«من لما بديت نعرف واني عايشة فيها.. كلنا عايشين فيها
مع بعض ..ديما ضحك ومقالب وسهريات ..ماتوقعتش ولا تخيلت في يوم يصير فينا اللي صار.. اللي يشوفنا وقتها مستحيل يصدق شن يراجي فـ كل واحد فينا.. ممكن لو جي حد زمان وقالي بيصير فيكم هكي وهكي كنت لزيته وا...
#سانية_جدي🌹 #الفصل_الثالث «جسدٌ هنا وروحٌ هناك» #الحلقة_الثانية_والثلاثون ___________________________ :اني بدرية يا خالتي ماعرفتينيش؟! حليمة ابتسمت بفرح: بدوره كيف حالك عاش من سمع صوتك.. : تعيشي يا خالتي والله ليك وحشة.. وبعد السؤال عن الحال والاحوال طلبت بدرية من حليمة رقم تليفونها وهي قعدت اضبح: مروومه.. بنياتي وينكم شوي وجتها مريم ومعاها رواية قالوا مع بعض: نعم حناي حليمة: انعم عليكم.. ترا وحدة منكم تجيبلي النقال بقولي في دار التقعميز.. مشت راوية جابتهولها من الدار كان محطوط في تزدانها خداته منها حليمة ورجعت تتكلم بسماعة الارضي: تعالي مرومه رقمي مانحفظاش اني قعدت مريم تسميلها فيه وبدرية من الجهة التانية تخزن.. : اهو توا بنعاودلك عالتليفون خالتي خليك معاي حليمة: باهي صكري مالا.. صكروا الزوز وقبل مايسألوا البنات اي سؤال عاودت بدرية اتصلت بس عالنقال ..فتحت حليمة الخط بالخضرة قالت بدرية:عطيني من يوصف الحوش لولدي يا خالتي.. حليمة: والله ماحداي حد من الولاد توا لكن تو نشوفلك الصبايا..نزلت السماعة وهي تقول: ترا تعالوا وحدة منكم تنعت مكان السانية لعيلة الحاج رجب.. مريم: نفسهم العيلة التاجورية اللي تلاقيتوا معاهم في الحج؟! حليمة باستعجال: ايه ايه، هيا سلم بنتي هاك الهاتف خداته مريم وقالت: السلام عليكم.. :وعليكم السلام، هي بنتي السماعة مفتوحة على برا وولدي يسمع فيك هي انحرجت لكن مافيهاش كيف .. تنحنحت وبدت توصف، ومريم اللي قبل كانت حافظة جيهتهم كلها بكبرها بالزناق الرقاق قبل الشوارع الواسعة.. انطمست فجأة ومعاش عرفت تقول حرفين ع بعض وهو زاد وترها بأسئلته اللي ورا بعضها.. :الزنقة الاولى لا التانية لا التالتة؟! مريم: ايه خش منها.. هو مشي مسافة بعدين قال: :الزنقة ضيقة راهو يا بنت الناس ولا ريت جامع لا جرته.. امه فنصت فيه مريم متلخبطة: لا هادي مانعتبروش فيها زنقة حني.. : يا اختي عطيني النعتة زي الناس..ماتعتبروش فيها نعلم بالغيب اني؟! لا حول ولا قوة الا بالله بس مريم ازعجها اسلوبه: ولي وخش للي بعدها طول تلقى عمارات..العمارة رقم تلاتة ظهرها مقابل لجامع..الجامع هادا خش من الفتحة اللي هو في شوكتها وكمل طول.. راوية تشبحلها ومستغربة فيها ..بنت عمها اللي قبل معلمة في الوصف بالذات مكان السانية ولا يمكن تغلط فيه حليمة بصوت واطي: مرومة خيرك؟! شن النعتة الملبزة هادي! : خيرهم العمارات من امتى فيهم ظهر هما؟! عطونا ناس كبيرة النهارات المباركة.. وامه تندب في خدودها ع الصامت هي واللي معاها.. نزلت مريم التليفون ووجهها احمر راوية: شن قال؟! مريم: الولد مافهمش شي ويقول نبي ناس كبيرة! منين بنلقاهوله يا همي منين استغفر الله العظيم وخلاص .. اسلوبه وترني نازل فيا اسئلة لين تلخبطت! :وينك يا بنت النااااس؟! خدت راوية التليفون من مريم: هاتي ترا..حطاته ع وذنها وقالت بصوت جدي: ايوا خوي تسمع فيا.. هو طول زبط ان البنت مش نفسها، صوت راوية كان فيه بحة خفيفة تميزه رد عليها: ايه نسمع سقديني بس.. عقدت حواجبها: ياريت تسكت وتسمعني باش نعرف ندلك! شدت مريم ضحكتها اما حليمة جبدتها من حوايجها وهي تفنص قعمزت راوية وهي تسمع فيه يقول: فيسع راوية: هي النعتة من الاول واضحة مش عارفة كيف مازبطهاش! عمومًا رابع فتحة بعد خشيت من التقاطع تشبح فيها؟! هو كان يسوق ولسانه اللي يلاطي بيه قبل شوي انخرس.. متفاجأ بيها: ايه قدامي.. راوية: كويس مدامها قدامك يعني اكيد تشبح في عمارات ولا! العمارة رقم تلاتة دورها ترا حليمة بهمس: راوية هادا شني! هي نزلت الهاتف من ع وذنها وردت: شوية بس حنينة نشرحله قاعدة.. غيرت عيونها لمريم اللي مزال شادة ضحكتها : الووووو؟! سمعوا كلهم الصوت وهي ردت الهاتف طول ع وذنها: شن صار معاك؟! : عمارات لونهم اخضر راهو راوية بقيمة حاجب: بالزبط.. العمارة رقم تلاتة ظهرها يعني واضح معناها مش جهة بابها فاهم هكي ولا نزيد نوضحلك.. غيرت مريم وجهها لجهة تانية وضحكت بدون صوت وهو اللي كان لماح زبط تلقيحتها بس الغريب ان ماضايقكش ولا عصب عالعكس تمامًا: فاهم كملي راوية: في جامع..بعد تخش من شوكة الجامع برا طول طول واسأل ع سانية منصور بلحاج اللي يسأل مايتوهش.. وبدون ماتعطيه فرصة للرد صكرت بالحمرة حليمة بتفنيصة: بنيتي هادا شني؟!! كيف تقولي لولد الناس هكي ناس برانية هادم واول مرة يجونا عيب! راوية وهي تفك في شعرها وتعاود تربط فيه: حنينة اسلوبه لا يطاق زهق كبدي نسمع فيه يلعلع ع مريومه لا باس شكون يحسابلي روحه الاخ القايد؟! حليمة: كان هادا تناقريه هكي وديري كارك من كاره! راوية معادش صغار انتوا مواويل زمان هادي كبرتوا عليها بنيتي راهو.. راوية شدت يد حناها: ماقلتله شي اني يا حنينة عبارة رديت عليه بنفس طريقته خل يجرب شوية بعتالي كان امه ولا من هيا مسيفة عليه يجيبها يمشي يفش غله فيها مش سايبيله حني.. والله كان يسمع بيه جدو لما ينكر معرفتهم مرة وحدة حليمة بضحكة: لا عاد ماتوصلش لهني هونك عطيتيه ع راسه ساد.. وكملت: وكان غير قلتيله لون البوابة شني حشمة مع امه.. راوية: تو يلقى حد الشارع مايفضاش خل يتعب شوية عادي ضحكوا الزوز مريم وحليمة فجأة هي وقفت: حي نسيت المركاب برا مشت بسرعة وحليمة قعدت تقول بصوت عالي: كان هادا نفتحوا الدفاية وخلاص.. هي ردت عليها: لالا حنينه خاطرك فيه انتي ابتسمت حليمة بعتالي تلفتت ع مريم: نوضي جيبي وشيقه نطلقوها وقفت مريم: حاضر ومشت باتجاه الدار فتحت درج الدولاب وطلعت فازو البخور بعدين طلعت بطريقها برا لاقت راوية قايمة المركاب في صفرة وتنزل بيه من الفيراندا بحذر.. كبهت مريم: يلهلب راوية: اممم .. وبقيمة حاجب كملت: ودك غير تلوحي التاجوري فيها هي قعدت تضحك لين وخرت براسها التالي..بعدين تكلمت ومزال الضحكة باينة في صوتها: اااه لين بطني وجعتني يا ويري ابتسمت راوية: فداك عشرة من اشكاله.. مريم بابتسامة وهي تنزل فآخر درجة: شن قالك حقا؟! حركت راسها حركة خفيفة وهي تقيم فحواجبها المعقودات وتنزل: ماعنده مايقول غير باهي ونعم بان شي من الاستغراب ع وجه مريم: متأكدة.. راوية ضحكت ضحكة خفيفة: بيني وبينك حتى اني استغربت توقعتها تسخن بيناتنا عارفتيني الناس اللي زيه هكي يحساب مافيش فالوطا غيره مانطيقهمش خير شر..لكن شوره اللي هيا بحداه نخصاته يخفف مريم بضحكة وهي تحرك في فازو البخور في يدها: ممكن وممكن من النوعية هديكا اللي يحبوا يبينوا الوعارة زعميته شخصية رفعت راوية زاوية فمها بهزوة: فالحالتين ربي يعين عيلته ع مابلاهم ضحكت مريم تاني وهي ادف فالباب قدام بنت عمها باش دخل المركاب: خل نحط بخور بسرعة باش نفيق عمتي كلثوم مسكينة عروفي ماخلاهاش ترقد بكل.. راوية: تو نحطه اني اهوا المركاب بري انتي فيقيها اكيدة على وصول وبالفعل عطتها الفازو ومشت هي للدار.. •🌹•🌹•🌹•🌹• بينما التاجوري اللي كان تلقاه راوية تاكله بسنونها بعد ماصكر الخط ابتسم بسمة خفيفة جدًا لا تكاد ترى بدون مايحس.. بدرية: يا حليلك يا غسان ماتعرفش تتكلم بالشوية بكل! هكي باهي توا شن بتقول عليا المراة! اخته الكبيرة: سامحني لكن صح لسان اللي قداتك.. هو شبح لاخته من المراية: سمعتيها قصدك! ردت عليه: مالا شني اسلوبك يخلي الواحد يطلع عن طوره بدرية متعفلقة ومتحشمة: كترتها والله كترتها يا غسان، قسمًا بالله لولا ماهيا سكتاتك كنت قتلك دور ورجعني للحوش ماعنديش وجه نقابلهم بيه! غسان: ريتيهم ولا يا هدى هدى واللي تكون مرت خوه الاكبر منه: بصراحة غسان زودتها وسامحني هاه سكت ورجع يسوق وهو موجه كلامه لامه: تي طيرتهالي ماتعرفش تنعت كان قعدت عليها ولا! مانوصلوش لغدوة الصبح! اخته: لالا غسان انت خلوقك في حكة بس اني عارفاتك مش حد تاني..اهو بعد عطاتك كلمتين ع جنابك فهمتها رد وهو يكورب خاش لفتحة الشارع: مش نفسها وحدة تانية هادي.. بدرية: كان يندري بوك مش حيعجبه غالي عليه الحاج منصور غسان: تي شن هوا اللي درناه يام مكبرة الموضوع هلبا راك! بدرية: خلاص اسكت اسكت بتقلب علينا حني توا.. هدى اشرت بيدها: اهو وليد اسأله كان هادا خفف غسان السرعة ونزل القزاز وهو يصيح: انت يا ولد.. انتبه وجاه: نعم عمي غسان: تسكن هنايا انت؟! هز الولد راسه: اهوا حوشنا.. غسان: سانية الحاج منصور تعرفها وين؟! هو شبح قدام ومد يده: كمل طووول هكي واقعد اشبح يمين لين تلقى بوابة كبيرة سودة فوقها شجرة ورد بودرية طالعة من السور هي هادي طلع غسان يده من القزاز شفشف للولد شعره: صحيت.. دخلها وصكر القزاز بعدين تحرك بالسيارة مرة تانية وهو يقول: حوش بوسعدية هادا، برا هني برا غادي معاش وصلنا ضحكوا اخته ومرت خوه بدون صوت بينما امه قالت: شوقني الطلوع! غسان وهو يمرر في عيونه عالحياش والسواني: شكلها هادي.. تلفتوا كلهم واخته تكلمت: ايه زي ماقال الوليد غسان: مفتوحة ندخلك لداخل معناها.. بدرية: ايه ايه وكيف جي غسان بيخش طلعت في وجهه سيارة عبيدة..وخر باش يعطيه مجال يطلع وعبيدة اول ماتحرك كلكسله وقام يده حياه وغسان ردله التحية.. رغم انه ماعرفهمش لكن ماستغربش توقعهم احد معارف جده وحناه جايين يباركوا بالحج.. كمل طريقه للمطار بينما غسان خش بسيارته للسانية اخته تتفرج: ماشاء الله كبيرة هلبا تبان.. بدرية وهي حاطة يديها ع بعض في حجرها: ايه ماهو قالت الحاجة ولادها ساكنين فيها معاهم هدى: الله يبارك.. غسان كان مستمع فقط الحاجة الوحيدة اللي في باله حاليًا هي صاحبة الصوت المميز والكلام اللاذع استاقض وقال: وين ندرسلكم اما حوش؟! بدرية بتضييقة عيون: والله ماني عارفة يا ولدي لكن حطنا قدام هادا وخلاص بنتها: تحسيه كبير مايطلع كان هوا يام..اهو فوقه راية بيضا درس غسان فالوسعاية قدام حوش الحاج منصور وهو يقول: الساعة قداش نجيكم؟! قامت بدرية شنطتها: تو نتصلوا بيك غسان: مافيهاش نتصلوا بيك قولي تعالالنا الساعة كدا عندي ستين حاجة في راسي يام مش فاضي.. بدرية بامتعاض: المغرب معاش مزال عليه هداكا الوقت كان هادا تعالى بعد تصليه ونزلت وهي تساوي في شاربتها.. فتحوا كنتها وبنتها بيبانهم بينزلوا حتى هما غسان تلفت ع اخته: زابطة النعتة ولا، نوصل بنشرين عليكم ماتطلعوش طول نولعها ونمشي ردت ع مضض: باهي باهي! هدى بابتسامة: يكون في عون اللي بتاخدك يا غسان ديما خيوطك عريانات.. ضحك هو بخفة واول مانزلوا كلهم بدي يوخر باش بيطلع لحقوا الحمي ومرت خوها بدرية اللي كيف ركبت الدرجات متاع باب الحوش مدت هدى لعزوزتها طبق الحلو عاد هي اللي بتخش بيه.. خداته بدرية وبنتها في يدها كيسة صندوق عصير المانجا طقت الباب مرتين ..هو اساسًا كان مفتوح ثواني وسمعوا صوت رجلين بعتالي انفتح الباب وكانت كلثوم اللي فتحاته.. بدرية بابتسامة: السلام عليكم كلثوم ردت الابتسامة: وعليكم السلام، آنستونا تفضلوا خشوا ردوا بتفاوت: صحيتي.. يزيد فضلك نحوا من رجليهم وخشوا التلاتة سلموا بالخد ع كلثوم بعدين لحقوها للصالة.. اول ماخشوا كانت حليمة مقعمزة في صدرها بقفطان شتوي قنين ابتسمت بدرية بسمة واسعة، حطت طبق الحلو من يدها وقدمت طول تسلم بالاحضان سلام حار: كيف حالك يا خالتي اياك باهية انتي والحاج حليمة وهي تسلم عليها: في خيار خيرنا يا بدوره حج بيت الله وحجينا والباقي شن خاصنا مزال الحمدولله.. انتي كيف حالك وحال مولى بيتك..انستي بدرية: الله يانسك خالتي..ينشد كان عليكم قبل يبي يجي لكن خوه مستاجع شوية رفعوه للمستشفى حليمة بعقدة حواجب: لا باس ان شاء الله غير مش حاجة كبيرة.. قعمزت بدرية جنب حليمة وهي توخر فالشاربة بيدها: لا الحمدلله يا خالتي هني قدمت بنتها الكبيرة اسمها «سالمة»: كيف حالك يا حاجة تلفتتلها حليمة وقعدت تسلم عليها وسالمة تعرف بنفسها.. بعتالي وخرت عطت لمرت خوها المجال وهي تقول: هادي كنتنا الكبيرة يا حاجة اسمها هدى حليمة بابتسامة: مرحبتين بيها.. وهدى تسلم حتى هي في سلام حار زي مايديروا عزوزتها وحماتها دارت بعدين قعمزت عالجلسة مقابل كلثوم.. حليمة: والله مانحسابك تشريني بكل قلت شوره الرقم اللي عطيناهولهم راح حطت بدرية شنطتها ع جنب وهي تقول: لا والله فالبال لكن قلة الفضوة يا خالتي الحوش مافضاش بكل من الخاش والطالع.. حليمة: وكيف حاله الحاج رجب بدرية ابتسمت: الحمدلله وقعدوا يهدرزوا فالبداية نشدة عن الحال والاحوال بعدين موضوع يجبد موضوع.. •بينما في الكوجينة.. مريم وراوية فالاخير لحقت عليهم ليلى كانت تغسل في حوايج خوها الصغير فالحوش راوية وهي تحرك في سزوة القهوة عالغاز: في كدا صوت غريب شكلها مش بروحها جاية المراة.. ليلى فتحت الدولاب اطلع في سطل الحلو وتحط فالمترد: زعما وحدة من بناويتها تلفتت مريم عليها: بالك عندها كناين جابتهم.. قاطع كلامهم خشة كلثوم عليهم بصندوق العصير وطبق الحلاوات جتها طول مريم خدت منها: هاتي عليك عمتي علاش قايمتيهم الزوز رزان.. كلثوم بابتسامة: نجيها، حطيهم حطي ماتقعديش شادتهم وواقفة مشت مريم بيهم للرخامة وراوية سألت: قداش وحدة عمتي؟! كلثوم: ديروا اربعة فناجين اني ماتحسبونيش فالقهوة ومدوا قبلها الروزاطة راكم تنسوا.. ليلى: طلعت مريومه شيشة حطتها في ميه سخونة اهو نستنوا كان مافكتش تو نمدوها بعد القهوة وخلاص كلثوم: ديروا رايكم ..واطلعوا باش تسلموا مشت كلثوم وليلى قالت بضحكة: راوية ديما ع سنقة عشرة صحة ليك.. مريم: ريتي للوش قعدنا كان اني وانتي راوية: كان عالنظافة نظيفات والشعر مسلوت ومساوي واللبس عادي في حوش جدكم انتم..وكملت بغرور مصطنع: بعدين معليشي بنات بلحاج ماحد يغلبنا فيه الزين بتفتليك وبلاه.. جابت ليلى المترد وقالت بابتسامة: صح لسانك ويري.. مريم وهي تمصمص في شيشة الروزاطة تحت الميه السخونة: تتفكروا حنينه شن كانت تغنيلنا زمان ليلى بتضييقة عيون تفكر: اغنية طويلة هيا كل مرة تغنيلنا منها بيت ولا اتنين.. راوية: اني نتفكر شوية منها.. ابتسمت وقعدت تلحن فيها: شيعت عيني قابلتني هيا..قمر زارقة ولا شعلة ثريا مريم بابتسامة: قمر زارقة على العالي..وتحلف ثريا فوسط حوش الوالي ليلى جت بحداهم بالمترد: ياسعد من حازك وقال حلالي..كتب حجته فالمحكمة الشرعية راوية بضحكة: ولا لما تقول العين ليرة ومضحكها سلطاني حتى غزال الريم ماجابتها.. انفتح باب الكوجينة اللي برا وكانت خولة: جاتك عالجرح انتي عاد رقصت راوية حواجبها: اكيد، اساسًا حنينه كانت تغنيلي فيها اني ومريومه اكثر وحدات خولة: ياما غنتلنا قبلكم مانبيش نقولك باش ماتنغريش.. ليلى: غير تذكروا امتى تلمنا وتبدا تغنيلنا بالوحدة بعتالي بشن تختمها اربعتهم بصوت واحد: حجّب على اللي واسعة سانيته ومفتاح باب الحوش لبناويته وابتسموا.. •برا سانيتهم.. غسان يسوق في سيارته متوجه بيها برا الشارع وين وصل بدايته لف ومشي يمين فات من جنب الجامع تلقائيًا خطر عليه اخر مكالمته معاها «بعد تخش من شوكة الجامع برا طول طول واسأل ع سانية منصور بلحاج اللي يسأل مايتوهش..» ابتسم بسمة خفيفة، نبرة صوتها اللي مخالجها انزعاج والبحة الحلوة اللي فيه انطبعوا في ذاكرته ويترددوا ع مسامعه من لما صكر منها.. •🌹•🌹•🌹•🌹• : سحاب اسود جاي شكلها المطر بتصب هادا كلام فتحي لمرته واخته.. بهية: ايه قالوها مبارح فالنشرة رقية: كان هادا سادنا اليوم اللي لدناهم باهي.. فتحي: شن ورانا اليوم ماعنديش توكة فالخدمة الا لو كان انتي عييتي هداكا كلام تاني رقية سكتت شوي بعدين قالت: الحق نبي نلحق ع خليفة بالك يرفعني لحوش سعاد.. شبحلها فتحي من المراية ورجع عيونه فيسع للطريق: علاش ان شاء الله مافيش شي تاني بس؟! رقية ونبرة الحزن باينة في صوتها: نجلا يوم اللي صار فالليل مرضت وخشت المستشفى اليوم بيديرولها خروج نبي نشبحها بهية بصدمة والم: يا روحي رعشوها.. فتحي فلت عيونه: وهادا وين تقولي يا رقية تي اليوم ليها قريب عشرة ايام وخوالها ماواحد مشي هوي عليها! رقية: والله يا فتحي ماعرفت شن ندير ولمن نقول حتى امي لتوا ماتندري بشي الحكاية وقتها قاعدة ساخنة خفت نجبد سيرة نزيد نشكبنها سكتت وخلاص.. رد عليها وهو يهز فراسه: ربي يهديك ياريتك جيتيني اني عالاقل، وخليفة حتى هوا شن بنقول بس بهية: اني مانبيش ندخل لكن كلام خوك صح يا رقيوه سعاد انتي ادرى بيها قلبها اكثر مابيزيد يغلاظ وبتفهمها بشكل تاني راهو.. رقية منزلة راسها خجلًا من خوها: شن تقولي بهية وخيتي الكبيرة راك ..وبتنهيدة كملت: هادا اللي صار الله غالب ماعرفتش نحسبها كويس.. بهية: معليشي معليشي فتحي بعد طول سكوت: اهو تو اني نرفعك غادي وبالمرة نشوفوا نجلا اني وبهية ..شن صارلها بالزبط هي؟! رقية: شوره بعد بوي لزها وروحت بيهم اشبح شن قالت لسعاد خلاص اطربقت فيها هي ياروحي ماتحملتش عيطت هلبا ع خبر امها وبوها قطعت حوايجها وندبت حتى خدودها.. انخنق صوتها لما وصلت فالحزئية هادي..تمالكت نفسها بعدين كملت: بعتالي صاخت لما رفعوها للمصحة قالوللهم انهيار عصبي باهي اللي لحقتوا عليها.. فتحي بوجع واسف: لا حول ولا قوة الا بالله، لا حول ولا قوة الا بالله.. هي من السيارة شكلها مش عاجبني على ماسكتت فيها البنت شي ..ربي يسامح امها وخلاص من قال نجلا تمرض وحوش جدها مايعلم بيها واحد.. رقية كانت شادة دموعها بالقوة كلام فتحي قطع قلبها تقطيع.. وفي عقلها شريط ذكريات صغار اختها معاهم.. الزبير عاش فالسانية خمس سنوات كبر مع خالته وولاد خواله اكثر خوته تعلقًا بيها هو، اما نجلاء وعلي بحكم علاقة امهم مع عمامهم ماكانتش قوية ومعبية مشاكل زي هلبا عائلات فالمجتمع الليبي بالاضافة لفرق المعاملة اللي يشوفوا فيه بينهم وبين خوالهم ..في قرارة انفسهم لطالما اعتبروا حوش الحاج منصور حوش جدهم الوحيد يحبوه ويتلهفوا للمشية ليه ويا فرحتهم كان باتوا كلا العطلات اقامة بالرسمي.. صعب عليها انسحابهم فجأة من العيلة اما بهية كانت تسمع ومصدومة ع متألمة، مافاتش عليها كلام رقية وزبطت ان اللي صار بين نجلاء وامها سببه ابراهيم.. ماحسوش بمسافة الطريق وهما يفكروا لين وصلوا شارع سعاد هني بدت المطر تصب بهية: شكلها بتجي قوية.. فتحي درس قدم حوش اخته: ايه الباين هكي طفى السيارة وهو يقول: هي انزلوا.. رقية: بنزل الحاجات اللي شريناهم فهموها الزوز وبهية قالت: هيا مالا قبل لتقوا المطر نزلوا الزوز وفتحي سبقهم ضغط بصبعه ع الشريانة ..ع جية اخته ومرته بالاكياس في يديهم وقفوا بحداه.. شوي وانفتح الباب واللي فتحه خليفة تفاجأ بيهم في باله حيجيب رقية فالليل وخلاص عطي الطريق للنساوين يخشوا.. فتحي باستياء: معقولة يا خليفة يا راجل هكي معقولة! خليفة: عارف البير وغطاه يا فتحي هو هادا اللي طلع معاي.. هز فتحي راسه: اليوم ولا امس تعرف سعاد انت؟ خليفة وهو منزل عيونه: عندك حق والله عندك حق.. سكت شوية بعدين رد: حصل خير توا.. •وداخل الحوش.. اول ماخشوا سمعت سعاد شكشكة اكياس واصوات نسائية خافتة نجلاء حتى هي سمعت قلبها رف لكن كذبت وذانها.. وقفت امها: زعما مني؟! لما طلعت من الدار قابلوها بهية ورقية ينحوا في احذيتهم بحدا باب الحوش.. ابتسمت وقدمتلهم: مرحبتين مرحبتين.. استبشرت بهية بردة الفعل هادي اما رقية طول قدمت لاختها تسلم بالاحضان: كيف حالك اليوم ونجو كيف حالها.. سعاد: الحمد لله يا رقيوه رقية وخرت عنها ومكملة اسئلتها: خير على قبل؟! سعاد: نشكروا ربي..تلفتت ع مرت خوها وهي تقول: غريانية بهية بابتسامة سلمت عليها بالخد: كيف حالك يا سعاد لا باس على نجلا بعيد السو عليها.. سعاد: سلم مريّت خالها حالها باهي.. بعدوا عن بعض وبهية تقول: توا كيف سمعنا من رقية راهو ماكانش عندنا علم نهائي سعاد: العفو مافيكش شك انتي عارفاتك كان تندري مابتقعدي عليها لتوا.. وبابتسامة ذات معنى كملت: بنات اصول انتوا الغريانيات.. عقدت بهية حواجبها وسرعان ما انقلب وجهها لما خطرت عليها هياتم.. رقية وهي مبتسمة: هادا من خالها فتحي درس ع خاطرها فالمطر خدت سعاد من يد اختها اكياس الفاكهة والعصاير الطبيعية: سلم خالها ان شاء الله ماتفقده، وينه هو مالا حطك ومشي؟! بهية ردت: خليناه البرا مع خليفة تو شوي وتلقيهم خاشين.. تلفتت سعاد ومشت بطريقها اتجاه الكوجينة: خشوا خشوا هونا نجيوه فالدار ونجلا اللي كانت تسمع فيهم ومستاحشة خالتها عالاخر وقفت طول وطلعت من الدار شافتهم جاياتها سلمت الاول ع بهية بعدين جت لرقية.. ع خشة خوالها الزوز.. فتحي لما شاف شكلها اشفق عليها هلبا..ابتسم وهو يقوللها: شن يا نجلا تقيسي في غلاك قالت خالتك.. ضحكوا كلهم ومن ضمنهم سعاد اللي جت من الكوجينة وهي جت لخالها سلمت عليه.. فتحي: شن حالك توا بنتي هزت نجلاء راسها: الحمد لله احسن فتحي: تو المرة الجاية نجيبلك معاي راوية تهدرز عليك غير تو ماتندريش بيك هي.. نجلاء بمجاملة: اكيد عارفتها خالي.. سعاد: هي تعالوا نقعمزوا فالدار قعدتوا واقفين خشوا كلهم للدار ورقية حطت الشكاير بعدين مشت لحقت اختها للكوجينة داروا صفرة كاكاو بالحليب ومعاه حلويات، جابوهم للدار وقعمزوا عليهم.. بعتالي فتحت رقية الاكياس وبدت توري لاختها شن خدوا.. سعاد تتفرج وشادة دمعتها بالسيف..اختها الوحيدة ماتقدرش تكون معاها في تجهيزات عرسها ولا حتى عرسها نفسه،وهي اللي من اول ماصار الموضوع ياما خططت ورتبت في دماغها.. بهية: حاجات الكونفيتي كلهم جبناهم وباكوات الحلويات حتى هما سعاد بابتسامة وراها غصة: هادم البودريات ليوم القفة؟! رقية وعيونها تلمع بالدموع: ايه ليلى قالتلي خودي حاجات القفة والنجمة كله عالبودري.. سعاد: يطلع منها كنة زمزم..وشنو تاني خليفة شبح لخوه: مزال فيها تاني قصدك! بهية: هادم كلهم في يوم واحد راهو يا خليفة باهي فينا اللي شطبناه.. هو قام حواجبه ونزلهم وببصارة قال: باسطة نفوذها الغريانية ضحكوا كلهم حتى من نجلاء.. بعدين تكلمت رقية بابتسامة وهي تفتح في شنطتها: مشينا حتى لسوق المشير سعاد: شبحتوا الذهب! صحة ليكم.. بهية: لا ياوخيتي الذهب بتطلعله خديجة هي تعرف فيه اكثر سعاد بقيمة حاجب: لا تهني خديج من يومها.. شبحلها فتحي بأسف وفي خاطره يقول «ماتتعلميش يا بنت امي وبوي» تنحنحت رقية: خاتم دارهولي فتحي.. غيرت سعاد عيونها ليد اختها شافت علبة المجوهرات فيها ابتسمت: ماشاء الله الله يبارك، ربي يحفظه فتوحه ابتسموا نجلاء وخليفة بينما بهية قالت: قاللها الخاتم اللي يزهى في عوينتك اشري عليه بس رقية ابتسمت فتحي: هادي مصماصة الكرشة على قولة امي كان مادرتلها لمن بندير.. سعاد: ان شاء الله ماتفقدك وربي يجبر خاطرك وخاطر الغريانية يا رب العالمين عاجل غير آجل.. خليفة مافهمش هو وبنت اخته بينما الباقي زبطوا وبهية تغيروا ملامحها حس بيها راجلها وغير الموضوع طول: شن نجلا اجواء الشهادة معاك.. استرسلوا فالهدرزة، فتحي وخليفة اكثر دوتهم مع بنت اختهم بينما النساوين هدرزوا عن طلعة اليوم وشن بيديروا القدام استعدادًا للعرس، سعاد اتقنت التظاهر بالمكابرة ولا كأنها متأثرة بكل عكس رقية اللي طول ماهي تتكلم شادة دموعها.. قعدوا ساعة بعدها ناضوا فتحي وبهية ..رقية قالت انها حتروح مع خليفة بعدين ..طلعوا هما بعدهم ع طول خش علي كان مع ولاد الجيران يلعبوا فالكورة خش لقي خالته بحداها بضاعتها قعد يتبرد لين لزاته امه باش يدوش وبالفعل دوش ورقد طول رغم انه مستاحش خالته ولاحظ ان خاله مواطي عليه العين خاطره يعرف علاش لكن تعبه غلب عليه.. اخر شي قالت نجلاء انها تعبانة وبترقد ناضت ورقية لحقتها خلوا خليفة بروحه مع سعاد..وهي هني حست الفرصة مناسبة •خليفة: مقروضك هادا ماذقتش زيه في حياتي خاطري نعرف شن سره.. سعاد: مافيشي سر لا اسرار من كثر ماندير فيه خلاص بدي عندي زي شراب الميه..وبابتسامة كملت: انت غير انوى وتزوج واني نعلمه لمرتك لين تجيبه خير حتى مني رد عليها بعد بلع: يا ودي بعد يديك انتي يحرم المقروض.. سعاد: ومن قالهالك؟! انت جرب بعتالي احكم علاش طول تصكر فيها.. خليفة وهو ياخد في طرف تاني من المترد: كانك ع موال الماخدة خلاص ناوي نبدا نبني هي فرحت: هادا هو النهار المبارك حق! طيب فينا يا خلوفه طيب فينا.. خليفة بضحكة: فرحانة اكثر من امي! سعاد: وشن شوية عرسة خلوفه سيد الشباب!..نزلت يديها حطتهم ع رجليها: وتوا قولي سلم وخيي البال خالي ولا فيه وحيده.. خليفة: زي بعضه شن الفرق سعاد خافت ليكون حاط عينه ع وحدة فعلًا وهي عارفة خوتها كويس لو فات فيهم وخش خاطرهم مكان صعب يوخروا عنه: في فرق خلوفه وهلبا، كان ماهناك حد اني عندي ليك بنية لو دور طرابلس كلها ماك لاقي زيها الود ودي تاخدها هيا الحق.. حك خليفة شعره بشي من التوتر: والله شن بنقولك يا سعاد توا هي قاطعاته: غير خليني نكمل كلامي سلم وخيي.. البنية ذهبة ماضيعهاش من يدك لو كان تشوفها لما جت في الحجاج على اسلوب ورزانة وعقل هديكا البنت ماتنحي منها حاجة والزين هادا خليه بروحه تعلق عينك فيها كان تلقى معاش تنزلها.. وكملت تقول: حتى اميمتها ماشاء الله مراة معشرية وطيوبة يبان عليها غير جيتها في ضربة عبودة سادة.. هو كان يسمع ومش مهتم هلبا كل اللي يفكر فيه كيف يقنعها تحول البنت هادي من بالها بس لما سمع اخر كلامها تغير كل شي: بنت عم بهية مرت خوك راهي ويسكنوا هنايا في طرابلس..تقرا مع راوية فالكلية كان تبي تشبحها بروحك فالبداية مباش يتفائل هلبا بحكم عارف ان لهياتم اخت تانية عزباء بس كلام سعاد الاخير كان بمثابة الدليل الدامغ ع هويتها.. اختصرت عليه هلبا كلام وفرحت قلبه.. هو من النوعية اللي عاطي عيلته اهمية كبيرة رايهم في موضوع زي هادا يعنيله هلبا، ولعلمه بطباع اخته الصعبة كان سعيد جدًا بكلامها في حق هياتم بل يكاد يطير من الفرح..ردة فعلها هادي حمساته لردة فعل الباقيين.. ابتسم وهو يسأل فيها: عاجباتك يعني؟! سعاد: عاجبتني وبس! صدقني هي الوحيدة اللي رتها عيني تستاهلك بالحق ..ركزت ع ملامح وجهه لقتهم يضحكوا ضيقت عيونها: قلبي يقولي شايفها.. خليفة وهو شاد ابتسامته: كدا مرة لما نوصل في البناويت للجامعة وزي اللي خشت دماغي.. سعاد بحماس: وخيرك ماتتحرك وتخطبها كان نندري عليك حاطها في راسك راني امتى تلاقيت مع امها فالحج كلمتها عليها! خليفة حك لحيته: وين تكلميها اني وقتها مانعلمش عليها مخطوبة ولا حتى بالك عاطية كلام لحد فوقها ماعنديش وين نسكنها حاليًا موال طويل.. وسعاد مايفوت عليها شي: قلتلي وقتها ماكنتش تندري؟! معناها توا عرفت كان هناك حد ولالا! خلاص طاح في فخ اخته ومالقاش بد من الاعتراف الصريح.. حمحم بعدين قال: ليا فترة نكلم فيها.. هدرزة عادية يعني سعاد بابتسامة: تاريته الموضوع كابر وحني مانندروش، لا مدامها تكلم فيك ابني براحتك وكان هادا حتى بعد تناصف حويشك نمشوا نتمولك فيها عالاقل حاجة رسمية مش زي فهمتني.. خليفة ابتسم بسمة جانبية: ان شاء الله هو اني كنت ناوي ندوي مع بوي توا بعد تفض زحمة الحجاج لمعوا عيون سعاد بالدموع وصوتها تغير لما جت سيرة الحاج منصور: ايه مدابيك تستعجل وتعمر على روحك اهو ماشاء الله منصور ولد خوك اصغر منك ودار عيلة صغيويرته عالكيف.. وتجاهلت تذكر حمدي.. لاحظها خليفة ووجعاته: تبي تكلمك ع خاطر نجلا غير متحشمة ابتسمت سعاد: مش قلتهالك ولا بنت اصول وتفهم فالواجب.. قدامك بهية وين هي وين بنت عمها اكيدة ماتتخيرش عليها.. سعاد تهدرز وتمدح وهو يسمع بابتسامة حب.. •في دار نجلاء.. خشت هي وبعدها خالتها اللي صكرت الباب وراها وهي تقول: بابا مهناش نجو؟ ردت عليها بعد قعمزت عالسرير: تغدى وطلع لحق عالزبير عندهم خدمة هلبا قال.. جت رقية جنبها: زبير طالع من الصبح؟! هي قامت كتافها ونزلتهم بعدم معرفة: ماندريش عليه من اولامس لما جاني فالمصحة معادش شبحته..قامت عيونها في خالتها وكملت: اصلًا مانبيش نشوفه.. رقية: لاااا نجلا ردي بالك خوك هادا ماتغلطيش غلطة امك ودخلي هادي في هادي نجلاء وعيونها تعبوا دموع: عارفة لكن حني شن دخلنا ماجينا في شي، ياريته عالاقل قالك انتي قبل ولا خليفة كان هادا ماوصلناش لهني.. ونزلوا دموعها، ضمتها رقية ليها وهي تمسح بحنان ع ظهرها: فضفضيلي خالتك اني يا قلبي.. خيرك شن صار بالزبط خلاك هكي نجلاء وهي لافة يديها حوالين خصر رقية وراسها ع صدرها تتكلم من بين دموعها: بعد روحنا من السانية اتصل بيا ماما سمعتني لما نكلم فيه خشت تعيط وتهزب بعتالي خدت مني السماعة..قالتله كلام زي السم يا رقية واني عارفاته ابراهيم كرامته فوق حتى مني لو نقعد اخر وحدة فالدنيا هو معاش يبيني خلاص يا رقية خلاص..خسرت ابراهيم اني.. وزاد صوت بكاها رقية بتعاطف: معاش تقولي هكي والله نصدقها في كل الناس الا ابراهيم، ابراهيم سيب اكثر حاجة يتمناها ع خاطر ينولك صدقيني اني عمته ونعرفه هيما مايسيبكش يحبك راهو زي ما انتي تحبيه واحرف.. نجلاء بدموع: قبل كان في عقبة في طريقنا توا في عقبات.. رقية اني مش طفلة راهو تي امي مش طايقة عيلة خالي صبري كلهم ولا امه هو طايقتني من زمان كانت تتمناه يفوتني.. رقية اطبطب ع بنت اختها وقلبها يعصر فيها ع حالها: ماحال يدوم بالك تحسابيهم بيقعدوا طول العمر هكي ..قولي قالتها خالتي يانجو فترة من الزمان ويرجعوا زي قبل واحسن يخي عمره الدم مايولي اميه.. بعدت نجلاء عنها وهي ترشف ..شبحت لعيون خالتها: بنحضروا عرسك رورو؟! سكتت ونزلت عيونها..فاضوا دموع نجلاء تاني: ريتي! خلاص يا رقية حني قعدنا بلا حوش جد ..السانية وابراهيم وخوالي كلهم خلاص يا رقية ..عرس خالتي حبيبتي انحرمت منه ..وبخيبة ويأس كملت: مافي شي يتصلح كله كدب كله.. غطت وجهها بيديها وقعدت تبكي ..جبدتها رقية ليها ودموعها تنزل بغزارة •🌹•🌹•🌹•🌹• واقفين الزوز مقابيل بعض فم باب حوش جدهم.. ليلى بابتسامة حب: خود حبيبي قاعد سخون شورهم جابوه طازة خدي منها بشير طرف المالفي وهو يقول: حد قايللهم حني كلنا نعشقوه ولا جت ضربة حظ معاهم باش يخشوا خاطري.. ليلى بغيرة تحاول تخفيها: ع اساس مانشروش فيه بكل حني! بابا بس ياخد فيه قريب يوم بعد يوم! ضحك وهو ياكل واول مابلع قاللها: اااه نجيهالي اللي تغار تي اني الدنيا كلها كان تنحطلي بحداك مانشبح منها شي.. ليلى: وكان مش بحداي! بشير بغمزة مع ابتسامة: برضو مانشبح في شي غيرك..قرب طرف المالفي لفمها وقال: ذوقي يا قلبي.. هي دوب مانتشت ووخرت بسرعة متحشمة كلي بشير باقي الطرف كله في مرة وهو يقول: هكي سكره تعدل.. تحول وجه ليلى للون الاحمر وابتسمت وهي تمضغ فالمالفي.. •من جهة تانية داخل.. بناويت عمها الزوز كانوا يضيفوا فالقهوة مع الحلويات بعد ماقدموا الروزاطة والعبمبر قبلها بشوي بدرية تحكي عن موقف صار في الحرم حضروه هي وحليمة والباقيين يضحكوا.. حليمة: قلتلها يا بدوره هادي تصلي بالعكس ولا اني نتخايل! بدرية بضحكة: عاد عاطية بالظهر للكعبة وتركع..بعتالي جاها العسكري كلمها انخلعت ياناري قعدوا يضحكوا ومريم وراوية يمدولهم وهما مبتسمات ذهيبة وقفت ضحك شوي شوي: شورها من رهبة المكان مسكينة.. شبحتلها كلثوم: صح يقولك اللي يمشي غادي ويشوفها عالواقع مش زي اللي بعيد.. حليمة بابتسامة: شهادة لله يا بنيتي الا حق منين تشبحيها اول مرة تقول ابصر شن صارلك حاجة هكي تحسيها هني.. وحطت يدها ع صدرها سالمة ابتسمت: امي لما روحت تلقتنا بالبكي نحسابوها مستاحشة فالاخير طلعت ماتبيش تروح من غادي.. حليمة: خيره يابنيتي اللي يمشيلها مزال يخليه عقله يروح! بدرية رشفت من فنجانها بعدين قالت: ايه والله يا خالتي استاحشناها واستاحشنا رفقتكم غادي الحق.. هدى وهي مبتسمة: اللاي مابطلت دوة عليك الحاجة حليمة والحاجة حليمة حليمة: والله حتى هي غالية عليا تقول وحدة من بنياتي.. ابتسمت بدرية وكان خاطرها تسأل عن بنات حليمة خصوصًا اللي قاعدة فالحوش لكن لانه مش من الذوق فضلت السكوت مريم بعد فرقت القهوة طلعت طول اما راوية حطت المترد عالطاولة فالوسط وغطاته بالشنترو بعدين مشت جابت صفرة وولت باش تلم طواسي الروزاطة.. زمزم: قاعدين للعشي ولا.. جت بدرية بتتكلم سبقتها حليمة: قاعدين مالا شني.. بدرية: معليشي يا خالتي مرة تانية غير فات فيا وعطيت ولدي موعد قريب يجينا حليمة شبحتلها: نهار بيض اول مرة تخشي حوشي ومانطيبولكش!ورب الكعبة اللي ريتك فيها كان يندري بيكم الحاج جيتوا وروحتوا هكي لما يحرج عليا وعليكم.. زمزم: اللطف حتى مكانكم قاعدين ماسخنتوه لالا مش غير الحاج بيزعل كلنا الحق.. ذهيبة: تعشوا وروحوا يابدرية هي انحرجت هلبا ماقدرتش تردهم، تلفتت ع بنتها وهي تقول: كلمي خوك سالمة قوليله يوخرها لبعد العشي.. كلثوم: كان هادا قولوله ينزل يتعشى مع الولاد هدى شبحتلها: ابصر شن قال عنده ماظنيت يلحق.. حليمة: بينه مدام وراه مشاغل.. ناضت سالمة بعد طلعت تليفونها من الشنطة، شوي وطلعت راوية بعدها بصفرة الطواسي شافتها واقفة جنب باب المربوعة بيد شادة التليفون ع وذنها والتانية مربعتها قدام صدرها وتتكلم بصوت اقرب للهمس: امر واقع شن الله يهديك الناس كرشوا فينا! : مالا دوروا من يروح بيكم مانقعدش ماشي جاي اني! سالمة بتفنيصة: غسان هنينا عاد مايجيش رايك اهوا! : يجي غير رايكم الاعوج! صكري صكري ترا! سالمة: اسمـ.. وقبل ماتكمل كلامها كان الخط فاصل.. نزلت التليفون وهي تتأفف: شي شي ديما خلوقه في راس خشمه ..تنهدت وكملت: نشوف فيصل وخلاص وكيف تبحث ع رقمه بالحروف الابجدية جاها اتصال من غسان مرة تانية..فرحت وردت طول: الو.. :الساعة قداش نجيكم؟! سالمة: كان تقدر وماعندك شي استنانا نتصلوا بيك : ماشي تمام..صكري من عندك هي سالمة بابتسامة ريبة: استنى استنى، شن غير رايك هكي فجأة؟! : تبوا تونسوا صحابكم الليلة ماعنديش مشكلة، تو من جدك انتي بنخليكم! سالمة: شوق مادرتها قبل : قبل خوتك فاضيين اليوم لا كان مش اني مافيش غيري.. هيا خلاص الرصيد كمل.. ضحكت سالمة بخفة بعدين نزلت التليفون وصكرت بالحمرا: ربي يزيدك من الهداية ومشت مولية بطريقها للصالة.. •حطت الصفرة عالرخامة: كنت نقول ولادنا حاصلين فرواحهم نسحب كلامي قدامكم توا خولة مقعمزة لوطا عالفرشة وتشرب في قهوتها: لا ياويري حاصلين فرواحهم ونص.. مريم وهي تمسح فالرخامة: شن غير رايك ترا اتكت راوية بظهرها عالرخامة وقعدت تتكلم: هادا الدراه خوهم اللي مبكري.. ليلى: اللي هزبتيه؟! هزت راسها ومكملة تقول: وحدة منهم ناضت اتصلت بيه تبيه يخليهم للعشي شكله ماخلا ماقاللها الرزيل عديم الذوق.. ضحكوا.. وخولة قالت: نوعية خوي حمزة هادا راوية: حشاه حمزة من هالاشكال واعر صح لكن طالعة عليه وعارته.. مريم: شخصية ولد عمي مش زي هداكا استغفر الله لسانه لايد برقبته قامت ليلى حواجبه بعتالي نزلتهم: مدامكم الزوز كرهتوه خلاص.. ضحكوا بعدين تكلمت راوية: ع ذكر حمزة وينه ماريتاشي اليوم بكل لا هو لا فراولة ليلى مقعمزة بحدا خولة تشرب فالقهوة وقدامهم طبق الحلويات اللي جاباته بدرية: فراولة اتصلت بيها مبكري عالارضي ماردوش عاودت ع رقمها لقيتها حاصلة مع تغريد في واجب العطلة مريم: الارضي مش كسره ابراهيم نهارها.. عمي صبري بيطلع واحد جديد قال ليلى وهي تاكل: ننسى فيه.. خولة بعقدة حواجب: مقدمه واجب العطلة اخر مرة سمعت بيه لما كنت نقرا مانحسابهمش ردوه ليلى: ماردوشي ابلة العربي بس داراته من راسها.. مريم بابتسامة: مالا كتبوه التوأم المختلف هزت ليلى راسها: فرقت يا مريومه امس جتنا تغريد زعميته بابا بيكتبهولهم دورة ماصارش لقيناهم دايرات اوشحة وبنابل يلعبوا اليوم اشبح بعد فصلناهم.. ضحكت راوية ومريم عاودت سؤال صاحبتها: ماقلتيش خوخة حمزة وينه اليوم هي نزلت فنجان القهوة من يدها حطاته في صونيته ونزلت يدها حطتها ع اقدام رجليها المربعات بعدين رقصت حواجبها: سر.. وفي لحظة كانوا كلهم قدامها راوية: سرك في خابية يا حنة ليلى: قولي واعتبريه مات هنايا.. مريم: سر وعلينا خوخة؟ خولة ابتسمت: الصبح يهدرز ع ماما وحمدي قال بيجيب مقاول اليوم للسانية باش يحسبله تكلفة البني كلها بعتالي بيدور مهندس يصممله خريطة الحوش.. ضحكوا كلهم بفرح ومريم قالت: فراولة عندها علم؟! خولة مبتسمة: مش عارفة ماعنديش فكرة وخايفة نتصل بيها يطلع مش قايللها ليلى: لالا فكيك العلقة مع حمزة واعرة كان ماقاللهاش قبل تو يقوللها.. راوية بضحكة: مافي مايدرق خلاص.. مريم بابتسامة: جو.. نتشت خولة من البكلاوة وهي تقول: رورو مزال ماروحتش؟! مريم: في حوش عمتي سعاد قامت خولة حواجبها: امتى؟ وعلاش؟ ع اساس طالعة تاخد حاجات الكونفيتي هيا؟! ربعت راوية رجليها: ايه مشت خدتهم بعتالي خطمت ع حوش عمتي نجلا بتطلع من المستشفى اليوم.. انصدمت خولة: خيرها!! ليلى بضيق: اللي باين ان عمتي سعاد زبطت نجلا تكلم في ابراهيم وزيديها عرفت يوم اللي صار مريم: جاها انهيار عصبي مسكينة قريب راحت فيها قالت رورو.. خولة وهي مصدومة: لا حول ولا قوة الا بالله.. غيروا الموضوع بالله يا بنات ماخاطريش نقول حاجة نندم عليها راوية: لا معليشي المرة هادي قولي وقولي زييين عمتك فاتت الحد غادي وين ماشية بيه هالجبروت وين! مريم: ويري مايجيش.. راوية بانزعاج: لا يجي مريم اصلًا ماخلاها هكي غير تفادينا ليها من يومها تصرفاتها تكسر الكرايم ومش في مكانها لكن المرة هادي زودتها راهو حرام عليها ..هدت شوية وكملت: شادة روحي الايام اللي فاتت ع عيون رورو وتوا مدامها مش هنايا خليني نفش غلي.. خولة: قالت اللي في خاطري، عمتكم تو يجي يوم تاكل فيه الجيفة باش ترجع لماليها وتو ترجع لكن بعد شن الله اعلم.. ليلى: فكينا خولة تربحي حسك غميتي قلبي بالدوة هادي! شبحتلها مريم اللي صارلها نفس الشي.. سكتت خولة فترة بعدين قالت: اشربوا وعدوا بالحلو وراكم عشي راوية: هاتي اني ماريتش حتى شن جابوا.. مريم: حطينا منه فالمترد ويري! راوية بتضييقة عيون: ع اساس مركزة فيه هلبا مريومه ضحكوا الاربعة.. مدتلها ليلى الطبق: بكلاوة وعبمبر وبيتي لوز ومالفي خداته منها راوية حطاته فالوسط ورجعوا يتبادلوا في اطراف الحديث.. •🌹•🌹•🌹•🌹• الساعة 8:30 مساءًا.. في هالوقت روح جمعة للحوش بينما الزبير تحجج بطلعة مع اصحابه بعد عرف بوجود خواله عندهم ..عارف في نقاش حيصير هرب مش خوف وانما احراج •طلعت رقية من دار نجلاء اللي رقدت بعد فضفضة مطولة مع خالتها.. وهي تصكر فالباب طلع فوجهها علي: بخخخخ نطت في مكانها وحطت يدها ع صدرها بتفنيصة: خلعتني يعطيك السلامة! ضحك بعدين اتكى بثقله عالحيط وهو حاط وحدة من يديه في جيب سروال التوتة: بنسألك يا حلوة رقية شادة ابتسامتها: اسأل يا شين.. علي: خليفة خيره؟! جوه مش ولابد معاي بكريكا.. كتفت رقية يديها قدام صدرها: وكيف عرفت ولا صاحب العلة ينخصوه مرافقه علي باستغراب: حتى انتي! رقية: خالك متعفلق منك وانت عارف علاش كويس وعارف شن اللي درته.. علي بحيرة: مش عارف والله ماعارف حاجة! نزلت رقية يديها: شدير ماشي لابراهيم فالمحل؟!! تغير وجه علي: مشيت تأكدت بروحي انه واحد نذل وحقير.. رقية: علي! عقد علي حواجبه وهو يقول بحدة: ايه نذل وحقير وواحد عيل ماعنداش كلمة! فوق عملته اللي دايرها لما جد الجد وخر! رقية: ماتقولش دوة اكبر منك علي بعدين شكون قالك وخر فاش وخر؟! ..وبجدية كملت كلامها: اني ماريتش في حياتي واحد يحب زي ابراهيم حب حقيقي ونظيف.. علي بهزوة: ماك عمته وهو ولد خوك الغالي اكيد بدافعي عليه رقية: عمته هو وخالة نجلا مستحيل نرضالها تخش في حاجة ماتصلحلهاش.. شورك خلاص من توا بديت تطلع منا فيسع نسيت رقية اللي عمرها مافرقت بينكم فالمحبة صغار خوتي ولا اختي.. شبحلها لقي ملامح الخيبة بادية ع وجهها ماتحملش وهو اللي يحبها حب كبير يكاد يضاهي حبه لامه.. حضنها بعد باس راسها: اسف والله ماقصدي رورو رقية: ماعمركش سألت نفسك علاش ابراهيم سيب الطب رغم انه نسبته ادخله وهو يبيه من زمان، سيبه ع خاطر اختك الطب طريقه طويل وخاف حد يسبقه عليها شفت قداش يحبها؟! قعد علي ساكت بس ملامح المفاجأة ارتسمت ع وجهه.. رقية مكملة كلام: اني عارفاتك كبرت مش حترضى تسمع كلام زي هكي لكن اني في مكان امك عليوه ونقولهالك ابراهيم رايد نجلا جديات غير الله غالب الظروف وقفتلهم فيها..تربح خلي وخيتك في حالها مريضة ونفسيتها تاعبة ماتكلمهاش خليك عاقل نفخ وهو حاط يديه في نصه: اني مانعرفش يا رقية واصلًا رايي ماحد يدور فيه شن ماكان ..توا حتى كانه يبيها جديات امي تهون عليها تعطيها لواحد شيباني باحفاده ولا تعطيها لابراهيم.. هي تنهدت ابتسم بعدين مد يده قرص انفها: خلاص العرس قريب يا عروسة ضحكت رقية ضحكة يشوبها الاحراج: بطل يا بارد! علي: كان نندري سليمان هادا بياخدك منا راني هججتهم من زمان بالرشاد عيلة النعاس هادم.. هي قعدت تضحك وعلي يناشب فيها •جمعة: قوللها يا خليفة قوللها راني شاد روحي بالسيف.. شبحتله سعاد بصدمة: صحيت بارك الله فيك! هو رد عليها بعصبية: عقابها كذب يا سعاد كذب؟! اني كان ماسمعتش من خوك راني قلت مستحيل تي ولدك ولدك بروحه لما قعمز وحكالي انصدمت نص اللي حاكيتيهولي مهناش منه! سعاد: اني ماكذبتش وان شاء الله نترزى في صحتي كانا هكي! خليفة: وسعوا بالكم يا جماعة خلونا نعرفوا نتناقشوا! سعاد بعصبية: نتناقشوا في شن ترا؟!! قبل لطلعني عافنة قدامه ولا بعد! ضرب جمعة يديه في بعض وهو يقول: تفضل هي.. خليفة: يا سعاد جمعة ماقصداش تكذبي بالمعنى الحرفي هو يبي يقولك انك فاهمة غلط سعاد بعصبية: لا فاهمة صح وراسك انت فاهمة صح.. جمعة: سعاد العني شيطانك ومن غدوة الصبح نرفعك تبوسي رجلين بوك وتستسمحيه.. ردت وهي قايمة حاجبها بمكابرة ودموعها حاصلات في محجر عيونها: بوي لزني ومزق صفحتي ع خاطر غيري خليفة بصدمة: سعاد!! انهمروا دموعها طول لما تكلمت: خيرها سعاد! عندكم حق ماحد حاس باللي فيا كان هادا ماديروش هكي! وطبست راسها ع يدها قعدت تبكي.. جمعة يشبحلها ونظراته مخلطات بين الم ع حالها وغضب منها اما خليفة كيف جي بيتكلم خشوا رقية وعلي من باب الكوجينة كان لاف ذراعه ع رقبتها ويضحكوا ..اختفت هالضحكة لما شافوا حالة سعاد وهي اول ماحست بوجودهم قامت راسها ..قعدت ترشف وتمسح في دموعها بكف يدها.. مابتش رقية تسأل عن شي في وجود علي حدها شبحت لخوها بنظرة هو فهمها ورد عليها بهزة الراس.. تنحنح علي: مزال العشي يام هي وقفت ماشية باتجاه الغاز: لا اهو بنصب المكرونة توا.. جمعة: حني فالدار بعد توتى جيبيها غادي وطلع.. خليفة لحقه اما رقية قعدت تجهز فالصفر وتقرض فالسلاطة في صمت مطبق.. الجو المكهرب هادا ضايق علي لهذا فضل يمشي بحدا خاله وبوه •🌹•🌹•🌹•🌹• في شقة منصور.. ملتمين ع صفرة فيها عصيدة دارتها ربيعة ام ناديا والموجودين كانوا مفيدة وخديجة بالاضافة لمعاذ ومها ووصال.. خديجة: بري للو نادي ماما تتعشى وتعالي بحداي نوكلك دارت زي ماقالتلها حناها وشوي ورجعت مع ناديا قعمزوا عالصفرة.. خديجة: رقدت ناديا وهي تقعمز: ايه واخيرًا مفيدة لمرت خوها: كولي قبل لتسطل.. قيس توكل فيه ربيعة بينما لتين جت جنب خديجة اللي قالت ببصارة: المعفن هداكا لخواله كلا هادي من يوم يومها حصتنا حني ولا للو ضحكوا ولتين جت فالوسط بين جداتها الزوز.. ربيعة باست قيس ع خده: مالا شنو يا خديجة هادا وليدي اللي ماحصلته معاذ اللي مقعمز ع صفرة وحدة مع اخته وبنت عمه: قيس يشبهلي يما معناها لينا حتى هو.. ضحكوا تاني بعدين رجعوا ياكلوا ويهدرزوا.. ربيعة: منصور مايبيش مالا ناديا بعد بلعت: بيتعشى في حوش جدي.. مفيدة: اتصلت مريومه قالت جايينهم صحاب جدي وحناي من الحج خديجة بقيمة حاجب: وانت خيرك مامشيتي مع عزوزتك غادي.. مفيدة: جنابي ينخصوا فيا يام ماعندي علاش ماشية غير بنرهنهم ناديا ابتسمت ابتسامة صفرة بعد حطت يدها ع رجل مفيدة: احسن مادرتي جيتي هني كان هادا كسدنا.. سكتت خديجة ورجعت تغمس في لقمة العصيدة بالرب والسمن بعدين قامت يدها وقربتها بالعصيدة لفم لتين وهالنقاش كانت في عيون تراقب فيه.. مها بهمس: خاطري نعرف علاش ماما وعمتي ذهيبة ديما متعاركات معاذ: يومها مرومه قالت لويري مايحبوش بعضهم بكل وحتى الولاد ينادوا فيهم فريال وسعاد زي متاعين بابا الحارة هدوكا النساوين الزوز.. مها قدمت راسها شوية القدام: فوفو اضايقت ولا؟! وصال بلعت لقمتها وبصوت خافت ردت: بكل شبحتيها؟! زي ماقال معاذ هما مايحبوش بعض بكل ..وبابتسامة كملت: لكن عمتي ذهيبة كويسة هلبا ريتي كيف تحب مفيدة وحتى فراولة ع خاطر حمزة وحمدي.. مها: تو شن دخل هادا في هادا! وصال: يا غبية حمدي يحب مفيدة وحمزة يحب فراولة هادا علاش هي تحبهم! معاذ وهو ياكل: بنحرش بوي عالدوة اللي تقولوا فيها.. الزوز فنصوا وشبحوله بخوف خديجة: كولوا فيسع ماتلبزوش.. رجعوا ياكلوا والزوز متخزرطات.. بينما النساوين يهدرزوا وجوهم حلو فيما عدا ان ربيعة بالها مش معاها ..الشي اللي لاحظاته بنتها •🌹•🌹•🌹•🌹• في مربوعة حوش الحاج منصور كان هو مع ولاده واحفاده يتعشوا وداخل الكناين كلهم جوا حتى وسيلة اللي بعتتلها حليمة مع خولة واصرت عليها تجي.. •داخل.. الصالة محطوطات فيها صفر العشي والنساوين متوزعات عليهم حليمة لما خشت بهية بروحها قبل ساعات استغربت وباعتبارها ماقدرتش تسأل كنتها ع انفراد توجهت لحفيداتها: خولة تلفتت المقصودة وجتها طول: نعم حناي تبي حاجة اشرتلها حليمة اطبس وهي دارت زي ماقالتلها: عمتك وين لتوا؟! شبحتلها خولة وسكتت.. حليمة: عارفتكم تندروا تكلمي هيا.. هي مررت عيونها عالصالة لقتهم لاهيين: في حوش عمتي سعاد دب الخوف في قلب حليمة: خيرها ماشية غادي شن في! ع جية فريال بصفرة اخيرة حطتها قدام حناها وبدت تعزم ع بدرية ونساوين عمامها اللي بحداها باش يجوا.. حليمة: تو بعتالي ساهل بري ع حالك.. مشت خولة وهي تقول بابتسامة: صحة بادلتها بدرية الابتسامة: سلمك حبيبتي.. مشت ولحقت عليها فريال: خوخة اسمعي خولة تلفتتلها وهي تمشي: نعم فراولة.. فريال بهمس: خاطري نشوف حمزة وقفت خولة مكانها وفنصت: ردي بالك! فريال: عارفاته هني هو قال جي بيتعشى نبيك تعسيلي امتى تزبطيه بيطلع للحمام نادي عليا بس بس.. كرتها خولة من يدها مشت بيها لممر الكوجينة: تربحي مش وقت هبالك جدي حلف يمين عارفة شن معناها انتي! فريال بضيق: عارفة يا خولة عارفة لكن مستاحشاته معاش شبحته من بعد هداكا اليوم الا مريرة من بعيد لما روحت ناديا.. خولة: تو مش يكلم فيك بالتليفون قريب كل دقيقة! فريال باصرار: نبي نشوفه.. هي كانت عارفة رغبة فريال في انهم يتلاقوا هي نفسها رغبة خوها وعارفة جدها كيف حاط العين عليهم، خافت تسايرها يصير شي لا تُحمد عقباه.. اختارت تردعها وبقوة: جدي وانتي تعرفيه كان تبيه يزوجك لغير حمزة ديري مافي راسك وخليه يهبل ويحط في رقبته رقبة بعتالي سكتت وهي مضايقة ع الاخر..وخولة تشبحلها تستنى فيها شن بترد نفخت فريال: خلاص باه.. هي ضحكت بخفة: تعالي ناكلوا تعالي.. : فراولة وين؟! خولة بغمزة: هونا اللاك تنشد عليك بري فيسع.. دوب ما ابتسمت بعدين رجعت بطريقها للصالة هي وبنت عمها كانوا فيها الكل بالاضافة لليلى ع نفس الصفرة مع زمزم.. وسيلة بابتسامة: اهي جاتك يا ذهيبة ابتسمت ذهيبة وشافتلها: تعالي بحداي هني..يوريني حميزه كان مارديتش بالي من ماكلتك تحشمت فريال وجت قعمزت جنبها عالصفرة بينما خولة مشت لصفرة تانية.. هدى بابتسامة سألت: مرت ولدك خالتي؟! ردت عليها ذهيبة وهي مبتسمة: عن قريب.. توا خطيبته خدت فريال الكاشيك وقعدت تاكل.. تحت عيون سالمة اللي تحسرت هلبا لما عرفت هالمعلومة.. عدم وجود دبلة في يد فريال خلاها تفكر فيها لواحد من خوتها ع قد ماعجبتها.. مش هي بس حتى خولة بس زي ماقلت فريال عندها اسلوب مميز يجذب اي حد ليها.. بدرية: ربي يفرحكم بيهم ردوا عليها حليمة وكناينها بتفاوت: آمين..ان شاء الله •في دار التقعميز باقي الحفيدات مقعمزات يتعشوا.. مريم: شن جوها جارة القمر نور وهي تحط فالسلاطة مع الرز: مكسدة بعد بدت العطلة.. راوية: مامشوش هني ولا هني؟! نور شبحتلها وهزت راسها: لالا قاعدين مشوا اولامس باتوا في حوش خوالها يومين واليوم روحوا هونا كلمتني ومشيتلها.. هما يهدرزوا وعليا طايحة فالصونية تاكل وخلاص.. مريم: عليا بالشوية عليك تو تغصي ردت بانزعاج وفمها معبي: بالله مريم ماتبديش في دسكة فريال والباقي ماصدقت ارتحت منهم! راوية بتقزز: معاش تتكلمي وانتي تاكلي يا نهاري.. ضحكوا كلهم وهي ولا على بالها.. •🌹•🌹•🌹•🌹• بعد كملوا ماكلة حلفت ربيعة تقيم الماعين وحلفت مفيدة تغسلهم.. خشت ناديا لابسة توتة كاملة شتوية لونها فوشي عليها روب حوش للركبة رصاصي ياقته مزخرفة بنفس لون التوتة..وشعرها مقيوم كعكة تلفت عليها مفيدة: فش النفاخ شوية ولا.. شافت ناديا حوالين روحها: حتى اني حسيت.. قامت راسها وجت بتساعدها في الماعين: عمتي سعاد اتصلت بيا امس مفيدة: غير خلي عليك ساهلات..وكملت تقول: تحمدتلك عالسلامة؟ هزت ناديا راسها: ايه كلمت منصور حتى هو.. قالت نجلا مريضة مفيدة بعقدة حواجب: خيرها؟!! ناديا: مش عارفة بالزبط لكن ع اثر اللي صار.. مفيدة: قلتي لامي؟ هزت ناديا راسها: قالت بتمشي اطق فيهم غدوة الصبح هي تنهدت: ربي يصلح الحال وخلاص.. رجعت تغسل وناديا واقفة جنبها سارحة شبحتلها وقالت: حسيتك زي اللي تخممي؟ كان عالبنية تو سيوركم تسموها فاللي يقعدوا بالشهر بلا اسم.. ناديا: مش ع هكي اني ..وبحيرة كملت: شاغلتني امي ليها يومين مهبية ومش معانا بكل تحسيها تبي تروح مفيدة وهي تكفي بالصونية ع قطعة قماش مفرشة فوق الرخامة: تلقيها تفكر في غزلان كيف مدايرة بروحها مع الحوش وماكلة بوك.. ناديا: لو في مدرسة نقولوا لكن توا عطلة يا مفيدة وامي معلمتنا كل شي ماطقش الوحدة فينا عشر سنين الا وهي تقدر تقيم بدل الحوش عشرة.. شن نسيتي في جيابي ع قيس باتت معاي لين صكرت الاربعين يخي وقتها دعاء كانت اصغر من غزلان توا ورادة بالها منها ومن قرايتها وبوي والحوش.. هزت راسها بعدم اقتناع: اني نعرفها امي يا مفيدة الغشاش واضح على وجهها.. قدمتلها مفيدة وهي تنشف في يديها: باهي اسأليها خير ماتقعدي تخممي هكي! ناديا: تحسابيني ماسألتهاش سألتها لكن مصرة اللي هناك ادرقه.. مفيدة: امتى بتروح هي شبحتلها ناديا: ياغدوة ياللي بعده طبطبت مفيدة ع ذراع مرت خوها وهي تقول: ماتحطيش في بالك توا والهي بالعسولة حناي تقول النكد للنافس مش باهي.. تنهدت ناديا تنهيدة مكتومة مع ابتسامة.. شوي وسمعوا صوت الصغار يعيطوا والباين جدًا انهم يلعبوا ع البيبي الجديدة مفيدة: خل نمشي نسقد هادو ونجي نكمل الكوجينة ردي بالك تمسيها.. ناديا: نرد الماعين الجافة بس وهي طالعة شرين تليفونها برقم راجلها ابتسمت وفتحت الخط طول: اهلا حبيبي، ايه كيف نضنا توا من عليها وانتم؟.. باهي صحة وعافية.. تحولت ابتسامتها لابتسامة سعادة يشوبها الخجل وضحكت بدلال: لا مزال شوية نجبد الكوجينة ونكلمك بعتالي.. ضحكت تاني: مانقدرش نخليها مافي حد.. بتستنى هكي فالصقع! لا حمدي كان هادا روح واني نلحقك راهو الدنيا تلج برا وندوة المطر قاعدة.. ابتسمت تاني وهي تسمع فيه بعدين قالت: باهي عالاقل خش لمربوعتنا لعند نكمل وننزلك.. حاضر ..في امان الله اول ماصكرت الخط ورجعت الهاتف لجيب ماليتها قعدت تنادي: مهااا.. هي انزلوا حبيبتي •🌹•🌹•🌹•🌹• ومن حوش ولد الخو لحوش العمة كان في مكالمة بين نجلاء وهياتم او ان صح القول مرت خالها مستقبًلا! : حبيبتي اني عارفة كويس بشن تحسي توا نبيك بس تردي بالك ع صحتك وقرايتك والباقي يجي بروحه صدقيني.. هزت نجلاء راسها مجاملة واغتصبت ابتسامة كون خالها واقف بحداها: فهمت عليك.. :ماشي يا حلوة مانعطلش عليك ولا باس مرة تانية.. نجلاء: ماتشوفي باس..تنحنحت وهي تقول: اهوا خليفة معاك تصنعت الخجل: تمام.. مدت نجلاء التليفون لخالها وهو خداه حطه ع وذنه: الو هياتم : خليفة رد بالك عليها صوتها يا روحي مش عاجبني بكل هو فرح باهتمامها..شبح لنجلاء بابتسامة: ماتوصينيش عليها.. : عارفاتك قلبك حنون يا خليفة هو مسح ع لحيته: هياتم نكلمك وقت تاني ضحكت بخفة وخجل: قلت حاجة مفروض ماتناقلش ولا؟ اسفة صكر خلاص.. طول فصلت الخط وخدت قلبه معاها كان يتمنى ساعتها يعاودلها طول ويخطي خطوة تانية باتجاهها غير عيونه لنجلاء لقاها تشوفله مد يده شفشف شعرها: من لما سمعت بيك فالمصحة نقرزت هلبا باش تكلمك وتقولك لا باس بروحها.. ضحكت وهي ادف في يدين خالها: بطل باه.. حول خليفة وهو يضحك ونجلاء سألاته: بتخطبها خليفة؟! خليفة: لالا هي فنصت عيونها.. وهو رجع يشفشف فشعرها: مالا شن بندير يا نص دماغ اه.. واسئلة زي هادي معاش تسأليها نزلت نجلاء عيونها متخزرطة وخليفة قال: بنروحوا توا تبي حاجة شريني عليا طول.. جبدها من شعرها هي قعدت تضحك: باهي باهي مشي باتجاه الباب: تصبحي على خير.. ردت بتنهيدة: وانت من اهله سلم ع حنينه.. وجدي تلفتلها وهو شاد الباب وابتسم: يوصل.. بعدين صكر الضي ورد الباب..مخلي نجلاء قاعدة متفاجأة ونوعًا ما مصدومة «خليفة وبنت عم بهية مرت خالي! وين لقوا بعض! لكن خالي شكله يحبها حقا عيونها يضحكوا زي عيون ابراهيم وين نتلاقوا في السانية» تلاشت بسمتها ودق قلبها دقة موجعة.. خشت بالشوي تحت بطانيتها وفي خاطرها تقول « اول شي عرس رقية وتوا حتى خليفة اللي ياما تخيلت عرسه وكيف بنفرح فيه بيخطب وحني مش معاه.. هيما حبيبي زعما حتى انت تكمل حياتك من غيري زعما تفرح في بعدي ولا ترجع للقراية وللكلية وتتعرف ع بنت تانية تنسيك في نجلا ومايجي منها.. اااه ياماما غير علاش درتي فينا هكي بس علاش بعدتيني عليهم علاش» ضمت نفسها ودموعها يتاقطروا لين بللوا مخدتها.. •بجنب باب الحوش.. سعاد شادة رقية ع جنب وتوشوشلها: اسمعيني جاي رقية اني مبكري كلمت خوك ع هياتم وهو ميال ليها تحسيه.. هي كانت متكية عالحيط وقفت ع حيلها: هياتم هياتم! بنت عم بهية؟!! سعاد بضجر: مالا شكون! تي مش جبدتلك عليها يومها وقتلك خاشة دماغي خيرك العفو ناسية ولا شن! رقية: لا مش ناسية لكن تفاجأت بيك ماقلتيش قبل بتفتحي معاه الموضوع.. حمحمت بعدين ردت تقول: قبل كنت مخممة في موال تاني كلا توا مدامني طلعت البرا مانعرفش شن يصير دقيت الحديد وهو حامي عالاقل نضمنه يكون فكر فيها البنية ماتنهانش بصراحة لامة الباهي كله.. رقية بتضييقة عيون: باهي كيف ميال ليها مافهمتش! سعاد حاطة يدها فوق فمها وتوشوش: خوك طلع يكلم فيها توسعوا عيون رقية وسعاد مكملة كلام: قاعدين هدرزة وتعارف بس.. رقية بصدمة: امتى صار! سعاد: هادي فاتتني ماسألتاش عليها ..المهم توا سلم وخيتي نبيك تزيدي تكلميه عليها مرة مرة خل يسقد روحه ويخطبها فيسع.. رقية: يا ودي مش عارفة هو مدامه قلتي يكلم فيها سوى تكلمت ولا قعدت حياخدها في كل الاحوال سعاد: رقية هنيني الله يربحك! هي هزت راسها: باهي حاضر تو نشبح.. ابتسمت سعاد ع جيته هو في يده مفتاح السيارة يفرك بيه فوذنه من الخلف: هاه شني خلاص واتية رقية: ايه الشكاير طلعهم عليوه واني كنت نلبس في كندرتي.. تلفتت لسعاد وجتها تسلم عليها: هي تصبحي ع خير سوسو.. سعاد: تلاقي الخير سلمك هدرازة ان شاء الله مانفقدكم.. رقية ابتسمت: مش بجميلنا.. بالسلامة سعاد تمشي وراهم: بالسليمة طلعوا الزوز للجنان لقوا جمعة واقف كان يدير في تليفون.. رقية بصوت مسموع: تصبح على خير جمعة هو تلفتلهم وقام يده: تصبحوا على خير، عاودوها.. خليفة: ان شاء الله هي ماتوصي شي.. جمعة: سلامتك في امان الله صكر علي باب السيارة الخلفي ع وصلة خالته وخاله الاخير شبحله بنظرة جانبية وسرعان ماركب السيارة بدون مايكلمه بينما رقية قدمتله وهي تقول: زي ماوصيتك حبيبي باهي؟ ابتسملها علي بعدين جي لبابها فتحه ركبت وصكره طول ..توجه بعدها لباب الكونشيلو باش يفتحهولهم.. •🌹•🌹•🌹•🌹• طلع من المربوعة ع جية اخته مدتله صفرة فيها صونية مسلفرة خداه منها بعدين لبس في رجليه وانضم لبوه اللي مروح للحوش.. منصور: بوي بلقاسم شبحله وهو كمل كلام يقول: مش ناوي تخش في موضوع عمتي سعاد.. عالاقل تصلح بينها وبين جدي.. حط بلقاسم يديه ورا ظهره وهو يمشي ويمرر فعيونه عالسانية: مافيهاش كيف بكل، جدك قالهالي صريحة يوم اللي صار وكان معاي عمك طاهر مايبيش من يدويله فالموضوع.. منصور: وعرس رقية؟! شن بتقول الناس لما ماتحضرش! تنهد بلقاسم: والله ماني عارف يا منصور، جاني عمك حسين يوم الاحد حكالي في نفس القصة ..سعاد المرة هادي عمتها بكل ماخلتلناش مانرقعوا وراها.. منصور باستياء: ربي يهدي ويصلح الحال بلقاسم: آمين.. •في صالة حوش الحاج منصور.. يشربوا فالشاهي باللوز ويهدرزوا ..فاتت نص ساعة شرين تليفون بدرية فالاول ماحستش بيه لين نبهتها بنتها قاماته طول وردت: هاه غسان.. : وينكم من بكري نستنى اهو يتصلوا اهو يبعتوا رسالة عجبكم الجو شوره! بدرية بابتسامة وهي تمرر فعيونها عالموجودات فالصالة: ايه ماشاء الله : باهي شن نجيكم لاني خلاص تاعب اليوم كله مانزلتش من السيارة.. بدرية مستغربة شوي في لباقته الزايدة في نفس الوقت فرحت بيها.. وزي مايقولوا كان صاحبك عسل ماتلحساش كله: ايه باهي تعالى يما : خلاص اني مش بعيد عشر دقايق ربع ساعة بالكتير ونشرين عليكم تطلعوا طول.. بدرية وهي تمسح ع اطراف شاربتها اللي واصلة حجرها: باهي تمام مع السلامة.. نزلت التليفون من ع وذنها وصكرت بالحمرة حليمة: العفو خيره مستعجل! بدرية: هوا هداكا يا خالتي طالع من الصبح ماروحش بكل قلق.. زمزم: لا مدامه قلق شدي روحك بس سالمة: تو التانيين عادي كلا خوي هادا ماني عارفة لمني طالع ديما متكنطي وخلوقه في شيشة.. كلثوم بضحكة: عندنا كلنا العرض.. حليمة: بسليمتهم ربي يحفظهم كلهم.. ومابين هدرزة وضحك لين وصل غسان للسانية وقاللهم يطلعوله وقفوا التلاتة طول.. وبعد السلام الحار طلعوا ووسيلة تسقد فيهم وين جوا بيطلعوا قعدوا بدرية ووسيلة يهدرزوا عالباب طلعت في مراة تقرب لوسيلة ع معرفة ببدرية.. طبعًا الهدرزة ماتحلى الا فالسقيفة خصوصًا لو اللي جايبك مستعجل😁 في نفس الوقت مريم وراوية واقفات في بداية الممر اللي يرفع للكوجينة.. مريم: عندي من التمانية ونص راوية: تو شن صار كان خلونا اسبوعين زي قبل.. ع حظنا داروه اسبوع وناقص يخي! ضحكت مريم وهي مربعة يديها ومتكية براسها عالحيط: تعرفي جعانة نوووم.. راوية: احرف منك قامت مريم عيونها لقت سالمة جاية جيهتهم.. لاحظتها راوية تشبح لجهة بعينها تلقائيًا تلفتت.. هي قربتلهم بابتسامة: معليشي بنسألكم مريم ابتسمتلها: تفضلي.. سالمة: وينها اللي مبكري نعتت لخوي السانية؟ راوية بضحكة: مش وحدة زوز ابلة سالمة.. اهما قدامك انقاموا حواجبها تعجبًا: انتوا!!.. نزلتهم وهي تقول بضحكة: صغيرونات ابتسموا الزوز بينما هي كملت: بالله اللي عطاته ع راسه من فيكم.. حطت مريم يدها ع فمها ادرق في ضحكتها اما راوية وجهها ولا احمر وردت: احممم اني.. قعدت سالمة تضحك وهي زادت تحشمت وقفت ضحك شوي شوي بعدين قالت: احسن مادرتي.. تلفتت ع مريم شدت يدها وهي تقول بابتسامة: معليشي امسحيها فوجهي هو هكي حتى معانا حني مايعرفش يوازي دوته.. مريم مبتسمة: مش مهم ابلة سالمة والله مادوري هدى: سالمة هيا هي شبحتلها: اهو جاية.. رجعت بعيونها للبنات وباستعجال قالت: بارك الله فيك.. شبحت لراوية قبل لتمشي وكملت: انتي خديتي حقك منه بروحك.. شبحت راوية لمريم لقتها تهز من الضحك.. راوية: الله يحشمه زي ماحشمني! ع جية فريال من الكوجينة لقتهم بالحالة هادي سألت باستغراب: خيركم؟! نزلت مريم يدها وصوتها مزال باينة فيه الضحكة: حقا انتي فاتك، تعالي تعالي.. مشت بيها والاخيرة تقول: شوره الاكشن مايصيرش الا لما ناخد وجهي! لحقتهم راوية: خلاص وانتم درتوها حديث الساعة! مريم تعالي! وسرعت خطواتها باش تجاريهم.. •برا.. اول ماركبوا وتحرك غسان بالسيارة بدت امه تسأل فيه الاسئلة المعتادة شن تعشيت وخوتك وين ومشيت لحوش عمك اولا..بوك شن كلي وخدي الدواء ولالا.. هو يرد وفي رغبة صغيرة في نفسه انهم يدووا عن عيلة الحاج منصور لكن هو تجاهلها تمامًا.. •🌹•🌹•🌹•🌹• الساعة 11:00 ليلًا.. روحوا الكناين لحياشهم وماقعد حد غير الاحفاد باعتبار اليوم هو يوم الخميس.. لكن.. طلعوا الزوز من دار جدهم يجروا في اذيال الخيبة، الباقي كانوا يستنوا لين تكلمت وحدة منهم: قال لا.. نزار: واضحة من الاول اصلًا شبحتله عليا وملامح وجهها متمعضة: حمزة روح من مبكري.. خولة: حتى كان شرف الدين ضحك بدون صوت: خايف نسقولهم رانديڤو بعد يرقد.. خنايسي جدي خبطه كمال ع ظهره وهمس: اوزن كلامك يا حمار مش قاعد بروحك انت.. نور بخيبة: معناها ماصارش نروحوا؟ راوية: تو نعوضوها الخميس الجاي نونا ماتزعليش.. منذر: يا ودي مدام مشوله لوز وسكر وقال لا ..ماظنيت مزال يصير منها قبل نص اتنين مريم: علاش التشائم توا.. سراج: فوتيه داير روحه دكتور مكتئب خبطه منذر عنفقة خولة: هادي تستاهلها لسانك طويل مولي تخوف.. هو شبحلها بالجنب طارق: اني طالع بكرامتي قبل لجدي يلزني شرف الدين: راجي جاي معاك.. لاقاهم خليفة فم الصالة كان يدوش: ماصارش مالا اشرله طارق بمعنى اي.. هما مشوا وخليفة خش للصالة وبصوت خافت قال: يا والله ايام مباركة ع راس حمزة.. •وفي دار رقية المصكرة حليمة كانت تعارك: تمرض وتخش السبيتار وانتي وخوك تمشوا وتجوا ماكلفتوش ع خاطركم تقولوا لهالعزوز اللي اسمها امكم! رقية: خفت نقولك تقعدي مشغولة يام وبوي عارفتيه معاش يبي يسمع سيرة سعاد بكل ..والحمد لله نجلا مافيها شي غير زعل بس.. كلثوم: حاجة السو ماتندسش يا اللاي حليمة شبحتلها: حتى كان مفروض تجيني تقولي عاللي صار مش ادير رايها من راسها ولا التاني نداده صغارهم بيخشوا المدارس ليه اليوم فالاسبوع مدرقها عاااادي! كلثوم: عندك حق في هادي اللاي لكن توا خلاص اللي صار صار ونجلا حالها باهي الحمد لله.. حليمة بنبرة غاضبة: ربي يهديكم..ربي يهديكم ماعندي مانقول ورقية تشبح لامها بضيق.. شوي وانفتح عليهم باب الدار كانت وراه نور قدمت لحناها باست راسها وخدها: تصبحي ع خير حنينه.. بعدين جت لامها دارت نفس الشي وكلثوم مبتسمة: خيره جدك قال لا نونا هي شبحتلها وردت: امممم حتى مشوله مريم وراوية ماباش.. ومشت لرقية باست خدها عقدت حليمة حواجبها باستغراب: قصدك عالبيات هني؟!! رقية وهي شادة يد نور ع كتفها: ع خاطر حمزة وفريال يام.. حليمة زاد استغرابها: خيرهم حمزة وفريال؟! شبحوا التلاتة لبعض بعدين تكلمت رقية: قصدك ماتعرفيش يما؟ •تهز بخوها وهو ينقنق: ننى ننى جاك النوم.. امك قمرة وبوك نجوم ..وانت تميره في عرجون.. وحويته في بحرها تعوم..وقفت غني وقالت: عاملها عروفي ولا خيرك ورجعت تهز بيه بين يديها.. تكلمت فريال اللي راقدة ع بطنها فالتركينة: بالك جعان تراسنا ليلى: صح ليه ساعتين مارضعش.. وقفت بيه بالشوي وحطاته عالبطانية مفرشة فوق المندار.. لفاته بيها كويس وعطاته اللهاية سكت وهي ناضت بالرضاعة وحكة الحليب للكوجينة.. حست فريال بصوت تليفونها يهز عالمندار قامت راسها شافت ضي طالع منه فوسط ظلام الدار: ردي الباب وراك للوش.. دارت ليلى اللي قالاته بنت عمها ..خدات فريال التليفون وهي تبتسم بعدين انقلبت ع ظهرها وثنت رجليها فوق: الو حبيبي.. : استاحشتك طلعت منها تنهيدة مكتومة هو قال: خيره حبي شكون مزعلهولي.. ضحكت فريال: ماحد، كان خاطري نشوفك اليوم بس : هانت حبي نقرا فاتحتك وان شاء الله تباتي في داري ماحد يقدر يفتح فمه.. في عز ما الجو مصقع هي سخنت من الخجل ومعاش ردت عليه : ماصدقتي سكتي انتي! ..ضحك بخفة وكمل: هدرزي عليا فراولة شن درتي اليوم بعد صكرتي مني بدت تحرك في صبعها الابهام ع ظوافر يدها وهي تتكلم: جتني خولة قالت في ناس متعشيين في حوش جدي وحناي تبي ماما تجي..عارف هونا معادش مشت بعد.. هو قص عليها: خلاص فهمنا.. ابتسمت فريال: تعرف اني نحبك ونموت فيك.. : نعرف وهادا اللي ضاربلي دماغي ماهو.. وبهيام قاللها: اخخخ منك انتي مشقيتني هي تضحك وقلبها نبضاته تقول في ماراثون لين فجأة عرفة بدي يبكي تاني : مني بحداك؟! قعمزت ع حيلها وردت: عروفي يبكي جعان وقعدت تزحف ع ركابها تجاهه.. : حطيله الطابة خل نعرف نقول كلمتين النم! فريال وهي ترد فاللهاية لفم ولد عمها: بالشوية غزالي بيبي هادا شن يعرف.. : بنقولك فريال بابتسامة وهي اداعب في خد عرفة: نسمع فيك حمزاوي : غدوة جاي مقاول يشبح الوطا.. فر قلب فريال وبانت الفرحة في نبرة صوتها: احلف! : كاذب عليك قبل! ضحكت وهي تقول: تي مش هكي افهم عليا قصدي رد فعل طبيعي.. : ماتقعدش في خاطر حبي..ورب عيونك الا جديات ابتسمت فريال ابتسامة فرح وحماس وحب.. حب كبييير •في الكوجينة.. ليلى تستنى في الميه تسخن بينما الصغيرات ومعاذ مقعمزين ع سطول الحلو اللي قاعدات من الحج.. مش هما بس حتى زهير وايوب.. ابراهيم واقف بعيد ماعنداش نية في شي.. مشغول بنجلاء ليه قرابة الـ10 ايام مش لاقي وسيلة يتواصل معاها بيها ورقية وخليفة اخفوا عنه قصة المستشفى كلها ناهيك عن مشيتهم اليوم ع خشة طارق وشرف الدين بعدهم بشوية كمال اللي قال: افرجتوا عنهم هادم.. نحساب معاش بنشبحوهم وصال: اصلًا حنينه قالت طلعوهم خلاص معاش في حد بيجي.. شرف الدين باستفزاز: احيي تاكلوا فالفضلة يا ولاااد.. زهير في يده طرف كعك ملون: ماتاكلاش انت بس حني احرار.. طارق: كلا اني بناكل ..قرب شاف ايوب مطبس ع سطل فيه اخر ماتبقى من كعك القرفة: هادا مدايراته الغالية جيب جاي يا مهف.. دفه ايوب بيده: برا روح بدوا يتشاحوا عالسطل والصغار يضحكوا عاجبهم الجو.. كمال وشرف الدين عيونهم ع ابراهيم بالكذب ماكأناش معاهم نزلت ليلى الميه وبدت تصب فيها فالرضاعة بعد قاست حرارتها ع ظهر يدها: جدي قاعد نايض حي عليكم فجأة وقفوا وكمال قال: اني بنوض نروح قبل ليجيني بالزقية.. شبحله زهير: مالا ماصارش شرف الدين بعد بلع: خطاب شديد اللهجة ع قولة مذيع الجزيرة.. شهقت تغريد: امتى خديته الطرف! تلفتوله كلهم وطارق قال: اهو المهف الحقاني.. انفتح باب الكوجينة خش منه بشير لابس سروال توتة غليظ وعليه توب غليظ حتى هوا شاف ليلى واقفة ابتسم من قلبه وقال: خيركم كلكم فالكوجينة جيداء: اشبح هني تو تعرف.. شبحلها بشير وهو قايم حواجبه بينما ليلى ماقدرتش تشد ضحكتها حالها حال الباقي.. طارق مد يده طقها في يد اخته: منورة.. طاحوا عيونه ع طرف مالفي في يدها: من جايبه هادا حشا النعمة؟!! مها: طيب خيره.. ليلى تخض فالشيشة: ع شن يحكي؟! معاذ: المالفي.. بشير ابتسم وقدملهم: بالعكس بونسيب حاجة مش للضي بكل.. طلعت ليلى وهي تضحك بدون صوت وقلبها يدق حبًا.. بينما طارق مزال متمسك بقراره: مش عارف كيف تاكلوا فيه بس! مش مفهوم تحسه ورق بكلاوة جاف حاطين معاه مهلبية.. انفلقوا الولاد بالضحك وكمال قال: تي حي عليكم باهي!.. قام يديه فوق بحركة الاستسلام وكمل: اني معاش قاعد اكثر من هكي.. بشير زبط ان جده مشي في قراره ع اكمل وجه وخاب امله يحصل سهرة مع خطيبته الليلة.. وفعلًا، روحوا واحد ورا التاني ماقعد غير ليلى باش تعاون امها في خوها كذلك فريال اللي سهرت ليلها كله مع حمزة عالتليفون..مرة يهدرزوا ويضحكوا ومرات يحب ويتغزل فيها وهي في كلتا الحالتين هايمة.. •🌹•🌹•🌹•🌹• شرق طرابلس واحد ضواحيها.. تاجوراء شارع من شوارعها وين مايسكنوا عيلة الحاج رجب.. لما روحوا من السانية توجهوا لحوش عمهم كملوا باقي الليلة بعدين روحوا.. هدى خداها راجلها ومشوا لحوشهم ..عشت سالمة غسان اللي ماتعشاش عند عيلة عمهم بعدين مشت لدار التقعميز لقت بوها داير المخدة ورا راسه يحضر فالليبية ويتناقش مع امها عالي يحضروا فيه.. بدرية لما شافتها قالت: يعطيك الصحة سالمة: سلمك يام.. كنت نكلم في صابرين تسلم عليكم ردوا الزوز بتتالي: عليك وعليها السلام.. وبدرية كملت: حالها باهي سالمة: باهي الحمد لله بالك غدوة تجي.. بدرية ابتسمت: مرحبتين بيها بنيتي رجب نقص فالتلفزيون وهو يقول: كيف حالهم عيت الحاج منصور بدرية تلفتتله: الحمدلله عيت خالتي حليمة وهي تنشد عليك رجب: مرة تانية ان شاء الله نمشولهم جميع اني وياك النية في تهدريزة تزهي الخاطر مع الحاج.. بدرية: ايه والله تعرف يا رجب منين ريت خالتي حليمة حسيت صدري انشرح سبحان الله.. هز رجب راسه: رفقة بيت الله مالا شنو.. غير عيونه لبنته: كان ديريلنا حويجة نقصروا بيها الليل النوم طاير.. هي وقفت طول: حاضر هي كيف بتطلع لاقاها غسان خاش: بالشوي.. سالمة فاتت من جنبه: بتأخرني على بوي هادا مامازالك ضحك غسان: غير احسبيني فاللي بديريه.. بدرية شافتله: مش تعشيت توا؟! رد عليها وهو واقف فالباب: قاعد في مكان ماتخافيش يا غالية.. هزت بدرية راسها وهي تبتسم بعدين ناضت: خل نعاونها مالا عطاها غسان الطريق ورجع شاف لبوه لقاه معلي الصوت تاني ومنسجم في اعادة البرنامج.. ابتسم عالجنب وقال: اخيرًا قناة حقانية تعرض في كل السلبيات مش خايفين ولا مدورين حد.. شبحله رجب ورد: قول ان شاء الله تقعد هكي مايزحفوش عليها غسان: قصدك تولي زي الجماهيرية؟! فرق السمي عن الوطا شوف هادي شريط sms ومواضيع وطرح بطريقة جديدة وذكية حتى الاستديوهات والاضاءة حاجة صح تنافس الام بي سي والجزيرة.. واهم حاجة يحكوا فاللي صاير ومايمسلقوش للحاشية وسيدهم رجب بتحذير: غسان رد بالك تقولها دوة زي هادي حتى لخوتك! رد بنبرة تهكمية: اطمن يا بوي مزال نبي عمري.. رجب: هاني وقضتك.. رجع عيونه للتلفزيون وكمل: تعالى تفرج غسان: نشبح شن صار معاهم بس.. لف وتوجه بطريقه للكوجينة لكن وقف غصب عنه وين سمع اخته تقول: تي عرفتهالك من هيا بالزبط منهم اللي ربت سنسن بدرية تسخن فالخبزة عالكسكاس: تو يسمعك تقولي سنسن طيرله منك سالمة بضحكة: خل طيرله عادي.. انصدمت لما عرفتها بدرية صابها الفضول: من هيا ترا.. ردت سالمة: هديكا الشقرة مانعرفش اسمها لكن.. بدرية بتضييقة عيون: بنت كنتهم الصغيرة ولا؟! سالمة: ايه يام حتى الشكل تجيب منها بكل.. ضحكت بدرية وحطت يدها فوق فمها تعجبًا: هديكا الصغيرة! سالمة ضحكت معاها: ايه يام هديكا الصغيرة ريتي.. قامت بدرية حواجبها ونزلتهم وهي تضحك: ماينخافش عليها هادي هو هني قرر يخش: مازلتوا.. سالمة لما شبحاته زرتها الضحكة: اهو قريب برا قعمز بحدا بوي شبحلها شوية بعدين لف وطلع.. رجعت سالمة توتي فالصفرة: ريتي شبحاته وليدك بدرية: راك خديتي رقمها البنية شورنا بنستحقوها هلبا.. قعدت سالمة تضحك من جدها.. •🌹•🌹•🌹•🌹• نزيدوا نشرقوا اكثر لين نوصلوا حوش الصادق العقوري.. كانت مرته تهدرز مع صاحبتها عالارضي في الصالون فوق : ياحليلها وخلاص عملة دارتها في روحها.. مريم: نا قديش لي نريد نحكيها مغير ماني عارفة بيش نبدا وايش نقول : ايه عندك حق قلبيها في دماغك باهي ولما ترسي على بر اتصلي بيها بالك ع يديك انتي تنحل قبل هالعرس.. مريم: على قولتك يا وريده ..عرس وبتغيب فيه خيتها بيش اتم الناس تبل وتعجن فالسيرة.. : غير ماينكدوش عليها يا روحي وعلى عمتي حليمة كلا الباقي خليهم يقيموا على كتوفهم لين يعيوا.. مريم: ماهي هذي اللي بتصير يبقن مفيت ينشدن يعقدن الواحد.. : زي ماقتلك مرومه زيدي فكري فيها وتوكلي على الله مريم: ان شاء الله خير.. هي مانطولش عليك وريده ساع نتكالموا بكرا : تصبحي على خير.. سلمي ع بنياتك.. مريم: يوصل.. تصبحي وتربحي صكرت مريم الخط بعدين ناضت من الصالون وهي تنادي: زينات.. ثواني وكانت الخدامة واقفة مقابيلها: نعم ياستي.. مريم: اقفلي الضوايا الزايدات بعدها ابرمي عالدفايات كان في شي وحدة عاقبة طفيها هي هزت راسها: حاضر يا ستي.. مشت مريم باتجاه دارها: تصبحي على خير ردت عليها زينات وهي كملت طريقها لين وصلت باب الدار فتحاته وخشت لقت راجلها مقعمز في سريرهم يقرا فالجريدة.. صكرت الباب وهي تقول بابتسامة: قيسك ماقريتهاش بدري فالصبح نزل الصادق الجريدة ورد: مالحقتش.. حطها ع جنب وحول نظاراته: لنقني تالف بكل نريد نرقد بس.. مريم خشت جنبه السرير: بعيد السو عنك.. ارقد تريح بكرا جمعة ابتسم الصادق وهو يشوفلها بعدين نزل تحت الورغان وغمض عيونه.. •🌹•🌹•🌹•🌹• بالرجوع للسانية ولحوش فتحي.. بهية ماقدرتش ترقد ماغير تخمم في قصد حماتها من كلام بكري، خايفة تفسره ويطلع صح وتكون هياتم فعلًا وصلت لمبتغاها.. •🌹•🌹•🌹•🌹• تاني يوم الجمعة.. في هاليوم ماصار شي غير ان المقاول اللي اتفق معاه حمزة جي والكل كان حاضر اولهم فريال اللي تتفرج من روشن حوش الطاهر هي وباقي بنات عمها وحاسة بسعادة لا مثيل لها وهي تعبي في عيونها بشوفته ..وشوفة مستقبلهم ينبنى قدامها.. رغم انه حوش الطاهر بعيد شوي عن حوش الامين اللي بيبني جنبه حمزة لكن يفي بالغرض.. عمامه وجده مقعمزين فالفيراندا ويشبحوا من بعيد.. صبري مرتاح وفرحان من جهة بنته حتقعد تحت عينه ومن جهة تانية حصلت راجل مقوم يتهنى عليها معاها اما الامين ماننكروش انه فرحان لفرحة ولده.. الحاج منصور ماتكلمش ابدًا ولا كأن في شي يصير متجاهل تجاهل تام مال الطاهر ع فتحي: بوي بوي ماخلاش منه حاجة.. ضحك فتحي بدون مايلاحظه الحاج منصور: سبحان الله.. حسين وبلقاسم عاجبهم اللي داره حمزة كيف يحاول يثبت لجده خاجة معينة.. زي ماعاجب الولاد واكثرهم حمدي.. بعد حديث دام قريب ساعة خدي فيهم حمزة كل التفاصيل من المقاول قرر يشرع فالبدء اول الاسبوع اللي بيجي💞 •🌹•🌹•🌹•🌹• طل صبح اليوم اللي بعده يوم السبت.. وعلى تمام الساعة 11:40 طلع الزبير هو وصاحبه من مبنى الادارة في كلية الاقتصاد.. طقوا يديهم في بعض والاخير قال: مش مصدق يا راجل الامور كلها تمام خلاص يتم الصيف هادا ..طربق بصوابعه وكمل: بعدها اهلا بلندن ضحك الزبير بعدين تكلم: تعرف راسي يسطر طالع من غير فطور.. : المرة هادي عزومة ببلاش خلاص اخر جية بإذن الله.. تلفت ع المبنى وكمل: اخيرًا يا راجل افتكينا من همها الكلية اللي تقصر العمر اهيا! الزبير بابتسامة وهو يمرر فعيونه عالباحة: نبي زوز مقلوبة وحكة بيبسي ..شبح لساعة يده بعدين كمل: قريب الطناش هوا هداكا عالغدي : ربع ساعة عشيري وتاخد احلى مقلوبة.. ضحك الزبير تاني فرحته بالايفاد مش زي صاحبه كانت ناقصة.. اولامس الخميس يوم لمتهم المعتاد في حوش جده واول مرة يغيب الزبير عن هاللمة كتم تنهيدة بعدين مشي قعمز ع مقعد لقاه فاضي ..اتكا بمرافقه ع ركابيه وشبك يديه في بعض.. سرح وماحسش الا بخيال شخص وقف عليه قام راسه لقاها ياسمين.. لما شبحلها تلبكت ودوب ما ابتسمت تقول: تبي قهوة؟! هو نزل عيونه ليديها لقاها شادة زوز اكواب كابتشينو ورقية..مادة واحد منهم ليه ضم شفايفه وابتسم عالجنب بعدين خداه منها: شكرًا.. هي قعمزت بحداه عالكرسي وخلت بينهم مسافة: العفو •🌹•🌹•🌹•🌹• تقعميزة تانية لكن مش في جامعة ناصر.. هياتم وصاحباتها في مكانهم المعتادة الجردينة بين الهندسة والعلوم واخدات سندوتشات طعمية وعصاير يعدوا بيهم فالهدرزة.. وحدة منهم قالت: قولي من اتصل بيا امس يوتا شبحتلها هياتم: مني ترا.. هي رقصت حواجبها: اسعد رجعت هياتم تاكل بدون ماتعلق.. نطقت وحدة تانية: حتى اني كلمني وبصراحة الولد بيهبل يا هياتم قالي نبي سبب يخليها تفوتني هكي : ماسمعتوشي امس تي قريب بكالي عالتليفون غير اني مش فاضية بيه.. هياتم: معاش خاطري مش بالسيف : مش غير هو بس يا يوتا حتى هداكا اللي كنتي تكلمي فيه متاع الفنون اخر اسبوع قبل العطلة جاني اني وحسنة يسأل عليك.. : حرام عليك.. شربت هياتم من طاسة العصير بعدين ردت: صكرته الباب هادا اني..وباستحقار كملت: النوعيات هادي قداش تفلفص في رقبتي يا بنات وحدة معاش تبيك علاش شادها في جرتها اعتقها يا اخي! : حتى انتي عليك حق علقتيهم بحبال ودك بعدين فوتيهم ماتجيش.. هياتم: المهم كان كلم وحدة منكم فالجديد ماتردوش عليه ..حطوه في قائمة الرفض من توا ريحوني وريحوا روسكم من الزنين.. •قدام واجهة العلوم.. درست سيارة نزل منها صاحبها لابس سروال بيج وقميص شتوي ارضيته رمادية ومخطط بالقهوي عليه جاكة جلد قهوية وبوت بنفس اللون.. مرر عيونه من ورا النظارات العسلية عالطلبة وزحمتهم بعدين خش شوية وهو متقي شاشة تليفونه عن الشمس باش يشبح.. اتصل برقم ورد عليه: وينك يا فيصل : فالكيميا تعالى غادي.. نفخ غسان بقلة صبر بعدين صكر الخط.. حط التليفون في جيبه، شبح يمين ويسار وقص القطران الاول بعده التاني كمل مشي لين ركب درجات القسم هني عاود اتصل بخوه مرة تانية: تي وينك بالزبط انت! : فوق نازلك خليك مكانك بس.. غسان عاقد حواجبه: قدام باب الهم اني.. : اوكي.. بعد نهي المكالمة حط يده اليسار في جيب سرواله الامامي ..مرة ينفخ مرة يهز رجله .. وهو واقف شده صوت ضحك انثوي.. ضحك فيه بحة حلوة من غير مايحس بروحه قعد يدور ع مصدر الصوت لين لقاه بس للأسف صاحبته كانت مدرقتها جهامة راجل واقف قدامها عقد حواجبه لما استاقض لروحه «بعقلك غسان انت.. قليلة الرباية هديكا شن تبي في خليقتها.. سكت وكأنه يسمع لرد داخله: مجرد فضول صح.. ضحك ع روحه: تي بالك تطلع واخدة بردة وتمت خلاص وانت ترفس منك ليك» حاجة دفعاته كم خطوة جيهتهم باش يسمع بوضوح «كانه صوتها تو نعرفه» •عبيدة ويديه في جيوب البالطو: الضحك يا ابلة مش هني.. راوية: طلعت من غير قصد انت تنكت شن نديرلك عبيدة قام حاجبه: وانتي خيرك تضحكي ع كل شي؟ ردت عليه بانزعاج: عبيدة ممكن تبطل دراه كبد! هو قعد ضحك.. وهي قالتله: الضحك مش هني يا باش مهندس! •توسعوا عيون غسان: هي قليلة الرباية هي.. شوي وجت وحدة بتفوت عبيدة كان معترض طريقها.. كلماته هو تبعد ووقف جنب راوية هني بانت راوية ع غسان لما شافها شي فيه تحرك ليها وابتسم باعجاب واضح.. بعد ثواني كان يتفرج فيهم ع راوية من غير ماتلاحظه ولا يلاحظه عبيدة.. غير عيونه للي جنبها حسه مألوف نوعًا ما ولان غسان زي ماقلت سلفًا ذكي ولماح طول تفكر المرة الوحيدة القصيرة اللي شاف عبيدة فيها.. الصوت وشقرا زي ماسمع اخته تقول وتوا وجود شخص من نفس هديكا السانية معاها، انقطع عنده الشك باليقين خلاص.. وخر ع وراه خطوتين ولف بعتالي ركب درجات القسم.. خدي تركينة وقف فيها بحيث يشوف راوية وهي ماتقدرش تشوفه.. كان مبتسم بدون مايحس وهو يتفرج عليها: حلوة قليلة الرباية..
