انثنى غيم نجد لخد الحجاز النرجسيه

٧٠

نورا عقدت حاجبينها وهي تشوفهم يدخلون المزرعه ماسكين يد جمعه ولفت لأنهار:وصلت الساحره
لفت أنهار وتنهدت:مو وقته نورا
نورا لفت لها:مو وقته ؟ على اساس احنا حزينين انه مات ؟ ولا افكر ادعي له بالرحمه كل شي بحياتنا قاعدين نعيشه بسببه وسبب زوجته شوفوا وضع ابويه كيف ، الله لا يسامحه
أنهار:اي وعندي خبر وانا اكثر وحده تأذيت لكن بسكت بسكت يانورا
نورا ناظرتها بحده:وانا ماني ساكته
تأففت أنهار من مشت تفتح الباب نورا تخرج ولحقتها أنهار وقفلت عبايتها على بطنها ودخلت البيت نورا وناظرتهم يبكون ومتجمعين يستعدون للعزاء اللي بيقيمونه
لفت ريوف اللي كانت موجوده وتقدمت نورا تناظر جمعه:ما يهدّ الإنسان غير الموت صح ؟
رفعت نظرها جمعه ولفوا عليها ورفعت حاجبينها نورا:بيتحاسب على كل شي سواه بالدنيا وبحياته وبحياتنا وين يروح من ربي ؟
وقفت منيره بصدمه من كلام نورا:بنت ! وش تقولين ؟
نورا:لحد يفكر يتكلم ويوقفني هذي اللي قاعده بينكم كافره ولا يجوز تقبرونها مع المسلمين ومصيرها جهنم الساحره
شهقوا ومسكتها عزه بقوه تسكتها ومسكت راسها أنهار من المشهد
نورا رفعت صوتها تردهم:ياساحره ياكافره خربتي بيت ولدك وحياته واخذتي منه اجمل ايام حياته عشان ايش ؟ عشان تكسبينه ؟ وتكسبينه بوشو بطريق الجن والسحره والكفره ، انتي مو أم انتي أنجس شخص بالحياه عرفته
لفت أنهار من دخلت وحده تعرفها ومستحيل تنساها ، حليمه اللي عقدت حاجبينها من الكلام اللي سمعته ولفت بسرعه أنهار خلف حليمه تترقب دخوله تترقب جيّته مع أمه لكن ماكان خلف حليمه غير الفراغ
لفت حليمه على أنهار اللي واقفه قدامها ونزلت انظارها من انتبهت انتبهت لكفوف أنهار اللي غطت بعبايتها بطنها ورجعت تناظر أنهار بصدمه
رجفت كفوف أنهار من شافت نظرات حليمه اللي فهمتها
ولفت من ارتفع صوت عزه ومنيره يردون نورا عن الكلام لكن نورا كانت اقوى منهم
ضربت الطاوله اللي قدام جمعه وناظرتها بحده:تفكين سحره ياساحره تطلعين سحره من تحت الارض اللي بتندفنين فيها وتتعذبين وتفكينه تفهمين ؟
سكتوا من الرعب اللي صابهم ومن كلام نورا ومن سكوت جمعه
ولفت ريوف وهي واقفه بثقه وتحدي و تناظر نورا وكأنها تشجعها تاخذ حق ابوهم منها
نورا:تفهمين ؟ ابوي بيقوم ويرجع طيب وبتفكين سحره والا والله الله بسماه واللي خلقني وحط فيني هالقوه اني لأندمك عمرك الطويل هذا كله والله لأحرق قلبك
جمعه ماردت وهي تناظر نورا وتهز رجلينها بتعب
نورا:لا تطالعيني بندم ، ما ارحمك ولا ارحم الميت
ناظرتها بحده نورا وناظرتهم كلهم واقفين وكأنها تبغضهم جميع وخرجت تاركتهم
لفت أنهار عليهم ولفت تناظر حليمه اللي واقفه مصدومه وخرجت ورا نورا مع ريوف
دخلوا الملحق ونطقت ريوف:اعشقك نورا اعشقك
نورا:خلاص عاد خلاص سكتنا لهم هذولا دمرونا
أنهار جلست ومسكت كفوفها ببعض بخوف
وناظرتهم ريوف:العزاء بيكون هنا رجال وحريم فهد يقول بيصلون عليه الحين ويجون هنا
نورا ماردت وجلست وكملت ريوف:ما اعرف كيف وضع ابويه معهم الله يقويه حبيبي
نورا:كلمي فهد كلميه ينتبه له
ريوف هزت راسها واخذت جوالها ترسل له ورفعت راسها لأنهار؛حليمه جات
هزت راسها أنهار ولفت نورا:بهاج معاها ؟
لفت أنهار تناظر نورا ومجرد التخيل صابها الخوف والربكه
لفت ريوف على نورا وتنهدت
'
قفل جواله ودخل يناظر سلطان:الشيبه
سلطان رفع راسه وكمل بهاج:عطاك عمره
عقد حاجبينه سلطان بصدمه وجلس بهاج وناطر الفراغ يتذكر الشخص اللي ما ذاق منه خير
الشخص اللي كان أقوى ؟ راح للي أقوى منهم جميع وما تفيده الان الا اعماله ، حق الإنسان من الإنسان باقي الى يوم القيامه ، الله غفور بعباده لكن حق الانسان مو ضايع بيبقى الى يوم القيامه ويتحاسب كل شخص من الشخص اللي له حق عنده
لف سلطان يناظر سكوت بهاج وهمس:نرجع ؟
رفع عيونه بهاج:بتحضر عزاه ؟
سلطان:وهذا حالي ؟
بهاج:عشان كذا بنقعد لين تطيب والله يرحمه
سلطان ناظر بهاج يوقف وكمل:انت ما بتروح ؟ تعزي ؟
بهاج طلع دخانه من جيبه وفتح الشباك:لا
شغل الزيقاره والتفت لسلطان:تشوفني قاسي ؟
سلطان مارد عليه والتفت بهاج وهو يدخن ويناظر المكان قدامه
سلطان:احجز بهاج خلنا نرجع
عقد حاجبينه بهاج ورمى زيقارته وتقدم له:ليه نرجع ؟ ليه ؟ انت مو تعبان ؟
سلطان؛تعبان لكني برجع الرياض اهلي عندي وانا عندهم ، ابي اكون مع ابوي
بهاج:تكون معه كيف وانت بهالحاله ؟ انت الى الان ماتحرك رجلينك
سلطان تكلم بتعب يحاول يرفع صوته:يابهاج
بهاج صد عنه بغضب ولف لسلطان:عشان يقولون حفيده بهاج بالسعوديه ولا جاه ؟ عشان يخلوني انا القاسي وانا اللي ما اسامح ولا اغفر ؟ عشانه مات بيجيني اللوم أنا ؟
وقف قدام سلطان ورفع اصبعه؛تعرف وش جاني ؟ تعرف وش صار بسبب جبروته وقراراته اللي جبرني عليها غصب ؟ انا لي ست شهور ، ست شهور ما اهتنيت بنومي وبحياتي وبرزقي ، ست شهور مع الهوجاس حرمني من كل شي اخذ مني كل شي ، ذبح حلال ابوي عشان يكويني حرّض امي عليّ ، تعرف وش سوا زياده ؟ خلاني اطلق أنهار خلاني بالوقت اللي قاعد احلم بحياه هاديه اطيح من سابع سما ، خلاني اقول اخس كلمه لأحلى شي بحياتي ، حرمني دموع عيني بعزاء ابوي اقولك وش سوا زياده ؟ اقولك وش اخذ مني اكثر ؟
سلطان سكت وكمل بهاج:اقولك ان لي ست شهور ما اقدر ادور لها عنوان عشان اشوفها واعتذر ؟ ما اقدر لاني ماني قدّ الاعتذار لان قدرت اخليها اهجرها وابيعها واختار نفسي وامي عشان طغيانه لا يأذيها اكثر ، ست شهور مدري وين انا ست شهور أدورني ست شهور المس الجرح ما برى ست شهور تحطمت فيها ٢٧ سنه من حياتي ، ست شهور اكتشفت فيها اني خسرت ابوي وامي ونفسي وزوجتي وعوض ربي بولدي
همس سلطان:وينهم ؟
صد بهاج عنه يستجمع نفسه وسكت وكمل سلطان:بجِده ؟
لف وعقد حاجبينه بهاج:ليه بجِده ؟
سلطان:اخر مره شفتهم بالمطار راحوا جِده
بهاج تقدم له:وديتهم ؟
سلطان هز راسه بألم:ماتدري عنهم ؟
بهاج هز راسه بالنفي:ظنيت انهم عند فهد بالرياض
سلطان:فهد وينه ؟
بهاج:بالرياض مع ريوف
سلطان:كلمك ؟
بهاج:لا قطع اهله ست شهور وامي كلمتني قالت انه مع ابوك وابوه بالمزرعه
سلطان سكت وناظره بهاج ثواني وهمس سلطان
:خل نرجع بهاج ، هذا وقت اننا نرجع ، هذا وقت اننا نتجمع كلنا بالمكان الأول لنا
بهاج:ياسلطان انت ماطبت !
سلطان:بطيب بس خلنا نرجع
بهاج سكت وصد عنه وشد على قبضة يدينه وعض شفته وهو يناظر الفراغ وهز راسه ولف لسلطان وهو يهز راسه ووقف يخرج من الغرفه
'
وقفت نورا جنب أنهار اللي واقفه عند الشباك وهمست لها:مو موجودين
لفت أنهار عليها وعقدت حاجبينها:ماتحسينه غريبه ؟ وين اختفوا ؟ هذا ثاني يوم عزاء نورا
نورا:ريوف سألت فهد ما جاوبها
أنهار لفت تناظر المزرعه:بسألها بسأل حليمه
نورا:لا ، خلاص أنهار لا عاد تدخلينها بحياتنا
ناظرت حليمه وشموخ اللي جايين للملحق وهمست:جات بنفسها
نورا ناظرتهم وعقدت حاجبينها ومشت تفتح الباب من دقوه وناظرتهم حليمه ودخلت
خرجت ريوف من الحمام وناظرت شموخ وحليمه ومشت لهم
نورا؛نعم ؟
حليمه؛ما بتجون بين الحريم تعزون ؟
نورا عقدت حاجبينها:انتي باقي متقمصه دور زوجة الاب ؟ خبري فيك تطلقتي
شموخ همست:نورا لا تطلعين كل خلقك علينا
نورا:انتي انكتمي انكتمي ولا حرف روحي لقطي لك كرامه ياناقصة الكرامه كل شي بسببك اجل كنتي بتشهدين زور ؟ كلكم كذا كلكم تعبدون الله وانتم كفره
حليمه قفلت الباب ودخلت:خلاص نورا خلاص الزمي حدك وتكلمي زين الدنيا موت واحنا بعزاء والملائكه حوالينا
نورا:ليه ما تكلمتي يوم عرفتي ان ابوي مسحور ؟ هاه ؟ جاوبي ليه ما اخذتيه من يده لشيخ يطلع سحرهم ؟ ليه ما قلتي لنا نعذره نوقف معه ؟ والا كنتي مبسوطه زاين لك الجو وهو متجنن علينا ؟
حليمه تنهدت واستغفرت بهمس وكملت نورا
:من اليوم ورايح مجامله واني اسكت انسوها انا برمي الكلام اللي تستحقون تسمعونه من فتره ومحد قدر يقوله والحين توكلوا اطلعوا برا وان شاء الله معد نشوفكم بحياتنا كلها واخس فرصنا اننا عرفناكم والله ياخذ حقنا منكم كلكم
حليمه لفت تناظر أنهار اللي جالسه ورجعت تناظر نورا اللي واقف
ولفت شموخ على أنهار تناظرها هي من يوم قالت لها حليمه انها لمحت بطنها عرفت ان أنهار مستحيل تخرج من حياة بهاج وان شموخ خسرت رغم محاولاتها بالفوز ، خسرت بهاج للأبد
حليمه لفت:امشي شموخ
شموخ ناظرت أنهار اللي تناظره ونطقت أنهار:اطلعي
مشت لها شموخ ووقفت أنهار تناظرها بحده:اذا عندك كلام لا تسمعينه لي لان ماودي اتكلم
شموخ؛تعرفين وين بهاج ؟
أنهار زادت حدة صوتها بغضب من جابت طاري بهاج:اطلعي برا قلت
شموخ فتحت جوالها وعقدت حاجبينها حليمه وهي تناظرهم ومدت جوالها شموخ قدام عيون أنهار
وناظرت الصوره أنهار كان بهاج بالصوره بهاج لابس كوت وبيده قهوه وجالس على طاوله وشموخ ماسكه كوبها قدامه واسفل الصوره فلتر ألمانيا
عقدت حاجبينها أنهار ومشت ريوف لين عندها وناظرت الصوره ومشت نورا وناظرت الصوره
وناظرتها شموخ:رحت معاه ألمانيا ورجعت عشان عزاء جدي وهو ظل هناك عشان شغله
رفعت عيونها أنهار لشموخ بصدمه وعقدت حاجبينها ريوف:ليش تروحين معاه ؟
تقدمت حليمه من شافت شموخ تخربط بالكلام وسحبتها:امشي شموخ
مسكت ذراعها بقوه أنهار:ردي وش وداك معاه ؟
حليمه:شموخ اطلعي قلت
ماردت شموخ وهي تناظر أنهار وذهولها
وتقدمت نورا لها:انتي ما بتفكينا من سوالفك ؟ تبغين تغثين اختي ؟
ماردت شموخ وعينها بعين أنهار وناظرتها بحده وغضب نورا وتقدمت تشدها من شعرها وصرخت شموخ وتقدمت بسرعه حليمه بخوف:نورا بنت فكيها
ضحكت ريوف وعضت شفتها تشوف نورا تسحب شعر شموخ
نورا:يامريضه يامعتوهه ابعدي عن خواتي ماتفهمين ؟ والله والله لأطلع جناني عليك تفهمين
صرخت شموخ تحاول تفلت من يدها ودفعتها نورا بحده وصرخت بوجهها بغضب:انقلعي لا اشوفك تفهمين ؟ انقلعي
ناظرتها شموخ بخوف وخرجت بسرعه
وناظرت حليمه نورا:وانتي اذلفي لا اشوفك بعد والا والله ما اعرف فيها عمرك
خرجت حليمه معاها ولفت حليمه عليها بحده:وش تسوين انتي ؟
شموخ مسكت شعرها بألم:اغثها
حليمه:اجل تستاهلين اللي جاك
جلست أنهار بصدمه تسترجع صورته بذاكرتها ولفت نورا على ريوف:مافهمت هذي من جدها ؟
ريوف:تستاهل اخخ نورا ابوس يدينك
نورا:خلاص عاد زودتها
ريوف:طيب وش وداها مع بهاج ؟ لوحدهم ؟ يمكن سافرت مع سلطان ومع بهاج ؟
نورا:ريوف ؟ تستهبلين ؟ وتروح معاهم ليش ؟
أنهار رفعت راسها لهم:دقيت عليه ميتين مره ، ميتين مره ست شهور وماكان يرد ، كان معاها ؟
سكتت نورا وهي تفكر وناظرتها ريوف:أنهار اكيد في شي غلط يعني مستحيل تزوجوا مستحيل
أنهار ناظرت ريوف بصدمه:استنيته ريوف ٦ شهور لين اليوم استنيته وقفت عند الشباك الملعون هذا انتظره وهو ؟ هو وينه ؟
تنهدت ريوف وسكتت وجلست جنبها ومسكت ذراعها وهزت راسها بالنفي أنهار:٦ شهور ريوف ، ٦ شهور ادوره ، ست شهور رسمت اعذاره وحطيت له سبعين عذر واكثر ، ست شهور ريوف عشتها لوحدي عرفت بحملي لوحدي رحت لكل موعد لوحدي بكيت لوحدي ونّيت لوحدي ، وهو ؟
نورا مسكت راسها وجلست:خلاص تعبت من كل شي تعبت خلونا نرجع ، خلونا ناخذ ابويه ونرجع
لفت ريوف على نورا ورجعت تناظر أنهار اللي وقفت اخذت عبايتها وناظرتها ريوف؛أنهار !
أنهار:لحد يلحقني
غطت جسمها بعبايتها وخرجت من الملحق ومشت بخطوات سريعه ونزلت دموعها وهي تمشي ، تمشي لنفس الطريق اللي مشته كثير لوحدها ومعاه وبدونه الحين
من دخلت ممر النوير بكت بعلو صوتها وهي تشهق رفعت ذراعها تتمسك بأطراف النخل وهي تمشي وجلست على ركبها وهي تبكي
نزلت راسها وهي تشهق ورفعت راسها تناظر السماء ونطقت من حدة صوتها وحدة غصتها بحنجرتها:اهخ يارب
رجعت تبكي وهي تتمسك بالنخل اللي يسارها وناظرت اخر الممر ، المستودع المحروق اللي محد عاد ترميمه من جديد ناظرت مكان اول حضن اول اعتراف لهم اول قُبله بينهم اول حريق عاشوه
استرجعت كل وعوده كل ذكرياتهم كل وجعها بدونه نزلت يدها لبطنها وصرخت بتعب وسط بكاها؛كل يوم كل يوم احارب صحتي عشان يبقى في بطني عشان استنيتك عشان قلت بيجي ومعه عذر ينسيني كل تعبي
نزلت عيونها وطاحت دموعها على بطنها ومسكت بطنها بكفوفها الثنتين وهي تبكي
'
جالس بالطياره كفه بكف سلطان والطاقم الطبي معهم
ناظره سلطان بتساؤل:هذا على حساب من ؟
بهاج ناظره ورجع صد؛الحكومه
سلطان:طالع فيني
بهاج لف عليه:مو مصدقني ؟ اسألهم وقوف عندك
سلطان:امس قلت لك نرجع السعوديه واليوم هذانا بنهبط بالسعوديه
بهاج تنهد:وش تبيني اسوي طيب ؟ انتظر احد يمد لي يد عونه ؟
سلطان:كم دفعت عليّ ؟
بهاج؛عمري ولا استخسره فيك وادري لو كنت مكانك بتسوي لي الأكثر
سلطان سكت يناظر بهاج وكمل بهاج:انت ما انت معرفة شهرين والا سنتين انت معرفتك عمري كلها من يوم قطعوا سرّي وانت جنبي ، تهقى اخليك ؟ ولو اني عرفت متأخر لكني ما تركتك
سلطان؛حالتي كانت شينه ؟
بهاج:مامنك رجا
سلطان ارمش بتعب ووقف بهاج يمشي لمقعده يقفل حزامه والتفت يناظر الهبوط بالرياض ونزل ونزل سلطان للإسعاف اللي نقله من المطار للمستشفى مباشره
وخرج بهاج للمواقف وناظر ابراهيم وابتسم له وهمس:أبو مهنا
ابتسم ابراهيم؛حمدلله على السلامه
تقدم وحضنه بهاج واخذ نفس هو رجع للسعوديه بعد كل هالشهور ومعه أمله برجعته بسلطان طيب وهذا هو الحين مع سلطان
ابتعد عن ابراهيم وابتسم له ابراهيم:كيف الأمور؟
بهاج؛نحمد الله سلطان سبقني بالاسعاف للمستشفى وانا بشوفه وارتب اوضاعه وبعدها اشوف امي
ابراهيم:سوا ، معك
بهاج؛ماودي اتعبك يكفي جبت سيارتي
ابراهيم:مافيها تعب نشوف سلطان ونتحمد له بالسلامه
بهاج مشى مع ابراهيم وركب سيارته بهاج وركب جنبه بهاج وابتسم ابراهيم:يوم دقيت الباب على امك اطلب مفتاح سيارتك قالت فداك
ضحك بخفوت بهاج؛صرت الحين اغلى مني عندها
ابراهيم؛الله يخليها لك
حرك بهاج وانتصف بالطريق ولف ابراهيم عليه:وش احوال اهلك ؟
بهاج سكت ثواني والتفت عليه:الشيبه عطاك عمره هذا ثالث أيام عزاه
عقد حاجبينه ابراهيم:لا حول ولا قوة الا بالله ،  الله يرحمه ويغفر الله
هز راسه بهاج من سمع دعوات ابراهيم ولف ابراهيم عليه:قبل فتره شفت بنات عمك
التفت بهاج وعقد حاجبينه وكمل ابراهيم:نورا وأم سعود معها
سكت بعد ما نطق بأم سعود وتغير وجه بهاج يلتفت للطريق وبلل شفايفه ابراهيم:ماكان ودي اقولك وافتّح جروحك بس لاني استغربت شكلهم ماكان عندهم علم عن سلطان ، تقدمت اسلم عليهم وماردت علي أم سعود قلت ماتشوفون شرّ جميع لكن مايدرون باين وقلت يا ابراهيم لا تزيد بالكلام وتطلع انت اللي عطيتهم الخبر
بهاج نطق بهدوء:وين لقيتهم ؟
ابراهيم:بإجتماع اللي ارسلته لك ورتبنا له سوا كانوا معنا شركات ومن بين الشركات شركه تشتغل فيها نورا الشركه اللي صاحبها وليد اذا تعرفه سوينا مشروع معاه ودخل بـ ١٠٪؜ أسهم بشركتنا نشغلها له وقدمت تعريف الشركه هي ماشاء الله عليها
بهاج اخذ نفس يسمع أخبارهم وكمل ابراهيم:بجِده
هز راسه بهاج:كانوا بجِده
ابراهيم ناظر بهاج اللي تضايق وابتسم:وعاد زان الجو يوم جيتم بتجيبون المطر شكلكم
ابتسم بهاج له من فهم انه يطلف جوّه:الله يجيب كل خير
وقف عند المستشفى ونزلوا سوا
'
جلست عند رجلينه ولبسته شراريبه وناظرته:أسوي لك شي دافي تشربه ؟
هز راسه بالنفي بتعب وتنهدت تجلس عنده:كيف صرت ؟
مارد عليها ورجع راسه ولفت نورا على البنات اللي واقفين ومشت لهم وهمست:اش قال الشيخ لفهد ؟
ريوف:بيقرأ عليه لين يرتاح وفتره ويتحسن ان شاء الله
تنهدت أنهار وهي تاكيه براسها على الجدار تناظره منسدح
نورا:ما بتنامون ؟
ريوف:الا بروح عند فهد
هزت راسها نورا لها ولفت ريوف لأنهار:أنهار ما بتنامين ؟
أنهار:بجلس عنده
نورا:نسمعه لا تخافين لو صحى بنحس عليه
أنهار هزت راسها بالنفي وهي تناظره ولفت ريوف لنورا وخرجت ودخلت الغرفه نورا وقفلت الباب ومشت أنهار لين فراش عمر وجلست على رجولها عنده
رفعت يدها لكفه تتحسس برودتها ونزلت دموعها بدون صوت وهي تراقبه وهمست:حتى يوم ذوقتني القسوه ويوم جاتني منك ماكنت أصدقها كنت أنكرها ، ولو انها عورتني يوم جات منك كل ما طاحت عيني بعينك ومعد شفتني بعيونك كنت انحرق بدون ما ينسمع لي صوت ، بكل مره بكيت فيها لوحدي كنت اتمنى الاقي حضنك من يوم جينا لهنا انحرمت من أماني
نزلت راسها تبكي وشدت على كفه:اكثر وقت محتاجه فيه لك ، لا تخليني عوروني يا ابويه
نزلت راسها لكفه تبكي عليها:تكفى لا تخليني
رفعت نظرها له وهو نايم:إنت أول من علمني الحب وأول من قال لي أحبك وأول من ضمني وداواني أنت أول شي من كل شي ، انت اللي مستحيل احد يسد مكانك انت اللي رغم جرحك اخترتك وفرطت في قلبي عشانك
بكت بشده:بابا اشتقت اناديك ، اشتقت تسمعني اشتقت ابكي في حضنك
نزلت راسها وهي تبكي من حست بذراع نورا ولفت تبكي بحضن نورا اللي مسحت عليها ومسحت دموعها تناظر عمر
اخذت نفس نورا تهدي نفسها وتمسح دموعها وتسمع بكاء أنهار بحضنها وهمست:بنرجع معاه ان شاء الله وبيكون طيب شوفي كيف تحسن وصار افضل بعد ما الشيخ قرأ عليه وانفك سحره ، بنرجع أنهار
'
فتح باب البيت ودخل بهدوء وهو يسمع اذان العشاء برا وتقدم للصاله يناظر امه اللي مو منتبه له تخيط في قميص لها وهمس:يمه
رفعت راسها بذهول:امي
تقدم لها بتعب وحط براسه بحضنها وانسدح ومسحت على شعره وشدت على ذراعه:حمدلله على سلامتك يا أمي
مارد عليها وناظرته:كيف سلطان ؟
بهاج:طيب
حليمه:بتروح تعزي أعمامك ؟
بهاج لف راسه يناظرها:في من أعزيهم ؟
حليمه سكتت وتنهدت وكمل بهاج:من ؟ اللي مخليني بهالحال الحين ؟ ماله عزاء عندي
حليمه:الله يسامحه يا امي الحين مالنا الا ندعي له
بهاج جلس وناظرها:ماني داعي له الحين هو بقبره يتحاسب على كل شي ، كل يوم من عمره يتحاسب عليه
حليمه اخذت نفس وكمل بهاج:انا رجعت لان سلطان وده يشوف ابوه واهله ، والا ماهزني موته لو شعره
حليمه:اذا بنقعد نقسي على كل البشر ولا نسامح ما بنطيب
بهاج:تدرين من بسامح ؟ بسامحك انتي لانك أمي لكن اللي جاني منك اكثر من اللي جاني من أي احد ، كنتي انتي اللي تخدشين فيني جروحي وهم كانوا يلمسونه وكل ما يلمسون الجرح ما يطيب
حليمه:قلت لك أسبابي
بهاج:وانا مسامحك بأسبابك انتي أمي لكن ودي تدرين بإني اسامح وأعدي لكن للي يستحق اني اسامحه وان جاني منه جرح قلت يمون
حليمه:ما هدأت بك عواصفك ؟
بهاج:انا الوحيد اللي كنت أجمع لي حياه ، أنا الوحيد اللي شقيت عشان تضحك لي الحياه ، جازفت بحلال ابوي كله شريت لي بيت اخترت اللي كانت أول امنيه ادعيها لربي أول من تركت قصري عشان بيت طينها رسمت معها كل حياتي مافي في مستقبلي ماكانت معي فيه ، رعيت دروسهم وعيشتهم معي وأملوا حياتي عليّ لاني أخاف الوحده أخاف صوت الصمت كنت كلي أمل يصدأ ببيتي ماهو صوت أصوات صوت عيالي وزوجتي وخواتها واخواني وانتي وأنا ، صوت ألعابهم وضحكاتهم ، لكن أول من عانَا أنا ، انا اللي صرت وحدي الحين سلطان معه اهله وهي معها خواتها وانا مامعي الا انتي هذي انتي قدامي الحين وش تشوفين مني غير ثرثره
تقدم لها يأشر على صدره؛انا من يوم تركني أبوي وانا مابي احد يتركني ، شديت وجيتك عشان ما تتركيني ويوم شفتك تعيشين مع واحد حرّم علي الجيّه لك كنت أوّن ، آه من أمي وش سوت فيني أمي يوم شفتك تحفرين بيدينك قبري على فرقاها قلت آه من أمي ، هو لو انه ثوب خلعته يا أمي لكنه شعوري
حليمه تقدمت وحضنته وغمضت عيونها تبكي تنهد من حضنته تماسك داخله وهو يتنفس ومسحت على ظهره حليمه:اسفه يا أمي اسفه ولو اني كل شي سويته عشانك قبل يكون عشاني وحاولت ابعدك عن هالونين اللي توّنه لكنه حصل ، بس لو ضاقت بك المساعي سق خطاويك لي والله لأحطك بين طيّات أهدابي
غمض عيونه وتنهد وهو بحضنها ومسحت على ظهره وهي تسمي عليه
'
جالس فهد بينهم ويسمع تقسيم الورث والنصيب لكل واحد بعد ما مرّ أسبوع على وفاة رَده ولف على عمر اللي جالس جنبه ولف له عبدالله:انا باخذ نصيبي من هالمزرعه وابيعه واستقر انا وعيالي ببيت أوسع بالرياض وقريب من ولدي
ابتسم فهد له من طراه وهز راسه زيد:وانا بايعها بعد وش تقول ياعمر
اخذ نفس عمر بتعب:معكم معكم
ابتسم عبدالله:فيك العافيه يا أخوي
لفت جمعه تناظرهم ونطق زيد:وانتي يا أمي معنا ؟
جمعه هزت راسها لهم ولف زيد:فهد
التفت:سمّ
زيد:خذ من ابوك هالاوراق وارسلها للمحامي
هز راسه فهد وتقدم لابوه واخذ الاوراق ولف عمر:انا رايح مع بناتي
جمعه التفت له ونطق عبدالله:وكيف حالك رجع وضعك؟
هز راسه ومد ذراعه:الزيوت المقري عليها ما تطلع عن جلدي
زيد:فيك العافيه وانا اخوك فيك العافيه ، والله يوجه لكم كل خير
وقف عمر على حيله وعقد حاجبه بتعب ولبس شوزه يترنح بتعب ومشى خلف فهد اللي دق باب الملحق
وخرجت ريوف وناظرت فهد ورفعت راسها من شافت عمر يمشي خلفه:بابا
تخطت فهد ومشت تمسك كفه تسنده:تعبان؟
عمر:لا لا جهزتم ؟
فهد:جيت اسألهم ياعمي
عمر هز راسه وخرجت نورا لابسه عبايتها:بنروح؟
فهد؛اي عطوني اغراضكم وخلونا نمشي
خرجت أنهار ومسكت بطنها بتعب وناظرت عمر اللي واقف ونزل انظاره لبطنها ورجع ناظرها وسكت
وفتح شنطة سيارته فهد يحط الشناط وفتحت الباب نورا لعمر اللي ماسكته ريوف وركب عمر وقفلت الباب نورا ولفت لأنهار:جبتي جوالي ؟ كان بالشاحن
أنهار:نسيته نورا روحي جيبيه وتفقدي البيت معاك
ركبت ريوف وعدل شماغه فهد يقفل شنطة سيارته ولفت أنهار للممر اللي يسارها وبلعت ريقها هي مستحيل تشوف المزرعه من جديد المزرعه بتنباع المكان اللي عرفته فيه بيختفي مشت لبداية الممر ووقفت وهي تناظر علّو شجره ونخيله اللي ارتخت من الجفاف وغمضت عيونها تاخذ نفس طويل ولفت من انفتحت البوابه وتقدم فهد عاقد حاجبينه من السياره الغريبه
رجف قلبها من عرفت السياره السياره اللي اختارتها معاه وكان حلم حياته يقتنيها ويشتريها
وعقد حاجبينه فهد من شافهم سوا وهمس:بهاج وسلطان !
رجفت كفوفها من شافت السياره تتقدم وتوقف قدام سيارة فهد وانعدم الصوت من حوالينها ما تسمع غير انفاسها ونبض قلبها
تناظر نظراته لها من سيارته كان شاد على كفه بقوه من شافهم قدام عيونه وناوين الخروج من شافها واقفه قدام الممر وحدها وعينها على السياره ماقدر يحرك أطرف ضلع فيه ماقدر ينطق بحرف
تكرر على باله صورتها تضحك وسمع صدى صوت ضحكاتها كل أيامهم سوا عادها ، من أول مره شافها تغطي بكفوفها الشمس وتحذره يكسر أغراضها ومن عطرها اللي انتثر بصدره وهزمه بالحب لين أعترف ، يذكر شعاع الحرايق بعيونها ولمعة عيونها يذكر كيف كان ملمس كفها الناعم من أول مره لمسها يذكر شرايين صدره اللي تفجرت بلحظة حضنها الأول يذكر كل شي بدقيقه وحده دقيقه وحده خانته ذكرياته اللي ما زالت توجعه من نظرتها قدام ممر النوير نظرتها اللي كان فيها حرب الحروب وأشد أنواع العتب والسؤال بليش ؟
خرجت نورا ووقفت عند الباب من شافت السياره وعقدت حاجبينها وظلت محلها تشوف فهد يركض للسياره وسلطان وبهاج راكبين
فتح باب بهاج فهد وابتسم يتقدم له يحضنه:بهاج
نزل بهاج وحضنه وغمض عيونه يشد عليه بتعب من بعد كل هالشهور وهمس:فهد اخوي
ابتسم فهد بفرحه بشوق:يالله حيّه يالله حيّ ابو سعود يالله حيّ اخوي بهاج اقسم بالله مشتاق لك
لفت أنهار تناظر نورا اللي واقفه عند الباب ورجفت تغطي جسمها بعبايتها وتستر بطنها قبل يلمحه قبل يشوفه ومشت لنورا والدموع بمحاجر عيونها وناظرتها نورا بخوف وتقدمت تشد على كفوف نورا وتدخل وتبكي ولفت نورا لها وهمست:أنهار
جلست وهي ترجف وتتنفس بسرعه ولفت لها وهي تبكي:قفلي الباب تكفين قفليه قفلي الباب
مسكت راسها تجلس وتهز جسدها برجفه ولفت نورا من شافت فهد يفك كرسي لسلطان ويجلس عليه سلطان وعقدت حاجبينها بصدمه وظلت تناظره ينزل على الكرسي وشكله متغير وشدت على الباب وبلعت ريقها بخوف وتوتر ولفت لأنهار اللي تبكي وجالسه وتقدمت لها بسرعه تمسها:أنهار !
نزلت ريوف بصدمه تناظرهم وتقدمت:بهاج
التفت بهاج عليها ولاقدر ينطق بحرف ناظرته ريوف وظل يناظرها ميلت راسها بعتاب له وفهمها فهم ان اعذاره قضت ولا له عذر يتعذر به
رفع انظاره بهاج وشاف عمر اللي بالسياره ورجع يلف على ريوف اللي تقدمت لسلطان
وناظرته:سلطان !
رفع راسه لها وابتسم بخفوت وتعب:اسوأ جيّه تشوفيني بها
عقدت حاجبينها:اش صار لك ؟
فهد:اقولك انا بس خليهم يدخلون
سلطان ناظر ريوف:وين نورا ؟
لفت ريوف تناظر باب بيتهم مفتوح ومحد واقف عليه وناظر الباب سلطان وفهم ومشى فهد به يدفعه للدكَه
ومشى بهاج لين سيارة فهد وناظر عمر اللي فتح شباكه وناظره بهاج لثواني وهز راسه:طيب ماشاء الله
عمر هز راسه له وراقبه بهاج ما يدري يلومه ويحمّله سبايب كل هذا والا يدعي له بالشفاء من الحال اللي وصل له لكنه رفع راسه يناظر المزرعه على مدّ بصره وحالها اللي صابه الجفاف والتقشف والخلو ومشى وعينه على بيت أبوه المقفله أبوابه ونزل راسه من عدا الملحق ولا قدر يرفع راسه ومشى للدَكه
ولفت نورا تناظره من طرف الباب يمشي خلف سلطان ولفت لأنهار اللي تبكي ومشت لها:لا تبكين تفهمين لا تبكين
أنهار : شفته نورا شفته قدام عيوني
نورا مسحت دموع أنهار وبلعت ريقها:خلينا نروح يالله ابويه ينتظرنا
وقفت أنهار وهي ترجف وخرجت من الملحق تمشي للسياره ونورا معها وركبت خلف عمر وركبت نورا جنبها ولف عمر عليهم وناظر أنهار تبكي:ليه تبكين؟
نورا:بابا تكفى كلم فهد يجي ونحرك
ارتبكت نورا تضغط على كفوفها وتتذكر مشهد جلوسه على كرسي
عمر اخذ نفس بتعب وتقدم يدق بوري سيارة فهد والتفت بهاج عند باب الدَكه يناظر عمر من بعيد ولف لفهد اللي واقف مبتسم:فهد
لف عليه فهد واشر له بهاج وخرج فهد والتفت لبهاج:بتبطون هنا ؟
بهاج:انا لا ، جبت سلطان لأهله وبرجع
فهد؛بالرياض ؟
بهاج شد على كتفه بشوق:بكلمك بكلمك ماني مقفل جوالي
فهد ابتسم ومسك كفه:تكفى باخذهم بيتي بالرياض وكلمني اشوفك
بهاج هز راسه ومشى فهد لسيارته وناظرته ريوف جاي وركبت جنب البنات ولفت لنورا وأنهار:شصار فيهم ؟
نورا لفت لها بحده وسكتت ريوف تناظر أنهار وركب فهد وحرك سيارته خارج من المزرعه
طلع من المزرعه وحطت راسها على الشباك تناظر المزرعه وممر النوير اللي غاب عن عينها
ظلت تناظر الطريق وذكرياتها تتعبها كيف إنه رجع غريب وكأنها أول مره تشوفه وكأنها ماعاشت معه قرب الرمش للعين ، كانت أقرب له من زرار ثوبه أقرب لروحه والحين حال بهم الحول من التعب هي تلوم نفسها ليه انتظرته ليه حطت له أعذار كان بمقدوره يقطعها ويكلمها ويرجع كل شي نفس ماكان ، لكنه ما أتصل عاشت كل شي لوحدها
ولفت من لف عمر لفهد يسأله:وش جاه سلطان ؟
لفت نورا على فهد اللي نطق:حادث
عقدت حاجبينها نورا ونطقت ريوف:يقدر يمشي طيب ؟
فهد:ان شاء الله رجله انكسرت وركبوا له أصياخ فيها واموره زينه
التفت عمر يناظر الطريق وناظره فهد:ماودعت جدتي ؟
ريوف:فهد !
فهد ناظرها من المرايه ورجع ناظر الطريق ونزل انظاره عمر:وش وداعه يافهد وش وداعه