إستيقظت غالية وفردت ذراعيها براحة وفتحت عيونها فرأت ملك جالسة بجوارها تبتسم فسألت: ملك .... صباح الخير.
صباح النور سندريلا.
جلست غالية وسألت: صاحية بدرى ليه؟
بدرى !! إنتى عارفة الساعة كام ؟
كام؟؟؟
الساعة 10
إيه 10 !! أنا إزاى أفضل نايمة لدلوقتى؟؟
كنتى مرتاحة وبتحلمى .
قومى قومى أنا ورايا شغل ..
نهضت غالية بسرعة من السرير وبحثت عن المنشفة وضحكت ملك وهى تقول: إنتى عارفة إنك كنتى بتحلمى .
وفيها إيه ؟ فين الفوطة بقى.
وكنتى عمالة تقولى جلال جلال جلال ياترى كنتى بتحلمى بإيه؟
توقفت غالية ونظرت لأختها وقالت: بلاش هزار ياملك.
والله مش هزار أنا لما صحيت ولقيتك لسه نايمة دخلت أشوفك لقيتك بتقولى إسمه.
أنا ... مش فاكرة كنت بأحلم بإيه.
مش فاكرة وإلا مش عايزة تحكى لى؟
وقفت ملك أمام غالية وإبتسمت قائلة: غالية إنت بدأتى تحبى جلال؟؟؟
إحمر وجه غالية وقالت: وبعدين ياملك.
أمسكت ملك ذراع غالية وقالت: مش هاسيبك غير لما تقولى بتحبيه.
طنط غالية صباح الخير.
دخول نورين أنقذ غالية من الإجابة ولكن ملك قالت: من غير ماتقولى أنا عارفة.
نورين: عارفة إيه ياملك؟؟؟
عارفة إن غالية ... عندها شغل كتير ..
خرجت غالية من الحجرة مع نورين ودخلت الحمام و أغلقت الباب ووقفت خلفه وزفرت وقالت: البنت ملك دى طلعت أذكى مما كنت أتخيل وأنا اللى كنت فاكراها طفلة.
بالطبع لم تكن أمينة ستستسلم بسهولة إنتظرت حتى خرج جلال للعمل وإستدعت السائق وعندما دخل قالت: قولى بيت اللى إسمها غالية دى فين؟
آنسة غالية!!ليها بيتين ياهانم .
بيتين إزاى؟
بيت في المهندسين وبيت في حى متواضع.
فكرت أمينة لدقيقة وقالت: غريبة ,,, وأمها عايشة فين؟
في بيت المهندسين ياهانم.
طيب عايزاك تودينى عندها.
بس ياهانم ...
نفذ الأمر ومش عايزة جلال يعرف.
أنت تقرأ
دموع غالية
Romanceفى بعض الأحيان نضحى من أجل من نحب ونعمل من اجلهم ولكننا لانجد التقدير والحب فى المقابل ولذلك يجب أن ننسحب للحفاظ على أنفسنا من الجرح حتى لو كان من جرحنا هو أكثر شخض نحبه
