انثنى غيم نجد لخد الحجاز النرجسيه

٥٥

دخل المطبخ يسمع اصواتهم وشافهم بالمطبخ ونورا عند الثلاجه
لفت أنهار عليه:ازعجناك ؟
هز راسه بالنفي ورفعت راسها نورا:كويس صحيت نفطر سوا
بهاج:ريوف متى تخلص دوامها ؟
أنهار:ليش؟
بهاج:نمرها ونروح نشوف لنا اغراض
نورا ناظرته:منجد ناوي تشتري اثاث ؟
هز راسه بهاج ولفت نورا لأنهار اللي تناظره:لا تضغط نفسك
بهاج:مو مضغوط بسعه
نورا:طيب ليش اليوم ؟
بهاج:عشان ودي انام بسريري نومة الكنب بتكسر ظهري
أنهار اخذت نفس ولفت نورا عليها:بكلمها واشوف متى تخلص
حطت الجبنه على الرخام وخرجت تاركتهم
ناظرته أنهار:ومتى بتروح لهم ؟
بهاج:العصر
أنهار:كلمك سلطان ؟
بهاج:ماشفت جوالي
تقدم يناظر الاغراض على الدولاب:فطريني والا ماودك؟
ابتسمت بخفوت:الحين اجي
هز راسه وخرج من المطبخ على طلعة نورا
:بهاج
لف عليها وتقدمت له:تقول اخر كلاس بعد شوي تخلصه
بهاج:طيب افطروا واجهزوا نمرها ونشوف لنا محل
نورا هزت راسها ودخلت المطبخ
حطت الصحون قدامه وخرجت أنهار وبيدها كوبين ولفت نورا عليها
أنهار:باقي كوبك
مشت نورا تدخل ومدت كوبه أنهار واخذه بهاج
:اغراض المطبخ لوحدها يبي لها يوم
جلست أنهار جنبه:عادي مو شرط تشتري كل شي
بهاج:ودي اخلصه
أنهار:شوي شوي طيب
بهاج هز راسه واخذ جواله يناظره ولفت أنهار على نورا اللي جلست بكوبها:اول مره اصحى رايقه
رفع راسه عليها بهاج وابتسم
نورا:اقسم بالله اشتقت انام على سرير واصحى ببيت كذا وبمدينه صاخبه كذا
تكت بيدها أنهار تناظرها وابتسمت بهدوء
نورا:بس الله يعينك بهاج بنفرّ الرياض معاك كلها
بهاج:ابد تحت أمرك إخت نورا
لفت أنهار:ماعندك محاضرات اليوم ؟
هز راسه بالنفي بهاج:لا وزين انه مافي عشان يمدينا نطلع بدري ونرجع بدري عشان اخرج
نورا:بتروح مكان ؟
ناظرها:المزرعه
نورا:ليش تروح بس بيتعكر مزاجك
بهاج:لازم اروح
نورا تنهدت وبدت تفطر:ما بنخلص منهم هذولا
لفت أنهار تناظر نورا اللي تاكل ورجعت تناظر بهاج
'
خرجت ريوف ولفوا يناظرونها وابتسمت أنهار
نورا ضحكت:عشقي ياناس الستايل تكفون
ابتسم بهاج لانها فعلاً ريوف ما تشبه الا نفسها بألوانها ونظاراتها وشعرها ومشيتها وشخصيتها
رفعت جوالها نورا تصورها وفتحت الشباك وابتسمت ريوف لها تميل راسها للفيديو
فتحت الباب وركبت تحط الايباد وجوالها جنبها:هاي تأخرت ؟
بهاج:فدا فدا
ابتسمت وناظرتهم:قولوا اننا بنتغدا سوا لاني مافطرت
بهاج:بنتغدا بس خلونا نخلص واستعجلوا بالله
نورا:اسرع سريع لا تشيل هم
بهاج:كل وحده تشوف اللي يناسب غرفتها وبس لا نقعد لكل وحده نختار لها بيضيع الوقت
ريوف لفت:حماس احلى فقره
لفت عليهم أنهار وابتسمت وهي تناظر الطريق
وقف بهاج ونزل ونزلوا معاه المحل ودخلوا
اخذ نفس ينزل نظارته الشمسيه ويناظر الاثاث والمحل الكبير والتفت عليهم:نص ساعه نتجمع هنا
ضحكت نورا ومشت ومعها ريوف ولفت أنهار عليه من مسك كفها وناظرها:إحنا بنمشي سوا ، تعالي
أنهار:بيفقدوني
بهاج:بنأثث غرفتنا سوا
ناظرته وابتسمت بتوتر من مسك كفها يمشي بين الممرات ويناظر الغرف اللي موجوده
أنهار:والغرفه اللي تحت ؟
بهاج:تقعد للي يبيها
أنهار اخذت نفس تناظره ينقي هو فعلاً ينقي لغرفه لشخصين ماهو لوحده وهالشي يربكها
ناظر الغرفه اللي قدامهم:شرايك ؟
هزت راسها:حلو
بهاج تقدم يناظره من قريب وشاف السعر اللي مكتوب عليه والتفت عليها:حلو ناخذه والا نتقدم قدام ونشوف ؟
طلع جواله من جيبه من دق وهزت راسها أنهار
:اشوفه مناسب وحلو
رد:هلا
نورا:بهاج لقيت سرير عاجبني بس اخاف اجي واضيعه
بهاج ضحك:جيبيه معك
نورا:بهاج منجد اخاف اضيعه
بهاج:كلميهم يعطونك فاتوره وجايك
نورا:ما سألت عن سعره
ابتسم بهاج:افا !
نورا:ياناسس على الكريم
ضحك بهاج وناظر أنهار اللي تتلفت بالمكان:وريوف؟
نورا لفت وراها:ما اعرف فينها بكلمها
بهاج:طيب
قفل الجوال ومسك ظهرها من الخلف:تبين تشوفين مكان غيره؟
هزت راسها بالنفي:نورا وريوف خلصوا ؟
بهاج:نورا بتشوف ريوف الحين وينها ، تعالي معي
كان يمشي معها وذراعه خلف ظهرها يناظر باقي الاماكن وأنهار معاه تمشي
لفت من شافتهم وابتسمت ووقفت لوهله تناظرهم من بعيد
تلاشت ابتسامتها تشوف ذراع بهاج اللي يحاوط فيها أنهار وابتسامة أنهار له
كانت تشوف هالمنظر للمره الثانيه بينهم ، الألفه والاحتواء والإهتمام نظرات أنهار لبهاج يكسيها الخجل
هي مو أول مره تشوف بهاج وأنهار سوا لكن أول مره تلمح انهم شكلاً زوجين
كانوا ينقون أثاث ويطري على أي شخص بالمكان انهم زوجين ، هي كانت تنكر فكرة حقيقة زواجهم لكن الحين بدت تصدقهم
لفت عليها أنهار وشافتها واقفه وعقدت حاجبها:نورا
تقدمت لهم وابتسمت:لقيتوا ريوف ؟
ابتعد بهاج عن أنهار بهدوء وهو يناظر المكان
أنهار:لا وريني اللي اخترتيه
نورا فتحت جوالها:صورته شوفي
ورتها الصور ولفت نورا لبهاج:اخترتوا انتوا ؟
أنهار ناظرت بهاج:اختار بهاج
نورا:فين ؟
رفع اصبعه بهاج؛هذاك
نورا عقدت حاجبينها:كبير
بهاج:اي قاصد
نورا لفت عليه تناظره وصد بهاج يكلم الموظف
اخذ ورقة نورا ولف من شاف ريوف جايتهم
ابتسمت أنهار:معجزه خلصتي بدري
ريوف:المحل خيال وكبير بس اخذت اللي عجبني بسرعه عشان بهاج بس
بهاج:كفو خل اشوفهم واجيكم دقايق
مشى تاركهم ولفت نورا تناظره بشماغه وثوبه واقف مع الموظفين ويتكلم معهم
ولفت تناظر أنهار اللي تتجول بالمكان
هز راسه بهاج وهو يناظر الفواتير وطلع بوكه من جيبه ونطق:شبكه
مد بطاقته له ولفت نورا عليهم:غالي بنات
ريوف لفت تناظر بهاج:مستحيه صراحه اقولكم اني نقيت الرخيص والمناسب
أنهار لفت عليهم وتنهدت:كل هذا عشاننا
نورا ناظرته من بعيد ولفت عليهم:مستحيل بيوم انسى واجحد اللي يسويه بهاج لنا الحين ، مستحيل
ريوف:عسل ياناس احبه مره
ابتسمت أنهار من كلامهم ولفت تناظره واقف بعيد
التفت عليهم وابتسم لهم واستلم الفواتير ومشى لهم؛توكلوا على السياره
نورا:متى بجيبونها ؟
بهاج:الليله بالليل
ريوف:واو حلو
نورا:جاهزه مو تفصيل ليش يتأخرون اصلاً
بهاج فتح سيارته وركب وحط الفواتير بدرج السياره وحرك:مستحي اقولكم اني مشتهي مظبي لحم
ضحكت أنهار وتقدمت ريوف له:تحزن بهاج احسك بالمكان اللي ما تنتمي له معانا
بهاج:ياخوك ما يشبعني اكلكم ابي امد بالثقيله
نورا:انا اكل معاك بهاج عادي
ريوف لفت عليها ورجعت لفت على بهاج:صدقني ماتعرف اش هو المظبي
نورا ضربتها:اعرف لحم بس عشان بهاج باكل
بهاج:لا باخذ لي وانتم قولوا وش تبون ؟
أنهار:انا ابغى معاك
نورا:وانا كمان
ريوف ابتسمت:ما اخليكم
ضحك يناظر الطريق والتفت عليهم:تسايروني ؟
ريوف:ترا لحم يعني مو بهالسوء نفس الدجاج
نورا:اخوه كلهم بهايم
هز راسه بهاج ووقف عند المحل:تنزلون والا اجيبه ونرجع البيت ؟
أنهار لفت عليه:ننزل
بهاج هز راسه ونزل ونزلوا معه اخذ نفس يتقدم للمطعم ودخلوا معه
ناظر العامل:في جلسات عوائل ؟
هز راسه العامل واشر لهم وفتح الستاره الهزيله وضحك:امش يا ابو سعود جبت لكم مزرعة الشيبه لين هنا
دخلوا يناظرون الفرش الاحمر والجلسات اللي على الارض وضحكت ريوف:لا يطلع لنا الشايب تكفى
بهاج ضحك:ادخلوا انتم
دخلوا وجلست بالارض ومشى يطلب بهاج
ضحكت نورا:صراحه شتان بين عشاء امس وغداء اليوم
أنهار:مو كل يوم زي بعض حياتي
ريوف ضحكت:المطعم كله عيال اسمعوا الاصوات تكفون
لفت نورا تناظر المكان ودخل بهاج وقفل الستاره وجلس واخذ المركى وتكى بظهره
طلع جواله يناظره وحك جبينه ورفع راسه للي دخل بالسفره الشفافه والصحن الدائري
وابتسم:ايباه
اعتدل بجلسته وخرج العامل وناظر اللحم بمنتصف الصحن والرز واللبن والسلطه والليمون
بهاج؛اقسم بالله احلى منظر
ضحكت ريوف:عيونه تلمع
ابتسم بهاج لها وسحب شماغه عن راسه ورفعت عيونها له أنهار تشوف شعره المبعثر
ومدت كفها لشعره ترفعه وتعدله له وابتسم يناظر الصحن
ورفعت انظارها نورا لهم ورجعت تناظر الاكل
بدأ ياكل معهم وهو يضحك بنص لقمه من سوالفهم وتعليقات ريوف على اللحم
ريوف:هذي اللحمه عجبتني مره ناعمه
بهاج ناظر اللحمه:هذا لسان
ضحكت نورا وهي تناظر وجه ريوف اللي تغير
:امانه هذا لسان ؟
أنهار:لقينا لسان اطول من لسانك
ناظرت اللحمه:حرام ليه تاكلون لسانها
بهاج:انتي ماكلتها شدخلنا
ضحكت أنهار وهي تاكل وتكلم بهدوء بهاج
:لحمهم حلو والله
نورا:عجبني الرز كمان
لفت تناظره ياكل ومشمر اكمامه وشماغه وعقاله بحضنه وابتسمت تتأمله
مسكت الليمون بيدها:اعصر لك ؟
هز راسه وهو يمضغ لقمته وعصرت له وابتسم لها وهو يناظرها
بادلته الابتسامه لانها تفهمه تدري انه يحب هالألفه ويتمناها طول عمره
انها تكون بجانبه على صحن واحد وتعصر له ليمونه بيدها
تكى بظهره بعد ما شبع:حمدلله
نورا:بغسل فين اروح ؟
بهاج وقف وفتح الستاره وناظر العامل:فين الحمام ؟
تقدم من أشر له ولف عليهم:اعجلوا بنمشي
دخلوا الحمام وغسل هو ومسح يده ووقف قدام المرايه يلبس شماغه وعقاله وهو ينتظرهم
مشى وخرجوا وخرج من المطعم يركب سيارته واخذ نفس:يالله لك الحمد شبعت عن ثلاث ايام قدام
ابتسمت:بالعافيه
لف عليها وابتسم والتفت لنورا وريوف:بنرجع البيت بحطك عندهم واذا تبين ترجعين كلمي فهد
ريوف:بجلس عندهم لين ترجع بشوفك
بهاج لف للطريق:لا تنتظريني ارجعي بدري وراك دوام بكره
لفت عليه أنهار:مابترجع ؟
هز راسه:الا بس يمكن أبطي
ناظرته يشغل سيارته ويحرك وهو هادي ولفت للطريق
وقف عند الفله والتفت عليهم:ان بغيتوا شي كلموا فهد وانا بكلمه يمركم
نورا:تمام وانت طمنا بهاج اوكيه ؟
هز راسه وفتحت الباب تناظر البنات ينزلون وانقبض قلبها تلف عليه وهي ماسكه الباب
وناظرته:احضني بهاج
ابتسم بهدوء لها ومد لها ذراعه وقفلت الباب وتقدمت له تحضنه وحاوطها وهو يغمض عيونه وهمست:تكفى ارجع بهاج
هز راسه:ان شاء الله
ابتعد عنها وابتسم:انبسطي معهم وان ودكم تخرجون كلموا فهد
أنهار هزت راسها بالنفي:حتى لو خرجنا بالي معاك
بهاج:لا انا طماع ابي بالك وقلبك معي
ابتسمت له ورفعت كفها على صدرها:انت فيني هنا وين ماتروح
بهاج:الله يجعلهم يدفنوني بين هالضلوع
مسكت كفه تناظره:انتبه على نفسك ودي اروح معاك
بهاج:برجع ماني مطول
هزت راسها له وابتسم لها يطمنها ونزلت من السياره
وقفت عند باب الفله ورفع كفه لها وابتسم ودخلت تقفل الباب وحرك هو
حطت ظهرها على الباب بتوتر وربكه وناظرت الحديقه وخرجت نورا وناظرتها من بعيد واقفه عند الباب:طولتي
تقدمت لها وهي تفصخ عبايتها:ودعته
نورا تقدمت لها:ريوف تقول بنسبح تكفين حتى انا ودي
ابتسمت أنهار وهي تشوف المسبح :نظيف ترا
نورا:اي شيكت عليه
أنهار:اوكيه نسبح
ضحكت نورا ودخلت داخل معها وهي تشوف ريوف تطلع لها ملابس للسباحه من بين اغراضهم
'
مشى طريقه كله يهوجس ويفكر ساهي وعاقد حجاجه تارك الرياض خلفه ما يسمع غير صدى ضحكاتهم بسيارته يناظر حوالينه كان مافي الا هو خالي المكان بدونهم
أذن للمغرب وهو بطريقه وصفى الجو قدامه مظلم
مافي شي يشغله غير صوت افكاره وعقله ناظر المزرعه من بعيد واخذ نفس يقوي نفسه ويعدل جلسته ويدخل المزرعه بسيارته
رفع راسه سلطان اللي كان لوحده من شافها وبلع ريقه يوقف ويراقبه يوقف سيارته
نزل من السياره بهاج وقفل بابه وتقدم التفت يشوف سلطان من بعيد واقف وظل يناظره لا هو اللي تقدم ولا سلطان تقدم
التفت يناظر بيته ومشى يفتح الباب ويدخل
لفت من دخل ووقف من شافها بالصاله جالسه
قفل الباب خلفه وتقدم لها بهدوء:سلام
هزت راسها له وهي تناظر شكله ورجعت ناظرته
:حلو مجلاسي لوحدي ؟
تنهد يصد عنها وكملت حليمه:هذا انت اخذتهم وسويت اللي براسك وتركت أمك ، اخذت كل حلال ابوك اللي صفى لنا عشان تشتري لك بيت بدون ما تقول لأمك بدون ما تشاورها ، بهاج وش صار لك ليه ماصرت تسمع لي ؟ قلت لك انا اعرف امور ماتعرفها انت لا تعاندهم لا تعاند عمر والشيبه
بهاج لف عليها يناظرها وكملت حليمه:وسويت اللي تبيه هذا هو عمر بمكان وانا بمكان لا يحل لي ولا احل له
بهاج تقدم بهدوء:ماكان هذا اللي ابيه
حليمه:الا هذا اللي تبيه تبي تكسر راس عمر ببناته وتاخذهم منه وتاخذني منه حتى
عقد حاجبينه يناظرها وكملت حليمه:بتعيش انت معهم ثلاثتهم وانا بعيش هنا لوحدي لين اموت
بهاج:شايله عليّ بيّن
حليمه هزت راسها بالنفي:كنت مبسوطه
بهاج مارد عليها يناظرها وكملت حليمه:يوم لقيته كأني لقيت العوض ، عوضني بنفسي بداني عن الكل عطاني قيمتي
بهاج ناظر حزنها وغضبها عليه وهمس:ظنك ماجيت عشانك ؟
حليمه:ليه تتشمت فيني ؟ بتروح تقول للبنت اللي بديتها على رضى امك ؟ شموخ قالت لي كل شي كل شي ، وادري ان من يوم دخلت الملحق وصرت ماني حليلة عمك انك استغليت حلفانه وصارت حلالك من يدري بكره تجيني تبشرني بإن جالك ولد منها من يردك عنها الحين ؟
بهاج:عمر ماعطاك شي انتي معه عطيتي نفسك كل شي ، عمر هو هو نفس ما يعامل بناته كان يعاملك لكنك توهمتي لنفسك
حليمه:لا
بهاج:امي اسمعيني انا مادخلت الملحق عشان انفذ طلاقه منك انا دخلت لاني ابي نجاة البنات بس
حليمه:البنات البنات البنات ماهم خواتك ليه قلبت حياتنا كلها عشانهم
بهاج ناظرها:لانهم بوجهي ، لانهم راعوني وانتي ماتدرين عني ، لمسوا جرحي وداووه وقفوا بوجيههم كلهم واختاروني لانهم وثقوا فيني وجو معي تاركين ابوهم سكنوا معي بدون ما يشيلون هم ويخافون شي ، لان اللي يجيله بنات تجيله العافيه طلعتهم من خوفهم ومن عذاب ابوهم سكنتهم عندي وبين عيوني
حليمه صدت عنه وكمل بهاج:عمر مريض افهمي
لفت عليه بحرقه:ليه ماتبي تشوفني سعيده ؟ ليه مستكثر علي ؟
بهاج:لانه ماهو حقيقي انتي توهمين انا اعرف عمر اعرفه ماقدم لك شي اكثر من وردتين والباقي كله همّ وهواش ، عمر مريض حتى اهله مايدرون وش علّته
صدت حليمه تبكي ومن شافها تبكي تقدم لها
:انا مابعتك ولا فرطت بسعادتك يمكن كل هذا خيره يمكن كان أذاك نفس ما كان يأذيهم وين اروح لو جاك شي ؟ اصير ذبّاح ؟
لفت عليه حليمه تمسح دموعها وتقدم يبوس راسها:بتجين معي ببيت ولدك البيت اللي بتكونين مرتاحه فيه
حليمه:ما اترك ارضي هنا وهذاك ماهو بيتي هذاك شريته لك ولها
تنهد بهاج:امي لا تسكرينها بوجهي
حليمه لفت عليه:اطالع فيك كأني اطالع بعقاب ربي لي
لانت ملامح بهاج يناظرها وكملت حليمه:ما اعرفك اخترتهم عليّ بعتني عشانهم
بهاج:امي وش هالكلام !
وقفت وناظرته:اطلع مابي اشوفك
ناظرها بهاج بذهول واشرت على الباب:مابي رضاك اطلع
وقف يناظرها:انا بهاج
حليمه:ولدي مات ولدي اللي كان يرعاني ويرعى حلال ابوه مات ، انت منت ولدي انت اخترت عيشتهم وبيوتهم وتخليت عني وانا ماعاد ابيك
بهاج هز راسه:انتي زعلانه مني ومعك حق بس بجيك بوقت ثاني
حليمه:مابي اشوفك بعمري كله
ناظرها تبكي وهي تنطقها وتنهد وخرج من الباب قفل الباب وانقبض قلبه مع قفلته
وقف محله ماسك نفسه ماسك غضبه وحزنه وحرقته امه كانت تكابر بحب عمر ، كانت من ضعفها ووحدتها تستقوي بعمر
عمر اللي مريض لا محاله ولاشي يفسر اختلافه غير اطباعه
دخل الدكّه وناظرهم جالسين ورفع راسه رَده:جيت
هز راسه يناظرهم:جيت
اعتدل بجلسته عمر ووقف رَده على عكازته ومشى يوقف قدام بهاج المهزوز الضعيف اللي هدّته أمه
رَده:تذكر يوم حرقت المستودع وش صار لراسك ؟
دخل سلطان وناظرهم ووقف محله
رَده:كسرت راسك لين غرزوه وللحين لو تخبط به بمكان صبّ دم لاني كسرته لك
بهاج مارد عليه وكمل رَده:ظنك وش بسوي بعد ماضاع حلالي مره ثانيه بسبتك
ظل يراقبه بهاج وهو صامت وكمل رَده:نفضته نفض عشان اطلع منه بصمات للبنت اللي تعرفها للي تجرأت وحرقته عشان سواد عيونك
بهاج:ولقيت ؟
ابتسم رَده:لا
بهاج هز راسه ولف يناظر سلطان اللي واقف:ولا بتلقى
رَده:كنت ابيها قانون ومشاكل كنت ابي اشوف بنات عمر يتنافضون بين الحكومه لكن سلمهم ربي من أخف عذابي
بهاج لف عليه يناظره وكمل رَده:بس باخذ حلال ولدي منك من بين عيونك هذي
مد اصابعه لجبينه بهاج يدفعه بقوه وغمض عيونه بهاج يبتعد عنه
رَده:تاخذ بيوت وعماير وكأنه لك !
بهاج:ماهو لي ؟ وانت تنازلت عنه وقلت حرام مال اليتيم ؟
رَده:تنازلت قول ياحبيب أمك
بهاج:كل اللي بجيبي حلالي ولا لأحد نصيب فيه
رَده:والله لأخذها منك غصب والمحاكم بيننا ياولد سعود
بهاج:ان كان عندك شي تزيده قوله وخلصني
رَده:عمر بعد بيقابلك بالمحاكم
لف بهاج لعمر اللي جالس وكمل رَده:بياخذ بناته الثنتين وبيفصخ زواجك من الثالثه
ناظره بهاج وهز راسه لعمر:ونعم
رَده مسكه من ياقة ثوبه:والله لأرباك ياولد سعود والله لأرباك
بهاج:انت معبي راس امي علي ؟ خليتها تعيي تجي معي ؟
رَده:لانه بأسبابك هي تطلقت
هز راسه بأسف بهاج وهو يناظرهم ووقف عمر خلف رَده:مالك مكان هِنا لا تفكر ترجع له
رَده كمل بعد منطوق عمر:عيني لا تشوفك بتصفى بالشارع بعد ما اخذ حلالي كله
عمر:وبتصفى لوحدك لاني باخذ بناتي عندي ومحد بيردني
زيد وقف وناظره بهاج ونطق:انك تعطي كلمة رجال لبنت عمك وتتراجع عنها ! ما ارضاها
بهاج هز راسه:يعني كلكم عليّ ، تغلطوني ؟
رَده:الغلط راكبك
لف بهاج لسلطان:كملها ياولد عمي معهم
مارد سلطان وابتسم بهاج:توقف معهم ؟
لف سلطان على ابوه اللي يناظره ورجع ناظر بهاج:توكل
ظل يناظره بهاج وهو صاد عنه ولف يناظرهم كلهم وخرج
شالته رجله بصعوبه من المكان شايل معه خساراته كل أوراقه خاسرها كل شي تعب عشانه بيخسره
ركب سيارته وخرج سلطان وهو يراقبه ماقدر يخليه ولا قوى قلبه يخليه كان الضيق بوجه بهاج متلبسه لبس
كان يشوف انه ماهو بخير وماهو على وضعه
خرج من عنده يركب سيارته سلطان ويخرج خلفه يحاول يلحقه لكن بهاج كان أسرع منه
كان يسوق سيارته بظلمة الليل ماسك بذراعه دركسونه ويحس بالضيق ياكل صدره
فتح أزارير ثوبه وهو يمسك الدركسون بيد راجفه وبلع ريقه يرمي شماغه يمينه ويرجع يناظر الطريق
ناظر عداد سيارته اللي تعدا السرعه الطبيعيه
كان وده يركض للرياض برجلينه من إحتراق صدره ونيرانه اللي تاكله
نزل انظاره وهو يراجع افكاره ماعنده شي يربحه
كل أوراقه خسرها بيتحدونه وياخذون منه كل شي
أنهار والبنات والبيت وكل حلاله وراس ماله وأمه وراحته ورخائه واللي تعب وسعى له
رفع عينه من الفلاشات اللي أعمت عيونه ولف سيارته بقوه
'
مشى خلف طريقه وهو عاقد حاجبينه واخذ جواله يحاول يدق عليه كان وده يتكلم معه لكن بدون ما يكون عندهم ومعهم
وبيلحقه يتكلم معه لان المصايب تشكلت على عاتقه وما بينقصه سلطان وكلام سلطان
لام نفسه ليه بالوقت اللي بهاج كان محتاجه فيه باعه بأرخص كلامه
وقف من شاف السيارات اللي قدامه تهدي وعقد حاجبينه يناظر السياره اللي مقلوبه على يمينه والشاحنه اللي قدامها
جمد وجهه ووقف الدم في جسمه ولا قدر يحرك عضو بجسمه بكل خوف
يسمع دقات قلبه وتنفسه السريع واصوات الناس اللي يطلبون سيارة اسعاف وهمس:لا يارب
فتح باب سيارته وهو يحس انه يمشي ببطئ يسرع بخطواته لكنه يرجع بتردد وخوف
دخل بين السيارات تارك سيارته مفتوحه ويمشي ويترنح بكل خوف
ابعد الناس وهو يدخل بينهم ووقف محله يشوف السياره
عرفها عرفها وركبها ويعرف صاحبها ، كانت سيارته
سيارة بهاج رفيق عمره ولد عمه وصاحبه وأخوه
التفت بخوف وصرخ:خرجوه خرجوه حيّ
تقدم للسياره يحاول يتفقد بهاج ومسكوه:لا تتقدم خلهم يجون يطلعونه
دفهم:طلعوه قبل يموت طلعوه لا ألحقه طلعوه
جلس على الارض يناظر سيارة بهاج المعدومه اللي صفت حديد وبس وصرخ:بهاج
'
جالسه بالكرسي الهزاز وتناظر ريوف ونورا اللي بالمسبح وهي ساهيه
لفت براسها تناظر جوالها اللي يمينها ساكن محله
ماتقدر تدق عليه او حتى ترسل له هي خايفه من اللي جاه عندهم ومن اللي بيقولونه ومن اللي بيصير
تنتظره ، وتنتظره وتنتظره لكن ما اتصل
لفت لريوف اللي مسكت جوالها وهي بالمسبح:فهد جاي
نورا:خليه شوي ماصدقت أستكن
ريوف:قومي ادخلي بس
نورا:حتى انتي ادخلي اكيد ما بتقعدين كذا اذا دخل
ضحكت ريوف:زوجي اذا ناسيه
ضحكت نورا:تكفين !
لفت على أنهار:ارمي علي روبي
ماردت عليها ورفعت ذراعها:بنت
لفت عليهم واخذت نفس:ادخلوا اكيد بيجون العمال بالاغراض بعد شوي
نورا:عطيني روبي طيب
مدت اروابهم واخذت جوالها ومشت تدخل البيت
دخلت المطبخ ورفعت شعرها وهي تشوف الاغراض اللي شراها بهاج
سمعت صوت فهد ولبست عابيتها اللي عندها ولفت من دخل المطبخ:حيّ ام سعود
ناظرته:كلمك بهاج ؟
فهد تقدم:لا ما رجع ؟
هزت راسها بالنفي ولفت للمكرونه تفتح كيسها
فهد:شوي ويرجع ما بيبطي
أنهار:طيب جرب كلم سلطان اسأله
فهد اخذ جواله:شوي ويدقون اعرفهم اصبري عليهم
دخلت ريوف اللي تنشف شعرها:بدري ، فين كنت؟
فهد لف لأنهار وابتسم:تحقيقات زوجتي ، تشوفين ؟
ريوف:اخلص شليويح
فهد:مع صاحبي
ريوف رفعت حاجبها:صاحبك اللي عزمك قبل يوم؟
هز راسه فهد وميلت شفايفها بتعجب:عجيب صاحبك هذا صرت تشوفه اكثر مني
فهد:لبى الغيرانين ياناس
نورا دخلت وفتحت الثلاجه تاخذ تفاحه ولفت لأنهار:اش بتسوين ؟
أنهار:مكرونه
لفت تناظر نورا تاكل تفاحه وابتسمت:شهيتيني عطيني معاك
ابتسمت نورا ورمت عليها تفاحه وقضمت منها
ريوف:بيجون العمال بأغراضنا الحين
فهد:عندي خبر كلمني بهاج الظهر
لفت أنهار وهي تحط المويه على المكرونه على رنين جوال فهد
لفت بسرعه على فهد وابتسم فهد:سلطان ، قايل لك بيدقون علي ما يقدرون بدوني
أنهار:رد طيب
فهد رد:ارحب ابو زيد
سلطان:انت لوحدك ؟ اخلص
فهد ناظر البنات وضحك:وحدي وحدي محد حولي ابد
عقدت حاجبينها أنهار ومسك جبينه سلطان وهو يتنفس بضيق ويناظر المستشفى:بهاج تقلبت فيه سيارته وهو راجع
جمد وجه فهد بصدمه ووقف بأعتدال وهمس:وش؟
طاحت من كفها التفاحه وتقدمت له بخوف:اش صار ؟
ونشف ريق نورا من ردة فعل فهد:فهد اشبك
مسك جبينه وهو يسمع سلطان نشف دمّه وسأل سؤال هزّهم كلهم:بهاج حيّ ؟
رفعت كفها نورا على فمها وشهقت وتمسكت أنهار من حست الدنيا تدور فيها لوهله
'