انثنى غيم نجد لخد الحجاز النرجسيه

٥٤

دخل البيت ودخل الصاله وحط الأكياس والتفت يشوف نورا تخرج من المطبخ وناظرته بهدوء
:بيت مين ؟
اخد نفس بهاج:بيتي
تقدمت له وعقدت حاجبينها:من متى ؟
بهاج:قريب شريته محد يدري عنه
نورا:ليش ؟
بهاج:كنت اتنبأ للهجه هذي
تنهدت نورا ونطق بهاج:أنهار وينها؟
نورا:نايمه
بهاج جلس على الكنبه:طيب تعالي اجلسي جنبي شوفي وش جبت لك
مشت تجلس جنبه وفتح الأكياس بهاج
:جبت شي يبقى لنا بالثلاجه بالمطبخ لان البيت خالي مافيه شي وان جا سلطان بيجلس عندكم واخرج اشوف شغلي
التفت لنورا يناظرها:ابي اكمل الدور العلوي بخلص كل الغرف واحط لك غرفه ولريوف غرفه
ابتسمت بهدوء وابتسم لها بهاج ونزل انظاره للأكياس
نورا:وأنهار ؟
لف عليها لثواني ورفع كتفه:الغرفه اللي نايمه فيها انهار تحت تكون لها اذا ودها ، فوق ثلاث غرف بتكون الثالثه لي
نورا هزت راسها وعض شفته بهاج:ماكنت بستعجل عليه بس شكلي بشدّ
ماردت نورا وفتح لها العصير ومده لها وفتح أكلها قدامها وهمس:سمي بالله
وقف:بشوف أنهار واجيك
ناظرته يمشي لغرفة أنهار ودخل ناظرها نايمه بالسرير ومشى لها
اخذ نفس طويل وهو يشوفها نايمه شاده على لحافها بكفها لصدرها ولامه نفسها
تقدم لها وجلس على حافة سريرها السرير اللي نامت فيه لأول مره في حضن بهاج
رفع كفه يمسح على شعرها ونطق:أنهار يا ابوي
فتحت عيونها وكأنها ماكانت نايمه كانت غافيه وحست عليه بسهوله
ناظرها وابتسم بهدوء:مو قلت بجيك
ميلت راسها تناظره بتعب وتقدم لها ومسك كفوفها الثنتين:انتي مأنتي شوي عندي لا تظنين ان اللي صار لك بينقضي والسلام ، كل من كان سبب في دمعتك ببكيه دمّ ولو كان من يكون
أنهار:ابغى أنسى اللي عشته صدى صوته بالمكان
شد على كفوفها يجلسها وحاوط خصرها بذراعه يحضنها لصدره
حطت على صدره وهي تلمّه بذراعينها وتسمعه
بهاج:سلامتك دامي هنا لا خاطرك يسكت عن اللي يبيه والله ما تِزعله الحياة الفانيه وأنا هنا
شدت عليه براسها اللي على صدره ومسح على ظهرها:قومي معي
ابتعد عنها وجلست ورفعت شعرها بتعب وقف وهو ماسك كفوفها:تعالي كلي مع نورا ريوف جايتكم
أنهار:ريوف عرفت ؟
هز راسه بهاج ومسكت قلبها بتعب:كلنا بنطيح
بهاج نزل لمستواها وهمس:وأنا ويني ؟
ناظرته أنهار وكمل بهاج:قبل كنتم بدوني بس الحين انا معكم
أنهار هزت راسها له ووقف:يالله قومي
قامت وخرجت من الغرفه وبهاج خلفها ولفت نورا تناظرها وجلست أنهار بتعب تناظر الأكل بقل شهيه
بهاج فتح جواله يناظره:كلي كلي بجيك اشوف
مشى يخرج من الصاله ولفت أنهار تناظر نورا ووجهها اللي عليه خدوش وكدمات
رفعت انظارها نورا لها تناظرها بنفس النظرات
كل اللي تشوفه الحين هو ذكرى للي صار لهم كيف كان يضربهم بالجدار وبالارض وببعضهم بكل قوه
تحلف يمين ان القوه اللي كان يملكها لعشر أشخاص مو لواحد
نورا همست:ما بقدر اسامحه
ناظرتها أنهار وكملت نورا:وصلت اني اجحده
تنهدت أنهار تغمض عيونها بتعب وكملت نورا
:ولو يندفن ما بحضر عزاه
لفت أنهار عليها تناظرها بخوف وهزت راسها نورا
:لهالدرجه
'
فتح الباب بهاج وناظر ريوف وفهد وتقدمت ريوف
:بهاج اش صار؟
ناظرها بهاج:كل خير
ريوف:وين البنات ؟
بهاج:داخل
لفت تناظر البيت وناظرت بهاج:بيت مين هذا ؟
لف يناظر فهد ورجع ناظرها:بيتي
رفع حاجبه فهد وتقدمت ريوف تدخل ولف بهاج لفهد اللي يناظره:محد يدري عنه لا تطالعني كذا
فهد:من وين لك شاريه ؟
بهاج:بفلوس ابوي
مشى بيدخل وناداه فهد:بكم شريته ؟
بهاج:مو وقتك فهد
دخل البيت وناظر ريوف اللي حضنت نورا وبكت
انصدمت من شكل نورا اللي متأثر وبخوف حضنتها
بهاج تنهد من شافهم رجعوا يبكون سوا وصد عنهم
تقدم فهد يناظرهم وجلس راقبهم بهدوء ولف يناظر بهاج اللي واقف وصاد عنه
ابتعدت ريوف تناظر نورا:تعورتي مره
نورا ماردت عليها ولفت ريوف تناظر أنهار ورجعت ناظرت نورا:ليش ؟ ليش ضربكم ؟
نورا:ما ادري كل اللي ادري عنه اني ما اعرفه
لفت ريوف لفهد اللي يناظرها وهمست
:وهو ؟
نورا:مو مهتمه ابداً بوضعه ، تركناه طايح بالارض
ريوف:ليش شصار له ؟
التفت بهاج:اغمى عليه وقام مافيه شي طيب
عقدت حاجبينها ريوف:ضربكم واغمى عليه هو ؟
أنهار هزت راسها بالنفي:ماكان طبيعي
لفت ريوف تناظرها ورجعت ناظرت فهد
واخذ نفس بهاج:طيب ما بنقعد كل شوي نفتح الموضوع
مشى وجلس معهم وناظرهم:ابي تساعدوني نكمل البيت ماخلصت منه الا غرفه ومطبخ
فهد:صامل ؟
بهاج:هذا بيتي مالي رجعه لمكان غيره
التفت بهاج عليهم:كل وحده بتروح معي تنقي غرفتها وتأثثها وانا علي ادفع وبس
رفعت انظارها أنهار له وناظرهم ساكتين:مابي رفض بتجون معي قلت
نورا تنهدت تناظر البنات وصدت عنهم
'
دخل سلطان الملحق بعد ماشاف عمر يخرج منه تقدم وفتح الباب ودخل ناظر البيت مافيه أحد
والتفت يدخل غرفتهم فتح الباب بهدوء وناظر اغراضهم اخذ نفس وتقدم يشوف فرشهم واماكن نومهم شواحنهم وسماعاتهم ملابسهم مكياجهم كل شي تركوه على حاله وكأنهم هاجروا بدون شي
تقدم ياخذ الاغراض ويحطها بنشطهم وفتح الشنطه وعرف انها لها ، هو من كثر ما يعرفها توقع اغراضها من الألوان والتفاصيل والإهتمامات
قفل الشنطه بعد ماحط فيها اغراضها واخذ شنطة أنهار وسحبهم اثنينهم معه وفتح الباب ورجع بيطلعهم وسحبهم وهو يرجع وراه والتفت من شاف عمر عند الباب
ناظره عمر وناظر الشنط وعقد حاجبينه:وين ماخذهم ؟
اخذ نفس سلطان وصد عنه بدون رد وخرج
مسك الشنط عمر وناظره بحده:اكلمك رد علي
ناظره سلطان:مابي ازعلك وخر ايدك
عمر:ابتليت ببلوى بهاج انت بعد ؟
سلطان:محد مبتلي الا انت
عمر:ما انت ماخذهم مكان بتمر على ابوي الحين يبيك
سلطان:بمر اشوفه بس باخذهم محد يردني
مشى سلطان للدكَّه وعمر معاه ودخل ورفع راسه
رَده:تعال
تقدم وناظر ابوه وزيد اللي جالسين وجمعه معهم
رَده:وين اخذهم بهاج ؟
سلطان:ما اخذهم بهاج هم راحوا مع بهاج ، تفرق
رَده:وين اخلص
سلطان:مدري
عمر:ما انت ماخذ شنطهم الحين يعني ؟
سلطان التفت على رَده:تبيهم يردون له بعد اللي سواه؟
رَده:بيتعذر
سلطان ضحك بسخريه وناظر عمر:هو مايذكر اللي سواه عشان يعتذر !
عمر صد يناظرهم وكمل رَده:هذا ماهو شغلك
سلطان:صح المفروض ما اتدخل لين يموّت وحده من بناته من جنونه
عمر:عدل لسانك
تقدم سلطان له بيتكلم ودخلت حليمه ومعها شموخ ولفوا لهم
رفعت نظرها شموخ على سلطان اللي ناظرها
تقدمت حليمه:بهاج شرا له بيت بورث ابوه
وقف رَده على حيله بصدمه وعقد حاجبينه عمر
كملت حليمه:بهاج شرا له بيت بالرياض
رَده:وكيف يتصرف بورث ابوه بدون شور ؟
سلطان التفت عليه:ليه يشاور ؟ ورث ابوه ونصيبه
رَده:انا تنازلت عن ورث سعود والا هو حق لي
رفع حاجبه سلطان يناظره
وتقدمت شموخ تناظرهم بربكه:واللي حرق المستودع اخر مره هي أنهار
لف سلطان على شموخ بحده وعقد حاجبينه رَده
التفت عمر لحليمه اللي تناظره وكأنها تقوله ان شكها كان صحيح
رَده:بنكسر راسها
جلس رَده بتعب:بنكسر راسها وراسه معها والله لأرباهم والله
مسك ذراع شموخ وخرج معها ومشت معه:سلطان تعورني ترا لا تسحبني كذا
ابتعد عنها والتفت عليها بحده:وش اللي تقولينه انتي ؟
شموخ:قلت اللي اعرفه أنهار بنفسها قايله انها هي حرقته
سلطان:وبيت بهاج ؟ وش يدريك عنه ؟
شموخ:سمعته يتكلم
سلطان:شتبين توصلين له ؟ تبين الفتن والمشاكل؟
شموخ:ابي حقي سلطان اللي مستحيل تاخذه لي من بهاج ، لعبوا عليك وعليّ ، بهاج ما طلب يتزوجني الا عشان أنهار طلبت منه عمك عمر وعدها ان تزوج بهاج بيرجعون جِده
رفعت كتفها:شسوت ؟ باعت بهاج عشان ترجع مع ابوها وخواتها وهو شسوى ؟ باعك وباع عشرتك ، شفت شسوى بأختك ؟ والحين وينه ؟
سلطان ناظرها وهو ساكت وكملت شموخ
:اذا تعزه اكثر مني محد بياخذ حقي منه
ناظرته لثواني ساكت ومشت تاركته وراحت
اخذ نفس سلطان محله ومشى ياخذ الشنط لسيارته
دخلها السياره وركب وحرك خارج من المزرعه
طول طريقه يفكر بكلام شموخ وساهي فيه هو ماكان عنده علم ان بهاج طلبها عشان أنهار طلبته
صد يناظر مرايات سيارته وهو عاقد حجاجه ورجع يناظر طريقه
محد لحقه وهذا اللي مطمنه لكنه يترقب للمشاكل
'
بهاج شغل زيقارته وناظرهم:بناكل برا ليه تجيبه هنا؟
فهد:ما بيطلعون
لف بهاج على البنات:الا بنخرج سوا وهم بيختارون اللي يبونه
نورا:انا اخرج ماعندي مانع
لفت عليها ريوف تناظرها كانت نورا متجاهله كل اللي صاير وكأنها تخطته تماماً وهذا تصرف ثاني لصدمتها وحزنها ، التجاهل
بهاج:تم
ريوف لفت عليه:بهاج خلها يوم ثاني
بهاج:لا بنروح اليوم
لف على أنهار اللي ساهيه:وبنروح جميع
فهد:بتنتظر سلطان ؟
بهاج هز راسه وهو يدخن:جاي كلمته
فهد:طيب انا بطلع معزوم
لف عليه بهاج وعقد حاجبينه:معزوم وين ؟
فهد:مع واحد اعرفه
ناظرته ريوف بذهول:واحد ؟ واحد والا وحده ؟
ابتسم فهد ولف على بهاج:تغار علي
بهاج ناظر ريوف اللي كشرت ورجع ناظره:مع من؟
فهد:واحد عرفته بالدوام
بهاج رفع حاجبه:ما اصدق
فهد:شفت اني خفيف دم من توظفت كوّنت علاقات بسرعه شخصيتي حلوه
ريوف:حسافه ياليتها وحده يمكن تفكني منه واقدر اشتري لي سياره اروح وارجع على راحتي
فهد:تعقبين بس
ريوف ماردت عليه ووقف فهد:تبون شي ؟
هز راسه بهاج وهو يطفي زيقارته:سلامتك
فهد:وانتي ؟
رفعت نظرها ريوف:لا خله بس يعلمك تلبس نفس عيال الرياض
فهد:توكلي بس
خرج من البيت ومشى مع الحديقه لين فتح باب الفله وشاف سيارة سلطان وتقدم:هلا
سلطان رفع نظره ونزل:تعال عاوني
فهد:وش جايب ؟
سلطان:اغراضهم
فتح شنطة السياره وطلع الشنط مع فهد ودخلوا
تقدم سلطان ودق الجرس ووقف بهاج خارج لهم
ناظر سلطان بهاج:ابطيت
سلطان هز راسه ودخل الشنطه ولف لفهد اللي نطق
:تبون شي ؟
سلطان:وين رايح ؟
بهاج:معزوم
سلطان التفت لبهاج:معزوم عند من ؟
فهد:صاحبي الجديد
رفع حاجبه سلطان وخرج فهد ولف سلطان لبهاج اللي نطق:وش العلم هناك؟
سلطان:وش تتوقع ؟
دخل سلطان وتنهد بهاج يقفل الباب وتقدم سلطان
:سلام عليكم
ناظرهم جالسين وجلس ومشى بهاج يلبس شماغه:كنا نستناك بنطلع ناكل برا
سلطان:وين ؟
نورا:مطعم
لف سلطان عليها من نطقت ووقفت:بروح اتجهز اجل
مشت تاركتهم ولف سلطان على بهاج:ايوا وهذا وش يسمونه ؟
ريوف:نورا كذا تمثل على نفسها وعلينا وتتجاهل اللي صاير
أنهار اخذت نفس ووقفت ومشت تدخل
ريوف رفعت راسها لبهاج:كان خليتهم يرتاحون
بهاج:ما بيرتاحون بيقلبونها بكاء من جديد
اخذت نفس ريوف ودخل يده بجيبه بهاج من دق جواله وعقد حاجبه وناظر سلطان:ابوك
سلطان وقف:لا ترد
ناظره بهاج وخرج برا البيت:هلا
مشى خلفه سلطان ووقف بالحديقه بهاج
زيد:كيف الحال ؟
بهاج:حمدلله ، انتم خلنا نعرف حالكم
زيد:والله ماهو حال بيسرّك
بهاج عقد حاجبه:ليه
زيد:يقولون ماخذ بيت بالرياض ، افا يابهاج ولا تقول لنا ولا ندري ! محنا حاسدينك وأنا عمك
لف بهاج لسلطان اللي واقف جنبه:ماخبيته عن أحد لكن شريته قريب وش المشكله ؟
زيد:المشكله ان جدك يبيك فضّ نفسك وتعال
بهاج هز راسه بهدوء وكمل زيد:غير البيت بنقعد نحلّ موضوع امك وعمك اللي نقضت حلفه وطلاقه ودخلت الملحق
بهاج:اها انتم تجمعتم سوا وعرفتم ان بهاج الغلطان بالنهايه ؟
ابتسم زيد وهو يناظر شموخ اللي جالسه قدامه
:ما انت الوحيد معك اللي حرق المستودع عشان ما تتزوج
جمد وجه بهاج وناظره سلطان من اختلف وجهه وفهم
مارد بهاج وكمل زيد:جدك ماهو ساكت
بهاج:محلوله بجيه بكره
زيد:زين
قفل جواله بهاج ولف على سلطان:عقدوها
سلطان ناظره واخذ نفس بهاج:اختك قالت كل اللي سمعته ، بيّن
سلطان:ليه كنت بتاخذ شموخ ؟
لف عليه بهاج يناظره وكمل سلطان:عشان أنهار قالت خذها وابوها وعدها ان خذيتها بيهجون لجِده ؟
عقد حاجبينه بهاج وناظر حدته:مافهمت
سلطان:انت قلت لي ابيها وماني راجع بكلامي ياسلطان لانك تبيها صدق ولان زواجك هذا ماهو زواج بس ماهو عشان كذا ، انت سويت كذا لانك تمشي ورا كلام أنهار قالت لك اي يابهاج قلت اي قالت لا قلت يعقبون
بهاج عقد حجاجه:وش تلمح له ؟
سلطان:انك خروف تاخذك وين ماتبي
بهاج رفع حاجبينه؛اعتدل
سلطان ناظره بعصبيه:انا صادق الدنيا ماهي على كيف أنهار ! انت تمشي تدربي براسك وراها بدون راي ، شف وش صار الحين ! حرقت المستودع بليلة زواجك وقالت لك بهاج ابيك وهذاك هنا ماتدري عن اختي ولا عن اهلي اللي معلقين كل شي عشانك
بهاج:بتجاهل الغلط لانك اخوي بس ما تجاهلت احد انا جيتك وقلت لك النيّه قلت سلطان معد ابي وكلم اهلك
سلطان:بهاج فتح عيونك شوف وش قاعد تسوي عشان ترضيها ، طالع بنفسك مالك راي تجري ورا رضاها ضيعت نفسك وضيعت امك
بهاج:ليه ضيعت نفسي ؟ عشاني شريت بيت بدون ما اقول لاحد ! وليه ضيعت امي ؟ عشاني دخلت الملحق قبل ما يذبح بناته !
هز راسه بهاج:سلطان انت عبوا راسك وجيت هنا ثاير بس اقعد قلبها براسك بتعرف انك غلطت
مشى وتركه ودخل البيت وهو معصب وناظرهم طالعين
ريوف:بنخرج ؟
هز راسه بهاج والتفت من شاف سلطان خرج من البيت وهمست نورا:ما بيروح؟
مشى بهاج:لا
خرجوا وركبت أنهار بجانبه والتفت عليها قبل يشغل السياره:انتي زينه؟
هزت راسها له ولف للطريق وشغل سيارته وحرك
نورا:بهاج لقيت مطعم حلو اعرفه في فروع كثيره ويمدحون فرع الرياض نروح ؟
ناظرها بالمرايه:نروح بس عطيني موقعه
نورا مدت جوالها واخذه بهاج وهو يناظرها وناظرته نورا:شوي غالي بهاج
بهاج:ما يغلى عليكم اهم شي يعجبكم
ابتسمت نورا له ولف عليها ابتسم بهدوء ورجع يناطر الطريق ساهي يكتم قهره وغضبه من كلام سلطان اللي راح بوجه ورجع له بوجه ثاني
ويفكر بجده اللي بيوقف على كل ربع ريال صرفها وبيدري انه صرف كل الورث وشغلّه بشركة ابراهيم وبيقلب الدنيا على راسه عشان أنهار
لف يناظرها تناظر الطريق ورجع يناظر طريقه بهدوء
وقف عند المطعم وهو يناظر انه مافي مواقف:وين اوقف اصبروا
ريوف:بهاج وقف وعطهم المفتاح هم ينزلونها بالكراج تحت
رفع حاجبه:احلفي
نورا ضحكت:والله بهاج وقف
وقف وناظر اللي تقدم يفتح له الباب وناظرهم بتعجب بهاج ونزل ونزلوا معه البنات
وقف يناظر اللي ركب السياره وحركها وهمس:ابو سعود
تقدم معهم من دخلوا ومشى معهم وقف عند اللي استقبلهم:اهلاً وسهلاً طاوله لكم شخص ؟
بهاج:اربعه
هز راسه:تفضلوا
مشوا خلفه وقدمهم لطاوله ودخلوا وابتسمت ريوف:الڤيو خيال
ابتسمت نورا وهي تاخذ جوالها تصور:نسيت المطاعم من كثر ماطولنا عنها
ابتسم ولفت أنهار عليه:بغيت الحمام قبل نطلب
هز راسه بهاج:تعالي معي
رفع ذراعه خلف ظهرها ومشى معها لين وقف عند الحمامات ودخلت أنهار
اخذ نفس وطلع جواله يناظره ماكان احد داق عليه او مكلمه هو غارق في المشاكل اللي فوق راسه ومن ابراهيم اللي مهمشه ومن همّه على أنهار والبنات
التفت من خرجت أنهار وابتسم يوقف بإعتدال لها
تقدمت له وناظرها بهاج بإنتباه كانت باكيه وهربت عشان ودها تبكي:اه يا أنهار تشتعل بقلبي حرايق لا تزيدينها عليّ
لفت عليه أنهار وبكت:مو قادره
اخذ نفس واخذها بعيد يوقف معها لوحدهم وناظرها تبكي ومسك وجهها:قضت ليه تبكين ، تركنا كل أبوهم وجينا هنا ، أنهار جيت عشانك
رفعت نظرها له وهزت راسها وهي تمسح دموعها
بهاج:شدّي خليني أتقوّى بك لا تطيحين وتطيحيني معك ، باقي قدامي كثير عشان أربح راحة الدنيا
أنهار ناظرته وهمست:بيصير أكثر ؟
تنهد بهاج وهز راسه بالنفي:ان كنتي قويه ما بيصير أكثر
أنهار:انا خسرت ابويه بهاج خسارتي الجايه ما ابغاها تكون إنت
ابتسم لها يطمنها وهز راسه:ما بتخسرين شي أكثر كل اللي بتعيشينه ربح
مسحت دموعها تناظره وبلعت ريقها ترجع معه للطاوله
جلست وجلس بهاج ولفت ريوف:تأخرتوا كنا بنطلب
نورا:بهاج بطلب لك على ذوقي صدقني بيعجبك
ريوف:الله يعينك
نورا ناظرتها بحده وهز راسه بهاج:اطلبي اطلبي
رفعت نظرها أنهار عليه من صد عنهم ساهي كانت تحس انه يعيش شي اكبر من انه ترك المزرعه واخذهم للرياض كانت تدري ان ما خف توهجه هالقد الا لانه في شي يعيشه
نزل انظاره بهاج لجواله يترقب منه مكالمه ورجع حطه على الطاوله بهدوء
ريوف لفت عليه:ليش سلطان ماجا معانا ؟
بلع ريقه بهاج من طاريه:بيرجع
نورا:طيب على الأقل ياكل ويرجع
بهاج اخذ نفس:مدري عنه
رفع نظره لأنهار اللي تراقبه بعيونها وناظرها لثواني يعدّ الهموم اللي تشكلت عليه ، يترقب جدّه اللي بيهد فيها الدنيا عشانها حرقت المستودع
ابتسم بخفوت لها والتفت من شافهم يملون طلباتهم على النادل
-
ابتسمت ريوف:لا تسهرون بدوني بالبيت
ابتسم بهاج:نامي وراك دوام
ريوف:باي ، باي أنهار
لفت عليها أنهار وابتسمت:باي ياروحي
نزلت ريوف واشرت لهم من بعيد ودخلت البيت
تشكل بحلقها غصه تشوفهم ودخلت وبكت من غابت عن عينهم
كيف كلهم خارجين عشان يتخطون لكن كل واحد يخفي اللي فيه هي مو قادره تعدل وتصلح شي
دخلت الشقه وقفلت الباب وجلست وهي تغطي وجهها واخذت جوالها ترسل له وتعض شفته
:تعال بشوفك تكفى
ارسلتها وقفلت جوالها كانت تدري انه بيتجاهل رسالتها ولا يقوى يجي ماكانت تعرف كيف تشافي ابوها من اللي فيه وتشافي خواتها
ماكانت تقدر تشرح لهم الوضع لين تقدر هي تفهمه
دخل فهد وناظرها:اوف وصلتي ؟
مسحت دموعها وتقدم لها بهدوء:تبكين ؟
لفت تناظره:بدخل أنام
فهد:افا ! لا والله ما تنامين اقعدي
ريوف:فهد مو رايقه تكفى
فهد:اجلسي قلت
جلست وصدت عنه وتنهدت
جلس جنبها:اي يبي لنا اسكريم هالمره بعد
ضحكت لانه كل مابكت جاب لها اسكريم يترضاها ولفت عليه:ابغى يرجع كل شي زي زمان
ناظرها وسكت وبكت:ما ابغى اشوف خواتي كذا وما ابغى اخسر ابويه
مسحت دموعها ورفع كفه يمسح على ظهرها وكملت ريوف:ابغى اشوفه فهد خذني له تكفى
فهد:ريوف بس بنزيد المشاكل لو رحنا بنقعد للشيبه ما بيفكنا من لسانه شي
ريوف؛ما يهمني ما يهموني كلهم ابغى اشوفه
فهد ناظرها وتنهد:طيب
ريوف بلعت ريقها:وعد ؟
هز راسه:افا وش له اوعدك مابقولك شي ولا اسويه قلت اخذك يعني اخذك
اخذت نفس ولفت تهدي نفسها وهزت راسها
:تصبح على خير
وقفت وناظرها فهد:متأكده ماتبين اسكريم ؟
ابتسمت له وهزت راسها بلا وابتسم لها ودخلت
'
دخل وفصخ شماغه وناظرهم:ادخلوا ناموا لا تبطون
نورا:فين بتنام ؟
بهاج:هِنا
ناظرته أنهار ورفع بكت دخانه:بدخن فوق انا
مشى وطلع ولفت نورا على أنهار:بتنامين ؟
أنهار:شويه واجي
هزت راسها نورا ومشت للغرفه وطلعت أنهار تناظره بالبلكونه من بعيد
حاط شماغه على كتفه ويدخن وماسك بكفه سور البلكونه يتأمل الحديقه بسكون
نفث دخانه وناظر جواله فارغ ورجع يرفع راسه يدخن انقبض قلبه من حس بذراعينها ونزل انظاره لكفوفها اللي تقفلت ببعضها تحاوط بطنه
تنهد:صدري اللي زايدٍ ضيقه وزايدٍ كبته ما يفكه غيرك
حطت براسها على ظهره وهي تلمس صدره بكفوفها الثنتين:مين تنتظر يكلمك ؟
رمى زيقارته ومسك كفوفها اللي على صدره:سلطان
رفعت راسها وابتعدت عنه تتقدم له ولف عليها
أنهار:ليش سلطان ؟
بهاج تنهد وصد بأنظاره وميل شفايفه:مدري وش جاه ، جاني بشرّه وشرّ اللي هناك كلهم
أنهار:تهاوشتوا يعني ؟
بهاج لف عليها:ماني مهاوشه ولا زعلان عليه انا مصدوم منه بس
أنهار:اش قال لك طيب ؟
بهاج نزل راسه وابتسم يتذكر كلام سلطان ورجع ناظرها وده يقول بأسبابك إنتي يعاتبني يقول اني امشي وراك ولا احكّم اموري
بهاج:خربط بالكلام شكلهم زادوها عليه هناك وهو لوحده
أنهار:طيب كيف الوضع هناك ؟ كلمت أمك ؟
لف بهاج عليها وهز راسه بالنفي
أنهار:دخلت الملحق برجلينك بهاج
هز راسه بهاج واخذ نفس:يكبلون رجليني ولا يبوني اتمادى ، وش كانوا يتوقعون مني ؟
أنهار سكتت وكمل بهاج:واكيد انها الحين تحط كل اللوم علي انا متجاهله اللي سواه
هز راسه بتعب:كالعاده بهاج دايم غلط
مسكت كفوفه أنهار:ما يعرفونك بهاج
ناظرها بهاج وكملت أنهار:ما يفهمون ولا يعرفونك
تنهد بهاج وهو يناظرها:بروح لهم بكره
جمد وجهها وهمست:تكفى لا
بهاج:بروح وارجع لكم لكن لازم اني اروح
أنهار هزت راسها بالنفي:ليش تروح ؟ اش تفيد روحتك ؟ خلاص بهاج
بهاج:جدي يدري عن البيت والبيت من ورث ابوي اللي تنازل عنه هو لي
أنهار عقدت حاجبينها:ليش ورث ابوك له هو ؟
بهاج:نصيبه ان مات الولد قبل الأب الأب يورثه
أنهار:بس هو لك بهاج ما اخذت منه شي
هز راسه بهاج:وهذا اللي بقوله ، هذا حلالي محد محاسبني عليه
أنهار:لا تروح بهاج تكفى
بهاج:لازم اني اروح
بلعت ريقها تناظره وهمست:تعبت
رفع ذراعينه يحاوط خصرها ويحط بظهره على سور البلكونه ويقربها له:أنا جفاف وإنتي ربيع وسحابه ، كل ما ضحكتي لي انا بزود انتي بس تقوّي بي وانا بخير ماعلي خلاف ، اتبعثر وأنهمر وأرجع ضحوك لان نهاية دربي إنتي ، كل شقاي اللي بشقيه ماهو على شاني لوحدي ، انا من قبلك كنت اسكت عن كل زلّه واقول مشها لكن من يوم دخلتي علي وقفت عند كل كلمه
أنهار رفعت عيونها له:ما ابغى احس اني كذا ، ما ابغى اشوفك تعاني عشاني
بهاج ابتسم لها:لو إنك بحر مالح وجيت لك مجروح حضنتك موج ما كأني بمجروح
أنهار تمسكت بثوبه ونزلت انظارها ثواني تستجمع نفسها ورفعت راسها تقرب وجهها لوجهه وبدون تفكير وبدون تردد باسته
وقف دمّه لانه ماتوقعها تبادر ولا جات بباله تردّ عليه بالفعل كان ينتظرها تقول أحبك كتعبير لكنها عبّرت له بأحسن أفعالها
رفع يدينه عن خصرها لوجهها مايردها عنه
ابتعدت عنه تبلع ريقها وتحط جبينها على جبينه
وهمست:غرقانه فيك بهاج لو بعدوك عني بموت
شد على جبينها يناظرها:ما أخليك الا وانا ميت
رفعت عيونها لعيونه بخوف ورفع راسه يبوس جبينها
رفعت يدينها على ظهره تغمض عيونها وابتعد عنها
:ادخلي نامي
ناظرته:لا تروح ماشفتك
بهاج هز راسه بالنفي وناظرته بخوف لثواني وهز راسه لها:ادخلي
هزت راسها له وفلتت يدينها من يدينه وهي تراقبه وابتعدت عنه تنزل تحت تحت نظراته
غمض عيونه يلتقط انفاسه لانه يندمر منها لانها كثيره بحزنها وفرحها كثيره عليه
رفعت يدها على صدرها اللي تحس بنبضات قلبها تتسارع وقفت عند نهاية الدرج ولفت تناظر الدرج من مكانها
ليه بكل نهاية كلامهم ينكتب عليها تبتعد عنه ، ليه بعد كل هذا هي بتنام بمكان ماهو صدره ! ماهو حضنه
ليه تتسارع خطواتها له وعشانه وودها فيه لكن كل الظروف تحدّها توقف محلها !
-
(جميع التشبيهات موجوده بحسابي بالاستقرام r_55shog )