تجولت غالية مع جلال لتشترى طلبات العشاء, كانت تشعر بغرابة الموقف لأنها تسير بصحبة رجل غريب ولأول مرة , كان جلال صبورا جدا ودخل معها للماركت ويشاركها الرأى في كل شيء وقال لها بعض الاقتراحات وزاد إعجابه بها لأنها كانت تمشى بثقة وتختار ماتريد بدقة وبعد ساعات من الشراء أخيرا انتهت وتم وضع كل شيء في السيارة وقالت غالية: مش عارفة أشكر حضرتك إزاى؟
تشكرينى على إيه أنا صاحب العزومة.
لأنك تعبت نفسك وجيت معايا وانا عارفة إن الرجالة مش بيحبو يخرجو مع الستات خصوصا للشراء.
لأ أنا مش كده الحقيقة انا إستمتعت بالخروجة دى جدا, إنت عارفة إن حياتى كلها شغل وإجتماعات وقليل قوى لما بالاقى وقت لنفسى.
ضحكت غالية وهى تدخل للسيارة وقالت: وهى دى برضه خروجة تليق برجل اعمال.
رمقها جلال بنظرة جميلة وضحك ولم يتكلم وانطلق بالسيارة لبيته وخرج الخدم لحمل الأكياس فقال: إتفضلى ندخل نكمل كلامنا.وبالمرة تشوفى المطبخ ولو فيه طلبات معينة نجهزها.
دخلت غالية ونظرت لها وفاء بحنان وقالت: غالية هانم أهلا وسهلا.
لأ إيه غالية هانم دى؟ غالية وبس انا مش بأحب الألقاب من فضلك.
خلاص يابنتى زى ماتحبى.
إتجه جلال للمطبخ وغالية تتبعه وعندما دخلت فتحت فمها من الدهشة, كانت مساحة المكان كبيرة ومجهز بفرن كبير ويوجد شواية رأى جلال دهشتها فقال: المطبخ كان صغير وعلشان كده فتحت عليه اوضة فبقى بالمساحة دى.
مطبخ رائع
تجولى كده وشوفى إيه ناقص.
تجولت غالية في المطبخ وهى تنظر بإنبهار وفكرت بأن لو لديها مطبخ مثل هذا لن تخرج منه إبدا.
نزلت نورين السلم ونادت: ماجدة .. ماجدة ....
إقتربت ماجدة فسألتها نورين: أنا سمعت عربية بابى هو فين؟ في المكتب؟
لأ في المطبخ.
إبه المطبخ! بابى دخل المطبخ ؟؟؟ غريبة.
أيوه دخل مع كابتن غالية.
كابتن غالية بتاعتى!!
أيوه .
فكرت نورين بحيرة واتجهت للمطبخ بسرعة ودخلت كان والدها يضحك مع غالية رفعت حاجبيها بدهشة فهذه أول مرة ترى والدها يضحك بهذه الطريقة منذ سنوات, وقفت في مكانها ولمحها والدها فناداها: تعالى يانورين
إقتربت منهم وهى تنظر بعدم فهم لما يجرى فقال جلال: كابتن غالية.. قصدى غالية هاتتولى عزومة العشاء.
هو إنت كابتن وإلا طباخة؟؟؟
هو علشان كابتن يبقى ماعرفش أطبخ.
أنت تقرأ
دموع غالية
Romanceفى بعض الأحيان نضحى من أجل من نحب ونعمل من اجلهم ولكننا لانجد التقدير والحب فى المقابل ولذلك يجب أن ننسحب للحفاظ على أنفسنا من الجرح حتى لو كان من جرحنا هو أكثر شخض نحبه
