سلطان عقد حاجبه:كيف يعني ؟
فهد:والله هذا اللي شافته عيني بهاج يشتغل
سلطان:وليه ما قال ؟
فهد:خايف نحسده !
سلطان:ولد وش ذا الكلام ثمّن حروفك
فهد:اجل ليه مخبي انا قبل انوي نيّه بشي هو اول من يعلم والحين اشتغل بشركه شهور ولا ادري انها لبهاج ولد عمي !
سلطان:اصبر ياخي يرجع ونعرف منه
فهد:والله تبي تسمع اسمع انت
سلطان ناظر جواله من قفله فهد وعقد حاجبه والتفت يناظر بيت بهاج أمامه
'
صحت من جانبه تناظره نايم وفاتح يدينه من اندماجه بنومه وصدره عاري وابتسمت جلست بإعتدال تناظره
هي حست انه بنص نومتهم سوا قام وخرج للبلكونه يخيّل له انها نامت لكن كانت تراقبه تراقب سكونه ودخانه اللي يرتشف منه زيقاره واثنين وثلاثه
ما هدأ باله ولا سكنت افكاره غارق وسطها وطال ليله وليلها وهي تتأمله بدون ما تتجرأ تقوم له
رفعت كفها تمسح على شعره وتناظره نايم وتقدمت تبوس خده بسكون بترجي بتمني بإنه ما يغيب عنها ابد ولا ينرسم لها درب دونه
قامت من السرير ودخلت الحمام اخذت شاور وخرجت تنشف شعرها بروبها وناظرته جالس على جواله وابتسمت:صباح الخير ياحبيبي
رفع انظاره لها وقفل جواله وابتسم:والله الشمس تشرق من هالمبسم
مشت له وجلست جنبه ورفعت كفها لشعره:نمت كويس ؟
بهاج:والله شوي بس اريّح بالطياره ان شاء الله
أنهار ناظرته ورفع انظاره:ليه تعبسين ؟ ماودك بالرجوع ؟
أنهار:ادري ان ورا رجعتنا حاجه ما قلتها لي ومو خايفه اني اعرفها خايفه لو تكون سبب تبعدك عني
عقد حاجبه وجلس لين اعتدل قدامها:افا من دفن في وسط صدرك هالظنون ؟ من قال بهاج يترك دربك ؟
أنهار سكتت تتأمله ومسك وجهها بكفوفه:انا تركت هلي وديرتي والارض اللي طاح فيها سرّي ، تركت حلال أبوي وأمي تركت اقوالهم عنك وعن دربك ومشيتك ، يوم جيتك جيتك بقايا ، وصلتي لي بعد اخر رمق من حياتي جيتك مزيج دموع وآهات جيت أتظلل بظلالك عن شمس قيظ حياتي ، من يقدر يردني عنك ؟
مسكت كفوفه وناظرت عيونه:بهاج تكفى ما ابغى تخرج من حياتي وتغيب عن عيوني ، تكفى بهاج لا يوقفون بيني وبينك
عقد حاجبينه من صوتها اللي تغير:أنهار أبوي انتي
تقدمت تقطع كلامه وتحضنه بقوه بخوف هي تشوف الظلام المهجور اللي ينتظرها بالمستقبل ماتدري بدونه والا معاه لكنها صارت تخاف كل ماعاشت سعاده معاه لان تدري ان مابعد الهدوء الا العاصفه
أنهار غمضت عيونه من حست بحضنه وشدت على ذراعينه العاريه:ابغى يدفنوني هنا
بهاج مسح على ظهرها يشدها لحضنه:بعد مانشيب سوا ان شاء الله ، انتي خلي كل همّ عليّ وانا قدها لو اكسر قلوب ولو ازعّل خشوم محد قادر يبعدك عن حضني
أنهار بعدت عنه وناظرها يأكد كلامه:بهاج بدونك ما يعيش
رفع راسه يبوس جبينها بقوه وناظرها:لا تاخذك الهواجيس بدخل اتروش ونطلع نجهز
هزت راسها له ومشى للحمام واخذت نفس نزلت كفها للسرير تشد على مفرشه من ضيقة صدرها