انثنى غيم نجد لخد الحجاز النرجسيه

١٨

يلمس باصابعه شاربه ويناظر اللابتوب وقدامه أنهار وريوف اللي جالسين ينقون ملابس بالايباد ويهمسون بهدوء
تقدمت أنهار تاخذ كوبها وتشرب منه وتناظر الايباد
رفعت راسها من سمعت اصوات عاليه
عقدت حاجبينها وجلست بإعتدال ريوف ولف بهاج وفزّ بسرعه
خرج من البيت وطلوا ريوف وأنهار من عند الباب
عقد حاجبينه بهاج وهو يناظر التوتر اللي بينه وبين عمه عبدالله وزيد اللي يمشي بسرعه لهم من اعتلى صوت عمر:انت تسمع وش يقول ؟
عبدالله:ما يسوى تعصب اقعد ونتفاهم
عمر بعصبيه:عبدالله لا تجنني ، سكت وعديتها قلت يهذري لكن كل ماشافني عاد نفس مواله
تقدم لهم زيد:عمر ! علامك ؟ ما قال شي غلط !
عمر:لا تتدخل تفهم ؟
تقدم بهاج لمسافه بعيده عنهم بشوي بإستغراب
:عسى ماشر !
التفتوا له ورفع انظاره عمر لأنهار وريوف اللي يطلون من بيت بهاج ورجع ناظر بهاج وبلع ريقه
التفت زيد لعمر:طلع صادق
التفت عمر لزيد وشد على فكه بقوه وبغضب ودخل الملحق
عبدالله عقد حاجبينه: وش يسوون بنات عمك عندك؟
بهاج رفع حاجبينه وسكت
زيد:بنت انتي وهي ارجعوا بيتكم
التفت بهاج لهم وهز راسه ومشوا لين عندهم ودخلوا الملحق
زيد:فكنا من المشاكل
بهاج اخذ نفس:ما بتكلم شكل حيلكم بينكم
التفت تاركهم ودخل الملحق اخذ جواله وجلس قدام لابتوبه وهو يدق عليها
كانت واقفه عند غرفتهم تحاول تسمع ورفعت كتوفها نورا وهمست:دخل بيحرق البيت
ريوف:اش صار ؟
التفتت من دق جوال أنهار ومشت أنهار للغرفه وردت:ايوا بهاج
بهاج:علامه ابوك ؟
أنهار:ما اعرف دخل عند امك الحين وما نسمع حاجه
بهاج:يالله الله يشغلهم بأنفسهم
أنهار:تتوقع تهاوشوا وبنرجع ؟
بهاج سكت ثواني:ترجعون وين ؟
أنهار:جده !
بهاج رجع سهره لورا وهمس:لا
أنهار:ما اعرف بهاج بس احس فقدوا اعصابهم
بهاج بلع ريقه ونطقت أنهار:مو مشكله كمل كلاسك باي
قفلت منه وناظر محل جلوسهم واكوابهم والتفت للباب وعقد حاجبينه
فقد باله فكرة انه ممكن عمر يتهاوش مع اعمامه ويترك المكان ببناته وامه ويهج
همس بخوف:مستحيل
حك جبينه بتفكير وطلع دخانه وشغل زيقارته وهو يناظر اللابتوب بسرحان
خلص كلاساته بوقت طويل واخذ اللابتوب وهو يطلع من بيته ويمشي للمحلق ووقف عند الباب وفتحته أنهار:خلصت ؟
هز راسه ومد اللابتوب وناظرته:كان خليته
بهاج رفع راسه بلا واخذته من يدينه ودخل يده بجيبه يطلع دخانه:ماعرفتي شصاير ؟
هزت راسها بالنفي وحط زيقارته بفمه بتوتر وناظرته صاد بأنظاره:ما كنت مهتم !
هز راسه بهاج:ولا مهتم للحين
أنهار:مو باين
التفت لها وناظرته:بتروح لسلطان وفهد ؟
بهاج:لا بروح للنياق قبل تغيب الشمس
تركها ومشى ودخلت تحط اللابتوب وفتحت الدولاب
:بطلع امشي انا
نورا:لحالك ؟
هزت راسها وهي تطلع لها ملابس:اتوقع
ريوف:لا تطولي مسويه بيتزا بالفرن
اخذت ملابسها ومشت للحمام:اوكيه
غيرت ملابسها وناظرت شكلها بالمرايه وعدلت شعرها حطت ماسكرا ونفضت شعرها على كتوفها وخرجت
سحبت عبايتها وطرحتها ولبست شوزها وخرجت وجوالها بيدها
مشت وهي تناظر يمينها تراقب مكان أعمامها لكن مالقت أحد
مشت بخطواتها لين عند النياق برغبه كبيره انها تكون متواجده معاه لانها حست انه يهوجس ومتوتر ماعطاها ردة فعل زي عادته لان باله مشغول
لكن من وصلت ولمحته داخل حوض النياق وقفت محلها تلمحه
كان عاقد حاجبينه بشده وملامحه تحتد من افكاره وكفه تلمس ظهر الناقه وكف تنفث من ثغره دخانه اللي بيده
وقفت محلها تناظره من بعيد بثوبه وشماغه اللي على كتفه تحركاته بين النياق وباله ساهي
رمى زيقارته بتأفف وفتح زرار ثوبه بقوه يتنفس بغضب وابتعد عن الناقه والتفت ووقف من لمحها عند الحوض
اخذ نفس بسرعه من تسارعت نبضات قلبه هي تربكه تثير داخله احاسيس قويه ما يقدر يوصفها كان عقله يعج بالخوف من فكرة الزوال
يفقد امه وهي والوضع اللي مرتاح فيه حالياً ومن شافها تراقبه من بعيد بهدوء تلخبطت مشاعره أكثر مايفهم مشاعره غير انه يحترق
بلع ريقه من طالت نظراته لها من بعيد وقرر يتقدم لين عندها
نزل انظاره لخطواته لين وصل لها ووقفوا قدام بعض وبينهم حوض النياق
تكلم بهدوء:ما توقعتك تجين
أنهار:من أول واقفه بس ماحسيت علي
بهاج مارد وكملت أنهار:كنت ادري في بالك حاجه تفكر فيها والحين يوم شفتك مو منتبه عليّ تأكدت
تقدمت اكثر وحطت يدينها على حوض النياق:عرفت شي ؟
بهاج هز راسه بالنفي:على ابوك وعمامي ؟ لا
أنهار:اجل اشبك ؟
بهاج:قلتي لي يوم دقيت عليك تتوقع نرجع
أنهار عقدت حاجبينها وكمل بهاج:ظنيت مالكم مفرّ عن هنا بس يوم قلتي لي فكرت فيها
أنهار:تحس ممكن تصير ؟
بهاج:تصير لو ضاقت بينهم بس ماودي
أنهار:عشان ؟
بهاج رفع حاجبينه لثواني وناظرها:عشان امي
أنهار سكتت وبهاج كمل:مالي حق لو قلت ماتروح
أنهار:بهاج امك مو قريبه منك لهالدرجه ولا احسها حنونه عليك ليش باين عليك عكس اللي تعطيك اياه ؟
بهاج:انتصاري الوحيد بحياتي معد باقي لي عايله الا هي
أنهار سكتت وكمل كلامه بهاج:والواحد بدون عايله ولاشي
أنهار:بس تعرف !
سكت يناظرها وميلت كتفها لثواني:لو رجعنا ما بخليك
لانت ملامحه وابتسمت أنهار بهدوء:ما بننسى انك اخونا
تنهد بهاج وهو يشد على الحوض اللي يشارك كفوفهم وهو يراقب نظراتها له وابتسامتها يتنقل بأنظاره على عيونها وثغرها المبتسم وهو يحترق من داخله
ضحكت من شافت غضبه المجهول عندها:كنت بتشقق زرار ثوبك عشان خايف تروح امك ؟
بهاج رمش لثواني وتكلم بهدوء:من كثر فيض الكلام اللي على بالي والله ياثوبي يادوب أصك أزاريره
تلاشت ابتسامتها وتقدمت أكثر وهي ترفع كفها لكفه:بسم الله عليك
تكهرب جسمه من لمسته ونزل انظاره لكفها
أنهار:قولي اللي تحسه لا تتركه يعورك بصدرك
بهاج سحب كفه من كفها وتراجع لورا:مافي شي ارجعي قبل تظلم
ناظرت كفوفه اللي شدها ورجعت ناظرت ملامحه وصدوده وارتبكت
التفتت بدون ما تقول شي ومشت راجعه للملحق دخلت وفصخت شوزها ودخلت المطبخ تناظر نورا وريوف ياكلون
ريوف:ارسلت لك من اول ما تردين !
أنهار:ماشفت
جلست عندهم ولفت لها نورا:ما بتاكلين ؟
هزت راسها بالنفي:ما اشتهي باكل بعدين
مشت من عندهم للغرفه تاركتهم وقفلت الباب وفصخت عبايتها وجلست حطت اظافرها بين اسنانها وهي تفكر في ردود افعاله معاها ومن كل لحظه كانت فيها معاه وكيف يختلف حاله معاها
هي متأكده انها مميزه عند بهاج وفارقه عن بقية خواتها ولكن تداهمها مشاعر من داخلها وشكوك انها تفرق عن خواتها هي كثيره عند بهاج
بدت تسترجع كل شي مع بهاج وتسترجع بهاج مع خواتها تشكلّت براسها اسئله كثيره مافكرت فيها من قبل
رفعت راسها من دخلت ريوف تشرب مويه:بنسهر برا
أنهار:مين ؟
ريوف:سلطان وفهد وبهاج
أنهار:بهاج معاهم ؟
هزت راسها ريوف وهي تشرب مويه:باخذ بروجكتر نورا ونشغله نتابع فيلم
أنهار رفعت حاجبينها:اووه
ريوف ابتسمت:فكرتي حياتي
أنهار جلست:كفو والله
ريوف:قومي طيب جيبي مع نورا البوب كورن
وقفت أنهار ووقفت عند المرايه واخذت عطرها تبخ منه ورفعت شعرها وهي تسمع نورا تنادي:جايه
مشت واخذت معاها الصحون وخرجوا
نورا:مالهم حس صح ؟
ريوف:ما خرجوا من الغرفه اصلاً
أنهار:وين بنروح ؟
ريوف:المجلس
وقفت عند باب بيت الشعر وناظرت حذايينهم عند الباب ثلاثه ودخلت مع نورا وريوف وناظرته جالس ومتكي
رفع انظاره لهم وناظرها تناظره ونزل راسه لفنجانه
فهد:وش ذا ؟
نورا حطته عندهم:بوب كورن
التفت سلطان:من هو ؟
ريوف:اوف مو منجدك فشار فشار طوروا اللغه شوي عندكم
فهد:ليه نتعلم بنقالي يكفي عربي
ضحك بهاج ومد يده للفشار وناظرته ريوف تطنز:هههه
شغلته بالجدر وسلطان ابتسم:بنات عمر ذيبات جابوا سينما لين عندنا
وقفت وطفت النور وتَكوا بمستوى جلسة بعض وانظارهم للفيلم اللي اشتغل
التفتت نورا وهمست:نظيف الفيلم؟
ريوف:ما اعرف بتابعه معاكم
أنهار لفت لها:شطوره ورطينا
نورا ضحكت:ياويلك ياريوف مني
سلطان:اشش
نزل وجهه ثواني يحاول ياخذ نفس وهو عاقد حاجبينه هو يشم ريحة عطرها لكن من بعدها ما يميّز اذا صدق عطرها او لا
التفت ورفع انظاره عليها ورجع يناظر الفيلم
وبوسط الفيلم وهم متكيين وياكلون ويشربون شاهي تقربوا الأبطال من بعض وبتوتر نطقت نورا
:ريوف بليز
سلطان فز:ابو زيد
فهد ضحك:بالله خلوه
صرخت أنهار وضحكت نورا وهي تغطي راسها بطرحتها وركضت ريوف وهي تدف البروجكتر ويطيح
ضحكوا وضرب كفوفه ببعض فهد:قهر
بهاج ضحك وسحب الفشار من عندهم:حطوها براس ريوف
ريوف:دخت اقسم بالله
نورا:انقلعي قلت لك بتورطينا افتحي اللمبات
أنهار اكلت اخر حبة فشار بالصحن وهي تضحك ولفت لهم:بزيد اجيب من داخل واجي
وقفت ورفع انظارها لها يراقبها تلبس شوزها عند الباب
التفتت تناظره يناظرها وانتبه وصد ورفعت حاجبينها وابتسمت
مشت بالصحن للملحق وهي مبتسمه ودخلت وناظرت حليمه اللي واقفه عند الباب:انتم برا ؟
هزت راسها أنهار ومشت للمطبخ ومشت خلفها حليمه:سهرانين ؟
أنهار وهي تحط بالصحن الفشار:ايوا
حليمه:كنت انتظر شموخ ياحلوها تنقصت لي من الحلا اللي مسويته
ماردت أنهار وابتسمت حليمه وهي تراقب صدودها
:محظوظه ان شموخ بتصير زوجة ولدي
رفعت انظارها أنهار والتفتت لحليمه وعقدت حاجبينها
حليمه غمزت لها وضحكت:انصدمتي ؟ الكل يدري هنا شموخ لبهاج بس كنت انتظر بهاج يأمن مستقبله
أنهار بلعت ريقها ورفعت حاجبينها:ماشاء الله
التفتت للصحن وهي تشد عليه بإرتباك
وابتسمت حليمه:كويس انكم موجودين بنسوي العرس وانتم هنا حتى عمر بيساعدنا
التفتت وهي تاركه الفشار على الدولاب ودخلت الغرفه
مشت حليمه خلفها:صحنك !
أنهار ناظرتها عند الباب:مانسيته
قفلت الباب بوجهها واخذت نفس منقطع ورفعت شعرها وهي تمشي بالغرفه
حست بالحراره تسري بدمها من لمحت بكلام حليمه تلميح واضح
حليمه فهمت اللي تحاول تفهمه أنهار ولكن فتحت لها باب جديد ضيعها وشتتها وتاهت بأفكار جديده
استرجعت ذاكرتها بمين شموخ وأي وحده فيهم لكنها ما عرفت ولا تذكرت
خرجت من الغرفه ولا حصلت حليمه خرجت من الملحق ومشت وهي رايحه لهم بربكه وتوتر داخلها
ورفعت راسها ووقفت محلها من ناظرته ماشي بخطوات هاديه من بعيد لها ومن ناظرها أبتسم ابتسامه هاديه
شدت على كفها وهي تشوفه يقترب منها عقد حاجبينه وهو مبتسم:اكلتيه علينا ؟
عقدت حاجبينها ووقف بهاج قدامها:وين الصحن اللي رحتي عشانه ؟
أنهار:مالقيت
بهاج تلاشت ابتسامته من لاحظ حالها وهمس:بك شي ؟
هزت راسها بالنفي وصدت بأنظارها بتمشي وعقد حواجبه اكثر ومسكها من ذراعها يوقفها ولفت راسها له وناظرته يناظرها بإستغراب:بك شي متأكد
أنهار هزت راسها بالنفي وسحبت ذراعها ومشت تاركته
ظل يناظرها رايحه والتفت يناظر الملحق ثواني ولف يلحقها
دخلت وناظرتهم وجلست وبلعت ريقها من لفوا يسألونها وجاوبت:ما حصلت خلاص كلكم تسألون !
صدت عنهم ودخل بهاج ناظرها جالسه وجلس مكانه
نورا:اشبك ؟
أنهار ناظرتها:ولاشي
نورا:عرفتي شفيهم ؟
أنهار:لا
نورا:قابلتيه ؟ كلمك ؟
أنهار:نورا لا لا خلاص بطلي اسئله
سكتوا ولفت نورا تناظر ريوف وسكتت
رفعت راسها لسلطان بهدوء:وين خواتك ؟
عقد حاجبينه سلطان:اختي قصدك ؟
أنهار:ما اعرفهم بس اقصد البنات
سلطان:خوات فهد وشموخ اختي
أنهار سكتت ثواني:ليش ما يجون ؟
فهد:لا يعقبون ما يقعدون معنا
أنهار:ليش ؟
فهد:وانا ابو عبدالله تبينهم يقعدون مع بهاج وسلطان ؟
رفعت حاجبينها بذهول:بس إحنا جالسين !
لف سلطان لفهد ورفع انظاره بهاج لها من نطقت
:والا تشوف قعدتنا غلط ؟
لفت ريوف:أنهار اشبك ؟
أنهار لفت لهم:ما تشوفين اش يقول ؟ مدري قصده احنا فينا عيب جالسين معاهم عادي وخواته محترمات !
سلطان:محد قال
أنهار:لا تدافع عنه واضح كلامه ولا انت ترضى اختك تجلس مع عيال عمك لان اختك محترمه وبنت ناس ويحبونها الكل ومبسوطين فيها الكل
نورا:أنهار !
أنهار:ماني فاهمه احد هنا كلكم نفس النيه ونفس التلميحات اذا انتم عايشين في بيئه ضيقه خلتكم تشوفونا على غلط فهي مشكلتكم
عقد حاجبينه وهو يناظر اندفاعها وهمس:أنهار !
ناظرته أنهار وهمست:اخر شخص يتكلم
سكت بهاج ووقفت تاركتهم وخرجت
لفت نورا لهم:اشبها ؟
بهاج:احد كلمها اكيد
نورا وقفت:بشوفها ولو طلع ابويه بنتهاوش
ريوف:بس مو موجود بالملحق
نورا لفت:فينه ؟
ريوف:خرج برا من قبل نطلع سيارته مو موجوده
نورا عقدت حاجبينها وخرجوا ونزل راسه بهاج وهز راسه وهمس:أمي
لف سلطان عليه ولف فهد:شقلت انا ؟
بهاج اخذ نفس:امي رمت عليها كلام انا متأكد
سلطان:ما ظنتي امك ما تغلط على احد
بهاج:ما غلطت بس اكيد لمحت بشي مافهمت من كلامها انت ؟
سلطان:والله ما فهمت شي فجأه قبت فينا
بهاج وقف وخرج وهو يلبس حذيانه وطلع جواله وهو يرسل لريوف:اذا هدت ارسلي لي واذا عرفتي شي قولي لي
قفل جواله ومشى للبيت وجلس بالصاله واخذ جواله وهو يدق:امي !
حليمه:هلا
بهاج:وينك؟
حليمه:ببيت عمك عبدالله عند شموخ وجدتك
بهاج هز راسه:وانتي راجعه الملحق مريني بغيتك
حليمه؛طيب
قفل جواله واخذ نفس بغضب ياكل داخله
ماوده امه تحط اللوم على أنهار وكل المشاعر اللي تصير هي من طرفه لحاله بس
تضايق وهو يتذكر كيف كانت قبل تخرج من عندهم ويوم رجعت لهم