«من لما بديت نعرف واني عايشة فيها.. كلنا عايشين فيها
مع بعض ..ديما ضحك ومقالب وسهريات ..ماتوقعتش ولا تخيلت في يوم يصير فينا اللي صار.. اللي يشوفنا وقتها مستحيل يصدق شن يراجي فـ كل واحد فينا.. ممكن لو جي حد زمان وقالي بيصير فيكم هكي وهكي كنت لزيته وا...
#سانية_جدي🌹 #الفصل_الأول «سانيتنا» #الحلقة_الثانية _________________________ :ماشاء الله ربي يبارك جاتك صابغة.. مفيدة وهي تنحي فالقوانطي التاني وتوري فيها: عمتي دارت فيها الكافور مع زيت الحنة رقية: من لصق ومن حنى.. مفيدة: عمتي لصقت ومريم وخولة حنوني رقية غمزت: وحمدي وين قعد هدا كله.. مفيدة بضحكة: لوطا.. •برا الدار..في صالة حوش الحاج منصور :فرشي البخشات نور هي ردت: حاضر.. •خولة تعري ع الكيكة: حمزة قالي بنتها محروقة وحمدي ماباش يقربها بكل دروحه مايحبش الحاجات الجديدة مريم: حلو منظرها حرام عليهم خولة تقصص فيها: الا كيمو جبر بخاطري الله يجبر خاطره ع خشة بنوتة شقرا عمرها حوالي 12 عام: قاللكم عبيدة ديروا قهوة «عويلة» مها: عمتي سعاد وع كلمتها خشت ووراها خشت نجلاء في يديها الحوافظ: بديروا تقعميزة عليا بهمس: زعميته ماتندريش مريم التفتت وفنصت فيها سعاد: طلعوا للصالة شن تراجوا ع جية فريال من الصالة: سوسو جيتي سعاد ضحكت وقربت حضنتها: نجيها اللي ترحب بعمتها خولة بهمس: حظوظ سمعتها مريم ضحكت خش عليهم ابراهيم وبعده بشوي زمزم وولدها سراج يكركر مريم استاقظت ومشت ادير القهوة: ماقالش قداش نفر؟! وصال: الكنادر تلاتة قدام المربوعة مريم هزت راسها وقعد تعول: وين راوية؟! سراج وهو يشوف لباب الكوجينة بضحكة: طويلة عمر «السلاااااام عليكم» قالتها بنبرة منغمة ردوها كلهم.. وهي حطت من يدها ومشت طول لمريم ..سلموا بالاحضان قالت سعاد بقيمة حاجب: بابتين معاك مبارح حني مريم بعقدة حواجب وابتسامة: الا راوية عمتي سعاد: غير اطلقيها يا كبدي تسلم بس هما الزوز استاقظوا وبعدوا عن بعض.. وراوية مشت لعمتها تسلم عليها والباقيين كل واحد لاهي بحاجة .. زمزم تستف في بيتزتها.. وخولة وفريال يطلعوا فالحاجات للصالة وسراج خش داخل بعد تنحنح ..بش يسلم ع حناه.. وبهية لحقاته حتى هي واخر شي طلعت سعاد •ونجلاء وابراهيم.. هو قال: عبيلي ميه نجلاء حداك هي لفت للطرمس ومبتسمة.. عبتها ومدتهاله بعد قالت: اشرب بالشوية مصقعة خداها منها بابتسامة راوية تكسرلهم فالعين: ابراهيم هو لفلها: ها راوية اشرت بعيونها ع زمزم الملتفتة ع الدولاب تحوس ابراهيم حمحم ..بعدين دار اشارة بيده لنجلاء وطلع هي ابتسمت وجت لمريم وراية: نعاونكم في شي مريم: كملنا بكري ماكنتيش فاضية بينا نجلاء ابتسمت وهي تحول فوشاحها: نخش نشوف حنينة مالا وطلعت من حداهم مريم بعد وتت صفرة عبيدة: راجعتي درس الاحياء راوية متكية بظهرها ع الرخامة: خليني في طيور الكناري توا زمزم شافتلهم: نبي نعرف كيف سعاد ماكشفتش بنتها لتوا.. كلنا نندروا قريب الموضوع يوصل في جدكم وهي راقدة ع وذانها مريم: عمتي وين تجي هني نادر تطلع من حوش جدي .. حافظين مكانها ويتلاقوا بعيد عليها زمزم بمزح: بيني وبينكم عمتكم كان تلقى تبي واحد من الولاد يدبس في بنتها الزوز قعدوا يضحكوا مريم هدت بعدين قالت: مرت عمي كلمي عبيدة يجي يرفع القهوة زمزم حطت يدها في جيب القفطان مالقاتاش: شورني من ذهاب الشيرة خليته فالحوش راوية مشت للدولاب حطت يدها في وحدة من رفوفه وقعدت تتلمس.. بعدين نزلت من ع الرخامة المتعلية: تليفون رقية ديما هني .. ووجهاته ليهم مريم: فيسع كلميه قبل لتبرد القهوة راوية حطت ع رقمه اللي مسجل «بيدو» واتصلت •🌹•🌹•🌹•🌹• «نبي نبدا في حوشي» هدا كلام حمزة.. واقف هو وخوه قدام حوشهم ويهدرزوا حمدي بتأييد: نشجعك وكان تبي مساعدة اني موجود حمزة هز راسه بالرفض: بنظم اموري وندير مبلغ باهي باش بعد العيد الصغيرة كان حيانا ربي نجيب مقاول حمدي: وانت علاش ماتبني فوقي.. يجيك اقل واسهل حمزة: هكي اريح حمدي فهم عليه: اللي يناسبك ديره •«من توا..حني خلونا برا منها» طارق وشرف الدين.. اللي كانوا متوجهين لكوجينة حوش جدهم .. غيروا طريقهم لجهة شجر الزيتون لما شافوا.. علي بلع ريقه: كيف نديروا توا بشير حك لحيته: مافيها كيف نديروا ..نحولوه باش مايشكش جدي طارق بهزوة: راي مليح! شرف الدين: مش عارف جو الفروخ اللي ديروا فيه.. تي يومكم اسود انود من الحاج منصور علي بتوتر: نجربوا وشن خاسرين حني؟! طارق قام يديه بحركة الاستسلام: اني ماليش علاقة شرف الدين: ولا ني.. قام حواجبه ونزلهم: اللي عقد روس الحبال يحلهم بشير: تفو عليكم الزوز.. باهي اللي ماطلبناكم تفزعولنا في عركة! ارفع علي ارفع والزوز قاموا القطعة المفرشة تحت الزيتونة باش يطيح عليها الحب ..مشوا بيها لتركينة مستخطية بيلوحوا الزيتون اللي تهرس لما طاح عليه علي وبشير يجري وراه شرف الدين: زعما تفوت ع جدي؟! طارق: نقولوا ان شاء الله جاهم نزار ووقف عليهم ولتين تمشي جنبه وشاده في سبابة يده: شن ديروا هني شرف الدين: علمي علمك نزار بضحكة ع الجنب ويشبح لجهة بعينها: فريال وسعاد الزوز التفتوا.. شافوا خديجة مرت بلقاسم وذهيبة مرت الامين ورا بعض طارق: اللي محيرني كيف تناسبوا.. هادوا الزوز من لما نعرف مايتحابوش! شرف الدين بضحكة: ماهو الموضوع مش في ايديهم نزار: تؤ.. ذهيبة مرت عمي تحب مفيدة ومريم من يومها طارق: اني كل خوفي يوم من الايام يصيرلنا زي المسلسلات المصرية يطلعوا من البلكونات ويلعلعوا شرف الدين ونزار قعدوا يضحكوا بعدين الاخير قال: بنرفع المكركبة هادي لحوش جدي طارق وشرف الدين بحماس: كلنا ماشيين غادي نزار ضحك نص ضحكة: حتى اني قلت •🌹•🌹•🌹•🌹• خش من الباب وهو يثني في كمام قميصه قال وهو بيخش للكوجينة: كلمتني البلغارية وينها مريم وراوية ضحكوا رقية خشت وراه: القهوة قهوة مريم متأكدة مريم ابتسمت: اني وراوية واحد راوية قدمت بالصفرة: خود ..درنا معاها من اللي جبناه عبيدة يشبحلها بابتسامته الحلوة: اللي عليها مربى متاعتك التلاتة اندهشوا وهي ردت وفمها مفتوح: كيف عرفت! عبيدة بغمزة وهو ماشي: ماتسألينيش وطلع وهو قايم الصفرة بيد وحدة رقية ومريم ابتسموا .. وراوية قالت: خيال ولد عمي هدا رقية وهي مبتسمة: مش مع الكل لكن راوية: حني متربيين جميع محلاه يتثقل علينا رورو! مريم ضحكت وجبدتها من يدها: عندك الف حق شافوا الثلاثة للباب لما سمعوا صوت خطوات.. لقوها خديجة خاشة قالبة وجهها والحواجب معقودة كلهم استغربوا ومريم قالت: ماما؟! وسرعان ما تلاشى استغرابهم لما خشت بعدها ذهيبة اطنفر راوية بهمس: يا حبيبي رقية: خشي خديجة خيرك واقفة خديجة لاوية الوجه: كابرة فيه الحوش هادا ني يا رقيوة ماننعزمش لما نخشله ومشت للصالة ذهيبة تبعتها بنظرات من فوق للوطا لين طلعت بعدين قالت: كيف حالكم يا بنات اليوم التلاتة ردوا: الحمد لله هي هزت راسها وخشت رقية تنهدت بيأس مريم بقلق: اني كل خوفي ع مفيدة تمشي فالرجلين في جرة اني وانتي رقية بعد عبت مالقي الميه جتها وقالت بابتسامة: اطمني هما الزوز مش من مصلحتهم يخلطوا الامور في بعضها راوية طبطبت ع ذراع مريم: صح كلام رورو.. تعالوا نمشوا للباقي جيعانة وطلعوا التلاتة للصالة •حليمة ادير فالشاهي ع العالة: ويعطيها جدكم كف من قوته حسيته تقول ضاربهولي اني سراج عكرش وجهه خولة وغرفة كاكاوية في يدها تنقرش منها: احييييي نور بألم: يا روحي نجلاء شبحت لامها: مابعدك يما سعاد: يام مالقيتي غير هالقصة تحكيها! حليمة: انتو اللي طلبتوا! ناديا: احكيلنا حاجة حلوة حناي فريال بحماس: ايه ع خشة خديجة ووراها ذهيبة.. كل وحدة قعمزت في تركينة بعيدة عن التانية والسلفات بعيونهم معاهم لين لحقوهم رقية وبنات خوتها..مريم وراوية قعمزوا وانضمولهم.. مريم: شن كنتوا تحكوا؟! مفيدة بضحكة: حناي تحكيلنا ع عمايل عمتي سعاد وكيف جدي دارلها خديجة ضحكت: اياااه حلمية: نكمل ولا معاش تبوا! كلهم بصوت واحد: كملي هي ضحكت وشبحت بربع عين لكنتها الصغيرة: اسمعوا هادي مالا.. زمان ايام عمكم فتحي كان عزري ويخدم ع البطاح بهية فنصت بعدين تنحنحت وهي تقول: عمتي! راوية شبحت لامها وسراج شد ضحكته اما الباقيين متحمسين للكمالة.. قطع عليهم الحماس لما خشوا عبيدة وكمال وشرف الدين وطارق ونزار ..مرة وحدة سعاد بضحكة: اجليها يام حلمية: وهو هكي فريال باستهجان: علاش مش توا!! خولة توشوش في ليلى: كيف نشرحولها هادي ليلى: كان ينشرح راه شرحنا اللي في جواجي حمزة خولة ضحكت وفريال سكتت بعد فنصت فيها امها عبيدة قعمز قريب من راوية: طاسة خضرا مرغية حناي بالله حليمة: اصبر شوية عبودة لتين مشت لامها تجري نزار: غير شوفوا المكركبة باعتني! ناديا تلقتها وضحكت.. وخديجة ردت ع ولد سلفها تقول: الام ام يا نزوره عبيدة: مش كنتوا بتقعمزوا في الفيراندا؟ كيف صار؟ وسيلة: حمزة قاللهم لا كمال: علاش هو من صاحب الفكرة ليلى وهي تاكل: فريال كمال قام حواجبه ابتسامة: اهااااا نور ترقص في حواجبها: ايه يا كمال ايه نزار ابتسم: كان هكي ماعندنا مانقولوا حليمة مدت صفرة الشاهي لمريم باش توزعها عليهم: وين امك انت نزار شافلها: فالحوش ليلى: مريضة من الصبح ومهسهسة مريم ناضت بالصفرة واول شي حطت لراوية اللي مقعمزة جنبها.. وهي خدت طاستين ليهم الزوز.. وتخطتها لعبيدة مدتله حتى هو زمزم: خيرها اسم الله! ولامس كان مافيها شي! ليلى: قالت نحس في روحي دايخة بنرقد شوي وسيلة: نمشولها بعدين بناويت؟! سعاد: ايه ايه بروا امالا شن! ذهيبة شبحتلها برفعة حاجب وهمست لزمزم جنبها: مش ماشية هي مالا زمزم بنفس الهمس: وين نعلم بيها ليلى كلت بالشوكة من كيكة خولة: لا تعب بس ومولي عليها خديجة: اه كان هكي باهي مريم وصلت في امها اللي خدت منها طاسة وتخطتها للي بعدها نجلاء: لا مريومة بري مريم كملت ..وهي ناضت لخالتها المقعمزة وحداها مها ووصال تعطي فيهم شن يبوا طبست عليها ووشوشتها: وين الارضي رقية قامت عيونها فيها: في الدار اللي نرقد فيها خولة نخصتها ع كتفها: شن يدير غادي؟ رقية التفتت قدامها وضحكت: مش زي ماتفكري يا قردة في هالوقت نجلاء مشت للدار وصكرتها عليها ووصال تبعتها بعيونها وهي تاكل من الكيكة: بتكلم ابراهيم مها: عارفتها •حليمة: قول يا كموله.. امتى تكمل هالقراية كمال خدي من مريم طاسة: السنة هادي المشروع ان شاء الله.. بعدين وجه كلامه لمريم: حمرا ولا؟! هي شبحتله: ايه خديجة: ربي يوفقك كمال هز راسه لمرت عمه عليا: معزومين حني اكيد هو رد: اول وحدين عليا ابتسمت بحماس خولة: نبي نفرح لكن نعرف طبعكم زين عبيدة: من الاول يمشي فيكم.. بيديرها مغلقة رقية بتضييقة عيون: خزيييي يا كمال هو قعد يضحك حليمة: راوية ومريم شهادة السني ولا الزوز ردوا مع بعض: اي ومريم قعمزت بعد كملت تفريق بهية: راوية من توا تفكر خديجة: كان تشوفي مريم امالا.. دايرتلي احرفين من راوية سعاد: انتم باهي حالكم حداي.. نجيوه من توا تفكر وتقولي السنة الجاية شهادة كيف ندير مريم وراوية زرتهم الضحكة نور بعفوية: يومها نهدرزوا ع القراية قالت بنفوتها اي كلام وخلاص سعاد تحمرط وجهها ونور استوعبت انها احرجت عمتها ..نزلت راسها اما الباقيين داروا الحولة.. شرف الدين تنحنح يغير فالموضوع : نبوا زردة كبيرة ع النجاح.. زوز مش وحدة ومعاكم ابراهيم فريال: الزردة ع جدي حالف قداش ليه نزار: عقبالي يحلفولي حتى اني هما ضحكوا بعدين راوية قالت: غير ننجحوا حني يدير ربي طريق بعدها عبيدة حط الطاسة من يده: كان نجحتي يا راوية نقالك عليا الولاد كلهم ناضوا يعيطوا ورواية بتلقائية: اني ومريم جيبلنا مريم حضنت بنت عمها بحب وقالت لعبيدة: مادورش كلامها عبيدة هو بجدية: يمين معظم كل وحدة فيكم تليفون غير انجحوا بس راوية فرحت هلبا.. حست بشعور الخو الكبير بهية: علاش عبيدة والله ماعندك حق تحلف! شن زايدات عليك فلوسك! خديجة بعتاب: اللي زيك يحطهم في حاجة سيور ماتمزق فيهم من كراسة راك! عبيدة: ع نقالات؟! مش حاير في حقهم زمزم ابتسمت: خلوه بيود بنيات عمه بهية: يدس فليساته يا زمزم عزري تو سنتين اخرات بيطلعوله مصاريف عرس وحوش قالت حليمة وهي توتي فالطاسة التانية بالكاكاوية: ماتزوجوا اللي قبله سراج: حناي تلقح ذهيبة: حمزة قال بيبدا في حوشه يا اللاي ..غير مازال شوي الشباب والصبايا كلهم بدون استثناء توجهت عيونهم لفريال اللي كانت تاكل وتشرب ومش منتبهة حليمة بفرح: طيب فينا يا حنة وسيلة شبحت لسلفتها بابتسامة: ان شاء الله بالخير عليه ذهيبة ردتهالها: سلمك.. عقبال صغارك وسيلة هي ردت: آمين زمزم: وحاط بنية في باله يا وخيتي ولا يبيك تشوفيله الاحفاد تبادلوا النظرات بينهم هما وعمتهم الصغيرة سعاد: لابده عنده وحيدة..حميزه ولد خوي مايحبش يمشي براي حد ذهيبة بابتسامة صفرة: ماقالش يا زمزم زمزم: ربي يعطيه اللي ترضيه •مريم بابتسامة: عروسته قدامهم اهي راوية: تبي قرصة فريال بش تستاقظ مريم: المشكلة الموضوع ماينشرحش راوية: تو نشوفوا شن يطلع مع باتمان •نور: نبي نقوللها ومش عارفة كيف خولة: كلنا مش عارفين كيف رقية: تو يدير راي ..ولد خوي ونعرفه مدام فتح موضوع الحوش والبني معناها استعدوا •ناديا بضحكة: بتجي سلفتك بنت عمك مفيدة ابتسمت: محلاها فريال تتمنيها سلفة كل حبيب.. واني بروحي مشوبة من قصة السلفات هادي ع قد مايحكوا ع الهوايل اللي تصير ليلى: لحد الآن زيتنا في دقيقنا ..اشبح شن يطلع مع الباقي خديجة اللي عاطيتهم بالقفا شافت لبنتها: ترا نشوف حنتك ماريتهاش مفيدة شبحت للولاد لقتهم لاهيين ..نزلت القوانطي شوية خديجة عجبتها وابتسمت: اللصقة زي السيف وصابغة.. شكون دارها؟ خولة؟ مفيدة بتردد: لصقت عمتي ذهبيبة خديجة زالت ابتسامتها: اممم.. باهي ورجعت التفتت لزمزم تسأل فيها ع الزيتون اللي داراته في البيتزا داراته هي ولا •سراج: فريال هي شبحتله: نعم.. تبي حاجة سراج «حي ع العباطة حي»: مديلي هادي اللي عليها ابيض فريال مدتله طرف: يقولوله سكر مرحي يا دماغ هو خداه منها وقال في خاطره «شوره ع حظ حمزة بس لا تفهمي ولا تسمعي» •طارق: مرت خوك هادي يا بتعبه تعب كمال: هوووه فكنا طارق يسمعك يحط همه فيك طارق: فدا الحب عبيدة: اشبح شن في راسه حمزة شرف الدين يرقص في حواجبه: صنة الحب بتبدا تفوح في سانيتنا يا شباب عبيدة ابتسم..وشرب طاسة الشاهي كلها في مرة •🌹•🌹•🌹•🌹• في دار مفرشة بمنادير لونهم وردي.. وفي اخرها دولاب لوح فردتين وجنبه شاطار .. في نفس الجهة الدولاب بس بعده بمسافة في شكماجة على واحد من المنادير في الزاوية مقعمزة نجلاء.. وفي حجرها التليفون الارضي .. وسماعته ع وذنها نجلاء: نتلاقوا جنب حوش خالي طاهر هو من السماعة: المهم نتلاقوا بنعطيك حاجة.. شي تاني نجلاء هي خافت من نبرته اللي تغيرت: شني! :بكري قريب قعمزتيلي في حضن ايوب! لاصقة فيه وقدامي مش مدايرتيني حتى عرصة!! نجلاء: نهاري اسود والله ماقصدي يا هيما .. انت عارف كلهم زي خوتي :المهم معاش يتكرر يا نجلاء الموقف اهوا هي: وعد يا قلب نجلاء :تي وووه من لسانك باهي نجلاء ضحكت💓 •🌹•🌹•🌹•🌹• اذن المغرب وصلوه وروح الحاج منصور للسانية جايبه خليفة.. اول ماخش لحوشه..لقي مريم تكنس فالصالة بالمكنسة الحرشة .. وصوت حليمة من دار المعيشة تقول لحد «زيدي .. يمين يمين» مريم اول ماشافته طول جاته: جديدي الغالي .. وينك من بكري منصور ابتسم: باهي اللي لقيتك هني.. كان لابس جرد ابيض وتحته بدلة عربية طويلة عليها فرملة مخططة ذهبي فالكحلي.. وفوق الجرد لابس البرنوص مريم: خير جديدي تبي حاجة نديرهالك منصور حول البرنوص ..مريم خداته منه وهي تقول: هات عنك خشت راوية للصالة بالبخار وهي تنفخ عليه وفي جنبها رقية ابصر شن يهدرزوا.. وين شافت جدها جاته طول: جدي حبيبي منصور يضحك: تعالي تعالي كيف بنسأل مرومة عليك رقية ابتسمت وهو حط يده في جيب الفرملة: مشيت لفاتحة اليوم رقية جت جنبهم: نحسابك متغدي عند صاحبك اللي من الجنوب منصور: صار الكلام.. وبعده مشيت للفاتحة بعد العصر قروها وطلع في يده كلينكس ملفوف ع حاجة دائرية.. وحكة عصير لوز ..ساوا فرملته وشد بيد الحكة وبالتانية الكلينكس ومدهم لحفيداته: خودوا وحدة العصير ووحدة العبمبر الزوز خدوا منه وحضنوه.. بعدين باسوه بالوحدة ع راسه وهما يدعوله بطولة العمر.. وهو مبتسم بحب صوت باب الحوش الرئيسي انفتح وخش منه خليفة اللي اول مابانوا عليه قال: لوز وسكر ولف يديه الزوز ع رقبة كل وحدة فيهم وهو يقول: من زيكم دسلكم الحاج منصور حصته عمرها ماصارت قبل راوية تضحك بوجع: جدي مريم مغمضة عيونها: جديدي كلمه منصور قام زقيته وضرب خليفة ع ظهره: نزل يديك نزل! خليفة وخر وهو يضحك والزوز يفركوا في رقابيهم بألم خليفة عقد حواجبه لما سمع صوت امه تكلم في حد: من في غيركم؟ رقية: عليا .. وسعاد جت بكري هونها راقدة في الدار خليفة هز راسه بعدين مشي للمربوعة ومنصور مشي باتجاه داره ومريم لحقاته بالبرنوص رقية: راوية ماتخلوش عمتكم تشوفها في يديكم تو تحز في خاطرها علاش ماحسبش نجلاء راوية تأشر ع عيونها: حاااااضر.. اصلًا بعد كملنا بنمشوا لحوشنا نحلوا الواجبات رقية: قاعدات لتوا الواجبات! راوية حطت صبعها ع فمها: اصصصص تسمعك حنينة تورينا رقية: ساكتة حتى اني.. بنخش نشوفها تعطيني الريموت كلام نواعم قريب يبدا جتهم مريم: بنحضر الاعادة اني راوية: هيا مريومة وقت مريم خدت المكنسة المسندة ع الحيط: نرد المكنسة ونجي مشت مريم.. شوي وجتهم ووشاحها في يدها ..لبساته وسقدتهم رقية بعدين ولت لدار التقعميز.. وين مافي حليمة وعليا ديرلها في مساج لكتوفها ورقبتها •🌹•🌹•🌹•🌹• فوق سطوح حوش حسين مفرشين الولاد حصيرة ويهدرزوا.. حمزة والزبير وعبيدة وكمال وبشير دارتلهم زمزم صفرة شاهي اخضر وفطيرة الزبير راقد ع طوله ويديه ثانيهم تحت راسه:يعني قلت لجدي هو رد: اول واحد الزبير: ع هكي رسمي الكلام حمزة متكي براسه ع الحيط ومغمض عيونه: حتى انت نشط روحك اصغر مني بسنة بس راك الزبير ضحك ع الجنب: دير روحك شيباني توا! راس مالك 24 عام كيف طقيتهم حمزة ضحك بعدها قال: تحسابه ساهل تبني حوش من الصفر؟! بالذات في وضعي معاش الدولة بروحه مايوكلش عيش ع قول المصاروة.. يبي سنين من العمر الزبير: ابدا مشروع بروحك .. اقرب مثال بوي نفعه هلبا وخششني معاه حمزة: هادا اللي ناوي عليه الزبير بغمزة: والبال شنو؟! خالي ولا في من شاغلاته؟ «الزبير بسبب خدمته مع بوه ديما مشغول ..ونقصوا جياته لحوش جده وجت فترة انعدموا بكل..هادا علاش في هلبا حاجات مايعلمش بيهم» حمزة سكت.. وولد عمته ماعرفش هل يفسر سكاته اي او لا!! غير عيونه لعبيدة لقاه متكي بيديه ع الحيط ويشبح حواليه بعدين غيرهم مرة تانية لكمال وبشير .. كمال شاد تليفون بشير يوري فيه مميزاته ويعلم فيه كيف يغير الخلفية وكيف يبدل نغمة الرنين..عاد اصدار جديد مادابيه يتباهى بيه بكل الطرق زي كل اللي دايرين تليفونات هداكا الوقت الزبير: هوووه انت وياه.. اقربونا جاي نشوفوا حتى حني ناضوا الزوز وبشير قال: بتشري واحد مالا الزبير: مرات •بينما عبيدة يتفرج ع سانيتهم من فوق ..المكان اللي انولد فيه وكبر فيه ولقي حبه فيه.. حبه اللي توا ماشية قدام عيونه وهي تهدرز مع بنت عمها.. ويتقاسموا في طرف العبمبر بيناتهم راوية.. او زي ماينادي فيها هو ..البلغارية💓 من لما قعدت تكبر خطفت قلب عبيدة.. اللي صد حبها صد بعدين استسلمله.. وتوا يراجي فيها تكمل ثانوي ويصارحها ويخطب طول💞 •🌹•🌹•🌹•🌹• وسانية الحاج منصور فيها اكثر من نوع من الحب •زي حب وصال للهبال والمغامرات.. مها: علاش مانطلبوشي منهم تو يعطونا نلعبوا بيه! وصال: لا يا غبية مايعطوناش ..ناخدوه شوط ولا زوز ونردوه بلا ماحد يعلم مها شبه اقتنعت: هيا باهي علي: وين هيا انتي وياها! شن وريتكم ترا سمعوا مها: زعميتني نمشي لخولة نبي خميرة باش تفتح الباب وتخش انت هز راسه وغير عيونه لوصال اللي قالت: واني نمشي لزهير باش نلهيه علي مد يديه ليهم وهما طقوها: شوفوا شغلكم هي مشوا الزوز يجروا.. لابسات قفاطين موردة.. موضة الصغار وقتها وهو لبد جنب الشجرة متاع اللوز طقطقوا ع الباب.. مشوار وفتح الامين مها: وين خولة عمي هو وسعلهم: خشولها في الكوجينة هما خشوا .. ووصال التفتت لعمها بتلعثم تقول: خلي الباب مفتوح عمي بناخدوا حاجة وبنطلعوا الامين ضحك: باهي باهي رده وخش داخل.. ووصال مشت وراه لقاته خش للحمام .. راجت شوية بعدين مشت تجري ادور في زهير ومها كملت للكوجينة •علي لما تأكد مافيش حد.. خش بخطوات سريعة وبخفة وهو فايت من جنب دار المعيشة سمع صوت وصال متداخل مع صوت زهير وذهيبة كمل طريقه.. خدي شن يبي وطلع بسرعة لاقاته مها جاية من الكوجينة في يدها ظراف خميرة.. لما شافت اللي بين يديه فرحت هو طلع.. وهي مشت تنادي وصال
يتبع...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
