في بيت جلال أغلق باب حجرة المكتب وهو مندهش من ثورة وغضب إياد عليه وقال: انت بتزعق ليه يا إياد؟ بأقولك وافقت بنفسها.
ومسألتش نفسك وافقت ليه؟ ليه توافق على جواز مفيهوش مشاعر ولا حب , غالية إنسانة ممتازة وأكيد عايزة تعيش حياة طبيعية وجواز حقيقى ويبقى عندها أولاد , إيه اللى أجبرها توافق؟ أكيد فيه سبب خلاها تغير رأيها بعد مارفضتك.
هي أكيد درست العرض بتاعى هاحقق لها المشروع اللى بتحلم بيه و..
قاطعه إياد وقال: لأ غالية مش من النوع ده ولا يمكن أصدق إنها من النوع اللى بيجرى وراء مصلحته أو وراء الفلوس. , فيه سبب وراء موافقتها.
فكر جلال قليلا وقال: مش عارف هي دخلت الصالون وأعلنت موافقتها وبس وبكرة الصبح هاتيجى تفطر معانا ونتكلم.
ظهر التفكير على إياد ثم قال: اللى إنت بتعمله غلط ياجلال إنت كده بتحرم غالية من حقها الطبيعى في الحياة.
هي هاتعيش كويس وترتاح وتحقق اللى بتتمناه.
والأولاد ؟ مفيش ست عايزة تعيش من غير ماتبقى أم... .
صمت جلال فأكمل إياد: الجواز مينفعش بالطريقة دى ياجلال.. صدقنى مينفعش مسيرها تسيبك وتبعد علشان تحقق الأمومة ساعتها هاتعمل إيه؟
مفكرتش..
ومفكرتش كمان إنها ممكن تقع في الحب .
وقف جلال وقال: إيه تقع في الحب؟؟
أيوه مستغرب ليه ؟ ده شيء طبيعى , غالية ممكن تحب أي راجل , إنتو صحيح بينكم صداقة ومودة كبيرة لكن هي ممكن قلبها يتحرك وتحب ساعتها هاتعمل إيه؟
شحب وجه جلال فربت عليه إياد وقال: جلال أنا بأكلمك دلوقتى كصديق مش كدكتور أرجوك إنهى موضوع الجواز ده .
أنهيه يعنى إيه ؟
يعنى قول لها إنك غيرت رأيك ومش هاتكمل.
مستحيل .. مستحيل.
مفيش مستحيل ياجلال , الجواز مش صفقة مش عقد بين إتنين زى عقد بيع , دى حياة ولازم كل واحد منكم يآخد اللى هو عايزه وإذا ده محصلش .. هاتخسرو كتير.
يعنى إيه؟
هاكون واضح معاك أكتير من كده كل واحد منكم ليه إحتياجات , إنت فاهم قصدى , الجواز لازم يوفرها بين الزوجين لكن إنك تتجوز واحدة وتعيش معاها في بيت واحد زى الإخوات ده شيء مش منطقى وغير مقبول بالمرة.
عايزنى اعمل إيه؟
قول لها إن الجواز هايكون حقيقى علشان تعيشو حياة طبيعية مع بعض وتكونو أسرة هي أكيد بتتمنى تكون أم وغالية إنسانة ممتازة وزوجة أي راجل يتمناها , قول لها إنك بتحبها ياجلال وتبقى دى البداية.
أنت تقرأ
دموع غالية
Romanceفى بعض الأحيان نضحى من أجل من نحب ونعمل من اجلهم ولكننا لانجد التقدير والحب فى المقابل ولذلك يجب أن ننسحب للحفاظ على أنفسنا من الجرح حتى لو كان من جرحنا هو أكثر شخض نحبه
