انثنى غيم نجد لخد الحجاز النرجسيه

٤٥

أنهار صرخت بوجهها:مريض مريض ماشفتيه ؟
نورا:ونسامحه ؟ أنهار رحنا له بالمستشفى طردنا طردنا وهو مريض
أنهار:يمكن يحتاج يتكلم مع احد يمكن كان نفسه يتكلم مع ريوف لانه يرتاح لريوف ؟ ليش قلتي لا ليش وخرتيه ؟
نورا لفت لريوف اللي تبكي من أصوات هواشهم:بكيها اكثر شاطره
أنهار:ما اقول كذا عشان ابكي ريوف اقول كذا لاني حسيت انه تعبان فيه شي مخبيه علينا يبغى احد يسمعه انت ماشفيته كيف بعد عن حليمه ولا كأنه يعرفها كان يبغانا إحنا
جلست نورا وهي تحضن ريوف:محد بيتكلم معاه
أنهار هزت راسها وناظرت ريوف:ريوف انا برجع ياروحي لا تخوفيني عليك اوكيه ؟
ريوف ناظرتها وتقدمت تبوسها أنهار ولفت نورا:انا اجلس معاك
ريوف:لا خلاص مافيني شي روحوا
نورا:بجلس معاك ريوف ونخلص كل شغل الشقه وبعدين ارجع
ريوف لفت لنورا:مافيني شي بس كنت مكتومه وانفجرت والحين ارتحت خلاص روحوا
نورا:ما ابغى يجلس عقلي عندك
ريوف:بكره بداوم نورا ماعليك
نورا ناظرتها وتنهدت ووقفت وخرجت من الغرفه ابتسمت أنهار لريوف وهمست لها:بتكلم معاه
مسحت دموعها ريوف وهزت راسها لها وخرجت أنهار ورا نورا اللي وقفت قدام بهاج:بنرجع
بهاج وقف:وريوف ؟
نورا:مافيها شي كويسه
بهاج:بشوفها وجاي
نورا:لا بهاج خلاص خلها على راحتها غير انها فصخت عبايتها وغيرت ملابسها وبتنام
سكت بهاج يناظرهم ولف لسلطان اللي وقف ياخذ جواله وناظر فهد:ان بغيت شي كلمني
هز راسه فهد لهم وخرجوا
ركب سيارته بهاج ويمينه سلطان وخلفهم نورا وأنهار وحرك بهاج
تكى بيده يناظر الطريق ورفع راسه للمرايه يعدلها عليها وناظر انعكاسها بمرايته صاده للطريق عاقده حجاجها ساهيه
لف سلطان يناظره ورجع يناظر الطريق
نزلت راسها أنهار تفتح جواله ودخلت محادثته ناظرت اخر رسايلهم لبعض وعضت شفتها تمنع بكاها كان فويس منه وهي راده عليه:شكراً بابا
بلعت ريقها تحط جوالها على اذنها تسمع الفويس منه : بابا أنهاري حولت لك شيكي اذا وصلت وخلي ريوف تنزل لي اذا جهزت
نزلت راسها من بكت وتخلت ما يلاحظها احد ولفت نورا عليها وانتبهت انها تبكي وصدت نورا للطريق وبلعت ريقها تشد على كفوفها
نزلت من السياره اول وصولهم ودخلت البيت ومشى بهاج خلفهم
دخل البيت وناظر نورا اللي تدخل الحمام ومشى للغرفه ودخل ناظرها تفصخ عبايتها وصاده
لفت من شافته واقف وما تكلمت كان ودها تحضنه وتبكي بحضنه وتعيش كل حزنها زي كل مره بحضنه
بهاج:ليه كذبتي على نورا ؟
عقدت حاجبينها:كذبت بإيش ؟
بهاج تقدم لها يناظرها:قلتي اني ماخذك للرياض عشانك زعلانه على روحة ريوف ؟ ليه ماقلتي ان امي قالت لك بتفرّق بيننا وانتي تبيني وتحبيني وتضايقتي من كلامها واخذتك انا لبيتنا سوا بالرياض ؟
اخذت نفس بعدم تحمل وصدت بنظرها وهزت راسها بالنفي هي ماكان ينقصها شي اكثر من حزنها وضيقتها
بهاج:أنهار ! انا قلت ما بوقف قدام احد لوحدي
لفت عليه أنهار:لا توقف بهاج ولا ابغاك تقول شي تبغى تتزوج ؟ تزوج اخر همي ، تبغى تسمع لكلام امك اسمع سو اللي تبغاه بهاج ما ابغى شي ، اتركوني كلكم بحالي
سكت بهاج يناظرها وكملت أنهار:خنقتني بهاج وانا مخنوقه من نفسي ، ماراح اقول شي لاي احد تفهم؟
ظل يناظرها ثواني وهز راسه لها:افهم
انقبض قلبها من شافت ملامحه تغيرت ولف يعطيها ظهرها خارج وماقدرت تتحمل خروجه زياده وبكت هو لو لف كان انتبه انها اجهشت بالبكاء بس من زعله قفل الباب خلفه وخرج من البيت يقفل بابه بقوه
طاحت بفراشها تبكي هي ما كان ينقصها الا قطره ويفيض الكأس وتبكي هالبكاء كله هي تركت ريوف لوحده تبكي وهي محتاره بأفكارها لابوها هي ياكلها الشوق لابوها وتذبحها الاسئله من تغيره وكان ينقصها ملامة بهاج لها وتندمر نفسيتها لهالدرجه
،
دق الباب وهو منزل راسه ولاردت فتح الباب ولقاه مقفول وهمس:ابلش
دقه من جديد:ريوف
ماردت عليه وكرر الدق:ريوف افتحي بكلمك
اخذ نفس يزيد بالطرق:لا تخرعيني افتحي لا اكسره
سمع صوت خطواتها وفتحت الباب له وناظرته
رجع لورا يناظرها بربكه:تبين اسكريم ؟
عقدت حاجبينها وحك جبينه فهد:جيت اسألك تبين اسكريم اشتهيته وبطلع اجيبه ، ماجيت اسأل عنك ادري فيك ما يهزك شي
سكتت تناظره يداريها وكمل فهد:شوكلاته والا فراوله ؟
همست:جوكلت
تقدم لها:منهو ؟
اخذت نفس؛جوكلت
هز راسه:طيب ابشري بس لا تقفلين الباب عليك
هزت راسها له ومشى فهد يخرج من الشقه ورفعت راسها تاخذ نفس من بكاها اللي طال لساعات طويله
،
كانت بالغرفه تاركه نورا بالصاله لوحدها تناظر جوالها والصور وتنتظر بس جيّته هي تنتظر جيّته لها يوم كامل ووقفت من سمعت صوت السياره وخرجت من الغرفه وناظرتها نورا:اشبك ؟
مشت تفتح الستاره تناظر سيارته ونزوله مع حليمه وتكلمت بهدوء نورا:كلي معايا
لفت أنهار عليها:مالي نفس
نورا:طيب عشان انا يصير لي نفس
أنهار:والله مصدعه نورا بسوي لي قهوه مو مشتهيه اكل
نورا؛حتى بهاج ما يبغى مع مين اكل ؟
لفت أنهار قبل تدخل المطبخ ونطقت:وينه بهاج؟
نورا:برا ارسلت له قال انه يدرس
ماردت أنهار ودخلت المطبخ تسوي لها قهوه
-
صحت الصباح ولفت للباب وهي تسوي شعرها:
تعال يامؤدب
دخل وناظرها:مؤدب عشاني دقيت الباب ؟
هزت راسها ريوف:ماتوقعتك تعرف آداب الدخول
فهد:خلي كثر الكلام خلصتي ؟ مستعجل انا
ريوف:ياليل القروشه
وقفت وهي تفك شعرها باصابعها وناظر لبسها ولفت عليه وهي تحط روجها:عشان كذا اقول ابغى سياره
فهد:تعقبين بس البسي اخلصي بلحق دوامي
مشت تاخذ عبايتها السماويه وطرحتها البيضاء اللي على رقبتها وشالت شنطتها ومشت معاه
خرجت واخذ نفس فهد:يعني خلصت الالوان ؟
لفت عليه بالدرج:الوان ايش ؟
فهد:عبايتك
ريوف:لا مره انسى تدخل بملابسي
فهد تأفف وتقدم قبلها ومشى لسيارته وركبت جنبه
لفت عليه:ابغى قهوه قبل اروح الجامعه
فهد التفت عليها:كان سويتي بالبيت
ناظرته:فهد ! ياليت تبطل تعطي رايك
فهد:اذا صرت سواق عندك اسكت تراني زوجك
ضحكت ريوف وناظرت عصبيته:اوكيه يازوجي مرّ اخذ لي قهوه
ناظرها بنص عين وحرك سيارته وطلعت ايبادها من شنطتها تناظر جدولها وهمست:متى تجيب السياره يازوجي ؟
فهد:مابجيب
لفت عليه:اوكيه بهاج بيجيب
فهد:شدخل بهاج ؟
ريوف؛اخوي
فهد:بالله ؟ صار لك تعرفينه نص سنه متى صار اخوك
ريوف:هو مستعد يجيب لي سياره انت شدخلك؟
فهد:لاني انا زوجك
ريوف:زوجك زوجك وما يبغى يجيب لي سياره
فهد:انكتمي خلاص بعدين نتفاهم
ريوف رفعت راسها للطريق:هذا وقف
فهد:وشنهو ؟
ريوف:ستاربكس فهد ركز
وقف عنده ولف عليها:شتبين ؟
ريوف؛انا بنزل انتظرني
فهد رفع حاجبه من فتحت الباب ولبست نظارتها الشمسيه ونزلت الكوفي
قفل سيارته وهمس:اللهم طولك ياروح
لحقها وناظرها واقفه باللاين ووقف جنبها ولفت عليه:خير ؟
فهد:عطيني طلبك انا اجيبه وهاك المفتاح اركبي
ريوف ماردت وتقدمت تطلب ولفت عليه:جبت لك صدقه تجرب عيشة الاوادم الطبيعين
فهد:اللي جرب حليب النياق ما بيجوز له شي
ريوف:تكفى اسكت لحد يسمعك
فهد ابتسم ياخذ الطلب وهمس لها:ومعلمتهم اسمك بعد
ريوف اخذت قهوه وخرجت وفتحت جوالها تصور:بصور لبهاج والبنات
تقدم فهد بسرعه وفتح بابها:عشان بهاج ما يسوي لي علوم
ضحكت وركبت تصوره جاي من الجهه الثانيه:كذاب قبل شوي نافخ علي قدام الناس
نزلت جوالها تفتح قهوتها وتشرب منها وحرك فهد سيارته
،
نورا ابتسمت تناظر السنابه ولفت لأنهار اللي تشرب قهوتها قدامها وساهيه:شفتي ريوف ؟ ياحياتي متحمسه للدوام
اخذت نفس أنهار وهزت راسها بالنفي:مافتحت جوالي
نورا رجعت تناظر جوالها:مو مصدقه ان لك كذا يوم كذا
أنهار:مو وقت كلامك نورا
حطت كوبها ووقفت ومشت للشباك تفتحه تناظر من بعيد سكون المزرعه ولفت لنورا:بتمشى شوي وراجعه
ماردت عليها واخذت عبايتها ولبست شوزها وخرجت من البيت مشت بهدوء لين اقتربت من حوض النياق وشافته مع سلطان جالسين ماقدرت تقرب اكثر خوفاً من انهم يلاحظونها
اخذت نفس ومشت للملحق ودقت الباب وبلعت ريقها من فتح الباب عمر وعقد حاجبه
همست بهدوء:اقدر ادخل ؟
عمر:وش صاير؟
أنهار:بتكلم معاك انت لحالك ؟
عمر:طالع
أنهار تقدمت له:دقايق بتكلم معاك
اخذ نفس ودخل وشدت على كفوفها برجفه أنهار ونطقت:من يوم رجعنا من عند ريوف افكر فيك
عقد حاجبه وكملت أنهار:كنت تقول انك مو مرتاح هنا وتبغانا نرجع جِده اول مره اشوفك كذا من يوم جينا هنا
عمر مارد وهو يناظرها وعضت شفتها من حست بدموعها وهي تناظره:فهمني ليش تغيرت علينا وبترك كل شي هِنا واروح معاك لجِده
عمر:كل شي ؟
أنهار تقدمت له ومسكت كفه ومن حست فيها بكت تترجاه:تكفى بس ارجع زي زمان ، ابغاك وحشتني وحشتنا كلنا ، ارجع زي زمان بابا تكفى
مسكت بكفوفها كفه وهي تبكي ونزلت راسها تغمض عيونها:ما اشتقت لنا ؟
رفعت راسها تواجهه:انا اشتقت لك مره تكفى ارجع لنا مو قادره اتحمل اللي صاير مو قادره اتحمل وجودك قدامنا ولا نقدر نشوف منك حنيّه وسؤال زي زمان وكأنك ميت ، قولي ليش تغيرت ؟
عمر رفع راسه من دخلت حليمه ولفت أنهار تناظرها ووقفت محلها حليمه وهي تشوفها تبكي
لفت أنهار على عمر ولفت وجهه بيدها:بابا
عمر:طيب نرجع جِده سوا بس بشرط
أنهار:ماكان عندك شروط يوم كنا عند ريوف ! ماكنت تكلمني كذا واحنا عند ريوف ليش تتغير هنا ؟ مين يغيرك ؟
تقدمت حليمه تناظرهم بإستغراب ونطق عمر
:اخذك انتي ونورا وريوف ونرجع لجِده تاركين كل شي هنا بس بشرط
سكتت تناظره وكمل عمر:نحضر زواج بهاج على شموخ قبلها
ظلت تناظره بصدمه ولفت بصدمه حليمه عليه ونطق عمر:نذر علي ان تزوج بهاج لأرجع فيكم جِده ولا اشوف شي وراي
بلعت ريقها وبكت وهي تناظره وهمست:ليش طيب؟
عمر:عاد هذا اللي عندي
صدت براسها تبكي بدون صوت ومسحت دموعها ولفت عليه وكمل عمر:ومعد تشوفون عمر هذا لو طلعنا من هنا
هزت راسها بتساؤل:ليش تتغير هنا طيب ؟ ليش مانقدر نظل هنا بدون ما تتحول شخص ثاني ، ليش تبعدني عن بهاج ؟
عمر:ماهو بيدي
أنهار:بيد مين بيد مين اقطعها ؟ مين اللي بعدك عنا بعد ماكنا اقرب شي لك ؟ دخلنا هنا وانت تقول بناتي بناتي والحين ؟
ميلت راسها:ليش ؟
عمر:أنهار قلت لك ولا تكثرين كلام نخرج من هنا لاتزوج بهاج
جلست حليمه وهي تناظرهم وظلت أنهار تناظر عيون ابوها اللي متشكله بالعاديّه ولا كأنها تبكي قدامه : ليش تختبر قوتي ؟
عمر:وعدتك وعد وما بخلفه بهاج يتزوج نرجع كلنا بنفس الليله
هزت راسها وهي تناظره بقل حيله كانت ترتجي تجيه وتسمع منه شي ثاني شي نفس الامل اللي حسته من جاهم ببيت ريوف لكن خابت ظنونه مشت تخرج من الملحق شهقت من خرجت وجلست خلف الملحق وهي تبكي غطت يدينها واجهشت بالبكاء تمنت لو شافت منه الضعف اللي شافته ببيت ريوف تمنت لو كلمها وقال لها اسبابه وتغيره لكنه كل اللي سواه حط قدامها شرط يدري انها ما بتتحمله يشوف في عيونها حبها ويبغى يعاقبها عليه
رفعت راسها من شهق ورفعت راسها:لا تتكلم بحرف
وقفت ومسحت دموعها:سلطان ! تقول شي اقص لسانك
سلطان:علامك تبكين ؟
أنهار:مالك شغل
مشت وهي تبكي وتخطته تدخل البيت وعقد حاجبه يناظر الملحق وهمس:اجل ما اقول !
مشى لمكانهم من جديد ولف بهاج:لقيت الدِلال ؟
تقدم سلطان وجلس جنبه:ماشفت
بهاج:اجل ليه رجعت ؟
سلطان:لقيت زوجتك تبكي
بهاج عقد حاجبه:وين ؟
سلطان:ورا الملحق شكلها كانت فيه
بهاج التفت من بعيد وهو عاقد حجاجه وكمل سلطان:شوفها اذا ودك
اخذ نفس بهاج:ردتني سلطان
سلطان:والله حالها يكسر الخاطر
بهاج ناظره ثواني ووقف وهو يهمس:لا حول ولا قوة الا بالله بس
لبس حذيانه ومشى للبيت دخل وناظر نورا:وين أنهار ؟
نورا:بالغرفه
تقدم وجرب يفتح الباب لقاه مقفل ودق الباب:أنهار افتحي
ماوصله رد ولفت نورا:اشبها ؟
رجع يدق الباب:بنت أنهار هذا انا بهاج افتحي
نطقت وسط بكاها:ما ابغى اشوف احد خلوني لحالي
عقد حاجبينه من ردته وشد على قبضة يده اللي على الباب واخذ نفس يهدي عصبيته وتقدمت نورا:تبكي ؟
مشى بهاج وخرج من البيت ولفت نورا للباب:بنت اشبك ؟
أنهار:خليني لحالي ماتفهمون ؟
تنهدت نورا ومشت تجلس بالصاله تاركتها
-
خرج من البيت وهو يهمس:انا إبن الكلب اللي سألت ردتك ياحمار ردتك
مشى وهو غضبان ولف له سلطان اللي شافه جاي معصب:يارب ما انكويت عشان ما تطلع حرتك فيني
بهاج:انطم
جلس جنبه وناظره سلطان:اح بالله ردتك ؟
بهاج مارد عليه وهو يناظر النياق قدامه
وثواني نطق:وش غيرها ؟
سلطان:والله البنت تأزمت نفسيتها من ابوها ماخذهم رايح جاي مو مخليهم يعيشون زين ، مره متغير كأنه عزرائيل ومره يقولهم مشينا جِده
بهاج التفت عليه يناظره وهو ساهي يفكر
ولف عليه سلطان:تتوقع صادق يوم قالها ؟ يردهم لجِده ؟
بهاج ميل شفايفه:مدري لكني قبل ساعه كنت واثق انه هَرج وحتى لو انقال لهم مشينا ما مشوا لكني الحين ماني واثق من مصيري والله اتخيل اني اندفن هنا وانسي
سلطان:لا يارجال !
التفت عليه بهاج يناظره:وليه لا ؟ لو خيرها ابوها بيني وبينه بتختاره ، ما بتعزني اكثر من ابوها ، اي تهجرني سلطان عشان ابوها
سكت سلطان وصد يتنهد وكمل بهاج:لكن ان صارت !
لف عليه سلطان وسهى بهاج لثواني بكل ذكرياته معها ورفع عيونه لسلطان:بموت حيّ
سلطان:اسم الله عليك يارجال لا تقول شي ماصار قلت لك هي ردتك الحين البنت تعبانه ولا تدري وش تسوي ومن سمعت طاري جِده تبدل حالها
هز راسه بهاج يجاريه بالكلام ولف للنياق يناظرها
هو ما تشافي باقي من بوساتها وابتساماتها ما تشافى من وعودها واحضانها
يحس بالنيران تاكله لمجرد فكرة انها ممكن تروح تحط هذا الحب والتضحيات بعرض الحايط وتتركه !
خايف يصدق كلام امه يوم تقوله انهم بنات مدللات يعيشون ورا سعادتهم ولو ما لقت سعادتها معاك هجرتك بدون تسأل
هو وصله هذا الشك من اختلافها وتغيرها وزاد الشك فيه لين اندفن ظن داخله
ولف على سلطان وهمس:مخنوق هنا بروح الرياض
سلطان:وش تبي بالرياض ؟
بهاج:لا تقول لفهد ماني مارّ عليه ابي اقعد لوحدي
سلطان:لين متى ؟ بتبطي ؟
بهاج هز راسه:مدري
سلطان:تبيني اجي معك ؟
هز راسه بالنفي ووقف بهاج وطلع من جيبه بَكت دخانه يطلع زيقاره ويولعها ويمشي لسيارته
شغلها واخذ نفس يناظر يمينه كانت جنبه اخر مره والحين وينها ؟
قفل باب سيارته وخرج ماشي لطريق الرياض كان حاط ذراعه على شباكه ويفكر وهو يلمس شاربه ودقنه رفع انظاره على مرايته يشوف دقنه
اللي ما تحبه عليه ولا تبي تشوفه الا بشارب بس هي ما قالت له وافصحت لكنه يدري من نظراتها انها تحب شاربه وما تداني دقنه
كمل يناظر الطريق لين وصل للرياض ونزل لبيته
دخل البيت وفتح انواره واجتاحته الضيقه بصدره يناظر مكانهم قدام عيونه
مكان ما قال لها قصرّي بُعد المسافه وقصرت مكان ما انتشى مكان ما تلونت شرايينه بحبها وانطبع على قلبه هواها مكان ما قسمت الاثاث بيدها واختارت الوانه هي اليوم غايبه مالها حس بالبيت
بالبيت اللي رفع انظاره يتأمله البيت اللي ما اشتراه الا عشانها وما تمنى يسكنه الا معاها هو يفكر لو راحت وش يسوي بكل هذا كل هذا اللي يسكن صدره ويسكن جوفه
غمض عيونه وهو يهمس:لا يارب تكفى
تقدم يجلس على الكنبه وفتح عيونها يناظر الفراغ
نزل يدينها ولمس بكفه وشاحها ونزل انظاره يناظر وشاحها اللي كانت تغطي نفسها فيه وشد عليه بكفه ورجع ظهره لورا
'
كانت تناظر الفراغ وتسمع كلامها اللي تقوله وتكرره من ساعة دخولها:اول مره اشوف عمر ناوي نيّه هالقد فعلاً حط براسه وقالي ان لو تزوج بهاج واستقر وتطمنت عليه باخذ البنات ونرجع جِده وكل وحده تشوف حياتها هناك وترجع اموركم تتعدل
لفت عليها أنهار:خلصتي ؟
حليمه:أنهار محد بيقنع بهاج غيرك ! ، جربي اطلبيه واذا عرف انه عشانك بيتزوج وبيقتنع
أنهار سكتت تناظر حليمه وكملت حليمه:صدقيني محد يفهم وضعكم قد ابوكم وانا اعرف مصلحة بهاج مع من ؟ وابيه يتزوج ويستقر هنا وانا اذا ابتعدت عنه بكون مرتاحه
أنهار:اطلعي
حليمه:ماخلصت أنهار خليني اكمل
أنهار:لك يومين تجيني تسمعيني نفس الكلام ما طفشتي ؟ خلاص اتركيني بحالي
حليمه:لان بهاج مختفي ومايرد علي ولو كلمتيه ورجع واقنعتيه يتزوج ما بزعجك بعدها
اخذت نفس أنهار:اتركيني لحالي
وقفت حليمه وخرجت من الغرفه وناظرت نورا:اقنعها تاكل الله يهديها تتغذى على القهوه
نورا:ايوا ماقصرتي
صدت عنها نورا وخرجت حليمه تاركتهم
،
اخذت نفس تحاول ما تبكي هي تعبت من التفكير تعبت تسمع كلام حليمه وعمر كل يوم وتشوف نورا اللي تجلس بملل ووحده لحالها وتعبت تفكر في بهاج كل ماتتذكرته ينعصر قلبها كيف تفرط فيه ؟ كيف بتقدر تقوله يتزوج غيرها ويشوف حياته بعيد عنها كيف بتتحمل ان ابوها ضحى بحبها عشان يرجع نفس ماكان قبل
مسكت قلبها من حست بوجع شوقها له وخوفها وحزنها وتعبها لها مده تفكر تحتار وتحط يمينها بهاج ويسارها ابوها وحياتها القديمه وخواتها وتحتار اكثر وتتعب اكثر
لفت لجوالها وفتحت رقمه تناظره غمضت عيونها تمسح دموعها واتصلت عليه
عضت شفتها تنتظر تسمع صوته اللي من فتره طويله ما سمعته
بلعت ريقها من رد:هلا
سكتت تميل شفايفها بتعب يكوي صدرها
واخذ نفس يكرر كلامه:هلا
أنهار:جالس ببيتنا ؟
رفع حاجبه يناظر حديقة البيت من بلكونته:بيتنا !
أنهار:متى بترجع ؟
بهاج:مالي نيّه
أنهار سكتت تناظر الفراغ ونطق بهاج بعد طول الصمت:وش اقنعوك هالمره ؟ قلت لك مابي احب خوافه
تنهدت تشوي قلبه من سمع تنهيدتها ورفعت ابصارها لا تنزل دموعها وكمل بهاج:ليه تسمعين لهم ؟ ليه اجيك وترديني ؟ ليه يا أنهار متى صرنا كذا ؟
أنهار:لو اطلبك شي عشاني أنا توافق ؟ حتى لو هذا الشي بيعورك وما بيرضيك ؟
بهاج عقد حاجبينه وكملت أنهار:انت كنت تقولي لا تقولين تكفى قبل تنوين يجيك اللي طلبتيه صح ؟
غمضت عيونها وكملت:تكفى بهاج تكفى اسمع لهم اسمع لأمك وتزوج
جمد وجهه ووقف وهو عاقد حجاجه:وش تقولين ؟
سكتت أنهار تبكي وكمل بتساؤل وصدمه:صاحيه انتي ؟ وش قالوا لك هذولا ؟ انتي ليه تسمعين لهم ليه ليه ليه كم مره اقولك لا تسمعين لا يأثرون بك وش اللي تقولينه انتي صاحيه ؟
همست بين تعبها وونّها:تعبانه بهاج
بهاج اخذ نفس يهدي نفسه:بجيك وبتفتحين بابك والا بكسره وبنتكلم لين ترجعين لعقلك
قفل جواله ما يترك لها رد واخذ اغراضه وقفل انوار بيته وخرج من البيت
حرك سيارته ومشى بالطريق راجع هو كان قبل أيام لوحده يصارع ذكرياته ويقاوم كبرائيه لا يدق عليها
لكنها قاعده تغرق لوحدها من تأثيرهم عليها لدرجة طلبته يتزوج هو ما يجهل الوضع اللي هي فيه شافها كيف تاخذها الكلمات للحضيض تدمرها ويتبدل حالها ياكلها الشك ويفتري فيها الخوف وصار لازم انه يرجع يرجع يخليها تفوق وتعرف وينها عنده وينها بقلبه
فتح جواله يرسل لها وعينه على الطريق:لا تنامين جايك
حط جواله بحضنه يكمل طريقه وقرتها
مسكت قلبها اللي تتسارع دقاته وحست بالهبوط اللي يخليها تشوف الدنيا بدوران هي ما تاكل وتشرب قهوه وتسد شهيتها أكثر والتوتر والضغط زادها
كانت تفكر بتعبها وخمولها لين سمعت صوت الباب وصوت نورا تنطق:بهاج !
فتحت له الباب نورا ودخل بهاج:كيف حالك نورا ؟
نورا:فينك انت ؟
بهاج جلس بالصاله:وين أنهار ؟
نورا:بالغرفه
بهاج:أنهار
انتظر منها رد وهو جالس ولفت نورا تناظر أنهار اللي خرجت وعقدت حاجبها:تعبانه ؟
رفع انظاره عليها يناظر وجهها المصفر وشفايفها اللي تلونت بالبياض وتقدمت لها نورا بخوف:أنهار
وقف بهاج من مالت على نورا وفقدت الوعي وركض لنورا يشيلها عن حضنها ويشيلها بيدينه:الحقيني
نورا جمدت محلها بخوف وفتح الباب بهاج خارج ونطق بحرقه:اخ أنهار اخ
خرجت من الملحق تناظرهم وعقدت حاجبها تمشي لهم بخوف:بهاج !
التفت على امه وقفل الباب على أنهار:جاي
خرجت نورا بسرعه ولفت حليمه:شصاير ؟
نورا:تعبانه أنهار
ركبت نورا جنب بهاج ولفت تناظر أنهار بالخلف
:مو ماكله شي اكيد بتطيح
بهاج ناظر طريقه وتنهد ياخذ نفس ولفت نورا:بسرعه بهاج تكفى
هز راسه يعدل جلسته ويسرع ويكشح بفلشر سيارته