انثنى غيم نجد لخد الحجاز النرجسيه

٤٩

خرج يناظرهم ومشى للدكّه ودخل ناظر رَده اللي منسدح وعند راسه زيد وعقد حاجبه:علامكم؟
زيد:الشيبه تعب نزل ضغطه
تنهد بهاج ولف من دخل فهد ومعه دواه
ومسك قلبه رَده:بنجلط
زيد:يا ابوي سمّ بالله
حك شنبه بهاج وخرج براسه يناظرهم طفوا الحريق ولف من نطق زيد:نوديك المستشفى ؟
رَده:ان قعدت متّ ادفنوني هِنا
تقدم بهاج:تعوذ من الشيطان ياجدي
انحنى ومسك ذراعه وساعده فهد وخرجوا به
واشر بهاج :بسيارتي
فتح الباب وجلسوه وركب زيد يمين بهاج وركب بهاج وحرك
التفت فهد ينادي سلطان بعلو صوته ومشى له سلطان وهو يتنفس بسرعه:وش صار ؟
فهد:الشيبه بنوديه المستشفى امش
سلطان:من وداه ؟
فهد:بهاج وعمي زيد
سلطان:بنادي عمي عبدالله واجيك اصبر
مشى سلطان ينادي عمه ورجع لقي جمعه ويمينها امه اللي تترجى فهد
فهد التفت لسلطان:اقعد عندهم اجل
سلطان:علامك ياجَده ؟
جمعه:ودوني اشوفه
سلطان:ياجَده ضغطه ارتفع بس ربع ساعه ويرد
جمعه:خذوني له
تقدم لهم عبدالله:يمه علامك؟
لفت جمعه:اخذوا ابوك المستشفى
عبدالله:ايه ايه تطمني مافيه الا العافيه بروح اشوفه وارد لك
جمعه:خذني معك
عبدالله:ماله لزوم برد واطمنك عليه ان شاء الله
تنهدت جمعه ولف عبدالله:امش
مشى فهد وركب سلطان معهم وحركوا ورا سيارة بهاج
ناظر مرايته بهاج ولف من نطق زيد يهمس له:من حرقه ؟
بلع ريقه بهاج:مالي علم
زيد:لو ماكنت موجود قلنا انت
بهاج مارد عليه وهو يناظر طريقه
'
كانت بالحمام تناظر فستانها اللي طايح بالحمام وعليها منشفه صغيره هي لاحظت ان بهاج نسيها بالحمام وتأففت ووقفت من سمعت باب البيت وفتحت باب الحمام تطلع راسها ونطقت:ريوف ؟
تقدمت لها ريوف:فينك انتي ؟ دورتك بكل مكان
أنهار:كويس جيتي جيبي لي روبي وعبايتي سريع مت برد
ريوف:ليش ؟
أنهار:اخذت شاور ناسيه ان اغراضنا بالملحق
ريوف عقدت حاجبينها:مو صاحيه !
أنهار:اوكيه صح عليك روحي اخلصي
ريوف:اوكيه
خرجت ريوف وجات تقفل باب البيت ووقفتها حليمه:وش عندك ؟
ريوف:جيت لأنهار
حليمه:وش تسوي هنا ؟
ماردت عليها ريوف وتخطتها رايحه للملحق ودخله حليمه وعقدت حاجبها من شافت الحمام مفتوح وفستان أنهار عنده وتقدمت وطلعت راسها أنهار ومن ناظرتها رجعت راسها وتأففت
حليمه:وش تسوين ؟
أنهار لفت عليها:زي ماتشوفين
حليمه عقدت حاجبينه بصدمه:ليه متروشه هنا؟
أنهار بلعت ريقها:استعجلت ولا لاحظت ان اغراضي بالملحق
حليمه:تستهبلين ؟ بنت
ناظرتها أنهار بربكه وتقدمت حليمه من وقف دمها بخوف:انطقي
أنهار بلعت ريقها:خير ؟ ادخلي الحمام كمان ؟
حليمه:أنهار يمين بالله ان مانطقتي واعترفتي لأهدّ فيك المكان
أنهار عضت شفتها من شافت نظراتها الحاده ورفعت راسها لريوف اللي مدت لها الروب وسحبته ودخلت وقفلت الباب
حليمه:بتخرجين ونتكلم تفهمين ؟
ريوف:اعصابك !
لفت حليمه عليها بحده وناظرتها ريوف وخرجت تاركتهم
شدت على روبها وخرجت وناظرت حليمه:خير ؟
حليمه مسكت ذراعها:اعترفي
أنهار:اعترف لأيش انتي صاحيه ؟ طلعي جنانك بعيد عني بالله مو ناقصه
حليمه:ليه متروشه بحمام بهاج ؟
أنهار:لا تتهميني ما كنت مختفيه كنت عندكم اصلاً !
حليمه رفعت حاجبها بذهول:انا وابوك زواجنا ماهو لعبه اعترفي وش صار بينك وبين بهاج هنا ، انطقي بموت مجلوطه
ناظرتها أنهار بصدمه وضحكت من لاحظت ان حليمه ماكانت تقصد الحريق ابد وكان قصدها بعيد ، بعيد لدرجة خلت انهار تضحك بصوت عالي
ونشف دم حليمه من شافتها تضحك وبللت شفايفها أنهار تشد روبها:اسألي ولدك يجاوبك هو
اخذت فستانها وتركتها وخرجت من البيت وهي تضحك من تذكرت نظرات الصدمه بعيونها
دخلت الملحق ومشت للغرفه وقفلت الباب خلفها مشت ولبست ملابسها وجلست وهي تاخذ جوالها ودخلت على محادثته وفتحت الفويس
:بهاج ! على الاقل لا تخليني وانا بالحمام لحالي ! كويس مامت برد
ارسلتها ورفعت راسها من سمعت عمر يتكلم بالجوال ووقفت تتقدم تسمعه من ورا الباب
عمر:يعني بيتنوم ؟ ، لا ياشيخ ، طيب طيب اجيكم ؟ ، من بيقعد عنده ، طيب استناك ان رجعت دق بابي ، سلام
عقدت حاجبينها وهمست:مين بيتنوم ؟
'
ناظر جَده اللي نايم قدامه ولف لسلطان اللي جالس
:للحظه توقعتك انت اللي حرقته قلت بتخلص اختك مني
رفع راسه سلطان عليه:ليه من طلع حرقه ؟
سكت بهاج وناظر جَده ورجع ناظر سلطان:وش فيك انت مو على حالك ! وين طلعت وخليتنا ؟
سلطان:اغسل فناجين بالمغاسل
بهاج رفع حاجبه:لا تكذب !
سلطان التفت عليه:شتبي انت الحين ؟
بهاج هز راسه؛اها ، طيب ما بنقول شي ارتاح
تركه وخرج من الغرفه ودخل يده بجيبه ياخذه وناظر رسالتها وابتسم من شافه فويس
التفت خلفه وتقدم ورفع جواله يحطه على اذنه وغمض عيونه واتسع مبسمه من اشتغل صوتها وتنهد ينزل جواله ويرجع يشغل صوتها ويحطه على اذنه
رجع ظهره لورا على الجدار وهو يكرره وابتسم ينزل جواله وسجل لها صوته:مرحبا يا أعذب الأصوات وأحلاها كل مره تقولين بهاج من شفاتك ودي أفديك بعمري ، انتي تآمريني وتنهيني
ابتسم يسكت ويرسله لها ويرجع يفتح جديد وهو يناظر المستشفى:مانسيتك لكن خرجت بالشيبه جاته آثار جلطه ونوموه بالمستشفى وانا وسلطان عنده ، من جاك بالبيت انتي ؟
ارسله وناظرها تدخل محادثته وابتسم
ابتعدت عنهم وهي تحط الجوال على اذنها واتسع ثغرها من صوته ومن تملكها الخجل وعضت شفتها
صدت تناظرهم خلفها بالصاله وهي تسمع صوته هي نست كل شي قبل وكيف كان حالهم وكيف ان الخطر ما زال بس كل اللي تسمعه هو صوته وترحيبه ودلاله
نزلت جوالها تكتب له:ريوف جاتني انقذتني ، يعني بتنام عنده ؟
كتب لها وهو واقف عند بابه:ماظنتي انام بس ماني راد البيت ، احد قالك شي ؟
ضحكت بخفوت من تذكرت امه:لا
بهاج:زين
أنهار اخذت نفس تنتظره يكتب لكن ماكتب وماخرج من المحادثه ولفت تناظرهم بالصاله ورجعت تناظر جوالها:لو مانمت ارسلي
بهاج:ليه ؟
أنهار:بكلمك
ابتسم ورجع ذراعه خلف راسه:سمّي
ابتسمت وقفلت جوالها
'
ناظرتهم خارجين ولفت من استعجلتها ريوف:استعجلي
لبست شوزها ورفعت راسها:طيب اوف !
مشت وهي تعدل شعرها وخرجت وناظرت عمر راكب السياره وجنبه حليمه وسيارة عمها زيد جنبه وسيارة عبدالله معه وهمست:ياساتر
مشت وركبت ورا مع نورا وريوف وحرك عمر
ولفت حليمه عليه:بيطلعونه اليوم ؟
عمر:مدري والله بنشوف الحين ان وصلنا له
حليمه:اعوذ بالله كيف تغير كل شي مره وحده
لفت لعمر:الله يستر محد يشوف شناطنا بالملحق
عمر:محد بيشوف المهم ابوي الحين
لفت نورا وناظرت أنهار اللي جنبها وهمست:كان ضروري ؟
أنهار:انا كمان ماكان ودي اروح بس يقولون ما بيبقى احد بالبيت
نورا اخذت نفس وناظرت الطريق بسكون وهمست لها أنهار:فيك حاجه انتي ؟
هزت راسها بالنفي نورا ولا لفت عليها ونزلت راسها أنهار لجوالها :لحالك ؟
اخذ جواله وهو يتثاوب:صح النوم يامسهرتني
ابتسمت ورفعت راسها تناظر الطريق ورجعت تكتب له:عندك احد ؟
بهاج:لا بس اعمامي جايين
أنهار:ايوا شفتهم خارجين قبل شوي
بهاج:من معهم ؟
أنهار:ما اعرف ما انتبهت
بهاج:ابوك جاي ؟
أنهار:ايوا ومعاه امك
بهاج رفع راسه لسلطان اللي نايم على الكرسي ووقف ومشى له:ولد سلطان
تحرك وطقت رقبة سلطان وكشر وضحك بهاج:اسلم
عقد حاجبينه ومسك راسه وغمض عيونه
بهاج:قوم جايين
سلطان اخذ نفس ووقف ومشى خارج من الغرفه وهو فاتح ازارير ثوبه العلويه ودخل الحمام غسل وجهه وخرج وطلب شاهي كوبين واخذهم راجع للغرفه
ناظر الاكواب اللي بيده ورفع راسه من الاصوات بآخر الممر وعقد حاجبينه من عرفهم ، اهله
ووقف عند الباب وتقدم له عبدالله:هاه وش العلم؟
سلطان:نايم
ناظر الحريم وعقد حاجبينه:وش جابهم كل ذولا
عبدالله ناظره بحده:يزورونه
سلطان؛حياهم الله
دخلوا والتفت من شافهم خلف عمر وجمد وجهه من شافها بينهم ومن ناظرته دخل بسرعه وحط الاكواب عند بهاج
ناظرها بهاج اللي وقف عشان يقعدون عمامه واخذ الشاهي حقه يشرب منه ورفع راسه من دخل عمر ووراه حليمه وشرب رشفه وانحرق لسانه من ناظرهم خلفه هي ماقالت له انهم بيجون وجمد وجهه من شافها تبتسم له ودخلت
ناظرهم متجمعين كلهم بالغرفه وتقدم يمشي لين عندهم وقف عندهم وهمس:وش جابكم؟
ريوف:ماخلونا لحالنا يقولون البيت فاضي
رفع راسه لأنهار:تكذبين ؟
ابتسمت وصدت عنه ولف لريوف:وفهد وينه؟
ريوف:بيجيب عمال للمستودع
هز راسه بهاج ولف وهو يشرب شاهي ويسمع دعاء جمعه:الله يقومه بالسلامه الله يجعل يومي يسبق يومه
زيد:تعوذي من الشيطان
جمعه ناظرت رَده:تكفى لا تخليني بعدك هذا هم عيالك عندك اللي كديت عشان يكونون حوالينك وهذا هو عمر اللي شيبت تدوره هذا هو عندك معد بيروح عنك وانا ادري عمر مستحيل يروح عنك
عقدت حاجبينها ريوف تناظر جمعه ولفت تناظر عمر اللي مختلف حاله ويمسح تعرق جبينه بيده
وكملت جمعه:مستحيل يغيبون عنك
عبدالله:ما بنخليه هذا ابونا مالنا غيره
زيد:بس قم لنا بالسلامه وخلنا نكمل اللي وقفنا عنده ونفرح بأحفادك بهاج وشموخ
لفت أنهار تناظر بهاج اللي التفت لها ورجعت انظارها للبنات اللي جالسين خلف اعمامهم وميّزت نظرات شموخ لبهاج
تنهد عبدالله:ماضاع حلالك يا ابوي يعوضك ربي ان شاء الله
زيد:والله ينتقم من اللي حرقه
بلعت ريقها أنهار وتقدم بهاج:تعوذا من الشيطان
زيد التفت عليه:ايه لو كان فعل فاعل الله يـ
بهاج:نصيب نصيب
عبدالله:مالقوا أثر ان كان احد قاصد ؟ عدوان ابوي واجد يمكن انه راعي المزرعه اللي جنبنا اذكره تهاوش مع ابوي قبل زواجكم بليله
سلطان:وليه يحرقنا ؟ ما يسويها
عبدالله:ما استبعد يخلي عياله الخمس يحرقونه عاد الحريق ماهو هيّن تلقاهم خمس اللي حرقوه بهاج لوحده وهو رجال ما قدر يحرقه هالقد
ضحكت بخفوت من شافت وجه بهاج ولفوا عليها خواتها وسكتت وجمدت محلها تتخبى
وبلعت ريقها من نظراتهم ولف بهاج عليهم
:خلوه يرتاح ياجماعه
رجع يغمض عيونه رَده ووقفوا يخرجون من عنده وخرج بهاج وسحبها من ذراعها من بينهم:تضحكين اجل ؟
ابتسمت:يقولون بهاج رجال ما سوا كذا ، يعني غلبتك
ناظر ابتسامتها وابتسم ولف من تقدمت لهم حليمه:بهاج !
وقف بإعتدال وابتسمت أنهار لحليمه وبعدت عنه وتقدمت حليمه تهمس له:اعترف بسرعه وش مسوي
عقد حاجبينه:بسم الله وش مسوي بعد ؟
حليمه:لا تلعب علي لا تجلطني بهاج مو ناقصتك استفزتني هذي اللي وراك عشان تنطق وقالت اسألي ولدك ، وش مسوي اعترف
لف بهاج يناظر أنهار خلفهم وبلع ريقه ولف لها
:اعترف بوشو ؟
حليمه:أنهار ليه كانت تتروش بحمامك بعد الحريق؟
ارتبك وحك شاربه ورفع راسه يناظر اعمامه اللي بالممر يتكلمون ورجع ناظرها:لا تظنين هالشي بأنهار ، انا اسويها اي
حليمه ناظرته بصدمه:بهاج ! صاحي انت تبي تخرب زواجي من عمك ؟
عقد حاجبينه بهاج:لحظه عن وشو تتكلمين ؟
حليمه:لا تسوي نفسك ماتعرف قبل شوي تقول انك تسويها
جمد وجهه من استوعب تفكيرها:لا عاد !
حليمه ناظرته وضحك بهاج يناظرها بصدمه:هذا اللي فهمتيه ؟ اي زين خلك على فهمك ذا
حليمه مسكت ذراعه:تعال
بهاج ضحك؛يمه ارتاحي محد مفرقك عن عمي ارقدي وآمني
حليمه:اجل ليه تتروش بحمامك؟
بهاج ضحك:جازت لها حنفيتي يمكن
تركها ومشى رايح وتقدمت له أنهار:اش قالت لك؟
بهاج ضحك:ياخي امي
لف عليها:ماقالت شي
ناظرتهم خارجين سوا ومشت ورا بهاج ونطقت
:بروح مع بهاج
لف عمر قبل يركب سيارته وناظرتها حليمه:ليه ؟
لف بهاج على أنهار اللي ابتسمت لها:وين المشكله راجعه مع اخوي
شدت بنطقها الاخير وزادت بإبتسامتها وركبت يمين بهاج وناظر بهاج حليمه وركب سيارته
شغل سيارته ولف عليه وضحك:الحين صرت اخوك ؟
أنهار ناظرته:مو هي دايم تقولي كذا ؟ يالله اجل نقول زيها عشان تتركني بحالي
بهاج شغل سيارته وناظر سيارة عمر قبله وحرك خلفه ولفت عليه وابتسمت ورجعت تناظر الطريق
حسّ عليها والتفت يناظر ابتسامتها وصدودها ومد كفه لكفها يلمسه والتفتت عليه ونطق
:لعد تعيدين اللي صار ما انتي رايحه مكان بدوني
تنهدت من تذكرت اللي كان بيصير وكيف كان حالها وكيف تعبت واندمرت من حزنها وخوفها
وناظرته:اش بتسوي الحين طيب ؟
بهاج:في وشو ؟
أنهار:في البنت
بهاج ناظر طريقه وسكت وتقدمت له أنهار
:بتقول لا صح بهاج ؟
تنهد بهاج والتفت عليها:من وهقنا مو انتي ؟
أنهار عقدت حاجبينها بزعل:بهاج لا تجلس تلومني كل شويه !
بهاج:والله انك دمرتيني لين الحين مدري كيف بخرج منها
أنهار:قول ما ابغاها ما أحُبها مو صعبه
ابتسم والتفت عليها:ما ايش ؟
ابتسمت تفهم مقصده وناظرته:ما تحُبها
بهاج لف للطريق وضحك:ما أحوبها أحوبك انتي
ضحكت تشد كفه لها:عسول ياناس
ابتسم من كلامها ولهجتها يناظر طريقه وتقدمت له أنهار تلف بيدينها على ذراعه وهي ماسكه كفه وتنهدت تاخذ نفس مسموع:ابغى وين اروح القاك بهاج ما ابغى طريق بدونك ، ما ابغى مكان بدونك
رفعت راسها تناظره وتشد على ذراعه:حتى لو بتعب من كلامهم حتى لو بنكون بخلسه وسّر دايماً
نزل عيونه عليها وابتسمت له:دام انت الغايه اهخ ما احلى السبيل
ابتسم لها وتقدم يبوس جبينها:اهخ ما احلى هالريحه
اخذ نفس يبوس جبينها بتكرار:لا عدمني ربي هالشذى اللي يكركبني
ابتسمت تلف للطريق تناظره وشدت على كفه
وخفف سرعته:صوره لا تحرمينا اللحظه
ضحكت تاخذ جوالها وناظر طريقه اللي خفف سرعته فيه ورجع يناظر كاميرا جوالها وابتسم
صورتهم ورجع يمشي بالطريق وابتسمت تصور كفوفه ببعض ونزلت راسها تناظر جوالها
،
عقدت حاجبينها:وين راس أنهار ما اشوفه؟
ناظرتها ريوف:مو ناقده على نفسك بالله ؟
حليمه ماردت وهي تترقب بنظراتها للخلف وناظرتها نورا:خلاص طالعي قدامك وترتيني
حليمه لفت لعمر:عمر دق عليه انت خله يرتعب شوفه قاعد يخفف سرعته وهالبنت مو باينه
مارد عمر ولفت ريوف تناظره وهمست:بابا
ناظرته عاقد حاجبينه يتعرق من جهده وتقدمت له ولمست ذراعه وانتفض يبتعد عنها ولفت حليمه عليه:فيك شي ؟
عمر:اسكتوا
اعتدلت حليمه ولفت لقدام ورجعت محلها ريوف تناظره بترقب وخوف
رجعت تراقب من مرايتها لسيارة بهاج اللي خلفهم
كانت تجهل وضعهم اللي كانت تصوره أنهار وتضحك لفت عليه تناظره يغني مع الشيله:مسكين مسكين من قد بلي بالغرام
كان يغنيها لأنها هي طلبته طلبته هالشيله بالذات وابتسم يغني معها وهو يسوق ورجعت تحط براسها على كتفه وشعرها ينتثر
وبعد دقايق نطقت:تدري ان ريوف رجعت مع ابويه ؟
رفعت راسها وناظرها وعقد حاجبه وكملت أنهار
:جابها من الرياض بنفسه وبقولك شي يضحك
ابتسمت بخفوت:تقول حضنها
سكت بهاج يناظرها وبلعت ريقها أنهار:مع انه قبل يخرج لريوف شافني بالغرفه وكنت تعبانه وقتها ومهلوكه من تعبي وما قالي كلمه وحده ، ومع اني انا اكثر وحده تأذيت هنا عشانه بس ماجرب يحضني انا
تنهدت تناظر بهاج:حاز بخاطري مره بهاج مو قادره اقول عادي نفس ماتقول نورا ، انا رحت له وبكيت قدامه وترجيته يرجع زي قبل بس تدري وش قالي ؟ قال اقنعي بهاج يتزوج ونرجع سوا كلنا
تنهد بهاج وصد يناظر الطريق وكملت أنهار
:هو يشوفك بعيوني بهاج هو يدري إني أحُبك بس يبغى يبعدني عنك يدري اني بموت من بعدك ومع ذلك طلبني نبتعد
عقدت حاجبينها:ليش يسوي كذا ؟
بهاج:ان جاء الكلام لابوك معرف اقول شي
أنهار:غريب صح ؟ ماتقدر تدافع عنه حتى ، نورا الوحيده اللي عندها عادي ومن يوم رفض بندر وهي عايفته
بهاج التفت لها ورفعت كتفها:بس هذي الفتره نورا مو نورا هاجده وساكته وساهيه
بهاج التفت من خطر بباله سلطان وتكى بيده يفكر:تكلمت مع سلطان هي ؟
أنهار:ما اعرف ، ليه يكلمها ؟
بهاج لف لها:سلطان يهوجس بنورا
أنهار رفعت حاجبينها:نورا مستحيل تلتفت لسلطان
بهاج:ليه ؟
أنهار:مو منجدك بهاج ، نورا وسلطان ؟ مستحيل حتى بالحلم ما يركب
رفع حاجبه بحده لها وناظرته بذهول:بهاج !
بهاج:تذكري ان الكل يقول عنا كذا
أنهار:بس إحنا غير نورا تحب قبل ماتجي لهنا والى الان تحب بندر وتبيه
بهاج رفع راسه ينفي كلامها:نورا معد تبيه
أنهار:كيف عرفت ؟
بهاج:البنت ماتبي اللي يهملها
سكتت أنهار لثواني وكمل بهاج:توقعي كل شي
أنهار تنهدت ونزلت راسها والتفت بهاج:لو خواتك يدرون عنا ! كان ماشلت هم شي لانهم بيوقفون معنا
ناظرته أنهار:كيف اقولهم ؟
بهاج:صارحيهم مو صعبه
تنهدت وصدت تناظر الطريق ولف يناظرها بهاج ورجع يلف للطريق دخل المزرعه خلف سيارة عمر ووقف جات بتنزل ومسك كفها:أنهار
لفت عليه قبل تفتح الباب ورفع انظاره لحليمه اللي نزلت وناظرتهم ورجع ناظر أنهار
:ماكنتي كذا أول جيّتك لهنا ، انتي وقفتي بوجيههم كلهم بدون تخافين عشان أبوك
سكتت تناظره وكمل بهاج:ليه صرتي تخافين وانتي معاي ؟
ماردت عليه وعقد حاجبينه بهاج:هذا يتهيأ لي والا هذا اللي حاصل فيك ، تترددين توقفين قدام خواتك وهم خواتك وتقولين لهم عنّا ! ليه ؟ وقفتي قدام الشيبه ثلاث مرات عشان ما يتزوج أبوك
اخذت نفس وناظرت حليمه اللي ما زالت واقفه عند السياره تنتظرهم ولفت عليه
:لان هالمره فيها قلبي بهاج ، لو احد قال عنك شي او حاربنا او ووقف بطريقنا قلبي بيتعب وخايفه يتعب وأنهلك
هزت راسها بالنفي:كانت فكرة زواجك موتي البطئ انا عشت سكرات موتي قلبي كان يحترق ، خفت اتكلم ويزيدوني عذاب
ظل يناظرها بتمعّن ومدت كفها لكفه وهي تناظره
:انا مو خايفه وانا جنبك انا خايفه علينا
مارد عليها ولفت تفتح الباب ونزلت من سيارته ومشت لحليمه اللي واقفه وتعدتها تدخل الملحق
شاف امه جايه له قفل سيارته ونزل منها وناظرته حليمه:شتقولون ؟
بهاج ناظر امه وعقد حاجبه:وش غيرك ؟ ليه صرتي كذا ؟
حليمه تكتفت:دامني اشوفك ماشي على عماك بطريق مسدود اكيد بتغير ، تراك باقي معطي وعد لعمك زيد
بهاج مارد عليها وتخطاها يمشي لبيته