سانية جدي🌹

الحلقة السابعة عشر

#سانية_جدي🌹
#الفصل_ الثاني «شطرٌ من القلب»
#الحلقة_ السابعة_عشر
___________________________
اليوم اللي بعده..
جنب شجرة الرمان اللي زرعها الحاج منصور من سنة كتجربة هل تنجح في سانيته او لا..
واليوم جي وقت جني المحصول..
حاطة السلة عالارض وواقفة بموس في يدها وتقطع.. رغم انها قاعدة صغيرة لكن منظر الرمان فيها كيف احمر مع خضرتها يهبل..
: بالشوي يا فراولة بالشوي احسن ماجدي يوريني حساباتي
وقعدت تقطع فالحبات بحذر لين عبت سلتها وكملت الشجرة كلها..
رفعتها وقعدت تمشي بيها تجاه حوش جدها وهي تقول: زعما نفرطه ونديرهولهم هكي ولا نديره في فروتة؟! نتشاور مع رقية ونقرر
وهي تمشي كانت لابسة سروال متاع حوش اتش دي اكحل وبلوزة سماوية واصلة لحد الخصر.. عليهم مالية لنص الفخذ لونها اكحل..في رجليها شبشب باينات منه صوابعها اللي طاليتهم بلون فضي حلو ونفس اللون ع ظوافر يديها والشعر مقيوم فوق بشدادة
التوتة كانت قصيرة وضيقة نوعًا ما ..
لما وصلت لباب الكوجينة متاع حوش جدها سمعت صوت سيارة يقرب.. التفتت ع وراها لقتها سيارة حمزة مروح بخولة من المعهد
ابتسمت وقعدت واقفة مكانها.. بس زالت ابتسامتها لما جو عيونها في عيونه وشافت نظرته الحادة ..
خافت وقعدت تفكر: «حي عليا هادا خيره يشبحلي هكي؟! شن درت والله مادرت حاجة غلط.. نزلت عيونها لصوابعها: مستحيل يكون قنصهم من المسافة هادي بعدين هوا قالي عادي نزلمط المهم مانطلعش بيه من السانية.. وحوش خالتي من العيد مامشيتله!.. توسعوا عيونها لما قالت: حييي اكيد عالتوتة»
التفتت قدامها ومشت بخطوات سريعة ركبت الدرجات متاع باب الكوجينة وخشت بالسلة حطتها ع الرخامة وهي متوترة
ع خشة رقية للكوجينة قايمة صفرة الغدي لما شافتها قالت: جدك يسأل ع الرمان.. غيرت عيونها للسلة: ماشاء الله كبير واحمر يهبل
فريال: هييييه اني فاش وانتي فاش زودي فكي عليا يا نهاري الازرق كحلي..
رقية جتها: خيرك
فريال بتوتر: حمزة..حمزة شافني بالتوتة هادي برا وعطاني شبحة قريب متت في مكاني
رقية: ماك تستاهلي كان هادا توتة زي هادي ماتطلعيش بيها حتى برا من دارك
فريال: عارفتيني مانلبسش فيها اني غير من طياح سعدي اليوم باش يشبحني..
رقية حطت يدها على فمها وقعدت تضحك..
فريال فنصت فيها: تضحكي يا رورو تي باهي باهي
رقية نزلت يدها وقالت: اسمعي خودي حاجة من دولابي وغيريها باش كان جي
فريال مشت تجري برا من الكوجينة: تي اما دولابك اوسع قفطان عند حناي وان شاء الله الحال يلايم
وكملت طريقها مخلية رقية تضحك عليها..بعدين بدت تغسل فالماعين
•🌹•🌹•🌹•🌹•
كلية العلوم..
مقعمزات قدام بعض ع طاولة يتغدوا ويهدرزوا..
هياتم شربت بالمصاص من حكة المشروب: زي ماقتلك حني خمسة بناويت وتلاتة اولاد..اني صغيرتهم كلهم هادا علاش مدلعيني شوية
راوية: اي اي فهمت عليك..
هياتم بتضييقة عيون: انتي عندك وخية وحدة بس صح ولا؟!
راوية ابتسمت: صح.. اسمها وصال ما اعتقدش تعرفيها
هياتم تنهدت بتصنع وحطت شيشة المشروب عالطاولة: اسمعيني راوية.. اللي صار قبل كله لوحيه وراك لا اني ولا انتي لينا علاقة بخلافات اماليا مع امك.. مع اني مانشوفش فيه هداكا الشي الكبير اللي يستاهل القطيعة
راوية بقيمة حاجب: اولى بيك تقوليه لنفسك الكلام هادا يا هياتم.. بعدين مايجيش ماندخلش في الخلاف ع قولتك اللي مقاطعينها امي بقولي واللي كان ع حفة الموت بوي..
هياتم: باهي تمام معاك حق لكن اني زيني زيك راهو فتحت عيوني ولقيت الوضع هكي مع هدا كله لما شفتك في الكلية حبيت نتعرف عليك ونبادر بالصلح!
عقدت راوية حواجبها: هياتم اني ماقلتش اللي قلته من باب عتاب ولا لوم.. بس باش نوضحلك قداش الموضوع مش بسيط زي ماتشبحي فيه انتي.. ممكن عندك حق اللي يده في الميه مش زي اللي يده في النار الواقدة..
هياتم: مدام الحكاية هكي يا راوية لو بتجي تشوفي حتى بوي دار حادث وطلع من عينها راهو..
راوية: انتم اللي بديتوا بيها يا هياتم ماتستغربيش لما تتعاملي بالمثل!
ابتسمت هياتم: باهي فكينا منها السيرة هادي واني جيتك بنفتح معاك صفحة جديدة علاش تهاجمي فيا ع الطالعة والنازلة
راوية سكتت وهي تفكر..حست روحها مزودتها لهذا ردت: تمام
هياتم قامت حواجبها تتأكد: صافية لبن!
هي هزت راسها: حليب يا قشطة
ضحكت هياتم: تو اني مش ع معرفة قوية بأمك لكن نحسك تجيبي منها هلبا
راوية ابتسمت ابتسامة فيها بعض الغرور: نجيب من الزوز لكن صح يقولولي ديما انتي لامك
هياتم وهي مبتسمة ابتسامة تبان لطيفة قالت: باهي احكيلي ع عيلتكم اكثر
راوية: هيا هادي عيلتنا ماما وبابا واني ووصال..
هياتم: لا نحكي ع عمامك يعني، مش انتم عايشين مع بعض في سانية وحدة ولا
ابتسمت راوية: ايه.. هي سانية جدو وحني يعني بابا وعمامي بانيين فيها
هياتم: الله يبارك كلهم متزوجين
راوية: شبه.. مزال خليفة اللي عرفتك عليه اولامس العزابي الوحيد
هي حست بشعور راحة تملكها كلها.. فرحت بس مابينتش: ماشاء الله عليه انسان راقي وخلوق ربي يفرحكم بيه عن قريب
راوية: آمين تسلمي.. حنينة مش مغيبة جهد لكن عمي هادا كان فات فيه وصكر راسه خلاص انسي..
دق قلب هياتم لكن ظاهريًا مسيطرة ع انفعالاتها بقوة ومش مبينة ولا ربع شي..
واستمرت راوية تحكي وهي مركزة بكل حواسها ع كل التفاصيل..
•🌹•🌹•🌹•🌹•
وبالرجوع للسانية..
خشت ع عمتها الكوجينة.. والاخيرة لما شافتها ضحكت باندهاش: تتكلمي جديات كنتي؟!
فريال: مالا نلعب
وع كلمتها سمعوا صوت الباب المردود متاع الحوش ينفتح..
فريال جت تجري لبدت ورا رقية: جاني يا رورو جاني حي عليا
رقية: من قالك هو يا مهبولة
هي ردت بتوتر: هوا هوا تو شوي وتسمعي تنحنيحته ..نهارك البيض يا فريال نهارك البيض!
رقية جت بترد عليها لكن سكتت لما سمعت صوت تنحنيحة عالية نوعًا ما..
فريال: مش قتلك!
رقية قامت حاجبها: حافظتيه صم يا فراولة هدا غير ماليكمش اسبوع مع بعض!
هي وجهها تحمرط وقلبها دق..
لكن حالتها هادي مادامتش هلبا لما شافاته خاش عليهم الكوجينة ووجهه يايبشرش بخير
شدت في مالية رقية بقوة: حزي عليا عمتي بالله عليك
حمزة كان عاقد حواجبه لما تكلمت قام واحد منهم: كويس بكل معناها زابطة روحك شن مهببة! ماتبديش تحوسي وتلوصي!
رقية: خيرها يا حميزه شن دارت مسكينة
حمزة بعصبية: رقية مادافعيش عليها خليني بيني وبينها..
رقية بمسايرة: يا حبيبي غير قولي بس البنت ماطلعتش من بحداي بكل نبي نعرف شن هوا اللي دارتهولك باش هكي متعفلق.. معقولة نخليك تهزبها ومرات تكون فاهم غلط!
حمزة شبح لفريال اللي زادت ادرقت ورا عمتها: اطلعي هكي ترا..
هي فهماته لشن بيوصل وطلعت جنب عمتها بكل ثقة
ضحك ع الجنب وقال بعصبية: عيل نمص في صبعي تشبحي فيا قدامك! ..قدم خطوة وكمل: مدامك عارفتيها ماتلتبسش علاش طالعة بيها للشارع.. تعرفي مزال نلمحك لابستها قسمًا باللي احل القسم نمزقها على ظهرك!
هي لما قام يده يهدد تلقائيًا خافت يضربها بالذات عيونه يقدحوا فالنار ومعصب بجد.. هربت تجري لباب الكوجينة: يا جدي يا حناي وينكم!
رقية قعدت تضحك.. وحمزة لحق عليها جبدها من مرفقها: تي تعالي جاي ياعنشكلك بتلمي علينا السانية ولا كيف!
فريال: نطيحلك هنايا يا حمزة راهو معادش تفنص فيا الله يربحك
هو زراته الضحكة بس شد روحه: عادتك ولا بتشريها!.. التفت لعمته وقال: اطلعي واجبدي الباب وراك رقية
رقية ابتسمت لفريال بتطمين وطلعت زي ماقاللها..
هو مسح ع لحيته بعدين حكها بيده اليمين ورجع عيونه لفريال: ايه نسمع فيك
هي فكت يدها منه: يا ودي اني بروحي مانحبش نلبسها راهو غير مستعجلة بنجي لحوش جدي..
حمزة مرر عيونه ع القفطان اللي لابساته: اهو هكي من الاخير ترتاحي وتريحيني
فريال شدت ضحكتها بقوة
وهو عقد حواجبه واتكا بمرفقه جنبها ع الرخامة: علاش مادة الشوارب كدس توا!
هي شافتله: رعشتني ..دخلتني في حوايجي ..كان ماجانيش السكر اليوم معاش يجيني
حمزة ابتسم نص ابتسامة: بعيد السو على حبي ..
حطت يدها على وجهها وضحكت بعدين نزلتها وشبحتله: حتى انت عندك قوانين فاللبس راهو
حمزة يتفرج عليها: مثلًا؟!
فريال تحركت لين وقفت مقابله بالزبط: زي اللون الاسود ..انت مش ناقص كاريزما باش تزيد روحك.. اه حقا والنظارات كان فيها كيف معاش تلبسهم بكل
قام حواجبه وقال بهزوة: غير اعبي عليها
فنصت وحطت يديها في نصها: والله ..خيرني اني نسمع فالكلام!
حمزة: بنشيب اني ..بنشيب كان قعدتي راكبة راسك هكي ..
فريال ابتسمتله: مالا اسمع كلامي ..وكملت وهي ترقص في حواجبها: يا حمزاوي اللي تجرح واداوي
حمزة يتفرج عليها بحب: اي طلب..واللي خلق عيونك يا عيوني اي طلب الا هادا الغيه من حساباتك مستحيل..
هي تنهدت باستسلام: الله غالب قادر عليا شن بندير.. شهقت وكأنها تفكرت حاجة: تغديت ولالا حقا؟!
هو كان متغدي مع العاملين عنده فالمحل بس حب يعرف شن حدير: لا من فطور الصبح ماذقت حاجة..
فريال بتعاطف: حليلي حبيبي قاعد لتوا هكي.. استنى استنى نديرلك حاجة عالسريع
وقعدت زي الطقاشة تفتح فالدواليب والتلاجة واطلع
اما هو.. عقد حواجبه ووقف ع حيله: غير دقيقة بس شن هيا اللي قلتيها توا
هي هادا وين استوعبت شن طلعت من فمها.. سخنت وحست قلبها يدق بقوة ..قالت في سرها «كله منك مش قتلك اصبر شوي عاجبك موقفي! لا ني هبلت خلاص عليا»
ماستاقضتش الا وهو واقف جنبها ويعاود في سؤاله: وين سافرتي.. نستنى في جوابي هيا
ضحكت وردت وهي ماشية للغاز: اطلع بالله تشبحش فيا حايسة في بعضي راني عندي سوابق لما نتوتر وانت عارفهم
ضحك ويمسح ع لحيته: اني سيد العارفين..
جي بيلف وبيطلع وقفاته لما قالت: خليك قريب تو نشرين عليك لما توتى الماكلة
شبحلها ورد: قاعد هنايا بنخش بحدا جدي وحناي.. حقا اسمعي
شافتله من تاني وشبه عرفت شن بيقول
هو ابتسم: نحبك
ضحكت بخفة وردت: حتى اني
طلع وصكر وراه باب الكوجينة..
وهي بعد تأكدت انه مشي خلاص طلقت اللي في يدها وقعدت ترقص بكتافها وتغني بصوت منخفض: نمشيله ونجي خلوني.. مايطرالي شي خلوني..
بعدين فنصت عيونها وقالت: حيه وحيه الرمان راح بكل من بالي.. وبصوت اعلى نادت: رورو
•🌹•🌹•🌹•🌹•
بعد بعتت رسالة لبنت عمها وماجاهاش رد توقعت انها خشت لمحاضرتها..
قعدت تلف في شعرها كعكة فوق وهو يعاود ينزل.. تأففت بعدين استغفرت..
مريم وهي تلم فالشيتات: ماشفتش مفيدة ليا ايام.. زعما نمشيلها توا؟!
قامتهم وحطتهم في الدرج الخاص بيهم وهي مكملة تقول: لا مرات مقيلة وين بنهد عليهم..
قطع عليها تفكيرها شعرها لما انفك من جديد.. مشت وقفت قدام المراية وفرداته زين وهي ملتفتة بالجنب وتفكر «شكلي بنقص منه تعبني بكل .. ولا زعما نحففه بس؟!»
فاتت الموضوع مؤقتًا وقررت تضفره..
ضفراته وكملت بعد عطراته بزيت الزهر.. طلعت بعدها طول للكوجينة وهي مقررة ادير حاجة حلوة..
لاقاها منذر كيف خاش للحوش: مريم قهوة بالله اسعفيني..
مريم: كنت في حوش جدي؟!
منذر وهو ينحي من رجليه: روحت طول غادي تغديت معاهم.. راسي قسمًا بالله يخبط خبط من الدكتور الجيفة متاع الباثو
مريم: تستناني ندير كيكة برتقال معاها
منذر: لالا مانبي شي جيبيهالي سادة مرة زي مرارة حياتي نبيها
ضحكت مريم ومشت للكوجينة.. خشتلها ودارتله القهوة وزهرتهاله بعدين رفعتهاله لقاته طالع من داره وهو يلبس فالتيشرت متاعه
مريم: حسبت ماما وبابا معاك هونهم فالصالة
خدي منها منذر الصفرة وقال: صحيتي
مشي بيها ومريم رجعت للكوجينة بدت ادير في كيكتها بعد مافتحت الراديو جنبها ..بعد فترة حطوا اغنية..
طويل السالف ..عاشق زول طويل السالف..
طويل السالف.. بيه موالف.. عمره لميعادي ماخالف..
ضحكت وهي تصب في خليط الكيكة في الطاجين: كنت محتاجة من يتغزل بيا الحق..
وقعدت تسمع للاغنية بإنصات.. عجبوها الكلمات وصوت المطرب
دوار عليه زويله من قبل نغاليه..
زويله من قبل نغاليه..
دوار عليه زويله من قبل نغاليه..
قبل نغاليه ..اقسامي واتت قلبي بيه
انا قلبي بيه.. نصونه حالف.. لا نجفى لا بغيره نالف
طويل السالف.. عاشق زول طويل السالف
تسمع ومرسومة ابتسامة ع وجهها الجميل.. بعادتها تميل للاغاني الهادية ذات الكلمات العميقة
حطت طاجين الكيكة فالكوشة بعد زيناته بشرايح البرتقال.. ومشت للحوض بتغسل الماعين اللي قعدولها ع انغام نفس الاغنية..
شوي وخش عالخط صوت نقاش بوها وامها مع منذر..
عكرشت وجهها وضحكت..
•🌹•🌹•🌹•🌹•
ما لغيره نميل ..ولا نالف في صوب خليل..
لا نالف في صوب خليل..
لالا مانميل ..ولا نالف في صوب خليل..
لا نالف في صوب خليل..
لا.. لا مانميل ولا نعشق في صوب خليل
في صوب خليل.. مرادي فيه الوصف يخيل..
صوت لانغام نفس الاغنية طالع من السيارة..
واللي يسوق يردد معاها وهو يحرك في يده: يانا الوصف يخيل.. يضيع حسايف ..عمري ان يوم بلاه نوالف.. طويل السالف عاشق زول طويل السالف
عبدالرؤوف: انعم انعم.. لنقنه مش بطال صوتك
جمال وهو يوطي في صوت الاغنية: مالا اسمع هضي.. حمحم وكمل: لتوصيفك مالقيت مثيل.. حتى القليل.. عيونك ليل.. غثيثك عالمشّاط طويل
قالها باللكنة البدوية المميزة متاعهم..
ابتسم عبدالرؤوف باعجاب: سمحة.. لكن اكيد ماهنش ابياتك
ضحك جمال: نا وين والشعر وين يا را..سمعتهن وين كنا في البلاد في فرح ****** الهن واجد لكن
ضيق عبدالرؤوف عيونه: سمعتهن في فرح وله واجد وعند توا قاعد حافظهن واخرى تسمعلي فيهن.. لا ونفس موضوع الاغنية..قيسك غاوي يا ولد امي
قعد جمال يضحك وهو يسوق بعدين قال: لا مستحيل مزال مش توا ومش في وقت قريب
ابتسم عبدالرؤوف عالجنب ورجع يشبح للطريق قدامهم..
صكر جمال المسجل لما خطر في باله سؤال: رؤوف بننشدك
هو نزل الشمسية متاع السيارة قدام عيونه: اطري
جمال: كنك انت وخالد؟!
عبدالرؤوف: مولي ماينطاقش بكل مغير يجري ورا مراته واللي تقول فيه
ضحك جمال بهزوة: ليه وقت مش مفيت توا
شبحله عبدالرؤوف: في حاجة مانعلمهاش؟! حسيتك متحامل عليه واجد الفترة الاخيرة..
جمال شبح لخوه بسرعة ورجع يشبح قدام.. النظرة في عيونه يعرفها مليح.. نظرة شك
دار روحه عادي وقال: نفس قبل من يوم اجوز هضا حاله.. هو والاخر
سكت عبدالرؤوف ورجع شبح قدام.. وجمال فتح الراديو وهو يفكر بينه وبين روحه «عليك قصة توا يبي يتم ينبش وراي عند يعرف.. انكان مسكت لساني بس حتى نا!..وبغل بان في عيونه: الله يلعن فيتك يا اسما»
•🌹•🌹•🌹•🌹•
قدام قسم الكيمياء في جامعة طرابلس..
مقعمزة راوية مع زميلة ليها تشرحلها في نقاط مش واضحات عندها..
بعد كملت راوية شكرت البنت..
: في طالب في السنة الاخيرة اللهم بارك يشرح فالكيمياء زي شراب الميه.. اني والقروب كل ماتعصى علينا حاجة نمشوله والحق يا ربي مايخليكش تنوضي لين تخش المعلومة راسك صح
راوية: يعطي فيكم هنايا؟!
: ايه طلبة اولى كل مايحصل وقت فراغ يتفق مع الادارة وينزل اعلان ان مثلًا في يوم محاضرة كدا في مدرج كدا فهمتي .. هوا فاتح حتى كورس والناس تردس عنده خاش ع منهج الطبيات يشرحلهم ويقولوا اللي ياخدوا عنده يصفوا فالمادة بمعدل
راوية ابتسمت: الله يبارك.. شكلي بنقول عليه لولد عمي يقرا صيدلة وايامه محندبات من الكيمياء
: للاسف صكر التسجيل اكتفي بعدد شوية ع خاطر السني مشروع وبيتفرغ اكثر لروحه
راوية بخيبة: خسااارة.. وبعقدة حواجب كملت: مالا كيف بيقبلني اني؟!
البنت ضحكت: جار حوش اختي نعرفه ويعرفني تقدري تقولي واسطة يعني..وغمزت بعدين كملت: اساسًا نفر لا بيزيد لا بينقص
ابتسمت راوية: اهاا اي فهمت عليك توا..
: الاحد الجاي بيعطينا تو نكلمه عليك وخشي احضري ..جربيه وكان عجبك استمري، شن رايك؟!
راوية: عادي ماعنديش مشكلة
: نتلاقوا مالا.. هي سلام توا
راوية: سلام
مشت البنت وراوية طلعت تليفونها من الشنطة ..لقت زوز رسائل واردة ..اول وحدة قابلتها رسالة مريم.. ابتسمت وكتبتلها الرد بعدين خشت ع التانية وكانت من عبيدة
كاتبلها «قالولي بتروحي مع التلاتة ونص»
قعدت تمشي وهي تكتب «ايه هاني توا بنكلمهم»
خلال ثواني مالحقتش تنزل فيهم تليفونها جاها الرد سريع «حتى اني مروح توا.. تعالي لحوش جدي طول مستاحشك»
تعكرت ابتسامتها.. سكتت صوت عقلها اللي فسر الكلام وطول ردت عليه «تمام»
نزلت التليفون وزفرت بضيق ..سمعت نغمة الرسالة من جديد
قاماته وشافتها «مالا توأمك ماعندهاش اليوم»
ردت عليه «لالا ..لا اليوم ولا غدوة عندها السبت»
وهي تمشي خبطت في حد بقوة لين طاح التليفون وانفك كڤره من ورا والبتارية وكله..
قامت راسه بعصبية ووين شافت وجه اللي خبط فيها زادت عصبت وقالت: هادا انت!
هو جي بيطبس يلمهولها: اسف جدًا من غير قصد
هي سبقاته ونزلت وهي تحرك في يدها وتبعد فيه: حول هكي ترا مانبيش مساعدتك! بعدين بالك تبيها بالقصد باش ناديلك من يربيك!
وقعدت تلم فالتليفون وهي اتمتم بعصبية: الله يرزيك فيهم عيونك اللي بلا فايدة!
وهو بياكلها بنظراته..
وقفت ع حيلها وهي تساوي في حوايجها.. قامت عيونها شبحتله وبحدة قالت: نحي من طريقي لنلم عليك الكلية كلها! ماتحسش انت ماتحسش!
هو قعد يقول: اعطيني معاك فرصة.. فرصة وحدة راني ناوي الحلال علاش ماتبيش تفهميني
راوية شبحتله من فوق للوطا باشمئزاز: ناقص والله! ترا ما تزهقليش كبدي وبرا في حالك خيرلك..
ومشت من جنبه بدون ماتعطيه فرصة للرد
هو تبعها بعيونه اللي نظراتهم مش حلوة ابدًا وبعيدة كل البعد عن الحب ومعانيه: زدت سكرت راسي عليك.. حلاوة وجسم وعيون اه من العيون بس.. عض ع شاربه وكمل في سره: وقيمة الخشم هادي يا قداش نتعب معاها
استاقض لروحه ولوقفته.. تنحنح وساوا ياقة قميصه بعدين كمل طريقه تجاه مبنى القسم..
•وهي قررت تمشي للعلوم تستنى غادي.. واول ماولعت تليفونها شرين طول
فتحت الخط وردت: ايوا للوش
: شني كملتي
راوية بعد قصت الكياس: ايه في العلوم توا
: تمام جايينك
راوية: تمام..
ونزلت التليفون بعد صكرت الخط.. خشت وقعمزت ع الدرجات وهي طايرتلها.. من جهة شكوكها تجاه عبيدة ومن جهة اللي لصق فيها ومعاش سيبها في حالها..
قاطع سرحانها هياتم لما قعمزت جنبها: خيره الحلو
راوية استاقضت وشبحتلها: مافي شي
ابتسمت هياتم بلطافة: قوليلي عادي مايطلعش مني راهو
راوية شبحتلها وتنهدت: مافي شي مهم غير واحد لبسني ومعادش خلاني وين مانمشي نلقاه مش مبطل دوة فاضية بكل
هياتم: باهي مرات كويس علاش ماتعطيشي فرصة
راوية: لا كويس لا غيره هياتم.. اني توا مزال صغيرة وفوقها مش مستعدة للدوشة هادي كلها ..وبنبرة فيها استهزاء كملت: بعدين كان تشوفي شكله تنسد نيتك ع الرجالة كلهم!
ضحكت هياتم: يعطيهالك..
دوب ما ابتسمت ..وقامت التليفون لما شرين تاني: خلوفه
هياتم اختفت ضحكتها ودارت روحها مش مهتمة، لكن الحقيقة حواسها كلها مركزة مع راوية
: كملتي سكر
راوية بضحكة: كملت لكن نبشرك شكله عمي طاهر ولا واحد من الولاد جانا تو كيف اتصلت بيا ليلى
: وعلاش يجوا مش قلت امس اني اللي نروح بيكم؟!!
استغربت راوية انفعاله
وهياتم سمعت اللي انقال لان التليفون صوته عالي شوي ويعطي ع برا..ابتسمت بدون ماتلاحظها راوية
اللي استغربت انفعال عمها وقالت: عادي خليفة
: باهي باهي.. معليشي سكر غير ماحد قالي وفات فيا طلعتلكم
هني وقفت هياتم واشرت لراوية بيدها بمعنى باي..
هي قامت يدها وقالت: مع السلامة
عطتها بظهرها ومشت وع وجهها ابتسامة نصر خفيفة
: وين مع السلامة قاعد نتكلم..
راوية: تي لا مش ليك هادي هياتم كانت بحداي وناضت
سكت ..شوي وسمعاته قال: خالتك ولا من هيا
راوية: مش خالتي بنت عم امي
: نفسها خالتك..
هي ردت بانزعاج: غير خليني من السيرة هادي وقولي شن شريت
: تو بعد تروحي ساهل بالسلامة حاصل فالزحمة
صكر منها وشرينت بعده طول ليلى.. قالتلها اني وطارق قدام الواجهة
وقفت راوية ومشتلهم.. وهي تفكر باستغراب في عمها ومزاجه المتعدد خلال مكالمة وحدة..
•🌹•🌹•🌹•🌹•
من سكر للوز..
اللي كملت كيكتها وطلعتها من الكوشة.. الريحة الحلوة متاعها عبت الكوجينة وصولًا لباقي الحوش..
سمعت صوت خوها يقول: قصيلنا وجيبي منها سخونة مريم
ردت عليه وهي تحط فالطاجين ع الرخامة: الفرصة لا تأتي مرتين
: تي طرف ع رحمة الوالدين راني نجيك وناخده كله
هي قلبتها ع لوح التقطيع وبدت تقصص فيها واضبح: معاذ تعالى
هو شوي وخش عليها: نعم مريم
ابتسمت وحطت طروف الكيكة في اربعة صحون ومعاهم شوكات: تعالى باش ترفع الصفرة تاكلوا كيكة
ابتسم معاذ بحماس ومريم طلعت عصير حطاته في الصفرة اللي رفعها خوها للصالة
وهي زادت قصت كم طرف تاني حطتهم في صونية بطريقة حلوة وبعدتها ع جنب.. كملت تقطيع باقي القالب وستفاته في حافظة ع الرخامة
بعدين رجعت قامت الصونية وطلعت بيها في يدها: راكبة لناديا ماما
: بري
لبست في رجليها وفتحت الباب.. بعدين توجهت لباب الدروج المردود فتحاته وخشت راكبة فوق..
وصلت وطقت ع الباب..ثواني وفتحتلها مرت خوها اللي ابتسمت اول ماشافتها: مريومة اهلا اهلا..
ابتسمت مريم: بيك ندو
ناديا: خشي خيرك واقفة
نحت من رجليها وخشت ومرت خوها صكرت الباب
مريم: وين للو وقيس
ناديا: قيس رافعه بوه معاه اما للو يا حنة روحتلي من الروضة تبكي ع طول رقبتها ..قعدنا في قولة بابا زلبحني خلاني نخش للفصل ومشي لين رقدت
مريم بضحكة وهي تحط فالصحن ع الرخامة: يا روحي اني
ناديا شبحت للصونية: ابداعات اليوم
مريم: كسدت بروحي قلت نديرها و نركبلك اصلًا قداش لينا معاش هدرزنا
ناديا فتحت فردة الدولاب اللي فوق الحوض: مالا نطيب قهوة ولا تبي حاجة تانية مريومة
مريم نحت النايلو المغلفة بيه الصونية: اللي يريحك حبيبتي
دارت ناديا القهوة ومريم جنبها تهدرز.. بعدين طلعوا بالصفرة للبلكونة
مريم بابتسامة: مخليتيها تهبل ندو
هي ردت بعد قعمزت ع الكرسي: بعد الحمل جتني عالزرع قعدت ناخد في شتلات من السانية ونحط
قعمزت مريم ورشفت من فنجانها
ناديا تشبحلها: في في فمك كلامك مريومة
قامت عيونها ليها وهي ساكتة.. دورة تكلمت: نبي ناخد رايك في موضوع
ابتسمت ناديا: اللي هوا
مريم حطت الفنجان في الصحن متاعه بعدين حطت يديها ع ركابها: لو فرضنا في واحد يحب قريبته باهي.. من لما هي صغيرة يموت فيها واللي تبيه هو فيه غير تأشر.. يعني محصلة معاملة مميزة منه ..
ناديا باهتمام: ايه
مريم: الولد ماصارحهاش لتوا بمشاعره.. ومن الجهة التانية هي ماتحس بشي تجاهه بكل .. كيف يصير فالحالة هادي؟!
ناديا: تتكلمي ع روحك مريم؟!
ضحكت وردت: لالا.. وكملت تقول: راوية
توسعوا عيون ناديا بمفاجأة: راوية؟! مني؟!.. وزادو توسعوا اكثر لما قالت: راك تقولي عبيدة!
هزت مريم راسها بمعنى اي..
ناديا قامت حواجبها: كيف ماحد لاحظ.. حقا هو ديما راد باله منها وتحسيه يرف عليها طول الوقت
مريم بضيق: وفوقها دخلني فالنص قالي جسي نبضها ولمحيلها لين نكلمها.. واني مش راضية يا ناديا ضميري يأنب فيها كيف مدرقة عليها
ناديا بهدوء: هوا يدير في حاجة يعني تشوفي فيه يلمح يتكلم يتقرب منها؟!
مريم: الحق يا ربي ايه
ناديا: خلاص مالا اصبري عليه شوية.. مريومة راهو الراجل لما يحب يبدا يحسب في كل تصرف يديره قدام البنت اللي يبيها ويكونلها فارس الاحلام ..بالذات راوية انتي تعرفيها اكثر من الكل بنية حلوة ذوقها صعب وعندها ع شوفة النفس شوية هادا كله يبي حذر فالتعامل معاها انثى زيها مش اي راجل يلفتها.. صدقيني اللي تحسي بيه انتي جنة قدام شعور عبيدة يا ناري
مريم بقلق: وافرضي راوية رداته..
ناديا ابتسمت: ترده مرة واتنين لكن حتحبه مع الوقت ماتنسيش انه ديما في وجهها مش مسيبها دقيقة ..وكملت بضحكة: مهندس وحليوة وعاقل واهم شي ميت فيها بالله وين بتحصل وخيه؟!.. غير راك تخبري منصور اني نقول فالحق من منظور عام فقط لا غير
وضحكت..
مريم قعدت تضحك معاها.. وانزرع فيها امل كانت فاقداته..
•🌹•🌹•🌹•🌹•
في حوش الامين..
مقعمزة ذهيبة مع بنتها وكنتها في دار التقعميز يهدرزوا
مفيدة: مرات نقول نراجي للحج مرة وحدة
ذهيبة: لا وين للحج يا بنتي تحني عشر مرات واطير..مزال قريب شهر ونص راهو
مفيدة: خلاص اللي تشوفيه انتي عمتي
خولة: غدوة حوش جدي بيجوه عمال الكوجينة شن رايك نستغلوا الفضوة ونركبوا نديروهالك فيسع فيسع خصوصًا ماعنديش معهد غدوة
ذهيبة قامت حاجبها باقتناع: ايه راي كان هادا شوفي مريم معاك ولا وحدة من البنات واني نلصقلها
خولة بضحكة: شن رايك ننقلوا اللمة غدوة لشقتك فوفو
مفيدة ابتسمت: عادي
خولة: خلاص مالا.. غير وقضي حمدي ع حاجات الحنة
ذهيبة: حنة وزيتها بس اخطى من هكي لا مش باهي ليك
مفيدة: حاضر..
•🌹•🌹•🌹•🌹•
في الليل..
ليلى وبشير عالتليفون.. وزيهم حمزة وفريال💞
اما الباقي بين السهران والراقد..
زي حال عبيدة اللي يحب بصمت.. وعمه اللي يبدو انه بيخش لمعترك الحب اخيرًا..
ايييه..يقولوا الحب مش بس مقتصر ع المشاعر الحلوة والسلام.. الحب اكبر ..اكبر بهلبا.. ومع الوقت نعرفوا شكون اللي حب جديات وشكون لا..
•🌹•🌹•🌹•🌹•
يوم الخميس..
جوا العمال لحوش الحاج منصور وقف عليهم فتحي ومعاه الامين..
وداخل الحوش حليمة وكناينها زمزم وذهيبة ووسيلة مصكرين عليهم  دار التقعميز
اما الحاج منصور يدير في دورته المعتادة ع السانية ومعاه حفيده الكبير..
•بينما رقية مع بنات خوتها في شقة حمدي..
لصقت ذهيبة لكنتها وخلت الباقي ع الصبايا..
رقية: وينها الحنة يا خوخة
جت خولة في يدها صفرة فيها صونية الحنة مغطية وجنبها طاسة نايلو فيها ميه: اهيا عجنتها امي تسهف
فريال مدت يدها: هاتي حطيها بيني وبين ليلى.. وانتي جيبي وحدة تانية نحطوا فيها وخليها جنبك انتي ورقية
خولة قعمزت: اني متكسرة راني.. وكملت بصوت مسموع: علياااا صونية يا عليا فيسع
جاها الرد من الكوجينة: تخلوها في الرقبة..
فريال عضت ع شاربها وقالت بضحكة: ابصر في شن طاحت المنجوهة ..
نور متربعة ع الجلسة وهي ترفع في شعرها ذيل حصان: زعميتها مشت توتي مع مريم وراوية الصفرة
فريال: توتي الفري هادي مش وجه دير وقضية.. ع قولة المثل السوري اكل ومرعى وقلة صنعة
اللي فالدار قعدوا يضحكوا
دقايق وخشوا مريم وراوية بصفرة فيها مكسرات وما الى ذلك من لوازم التكسيدة.. ووراهم عليا فمها يمضغ وفي يدها صونية لخولة
حطتها قدامها ومشت قعمزت اول وحدة عالصفرة..
مريم: الله ريحة الحنة تهبل
رقية وهي تحني لمفيدة في يدها: حنة عمتك ذهيبة مش عارفة شن هوا اللي دير فيه باش تطلع هكي..
مفيدة: بكل.. وتصبغ لين تولي كحلة
ليلى تاخد من الحنة وتحط ع رجل بنت عمها: شن مريومة
هي ضحكت: كملوا لمفيدة بعدين ساهل
ع خشة ناديا كانت ادخل في لتين للحمام..
مها نادتها: للو تعالي بحدانا
لتين: انلا نبي حنة
ضحكت ناديا ومريم قالتلها: نكملوا لعميمه مفيدة ونديرولك يا قلبي
خولة: قداش بياخدوا يدياتها ..زودي لصقيلها
ناديا قعمزت: لالا خلي حصتها لليل توا مش حتتحملها تقلق وتقلقني
خولة: براحتك..
لتين: نبي بابا
راوية قرصتها من خدها بعدين باست صوابعها: وخيتي تتاكل ماكلة.. وينه بابا يا ناديا
هي ردت: اكيدة في حوش جدي
وقفت مريم وخدت وشاحها المحطوط ع المندار: تعالي نزلك للولاد تو يرفعوك ليه
جت لتين تجري شدت في يد عمتها..
مشت مريم وطلعت بيها من الشقة وهي تنزل عالدروج: عمامك لوطا في المربوعة
لتين ابتسمت ..ومريم فتحت الباب الفاصل خشت منه
سمعت صوت البلايستيشن عالي وصوت هدرزة وضحك..
وين جت بتمشي للمربوعة طلع عبيدة من الكوجينة .. رافع صفرة موتيتها خولة قبل لتركب فيها نوعين كيكة دايرتهم وفطيرة وصواني فيهم عسل وقشطة ومربى..
لما شافاته قالت: الباش مهندس معانا اليوم
عبيدة جاها: الباش مهندس حاله بالويل من بنت عمك
مريم ضحكت: خيرها
عبيدة: سلامتها.. امس قلتلها تجي لحوش جدي فالاول قالت باهي بعدين فاتتني بالطويل..
مريم اذكرت امس لما روحت راوية من الكلية كيف كانت متعفلقة من الولد اللي يلحق فيها وماطلعتش من الحوش بكل..
ابتسمت وردت عليه: مروحة تعبانة اعذرها شبه نهار كامل فالكلية
عبيدة تنهد: مستاحشها موت يا مريم
هي ضحكت: حي عليك انت غرقان لشوشتك
ابتسم عالجنب وقال: الله غالب قلبي مالقاش يحب غيرها
عقدت مريم حواجبها وقالت بتحذير: خلينا اصحاب
ضحك عبيدة: نسيتك بكل..
مريم رجعوا ملامح وجهها لطبيعتهم: انت اللي نسيتني علاش نازلة..مدت يدها اللي شادة بيها يد لتين وكملت: ايه نبيك ترفع للو لبوها ولا تبعت واحد من الولاد
عبيدة خداها منها: تم..
فجأة سمعوا باب الحوش انفتح وخش منه كمال.. مشي خطوتين بحذر ومد يده وراه يدور فالباب.. وصل فيه اخيرًا وصكره بعدين رد يده وشد بيها برج باكوات البيتزا اللي مدرق وجهه: من هنايا يجي يقيم معاي..
عبيدة: دبر راسك
كمال من ورا الباكوات: عشاكم راهو
مريم جاته وهي تضحك خدت منه مجموعة..
هو هدا وين تنفس وبانوا عليه: هادي انتي.. اصلًا ماتطلعش الباهية من غيرك
هي ابتسمت
ولتين تتفرج عليهم..
مريم: تعالى حطهم فالكوجينة..
مشي كمال وراها وحطهم بحذر ع الطاولة وهي دارت زيه
وقف ع حيله بعدين قال: ركبي حصتكم كل زوز في باكو
حسبت مريم ست باكوات وخدتهم
كمال حطلها واحد زيادة: هادا لعليا قوليلها هدية من كمال
مريم: خيركم معاها عقدتوها
عبيدة من برا الكوجينة: كمال هادا مشغول بالناس اكثر من روحه يحب يحشي راسه فاللي مايخصاش..
كمال: وانت علاش حادف وذنك معانا
مريم قامت الباكوات وطلعت بيهم وهي تقول لعبيدة: اشبح شن شاد عليك باش حامق منه هكي
ومشت كملت طريقها للباب الفاصل..
كمال طلع من الكوجينة وهو يرقص في حواجبه: ورقت اني عارف ولا
عبيدة شبحله: من يوم مالقحتلي عالابوة ما ابوة عرفتها زبطاتك
كمال ضحك: تعجبني كيف مركزة
ومشوا الزوز مع بعض للمربوعة.. ولتين شادة يد عبيدة
كمال: شن صار معاك جديد
عبيدة: مافيش غير حرق الاعصاب.. تقول ادير فيها بالمكر يا راجل تي كان عارفة نقولوا بلعاني فيا لكن الكارثة هي مش حاسة بكل ولا تجيب علم بشي!
كمال قام حواجبه ونزلهم: حتى انت مالقيت في من تعشق كان راوية
عبيدة شافله بربع عين: ضمه فمك اني راضي
كمال: تي يا طبل قصدي انك لازم تسايرها بالذات بعد تعرف احسب حساب اسوأ الاحتمالات
عبيدة: قول خير ولا اسكت عاللي عندك
كمال قام حاجبه: توا بس كنت تقولي راضي ومش عارف شني! اسمعني جاي راوية كيف مانشبح فيك قدامي بتبشمطك وقول قالها كمال..
هو تنهد: تبشمطني..تولع فيا ببنزينة ..اللي هو غير يصير اللي نبيه
كمال خبطه ع كتفه بخفة وابتسم..
وخشوا الزوز للمربوعة.. بدون مايلاحظوا او يحسوا ان الطفلة صاحبة الست سنوات كانت معاهم عالخط
•🌹•🌹•🌹•🌹•
فوق..
كملوا البنات لمفيدة وبدوا يلفولها في يديها ورجليها
فريال: نحطوا عليها مناديل قبل بقولي
رقية: ايه خير..
وبالفعل داروهم وكملوا..
وقفت فريال ع حيلها وهي تقول: حسني تشنجت
مفيدة ابتسمتلها: عقبالك فراولة نلتموا زي هاللمة في حويشك ونحنوك
دق قلبها دقات متسارعة في جرت بعض..
ضحكوا البنات.. وخولة قالت ببصارة: من توا تحالف نساوين خوتي
راوية بضحكة: تربحي يا خولة ماصدقنا خليها تتحالف زي ماتبي
خولة: لا مادابينا يتفاهموا
فريال: نجيهم حماتي وسلفتي قداش يهبلوا
عليا: حي عليها ركبت عالموجة طول
نور ورقية ابتسموا..
وفي تركينة الدار مقعمزة وصال وتتفرج بابتسامة.. رفعها تفكيرها وتخيلت روحها سلفتهم حتى هي.. البنية سيطرت عليها مشاعرها وهي ماكانتش عندها نية تحاول تكبحها ابدًا ولا تقاومها..
قطع تفكيرها خشة مها بالبخشة ووراها مريم بباكوات البيتزا.. واخر شي ناديا بصفرة فيها باكوين عصير وطواسي..
قدموا البنات بيتعشوا.. وناضت رقية تغسل في يدها من بقايا الحنة
اما التلاتة الباقيات يراجوا في دورهم..
ومريم اضم في الحوسة.. بعدين خدت صونية حطت فيها طروف بيتزا وطاسة صبت فيها عصير ورشقت فيها مصاص بعدين مشت بيهم لاختها قعدت توكل فيها
نور: خسارة فاتت نجلاء
ليلى: ربي يهديها عمتي كان خلتها تجي
خولة ضحكت بهزوة: لحوشنا بلا مناسبة مستحيل..
فريال واقفة في باب الدار باش اول ماتطلع رقية من الحمام تخش بعدها: شوره بكري اتصلت بابراهيم قالتهاله وصل للسقف ونزل
وقعدت تضحك
هما ضحكوا معاها
بعدين راوية قالت: مسكين من جية العيد معاش شافها
نور: خيرهم الزبير وعلي جو
عليا وفي يدها طرف بيتزا تاكل فيه: الزبير ماتقدرش عليه عمتي وعلي تراه هرب هروب مع خوه
ع خشة رقية قعدت تنطر فالميه ع وجه ليلى وتقول: مرومة كولي حتى انتي
مريم تشرب فأختها العصير: تو ناكل بعدين
راوية حولت من بيتزتها متاع الخضرة طرف بعدين زحفت ع ركابها لين وصلت في مريم: غير خودي الطرف هادا بس
مريم خداته ونتشت منه
وصال: مريم عابية بتحني هدا علاش تأجل فالماكلة
ردت عليها بعد بلعت: ريحي روحك اساسًا يادوب تسد للو اللي فضلت من مفيدة
خولة وهي تاكل بيد وحدة: ماما عبت بيك عارفاتك ماعندكش الروح
شبحتلها مريم بفرح: احلفي!
ناديا ضحكت: مش مستحق حلفان صونيتك مغطية في الكوجينة غير ماشبحتيهاش
مها قامت طرف بيتزا: حي عليك من ماما يا مريم شن قايلتلك عالحنة
مريم: ندير روس صوابعي بس
جت فريال وناضت بعدها ليلى..
رقية: تو نلصقلك اني
راوية: واني نحنيك
ابتسمت مريم..
وكملوا هدرزتهم وهما ياكلوا.. بعدين ناضوا ضموا الحوسة ماخلوا لمفيدة شي وروحوا كلهم، الا من خولة قعدت باش تنحي الحنة لمرت خوها
•🌹•🌹•🌹•🌹•
الساعة 10:30 ليلًا
في حوش حسين..
متكي في دار التقعميز ومعاه ولاده الزوز..
ايوب: مليحة خدمتهم
حسين: عمك فتحي جابهم شاكرينهوله
ايوب: وامتى يكملوها توا
حسين: اليوم بدوا يحولوا فالارضية الاولى .. ضيق عيونه وهو يفكر: كان استعجلوا رواحهم عالحج الحي توتى
ايوب هز راسه وشبح لعبيدة لقاه شاد التليفون كأنه يستنى في حاجة.. شوية وناض طلع من جنبهم..
تبعه بعيونه بعدين ضحك
حسين كان يتفرج عالتلفزيون شبحله: خيرك يا ولد؟!
ايوب رجع عيونه لبوه: تفكرت لما غرقوا البناويت فالبحر
حسين شبحله شوية بعدين ولى شاف للتلفزيون وهو يهز فراسه
وايوب شد ضحكته..
•اما عبيدة.. لما طلع من الدار اتصل بمريم.. تكلموا دقيقتين وصكر منها وهو مبتسم
•🌹•🌹•🌹•🌹•
تتكلم بالتليفون بصوت واطي وهي تقول: ناقصة بلاك
: اضطريت نمشيلهم كان هدا مانسيبش حبي ماصدقت اني
ضحكت فريال بعدين قالت: يا ريتك بعتت الزبير بدالك
: قعدتي تستاحشي؟!
تنهدت تنهيدة مكتومة وابتسمت ابتسامة حب..
: اليوم هادا كان زي الحلم في عيوني.. نموت فيك
فريال: غزالي انت
هو ضحك وقال: فكينا من الالقاب اهيا وهاتي الكلمة هديكا اللي طفي بيها في ناري
غمضت عين وخلت التانية مفتوحة: I love you يا واد انته
: خلاص بنكلمه عمي واللي يقدرك عليه ربي ديريه
فنصت فريال وضحكت: حمزاوي مش قتلك نقص شوية من فرض الاراء متاعك
: ماهو يا حبي كان جيت بالسياسة تبدي تدلعي وننصبوها فالاخر واني مانقدرش على زعلك..
فريال: تو هادي نفهمها تهديد ولا غزل ولا شن!
: اني مانهددكش.. مستحيل نديرها كان هدا نبدا مانسواش بارا في سوق التريس
هي بحب: انت سيدهم حبيبي مافيش راجل يجي في ربعك يا حمزة
: كبيدتي
فريال مبتسمة وقلبها يدق: نعم
: اللي تبيه يصير خلاص..
هي بصوت مليان مشاعر: نحبك
: بالله العظيم اني اللي نحبك
💞💞💞
•🌹•🌹•🌹•🌹•
يوم السبت..
18/أكتوبر/2008..
طلعت من الكافيتيريا في يدها طاسة عصير طبيعي ..تمشي وفي جنبها زميلتها
شيماء: حسبي الله فيها قصدي بجد خيرها هكي هي ..خربت الدنيا كان قلتلك عاودي مافهمتش!
مريم شربت من العصير بالمصاص بعدين قالت: فوتيها.. الناس اللي هكي ربي يعينهم ع انفسهم ..
شيماء بضيق: والمادة كيف نديروا فيها؟! اللي نسأله ولا نسألها يطلع مش فاهم
مريم: تو نكلم فريال بنت عمي مرات عندها خلفية
شيماء: شن يصير معاك كلميني
مريم: تمام..
وقعدوا يمشوا ويهدرزوا لين مريم فجأة شافت عبيدة من بعيد..
خبطت راسها بخفة: التليفون نسيته صامت
شيماء شبحتلها بعقدة حواجب بعدين غيرت عيونها وين مامريم تشبح
فتحت فمها وبان في وجهها الاعجاب شديد..
واضح انه جاي طول من المطار من يونيفورم الخدمة اللي طالع عليه يهبل ومبينه زي شخصيات الافلام الامريكية.. وزايد النظارات الشمسية بلونهم الازرق كحلي وحوافهم الرقاق الذهبيات عاكسات ع الزي..
تلفتت ع مريم وسألت: خوك؟!
مريم: لا ولد عمي.. سلام توا بنروح
شيماء: باي
مشت مريم وهي قعدت اتبع فيها بعيونها.. او بالاحرى اتبع في عبيدة ..وفي خاطرها تقول «شن العيلة هادي؟! جميع انواع الجمال عندهم!»
•عبيدة بابتسامة: شن الجو
مريم وهي تمشي في جنبه: مليح
عبيدة: دوم.. هي خفي رجلك بنوصلكم ونولي للمطار
تحركت اسرع وهو معاها .. ويدور بينهم حديث عن القراية واكيد عن البلغارية💖
اللي ركبوا السيارة وتوجهوا لكليتها..
•🌹•🌹•🌹•🌹•
في حوش اول مرة نخشوله..
حوش ناجي عم بهية..
كانت هياتم قاعدة اليوم ماعندهاش شي..
ضمت الحوش هي واختها المش متزوجة..
بعدين خشت دوشت وسلتت شعرها ورجعت طلعت جنب اختها: مزال ماروحتش امي؟!
اختها توتي فالغدي: لالا.. خليها تعطل بالك تقدر تجبد منها الدوة ع ولدها علاش طلق
هياتم بقيمة حاجب: مالا وحدة ساهلة تحسابيها لفعة هادي لفعة.. الا ماقلتيليش خوتك وين؟
: واحد فالمربوعة والتاني مانعلمش عليه
هياتم وهي طلع في شيشة ميه مصقعة من الثلاجة: خاطري نطلع
: السيارة في الورشة ماعندي كيف نديرلك
هياتم جت خدت طاسة من السقطار فوق راس اختها: لا قصدي طلعة عائلية كلنا جميع حتى خواتك نكلموهم وعيلة خوك الدراه
التفتتلها اختها وقالت: شن خطر عليك؟! ..وبتضييقة عيون كملت: مش عوايدك هادي يوتا..
هياتم بعد شربت من طاسة الميه ابتسمت: عادي.. نغيروا جو ونتعشوا.. كسرة روتين
: مندري شوفي خوتك وبوك
هياتم مبتسمة: تو نقول لامي تكلمهم ماعليكش
والتفتت ردت الشيشة للتلاجة ومزال مبتسمة ..
•🌹•🌹•🌹•🌹•
درس سيارته في قسم الكيمياء..
بعدين التفت ع مريم وقال: شريني عليها
مريم فتحت تليفونها وحطت ع الرقم بعدين اتصلت
نادى تلات مرات وفالرابعة انفتح الخط: مريومة
عبيدة لما سمع صوتها حس بشوق كبير.. ما كأنهمش يومين اللي غابهم عنها..
مريم حاسة بنظراته واضطرابه: حني برا ويري هي اطلعي
: هيا هي..
صكرت مريم الخط ونزلت التليفون.. عبيدة دار روحه عادي شبح قدامه ويده مزال ع الدومان
راوية لما طلعت قعدت ادور بعيونها وبسهولة زبطتهم كون عبيدة لابس لبس الخدمة وفاتح الروشن..
ابتسمت وتوجهتلهم.. ماحسوش بيها لين فتحت الباب وركبت
هو لما فاحت عليه ريحة عطرها اضايق «باخة الشيشة كلها هادي!»
اما هي قالت بابتسامة: شن الجو بيدو انت يلي معاش معبرنا
التفت عليها ونزل النظارات شوية: من اللي مش معبر التاني اني ولا انتي يا بلغارية..
مريم مبتسمة: واااك.. ماتتعاركوليش رجاءًا.. ويري تعالي في مكاني وخليني ورا ..راسي يوجع فيا من الشمس
عبيدة ابتسم بخفة وغمز لمريم..
اما راوية استغربت طلب بنت عمها.. لكن نزلت وبدلت مكانها معاها..
وتتحرك السيارة طالعة من الجامعة
عبيدة يفتح فالمواضيع مع راوية ومرة مرة يحدف تلميح..
بينما مريم ورا محصلة رؤية كاملة.. والفوكس عندها محطوط ع راوية وبس
اللي قالت: افتحلنا حاجة عبيدة
هو اصلًا كان مجهز شريط بيحطه.. طول رد: حاضر تؤمري امر على عبيدة
ضحكت مريم..
وهو فتح المسجل..بدت المقدمة الموسيقية
راوية قعدت طربق بصوابعها مع اللحن..
اما هو كان بعيونه بين الطريق وبينها.. الانسانة هادي خلاته معاش يحمل بعدها لحظة.. تأصلت في قلبه وتجذرت فيه ..وولى ضرب من ضروب المستحيل تطلع منه..
استاقض من هيامه لما سمع الاغنية بدت..
يا مقواها..
نار الغلا يا ناس يا مقواها..
عبيدة مع الاغنية: نار الغلا في القلب يا مقواها..
جبت الطبيب الها وحل في داها..
نار الغلا يا ناس يا مقواها..
مريم كانت تسمع ومبتسمة..
عبيدة وهو يسوق: اه وحل في دايا وجاب الدوا وعالج ..وجاب مراية.. لقي الكبد مسحونة بكي يلايا..
راوية وهي تسمع فيه.. حست كأنه يغني من قلب.. في حاجة غريبة في صوته..
هو مكمل يغني مع المطرب بعد مازاد علا الصوت: اه بكي يلايا.. قعد يأشر بيده ع راوية بحركة تبان كأنه يرقص فقط لا غير: وقال نارهم تقدي قليل نجاها..
هني مريم قعدت تغني معاه: يا مقواها..نار الغلا في القلب يا مقواها..والله يا مقواها.. جبت الطبيب الها وحل في داها
عبيدة: وحل في ناري.. شاطت بلا دخان حكم الباري.. احرر جمرها وقف دمي الجاري.. تقول سم في كبدي سمرت معاها.. يا مقواها.. نار الغلا في القلب يا مقواها.. جبت الطبيب الها وحل في داها .. نار الغلا في القلب..
وقعد يخبط بصوابع يده ع الدومان..
وهي جنبه.. تسمع وتشبح بحيرة..
واللي زادها ان بعد كملت الاغنية وطى الصوت.. وفتح اغاني عشوائية ولا وحدة فيهم تحكي عن الحب..او عالاقل بنفس طريقة اول اغنية فتحها..وفوقها معاش غنى بكل
هو كان يسوق وفي خاطره متمني انها تشك ولو شوي.. باش تسهل عليه الاعتراف اللي اصبح قريب جدًا..
بينما مريم وراهم كانت مبتسمة.. حالة عبيدة وهو يغني حلوة هلبا والحاجة الغريبة في صوته وراوية مازبطتهاش مريم زبطتها وعرفتها حب..
غيرت عيونها من عبيدة لراوية.. صاحبتها واخت روحها.. ساعتها تمنت من كل قلبها يصير اللي في بال عبيدة وتكون من نصيبه.. في نظرها مايطلعش ع راوية راجل غيره..

يتبع...
«لو عجباتك الحلقة اضغطي عالنجمة واعطيني رايك🤍»