انثنى غيم نجد لخد الحجاز النرجسيه

٥١

خرجت من شافتهم متجمعين بالمجلس ولفت لنورا وريوف اللي لابسين عباياتهم:بتسلمون ؟
نورا:شرايك ؟ الرجال راجع من جلطه
خرجت وتنهدت تمشي معهم ونطقت ريوف:عشان ابويه سلموا عليه بنات
نورا:لا بسلم عشان انا ودي اسلم مو عشان احد
ناظرتها ريوف ورفعت حاجبها نورا ودخلت ناظرتهم متجمعين كلهم وهمست:سلام عليكم
رفع راسه رَده ومشت نورا له وباست راسه:حمدلله على السلامه
هز راسه بتعب وسلمت على راسه ريوف:الحمدلله على السلامه
تقدمت أنهار وناظرته بتردد هي تذكرت الكف اللي ذاقته منه ولين الحين ما نسيته ولاقدرت تنحني تبوس راسه ابداً
رفع راسه عمر من شاف وقوفها وهمس:أنهار
لفت تناظره ورجعت تناظر رّده:ماتشوف شر
مشت تجلس بدون ما تبوس راسه والتفت بهاج على عمر اللي ناظرها بحده
جمعه:الحمدلله على سلامتك هذا انت بين عيالك ياربي لك الحمد
زيد:اي والله حمدلله حمدلله اخر الاوجاع ان شاء الله
وقف سلطان ياخذ الدله من على الجمر بخارج المجلس ودخل يصب لهم قهوه
وقف عند البنات ورفعت راسها نورا له وهمس:انا مسويها
كان يذكرها كل شوي بقهوته وكأنه يثبت لها ان حوارهم الأول ما نسيه
مد لها الفنجان وناظرت الفنجان بكفه واخذته منه
وقف عند أنهار يصب لها وابتسمت له أنهار تاخذ الفنجان وجلس سلطان بجانب بهاج
ورفعت راسها أنهار من نطقت شموخ:انتبهي لا تحرقك ما انتي متعوده عاللهايب
التفت بهاج بصدمه من سكتوا اللي بالمجلس وبلعت ريقها أنهار تناظر شموخ اللي ابتسمت لها
لفت حليمه تناظر أنهار وتنحنح بهاج يرفع صوته لرَده:عدت سليمه ياربي لك الحمد ما طولت وطلعت لنا بالسلامه
هز راسه رَده له وابتسم بهاج والتفت زيد له:حدد يوم وخلنا نتوكل على الله
سكت بهاج من فهمه والتفت عليه سلطان يناظره
بدلت نظرها أنهار من عليه على شموخ اللي ابتسمت لها لانه سكت ماتكلم اكتفى يهز راسه ويسكت
والتفت يناظرها تناظره وفهم نظرتها فهم انها كانت تنتظره يقول لا لكنه ماقدر
رفع انظاره عمر لبهاج اللي يناظر أنهار وتكلم بهدوء
:محد قال وش سبب الحريق ؟
عبدالله:لا والله
عمر:غريب بليلة زواج بهاج يصير كذا
رفع نظره بهاج لعمر اللي يناظره وابتسم عمر
:لو ماكنت موجود كنت بقول انها فعايلك
لاحظت حليمه انه بيضغط على بهاج بدون سبب ولفت عليه:عمر
ناظرها وارمش لها بهدوء يسكت ورجع صد
زيد:المهم سلامة الوالد الحين
جمعه:حمدلله ياربي لك الحمد
لفت ريوف تناظر عمر اللي نزل راسه ورجعت تناظر جمعه
وقفت تخرج من المجلس وخرجت وراها نورا وقامت أنهار تناظر بهاج اللي وقف يخرج وراهم
مشت وهي عاقده حاجبينها بحده ومشى يلحقها:بنت اصبري
لفت عليه وناظرته:ليش ماتكلمت؟
بهاج:تشوفينه وقت مناسب ؟
وقف قدامها وتكتفت أنهار:بالله ؟ ننتظر عمك بكره يجيب الشيخ يعني ؟ والا ننتظر شموخ تفضحني ؟
بهاج:ما بيجيبه سمعتيه يقول حدد يوم بتكلم مع سلطان بالاول
أنهار:حلها بهاج
بهاج:وش بيصير على روحتكم ؟ بتتأجل ؟
أنهار:بتنلغي قلت مستحيل اروح مكان بدونك
ابتسم لها بهاج والتفت خلفه ورجع ناظرها:ماتبين روحه للرياض مع ريوف وفهد ؟
ابتسمت:والله ؟
هز راسه وعضت شفتها أنهار:ونورا طيب ؟
بهاج:علامها ؟
أنهار:بتجي معانا اكيد
بهاج:اي بتجي وبقول لسلطان بعد يجي
عقدت حاجبينها وهز راسه بهاج:تبين نقعد لوحدنا ؟
أنهار:شرايك يعني ؟
بهاج ابتسم:راحت عليك
أنهار:ماراح اموت قهر ترا
بهاج:اعرفك
مشى قبلها يضحك ولحقته تضرب ظهره والتفت يضحك:افا
ناظرته بقهر:لا تطلعني خفيفه ! حتى انت ودك
بهاج:لا انا قلت ناخذهم انتي ماتبينهم
أنهار تنرفزت:بهاج
ضحك ومسك كفها:طيب نروح لوحدنا نصرفهم ماعليك
أنهار ماردت وهي تضحك ولفت تناظر حليمه اللي طلعت واخذت نفس تبعد كفها عن كف بهاج
ولف بهاج يناظر امه وهمس لأنهار:ناويتنا
أنهار:اكيد فهمت شموخ ، اذا احد سألني بقول ايوا انا
ناظرها بهاج وعض شفته يحذرها ومشت تدخل الملحق ولف بهاج لامه:عسى خير
حليمه:وبن انحاشت ؟
بهاج:ما انحاشت لحقت خواتها
حليمه:بهاج من حرق مستودع جدك ؟
بهاج:لا اله الا الله حتى وانا كنت بينهم يتهموني
حليمه:من ما يبيك تتزوج ؟
بهاج:ماهي فعايل احد تلاقينه انحرق لوحده
حليمه رفعت حاجبها:بهاج !
بهاج:وش ببالك قولي خل نشوف
حليمه:هالبنات الثلاث حرقوه
بهاج انصدم:من ؟
حليمه:بنات عمر
بهاج ضحك لانها ماتوقعت انه فعل أنهار لوحدها وناظرت ضحكته حليمه:هم ؟
بهاج:والله صرتي تضحكيني
حليمه شدت ذراعه:بهاج
بهاج اخد نفس:يتهيأ لك تعرفينهم ما يشغلون فرن وبعدين كانوا مبسوطين بزواجي
حليمه رفعت حاجبها وكمل بهاج: بس لا تجيبين طاري هالتفكير قدام أحد
مشى بيروح ولف لها:اي بنروح كلنا سوا بالليل لريوف وفهد
حليمه:ليه مايعرفون يروحون لوحدهم ؟
بهاج:يعرفون بس انا ودي نطلع سوا
حليمه:مارديت على عمك متى ودك ؟
بهاج:يصير خير وقتها
حليمه:بهاج !
مشى وتركها واقفه محلها يتصدد ما يطول حواره معها
'
لبست عبايتها تاخذ شنطتها وتطلع شعرها
ريوف:كل هذا عشان بتوديني الرياض وبترجعين؟
أنهار:من زمان ماخرجنا كذا كلنا سوا
نورا:انا صراحه ماكان ودي بس ماراح اجلس لوحدي اكيد
أنهار ناظرت شكلها بالمرايه وهي تعدل روجها
:بتجين حياتي كلنا بنطلع ننبسط
لفت عليهم:بسبقكم
خرجت وناظرته فاتح باب سيارته ويدخن وابتسم من شافها وتقدمت له وفتحت الباب اللي على يمينه:نسبقهم ؟
بهاج رمى زيقارته والتفت عليها:سلطان بيجي معنا
لفت من شافت سلطان وفهد جايين ورفع حاجبه سلطان:يالطيبه اركبي ورا
عقدت حاجبينها ولفت لبهاج اللي رفع كفوفه:مالي شغل
أنهار:بهاج ماراح تخليني اركب ورا صح ؟
سكت بهاج ونطق فهد:خذلك فهّى
ابتسمت أنهار:بهاج
رفع حاجبه سلطان يناظر بهاج اللي فاهي ومبتسم وكملت أنهار:بهاج بليز
قفل بابه بهاج ولف لسلطان:ورا ، الاهل قدام
ضحكت ولفت على سلطان وناظره سلطان:اعقب ترجعني ورا وتركب مرتك قدام ؟
بهاج:الشيخه ام سعود هذي مو اي احد
ابتسمت أنهار تناظر سلطان ولف فهد يربت على كتف سلطان:لو تجي معي ركبتك ورا الصراحه انا بعد
سلطان ناظره:ونعم يا عيال عمي
رجع للخلف وفتح الباب وركب وضحك بهاج
ناظره سلطان:اضحك يالخفيف اضحك
لف بهاج وهو يضحك وناظر ريوف ونورا طالعين وركبت ريوف مع فهد ومشت نورا وفتحت الباب ومن ناظرت سلطان رفعت راسها لأنهار:بنت
أنهار:اركبي طولتي
ناظرت سلطان اللي يناظرها واخذت نفس وركبت وقفلت الباب وخرج بهاج من المزرعه
لف يناظر ابتسامتها ورفع عيونه على نورا اللي بالمرايه صاده للشباك ومدّ كفه لكفها ولفت عليه
ناظرت نورا بالخلف صاده وابتسمت له تشد على كفه
بعد ذراعه من نطق سلطان:لا تاخذ راحتك يالطيب ، سوق زين
ضحك بهاج يشد على دركسونه والتفتت نورا عليهم تناظرهم
نزل راسه لجواله من ارسلت له:بتشغل لي اغنيه اهداء ؟
رجع يناظر الطريق ويكتب لها:بوسه على خدي واشغلك
ناظرته بصدمه ورفع حاجبينه يناظر الطريق
سلطان:ياخي اشغلتنا ركز بطريقك
بهاج:انا لله شتبي انت قروشتني
سلطان:ياتركز بطريقك يا ارجع ورا خلني اسوق
بهاج ناظره من المرايه :اعصابك
نزل نظره يشغل جواله بالسياره والتفتت أنهار:انا بختار الاغنيه
سلطان؛عيّنا خير
بهاج:ابد السياره وراعيها تحت أمرك
أنهار ابتسمت له ورفعت راسها لنورا اللي صاده عنهم ورجعت تختار اغنيه
كان يلتفت يناظرها تغني مع اغانيها ومبتسم تاكي بيده تحت دقنه يتأملها وماسك بذراعه الثانيه الدركسون
ضحكت تشوف نظراته لها ولفت تناظر نورا اللي صاده وناظرت سلطان اللي يناظرهم ناقدهم
وخفضت بصوت الاغنيه:نورا
لفت عليها وعقدت حاجبينها:اشبك ؟
نورا:مصدعه بس
أنهار:الحين نمر ناخذ قهوه
سلطان:ماتفوّقها غير دلتي
لفت عليه تناظره وناظرتهم أنهار ولفت لبهاج ورفعت حاجبينها تصد عنهم
التفت سلطان يناظرها ساهيه وصاده عنه ومد ذراعه يسحب كفها من حضنها ويلفه يناظر جرحها
لفت عليه بذهول وناظرت يده اللي ماسكه كفها وسحبتها وهمس:باقي تعورك ؟
هزت راسها بالنفي والتفت سلطان يشوف بهاج وأنهار اللي مندمجين يغنون سوا ونطق لها
:مانسيتي زي ما انا مانسيت !
لفت تناظره وناظرت أنهار وبهاج ورجعت صدت عنه
نزلت نظرها لكفها تتأمل الخدش اللي بوسطه وانعاد عليها الموقف
خرجت من بين ازعاجهم ورقصهم وشافته جالس لوحده ومشت بإستغراب تسأله:اشبك ؟
رفع راسه سلطان:ماهو وقتك ارجعي المكان كله رجال
نورا:كنت بشوف أنهار بس ليش جالس هنا ؟
سلطان وقف وتقدم لها:بتروحون الليله ؟
بلعت ريقها ترجع لورا ورفعت كتفها:ما اعرف
سلطان:ظنك بينتهي كل شي هِنا ؟
نورا سكتت تناظره وكمل سلطان: تعيشين وهم وتبين تقنعين شاربي اللي مبطي عليك احلقه انك تبينه ومازلتي تحبينه ! ليه تشوفين اللي ودك تشوفينه ؟
نورا عقدت حاجبينها تناظره وناظر استغرابها وهمس:ماتشوفينك في فراغ عيوني ؟ وفي سموم ضلوعي براد ؟ تقولين سلطان ليه تتكلم بهذا الوقت ؟ اقولك هدّ حيلي الكلام ماطلع ، وانا جبان وأعترف يوم اني اشوفك تنامين وتصحين على هوجاس شخص ثاني ما اقوى انطق وهذاني الحين ادفع ثمن صمتي ، رحتوا سوا لا بقي لبهاج شي ولا بقي لي شي
نورا:سلطان !
اخذ نفس يصد بعيونه بحرقه وناظرته نزلت نظرها لذراعه اللي حرقها خوفاً عليها وكيف قدم نفسه للأذى عنها ولا تردد ورجعت ترفع عيونها له:تعال نبعد عن هنا
ناظرها ولف يمشي بممر النوير وبلعت ريقها من توترها ومن عقدة حاجبينه وصوت تنفسه وغضبه ولفت عليه:ليش أنا ؟
لف عليها ووقف وكملت نورا:يعني اقصد ليش؟
ناظر نظراتها المرتبكه وتساؤلاتها:انتي تتسربين من بين اصابعي واخاف اخاف اني اتمسك بطفيف أمل اخاف اتأمل بجُبن ، واخاف اقدم واشوف منك نظرات الشفقه والرفض مابي احس اني طحت من أعلى صخر للقاع بعدها ، سكتّ وقلت أوهام قلت ماهي لك ماهي يمّك وانتي تلزمين السكوت والتجاهل ، انا ظنيت بعد ما سمعتي مني أعتذار وجيتك وقطعت الخطاوي تفهمين تمدين لي طرف خيط او ترديني عنك بالرفض لكنك سكتي خليتي الايام ذي كلها تمرّ وانا مدري وش شعورك مدري وش جوابك مدري هو انتي تفهميني والا ماتفهميني
رفعت كفها بتمسك ذراعه من ارتباكها من عصبيته واندفاعه وبلع ريقه يقرب لها:قولي سلطان اشوفك ، سلطان احس بك او قولي سلطان ما ابيك بس لا تسكتين
ناظرت نظراته لها هي ضايعه مذهوله وتعيش شي مافكرت فيه ولا ظنته ماتوقعت انها بيوم تنحط تحت هذا الكمّ الكبير من الضغط من مشاعر تفجرت لها ، يكويها خذلانها الأول هي ماتخطت حبها الأول وكيف انه اختفى وماترك بقلبها الا ذكريات كيف تقوى تلتفت لسلطان من جديد ترجع تعيش نفس المشاعر من جديد
شافها تناظره وعقد حاجبينه يزيد غضبه من سكوتها من صوت افكارها اللي يلاحظه بنظراتها وتقدم يمسك ذراعها بقوه يقربها منه
مسك فكها بقوه يردها للخلف هو يبي منها اي كلمه اي قول اي شي تقوله ولا تسكت
الوقت يمضي وهي بتروح وهو بيقعد بدون جواب بدون ما يفهم هو وش هو عندها
بلعت ريقها تحط كفها على صدره من قربها لدرجة حست بلهيب انفاسه على وجهها وهمست:سلطان
سلطان:سلطان ان ما تكلمتي بـ
فزّ من النيران اللي تفجرت خلفهم وصرخت برعب نورا سحبها ودفعها وطاحت على كفها اللي خدشه شجر وصخر
التفت يشوف المستودع خلفهم بخوف وصدمه ولف لنورا ومسك ذراعها:قومي امشي
عقدت حاجبينها بألم من الخشب اللي طاحت عليه وخدش كفها وقامت ولفت لعبايتها اللي انشقت من اسفلها ومسكت كفه بخوف ومشوا سوا
دخل الملحق ودخلت معاه وقفل الباب والتفت:من حرقه؟
تنفست بخوف ومسكت كفها بألم:ما اعرف
مسك راسه ومشى للشباك يناظر الحريق ولف ومن ناظرها تناظر كفها تقدم:تعورتي ؟
لفت بتجلس وطاحت عبايتها عن كتوفها العاريه ونزل انظاره لشامة نحرَها من بانت له ورفعت انظارها ومن طاحت عيونها بعيونه ارتبكت تغطي نفسها:جرح خفيف اطلع شوف اش صار
سلطان بلل شفايفه ومسك كفها يناظره ورجع يرفع عيونه لها:اغسليه وغطيه
هزت راسها وسحبت كفها ومشى يخرج سحب شماغه عن راسه ومشى بسرعه للمستودع
'
فتحت عيونها تتأمله الحين بالسياره تحت نظرات سلطان لها
رفعت راسها تشوفه ورجعت تلف للطريق بصدود
هي ماتفهم اذا كانت فعلاً نست بندر وتخطته وتقدر تفتح قلبها من جديد على مصراعيه لسلطان
سلطان اللي كانت ماتشوفه الا شخص عابر أقل غلاوه من بهاج
فتح شباكه بهاج يشغل سيقارته ويناظر الطريق ولفت له أنهار من شافت السيقاره بين اصابعه وابتسم يفهمها يفهم نظراتها من يشغل دخانه قدامها ورفع باصابعه سيقارته يأشر على ضلوعه بتكرار يدلل على انها هِنا وسط ضلوعه تتسرب نفس ما يتسرب السمّ من دخانه لصدره
وابتسمت لانها تفهمه من عيونه اللي تتأملها ومن صدره اللي يأشر عليه ولفت للطريق وهي مبتسمه
وقف ورا سيارة فهد ومسك ذراعها وهو يناظر المرايه ونزول نورا وسلطان من السياره ولفت تناظره ورجعت تناظر دخولهم ورا ريوف وفهد وجات بتلف عليه لكنه مسك وجهها بيدينه يبوس خدها وضحكت تمسك يدينه بذهول
رجع يكرر تقبيلها وهو يتنهد:اهخ أنهار
بعدت عنه تمسك كتوفه ونطق:محروم طول الطريق
عض شفته:محروم طول عمري الله يسامح ابوك بس
لفت بتوتر من الطاري تصد تنزل وقفل سيارته ونزل معها
ورفع ذراعه يسحبها لحضنه وناظرته:بهاج بنرجع نجي هنا لوحدنا
بهاج:ان شاء الله
أنهار:ما اطلبك انا اقولك
بهاج عقد حاجبينه:صرتي تديرين امورنا انتي ؟
أنهار:المره الجايه عليّ بس بندور كذبه جديده عشان نكون لوحدنا
بهاج دق باب الشقه:على خشمي
ابتسمت له ونزل ذراعه ودخلت أنهار الشقه وقفل الباب بهاج يدخل بينهم
بهاج:جمع لنا فرش خلنا ننام عندك الليله
فهد:تحسبني بقولك اقلط وسلوم رجال ؟ توكل فارقنا ورانا دوام
سلطان:حتى هو عنده دوام
ضحك بهاج:لا تذكرني
رفعت عيونها أنهار:اذا كسلان انا اقوم عنك احضرها
ابتسم بهاج يناظرها:تدلعيني
لفوا نورا وريوف يناظرونه وعض شفته سلطان من فجرها وصد عنهم ولف بهاج يناظر البنات يناظرونه
:تبون عشاء ؟
لفت تناظر ريوف اللي جلست جنبها:ياليت تسوي خير جوعانه
بهاج:تم
قام وناظر سلطان بيجلس:وين يالحبيب امش معاي
سلطان:توكل لوحدك بس
بهاج:الرياض زحمه تسليني بالعلوم الزينه
فهد:لحد يعزمني صدقوني ما بزعل لو رحتم سوا
بهاج:محد مناديك
سلطان تنهد وخرجوا سوا ولف فهد للبنات قدامه
:نشبت معكم الحين ؟
نورا ناظرته بهدوء:فهد ليش ما تمشط شعرك ؟
فهد:انا ليه مارحت معهم ؟
عقدت حاجبينها ريوف:منجد ليش ماتمشط شعرك على ورا وتعدله ليش ستايلك كذا قديم
أنهار:وديه الحلاق
ريوف:يبغى له رجل الأدغال هذا
ضحكت نورا عليه وناظرهم فهد:ترا اقدر ادافع عن نفسي بس مالي خلق
ريوف:تدافع اش تقول ؟ حتى انت مو راضي على شعرك هذا بنلاقي فيه ورث ابو بهاج لو نحلقه
ضحكت أنهار وناظرها بحده فهد وضحكت ريوف
:والله منجد شليويح خل نحلق شعرك يمكن نصدق انك فهد
فهد:ياخي راعوا مشاعري
نورا:حرام خلاص خليه بحاله
ناظرته ريوف بتهديد:بحلقه لك
مارد عليها يناظر تهديدها وضحكت أنهار لانه قمط