انثنى غيم نجد لخد الحجاز النرجسيه

٦٩

خرج من مكتب الدكتور كان يطلبه يرجع للسعوديه عشان يلحق على اختباراته اللي بتبدأ لكن الدكتور قال يحتاج أسبوع تحت المراقبه عشان يكون بوضع يسمح له السفر
مشى ودخل الغرفه وناظر سلطان نايم وجلس على الكرسي واخذ جواله يناظر رسالة ابراهيم:واختباراتك؟
لف يناظر سلطان نايم ونزل نظره لجواله ودخل موقعه بالجامعه هو كان يحلم انه ياخذ بكالريوس ويدرس لكن شائت الأقدار واشتدت عليه الظروف ولاقدر يدرس او حتى يجيب البكالريوس ناظر اسمه ورقمه الجامعي واعتذر عن الترم كامل ، اعتذر بدون ما يتردد بدون ما يندم كله يهون عند سلطان ، الترم اللي اخذ وقت وهو يدرسه سهر بألمانيا بجانب سلطان يدرس بفرق التوقيت ويوم جات الاختبارات ماقدر ، ماقدر يترك سلطان لوحده او حتى ياخذ سلطان ويخاطر بصحته بعد ما انتظر شهور طويله يتحسن قفل جواله وناظر سلطان وهز راسه:فداك
تنهد ورجع ظهره لورا ورفع راسه يناظر الفراغ ونزل نظره لجواله الثاني وفتحه وناظر صورتها بجواله
كم مشى فيه الوقت بدونها ، بدون حسّها ووجودها ؟ كم اخذ به الزمن وهو يتعاقب على قربها وكأنها أكبر ذنوبه ، ليه اخذ شهور طويله بعيد عنها لكنه ماتخطى مانسي ماعاش ليله هَني
عقد حجاجه من ألم صدره وهو يتأمل صورها ، ماّ صبره عنها واشتاقت لها كل جوارحه والمنافذ دونها مسدوده ، كل ما وجه لفراغ شافها لولا حاسة الشم اللي تخونه ولا يشم ريحة عطرها كان صدق انها هوجاس يمرّه ويلازمه ومستحيل يبتعد عنه
ناظر رقمها واخر رسايلهم سوا غرق يقرأ كلامه لبعضهم ورسايلهم وصورهم سوا لين لف لسلطان اللي ناداه
لمّ انفاسه يستجمع نفسه وتقدم:ارحب
سلطان:احس برجلي تألمني
تقدم بهاج:تحس بها؟
سلطان عقد حجاجه بألم:صحتني من نومي
بهاج:زين امورك سليمه ان شاء الله اصبر يجيبون لك مسكن ، جايك
خرج ونادى الممرضه وتقدمت له ودخلت لسلطان اللي اشر على رجله ونطق بهاج بالانقليزي يشرح لها
'
شدت على كف أنهار وهي تسمع الكابتن يبلغهم بالوصول للوجهه للرياض
نزلت راسها تسمع الهبوط وقلبها يتسارع من ذكرياتها ، كيف كان اول هبوط للرياض ومين كان معها كيف احتضنهم ابوهم بعد النزول وكيف قابلوا بنفس اليوم بهاج وسلطان وقتها ونقلوا للمزرعه وتحولت حياتهم تماماً
والحين هم راجعين لها ، راجعين للرياض عشان ريوف عشان يحضرون تخرجها ويرجعون معها للحجاز ويهجرون نجد تماماً
لفت تناظر أرض المطار وظلمة الليل وسكون الوقت ولفت لأنهار:متحمسه اشوف ردة فعل ريوف
فكت حزامها أنهار:حاسه ان الدنيا تدور فيني
عقدت حاجبينها نورا:والله ؟ طيب ارتاحي لين ينزلون وبكلمهم يجيبون لك عصير تشربينه
وقفت نورا وشدت على كفوفها أنهار وهي تحس بالدوار والدنيا بعينها ظلام وتقدمت المضيفه بالعصير وشربته أنهار وجلست نورا جنبها:صرتي احسن ؟
هزت راسها أنهار ولفت لنورا:كويسه كويسه خلينا ننزل
وقفت أنهار ونزلت للمطار واستلمت الشنط نورا ومشوا مع بعض
أنهار:نروح لها على طول ؟
نورا:شرايك ؟ انا قلت اذا تعبانين بناخذ فندق ونشوفها الصباح بس مشتاقه لها موت
أنهار:اوكيه نروح لها بس شوفي اذا كانت بالشقه
نورا:بالشقه بالشقه كلمتها واخذت العنوان منها قلت بنرسل لك هدية التخرج وما بنقدر نجي
أنهار هزت راسها ومشت نورا وهي تسحب شنطهم
'
لبست كاب التخرج ولفت بفستانها قدامه:كيف ؟
ابتسم:حلوه حلوه لدرجة ان شافوك كذا حلوه قالوا عيدوا لها السنه عشان نشوفها مره ثانيه
ضحكت ريوف تمسك كابها وجلست قدامه:شوف خواتي ماراح يجون صرفوني بهديه بس انت ماراح تصرفني بأي شي
فهد:تكفين انتي ان طلبتي طلبتي شي غالي ، وانا ماعندي الا كليتين لو ثلاثه مابقصر ببيع وحده
ريوف زمت شفايفها بزعل:شليويح ! تبخل علي بكليه ؟ افا هذا وانا ريوف اصغر عناقيد البنات
رفع حاجبينه يناظر دلعها:منهم ؟
ريوف:اصغر عناقيد البنات
فهد:اطلبي ياجعلني فدا اصغر عناقيد البنات
ابتسمت ريوف ورفعت كفها لشعره:شنطة ايرميز
فهد:منهي هذي ؟
ريوف:براند فهد عندهم شنط خيال نفسي بوحده
فهد:اي تم خلاص
ريوف انصدمت:والله ؟
فهد:اي والله بكم ٣٠٠ ريال ؟ ٤٠٠ مقدور عليها يا ريف قلبي
ريوف:٣٠٠ ريال ما يعطونك كيس بـ ٣٠٠
فهد:وشو الفين ثلاثه خلاص تم ماعندي اغلى منك
ريوف:فهد يعني اعلى شوي
عقد حاجبينه:شنطه اعلى من الفين ؟ شنطه ذي والا سياره
ريوف:هي بسعر السياره صراحه
فزّ:اخو بهاج شنطه بسعر سياره مجنونه انتي مهبوله ؟ غبيه تاخذين شنطه غاليه ؟ تعقبين ماتشمينها مجنون احط فلوس بشنطه
ريوف:دوبك تقولي فداك اش تغير
فهد:فداك الفين ثلاثه ، منين لي شكلك صدق طمعتي بكليتي
ريوف:افا ماتعطي كليتك لايرميز عشان حبيبتك ريوف بخاطرها شنطه من عندهم ؟
فهد:المشكله لو ماجابت كليتي شي بقعد بدون كليه وانتي بدون شنطه
ضحكت ولفت من دق الباب ولفت له:افتح اتوقع المندوب
فهد:من يجيب هديه الحين ؟
ريوف:خواتي ، افتح
وقف فهد وفتح الباب وجمد وجهه من شافهم وابتسمت بخفوت نورا من شافته لابس شورت وتيشيرت ومتغير شعره ودقنه وشاربه وكأنه فعلاً من صنع ريوف
توترت أنهار من شافته ورجعت لها كل ذكرياتهم سوا كل الأيام اللي عاشوها سوا وجلساتهم وكيف كانوا سوا أخوان ولبعضهم سند وستر وغطاء
هم قعدوا السته حوالين بعض أيام طويله والحين انقضت أيام طويله وكل شخص بعيد عن الثاني
بلع ريقه فهد من شافهم وهمس:حيّاكم
طلت ريوف وهي لابسه الكاب وبكت نورا من شافتها وصرخت ريوف بصدمه تغطي فمها وتقدمت نورا تحضنها بقوه وهي تبكي
حضنتها ريوف وهي تناظر أنهار بصدمه وبكت من استوعبت وجودهم
نزلت دموع أنهار بدون صوت وتقدمت تشد على ذراع فهد اللي واقف وابتسم لها ومشت لريوف اللي حضنتها وبكوا سوا
ريوف ابتسمت وهي تمسح دموعها:تعالوا وحشتوني وحشتوني
دخلت نورا وحطت شنطتها وجلست وناظرت ريوف:تغيرتي ريوف
ريوف ابتسمت تمسح دموعها وفصخت كابها:للاحسن ؟
ضحكت نورا:للاحسن
جلست ريوف وناظرت أنهار ونورا:فقدت الامل انكم تجون
أنهار حطت يدها تحت راسها وناظرتها:ماكان ودي ما اكذب عليك بس عشانك
ريوف تنهدت ولفت لفهد اللي واقف وحاط يدينه بجيوبه:تعال فهد
فهد:لا بطلع اخذ فره وين مفتاحي ؟
ريوف:عند راسي بالغرفه
مشى فهد للغرفه ولفت نورا تناظر الغرفه اللي دخل لها ولفت لريوف:كيف الوضع معاك ؟
ريوف:حمدلله ماصدقت خلصت فاينلز
أنهار:اخيراً بنرجع سوا خلاص
ريوف سكتت وناظرت فهد اللي خرج ورفع كفه لهم وطلع من الشقه ولفت لهم:فين نرجع ؟
أنهار:جِده
ريوف ناظرتهم وبللت شفايفها وبلعت ريقها:ما اتوقع برجع معاكم
سكتت أنهار وعقدت حاجبينها نورا:ليش ؟
ريوف:ماراح اخلي فهد
سكتوا يناظرونها وكملت ريوف:انا وفهد سوا
غمضت عيونها بتعب أنهار وناظرتها بحده نورا:وشو سوا مافهمت ؟ وشو سوا ريوف لا تجنيني
ريوف ناظرت عصبيتها:يعني انا ابغاه وهو يبغاني واحبه وهو يحبني وصار بيننا شي أكبر من الكلام وبس وفهد ترك اهله وبهاج وسلطان واختارني انا مستحيل اخليه
نورا مسكت راسها:لا تجنيني ريوف من قبل وانتي ماتشوفين فهد شي !
ريوف:بس صار الحين كل شي عندي ، نورا انا درست هنا لوحدي معاه كل مره ابكي فيها مشتاقه لابويه كنت الاقيه يسد مكانه ، انا صرت ما اقدر انام بعيد عنه ، نورا أحبه
تنهدت أنهار بتعب وناظرتها نورا بعصبيه:انتي تدرين وش جانا عشان اخترنا سلطان وبهاج؟ اقرب مثال اختك اللي جنبك هذي تعرفين وش صار لها ؟ تدرين ٥ شهور مرت وش صار لها ؟ وش صار لي انا ؟ ريوف بنكمل نص سنه بسبب المصايب بعيدين عن بعض
ريوف:ما يهمني شي نورا ، ما يهمني احد وفهد زي ماقدر يترك اهله شهور عشاني يقدر يتركهم سنين عمره كلها
نورا:بيخلونه اهله ؟ بينسونه تتوقعين ؟ تحسبين يوم تركهم وهجرهم شهور ماراح يدعون عليك ويخلونك انتي السبب عليك اللوم ؟ ريوف لا تجنيني يكفي اللي عشناه
ريوف ناظرتها بغضب ورفعت صوتها:ماراح تجبروني !
نورا ضربت الطاوله اللي بينهم وصرخت:بجبرك عشان تصحين على نفسك عشان ما تصيرين نفس اختك ، عشان ما تكونين أنهار
تبدلت نبرتها نورا للهدوء وكملت:عشان يكفي اللي ببطن أنهار
جمد وجه ريوف ولفت لأنهار اللي ساكته وصاده عنهم وكملت نورا:عشان ما يهجرك فهد نفس ما هجر بهاج أنهار ونفس ما هجرني سلطان
ريوف مسكت ذراع أنهار بصدمه واخذت نفس نورا
:يكفي اللي جانا تكفين ريوف يكفي خلينا نترك كل شي
ريوف:أنهار
لفت أنهار تناظرها ورجعت راسها على الكنبه وناظرتها وكأنها تثبت صحة كلام نورا
وغطت فمها ريوف وبدلت نظراتها لبطنها بصدمه ورجعت ناظرتها
نورا ناظرت ريوف بضيق:ريوف انا تعبانه ، انهد حيلي متعوره ودواي نكون سوا من جديد نعوض بعض ونبعد عن هذي العايله تماماً
ريوف:أنهار من متى ؟
نورا اخذت نفس تصد عنهم ولفت أنهار لقدام:من اول ما وصلنا جده
ريوف شدت على ذراعها:بالسادس ؟كلمتي بهاج ؟ تعرفين وينه؟
نورا:ريوف !
لفت ريوف لنورا وناظرتها:اشبك ؟ اكيد لازم يعرف بهاج
نورا:انتي بتجمعينا بالعايله هذي مره ثانيه ؟ اشبك ريوف مو مستوعبه حجم الضرر اللي تضررناه ؟
ريوف:لان صار في بيبي بالسالفه في بيبي يحتاج ابوه ولازم انهار تتجاهل كل شي عشان البيبي
نورا:انتي منجدك تبغين يوصل خبر لهم ان انهار حامل ؟ احنا ناقصين مشاكل ؟ يكفي ريوف يكفي صحصحي ، ولا تضغطين على أنهار هي تعبانه وببداية السادس حمدلله قريب تولد ونرتاح سوا
ريوف ناظرتها بحده:مصحصحه وادري ان اللي صاير غلط بهاج لازم يدري
نورا:هو نعرف وينه اصلاً ! قفل ابوابه خمس شهور ما نبغاه بهذا الوقت خلاص
ريوف لفت لأنهار:ماتعرفون وينه ؟ ماكلمك ؟
ماردت أنهار وكملت نورا:ولا نعرف وين سلطان وفهد بيكون الثالث معهم فجأه تصحين تلاقينه رجع لعقله واختار اهله ولا تلاقين له باب
سكتت ريوف بخوف تناظر نورا وكملت نورا:اختاري نفسك ريوف خلاص استوعبي هذي الحكايه انتهت ، درستي معاه ويعطيه العافيه بس خلاص انهي كل شي وارجعي معانا
ريوف انفجرت تبكي ورفعت صوتها:كيف اترك كل شي ؟ نورا اش ذنبه طيب ؟ اش ذنبي انا ؟ استوعبي اقولك احبه ابغاه
نورا وقفت تناظرها بغضب:مرد قلبك بينسى بتتعورين خمس شهور سته وتنسين وتعرفين ان اللي سويتيه صح
ريوف:وابويه ؟ ابويه اللي تركناه هناك بدون مانعرف وضعه وصحته
نورا:باقي فيها ابونا ياريوف ؟ باقي بعد كل هذا فيها اب ؟
ريوف صرخت:فيها فيها ، لان مستحيل اتركه مستحيل ما يتصلح شي مستحيل
اخذت نفس أنهار ورفعت راسها لهم واقفين:خلاص
سكتت ريوف ولفت نورا على أنهار
ناظرتهم أنهار بهدوء:يكفي ماجينا نتهاوش وكل وحده تفرغ اللي فيها على بعضنا
ريوف لفت وهي تمسح دموعها وجلست نورا وصدت بغضب واستغفرت بالسرّ
أنهار:تعالي اجلسي ريوف
لفت ريوف عليها وناظرتها وهي تبكي وهزت راسها أنهار:تعالي
مدت كفها ومسكت كفها وجلست وحضنتها وتنهدت أنهار من شافت ريوف بحضنها تبكي
لفت نورا تناظر أنهار اللي لفت لها وتنهدت نورا تصد
'
خرج من الحمام بعد ما اخذ شاور وهو لابس روب ومنشفته على كتفه وشغل زيقارته وهو يطلع من دولابه ملابسه الشتويه وجاكيته الطويل ولبس وانحنى يلبس شوزه ولف الشال على رقبته وخرج وهو يدخن ولابتوبه بيده وركب السياره مع السواق ناظر المطر اللي على السياره والناس يتجولون بالمظلات ووقف عند المستشفى ونزل
دخل الغرفه وناظر سلطان اللي معتدل بجلسته والممرضه عنده وابتسم من شافه صاحي وفتح يدينه بهاج من فرحته ونطق:والله ان ردتك تسوى الدنيا عندي ، حيّ يا اخوي حيّ
ابتسم بتعب سلطان وتقدم له بهاج ومسك كفه:هاه كيف الحال يا صاحبي ؟
سلطان هز راسه وهو يرمش بتعب:حمدلله أحسن
بهاج:لا طيب طيب ياربي لك الحَمد
سلطان ناظر الممرضه ورجع ناظره:يجون يقرقون فوق راسي مدري وش يقولون
بهاج ابتسم ورفع راسه للممرضه يسألها ولف لسلطان:تاكل ياسلطان تبي يجيبون لك شي ؟
سلطان:انت وش صار لك ؟
ابتسم لانه يقصد لهجته:ابد كل نومه نمتها انا كنت ادرس
خرجت الممرضه ولف بهاج عليه وابتسم:تكلم أهلك ؟
سلطان:اغراضي وينها ؟
بهاج:اي اغراض يا سلطان اغراضك راحت مزاد من الشهور اللي نمتها
سلطان عقد حاجبينه بتعب وشد على كفه بهاج وطلع جواله من جيبه:بشوف لو كانوا صاحين يدقون تكلمهم
سكت ثواني سلطان يناظر بهاج وتكلم بهدوء:ونورا ؟
لانت ملامح بهاج وهو يناظر جواله والتفت لسلطان يناظره وكمل سلطان يتسائل:وش صار ؟
بهاج تنهد ولف لجواله:صاحين تبي تكلمهم والا تعبان ؟
سلطان:هات
مد جواله بهاج لسلطان وقام بهاج تاركه ومشى لشباك غرفة سلطان يناظر ألمانيا الممطره هو من طاريهم تبدل حاله ، يسأله سلطان بعد كل هذا الألم كل هذا الهجران كل هذا الشتاء وصقيعه اللي عاشه يسأله بعد ما انتصفت السنه وصارت ٦ شهور على الغيبه ، ركضت فيه الأيام وهو واقف عند اخر مره ماقدر يوادع ماقدر يسلم ماقدر ينهي شي
لف من نطق سلطان:بهاج
كح وهو يناديه وتقدم له بهاج:اسلم
سلطان:عطني ماء
مد له الكاسه بهاج وجلس وناظره سلطان بتعب ومسك رجله بهاج يطمنه:تبي تبدأ علاج طبيعي هنا لين تقوم على حيلك ونرجع السعوديه ؟
سلطان:خلك مني وش العلم وش صار ؟
بهاج:والله انك دايخ انت ليه ما ترتاح وتقيّل شوي ؟
سلطان عقد حاجبه بألم ووقف بهاج يعدل له سريره:بقعد هنا عندك عندي شغل وانت ريّح اشغلت نفسك
ميل راسه سلطان وغمض عيونه واخذ نفس بهاج وجلس على الكنب اللي عنده وفتح لابتوبه ولف من وصلته رساله وفتحها شافها من أمه وناظر سلطان واخذ جواله تارك لابتوبه وخرج من الغرفه
دق عليها وردت عليه:بهاج
بهاج:هلا يمه
حليمه:كيف حالك وكيف سلطان ؟
بهاج:طيب ماعليه حمدلله اليوم كلم اهله وكلموه
حليمه:كلمهم ؟ ما قالوا له شي ؟
بهاج عقد حاجبيه:شي مثل وش ؟
حليمه اخذت نفس وجلست:رَده بالمستشفى طاح عليهم هالمره جلطه قويه
زادت عقدة حجاجه وكملت حليمه:ظنتي ما بيقوم منها كلمت العصر ام سلطان وقالت لي
بهاج:يطيب يطيب
حليمه:ماظنتي
بهاج صد يناظر المستشفى ولف يمشي:انتي ينقصك شي ؟
حليمه:لا ياحبيبي أريج امس مرتني وطلعتني تمشيني وقابلت ابراهيم وماقصر والله ونسوني
هز راسه بهاج وكملت حليمه:انت متى بترجع ؟
بهاج:والله مدري عن سلطان بشوف وضعه ان كان يقدر يرجع رجعنا ما بنطول اكثر
حليمه:اي والله لا تبطون وخله يكمل علاجه بالرياض وش لكم بالغربه يا أمي
بهاج:ماهي خيار يا أمي ماهي خيار
حليمه تنهدت:منيره قالت لي ان البنات بيجون يشوفون عُمر
بهاج سكت ورفع راسه من طاريهم وكملت حليمه:فهد كلم اهله بعد ماكان قاطعهم وبيرجع يشوفهم بس ماهو لوحده بنات عُمر معه
ابتسم ابتسامه بارده من عرف ان فهد كان معهم طول هالفتره
واخذت نفس حليمه:الله يشفي لهم ابوهم ويقومه بالسلامه
بهاج هز راسه وهمس:اللهم امين ، توصين شي ؟
حليمه:سلامتك استودعتك الله
قفل جواله وجلس وغمض عيونه ثواني يرجع راسه للجدار وتنهد بضيق من عرف اخبارهم بعد كل هالمده كل اللي طرى عليه ، انهم كانوا أولويته واول اهتماماته وكيف كان يهتم لكل وحده فيهم ويسندهم واختار انه يكون ستر وغطاء وتمسكوا فيه وتقوّت علاقتهم ، كانوا يختارونه يوم يتخيرون وكانوا يلجأون له يوم يهابون كانوا معه يطمنون بدون ما يحسون انه ولد عمهم ينامون معه ببيت واحد
تذكر كيف كانوا ثلاثتهم سوا معه ببيته بسيارته بمشاويره وكل موقف مرّ عليهم وانجمعوا فيه
تنهد بتعب من طاري ذكرياتهم ووقف يرجع الغرفه وناظر سلطان اللي نايم ومشى للكنبه وجلس
'
رفضت انهم يرجعون لوحدهم وظلوا عندها بالشقه معها ومع فهد واقنعتهم يشوفون عمر بعد كل هذي الشهور بمحاولة انه يرجع معهم ويتحسن كل شي بحياتهم
وكان أول الرافضين نورا اللي بكت بشده رفض انها تشوفه وترجع لهذيك المزرعه لكنهم قضوا أيام طويله سوا وريوف كشفت سرّ حزنها وسحر ابوهم وكانت الدهشه سيدة الموقف
بكوا وكيف ما يبكون تشكل الحزن عليهم من انهم تركوه وهم يحتاجونه رغم همهم من اللي سواه فيهم واجبرهم عليه من اللي عاشوه معه من القسوه اللي ذاقوها
ولكن بعد كل هذا هم الان راكبين سياره وحده راجعين لنفس المكان اللي تعوروا منه وخرجوا منه يحلفون ما يرجعون له ولو كان من يكون
وهذا هو طريق المزرعه يقطعونه وهم ساكتين
شدت على كفه ريوف وهي تناظر الطريق بخوف وبشوق انها بتشوفه بترجع تبشره بتخرجها ومهما كانت ردة فعله هي تتقبلها وتبيها
تنهد فهد وهو يناظر كفها بكفه ولف للطريق ورفع نظره لنورا وأنهار بالخلف
نزلت دموع أنهار بصمت بدون ما تتغير ملامح وجهها وهي تراقب الطريق ، الطريق اللي قطعته للرياض خِلسه معاه مطلب يكونون بخلوه وحدهم ، الطريق اللي اول ما عرفته كانت خلف ظهره وراقبت نظراته من مرايته لها وماكانت تدري ان هذا الشخص بيكون حب حياتها وتعبها وجرحها ، شافت من بعيد نخل المزرعه الشاهق الطويل ورجف قلبها تشد على يدينها تحاول تمسك مجرى دمعها لكنها أبت تسيطر عليها
لفت لنورا اللي مسحت دموعها من قهرها ومن زعلها انها راجعه للشخص اللي عورها اللي حرمها من سعادتها اللي جبرها على الحزن اللي حاربته بالتخطي الشخص اللي حلفت ما تبكي بعزاه من مرارة قسوته الشخص اللي قالت لو السماء تمطر مغفره دعيت انه يكون تحت ساتر يستره
وقف فهد من انتصف المزرعه ورفعت راسها أنهار للبيت اللي قدام عيونها ، بيته
تخيّل لها طلوعه من البيت بشماغه اللي على كتفه وعقاله اللي على راسه وثوبه الاسود ، زيقارته اللي تتوسط اصابعه
لفت ريوف تناظر الملحق من بعيد وغطت فمها وهي تبكي ولفت من فتحت الباب نورا واخذت نفس طويل تناظر المزرعه اللي ماكرهت بحياتها مكان قد ماكرهتها
لفت أنهار تناظر نورا ووقوفها اللي تتحدى فيه حزنها وفتحت الباب بيد راجفه تنزل وتناطر مفرق ممر النوير
وكن الأرض اللي بالممر صابها الجفاف وكن هذا الطريق اللي مشته كثير صار طويل موحش بعد ما كان يزيّنه النوير وورد الجوري والياسمين وطول ظلاله عن القيظ اللي من سبايب النخل الحين يكسوه الظلام والجفاف
لفت من نطق فهد:أنهار
لفت تناظرهم واقفين يناظرونها ولفت تناظر مكان المستودع اللي اختفى تماماً ومشت معهم
لفت تناظر حوض الإبل الفارغ وعقدت حاجبينها من وحشة المكان دون أصحابه دون ذكرياته
مشت لين الملحق ودقه فهد ولف لهم يناظرهم وفتحت الباب اخته عذاري وابتسمت تحضنه:فهد
لفت تمسح دموعها ريوف ولفت تناظر عذاري اللي ناظرتهم:مافي احد تعالوا
فهد:ليه وينهم ؟
عذاري:راحوا يشوفون جدي بالمستشفى
فهد:عمي عمر ؟
عذاري:داخل
لف فهد وناظر ريوف وتقدم لها:تدخلين ؟
ناظرته بخوف وتقدمت بخطوات هاديه وبيد راجفه دخلت وناظرته منسدح بالصاله وبكت من شافته وتقدمت له:بابا
لف عليها يناظرها ومشت له بسرعه تركض وبكت على بطانيته بصوتها كله
دخلت خلفها نورا اللي ناظرت حاله ووضعه وسواد وجهه وعقدت حجاجها بتعب
ومشت أنهار من جنبها وعضت شفتها وهي تبكي وتقدمت له وهي تسمع ريوف اللي تبكي
وانحنت له تناظره وباست جبينه وغمضت عيونها بقوه وطاحت دموعها على وجهه
تمسكت بثوبه وهي تبكي على جبينه وابتعدت تناظر سكوته ونظراته
رفعت راسها ريوف:ياروح ريوف انت انا اسفه خليتك انا اسفه
لف فهد على نورا اللي واقفه محلها وناظرتهم عذاري بضيق ولف فهد واشر لعذاري وخرجت معاه وعقد حاجبينه:وش صاير ؟
عذاري:هذا وضعه جدي قبل يتعب تهاوش مع جدتي جمعه وجابوا طاري سحور وسحر مافهمنا شي بعدها تعب جدي وودوه المستشفى
فهد:جدتي ما قالت شي ؟
عذاري هزت راسها بالنفي:تدخل على عمر تبكي عنده وتخرج
فهد:ما طاب ؟
عذاري هزت راسها بالنفي:ما يتكلم وياكل شوي وينام ان جاته جدتي واحياناً ترتفع حرارته واجد
عقد حاجبينه فهد بضيق ولف يناظر المزرعه وطاحت انظاره على حوض النياق اللي كانوا يجلسون عنده جميعهم السته ، واخرها صرنا وكنا وين ؟
ولفت عذاري عليه:تدري عن سلطان وبهاج؟
لف لها بإنتباه وهز راسه بالنفي:وينهم ؟
عذاري:بألمانيا
عقد حاجبينه فهد:ليه ؟
عذاري:سلطان تعبان صار عليه حادث ودخل غيبوبه شهور بالرياض وبعدها بهاج اخذه ألمانيا يتعالج
جمد وجه فهد وهو يسمعها ومسك ذراعها:وش تقولين انتي؟
عذاري:بس حمدلله طيب امس كلم اهله وهو بخير
فهد مسك راسه من صدمته وصد عنها وتنهدت عذاري:امي قالت لا تعلمينه لكن ماقدرت احس لازم تدري فهد
فهد:وش سويت انا وش سويت
غمض عيونه من صدمته والتفت من دخلت سيارة ابوه وهمست عذاري:لا تعلمهم اني قلت لك تكفى
هز راسه وشد من قبضة يده يخفي حريق صدره من تقدم ابوه ومشى له وسلم على راسه وناظره بجمود عبدالله
بلع ريقه فهد:شلونك يا ابوي ؟
عبدالله:مهتم ؟
سكت فهد ومشت له امه وحضنته وسلم على راسها من سمعها ترحب فيه
'
جلست على الكنبه وتكلمت ببحه:شفتي فهد؟
لفت ريوف عليها:عند اهله مارحت ماودي اشوفهم
أنهار:ليتهم ما يزيدونها عليه
نورا لفت لها وناظرت عمر اللي نايم عندهم ولفت تفتح ستارة الشباك وهي تناظر المزرعه
كانت تنتظر تدخل سيارة سلطان او حتى سيارة بهاج لكن ماكان في المزرعه احد وكأنها هجرت
تنهدت أنهار وبلعت ريقها ريوف:ودي اشوف فهد بس خايفه من المشاكل خلاص مافيني شدّه
أنهار:روحي لا تخلينه
لفت ريوف على عمر ووقفت وخرجت ولفت أنهار على نورا اللي تناظر المزرعه وهمست نورا:ولا كأن عاش فيها بشر
سكتت أنهار وكملت نورا:ولا كأن صار في هذا المكان كل هذي المشاكل
أنهار:راعي المشاكل هو بالمستشفى
نورا لفت لها:تتوقعين بيقوم ؟
أنهار رفعت كتفها:ما يهمني جيتي لهنا عشان ابويه
نورا لفت تناظر عمر:بيفكون سحره لان ماراح اسكت عن اللي سووه
أنهار نزلت انظارها ليدينها:امه تسحره وابوه يدري وكل ماشافوا منه شي كانوا يستغربونه ، ما قالوا بناته طيب !
نورا ناظرتها:انا كنت اكرهه أنهار كنت ما اتمنى احظر عزاه بسببهم بسبب اللي سووه خربوا حياتنا كلها ، هذا ولدهم اللي كانوا يبونه يكون تحت عيونهم ؟ هذا هو شوفي حاله
مسحت دموعها أنهار وهي تناظره بحزن وكملت نورا بحرقه:ماراح اسكت تعبت من السكوت
'
دقت الباب ودخلت ولف عبدالله يناظرها:مبروك التخرج
سكتت تناظر فهد اللي واقف وشكله كان في منتصف الهوشه وتقدمت لهم واخذ نفس فهد:يعني انت يوم كنت تبيني اقعد هنا كنت تبي الشيبه يحكمني ؟ كنت تبي تشوفه يظلمني ويظلم ريوف ويظلم بهاج وأنهار وعادي عندك ؟ انا يوم صكيت جوالي وحرقته عشاني خايف خايف ينحكم علي نفس ما انحكم على غيري
عبدالله:انت تدري وش سويت ؟ تدري ٦ شهور ماندري وين ارضك وين سماك ؟ هذي بسيطه ؟
فهد:لا انا يوم هجيت ارسلت لك هنا واحد يعلمك اني طيب واني اخترت هالقرار انا مانسيتكم ولا هجرتكم انا انتظرت هذا اليوم يجي وتهدأ النفوس وارجع واحب راسك وراس امي
عبدالله:انت رجعت عشان هالبنات يبون ابوهم يافهد
فهد ناظره بصدمه:عشانكم انتم ! وان كان جيت هنا وجو معي عشان ابوهم فماهو غلط ، هذي زوجتي وجات لابوها وانا جيت عشانكم
عبدالله ناظر ريوف اللي واقفه وتناظرهم ولف من دق جواله واشر بيده وهو يتنفس من غصبه:هاتيه
وقفت عذاري تاخذه ومدته له:عمي زيد
رد:هلا
لف فهد لريوف اللي تناظره ورجع ناظر ابوه اللي وقف:وشهو ؟
عقد حاجبينه فهد وتقدم له:وش العلم ؟
وقفت عزه من ناظرت حاله ومسك الكنبه عبدالله وهمس:لا حول ولا قوة الا بالله
تقدمت عزه برعب:منهو ؟ منهو اللي مات؟
ناظرهم بخوف فهد وناظرهم عبدالله:ابوي ابوي مات
جمد وجه ريوف ولفت تناظر فهد اللي واقف يناظر ابوه وجلس عبدالله ومسك راسه وبكت عزه
-
( لا تنسون النجمه وتفاعلكم يفرحني )