سانية جدي🌹

الحلقة الثامنة

#سانية_جدي🌹
#الفصل_الأول «سانيتنا»
#الحلقة_الثامنة
__________________________
مريم بحيرة: والله مافهمت منك حاجة!
عبيدة حك راسه بعدها قال: تو نفهمك.. شبحلها وحمحم: اني نبي راوية
مريم بصدمة: كيف تبيها؟ قصدي يعني اشرحلي من امتى وعلاش ماتكلمتش!
عبيدة ابتسم: ليا هلبا.. من هي كانت في اولى اعدادي
مريم زادت انصدمت: من وقتها؟!! ماحد لاحظ عليك اني بروحي ماحسيتش بشي ولا حتى هي
عبيدة ضحك: غير اسمعي بالشوي.. اني ماقلت لحد لاني نبي هكي معاهد نفسي مانفتحش معاها الموضوع الا لما تتخرج من المدرسة
مريم: صدمتني صراحة!
عبيدة: عندي سؤال.. هي في في حياتها حد؟!
قالها وحس بحاجة تحرق في صدره..
مريم طول ردت: لا ابدًا.. راوية مش مدورة حد ولا عاجبها حد من الاساس
عبيدة الابتسامة من الشق للشق: بشرك بالخير..
مريم: غير فهمني شن هوا طلبك.. دوختني معاك عبيدة
هو مبتسم: نبيك تكوني عيني ووذني
مريم عقدت حواجبها: قصدك ندس عليها!
عبيدة ضحك: وااااك ..صدق خليفة لما سماكم لوز وسكر.. من جماعة عهد الاصدقاء انتو
مريم ضحكت: اسمعني جاي .. يا تفهمني يا نمشي ونخليك دور من يساعدك بعدها
عبيدة ع اساس مصدوم: انتي مريم يطلع منك الكلام هادا! ماتوقعتهاش بكل!
مريم تضحك: شيطت ريقي حرام عليك
هو قال: زي ماقلت.. نبي اي موضوع يجيها ..ولا واحد يفكر يكلمها ويبعت اخت ما اخت والجو هادا انتي تنهي واطفشيهم..وعاد اللي يجوك انتي يبوك تخشي واسطة تقولي بالحرف يا مريم البنت لولد عمها
مريم: حاضر لكن لامتى
عبيدة تنهد: لين نكمل وراقي التخرج ونتم موضوع الخدمة .. اقل حسبة لبعد رمضان باش نستف اموري
مريم ابتسمت: نقولك حاجة
هو رد: قولي
مريم مازال مبتسمة: فرحت هلبا.. اول مرة نركز انك ماشي مع راوية طق رشق
عبيدة ضحك بعدين قال: لكن امها لبزتها.. معقولة شهر كامل بعيدة!
مريم: مرجوعها هني
عبيدة يده ع الدولاب ومبتسم
مريم: حقاااا .. قال جدي بتبدا تبني مع بشير حتى انت
عبيدة: محسوبك مايحبش يضيع وقت.. عبيدة بلحاج راني
قبل ماترد مريم شرين تليفونه هو.. اول ماقامه لقاه رقية شبح لبنت عمه وقال: رقية
مريم مشت باستعجال: حي عليا شورني عطلت..
عبيدة يلحق فيها: زي مافهمتك مريم عارفك قدها
ردت عليه وهي طالعة من الباب: اطمن عبيدة اني حنسعالك بكل جهدي لين يصير اللي تبيه
عبيدة ابتسم براحة.. بعدين رجع للكوجينة يكمل ماكلته وهو يلعب ببطم التيشرت💞
•🌹•🌹•🌹•🌹•
:تبدوا بعد العيد نونا ولا
نور تساوي فشعرها: اي ان شاء الله
رقية: للوش نزلي هالتليفون وتعالي جاي..
نور: مش مخلياته يستاحشها بكل
رقية ضحكت: وين يستاحشها يا حسرة وهما ليل ونهار وجوههم في وجوه بعض
ليلى التفتتلهم وهي تفنص: تو علاش هي.. سمعكم هكي باهي
سمعوا صوت نساوين يسلموا.. و ع كلمة ليلى خشت خولة وهي تفك فالوشاح: بالله عليك اسكتي درهتي كبدي.. تي وين ليلى متاع زمان حتى شعرها بلا مشط قدامه
ليلى فصلت الخط وبدت تفك فالكندرة من رجلها ناوية تفنها بيها😂
نور: توحشت اختي بعد الخطبة راه
خولة: اني نعرف البنات يترققوا مش يتغولوا
ليلى قايمة السكربينة وتهدد: بيجي الصندلي ع راس وحدة فيكم راه!
فجأة رقية ضحكت.. التلاتة شبحولها
هي نزلت التليفون اللي كان في يدها: باعتلي عمري ماريتها مساوية حتى بعد خطبتها
نور وخولة قعدوا يضحكوا.. وليلى زعلت: من جابره عليا كان مايبينيش
رقية: ماتصدقيش حتى انتي بشوره يحبك يا حنة وكان مايحبك راهو مش يسابق فالوقت باش يجيبك عنده
خولة: ولادنا حبهم حب رجالة للوشة
خشوا مريم ونجلاء للدار.. سلمت نجلاء ع خالتها وبناويت خوالها
ومريم مشت للزيانة بتبدا فروحها
رقية: نويره حبيبتي بري شوفي الضيافة
نور طلعت: حاضر
نجلاء: اني بنمشي نسلم
وطلعت وراها
ليلى لبست السكربينة: نحس فروحي متحشمة من عمتي زمزم تقول اول مرة بنشوفها
خولة حولت العباية والوشاح: طيح سعدك.. هادي زمزومة راهو
رقية ابتسمت: عادي ماهو مش كيف توا تغير الوضع معاش في ليلى متاع زمان ادير اي شي عادي ..بتبدا بريستيج قدام ام الغالي
ليلى جت وقفت جنب مريم ع المراية تساوي في شعرها ومبتسمة: نحس فيه زي الحلم
خولة بابتسامة: وخيتي محلاكم.. بعدين التفتت ع مريم اللي ساكتة وادير في شعرها بالخلاص: مريومة خيرك ساكتة
مريم وقفت اللي دير فيه وشافتلهم التلاتة: نقوللكم لكن ماتطلعش الدوة
رقية شكت: حاجة ليها علاقة باللي كان يبيك فيه عبيدة؟!
مريم هزت راسها
والبنات التانيات في حالة استغراب..
مريم ابتسمت: عمكم عبيدة انضم لحمزة حتى هو وطاح في طربيقة الحب.. يخي ليه زمان طايح
التلاتة تفاجئوا..ورقية قالت: ماتقوليش يبيك انتي!
مريم: تي شن اني راني زي اخته!
خولة: قالوها قبلك حمزة وبشير وشوفينا وين اليوم
مريم: لالا اني وعبيدة من سابع المستحيلات خيركم!
ليلى: باهي مني؟!
رقية بتساؤل: وحدة من بنات عمامك حتى هو؟!
مريم ردت بابتسامة وقامت حواجبها: راوية
خولة حطت يدها ع فمها بمفاجأة: ريتي عبيدة! ..حقا هو يومها قال بناخدلك نقال.. كيف مازبطناشي!
ليلى ضحكت: صار ويري بتولي سلفتي
خولة شادة بيدها ذقنها: ويري والبلغارية هادا كله وحني زي المساطيل مافهمناش
رقية ابتسمت: يا فرحة جدكم كان يسمع
مريم بتحذير: رد بالكم تقولوها لحد هو حرص عليا حتى راوية بروحها مانقوللهاش لين يرتب وضعه
خولة: وضع شني اللي بيرتبه.. شهادة وعنده غير يمشي للمطار بس طول يتلقوه ويبدا يخدم.. والحمد لله عنده خدمة تانية وحتى شقته مع بشير
ليلى: هو ادرى مرات
مريم مبتسمة: تعرفوا من لما هي فالاعدادي يحبها
رقية: يا رويحتي يا بيدو الله يجعلها من قسمه
التلاتة بصوت واحد: آمين
بعدين خولة قالت بضحكة: شوره بعد ناديا معاش بنجيبوا كناين من برا السانية
ليلى: لا تحمستي خولة
خولة قعدت تعد ع صوابعها: حمدي خدي مفيدة وانتي خطبك السي بشير وحمزة عاشق في فريال وابراهيم حتى الطب سيبه لعيون نجلاء واخر شي عبيدة طلع دايب في دباديب راوية.. وراجي الفصعونات الصغار يكبروا شوية تو يجيبوا الباقي
رقية بغمزة: وعلاش لين يكبروا الصغار بسلامة الصبايا اللي قدامي واولهم انتي
خولة: لالالا.. مستحيل ناخد ولد عمي تي كلهم زي خوتي مانقدرش نشوفهم غير هكي
مريم عرفت الكلام بيتوجهلها هي توا شوي سبقتهم: اما اني والله من اكبر واحد فيهم لاصغر واحد اعز واقربلي حتى من خوتي صغار امي وبوي
ليلى: تو نشوفوكم
خولة: ماعندكم ماتشوفوا.. خيرني قاعدة فالسانية بعد نتزوج! باش يلقوني حمزة ولا كمال قريبة نهار يبوا حاجة يجبدوني حتى من نومي
كلهم ضحكوا
رقية: يا ودي مش حنصدق لين نشوفكم بعيني متسقدات عرايس برا منها غير هكي كل شي وارد
مريم: باهي يا رورو بعون الله الزمان طويل وعينك حية وتمشي في رتل السيارات متاع حفلتنا
خولة ببصارة: وباش تصدقي تو نطلعوا من طرابلس كلها مش غير السانية
ليلى: لا مش هكي عاااد
رقية: بعيد وبر! اصلًا اماليكم مستحيل يعطوكم لبرا طرابلس ريحوا جمالكم من توا حسكم رعشتوني
الزوز قعدوا يضحكوا..
وليلى قالت: ابصر من فتح الاذاعة..
رقية: هي اطلعوا ارقصوا يا حلوات بالك تعجبوا نساوين عمامكم ولا عمتكم ويخطفوكم لولادهم
خولة بتذمر: واااك يا رقية
طلعت وعمتها وليلى بنت عمها يضحكوا عليها.. بينما مريم قعدت توتي فروحها باستعجال..
ورقية قعمزت جنب ليلى تهدرز عليها
•في الصالة..
محطوطة المبخرة ع الطاولة وتفوح منها روايح العود.. كناين الحاج منصور مقعمزات ومعاهم عزوزتهم يهدرزوا في جو لطيف وكله فرح وسعادة .. كيف عاد خطوبة بنيتهم لوليدهم ع قول هديكا الشتاوة
وموجودين خوال ليلى حتى هما..
كلثوم خشت للكوجينة والتليفون ع وذنها.. لابسة قفطان انيق وبسيط ومدايرة شعرها بطريقة حلوة: سلمك حبيبة والله مافيك شك انتي ..بالسلامة سلمي ع وخياتك واميمتك ..تصبحي على خير
ونزلت النقال وهي تضغط ع الحمرا..
نور تساوي في كيسان العصير: شكون ماما؟
كلثوم: هادي بهية مرت عمك متصلة تباركلي
نور: ناقصة راوية
كلثوم: معليشي ان شاء الله ربي يديم الافراح وتحضر.. مررت عيونها ع الصفر وقالت: شني واتي كل شي خلاص؟!
نور: ايه ماما ..تو كانت معاي فريال زادت واستهم بري تريحي انتي
كلثوم: خلاص ابدي مدي
نور: باهي
طلعت امها..ومشت هي طلعت باكوات العصير من التلاجة وهي تخض فيهم
ع خشة خولة وهي تقول: نمد معاك نونا
نور التفتت: هاك صبي انتي العصير نخاف نبزعه اني
خولة خدت منها الباكوات: تو نديرلك لقطة فيهم.. نخلط نوعين
نور: بالك نلبزوا
خولة تصب في عصير الكمثرى فالطواسي: ماتخافيش كل شي يخص الكوجينة اني اكثر وحدة تعرفه
نور قالت وهي تتفرج ع بنت عمها كيف تصب في عصير العنب بالجنب في كل طاسة باش يبدا لونين: صحاب الولاد املحينك شكلهم
خولة تصكر في الباكو بالمغطة وهي تتفحص فالطواسي زي بعض ولا: اسكتي بالله.. قريب نزوجهم باش يفكوا من عليا وهما كل يوم والتاني جاييني نقعد غير نوكل ونشرب اللي يشبحني يقول هادم عقاب واليا..
وقامت صفرة العصير طلعت بيها
ونور ضحكت ورفعت مترد الشكلاطة ورا خولة..
خشوا للصالة وقعدوا يقدموا.. وفي منظومة صغيرة نوعًا ما والعة والبنيات الصغيرات يرقصوا عليها
بعد كملوا حطوا الصفرة والمترد ع الطاولة.. خولة قعمزت جنب فريال ونور طلعت متوجهة لدارهم..
خولة: ريتي مها ريتي.. من دايرلها الروج هالسفتولة
فريال كانت حترشف من العصير لكن وخرت الطاسة باش ترد ع خولة: اني.. قالتلك كبرت ومعاش صغيرة
خولة: ماينقدروا هادم قعدوا يخوفوا
فريال ضحكت بعدين رشفت من العصير وقالت: مفيدة قاعدة مريضة؟
خولة: ايه مسكينة حتى عمتي خديجة ماجتش ع خاطرها.. اللي تاكله ترجعه مايقعد في بطنها شي ..وحمدي ياناري يطفطف عليها وخلاص
فريال بهمس وهي تضحك بالشوية: مصائب قوم عند قوم فوائد.. تخايليها جت وعلقت بينها هي وامك قدام امالي كلثوم مرت عمي.. فضيييحة
خولة ضحكت وضربت فريال بخفة ع يدها: يعطيهالك
فريال: شدي الطاسة نمشي نغير هالاغنية اللي ترقد هادي
خولة خدت منها..وهي ناضت للمنظومة وقفت عليها وقعدت تقلب لين حطت ع اغنية شعبية ناشطة..
قعدت ترقص عليها وهي تضحك والصغيرات انسجموا معاها
عليا كانت مقعمزة جنب بنت خالة ليلى وفجأة ناضت لخولة قعمزت جنبها وهي تقول بتوشويش: اسمعي
خولة شافتلها باستغراب: خيرك
عليا بدون ماتبين انها تهمس: نوضي بعدي للكوجينة
ووقفت مشت لباب الصالة.. خولة قعدت شوي ولحقتها
اول ماخشت عليها الكوجينة قالت: هاه شن في
عليا: سمعت وحدة من خوال البنات تكلم فاللي جنبها ع فريال لما ناضت ترقص.. حسب اللي فهمته تبي تخطبها لولدها ولا خوها مش عارفة.. المهم انها اكيد حتكلم عمتي كلثوم وبعدها امي
خولة: عادي فريال تو ترفض ماتنسيش انها تكمل في قرايتها قاعدة
عليا حطت يدها في نصها: والله! وكان يطلع ولد ماينردش خصوصًا اختي الهبلة ماعندها حد ومش حاسة بحمزة
خولة بلعت ريقها: كان توصل في حمزة حي علينا وعليها
عليا: واني علاش منادياتك لازم نتصرفوا قبل ماتكلم عمتي كلثوم
خولة بتفكير: وكيف باهي!
قطع عليهم كلامهم خشة مريم..لابسة ومكملة: شن يا بنات نطلعوا ليلى اظن خلاص
خولة كرتها من يدها: تعالي اسمعي
مريم بتعجب: خيركم!
عليا حكتلها اللي سمعاته..
سكتت مريم مشوار بعدين قالت: قعمزوا حداها انتوا الزوز وديروا روحكم تهدرزوا بعدين اجبدوا سيرة فريال ..وهي بروحها بعد تفهم الدوة ع البنت اللي عاجبتها حتسألكم.. ابتسمت وكملت وهي تعاود في كلمة عبيدة بكري: وقتها انتو بتقوللها المختصر المفيد البنت لولد عمها
خولة ابتسمت باعجاب: معقول كلامك
عليا: حتى اني عجبني
مريم: امالا بروا هي واني نمشي نقول لليلى تطلع
مشوا بنات عمها للصالة وهما عازمات ع تنفيذ كلامها.. اما هي فرجعت للدار لقت فيها نور ورقية مع ليلى المتوترة
مريم بابتسامة: هيا يا عروسة انطلقي
ليلى رقفت وهي تساوي في قفطانها وشعرها
رقية: وحق ربي حلوة غير هيا زمزومة ع قولتكم تستنى
ليلى خدت نفس وابتسمت ..طلعت من الدار وطلعوا وراها اختها وبنت عمها وعمتها..
اول ماخشت عليهم حليمة وزمزم زغرطوا..
ليلى قلبها قعد يدق ومشت قعدت تسلم ع الموجودين كلهم.. لما وصلت في زمزم باست يدها وراسها .. وبعد كملت سلام نادتها تقعمز جنبها
•من جهة تانية..
مش عارفة كيف حصلوا عليا وخولة مكان جنب مرت خال بنات عمهم الطاهر.. ومن حسن حظهم مقابلهم بالزبط فريال واقفة قدام عمتها سعاد وتهدرز
خولة: ريتي فريال محلاها طالعة اليوم.. عسل يا وخيتي والله كان يشوفها حمزة لما يروح بيها اليوم
عليا ضحكت ضحكة عالية: مالا شن يا خوخة ..حتى هو حمزة ماشاء الله عليه طالعين ع بعض
خولة: ايه حبيبتي ايه ربي يجمعهم بالحلال
عليا تسرق فالنظرات للمراة: آمين
المقصودة يسمعوها الدوة سمعت ومن حركات يديهم وتأشيرهم ع فريال زبطت ان الكلام ع البنت اللي حطت عليها العين لكن قررت تتأكد: معليشي يا حلوات بنسألكم
خولة هي اللي كانت جنبها ع طول..شبحتلها وابتسمت: تفضلي
: الحق اني سمعت كلامكم توا من غير قصد ..نبي نعرف ع من بالزبط تحكوا مجرد فضول بس
خولة: لا عادي شن فيها.. شافت قدامها واشرت ع فريال: هادي هيا.. بنت عمي وشبه خاطبينها لخوي .. هما يبوا بعض قداش ليهم وتو عاطيين فيها كلمة
المراة وجهها تغير وابتسمت مجاملة: ربي يهنيهم
خولة بابتسامة: تسلمي يا رب
والتفتوا الزوز ..
خولة بعد ارتاحت من هالموضوع ناضت ترقص وترقص معاها في ليلى بنت عمها.. اما عليا كانت مبتسمة براحة تامة تقول حمزة يبيها هي مش اختها😁
شرين تليفون زمزم طلعت ردت وولت للصالة.. طبست ع كلثوم ابصر شن قالت ووخرت..
نور: شن يوشوشوا زعما؟
مريم قامت كتافها ونزلتهم: اشبح
خشت رقية للصالة ونادت ع مها: مهوشة
هي جت ووقفت قدام عمتها: نعم
رقية: بري اطلعي لعلي شكله يبي حاجة
مها: هو قالك ناديهالي؟!
رقية: اي بسرعة
مشت مها زي ماقالولها..
•فريال: نجلاء مش باينة
ليلى: فرصتها مدام عمتي لاهية
وقفت عليهم زمزم: نوضي فريال جيبي عباية لكنينتي خطيبها بيلبسها
خولة وفريال ضحكوا والاخيرة ناضت: من عيوني الزوز يا عسل باللوز
ومشت..
ليلى ارتبكت: مش ع اساس انتي تلبسيني شن صار؟!
زمزم: غير نوضي يا بنتي ماتخلينيش نوريك وجه العزوزة الحرفة
قالت خولة: بالله وين تلقي زيها بطلعك لولدها بيدها وهي طاربة وتضحك..
وقفت ليلى وهي تساوي فالقفطان.. الكل زبط ان بشير حيلبسها بروحه..
ع تولايت فريال من الدار بعباية ووشاح في يدها.. مدتهم لليلى
اللي قعدت تلبس وهي في قمة التوتر.. والفرحة💕
•🌹•🌹•🌹•🌹•
برا حوش الطاهر.. في تركينة جاية جنبه.. كلها زرع اخضر يفتح النفس زي باقي السانية..ووراهم بمسافة باهية شجر الصنوبر اللي متقي ع نهاية السور من هديكا الجهة
ابراهيم واقف ع نجلاء ويهدرزوا..
هي كانت خايفة ومرتبكة اول مرة توقف معاه في مكان مستخطي وبالذات في ليل..لكن ثقتها العمياء فيه وحبها ليه نسوها هلبا حدود
ابراهيم: خليك ديما هكي كثرة لبز ع وجهك لا نوجتي مانبيكش تلفتي انتباه في مجمع نساوين فكينا
نجلاء مبتسمة ببلاهة: وعلاش بنديره المكياج.. الحمدلله بشرتي صافية وخدودي حمر ورموشي مظلات كله من ربي بلا سمكرة
ابراهيم مسح ع وجهه بتوتر: باهي خلاص اسكتي
نجلاء ارتبكت وسكتت
وهو شبحلها من جديد.. بالرغم ان الضي مش قوي في هديكا الجهة لكن الشيطان زينها في عيونها.. بانت عليه اجمل من قبل
حست نجلاء بنظراتها اللي بياكلوها.. بلعت ريقها وفي خاطرها ندمت هلبا انها جت من الاساس..
ابراهيم قام يدها ولمس خدها..هي هني رسمي انتفضت ودفاته بقوة من عليها واطرافها ترجف..
مشت تجري بلا ماتشوف وراها وقلبها يدق من الخوف .. تخيلت لو صار شي تاني هي وين حتمشي من عذاب الضمير تجاه اهلها وربها؟!
كملت طريقها لين وصلت باب حوش خالها ..اول ماحطت رجلها فيه حست كأنه بر الامان.. بعد تنفست الصعداء عاهدت نفسها انها مستحيل تكرر عملتها وتمشيله في مكان فاضي وبعيد.. مهما كان ابراهيم يحبها ويخاف عليها يقعد راجل..
في هالاثناء هو كان يعيش فاقصى مشاعر الندم.. استغفر هلبا ..لكن وقت يتفكر شكلها يتوتر ويخاف، معقولة تتغير نظرتها ليه بعد هالموقف؟!
قال بنرفزة: حمار وبهيم!!
ومشي وهو متكنطي لابعد حد..
«هادي نصيحة لكل بنت تفكر تتجاوز حدود باسم الحب.. نجلاء ابراهيم يحبها ويخاف عليها فعلًا وهي كذلك انقذت نفسها واول ماصحتلها فرصة مشت وخلاته..لكن فاللي مايكونش حظها زي حظ نجلاء..»
•جنب نفس الحوش.. حوش الطاهر واقفين تحت واحد من الرواشن علي ومها
مها متعفلقة: فهمت راهو فهمت كانك تبي وصال راجيتها روحت وخلاص!
علي حط صبعه السبابة ع فمه: اصصص يعطيك قطع الحس.. نزل صبعه وكمل: خليتيني ندوي زي النساوين يا فرخة!
مها نفخت بعصبية: ماهو انت شادلي وصال ووصال وكانهي وصال راهو مش هكي ياغيبة وصال! شن نديرلك تبيني!
علي يتختخ فيها: ع خاطر وصال قلبها قوي ماتخافش ولا تقعد تبردي فوق راسي ..فمها ساكت ويدها شغالة تنسجم معاي عكسك انتي ماتعرفي غير التنقريز وكيف وامتى وشن
مها هدت: باهي سكتت
علي: ركزي.. تو تمشي للمربوعة تفتحي روشنها مش تشرعيه! لا خليه وسط وتجيني طيران
مها: وكان يخش عليا قبل مانلحق نطلع
علي قوس فمه وقام حواجبه: هداكا الوقت مانعرفكش بكل ديري لروحك راي
هي قعدت تفكر
علي اتكى بظهره ع الحيط بعدها قال وهو يستفز فيها: وتقولي علاش فاقد وصال.. دار فمه ع الجنب وطلع صوت من بين سنونه: هديكا ماتعرفش غير تم واتفقنا مش تسرحلي ساعة وفالاخير تبلد بيا
مها عقدت حواجبها: هيييه اني قاعدة ماقررتش خيرك تكذب عليا!
هو رد: فيك مامشي وجي
هي ع قد ماغيظها مشت طول ..مخلياته وراها يضحك
فتحت روشن المربوعة من داخل وطلعت بسرعة.. وبعدها طول خش بشير.. لابس سروال قهوي محروق حاشي فيه قميص كريمي ولابس في يساره ساعة قهوية بلون السروال وسبتة كحلة مع كندرة كحلة.. باخ هداكا البرفان وطالع حلو
برا من المربوعة واقفة ليلى مع امها وعزوزتها.. وفي نهاية الممر نور وعليا يبيتوا عليهم
•زمزم فتحت الباب وقالت بابتسامة: هي خشي للوشة
ليلى خشت وشبحت قدامها بشير.. لابس ومتأنق ..مش اول مرة يتأنق شبه ديما هو هكي لكن المرة هادي غير.. لانه ليها هي وعشانها..
اول ماخشت طلقت السلام وهو رد عليها ومبتسم.. صح لابسة عباية لكن شكل وجهها بالمكياج فكره بالموقف هداكا💖
سلموا عليه كلثوم وامه وباركوله..
بعدين امه طلعتله الدبلة: هي لبس خطيبتك بشوره
بشير ابتسم وخداها منها ..بعدين خدي يد ليلى ولبسها في البنصر اليمين
وهي مانحكيلكم ع فرحتها ..ماتوقعتش في فترة قصيرة تتعلق بيه هكي واللي ماداراتاش سنين داروه شهور..
كلثوم مدت لبنتها دبلة بشير باش تلبسهاله وهي تقول: كان ماجاتكش يا ولدي اعذرنا.. طارق جابها على مقاسه هوا ع قد ماقلتله برا لولد عمك خودودها جميع قال شي اني نتصرف
كلهم ضحكوا وبشير قال: عادي نديروا حل كانه واسعة نحطولها لصقة وكانه ضيقة سلم الكريمات
ليلى ابتسمت وخدت الدبلة من علبتها ..بعدين شدت يده اليمين وهي تبلع فريقها ولبساته..جت ع مقاسه بالضبط
زغرطت زمزم..
وكلثوم مدتلهم الموس بابتسامة: هي قصوا الطورطة
•قدام المربوعة .. نور وعليا يتصنتوا
عليا: مازال العرس نور؟.. ولا ماقالوش قدامك
نور: سمعت بابا وماما يتكلموا اولامس.. بابا قال هو يكمل حوشه بالمهل ومنه حتى هي تكمل قرايتها وتتخرج
عليا: مازال معناها
نور: اي.. ومش فتحوا كلية جديدة متاع تقنية معلومات حاجة زي هكي المهم تبع الكمبيوتر ..ليلى من لما سمعت بيها قالت بنحوللها والكلام هدا من قبل حتى مايخطبها بشير
عليا: عاد هي من يومها غالي عليها الكمبيوتر ..نتفكر اول مادارت تليفون تبحبش فيه وتفتش
نور: مانحكيلك و على حسب ماسمعت ليلى القراية فيها 4 سنين
عليا تحسب في دماغها: معناها تتخرج في 2013
نور: في 2012 يا غبية
عليا حركت يدها: المهم.. لكن مش ضاع عليها سيمستر هكي
نور قامت كتافها ونزلتهم بعدم معرفة: مندري ..اني دوة الجامعات مانفهمش فيها هلبا لكن بقولي كلامك صح.. دام هما اول سيمستر ليهم بيبدوه معانا بعد العيد وليلى قارية قبل سيمستر في كليتها اللي هي فيها توا..
عليا: سعدودها كلية بنايلواتها واول دفعة تخشها
نور ضحكت بصوت واطي باش الجماعة اللي فالمربوعة مايسمعوهاش..
ع جية فريال ضربت عليا بخفة ع ظهرها: وينكم انتي وياها .. شديروا هني
وكعادة فريال.. كل شي تفهمه لكن فالحاجات العبيطة واللي ماتنشرحش تبدا حتى هي عبيطة.. واضح شن يديروا زي عين الشمس😁
واخيرًا فهمت بعد لقت نظراتهم متاع مش لهالدرجة ..قالت: اهاااا.. باهي تعالوا جاي وحدة تمشي اضم الدار مع مريم اللي مولية زي حلبة المصارعة والتانية توتي ماعين الكيكة مع خولة شارقة بروحها..
عليا حطت يدها في نصها: وانتي شن بديري ولا قاعدة منظر
فريال: ايييه.. اني اصعب مهمة مهمتي.. بنمشي لهالمفرخ المجننة نركحهم ..مش قصدي شي نونا راهو لكن هيا تلبيسة علاش خوالك جايبين معاهم الصغار مش في وباياتهم خلوهم معاهم! والله حني تغريد كان مش الله غالب والمناسبة فالعيلة راهو لوحناها عند حد من عمامي .. شن البلي هادا الدنيا بتكلب تقول حضرة من غير لتين مقعمزة وعاقلة يا روحي
اسلوبها فالكلام مضحك..خلاهم يقرقروا بس ع الواطي😁..
عليا هدت من الضحك وقالت: لتين زي امها نسيمة
وفجأة سمعوا صوت بشير يعارك ويصرف..
نور فنصت: شن صار
فريال بضحكة: بالك ليلى غسلت وجهها قبل ماتخش
عليا: مش وقت بصارتك حسه يدوي متعفلق زعما خيره
فريال: غير وخروا عن الباب بس خير مايطلعوا يلقوكم هنايا وتشوفوا حساباتكم بعدها
•بشير واقف فالروشن ويقول بعصبية: عارفك شكون راهو وهاه يا كلب كان ماوريتك مانبدا بشير ولد حسين!! طالعلك يا قرد طالع
وخر عن الروشن وطول جاته امه شادة ضحكتها: فوته يا ولدي الرشادة تو نحولوها وتمت
بشير سكت وهو يزفر بعصبية..
وكلثوم قالت: عادي يا بشوره بصارة
اما ليلى كانت حاطة يدها ع فمها وتضحك..
زمزم وصوتها باينة فيه الضحكة: تعالى قص الكيكة مع خطيبتك وابعد شيطانك
هو مشي معاها ع مضض ومتوعد لعلي بايام سود..
•🌹•🌹•🌹•🌹•
بالصدفة اليوم كل رجالة السانية قاعدين فيها.. لا اشغال ولا طلعات مع اصحاب..
اجتمعوا شباب العيلة في حوش الامين..
خوت بشير كانوا يقرموا فيه..
وخليفة مرة يهدرز مع هدا مرة مع هداكا.. منصور مسكين ولده بيهبله بالشطانة ..خداه من امه ع اساس يبيها تقعد داب اخته مفيدة والولد ماخلاشي يقول كلمتين ع بعض..
بينما حمدي كان يساير ..غياب مرته عنه مسببله فراغ مايقدرش يعبيه غيرها والكل لابسه😂
كمال يهدرز ع زهير ومنذر باعتبار التلاتة مجالهم طبي.. منذر بشري وكمال وزهير الزوز صيدلة..
طارق كان يتكلم بالتليفون.. ونزار يسمع فالجميع
بينما ابراهيم كان مقعمز بروحه وكل عقله عند نجلاء..
ع جية حمزة في يده صفرة ستانلس ستيل معبية طواسي شاهي ع عدد الموجودين وبراد هكي كبره..
خليفة: كبيرة هادي.. حمزة براسه مطيبلنا الشاهي
حمزة قعمز وحط الصفرة ع الطاولة قدامه: لا هو هدا اللي ناقص..
نزار: مالا من داير البرميل هادا
حمدي: من بيديره غير المسكينة خولة
كمال: توا حنيت عليها
حمدي فنص فيه..
منصور بضحكة: طيرلك الجبهة..
حمزة: خلاص عرفتوا الاجابة توا اللي يبي هونا قدامه
سراج: الله ع حسن الضيافة
وخدي البراد قعد يصب للكل..
عبيدة: حقا شن صار في المحل متاعك.. امتى الافتتاح
شرف الدين: شهادة لله نبوا حاجة تكسر الروتين.. شني مني قريب ولا بعيد بوحميز
حمزة: مازال هكي في جو عشر ايام خمسطاش اليوم ..
الزبير: خودوا هادي
ع جية طارق قال: هات
الزبير: الولد اللي مشاركه العبد لله
كلهم تفاجئوا بل انصدموا..
خليفة قال: وداسينها!
كمال: احكولنا بالزبط كيف صار.. هي الحكاية كساد وكساد
الزبير بضحكة: مافيها ماصار.. لما حمزة حكالي وقال بنفتح مشروع وهكي شجعته .. بعدين كل مرة يجبد الموضوع قدامي وشن يبي يدير وكذا.. لين في يوم ضربني شاهد العقل قلت علاش مانشاركه اني خبرتي مع افكاره هوا يطلعوا حاجة..
ايوب بعد رشف من طاسة الشاهي: بزناس من يومك
منصور: لكن حلو تفكيرك.. حديروا شي كبير غير اختاروا مكان باهي وبالنسبة للتجار الزبير مايتوصاش
الزبير ابتسم: شهادة نعتز بيها..
خليفة: ربي يجعله اية الرزق ويصير اللي فالبال
وغمز لحمزة غمزة ماشافهاش غيره..
اللي نفخ الدخان وتنهد.. وهو يقول في سره «آمين»
كلهم فهموها.. ماعدا الزبير اللي ماعطاش بال لدعوة خليفة
ووسط هدا كله.. كان ابراهيم بعيد ومش معاهم نهائي رغم اصواتهم العالية..
لين سمعوا صوت جري.. وشوي وبان عليهم علي ووراه بشير بجري ويهزب
حمزة بصوت عالي: سماح يا بشير اليوم غير
كلهم عارفين علي متاع مقالب ومقالب مرات من النوع التقيل..
بشير لحق ع علي وشده من تيشرته: تي اما غير تربح يا حمزة!! ..بعدين وجه كلامه لعلي يقول: عيل انت تحدف الرشاد علينا!! .. غز ع سنونه وقال بصوت هامس: كان جت فيها يا بغل شن ندير فيك بعدها قولي بس!
علي: عيب يا وحش اني قناص متمرس في الهدف طول لا يمين لا يسار
الزبير: شن داير مرة تانية
بشير نفضه: يحدف فالرشاد ع المربوعة!
طارق وقف وهو يثني فأكمامه: ارتاح بونسيب تو نكمل عليك
ومشي لعلي اللي طول هرب من قدامهم
خليفة: مش عارف امتى بيكبر الولد اهوا..
طارق ولى قعمز: لو اني منك يا زبير انوضه بالجريدة ونرقده عليها
الزبير ضحك: كان يفلق راني بحديدة مش بجريدة
هما ضحكوا.. وشرف الدين شادها في جرة بشير يتبرد عليه😁
•🌹•🌹•🌹•🌹•
دخلوا الطورطة المخبوطة للنساوين وقسموها.. فرقوا معاها النسكافيه وبعدها شاهي وحلاوات..
وبعد سقدوهم ضموا البنات مع بنات عمهم الطاهر الحوش بعدين روحوا.. مخليين ليلى تتأمل فصبعها اللي فيه دبلة بشير طول الليل💕
•🌹•🌹•🌹•🌹•
في حوش الحاج منصور.. تحديدًا دار رقية بنته..
المكيف مفتوح ع درجة 24 .. رقية راقدة هي واختها سعاد لكن نجلاء قاعدة فايقة.. مقعمزة وعليها البطانية وتفكر في بكري..
فجأة سمعت صوت الارضي شرين نص تشريينة وفصل.. قلبها فز
ناضت من مكانها بعد نحت الغطا ومشت فتحت باب الدار بالشوي.. شافت للساعة المربعة المعلقة وسط الصالة لقتها الـ2 بالزبط.. قلبها دق
مشت للارضي ..قامت السماعة وكتبت رقم حوش خالها صبري وطلباته.. مالحقش يشرين انفتح الخط وجاها صوته يقول: اسف نوجتي
نجلاء بلعت ريقها وسكتت..
: والله ساعة شيطان ..اني لما شفت نظرتك ليا تمنيت متت قبلها.. حسيت روحي اخي يا نجلاء حسيت اني مش راجل
هي ردت: حشاك..
: لو نتأسف من هنا لغدوة مايسدش يا نجلاء
نجلاء: انت اوعدني بس معاش نتلاقوا الا في حوش جدي ومش بعيد عن العين ..
هو طول جاوبها: بلا ماتقولي حبيبي.. عهد عليا نصونك لين ناخدك
نجلاء ابتسمت بسعادة
: محلا ابتسامتك
هي انخلعت وقعدت تتلفت بعدين اذكرت انه بالارضي يغني مستحيل يكون هني: وين شفتها ابتسامتي!
: نعرفك من صوت النفس متاعك يا روحي
نجلاء ابتسمت بحب: نحبك هيما
: اني بالاكثر حبيبي
سمعت صوت حركة قالت باستعجال: بنصكر توا حبيبي ابصر من ناض
: ماشي يا روحي
نزلت نجلاء السماعة ووين جت بتنوض للدار ولت وهي مبتسمة فكت الهاتف من الضي وخشت بيه بسرعة للدار اللي جنب دار خالتها..
•🌹•🌹•🌹•🌹•
وفي دار تانية في حوش تاني فالسانية..
كانت حتى هي ع الارضي..
مريم: حدف رشادة هكي كبرها من روشن المربوعة غير ستر ربي جت فالكيكة
: علي هدا من يومه متاع مصايب.. والمشكلة مايشعف حتى جدي مايخافش منه!
مريم ضحكت: كان تشوفي منظر الكيكة بعد دخلوهالنا مبعوجة ماتفهميش كيف..
هي ضحكت بعدها قالت: استاحشتكم كلكم مكسدة بلاكم
مريم اذكرت عبيدة وابتسمت: كلنا استاحشناك اني ورقية وحتى من عبيدة فاقدك
: عاد واعداته بعصيدة طبيعي يفقدني
مريم ضحكت وفي خاطرها تقول «لو تندري بس»
•🌹•🌹•🌹•🌹•
فاتوا اسبوعين..
يوم 5/يوليو/2008
في الليل..
المدينة كلها ضي .. والزحمة في عز عزها..
اما في حوش الصادق العقوري اللي في وسط بنغازي..
مقعمزة مريم مع بنتها ديما في دار التقعميز.. دايرة كراسة وبيرو وتكتب: شن اخرى يا ميما فكريني
ديما: كتبتي التورتة
مريم: لا هضي هما يجيبوا معاهم
ديما: اهاا..ماكنتش نعرف
ع خشة الصادق ..لابس توتة وعليها ديشمبر النوم الساتان: فيش اديروا
ديما تحشمت من بوها ووقفت: تبي نديرلك شاهي يا باتي
الصادق: لنقنه خاطري في طاسة خضرة.. ديري ربي يرضى عنك
مشت ديما للكوجينة..
والصادق قال بابتسامة: مستحية مني .. نا عارفها منين وجهها يريح حمر وتقعد تلكلك فالدوة معناها في شي مش تمام.. وتوا احكيلي فيش تكتبي لكي ساعة
مريم ضحكت: هاك تحق فيا نكتب.. مانبي ننسى شي في دفوع ميما نريده كبير وسمح
الصادق مبتسم: لا حقك وحقها..
مريم: الاسبوع اللي عدا كلمتني اختك قالت بوبكر يبي يطلع الفرح بعد تكمل ديما مدرسة
الصادق هز راسه: حكاها ليا باته اليوم..
مريم: وبيني وبينك دابينا هكي فرحت ان البيان توا بيش تقعد معطية رسمي خير
الصادق هز راسه موافق كلامها
بعدين هي قالت: معاش حكاك رويفه
الصادق: اليوم لا.. عارفته يا مريم انتي الصيف كله شبه يكمل فيه غادي فالبلاد على خاطر الرزق ..مرات مايفضاش حتى يحك راسه
مريم: حتى نا ماقلت شي مغير يسلم وليدي مانبي كان يتم صحيح وفي عافية..
•هما يهدرزوا.. وبنتهم الصغيرة في الكوجينة..تستنى فالشاهي يطيب وتفكر في بيانها اللي قرب موعده.. حيكون في نص الشهر الحالي.. فرحانة هلبا بابوبكر.. رغم انه ماتشوفش فيه ديما لكن يقعد ولد عمتها واحسن من غريب لا تعرفه لا يعرفها..هكي قناعتها.. هدا غير شوفتها ليه بعين كبيرة لما طلبها من خوها طول .. حساته دعائها اللي استاجب ماهي من ضمن دعواتها في كل صلاة ان لو ربي كتبلها تتزوج يكون راجل ..ويخاف ربي فيها ويحبها ومايكونش زي خوتها الكبار الزوز يعطي في وذنه.. ولما عرفت بوبكر طالبها فرحت هلبا كونه قريبهم واللي زاد ريحها ان جاها عن طريق خوها عبدالرؤوف اللي متأكدة مليون فالمية  لو كان يعرف ان مايصلحش بيها ماكانش فتح موضوعه مع اماليهم من الاساس..
•🌹•🌹•🌹•🌹•
تاني يوم في العاصمة ..
تحديدًا المكان الحلو المعبي طاقة ايجابية.. سانية الحاج منصور
كان هو مقعمز ع كرسي جهة الورد ..حاط رجل ع رجل ومتكي جنبه زقيته.. بين ايديه مصحف الجماهيرية الحجم الصغير ولابس نظاراته الطبية ويقرا..
سمع صوت خطوات هو يعرفها كويس.. لكن استمر فالقراءة
هي كانت جاية باتجاهه ومبتسمة.. حطت الصفرة اللي كانت جايبتها معاها ع الطاولة اللي جنبه.. بعدين مشت جابت كرسي وقعمزت مقابله..
منصور وصل نهاية الصفحة كمل اخر اية بعدها قال: سبحانك اللهم وبحمدك اشهد الا اله الا انت استغفرك واتوب اليك..
صكر بعدها المصحف وحطه ع جنب ع الطاولة.. بعدين حول نظاراته وردهم في علبتهم ودسهم في جيب فرملته..
مريم بابتسامة: تفضل اجديده قهوتك
منصور خدي الفنجان ورشف منها: يعطيك الصحة
مريم: عارفاتك ماتحبش الحلو هلبا درتلك معاها بشكوط مالح
وقربتله الصونية
منصور ضحك وهو ياخد في طرف من البشكوط باش ياكله
مريم قامت فنجانها ورشفت منه حتى هي..
منصور بعد بلع: مكسدة بلا راوية اه..اول مرة اديرها وترقى لغريان شهر
مريم ابتسمت: تبي الحق اجديدي ايه.. راوية اختي اللي ماجابتهاش ماما رغم بنات عمامي قاعدات وديما نتلاقوا لكن هي غير
منصور: بعد المسافة هادا عادي وسيوره في يوم والبعيد يتلاقى.. لكن المصيبة في بعد القلوب وجفاها على بعضها.. قعد يأشر بصبعه ع حياش ولاده اللي متوزعة فالسانية ومكمل يقول: ريتي يا بنتي هادو كلهم باش كبرتهم قلوبهم على بعض تعبت هلبا.. اني ضنوتي اكثرها ولاد والولاد يهدوا الحيل لين مايسقموا ويبدوا تريس.. لكن اني ديما حاط بين عيوني الدنيا كيف تغير بالذات اللي بذرته من الاول بلهون .. الحمد لله توا اللي ربيت عليه ولادي ربوا هما عليه صغارهم .. هادا علاش حتى انتي قولي الحمد لله بينك وبين بنت عمك مافي غير الود حتى وهي بعيدة ديما تشرين عليك ودور فيك ..لولا المحبة راهو حتى تقعد معاك في نفس الحوش ماهيش بتسالك.. ادعي ديما يا مريم ربي مايشتت شملكم الدنيا فيها كل شي ..ونقولك حاجة حتى اني بيني وبينك
مريم رغم كلامه اثر فيها هلبا لكن اخر شي قاله وهو يقلد فيها خلاها تضحك..
منصور: هادي دعوتي اللي في كل صلاة ندعيها راجي من ربي مايوصلني ليوم نشبح فيه ولادي كل واحد في تركينة وماحد ينشد على التاني.. وحتى وين نموت مانبيش من يقول صغار منصور بعد توفى بوهم معاش يعرفوا في بعضهم.. خليكم قلوبكم على بعض وتحسوا ببعض سوا راوية ولا بنات عمك التانيات .. الدنيا مانا رافعيين منها شي يا بنتي نبيكم هكي ديما حتى بعد ماتدرق عيني ايد وحدة وقلب واحد واهم شي سانية وحدة..
مريم دموعها نزلت.. جدها حبيبها ماتتحمل فيه شي ..مجرد جبدلها سيرة الموت والفراق دموعها نزلوا..
ناضت من كرسيها وجت باست يده وراسه: بعد عمر طويل اجديدي معاش تقول هكي.. ان شاء الله بتعيش لين تشوف صغار قيس وتكبرهم وتزوجهم هني في سانيتنا
منصور: قالوا شن ودك يا الاعمى..
وضمها لصدره وهي تبوس في يده وتقول: ربي يحفظك فوق روسنا يا رب
منصور ابتسم وهو يمسح ع راسها..
لما حست روحها هدت بعدت عن جدها وقالت: حي يا جدي فرملتك تبقعت بالدموع .. هات نغسلهالك
منصور: غير قعمزي بس ..توا نبي نشرب قهوتي معاك وبعدين ساهل
مريم مسحت دموعها بيدها وولت لكرسيها.. هو يهدرز وهي تهدرز معاه ..لكن مش قادرة تنسى كلامه.. اول مرة تستشعر قداش جدها تعب باش صنع الحياة اللي هما عايشينها.. سواء ماديًا زي السانية اللي لامتهم كلهم ولا معنويًا زي مودتهم لبعض اللي ربا صغاره عليها وبالتالي تربوا الاحفاد عليها حتى هما ..والاصعب من هادا كله كيف خلاهم يحافظوا ع هالمودة طول هالسنين..
حاولت مريم تتخيل ان حالهم من حال هلبا عائلات تانية يتقاطعوا ويتعاركوا متحملين بعض بالسيف ومايتلاقوش الا من العيد للعيد.. قلبها انغم واللي زاد غم قلبها لو جدها غاب عن دنياهم وادرق ..هل بعده مازال حتشوف السانية جنة زي ماتوصف فيها ديما لاي حد؟!.. توا بس مريم ادركت ان وجود جدها معاهم هو اكبر سبب في سعادتهم سواء بطريقة مباشرة او غير مباشرة..
•بس مرات الموت مايكونش هو سبب الشتات الوحيد.. مدام الحاج منصور مربي اولاده تربية صحيحة وزارع فيهم قيم فغيابه عليهم مش حيزعزع هالعلاقة.. بس في هلباااا حاجات غير الموت ادير ما اكبر من اللي خايف منه الحاج منصور.. رغم هكي يقعد هو اقوى سبب..
•🌹•🌹•🌹•🌹•
عشية هاليوم افتتحوا حمزة والزبير محلهم..
محل ملابس شبابية.. كان الديكور والبضاعة والمكان كله حاجة صح واضح متعوب عليها.. عزموا اصحابهم فالافتتاح واكيد اول الحاضرين شباب العيلة..
كلوا وشربوا من الضيافة حصلوها عزيمة ببلاش😂
عجبتهم البضاعة.. وفاللي حتى شري
شرف الدين: عيب عليكم.. مفروض من اول ماخشيت طول يا شرف لبسة كاملة علينا ..
حمزة كان ساكت ومش مدوره اصلاً بينما الزبير قال: بتدفع ع عينا وراسنا غير هكي ردها مكانها وهنينا
شرف الدين: لا بندفع يا عيت النجمة السداسية.. التفتت يمينه وصفر: عبيدة..
الزبير ضحك بصدمة..
عبيدة جي: هااه
شرف الدين: تعال خلص البدلة
عبيدة طلع من جيبه ربطة فلوس: تتخايل فيا صراف داير رجلين ولا كيف انت؟!
شرف الدين: هيا وانت تتمنن عطيهم حقاتهم خلي يعرفوا التريس باااهي
دفع عبيدة حق اللبسة وخداها شرف الدين..
حمزة ماكانش متوقع يجي العدد هدا كله للافتتاح.. لما شاف الزحمة تفائل هلبا وحس ان المشروع حينجح والنتيجة من اول يوم بانت قدامه زي عين الشمس..
وشكله الطريق لقلب فريال بدا يتقطرن💖
•🌹•🌹•🌹•🌹•
فتح باب الحوش وخش.. صكره بعدين نحا من رجليه وكمل طريقه داخل ينادي: يا خديجة
هي طلعتله من دار بناتها: هني اني
بلقاسم التفت: شن حالها مفيدة اليوم
خديجة: بلهون قاعدة، تو لين تكمل تلات شهور الاولى بعدها عادي.. جي راجلها بكري يسأل وجايبلها حاجات
بلقاسم خش داخل: وعلاش يجيب شن ناقصها هي هني
خديجة لحقاته وقعمزت جنبه: ماناقصها شي لكن هو راجلها ومسؤولة منه طبيعي بيهتم .. بعدين سألت: كنت في حوش عمي؟
بلقاسم: ايه خطمت شفت امي وبوي طلعت الصبح بلا مانمشيلهم
خديجة: ربي يعطيك صحيحتك.. حقا يا بلقسام في شن خاطرك ع العشي
بلقاسم: النية في محشي ضولمة..
خديجة ابتسمت: غالي والطلب رخيص.. تو انوض منذر يخطف رجله للجزار يجيب لحيمات
بلقاسم: ديري رايك.. المهم لما يقرب المغرب نوضيني بنخش نتكا شوي
خديجة وقفت: حاضر..
هو مشي لداره وهي توجهت لدار منذر..خشت طول للروشن فتحاته ع وسعه وهي تقول: نوض يا منذر نوض الشمس حتى قريب اطيح وانت في رقدة وحدة من الصبح..
منذر وصوته مغموم لانه راقد شبه ع بطنه: يام تاعب خليني
خديجة قعدت اضم فالدار: نوض يا ولدي قبل امتحانات وتوا شنو! هيا صحصح سلم نذيره بوك يبي العشي محاشي باش تجيبلي اللحم وقت
منذر حط يديه ع السرير وقام روحه وهو ينفخ: باهي
خدي فوطة من الدولاب وطلع للحمام.. وخديجة بعد كملت ضم طلعت من الدار حتى هي ..مشت للكوجينة خدت سلة وموس خضرة بعدين توجهت للصالة وين ما بنتها مها تتفرج ع التلفزيون..
خديجة: تعالي مها..
هي ناضت وجتها
خديجة مدتلها السلة والموس: اطلعي قطعيلي خضرة رقيقة وورق السلق فيسع مش تلهيلي بالورد!
مها خدتها منها وطلعت تجري وهي تقول: حاضر
وامها قعمزت ع الجلسة وقامت سماعة الارضي بتكلم مريم تجي تعاونها..
•🌹•🌹•🌹•🌹•
في هالوقت مريم كانت مع عمتها في اخر السانية ..يقطفوا فالخوخ والمشمش..
دايرة سلوم متاع جهتين وراكبة بيه ..تقطف وتمد لعمتها لوطا
مريم تختار فالحبات: بعدها
رقية شادة سلة وتشبح فوق لمريم: قالت لا عاد نوليله ولا يحلم حتى بظفري
مريم مدت حبة خوخ لعمتها: هكي الصح..
بالصدفة شافت قدامها ..لقت مجموعة رجالة ابصر شن يديروا فالسانية اللي لاصقة فيهم من ورا..
نزلت درجتين من ع السلوم وهي تقول: تعالي نقطفوا المشماش هني معاش نقدر نركب سانية عيت النعاس فيها وحدين ترا شن يديروا
رقية شافت وين ماتشوف بنت خوها لمحت عمال مصاروة ومعاهم واحد يبان من ولاد النعاس: جايبين عمال يحسنوا فالشجر شكلهم..
مريم تصكر فالسلوم: شكلهم.. هما سانيتهم مستغلينها يزرعوا ويبيعوا مافيهاش الا حوش بوهم..
رقية: ان شاء الله غير يكملوا فيسع ومايرهنوناش
مريم تكت السلوم ع الشجرة ومشت مع عمتها جهة شجر المشمش: حتى حني كان نبدوا نبيعوا محاصيلنا زيهم.. نراهن لو يلقوا احلى من اللي يطلع فيه شجرنا
رقية تمشي وهي متكية السلة ع بطنها وشادتها بيديها الزوز وتقول: حني مش زيهم ..هما ماعندهم فيها غير حوش بوهم  ومن يوم نعرفوهم هادي صنعتهم بعدين راهو اللي بيخدم فالزراعة يبي من يعاونه ويوقف لحاجته وجدك مستحيل يجيب خدام للارض والسانية ماشاء الله معبية بنات بياخدوا راحتهم فالخشة والطلعة.. توا سادنا العمال متاعين عبيدة وبشير مقيدينا
مريم وقفت تحت شجرة مشمش وقعدت توازي وتقطف: امتى يكملوهم زعما؟
رقية: يبوا فترة..
•🌹•🌹•🌹•🌹•
في بلدة عبدالرؤوف الام..
روح من مشوار يخص شغله اللي هني.. خش دوش وطلع
صالح بلغه ان جده مشي يزور واحد من اصحابه العزيزين عليه وانه مولي ع الغدي..
خش للدار وفتح المكيف.. هادي عادته من يومه فالصيف يدوش ويولع التكييف.. ياويله لو شافاته امه لكن هو مستغل غيابها..
قعمز وفتح التلفزيون حط ع قناة الليبية.. شوي وشرين تليفونه ناض خداه من ع حفة طاولة التلفزيون ..قري الاسم ابتسم ورجع لمكانه بعد فتح الخط وقال: الون
جاه صوت خطيبته يقول: رؤوف كيف حالك
هو رقد ع المندار ورد عليها وهو يتني فالمخدة تحت راسه: الحمد لله .. شنو حالك انتي يا سمحة
هي ابتسمت: بعد سمعت حسك تما باهي
عبدالرؤوف: مش انكان صيفتوا فالبلاد خير
: نا نبي وواجد اخرى لكن باتي قال ايش مش كان ندز فيها معاه كل مرة نهار ناقص ياخد علي وجه!
هو قعد يضحك: باتك هضا يعيني ربي عليه وخلاص
هي فجأة نطت: اسم الله! .. بعدين كملت بنرفزة: فجعني افجع درايزه
عبدالرؤوف: واحد من العيال؟!
:اها
عبدالرؤوف: كنه ينعر
هي ضحكت: مدرعنه نا ..قاعدة في داري نحكي معاك
عبدالرؤوف قال بابتسامة: مايقطعلي حكاويك
: نقولك حاجة اول مرة نعترف ليك بها
عبدالرؤوف: قولي حاجات
: تصدق مرات نقول لروحي نا شن دايرة في عمري عند ربي عطاك ليا .. لدرجة نخاف نحسدني عليك
عبدالرؤوف بضحكة: يا اوڤر
: لا ماهي اوڤر والله.. ديما قلبي ناغزني من تالاك.. تعرف يا رؤوف كل مرة تدوي لباتي انت ولا خالي ع الفرح ويعصي معاكم نبكي ومحوتك يسكتوني نقول هضي هي الحاجة اللي بتفرقنا.. وحق الله يدي على قلبي يا رؤوف من لما حكيتوا فيا
عبدالرؤوف مبتسم بعقدة حواجب: نا يا صفاء عمري مانرخيك وعارف شن عندك ليا ..وفي سبه هضا مستعد نرجاك تقري حتى 10 سنين..غير هك يقعد عيب ينقال علي راجل..
: راجل وسيد التريس اخرى..
عبدالرؤوف: خلاص صكري ع هالموال ومعاد تفكري فيه بكل احكي في حاجة اخرى
ابتسمت هي وردت: ايش تغديت
هو قال بعد خدي نفس ومبتسم: نرجى في جدي يرد من عند رفيقه بيش تحن الحاجة فوزية علينا ..
«فوزية تكون زوجة صالح»
: ياناعلي قاعد هكي لعند توا..
عبدالرؤوف ضحك: وانتم شن درتوا غداكم
: لا ماني عديمة احساس نا..كني نقولك وانت قاعد صايم لتو!
هو قعد يضحك..
وصفاء ع الخط.. لما سمعت ضحكته ضحكت معاه تلقائيًا..
•🌹•🌹•🌹•🌹•
حوش جمعة المزداوي..
مقعمزة نجلاء تتفرج ع التلفزيون مرة تفتح روتانا مرة ميلودي..
لين سمعت صوت باب الحوش ينفتح عرفاته بوها وطول غيرت المحطة..
شوي وفات هو جهة الديار.. خش لداره وشافت امها لاحقاته بتوتيله حوايجه اللي بيلبسهم بعد الدوش..
ربع ساعة وسمعت الباب انفتح مرة تانية.. طلعت من الدار هالمرة وشافت لقاته خوها الكبير.. واقف وينحي في سبيدروه
الزبير قام راسه بعد حط شخشيره فالسبيدرو شافها: في وقتك كيف كنت بنادي عليك.. بري ديريلنا حاجة نشربوها شكله حتى بوي كيف واصل
نجلاء بتذمر وهي ماشية جهة الكوجينة: تؤ..
الزبير مشي للدار وقعمز ع اول مندار شافه.. ع خشة بوه وامه عليه
جمعة: هادي الوصلة امالا
هو رد: وراهو زعميتني حاسب حساب الطريق وطالع بكري دروحه بنرتاح..
جمعة قال بعد قعمز: ايه غدوة وراك طلعة من الصبح للميناء
سعاد وهي تساوي فالشنترو اللي فوق التلفزيون: وخليت حمزة بروحه؟ ولا ماعندكمش زحمة
الزبير: لا الله يبارك زحمة غير متوقعة لكن معاش فيها كيف متكسر تكسير طلعت وسيبته حاصل شوي حصلت في ماهو احرف
قعمزت سعاد وجمعة سأل: الطريق
الزبير: تي مش زحمة ..تقول البلاد كلها طالعة وماحد قاعد في حوشه!
سعاد: هادي طرابلس من يومها هكي ماجد عليها شي
جمعة: ايه لكن حتى الايام هادي راهو جو بحر الناس كلها ماشية..
ع خشة نجلاء بصفرة فيها باكو عصير برتقال مندي من البرودة وجنبه طواسي ..حاطة معاه مقروض امها
حطت الصفرة ع الوطا وقالت: وامتى حني دورنا ..السنة هادي مامشينالاش بكل
سعاد: حتى اماليا يخطروا يمشوا..خليفة هو اللي طلع بالفكرة
الزبير: تبوا الحق ولا.. البحر كان مش الايام هادي معاش يمتشاله جوه شهر سبعة وبس
نجلاء برجاء: بابا شن رايك نمشوا مع حوش جدي! بالله عليك خاطري هلبا
جمعة يتنقل بعيونه بينهم: اني من عندي مافيش مشكلة وانتو زيدوا نسقوا مابين بعضكم باش كان هدا نتفق مع خوالكم
الزبير: تو نشوفه اني خالي خليفة
وعاد نجلاء وين تلقوها فرحانة وجاحدة..
لين فيقتها امها من احلامها الوردية لما سألت: وين علي؟! ماتقوليليش ولى رقد!
نجلاء: لا ع البلايستيشن
جمعة: صبولنا من هالعصير وعلي خلوه براحته فكونا من نشافه
الزبير قلب الطواسي وقعد يصب للكل.. بينما امه تشارك مع بوه فأفكارها حوالين جلسة دار الضيوف اللي تبي تغيرها.. واخته في عالم بعيد عليهم تتخيل في مشية البحر اللي متحمستلها هلبا خصوصًا وحيكون فيها ابراهيم..
•🌹•🌹•🌹•🌹•
: لين نبعتلك معاذ باش تجيني! بعدين وينكم ع الارضي
مريم: طلعت سايرت رقية بتقطف خوخ .. والارضي في المربوعة شكله حنينه ماسمعاتاش
خديجة: باهي خشي اغسلي يديك والحقيني .. فرحت اللي مفيدة قالت عادي ناكل منه
هي مشت غسلت يديها ولمت شعرها فوق .. بعدين جت للكوجينة لقت امها تقرض فالخضرة
دقايق وخش عليهم منذر في يده اكياس لحم: السلام عليكم
الزوز ردوا: وعليكم السلام ورحمة الله..
بعدين خديجة كملت: حطه ع الرخامة..
منذر حطه ومريم مشتله باش تغسله وتقرضه رقيق..
جبد منذر كرسي وقعمز عليه: مرات نطلع فالليل مع زهير لكن حطوا احتمال مايصيرش واحسبوا حسابه معاي فالعشي..
خديجة: مالا عشي امه مش هداكا الزود اليوم
منذر بضجر: تو يام قداش ليها سنة عمتي ذهيبة معاش اطيب؟! خولة هي اللي ادير راه
امه قامت حاجبها بعدها قالت: غير بالك تفكرت فلاحتها متاع زمان
مريم كانت شادة ضحكتها وهي تغسل ومنذر شرب ميه بعدين طلع ناوي حوش جده.. كبروا وتعودوا ع الحرب الباردة بين امهم ومرت عمهم
«الخلاف بين ذهيبة وخديجة من اول ماتزوجت ذهيبة سنة 83 كون خديجة كانت اول كنة وحصلت دلع من العيلة نوعًا ما لين جت ذهيبة اللي في نظرها شاركتها فالعيلة وخدت مكانها ومع الوقت حستها تبي تجبد منها منصب السلفة الكبيرة وحقوقها ..ذهيبة ماكانتش تبي هكي حرفيًا لكن من جهته ..حتى هي تبي توطد علاقتها مع العيلة وتولي زي مايقولوا الكل فالكل.. وهداكا يوم وهدا يوم وهما الزوز قاعدين في نفس الصراع»
خديجة التفتت ع مريم وهي تقرض: من خليتي عندها عمتك
مريم فاتحة الشيشمة وتغسل فاللحم: لما جينا من برا لقينا فريال تستنى فينا..
خديجة: تبي حاجة ولا غير هكي
ردت مريم: عندها عرس صاحبتها عازمينها يوم الحفلة.. تبي قفطان رقية اللي خداته ع عرس حمدي ومفيدة
خديجة: اما هوا؟!
مريم: هداكا اللي لونه فيروزي.. هو مش عندها عاطياته لخولة هونا لبساته في عرس عيلة الصغيّر..
خديجة: اه هداكااا .. اي قنين
•🌹•🌹•🌹•🌹•
عند الحاج منصور..
كان يلف ع الورد وشجر الزينة ويسقي فيه.. عكس شجر الثمار اللي يسقي فيها مرة فاليوم كل صبح بعد الصلاة هادي يسقي فيها مرتين صبح بكري وعشية ماسي .. طبعًا ماكانش بروحه معاه الامين ولده..
وفي حوشه ..مقعمزات مرته وبنته وحفيدته في الصالة..
حليمة: النو برا لكن داخل الحمدولله مكيفات لين اتلجي!
قالت كلامها تعقيبًا ع طواسي العصير المثلجة اللي يشربوا فيها الزوز..
فريال حطت الطاسة من يدها: الله يا حناي ع ذكر النو تو مش الجو جو بحوري!
رقية: صدقتي فريالو.. التفتت لامها وكملت: حتى خليفة الجمعة اللي فاتت قال خاطري فيه..
ع خشته هو: سمعت اسمي.. خير ولا شر
فريال ضحكت: خير خير
رقية: كنت فالخدمة؟
هو قعمز وقال: ايه.. مازال في منه العصير هادا؟
حليمة لوت فمها: ما ابهى منكم غير هو..
ورقية ناضت تجيبله من العصير..
خليفة ضحك بعدين سأل: ايه ماقلتوش علاش كنتوا في سيرتي
فريال: قلتلهم الايام هادي جو بحر مشي رقية قالت حتى خليفة خاطره
هو قال: نبوا نرتبوا مشية معاش فيها الحق
حليمة: شوفوا بوكم قبل
خليفة: اكيدة هادي..غير خل يروحوا عيلة فتحي من غريان
فريال: امتى مروحين هما
خليفة: بكري يهدرز ع الامين قال ممكن نهاية الاسبوع الجاي بيمشي يجيبهم
جت رقية بطاسة عصير معبية ومدتهوله ..وهو قال: صحيتي
هي قعمزت ..
حليمة بتساؤل: ماكش واخدة الواحد من بنت عمك ولا شن؟!!
فريال رشفت من طاستها: اتصلت بيها بكري شوي لقيتها طالعة بتشري ورق جلاش تو اول ماتروح تكلمني..
حليمة هزت راسها..
شرين تليفون خليفة لقاه الزبير.. فتح الخط وقال: يا الو
•🌹•🌹•🌹•🌹•
خشت لدارها هي وخواتها.. لقت اختهم الكبيرة مقعمزة قدام الزيانة وتسرح في شعرها..
شافت للسرير لقت عليه لبسة كاملة..قالت: هضا ايش؟!
صفاء التفتتلها: مش بنعدوا لعيت خالي ضو
اختها: اها لكن من امتى هاللبس والحوسة لما بنعدوا لحوش خالي ضو!
صفاء ابتسمت: عيت خالي الصادق بيجوا..
:ومنو قالها لكي؟
صفاء وقفت تتفرج ع شعرها البني الواصل نص ظهرها: دقيت على الارضي ردت علي ديما سألتها..
اختها بقيمة حاجب: حقا تعاليلي هنا ايش الدوة اللي تفصع الرقبة اللي حسك تحكي فيها لرؤوف بدري! يا حمارة في بنت تقول اللي قلتيه لخطيبها! الراجل هو المفروض يتغزل بالبنت مش العكس! بأي نظرة بيحقلك توا
صفاء التفتت ع اختها وقالت بضيق: انتن لما نحكيلكن اللي نحس به تبقن تضاحكن عليا مالقيت غيره هو يسمعني .. بعدين رؤوفي موش كيف الشباب الاخرين رؤوفي راجل..
اختها تنهدت: باهي باهي مغير ماتعاوديهش
صفاء ابتسمت: ماعندي عليش نعاود فيها كلامه خلاني نطمن واجد ومعاش نفكر هك حتى بيني وبين روحي
: ربي يحفظكم لبعض يا قلبي.. وكملت تقول باستعجال: هيا البسي دبشك تو ماتحقي الا وباتي فوق راسك ومعاش يرجاك دقيقة
قالت كلامها وطلعت..
وصفاء بدت تلبس بسرعة..لكن مامنعتهاش السرعة من انها تطلع ع سنقة عشرة
•🌹•🌹•🌹•🌹•
الساعة 10:00 ليلًا..
غريان.. في حوش اهل بهية
مقعمزة مع اختها الكبيرة في دار التقعميز..
ومن موضوع لموضوع وصلوا في..
بهية: سلامتهم وقلة سوهم ..اللي ماجانيش في عملية فتحي معاش نبيه فوق فوق..
: لكن يا بهية عمك داير حادث وطالع من عينها راهو فوتوه حتى لتونس..
بهية: مش مدرق عليك يا تفيدة اني كنت نواصل فيهم فالمهم المهم وتغاضيت ع حاجة وتنين ماجونيش فيها.. اما بعد فتحي دار العملية وماريت من حوشهم واحد خلاص ..حدي لما نتلاقوا في غريان كيف حالك سلمك وتم.. هي العلاقة من يومها رسمية مش هداكا التغيير يعني
: اني على حاجة وحدة بس كونك انتي عايشة في طرابلس يعني قريبة عكس خواتك التانيات كلهم هني الناس بتبدا تنظر ماغباك فيهم انتي..
بهية بقيمة حاجب: خلهم يدووا سيورهم ساكتين لكن اني والله مانقدرها .. ماننسى شن صار فيا نهار مرض فتحي وشكوا يكون عنده الخبيث بعيد وبر ..وهما سمعوا وداروا الحولة وبعد العملية حتى التليفون عليا ماقاموه..
اختها تنهدت وقالت: صح كلامك.. يلا ع قولتك اللي بيتكلم حطي في عينه عود..
•🌹•🌹•🌹•🌹•
فتح كمال باب الحوش وخش شاد شكاير.. وخشوا وراه اخته وامه
خولة دارت تشريينة لفريال باش تجيها.. خشت بدلت ووتت كيسة القفطان.. بعد كملت طلعت للكوجينة بضم الحاجات اللي شروهم
لقت امها فيها توتي فالعشي: خليتيه كنت جاية يام
ذهيبة: قرضت الكوسة والباتنجال بس راهو..
خولة سمعت صوت الباب: شكلها فريال جت
مشت للباب وفتحاته: خشي خشي
فريال ويديها في جيوب الماليا قالت: شن الجو
خولة صكرت الباب: مليح غير نحس فرجليا يوجعوا من اللودان
فريال بضحكة: تبي الحج وتبي السلامة.. قالت بعد خشت للكوجينة: السلام عليكم.. كيف حالك مرت عمي
ذهيبة ابتسمت: الحمدلله كيف حالك انتي وكيف حال العويلة كلهم
هي ردت بابتسامة: الحمد لله
ع خشة خولة بالكيس: شدي
فريال خداته منها وشافت للطاولة وهي تقول: ثانكيو.. شن امالا حصلتي النوعية اللي في بالك
خولة طلعت الورق اللي خداته توريلها فيه: ايه.. الولد قال جاي طازة والناس كلها تاخد فيه وحتى ماما عجبها لونه ..
ذهيبة: فكرني بمتاع امي الله يرحمها زمان هكي
فريال بحماس: شوقتوني عليه.. مبكري رقية قالت كان تجيبه ونتعاونوا عليه كلنا نديروه.. هي تبي تزيد تشري ورق مع متاعك يديروا كمية
ذهيبة: لا خولة عابية بالكل باش كان نجحت منها بتذوق السانية كلها
فريال ضحكت: صحة ليك ويا حبذا كل مرة هكي اديري
خولة ضحكت حتى هي: ع العموم اني مادابيا من يساعدني.. قولي لرورو تختار يوم
فريال: ماشي.. هي توا تصبحوا ع خير
الزوز ردوا عليها: وانتي بخير..قدامك كل خير
وخولة طلعت معاها تسقد فيها للباب..
•🌹•🌹•🌹•🌹•
في شارع من شوارع بنغازي..
تحديدًا حوش عم عبدالرؤوف .. موجودين اهله وحوش عمته اللي خاطب بنتهم
والجو بين مريم وحماتها برنية احلى مايكون.. واخدات بنات بعض عاد
صفاء كانت ملاصقة لمريم طول الوقت.. طبعًا بطريقة راقية ومافيهاش مضايقة بالعكس خلت مريم تفرح بيها بزيادة ووتتأمل فيها تجي خير من سلفاتها اللي قبلها..
وصفاء مرتاحة ع الاخر.. وفي كل مرة تزيد تتأكد انها لما وافقت ع عبدالرؤوف دارت عين العقل.. واحد زيه مافيش عاقلة تخليه يضيع من يدها هادا غير اهله اللي يعاملوا فيها معاملة حلوة.. ومرة عن مرة صفاء تزيد تغرق في حب عبدالرؤوف بدون ماتحس..
•🌹•🌹•🌹•🌹•
انقضي اخر اسبوع من مشية بهية وبناتها لغريان..
وجي موعد المرواح لطرابلس وللسانية..
والوحيد اللي شوقه لراوية يضاهي شوق بنت عمها وجدها ليها هو عبيدة💖

يتبع...