سانية جدي🌹

الحلقة السادسة

#سانية_جدي🌹
#الفصل_الأول «سانيتنا»
#الحلقة_السادسة
________________________
قدام صفة محلات.. واحد منهم محل احذية وحقائب
صاحب المحل: الراتب مبدئيًا حيكون 200 دينار.. بعدين انت وشطارتك كيف تخليني نزوده
ابراهيم فرح هلبا: موافق.. وانت جربني واحكم
صاحب المحل شبح للباب وين مافي شاب تاني عاطي بالظهر ويتفرج ع الشارع: انت صاحب ولدي واني عندي ثقة انه مايخالط الا الناس الطيبة
ابراهيم ابتسم مجاملة بعدين قال: ان شاء الله نكون عند حسن ظنك.. توا عن اذنك وان شاء الله من غدوة نبدا زي ما اتفقنا
صاحب المحل: بعون الله..
طلع ابراهيم وخبط صاحبه ع كتفه: منور يا قدر
صاحبه التفت: عيب يا راجل.. انت ادور في خدمة وبوي يبي حد يهنيه ع المحل في فترة مانكونوش موجودين لا ني ولا هو.. مادرت شي يستاهل تدوي عليه
ابراهيم ابتسم ع الجنب وتنهد بعدين قعد يمشي..
صاحبه يمشي جنبه: لكن اني من رايي لو شفت قهوة خير.. بوي يبيك تشد من الـ11 للـمغرب التوكة مرات تتعارض مع جدولك بعد تسجل فالكلية لكن القهاوي اكثرهم دوام ليلي
ابراهيم ويديه في جيوبه: معاش في كلية خلاص
صاحبه انصدم: بلا سهوكة ابراهيم..
هو رد: ريحني يا راجل مش ناقصك
صاحبه: تي باهي علاش؟!!
ابراهيم: هكي..البزنس خير وبعد نحصل مبلغ نقدر ندير راس مال ونبدا شغلي الخاص خير من ستين الف شهادة خاتمتلك عليها الجامعة
صاحبه سكت مشوار بعدها قال: حرام واحد زيك يبطل نشهد بالله انه حرام
ابراهيم يغير فالموضوع: اني بنروح وراي ماندير.. وقف وشبح لصاحبه: هي تشاو
وسلموا ع بعض باليد.. ابراهيم كمل لمحطة الافيكو وصاحبه رجع لمحل بوه..
•🌹•🌹•🌹•🌹•
في الكوجينة..
البنات يغسلوا فالماعين
نور تاخد من خولة وتكفي ع الدولاب: فريالوو.. وين اليوم ماليكش حس غريبة
فريال فاقت من سرحانها: نفكر في ردة فعل بوي وامي
خولة عقدت حواجبها باستغراب: ع شنو؟!!
فريال تطلى وتمد لخولة تمصمص: يا حنة خوي بيبطل قراية ع خاطر نجلاء.. ع حسب مافهمت من رقية ان كثروا عليها الخطاب وتخاف اماليها يشكوا ماتضمنش شن يديروا وقتها.. مرات يصكروا ع موضوع ابراهيم بكل
خولة: والله الا صحة ليه
عليا تمسح فالدولاب قالت: حي عليه من ماما
فريال: واني شن مخليني نخمم غيرها!
نور بحزن: جي بين نارين ابراهيم
خولة وقفت غسل: ونجلاء وينها مش باينة من بكري؟
فريال: خدوها مريم وراوية لحوش عمي فتحي منهارة كان تشوفها امها تزبط طول..
عليا تنهدت: ايييه بالله ..اشبح هو توا شن صاير فيه..
نور: من قال ابراهيم يسيب الطب
فريال بضحكة: يا الطب يا الحب
عليا نزلت من ركابة الدولاب بعد كملت مسح.. لما شافت للباب بلعت ريقها وقالت: ماما؟ امتى جيتي؟
التلاتة التانيات جمدوا في مكانهم..
وسيلة تحاول تتمالك اعصابها: شن القطاف اللي سمعته توا!
فريال لفت وشافت لامها: احممم ماما..
وسيلة قاطعتها وهي تقول بصرامة: الدوة اللي قلتوها توا حق والالا ماترقعيش ولا ادرقي!
فريال بتوتر: ايه ..
وسيلة هزت راسها بوعيد: ماشي.. وينه خوك؟!!
فريال: مانعلمش ماشفتاش بكل اليوم
وسيلة مشت باتجاه الباب الرئيسي وتتوعد: ساهل يا ابراهيم ساهل
نور بخوف: حي غبارة حي في شكارة.. قعدت تتنقل بعيونها بين بنات عمها: كان تبوها باهية تحلفله ع نجلاء
عليا: لااااا ماما مستحيل اديرها
خولة ويديها صابون: اللي نعرفه ان وسيلة مرت عمي ديما تقول نبيه دكتور يرفع راسي ..ربي يكون في عونه ابراهيم هالمرة مش زي كل مرة
فريال: اساسًا هو حيقوللها اول ع اخر ..وبوي مش حيدور هلبا المهم عنده يعتمد ع نفسه ويدير حاجة لمستقبله مش مهم بشهادته ولالا..
نور تشبحلها: قصدك تقولي عمي بيسكتها؟!
فريال اشرت ع نور: بالزبط..
عليا عكرشت وجهها: وووه عليا موعره الحب يا اما متليعة يا اما تتخيلي تصير فيكم حاجة تليعك..
التلاتة ضحكوا..
خولة تمصمص في صفرة: خصوصًا اللي من طرف واحد والتاني مايندري ع هوى داره
نور وعليا شبحوا لفريال..
اللي قالت وهي تغسل فالحوض: ربي يكون في عونهم اللي هكي
التلاتة بنفاذ صبر: آمييييين
•🌹•🌹•🌹•🌹•
في حوش صبري..
وصلت مرته وسيلة وهي كتلة من النار.. تمشي وتجي وهي قريب تنجن ..كلام البنات يرن في وذنها ويزيد يعصب فيها
•راوية مقعمزة ع كرسي الكنبة وسماعة الارضي ع وذنها: قداش ليها طالعة؟ باهي صحيتي نونا..
صكرت من بنت عمها وشبحت لمريم: قالتلي طلعت والعة ماتشوف في شي قدامها
قبل ماترد مريم خشت نجلاء.. وجهها منفوخ وعيونها من كثر مابكت بكري لين صاغرات
قالت بحزن: مرت خالي عرفت؟!! قداش كانت تتمناه دكتور قد الدنيا
مريم وقفت وجتها: تعالي قعمزي بس.. قعمزتها وقعمزت قدامها: قوليلي انتي ماتعرفيش وين مشي بعد كلمك؟ كان هدا نبعتوا وراه واحد من الولاد يقوله مايجيش هنايا لين تهدا مرت عمي ويقدر يتفاهم هوا وياها
نجلاء هزت راسها: لالا ماقالش
راوية ابتسمت وفاهمة عليها في شن تفكر: ماتخافيش.. عميمة وسيلة طيبة هلبا مستحيل تحملك المسؤولية
نجلاء بأمل: يا رب
•🌹•🌹•🌹•🌹•
:كنه معاي هو كنه!! ليش مصر يخرب عليا ليش!
هادي صفاء.. تبكي وتعارك
امها جنبها تمسح ع شعرها: اشششش عليش البكا توا..ولد خالك ماسك فيك بيديه وكرعيه وهضي اهم حاجة.. بعدين باتك هكي عقليته مايحبش يعطي البنت لين تكمل قراية صار فيها ماصار معاشها عندها..
هي بدت تهدى وقالت والكلينكس في يدها وتحرك فيها: لكن هو رد خالي يمي.. خالي الصادق طلع من هنا وجهه كيف الليمة .. نا ننتحر بيش يتريح ولا ايش ندير اهاا؟!
امها حضنتها وباست راسها: فال الله ولا فالك.. كنك يا بت انتي انتحار ايش دوته .. باتك وخالك يعرفوا كيف يحلوها بيناتهم ماتدخلش انتي
ابوبكر وقف في باب الدار ..لما شاف حالتة اخته عرفه السبب المعتاد .. غير عيونه لامه وقال: يما نا طالع تبي شي..
امه ردت: شي يا ولدي مفيت سلامتك
ابوبكر وهو يحرك في مفتاح سيارته بيده: ماشي نا بنعدي رؤوف يرجى فيا
صفاء بعدت عن امها وقالت وهي تمسح في دموعها بظهر يدها: كنه رؤوف.. عليش معديله؟!
امها بابتسامة: ساع تعرفي بعدين
صفاء رجعت اتكت ع صدر امها وتنهدت..
•🌹•🌹•🌹•🌹•
في طرابلس..
خش ابراهيم من بوابة السانية.. مشي لين وصل حوشهم فتحه وخش
واول ماصكره طلعت امه من الدار وواضح مش ناوية خير.. زبط انها عرفت
ابراهيم: يام خليني نفهمك..
وسيلة بعصبية: شن هوا اللي بتفهمهولي شن؟! الناس تقدم وانت توخر ..علاش يا ولدي علاش تسيب قرايتك ماتنفعك الا هي! لا حب ولا كلب! واني اللي كنت فرحانة بيك ومش مدرقة .. ولدي بيبدا دكتور ليه شنة ورنة.. تدفن روحك علاش علاش!!
ابراهيم بانفعال: يام اني هادا اللي مريحني وماشي معاي ..القراية تعبتني بنفوتها بندير فلوس من حاجة تانية اسرع واقل تعب!
وسيلة: حاجة تانية قتلي!! ع امك يا ابراهيم اللي عارفة غنتك؟!! كله من جراير بنت سعاد تنقرز فوق راسك تحسابه ساهلة كلمة تعال اخطبني صبلي نشرب!!
ابراهيم بهدوء: نجلاء ماليهاش علاقة بكل وهي بروحها رافضة لكن علاش ماتبوش تفهموا انها حياتي اني بروحي.. شن ندير باش تخلوني في حالي نقرر اللي نبيه ونتحمل مسؤوليته ،راجل راني مش طرطور تمشوني بكيفكم سوا انتي ولا هي
وسيلة حستها منه الكلمة: صار اني نتساوى بغيري عندك يا ولد بطني؟ عند الله سين من الناس امك طلعت.. هادا مكانتي وقدري؟
ابراهيم عرف روحه لبز فالدوة.. طول قدملها باس راسها وضمها: ان شاء الله نتبكش قبل مانوجعك يا غالية
وسيلة: لو اني غالية عندك حق فوت الدوة الفاضية واستعوذ من الشيطان سلم ولدي وارجع حط عقلك في قرايتك
ابراهيم بعد عنها وقال بنرفزة: تربحي يام صكري عليها السيرة كان تبيني نقعدلك في هالحوش!
:في شكون تهدد انت؟!!
هو لما سمع صوت بوه نزل راسه.. ووسيلة شبحتله وهي مازال ممتعضة ..
صبري بعقدة حواجب: شن صاير؟! تكلموا..
ابراهيم لقاها فرصة مناسبة يبلغ بوه بقراره: قلتلها بنبطل بعد الشهادة هادا علاش
صبري انصدم..يعرف قداش ولده متمسك بقرايته: وانت شن اللي غيرك بين يوم وليلة يا ولد؟!
وسيلة ابتسمت بهزوة وهي تمرر في عيونها ع وسط الحوش..
ابراهيم بضيق: مانبيش نفوت سبع سنين سريك مريك بين الكلية والسانية.. نبي ندير فايدة ع عمري وسبع سنين اللي بنضيعهم بين الكتب والشيتات يبنولي مستقبل بالمرتاح..
كلامه كان مقنع كأنه فعلًا هادا رايه والدافع الحقيقي لتسييبته.. خلا بوه يفكر في كلامه ومالقاش مناص من الموافقة لانه خش الكلام راسه بجد..
صبري: اللي قلته صح.. وكمل بلهجة تحذيرية: لكن اياني واياك يا ابراهيم نلقاك ملتم على جماعة مش مزبوطة ولا تخلط ع اي حد.. دابك داب خدمتك سلم ولدي .. عقد حواجبه وكمل: الا ماقتليش؟! امتى تبي تبدا تخدم ووين؟ كان دورت وماحصلتش مكان قولي اني نعرف وين نحطك ومع من
ابراهيم ابتسم: مشكور بوي لكن حصلت خدمة في محل بو وليد صاحبي متاع احذية جهة نادي الاتحاد.
صبري ابتسم: ماشي ربي يوفقك ..اهم شي تكون قد الامانة اللي عطوهولك وتركز في خدمتك..
ابراهيم: في هادي ولا يهمك اني حريص
صبري طبطب ع كتف ولده وقال: باهي امالا.. شاف لمرته اللي كانت ساكتة طول ماهما يتناقشوا: هي وقت يا وسيلة مش قلتي تبيني نرفعك لحوش اختك؟
وسيلة: خمس دقايق ندير عليا جلابيتي ونطلع
صبري لف متوجه لباب الحوش: اني بنسخن السيارة..
بمجرد ما طلع.. هي التفتت ع ولدها وقالت: علاش ماقلتش السبب الحقاني؟!!! من شن خايف
ابراهيم بابتسامة: نحبك يام ..نموت فيك.. اني اللي مفروض نسألك علاش ماقلتيلاش انتي.. قام حواجبه وهو مازال مبتسم: واني اللي بنجاوبك.. لانك ماتبيش تخربي عليا
وقرب باسها بحب ع راسها
وسيلة تنهدت وخشت لدارها وخلاته فرحان ..ماتوقعش الامور تمشي بالسهولة هادي..
بس اللي زي ابراهيم نواياهم مش خبيثة طبيعي يسخرلهم الله الاسباب وييسرلهم امورهم💖
•🌹•🌹•🌹•🌹•
واقفين الزوز فالوسعاية قدام حوش جدهم..
بشير مسح ع وجهه بيديه الزوز: المشكلة اني ملبزها معاه اخر فترة.. زعما يوقف معاي بعد عملة الزيتونة؟
عبيدة: جدي اسلوبه عقاب يا حمار بعده خلاص ينسى ويفوت.. رقص حواجبه وكمل: بالذات بالبشارة اللي جايبهوله انت
بشير نفخ: مش عارف كيف بنوقف قدامه جدك عنده هيبة النم تخليك تتلكمس واني من الاول يازين مبهاك
فجأة طلع عليهم كمال: ع شن تحكوا؟!
عبيدة شافله: انت من وين تطلع بالزبط؟ نبي نفهم فهمني لو تكرمت!
كمال ضحك: ماتكبرهاش يا راجل.. كنت ندير في مكالمة فالفيراندا وين جيت نازل سمعت اخر شي قاله بشير حبيت نقدم خدماتي
عبيدة بهزوة: هات ابهرنا
كمال وهو يتنقل بعيونه بيناتهم: انتم اللي هاتوا الاول.. نعرف الموضوع قبل باش نعطيكم الدبارة
بشير رد: نبي نعطي كلمة في ليلى بنت عمي طاهر ومش عارف منين نجي لجدي
كمال قام حواجبه بمفاجأة: واحد ورا التاني شوركم
وشبح لعبيدة بطرف عينه.. وعبيدة ولا كأنه الدوة عليه
اما بشير فهمها ع حمزة وابراهيم: ماتبيش تتكلم؟
كمال ابتسم ويديه ورا ظهره: بروا لحناي ماليكم الا هي
الزوز شبحوله وهما يستنوا فيه يكمل..
كمال مبتسم: تمشي لحناي وعمتي زمزم وتفتح معاهم الموضوع .. وحناي تو تتكفل بالباقي من غير ماتطلب منها
بشير ابتسم والفكرة خشت راسه..
عبيدة ابتسم حتى هو: تي شن تستنى برا نفذ
كمال جبد بشير من يده: هيه هيه.. قلت لطارق قبل؟!
بشير بابتسامة ثقة: ايه.. توا كيف جيت من عنده
كمال طلقه: مالا توكل وربي معاك
بشير شاف معاذ ولد بلقاسم جاي من حوشهم.. شده من يده وقاله: جيت وجابك ربي..
معاذ يشبحله باستغراب
بشير مطبس ع معاذ ويكلم فيه: خش لحوش جدي ونادي على عمتك زمزم قوللها يبيك بشير برا..طلقه وقال: هي برا فيييسع
معاذ هز راسه بمعنى باهي وخش يجري
•كمال مبتسم ابتسامة باردة ويشبح لعبيدة بربع عين: وانت امتى بتتلحلح
عبيدة بدون مايشوفله: الله يلعن هداك اليوم اللي ريتني فيه
كمال ضحك بإستفزاز.. وعبيدة ع اعصابه😂
•🌹•🌹•🌹•🌹•
في كافي خاص بالشباب..
مقعمزين مقابلين بعض وقدامهم زوز طواسي مكياطة
عبدالرؤوف: مازال ماتبش تحكي؟! ادوي يا را وترتني
ابوبكر: لنقنه يوتر الموضوع هو
عبدالرؤوف بعقدة حواجب: مافهمتش
ابوبكر تنهد: نابيدي جايك في موضوع خطبة
عبدالرؤوف قام حواجبه..
ابوبكر كمل: مانبش نكذب عليك.. نا من فترة عاجبتني ديما وكيف ما انت عارف اني بديت في حوشي ونبي نخطبها توا والفرح امتى مايسخر ربي ع الحوش وكماله
عبدالرؤوف سكت مشوار بعدين قال: بحت يا بوبكر ..انت ولد عمتي ومانا لاقيين خير منك..لكن زيجة البدل هضي حتى الرسول ناهي عنها ..نعطيك اختي وتعطينا اختك ويوم اللي تصير مشكلة مثلًا بيني وبين صفاء انت ادخل ديما في الموضوع نكاية فيا ..وفالنهاية بكل نخسروا بعضنا..
ابوبكر باندفاع: لا يا رؤوف انت فهمت غلط.. الشاهد عليا ربي لما دويتلك مش هضا غرضي .. نا عجبتني بنت خالي ونبيها مراتي وربة حوشي وبدل مابدل هضا مش في عقلي بكل ونقعد مش راجل لو فكرت فيه
عبدالرؤوف اقتنع بكلامه: على هكي يا ولد عمتي اللي يصير بينك وبين ديما نا وصفاء مش شورنا بيه والعكس صحيح.. الا طبعًا لو جت وشكتلي منك وطلع موضوع ماينسكت عنه هضا شي اخرى
ابوبكر ابتسم: لا نحن شورنا بيكم ولا انتم شوركم بينا كل حد في حاله..
عبدالرؤوف ردله الابتسامة: بات الكلام امالا.. نا حنفتح الموضوع مع باتي وامي وناخذ راي صاحبة الشان بعدها يصير خير
ابوبكر بفرحة مش قادرة يدرقها: ماتبطاش علي اهاا وصاة وسع يا رؤوف
عبدالرؤوف قام عيونه فيه: لم فمك وراعينا عاد
ابوبكر ضحك: ماشي..
ورشف من المكياطة
•🌹•🌹•🌹•🌹•
بالرجوع لأم السرايا..
حليمة قامت راسها وشافت لحفيدتها: ماتبيش تشربي معانا طويسة حمرة؟!
ليلى طبست وباست راس حناها: قدامك يا حنينة طارق اتصل يبيني ضروري
كلثوم: شكله يبي غدي لانه روح من الجمعة رقد طول
حليمة عقدت حواجبها: من طول عمره ياكل هني شمعنى توا الا يتغدى غادي يا ودي مش راكبة..
ليلى زي امها.. كانت متوقعاته يبي ياكل، وطول خطر في بالها كلام مريم امس « لو حدسي ماكذبنيش اول حاجة حيديرها بشير انه يحاول يخلي في شي رسمي يربطكم»
بلعت ريقها وطلعت من الدار ودماغها يرفع ويجيب في مليون فكرة «زعما كلم طارق عليا؟ باهي ع راي مريم مفروض يكلم جدي الاول؟ تي من قال يا ليلى وانت تحلمي.. اوووف»
هي طلعت من باب الكوجينة وزمزم خشت من باب الحوش ..
وصلت فالدار وقالت: عمتي وانتي كبيرة قدر بشير يبيك برا شوية
كلهم استغربوا.. علاش مايخشلهاش وخلاص؟!
لكن حليمة ناضت طول وهي تقول: يا الله .. وينه هو
ومشت بطريقها للباب
زمزم وخرتلها ومشت معاها وقالت بعد تنهدت: قالي نخشوا للدار وهو يجينا
حليمة زاد استغرابها: اضربي عليه اضربي
وفتحت باب الدار وخشت وكنتها خشت وراها وهي فاتحة تليفونها.. لقت الرقم وضغطت ع البطمة الخضرة.. نادى نص مرة بعدين انفتح الخط: هاه بشير.. اني وحناك فالدار وينك.. سكتت شوي وهي تسمع فيه بعدها قالت: باهي
نزلت التليفون من ع وذنها وصكرت الخط..
حليمة: شن قالك
زمزم قعمزت: قال جاي
•في هالوقت في حوش الطاهر..
وصلت ليلى ولقت طارق في انتظارها
نظرات عيونه اربكوها هلبا.. ولا نقولوا هي حاسة اللي بيشبح وجهها بيعرف
طارق: خشي قدامي للدار نبيك
ليلى تحاول تخلي روحها طبيعية: علاش ناديتني .. كان تبي غدي راك جيت غادي وحطيتلك
طارق بقيمة حاجب: اني قتلك نبيك فالدار مش فالكوجينة
ليلى سكتت ومشت لدار المعيشة.. فتحت ضيها والتفت لخوها تقول: هي شن هوا اللي تبيه
طارق قعمز ع المندار ودار رجل ع رجل: اليوم جاني بشير وكلمني عليك
ليلى كانت مهيأة نفسها لاحتمال زي هادا.. قالت باستعباط: يعني؟!
طارق قام حواجبه: يعني طلبك مني بالعربي..
ليلى ع اساس مصدومة: كييييف؟!!!!
هو حسها تبالغ في ردة فعلها وشك: خيرك تعيطي؟ .. الحصيلو من جيبتي ليك هني بنسألك انت راغبة ولالا.. لو لا باش نلحق عليه قبل مايكلم جدي ونقعدوا في موقف مع عمي حسين
ليلى انحرجت قدامه: مش عارفة.. بشير ولد عمي خير من الغريب لكن الراي رايكم انتم وبوي
طارق: يعني مافيش بينك وبينه دوة قبل بكل!!
ليلى تمنت الارض تنشق وتبلعها: لا يا وخيي صدقني منك نسمع
طارق وقف: تمام
ليلى بتوتر: كان معاش تبي شي اني مولية غادي
وجت بتطلع
هو لحق عليها: ماتبيش تخليني نباركلك؟!
ليلى رجعت وقدمت منه بخجل وهي دوب مامبتسمة
طارق حضنها: مبارك عليك السطل..
ليلى بخجل: الله يبارك فيك.. عقبالك يا رب
طارق بعدها عنه: كل يوم نتأكد ان الاسلوب مايمشيش لا معاك لا مع اختك.. تي شوفي سحنتك كيف تغيرت لما كلمتك بهداوة .. حسيت الاعدادات تتلخبط مافيش خير من الحروشية
ليلى ضحكت.. مشاعرها هايجة ودقات قلبها حاستهم مسموعات لخوها وحيكشفوها.. ماكانتش في حالة تسمحلها ترد لا بخير لا بشر ..
طارق: كان بتمشي بري توا
ليلى: لالا نعست بنرقد شوية.. لما تطلع صكر باب الحوش وراك
ومشت بدون ماتخليله مجال يرد عليها.. وصلت لدارها هي وخواتها فتحتها وصكرتها وراها
قعمزت ع طرف السرير وتنهدت بابتسامة
ليلى بهمس: نهاري اني معقولة حبيته هكي! يا خفيفة يا ليلى شن ريتي منه انتي قاعدة!
تفكرت موقف المكياج.. اللي من بعده لا هي رجعت تشوف فيه زي قبل ولا هو💖
قالت بضحكة: شكله البركة في مكياج زمزومة الايطالي
تحولت ضحكتها لابتسامة.. وانطرحت ع السرير وهي تفكر فيه
•اما طارق.. طلع وكان ناوي مايقولش لبشير ع  ردها ..يبيه يتشحط لين يسمعه من جده😁
•🌹•🌹•🌹•🌹•
عنده هو..
بعد خش للدار قعمز مقابل امه وحناه
حليمة: تكلم طيحت قلوبنا راك!
بشير وهو يحرك فيده ع رقبته بالجنب: بنحكيلكم موضوع وقاصدك يا حناي تخدميني فيه
حليمة اشرت ع روحها: اني!! وباهي كان نقدر غير تكلم بس
زمزم: هيا يا بشير يبست ريقنا
بشير تنحنح: اني حاط عيني ع وحدة ونبي نعطي فيها كلمة باش نضمن انها ماتمشيش لغيري..
زمزم: قاعد صغير انت يا ولدي من هوا اللي بيقولك عادي نخلي بنتي تستناك!
حليمة التفتتلها: اصبري يا زمزم.. رجعت شبحت لحفيدها وكملت: قوللنا قبل من هيا البنت ولعيت مني؟!
بشير ابتسم: لعيت منصور بالحاج
الزوز عيونهم توسعت بمفاجأة
وحليمة قالت بفرح: رايد وحدة من بنات عمامك؟!!
بشير: بنت عمي الطاهر يا حناي.. ليلى
زمزم ابتسمت: عليك نهار زين مزين
حليمة بابتسامة فرح عريضة: هو غير مزين يا زميزم
وحطت يدها فوق فمها بتزغرط..
بشير وقفها لما قال: لااااا مازال مش توا
حليمة تكنطت: شن هوا اللي مازال؟!
هو رد: مش قتلك نبي منك خدمة
زمزم: قول الجوهرة
بشير شبح لامه بعدين لحناه: نبيك تكلميلي جدي يتكفل هو بالموضوع ويفتحه مع بوي وعمي
حليمة ضيقت عيونها وابتسمت: طلعت مانك هين يا بشوره.. اطمن يا غالي جدك كان يسمع من توا يتملك فيها
بشير ابتسم بفرح.. طبس باس يدها وقال: ربي مايحرمنا منك
حليمة تضحك: اه منكم تعرفوا كيف اتختخونا..
بشير باس يد امه حتى هي: عيب يا حناي انتم الخير والبركة.. وقف بعدها كمل: اني بنطلع بالله هنيني يا حناي
حليمة تربط في تستمالها اللي ارتخي: برا وانت مطمن حليمة الساقزلي في قفاك
هو ابتسامته كبرت وفتح الباب وطلع
زمزم وقفت بابتسامة: ريتيه كيف فرحان
حليمة مبتسمة: اني اللي ريته.. ربي يكمل عليهم بالخير..
ووقفت حتى هي
زمزم: بتقوليلهم البناويت عمتي؟!
حليمة: مش قايلة شي لين نكلم عمك..
•🌹•🌹•🌹•🌹•
في حوش فتحي..
مريم بتساؤل وهي تتفحص في نجلاء بعيونها: بتروحي خلاص؟
نجلاء هزت راسها: نحس في روحي احسن .. غير شوفوا وجهي قاعد باين فيه اثر دموع
راوية: لالا .. غسلتيه مليون مرة معاش في شي
نجلاء خدت نفس وزفراته: تمام.. مشت باتجاه الباب لبست شبشبها ولفتلهم تقول: مش موليات انتو؟!
مريم: بنمشوا لحوش منصور نكملوا عقاب قرايتنا
نجلاء ابتسمت: بالتوفيق..
فتحت الباب وطلعت بعد خلاته مردود
مريم: بري فيسع جيبي الكتاب اللي عطتهولك ليلى متاع الفيزياء
راوية خشت داخل باستعجال تجيبه باش يطلعوا..
•ونجلاء بعد طلعت.. كانت تمشي وهي تفكر بحزن في ابراهيم
لين سمعت..
:بست
التفتت طول وهي ادور في مصدر الصوت.. اول ماشافاته هو ولقاته يبتسملها من روشن حوشهم..تلقائيًا ابتسمت
ابراهيم بحركة الشفايف: نحبك
هي ضحكت ومشت تجري لحوش جدها..
وهو يتبع فيها بعيونه المُحبة
•🌹•🌹•🌹•🌹•
في الليل.. الساعة 10:30
مقعمزين في دار المعيشة والتلفزيون مفتوح ع قناة السعودية ع الحرم المكي.. خشت عليهم رقية بطاستين كركديه مصقعات لين منديات
نزلت الصفرة قدام امها وبوها وحطت لكل واحدة طاسته قدامه
منصور: في وقتها يا بنتي
حليمة رشفت من الطاسة بعدها قالت: عطيتي منه لخليفة؟ غالي عليه
رقية: لالا خليفة مشي عند حمدي
منصور بعقدة حواجب: علاش؟!
رقية قامت كتافها بعدم معرفة: قال خدمة ماخدمة
حليمة اشرتلها براسها تطلع.. رقية استغربت لكن قامت الصفرة وقالت: عندي شوية حوايج يبوا الغسل نصوبنهم وجاية
طلعت من جنبهم والفضول بيقتلها..
حليمة حطت الطاسة وشبحت لراجلها: وتو بعد قعدنا بروحنا يا حاج نبيك في مويضيع هكي صغير
منصور شافلها: ان شاء الله خير
هي بابتسامة: خير خير .. بشير جاني بكري ويبيني نكلمك تخطبله
منصور عقد حواجبه بتعجب: نخطبله! حسين ماجابش سيرة بكل
حليمة: لا ماهو هو مايندريش ويبيك انت اللي تقوله هو والطاهر
منصور: شن دخل الطاهر توا؟! معاش فهمتك يا مراة!
حليمة ضحكت: بالشوية عليا يا حاج وحيدة وحيدة.. هادا بشوره رايد ليلى بنت عمه ويبي يعطي فيها كلمة عن تريح منه
منصور فرح واستبشر: والله! زين ما اختار ماهو لاقي خير من بنت عمه وكان يلود البلاد كلها
حليمة بسعادة: وشن قتله حتى اني.. والله يا حاج فرحت من جواجي قلبي لما قالي
منصور هز راسه بابتسامة: خلاص اني اليومين الجايات الحي نكلمهم وماتكون ليلى الا لبشير
حليمة: بكري ماخلانيش نزغرط لكن تو والله الا مانطلقها
حطت يدها ع فمها وعطتها زغروطة ترن رنان..
والحاج منصور يضحك
خشت عليهم رقية: شن في؟! يام خيرك تزغرطي شكون بيدير عرس؟!
حليمة: تعالي قعمزي تعالي ونقولك
رقية خشت وقعمزت جنب امها اللي قعدت تحكيلها
•🌹•🌹•🌹•🌹•
في الحوش اللي جنبهم..
سراج: احيييه يا بشوره ماتعرفش تبصر طول لجدي
ايوب بضحكة وهو يغمز لسراج: دارها من مجاميعه مازعل حد.. كلم طارق خايف يوقفله فيها كان ماقالاش
شرف الدين يرقص في حواجبه: بيبدا التبندير ع اصوله من هني وبرا غادي
خوته قعدوا يضحكوا..
عبيدة: بادي قداش ليه
بشير ياخد فاللي يلقاه قدامه ويحدف ع خوته: نوض يا فاضي انت وياه مرض
زمزم فنصت: بلا دعي!
بشير شبحلها وابتسم: حاضر يا حياتي انتي
وخوته الاربعة يشبحوله في شبحات مش هيا😂
ناض شرف الدين وقال: اني خلاص مش متحمل..
بشير: مص الليييييم يا خوي
والتانيين يضحكوا
هو طلع وزمزم قالت: صار بتجيبلي ليلى بنت كلثوم كنتي
بشير: يام عاد فكينا.. كنتي تحبيها غير وين بنخطبها تغيري موقفك! مامعاناش راه
زمزم ضحكت وضرباته ببصارة ع يده: ريتوه من توا دارلي عليها سبعة لسانات ومش طايق فيها كلمة
سراج بخبث: قوليله يفوتها وشوفي كيف يفضلها عليك
بشير يفنص فيه ويعض ع لسانه
زمزم تضحك: يعطيكم الخير انت وياه .. طبطبت ع رجل بشير وقالت: ماتخافش زمزم لديكم لا خوف عليكم مانفتحش في وذاني لحد
عبيدة: اوووووه قصف يام ارض جو
ايوب يدغدغ فيها: صقع عليك مالا شن
زمزم قعدت تضحك وهي ادف في ايوب: يا فرخ حول من عليا .. ضرباته عنفقة وخر ..قالت وهي تلهث: يرزيك في العدو دهشتني!
سراج بصدمة: ولا جون سينا
ايوب وهو يتحسس في رقبته: خلاته وراها.. احححح سم يما
زمزم قلبها وجعها: يا روحي وليدي ..شن بنديرلك كله منك علاش ادغدغني وعارفني فيا النطة
بشير بملل: فكونا من الدوة الفاضية وخلونا فالمهم
زمزم ضربت يديها ببعض: المهم هونا في يدين جدك .. ترا ماتبداليش بالنفخ من توا
بشير سكت وخوته مبتسمين بشماتة وهما يشوفوله..
زمزم شبحت لعبيدة ببصارة: وانت امتى بتتلحلح
عبيدة: وااااك ..خيركم معاها الكلمة هادي اليوم! كان محفورة ع جبهتي قولولي..
وناض وقف وهو يقول: نمشي لشرف الدين خير
وطلع من الدار
زمزم شبحت لولادها بتعجب: خيره خوكم؟! تو مش عارفني نبصر
ايوب بغمزة: فوتك منه يام غاير
زمزم حطت يديها فوق بعض: هالجيل هادا ماينقدر وصغاري ني بالذات عاصيين وديما عفاريتهم حاضرة في كل وقت
والتلاتة يسمعوا فيها وهما شادين الضحكة بالسيف..
•🌹•🌹•🌹•🌹•
:كذاااابة!!
ليلى قدمتلها بسرعة وحطت يدها ع فم اختها وصبع يدها التانية اشرت بيه ع فمها هي وقالت: اصصصص
نور نحتلها يدها: بشير! ولد عمي حسين وانتي؟! .. كملت بعتاب: من امتى وعلاش ماتقوليلناش لين توصل للخطبة يا ليلى؟!
هي شدت يدين اختها وتتكلم بتوتر: مش هكي يا نور ..هو اصلا مافي شي بيناتنا والله..
نور داخت: كيف مافي شي؟! الفرحة هادي كلها من وين جت مالا
ليلى وقلبها يدق💓: تذكري اليوم اللي مرضت فيه ماما ورفعناها للمستشفى
نور: ايي
ليلى كانت لابسة خاتم ذهب ديما في يدها قعدت تنحي فيه وترد من التوتر: مش الصبح جبتلها قرفة من عمتي زمزم.. احمم واني غادي لقيت عندها مكياج جديد جي خاطري نجربه ..طلعت وقعدت نحط هو شوره كيف نايض ومايندريش اني عندهم وشافني بمكياجي
نور بإنسجام: حي الحشمة
ليلى خدودها انحمروا: خلاص من هداك اليوم فوت اسبوعين او اكثر مش عارفة وجي لحوشنا وقعد يقول في كلام مش واضح معناه لكن اثر فيا
نور اخر انسجام وكفوفها تحت خدودها: شن قال؟!
ليلى شبحتلها وتحشمت وقالت: وشن علاقتك شن قال ..قال اللي قاله وبعدين كلم طارق وشكله حتى جدي والباقي تعرفيه
نور ابتسمت بعدها وقفت بحماس: نمشي نزف الخبر للبنات
ليلى: مريم وراوية عندهم علم
نور شهقت: حي الخاينات حرام ماقالوا حاجة
ليلى: تي شن هوا اللي بيقولوه يا همي!
نور طالعة من الدار: نخبر الباقي باهي
ليلى علت صوتها: جيبي الارضي وتعالي هنا
جاها صوتها من برا: حاااضر
•🌹•🌹•🌹•🌹•
نزلت من فوق وهي شادة راسها بيدها.. وصلت في الكوجينة لقت امها كيف بتطلع منها: ماما
مريم عقدت حواجبها: كنك بنيتي كنه راسك ماسكته هك؟!
ديما: قلت لرؤوف عطيني نلعب بكمبيوترك طشة .. هلب الوقت بلا مانندري ومانلقى روحي الا مريحة 5 ساعات ونا قاعدة عليه
مريم قعدت اضبح: زينات.. يا زينات
شوي وجت وقفت قدامها: ايوه يا ستي
مريم: خشي هاتي لديما حبة دوا راس بعدك مصدعة من القعدة ورا هالكمبيوتر
زينات: حاضر
وخشت للكوجينة.. شوي وجت في يدها صفرة فيها الدوا وطاسة ميه
خدتهم ديما وزينات رجعت للمطبخ
مريم راكبة هي وبنتها وتقول بتأنيب: عاجبك هك.. مش باهي هضا يا يمي اتمي معاش تحقي كيف الناس ..هالعيون السميحة هذينا يتمن بلهون
ديما ابتسمت واتكت ع كتف امها بعدين قالت: روحن بدري مالا
مريم ابتسمت بهزوة: طلعن يجارن من بعد المغرب يقولن تو هضي بتوحلنا فالعشا
ديما تنهدت..
وخشت هي وامها لدارها
في نفس الوقت انفتح باب الحوش.. خش منه عبدالرؤوف وهو يلعب بمفتاح الحوش بصبعه السبابة..
تلاقى مع زينات كيف طالعة من الكوجينة وبتمشي لدارها
لما شافاته جاته تقول: عايز حاجة يا بيه
عبدالرؤوف: امي وباتي رقدوا ولا مازال واعيين
زينات ردت: الست مريم مالهاش خمس دقايق راحت فوق والبيه صادق من زمان دخل اوضته
عبدالرؤوف: وجدي؟!
زينات: من بعد حضرتك طلعت هوا راح جناحه قال ايه ..مايبيش يسمع الحكاوي المفترشة
عبدالرؤوف شد ضحكته: صحيتي زينات تقدري تعدي
زينات: تصبح على خير با بيه
عبدالرؤوف وهو يركب فالدروج درجتين بدرجة كعادته رد عليها: وانتي من اهله
كمل طريقه .. ع طلعة امه من دار ديما
لما شافاته ابتسمت
عبدالرؤوف جاها وحاوط كتفها بذراعه: ايش اللي موعيك لتوا
مريم: اللي موعيك انت
هو ضحك وباس راسها بعدين قال: كان باتي قاعد واعي كلميه ليا وتعالوا نبي نسهري معاكم شوية
مريم استغربت بس قالت: باهي تو نشوفه لك
طلقها عبدالرؤوف بعدين مشي للمكتب متاع بوه فتحه
ع جيته هو ومريم..
الصادق بابتسامة: الصقر
عبدالرؤوف قدمله طول وباس يده وراسه: قمعز يا باتي
الصادق سحب الكرسي وقعمز ورا مكتبه ..ومريم وعبدالرؤوف قعمزوا حتى هما ع الصالونات اللي قدام المكتب
الصادق: هات يا صقر ماعندك امك قالت تبينا في موضوع
عبدالرؤوف ابتسم: صحيح كلامها..
الصادق شبح لمرته وهو يأشر ببيرو كان محطوط على مكتبه ع ولده: قولك ايش يريد يا مريم
عبدالرؤوف ضحك
مريم بابتسامة مع تضييقة عيون: ولدك هضا كيفك بحره غريق
عبدالرؤوف زاد فالضحك.. والصادق حتى هو قعد يضحك بعدين قال: لنقنك ماضيعي فالفرص بكل يا رفيقتي
عبدالرؤوف هدا ضحك وشافلهم الزوز: خلي ندويلكم عليش جبتكم هنا
الزوز شبحوله بانتباه
وهو قال: اليوم تلاقيت مع بوبكر ولد عمتي فالبداية حكينا في مواضيع عامة وسهاري عادية.. بعدين فتح معاي موال الزيجة وتقدروا تقولوا خطب مني ديما
مريم والصادق تفاجؤوا
ورؤوف مكمل: طبعًا الشور شورك يا باتي وشور ديما .. نا عليا نوصللكم طلبه الراجل
الصادق سكت مشوار بعدها قال: بوبكر ولد خيتي وشبه متربي معاكم ..نعرفوه زين ونعرفوا تربيته ومن وين طالع.. لكن كيف ماقلت يا ولدي الكلام عند ديما ونحنا مالناش علاقة.. غير عيونه لمرته وقال: ولا ايش يا مريم
مريم بتفكير: نا خايفة قدام كان صارت مشكلة بين واحد منكم هو ووليته الثاني ينحط فالوسط .. هو هضا اللي مخليني مش مشّجعة
الصادق وهو يفكر قال: يسلم فمك.. هضي نقطة غابت عني
عبدالرؤوف ابتسم: لكن ماغابتش عني نا.. قلتها له وهو قالي نطمن وعطاني عهد.. والراجل تمسكه كلمته يا باتي
الصادق بسط كفوفه الزوز والبيرو بين صوابعه: تو تما الكلام يالا ديما معناها.. واني ساع نفتح معاها الموضوع بكرة بعون الله
مريم ابتسمت: اللي فيها الخير يجيبها ربي
عبدالرؤوف وقف: مالا تو عن اذنكم تالف بكل وبنعدي نرقد ..تصبحوا على خير
الصادق: امتى مشيتك الجاية للبلاد
عبدالرؤوف: اسبوعين وحاجة وبنعدي ان شاء الله
بوه هز راسه وابتسم: ربي يعاونك
عبد الرؤوف: هي تصبحوا على خير
هما الزوز ردوا: قدامك كل خير
طلع عبدالرؤوف لداره.. وامه وبوه حتى هما طلعوا بعده لدارهم
•🌹•🌹•🌹•🌹•
بعد ثلاثة ايام..
قعدوا فيهم بشير وليلى ع اعصابهم ويستنوا امتى جدهم يتكلم..
بينما مريم وراوية وابراهيم مشغولين بقرايتهم .. الشي الوحيد ان الشغف عند ابراهيم مات ويقرا بلا نية..
اموره هو ونجلاء عال العال.. وهي مش قادرة تعاود تناقشه في موضوع القراية ليزعل منها..
• في مربوعة حوش الحاج منصور..
مقعمز هو وولاده يحضروا فالاخبار.. وقدامهم صفرة الشاهي باللوز
الحاج منصور تنحنح..
كلهم انتبهوله.. وخليفة كتم في صوت التلفزيون
منصور: بنتكلم ومانبيش من يقاطعني
بلقاسم: تفضل يا بوي..
منصور مرر عيونه عليهم بالواحد وثبتهم ع حسين: قبل ايامات جاني ولدك بشير يا حسين ووكلني بموضوع يخصه
حسين عقد حواجبه باستغراب
منصور: ولدك يبي يكمل نص دينه .. واني عارفك شن هوا اللي بتقوله.. انعم ولدك صغير لكن مش عيل ..بسلامة عيونك تشبح فيه راجل طول بعرض ولى واللي طلبه من حقه.. الخدمة ويخدم والقرايا على ماسمعت من رقية انه قريب يكمل .. قولي شن رايك
حسين تنحنح: ماعنديش راي بعد رايك يا بوي.. لكن هو مايقدرش يتزوج توا اول شي ماعنداش وين يسكن ويبي وقت باهي باش يبني ماظنيت حد يرضى يربط بنته لوقت في علم الغيب
الحاج منصور هز راسه: تو نشوفوا.. غير عيونه لطاهر وقال: ترضى يا طاهر تعطي ليلى بنتك لولد خوك بشير
الطاهر ماتوقعش نهائي وانصدم.. وحسين تفاجأ
خليفة ابتسم بدون ماحد يلاحظه .. وباقي خوته يسمعوا بصمت
منصور: هاااه ماسمعتش ردك
الطاهر استاقض ..شبح لخوه وابتسم: واني وين نلقى زي ولد حسين..خبط ع صدره وقال وهو يشوف لخوه: كلمتي كلمة يا خوي وبنتي من توا ليكم ولغير بشير بإذن الله مش حتنكتب ..تراجيه لين يكمل حوشه ونراجوه معاها
خوته كلهم فرحوا بكلامه .. لكن مش زي فرحة حسين وبوه
الكلام هدا سمعوه رقية ومعاها هداكا الوقت فريال.. طول لبسوا في رجليهم وجري لحوش الطاهر بيبشروها عاد😁
منصور خدي زقيته ووقف: هيا معاي امالا نسمع راي البنت
حسين وطاهر ناضوا معاه.. وطلعوا التلاتة جميع لوجهتهم
فتحي بضحكة: يا الله بشير.. طالع لجده الولد
ابتسموا خوته..
•🌹•🌹•🌹•🌹•
جنب حوش الامين..
عبيدة: اني حاس اليوم يكلمهم
بشير متكنطي: تي اما اليوم، واضح مش مفكر بكل جدي!
كمال: تعرف خاطري نقتلك.. مسلم امورك في يد الكوماندا الكبير وقاعد تخمملي!!
حمزة كان يسمع وبس وهو مقعمز في سيارته ..فاتح الباب ورجليه برا
شرف الدين كان حاط وحدة من رجليه فوق ركبته.. وحدة من يديه حاطها ع يد الكرسي والتانية يمسح بيها ع لحيته.. فجأة ابتسم ع الجنب وعدل قعدته: اشبح غادي يا عريس
كلهم توجهت انظارهم وين ما شرف الدين اشر براسه.. شافوا جدهم ماشي ومعاه ولاده الزوز حسين والطاهر
بشير قلبه قعد يدق بقو قوته.. سيب اللي في يده ووقف
حمزة: جدي ناويلك الجديات
هو لما تأكد انهم خشوا للحوش ناض بسرعة ومشي باتجاهه
وعبيدة ناض وراه..
حمزة ركب زين فالسيارة وصكر الباب: اللي يبي يحضر ينقز
شرف الدين وكمال ركبوا ورا..
عفس حمزة ع البنزين وطلع بالسيارة ..ماطفاها الا قدام حوش عمه طاهر
وقال بنص ضحكة: وصلنا قبل العريس
نزلوا التلاتة مع وصلة بشير وعبيدة
•داخل..
في دار المعيشة واقفين كلهم.. الحاج منصور وولاده الزوز وليلى وكلثوم وهي لابسة بدلة الصلاة..
طبعًا وراء الكواليس خواتها التلاتة وبنت عمها وعمتها
الحاج منصور: بوك خبط ع صدره وعطاك لولد عمك.. لكن اني جاي ونبي رايك انتي كان ماتبيش ماحد يغصبك ومافيش كلمة فوق كلمتك انتي ..هكي الشرع يقول يا ليلى
ليلى وهي بذوب في حوايجها من الخجل قالت بصوت واطي: ورا بوي ووراك ماعنديش كلام يا جدي اللي تشوفوه انتم اني فيه ويمشي عليا
الحاج منصور عجبه كلامها.. زي ماعجب عمها وبوها
اما امها.. ابتسمت بفرح تعز ولاد حسين هلبا وعاجبينها.. واللي زاد ريحها زمزم ومعرفتها بقداش انها طيبة وحقانية ومن قبل علاقتها وطيدة مع بنات سلافها..
وهي اول ماقالت كلامها طلعت تجري..
منصور ابتسم: امالا ع بركة الله
وسلموا الخوت الزوز ع بعض💖
رنت زغروطة فريال.. وقعدت ليلى من حضن لحضن💞
•بشير سمع الزغروطة.. نقز فالهوا ورفع قبضة يده فوق وهو فرحان
عبيدة حط صوابعه في فمه وصفر
كمال قرب منه وهو يضحك: وانت.. امتى ناوي تصيد طيرك
عبيدة بتنهيدة مع ابتسامة: قريب ان شاء الله
كمال ضحك بعدين قعد يدربك ع سقف السيارة: حبها ماكدبش عليها.. حبها عطي كلمة فيها
شرف الدين: وووووه
وبشير طاير فوق فوق
حمزة كان يضحك لين خوه بدا يدربك ع السيارة.. ظلمت عنده وقعد يصيح: السيارة يا حماااار
عبيدة فتح بابها وركب: جدي ع طلعة يا ولاد.. هيا امنعوا خير مايشوف العريس هني ويغبرله يومه
وخبط بيده اللي مطلعها من الروشن ع باب السيارة من برا
كلهم ركبوا .. وحمزة ركب مكان السواق وهو يقول بعصبية: السيارة يا عن فيتكم مرة وحدة!
قعدوا يضحكوا هما
هو ولع وطار بيهم وهو يهزب.. وما ان وصلوا حوش الامين ودرسوا طلع الحاج منصور
عبيدة كبه من الروشن بعدين اتكا بظهره ع الكرسي وهو يقول بضحكة: طلعنا من عينها
•وين طارق ونزار من هادا كله؟.. نزار مع سراج ماشيين للسوق وطارق في شغله..
•🌹•🌹•🌹•🌹•
ومش بس الحاج منصور خدي موافقة ع موضوع خطوبة..
حتى الصادق وبوه الكوني خدوها من ديما..
الصادق بابتسامة: يعني نفهم انك موافقة على ولد عمتك يا بنتي
ديما وجهها احمر ومش قادرة ترد «يا ريتك يا ماما طلعتي مكاني.. هابا عليك موقف يكسف»
الكوني متكي بيديه ع عكازه: ادوي كنك متحشمة
ديما والوجه بيطربق: موافقة
قالت هالكلمة ومعاش شافوا غير غبرتها..
الصادق وهو يطلع في تليفونه من جيب جاكته الرسمية: مالا ندق على رؤوف بيش يقوللهم
الكوني عاقد حواجبه: راجل اختك هضا مايتعاشر مفيت مانبش نحكي نا
الصادق: لا ماتحكش يا باتي تربح ،ماواكلها غير رؤوف وبيخرب مواله مع بنت عمته
الكوني بسخط: ونا شن قاسملي اظهري ومسكتني مفيته هو
•🌹•🌹•🌹•🌹•
وتمشي الايام بروتينها الهادي والمعتاد ع الجميع..
فاتوا 27 يوم بالزبط..
كملوا امتحانات الشهادة الثانوية.. وبدت مرحلة الانتظار ع الطلبة
اخر امتحان كان يوم الخميس.. والجمعة ركب فتحي مرته وبناته ومشي بيهم لحوش خوالهم في غريان بيقعدوا غادي شهر..
حست مريم بالفراغ بعد مشت صاحبتها.. كسدت هلبا وفقدتها رغم انهم ديما مع بعض ع الارضي .. اللي مريم استولت عليه وقاماته في دارها من لما مشت راوية
بينما ليلى وبشير يتواصلوا ع التليفون بعد خدي رقمها من رقية .. وعايشين حبهم .. بشير قعد القرش اللي يحصله من خدمته يخليه ع جنب باش يبدا يبني بيه ..وحسين قرر انه يساعد ولده في شقته اللي حيبنيها فوقه
اما المسكين حمزة مشيطتله فريال ريقه.. مش فاهمة عليه ومخلياته قريب يهبل .. بس زعما يقدر يتحمل لبعد يمشي في حوشه شوط باهي ولا فريال اطيرله عقاب العقل؟!..
•🌹•🌹•🌹•🌹•
يوم السبت ..14/6
الساعة 9:33 صباحًا
يا أم السرايا..
والشط والهاني..
شايل حنيني ليك..
يا عيوني جيت..
يا حلم ديما..
يعيش في وجداني..
بكل الوفاء لحبك..
أنا غنيت..
طالعات الالحان من الراديو المفتوح جنبها وهي تخدم وتغني مع الاغنية
خشت امها للكوجينة وهي ترفع في شعرها فوق بالشدادة: شن اديري مرومة
مريم التفتت وراها وهي مبتسمة: كيكة نسكافيه لمفيدة تتوحم عليها
خديجة: ايه قالتها لكن نحساب خولة دارتهالها
مريم تجهز فالصوص: دارتهالها مرة وبعدها نحرقت يدها مسكينة معاش قدرت تحركها هونا
خديجة عكرشت وجهها بألم: يا روحي يوم ماننساه جلدتها قريب انسلخت
«صباحك مبروك بوي»
خديجة ضحكت: اهي مفيدة جاتك برجليها اضربي هي ماصارلكش من التعبة لشقتها
ناضت طلعت..وخلت مريم مبتسمة ورجعت تغني مع الاغنية بحب وبصوتها الرقيق..
:وين منذر؟!
:قاعد راقد يا روحي ماكملوا امتحاناته لين ربي خدي فيه وعطي
:حتى هو طب يا خديجة
دقايق وخشت عليها مفيدة الكوجينة..
مريم التفتت وجتها ..سلموا بوسات، بعدها
مفيدة بضحكة وشهية: كيكة نسكافيه! ربي يحفظك ليا مريومتي الحنانة
مريم تضحك: آمين ويحفظك .. مالا حمدي ماجاش معاك
مفيدة تغير وجهها: كارهاته وكارهة الحوش .. صنته والمزيل لوحتهمله امس من كثر ماكبدي زاهقة
مريم شقهت وصوتها باينة فيه الضحكة: حيييي!!
مفيدة: وتوا جاية بنقعد عندكم لين يتم الوحم
مريم عقدت حواجبها بتساؤل: وحمدي قال باهي؟
مفيدة قعمزت ع الكرسي: خليت عمتي هي اللي تكلمه كان طلبت منه اني طول يرفض لكن هي امه يتحشم منها
مريم باستغراب: لهالدرجة مش متحملتيه.. تي كنتي طايرة بيه انتي
مفيدة بحب: ولتوا.. لكن بمجرد يقرب مني نحس في كبدي تلعب معاش قادرة نقعد معاه في نفس المكان
مريم: يا روحي..كل شي بأجره فوفو تحملي
مفيدة بضحكة: العقبالك حتى انتي نشوفوك حامل
ع خشة لتين بنت منصور تجري وتقول: صباح الخيييير
مريم طبست تلقتها وقامتها فوق وهي تضحك: اني هادي بنتي بس هادي
وقعدت تبوس فيها وتعض.. ولتين تضحك
مفيدة فتحت يديها وهي مبتسمة: للو!! تعالي سلمي عليا
مريم نزلت واشرت ع مفيدة بابتسامة: اجري لعميمة تغمريها وعطيها هلباا بوسات
لتين دارت زي ماقالتلها مريم
: صباح الخير.. كيف حالكم اليوم
مريم ومفيدة ردوا: صباح الورد.. صباح النور ندوش
بعدين مريم جتها وخدت قيس منها وهي تلعب معاه: شن الجو يا بطل
قيس: مليح
مريم ضحكت وقرصاته من خده بعدين باست صوابعها
ناديا: قاعدة هني معناها يا تركبيلي يا ننزلك فرصة لا تعوض هادي
مفيدة: كان لقيت جهد نركبلك بيه.. تعرفي جايتني ع النوم بلا مانندري نلقى روحي سايحة راقدة.. وانتي شن امورك لتوا؟
ناديا ابتسمت: الحمد لله ماتعبتش
مريم نزلت قيس وهي تقوله: برا لجدو.. فيييسع
هو طلع ومايشبحش وراه
ناديا طلعت وراه تجري: يعطيك السلامة يا مريم عمي ومنصور بيمشوا لحوش جدي يفطروا.. وهادا مايرده كان بوابة السانية كان فات فيه وحصل فرصة
مريم طلعت وراه: خليك تو نجيبه الشرير هادا
ناديا وقفت ورجعت لمفيدة: بيهبلني
مفيدة بضحكة وهي تلعب بشعر لتين: خليه عسل
•مريم وصلت في قيس وقاماته في غمرها: هووووب.. يا شيطان
وقعدت تبوس فيه: تبي نمشوا لحوش جديده منصور
قيس بحماس: اي اي
مريم ولت للصالة بعد نزلاته وشدت يده.. خدت وشاحها المعلق في الروشن كونها تستعمل فيه للصلاة..
خديجة تخيط في غلاف مخدة: لحوش جدك مرومة
مريم تلبس ع مراية المدخل ردت بصوت عالي: ايه ماما نبي بابا في حاجة.. قيس تعالى هنييي
:باهي باهي
كملت مريم مواساة وشاحها وطلعت مع ولد خوها
لقت بلقاسم ومنصور مش بعاد هلبا عليها.. مشتلهم تجري
اول ماوصلت فيهم قالت بابتسامة: صباح الخير نصوره
منصور: حبيبة جدها.. صباحك ورد
مريم ضحكت بخفة وغيرت عيونها لبوها: بابا عادي نمشي للساحة الخضرا بعدين؟! ..وكملت برجاء: استاحشتها هلبا
بلقاسم ابتسم: بري لكن ماتعبيش عليا نرفعك عندي موعد مع واحد نعرفه بعد نفطر
مريم مبتسمة: لالا بنقول لخليفة اصلًا
قيس قعد ينقنق ويبي يمشي لبوه
مريم قاماته ومدتهوله: برا يا شرير حني بنيتنا للو بس هادا مش صاحبنا
بلقاسم يتفرج بابتسامة
ومنصور خداه منها وهو يضحك
مريم: هي مانعطلكمش حتى اني وراي كيكة بنكملها
رجعت للحوش بخطوات سريعة.. وبوها وخوها كملوا طريقهم لحوش الحاج منصور..
•🌹•🌹•🌹•🌹•
دارت مريم كيكتها وكملتها.. بعدها اتصلت بخليفة اللي مايرفضلهاش طلب ..
وتت روحها ..لبست سروال واسع اسود وعليه بلوزة صيفية طويلة لتحت الركبة مزركشة باللون الاسود والقنتشي والابيض والحني
ومعاه محرمة حمرة دم غزال وكندرة فلات كحلة
لون المحرمة الاحمر عكس ع لون بشرتها البيضة حليب وكاسر بياض وجهها حواجبها المرسومة خلقة من ربي سود فاحمات وعيونها الكبار اللي يبانوا مكحلات من كثافة رموشها.. منظرها يلفتك غصب
رفعت معاها لتين ..ورقية حتى هي قالت بنمشي
•في الطريق..
فتح خليفة راديو السيارة وبالصدفة كانت نفس الاغنية اللي كانت تسمع فيها مريم الصبح.. أم السرايا
مريم ابتسمت: خليها خليفة
هو رد: حتى اني مخليها
ياما فيها.. ام المحبة القلب غنى ليها
عاشق هواها وبحرها وشاطيها..
مريم تغني معاها: هايم بحب عيون سود عوادي.. يا محلاها
.. بأطفالها ورجالها ونساها
رقية كانت اطقطق بصوابعها وهي ادندن
مريم مبتسمة وهي تغني وعيونها ع الروشن لما بانت عليها السرايا: عروس البحر من خاطري نهواها.. اللي بحسنها تفخر جميع بلادي
لتين تصفق: وصلناااا
خليفة عيونه ع المراية ويوخر: تي غير اصبروا ندرس بس وانتو تقول اول مرة تجوا
مريم: حرام عليك اني من قبل امتحاناتي في قبل ماجيتش
رقية تفك في حزام الامان: انزلي مريومة مادوريشي عمك هدا
نزلوا مريم ولتين وخليفة قال: الحق فيا جايبك
مريم تضحك بالشوية: تعالي للو نوكلو الحمام ونخلوهم يتناقروا
لتين بضحكة: هيا هي
خليفة ورقية لحقوهم طول
خدالهم خليفة الطعام ..طبعًا لتين غيرت رايها بعد شافت الطيور هجموا عليها اول مالوحت الحبوب وقعدت لابدة ورا رقية وخلاص😂
اما مريم كانت شادة كيسة الحبوب بيد وصابة منها كمشة في يدها التانية اللي مادتها قدام والحمام يوقف عليها وياكل منها.. وهي تضحك
خليفة كان ماشي ياخذلهم بوشار وشكاليط والذي منه
شوي وقرب منهم شاب.. حوالين رقبته معلقة كاميرا وفي يده في كم صورة..
قرب من مريم وقال بابتسامة: السلام عليكم
مريم نفضت يدها من الحمام ولوحت باقي الطعام ليهم ع الوطا بعدين ردت: وعليكم السلام ورحمة الله
رقية قربت من بنت خوها
والولد كمل بابتسامة: شفتك وانتي توكلي فالحمام.. وجهك وجه كاميرا ماقدرتش مانصوركش ..مدلها الصور وقال وعيونه بياكلوها: تفضلي
مريم خدتهم منه وابتسمت بجدية: شكرًا.. بقداش؟!
الولد حك شعره بابتسامة: لا هادم هدية
رقية خافت يشوفهم خليفة معاه وتصير قصة.. اذا هي فهمت الولد من نظراته انه معجب فكيف خليفة اللي راجل ويفهم في بني جنسه كويس؟
طول شدت يد بنت خوها: تعالي غادي عمك يستنى
هي اصلًا تبي تمشي: هيا
الولد وقفها: لحظة يا ابلة.. كان تبي ناخدلك لقطات تانية مايحشمك شي حتى كان نقعد دابك انتي بس اليوم
مريم وجهها تحمرط من جرأته.. ورقية قالت بحدة: بارك الله فيك ماتبيش!
لتين بحماس: لكن اني نبي يا عميمه.. شدت في حوايجها وقعدت تترجى: بالله صورة وحدة بس
مريم في خاطرها «مش وقتك بكل يا للو!!»
رقية «كمللت»
لتين شافت خليفة جاي مشتله وقعدت تترجى فيه حتى هو
شافوه قام راسه وشبحلهم.. التلاتة توتروا.. الولد لما شاف شكل خليفة وبنيته خاف يفهمه ويعطيه اللي فيه النصيب
لكن هو جي مع لتين وقال: بقداش الصورة
رقية ومريم يبلعوا في ريقهم وبس
الولد رد: 50 قرش يا شبوب
خليفة هز راسه: وين تبي تصوري
لتين تصفق بحماس: جنب الغزال
مريم شافت للغزال وابتسمت.. تحب تصور معاه كل ماتجي هني
والولد قريب داخ وين راها ابتسمت
خليفة بضحكة: باهي بري جنب الغزال هي .. التفت ع الولد وكمل: هي يا خوي
الولد شبحله ومشي معاه ..صور لتين معاه كم لقطة وعطاهم لخليفة اللي خلص حقهم
بعدين شاف لمريم: تعالي لوز صوري.. غريبة ساكتة لتوا!
الولد استغرب الاسم..
ومريم ماقدرتش تقاوم رغبتها عطت الصور لرقية ومشت طول مخليتها تفرك في يديها في بعض وهي متوترة وتقول: شوقنا الطلوع!
هي قعمزت جنب الغزال وقعدت تمسح عليه بحب.. بعدين حطت يدها ع ظهره وميلت راسه قريب من راسه وابتسمت
الولد هايم رسمي ويقول في خاطره «وينه الغزال فيهم بالزبط!»
بعدين ضغط ع زر الكاميرا وخدالها اللقطة..
•🌹•🌹•🌹•🌹•
في مكان شبه صحراوي ..
راكب صندوق سيارة صحراوية ويسوق بيه ولد صالح اللي يخدم عندهم فالمزرعة
مغطي خشمه وفمه بشال خفيف عن رملة الصحرا..جبهته تقطر عرق من الشمس اللي فوق راسه ..حواجبه معقودة وعيونه تتفحص في المكان حواليه بدقة
لين فجأة اشر ع مكان معين بعد مالمح حاجة: غاااادي يا يونس
الولد اللي يسوق كان فاتح روشن السيارة ومطلع يده.. اول ماشاف عبدالرؤوف يأشر لجهة معينة.. طول عفس ع البنزين وزاد السرعة لنفس الاتجاه
في الوقت اللي فيه عبدالرؤوف ينزل في الحديدة متاع صندوق السيارة وعيونه مانحاهمش من ع المكان اللي يشوفله
بعد دقيقة بالزبط قال بصوت مسموع: افطن ماتخليشي يشيلك لوين ما يبي هو الكرهبة ماتحملش
يونس من الروشن بصوت عالي: باهي شن ندير بنريحوه هكي نحن
عبدالرؤوف وهو يأشر بيده المغطية بقوانطي جلد قهوي: ابرم هكي وزر عليه ونا تو نشده
يونس دار زي ماقاله بالزبط
عبدالرؤوف وعيونه مركزة ع الغزال اللي يجري: ارجى.. ارجى.. قرب من طرف الصندوق وقال: توا
يونس صكر بالسيارة الطريق ع الغزال وحاصره قريب من منطقة وعرة معبية صخور..
وقبل مايهرب ..شده عبدالرؤوف بيديه الزوز بلمح البصر .. حطه فالسيارة وربطه بالحبل اللي موتيه مُسبقًا
الغزال كان هايج بسبب خوفه.. لكن هو قدر يهديه
قعد وقت يمسح عليه وهو يشبح في عيونه الواسعة بابتسامة.. وقف بعدها صكر الصندوق كويس وخبط خبطتين ع السيارة بيده..
يونس فهم وتحرك راجع بيهم للمزرعة اللي تبعد مسافة بعيدة عنهم..
وعبدالرؤوف مقعمز ورا ..قايم رجليه وحاط وحدة من يديه ع ركبته ويحول فالقوانطي الجلد منها..
شاف للغزال مرة تانية وقال بابتسامة: جدي ريم هالمرة

يتبع..
«لو عجباتك الحلقة اضغطي ع النجمة واعطيني رايك🤍»