انثنى غيم نجد لخد الحجاز النرجسيه

٢٠

ابتسم وهو يناظر العيال:نزوجكم لبنات عمكم عمر
رفعت راسها نورا بصدمه لعمر اللي يناظرهم وهمست:مستحيل
رَده:ما ناخذ براي البنات ابوكم قاعد وله كلمه عطاها لاعمامكم وقال تم
ريوف:صاحيين انتوا ؟
عمر نطق:ريوف !
نورا:ما راح يصير هالشي
رَده:ابوكم عطى كلمه وما انتم لأغراب لعيال عمكم
لف انظاره للعيال اللي يناظرونهم بصدمه واسئله كثيره بملامحهم
رَده كمل:وعيال عمكم موافقين
عقد حاجبينه بهاج ونطق:محد قال انه موافق !
لف عمر عليه وناظرهم بهاج بحده وصدمه
سلطان:صادق ، محد معكم
عبدالله:الكبار تشاوورا احنا ما نشاور احنا نبلغ
بهاج وقف:مصخره ذي !
رفع راسه عمر لبهاج وتكلمت جمعه:قصور ببنات عمر ؟
بهاج التفت عليهم:ماهو قصور بأحد لكن لا هم يبون ولا نحنا نبي
عمر حس برَده يمسكه من ذراعه ويهديه وناظر بهاج:دام ابوك ماهو حيّ انا ابوك اليوم واقول ان وحده من بنات عمك عمر بتزيّن وضعك
أنهار وقفت:تنقينا كأننا غنم من عندك ؟
رَده لف لها:والله استغربت انك ما تكلمتي للحين قلت يمكن ربي عقلّها
أنهار:انت اللي ربي حرمك من العقل
وقف عمر:أنهار اقعدي
أنهار ناظرته بحده:سكتّ وتحملت كل شي قاعد يصير ولا تكلمت ، وقفت بنصيب نورا اختي ومنعتها تتزوج رجال جا وخطبها وسكت ، تناسيت جامعة ريوف وسويت انك ما تشوف ولا تكلمت ، وقفت ورا ابوك يوم ضربني على وجهي ولا تكلمت ، لكن مستحيل اسمح لك الحين ولو يصير اللي يصير
ناظرها عمر بحده وهو يلمح غضبها وحدة نظراتها له
وقفت نورا:ولا انا راح اسكت ، خواتي ماهم دجاج مالهم كلمه
عمر:انا عطيت كلمه وبتتزوجون عيال عمكم وبتستقرون هنا معي ومع عمتكم حليمه
نورا:انت واثق فينا لدرجة تتوقع اننا بننادي زوجتك عمه ! او بنترك حريتنا ونسكن بين الغنم ؟ عشان وشو عشان كلمتك
عمر شد على اسنانه بغضب والتفت من تكلمت ريوف:طول الوقت وانا اللي أقول لخواتي لا وبنصبر وما بنسوي مشاكل بس الحين انا ماني قايله شي لانك بيّنت لنا احنا ايش بحياتك
أنهار ناظرت رَده اللي تكلم:ياعمر خلهم بيعقلون
أنهار:ياليت ما تتدخل
لفت لعمر وناظرته بتحدي:اذا فكرت انك بتجبرنا وبتقدر علينا فإنت غلطان ، نترك لك المكان باللي فيه ولا نلتفت بوجهك ولا نتذكر ان عندنا أب حيّ
مسكها من ذراعها بقوه يسحبها لناحيته بعصبيه
وتقدم بهاج وهو يمسك ذراع عمه يوخرها عن أنهار
لف عمر:لا تتدخل انت
بهاج:قبل شوي بتزوجني وحده من بناتك ليه ماصار لي دخل الحين ؟
عمر:تعقب
بهاج ابتسم من نزل عمر يده ونطق:ماتقدر
رَده:بتنحاشون نحشة الخدامات يعني ؟
لفت نورا عليه وناظرته بإشمئزاز وكمل رَده
:يتبرى منكم ابوكم ويشيل عنه العيبه
ريوف:احنا مو عيبه
سلطان:ياجماعه استهدوا بالله اللي قاعد يصير محد راضي عنه وما بيجيب الا المشاكل
رَده:انا بشوف وش مشاكل بنات عمر حفيدات رَده
أنهار:تحلم باللي قاعد تخطط له
رَده ابتسم وهز راسه:ماعاد هو حلم بيصير حقيقه
عمر:اقعدوا
نورا:بطل تأمرنا على الأقل !
جمعه:اقعدوا واسمعوا من ابوكم
أنهار التفتت لهم:ياليت الكل يكرمنا بسكوته سمعنا منكم لين فقدتوا عقلكم
عضت شفتها جمعه من كلامها وصدت أنهار لعمر
:اذا صرت معاشرهم وتفهم نيّتهم وتجاريهم ! فأنا بصير منهم وفيهم واقولك تعقب
تقدم رَده بسرعه يدخل بينها وبين عمر وسحب أنهار بهاج وسطهم وناظرها بعصبيه:إنتي في وجهي
ناظرته بخوف من عصبيته وصوته اللي اعتلى ولف بهاج لهم:ما تنمد يد على وحده فيهم
رَده:دامها في وجهك اعقد عليها زي الرجال
نشف دمها وهي تناظرهم وتناظر ذراع بهاج اللي ماسكتها بقوه ومخبيها خلف ظهره عنهم
بهاج ناظر عمر اللي تبدلت ملامحه لعدم الرضى وناظر رَده اللي يتحداه ولف للبنات اللي تجمعوا جنب أنهار خلفه
سمع نحيب ريوف خلف ظهره وفهم ان كل شي انتهى من أمامه وهز راسه:تصير حلالي
لفت بصدمه عليهم وتلاشت ابتسامة رَده وناظر عمر اللي انصدم
وكمل بهاج:وسلطان يعقد على نورا وريوف لفهد ومحد له كلمه
التفت سلطان عليه بصدمه وجمدت ملامحهم
ابتسم بهاج لعمر اللي يناظره وتبدلت نظرات بهاج لتحدي لعمر
لف يناظرهم وهمس:ارجعوا
ناظر صدمتها ونظراتها له وشد من ذراعها للخارج:ارجعوا جايكم ارجعوا
خرجوا ولف لسلطان وفهد واشر لهم يخرجون
لف يناظرهم لين طلعوا والتفت لعمر ومشى له
ربت على ذراعه وابتسم:العوض بسلامتك
خرج تاركهم ولف عمر لرَده:قلت لك قلت لك
رَده:قلت ما بيوافق
زيد:هذا هو وافق
جمعه:نيتكم تضغطونهم وما يوافقون ؟
رَده:لا انا قلت نزوجهم غصب ويتزوجون لكن ماتجي منهم
عمر:بيوقف بوجهي وبناتي عنده ، بناتي ورا ظهره عني انا
رَده:اسكت واقعد
قعد رّده وانعقد حجاجه بعصبيه وتفكير
وقبض كفه بقوه عمر وهو يتذكر ابتسامة بهاج ونظراته
،
دخل بيته وعقد حاجبينه وهو يشوفهم قاعدين
وناظرهم وقفل الباب:علامكم ؟
سلطان:وش قايل انت ؟
بهاج وقف وناظرهم:قلت اللي ما يبون يسمعونه
فهد:تستهبل ؟ هم قايلين يبون يزوجونا
بهاج التفت لريوف اللي تبكي وهمس:لا تبكين
ماردت وهي تبكي وتقدم لها:لا تبكين قلت ، تبكين ليه ؟
ريوف تكلمت وهي تلهث من دموعها:بيزوجنا غصب عنا !
بهاج:ويزوجكم وش المشكله ؟ تبكين ؟ انا ماني متكلم لين تسكتين
ريوف:بهاج ما اقدر
ناظر دموعها وهمس:امسحيها
نزلت راسها وهي تمسح دموعها والتفت يناظر نورا وأنهار اللي صادين ولف للعيال
:هم ودهم يغيرون اللي صار بيننا ماعجبتهم قعدتنا واختلاطنا قالوا نغير عليهم كل شي ، دروا ان البنات بيرفضون وهم ودهم يرفضون ويصير في علو صوت وضرب ومد أيادي ، رَده يتعاطى مشاكل ياجماعه
سلطان:تقوم تقول لهم سمّوا !
بهاج:انت شفت وجه عمك يوم وافقت ؟ هو كان متأكد ان ولا وحده من بناته بتوافق يبي يثير مشاكل ويبتعدون عني ، عمك ثار دمه وقالها بوجهي " تعقب " ما يبيني اخذ وحده من بناته لكن جارى جدك
فهد:والحين وش العلم ؟
بهاج اخذ نفس والتفت يناظر نورا وأنهار اللي يناظرونه وينتظرون منه جواب
ولف لفهد وسلطان:ما ودكم تفرون من هنا ؟
فهد:انا اول واحد وانت تعرف
بهاج لف يناظر البنات وحده وحده فيهم:وانتم تبون
بلل شفايفه وناظرهم كلهم ونطق:فهد بيطلع من هنا ويستقر بمكان هو يبيه بس مو لحاله
ناظره فهد وميل راسه يمنعه يكمل
وكمل بهاج وعينه على ريوف:مع ريوف اللي تكمل جامعتها وتعيش بعيد عن تسلط اي احد
لفت أنهار على ريوف اللي تفرك يدينها بتوتر ورجعت تناظر بهاج اللي ناظر سلطان
:وسلطان بيختار المكان اللي تختاره نورا
رفع انظاره سلطان لنورا اللي تناظره وكمل بهاج:وبعدها كل واحد يروح بطريقه ! عطوهم اللي يبونه لكن في نفس الوقت يخدمنا
لفت نورا لأنهار اللي تناظر بهاج وبلع ريقه بهاج من حسّ بنظراتها عليه
وناظر سلطان وفهد اللي واقفين قدامه ينتظرونه يكمل اخر جزء
لكنه ماقدر ينطق بحرف واستصعب يقولها هي امس تمنّعت من لمح بإنهزامه ومتأكد من رفضها له ولا قدر ينطق بحرف
ناظر أنهار سلطان ورجع ناظر بهاج اللي يناظرهم وساكت:وانت تختار اللي تبيه مع أنهار ؟
صد بهاج من نطق سلطان وابتعد عنهم مسافه يعطيهم ظهره
ناظرت صدوده ونزلت انظارها لرجلها اللي تهزها بتوتر
نورا:يعني كذا نحلها ؟
سلطان:نفس ماقال بهاج ان قعدنا انغبنا اكثر ما خلونا
ريوف:نشرد عنهم كلهم مو لازم نتزوج !
سلطان:تشردين لوحدك ؟ بدون ولي وبدون رجال ؟
سكتوا كلهم لدقايق وهم يتنقلون بأنظارهم ببعض
وهمس بهاج وعينه على شباكه:وانا ماعاد تفرق عندي أمي
لف لهم:تعيش مبسوطه معاه
ريوف:ما بيخلينا
بهاج عقد حاجبينه:ماله كلمه عليكم
اخذت نفس أنهار وبلعت ريقها وهي تسمعهم يتناقشون وتناظر بهاج اللي يتصدد عنها بشكل واضح
نزلت راسها وهي تتذكر جملته وسطهم وصرخته بوجهها يمنعها عنهم " إنتي في وجهي "
رفعت انظارها عليه وهو يتكلم معهم وشماغه على راسه
وقفوا البنات وناظرهم بهاج:لا تقعدون تبكون نورا ربحت سلطان صح ريوف تورطت بس شنسوي
ضحكت بين دموعها ريوف ولف بهاج وهو مبتسم يناظر فهد اللي نطق:العوض بسلامة أنهار بس
تلاشت ابتسامة بهاج ولف من وقفت جنب بهاج تناظر فهد
ناظرها تناظره وصد بعيونه مباشرة لبعيد
مشت مع البنات برا وتنهد من خرجوا وجلس على الكنبه
سلطان ناظره وهمس:استغليت الموقف !
بهاج:مو وقتك سلطان
سلطان:ماقلت الا اللي شفته ، وقفت قدامها تقول انتي بوجهي خايف واحد منا ياخذها ؟
بهاج رفع راسه لهم:ماتبيني
فهد ناظر سلطان اللي التفت له ورجع ناظر بهاج:كلهم ما يبونا ولا نحنا نبيهم
بهاج:ماتبيني من قبل هالليله
سلطان سكت وتقدم له وقعد قدامه:وش صار ؟
بهاج ناظره وفصخ شماغه عن راسه:انت قلت لي ، هي ماتشوفني
سلطان ماتكلم وبهاج رفع حاجبينه ونزل انظاره لشماغه:ماتبيني
فهد:لا تحسس ماتبيك ولا تبي احد فينا ولا خواتها يبونا ، واحنا محنا هينين ترانا مانبيهم
سلطان لف لفهد وفهد كمل:انا وسلطان اقصد
بهاج وقف:وانا مابغيتها حتى
ناظرهم ورفع شماغه يأشر على الباب:والحين خلوني ارقد
وقفوا وخرجوا تاركينه لحاله دخل الغرفه ورمى شماغه وانسدح بثوبه يتذكر غضبها ووقوفها قدامهم كلهم كلمة تعقب اللي سرقتها من فم بهاج بكل وضوح لان محد يقولها بكثره غيره
هو يشوف اهتمامها له ويفهمه ساعات لكن ساعات يقول انها فطرتها واهتمام من اطباعها ماهو تمييز وشي أكبر
تنهد وصورتها ما تروح عن باله ابد ، عقد حاجبينه بتعب من تفكيره كل ماغمض وكل مافتح وهي بباله مرسومه