انثنى غيم نجد لخد الحجاز النرجسيه

٧٤

دخلت نورا الغرفه وناظرت أنهار وبكت من شافتها أنهار وتقدمت نورا وابتسمت:قولي انكم تراضيتوا
حضنتها وبكت أنهار وهي حاضنتها واخذت نفس نورا:تبكين يعني باقي زعلانه ؟
أنهار:وحشني أنهار ، ابغاه
نورا مسحت على ظهرها:دام تبغينه ويبغاك ليش كل هذا ؟ خلاص أنهار تعرفين ان بهاج كان مجبور وبعد ما ماتوا اللي كانوا سبب بكل هذا مافي شي بيخليه ينجبر مره ثانيه على الطلاق
ابتعدت أنهار وهي تمسح دموعها:قالي كلام كثير نورا كثير ، كان ودي ما يروح ما يبعد عن حضني
عضت شفتها وابتسمت نورا:حضنك ؟
تأففت أنهار وصدت:اوف نورا انا وين وانتي وين
نورا ضحكت:مركزه على اهدافي
أنهار ماردت وهي تناظر كفوفها وهمست نورا:باسك ؟
لفت أنهار بعصبيه:نورا اطلعي برا
ضحكت نورا:والله رضيتوا على بعض بس ماتبغين تقولين لي
أنهار:اطلعي من يوم خطبك سلطان وانتي ضايع عقلك
نورا:اوف أنهار جلس مع بابا بالمستشفى يسولف ويعطيني نظرات اخ يجنن جذاب
لفت أنهار تناظرها وكملت نورا وابتسمت:وقبل يخرج مع فهد قالي قدام بابا وفهد وريوف ناقصك شي نورا ؟ واحسني دخت خلاص اخذ قلبي كويس صار له حادث واختفى ٨ شهور عشان استوعب مشاعري
أنهار:ربّ ضارةٍ نافعه
ضحكت نورا:منجد صايره استحي منه أنهار مو مصدقه هذا سلطان اللي كنت انا واياه حرب
بللت شفايفها نورا بحيا:اوف متى
أنهار صدت عنها ولاردت
-
ريوف:اقول ترا استهبال الوضع ، انا ادرى ببطني مافيه شي صدقوني
عمر ضحك:بابا ريوف ! تحاليل هذي مو لعبه
فهد:الصراحه ياعمي انا بعد ادرى ببطن ريوف مافيه شي
صد عمر وهو يضحك:إنّا لله
فهد:حتى ماقلت لاهلي ادري تحاليل وخربطه
ريوف:صح ؟ والله اول مره اتفق معاك
فهد:لا ماعليك انا دكتور وافهم ما انتي حامل
وقف عمر:بشوف أنهار
مشى تاركهم ولف فهد لريوف:بنت
ريوف عقدت حاجبينها بخوف:فهد
فهد:وشو حامل منجدهم ؟
ريوف:تطبخ الطبخه وتنصدم اذا استوت ، عجيب !
فهد ضرب راسها:بنروح نتأكد مره ثانيه
ريوف:بس نتفق اذا في بيبي حقيقي ما نعامله ولدنا نخليه يعني كأنه صاحبنا او ولد بهاج وأنهار او ولد الجيران يعني كذا
فهد:لا انا لو طلعتي حامل بخليه يلعب عندنا عصريه وينام عند بهاج ، بهاج أب مناسب
ريوف:بس تصرف عليه
فهد:اي اكيد بعطيه مصروف يومي بس وش يجيب عندنا ورع يالله اربيك انتي
ريوف:على اساس انت راعي مسؤوليه توكل بس
فهد:طيب امشي دام محد في نروح نحلل بمكان جديد
ريوف:تعبانه تستهبل دوبي طالعه من المستشفى مافيني اتحرك
فهد:اقعدي كذا لين ننصدم بكرشتك نفس كرشة أنهار
-
دخل بهاج المكتب وناظر الشيخ اللي جالس على مكتبه وطلع جواله قبل يدخل ودور رقمها ودق عليها
حك شاربه بهدوء ينتظرها ترد وعض شفته ينتظرها
اخذت جوالها ومن شافت اسمه جمد وجهها وارتبكت جلست على السرير تناظر اسمه هو له شهور ما دق جوالها بإسمه ولأول مره يتصل بعد غيبته وهجرانه
بلعت ريقها وردت:الو
بهاج:أنهار
غمضت عيونها من سمعت صوته صوته اللي تحبه بكل نبراته واشتاقت تسمعه وتسمعه يناديها
بهاج لف يناظر المكتب:انا عند مطوع شيخ قاضي بالمحكمه دبرت لي موعد معاه بمكتبه عشان اتكلم معه وابيك على الخط تسمعينه
عقدت حاجبينها ووقفت:مافهمت
بهاج:الحين تفهمين كل شي
دق الباب ودخل:سلام عليكم
رفع راسه الشيخ:وعليكم السلام ورحمة الله وبركاته حياك الله يابهاج
ابتسم بهاج وتقدم يصافحه:كيفك ياشيخ ؟
ابتسم الشيخ:الحمدلله تفضل حياك
بهاج:ماني معطلك ان شاء الله هو بس بغيت اسألك عن امور تخص زواجي وزوجتي معي بالخط تسمع
الشيخ:تفضل
بهاج:انا ياشيخ قبل ثمان شهور أجبرني جدي اني اطلق زوجتي وانا ماودي ، حدني وطلقتها طلقه وحده والحين زوجتي حامل وابي ترجع لي ، اعقد عليها من جديد ؟
الشيخ:شوف يا إبني لا يعتد بالطلاق الذى يصدره المكره، فلا يجوز إكراه الزوج على تطليق زوجته ، دام إنت مكره على تطليقها فهي زوجتك ولا تزال الزوجيه قائمةً بينكم
ابتسم بهاج لثواني:حتى لو عدت ٨ شهور ؟
الشيخ هز راسه:هذه زوجتك يا إبني يابهاج
ابتسم بهاج بوسع مبسمه ووقف وصافح الشيخ:جزاك الله خير ياشيخ ماقصرت
الشيخ:حياك الله
مشى وخرج من المكتب وحط جواله على اذنه:أم سعود ؟
سكتت وهي تسترجع كلام الشيخ اللي سمعته وعضت شفتها من ناداها من جديد بإسمها:أنهار
أنهار:سمعت
ركب سيارته واخذ نفس:انتي والله لي واسمك يتبع اسمي أنا الاوفى لك وأنا الأنسب
رفعت كفها تلمس قلبها وهي من زمن لمسته متوجعه لمسته وكان هشيم بارد والحين تلمس فيه الحياه تحس فيه يرجع يتلون من جديد من صوته من كلامه من رجوعه اللي انتظرته
بهاج رجع ظهره لورا:ادري تنتظرين مني اللي يستحق دلالك وإبشري بي ، انا راجع للرياض ومعي سلطان وبنرجع لجِده مع امي واهله وقبل نخطب نورا لسلطان بترجعين انتي لي ولحضني زوجتي وأم سعود
ماردت عليه ووقفت تمشي بالغرفه وشغل سيارته بهاج:عشان نرضيك ونرضي أبوك
وقفت عند الشباك بخوف وهمست:بترجع ؟
بهاج رفع راسه من نطقت بنبرة صوتها اللي يميّزها ويميّز الخوف فيها:أبوي انتي يا أنهار أبوي وأهلي وربعي كلهم ، ما أخليك وأجيك ماهو من أقصى نجد للحجاز أجيك من أخر دروب الدنيا لك ، ماني مخليك
أنهار:قلتها لي وخليتني
بهاج: وش أقول غير إني آسف وش أقول أنا خانتني العواصف والفصول ، من يبي خريفك ويهجر ربيعك ؟ من يبي بردك يا أنهار ويهجر ورودك ، ما بيجيك الا الربيع مني وان قالها ربي فإني بعوض الثمان شهور بثمان سنين وأكثر
أنهار سكتت وهي ماسكه قلبها وكمل بهاج:بس قولي انك بتنتظريني
أنهار:من قبل ثمان شهور وانا انتظرك
ابتسم ثواني بهاج:مازلتي تتأملين بي يعني تحبيني
لفت أنهار من انفتح الباب وناظرت ريوف:تعالي
صدت للشباك بهدوء:باي
قفلت منه وناظرت جوالها ثواني ومشت ريوف:جيت اسلم عليك بطلع مع فهد ويمكن ننام برا كمان
أنهار:انجوي حياتي
ريوف باست خدها وابتسمت:باي
خرجت تاركتها وجلست أنهار على السرير وبلعت ريقها تناظر جوالها خلفيتها اللي زالت صورتهم سوا وماقدرت تغيرها
-
ركبت مع فهد ولفت عليه:اوكيه مستعده
فهد حرك:وانا مستعد وانا ادري بيقولون مافي ورع
ريوف:حتى انا مطمنه ماعليك بطني وانا ادرى فيه
وقف عند المستشفى ونزلت ريوف ومد كفه لها ومسكت كفه تمشي معاه وتقدم:السلام عليكم ابي موعد عند دكتورة نساء وولاده
مد له رقم:تفضل بغرفة الانتظار
مشى مع ريوف وجلسوا ولفت له ريوف وشدت كفه:فهد بتدخل معاي حتى لو ممنوع
فهد:لا ادخلي انتي لوحدك وعلميني لاخرجتي
ريوف:فهد ! ماراح تخليني لوحدي ياويلك
تأفف وهو يناظر الحوامل اللي بالانتظار ورفع عيونه من وصل رقمهم ومشى معها
دخلت ريوف وبلعت ريقها وجلست
الدكتوره:لا تفضلي على السرير هناك
فهد حك جبينه:دكتوره بس نبي نتأكد اذا حامل
الدكتوره:ما سويتوا تحليل حمل ؟
ريوف:الا
الدكتوره:اش طلع ؟
ريوف:حامل
ضحكت الدكتوره:طيب حامل
فهد:بسرعه كذا عرفتي ؟ ماشاء الله اثاري الطب سهالات
الدكتوره:ارتاحي نشوف بالسونار ارتاحي
انسدحت ريوف ومشى فهد يوقف عند راسها ومسك كفها وهو يناظر السونار وكلهم عيونهم بالشاشه وابتسمت الدكتوره:في بيبي
ريوف لفت لفهد:فهد !
فهد تقدم وعقد حاجبينه:وينه ما اشوفه ؟
الدكتوره:اكيد ما تشوفونه الحمل له أسبوعين فقط بس شوف هنا هذا البيبي
فهد قرب عيونه:النقطه هذي
هزت راسها الدكتوره ولفت ريوف:فهد !
فهد:فهد فهد حتى انا مصدوم نفسك اسكتي شوي
الدكتوره:اطبع لكم صور السونار ؟
فهد:اي
مشت الدكتوره ولفت ريوف لفهد وتمسكت فيه:اش حامل فهد يعني يجينا بيبي ؟
فهد ضحك:والله اني احسبهم يكذبون
ريوف عضت شفتها بتوتر وجلست ودخلت الدكتوره بورق السونار ومدته
تقدم فهد يناظر الصوره مع ريوف وظلوا يناظرونها ثواني وهمست ريوف:لقيته ؟
فهد:لا
ريوف:وينه ؟
ضحكت الدكتوره واخذت الورقه وحطت دائره ومدتها
ريوف ميلت راسها بدموع:فهد !
فهد:وشو يادكتوره ولد والا بنت ؟
الدكتوره ضحكت:ما يبين معانا بأول شهر
فهد:افا وانا قلت الدكتوره هذي رهيبه
الدكتوره: اهم شي ترتاحين تحتاجين راحه واسترخاء وما تجهدين نفسك
ريوف:وسياره صح دكتوره ؟ احتاج يشتري لي سياره
فهد ضرب راسها:وش سيارته انتي بعد !
ريوف وقفت وهي تناظر الورقه وخرج فهد معها
حاوط كتفها يمشي معها ويناظر الورقه:يعني هذا ولدنا ؟
ريوف:يمكن بنت ياحياتي يارب بنت بدلعها دلع
فهد:وشو بنت لا نبيه ولد وعدت بهاج انا عشان يلعب مع سعود
ريوف:اوكيه نجيب بنت عشان سعود بالمستقبل يلاقي له حب حياته بسرعه
فهد:صح والله نصير أقارب اكثر
ركبت جنب فهد وابتسم يناظر الصوره وابتسمت ريوف:مو مصدقه بيجينا بيبي
فهد طلع جواله:بقول لاهلي
ابتسمت ريوف تناظر الصوره وحرك فهد وهو يتصل على امه
-
وقف بهاج عند بيت اهل سلطان والتفت عليه سلطان:ادخل
بهاج:لا والله بمرّ امي وارتاح اقعد مع اهلك انت
سلطان:متى نرجع ؟
بهاج:شوف اهلك ورتب امورك معهم ونحجز طيران ان قالها الله
سلطان ابتسم:سوالف خطبه ومهر وشغله
ضحك بهاج ولف له سلطان:تساعدني فيها ؟
بهاج حط اصبعه على خشمه وابتسم سلطان:اختار انت دبلتها البنات يحبون ذوقك
ضحك بهاج:ابشر ان قمت كلمتك وطلعنا سوا
سلطان:تبي شي ؟
بهاج:سلامتك
نزل سلطان من السياره وحرك بهاج للبيت ووقف عند الباب ونزل ودخل البيت
وتقدم يمشي لين غرفة امه ودخل كانت تصلي
انسدح على السرير بتعب وسلمت وناظرته:ياهلا يا أمي
ابتسم بهاج:مانمتي صح ؟
حليمه:لا والله يوم قلت انك بتجي قلت استناك ، سويت لك شي تاكله اسخنه لك ؟
بهاج رفع راسه بيده واعتدل يناظرها على سجادتها:لا ، تعالي ابيك
وقفت حليمه ومشت وجلست على السرير وناظرها بهاج
حليمه:وش صار معك ؟
بهاج:كل خير ان شاء الله رجعت عشانك وعشان سلطان بياخذ اهله ونرجع لجِده سوا
حليمه عقدت حاجبينها وكمل بهاج:بيخطب سلطان نورا
حليمه رفعت حاجبينها:ماشاء الله
بهاج:وانا باخذك وبنروح لعمر ونرجّع أنهار
حليمه:تكلمت معها ؟
هز راسه بهاج وتكلمت حليمه:ورضت عليك ؟
بهاج:أنهار ماتزعل مني
حليمه اخذت نفس:يالله زين الله يهدي النفوس ومتى بيروحون ؟
بهاج:مدري عن سلطان واهله بيضبط اموره ونحجز سوا طيران
حليمه هزت راسها وصدت عنه ووقف بهاج:بنام على طول تعبان من الدرب
هزت راسها له ومشى وخرج من عندها لغرفته
دخل وغير ملابسه وغسل وطلع ياخذ جواله وارسل لها:وصلت الرياض
انتظر ثواني وقرتها وردت:حمدلله على السلامه
جلس وهو يكتب لها:مانمتي ؟
بللت شفايفها وهي تناظره يسألها واخذت نفس ترد:لا
بهاج:ليه ؟
كان يشوفها تتأخر بالكتابه ويدري انها تفكر وتغرق بالتفكير ومستغربه محادثتهم اللي بعد زمن
بهاج:لا تخونك افكارك انتي تعرفين من ماخذ قلبك ويدل دربك واستسهل الصعب لأجل عينك
سكتت تناظر رسالته وكمل بهاج:تبين تكلميني ؟
ارتبكت تعتدل بجلوسها على السرير وبلعت ريقها تناظر الوقت المتأخر:انت جاي تعبان
ابتسم بهاج من ردت بهذا الرد ودق عليها وانتظرها ترد
عضت شفتها من شافته يتصل واخذت نفس تضم لحافها وردت
بهاج:التعب عشان جيتي دونك والله
أنهار:كان نمت
بهاج انسدح بتعب:ماودي به
أنهار سكتت ثواني وناظر السقف بهاج:قولي اسمعك
أنهار ناظرت بطنها ولمسته بكفها:عشت في خوف اكثر من الحزن ، كنت خايفه عليك وعليّ وعلى البيبي خايفه ان تكون النهايه مو نفس اللي رسمتها وخايفه انك اخترت طريق غيري او صرت شخص عادي عندك
عقدت حاجبينها وكملت أنهار:ورتني شموخ صوره لك معاها بألمانيا
أنهار رفعت كتفها:صورتك تشرب قهوه معاها
بهاج:ماتصورت
أنهار:يمكن صورتك وانت ماتدري
بهاج:اكيد صورتني وانا ما ادري اكيد يا أنهار راحت معي عشان سلطان وما ابطت ورديتها
سكتت أنهار ورفع حاجبه بهاج:والله انا اللي ظنيت ان في غيري بديل
عقدت حاجبينها:مين ؟
بهاج:من وليد ذا اللي يمون يرسل لك ورد ويتحمد لك بالسلامه ؟ ويدل البيت بعد
ابتسمت بهدوء أنهار:وليد مدير نورا
بهاج:واذا مدير نورا ؟ يمون ؟
أنهار ماردت واخذ نفس بغضب بهاج:بس حليتها خلاص
سكتت أنهار وهي تلمس بطنها وتحس بحركة البيبي ببطنها وسكت يسمع سكوتها وهدوئها
ونطق بهاج وهو يغمض عيونه:الضلوع اللي على خبرك ضمايا
رفعت عيونها تسمعه يتكلم بصوته اللي تعرفه صوته اللي تميزه كل ما نطق بهذي النبره تعرف انه غرق
بهاج:الضلوع اللي لمستيها بأصابعك الضلوع اللي غفيتي عليها الضلوع اللي توحشتّك والضلوع اللي سكنتيها ، ردي المياه والربيع ونسيمه لهالضلوع ، من ثمان شهور وانا عاقد حجاجي ما يفكّه غير ثغرك الباسم ، ارجعي لي ارجعي لأوطانك وعلى ما تعودنا انا واياك ، لا تعامليني بسياسه احتليني وبعدها نتفاوض
شدت على كفها وهي تسمعه وتدري انه تعبان من صوته اللي كل ماله يخفت لين سكت وهمست:بهاج !
مارد عليها وناظرت الساعه ورجعت حطت جوالها على اذنها:نمت ؟
ماجاها غير السكوت وهمست:السكوت منك يعور
تنهدت تنتظره يرد لكنه مارد قفلت جوالها وهي تدري انه غفى ، غفى من تعبه ومن درب السفر اللي مشاه
-
فتح عيونه وعقد حاجبينه وهو يسمع صوت جواله وجلس وهو يناظر المخده اللي كان حاضنها والتفت لجواله وشاف اسم سلطان ورد:صحيتني من حلم زين
سلطان ضحك:ابطيت نايم علامك؟
بهاج ناظر الساعه:والله ماحسيت ولا شبعت حتى
سلطان:لا بالله قم خلنا نخلص امورنا
بهاج اخذ نفس يمسح عيونه:طيب دقايق واجيك
سلطان:استناك
قفل من سلطان وتثاوب بتعب ونزل نظراته يتذكر انه كان يكلمها وبعدها غفى ووقف وهو يكتب لها
:نمت ما حسيت والله
ماردت عليه وحط جواله ومشى للحمام وخرج بعد ماتروش وناظر رسالتها:مو مشكله
خرج من غرفته ونزل لامه اللي عند التلفزيون:سلام
رفعت راسها:وعليكم السلام طالع ؟
بهاج:اي بروح لسلطان بخلص معه اغراضه
حليمه:بغيت اسألك بهاج وين بتجيب ولدك ؟
بهاج سكت ثواني:ببيتي
حليمه:اللي هاجره ؟
بهاج:اموره زينه بس اجيب له خدم ينظفونه
حليمه:لا كلمت أريج وبنروح للبيت مع خدمها اللي عندها بننظفها سوا وبننظف لولدك غرفه زينه وقريبه من غرفتكم
بهاج ابتسم:وسرير ودولاب والعاب ؟
حليمه ناظرت ابتسامته وابتسمت:تبي تشتري خذله
بهاج:اي والله ودي بشوف ان امداني مع سلطان
حليمه:الله يلقي لك
بهاج:يالله سلام
-
وقفت بتوتر وهي تناظر جوالها:وصلوا سلطان يقول
لفت أنهار عليها:وصلوا جِده ؟ بسم الله قالوا نهاية الاسبوع امداهم بأربع ايام يجون ؟
هزت راسها نورا وابتسمت بربكه:خايفه أنهار
ابتسمت أنهار:بكره بيجون حياتي مو اليوم
نورا رفعت شعرها:عارفه بس متوتره ما اعرف كيف بنام اليوم
أنهار ردت على جوالها:ايوا ريوف
ريوف:فينكم جيت مالقيت احد بالصاله
أنهار:اطلعي غرفتي
ريوف:لا طبعاً انا حامل تعالوا انتوا كويس مشيت للصاله
أنهار:حياتي انا اللي ثقيله مو انتي
ريوف:تعالوا لي بس
قفلت أنهار:ريوف بالصاله
نورا:بقيس فستاني وبجي اوريك
أنهار:نورا حياتي هذي عاشر مره تقيسينه
نورا:اوف انهار لا توتريني اخاف مو زابط
أنهار:براحتك
خرجت لريوف ولفت ريوف:هلا كروشه
أنهار جلست:اخيراً شفناك ما بغيتي تجينا
ريوف:من يوم عرفت اني حامل اسبوع خليت فهد يشيلني على ظهره ويعاملني معاملة الملوك ماقدرت افرط ، بس الحين خرج لسلطان واهله وبهاج يستقبلهم بالمطار
سكتت أنهار ولفت ريوف:بترجعين مع بهاج؟
رفعت كتفها أنهار وابتسمت ريوف:يازينه بهاج لو مارجعتي له بزعل عليك الصراحه
أنهار:يكفي ما تدخلين
مشت نورا بفستانها:كيف بنات ؟
ريوف ناظرتها:واحنا المفروض الحين نجاوبك كأننا ما شفناه خمسين مره ؟
نورا:تحسون من هنا مقاسه تمام ؟ طيب محليني ؟ احس القماش مو مريح
ريوف:ترا سلطان اللي بياخذك اشبك نورا ؟
لفت نورا من دخل عمر ومعه اكياس وابتسم لها وهمس:ماشاء الله تبارك الله
ابتسمت نورا بحيا وعضت شفتها وتقدم عمر:أول بناتي وأول أفراحي ، الله يحميك
تقدمت تحضنه نورا وابتسم يمسح على ظهرها:الله يحميك
نورا:بابا قول الصراحه حلو فستاني ؟
عمر:انتي تحلينه مو هي يحليك
ريوف:مجامله
عمر:اسكتي ياغيوره
نورا:بابا منجد ؟
عمر:والله انك ملاك
ابتسمت نورا ولف عمر لأنهار:بهاج عندي
جمد وجه أنهار:عندك فين ؟
لفت ريوف عليه بحماس وناظرها عمر:بالمجلس ومعه امه
لفت نورا بصدمه ووقفت أنهار:الحين ؟
هز راسه عمر ومد الاكياس لنورا:البسي وتعالي لي المجلس
أنهار:بابا ؟
عمر:بنتكلم سوا استناك
مشى ولفت نورا لأنهار:معاه امه ؟
ريوف ابتسمت:وليش بالمجلس يقلطه عندنا هو بهاج غريب
أنهار مسكت راسها بصدمه وسحبتها أنهار:تعالي اخلصي البسي
مشت معاها ومسكت ظهرها تناظر نورا تفتح الدولاب:نورا منجدك اي فساتين
نورا:فستان عشان يزيد الندم
ريوف:بهاج من الشوق لو تطلع له أنهار بخيشة بصل بيشوفها ملاك
أنهار جلست بتعب ومسكت بطنها:ليش جاب امه معاه طيب ؟
ريوف:يخطب من جديد
نورا ابتسمت تمد الفتسان:قومي البسي
أنهار وقفت تاخذه من يدينها ولبسته وخرجت لهم وفتحت شعرها نورا ترتبه ووقفت ريوف تناظرها:نتمنى يعني يا ام سعود تكون اخر محطات الزعل وتجينا تقولين انك راجعه بيت زوجك معاه
أنهار:ريوف لا تضغطين علي يكفي متوتره ما ادري ليش جا الحين ومعاه امه ماعطاني خبر ما كلمني
نورا:يعني ليش جاي انهار بالله ؟ اكيد يراضيك ويحسن الامور قبل ملكتي بكره انا وسلطان
قالتها وهي مبتسمه بحيا ولفت لها ريوف تناظر حياها:اخذت دور العروسه هذي
وقفت أنهار واخذت عطرها وبخت منه واخذت جوالها ومشت ومشت خلفها ريوف
نورا:بغير واجيكم
وقفت عند المجلس وبلعت ريقها ودقت الباب ريوف ودخلت:سوري بابا بس نمون على بهاج ما يتخبى عنا
فتحت الباب كله وشافت بهاج جالس وحليمه يمينه وجنبه اكياس وبوكيه ورد وعمر قدامهم وارتبكت أنهار
ابتسم بهاج لريوف اللي دخلت:كيفك ابو سعود
ضحك:الحين دورنا نناديك انتي ام
ريوف:لين الحين ما قررنا اسم نعتذر
عمر:تعالي أنهار
ناظرها بهاج تمشي وتجلس جنب عمر وناظرت حليمه اللي نطقت:كيفك أنهار ؟
أنهار هزت راسها ولفت لبهاج اللي تنحنح يناظر عمر وأنهار:جيت ومعي أمي لان أنهار تستحق العنوّه والاعتذار وتصحيح الاغلاط ، انهار زوجتي وام سعود وراس مالي وحلالي واللي جبرنا على البعاد شيخ تحت التراب وانا تعبت من البعاد ابي اشهد باقي حياتي مع زوجتي ومع ولدي
ناظر عمر وكمل:انا حطيت أنهار بصدري وعديتها اغلى حلالي ومن غلاتها عندي غليت حتى خواتها ، صحيح ماقدرت اسد مكانك عندهم ولا يمكن اسده بس ايامهم كانت افضل وماهي مِنّه بس ابي تعرف ان اللي بيني وبين بناتك شي اكبر من اني زوج اختهم
رفعت انظارها تتأمله أنهار يتكلم بكل راحه بكل صراحه ويفصح عن مشاعره قدام عمر وبحضرة أمه
بهاج:أنهار
شبكت يدينها ببعض تناظره وكمل بهاج:انا ابيك ترجعين لي ولبيتي ولحياتي وتزيديني خير وسعاده تسدين اللي فارغ بدونك ، ‏انتي أغلى طموحي و غاياتي و نياتي ، وانا قدام أبوك وقدام أغلى انسانه بحياتي وهي أمي اقولك اني قادر اعوضك عن كل شي واعطيك افضل حياه واشتريها لك بالغالي النفيس انتي وسعود ولدنا
لف عمر يناظر أنهار اللي ساكته تناظر بهاج واخذ نفس بهاج ينتظرها تتكلم
ريوف:واو بهاج
ابتسم بهاج يناظر أنهار اللي تناظره ودخلت نورا:سلام عليكم
ناظرتها حليمه:وعليكم السلام
نورا همست:اش فاتني ؟
ريوف؛كل شي
عمر:أنهار !
لفت تناظر أبوها وناظر عيونها عمر كانت تخفي دموعها وهمس:انتي بغيتيه ليش ما تجاوبينه ؟
مسكت ذراعه بكفها ولفت لبهاج اللي يناظرها ولف عمر واخذ نفس:أم بهاج
ناظرته حليمه ووقف عمر:حيّاك
وقفت حليمه ومشت تخرج وناظروا أنهار البنات وخرجوا ووقف عمر؛خذوا راحتكم
طلع وقفل الباب ومشى بهاج يجلس جنب أنهار وناظرها:ليه ساكته ؟
ناظرته أنهار وتقدم يمسك كفوفها بهاج:خلي الشمس تشرق بدربي من جديد انتي شمسي وانتي ربيع فصولي ‏ارجعي لي ترضى على الصبح الدرايش وينضج التفّاح والورد يتكدّس ويفرح بهاج ، يفرح اللي سكنتي يسار صدره ولا فارقتيه ، أبيك وأبي حسن الختام
نزلت انظارها لكفوفه اللي بكفوفها ولمستها بكفوفها تقلبها هي يامت اشتاقت للمسات كفوفه واحضان كفوفه وحنية كفوفه
نزلت دموعها تتأمل كفوفه وهمس:مشتاق لك كل شي مشتاق لك
رفعت كفه تحطه على خدها ولمس خدها بكفه وميلت راسها تغمض عيونها ياما اشتاقت لحضن كفوفه لوجهها لملمس كفوفه
تقدم لها يرفع كفه الثاني لوجهها وناظرها:أبوي أنهار
فتحت عيونها وهي متمسكه بكفوفه تناظره
بهاج:إروي ضمى العطشان
ناظرت ثغره ورجعت تناظر عيونه وتقدمت تبوسه بخفه وابتعدت بعد ثواني وناظرها بهاج هو غرق من ردة فعلها ومن هدوئها ونعومتها وذاب قلبه وداخ
تقدم لها يتمسك بوجهها وغمضت عيونها تنزل دموعها من حست فيها يقرب وجهه لوجهها ويبوسها
شد على وجهها يبوسها يسترجع كل اللي عاشه معاها ياخذ حق الليالي الظالمه بدونها يروي جوفه يروي قلبه يروي ضلوع صدره
هو ماعاش قبل هذي القُبله ليله ، هو ماشمّ ريح الصبح قبل هذي القُبله ، هو ما تلونت حياته قبل هاللحظه كان يعيش الرماديه والسواد يعيش العتمه والظلام يعيش البرد والزمهرير يعيش السهر والسهاد ، والحين سرى داخله دمّه واسترجعت كل حواسه عملها يشم شذا عطرها ويحس بنعومة ثغرها
ابتعد عنها وباس جبينها وتمسكت بكفوفه وابتعد عنها يناظرها
ناظرته بشوق ولهفه بدموعها وهي متمسكه فيه وناظر دموعها:ابكيني عشان ادري انك تحبيني ، او قولي انك تحبيني وانعشيني
بكت تعض شفتها وهي تناظره وانتظر ثواني وهمست:وحشتني
سحبها لحضنه وغمض عيونه:ابو بهاج وأهله وربعه كلهم ، أبوي انتي يا أنهار
حضنته تتمسك بثوبه ودفن راسه بعنقها:لا عدمني ربي هالشذا
ابتعد عنها ومسح دموعها ووقف يمشي لاغراضه وناظرته أنهار ياخذ الورد والاكياس ويتقدم لها
جلس ومد لها الورد وابتسم وابتسمت بهدوء وهي تمسح دموعها تاخذه وتناظر الكرت:كل الليالي اللي بدوني اسفه
وطلع من الكيس بوكس أخضر وناظرته وابتسمت تشوفه يفتح الهدايا بكل حماس ومد لها البوكس بعد مافتحه تناظر الساعه اللي بالبوكس ورجعت ناظرته
بهاج:ماجازت لك ؟
أنهار هزت راسها والورد بحضنها:خياال
عضت شفتها تنطق بالانقليزي وابتسم لانه يفهمها ويعرف وش تقول وكيف توصف الساعه
مسك ذراعها يلبسها ولف واخذ الكيس الأحمر وضحكت لان تذكره تذكر المحل المفضل لبهاج
وابتسم من ضحكتها يلف لها:امطرت نجد وامطرت الحجاز بضحكتك
ابتسمت له وفتح البوكس تناظر الدبله الجديد وهمست:دبلتي عندي
بهاج:دبله جديده لأيامنا الجديده ، دبله اغلى ودبله احلى
رفعت عيونها لنظراته لها ومسك كفها يلبسها الدبله وابتسمت تتأملها وهي تحضن الورد
وناظرها تتأمل الهدايا وهمس:رضيتي على المسكين عندك ؟
رفعت عيونها تناظره وكمل بهاج:رضيتي على أبو سعود؟
ابتسمت له ومدت كفها لكفه وشدت عليه وهي تناظر عيونه:لأني أحُبَك ماقدرت أزعل عليك أكثر
غمض عيونه ومسك صدره:الله !
فتح عيونه يناظر ثغرها:لو يسمع العاقل أحبك منك والله يمسي وهو خبل
ابتسم لها:أحوبك تخليه ماهو خبل وبس تخليه يهذري
ضحكت لانه يقلد لهجتها وشد على كفها:ادخلي خذي اغراضك وارجعي معي
أنهار:وين ؟
بهاج:معي
أنهار:الحين ؟
وقف بهاج:اجل متى ؟ ترجعين معي
أنهار:بهاج بكره ملكة نورا ، بهاج !
بهاج:ناديني بإسمي يا احلى من يردد اسمي في شفاتينه
ابتسمت له ومسك كفها يوقفها:نجيهم بكره
أنهار سكتت ثواني ومشى بهاج:مامن مفرّ ادخلي تجهزي واطلعي لي
ناظرته واخذت الورد والاكياس ودخلت
لفت حليمه تناظرها تدخل وتمشي مشية الحامل ببطنها واغراضها
وتقدم عمر لها ومسك كتوفها:وش صار ؟
أنهار ناظرته وتكلمت بهدوء:بروح معاه
عمر هز راسه لها ومشت تدخل الغرفه
لحقتها ريوف وناظرتها:اشوف وريني يدك
مدت يدها وابتسمت وناظرت الدبله ريوف:خيال
دخلت نورا تناظرهم:كل شي ذوق من الورد للهدايا للكلام خساره سمعته من ريوف ياليتني سمعته من بهاج
اخذت نفس أنهار بربكه ولفت تاخذ عبايتها
نورا:بتروحين ؟
هزت راسها أنهار:بروح معاه
ابتسمت ريوف بسعاده وناظرتها نورا:مكلتي بكره
ريوف:واذا ملكتك بكره ؟ ترا ما بتهاجر بتروح مع زوجها بس
ابتسمت انهار وهي تلبس وهمست بإستنكار:زوجها
تذكر كيف كانوا يقولون لها اخوها بمده وبفتره والحين يقولون لها زوجها كيف تغير الوضع تماماً وصار حبهم واضح ومفضوح
نورا:وهذي بتجي معاكم ؟
أنهار لفت:اكيد فين يوديها؟
ريوف:وخليناها مع ابويه كمان مدري اش بيقولون
نورا:تقول اللي تقوله طلقها ثلاث ومالها رجعه
ريوف:عاد احسها كانت تحبه
أنهار اخذت شنطتها وخرجت ومشوا معاها البنات
لقوا حليمه لوحدها بالصاله وابتسمت ريوف وهمست:ماكان عندها
وقفت حليمه تناظر انهار:بتروحين معنا ؟
هزت راسها بدون تتكلم وخرجت انهار وناظرت عمر بالحوش مع بهاج وابتسم بهاج يناظر ريوف ونورا خلف الباب
اشرت له ريوف ورفع كفه لها ومشت أنهار لعمر اللي تقدم وحضنها
اخذت نفس تغمض عيونها بحضنه وابتعد عنها:ان بغيتي شي انا موجود وماني مخليك
ناظرته تتذكر ليلة زواجها وتتذكر اللحظه هذي ، كانت تتمنى تسمع منه هذا الكلام وتشوف منه هذي النظرات وتاخذ من حضنه راحتها وآمانها
ابتسم يمسح على خدها:اي شي بخاطرك لا يقعد بخاطرك تعالي لي
هزت راسها له وتقدم يبوس جبينها ورجعت تحضنه من جديد
خرجت حليمه ووقفت تناظرهم وتنتظرهم
ولف عمر لبهاج اللي واقف ومسك كف أنهار:هذي بنتي ماني موصيك عليها لانك تعرف وش أنهار بحياة إنسان
ابتسم بهاج وكمل عمر:لا يجيها قصور ولا يمسّها زعل ولا يكدر صفو حياتها شرّ
بهاج ناظر أنهار اللي تناظر عمر وكمل عمر:هي تعودت الدلال
بهاج ابتسم يطمنه:وهي دلوعتي
ضحكت أنهار بصوت واضح وابتسم عمر من صراحة بهاج وغزله قدامه بدون إحراج او تردد
ابتسم من ضحكتها بهاج وأيقن بهاللحظه ان الطوفان استراح وانقاد الماء للعشب الجاف ، وامطرت على وادي كان يصيح من الجفاف ، وانتصر هذا الشجاع بعد طول الهزايم ، واللي كسَى وجهه السخط ! تبشّر بأول تباشيره ، كل من كان ضايع لقى وجهته وكل الدرايش تفتّحت وكل الورود تلقحّت وهذا حال صدره
حاله بعد ما شاف ضحكتها ورضت عليه دنيته وكل مافي داخله رجع تلوّن من جديد وعادت تخيط كل جرح داخله بدون كلافه منها بمجرد ضحكتها تصلح تصدع جدرانه بدون تحس
عمر:الله يلقي لكم
فتح باب البيت بهاج يخرج وخرجت حليمه تركب يمين بهاج وركبت أنهار خلف بهاج وركب بهاج وحرك
لفت حليمه تناظر الطريق بهدوء وبهاج يسوق وخلفه أنهار
نزلت انظارها لدبلتها ورفعت راسها من نطقت حليمه:متى شهرك ؟
رفع عيونه بهاج لمرايته واخذت نفس بهدوء أنهار:دخلت التاسع
شد على قبضة يده بحرقه فاته الكثير من عمره بدونها
حليمه:تقومين بالسلامه
ماردت أنهار ودخل الفندق بهاج ونزلت أنهار معاه
مد كفه لها وناظرت كفه وناظرته ومسكت كفه ومشى معها يدخل وحليمه تمشي قبلهم
طلعوا بالمصعد ودخلت حليمه غرفتها ومشى بهاج معها لين غرفته وفتحها ودخلت معه
اخذت نفس تناظر الغرفه وتقدمت تشوف البلكونه المفتوحه وطلت تشوف الغروب وموج البحر عاكس نور الشفق وتقدمت تاخذ اطول نفس وهي ماسكه بطنها
وحست فيه يدخل البلكونه ويوقف خلفها مد كفه لشعرها يزيحه عن عنقها وتقدم يبوس نحرها ويحاوط ذراعينه
رفع راسه يناظر البحر وهو محاوطها: لنا في حياتنا مثلها ، مثل الشمس الغاربه هذي شمس بها شر تصلانا واخذنا نصيبنا منها وشمس بها خير تدفينا وهي اللي بتشرق علينا بقية عمرنا
مسكت كفوفه اللي على بطنها وهي تناظر البحر
وكمل بهاج:اشتقت لأيام عطرك وأيام الهنا مع جنابك ، اشتقت تضوين لي الشموع بليل وأسهر عشانك أسهر احكي عن كل سبايب غرامك ، اشتقت ارد على هاتفك بمرحبا بك
ابتعدت عنه تلتفت تبي تشوف عيونه لان أجمل منظر لأبصارها هو وقوفه قدامها ماهو غروب شمس البحر الأحمر
بهاج تنهد من لفت له:اروي القلوب اللي بعدك ما تروّت
أنهار:ارجع حُبَني من جديد بإفراط وغلو ودللني زي زمان ابغى انسى كل قسوة زمانك
بهاج ابتسم:برجع أحوبك من جديد
ضحكت له وغمضت عيونها من مسح على وجهها بكفه وتقدم لها:بس قولي أحبك
فتحت عيونها تتأمل عيونه ولمعتها واللهفه اللي تستوطنها وهمست:ولا يوم بطلت ، في فراقك ماقل حُبك الا زاد
سكت بهاج وكملت انهار:أحُبَك بهاج
مسك كفها يدخل للغرفه ومشت خلفه ولف وهو يقدمها له:تعالي للي بايع ربيع الأوادم وشاري خريفك
رفع شعرها عن وجهها واخذ بأنفاسه عطرها وأخذ من شهدها جفاف ريقه
قبّلها يعيد كل ليله قضاها لوحده كان الحق انه يكون بحضنها مرتاح على صدرها ، يغرق فيها من جديد يغرق ولا يدور طوق النجاه وكأن الغريق في بحر النرجسيه أسعد من الناجي ، النرجسيه اللي جات من أقصى غرب المملكه بنت الحجاز وسكنت في قلب بدوي من نجد ما يعرف الا يدل دربها
وصارت بين يدينه مثل تحقيق الأحلام وأغلى الطموحات وأول الغايات وأحسن النيات ، عاش معها سرّ الخلوه الحلوه وإفصاح الغرام وتمجيده ، كان العطش ذابحه من يباس حياته وكانت مثل الندى اللي تغيثه وكأن موسم الوسم ابتدا بلحظة ما صارت بين يدينه ، يقبلها ولا يشبع تقبيلها يحررها من قماش يسترها وكأنه يقول أنا أولى بلمساتك ، عطرها هدّ الجبال كيف ما يهدّ إبن الطين كيف ما يزعزع ثباته ويخليه رهينة حاسة أنفه
فتحت عيونها تناظر عيونه ونظراته له ورفعت كفها لشعره تلمسه هي تعرف ان الحياه قبله كانت خساره والأيام اللي عاشتها بدونه كانت ربح للشوق زاد بُعد المسافه غلاته عندها وتحدا حبها اعذاره الركيكه وأفصحت عنه وحررته من عتابها ولومها تبغى تعيش اللي بقى من حياتها بدون إسراف بالثواني والدقايق والأيام
كان بهاج داخلها أطول جذع وأشدّ ضلع وأحنّ شعور ، يتلوّن داخلها ويمتزج مع دمّها وتحيا به ، حتى لو رهان بقائهم سوا خاسر المكسب عودتهم من جديد ، أنهار ما يدفيها معطف فرو أنهار تدفيها حنيّة بهاج ، أنهار مثل ماهي موت بهاج ! بهاج ميلادها ، أنهار مثل ماهي صباح وخير ! بهاج شروق شمس ما تشرق الا في صبحها ، أنهار خُلقت تحب بهاج وبهاج ولد يحبها فطره