انثنى غيم نجد لخد الحجاز النرجسيه

١٦

خرج من الحمام وناظرها جالسه على الكنب بالصاله ووقف ثواني وصد وهو يقفل باب الحمام ويتقدم للصاله ودخل غرفته
لحقته ووقفت بالغرفه تناظره ياخذ ثوبه:جيت اصبح عليك
هز راسه وهو يلبس ثوبه متجاهلها ونطقت بهدوء حليمه:عمك اعتذر مني لانه طردك
بهاج هز راسه وهو صاد:يعتذر منك انتي وانا المطرود
ضحك وهز راسه بأسف وتقدمت حليمه له:بهاج !
بهاج رفع راسه له:زي ماتعودتي على ولدك خليني اهدأ وانا اجيك ولا كأن صاير شي لكن الحين مابي اتكلم
حليمه:بنتكلم لاني ادري لو تقابلت مع عمك بتصير مشكله ثانيه
بهاج:ان نطق بحرف بحرقه
حليمه:بهاج تكفى خلاص
بهاج:خلاص وش ؟ خلاص اخلي امي مع واحد ما يحترمها ولا يشوفها زوجه ؟ انتي تشوفيني غلطان
حليمه:مو عني ، عن بناته
سكت ثواني وعقد حاجبينه بإرتباك:شسويت ؟
حليمه:وخر عن بناته
بهاج:هذا مو صاحي اقسم بالله مو صاحي ، سلب من بناته كل شي مره وحده وما يبيهم يلجأوون لأحد غيره ! انا رجال رجاال وما بسمح له يكسر في بناته ويهدمهم عشان من ؟ عشان الشيبه ورضى الشيبه باللعنه فيهم كلهم
قفل الدولاب بقوه وتكلمت بهدوء عكس انفعاله وعصبيته وحدة حجاجه
:لو جات من رجوله وشهامه ما بقولك شي ، بس انت تلعب بالنار
غمض عيونه من عرف انها بتتكلم وتذكره انها شافته مع أنهار
بلل شفايفه والتفت لها:مو اللي ببالك
حليمه:ماهو ببالي ، شفته بعيني
بهاج:غلطتي
حليمه:بهاج !
بهاج:هذولا حسبة خواتي من يوم تزوجتي ابوهم وهم خواتي محد بيغير هالكلام تطمني
حليمه سكتت وبهاج مشى رايح والتفت لها:لا تفتحين معاي التلميحات ذي
حليمه لحقته وهمست:ياليت
مشى معها وفتح الباب وبلع ريقه من ناظرها
لفت حليمه عليه ورجعت ناظرتها:بغيتي شي ؟
أنهار:بهاج كويس صاحي
تجاهلت حليمه تماماً وسؤالها ومشت حليمه من جنبها والتفتت أنهار تناظرها رايحه ورجعت تناظر بهاج:عندك محاضرات
تقدمت له بهدوء:ارسلت لك سناب ومارديت توقعتك نايم جيت اصحيك
اخذ نفس بهاج:لا صاحي
دخلت وحطت اللابتوب بالصاله ولفت عليه:تعال
مشى وجلس بعيد عنها وتقدمت له وهي تشيل شعرها خلف ظهرها:بعلمك تشغل الكلاسات عشان ما اقروشك دايم
بهاج اخذ نفس وهمس:تكفين
ناظرته أنهار ورجعت لورا:امك ضايقتك بكلام صح ؟
بهاج مارد ورفعت حاجبينها أنهار:اكيد دام مزاجك كذا متعكر
نزلت انظارها وشغلت المحاضره ومدت له اللابتوب ووقفت:بعدين اعلمك
بهاج هز راسه والتفتت تناظر البيت ورجعت ناظرته من اندمج باللابتوب:يصير ادخل المطبخ عادي صح؟
بهاج:اكيد
مشت ودخلت وشد على يده وهو يحس بالضغط هو ماوده تجيه وتكركبه اكثر ماوده يرجع يحس بمشاعر قويه تحرقه من داخله ماوده تقرب ابد ولا يشم عطرها ابد
حك جبينه وهو يناظر اللابتوب ويسمع المحاضره التعريفيه بالمنهج
ورفع انظاره من مدت له كوب وناظر الكوب وناظرها واخذه من يدها وناظره
وهمست:شاي
هز راسه ومشت أنهار توقف عند شباك الصاله وتشرب من كوبها
لف يناظرها ورجع ناظر اللابتوب كانت تشغل نفسها بالنظر لبرا وتتجول بالبيت وتفتح جوالها مره لين يخلص محاضرته
لمحته مندمج ومشت لغرفته دخلت بخطوات هاديه لين دخلت
ابتسمت من ناظرت الغرفه تجولت فيها وهي تشوف فراشه وملابسه خلف الباب ودولابه ومرايته وقفت عند الدولاب وفتحته وماشافت فيه الا الثياب
الاسود والكحلي والكثير من البياض مافي غير اقمشه بالدولاب هو ماعنده تيشيرتات وبناطيل وشورتات
رفعت حاجب بإبتسامه وذهول وقفلت الدولاب التفتت تناظره من محلها جالس بالصاله ومنشغل تقدمت له وهي تسمع التحضير ورفع راسه يدورها ومشت وهي تحط كوبها:بفتح المايك
فتحته ونطق بموجود اول ما سمع اسمه قفل اللابتوب والتفت لها:بقعد ساعه يومياً ؟
أنهار:اكيد لا ! اكثر
بهاج:تقولينها صادقه ؟
أنهار:اشبك بهاج الحين هذا الوقت كله وهو بس تعريف بالمنهج اكيد اذا بديتوا بتاخذون وقت اطول
بهاج تأفف وتكلمت أنهار:وبعدين المفروض تكون متحمس ليش هذا التأفف ؟
بهاج:مو وقته
أنهار:وقته اشغل نفسك لان واضح عقلك يفكر في اشياء كثيره تخليك تصحى متوتر
بهاج رفع انظاره عليها وكملت أنهار:هذا اللي اشوفه
بهاج وقف ومشت قبله أنهار :برجع انا مافطرت حتى جيتك على طول اول ما صحيت
بهاج عقد حاجبينه:ماعليك مني نامي واشبعي نوم وافطري
أنهار:وتلقم حرمان
بهاج تنهد وميلت شفايفها أنهار:ودك تتمشى معاي؟
بهاج:ما بتفطرين ؟
أنهار:لاحقه تعال ممشى النوير
بهاج قفل الباب وتقدم معاها بخطوات هاديه وحط يدينه بجيوبه
مشت ولفت عليه تناظره بترقب ورجعت ناظرت قدامها:اذا ودك تقولي حاجه عادي اسمعك
بهاج مارد وهو يمشي وأنهار لفت له بضيق
:كله بسببنا صح ؟
بهاج التفت وعقد حجاجه وكملت أنهار:ماكنتوا كذا قبلنا ، انت وأمك
بهاج:وش بتلومين نفسك الحين ؟
أنهار:هذا الصدق بهاج احنا خسرنا بابا بجيتنا لهنا وانت خسرت امك
بهاج:انا من زمان خسران كل شي ، ابوي وامي والسند والدراسه والاستقرار والحريه مافزت بشي
بلع ريقه وهو يناظر قدامه:حتى ان خطيت خطوه ونويت افوز فيها خسرتها من البدايه ، تصكك البيبان بوجهي من يعرفون اني انا خلف البيبان
أنهار:ليش ماتركت كل شي ورحت بهاج ؟
بهاج:امي يمكن يهون عليها تخليني بس انا ما يهون علي اخليها
ظلت تناظره وهو يناظر الطريق ومبتعد بنظره عنها هي تحس بغضبه اللي بصدره وحزنه وضيقته لكنه قليل كلام وتعبير
أنهار: لو تتكلم معاي بترتاح بهاج
بهاج التفت لها ووقف ووقفت أنهار وميلت راسها
:يعني انت تسمع لي وتقولي كلام يريحني بس انت مين يسمع لك ؟
سكت وهو يراقب نظراتها له وناظرته بحزن أنهار:بهاج اذا انت موجود عشاننا احنا كمان موجودين عشانك ، وانا بالذات
مارد عليها وتنهدت:ما بتقول شي اكثر ؟
بهاج انقبض قلبه من نظراته لها ومن وعي امه بضعفه تجاهها هو انهزّ اكثر من انتبه ان في احد منتبه عليه وهو يغرق وماوده يغرق اكثر
لان الطريق مقفل وجهتها محكوم عليها تكون مقفله بوجهه ، هي حتى لو تشوفه بتشوفه أخ مستحيل تتنازل بنت الحجاز المدلّله والناعمه والرقيقه والبريئه للخشن اللي قدامها والجلف
كانت تراقب نظراته لها وساكته كانت تلمحه يعض شفايفه تترقبه ينطق بأي شي يريّحه بس ماكانت تدري انه يحترق اكثر بصمته وسكوته واصرارها واهتمامها ونظراتها وقربها
بهاج رمش بهدوء وهمس:ليه مهتمه ؟
أنهار:اكيد مهتمه بهاج انت مهتم فينا وسويت لنا اشياء كثيره !
بهاج:يعني عشاني مهتم فيك بتهتمين فيني ؟
أنهار عقدت حاجبينه من تغيرت نبرته:مو هذا الصح ؟
بهاج صد عنها وبلع ريقه واخذ نفس ورجع ناظرها:انا ما سويت هذا كله عشان احد يلتفت لي ولا ابي احد يهتم فيني
أنهار عقدت حاجبينها ومشى بيروح ونادته والتفت لها
أنهار:ما بنكمل نمشي سوا ؟
هز راسه بالنفي ورجع بخطواته للبيت ظلت تناظره لين اختفى عن انظارها وعقدت حاجبينها ليه فجأه نطق بالقسوه وصد عنها هي كل اللي سوته معروف ورد جميل له واهتمام وحزن على حاله
،
ريوف وهي تلبس شوزها:ناموا كلهم بنطلع الان نسهر
أنهار:مين قالك تعالي يمكن ما يبغونا ؟
نورا التفتت وعقدت حاجبينها:ليش ما يبغونا ؟ وبعدين بهاج ارسل لي
أنهار:ارسل لك فين ؟
نورا:واتس اب
أنهار سكتت وريوف ناظرتها:البسي وتعالي اشبك!
أنهار هزت راسها:بسوي لي قهوه واجي اسبقوني
خرجوا تاركينها ومشت للمطبخ وقفت وهي تسوي قهوتها وبالها كله في بهاج لو زعل منها مع انها متأكده ماغلطت ولا سوت شي يستدعي تجاهله وزعله
حركت قهوتها وشربت منها شوي وخرجت للغرفه حطت كوبها ولبست عبايتها واخذت جوالها وخرجت لهم
مشت بإتجاه جلستهم ومن قربت وبدت تسمع ضحكاتهم ابتسمت تقدمت لين وصلت لهم وناظرتهم يضحكون وهمست:هاي
لفت نورا اللي تضحك:الحقي بسرعه شوفيهم وهم يقلدون بعض
ابتسمت وجلست وناظرتهم
سلطان ضحك:انتم مالحقتم على بهاج وهو بالثانوي
بهاج:انكتم
فهد شرق بالقهوه وهو يضحك وتعالت ضحكاتهم من ضحكته
بهاج ضحك:الله ياخذك
سلطان:هيه اسمعوا ترا كان شعره حد اذنه تقول باكستاني
ضحكوا وعض شفته بهاج وهو يسمع سلطان يوصفه
فهد:يطقطق على شعر بهاج وهو ماطلع له شعر الا يوم دخل العشرين
سلطان التفت عليه وضحك بهاج:جات عالشعر هو ما طول الا بعد التخرج
ضحكوا والتفتت نورا:درستوا وين ؟
بهاج:قريب مدرسه مافيها الا احنا الثلاث وبساس الرياض كلها
ضحكت نورا:ياويلي منجد !
فهد:من النبذ بالمدرسه نسوي نفسنا مانعرف بعض ونتعرف على بعض من جديد
ضحك سلطان:مافي محتوى
ريوف:وليش ماكملتوا جامعه ؟
سلطان:انا ماودي ماني حق جامعه وذا زين احد يقبله
فهد:عن الغلط
سلطان:قدم ان قبلوك لك مني خمس الاف
بهاج ضحك:انت طلع خمسه ريال بالاول
ضحك فهد:كفو ياولد عمي كفو
ضحك سلطان والتفت لبهاج:شوف نفسك علينا ياعم بهاج لو ما قدمت لك الذيبه أنهار مادرست
لانت ملامح بهاج من طرى اسمها هو من يوم جلست كان يتجاهل وجودها لكن تقلب وجهه من طاريها وناظر سلطان اللي جمدت ملامحه والتفت لأنهار اللي نطقت:بهاج عندك بكره كلاس بعد الظهر بجي بعد الصلاه اوكيه؟
هز راسه وهو متجاهلها بنظراته لفت لها ريوف
:علميه وخلي اللاب عنده
أنهار:اي ان شاء الله اكيد
رفعت راسها لبهاج اللي صاد عنها ويسولف معهم كلهم وهي ولا كأنها موجوده
قام سلطان:بجيب جوالي والله مدري وين وطيته
ناظرت بهاج اللي جالس وقامت وهي تنادي سلطان:بهاج !
رفع راسه بإستغراب والتفت سلطان عليها وهمست:سوري كان قصدي سلطان
التفت بهاج لسلطان اللي واقف ويناظره ومشت أنهار له:ابغى اكلمك دقايق
هز راسه ومشى ومشت معاه عقد حاجبينه بهاج من بعدوا عنهم والتفت للبنات:شعندها ؟
نورا:ما اعرف
لف يناظرهم من بعيد وعاقد حاجبينه
وقف سلطان والتفت يناظرهم من بعيد وناظر أنهار:عسى ماشر ؟
أنهار:سلطان بهاج قال لك شي عني ؟ يعني شي زعله مني او متضايق مني ؟
سلطان:ليه ؟
أنهار:احسه زعلان علي انا كلمته عن امه وابوه كذا مره واحسه تضايق تتوقع تضايق مني ؟ اعتذر منه؟
سلطان التفت وناظر بهاج اللي يراقبهم من بعيد ورجع ناظرها:لو زعل بهاج قال انه زعلان ما يخفي زعله
أنهار:ليش طيب ما يكلمني ؟
سلطان:لا تتحسسين عادي يتكلم معكم كلكم
أنهار سكتت وسلطان كمل:مافيه شي
بلعت ريقها من كلمته بلا تتحسسين وحست انها فعلاً دراما وشكلها بايخ قدامه تمنت انها ما سألت ولا اهتمت ولا حست بشي
مشت تاركه سلطان وراجعه لهم انحنت اخذت جوالها وناظرتها ريوف:فين رايحه ؟
أنهار:البيت نعسانه
مشت تاركتهم ولفت نورا لريوف:اشبها ؟
بلع ريقه بهاج وهو يناظرها رايحه وده يلحقها لكنه مايقدر هو كل ما لحقها تعب اكثر ماوده يغرق اكثر من بداية الطريق وبداية الايام بينهم
هو ناوي يتجاهلها ويتجاهل مشاعره لين تختفي
صد عنهم ولمس شاربه وهو ساهي بشبة النار اللي وسطهم والتفت يناظر سلطان اللي جاي ووقف له
مشى وهو حافي لين ابتعد عنه وهمس:شقالت لك ؟
سلطان:علامك عالبنت ؟
بهاج مارد وكمل سلطان:تشكي منك
صد بهاج واخذ نفس وتقدم له سلطان:تعاملها معاملة الجدار وسط خواتها ليه ؟ تضحك لاختها وتلف عليها تتبدل ملامحك علامك انت ؟ البنت رقيقه كما النسمه انت ترعاهم عن قسوة ابوهم وتقسى عليهم بعد ؟
بهاج:ياخي تكويني ياسلطان تكويني اقسم بالله ، لاهي درب خضر ولاهي درب شوك ، تاخذني يمين وشمال اتشكل بألف حال وانا يمها
سلطان تنهد وكمل بهاج:اتجاهلها لين يختفي اللي احسه
سلطان:تهقى يختفي ؟
بهاج نطق بسرعه:غصب
سلطان مارد وبهاج ظل يناظره ومشى سلطان تاركه وتنهد بهاج التفت يناظر نورا وريوف ورفع راسه لمكان مشيتها
كان وده يتعذّر لها انه مالحقها ماجاها ويقول اعذريني كان ما اقدر اجيك ويبقى طيفي لو تخيلتي معاك
هو يقدر يقسم الان ان روحه سبقتها ومشت معها ولا خلتها وكانت مشيّة ظلالها لكنه سكت وظل محله واقف
جلس بينهم واخذ نفس ولف لريوف:تجين الظهر تفتحين لي محاضراتي ؟ وعلميني عليها مره وحده ماودي اشغلكم
نورا لفت له:أنهار موجوده
ريوف:عادي بهاج اجيك
ابتسمت له وهز راسه والتفت لسلطان وصد عنهم
سلطان لف للبنات:بدون طرده توكلوا لا يجي ابوكم يهد بنا
نورا:بكير !
سلطان:لاحقين
ريوف:نمل لحالنا تعرف ؟
فهد:واحنا وشو ماخذينا وناسه ؟ ترانا اوادم
ريوف:ياليت تسكت طول القعده لان منجد ماتعرف تسولف
فهد:تصبحين على خير
وقفت وهي تناظره والتفتت لبهاج:نام بدري بجي ازعجك
ضحك لها ومشت مع نورا ولفت نورا:اشبها أنهار ؟
ريوف:هرمونات يمكن
التفت سلطان لين بعدوا وناظر بهاج:فضفض ياولد عمي
رجع ظهره ورا سلطان واتكى على المركى وصب له من الدله قهوه
وناظرهم فهد:وش العلم ؟
سلطان:ما لاحظت عليه شي ؟
فهد:والله اني غبي لكن لاحظت شي مدري تقصدونه والا لا
بهاج ناظره وسلطان ابتسم ولف لبهاج:خليت الغبي يدرك السالفه
بهاج تنهد وصد وفهد ناظره:علامك على البنت ؟
ضحك سلطان والتفت بهاج:شسويت ؟
فهد ناظرهم:مدري ماكنت تعاملها كذا تلف لاختها تضحك بوجهها وان نطقت هي كشرت
بهاج:ما كشرت
سلطان:تقلبت ملامحك
بهاج مارد وسلطان ناظر فهد:يبي يتجاهل وجودها لين يتجاهل شعوره
ابتسم فهد:عاجبتك ؟
عض شفايفه سلطان وضحك:ابو زيد
بهاج تقدم لهم:بتضحكون وتقلبونها مصاخه قلبت قشكم عليكم ورحت ارقد
سلطان:نمزح ياولد
بهاج:لا تمزح
فهد:ما بنضحك خلاص
بهاج رجع ظهره لورا وناظرهم:امي جاتني هي ما تكلمت بالصريح بس كانت تحس فيني ، لمحت لي انهم بحسبة خواتي وما يجوز اظهر لهم غير كذا
سلطان صد ورفع حاجبينه
فهد:وش خلاها تقول كذا ؟
بهاج بلع ريقه:مدري يمكن حست بشي
سلطان:او يمكن شافتك
بهاج:شافتني وش اسوي ؟
سلطان:يتقلب حالك عند أنهار
بهاج نزل انظاره وسلطان كمل:يكفي تلاحظ وجهك ان نطقت بإسمها
فهد:بالله عاجبتك ؟
بهاج:مدري ياشيخ بس ماني راضي عن اللي يصير اقسم بالله ما اطيق نفسي
سلطان همس:تماسك
رفع انظاره بهاج والتفت سلطان بجديّه:ابوها كسر راسك والبنت شبعانه نظر شبعانه دلال ابوهم عطاهم من الاهتمام لين شبعوا
فهد:وعطبها الحين
سلطان ناظر فهد:ما يهم الحين بس البنات ما يشوفونا اكثر من كذا ، كلهم
بهاج ناظر سلطان ولف له سلطان:هذا رايي وشوف عيني
بهاج وقف تاركهم وناظره سلطان:اقعد
بهاج:ماودي
ناظره فهد:ضيقت على الرجال
سلطان رفع حاجبه ومشى بهاج رايح لبيته
سلطان:احسن ما يقعد يهوجس بوهم
فهد:نقصّت الرجال بعين البنت بالغت !
سلطان:اقص شنبي يافهد ياولد عمي ان التفتت البنت لبهاج
فهد صد عن سلطان ومدد رجوله وحط يدينه ورا راسه
،
حك راسه وهو ينتظر جيّة ريوف وتأخرت عليه سمع الباب يدق ومشى وفتحه وجمد محله
أنهار ابتسمت:جيت لا تخاف بتحضر كلاساتك
بهاج:لا ما بحضرها
ناظرته وعقدت حاجبينها:ليش ؟
بهاج:عندي شغل ما يمديني
أنهار:بهاج اشبك ترا ينحط لك غياب !
بهاج:واذا ؟ انا ادرى
سكتت وهي تناظر حدة ملامحه وبلعت ريقها ورجعت على ورا:بكيفك
مشت راجعه للملحق وهي عاقده حاجبينها بزعل انكمشت ملامحها من خشونة تعامله معاها ودخلت حطت اللابتوب بالصاله ومشت للغرفه ودخلت ناظرتهم لابسين عباياتهم:فين ؟
ريوف:عبالي رحتي لبهاج عطيني اللابتوب هو ينتظرني
أنهار:ينتظرك فين ؟
نورا:ارسل لي يسأل عن ريوف قلت بروح انا كمان الجو غيم خيال
سكتت وهي تناظر ريوف تلبس شوزها وتخرج وتاخذ اللابتوب معاها
نورا وقفت وناظرتها:بتجين ؟
أنهار هزت راسها بالنفي وصدت بعيونها:باخذ شاور
نورا:اوكيه
خرجت وتركتها بالغرفه وجلست أنهار وهي تناظر الارض بضياع كل اللي اكتشفته انها متجاهله من بهاج وبدون سبب حست انها ثقيله كرهت هذا الشعور اللي تحسه
مسكت نفسها ما تبكي لانها بتحس انها دلوعه وتبالغ بس من لفت وناظرت حليمه تخرج من الغرفه بدون جلال وبيدها صينية غداء ومبتسمه شدت على قبضة يدها بقوه
ناظرتها حليمه وتلاشت ابتسامتها ومشت لها
:تبين غداء ؟
هزت راسها بالنفي ومشت حليمه للمطبخ وخرج عمر من الغرفه يغسل يدينه ومشت وقفلت الباب وبكت خلفه هي تكره شعور انها مهمشه غير مرئيه تكره تشوف ابوها تعايش بسرعه ونسي وجودهم وحاجتهم له وتكره تشوف نفسها ثقيله وتتحسس من أدنى كلمه
،
بهاج عاقد حاجبينه ويكتب بتركيز متجاهل سوالفهم
سلطان:وانتي محد كلمك ؟
نورا:مين يكلمني ؟
سلطان:الورع هذاك
نورا تنهدت وهمست:لا
سلطان:بيّن النيه عليه
ريوف:ليش تنكد عليها اففف سلطان
سلطان:مانكدت بسم الله سألت سؤال عادي
ريوف:ماله داعي
سلطان عدل جلسته:زعلتك ؟
نورا:لا
لفت لريوف:اتصلي على أنهار تجيب جوالي معاها
التفت بهاج من جابوا اسمها
ريوف:قالت بتجي ؟
نورا:ايوا بتاخذ شاور
بهاج:لا تطلع يلفحها هواء ارجعوا انتم لها
لفوا عليه ونورا تاففت:الجو خيال كأنه بتمطر بيفوتها
رفع راسه بهاج وناظر الغيم وهمس سلطان:ولا كأنه ظهر سبحان الله
رحع نزل راسه للابتوب وسألته ريوف مباشره:أنهار رجعت باللابتوب من برا توقعتها جاتك
بهاج رد وعينه على اللابتوب :لا
ريوف:اي قلت لها اني باخذه عشانك
انصدم ولف لريوف:وش قلتي ؟
ريوف عقدت حاجبينها:انك تبغاني اعلمك عليه
ظل يناظرها جامد والتفت يناظر الملحق من بعيد هي ماجات لانها فهمت
هو لمحها تضايقت من جموده لكن حسّ انه بالغ عشان يبعدها عنه هو ما توقع انه لو بيتجاهلها وبيتجاهل شعوره بيعورها ! بيخلي داخلها مليون سؤال ومليون شعور
نورا رفعت راسها بذهول:ترشش
شال لابتوبه ووقف:بدخل عن الماء
مشى تاركهم ومرّ من على الملحق ووقف ثواني قدامه لين حس ان الارض بدأت تتبل ومشى بسرعه للبيت حط اللابتوب بنص الصاله ومشى للباب يناظر المطر اللي انهمر
ومسح وجهه بضيق ومشى للصاله وجلس