إعتاد جلال في غياب غالية أن ينام في حجرتها لعله يجد رائحتها في المكان وكانت دهشته كبيرة عندما إكتشف بأنها تركت كل ما إشتراه لها ,الدهب والمجوهرات وحتى الشبكة لم تأخذها وتركت دفتر الشيكات وكارت البنك أيضا , فتح الدولاب تركت أيضا الملابس التي إشتراها دمعت عيناه وقال: للدرجة دى ياغالية مش عايزة أي حاجة من ناحيتى؟؟؟
فتح باب الحجرة ودخلت أمينة وقالت: فيه إيه ياجلال؟ كل يوم هاتنام هنا في أوضتها؟ هي عملت فيك إيه؟
أنا مرتاح هنا.. ده يضايقك في إيه؟
عايزة أعرف ليه مطلقتهاش لحد دلوقتى؟
مطلقتهاش لأنى بأحبها .. بأحبها ومش هاسيبها وهافضل وراها لحد ماترجع لى تانى ,
هي سابتك خلاص أخدت مصلحتها منك المطعم والفلوس اللى في البنك والمجوهرات, خلاص مبقتش تلزمها و...
ثار جلال وقال بعصبية: غالية سابت كل حاجة يا أمى ,, شوفى ... آدى دفتر الشيكات وكارت البنك وده كل الدهب اللى جبته حتى الهدوم سابتها ودفعت لى تمن المطعم ,يعنى مكانتش طمعانة ,
نظرت أمينة بدهشة لكل شيء وقالت :عجيبة !!
غالية عمرها مافكرت في الفلوس , غالية كانت فعلا غالية لكن أنا اللى ضيعتها من إيدى بغبائى ودلوقتى مش عارف أرجعها إزاى؟؟
جلس جلال بإنهيار وربتت عليه أمينة وفكرت بأنها ربما تكون ظلمت غالية فعلا وقال جلال: اعمل إيه يا أمى غالية طالبة الطلاق؟؟؟
ظهر التفكير على أمينة ,غالية ليست كما كانت تظن وفعلا ليست طامعة والآن جلال يتعذب لبعدها عنه , ماذا ستفعل؟
كان جلال يعرف أخبار غالية من نورين ويطمأن عليها وإعتادت نورين أن تذهب لغالية كل أسبوع وتبقى معها لعدة ليالى وتذهب لها في المطعم أيضا لكن كان جلال محظور عليه الاقتراب منها أو رؤيتها.
أرادت غالية أن تغير جو قليلا وقالت لأمها: إيه رأيك تيجى نسافر يومين إسكندرية أو أى مكان أنا مخنوقة قوى.
تغيير الجو معاكى هايجيب نتيجة يعنى؟
يمكن ..
غالية إنت بتخدعى نفسك يابنتى إنتى بتحبى جلال علشان كده حاسة إنك مخنوقة بعيد عنه؟
لأ ياماما .. مش باحبه .. وعايزة أنساه.. لو مش هاتسافرو معايا أنا هاسافر لوحدى.
سافرى إنت وأنا هاتابع المطعم...
عندما علمت نورين طلبت السفر مع غالية ولكنها قالت: مش هاينفع ياحبيبتى إنت عندك تدريب في النادى وإلا نسيتى البطولة الجديدة ,, كلها يومين وأرجع..
فعلا حجزت غالية في باص متوجه للأسكندرية وودعتهم في البيت ورفضت أن يذهبو معها للمحطة وقبلت نورين وقالت: إتدربى كويس علشان لما أرجع إن شاء الله هاعمل لك إختبار..
أنت تقرأ
دموع غالية
Roman d'amourفى بعض الأحيان نضحى من أجل من نحب ونعمل من اجلهم ولكننا لانجد التقدير والحب فى المقابل ولذلك يجب أن ننسحب للحفاظ على أنفسنا من الجرح حتى لو كان من جرحنا هو أكثر شخض نحبه
