سانية جدي

الحلقة الثالثة

#سانية_جدي🌹
#الفصل_الأول «سانيتنا»
#الحلقة_الثالثة
________________________
الساعة 7:30 صباحًا
طلعت شمس ثاني يوم
وكعادته الحاج منصور.. بعد يصلي الفجر ويفطر لازم يدير دورته ع السانية اللي زارعها بكل خير
وبدا جولته من عند شجر الزيتون
•الحاج منصور: العام الجديد بإذن الله نديروا نظام باش الحب كله يتلقط ومايقعد منه شي ع الشجر
بلقاسم: مزبوط  يا بوي ..نص المحصول قاعد غير خسارة
منصور ولده: لكن قاعد فيه حيل ويندار زيت
وشبح لجده يستنى منه في ردة فعل ع كلامه
وهو رد: ايه ايه .. تو اليوم نكملوه ان شاء الله
وفجأة وقف وعقد حواجبه وهو يشبح لجهة معينة
ولده وحفيده شبحوا وين مايشبح
الحاج منصور: الشجرة هادي كان في تحتها خيشة.. وينها؟!! من قاربها
بلقاسم: بالك ملقطينه يا حاج
الحاج منصور هز راسه بالرفض: لالا.. من بعد الموسم معاش لقطناه .. هادي واضح عملة ويدرقوا فيها
منصور في خاطره «نهار اللي قربها اسود» بعدين كمل بصوت مسموع: وكيف بتعرف من دارها يا جدي
الحاج منصور ماردش ومشي كمل طريقه .. وولده وحفيده لحقوه وهما حاسين بالشفقة ع اللي تجرأ وجي جهة الزيتونة
•🌹•🌹•🌹•🌹•
وفي حوش الطاهر
طلعت مرته كلثوم من الحمام وقعدت تنادي بصوت متعب: ليلى ..نور
جت ليلى من الكوجينة: نعم ماما.. لما شافت امها قالت: حي وجهك اصفر زايدة مارضة.. وكملت بقلق: ضروري تمشي تعايني
كلثوم قعمزت بتعب ع الكرسي: وين خوتك؟
ليلى: الولاد راقدين وجيداء وغيداء كيف فطرتهم وطلعوا لحوش عمي صبري.. بيمشوا للمدرسة.. ونور في حوش جدي
كلثوم هزت راسها بعدها قالت: نبيك تمشي لحوش عمك حسين تجيبيلي من مرت عمك عويدات قرفة اغليهملي بالك زهاق كبدي يخف
ليلى بقلق: حاضر.. نلبس شبشبي ونمشي
كلثوم ناضت بتولي لدارها: كان يعطلك ع قرايتك فوتيه تو نوصي بوك بعدين
ليلى وهي طالعة: لا مازال الوقت
•🌹•🌹•🌹•🌹•
في حوش بلقاسم..
خديجة:باهي يا بنتي مبارك وان شاء بخلاصك ع الخير
ناديا بابتسامة خجولة: سلمك عمتي
خديجة: ومشيتي عاينتي؟
ناديا: ايه امس فالليل قلت لمنصور نبي نتأكد وطلعنا
خديجة ابتسمت: ربي يدوم عشرتكم
ناديا: ان شاء الله.. قيس يا ماما ريحني
خديجة خداته منها وهي تقول بصوت طفولي: هاتي زاي هالولد السمح اللي طالع لحناه
خش عليهم منذر كيف نايض: صباح الخير
الزوز ردوا عليه
منذر: فرخة مها وين
خديجة وهي شادة حفيدها: مشت لحوش عمك فتحي..خيرها؟!
منذر هز راسه وقال بصوت مسموع ليه هو بس: تو تشوف غير تروح بس
خديجة عقدت حواجبها: شن تبي فيها ماقلتش
منذر: شي يام.. حرام نسأل!
خديجة: لا مش حرام!..شن ماعندكش كلية اليوم
منذر: مش ماشي مافي شي مهم
خديجة: باهي برا صل وتعالى باش تفطر
منذر وهو ماشي: ديري دحي بالجبنة يام خاطري فيه
خديجة بصوت عالي شوي: باهي باهي
ناديا وقفت: تو نديرله اني
خديجة: ديري فيا صورة معروف اليوم نايضة راسي يسطر فيا
ناديا قبل ماتطلع من الدار: تو نجيبلك حبة بنادول
•🌹•🌹•🌹•🌹•
طلعت من الممر والمنشف ع راسها
وسيلة: صباح الخير
ردوا عليها كلهم
وسيلة: كيف حال ماما اليوم جيداء وغيداء
ردت جيداء: مش عارفة حني فطرنا وطلعنا
غيداء كملت عليها: خليناها راقدة
وسيلة هزت راسها والتفتت لفريال وهي تقول بتساؤل: بوك وابراهيم وين؟! ماليهمش حس
فريال: بوي فاطر في حوش جدي طلع قبل شوي.. وكملت بضحكة تقول: وابراهيم لحقه
وسيلة قامت حواجبها ونزلتهم: الصبر بس!
عليا بانزعاج: مش هيا! وقت راه نبي فطوري
فريال: بري لبوي يعطيك فلوس وخودي من المقصف.. جرحني الموس امس في جراير بطنك
عليا شقلبت عيونها وطلعت ..والبنات الصغار يضحكوا عليها
وسيلة قعدت اضبح: تعالي عليا تو نديرلك نص اني .. تعالي يا عليا
:معاااش نبي
فريال تضحك: حرجت عليا
•🌹•🌹•🌹•🌹•
في نفس الوقت
كانت الحاجة حليمة في الدار.. فاتحة ع قناة السعودية.. ضروري كل صبح هي ولا المجد
وتحب السعودية اكثر كونه مع القرآن تتمتع بشوفة الحرم المكي
حليمة وعيونها المشتاقة ع التلفزيون: يا ربي عطينا زي ما اعطيتهم
•وفي الكوجينة
مريم وراوية لابسات البدلة الثانوية ويهدرزوا ع رقية اللي دير فالفطور.. وتعاون فيها نور ونجلاء اللي غابت عن مدرستها اليوم زي هي زي خوها علي اللي قاعد راقد
راوية: وشاح مزركش وفيه خيوط نازلة يهبل شكله اخر طرحة
رقية تحط في الدحي المطبوخ في الصواني: يشبه لمتاع بنت النعاس هداكا اليوم لما تلاقينا
مريم: صح صح زيه طبق الاصل
راوية: اني خش راسي وبناخذ منه ع قد ماعجبني
نور: مافيش موضة تفوتك انتي عاد
راوية رمشت عيونها بغرور
نجلاء شبحتلهم: شن الصوت هادا؟
مريم: ابصر من جي
: هااااااااااع
نور بعقدة حواجب: بسم الله، هادا صوت عياط
رقية: صوت عليوه هدا
راوية: اللطف يا ربي!
: نوض .. نوض فز راقد لتوا
مريم بضحكة: عمي صبري
نور ضحكت حتى هي: مايحبش حد راقد
راوية: حتى علي غبي اللي راقد في المربوعة.. هادا مكان جدي وعمامي كان مانوضاش عمي صبري ينوضه جدي بالزقية.. يمشي يشوف خليفة كاسب راحته وراقد داخل
نجلاء مبتسمة: بنمشي نشوف عمي فاطر ولا يبينا نديروله
وطلعت بسرعة
راوية: حي عليها نجلاء كان استمرت هكي بتفضحها عمتي سعاد
ضحكوا كلهم
فات من قدام الكوجينة خيال.. ينقط ميه تنقيط
اول من شافه نور وقعدت تضحك
مريم: شن يضحك فيك!
نور وهي تضحك: عمي.. شكله مدوش لعلي
مريم وراوية فنصوا ومشوا يجروا للباب بالك يلحقوا يشوفوه
ورقية حطت يدها ع فمها وزرتها الضحكة: مالقي الميه نسيت ماحولتاش
راوية من الباب: نعيمًا ولد العمة
وهو ماردش عليها.. متعفلق
مريم ضحكت
انفتح باب الكوجينة اللي يفتح برا وخش منه زهير واضح عليه كيف نايض.. السروال من شكل والتيشرت من شكل: صوت كلاكس باص برا راه
التلاتة التفتوله.. وطلعوا يجروا
رقية بصوت عالي: افطروا قبل
جاها صوت مريم يقول: صحة
زهير بيخش للحوش: احسبيني في الفطور رورو
رقية ابتسمت: من عيوني
•طلعوا بنات السانية من البوابة.. لقوا باصهم يستنى فيهم
مريم وراوية وعليا للثانوية..نور وتغريد والتوأم ومها ووصال للمدرسة ابتدائي واعدادي
ركبوا الباص..وتحرك بيهم من قدام السانية
•🌹•🌹•🌹•🌹•
طقطقت ع الباب وهي تنادي: عمتي زمزم
: خشي بنيتي خشي اني في داري
مشت لين خشت عليها وهي تقول: صباح الخير زمزومة شن ديري
«زمزم علاقتها ببنات سلافها كلهم قوية هلبا.. يعاملوا فيها زي صاحبتهم ما كأنهاش مرت عمهم ماتحسسش فيهم انها اكبر منهم.. يرتاحولها هلبا وغالية عليهم»
زمزم كانت اضم في دارها: شوفت عينك.. نكرف من صبح ربي
ليلى قدمتلها وسلمت عليها بوسات: بالك تبيني نعاونك.. فاضية ووقت الكلية مازال
زمزم: لا بنيتي قريب نكمل
ليلى: حقا عمتي نبي كان عندك قرفة
زمزم: قرفة مرحية ولا اعواد
هي قالت: لا اعواد ..نبيهم لماما
زمزم حطت من يدها القماشة اللي كانت تلمع بيها: مش عارفة تو نشوف.. بقولي عندي اخر مرة
ليلى جت للزيانة بتصكر قجورها: حي يا عمتي مكياج جديد
زمزم ضحكت: طلعت يومها مع عبيدة خديت حويجات ..لقيته وسهفني قداش ليا ماجددت لميت اللي لميته وجابني الباب
ليلى تتفرج عليه: قنين باين وحاجة ماركة
زمزم طلعت من الدار: ايه قال صاحب المحل من ايطاليا
ليلى بصوت عالي: نجرب زمزومة
: خودي راحتك
ليلى طلعت علبة ظلال وارواج وبلاشر وهي مبتسمة بحماس
وقعدت تجرب وتاخد وتحط ع وجهها
•نزل من فوق وهو يمسح ع وجهه
فات من قدام الكوجينة جاه صوت امه
:نزلتوا؟!
هو رد ومازال مكمل طريقه: الشمس قلقت نومي نزلت نبي ولا مانبيش
زمزم: والباقي قاعدين راقدين؟
هو قال: ايه يام
كمل طريقه ..فات من قدام دار نوم امه وبوه ..مشي خطوتين ووخر وهو مستغرب..
كبه من الباب وشاف ليلى.. واقفة ع الزيانة وتتمكيج ..روج وردي واحمر خدود وقاعدة تحط فالظل
لما شافاته عيطت ولفت وجهها.. وهو تلقائيًا طول جبد باب الدار قربعه
مشي وعلى فمه ارتسمت ابتسامة حلوة هلبا.. وفجأة ضحك لما رن في وذنه صوت عيطتها💓
•🌹•🌹•🌹•🌹•
خلونا نطلعوا من السانية.. ونطلعوا من العاصمة كلها
من غرب ليبيا ..لشرقها
تحديدًا بنغازي..ربّاية الذايح💞
واحد من شوارعها المعروفة والراقية.. حوش كبير وعلى 3 ادوار
تفصيلته حديثة.. جنبه بالزبط يفصل بينهم سور بس وفيه باب يربطهم ببعض.. حوش ع دورين.. او بالأحرى حوشين منفصلات بس مبنيات فوق بعض
حياش الصادق العقوري ..هكي معروفات
•مراة عمرها في نص الاربعينات ..شادة في يدها بخارة وتبخر في صالة حوشها
شوي وسمعت صوت الباب ينفتح وخشت بنوتة جميلة جدًا لابسة بدلة الثانوية وع كتافها شنطة ومحرمة بيضا ع راسها
المراة الاربعينية واللي اسمها «مريم»: روحتي
البنوتة واسمها كان «ديما»: اه روحت.. سرحونا بدري اليوم
مريم ابتسمت: معناها سلم بنتي عدي غيري دبشك وتعالي بيش نعلمك كيف تسوي الكسكسو اليوم
بنتها تحمست وتوترت في نفس الوقت: خايفة يخرب مني ونعزقوه ونقعدوا بلا غدا
مريم حطت البخار ع الرف بعد طفي: ويش ورانا.. باتك وجدك متغديين عند عمك ساع نعاودوه لين مايجيك تقول ايش
ديما تحمست من كلام امها: نغير دبشي ورادة
مريم ضحكت: ونا سابقتك تلقيني
ركبت ديما الدروج لدارها.. ومريم مشت للكوجينة
•على الكورنيش.. زوز شباب شبههم لبعض يبين انهم خوت .. واقفين ويهدرزوا
تكلم الصغير «جمال»: نفكر نسيب ونبدا نخدم مع باتي
رد الكبير «عبد الرؤوف»: كذا فكنا من النوطرة.. تقدر اديرهن الاثنين تكمل قرايتك وتشتغل معانا
جمال شبحله: وكنك انت مادرتها.. قريت سنتين في قاريونس بعدها بطلت
عبد الرؤوف بعد حدف حصاة فالبحر: نا مش كيفك.. نا خدمت مع جدي في ***** فالسعي وشديت معاه رزقه غادي ..بعدين خشيت مع باتي..وبالك تحساب ساهل تخش في شغل مع باتي ..ماتحقاش فالحوش ..غادي كل حاجة يريدها تمشي بالريموت
جمال بدا يقتنع بالكلام: ممكن كلامك صح.. خبط خوه ع كتفه بخفة وقال: هي صبي نبرموا شوية ونروحوا نتغدوا بعدك جيعان موت
عبد الرؤوف ابتسم: انت غير كمل قرايتك والباقي ماتشقابش نا نتصرف
جمال شبح لخوه وابتسم بإمتنان
بعدين ركبوا الزوز سياراتهم وتحركوا
•عيلة الصادق العقوري.. سكان بنغازي بس اصلهم من بلدة تانية مازال مشرق غادي من بنغازي لكن طول عمرهم عاشوه فيها ومتطبعين بطباع اهلها
سبب تحويلتهم هو رب الاسرة.. الصادق .. اللي كان شاب طموح وعصامي وصاحب اصرار، من زمان حلمه يقرا في الجامعة وياخد شهايد..لكن بوه كان رافض الفكرة ويبيه يقعد في بلادهم ويخدم معاه في رزقهم اللي هو اراضي وسعي وبل ويبي من يرد باله منه
وباعتبار الصادق اكبر خوته بوه عارف انهم حيديروا زيه طال الزمان ولا قصر وهادا اللي خلاه رافض بزيادة مايبيش رزقه يسيب
وبعد محاولات من ولده وكر وفر ..حايل ع بوه وقاله بنمشي نقرا في بنغازي ناخد هالشهادة ونروح وخلاص
رفض بوه هلبا لكن الام اقنعاته كانت شايفة في ولدها مستقبل
ويوافق بوه ويسافر الصادق لبنغازي..للمدينة اللي كل شي فيها مختلف تمام الاختلاف عن الدواخل..انبهر بيها وحبها من اول ما خطي ترابها ،قري فيها وكمل .. ولانه فالح ودماغه نظيف طول فترة القراية كان يخدم ويلقط فالقرش ع القرش والفلوس اللي يبعتله فيهم بوه مايصرفش منهم الا شوي والباقي يحطه مع فلوسه.. لين ولى عنده مبلغ باهي وشري بيه حوش متوسط في بنغازي اللي خذت عقله بكل شي فيها ..طبعًا شراه بلا علم بوه فالاول
بعدين فتح موضوع رحلتهم لبنغازي معاه..عصب هلبا وطارتله ووصلت بيه حتى انه قاطعه فترة.. فكر هلبا وبعد زنين مرته وولده الصادق وافق ع مضض لكن شرط ع الصادق يجي ديما للبلاد معاه يتفقد الرزق وهو وافق طول ..ومع مرور السنوات يكبر الصادق وتكبر معاه خدمته وفلوسه،حول من الحوش الاول اللي شراه لحوش ارقى واكبر واحلى في نفس الوقت انشغاله بأملاكه خلى مشياته لبلاده تقل ..بعد وفاة امه اصر ع بوه هلبا يجي يسكن عنده عارف قداش متعلق بيها وقعاده بروحه مع حزنه حيأزم حالته..وبالفعل حول عنده..ومازال ديما يمشي لبلاده رغم تقدمه في السن.. لانه ببساطة عارف ان ولده منشغل بحياته هني وحتى مشيه غادي قعد قطع ملام وبس بسبب جدوله اللي مايفضاش من الخدمة
الصادق متزوج من مريم.. وعندهم 4 اولاد وزوز بنات
خالد مواليد 81
يحيى مواليد 82
عبد الرؤوف مواليد 83
ريما مواليد 86
جمال مواليد 87
ديما مواليد 93
من بينهم كلهم عبد الرؤوف اكثر واحد يحب البلاد ويحب يمشيلها ومتلهف اكثر من الكل عليها
طبعه هدا لفت نظر جده وقعد هو امله اللي بيحافظ ع رزقهم من بعده.. وبالفعل كان هكي واحسن.. واخيرًا بعد سنين طويلة لقي من يهني ع رزقه من بعده ويكون قد المسؤولية
•🌹•🌹•🌹•🌹•
بالرجوع لأم الزهر والحنة..
قدام واحد من معاهد التمريض
خولة تتكلم بالتليفون: هيا يا حمزة وراي غدي مازال بنديره!
هو من التليفون: شن تبيني نطيرلك!! الطريق زحمة والمرور بروحه حاصل
خولة مسحت ع وجهها وهي تفكر .. لو تأخرت كل روتينها بيتشقلب
:المهم تخشي داخل مش نلقاك مادة وجهك وتستني البرا الخاطم يتفرج!!
خولة: حاضر حاضر غير بسرعة يا حمزة بس بس
:ديري زي ماقتلك.. سلام توا
صكرت من خوها وخشت قعمزت ع كرسي..فتحت مذكرتها وقعدت تكتب شن يراجي فيها فالحوش من ضمان لتطييب لما يتبعه
خولة قامت راسها وحطت القلم وهي تتأفف: هادي ضريبة تكوني بنت وحدة فالحوش
ربع ساعة وشرين تليفونها.. وقفت باستعجال وطلعت برا.. شافت سيارة خوها لاصقة فالباب مشت طول ركبت
خولة وهي تصكر فالباب: السلام عليكم
حمزة عيونه ع المراية ويوخر: وعليكم السلام
خولة: طلعتك من خدمتك؟
حمزة لبس نظاراته الشمسية: مادوري شي
خولة اتكت بظهرها ع الكرسي بعدين قالت: شن تبي تتغدا ولا بتمشي لحوش جدي
حمزة: خليني من غداك توا.. بنت عمك مش عندها محاضرات اليوم
خولة بإستعباط: اما منهم؟
حمزة وعيونه ع الطريق: خولة الحكاية قايلة ورطوبة عطيني الدغري
هي تحاول جاهدة تخفي ابتسامتها: عندها اي
حمزة: وامتى تكمل
خولة: مانعرفش ع حسب
هو قال: كلميها وافتحي السبيكر
خولة دارت زي ماقاللها
نادى تلات مرات
هو عقد حواجبه: خيرها ماتردش! علاش دايراته التليفون مالا!
خولة عضت ع شاربها وفنصت لما انفتح الخط
:هلا خوخة شن فكرك بيا
وبدا قلب حمزة يدلف بعد سمع صوتها💓
خولة: خزي يا حيوانة زعميته ماندورش فيك قبل يا قليلة الخير
:هههههههه نبصر عليك بلاش زعل
خولة شبحت لخوها بربع عين لقاته يشبح قدام ويبان عادي.. لكن تفاحة ادم في رقبته كانت تتحرك لما يبلع فريقه كله من تأثير ضحكتها
:الووو ..خولة
هي ردت: معاك معاك.. قتلك فريال امتى يكملوا محاضراتك
:توا توا كيف طلعت من اخر وحدة وبنكلم خليفة يروح بيا.. خيرك تبي شي انتي؟!
حمزة: اقعدي مكانك فالطريق حني.. وكمل بحدة: حاجة تانية خليك داخل في القاعة ماتطلعيش برا منها لين نوصلوا
قريب ماتت لما سمعت صوته .. ردت طول:
:حاضر
خولة: هي بالسلامة فريالو
:سلامات
صكروا الخط .. وتوجهوا لجامعة ناصر.. تحديدًا كلية اللغات
•خولة: نتصل بيها؟
حمزة فك الحزام وفتح الباب: قعمزي وانتي ساكتة بس
نزل وكمل طريقه داخل، متأكد بل يكاد يجزم انها ماسمعتش كلامه.. مش عناد لكن مش حتصبر ع الهدرزة برا.. وهو اكثر من يعرفها فرفوشة ومقبلة ع الحياة وتحب تهدرز وتتعرف
شكله لفت الطالبات غادي.. زي مايقولوا ملامح راجل وهيبة راجل عنده طغت ع المكان
بينما هو يدور عليها بعيونه المغطية بالنظارات..
لين واخيرًا شافها.. مع مجموعة بنات متكية بالجنب ع حيط وحاطة مذكرة فوق راسها عن الشمس..
ماقربش هلبا وتنحنح هديكا التنحنيحة
البنات انخلعوا.. وفريال اول ماشافاته مشتله تجري خافت يعصب
حمزة قام حاجبه: مش قتلك خليك داخل اني؟!!
فريال ضيقت عيونها بابتسامة صفرة: مشيهالي هالمرة سماح
هو حمد ربي في سره ان عيونه مغطيتهم النظارات.. مد يده وخدي منها الدوسي بعدها قال: فوتي قدامي بسرعة
هي تحركت طول وهو لحقها
وخلوا المساحة للبنات يعلقوا عن اللي شافوه..
: يعطيها نقطة هالفريال وين لقاته.. اني بعد الشبوبية والرجولية اللي شفتها توا بنتوب عن الشكالات التانية
: وخدي منها الدوسي ااه وخلاص
: خيرها ماقالتلنا عندي حبيب وحني نحكوا فالكبيرة والصغيرة؟! وجعتني منها
: مالا مهبولة عندها الصاروخ هادا وبتحكي عليه؟!!
: مرات خوها
: لا فريال عندها خو واحد وتوا شهادة اعتقد يعني مفروض يكون اصغر من اللي ريناه توا
: تو يبان كان في شي، مش من النوع اللي يدسدس فريال
•🌹•🌹•🌹•🌹•
فتح باب الحوش وخش.. هو وولده الكبير
خشوا للمربوعة وقعمزوا.. شوي وشافوا شعرات كحل وعيون صغيرة توق عليهم
بلقاسم ضحك: تعالي تعالي خشي
لتين خشت تجري وهي مغطية وجهها بيديها متحشمة وارتمت في حضنه
والحاج منصور مبتسم
بلقاسم: مش مسلمة ع جدك
لتين حولت منه ومشت للحاج منصور باست راسه: جدي الكبير حالك باهي
منصور مسح ع شعرها وهو يضحك: في خيار الخير يا مدورة
بلقاسم: ايه يا بوي.. ماقلتليش شن بدير ع الزيتونة اللي مبكري
منصور بوعيد: تو نزبطه شكون قربها وعلاش
لتين هني تكلمت: جدي الكبير نقولك حاجة
الزوز شافولها
لتين ببراءة: تبي تعرف من خنب الزيتون .. اني نعرف منو
منصور شبح لبلقاسم: ريت ولا.. واتية جت كشفه ربك من عنده.. بعدين رد عيونه للتين وكمل: قولي هي
لتين: عارف هم زوز.. ودارت رقم اثنين بصوابعها بعدها كملت: عمو بشير وعمو علي
•🌹•🌹•🌹•🌹•
من البوابة نزلوا البنات من باصهم.. تعبانات طول الطريق وهما من مدرسة لمدرسة .. والي كملت عليهم التقعميزة في الثانوية وهما يستنوا في فصل مريم وراوية يطلعوا ..نور مسكينة تعبانة وبطيح ع وجهها .. والبنات الصغار زيها
عليا: جيعانة
نور بتعب: واني نعسانة
وصال وهي ماشية لحوشهم: مازالك هلبا بش توصلي حوشكم نور
هي ردت: بنمشي لحوش جدي ماعنديش جهد
مريم: بتباتي عندي اليوم
راوية: عارفة مريومة
مريم تنفست براحة: واجب العربي وكتبناه من يوم الاحد يعني اليوم مافي شي
عليا عقدت حواجبها وقوست فمها: سعدودكم..اني عندي تطبيق وكدس واجبات
تغريد: تستاهلي..قالتلك ماما اكتبي ولا
عليا ضربتها بخفة ع راسها.. والباقيات يضحكوا ع عليا بشماتة
سمعوا صوت سيارة ..كونهم قاعدات قريبات من البوابة مالحقوش يلتفتوا الا وفاتت من جنبهم السيارة..فيها حمزة وخولة ومن ورا فريال
البنات الصغار داروا باي للسيارة.. فريال وخولة ردوها وهما مبتسمات
راوية مبتسمة وترقص فحواجبها: ولد عمنا باسط نفوذه
نور ابتسمت: امتى بس تفهم فريال انه يحبها
مريم وراوية وعليا فلتوا فيها عيونهم بالتفنيص
نور استاقضت للبنات الصغار وسكتت
عليا بعد زفرت: فوتي قدامي تغريد بسرعة
وتوجهوا الزوز لجهة حوشهم
نور: جيداء وغيداء بروا جري للحوش
غيداء: نبوا حوش جدي حتى حني!
نور: تي غير بروا غيروا شراتيلكم ع الاقل وين بتمشوا هكي!
مريم حطت يدها ع ظهر اختها ودفتها بالشوي: حتى انتي مهوشة سايري التوأم اني وراوية بنخطموا شوية ولاحقينك
مها: باه.. التفتت ع بنات عمها وكملت: هيا تعالوا
مشوا التلاتة مع بعض
ومريم قالت: نونا شدي فرينو قدام الصغار تخايلي يزلقوا بكلمة ويفهم حد غلط ولا شي شن يصير بعدها
نور باحراج: من غير قصد
راوية: تي عارفينك من غير قصد يا قصيرونة نبوك تردي بالك بس
نور سكتت وهي مضايقة..ماتحبش تكون سبب في اي حاجة سيئة ولو بدون قصد
مريم شدتها من يدها وضحكت: اضحكي خلاص
راوية جت شدتها من اليد التانية وابتسمت: ورينا صف اللولو
هي ضحكت
جاهم من بعيد عبيدة: شن سر اللمة هادي يستر الله وخلاص
راوية: حول هكي عبيدة واصلين حدنا راه
نور: بنطيحوا ع وجوهنا
عبيدة قام حواجبه: بالشوية عليكم! اللي يسمعكم يقول مروحات من حرب.. اشر بحواجبه ع مريم وكمل: شوفوا المرأة الحديدية اللي جنبكم
مريم ضحكت
راوية: المرأة الحديدية تبي تتكا داخل بتخليها تخش هي ومرافقاتها ولا تبي تكسر الراس ولد عمي العزيز!
عبيدة بابتسامته الحلوة: هدي يا ويري خيرك
مريم ابتسمت: ويري..حلو من اليوم بندلعك بيه!
نور: احلى من رورو نلخبطوا بينك وبين رقية
راوية ابتسمت: حتى اني عجبني.. بعدين عبست: عادي نخشوا توا
هو نحا عن طريقهم وايديه في جيوبه: ليك المجال يا بلغارية
مشوا البنات ..وهو يتبع فيها بعيونه لين خشت
:ويري ع وزن طيري.. يعجبني تفكيرك
عبيدة انخلع والتفت طول شاف كمال عقد حواجبه: شن تخرط انت؟!!
كمال بابتسامة: عليا يا عبيدة؟ تحسابه قصة النقالات مرت مرور الكرام عندي.. مفضوح راك
هو بعد عرف لا مفر من الادلاء بالحقيقة قال بجدية: بيناتنا كمال مانبيش مخلوق يعرف
كمال رد بنفس الابتسامة: سرك في خابية
عبيدة سكت شوية بعدها قال: علاش تشبحلي هكي!!
هو مازال مبتسم: شي.. مافي شي
عبيدة بانزعاج: نمشي خيرلي ني!
مشي عبيدة وكمال قال بصوت مسموع: طيري طيري مانخليه لواحد غيري
وقعد يضحك..
•نزلت من السيارة وهي تكلم في بنت عمها: بتجي في الليل لحوش جدي
خولة من الروشن: ماظنيتش.. وراي حوسة هدا غير الكوجينة تبي تنفيض وانتي عارفة امي ظهرها ماتقدرش ادير معاي يا دوب تلمع ولا تمسح ع الخفيف
ع جية عليا تمشي .. لما شافت حمزة ابتسمت وقالت: شن الجو حمزة
هو رد: مليح
اما هي وقفت وقعدت تسمع في كمالة حديث فريال وخولة
اختها قالت بعد تفكير: اني غدوة ماعنديش محاضرات مهمة كان هدا نجيك الليلة نعاونك فيها
حمزة💓
وعليا عينها عليه ومبتسمة.. غالي عليها حمزة وتشوف فيه شخصية ونهار اللي عرفت انه يبي اختها فرحت قريب طارت..
خولة شدت يدها تقول بشرتها بالجنة: بجديات فريال! هاتي بوسة
حمزة بنرفزة: مازال ترغوا!
فريال تنحنحت وخولة عدلت تقعميزتها
بعدين قالت: سلامات توا
فريال ابتسمت: قود باي
تحركت السيارة.. وعليا قدمت لفريال وهي مبتسمة بخبث: ماشاء الله عليك
فريال شادة الدوسي وتمشي.. دارت حركة بفمها وقالت: ماشاء الله عليا وبس! اااه يا لولا اسمي بس
«طبعًا فريال تكره اسمها كره العمى»
•🌹•🌹•🌹•🌹•
قبل الغدي بشوي
واقف الحاج منصور فالوسعاية قدام حوشه ومتكي بيديه ع عكازه
طلع علي من وراه وهو يبلع في ريقه: ناديتني جدي
منصور بدون مايشوفله: تعالى اوقف هكي
هو نفذ امر جده..
وفوق في الفيراندا.. مقعمزين بلقاسم والامين وطاهر وصبري كانوا يهدرزوا واول ماطلع علي انتبهوا
نجلاء واقفة جنب باب الحوش تستنى تعرف علاش جدها بعتها تنادي خوها
شوي وجي شرف الدين ووراه بشير.. اول ماروح شرف الدين جي لجده وحناه يشوفهم وجده بدوره بعته يشوف خوه روح حتى هو ولا ويناديه
منصور: اوقف بحداه امشي
هما وضحت الصورة عندهم وفهموا ان عملتهم انكشفت
دار بشير زي ماقاله جده.. ورقية وسعاد يتفرجوا من الروشن
•سعاد بقلق: زعما شن يبي فيهم؟!
رقية: مدايرين حاجة واضح.. تو علي من يومه هادي صنعته لكن بشير جديد عليه!
ع جية حليمة: خيركم متشعبطات فالروشن اللطف!
رقية التفتتلها: بوي مضبح ع بشير وعلي اشبح شن داروله.. انتي علاش جاية يام كان تبي حاجة راك ناديتي عليا
حليمة: لا غير نبيك تحطي من العطر اللي برا فالميه.. وتعقبي لنويره رقدت
•منصور بحدة: علاش قايمين خيشة الزيتونة!
علي بلع ريقه وبشير منزل عيونه يستنوا فالعقاب
شرف الدين بهمس: ربي يعينهم ع ماصابهم
كمال بعدم فهم: تي هما علاش يمسوها الحمير
شرف الدين: بعدين نحكيلك
منصور: ماتبوش تردوا انت وياهوو؟!
بشير: حشا يا جدي.. لكن الحب تمزط واضطرينا نلوحوه
منصور عاقد حواجبه: وشن اللي مزطه
علي تنحنح: طحنا عليه
نجلاء ضحكت.. وابراهيم اللي كان واقف جنب شرف الدين وكمال فنص فيها..في مواقف زي هادي جدهم مايحبش السهوكة وهو خاف ينوبها من الحب جانب.. بس لحسن حظها جدها ماسمعش ضحكتها
وهي بحركة تلقائية حطت يدها ع فمها
منصور بصوت عالي: ماتبوش تكبروا!! تي كيف تبوني نديركم بنادميه ونقول هادو احفادي وانتم سرايف ماعندكم ماتصنعوا غير الجري جاي وغادي!
•الامين: ولع بوي
صبري: عنده حق ..حني في عمرهم بنساوينا وقايمين حياش .. مازال يبوا قشط وشحط باش يصير منهم
بلقاسم ضحك: يا ودي زي قشط وشحط بوك مش حيلقوا ..غصبًا عنهم حيولوا ع تالياتهم
طاهر: اشبح شن يلبسهم توا.. حي عليهم
•منصور شبح لجهة معينة: تشوف فيه الزيتون هدا كله انت وياه
هما ردوا: ايه يا جدي
منصور: الحب اللي قاعد كله تلقطوه انتم مانبيش حبة تنقص! ومن توا رجليك في غمرك انت وهو وتمشوا تبدوا.. وكمل بلهجة آمرة: هيا بالكم!
الزوز انصعقوا.. وعلي عيونه ع اشجار الزيتون ومش مستوعب بشن كلفه تو جده
اما بشير..سلم واستسلم طول قال لروحه نبدا باش نكمل فيسع احسن وفي نفس الوقت باش يخفف من وطأة غضب جده
رد يقول: حاضر نغير ونمشيله
وعلي اخيرًا فاق: زي ماتبي انت الموس وحني اللحم
منصور: عارفين مكان كل شي هي توكلوا.. وكمل بتحذير: وان شاء الله نلقى واحد ماشيلهم!
ولف مولي لحوشه
علي سبق بشير للشجر وعين تضحك والاخرى تبكي.. والثاني حاله مش انظم الا انه ماتحملش كلام جده في حقه عكس علي اللي قاعد صغير نوعًا ما ومايدورش .. فاتوا من جنب الولاد اللي ماضيعوش الفرصة وتشمتوا كالعادة
منصور وصل فالباب اللي واقفة جنبه نجلاء: بنتي خشي لامك قوليلها ديرلهم صونية غدي وارفعيهولهم غادي
نجلاء ابتسمت: حاضر
منصور كمل طريقه داخل.. وحفيدته لحقاته
لقت امها فالكوجينة واجعها ولدها اللي بيقضي نهاره تحت الشمس.. حاجة مهمة ع سعاد انها مبالغة هلبا في حرصها ع راحة صغارها ومدلعتهم بزيادة
•بس سبب هدا كله مع امها وبوها تتغدى
ناديا حطت الصفرة: عمتي قالت ماشية لحوش بنت خالها دايرة عزومة غدي رفعها منذر بسيارة عمي
منصور قام كاشيك: حتى بوي متغدي في حوش جدي.. ابتسم وهو ياكل وكمل: فضي الجو للوز وسكر
ناديا حتى هي ابتسمت وهي توكل في بنتها: قداش غاليات عليا اللقطات اللي يديروا فيها لما يجوا عند بعض يخلقوا في جو ليهم تعرف لولا عارفة روحي نضايقهم وهما بنات بيهدرزوا براحتهم كان هدا ننزللهم
منصور: يا ستي تو نديرلك اجواء حتى اني ولا معاش يعجبوا فيك
ناديا ضحكت بخجل
وهو قال بعد تذكر: غير ان شاء الله نزلتيلهم من الغدي
ناديا: تي قول هما بيركبولي.. جوني بكري قالولي ماتنزليش مش عارفة شن هيا الاكلة اللي بيديروها اليوم يتغدوا بيها
منصور حرك راسه وهو مبتسم.. بعدين شد لتين وجابها لحجره: يوكلك بابا يا مدورة ع قولت جدي.. اه يوكلك
وقعد يضحك فيها
وناديا تتفرج عليهم بابتسامة
•🌹•🌹•🌹•🌹•
بينما لوطا..
الحوش مضموم ومنشف.. ريحته معطر وفي ريحة تانية طالعة من الكوجينة
اللي فيها راوية توتي فالصفرة ومريم مطلعة طاجين من الكوشة
مريم: ويري تعالي شديلي شعري فوق طاح
راوية وهي تضحك: غريبة مخليتيه بلا ظفرة
مريم: شوفت عينك روحنا طول ضمينا وبدينا فالحلوة هادي
راوية نحت التوكة من شعر مريم.. اللي كان كثيف وطويل هلبا لنهاية ظهرها اسود زي الليل وفيه لمعة
راوية بدت تجدل فيه: تو نظفرهولك اني صح مش زي متاعك لكن يمشي الحال
مريم ابتسمت وهي تطفي فالكوشة وتفك فيها من الضي
بعدين قالت: خليه توا يبي هلبا باش تكملي
راوية: غير خليك بس وخليني نتفنن
مريم قعمزت ع كرسي نايلو: وين مها ماليهاش حس من بكري؟!
راوية: قالت بتمشي لحوشنا ..اكيد تتغدى غادي
وقعدوا يهدرزوا لين كملت راوية ضفيرة مريم اللي عجبتها هلبا💖
•🌹•🌹•🌹•🌹•
عند الخوت..
بلقاسم وقف: هي نوضوا اكيد حطوا الغدي وبوي مايحبش اللي يجي موخر
خوته وقفوا معاه.. لكن طاهر جاه تليفون وقعد في مكانه
رد ع المكالمة: ايوا ليلى..
:بابا تعال ماما مريضة هلبا!

يتبع...