انثنى غيم نجد لخد الحجاز النرجسيه

١٩

دقت الباب ولف يناظره ووقف ومشى وفتح الباب
ابتسمت حليمه:ابطيت ؟
دخلت وقفل الباب بهاج ومشى لين جلست وجلس قدامها
وناظرته حليمه:علامك ؟
بهاج:علامك انتي !
حليمه:شفيني ؟
بهاج:قايله شي لوحده من البنات ؟
حليمه سكتت ثواني وهزت راسها بالنفي:ما يودوني عشان اكلمهم
بهاج:لكنك تكلمت
تقدم لها يناظرها بحده:من عطاك الجرئه ذي ؟ عمر ووردتين ؟
تغيرت ملامح حليمه وهز راسه بهاج:خلاك تسمعين البنت كلام ما ودها تسمعه تكلمتي بتربيتهم واطباعهم وان بنات عمامهم احسن منهم وان اخوانهم ما يرضون عليهم !
عقدت حاجبينها:ماقلت
بهاج رجع ظهره:يعني تكلمتي
حليمه:انا تكلمت اي مع وحده منهم بس سولفت عادي ، شكت لك ؟
بهاج:لا ، وش قلتي ؟
حليمه:قلت ان ودي بشموخ لك وان اعمامك كلهم يدرون ان شموخ مردها لك
سكتت ثواني ورفعت حاجبينها:بس يمكن زعلها الكلام
عقد حاجبينه بهاج:ليه تقولين لها كذا ؟
حليمه:ليه وانا قلت شي غلط ؟
بهاج سكت وهو يناظرها بصدمه ونطقت حليمه وهي تناظر ملامحه:ان مافقت انت على الاقل تفوق هي طريق لبنات عمر مسدود
بهاج تقدم لها:بنات عمر خواتي
حليمه همست:ثنتين منهم
بهاج:لا يتهيأ لك شي
حليمه:ما تهيأ ! عيني شافت
بهاج تنهد ووقف بعصبيه ولف وعقد حاجبينه:ما كنتي كذا وش غيرك ؟ ماكنتي تقولين شي كيف صرتي كذا
حليمه ماردت وجلس جنبها بهاج:غيرك عمر ؟
حليمه لفت له:عمر نفس ما عطى بناته هالشخصيه بيعطيني اياها
بهاج:على ولدك
حليمه:ما قلت شي غلط !
بهاج:يكفي ما تصدقيني
حليمه:صدقت عيوني
بهاج:مو نفس اللي ببالك
حليمه هزت راسها:اتمنى ، بس فهمني كيف عرفت اني قلت شي يزعل البنت وليش زعلت ؟
بهاج سكت وكمل حليمه:مو هي اختك !
مارد بهاج ووقفت حليمه:لا جدك ولا اعمامك عاجبهم وضع التماشي هذي سوا ، ويكون بعلمك جدك نيته ماهي زينه لكم وكل المشاكل اللي صارت بين اعمامك سببها شي كلنا واقفين ضده
بهاج عقد حاجبينه:وش نيته ؟
حليمه:مو مهم تعرف لان عمر قفل الموضوع
بهاج وقف قدامها:علميني وش صاير ؟
حليمه:صار وانتهى بهاج لا تفتحه علينا من جديد ، عمر خرج مع عمك عبدالله والظاهر ان الموضوع انقفل وانتهى
بهاج زاد فضوله واخذت نفس حليمه:ما يتهيأ لي يابهاج شي انا رميت كلمه وفهمت اللي ابي افهمه
مشت لين الباب ولفت له:تصبح على خير
خرجت وقفلت الباب تاركه بهاج واقف محله
ظل يناظر محلها ويسترجع كلامها وصوتها براسه ويتذكر كلام أنهار عن خوات فهد واخت سلطان
هو فهم ان امه تكلمت عن اطباعهم لكن ردة فعلها كانت عليه هو لوحده
جلس على الكنبه وهو يتذكر نظراتها له وجيّتها لحوض النياق ومحاولاتها الكثيره تجاهه وانه يبعد صدوده عنها لانها تحس بالإنزعاج
نزل راسه بين كفوفه بتوتر يدري ان في شي قاعد يصير بين جده واعمامه يدور حوالينهم
يدري ان سكوت جده وراه نيه ما تطمن ، توتر من عرف ان في شي صار وهو يجهله وان عمر وانزعاجه وعصبيته ماهي الا على بناته
عض شفته بقوه واخذ جواله وهو يرسل لها
:اطلعي لي
ماردت عليه ودق عليها ينتظرها ترد
،
نورا ناظرتها منسدحه:طيب جوالك يدق
أنهار ماردت عليهم وناظرتها ريوف:بنخليك على راحتك بس بتتكلمين معانا بعد شوي
نورا لفت لجوالها اللي يدق:ردي على بهاج
أنهار اخذت جوالها بقوه منها:مالك شغل
نورا:شدخل بهاج تعصبين عليه ؟
أنهار:ممكن تخلوني لحالي ؟ لان لو ماتركتوني راح نتهاوش
رفعت راسها نورا لريوف وخرجوا من الغرفه
ناظرت جوالها والمكالمات ولا ردت عليه
قرت رسايله اللي مضمونها:عرفت انها امي ، اطلعي بتكلم معك
غمضت عيونها وتنهدت بغضب وردت عليه
:ما ابغى
هز رجله بعصبيه:تبين لاني ما اشاورك ان ما طلعتي بدخل الملحق وباللعنه
ماردت عليه وهي تناظر رسالته وارسل رساله اخيره
:ممر النوير
قفلت جوالها بنرفزه من أوامره ووقفت وهي تاخذ عبايتها لبستها وخرجت
لفوا عليها وناظرتها ريوف وضحكت:عرف لك بهاج !
ناظرتها أنهار بعصبيه ومشت وخرجت من البيت مشت لممر النوير بعصبيه وهي متكتفه ومن دخلت بالظلمه هدت خطواتها وهمست:بهاج
مشت بهدوء تحاول تلمحه لكنها وصلت للمستودع ولفت خلفها تدوره ونطقت:بهاج !
فتح باب المستودع والتفتت بخوف وخرج وهو يترك الباب مفتوح وبانت ملامحه من نور المستودع
مشى لين عندها واخذت نفس وهي توقف محلها
وقف قدامها وهو يناظرها وصدت بوجهها عنه
بهاج:ليه تضايقتي ؟
أنهار بلعت ريقها والتفتت له:عشانها لمحت عني بشي غلط
بهاج:يعني كل زعلك من امي ماهو من فهد !
أنهار:وفهد سمعت اللي يقوله ؟
تجاهل موضوع فهد ونطق :وش لمحت امي ؟
أنهار:امك توقف قدامي تقول ان ولدها عينه على بنت عمه شموخ وان شموخ مصيرها له تتوقع ليه ؟ تهمها فرحتي ؟
بهاج ميل شفايفه:يمكن
أنهار:امك تشوفني انا وخواتي خطر عليك وعلى سلطان وفهد ، سوري صراحه ما عرفت ان كل واحد فيكم بيتزوج من بنات عمه والا ما شكلنا خطر على شموخ وغيرها
بهاج:تدرين انها خرابيط بمخك بس صح ؟
أنهار:صح انا مخربطه أخ بهاج ، والا مو انت اخوي ؟
بهاج ظل يراقب انفعالها وكملت أنهار:ما يحتاج امك تذكرني كل دقيقه انك اخونا
بهاج:تحتاجين تتذكرين اني اخوك ؟
أنهار سكتت وراقبت نظراته لها وكمل بهاج
:ما تجيك لحظات تنسين !
أنهار:انت جايبني لهنا غصب عني عشان تقول ان اللي ببالي خرابيط بس ؟ اوكيه فهمت
مشت بتروح وسحبها بقوه يوقفها قدامه
ناظرت نظراته لها ومسكة ذراعها بقوه من كفه واحتدت ملامحها وهمست وعينها بعينه
:الأصح انت اللي تنسى دايم انا من اكون
لانت ملامحه وكملت وهي تناظره من قريب ونطقت بهدوء:ليش نظراتك لي غير عن خواتي ؟
فلت ذراعها ووقف بإعتدال ووقفت قدامه أنهار
:مو يمكن امك تقول كذا لانها شافت ولدها !
بهاج ما تحرك وهو يراقبها
وناظرت عيونه اللي تراقبها وهمست:ولا عمرك شفت نورا وريوف بهالنظرات
سكتت ثواني وهمست:اذا كان صدودك عني بهذيك الفتره عشان شموخ ما تتغير مكانتها فأنا اسفه اني مافهمتك
تقدم لها وعقد حاجبينها:من شموخ ومن هم ؟ انتي صاحيه ؟
أنهار:بتشككني بعقلي عشان قلت الصح !
بهاج:يمين بالله انها فكره بمخ أمي ما طرت على بهاج حتى
أنهار:صدقني ما يهمني
بهاج سكت وكملت أنهار:انا اندفعت مني الخطأ ، ما سمحت للحدود اللي بينك وبين خواتي تكون بيني وبينك ، بلزم حدودي من اليوم ورايح
بهاج انقبض صدره وهو يناظرها وتقدم لها ونطق بنفس نبرته اللي تعرفها وتميزها:قدني غرقت
سكتت وهي تناظره وتلمح بنبرة صوته الاستسلام
أنهار بلعت ريقها وهي تناظر نظراته لها وبخوف همست:تكفى
بهاج:واقف قدامك معترف بالهزيمه لا همني إنسي ولا جني
أنهار هزت راسها بالنفي بتكرار ومشت تاركته
رفع انظاره عليها وهي راجعه مع ممر النوير وانقبض قلبه وشد على كفه وبلع ريقه وهو يتذكر انه تجاهل كلام سلطان
يوم فرّق بسبعين فرق بينه وبينها وقال انها مستحيل تنتبه لك مستحيل تلاحظك وتفكر فيك نفس ما يفكر فيها ، هي من لبّ الحجاز وهو مطرّف بنجد
هي يسكنها الغرور بنفسها وتمتلكها النرجسيه وهو ما يسكنه غير الخوف والجبن
التفت وهو يشد على فكه ويناظر المستودع خلفه هو يحلف يمين ان لو كان بجيبه ولاعه بيحرق المكان كله ويخليه رماد لكن من حظ جده ان جيبه فارغ
،
مشت مع الممر تسابق خطواتها بخوف من الظلمه والرياح ومشاعرها اللي تلخبطت وتوترت
ركضت للملحق ودخلت وقفلت الباب خلفها واخذت نفس بربكه كيف تبدلت نظراته لها ونبرة صوته كل اللي يمر ببالها شكله بكل مره شافته
ابتساماته نظراته ولفتاته وجلوسها جنبه ببيته تجنبه لها وتميزها عنده بين خواتها
تذكرت انها هنا عشان تحارب موضوع ابوها وزواجه وعيشتهم هنا ، ورعبها لو تعيش شي يخليها هنا
عضت شفتها وهي تتذكر حليمه وكلامها وانها فاهمه وشايفه ولا ودها
هي الفكره براسها تنفر منها ولا ودها تصير حقيقه ابد
،
عاقد حاجبينه ومتكي بظهره في مكان خالي من أي احد نزل كفه لدخانه جنبه وشغل زيقاره ورجع كفه خلف راسه وهو يناظر السماء
التفت وهو يسمع فهد يناديه ومشى لين عنده فهد
:ياخي ليه ماترد على جوالك ؟ خليتني أفرّ المزرعه كلها
بهاج صد عنه وهو ينفث زيقارته:شتبي ؟
فهد:جدي يبينا كلنا على العشاء
بهاج:ماني جاي
فهد:والله بتسوي عنيد وما بتجي بيلعن سابع خيّر لك
بهاج رفع راسه:شيبي فينا ؟ اشتاق لهوشاته ؟
فهد:عنده موضوع يقول
بهاج سكت وهو يتذكر كلام امه عن نيّة جده واعمامه وهز راسه
فهد:اذا رايح للبيت مرّ الملحق قول للبنات ظني عمي قالهم بس ما بيجون
بهاج:لا يجون اذا ما يبون !
فهد:جدي يبيهم
بهاج وقف ورمى زيقارته:جدك وراه بلاء
فهد:والله كشرته لين اذنه مستانس
بهاج ناظر فهد ورفع حاجبينه فهد ومشى
مشى بهاج ورفع انظاره من قرب للملحق وزادت ضيقة صدره وعقد حاجبينه ونزل راسه لخطواته
اخذ نفس يستجمع نفسه ووقف عند الباب ودقه
صد للخلف وعض شفته من انفتح الباب
:هلا بهاج
التفت من سمع نبرة صوت ريوف وتنهد براحه من ناظرها تطل من الباب
بهاج:امي عندكم ؟
ريوف:لا
بهاج:زين ، بتجون للعشاء ؟
ريوف:محد بيجي اكيد
بهاج:لا بتجون قولي لخواتك لان بتصير مشكله لو ماجيتم ، كلها لقمتين وقوموا
ريوف:والله بهاج ما اتوقع حتى أنهار منفسه علينا ما اتوقع
سكت بهاج ثواني ورفع كفه:ضروري اقنعيهم
ريوف:بجرب اذا ما اقتنعوا بكلمك تجي تكلمهم
بهاج:لا فكيني انا انتي لا تقصرين
هزت راسها ريوف ومشى بهاج للبيت فتحه ودخل
،
عمر دخل عليهم وناظرهم جالسين:ما قلت اطلعوا ؟
نورا رفعت راسها:بناكل هنا
عمر:بناكل برا قايل من العصر ومعطيكم خبر
ريوف:بس احنا ما نبغى
عمر:ما اشاوركم ، البسوا والحقوني
تنهدت أنهار ولفت تناظره واقف ووقفت ومشت من جنبه للحمام
خرج عمر وانتظرهم عند الباب شد على كفه وهو يتذكر كلام عبدالله له وإقناعه
التفت من خرجوا ومشى ومشوا خلفه للدكه
دخلت وهي تناظرهم جالسين كلهم وناظرت فهد وسلطان اللي جالسين قدامهم ودورت بنظراتها عليه ومالقته
جلست جنب خواتها واخذت نفس بضيق وهي تسمع سواليف جمعه وحريم اعمامها هي ماتطيق القعده ابد معهم واليوم زايده ضيقتها عليها من يوم صحت
لفت نورا وهمست:بهاج جا
التفتت وناظرته جاي شماغه على راسه وعقاله ومتجهه لهم من بعيد
رفع انظاره وهو يلمحها قاعده على طرف الدكه مع خواتها مشى وهو يرفع شماغه على راسه ودخل
:سلام عليكم
نزلت انظارها من مرّ من عندهم يدخل ويجلس جنب سلطان وفهد
رَده:زين شفناك
بهاج مارد وهو يناظرهم متجمعين
جمعه:زين ما سوى جدك خلانا نشوفكم
نزل انظاره من صب له قهوه فهد واخذها من يمينه
وابتسم رَده:ما تجمعتم الا على خير
رفع انظاره من لف رَده يضرب فخذ عمر وهو مبتسم:عطنا العلم يا ابو سلطان
زيد ابتسم:انت الراس الكبير وصاحب الفكره ما نتقدم عليك
رَده التفت للعيال الثلاث اللي قدامه ورفع سبباته
: واحد اثنين ثلاث
عقدوا حاجبينهم من لف بنفس السبابه يغير اتجاهها للبنات ويكمل:لوحده وثنتين وثلاثه
تبدلت ملامحهم واعتدل بجلسته بهاج
ناظروا بعض بتكرار ينتظرون يفهمون اللي سواه رَده
وبلع ريقه عمر وهو يناظر بناته يناظرونه
رَده:دامكم متفاهمين وتقعدون سوا تسمرون قلنا نمنع الشيطان عنكم