انثنى غيم نجد لخد الحجاز النرجسيه

٥٣

فتح جواله بنعاس وهو يسمع المحاضره وناظر مكالمة ابراهيم
عقد حجاجه واعتدل بجلسته ودق عليه وهو يناظر لابتوبه
رد ابراهيم:هلا ابو سعود
ابتسم بهاج:ياهلا ارحب
ابراهيم:مبطي عنا ناسينا ؟
بهاج ضحك:فهد عندك ماني بعيد
ابراهيم:عز الله شاد حيله ولد عمك ماهو هيّن
بهاج ابتسم:حمدلله
ابراهيم:تقدر تمرني ؟
بهاج:متى ؟
ابراهيم:قريب الليله اذا تقدر او بكره
بهاج:ليه ؟
ابراهيم:شغل يابهاج شغل
بهاج:طيب اشوف اموري واكلمك
ابراهيم:تم انتظرك
قفل بهاج وناظر اللابتوب يكمل محاضرته
خرجت أنهار وناظرت عمر وحليمه بالصاله ومشت داخله الحمام
عمر:بنت
لفت عليه وناظرته ورفع عيونه لها:نادي اختك وتعالي
أنهار عقدت حاجبينها:اش فيه ؟
عمر:صحيها وامشي اقعدي
سكتت تناظر حليمه اللي جالسه جنبه ورجعت للغرفه وناظرت نورا على جوالها:صحيتي ؟
رفعت راسها نورا وهزت راسها
أنهار:يبينا بالصاله ما اعرف شعنده
عقدت حاجبها نورا وجلست:بسم الله
أنهار:قومي
خرجت أنهار ودخلت الحمام غسلت ورفعت شعرها وخرجت له وجلست:صاير شي ؟
مشت نورا وجلست جنب أنهار ورفع عيونه عمر بحده
:من حرق مستودع ابوي ؟
بلعت ريقها أنهار وبدلت نظرها لحليمه اللي جنبه
وعقدت حاجبها نورا:تسألنا ليش ؟
عمر رفع صوته:جاوبي
نورا:صار لك شي هذا الصباح ؟ ليش تسألنا مين حرقه ؟
عمر:لانكم حارقينه انتم
سكتت أنهار تناظر غضبه ووقفت نورا
:هذا كلام مين كلام زوجتك ؟
عمر وقف يناظرها بحده:حرقتوه جميع ماودكم تتركون المكان ؟
نورا هزت راسها بأسف:ما ادري شقول
تقدم عمر من جربت تروح ومسكها من ذراعها بقوه ووقفت أنهار بخوف من صرخت بألم نورا
وقفت حليمه بخوف تناظر غضبه وتقدمت أنهار تبعده:فكها
عمر ناظر نورا بحده:ماخلصت كلامي
أنهار دفته من صدره:بعد عنها
رفعت نظرها لعيونه اللي تمتلي بالنيران وتتلون بالأحمر تعكس غضبه وغلّه ورجفت بخوف تحط نورا خلف ظهرها
عمر رفع صوته بعلو صوته صرخ عليهم:انتم حرقتوه حرقتم مستودع ابوي
نورا ناظرت غضبه وصراخه:محد حرقه مو إحنا افهم
مسكت كتفه حليمه تبعده بخوف:عمر تعوذ من الشيطان
رفع ذراعينه يسحب نورا من خلف أنهار وصرخت تبعده وتقدمت أنهار بينهم وضربها بكفه على وجهها وصرخت تبتعد عنه وتشوفه يضرب نورا
رفعت صوتها حليمه:عمر تعوذ من الشيطان
تقدمت أنهار تبكي وتصرخ بخوف كان يضربهم ثنتينهم شدها من شعرها يرميها على الطاوله ويرجع لنورا يضربها كان شخص اخر يضربهم كان يحمل قوتين كان يتكلم بعلو صوته بغضب كأنه معمي
بكت وهي تبعده عنهم وتصرخ ورفعت انظارها نورا من طاح بالارض
جمدت ملامحهم ودموعهم وشافوه يفقد وعيه قدام عيونهم
جلست حليمه بالارض من شافته طايح ودق الباب بقوه سلطان يناديهم:افتحوا وش صاير
كانت ترجف وتشوف يد نورا اللي متمسكه فيها وتناظره طايح بالارض مغشي عليه وجهه مسوّد
'
ركض من اصواتهم ومن شاف عمامه متجمعين كان صراخهم يوصله
وقف دمه بخوف وهو يركض لهم وشاف سلطان يدق الباب وتقدم ومسكه زيد:اصبر اصبر
دفعه يدق الباب برجله ومسكه سلطان:لا تدخل
بهاج لف عليه وصرخ:وخر قلت
تقدم عبدالله:يابهاج اصبر اصبر خلنا نعرف وش صاير ، يا ام بهاج افتحي افتحي
سلطان دفع بهاج بحده:وخر بهاج
مسكه زيد يمنعه:بهاج لا تدخل خلنا ندخل اصبر
كان يسمع امه تنادي عمر بخوف وتصرخ ومعد سمع للبنات صوت وتقدم بكتفه يبي يكسره وشد ذراعه سلطان جنبه وكسروه سوا
ودخل بهاج يناظر عمر اللي طايح وحليمه عنده والبنات قدامهم
دخلوا عبدالله وزيد لعمر يشيلونه وينادونه ورفع نظره عليهم كانوا مضروبين كانوا يبكون ويرجفون بزاويه
سلطان عقد حاجبينه يناظرهم:اعوذ بالله وش صار ؟
تقدم بهاج يدخل وسط البيت ورفعت راسها حليمه تناظره التفت يناظرها هو فهم نظراتها فهم ان انتهى زواجها من لحظة مادخل بهاج هالبيت وتوسطه
بكت وهي تشوفه واقف كان ودها تركض له لكن رجلينها ما تشيلها من خوفها وفزعها من صراخه وضربه من تحوله لشخص ثاني
والتفت بهاج يناظرها تناظره وهمس:أنهار
مشى لها ورفعت ذراعينه تحضنه وبكت التفت يناظرهم يشيلون عمر على الكنبه ولف لنورا اللي واقفه تناظرهم وهي ترجف ومسك ذراع نورا له يشدها توقف جنبه
لفت نورا تناظر أنهار تبكي بحضن بهاج ونزل نظره بهاج ليد نورا يناظر أثار ضربه عليها ورجع يناظرها
وهمس:امشي معي تعالي
نزل كفه يمسك كف نورا وبذراعه الثانيه يحاوط أنهار وخرج من البيت معهم
فتح باب بيته ودخلوا وجلسها وجلست نورا جنبها
ناظرهم بصدمه ورفع شعرها اللي تناثر على وجهها
:وش صار ؟
نورا هزت راسها بالنفي بتكرار تناظره وبدل نظره بين أنهار اللي تغرق ببكاها وبين نورا اللي ترجف بدون رد
دخل سلطان والتفت بهاج عليه يناظره بذهول
:وش صار ؟
سلطان ناظر اشكال البنات مصدوم ومارد
بهاج لف لأنهار:أنهار ابوي كلميني انا بهاج علميني وش صار ليه ضربكم ؟ ليه تصرخون ؟
ماردت وهي تشهق ببكاها ولف لنورا:نورا وش العلم ؟ كلميني يرحم والديك
كانت تهز راسها بتكرار ودموعها تنزل ووجهها جامد
تقدم سلطان لها وانحنى يناظرها:بنت نورا
كانت على حالها لين تقدم سلطان يهز وجهها بقوه يوعيها:نورا
بكت من هزها بقوه ومد ذراعه من تمسكت فيه تبكي على ذراعه
ومسك راسه بهاج يجلس قدامهم يناظرهم يبكون هو مصدوم هو سمع صراخهم من مكانه من وسط محاضراته خرج مفزوع خايف مايدري كيف بدأ الموضوع وليه ضربهم ليه
وقف بهاج:اقعد عندهم
سلطان:وين بتروح ؟
خرج بهاج ومشى للملحق ودخل يشوف عمر فاق وعمامه عنده والتفتت حليمه تناظره يدخل
رفع راسه عمر وعقد حاجبينه يناظره ناظره بهاج
:ليه تضربهم ؟ ليه تمد يدك عليعن ؟
مارد عمر وهو ماسك راسه ومتعرق ولفت حليمه عليه:دخلت ؟
بهاج ناظرها:دخلت ولا عاده يهمني ولا ابي امي تقعد مع واحد يمدّ يده على بناته
التفت لعمر:ليه تضربهم ليه ؟
زيد؛بهاج اصبر نفهم منه توّه يفوق ، اهدأ
تقدم بهاج ومسكه من ياقته وابعدوه وناظره بغضب يصرخ عليه:بكسر ذراعك والله لاكسرها
كان يناظر بهاج بتعب وبثقل ولاهو قادر يرد عليه
بكت حليمه ومسكت راسها مستصيبه تسمع صراخ بهاج عليه
لهث من غضبه بهاج وتنفس بسرعه يبعد عمامه
:انسى تشوفهم والا تعرف مكانهم انسى
خرج من الملحق تارك عمامه ينادونه والتفت يشوف جمعه تخرج مع رَده اللي وقف على حيله بصعوبه وتعداه ودخل
مشى لغرفته ياخذ اغراضه وسحب الشنطه من فوق والتفت سلطان عليه يناظره:وش بتسوي ؟
بهاج:بترك المكان واخذهم معي
سلطان لف لنورا اللي متمسكه بذراعه ورجع ناظر بهاج اللي خرج وشنطته بيده وتقدم لأنهار
:ابوي أنهار كلميني
ماردت عليه وهي تبكي وحط شنطته وانحنى لها
:بنروح بنروح سوا بس اهدي
لف لسلطان:جيب اغراضهم وتعال سيارتي
لف سلطان يناظر ذراعه اللي متمسكه فيه ماهان يتركها ويبعد ذراعه لكنه شالها ومشى يخرج
ناظر زيد اللي تقدم له:وين بهاج ؟
سلطان:داخل
تعداه ودخل زيد وناظره بهاج ووقف ومشى له تقدم ورجع بخطواته لورا زيد وقفل الباب بهاج
:ماتكلم ؟
زيد؛ماهو بوعيه مدري وش بلاه
بهاج:خله ببلاه اجل
زيد:دخلت الملحق وهو مطلق ثلاث على امك
لف بهاج:باللعنه
زيد:بهاج !
بهاج:ماهو فارق عندي ماشفت حال بناته ؟ انت شفت كيف معورهم ؟ هذا بعقله ؟ حتى امي ماهي قاعده عنده
زيد:جدك تعبان لا تزيده ينجلط علينا
بهاج:قلت لك ماهي فارقه ياعمي
ناظر سلطان يخرج ومعه اغراضهم ولف لعمه:انا ماشي
دخل بهاج وانحنى لأنهار:قومي معي قومي بنمشي
وقفت جنبه واستندت عليه تبكي ومد ذراعه لنورا اللي ناظرته وهي تبكي وتمسكت بذراعه ووقفت جنبه
حاوطهم بذراعينه وخرج معهم وناظرهم زيد وعقد حاجبينه:لا حول ولا قوة الا بالله وش جاه عليهم هالبنات
ناظرهم سلطان يركبون مع بهاج واخذ نفس بغضب ولف لابوه:هذا ماهو صاحي
زيد:مابغيت اقول لبهاج لكن ظنتي ماهو بعقله ما يذكر شي
سلطان عقد حاجبينه:بغى يذبحهم ولا يذكر ؟ يستهبل؟
زيد:اسكت عمك شكل فيه بلاء ماهو صاحي
سلطان صد يناظر الملحق من مكانه
'
مشى بطريقه وهو يلف يناظرها جنبه ونورا بالخلف غافيه
التفت يشوفها ساهيه وساكته وهاديه تناظر الطريق ونزل نظره لذراعها اللي يشتعل من إحمراره
ومد كفه لكفها ولا لفت عليه تناظر الطريق هي انغمرت بحالة لاوعي من الصدمه والرعب اللي عاشته
شد على كفها ولف للطريق يناظره تارك المزرعه ودربهم وراه وماشي لبيته بالرياض
وقف عند البيت ولف عليها:أنهار
ماردت عليه وتقدم لها:يا أبوي وصلنا هذانا عند بيتنا
لفت تناظر البيت بهدوء وتنهد بهاج ولف لنورا اللي نايمه ومد ذراعه:نورا
فتحت عينها وجلست وهي تتلفت حوالينها وتكلم بهدوء:انزلي
نزل من سيارته وفتح الباب لنورا ومسك ذراعها يسندها وقفل الباب ماشي لأنهار وفتح الباب ونزلت
رفع ذراعه يحضنها لصدره وفتح الباب ودخلوا معاه
مشت أنهار وجلست على الكنبه ومسكت راسها تبكي بدون صوت وتقدمت نورا تناظر البيت ولفت عليه:وين هذا ؟
بهاج اخذ نفس:ارتاحي تعالي اجلسي
جلس قدامهم وناظرهم:وش صار علموني حكوني
رفعت راسها وهي تبكي وتهز رجلينها
وبلعت ريقها نورا:ضربنا
عض شفته بهاج وهو يناظرهم وهزت راسها بالنفي نورا:ضربنا كان بيذبحنا كان وده نموت
أنهار:مو هو مو هو
لف عليها وبكت:مو هو هذا مو هو مو هو اللي ضربنا انا شفته قدامي ما اعرفه
نورا:اول مره بحياتي اشوفه
بهاج:ليه ضربكم ؟
أنهار رفعت عيونها عليه:قال اننا حرقنا المستودع وضرب نورا قدام عيني ضربها جيت ببعد نورا ضربني معها
رفعت يدينها اللي ترجف لشعرها توصف له
:مسكني من شعري
نورا بكت بعلو صوتها من تذكرت كل شي ووقف بهاج لهم وجلس وسطهم واخذ نفس
نورا لفت عليه:خايفه بهاج
هز راسه بالنفي:لا تخافين هذاني عندكم ولوحدكم
لف لأنهار اللي تبكي وتهز رجلينها ومسك كفها:ادخلي نامي ادخلي أنهار
هزت راسها بالنفي ولف لنورا:امشي معي
وقفت نورا وبلعت ريقها ومسكها من كتوفها بهاج يمشي معها وفتح الغرفه لها ودخلت تناظرها
بهاج:تعالي نورا
جلست على السرير وناظرها بهاج:تعوذي من الشيطان ونامي هنا انا موجود ماني بعيد
بكت تناظره وناظر دموعها:لا تبكين تكفين
نورا:صوته اسمع صراخه كأنه موجود
بهاج تنهد وجلس على رجلينه قدامها:لاتفكرين بشي الحين ارتاحي غمضي عيونك ونامي
هزت نفسها بتوتر ومسك كفوفها بهاج:نورا تكفين لا تسوين فيني كذا ، تحرقيني عليكم
نورا ماردت وهي تبكي ووقف بهاج يفتح اللحاف لها:ارتاحي
انسدحت وغطاها بهاج:انا عندك ماني بعيد
ناظرها تغمض عيونها وهي تبكي واخذ نفس يخرج من الغرفه ومشى للصاله
ناظر أنهار محلها وتقدم لها جلس جنبها واخذها لحضنه ومسح على شعرها:اسم الله عليك اسم الله على روحي لا يجيك شي تكفين
ماردت وهي تبكي:كل شي يعورني
بهاج:الله يجعله فيني
شهقت وشد عليها وهو يمسح على ظهرها
مصدوم مايدري وش يقول وش يعذره وش يفهم منه مذهول اكثر منهم نزل انطاره لذراعها ورفع راسه يبوس راسها ويسمع بكاها وعاقد حجاجه من همّه
الهم اللي توسطه مايعرف علاجه ودواه يذكر اشكالهم بزاويه يحضنون بعض وبمكان عمر طايح بالارض مغشي عليه وبمكان نظرات امه له
نزل انطاره يشوفها مغمضه عيونها تشهق بخوف وترجف بوسط حضنه ومسح على شعرها
نزل راسه يبوس شعرها وهمس:انا جنبك
ماردت عليه وتنهد بمحله يسمع صوت انفاسها وهدوئها بحضنه
-
كانت تناظر السقف ساكنه كل اللي يتكرر هو صدى صوته صراخه وضربه ونظراته وغضبه
غمضت عيونها تسمح لدموعها تنزل بإنسيابه ورجعت تفتح عينها
كيف قدر ؟ كيف هانت عليه ؟ يضربهم ؟
مستحيل يكون نفس الشخص ومستحيل يكون تغير فجأه عليهم مستحيل تقدر تسامحه
مستحيل تنسى كيف من أول غلطه غلطها ورفض حب حياتها الأول لليوم هذا
لليوم اللي تورمت ذراعينها من ضربه لها ، مدّ يده لأول مره عليهم اثنينهم
عقدت حاجبينها تتذكر كيف طاح مغشي عليه فجأه بشكل يخوف
وكيف لفت تناظر بهاج يتقدم لهم وتفجر الرعب بقلبها ولجأت له
تتذكر شكل أنهار بجانبها وكيف دخلت بموجة بكاء طويله ماخرجت منها
لفت من تذكرت أنهار وناظرت الغرفه فارغه وقامت
وقفت على رجولها تخرج من الغرفه تمشي بخطوات تايهه بالبيت الغريب عليها
لين وقفت عند الصاله تلمحهم من بعيد من محلها
كانت بحضن بهاج محاوطها بذراعينه وراسها على صدره ومتمسكه فيه بشده
كانت تشوفه يبوس راسها ويمسح عليها ظلت تناظرهم لثواني طويله طويله تركت الدقايق تمرّ وهي واقفه
تناظر أنهار بحضن بهاج رمشت بهدوء تكركب تفكيرها وتناظرهم سوا لأول مره ، لأول مره تشوفهم بهذا القرب ماكانت تشوف أنهار زايده عند بهاج ولا غير عنها وعن ريوف
لكن اليوم بهاج تارك الجميع وماخذها بحضنه هي وهي تتوسط حضنه وكأنها متعوده عليه ، كأنها اعتادت الحنيّه منه كأنها تعرف الملجأ اللي تلجأ له
هزت راسها بهدوء بالنفي من الكمّ الهائل من الأفكار وكركبة مشاعرها اللي اجتحاتها ورجعت للغرفه ودخلت
'
نزل نظره عليها:أنهار
رفعت راسها له وناظرته وتكلم بهدوء:تقومين ؟
سكنت ثواني وقامت من حضنه تجلس ناظرها وهو ماسك كتوفها:تدخلين تنامين جنب نورا ؟
أنهار لفت عليه:وين بتروح ؟
بهاج:بجيك والله ما اخليك بس ارتاحي ونامي ، بجيب شي تاكلونه وارجع
أنهار ناظرته بدموعها:خايفه
تقدم وباس جبينها وقرب منها يناظرها وهمس وعينه بعيونها:عسى الله يسبق موتي قبل أخليك ، ماني مخليك انتي هنا في بيتنا
أنهار نزلت نظرها لكفه اللي يمسك كفها
بهاج:بجيك وعد أجيك لكن ادخلي نامي ارتاحي جنب اختك
لفت عليه تناظره وهز راسه يطمنها ووقفت
قامت معه ومشى يدخل الغرفه ناظر نورا منسدحه وتقدم مع أنهار وانسدحت وغطاها
ناظر نورا نايمه جنبها وقرب من أنهار وهمس
:بجيك
هزت راسها بهدوء له وناظرها لثواني وتنهد وخرج
اخذ جواله من جيبه وهو خارج من البيت
وركب سيارته ورد عليه سلطان:هلا
بهاج:وش العلم ؟
سلطان:مدري والله لكن شكله ماهو بوعيه
بهاج:وش نطق ؟ وش قال ؟
سلطان:مايذكر شي
بهاج رفع حاجبه:مايذكر ؟ يضحك على من ذا ؟ يضحك على من ؟
نطق بعصبيه:اقسم بالله لأحرق أراضيه أحرقها ، وأكسر اليد اللي تنمد على وحده منهم
سلطان:وينهم ؟
بهاج:عندي
اخذ نفس سلطان وشغل سيارته بهاج
:وامي ؟
سلطان:ماهي عنده هي ببيتك
غمض عيونه من تذكرها وتنهد:من وين تتصلح ياسلطان
سلطان:هونها وتهون كل شي خير
بهاج:ابيك تدخل تاخذ ملابسهم واغراضهم وتجيبها لي لاني ان جيت ماني راجع الا بدمه
سلطان:طيب لا تجي انت وريحنا
بهاج:لا يوصل علم لفهد
سلطان:ظنتي وصله دام عمامك وحريمهم يدرون
تأفف بهاج:بمرّه اشوف
سلطان:طيب ان احتجت شي كلمني
بهاج هز راسه وقفل جواله وحرك سيارته
'
واقفه في الباركنق لابسه نظارتها الشمسيه وتناظر الساعه بجوالها بعصبيه:ويقول ما بشتري لك سياره
لفت من تقدمت سيارته وفتح الشباك:وش هالصاروخ اللي بظهر ربي
رفعت حاجبها تناظره يرقع تأخيره وابتسم فهد
:اجبري بخاطر مهتوي وقولي انك مانتي مرتبطه
ريوف تكتفت وهي تناظره وكمل فهد
:كان من يكون اقسم بالله محظوظ وش هالزين
تقدمت وفتحت الباب وشال شماغه اللي على المقعده:ارحبي ، مره وحده تركبين معي ؟ اثاريني مزيون
لفت عليه ونزلت نظارتها وتكى بكفه تحت دقنه
:وش سوت فينا العيون السود !
ريوف:وكأنك مو مسوي شي صح ؟ والمفروض انا الحين ادوخ من الوناسه والكذب حقك وانسى الساعتين اللي انتظرتك فيها
تنهد ولف للطريق وحرك:ياليل ما بنخلص من النكد
ريوف:تستاهل كم مره قلت لك جيب لي سياره وفكنا من هذا التأخير كله بس ماتفهم
فهد:تسوقين لوحدك لا
ريوف:لا تقول غيور بس لان مع شمس الظهريه هذي بتخليني اضحك
فهد التفت عليها ورفع حاجبه:اهجدي
ريوف:شليويح ما بقفل الموضوع بس بسكت الان لاني تعبانه ومصدعه
فهد مارد وهو يناظر الطريق وهمست ريوف
:والبجيح مقفل جواله كمان !
فهد طلع جواله من جببه ورماه بحضنها:طافي طافي فكينا
ناظرته بحده ورمت عليه جواله:ماعندك شي اسمه شاحن ؟ فقير نسلفك
مارد عليها وهو معصب واخذ الشاحن من السياره وشبك جواله وحطه بحضنه
ريوف همست بهدوء:ابغى غداء
لف عليها وناظرته:خير ؟ قول لا كمان !
فهد:سوي بالبيت ليه ماتسوين
ريوف:لاني تعبانه برجع انام
فهد تنهد واشرت له على المطعم ووقف ولفت عليه:ريحنا انا بطلب
ناظرها تنزل من السياره ونزل انظاره لجواله وفتحه
ناظر مكالمات ابوه وامه وخواته وعقد حاجبه وهمس
:اعوذ بالله
دق على امه ينتظرها ترد وعينه على ريوف اللي بالمطعم وردت:وينك انت ؟
فهد:وش صاير ؟ كلكم داقين ؟
عزه:اسكت لو تدري وش صار
فهد:بسم الله وش العلم
عزه:عمك ضارب بناته الثنتين صراخهم وصل لاخر المزرعه
عقد حاجبه فهد بصدمه:اسألك بالله
عزه:قام بهاج كسر باب الملحق كسره كسره الباب ما ينقفل للحين دخل الملحق عليهم وعلى امه
فهد ظل مذهول يسمعها وكملت عزه
:واخذ البنات وخرج مدري وين اخذهم والحين حليمه قافله على نفسها ببيته ، معلوم دخل الملحق وعمر مطلق بالثلاث !
فهد:لا حول ولا قوة الا بالله وش جاه ؟
عزه:علمي علمك وابوك مكتّم ما يبي يقول حتى انا قاعدين مع عمر جميع ولا ادري وش العلم
فهد:طيب بكلم بهاج انا
عزه:وعلمني وينهم فيه
فهد:طيب طيب
نزل راسه يدور رقم بهاج ورفع عينه يشوف ريوف بالمطعم واخذ نفس من رد بهاج:دريت اكيد
فهد:وش العلم يارجال ؟
بهاج؛ضربهم يافهد ضربهم عسى ايده تشلّ
فهد:ليه ليه طيب وش جاه ؟
بهاج وهو يسوق:مدري مدري لكني محترق اقسم بالله محترق
فهد ناظر ريوف اللي جايه بالأكل وبلع ريقه:طيب بكلمك اذا كنت لوحدي
بهاج:طيب
قفل جواله وركبت ريوف:جبت لك برقر لحم لان معدتك متعوده على الشحوم حقتكم
حطت الاكياس بالخلف ولفت عليه تنزل نظارتها
:اشبك مصنم ؟
فهد:ولاشي بحرك
لف وحرك وهو هادي والتفت يشوفها على جوالها وبلع ريقه ورجع ناظر الطريق ووقف عند الشقه
شافها تاخذ الاكل وتنزل وهو ناوي
ناوي انها تاكل وترتاح وبعدها يقولها يكلمها يبيها تشبع لانها بتتعب لو عرفت بتنهار لو درت
بتترك اللي وراها ودونها وتركض لخواتها وابوها ومشاكلهم
ظل يراقبها تاكل بالصاله وترفع شعرها عن وجهها وتراقب التلفزيون ورجع يناظر اكله اللي قدامه
لفت عليه من خلصت:لك ساعه تطالع فيني اشبك ؟
فهد:شبعتي ؟
هزت راسها:كنت ناوي تكمل على وجبتي كمان؟
فهد اخذ نفس:اسمعي
لفت عليه ولانت ملامحها من شافت وجهه تغير
:اشبك !
فهد:خواتك بالرياض هنا
عقدت حاجبينها:وين هنا ؟
فهد:بهاج جابهم لهنا مدري وين جالسين بس انهم تركوا مزرعة الشيبه
تقدمت له:ليش ؟
فهد:ابوك تعرفينه طفشهم وزعلوا خواتك دلوعات قام بهاج اخذهم للرياض
ريوف:فهد ! قول الصدق اشبهم ؟
فهد:هذا الصدق وقلت لك بعد ما تاكلين عشان تشبعين
ريوف:بتاخذني لهم اشوفهم
فهد هز راسه واشر على خشمه:على خشمي
مشت تدخل الغرفه تاخذ عبايتها واخذ جواله فهد يرسل لبهاج:جايين