سانية جدي

الحلقة التاسعة عشر

#سانية_جدي🌹
#الفصل_الثاني «شطرٌ من القلب»
#الحلقة_التاسعة_عشر
_____________________
حافظت ع ثباتها وهي تشبحله بكل قوة وانفة: قول اللي عندك بسرعة ماعنديش وقت نضيعه فالفاضي
ابتسم وقدملها خطوة.. هي وخرتها: خليك في مكانك راهو تشوف شي مايعجبكش!
قام هو كفوفه قدامه وقال: اسف مش بالقصد عفوية جت..
مررت عيونها عليه من فوق للوطا بنظرات حادة
هو مسح ع شعره بيده وبدي كلامه: اسمعي اني من يوم ريتك هنايا لخبطتيني.. معادش عرفت ليلي من نهاري ..طالب في مكاني قعد بدال مايحضر لمشروعه يفكر فيك.. ماتغيبيش عن بالي دقيقة في محاضرة على صفرة غدي ..حتى الحلم قعدت نحلم بيك تصدقي
راوية توجست من كلامه..
وهو مستمر والابتسامة على وجهه مع بعض الارتباك: مش عارف علاش مصكرتيها في وجهي.. والله رايدك ولو شاكة حتى شوي اني بنكسد عليك بس مستعد من غدوة نجيب امي لحوشكم واتملي فيك.. اني مش طالب منك شي يا بنت الناس غير فرصة تتعرفي يا بيها وعجبتك يا بيها وكل واحد مشي لحاله.. واني راهو واخد شقة في عمارات ابن النفيس وبادي نصين فيها وبسيارتي وشغلي، يعني لاني متاع علاقات ولا دوة زايدة
راوية عرفت ان الاعصاب مش حيجيبوا معاه نتيجة لهذا قررت تتعامل باللين والتفاهم لعل وعسى يعني: شوف.. انت مافيكش عيب تنرفض عليه
هو فرح.. بس هي طفت هالفرحة لما كملت تقول: في نظر غيري.. لكن اني لا واساسًا في الوقت الحالي منحية اي شي يخص الارتباط من بالي زي ماتعرف قاعدة صغيرة
هو جي بيقاطعها لكن هي وقفاته: اني بكل صراحة معترضة على شخصك مش لشي لكن ماقدرتش نقبلك نهائي.. بتقول نستناك نقولك لو تراجي عمرك كله ولا يمكن اني وياك نكونوا جميع يا ريت تحترم قراري ومعاش ضايقني راهو فاضت بيا..
هو تنرفز وعيونه بان فيهم الاحباط والخيبة
راوية شبحتله: ماعنديش تجاهك اي كره وربي يسعدك ويبعدك
قام راسه لما عرفها خلاص بتمشي: مافيش كيف بكل؟!
راوية: لا..
حط يديه في جيوبه وقال بأسف: كل شي بالسيف الا حبني يابنادم.. على كلٍ ربي يوفقك ونشوفك من اوائل دفعتك وتحصلي اللي يستاهلك ويليق بيك.. على فكرة محاضرات التقوية تقدري تجيهم عادي من اليوم حني مانعرفوش بعض
راوية بمجاملة: كويس.. نستأذنك
: اذنك معاك
خدت راوية بعضها ومشت من قدامه بدون ماتلتفت وراها وفي خاطرها تقول «الحمد لله يا ربي طلع قاعد عنده شوية عقل.. اااه هادا وين ارتحت»
اما هو.. قعد يتبع فيها لين ادرقت بعيونه اللي نظراتهم مخلطة خيبة على خبث
•🌹•🌹•🌹•🌹•
: اااه يا ظهري المتكسر..
علي نزل شنطته من ع ظهره: جدول يوم الاحد زي الهم
نجلاء بضجر: يا ربي امتى نكمل ونرتاح.. حتى حياتي معاش قعدت زي الناس لا طلعة لا خشة، خوالي اللي هما خوالي من اسبوع العيد معاش ريتهم
ع خشة سعاد من باب الدار وهي تثني في كمام قفطانها: بالك غدوة نخطفوا رجلينا ليهم
نجلاء شبحت طول لعلي لقاته مركز عليها، تخزرطت ودارت روحها عادية وهي تقول: مش في وسط الاسبوع ماما
وفي خاطرها تدعي امها ماتسمعلهاش وتأجل المشية..
سعاد: مستاحشة فرحت اللي بوك فضي.. يخي قبل ناوية كان قالي لا بنتصل بواحد من الولاد يجي يرفعنا
علي خدي مخدة تناها ع زوز وحطها تحت راسه وهو يسمعلهم
نجلاء: الزبير ماكملهاش هالخدمة هادي؟!
سعاد: خوك يجري ورا مستقبله شن تحسابيه بالساهل.. غيرت عيونها لعلي وكملت: نوض عليوه اغسل وغير حوايجك ماترقدش بيهم نوض..
علي بكسل: خليني يام راهم سبعة حصص..
سعاد: غير نوض سلم ولدي حتى بوك على جية باش تتغدى هيا
فكت نجلاء وشاحها وقعدت تخلل في صوابعها بين خصلات شعرها وتحرك فيه باش يتنفس
اما علي.. وقف زي ماقالتله امه ومشي تجاه داره
سعاد رجعت عيونها لنجلاء: عجباتك التقعميزة شوره.. خشي بدلي بعدين بري ولعي تحت الكسكاس هداكا هوا
نجلاء نزلت يديه ووقفت وهي شادة الوشاح والشنطة: ماما شوفيه انتي اخر مرة حرقني البخار لليوم ماننسى الوجع متاعه
سعاد: من فلاحتك يا حنة.. راجيه يسخن وصكري تحته النار بعدين نزليه وافتحي المغطة.. مش وهو يغلي! راك كبرتي يا نهاري الاحرف عليا ونور اصغر منك واخدات وجبة رسمي مع امهاتهم
هي تنهدت باستسلام وجت بتطلع: امري لله.. لكن كان صار ماصار ماتقوليش خيرك
سعاد مشت وراها لكن بعدين غيرت طريقها للحمام اللي فيه غسالة الحوايج: والسلسلة معاش تمشي بيها للمدرسة تو تعرقي عليها وتأمّر في رقبتك
ابتسمت وهي متوجهة للدار: لا ماما هادي لونها ثابت .. دوشت بيها وبخيت عليها الصنة قاعدة زي ماهي
جاها رد سعاد من بعيد: باهي مالا
وخشت للحمام.. اما نجلاء خدت توتتها ومشت باش ادوش مرة وحدة..
•🌹•🌹•🌹•🌹•
في حوش ناجي عم بهية
بعد ضمت الحوش وبخراته خشت للدار.. لقت اختها فاتحة الدواليب والقجوره تفركس فيهم بترتبهم
اشرت ع جهة معينة وقالت: الوشاح هادا خليهولي بنمشي فيه بعد غدوة
: مصح خليقتك وشاحي هادا يا كلبة جديد قاعدة مالبسته مرتين على بعض
هياتم قعمزت عالسرير: غير هيا بلا مكر
: اطلعي من راسي تربحي مش فاضيتلك.. اوني الدولاب معبي اوشحة على شن ترضي
هياتم: هادا لونه يطلع حلو على بشرتي..
اختها شبحتلها بتضييقة عيون: وين كلامنا قبل واني اللي نحلي اللبس، ولا بتاخديه غير عناد فيا!
هياتم: تؤ.. اهو نحكيلك.. احممم بداية السيم تلاقيت مع بنت بهية في الجامعة تقدري تقولي تعرفنا وخدينا ارقام بعض وقعدنا نتلاقوا كل مايصادف وقت
: بهية بهية بنت عمك؟!! يعطيك ماينزعك يا فرخة تي هيا فاتتنا في حادث بوي عيني عينك وبعد هادا كله ماشية تتلصقي على بنتها ..تبي تهزيها علينا ولا كيف!
هياتم: خودي نفس وانتي حاصل فاصل! بعدين بالك تحسابيني هوينة ولا ع خاطر عويناتها هي وامها؟! لا يا قلبي ابدًا مش هياتم اللي ديرها
: كان تسمع بيك امي لما تفرمك.. تراهم الكلبات بنات عمك يهدرزوا بينا ويضاحكوا توا..
هياتم بنرفزة: غير اعطيني معاك كلمة!
اختها حطت يديها ع بعض وهي تشبحلها..
هياتم: نبي ندبس عمها لا اكثر ولا اقل
هي ارتخوا ملامح وجهها وردت: سلف بهية يعني؟!
هياتم: بالزبط..
: فوتيه سلم وخيتي الرجالة ماكملوش.. غير كليتك معبية اشكال الوان ..خودي عن بهية الوسع ماتخليهاش تشهد عليك ولا تشد عليك حاجة راهم يراجولنا فالتكة عيلة عمك
هياتم: مافهمتينيش..هادا غير عن كل اللي قبله ..جديات يعني مش تضيبع وقت
توسعوا عيون اختها بمفاجأة: نوينا نتوبوا خلاص؟!
ضحكت: ايه اخيرًا ع يدين خليفة
هي ضحكت معاها: واسمه خليفة.. كيف شكله هادا كبير ولا صغير حلو ولا شين.. احكي كل شي
هياتم ابتسمت: اختك ماطيحش كان عالحاجة المقومة يا عيوني.. عيونها تغيرت نظرتهم وكملت: صغير نعطيه بداية الثمانينات.. طويل عريض قده يهبل ..شعره فالاول تحسابيه اسود لكن هو بني غامق هلبا مايبانيش غير وين يوقف في الضي ولا الشمس.. توسعت ابتسامتها وهي مكملة تحكي: ملامحه زي الممثلين وضحكته اطيح الطير من عشه.. كان نحكيلك ع عيونه كيف، لونهم زي العسل لما يشبحلك بيهم تتمني معاش يحولهم بكل ..في اول مرة تشوفيه جنب راوية مستحيل تتوقعيه عمها.. كأنها اخته الصغيرة ..ااه وخلاص.. هادا من غير الاسلوب الحلو والكلام المريح
شبحت لاختها لقتها تتفرج باستمتاع ...
هياتم بضحكة: حسيت روحي خديت راحتي بزيادة
: تي قريب نزلتي فيه ابيات شعر.. طايحة على منقارك انتي من توا نقولك
تنهدت بابتسامة وردت: هادا علاش مصكرة راسي عليه..
: وهوا شني من ناحيتك .. قصدي لما تتلاقي معاه شن يدير وين يشبحك
هياتم: كلي الطعم
وضحكت..
: لا ماينخافش عليك تقديه
هياتم: طبعًا.. هوني عزمت بنت خوه لسوق التلات وقلتلها جيبي عيلتك كلها
ضحكت اختها: كان في حاجة ليك عنده تو تبان بعد غدوة لما تتلاقي مع ماليه
هياتم ابتسمت: هو غاليات عليه بناويت خوته
: وحني بنعزفوله عالوتر..
هياتم ابتسمت.. وهي تفكر في يوم التلات
: امي بتحكيلها؟!
رجعت عيونها لاختها: مزال مش توا.. خل يصير منه قبل
: غير باش تحطيها فالصورة بس
هياتم ردت وهي مبتسمة ابتسامة ليها معنى: زي ماقتلك غير مزال شوي ..اساسًا في موال في راسي نبيها تغنيهولي
اختها خدت الوشاح ومدتهولها: وهادا الوشاح حلال زلال عليك
بعتتلها هياتم بوسة في الهواء: مانفقدك يا رب..
•🌹•🌹•🌹•🌹•
جامعة الفاتح..
درست سيارة عبيدة قدام قسم الكيمياء.. بعدين طلع تليفونه حط ع رقم راوية واتصل بيها
دقايق وجتهم.. وكالعادة مريم خلتها تركب قدام بعذر مقنع
عبيدة وهو يسوق: شن جو الكلية لتوا
راوية: مية المية.. في حاجات صعبة لكن ماشي الحال
عبيدة: حتى هي كيمياء مافيهاش بصارة يا عيون الفستك
ضحكت راوية ومريم كذلك ..
راوية: اليوم بيجوا العمال للكوجينة
عبيدة: مش متأكد.. هما بدوا الخميس وقالوا يا الاحد يا الاثنين يرجعوا
مريم وهي تقلب في شيتاتها: عبيدة عادي تردني للكلية
راوية التفتت وهو سأل وعيونه عالطريق: علاش؟! ناسية حاجة ولا شن
مريم تفتش في الشنطة: شكلي..في شيت مهم كنت نشرح منه لشيماء الباين خليته عندها بالغلط..
عبيدة دور الدومان: ماشي..
مريم: غير عندي كويز ومحتاجاته ضروري كان هادا مانتعبكش
هو رد: اسكتي بالله عليك القطاف هادا يكسرلي في رقبتي
ابتسمت وقالت: باهي خلاص..
راوية: وكان طلعت مروحة البنت مريومة
مريم: نسحبه من المصور مرة تانية وخلاص
وقعدوا يهدرزوا طول الطريق اللي رافعتهم لجامعة ناصر.. مريم لاحظت ع راوية جوها الحلو واللي متأكدة ان وراه سبب
وصلوا الجامعة.. ودرسوا السيارة في البركيدجو
عبيدة التفت وراه: اتصلي بيها شوفيها روحت ولا
مريم جت بتقيم التليفون وفي اخر لحظة وقفت: هونها غادي
راوية وعبيدة شبحوا وين ماشافت مريم..
اللي قالت: دقيقة بس مش مطولة.. ويري انزلي نعرفك عليها
هزت راوية راسها: فكيني منها ماحبيتهاش بكل
نزلت مريم من السيارة وعبيدة يضحك ع راوية: غير علاش شن ريتي منها مسكينة
راوية: هكي ماخشتش راسي
•مريم وهي تأشر بيدها: شيماااء..
هي التفتت وتفاجأت لما شافت مريم: خيرك وليتي؟!
مريم ابتسمت..وقفت قدام شيماء وهي تقول ببصارة: ناوية تسكتي عليه شورك
واشرت بعيونها ع كوم الشيتات في يد شيماء واللي كان اول واحد فيهم شيت مكتوب بقلم حبري ع اول صفحة فيه اسم «مريم» بالانجلش وبخط جميل.. ومظللاته بالهايلايتر «الخطاط الفسفوري»
شيماء حطت يدها ع فمها: حي عليااا.. نزلتها وكملت: ماتقوليش ضربتي مشوار لهنايا ع خاطره
مريم بضحكة: شن رايك انتي
•راوية: باين عليها تفرفش هلبا البنت
عبيدة والنظارات الشمسية ع عيونه: اني مش فاهم كيف بس هادي ومريم صاحبات
راوية شبحتله بتفنيصة: صاحبات قلتلي؟!
هو شبحلها وضحك: ماتزعليش يا بلغارية قصدي زميلات
راوية قامت حاجبها والتفتت قدام: خلينا حلوين مع بعض ترا
•شيماء فتحت فمها لما اذكرت شكون اللي روح بمريم واكيد هو نفسه اللي ردها.. لكن دماغها قال لازم تتأكدي.. وفعلًا مررت عيونها عالسيارات وشافت سيارة عبيدة مقابلتهم بالزبط وهو مقعمز فوسطها وع يمينه بنية حلوة..
تفلوشت وطاح كل شي من يدها..
•عبيدة: براااا
راوية عقدت حواجبها: لا بجد ربي يكون في عون مريومة..
•نزلت بسرعة وقعمزت ع روس صوابعها وهي تلم فالشيتات: تعبتك وذهبت شيرتك يا مريم.. كسرت عينها لسيارة عبيدة كان واضح عيونه عليهم حتى من ورا النظارات.. انحرجت بزيادة وعاودوا الشيتات طاحوا والمرة هادي حتى الشنطة
مريم من بكري شكت وتوا تأكدت.. نزلت تساعد فيها وهي شادة الضحكة: خيرك مافي شيت ماجايبتيه اليوم
شيماء «من حظي الاسود»: ديما معطلاتك ومتحشمة معاك.. اوووف
مريم تلم معاها: شن صار ماصار شي..
•شاد ذقنه بيده ويمسح عليه: مرات عندها ارتخاء اعصاب ولا شن هوا..
راوية: عندها اللي يخطر ع بالك بيدو الا العقل
هو قعد يضحك بعدين قال: اخخخخ يا بلغارية العقل كله عندك انتي ماخليتي لغيرك شي
ابتسمت راوية بغرور...
•وقفت ع حيلها وهي تواسي فالشيتات ..مريم مدتلها الباقي بعد نحت شيتها من بينهم.. واخر شي ساعدتها تلبس الشنطة ع كتفها
شيماء شادة الشيتات قدام صدرها: سامحيني ع تعبك
ابتسمت مريم: معاش تقوليها الدوة هادي مش بيناتنا.. هي اني عطلت عليهم نتلاقوا يوم الاربعاء..
شيماء قامت يدها وحيتها بابتسامة: ان شاء الله
لفت مريم ومشت راجعة للسيارة.. ركبتها وتحركوا.. وشيماء عيونها وراها
•وهي تساوي في تقعميزتها قالت: عطلت عليكم؟
عبيدة يسوق: لا الجو مليح
راوية: مابعدك وخلاص مريومة البنت ابدًا مش طبيعية
ضحك عبيدة
ومريم قالت: لا اليوم استثناء..
راوية: ع حسب ماتحكيلي عليها هادا حالها ديما
مريم: هي صح عندها هبلات.. لكن بجد بجد اليوم غير.. شبحت لعبيدة من المراية وغمزت: حسيتها معجبة بالباش مهندس
عبيدة: حطيها في راسي توا..
راوية: حلوة والله! ..وقعدت تشتي وتقول: عسلنا مانعطوه لحد ان شاء الله غير علينا يسد..
انصدموا الزوز.. بس صدمة عبيدة كانت صدمة حلوة طار بيها قلبه من الفرح.. حس في تطور💞
بينما مريم اضايقت.. في حاجة داخلها تمنت لو راوية ماقالتش اللي قالاته.. نفسها الحاجة اللي قاطعة الامل من ان راوية تحب عبيدة في يوم
لكن سرعان ماطردت هالافكار من راسها لما جي بين عيونها كلام ناديا.. ابتسمت وهي تدعي ان هالشتاوة تكون انقالت بدافع غيرة مش هكي وخلاص..
•🌹•🌹•🌹•🌹•
في السانية..
نزلت من الفيراندا وخشت داخل للحوش.. لاقتها خولة كيف بتطلع
خولة: هاه بشري
ليلى: قال باهي لكن بيمشي معانا.. وابتسمت بفرح
خولة رقصت حواجبها: مزال فريال..
ليلى بضحكة: قاعدة ماكلماتاش
خولة: شكلها.. اليوم عندها للعشية هي تروح وهو يتسقد للمحل..
ليلى: مدام جدي غصوره خلاص.. اني بنخش شوي بحدا حناي وبعدين بنقعمز نقرا
خولة: ايه خشي.. نروح نغديهم والعشية مولية
ليلى كملت طريقها داخل: تمام
خولة طلعت..
فاتت من جنب ممر الكوجينة الواقفات فيه رقية ووسيلة: بالدور بيناتنا كل مرة حوش لين تنخدم الكوجينة
رقية: رايكم انتم اكبر وادرى، بالنسبة ليا اني عادي مانحيرش فيها طنجرتي، ندير بريمس في المخزن وتتساتر
وسيلة: لا نهاري علاش التلفيق وحني بدال الوحدة ستة الله يبارك.. بعدين هادا حوش عيلة يا رقيوه والصغار واخدين يروحوا يتغدوا مع جدهم قداش بديري عالبريمس.. وركوب ونزول
رقية ابتسمت: اللي يريحكم انتم فصلوا واني نلبس
وسيلة: ربي يكملك بعقلك.. وكملت تقول: اني بناخد غدوة بإذن الله
•في الدار..
واقفة ليلى قدام التلفزيون وشادة الريموت دور في قناة السعودية
حليمة: حافظتها يا بنيتي رقمها عشرة
ليلى بعقدة حواجب: وصلت في الميتين ومهناش ..التفتت لحليمة وكملت: بالك ملخبطة في الرقم يا حناي
حليمة باصرار ردت: لالا متيكدة اني.. بالامارة اني قلتها لخليفة نهار جابه يديرهالي في رقم صغير باش نقدر نحفظه ..
ليلى وهي تقلب فالمحطات: معناها ابصر من قاربه
حليمة: كانش معاذ مبارح نشبح فالجهاز عنده وماتحركش بكل من قدام التلفزيون
نزلت الريموت وقالت: مالا اكيدة هو.. ديما دايرها العملة هادي في تلفزيون حوشهم.. ابسط مايعطل اللي بيغيرله ينوض للريموت بمعرفة وبلاها
ع خشة ناديا تقول في السلام: السلام عليكم.. كيف حالكم اليوم
الزوز بتفاوت: وعليكم السلام.. مرحبتين
قيس قعمز ع اول مندار اما لتين مشت تجري لحليمة حضنتها وباست راسها
وهي تلقتها تبوس فيها وتقول: يا سلمها يا نجيها يا كبرها يا عليها
ناديا تسلم ع ليلى بالخد: كيف حال اللي كنتوا عندهم.. حناك شن حالها
ليلى: لا الحمد لله نشكروا ربي.. انتي شن جوك ندوش والبيبي شني
ناديا بابتسامة: دوم يا رب.. حطت يدها ع بطنها من فوق وكملت: ماني عارفة امتى نحطه ونرتاح
ومشت لحليمة بتسلم عليها..لتين وسعت لامها ..
ليلى: تحلي عويناتك ع خير..
ناديا وهي تسلم ع حليمة: آمين يا رب..
حليمة بعد بعدت عنها: قعمزي سلم بنتي مش باهي ليك كثرة الوقوف والتطبيس
قعمزت ناديا بحدا حليمة وهي تنحي في وشاحهها
حليمة شبحت لقيس: مانبوش نسلموا شورنا.. تعالى جاي يا شويطين تعالى
جت ليلى طباته وهي تضحك وتبوس فيه.. مشت بيه لين نزلاته في حجر حناها..
ناديا بابتسامة: مايبيش الفالح
ليلى تضحك: ايه.. خل نمشي ناديلك ع خليفة حناي يشوفلك التلفزيون
هي قامت راسها ومكتفة قيس بيديها: بري سلم بنيتي مانقدرش نقعد بلاها..
طلعت ليلى وتوجهت للمربوعة.. مخلية ناديا وحليمة يهدرزوا
وقفت في بابها وقالت: خلوفه ترا تعالى شوف التلفزيون
هو ناض وقعد يساوي في اطراف سوريته: خيره؟!
ليلى وخرت: شكله واحد من الصغار لاعب بيه مريح القنوات
وكملت طريقها مع عمها..هو خش للدار وهي للكوجينة باش توتي صفر الغدي مع وسيلة ورقية
منصور الحفيد: العيلة اللي كانوا يبنوا في نهاية الشارع باين عليهم خلاص بيسكنوا
الحاج منصور: ريتهم مالا
منصور: ايه اليوم الصبح لقيت كناتر الاثاث قدام حوشهم
حسين: باهي كويس.. قداش ليهم توا من اللي شروا القطعة
حك منصور حاجبه: هلبا صح.. بالك في الفين وستة ولا خمسة بكل
الامين: هادي هيا من عمر قيس بقولي..
هز الحاج منصور راسه: ان شاء الله عتبة خير عليهم
كلهم بتتالي: آمين.. ان شاء الله
•🌹•🌹•🌹•🌹•
من بوابة السانية خشت سيارة عبيدة..
مريم: الجو مصقع اليوم
راوية: نسمة باردة مريرة مريرة  بس
عبيدة: وين تبوا
مريم: حطنا في حوش جدي اليوم ماريناشي بكل
هو كمل طريقه طول باتجاه حوش جده اللي متوسط السانية
راوية شبحتله: مولي للمطار؟!
عبيدة: توكة من امس فالليل بنخش نرقد.. عندكم شي غدوة؟!
هما الزوز مع بعض: لالا..
هز راسه وقال: مية مية حتى اني ماعندي شي
راوية ابتسمت: لكن التلات عندنا طلعة عائلية
عبيدة درس السيارة فالوسعاية قدام حوش الحاج منصور وهو يقول بعقدة حواجب: امتى صار؟!
مريم: امس قررنا وجديده نزل فرمان
هو شبحلها بعدين نحا النظارات: وين
راوية: سوق التلات
عبيدة: مايصيرش منها اجلوا.. التلات بنعلق فالمطار حتى نص الليل مايجيبنيش!
مريم بضحكة: عادي مرة تانية ارفع زمزومه وبراله
عبيدة ابتسم عالجنب: وكان اني نبي نمشي المرة هادي بالذات كيف الدبارة
راوية بانزعاج: ماتفسدهاش علينا.. قالتلك تعوضها يوم تاني وصلى الله وبارك
عبيدة جبد المفتاح من مجاله وعيونه في عيون راوية: قلبك اسود من قرن الخروب يا بلغارية..
راوية ضيقت عيونها: انتي اللي خلوقك في راس خشمك مش متحمل كلمة..
مريم: اني بننزل كان مزال ماكملتوش نقاشكم
راوية فتحت الباب: خوديني معاك ماينطاقش بعد يسهر هادا
نزلت.. ومريم نزلت معاها
اما عبيدة طلع راسه من الروشن وقال بصوت عالي: نتحاسبوا عليها يا بلغارية اهيا غير مش فايقلك توا
شدت راوية ضحكتها عكس مريم اللي تتفرج ع مناقرتهم باستمتاع وتضحك..
دخل راسه وقعد ياخد في حاجاته من السيارة باش ينزلهم.. كمل ونزل بعد صكرها بالمفتاح .. شبح ناحية حوش جده وابتسم.. بعدين لف بطريقه لحوشهم
•🌹•🌹•🌹•🌹•
عشية نفس اليوم شمال شرق البلاد..
مريم وبنتها ريما ماشيين زيارة لحوش برنية.. وانضمتلهم مرت ضو وغزالة كذلك..
خشت وحدة من خوات صفاء بصفرة القهوة والحلو وقعدت اضيف فيهم..
برنية: كنك ماجبتي دودة معاكن يا مرومه
مريم وهي تاخد في فنجان القهوة: صحيتي.. شبحت لبرنية وكملت: ستر الله باقي يا برنية وين بنجيبها معايا.. ساع ياخذها بوبكر وتقعد يلاك دوم الدايم..
ابتسمت ريما..
الباقيات قالوا بتوالي: ان شاء الله.. ع الخير يا ربي
ريما ببصارة: كنتنا وينهي يا عمتي.. ولا ماتريدش تعصر معانا..
غزالة نزلت الكلينكس اللي فيه الحلو جنب فنجانها: ايش اللي بديره معاك بعد حازت رويفه الزول الخايل ..زايد ناقص انتن
ضحكوا كلهم.. واخت صفاء مشت تجري تناديها
ريما: ناعلي يا عمتي بتندمني على جيبتها من توا
مريم نتشت من المقروضة: مغير تسلم مانبوا شي خاطي تهني رؤوف ..وقدرها محفوظ دام انها حافظة قدرنا
مرت ضو: ايواه صدقتي يا مرومه
ع خشة صفاء ووراها اختها.. لابسة بدلة سروال حلوة وحاطة لمسات على وجهها ..شعرها قايماته ذيل حصان ولاوية اطرافه عالخفيف
اول ما بدت جت لمريم طول تسلم عليها: اش حالك عميمه.. معليش طولت ماطلعت عليكم مغير كنت نسبح
مريم بابتسامة: الله يسلم حالك بنتي.. نا باهية الحمد لله انتي كيف حالك
صفاء مبتسمة: ولى باهي بعد ريتكم
مريم: دوم عليك ان شاء الله..
صفاء مشت بعدها طول لمرت خالها ضو سلمت عليها حتى هي
ريما: كنتنا زايدة فالسماحة يا العطيبة
ضحكت صفاء وسلموا ع بعضهم بالخد وهما يسألوا عن الحال والاحوال..
واخر شي سلمت ع خالتها غزالة ورجعت قعمزت بحدا ريما
وهي مبتسمة وتقول: انستي ريما
ريما ردت: الله يانسك .. في حاجة متغيرة فيك زايدتك النص ماعرفتها ايش
برنية: قاعدة واضحة يا رويمه
مريم بعد رشفت من القهوة قالت: محففة قصيصتها كنك ما انتبهتيلهش؟
غزالة: حتى نا ماحقيتها.. كذا وريني.. وقعدت تتفحص في وجه بنت اختها باعجاب
اما برنية بضحكة قالت: قيسه نط العرق الطرابلسي يا مرات خيي
هي ضحكت وردت: جمة يا ودي جمة..
مرت ضو: خطرها على طرابلس مرومه.. قديش ليا نبي ننشدك ناوية تعدي في حج عمتك ولا..
برنية: عمتك هذكي نفسها
مريم ابتسمت: اها هي وحدة بس اصلا..
برنية بابتسامة: طيب فيها مسكينة ماقبل حصلتها هالحجة
مرت ضو: تذكري فيها حتى انتي برنية
برنية: يا مينتي ماننسى هذاك اليوم، بكت فيه نين نزحن عيونها
صفاء واختها يسمعوا بس.. ماعندهمش معلومات عن مريم اكثر من انها وحيدة امها وبوها اللي ماتوا.. زيهم زي باقي العيلة
مريم شبحت لسلفتها: ان شاء الله بنعدي.. مفيت الصادق يفضى شوي
ريما: شوقتني نشوفهم يا عمتي
مريم ضحكت: بعدك نا بروحي متشوقة
ضحكوا كلهم..
ومريم غيرت عيونها لصفاء: عينك من غزالتنا لين ناخذوها يا برنية راهو رويفه ماحامل فيها حتى حاجة ..
ابتسمت برنية: ماعليك في الحفظ والصون
كلام مريم خلا خدود صفاء انحمروا وقلبها قعد يدق بقو قوته.. اختها ناضت تقيم فالفناجين الفاضية
اما غزالة وريما كانوا يشبحوا لصفاء والابتسامة مرسومة ع وجوههم
•🌹•🌹•🌹•🌹•
في ڤيلا الصادق العقوري..
طلعت زينات بصفرة الشاهي للجنان وين مامقعمز الكوني ومعاه حفيده عبدالرؤوف..
حطتها قدامهم ع الطاولة الصغيرة وقالت: عايزين حاجة تانية يا سيدي
الكوني: احسنتي خلاص
هي لفت مولية للحوش..
وعبدالرؤوف خدي البراد قعد يصب لجده هو الاول: ودك غير نقعمزوا كيف هالتقعميزة في البر
الكوني متكي بيديه ع زقيته: ماريت لا والي مفيتك انت غالي عليه هالجو هضا
ابتسم عبدالرؤوف عالجنب وهو يصب لروحه: نفايح شتى يا جدي
الكوني بعد رشف من طاسته: قيسك ناوي مشية قريبة للبلاد
عبدالرؤوف: ان شاء الله.. نا وياك وبنت عمتي برنية
الكوني: نتوكلوا الاثنين الجاي
هو هز راسه بعدين قام طاسة الشاهي: كيف تبي
•🌹•🌹•🌹•🌹•
: يهبل الجو..
قالتها وهي تجبد فالمالية العنبرية الخفيفة عليها..
راوية: كله في طاعة الله لكن مريومة مش حلو.. اشرت بيدها من روشن دار جدهم: بالله اشبحي مش مفهوم ريح ولا عجاج .. يطبق الخلوق استغفر الله
مريم وخرت عن الروشن: عرفتك بتقوليها.. خدت علبة نظارات جدها الطبية من ع الكوميدينو وجت طالعة: اسبقيني نعطيها لجديده ونجي
مشت راوية لدار التقعميز.. اما مريم خدت ملاية عمتها وطلعت، مالقتش احذيتهم قدام الباب تفكرت ان ليلى ضمتهم في الجزامة بكري، لبست شبشب خليفة المحطوط قدام باب المربوعة الخارجي ومشت ادور في جدها باش تعطيه نظاراته..
•فريال: صنة كعك القرفة تهبل
وقعدت تفك فالوشاح..بعدين حطاته حوالين رقبتها
نور: داراته ماما الايامات اللي فاتوا
عليا خدت صونية عبتها من المترد: عمتي كلثوم الله يبارك ع يديها ديما المنظر تقول دايراته ماكينة والبنة ولا يعلى
ع خشة راوية عليهم: روحتي فراولة
فريال شبحتلها: لين مرارتي فاضت، شادنا هداكا الدكتور قريب تلات ساعات
عكرشوا كلهم وجوههم لما سمعوا صوت الات العمال والدوشة متاعهم علي..
فريال وهي تقعمز: من معاهم؟!
رقية: فتحي.. مررت عيونها ع الدار بعدين التفتت للباب وقعدت اتوق: وين مرومه
راوية: مشت لجدو شوي وجاية
ليلى: نهارها من وين طلعت!
هي ردت بضحكة: من الباب من وين يعني
مفيدة تساوي في تقعميزتها: تو مش عارفة في عمال علاش طالعتله جدي
راوية: بترفعله نظاراته
خشت عليهم حليمة.. كيف مكملة دوش وريحة الزهر تفحفح منها
البنات ابتسموا لما شافوها وقالوا بتفاوت: نعيمًا حنينة.. صحة صحة..
الا فريال اللي قالت: حمام الهنا يا حق
قعدوا يضحكوا كلهم وهي معاهم..
اما حليمة قعمزت وهي تقول: يعطيك نقطة يا فريال..
خولة خدت صونية حطت فيها كعكات لحناها وصبت طاسة كاكاو.. بعدين حطتهم قدامها
حليمة خدتهم: يعطيك الصحة.. بعدين قامت راسها وهي تسأل: بشوره ماروحش ليلى
ليلى ردت بعد بلعت: لا حناي اليوم عنده كلية قبل الخدمة
هي هزت راسها: ربي يعاونه ويفتحها قدامه.. وكملت بتساؤل: المربوعة من فيها؟!
رقية: خليفة بس راقد الولاد مهناش
راوية: كان قاعدين راه تشبحي فيهم معانا توا حشيشتهم يشاركونا صفرة العشية
ضحكوا بنات عمامها وحناها قالت: بلاش سلم بنتي صحتين عليهم
راوية بضحكة: نبصر حنينه..
حليمة غيرت عيونها لفريال لقتها شادة تليفونها وابصر شن تقرا فيه وهي مبتسمة: فريال شن حالك
هي انتبهت لحناها.. قامت عيونها وردت بضحكة: شربات للا حلّومه
هي ابتسمت: اياه.. متريحة ورايقة قصدي
فريال فهمت المغزى من سؤال حناها.. قلبها دق وابتسمت: من جاور السعيد يسعد
حليمة بانت الفرحة ع وجهها: دوم حالك
راوية طبست على فريال: تسأل على جوك انتي وحمزة راهو
فريال مبتسمة وعيونها مع حناها اللي لهت بالهدرزة مع مفيدة: كان نعرف من الشوشيدة فيكم اللي قالتهالها
خولة بهزوة: حناي تعرف حتى قبلك انتي يا مسكينة
ضحكت راوية ضحكة خفيفة بدون صوت..
عيون فريال طلعوا: السانية كلها تعرف ع الحالة هادي!
خولة بتوشويش: غير هيا كملي فيسع باش تنوضي معاي نضم الديار، النهار بدي قصير هوا هداكا
فريال: خل نكمل السليلة هادي بس..
رجعوا التلاتة انتبهوا للهدرزة..
اللي كانت مترأستها حليمة وهي تنصح في حفيدتها ترد بالها من صحتها.. شوي ولحقت عليهم ناديا ..كانت ترقد في ولدها فالدار التانية.. اما لتين طالعة مع بوها
•🌹•🌹•🌹•🌹•
بخ من عطره وجي طالع من الدار وهو يحط في دخانه في جيب سرواله الخلفي..
قابله زهير كيف طالع من الحمام ينشف في وجهه..
كمل طريقه لين وقف قدام مراية المدخل
زهير لحقه: بوحميز
حمزة: راسي زهير راااسي فوتني
هو سكت ومباش يزيد معاه اكثر..
ع طلعة كمال من وراه وهو يمضغ وفي يده طرف شكلاطة مارس
زهير شبحله: خيره الغالي
كمال: مافضاش اليوم باش يشوف مرت خوي بكل.. الصبح خدمة وتوا ماشي للمحل
ابتسم زهير عالجنب
وحمزة خدي تليفونه اللي حطه ع المدخل بعدين التفت لكمال: مانبيش نحط يدي فيك يا كموله لابس وبنطلع
وبالفعل هو كان طايرتله ع خاطر السبب اللي قاله كمال.. في جرة انشغاله وكليتها حتى مكالمة مالحقوش عليها اليوم
لف ماشي لباب الحوش الرئيسي..
وقفه كمال لما قال: راجي جايبلك تباشير
هو التفتله وقام حاجبه: متعطل من غادي يا راجل سقدني
كمال ابتسم: جاية هنايا اليوم..
وغمز
حمزة ابتسم بخفة: لالا
كمال: بتعاون خولة
هو حدف مفتاح السيارة لزهير اللي تلقاه: برا انت اليوم
زهير شبح لكمال: منور عليها..
هو ضحك بعدين نتش من طرف الشكلاطة وقال: البشارة بوحميز معقولة تفوتها عالجاف هكي!
حط حمزة يده في جيب السروال وطلع ربطة فلوس حدفهمله وهو يقول: بالصحة عليك
وتخطاهم خاش داخل
زهير لما شاف حجم الربطة قام حواجبه: شكشكي!
كمال ضحك وهو يحط فالفلوس في جيبه: مش هكي يا حمزة
جاه صوته من داخل يقول: بتردهم فالعرس
رد كمال بصوت عالي: ادلل يا غالي ع كتوفي كله.. غير عيونه لزهير وكمل: اني طالع مع الولاد تبي شي
زهير بقيمة حاجب وهو يلعب بالمفتاح في صبعه: نبي نعطيك باليمين واليسار بس!
طلع كمال وهو يضحك وصكر وراه الباب.. اما زهير اللي كان ناوي يمشي لحوش جده..ولى لداره باش يلبس ويتسقد للمحل بدل خوه
•🌹•🌹•🌹•🌹•
جنب داليات العنب..
فتح الحاج منصور الشيشمة متاع طوبو الميه اللي يمر عليهم كلهم..
مريم كانت واقفة وراه وتتفرج وهي مربعة يديها قدام صدرها: كبروا هلبا
الحاج منصور: هادا علاش قلت لعمك يخدملهم اللوحات هادي.. اشر بالزقية متاعه وكمل يقول: اعطيهم عامين تانيات وشوفيهم كيف يبدوا..
مريم ابتسمت: جديدي
الحاج منصور شبحلها
مريم: شن رايك نغرسوا مانجا.. ماعندناش مانجا في السانية
منصور ضيق عيونه وضحك: كبرتي يا مرومه قعدتي بتغرسي حتى الغرس
مريم بابتسامة: الراي رايك جدو مجرد اقتراح
منصور: غالي والطلب رخيص كان ربي وصلني مكة وروحت منها بالسلامة تو نديرلك شجرة مانجا بحدا روشن دارك باهيو
ابتسمت مريم بحب وقالت: ربي يفرحنا بحجتك جديدي وتروحلنا سالم غانم معافى
منصور: ان شاء الله.. لكن راهي تبي اهتمام هلبا
مريم: عادي انت تعلمني كيف نرد بالي منها
منصور: خلاص كان حيانا الحي نديروا عليها بالدور يوم اني ويوم انتي لين ترقى لقلالية حوش منصور
ضحكت مريم .. والحاج منصور قعد يضحك معاها
بعدين قال: وين راوية
مريم: مع البنات قلتلها بنرفع النظارات ونجي
منصور: ايييه فكرتيني فيهم هاتيهم جاي.. هي مدتهمله وهو خداهم وكمل كلامه: الحاج الشريف باعتلي رسالة وخط الهاتف صغير مانفرزش فيه
فتح علبة النظارات وقعد يمسح فيهم بالفوطة الصغيرة متاعهم..
اما مريم كانت تسمع فيه شن يقول وهي مبتسمة ومستمتعة بأجواء نهاية فصل الخريف اللي تحبهم
•🌹•🌹•🌹•🌹•
الساعة 6:33 مساءًا..
استغل ان حركة الزباين خفت وطلع تليفونه شرين على رقم الارضي متاع حوش عمته..
نادى مرتين وانفتح الخط.. قعد ساكت يترقب من اللي حيرد
وابتسم لما سمع صوت حبه الوحيد: هيما
ابراهيم بحب: يا روحه.. مستاحشك نوجتي
: اني اكثر حبيبي.. عندي ليك خبر حلو
ابراهيم مقعمز ورا الطاولة وحاط وحدة من يديه عليه: شني
: غدوة جايين للسانية وبنباتوا
ابتسم بفرح: احلفي!
: والله العظيم، تعرف فرحانة بنطير
ابراهيم بضحكة: تي مالا شن نقول اني، امتى ناويين تجوا باش نكون قاعد غادي
: بنتغدوا غادي قالت ماما
ابراهيم: حتى عمي جمعة
: ايه.. قداش لينا عالسانية
ابراهيم: السانية هاماتك اما ابراهيم يستاحش ولا يهبل عادي عندك
: هيمتي نموت فيك ماتزعلش
هو تنهد وابتسم: مش زعلان حبيبي غير مستاحشك بس
: باهي هيما اني بنصكر مرات ماما تخش في اي لحظة
ابراهيم: لما تحصلي فرصة شريني عليا، وكالعادة موعدنا الساعة اتنين
: حاضر.. هي سلام
ابراهيم: في امان الله
صكروا الخط..
وهو نزل التليفون من ع وذنه وكله حماس لجية نجلاء غدوة.. وقف وقال لروحه: نعاود نواسي هادم خير من الكساد
ومشي يرتب في باكوات الاحذية متاع العرض..
•🌹•🌹•🌹•🌹•
في السانية..
ماشيات الزوز جنب بعض ويهدرزوا
فريال: خلطي المكونات الجافة قبل بعدين حطي عليهم الباقي فهمتي
خولة بتركيز: ايه ايه.. تو بعد نخشوا عاودي اكتبيهالي في ورقة كان هادا
وكملوا طريقهم باتجاه حوش الامين..
لما وصلوا قدام الباب فريال شدت يد خولة: اسمعي كان في حد فالحوش بنروح فكيني من الاحراجات
خولة: لا مافي حد.. بوي من بعد صلاة العصر ماروحش وامي عند عمتي كلثوم بالك فالليل يسهروا في حوش جدي..والولاد كلهم طالعين
فريال تنفست بارتياح: طمن بالك.. لكن الحق الحق استاحشت خوك
خولة خشت داخل وهي تضحك: يجري باش يجيبك عنده شن نلعبوا حني تحسابينا..
فريال بضحكة: وخيتي سلمكم ماتلعبوش بكل
وصكرت الباب وراها..
خولة خشت لممر الديار: نمشي نجيب ملمع وفوط
فريال: والمكنسة الكهربائية راك تنسيها..
خولة: هونها جنب دار حمزة
فريال: خوديها انتي اني تو ناخد مكنسة عادية
ردت عليها وصوتها يتباعد: نتبادلوا بالدور
فريال وهي ماشية للكوجينة: تي مدوريش ..
جابوا اللي يحتاجوه كله.. خولة خشت لدار كمال وزهير.. وفريال خشت لدار حمزة اللي كانت ليه هو وحمدي قبل مايتزوج
اول مافتحتها لقت الدنيا تضرب تقلب..
فريال وصوتها باينة فيه الضحكة: مابعد عظيماتها بنية عمي وخلاص.. تنت كمامها وعاودت ربطت شعرها كويس: هي بسم الله توكلنا على الله..
فالاول حارت من وين تبدا بس بعدين خلاص استرسلت وقعدت كعادتها اضم وتتحرك زي الطقاشة..
من جهة تانية.. انفتح باب الدروج وتصكر
لا خولة ولا فريال استاقضوا بيه لانهم كانوا منهمكات في شغلهم
واللي فتح باب الدروج كان يمشي بطريقه لداره ..
لما وصل الباب فتحه بسرعة وخش وهو يصكر فيه وراه
فريال انخلعت وشافتله وهي حاطة يدها ع صدره: نزلت الميه في ركابي! امتى جيت بسم الله!
حمزة ابتسم وهو يمرر في عيونه عالدار: نحلم ولا كيف اني، شن اديري هنايا فراولة
فريال حطت يدها ورا رقبتها وهي تلعب باسفل منابت شعرها: شوفة عينك حمزاوي نضم في حوستك
حمزة وهو يقدملها: قصدك كل مابنحوس بتجي حبي؟!
فريال لما شافاته يقدملها دقات قلبها تسارعوا: تبي تدهك عليا من توا شورك
ضحك حمزة ووقف قدامها بالزبط: قداش نموت فيك لما تبدي تستعبطي
وغمز..
فريال ماقدرتش تشوف لعيونه.. نظراتهم الواعرة تخلي فيها ترعش رغم انهم معبيات حب..
حمزة خدي يدها اليسار وشدها: كيف الراي توا؟!
فريال ضحكت: راي شنو العفو!
حمزة يمشي بابهامه ع ظهر يدها: اشبحيلي جاي وانتي تتكلمي..
هي في نفسها «انتي مستاحشتيه يا همي اشبحيله خيرك حصلة»، وتقيم راسها تحط عينها في عينه مباشرةً.. سخنت وقلبها حساته قريب يطلع من صدرها
حمزة يتأمل فيها بحب: اااه يا فراولة كان نعرف شن دايرتيلي بس
فريال بنفس النبرة: تعرف نحبك
حمزة: هادا الكلام اللي ينسمع، من الصبح ناقصتني حاجة ومتعفلق توا بس تعدل وضعي
ضحكت فريال بعدين نزلت عيونها ليديهم: باهي في مجال يا غزال تطلع احسن ماتخش علينا خولة وتفهم غلط
حمزة: مش مدور حد يفهموا ولا يطربقوا
فريال: عاد انت كاسح امشيهم بمقولة خافوا تسلموا
حمزة حط يده التانية ورا ظهره: شكون خايف، اللي بيمشوا لسوق النم هداكا؟!
ضحكت ضحكة صفرة: كساد يبلغم وجوهنا في وجوه هالشيتات وخلاص.. تقدر تمشي معانا حبيبي باش تطمن
حمزة قام حواجبه: بالك عابية نبعتوكم بروحك وسط السرايف اللي غادي؟!! .. ضحك عالجنب وكمل: يا روح حبيبك انتي
فريال ابتسمتله: نجيهولي غزالي
: فراولة ملمع اللوح عندك؟!
هي ردت بصوت عالي: لالا خوخة دوريه بحداك هني ولا هني.. التفتت لحمزة وكملت بصوت منخفض: حميزه اطلع بسرعة ماتحطنيش في موقف
طلق حمزة يدها ومشي تجاه الباب.. فتحه وهو طالع قاللها: نحبك فراولة
فريال لحقت عليه شدت يده اللي قاعدة ع مقبض الباب بيديها الزوز وابتسمت: واني
لفلها وضحك: معادش يصير من الطلعة راهو
فريال وهي تضحك وخرت وطلقت يده: باهي باي
حمزة صكر باب داره ومشي وهو يبتسم..
اما هي.. اتكت بظهرها ع الباب وقامت عيونها فوق: ربي حبيبي يا ترى اني شن دايرة من خير تحتك اللي خليت حمزة يحبني.. نزلت راسها ووقفت ع حيلها: اااه يا كبيدتي الممروجة منك يا حمزاوي وخلاص.. وبضحكة كملت: زعما حتى اني مارجتلك كبدك؟ لكن طلعتي مميزة بالحاق يا فراولة ماهزبنيش ع قصة الطلعة هدا في حالة ماحسبتش التفنيصة ونبرة الصوت..
ضحكت من تاني ومشت للدولاب طلعت حوايجه المعلقات كلهم وهي مبتسمة.. بعدين طلعت باش تسأل خولة عن مكان طاولة الحديد..
•بينما هوا.. بما انه بعت زهير بداله قرر يمشي لحوش عمه حسين يكسد مع الولاد غادي..
•🌹•🌹•🌹•🌹•
بعد روحوا العمال..
فتحت باب الحوش المردود وخشت تجري وفي يدها كيس اكبر منها معبي شمعدانات وشكلاطة
منصور وهو ينحي في كندرته ويضحك: بالشوي
هي قاعدة ماكملتش طريقها يطلع من المربوعة ايوب في لمح البصر قامها فوق: كركوبة
منصور وقف ع حيله: مافي حد غيرك مالا
ايوب: يشبحوا فالكوجينة
مشوا الزوز متوجهين داخل.. ايوب بلتين للصالة وهو يحاول يفك منها الكيس بالبصارة.. اما منصور مشي بيطل ع الكوجينة ولوين وصلت اليوم.. يسمع في نقاشاتهم، وطاغي ع كل الاصوات صوت جده
لما وصل لقي قدامها اللي قاعدين وقتها فالحوش كلهم.. الحاج منصور وحليمة ورقية وناديا ومفيدة وعليا ونور وليلى وذهيبة وكلثوم .. واخيرًا منذر والتوأم وتغريد
فتحي طلع يروح بالعمال ..بينما لوز وسكر ..الاولى مع قيس تغسله في يديه من التراب اللي طلعله برا، اما التانية تكنس في دار التقعميز
•🌹•🌹•🌹•🌹•
جهة النخلة..
واقف ويدخن.. وجاي منه عمه الصغير
خليفة: تخمم هلبا
حمزة شبحله
خليفة: اللي هناك عرفاته شن اللي مزال شاغل بالك؟!
حمزة نفخ الدخان من خشمه: الوضع هادا ماباش يركب ع دماغي يا خليفة.. اني راجل نحب الدغري والحاجة الواضحة..
خليفة بهدوء: اصبر شوي عليها.. رايها فيه وجهة نظر بوحميز
حمزة جبد تاني من السبسي وغير عيونه لعمه: ترضاهالي راجل بطولي وعرضي نقعد زي الخانب نتلبد بيها في التراكين!
خليفة: يا ودي علاش مصعب الامور.. بعدين ترا تعالالي هني انت يا سي البي اللي ناويلي على حوش بأساسات جديدة فكرت قداش بياخد وقت وتكاليف؟! تي تبيلك من هنايا لعامين باش تسقف وتملعق بس..
حمزة: عايش معانا انت ولا مش معانا؟! ماهو الحج وقف كل شي
خليفة: هوا هادا اللي نبي نقولهولك.. حج بوي وامي جي فالوسط شوفت عينك حتى ولاد حسين معاش كملوا شققهم.. كان تبي تاخد رايي يا حمزة انت بتستنى تفض قصة الحجاج بتستنى، استنى عالمزبوط واول مايروح جدك طول ربط معاه ..
حمزة باقتناع وهو يلوح فالسبسي عالارض ويعفس عليه: معقول..
خليفة: اسمع كلامي ودير زي ماقتلك.. يروح الحاج رايق حط الموضوع في يده وانت الهى بحوشك
حمزة ابتسم عالجنب: منين خطرتلك بس..
خليفة ضحك وغمزله: ماهو بندير زيك حتى اني
حمزة عقد حواجبه باستغراب: جت بنت امها ولا شن
خليفة يمسح ع ذقنه بيده: عمامك ينقرزوا فوق راسي.. والحق مانبيش نخاطر لين الكوماندا يضطر يفتح معاي الموضوع، مناقشني قبل مرتين عاد التالتة ثابتة ..شاورت عقلي وقررت بعد الحج نرقي فوق المخزن
حمزة: ع الخير ان شاء الله
عبيدة وهو جاي بصفرة الشاهي وطاولة خشبية: شن في
حمزة: العريس حط عقله في راسه..
عبيدة شبح لخليفة وضحك ع الجنب: صار مزبوطة دوة كمال
خليفة قعمز ع كرسي النايلو : الفرخ هادا ماتفوتاش الفايتة..
عبيدة: كلب للمليون
خليفة شبح لحمزة اللي يصب فالشاهي: ديروا دورة على داره بالك حاط فيها مصيبة
الزوز قعدوا يضحكوا وخليفة معاهم..
حمزة حط البراد وخدي طاسته بيشرب منها وهو يوجه في كلامه لعبيدة: لحوش جدي؟!
عبيدة: ماريتهمش بكل اليوم.. روحت طول للدار لين جيتوني
خليفة شافله: قداش لينا ماهدرزناش
عبيدة وهو ماشي: الخميس قاعد
وكمل طريقه..
خليفة خدي طاسته: وراه حاجة ولد عمك
حمزة: غية هادي وانت الصادق..
خليفة: هكي تقول؟!
حمزة رشف من شاهيه: أسأل مجرب..
خليفة: تي مسرع كبرتوا يا عنشكالكم..والله الا رسمي فاتني القطار!
حمزة ضحك..
واستمرت الهدرزة المطولة بين الولد وعمه لين اذن العشي ووقفوا الزوز باش يلبوا النداء
•🌹•🌹•🌹•🌹•
مع قرب نص الليل..
عم الهدوء عالسانية الا من مكالمات العشاق..
وفي حوش الجد اللي بايتات فيه مريم وراوية باعتبار الزوز ماعندهمش كلية تاني يوم..
فتحت باب الدار وخشت وهي تقول بصوت منخفض: رورو وين
مريم وهي راقدة في فراشها وفاتحة شعرها ع طوله مدايراته وراها: مشت ادوش
راوية قدمت وخشت فراشها جنب بنت عمها..
مريم راقدة ع ظهرها مبتسمة: غدوة من بعد الفجر بنوتي فطور جديده
راوية حاطت يدها ع فمها تثاوب وهي تشوف لمريم: نوضيني نبي نهدرز عليه حبيبي.. معاش يقعد بكل الايام هادم
مريم ضحكت: يوتي للحجة.. يبي ياخد كل شي من احسنه
راوية ابتسمت: مافيش احلى من ذوق جدو في بداليه العربيات.. نتمناه يلبسهم كل يوم
مريم اتكت ع جنبها مقابيل راوية: ايه ماقلتيليش الروق هادا كله من وين جاك
راوية وهي مبتسمة وتهمس: كان نقولك يا مرومه..الولد اللي حاط عليا عتقني اخيرًا
مريم ضحكت بخفة: قولي والله!
راوية: والله العظيم.. اليوم شدني وكلمني واني عطيته قراري النهائي وقطعتله اي امل في راسه
مريم: ريحتي قلبي كنت خايفة يصكر راسه عليك ويديرلك شي
راوية: من الاول قتلك ماتخافيش النوعية هادي يملوا بسرعة
مريم وهي حاطة يد تحت خدها والتانية ع بطنها: عندي كويز يوم الاربعا
راوية بنفس الوضعية: مزال حني.. خايفة تعرفي وحايسة فالمواد
مريم وعيونها قعدوا ينفتحوا ويتغمضوا بالشوي: ارخي اعصابك واقري بالشوي عليك
راوية: ان شاء الله خير..
شبحت للسقف شوية ولما معاش سمعت من مريم رد ..شافتلها لقتها مغمضة عيونها وبادية تمشي فالنوم خلاص.. ابتسمت
ورجعت تتأمل في سقف الدار.. لين نزل عليها النوم حتى هي
انفتح باب الدار وخشت منه رقية.. لابسة توتة خريفية كم ولافة شعرها بالفوطة.. لما شافتهم ضحكت بدون صوت.. قربت واست غطاواتهم
بعدين خلصت شعرها وشدت مكانها حتى هي ع تشريينة سليمان عليها..
•🌹•🌹•🌹•🌹 •
اليوم اللي بعده..
جي جمعة بعيلته ماعدا الزبير، نجلاء فرحانة تقول ليها سنين ماجت
وابراهيم كان في انتظارها وتحجج بالمرض باش يتغيب عن دوام المحل ..
سعاد جابت معاها عبايات وشاربات ولوازم تانية طلعت شرتهم لامها ع خاطر مشية الحج..
الكل عجبهم بالذات حليمة اللي كل يوم يزيد شوقها لمكة وشوفة الكعبة على ارض الواقع..
•🌹•🌹•🌹•🌹•
ويجي تاني يوم
21/10/2008..
مها برجاء: بالله عليك ماما توبة معاد نعاودها بالله تخليني نمشي معاهم!
خديجة بصرامة: لا يعني لا، شمعنى توا خطرلك تسمعيه الكلام علاش مش من الاول..
مها دموعها نزلوا: حرام عليك ماما
خديجة بتفنيصة: نادي على بوك راهو! ضمي فمك واسكتي!
مها انقلبت ع سريرها وقعدت تبكي..
اما مريم.. اللي كانت تجهز فروحها وتسمع فيهم..
كملت ترتيب وشاحها وشبحت لامها: ماتبيش تغيري رايك
خديجة: بروا زينة الحق راسي ماخاطري في سمع حس.. مرات بعدين نطل ع حوش جدك مدام عمتك جاية
مها قامت راسها بعد ماكانت دافناته فالمخدة ..وجهها رايح حالة من الدموع، بصوت باكي قالت: باهي نمشي معاك لحوش جدي ومانتحركش وعد
خديجة بملل: ايييه ع خرافة ام بسيسي.. طلوع برا من عتبة الحوش ماتحلميش بيه لين تتربي وتمشي مشيتك
مها غمت وجهها تاني بالمخدة وهي تبكي وتكتم في عيطتها: علاش باهي علاش! ليك تلاتة ايام حابستيني بنموت اني بنموت
مريم وهي شادة ضحكتها: هي اني بنطلع ماتبي شي ماما
خديجة ردت: سلامتك
هي قامت شنطتها وطلعت من الدار..
•كمال: خولة وين الكندرة القهوية
: مسحتهالك تلقاها ع مطلع الدروج
هو مشي وين ماقالتله، فتح الباب الفاصل وجي بياخدها.. سمع صوت خوه ومرت خوه نازلين يهدرزوا والواضح هو يتغزل فيها
قام حواجبه ونزلهم وهو شاد ابتسامته.. بعدين خدي كندرته ومشي بخفة
•في حوش الطاهر..
واقفة عالمراية وادير في لمسات
نور جت من وراها تساوي فالوشاح: حي عليك من بشير
ليلى وخرت: ع خاطر من دايراته اني مش ع خاطره
كلثوم من برا: وينكم يا بنات هيا الساعة تمانية
ليلى باستعجال: هيا هي
وطلعت بسرعة.. ونور مررت عيونها ع طلتها فالمراية بعدين لحقتها..
•طلعت من دارها هي وبنت خوها..
لقوه مقعمز فالصالة يستنى فيهم
اول ماشافاته ابتسمت.. وهو كان يفصل في لبستها، بعدين شبحلها وغمز: قدامي
ضحكوا الزوز وتحركوا بسرعة
رقية بهمس: طالعة قنينة؟!
فريال بنفس الصوت: بيرفكت عيني ماضرك
ابتسمت رقية بفرح..
حمزة بصوت عالي: وينكم
فريال بضحكة: وووه بصلته محروقة حبيبي، هيا خفي رجلك
رقية التفت: نجووو.. هيا حبيبتي سقدينا
فتحت نجلاء باب الدار التانية وجتهم تجري: طولت؟!
فريال وهي ادف فيهم الزوز: غير فوتوا بس
جاهم صوت سعاد من دار التقعميز: راكم تريحوا من بعض
رقية ردت عليها بصوت مسموع: كبروا يا سعاد راهم
فريال: معانا حمزة سوسو مش حننقصوا نفر
ضحكوا حليمة وسعاد
شوي وسمعوا صوت حمزة يرعد: يا رقية..
المعنية شدت يدين بنت اختها وخوها وطلعت بيهم تجري
•الحوش اللي جنبهم..
واقف ع مراية دارهم وهو يساوي في ياقة قميصه والتليفون ع وذنه: باهي باهي فهمنا
: بشير ماتلهاليش مع ليلى وتسيبهم بروحهم، رد بالك غادي اللي مايشري يتفرج
هو رد: عارف عبيدة عارف..
: نوصي فيك بس، من معاك تاني بيمشي؟!
بشير: خليفة وحمزة و..
: حمزة ماشي؟! خلاص مية مية اني وراي خدمة ..تشاو
بشير: طير..
نزل التليفون وهو يصكر فالخط ..وطلع من داره بعد بخ من عطره
•وصال بدموع: بابا الله يربحك يا بابا ان شاء الله تخش الجنة ..حتى مها حرمتوني منها
فتحي: لما تسمعي الكلمة تو نخليك تمشي وين ماتبي.. وتوا بري شدي كتاباتك غدوة عندك اختبار ولا
وصال خشت لدارها وهي تبكي وصايرة فيها حالة احرف من حالة مها: يا رب نموت يا رب نموت
بهية فتحت عليها باب الدار: تعاوديها تاني اللي قلتيها توا ماتلومي الا روحك سامعة!
وصال غمت فمها: هاه!
بهية قامت حاجبها بعدين طلعت وصكرت الباب
: ايوا مريومه.. طالعة اني نلبس سبيدروي بس
مشت وصال للشنطة وهي تفتح فيها بغيظ..
•عند عيلة صبري..
وسيلة: ردوا بالكم على وخيتكم.. مش تسرحوا وتريح منكم
قالت كلامها وهي تشبح لابراهيم بربع عين
عليا وصوتها باينة فيه الضحكة: حاضر ماما
ابراهيم زاد بخ صنة وعاود حطها ع طاولة الكنبة: هيا
وسيلة: باهي وانت بتطلع من عقلك!
عليا شدت يد تغريد ..طلعوا الزوز واطلقوا العنان لضحكاتهم
رجعوا لطبيعتهم لما شافوا ابراهيم جاي وراهم
•ركب الكل في السيارات.. خليفة معاه رقية وخولة وليلى وعليا.. حمزة مركب الولاد، نزار وسراج وزهير وابراهيم وكمال
بشير امه وكلثوم والتوأم وتغريد..
سيارة حمدي معاه مرته مفيدة ومريم وراوية ومعاذ.. منصور رافع عيلته
واخيرًا.. الزبير اللي جي العشية، مركب ايوب ووراه نجلاء ونور وعلي
•🌹•🌹•🌹•🌹•
في بنغازي..
مقعمزة عالصالون في الدور الثاني .. قايمة سماعة الارضي ع وذنها وتسمع بابتسامة مشرقة..
ابصر شن قال الطرف التاني خلاها تضحك: انكان تحقني نا ..مرة نقزتني بطة في المزرعة دخت عليهم
: انتي حالة خاصة حبيبي.. مرات نحسك كيف العيل الصغير ابسط شي يأثر فيك
ديما بابتسامة: حتى اوفا يحكيلي فيها
تنهد ورد: ننقني نحبك يا ديما.. واجد
قلبها تسارعوا نبضاته.. وحست بالدم كله تجمع في وجهها خلاها تسخن.. اول مرة بوبكر يعترف بحبه ليها ويقولهالها صراحة هكي..
سكتت شوي بعدين قالت بتوتر وهي تلعب بشناشيب مخدة الصالون: حتى نا..
ابتسم من قلبه: ناعلي وخلاص
هي حطت يدها ع فمها وضحكت بدون صوت.. نزلتها لما سمعت صوت رجلين عالدروج وقالت: بوبكر نا بنصكر توا
: براحتك مع اني مزال نبي نسهري معاك
ديما: قدامنا العمر كله ان شاء الله
هو تعكر صفوه، واذكر المصيبة اللي ورط روحه فيها: تصبحي على خير
ديما مبتسمة: وانتي بخير يا رب..سلم على عمتي والبنات
: يوصل..
ديما حست بصوته تغير، لكن ماوقفتش عند الموضوع وحطت في بالها انه مجرد تعب او مايبيش يصكر منها: سلام
فصل الخط، هي نزلت السماعة ردتها في مكانها بعدين قامت راسها تشوف من اللي ركب
لقتها امها جايتها..
ابتسمت وقالت: ماما
مريم وهي تمشي: سمحتي.. كذا تعالي جنبي
هي ناضت من مكانها.. ومريم قعمزت وفتحت يديها
ديما جت لصقت فيها وتكت راسها ع كتفها وهي تلف في يديها حوالين امها
مريم تمسح ع شعر ديما وهي تقول: شن جوك مع بوبكر
ديما مبتسمة بشي من الخجل: الحمد لله ماما
مريم: متريحة معاه.. ماشرطش عليك شي حاجة ماضايقاتكش كلمة منه
ديما هزت راسها هزة خفيفة: نهائي يا ماما.. هو يمكن في البداية كنا مش واخدين على بعضنا واجد لكن توا حبيته بكل
قالتها بصوت منخفض بسبب الخجل..
مريم ضحكت وباستها ع خدها: بحتوا للمنكسفة من امها.. نجك لي
ديما قعدت تضحك ع نبرة امها كيف قالتها.. لكن مريم وهي تحاول تعدل تقعميزتها حست بوخزة زي السم اسفل ظهرها
ديما لاحظت وجه امها تغير
اختفت ضحكتها وسألت: ماما كنك؟!
ابتسمت مريم بالغصب: مافيا شي، مغير انظر كيف تحركت غلط
ديما بقلق: هضي مش اول مرة يصرالك هك..
: ديما.. يا ديما
مريم: عدي لجدك يعيطلك عدي
ديما: لكن ماما..
هي قصت عليها: قتلك نوضي نا مافيا شي عدي
ديما وقفت رغمًا عنها.. مشت بتنزل وبالها مشغول ع امها
اللي اول ما تأكدت بنتها نزلت.. خلت ملامح وجهها المتألمة تبان وهي تقول في خاطرها «هضا الوجع ايسما يا ربي ..ياناعلي تقول امّاس!»
•🌹•🌹•🌹•🌹•
بالرجوع للعاصمة.. قدام مولها المعروف وقتها.. سوق الثلاثاء
درست في البركيدجو سيارة اخت هياتم وخوتها الزوز ونزلوا اللي فوسطهم
مرت خوها مشت جنب راجلها ..اما هي وامهم وخواتها مشوا مع بعض وقدامهم خوها العزري..
: خيرك قالبة وجهك احلام
«احلام» واللي تكون اختهم العازبة: بالله اسكتي واصلة معاي لهنايا
واشرت ع خشمها
: الواه
هياتم بتوشويش: سيبها
: طيح سعدك متعفلقة ع خاطره؟!!!
: والله الا خايبة..
احلام بعصبية: طلع يخون فيا الحقير
: كاني منك نردهاله في وقتها
: شوفيني اني اكبر مثال قدامك.. شن ماكلمتش قبل راجلي بكل؟!اللي نسيبه واللي هو يسيبني والخاين ..لين جي صاحب النصيب اللي ناوي الحلال بجد واهو اليوم عندي منه تلاتة صغار
هياتم: زي ماقالتلك.. الشنابات هلبا يا لومي لكن الرجالة شوية
احلام شبحتلها: واللي جاية ع خاطره اما واحد فيهم
: واحد جديد يوتا؟!
هياتم بابتسامة: خل نخشوا ونحصلوا مكان نقعمزوا فيه بعدها نحكيلكم
احلام: عازماته هني اليوم هو وعيلته
: اشي مفلحك.. فتينا كلنا
هي ضحكت
: غير شوفوا الشنعب مرت خوكم كيف متشبطة فيه
احلام: ماصدقت حصلاته ماتقول شابحة راجل
هياتم وباقي خواتها ضحكوا ..
امها: هيا سقدوا بنياتي دوبنا نحصلوا طاولة في هالزحمة
سرعوا الخمسة خطواتهم باتجاه المدخل..
فاتت ع خشتهم قريب نص ساعة.. لما وصلوا سيارات عيلة بلحاج
ونزلوا حتى هما للمول..

يتبع..
«لو عجباتك الحلقة اضغطي عالنجمة واعطيني رايك🤍»