انثنى غيم نجد لخد الحجاز النرجسيه

١٧

دخلوا الملحق بسرعه ودخلت الغرفه نورا وناظرت أنهار منسدحه وعقدت حاجبينها:ما أخذتي شاور ؟
دخلت خلفها ريوف وناظرتها:اشبك ؟
أنهار:ولا حاجه
نورا:هرموناتك متلخبطه من امس مو على بعضك !
تنهدت أنهار وناظرت ريوف:طيب فين شاحن اللابتوب ؟
عقدت حاجبينها أنهار وريوف رفعت جوالها:بهاج يبغاه
جلست بإعتدال:انا باخذه
وقفت بسرعه وسحبت الشاحن بقوه وخرجت من عندهم
مرت من عند حليمه اللي تمسح آثار الطين وخرجت ورفعت راسها حليمه وهي تشوفها رايحه لبيت بهاج
مشت بسرعه بدون ما تحس بالمطر اللي بللها ودخلت من الباب اللي كان فاتحه ووقفت عند الباب
رفع انظاره ومن شافها تبدلت ملامحه وصد عنها
مشت ورمت الشاحن جنبه ورفع انظاره عليها
أنهار؛ممكن افهم شصاير ؟
بهاج ناظر الشاحن وشبكه:شصاير ؟
أنهار:انا اللي اسأل
بهاج بلع ريقه وهو صاد:عن ؟
أنهار اخذت نفس بتعب من بروده واجوبته وعضت شفتها وهي تهز راسها وتراقب صدوده
:ما يهمني ، اللي يهمني خواتي
رفع راسه لها وناظرته بحده:اذا بتتقرب من ريوف لين تحس بحنيّتك اللي خسرناها ؟ وبتقلب عليها بعدين لا تقرب منها ولا من نورا تفهم !
مارد عليها وهو يناظر عصبيتها وكملت أنهار
:لا تقلب بوجهينك لخواتي نفس ما سويت لي ، اعرف من نورا انها قالت لك نفس الكلام اللي قلته لك انا وطلبتك تفضفض لها وذكرتك انها موجوده ان بغيتها لكن اللي اشوفه ما زعلت عليها ، زعلت مني انا
بهاج مارد وناظرته ساكت وصدت وهي متكتفه ولفت عليه تكتم بكيتها:لا تتكلم عن اي شي تحسه وموت قهر ماراح اسأل عليك ، الشرهه علي انا اكيد دايم مندفعه لين اطيح على وجهي واصحصح
مشت بتطلع ووقفت ولفت له وابتسمت وعيونها تلمع من دموعها اللي حابستها:على فكره امك مبسوطه تتمشى بالبيت براحه بدون جلال صلاه
لانت ملامحه اكثر لين عقد حاجبينه وكملت أنهار
:اذا حزنك على امك فإرتاح الحين
تنهد بتعب من مشت رايحه وهمس:أنهار !
وقفت عند الباب وناظرته ولف لها كان شاد برجلينه على الارض وده جاذبية الارض تنتصر ولا يقدر يوقف على رجلينه ويمشي لها
خايف ، خايف من اي تصرف ممكن يطلع منه لها يندّمه
ظل يناظرها واقفه تنتظر منه ردة فعل لكنه ماقدر كل اللي يسمعه كلامهم ، هي زعلت على اخوها وبس
وبهاج ما بيقدر يعاملها بأخوه بدون ماتندمر مشاعره وينحرق صدره من مشاعره واندفاعه
صد بعيونه بسرعه يصرفها عنها وشدت على اسنانها من تجاهلها وخرجت بسرعه تبكي تخلط دموعها مع مطر ربي
دخلت بسرعه ومرت من الصاله اللي حليمه كانت فيها ودخلت الغرفه وهي تبكي ورمت نفسها على فراشها
نورا وقفت ومشت لها:بسم الله بنت اشبك
ماردت وهي تبكي ورفعت وجهها ريوف:أنهار اشبك ؟
أنهار:اكرههم كلهم اكرههم ما ابغى اجلس هنا خلاص
نورا:مين كلمك ؟ قولي لي والله لاروح اتهاوش الحين قولي
أنهار ما تكلمت وهي تبكي وحطت راسها بحضن ريوف:زعلانه من كل احد
نورا:احد كلمك ؟
هزت راسها بالنفي وريوف ناظرتها بحضنها:اجل اشبك ؟
أنهار:مشتاقه لبابا
رفعت انظارها نورا لريوف بضيق وتنهدت وصدت عنهم
شدت ريوف على أنهار بضيق أكثر وسكتوا بعد ما قالت اخر جمله عكست مشاعرها عليهم وحسوا بنفس مشاعر أنهار هم يفقدون وجوده من مده طويله ماجاهم ما كلمهم ما اعتذر مارجع لحالته ابد
،
عمر لف لرَده اللي وقف جنبه:حالك زاين
عمر هز راسه:حمدلله
رَده ابتسم:من يعاشر حليمه !
عمر حك دقنه وهو يناظر النياق قدامه:صدقت
رَده:واحوال بناتك ؟
عمر:ماعليهم
رَده:وانا اقول نفس كلامك مبسوطين كل يوم سهارى مع عيال عمهم
التفت عمر وناظر رَده:سهارى !
رَده اشر بيده:بعد حوض النياق يقعدون ويضحكون ويطربهم ولد اخوك بهاج ، تعايشوا
عمر عقد حاجبينه:ماعندي علم
رَده:دريت والا ما بتخلي بناتك يقعدون مع عيال عمهم يضحكون ويسهرون
عمر مارد وهو عاقد حاجبينه بعصبيه
رَده؛لكنك ما بتسمع مني لو نصحتك
عمر:افا !
رَده:تقول الحين لكن بعد كلامي بتغير رايك
عمر:وش العلم ؟
-
واقف عند الباب ويناظر المطر اللي مغرق الارض والشجر من حوالين المزرعه مبتل وريحة الطين تعجّ بالمكان اللي هو فيه
ضرب بيده الباب:الله ياخذك يابهاج
تنهد بعصبيه وهو يتذكر نظراتها وزعلها تضغط عليه بزعلها ودلالها ودموعها اللي تخبيها عنه وينضغط انه هو مندفع اكثر منها هو اللي تتلخبط كل حياته وكونه يتبعثر كل مازادات بقربها له
زعلها وضحكها وقربها منه يغرقه اكثر ولا يقدر يعصي مشاعره ويتجاهلها هو قاعد باللهيب والحريق لوحده ، لكنها تزعل ولا يهون عليه هو كذا كذا ما بيتخلص من مشاعره هو يحترق ولا يقدر يخبي ريحة رماده ودامها فيه فيه مابيسمح لها على الاقل تزعل
تشوفه اخو تشوفه ابو تشوفه اللي تشوفه المهم انها ما تزعل
خرج من البيت يبلّه المطر ووقف عند الملحق ودق الباب وفتحت ريوف وناظرته:خلصت ؟
بهاج:نادي أنهار
ريوف:أنهار تبكي ما بتطلع
بهاج:تبكي ؟
ريوف تنهدت وتقدمت له تتكلم بهدوء:تقول انها اشتاقت لبابا ، هي من بداية اليوم زعلانه اصلاً
بهاج تنهد:الله يحرمني ، ناديها
ريوف:بهاج والله ما بتطلع اعرفها
بهاج:ادخلي ياريوف والا انا بدخل واخلص امي من همها
ريوف:بطلت تشوفه هم ابشرك
بهاج عض شفته:ادخلي
ريوف مشت تاركه الباب وفتح الباب على وسعه يناظر الغرفه من بعيد
خرجت حليمه وناظرته واقف:بهاج !
بهاج ناظرها والتفت للغرفه وصرخ بصوت عالي بعصبيه:أنهار !
طلت من الغرفه نورا بإستغراب واشر بحده:ناديها تخرج يمين بالله لادخل !
حليمه ناظرته بصدمه:بهاج علامك ؟
بهاج:اخرجي لي
ريوف:وي اشبك البنت ما تبغى بهاج خلاص اتركها !
ضرب الباب بيده بقوه ووقفت حليمه قدامه:وش عندك ؟
بهاج ناظر امه:طلعيها لي
حليمه:شتبي فيها ؟ شفيك جاي بشرك ؟
بهاج ميل راسه يناظر الغرفه بعصبيه ولمحها توقف عند الباب تناظره وبعد عن امه وهو يراقبها
مشت لين عندهم وناظرته:نعم ؟
انحنى ورمى شوزها لعند رجلها ورفع راسه
حليمه ناظرته ولفت لأنهار اللي هزت راسها بالنفي
حليمه:وين بتودي البنت ؟
بهاج ناظر وجهها اللي غرق من دموعها اللي خبتها عنه ونزل انظاره للشوز:البسيه
حليمه:بهاج ! اعقل
بهاج ناظر امه ورفع كتوفه:اختي !
حليمه سكتت وبهاج لف لأنهار:امشي أنهار
أنهار لبست شوزها ومشت وتكتفت وغطت شعرها وخرجت
قفل الباب بقوه ولف لها وهمس:امشي
أنهار:ما ابغى
بهاج:تبين ، امشي معاي
أنهار التفتت له:تزعّل وتعصب ومالي حق ارفض ؟
بهاج:لاني ملعون
أنهار سكتت وناظرها بهاج وهز راسه:الله يلعني
عقدت حاجبينها وهمست:استغفر الله
بهاج:هي امشي
مشت وتكتفت ومشى جنبها لين دخلوا ممر النوير وخفّ المطر عنهم من الشجر اللي مغطي الممر
بهاج وقف وناظرها:اعقب ان زعلتك
صدت عنه ونزلت راسها ولا ردت
بهاج:ان كان يرضيك بقولك اني محروم ، محروم من امي ومحروم عن ابوي ومحروم اختار ومحروم اقرر ومحروم يكون لي راي ومحروم اطلب وارفض
رفعت راسها وكمل بهاج:حتى اللي احسه محروم اقوله ومحروم يصير اللي ابي ، يمكن انا حزين ويمكن انا معرف اتبع الايام محبوس بالظلمه مرغم انا ومجبر واللي احسه سكين
وسعت عيونها تناظره وهو عاقد حاجبينه ويتكلم بحرقه ويأشر على صدره
بهاج ناظر نظراتها له وهز راسه بالنفي:لا الليل يسعفني ولا النهار اخضر ، اهدم معاي بلاد والحي والعبّاد والمسجد يكبّر واصحى عليه ومعاي أمس والباقي من همي ، ما يتجدد شي فيني وامشي ولا ادري لوين المشوار مهدوم ، وانا هنا
رجف قلبها من كلامه وتعبيره عن حزنه وعقدة حاجبينه وصوته اللي يهمس بحروفه
بهاج:وادري عورتك
نزلت انظارها بزعل وكمل بهاج:ارمي علي عتابك كلها افديك بالافراح والضحكات بس اسف !
أنهار رفعت راسها:ليش انا ؟
بهاج سكت وكملت أنهار:ما تثاقلت ريوف ولا نورا انا اللي كنت ثقيله عليك ؟
بهاج تقدم لها:اعقب
أنهار:ليش انا طيب صرخت بوجهي وقفلت بابك بوجهي وتتجاهلني ؟
بهاج بلل شفايفه وهو يناظرها وكملت أنهار
:تقول لامك اكلم اختي وتقول لنورا انتوا خواتي بس انا ما احسني زي خواتك
بلع ريقه وكملت أنهار:تعامل نورا وريوف سوا وتعاملني انا لحالي
بهاج:والله لا معجم لغه ولا كتاب يوصف اللي فيني ، شعوري اكبر من رفوف المكتبه لكني اسف ما تكفيك ؟
أنهار هزت راسها وصدت:الا
بهاج ناظرها صاده:ربي سخط عليّ بكى الغيم كله مع عيونك
رفعت راسها وابتسم بهاج لها وأنهار نطقت
:مو يمكن انثنى غيم نجد لخد الحجاز النرجسيه ؟
اتسع مبسمه ورفع حاجبه بدهشه من تذكرت جملته وابتسمت أنهار ورفعت انظارها لشعره:تبللت
بهاج صد بانظاره لنهاية الممر:فدا
لف لها:ترجعين ؟
هزت راسها ومشى قبلها وهو يحط يده بشعره المبلول ويرفعه بيده تحت انظار أنهار اللي نزلت انظارها للارض بعد ما ابتسمت
مشت معاه وهي تراقبه يناظر الطريق لين وقفوا عند الملحق ولف لها:نادي امي لي
هزت راسها ومشت للباب وابتسمت فتحته ودخلت والتفتت تناظره واقف ينتظر ويناظرها
ابتسمت بوسع مبسمها ورد لها الابتسامه والتفتت لحليمه اللي شاهده علم وقوفهم من شباك الصاله ورفعت كتفها:يبغاك
ماردت حليمه ومشت أنهار وهي مبتسمه ودخلت الغرفه
رفعت راسها نورا:شصار ؟
أنهار قفلت الباب وفصخت عبايتها وتنهدت:ياخي بهاج ياخي
ريوف:دلعك اكيد زي مادلع نورا
لفت نورا لها وابتسمت:كلامه زي العسل صح ؟
أنهار هزت راسها:صح انه ناداني كأني ذبحت امه بس عسل
نورا:والله بهاج مافي منه اذا عرف ان في احذ زعلان مننا جانا كلنا يراضينا
ابتسمت أنهار وصدت بنظراتها:صح
،
بهاج حط زيقارته بفمه وهو مبتسم وشغلها ونفثها وهو صاد عن الباب ولف من طلعت له حليمه
تقدم لها وباس راسها ونزل عن العتبه:شلونك ؟
حليمه هزت راسها:زينه
بهاج:العلوم تقول انك مبسوطه
حليمه:يسرّك ؟
بهاج:اكيد يسرني ولو انه مو جايز لي بس المهم انتي
حليمه:كانت جيّتك للملحق عشاني الحين حرّم عمك وتجي ؟ وتنادي بصوتك كله كأنك بـ
بهاج قاطعها:اخوهم
سكتت حليمه ورفع حاجبه بهاج:معي علم وش بتقولين لكن هذا العلم ، ان بكت وحده من البنات اللي داخل هديت بهم الدنيا
حليمه هزت راسها وكمل بهاج:كلهم عندي بنفس المقدار خواتي وهم بوجهي
حليمه:زين
بهاج: تبين شي ؟
حليمه:جدتك تدور عليك تقول انك مختفي ماتمرها
بهاج:امرها ليه ؟
حليمه:تعرف اخبارها
بهاج:يجيبون لي عوار الراس وانا ماعاد فيني اتحمل
حليمه:ما تمر على اعمامك بعد
بهاج هز راسه بالنفي وكملت حليمه:لين متى ؟
بهاج ناظرها ورجع لورا:لين انا يصير ودي
رفع كفه يسلم وحط بيده الثانيه زقارته بفمه ومشى للبيت تحت انظارها
دخل البيت ورمى زيقارته عند الباب ودخل وفتح زرار ثوبه ومشى للمطبخ وقتح الثلاجه وسحب منها عصير وابتسم وفكه وهو يشرب منه
مشى للصاله وجلس براحه على الكنب وابتسم وهو يناظر السقف
يدري انه تمرد وطنش لهيب طريقه لها لكنه مبسوط ومستمتع يحس بلذه وتحدي ماذاقها بحياته ابد والسبب هي
دربها مجهول لكن الدروب لها تزهر بحفيف عطرها وتغرقه وهو مبسوط وهو غارق
رمش وهو يتذكر شكلها بكل لحظه مرت على ابصاره من خروجها بفستانها تبكي قدامه وقدام ابوها بخطوبة نورا ، واول مره مدت له جوالها تطلبه يشحنه ومره وسط الحريق ومره وقوفها قدامهم عشانه
غمض عيونه وعض شفته وهو مبتسم ولف ياخذ جواله ويشرب من عصيره ودخل يكتب لها
:ابي الكعك اللي من يدينك
رفع سبابته على شاربه ينتظر منها رد وردت بعد ثواني تخيّره:جوكلت والا برتقال ؟
ابتسم:مايفرق المهم من يدينك
رفعت حاجبينها ولفت للجهه الثانيه تنسدح:متى ؟
بهاج:قبل تغرب الشمس
ناظرت الساعه تطمن على مغيب الشمس وكتبت:تمام
قفلت جوالها وقامت:بسوي كيك لبهاج مين يساعدني ؟
ريوف:كيك ليش ؟
أنهار:مشتهيها !
نورا:عادي انا اساعدك بس جهزي المقادير
هزت راسها أنهار ومشت وهي ترفع شعرها وتربطه وتدخل المطبخ
،
بهاج فتح الباب وناظر سلطان:وينك ياورع ادق عليك ماترد ؟
بهاج عقد حاجبينه:شتبي ؟
سلطان:فهد بينجلد
بهاج:وش مسوي ؟
سلطان:ضيّع مفتاح شبك الغنم وطب مع الجدر يبي يجيب عامل يكسر القفل
بهاج:الله يسلط عليه الحمار
سحب شماغه وخرج من البيت مع سلطان:من وين بيدخل العامل ؟ مع خشمي ؟
سلطان مشى وراه بسرعه:وانا ليه مناديك نبي نصرف عبدلي عن البوابه
بهاج:عبدلي ؟ عبدلي وقبيلته تقصد
سلطان:قلت لفهد يعترف ويفكنا
بهاج:والله ليكسر ظهره عمك عبدالله ذا خامس مره يضيعه الغنم بتموت جوع بالشبك
سلطان:الغنم ماكله من صبح ما يمديها تموت ان دخلنا فهد
بهاج:غربت الشمس يمدي
وقف قريب من البوابه سلطان والتفت بهاج واخذ جواله من دق وناظرها تتصل عليه
سلطان:فهد ؟
بهاج هز راسه بالنفي ورد:هلا
أنهار:جيتك البيت ما حصلتك فينك ؟
بهاج:مشغول شوي واجيكم
أنهار:فين مشغول ريوف ونورا راحوا عند سلطان وفهد وما حصلوهم
بهاج:العيال عندي
أنهار:اشبكم في شي ؟
بهاج:لا لا شوي واكلمك اصبري
قفل منها وهو يدق على فهد:حمار يمين بالله
فهد:هاه
بهاج:أوى ياشيخ وينك ؟
فهد:بعيد رايح بدون سياره اكيد ما بجي بسرعه
بهاج:انت حمار رايح تجيب عامل يكسر قفل ؟ كان كسرته انت
فهد:نفس ما كسرته المره الاولى وانكسر باب الشبك وخلاني ارقد فيه يومين عمك
بهاج:ابلشتنا يمين بالله ان جيت لاعلق القفل باذنك
فهد: انت دخلني بالعامل وانا اعلق المفتاح باذني
بهاج:ياخي وين اصرفهم ؟ تستهبل !
فهد:تصرف يارجال اخلص بهاج لا اجي واقعد متورط من وين ازبن من برا
بهاج عقد حواجبه بحده وناظر سلطان اللي واقف وهمس:الله ياخذك ياشيخ ، سلطان امش
قفل من فهد وناظر سلطان:امش نصرفهم
سلطان:بيدرون يابهاج علامك انت ؟
تافف بهاج وصد يناظر البوابه من بعيد ولف لسلطان:بنادي البنات
سلطان:اي بنات ؟
بهاج:بنات عمر
مشى بهاج وسلطان مشى وراه:وش تبيهم يسوون
بهاج:اصبر يارجال
طلع جواله وهو ماشي للملحق:أنهار اطلعي لي
أنهار:خلصت شغل ؟
بهاج:لا اطلعي بكلمك
أنهار:اوكيه
وقفت واخذه الكيكه بيدينها الثنتين وابتسمت وطلعت للصاله:افتحي لي الباب ريوف
وقفت ريوف وناظرتها نورا:بناكلها وين ؟
أنهار رفعت كتفها وفتحت الباب وناظرت سلطان وبهاج عند الباب وابتسمت
ريوف:اكيد مو جايين تاكلونها هنا !
بهاج:اطلعوا بنروح نغطي عن فهد
ريوف:ليش ؟
بهاج:طلع من البيت ونبيه يرجع يدخل بدون محد يدري
أنهار:ليش يعني ممنوع من الطلعه ؟
سلطان:ياخي يابهاج وقته ؟
بهاج:اطلعوا انتم ونتكلم واحنا ماشين
نورا مشت معاهم:بجي معاكم انتظروني
خرجوا وأنهار شايله الكيكه ومشوا سوا وعقدت حاجبينها ولفت لبهاج:ماشفت الكيكه
بهاج مشى وهو معصب:بشوفها
،
دخل عمر على جمعه وناظر حليمه جالسه عندها:انا راجع الملحق
حليمه ناظرت عصبيته:اجيك ؟
عمر:خليك عند امي
خرج من البيت ولفت جمعه لحليمه:الحقي رجالك ماهو على بعضه
خرجت حليمه ومشت ورا عمر:عمر !
التفت لها ووقف ومشت له:علامك ؟
عمر:كالعاده ابوي بدأ يخرف
حليمه:شهالكلام ؟
عمر:لو تسمعين وش قال ما بتلوميني ، معد اتحمل
لف ودخل الملحق بغضب ومشت حليمه وراه:علمني وش قال ؟ تكلم ببناتك ؟
عمر التفت وناظرها:بالشينه وهالمره كثرها علي
حليمه تنهدت ومسكت ذراعه:ماعليه هو كذا دايم
عمر ناظرها وهز راسه بالنفي:هالمره ماقدرت
حليمه:تقولي طيب عشان افهم ؟
عمر صد وغمض عيونه بغضب وهو ياخذ نفس طويل
،
نورا ناظرتهم بصدمه:تو ماتش !
أنهار:وضيّع مفتاح اش بيسوي ابوه يعني مثلاً ؟
سلطان:ياخي مابنقعد نسولف عن الوضع فهد جاي
ريوف:طيب اش بنسوي الحين ؟
بهاج:بروح الهي عبدلي وانتم افتحوا له باب البوابه واركضوا للشبك قبل احد يلاحظ
أنهار:وليش انت ؟ تتوقع بتلهيهم يعني؟
بهاج:اجل من يلهيهم ؟
أنهار ابتسمت:انا بطيّر عقولهم بعد
تغيرت ملامحه وشد على أسنانه:تكلمي زين
نورا:بهاج منجد بروح مع أنهار انا كمان نعطيهم الكيك حقك
بهاج ناظر الكيك بيد أنهار وناظر أنهار وشد على كفه بعصبيه
سلطان:ذيبات اعجلوا علينا
أنهار لفت لنورا وابتسمت نورا ومشوا سوا للبوابه
ولف بهاج لسلطان:ترسلهم انت بعد ؟
سلطان:وهي صادقه ما بيهبل عقل عبدلي غير ريحة الحريم
التفت بهاج من دخلوا غرفة عبدلي بالكيك وابتسمت أنهار وهي تشوف العماله اللي موجودين بالغرفه ومن ناظروهم فزّوا
ابتسمت بوسع مبسمها:هاي
عبدلي هز راسه بتوتر وابتسمت نورا:كيفكم ؟
رفعت انظارها أنهار وهي مبتسمه وتناظر بهاج مع قزاز الغرفه فتح الباب وخرج سلطان يوقف برا
حطت الكيك قدامهم:هذا عشانكم
عبدلي:شكراً شكراً كثير
نورا:ان شاء الله يكون لذيذ
أنهار رفعت راسها لنورا اللي تناظر فهد يدخل ومعاه عامل وعدّته بيده
ولفت أنهار:بالعافيه
تشكروهم بسعاده وركضوا نورا وأنهار يلحقون ركضهم للشبك ومشوا لهم ووقفوا يناظرون العامل اللي يحاول يفتح القفل
لفت نورا لفهد:خليتنا نتبرع بالكيكه اللي جالسين نسويها لنا ساعتين
فهد:اسكتي لحد يجينا محنا ناقصين
بهاج:تراها كانت لي
أنهار لفت له وضيقت عيونها تضحك:من نصيب العمال
ناظرها بحده واخذ نفس وصد
سلطان:صديق اخلص علينا يرحم ابوك
ريوف:اسكتوا خلوه يركز كفايه ظلام
نورا:وي طيب احد يشغل فلاش للرجال
بهاج:انتم وش موقفكم اصلاً ادخلوا داخل
أنهار:ترا بنطلع العامل احنا !
بهاج:تعقبين ، ما ترجعون لهم
نورا:مين يطلعه يعني انت ؟
سلطان:انتم لو تسكتون بس وتفكونا
ريوف اخذت نفس وهي تراقب العامل يفك القفل وابتسمت:اوف اخيراً
وقف العامل وابتسم لهم بفخر بشغله:تمام؟
بهاج:تمام تمام كم يبغى ؟
العامل:١٥٠
سلطان:ابو زيد ١٥٠ ليه فاك خزنه انت ؟ كله شبك غنم
ريوف:انتوا على دخولكم المفروض تعطونه ٢٠٠ يعالج فيها اعصابه اللي تلفت من الركض
بهاج:صديق وشو ١٥٠ ؟ ٢٠ ريال بس
العامل عصب:لا مافي انا يجي الساعه ٧ مغرب مافي شغل وجيب معاي قفل جديد
فهد:والله جايبه مشي من اخر الدنيا عطوه يعالج رجلينه والله
بهاج:بنعالج راسك انت اللي جايب لنا المصايب
العامل:جيب ١٥٠
سلطان جا بيتكلم وفزوا بسرعه بخوف وتلخبطت خطاويهم وهم يسمعون زيد ينادي بإسم فهد ودخلوا شبك الغنم وسحبوا العده والعامل معهم
جلسوا بين الغنم
ووقف زيد عند الشبك:وين طس ذا عن ابوه ؟
لفت أنهار اللي بتبكي تناظر البنات اللي مغمضين عيونهم من الرعب اللي يحسونه وهم بين الغنم
ومشى زيد يبتعد ولفوا يناظرون بعض وطل سلطان يناظر ونزل انظاره للعامل اللي بعدته جالس وخايف من خوفهم وتوترهم والبنات اللي ناشف دمهم من الغنم وضحك بصوت عالي
وقف بهاج:لعنه اسكت لا تفضحنا
ماوقف ضحك سلطان وضحك فهد اللي يناظره:مو صاحي
سلطان اشر على العامل ولفوا يناظرونه وضحكوا
قاموا البنات يخرجون بسرعه وينفضون ملابسهم
نورا:بموت كان في غنمه تتنفس برقبتي ببكي
ريوف عقدت حاجبينها بإشمئزاز:ببكي انا كنت بين ثلاثه
بهاج خرج وناظر العامل ودخل يده بجيبه وعطاه الفلوس:خلاص خذ
مشوا مع العامل وحكت خشمها أنهار:احس ريحتي غنم
نورا:بنروح اش نقولهم الحين؟
بهاج:جيبوا كيكتي
سلطان:قدهم اكلوها
أنهار تأفتت ومشت للغرفه ودخلت وابتسمت تناظرهم ماكلين كل الكيكه وجالسين حوالينها:هاي
خرج العامل بسرعه يركض وقفلوا الباب وراه ومدت يدها أنهار للصحن:باخذ هذا اوكيه ؟
هز راسه عبدلي:شكراً شكراً
هزت راسها تسلك لهم وخرجت وكشرت
عقد حاجبينه وهو يشوفها جايه بالصحن فاضي:سُم ياعبدلي
نورا:حرام عليك ، نسوي غيره وي !
اخذ نفس بهاج:قروشتنا ياخي
فهد:خلاص عاد شسوي
ريوف:بدخل اخذ شاور
نورا:ياويلك انا اول
ركضت ريوف وهي تضحك وسحبتها نورا بقوه من عبايتها تحاول تسبقها
لفت أنهار عليهم بالصحن:لو في مجال صدقوني باخذ الشاور بالغساله
ضحك سلطان وناظرها فهد:لازم ، تفوح منك ريحة غنم
كشرت أنهار:فهد !
بهاج التفت لها وناظرها مكشره وابتسم مشت بالصحن تلحق البنات ولف فهد لهم:ليه اشغلتوهم معنا ؟
سلطان ابتسم:عن عشر رجال خل عنك ما كان قدرت تدخل
بهاج ابتسم من كلام سلطان وضحك:ودخلوا بين الغنم وهم يهابون دجاجه
فهد:انت شفت العامل بالله عليك ؟
ضحكوا بشكل هستيري وانحنى بهاج يشد على ذراع سلطان من الضحك كل ما يتذكر مغامرتهم وفهد اللي يوصف لهم الموقف من جديد
،
التفت من خرجت بروبها من الحمام والمنشفه فوق راسها ناظرته وناظرت حليمه ولفت للغرفه:نورا خلصت ادخلي
خرجت نورا ولفت لعمر وحليمه وناظرت ريوف:المويه دافيه ؟
ريوف:اكيد ما يهمك ، المهم مويه وصابون
دخلت نورا ودخلت ريوف تناظر أنهار تمسح رجلينها بكريم:وين اخذتي شاور انتي ؟
أنهار:بالحمام الثاني
ريوف:عندهم ؟
أنهار هزت راسها:اكيد مو لهم الحمام بس
ريوف:طيب اشبهم جالسين كذا يراقبونا بالصاله ؟
أنهار:خلصت فقرة التعارف حقتهم
ريوف اخذت نفس وجلست جنبها وهي تسحب الكريم:محد فتح معاي موضوع اخر سنه بالجامعه
أنهار:احنا نعرف هو اللي ناسي الموضوع
ريوف:وعدني
أنهار ناظرتها:تتوقعين تهمه جامعتك بعد اللي سواه فيني وفي نورا !
ريوف:طيب خايفه أنهار خايفه منجد ما اقدر اكمل جامعتي
أنهار:قدمي اول ما يفتح التقديم ومحد بيقدر يتكلم
ريوف:طيب انا عارفه وين اقدم اصلاً ؟
أنهار:بالرياض هنا
ريوف:وكيف اروح الجامعه من هنا ؟
أنهار:نحلها بعد ما تنقبلين انتي
ريوف تنهدت بتعب وانسدحت