انثنى غيم نجد لخد الحجاز النرجسيه

٤٦

التفت على نورا اللي جالسه:بجيب لها شي تاكله اذا صحت خليك عندها
هزت راسها نورا وكمل بهاج:تبين شي انتي ؟
نورا:لا
بهاج مشى وخرج وهو يسمع تنبيهات الدكتور بإنها تغذت على كافيين لفتره طويله وصابها هبوط وزياده بدقات القلب فقدت التغذيه الصحيحه وتحتاج إبر وغذاء وراحه
اخذ نفس يتنهد ويخرج من جيبه بوكه ويدفع لاغراضه ويمشي راجع ويفتح جواله يناظر رسايل سلطان : وش العلم ؟
جلس بالكرسي المطرّف ودق عليه ورد سلطان:وش السالفه انت جيت ورجعت ؟ والا هذي مهي سيارتك اللي لمحتها ؟
بهاج:الا رحت المستوصف
سلطان:عسى ماشر ؟
بهاج:أنهار طاحت ووديتها
سلطان:اعوذ بالله
بهاج تنهد:محد درى ؟
سلطان:ماشفت احد
بهاج:طيب زين
سلطان:بترجعون ؟
بهاج:ان شاء الله لا صحت
سلطان:ان بغيت شي كلمني
بهاج:ان شاء الله
قفل من سلطان وناظر بقية اشعارته وعقد حاجبه يقرأ رسالة امه من الخارج
:اذا طلبت منك تتزوج ترا ابوها وعدها بزواجك يرجعون لجِده تاركين كل شي هنا
عقد حاجبه يعيد يقرا رسالتها وحط الاكياس جنبه والعصيرات ورجع يقرا الرساله ويدخل محادثتها
رفع راسه وحط يده تحت دقنه يعيد رسالتها براسه كيف يعني ان تزوجت بيتركون كل شي هنا ؟ قصدها بكل شي انا ؟ قصدها ان أنهار فضّلت الرجعه بدونه ؟ هو راجع لها ومقصر المسافات عشان يفوّقها لمكانته وان القلب ما يخطي ولا يظن فيه الظن السوء ترده ؟ تصده ؟ هي ترسم روحتها مع ابوها وهو يرسم مستقبله معها ؟ يوم يتمنى وصالها صدت عنه ؟
تمكن الخوف بقلبه واكله ، تترك الأيام والذكرى ؟ ما تراعي كل همسه وكل لمسه بينهم ؟
رفع راسه يقوم وياخذ الاغراض ويدخل يشوف الدكتور اللي عندها وحط الاغراض يمينه وهو يناظرها
شبه نايمه من تعبها وعينها على الدكتور اللي يذكرها بصحتها وخطورة اهمالها
حط راسه على الجدار يناظرها ساهي وعقد حجاجه من اللي حسه من افكاره ولفت من خرج الدكتور تناظره واقف وراسه مايل على الجدار يناظرها
تقدمت نورا لها تمسك يدها:لا تخوفيني عليك أنهار وتعيدينها
صدت عنهم تلف للجهه الثانيه وتغمض عيونها
نورا:لا مافي تنامين بهاج جايب لك عصير وشي تاكليه قومي عشان تصحصحين شويه
أنهار هزت راسها بالنفي وهي صاده عنهم ولفت نورا:قول للعنيده هذي شي
بهاج مارد ولفت أنهار تناظر سكوته ونظراته مافهمت من نظراته شي هو يلومها هو يعاتبها هو خايف عليها هو مطمن عليها هو ولهان هو ندمان ولف بهاج لنورا:انا برا
خرج تاركهم ولفت أنهار لنورا:اشبه ؟
نورا:خوفتينا كلنا أنهار
سكتت أنهار وشدت على كفها نورا:بليز عشاني بس اشربي العصير على الاقل
مدت يدها اللي بداخلها المغذي واخذت العصير تشربه هي تحتاج تفوق فعلاً هي تحتاج تستصح
جالس برا وتاكي بيدينه على ركبتيه ويناظر الارض هو لوهله توقع ان امه ترمي حطب بالنار وتفتري وتمنى لو كانت امه تفتري ، لوهله قال لا تصدق يابهاج واسأل بالأول
رفع راسه من خرجت نورا:جيب كرسي بهاج بنرجع
هز راسه يوقف ويسمع صوت أذان الفجر بالخارج دخل بالكرسي عليهم وناظرها تجلس مع نورا
تردد بوقوفه قدامهم يناظرها تمد كفها لنورا اللي تساعدها وشد على كفه لا يمدها لها
رفعت نظرها له وهي واقفه تشوف بعده ونزلت انظارها ليده اللي توقعت يمدها يساعدها لكنه ما تقدم
جلست على الكرسي واخذت نفس نورا:اخيراً
تقدم يدف كرسيها ونورا بجانبه نزلت انظارها من حست بالبرود بعيونه بالصدود بأفعاله شدت على كفوفها تمنع دموعها لا تطيح ومن وقفت عند السياره غمضت عيونها بخوف انه يتركها ما يمد كفه لكنها رفعت راسها من حست بذراعه
ناظرها كانت عيونها تفيض بالدموع المحبوسه ورفعها يقربها لصدره ويبعد الكرسي ويفتح لها الباب
ركبت بالخلف وقفل الباب يناظرها وركب يسار نورا يشغل سيارته تكى بذراعه يناظرها بالمرايه ولف لنورا:اكلتي ؟
هزت راسها وابتسمت له:اكلت اللي جبته لي ثانكيو بهاج تعبناك معانا وشكلك مو نايم كمان
بهاج مارد يلف للطريق وكملت نورا:فين كنت ؟
بهاج لف عليها:ماسألتي سلطان ؟
نورا:لا ، ليش هو يعرف ؟
بهاج هز راسه:قلت بروح الرياض
نورا:عند ريوف ؟
بهاج:لا
نورا:مامريت عليها ؟
بهاج هز راسه بالنفي ورفعت عيونها تشوفه كانت تدري انه في بيتهم وكانت متوقعه
عضت شفتها تتذكر كلام حليمه لها نزلت راسها تناظر خلفية جوالها اللي كانت هم سوا ، بهاج وأنهار اللي محد يحط اساميهم سوا من فارقهم عن بعض من اختلافهم وشذوذهم بعيونهم لكنها حبته رغم ظنونهم عنهم وتعلقت فيه وتبيه
وبنفس الوقت رفعت راسها لنورا اللي قدامها ساهيه بتعب هي ما تشوف نورا كذا بجِده ولا تشوف دموع ريوف ولا قسوة عمر وتشعر انها تستحق تضحي ببهاج عشان خواتها عشان ابوها عشان عايلتها
لفت تناظر الطريق وتمسح دموعها بهدوء
رفعت راسها من وقف بهاج ونزلت نورا اللي تكلم:ماكنت بخوفك ريوف خصوصاً انه وراك دوام الصباح بس كويسه مافيها شي تعرفينها دلوعه
اخذت نفس تشوفه يطفي السياره وهمست:بتكلم معاك
رفع عيونه للمرايه وهز راسه:ارتاحي ، بعدها
أنهار:ما برتاح
سكت ونزلت من فتحت الباب نورا لها ورفعت كفها أنهار:كويسه انا
نورا:طيب الحمدلله
مشت أنهار تدخل البيت واخذ نفس بهاج ينزل من سيارته ومشى يتعدى الملحق تارك امه خلفه وتقدم يمشي بهدوء بممر النوير يرفع راسه يشوف اشعة الشمس المعكوسه بالنخل والشجر واخذ نفس
طلبت من نورا تشم هواء نظيف وتمشي لوحدها وخرجت تشد جاكيتها على جسمها من برودة الصبح ولفت تناظر حليمه اللي تقدمت بصينيه:طبتي ؟
هزت راسها أنهار وتقدمت حليمه لها:كنت جايه وجايبه لك مسلوق يدفيك
أنهار:ما ابغى شكراً
حليمه:بهاج داخل ؟
أنهار اخذت نفس:ما ادري
حليمه:ما كلمتيه ؟
أنهار ناظرتها ثواني وهمست:اتركيني لوحدي
حليمه:سلامتك
مشت وتخطتها أنهار تمشي لممر النوير ورفعت عيونها تشوفه بنهاية الممر قدام المستودع يدخن ولف عليها يشوفها تمشي له واخذ نفس من زيقارته ونزل راسه تقدمت له توقف قدامه ورفع راسه بعد مارمى زيقارته تحت رجله
ظلت ثواني ساكته لين سألها:وش سووا فيك ؟
بلعت ريقها وتكلمت بصوت مبحوح ياكله التعب
:بهاج
بهاج:اسمعك ، قلتي لي تزوج اخر شي صح ؟ ليه ؟
أنهار صدت عنه تستجمع كلامها بفمه وعقد حاجبينه بهاج من سكوتها:ما تراجعتي ؟
لفت عليه:خيرني
بهاج سكت وكملت أنهار:واخترته هو
بهاج رجع لورا خطوه:وخليتيني ؟
أنهار ميلت راسها تبدأ بالبكاء وتقدم لها بحده:لا تبكين اذا انتي قدّ الكلام لا تبكين
أنهار:ما اقدر اجلس هنا واترك نورا هنا وريوف هناك ، ما اقدر اعيش من دونه اكثر ابغى اي شي يرجعه لنا زي ماكان
سكت يناظرها تبكي وكملت أنهار:قالي يتزوج بهاج ونروح جِده وقلت يتزوج بهاج ويجي معاي جِده
بهاج رفع حاجبينه:واللي تزوجتها ؟
سكتت وجمد وجهها من خطرت ببالها وكمل بهاج
:صح ما اهتميتي لانك فكرتي بنفسك فكرتي ان بهاج بيترك كل شي ويجي معك جِده ، بيتزوج بنت عمه ويرميها ويخذلها وينهي حياتها بعقد ويمشي ورا دربك صح ؟ حشى ما سويتها وهي اخت اخوي سلطان
بلعت ريقها تناظره وكمل بهاج:اذا صدقتي ابوك وانه بيترك اهله وابوه وامه ويمشي ورا شورك فأنتي غبيه ياخذونك بالعجه ، كل اللي يسوونه عشاننا وللحين تسمعين لهم وفاتحه اذنك لهم
تقدمت له تناظره:كان بيحضن ريوف قدامك ، هو ما نسينا بس في شي يرده عنا هنا انا فهمت بهاج
هز راسه بالنفي يناظرها وعضت شفتها بخوف
:بهاج !
بهاج:تبين ابوك ؟ تبين تصدقينه ؟ يحق لك ابوك من يردك عنه ، لكني ان قلت بتزوج فأنا بتزوج صدق ولا بلعب ببنت عمي واخت سلطان عشان احد
أنهار:بهاج خيرني
ناظرها تبكي وهز راسه:لا تبكين ليه تبكين ؟ انتي تبين ابوك وهذاك هو قالك اقنعي بهاج ونهج ؟ انا الحين ادخل المجلس واطلب أعقد الجمعه هذي والجمعه الجايه بتكونين ببيت ابوك بجِده
أنهار نزلت راسها بتعب وتقدم لها بهاج واخذ نفس
:يبون يمنعونا ياغبيه افهمي
رفعت راسها له:واذا صادق ؟
بهاج:تجازفين فينا ؟
صدت بإتجاه المستودع تبكي وشهقت بتعب انرخى جسمها من ضعفها وتعبها وتقدم هو ما يقوى تبكي ولا هو قدّ دموعها ورفع ذراعينه بهدوء يحضنها رغم قهره رغم غضبه حضنها لصدره ونطق : انتي تخافين من صروف الأيام وتخافينهم لكن رياحهم ما تمسح خُطاك مني ، تبين تصدقين ابوك صدقيه لكن ان طلع يكذب مامن خط للرجعه يا أنهار
شدت على ظهره وهي تبكي تكره تفقده تكره تسمع منه اللي سمعته تكره انها تخيّرت تكره انها عرفته بصدوف الزمان هذي
واخذ نفس يتنهد بتعب:ويلي على حبنا وش تاليه
ابتعد عنها وناظرها:بترجعين لحضن ابوك ماني رادك عنه لكن ما نتشارك حياتك انا واياه
تقدمت تمسك كفه بقوه:ما اقدر بهاج تكفى اذا خليتك بموت
هز راسه بالنفي:ولا انا بقوى لكن عشانك
رجفت بخوف تشد على كفه بيدينها الثنتين وكمل بهاج:ادخلي ارتاحي
أنهار:بهاج !
كانت ترده عن الفراق وهي تطلبه لانها تحتار وتحترق مابينه ومابين كل شي ، خواتها وابوها وبيتهم وحياتهم قبلهم حريّتها وراحتها والدلال والرخاء ومابينه هو
بهاج فلت يده يصد:ادخلي
تركها ورجع هو فتح زرار ثوبه يعض شفته يدور اي شي يطفي نيران صدره لكنه ينكوي اكثر ينكوي وهو يدري بنية عمر يدري انها حطت آمالها على رجال ماهو كفو
اتجه لفراغ المزرعه وده يصرخ ويحرق المزرعه باللي فيها هي خلته وكذّب فكرة انه بينترك وبيجي يوم يتخير ويكون هو بالكفه الاضعف وينترك
خذت كل شي من يدينه خذت بهجة مبسمه معها وخلته ينربط لسانه ولا يقدر يتكلم هو يشوف بعيونها انه بالكفه الاضعف ومضطره ترخي كفها
،
نزلت على الارض تبكي من تركها وشهقت بتكرار وبصوت عالي تبكي تشد على الارض بيدينها وتبكي خايفه تندم خايفه ما يرجع شي نفس ماكان وتخسره خايفه يكون لغيرها وهي ماتقوى هي تحبه تغار عليه ويسكن صدرها ومستعمره بقوه
ظلت تبكي من تعبها ومن اللي سواه فيها ابوها وحطها فيه رماها بنيران ولهيب وهي لحالها
هي حتى ماتقدر تقول لأحد يساعدها هي لوحدها صفت هي اختارت وتخيرت لوحدها
مشت بخطوات ثقيله وكأنها خرجت من معركه خسرت فيها كل اجزاء جسمها تخدشت وتجرّحت وذاقت دم الجروح
فتحت باب البيت بيد راجفه ولفت تناظر نورا اللي وقفت:ادق عليك فينك ؟
ماردت وقفلت الباب وتقدمت نورا تشوفها وهمست بخوف:اشبك ؟
بكت وفلتت نفسها بحضنها وحضنتها نورا بخوف:أنهار لا تخوفيني ليش صاير فيك كذا ؟
ماردت أنهار وهي تبكي وشدت على نورا:اعوذ بالله من الشيطان الرجيم تعالي اجلسي وسمي بالله
جلست أنهار وناظرتها نورا:اشبك طيب علميني ؟ مشتاقه لريوف ؟ عشان بابا طيب ؟ احد كلمك؟
هزت راسها بالنفي أنهار:تعبانه نورا احس فيني نار تعورني نورا
عقدت حواجبها نورا:بسم الله عليك أنهار لا تخوفيني حكيني طيب
أنهار رفعت راسها وسط بكاها ونطقت:اخ
حضنتها نورا:بسم الله عليك بسم الله عليك
-
مشى للملحق ودق بابه وخرجت حليمه:بهاج !
بهاج:ناديه
حليمه:مين ؟
بهاج رفع راسه بحده:ادخلي ناديه والا دخلت انا
حليمه سكتت ثواني ولفت تناظر عمر اللي وقف وخرج
ناظره بهاج وهز راسه:طيب وسويت اللي براسك بدخل واخطب واتزوج ، وسويت اللي براسك وحرّمت علي جيّتي لامي هنا ، وسويت اللي براسك وقفت بيني وبين بنتك
تقدم لعمر ورفع سبابته:لكن يمين بالله لو ماتهج بعيالك وتتركني بحالي يمين بالله لأهد فيك هالملحق ، خذ بناتك وارجع من مكان ما جيت ، وخذ امي معك وان بغيتها اعرف اجيها بس هج يا آدمي
نفض ثوبه بهاج بعصبيه:هج وخلني بحالي
نطق عمر بهدوء:كنت ادري أنهار بتعرف من تختار
ضحك بسخريه بهاج وعض شفته وهو يناظره
وكمل عمر:نذرت اني بطلع من هنا بس اذا تبيها تتم لحد يدري غيرنا ، ما بيخلوني لميت اغراضنا لو بتشوف
بهاج ناظر الشنط اللي بالصاله وناظر امه ورجع يناظره وهمس
:يعني صادق ؟ ماكذبت عليها ؟
عمر هز راسه بالنفي وظل يناظر عيونه بهاج وهز راسه لهم ومشى
وقفت رجوله عند حوض النياق يناظر نياق ابوه وجدّه ومكان النايفه الخالي من بينهم
هو عشان يثبت حبه ضحى بأحب ناقه له ولأبوه عشانها
عقد حاجبينه يتذكر بكاها يدري انها بتتعب بتنهدّ يدري انه موتها ويبيها تبتعد تبتعد قبل تحترق ويحترق معها
شد بيده على الحوض يتذكر انها تخيّرت تدمرت عشان تختار بينهم وهذي مشكلتهم
هي روحه وعينه وهي قلبها بين يدينه لكن الأقدار ماكانت معاهم
يدري انها تموت لهفه بغيابه يدري انها يوم غاب عنها ماترددت تنام بفراشه وبغرفته
تنهد يتذكر البيت اللي رسمه معها ونطق بتأكيد انها بتسكنه المره الجايه
لف من حس بكتف سلطان:اناديك ليه ماترد ؟
ناظره بهاج وهز راسه بالنفي:ماسمعت
بهاج:فيك شي ؟
بهاج اخذ نفس ولف على سلطان:زواجي من البدايه كان واضح وردوني عنها لين معد لقيت لها منفذ
عقد حاجبينه سلطان:وش تقول انت ؟
بهاج:سلطان انا بتزوج
سكت بهاج يناظره وكمل بهاج:باخذ اختك
ضحك سلطان:وشو دبسوك فيها غصب ؟ ماقلنا حليتها انا مع اهلي وبفكك من سالفة امك
بهاج:محد غصبني غصبوني قيل لكن الحين زواجي منتهي وما بيستمر
سلطان:ليه وش صار ؟
بهاج:سلطان لا تزيدها علي بغيت يجيك العلم لو سمعت اني خطبت اختك بالمجلس
سلطان:ماني معطيك بهاج ماني رامي اختي حتى لو ابوي وافق وهي وافقت انا ماني معطيك
عقد حاجبه بهاج:ترميها ليه ؟ ماني رجال انا ماني كفو ؟
سلطان:وش هالكلام بهاج ؟ اعرفك ولاني اعرفك مابي اختي لك ادري انك تموت بخطى وحده ثانيه وما بتحبها ليه اعطيك ؟
تنهد وصد بهاج وكمل سلطان:ماني معطيك بهاج
التفت عليه بهاج:ما بيقعدون هنا
سكت ثواني:منهم ؟
بهاج:أنهار واهلها بيرجعون ويتركون كل شي هِنا وانا بترك كل شي هنا واروح الرياض ، تبي موتي ؟ خلني اروح لوحدي
سلطان:من قالك بيروحون ؟
بهاج:سلطان انا جيت وقدرتك وكلمتك قبل اكلم الشيبان بالمجلس لا تردني ان خطبت وانا ماني ظالم اختك ، ان قلت ابيها بكون قدّها
سلطان مارد وكمل بهاج:ان قلت تم ماعلي بأحد
تنهد سلطان يصد عنه وكمل بهاج:سلطان
سلطان التفت عليه:بشاورها اول لا تتكلم قبل ارد عليك لكن لنا كلام ثاني سوا يابهاج
هز راسه بهاج ومشى تارك سلطان محله
،
خرجت من البيت بعبايتها وجوالها ومشت بإتجاه جلوسهم المعتاد قدام حوض النياق وناظرت الجلسه خاليه وتقدمت توقف عندها وتشوف الغاز اللي يشتغل والدله فوقه ومحد موجود
عقدت حاجبها ومسكت جوالها تدور رقم بهاج وتقدم ومعه فناجين غاسلها وناظرها واقفه:من تبين ؟
لفت عليه واخذت نفس:بهاج وين ؟
سلطان ناظرها وجلس وحط الفناجين قدامه:مدري
نورا:مو بالبيت وسيارته موجوده توقعته هنا جالس
سلطان:كان جالس هنا بس مدري وين راح
نورا:بيرجع ؟
سلطان:مدري عنه
اخذت نفس وتلفتت تدوره ورفع راسه لها:وش تبين فيه ؟
ناظرته وجلست واخذت نفس:أنهار تعبانه ومو راضيه تقولي شي ابغاه يكلمها يسألها
سلطان عقد حاجبه:تعبانه عشانكم بتروحون ؟
نورا لفت عليه بإستغراب وتقدمت له:نروح وين ؟
صد سلطان وهمس:شكله كان مفروض ما اقول انا
تقدمت له:ايش فيه صاير شي ؟
سلطان التفت عليها:تبين قهوه ؟
ناظرت الدله تغلي قدامها ورجعت ناظرته هادي محله ونزلت راسها للفنجان:انا أصب لي
اخذت فنجان من بين يدينه وتقدمت تمسك الدله كان على وشك يحذرها من حرارتها لكنها انلسعت منها وفلتت الدله ولولا ذراعه اللي حطها على كفوفها كان تأذت من حرارة البُن المغلي
لكنها شهقت تشوف ذراعه يغطيها ويتلون ثوبه بالبني رفعت انظارها تناظره يناظرها بدون أدنى ألم وجمدت محلها
ناظرها بحذر:جاك شي ؟
هزت راسها بالنفي تبتعد عنه ونزل انظاره سلطان لذراعه وهمست:انحرقت ؟
رفع كمه عن ذراعه يشوف لونه ونطق بهدوء:لا
نورا ناظرت يده وعقدت حاجبينه:تعورت ؟ اكيد تعورت
رفعت نظرها من لف يناظرها وبلعت ريقها:غسلها بمويه بارده
هز راسه بالنفي:ماجاني شي
عضت شفتها تناظر الدله طايحه:كنت مشتهيتها لأول مره ريحتها حلوه
لف عليها وهو ينشف يده ولفت عليه:سلامتك ماتشوف شر
وقفت تاركته وابتعدت عنه ولف يناظر الدله اللي قدامه:وانا أخو بهاج
اعتدل بجلوسه واخذ الدله ووقف يمشي يغسلها ويرجع يلقمها ويحطها على الغاز الصغير ويشغل عليها تغلي قدامه يناظر غليان البُن وساهي بكلام بهاج:بيروحون بيرجعون ويتركون كل شي هِنا
شد على ذراعه اللي يشتعل من حرارة جلده وهو ساهي يتذكر شامة نحرّها اللي لمحها مرتين
يتذكر انه غلط انه تفجّر غضبه اللي يغطيه عن غيرته وزعلّها هي يمكن بيوم ماتكون له بس ماوده ينتهي كل شي هِنا ويغيبون تارك بقلبها ذرّة زعل
هم يمكن يروحون ينتهي طاريهم هِنا بس ما بيرجع شي نفس قبل ، بهاج بيغيب بهاج بينحرق بعيد ، وبيصفى هالمكان خالي ما تعجّ فيه الا رياح وأصوات ذكريات
بعد ماكانت هالجلسه تمتلي بالسوالف بالضحك بأول حكاياتهم بنشوة الحب الأولى بين بهاج وأنهار الاولى صارت خاليه بسلطان
قفل على الدله ووقف وشالها بكفه ومشى رايح للبيت وقف على الباب كان بيحطها ويدقه ويمشي لكن ماقدر دقّ الباب وهو واقف بالدله وانتظرها
فتحت الباب تناظره بإستغراب وعقدت حاجبها
وتقدم على عتبة الباب بالدله:سويت لك غيرها لا يقعد بخاطرك شيٍ تشتهينه
رفعت نظرها له وناظرته منزل عيونه للدله واخذ نفس:اسف ان قلت شي زعلك وأرد اللي قلته ما تستاهلين تسمعينه
رفع عيونه لها يناظر سكوتها وصد براسه يناظر حوالينه ورجع ناظرها:مدري لو انك تخطيتيه او لا لكني ودي اقولك ان ما كل الحبايب حبايب حتى لو انك تظنين بهم
سكتت تناظره وكمل يتردد بأنظاره عنها:اللي يبيك يجيك لو حوالينك قيود ويكسر على شانك خشوم الصعايب
بلعت ريقها ونزلت راسها للدله اللي شايله وكمل سلطان:والله مدري وش الغيب لكن ان حصل بيوم ورجعتم وافترق طريقنا تذكري اني وقفت قدامك وقلت لك هالكلام ، انا ما اشوفك الا ستيرة عَرب ومن راس قوم وبنت رِجال درّه مايقدرك الا اللي تكونين أكبر أحلامه لا تعلقين نفسك برخمه انتي مانتي له ، ولا تضعفين عنده عزّي نفسك
نزل الدله على العتبه ورفع شماغه على كتفه ووقف يرجع خطوه للخلف:حارّه جيبي وقايه لا تشيلينها
ماردت عليه ومشى يعكس طريقه تاركها محلها
نزلت نظرها للدله تناظرها تعيد براسها كل كلمه قالها
انحنت تلمس الدله الحاره وعقدت حاجبينها من حرارتها مسكتها بطرف كمّها ودخلت وحطتها بالصاله جلست وهي تناظر تصاعد دخان حرارتها ليه بدت تفهم تصرفات سلطان هذا الوقت ؟ متأخر شافت انه بكل مره كان يقدم شي ولا تفهمه واليوم فهمته ، فهمت غضبه وتسرعه يمد ذراعها لها وانه رجع يسوي لها دلّه ثانيه لانها بخاطرها ، بدت تشوفه بعد ما كانت الا تلمحه وبس
خرجت من الحمام أنهار تحت انظار نورا اللي بالصاله ووقفت قدام المرايه تنشف شعرها تناظر وجهها اللي ملوّن بالأحمر مر شدة بكاها ولفت من دق الباب وناظرت نورا اللي بالصاله:علميني مين لا تفتحين
وقفت وفتحت الستاره وعقدت حاجبها ولفت لأنهار:ابويه
لفت أنهار تاخذ نفس ومشت نورا وفتحت الباب وناظرته
تقدم يدخل وناظر أنهار قدامه واقفه وهز راسه لها:يسوى !
لفت نورا عليهم ولف عمر على نورا:رتبي كل شي تبين تاخذينه معك ، راجعين لمكان ماجينا
عقدت حاجبها ولفت لأنهار اللي واقفه وماتغير فيها شي ورجعت ناظرته:مين قال ؟
عمر:أنا أقول وأنهار تبي ترجع وريوف تبي ترجع
نورا لفت لأنهار ورجعت لفت لعمر:واذا رجعنا ؟ بيتغير شي ؟
عمر:يتغير كل شي بنمشي بدون محد يدري بعد ما يتم زواج بهاج
جمدت ملامح نورا:بهاج بيتزوج؟
عمر لف لأنهار:ماقلتي لها ؟
اخذت نفس أنهار تصد عنهم ولفت نورا عليه
لف عمر عليها:انا ابلغ ريوف اجهزوا
ماردت عليه ولف عمر يناظر أنهار ومشى خارج من عندهم لفت نورا لأنهار اللي ميلت شفايفها تنزل دموعها وتقدمت لها نورا:ليش ماتعلميني ؟ ليش ؟ كلمتيه لحالك صح ؟ عشان كذا !
أنهار ميلت راسها:خايفه ما يتغير شي اذا رجعها
نورا تنهدت وتقدمت تحضنها وهمست:مين يدري غيرك اننا بنروح ؟
أنهار بلعت غصتها:بهاج
نورا:عشان كذا مختفي ؟
ماردت أنهار وناظرت الدله بالصاله نورا وتذكرت كلام سلطان اللي فهمته وفهمت انه عرف ويدري وجاها كأنه موادع