سانية جدي🌹

الحلقة الثانية عشرة

#سانية_جدي🌹
#الفصل_الأول «سانيتنا»
#الحلقة_الثانية_عشر
__________________________
اول ما خشت قام راسه تلقائيًا.. ابتسم وين جوا عيونه عليها
حس براحة.. ملامحها هادية وتبان انسانة لطيفة
خليفة قعمز بعيد ودار روحه لاهي بالتليفون..
اما هي قدمت وضيفاته وبصوت خفيف قالت: تفضل
ابتسم سليمان وشافلها: زايد فضلك
خدي الفنجان ونزله قدامه.. وهي اربكتها بسمته ونظراته.. حطت الصفرة على الطاولة وقعمزت
سليمان: ماتبيش تسايريني؟!
رقية شبحتله بعدين تنحنحت وهي تقول: لا ماخاطريش..
سليمان مازال مبتسم وسأل تاني: انتي مدايرتها القهوة؟!
رقية تحشمت.. اللي مدايرة القهوة فريال مش هي
سليمان ضحك عالجنب: خيرك اللي نقولهالك تشبحيلي هكي.. نبي نسمع صوتك يا بنت الناس
رقية لاح على فمها شبح ابتسامة بسرعة مامشي وسليمان مازال مستلم دفة الحديث اللي ماحد مشارك فيه غيره: لو ماتبينيش كله نصيب راهو؟! حسيتك طالعة بالسيف!
رقية حطت يدها على فمها وضحكت بخفة.. بعدين قالت: لا
سليمان ابتسم وقال: نخش فالموضوع مالا.. تفضلي اسأليني شن تحبي اني ليك كتاب مفتوح وبعون الله مش حتسمعي غير اللي تسرك
رقية «ثقة ولا غرور!»: احكيلي عن نفسك بصفة عامة
سليمان: بشرط!
عقدت حواجبها هي..
وهو كمل بضحكة: حتى انتي تحكيلي.. واكيد نبي نسمع شروطك
هزت رقية راسها بابتسامة..
وسليمان استرسل: اسمي ومواليدي اكيد عرفتيهم بالنسبة لقرايتي متخرج قسم احصاء.. خدمتي حتى هيا بتكوني تعرفيها لكن مافيش باس نوضحلك.. من زمان محترفين في الزراعة ونبيعوا فالمحاصيل متاع سانيتنا والحمد لله ماشية امورنا وعايشين من وراها زي مانبوا واحسن.. خدي نفس وزفره وهو مكمل: السنة اللي فاتت خديت قطعة هنايا في**** وبديت نبني فيها ومنها الميمّة اقترحاتك عليا مبدئيًا.. ماكنتش مدور هلبا واثق في امي وعارف مش حتجيبلي وحدة ماتمشيش معاي او ماتنفعش..
رقية بتساؤل: عندك عادي تاخد وحدة قطوس في شكارة يعني؟!
سليمان: طبعًا لا.. واكبر دليل تقعميزتي معاك توا واكيد لو صار النصيب بيبدا بينا تواصل فترة الخطوبة
وجهها تحمرط لما قال كلامه الاخير.. وهو لاحظها وابتسم: لكن القصد من دوتي هادي اني ماعنديش على جو العلاقات والهدرزة متاع التعارف هادي ..المهم وبلا طول سيرة وافقت وارتحت لانكم جيران ونعرف بوك وخوتك وحتى ولادهم.. سكت شوي وقال: ومش حندرق عليك اني شفتك مرة
هي قامت حواجبها بعدين غيرت عيونها عنه بخجل..
سليمان مبتسم: تو بتقولي طبيعي تكون شايفني لانك تسكن بحدانا.. احمم اني نحكي شفتك بعد انفتح موضوعك في حوشنا
هي شبحتله وكلها فضول تعرف امتى.. حست روحها مهتمة تعرف كيف شافها وشن كان منظرها ولبسها وقتها.. مساوية او لا
وهو جاوب واعفاها من السؤال: مرة جايب عمال للشجر نحسن فيه.. شجر السرول
هي اكتفت بالكلمة هادي باش تفهم.. ورجعت بذاكرتها طووول لليوم اللي كانت فيه هي ومريم يقطفوا فالخوخ والمشمش.. وكلمة فريال وانه شافها يومها بس هي مادورتش ساعتها..
قالت بعفوية: نهاري هداكا اليوم غولة كنت!
هو ابتسم وعيونه عليها وعلى ردود فعلها اللي ترتسم ع ملامح وجهها..
رقية هادا وين استاقضت شن قالت لما شافت ابتسامته وقعدت تشد في طرف البلوزة وتعصر فيها بيدها من السحن..
سليمان حس بيها وحب يغير الموضوع: وانتي.. مانعرفش عنك شي غير اسمك وعمرك احكيلي عليك فضولي كبير جيهتك
رقية شبحتله وابتسمت: شن بنحكيلك.. اكثر وقتي نكمل فيه فالسانية مانطلعش هلبا خصوصًا بعد كملت قراية.. ضحكت بخفة وكملت: حتى اني طالعة من العلوم لكن مش الرياضية اني خريجة علوم ارض تحديدًا جيولوجيا اصغر وحدة في خوتي واكثر حاجة نحبها صغارهم قريبين ليا هلبا وضروري كل يوم نشوفهم..
سليمان بضحكة: هادي رسالة وافهم كان بتفهم ولا
رقية بخجل: الصراحة راحة.. واني ماعنديش شروط غير اماليا مانبيش ننقطع عنهم والكلام شامل صغارهم ولاد وبنات ..يعني في المستقبل لو صار نصيب وكملنا مانبيكش تقولي هادي بعيدة وهادا مش لازم موضوعهم حساس بالنسبة ليا ..
سليمان مبتسم بعقدة حواجب: تتكلمي كأنهم صغارك
رقية ابتسمت: خوتي الصغيرين مع ان في منهم اكبر مني
سليمان رشف اخر رشفة من القهوة: واللي تبيه اني فيه.. امتى ماتبي نولع ونجيبك للسانية .. غيره؟!
رقية مبتسمة: هو هادا بس.. وانت في حاجة معينة تبيني نعرفها؟!
سليمان هز راسه: القدر والاحترام ليا ولعيلتي فقط لا غير الباقي زايد
رقية: ان شاء الله..
هو ابتسم: تفاهمنا مالا.. اه حاجة تانية بالنسبة للعرس يا رقية على كمالة الحوش اول مانشطبه ونتم اموره طول بنجي وبنحددوه وحيكون بيناتنا تواصل لوقتها..
وقفت وهي تقول: تفاهم مع خليفة.. طبست قامت الصفرة وفنجانه وقالت: صحتين
هو رد بابتسامة وعيونه يتبعوا فيها: سلمك..
طلعت وخليفة طول قربله..
•🌹•🌹•🌹•🌹•
: امتى خشت
مريم: ليها ممكن نص ساعة
خولة تربعت: قبل نبي نجي نحصل عليها جو قبل لتخش لكن امي كسرتها فيا..
راوية تقصص فالبسبوسة: قلتي خالتك عازمتكم
خولة: مرت خالي..
فريال: وعلاش مامشيتيش يا خايبة فطور على الطبطاب من غير تعب
خولة حركت يدها: ماخاطريش.. اونا مشت معاها كنتها خلاص اني بنتقاعد هلبا نجري فالحوش وبرا منه
ضحكوا البنات..
: نجلااااء..نجلاء تعالي
خولة: امشي نوضيها هادي ماتعياش من النوم!
وقفت راوية وطقت عليها الباب متاع دار رقية.. فتحاته وخشتلها
مريم تحط فالبسبوسة في صحون وتمد لبنات عمها: ليلى ونور خيرهم ماجوش لتوا؟!
جت فريال بتجاوب بس قص عليها صوت خديجة تنادي: مريم..
وقفت ومشت لدار المعيشة وهي تقول: نعم ماما
خديجة: بري كلمي واحد من الولاد يجي يعدل التلفزيون
مريم شبحت للشاشة بعدين قالت: حاضر
حليمة مبتسمة: مرومة هادي اللي بيطيح فيها امه داعيتله وباب العرش مفتوح ..
وسيلة ابتسمت: صدقتي اللاي غالية عليا هلبا حبابة بشكل
خديجة تسمع فيهم وهي فرحانة وفخورة.. بينما سعاد قالت: شورها نجلاء فالحمام كان هدا جت طول
ومريم من لما قالت حاضر مشت طول الكوجينة بتطلع منها.. تلاقت مع رقية خاشة ابتسمت بحماس وقالت: شوية وجاية متهدرزوش لين نولي!
رقية ضحكت وهزت راسها بمعنى تمام..
كملت طريقها داخل وبنت خوها طلعت من باب الكوجينة .. شافت عبيدة والزبير يقربوا جايين من حوش حسين ..عبيدة من بعد المغرب مع العمال ..بعد التراويح جي بشير وخدي مكانه وهو مشي مع الزبير متوجه لحوش جده
عبيدة: ابكي على روحك يا حبيبي اني نبني خلاص
الزبير: يا كلب الكلاب .. تعرف كان نحط الموضوع في راسي ندير عرسي في ظرف شهر
عبيدة بهزوة: شهر قلتلي صار! ديرها باهي ونتحداك
ضحك الزبير: ماتلعبش على الوتر اهوا وتبدا تستفز عارف عمك جمعة شادها في جرتي
عبيدة ضحك عالجنب: موضوع انك اطير لبريطانيا بروحك مش صاير منه لو تنقب السمي يا غالي .. وزيد عليها قصة ماخدتك قبلي بتمرخاك هادا حتى هيا نحيها من دماغك..
الزبير: تتكلم تقول الا العروس واتية وتراجي في حضرتك!
ماردش لكن ابتسم.. والزبير ماشافش الابتسامة لان عيونه كانوا قدام على مريم اللي جاية ناحيتهم: شن اديري طالعة عارفة في راجل فالمربوعة وعمال؟!
مريم: عارفة مالا علاش طالعة من هنايا.. غيرت عيونها لعبيدة بعدين ردتهم ليه: واحد منكم يجي يشوف التلفزيون خيره
مشت وهما معاها: شن جاه حتى هوا؟!
قامت كتافها ونزلتهم بعدم معرفة: علمي علمك خش بالك تعرف اديرله حل
فتحت باب الكوجينة اللي خلاته مردود وهي طالعة..
عبيدة فتح الضي ومشي طول للحوافظ المستفة عالدولاب.. فتح وحدة منهم وطلع طرف بيتزا كلاه في مرة
الزبير هز راسه: شكلي اني اللي بنخش للتلفزيون فالحلقة الاخيرة
ضحكت مريم وقالت: برا بسرعة حناي على نار
طلع الزبير من الكوجينة.. وعبيدة بعد بلع قال: مش ناويات اديروا صفرة هكي ولا هكي؟!
مريم: بنديروا غير يجوا الباقي
عبيدة يفتح فالحوافظ وياكل: من مازال
هي ردت: من ما مازالش.. لكن اكيدة على جية معاش يعطلوا
ومشت بتخش وهو بعد كلي اللي خاطره فيها.. غسل يديه وتوجه داخل وهو يسمع في صوت الزبير: شكله بالدور حوش جدي.. فالاول الارضي وتوا التلفزيون
بعدين سمع رد حناه: الخارب هداكا ماشاغلني لكن التلفزيون يا وليدي اخي بلاه
كمل طريقه ولقي الصالة فيها البنات.. وعلي غاطس في طاجين البسبوسة
عيونه مشوا لراوية طول.. لكن هو غيرهم بالسيف وقعمز موجه كلامه لرقية: شن عجبك العريس
رقية باحراج: زي الناس
ضحك عليها عبيدة وقال: ترا طرف..
راوية قامت طرف في صونية ومدتهوله ومعاه كاشيك: خود قبل مايكملها الهايشة هادا
علي رد عليها باستفزاز: في واحد عاقل ينوض ويخلي بسبوسة رقية؟..لكن ماتوجعكش روحك بنت خالي تو مرة تانية كان درتي حاجة قوليلي وحاضر نكملهالك كلها ونخليك تحسي الشعور..وحنغض نظر عن انك مش حتديري حاجة تتاكل اصلًا ..التفت بسرعة لمريم وكمل: مريم بالله خليك برا الموضوع مادافعيش المرة هادي
بس الدفاع ماجاش من مريم.. جي من حد تاني
كان ياكل وعيونه فالصونية: الكيكة المصقعة متاع اول يوم من دارها؟!
نجلاء جت بترد لكن مريم اللي فهماته اشرتلها تسكت وابتسمت: خيرها
عبيدة شبحلها: حاجة صح.. تحرم بعدها الكيكات اللي مدايرتها فيكم تعاودها ..تلاتين يوم نبيها وحاجاتها عليا غير ديروهالي بس
راوية ابتسمت بنصر: من عيوني ما طلبت شي
فريال بهمس ضحكت: حي عالصقع!
رقية كانت جنبها سمعتها وضحكت حتى هي..
علي قام حاجبه وهو يتنقل بنظراته بينهم الزوز بشك: نحلف الا عارفها هيا ودير فالجو بلعاني!
هو باستغباء ومكمل ماكلة: ومن وينلي باش نعرف شن مدايرها معاها!
واذكر لما خش عليها وهي توتي فيها💖
خولة: كان مش مصدقه اسأل نجلاء اهي قدامك اختك مابتكذب عليك
هي ضحكت: الحق الحق طيبة وتسرسح
قامت راوية حاجبها وشبحت لعلي بغرور.. هو سكت لكن قاعد مش مصدق عبيدة
طلع الزبير من دار التقعميز.. في نفس الوقت خشوا وصال ومها من برا
عبيدة قام عيونه ليه: شن صار معاك؟!
هو قعمز: مشت الامور
مدتله رقية طرف بسبوسة..
وصال: علي نوض نبوك شوي
هو التفت: خير ان شاء الله
مها مررت عيونها عالموجودين: موضوع
مريم بشك: موضوع شني؟!
وصال بضجر: ياودي نبوا نمشوا للدكان شن فيها!
راوية بتفنيصة: شن هيا وين تفضلتي بتمشي! ..وكملت بتهديد: تعرفي تقصي خطوة برا السانية نقيم التليفون لبابا وانتي عارفتيه شن قايل
علي ساكت.. جاته من ربي ماخاطراش فالطلوع
وصال ردت بانفعال: علاش باهي!
مريم: ركحوا وفكونا
رقية بمسايرة: اصلاً شن تبوا فيه الدكان وكل شي موجود.. قعمزوا كولوا معانا
مها بتنقريز: نبوا نطلعوا حتى شوية بالله بالله
: يا سبحان الله تموتوا فالتنسريف كبار وصغار
الزوز يبسوا من الخوف.. ولا اراديًا قعمزوا على الجلسة بدون ولا حرف
عبيدة ضحك..
هو خش داخل: مافيش حاجات من الفطور؟!
خولة: اهو توا بنديروا غير خل الباقي يجوا
حمزة كمل طريقه لدار المعيشة بيسلم على حناه ماشافهاش اليوم.. بدون مايشوف لفريال نهائي
الزبير بضحكة شبح لبنات خواله الزوز: تعرفوا من من تخافوا اه
راوية بعد جي حمزة خلاص ارتاحت من جهة اختها.. ناضت وهي تقول: نحط تليفوني يشحن
خولة وشوشت مريم ورقية جايات جنبها: دايرين رواحهم مايبوش يشبحوا وابراهيم هادا ماجاش لتوا بكل
مريم: الشهر ليه حرمته مهما كان
خولة: فرقت .. مولى الفراولة مش هادا رايه
رقية بضحكة: دلعها بس ومن يومها حتى لوجهها معاش شبح الراجل
علي: شن توشوشوا فكونا من القرمة في رمضان راكم
خولة شبحتله بربع عين: كول وانت ساكت كول..
جت راوية.. وخش شرف الدين وبعده ليلى ونور بحوافظ في يديهم
شرف الدين: اووو خونة ماتجيش راهو بتزعلوني
طلع حمزة من الدار سمعه ورد عليه: تعالى بالك تبكي على كتفي بالمرة
ضحكوا كلهم..
شرف الدين: باهي اللي شفناك تضحك وانت النهار بطوله مكشر في وجوه الناس
حمزة قعمز: اما نهار؟! اللي راقد فيه ولا واحد تاني
ضحكوا مرة تانية.. والبنات بدموعهم
وشوي شوي بدوا باقي الاحفاد يخشوا..
•🌹•🌹•🌹•🌹•
بنغازي..
خشت للدار بعد كملت حوستها في الكوجينة.. لقت امها وبوها وخواتها وزوز من خوتها ملتمين في دار التقعميز.. امها قدامها العالة
قعمزت معاهم وسألت: جدي فاطر معانا بكرا صح
سالم: اها بإذن الله
برنية تكشكش فالطواسي: نابيدي قبل نبيها اليوم مغير خالتك غزالة اسبقتني
: كيف اليوم كيف بكرا عادي
: قدامك رمضان مازال فيه يجي بالك 25 ليلة اعزميه عند تبطلي
برنية تنهدت: عارفين جدكم يحب يبقى في مكان واحد مش غالي عليه المشي والجي واجد..مالا عليش تم عند ضو بعد سافروا عيت الصادق
: جدي عطيه ***** بس يعديلها حتى مليون مرة عادي
ردت عليه اخته: بلاده غير .. حتى رؤوف كيفه ديما فيها
برنية بفخر وهي تمد فالصفرة لبنتها باش تفرق: ماينكر اصله كان الكلب ..وكملت بدعوة من القلب: انعنهم مايغيبوا يا ربي..
صفاء تسمع ومبتسمة لين نخصتها اختها في جنبها وسألت: مرايفة عليه اها اعترفي
ردت بتفنيصة: استحي را نلطك!
اختها تغمز: هيا ادويلي نا اختك ..كنك يا صفيوه هيا اعترفي وانتي ماقبل تقولي لين تنشفي الريق!
صفاء استسلمت: ايه باهي.. رايفتله واجد
: متعاركين؟ لاحظتك معاش تكلمي فيه بالتليفون نا
صفاء: فالك ماهو لينا يا فرخة!.. كذا تحركي من مكانك!
اختها ضحكت وهي تمرر في عيونها عالباقي فالدار ..لما لقتهم لاهيين بالهدرزة وما انتبهوش كملت كلامها: كنكم مالا
صفاء يدها على خدها وصبعها الخنصر فوق فمها: مايبش مكالمات في رمضان وعنده حق فيها..
: نجه نجه النسيب الباهي
صفاء شبحتلها عالجنب بعدين ضحكت
•🌹•🌹•🌹•🌹•
الساعة 4:30..
يوتوا البنات فالسحور.. ولتوا ماحصلوش مع عمتهم فرصة باش يقصقصوها
فريال: النوم كبس عليا اني خلاص
نور: ماهو مارقدتوش بعد التراويح هادا علاش
مريم شبحتلها وضحكت: هربتي انتي ورقدتيهم ساعتين مشحطات
نور: باش نقدر نقاوم..
جنبهم الزوز ليلى واقفة على وحدة من الصفر وتحط فالقلاية فيها..
خش عليهم ايوب ومعاه منذر وزهير
منذر: قصدكم مازال؟! جايين بنرفعوا راه
خولة فقدت اعصابها: تحشموا عاد تحسابونا حديد ولا شني!
زهير ضحك بخفة: ناقصة نوم مادورهاش
رقية مدت لمها ووصال صفرة يحطوا فيها المشاريب: نص الشهر يبدا السيمستر نذوره
منذر مد يديه لكتاف ايوب وزهير وهو يرقص فحواجبه: كلنا يا رورو كلنا..
راوية ومريم سألوا في نفس الوقت: حتى حني؟!!
ايوب هز راسه: لا انتوا مازال الدفعة الجديدة بيلهوا بيكم بعد العيد
فريال تحرك فالشكشوكة: حتى حني قالوا مش باديين للعيد
منذر: سعد الناس ..كلية منكوبة كلا اني اللي خشيتلها
مريم بضحكة: هادا الطب اللي تبيه تحمل..
وفي وسط هادا كله كان زهير متكي عالدولاب ويسمع فالهدرزة.. وعيون وصال عليه.. البنية من يوم سمعت بيه انقذها من الغرق وهي تفكر فيه بزيادة عن قبل..
ليلى: اني مش عارفة نظامهم لتوا، الكلية كلها على بعضها قاعدة جديدة
ايوب خدي مبطنة: صار رسمي الدوة بتحولي للتقنية
ليلى هزت راسها..
ايوب كلي منه: علاش؟!
راوية: تحب الكمبيوترات والحاجات هادي من زمان قوية علاش حتى انت
ايوب شبحلها: مطول لسانك.. وانتي شن ناوية تخشي بما انك تكلمتي وتكلمتي
ردت بتفكير: خاطري في فيزياء ومرات كيمياء مش عارفة حايرة بين الاثنين
زهير: التربية ولا العلوم
راوية: لا نبي العلوم
ايوب غير عيونه لمريم وقال: وانتي مريم شن بتخشي
منذر بضحكة: حتى هيا بتنضم لكلية new او بالاحرى قسم
ايوب بعقدة حواجب: وين؟!
فريال: في كليتي
عليا: بانيهالك صبري
ضحكوا كلهم بما فيهم فريال وهي تقول: بنخبره
منذر شبحلها لقاها شادة هاتف خولة وتلعب بيه..جاها وهو يقول: نوضي ديري حاجة معاهم هادا علاش ساكتة من بكري انتي!
عليا وقفت وهي تتأفف.. ماخاطرهاش تسمع محاضرة فـ خدتها من قصيرها
راوية وهي تقصص فالخبزة: هيييه انحرفنا عن الموضوع الاصلي معليشي صاحبتي بتتكلم
ليلى: اسكتوا حي عليكم راه
ايوب فتح عيونه على وسعهم وتصنع الانتباه: كلي اذان صاغية
مريم ضحكت على منظره بعدها قالت: ترجمة وتعريب
زهير مربع يديه: حلو
نجلاء عقدت حواجبها بتساؤل: خشي انجليزي زي فريال تو تعرفي اترجمي علاش تغامري وهو زي بعضه؟!
مريم: مستحيل يكونوا زي بعض صدقيني..مالا علاش يتعبوا في رواحهم ويفتحوا في قسم جديد
ايوب التفت ع نجلاء ورقص حواجبه بابتسامة: الدور عليك السنة الجاية وتي روحك
نجلاء تنكدت: غيروا السيرة تربحوا..
ضحكوا الولاد.. وزهير نزل من ع ركابة الدولاب وقال: بنمشي لحناي
منذر طلع وراه وهو يقول: خودني معاك
طلعوا الزوز ورقية قالت: يوبي في حد من عمامك مع جدك؟!
هو شقلب عيونه: رقية فكينا تربحي تحسابيني قطوسة؟!!
البنات ضحكوا وهي قالت: ماشية فيك شن ندير.. غير بجديات شكون مع جدك من غيركم
ايوب: عمي بلقاسم وعمي فتحي ومنصور
هزت راسها وراوية قالت: ماما قعدت بروحها لابده ادير سحورها وتجي
وما ان كملت كلمتها لين شرين تليفونها.. خداته وقرت الاسم بضحكة: مش قتلكم.. فتحت الخط وكملت: ها ماما..
•تسحروا كلهم.. وعلى اساس البنات يصلوا الفجر ويهدرزوا.. لكن اللي صار انهم طاحوا كلهم عالفراشات بعد صلوه ومش كلهم لحقوا يسمعوا كمالة الهدرزة من رقية لان النوم غلبهم.. تعبوا هلبا اليوم ومارقدوش بكل.. اما الولاد صلوه فالجامع وروحوا لنفس المآل حتى هما.. مربوعة الحاج منصور وماحد فيهم تعب روحه وروح لحوشهم
مع الساعة 8:20 ناضت سعاد للحمام.. طلعت منه.. وهي تمشي لفت نظرها ضي طالع من الكوجينة استغربت.. الدنيا كلها مرقدة
مشتلها ولما خشت شافت بابها اللي على برا مفتوح وخاش منه ضي الشمس.. وين كبهت لقت ولدها الكبير واقف يتكلم بالتليفون
الزبير: منور عشيري.. ازعاج عينك انت التاني.. المهم انت وقضني لما بتمشي باش يا نخطم عليك يا تخطم عليا.. ماشي هي السلام عليكم
نزل التليفون والتفت بيخش شاف امه عقد حواجبه: امي شديري نايضة لتوا؟!
سعاد: كنت فالحمام انت اللي علاش مارقدتش وقت الخدمة مازال
الزبير يثاوب: صاحبي اتصل على قصة الايفاد.. في وراق وهكي يبوا مشية للكلية
سعاد: امتى؟!
قوس الزبير فمه وقال: امتى مانفضوا والكلية تفتح..ممكن الاسبوعين الجايات مش معروف
سعاد قامت حواجبها ونزلتهم: راك تنسى بوك وشن قايلك.. سفر بلا زواج انساه
هو رد بملل مع ابتسامة: عارف حتى اني ولين يجي موعد الرحلة ساهل يام
خشت عليهم رقية حتى هي واضح عليها النعاس: رحلة شنو
سعاد التفتتلها: حتى انتي نايضة.. يا حنة يحكي على السفرة متاع القراية
رقية: اااه والله مدروخني النوم.. فجأة قالت وكأنها اذكرت شي: حي عالنسوة!
الزوز شبحولها بتعجب.. وهي شافت للزبير: فريال وصتني نوصلك كلام واني نسيت مرة وحدة وراح عن بالي.. تعرف من اول يوم رمضان
الزبير: غريب.. ماجابتليش سيرة بكل
رقية: تي ماهو عبت عليا حتى قلتلك
سعاد: وشن هوا الكلام هادا؟!
رقية ابتسمت: في بنية اسمها ياسمين بنت جيرانا تسلم عليك هلبا .. قالت متلاقية معاك سنة اللي تخرجت ووين سمعت بيك بتطلع برا كلمت فريال وسألتها عليك ليلة رمضان
الزبير عاقد حواجبه بتفكير: ياسمين؟! ..سكت شوي بعدين قال: مانذكرش الحق
رقية: البنية قالت مهدرزين ..بنت عيت النعاس يا زبير اللي سانيتهم ورانا
هو قعد يعصر في دماغه ثواني بعدين قال: معاش نزبط شكلها لكن بقولي مرة جتني وحدة نتذكر اسم بوها او عيلتها النعاس..
سعاد: يا فرحتي بيك هادم جيران خوالك من عمر معقولة ناسي البنية مفروض غير من الجي هني تعرفها!
رقية ضحكت: حي عليك
الزبير حتى هو يضحك: خيرك يما عادي راهو شن تبيني اللي يوقف عليا 5 دقايق نعطيه حيز في ملفات الذاكرة تي يا الله نلايم عمري توا .. بعدين اني متخرج ليا عامين حتى اللي قاريين معاي لو نشوفهم فالشارع مانعرفهمش ..التفت لرقية وقال: كان سألتكم مرة تانية قولولها يسلم عليك وخلاص
رقية: ما اعتقدش تسأل هي بعتت السلام وخلاص
الزبير قام حاجبه بتفكير: ياسمين.. ياسمين.. التفت لامه وخالته وقال مرة تانية: يمين بالله مش مذكر وحدة بالاسم هدا مرت عليا في حياتي كلها!
رقية تضحك: والبنية يا روحي تسأل وتعاود ..خزي عليك
الزبير: لا حول ولا قوة الا بالله.. نمشي نرقد خيرلي
سعاد: اي سلم ولدي برا تريح
هو مشي ورقية مزال تضحك..
سعاد شبحتلها: مدامك نايضة قعمزي قوليلي شن صار مع خو ياسمين يا حنة
وبدون ماتعطيها مجال ترد جبدتها من يدها وطلعوا برا..
•🌹•🌹•🌹•🌹•
الساعة 12:40 مساءًا..
فتحت عيونها بانزعاج وحطت يدها قدامهم: سكروا الضي!
خولة اطبق في بطانيتها: نوضي نوضي يا للا الظهر على اذان
فريال تكسلت في فراشها وهي تقول بتذمر: امتى رقدنا حني باش انوضوا! تؤ..
حركت عيونها عالدار كلها.. لقت فراشات تغريد والتوأم فاضيات وخولة اضم فيهم.. شبحت للجهة التانية مكان فراش رقية فاضي وغادي منه ليلى كيف فاتحة عيونها وتشوف فالساعة من التليفون
سألت وصوتها مرخي من النوم: شكون ناض غيرنا
خولة تفتح فالروشن: الصغار برا.. وحناي وجدي بكري شوي حتى هما
وقفت فريال على حيلها: نمشي للحمام ونجي انوض الباقي.. ماضميش فراشي تو نجيه
اما ليلى قعمزت في فراشها وهي تلم في شعرها بحيرة: مش عارفة شن ندير اليوم
خولة: كان هدا جربي هامبورجا الطاجين
ليلى بعقدة حواجب: كيف هادي؟!
خولة قعمزت: تو نعطيك طريقتها
•برا من الدار.. الحاج منصور خدي مصحفه وبيطلع بيه برا..
فريال بابتسامة: جدي صباح الخير
منصور شبحلها: قولي قايلة الخير.. وين تبوا بيه هالنوم هادا كله.. وكمل وهو عاقد حواجبه: مالا انتي بس اللي فقتي؟!
هي بضحكة: وخولة وليلى ورقية والباقي سبااات
هز الحاج منصور راسها ..حط المصحف ع المكتبة وقال: حتى هدوكا عجبتهم الرقدة من بكري صابر ونقول اهو ينوض واحد منهم لكن شكلهم استانسوا
قعدت اتبع في جدها بعيونها وهو ماشي للمربوعة ..كملت طريقها للحمام وهي تهمس: يا طيحتهم
خشت للحمام وصكراته عليها من هني .. وسمعوا الباقي صوت جدهم يرعد رعد وهو ينوض في الولاد
البنات في الدار التانية وقفوا من نومهم استعداد..
رقية كانت تكنس فالحوش بالمكنسة العادية مابتش تولع الكهربائية على خاطر الراقدين..
طلعت سعاد بسرعة فاقت عالصوت تساوي في شعرها وترعش: صوت بوي هادا حي عليهم وحي! ..تلفتت على اختها اللي كانت تضحك: فيه حد الحمام؟!
رقية رقصت حواجبها: فيه
سعاد قعمزت عالجلسة فالصالة وحطت يديها على بعض: يا حليلييي
•خولة واقفة في فم الممر وتضحك: غير شوفيهم كيف يجروا
ليلى كانت تشبح معاها وتضحك.. بس لما فات بشير وواضح عليه الانزعاج وانه نايض بالسيف قلبها وجعها وقالت: بشوره يا روحي تعبان مع العمال امس وماحصلش ريست الا بعد الفجر
لكن خولة عاجبها المنظر وتضحك..
ومن باب دار المعيشة حليمة واقفة وتشبح لبناتها الزوز وتقول: من مبكري دايرة عليهم طريق واني في قولة نوضوا يا وليداتي خير ماجدكم يجيكم لكن هاتي من يسمع كلامك ..ريتي وين جبدوهم بالسيف ناضوا زي الرجالة الطيبة..
رقية: تعبانين يام وواخدين يرقدوا
حليمة: زعميته مايعرفوش جدهم ولا اول مرة يباتوا هنايا لكن كساحة وتصكير راس ..وكملت بقيمة حاجب: ماعندهم لمن يطلعوا غيره نفس الطبايع.. مقيولة العرق يمد لسابع جد يابال واقف!
جت خولة ووراها ليلى وفريال يضحكوا..
خولة وعيونها على باب الدار المصكر سألت: حي هادم قاعدات لابدات؟!
حليمة: الخوف باهي
فريال قدمت للباب بضحكة وقعدت ادربك عليه: اطلعوا اطلعوا عليكم الامان
•طلعوا البنات.. وروحت كل وحدة لحوشهم بيديروا الفطور.. ماعدا فريال اللي مشت لزمزم باش تعاونها .. اما الولاد فاللي كان عنده خدمة زي الزبير مشالها وفاللي ولى رقد في حوشهم..
•🌹•🌹•🌹•🌹•
بعد ساعات في مصر..
خش من باب البلكونة بعد ماكان يدير في مكالمة .. امه وديما فالكوجينة يجهزوا فالفطور.. اما بوه شاد الجريدة ويقرا فالاخبار باهتمام
وجمال متكي عالصالون.. يكتب في رسالة نصية لصاحبه ليبي في مصر يبيه يكلم باقي الشباب اللي تعرف عليهم لما جي في 2005 ويطلعوا بعد الفطور
الصادق لما سمع باب البلكونة تصكر قام راسه ونزل النظارات: خالد هضا صح
عبد الرؤوف جي وقعمز معاهم: اهاا هو.. دقيت عليه نسأل عالشغل
الصادق حط الجريدة على جنب وقال بعقدة حواجب: ايه ايش مداير معاه؟! عرف يمشي وضعه؟!
عبدالرؤوف حتى هو عاقد حواجبه بتفكير ويرد على بوه وعقله مش معاه بس منتبهله: لا ممتاز كيف ماحكيتله انت قاعد يدير ونا نراقب معاه اول بأول هو ويحيى
الصادق هز راسه: نا كلمتهم امبارح لكن ضروري كل يوم بيومه .. تو هما ماسكين كل شي مش كيف قبل يعني في حاجات واجدة جديدة عليهم
هز عبدالرؤوف راسه بدون مايرد.. بوه رجع قام الجريدة ورفع النظارات على عيونه.. فتحها عالصفحة اللي كان فيها وكمل قراءة
اما هو كان حاط وحدة من رجليه فوق ركبة رجله الثانية ومتكي بمرفقه على يد الصالون ..في كفه التليفون مسنده تحت ذقنه وسارح بعقدة حواجب
جمال بعد بعت اخر رسالة نزل تليفونه ..حرك عيونه عالصالون وثبتهم على خوه لما لقاه مش ع بعضه.. طريقة تقعميزته وعقدة الحواجب هادي نادر تبان عليه الا لو كان حاير ويفكر او شايل هم..
جمال قربله وهمس: كنك؟!
عبدالرؤوف شبحله.. فكر يشاركه شن يدور في عقله بس تراجع في اخر لحظة: مافيش.. وقف وكمل: بنعدي نقرا قرآن.. حتى انت افتح مصحفك حقيتك وين طاق
حك جمال شعره باحراج.. وبالفعل ناض للرفوف خدي المصحف اللي يقرا منه
اما عبدالرؤوف.. خش لداره ومازال يفكر في خالد.. الراجل واضح جدًا اسلوبه متغير ويرد من راس خشمه مايعطيلاش فالمجال يتكلم والحوار متاعه كان هجومي وحاد..
تنهد بعد خدي مصحفه وهو يطرد فالافكار هادي من راسه.. مؤقتًا
•🌹•🌹•🌹•🌹•
قبل آذان المغرب بشوي..
الفطور واتي عالحطان بس
ومريم كانت تحكي لمنصور على فرعاسة القايلة: كان تشوفهم يا ناري كيف ينقزوا لو عندهم جناوح راهم طاروا..
هو يضحك: جدي ويتلامسوا عنده الخيوط
مريم: يا ريتك خليت للو كساد بلاها
منصور: خوات ناديا ملتمات كلهم وموصياتها بالحرف تجيبها.. عارفاتك ديما تشدي فيها
مريم ضحكت باحراج: واخدة عليها تلعب وديما معاي
جتهم خديجة وهي تقول: تسلم عليكم مفيدة..
منصور التفت لامه: عليك وعليها السلام.. كانت تكلم فيك؟!
خديجة: ايه توا كيف صكرت منها شوي وجاية
مريم: حتى هيا فاطرة في حوش خو عمتي ذهيبة امس
منصور هز راسه: قالي حمدي
خديجة: شن مرومة هيا نحطوا وقت عالاذان
مريم: هيا هي ..نرفع حصة حوش جدي ونجي
طلعت مريم بسرعة وخديجة قالت: درتلك كفتة الدجاج
منصور قدم باس راسها بابتسامة بعدين وخر: يطوللنا في عمرك.. شاف لساعة يده وقال: نمشي انوض منذر ومعاذ هو هداكا
ردت عليه: تربح اجر يا ولدي
•🌹•🌹•🌹•🌹•
في حوش الامين..
خش هو للكوجينة وقال: هيا سلم بنتي الاذان قريب
خولة استغربت فيه قاعد فالحوش.. بس ردت: حاضر ثواني ونجيب الصفر
طلع الامين وهي كملت حوستها.. اليوم تأخرت شوي هادا علاش قاعدة شارقة وزيادة مرت خوها اللي خدت عنها جزء من المسؤولية العام هادا لدرجة حتى التراويح بدت تمشي يوميًا مع الباقي.. اليوم وتت نوع في شقتها ومشت بتفطر عند اماليها هي وراجلها
سمعت باب الحوش انفتح بالمفتاح وهدرزة خوتها العالية ..بعدين خطواتهم وصوته مرة تانية تصكر
خشوا التلاتة للكوجينة.. حمزة قلب الكرسي وقعمز عليه بطريقة معكوسة
اما كمال اتكى عالدولاب: اسمع كلام خوك .. الخدمة تستحقها بالذات وانت في مجال طبي لما ينهرد جيبك ..والعبد لله قدامك اكبر مثال
زهير قعمز على حاشية الطاولة: تي عارف ..غير عيونه لحمزة وكمل: لكن المحل مش ليك بروحك الزبير عنده حصة تحط فيا فالوسط علاش
كمال: خوك ماتكلم الا ومتفق معاه عادك بيه يهبد من راسه قبل انت؟! وحتى بلاها يا ودي عندك شك فالزبير انت؟!
زهير بملل: واااااك.. قداش تحبوا تقلبوا الدوة على مزاجكم! اني عادي لو يبوا حد يشد معاهم ومش ملحقين نمشي لكن مش لازم بالفلوس ..قصدي تبوها بالمفتشر مرات ماتقدروش تخلصوني وتبدوا تتلكونوا وتضغطوا على رواحكم على حاجة مش ضرورية.. اني الخدمة نلقاها حتى في مكان تاني ..
كمال مسح وجهه ورد: اسمعني جاي ..اني اللي من يوم طلعت نتيجتي في ساعتها مشيت ندور في خدمة باش ماناخدش مصروفي من الولاد ولا من بوي وشوف امتى حصلتها ..في سنة تالتة ..تلات سنين واني نجري في طرابلس الكبيرة وانت جاتك لعندك وترفس فيها.. قام حاجبه وكمل: بعدين اطمن اني نجاملك حمدي يجاملك لكن حمزة مستحيل تعرفه كويس انظني كان مش واثق من روحه يقدر مايفتحش فمه
حمزة يطربق في صوابعه: خليه هادا خاطره في من يردسه طريحة تسرحله دماغه باهي
ضحك زهير عالجنب وهز راسه بعدين قال: مداما هكي معناها موافق
حمزة شبحله وابتسم بهزوة: غير صل استخارة قبل ماتردش طول
خولة طول الوقت كانت تسمع فيهم ولما قال حمزة كلامه ضحكت.. وضحكوا معاها كلهم
بعدين قالت بتساؤل: توا بتغيروا التوكات مش زي قبل انت نهار والزبير ليل؟!
حمزة: لين نشوفوا
زهير حك لحيته وهو يمرر في عيونه عالرخامات: المغرب قريب راهو
خولة باستعجال: تعالوا ارفعوا البخش
كمال قامهم وطلع بيهم .. وزهير وحمزة قعدوا يهدرزوا عن المحل
على خشة ذهيبة لابسة قفطان حوش وريحة المسك تفوح منها: خليتك بروحك
خولة ردت: شبه كملت انتي اطلعي كيف مدوشة تو يعلق فيك
زهير وحمزة: نعيمًا يام
ذهيبة: الله ينعم عليكم ان شاء الله..
خولة باستغراب: يام بوي شكله مش ماشي لحوش جدي وحتى انتي واضح مش باينلك بتطلعي.. وكملت بتساؤل: على اساس فاطرين غادي اليوم!
ذهيبة: كنا.. بكري اتفقت مع كلثوم تجي لكن ماصارلهاش ..وبروحي مع عمتك سعاد غادي عارفتينا مش مانجا
خولة جت بصفرة التمر والحليب: كيف ماصارش؟!
ومدت الصفرة لزهير باش يرفعها وهي تلحق الميه..
ذهيبة: خشت عليها مرت خوها.. وكملت تقول باش تخلي بنتها تستذكر المراة: هديكا اللي قعمزت جنبك في تلبيسة ليلى وحطت عينها على فريال لولدها
لحظة صمت.. زهير طلع بالصفرة وهو مبتسم.. اما خولة حست بنظرات خوها الكبير تخترق في دماغها ومن توترها ماقدرتش حتى تشوفله.. حدها ضحكت بارتباك تحاول ترقع: منين جايبتيها الدوة هادي ماما! كان في شي زي هكي رانا اول السامعين
ذهيبة بتأكيد: خدت رقم وسيلة من كلثوم قدامي وطول الليلة مانحتش عيونها من بنت عمك ..وكملت بعقدة حواجب: تو شن مانعرفش اني فالنساوين وحركاتهم!
خولة تبلع في ريقها بالسيف وفي خاطرها تقول «صحيتي ماما عالتوريطة»
ارتفع اذان المغرب وذهيبة وقفت وهي تقول: صدق الحق.. هيا تعالوا كان بتفطروا
طلعت ذهيبة وخولة قالت جاني الفرج وجت بتطلع في جرتها
بس مع حمزة لا فرج لا مسعود.. وقف بخفة وجبدها من يدها: شن الخراف اللي سمعته؟! قولي اللي هناك خولة نزبطك راهو!
هي جبدت يدها وقالت باستسلام: زي ماسمعت مراة عجبتها فريال وكلمت عليها مرت عمي .. وكملت بتطمين: موضوع عابر ومشي على حاله
قال والحواجب معقودة ونبرة صوته تخوف وفيها شك: متأكدة خولة
خولة غمضت عيونها وفتحتهم: والله العظيم زي مانقولك ومانزيد غير فالنفس.. حتى مرت عمي مادورتش الموضوع ورداته طول
حمزة زفر براحة ..بعدين شافلها من جديد بقيمة حاجب: مرة تانية لما بتكذبي اعرفي كيف تكذبي مش تقعدي تلكلكي..
خولة بتوتر: فالجديد ينجد موضوع زي هكي نجيك نقولك طول ومانتعبش روحي من الاساس
حمزة بحدة: فالجديد معاش في مواضيع بكل!
وطلع من الكوجينة وهو ينادي: تعالي افطري هيا
خدت مالقي الميه وطلعت وراه وهي اتمتم: شورنا مانديروش حاجة وتكمل للاخير.. معاش مدخلة فيهم ينفلقوا الزوز
•🌹•🌹•🌹•🌹•
بعد روحوا من التراويح..
كانت سعاد في حوشها هي وولدها الصغير من بعد الفطور على طول .. جمعة حل صيامه فالسانية وخداهم
عبيدة كان لاهي بالعمال.. بشير وشرف الدين وطارق عندهم مباراة طالعين لقهوة يحضروا فيها.. لان حوش حسين اللي قبل ياخدوا فيه فراحتهم دوشة العمال حرمتهم منه..
الزبير مشي للمحل وحمزة مع عمه خليفة فالفيراندا يهدرزوا عن اللي بيديره حمزة بعد العيد.. وخليفة كان ناوي حتى هو يبني فالدور الثالث لكن ماحددش امتى
في حوش بلقاسم مفيدة تهدرز على خوتها وخواتها.. وعندهم وصال وراوية..جوهم ولا احلى
الحاج منصور مع ولاده مشوا يعزوا في قريب ليهم..
حليمة بعتت بنتها مع كناينها الكبار الثلاثة.. وهي كانت ناوية من صبح تاني يوم تمشيلهم مع باقي الكناين واللي خاطرها من الحفيدات تلحقهم بعد الفطور..
مرت اخ كلثوم كانت ناوية تقعد تهدرز لوقت متأخر.. لكن بعد صارت حالة الوفاة تحشمت وروحت على قد ماشدت فيها حماتها.. بعد سقدتها مشت كلثوم مع بناتها لحوش شيابينها ولقت قدامها فريال وعليا وخولة ..ونجلاء طبعًا.. اما المربوعة طالع منها صوت نزار ولدها وسراج يصيحوا عالبلايستيشن.. وقدامهم مالذ وطاب من الفطور.. ايوب طالع مع صحابه وزهير في حوش بلقاسم
ابراهيم كان في خدمته والضغط متاع اخر رمضان بادي من توا .. واخيرًا كمال قرر يرقد بما ان الحوش فاضي والدنيا هدوء..
•في حوش فتحي..
صكرت بهية من امها وناضت قرت شوي قرآن بعد بخرت حوشها ..فالاول جت بتمشي لحوش عزوزتها ..خشت لدار نومها بتغير قفطانها وتاخد وشاح
لبست وكملت وحطت عطرها.. صكرت دار النوم بعد طفت الضي
وين جت فايتة من قدام دار بناتها هبت نسمة
بهية تنهدت بقلة صبر وولت على وراها: راوية ضروري تشرع الدنيا ..الجو بدا يتعدل شن هوا اللي مقلقها مش عارفة!
قدمت وبصكره شافت ضي دار نوم سلفتها اللي جنبها والع.. روشنها مفتوح ونازل عليه الستار وفي ظل حركة
بهية بصوت مسموع: وسيلة.. وسيلة مالا قاعدة
تحول الستار وبانت وسيلة: قاعدة يا وخيتي كنت نحدد في حوايج صبري وابراهيم ..فريال اليوم خلتهوملي
بهية بضحكة: مالا افتحي الباب جاياتك
وسيلة: تآنسي.. اهو نفتحه ونخليه مردود دفيه وخشي بعد تجي
بهية خلاص بتصكر الروشن: واتية اني نلبس في رجلي بس
صكرت الروشن ومشت تتأكد من الغاز او كان في حاجة فالضي
بعد تممت على كل شي طلعت وجبدت الباب وراها..
•🌹•🌹•🌹•🌹•
في حوش الحاج منصور..
مقعمزة كلثوم في دار المعيشة ومعاها عزوزتها وباقي البنات يهدرزوا..
وقفت حليمة بتمشي للحمام.. وهي طالعة نادت وحدة من التوأم بصوت عالي: فراولة
حليمة استغربت ووقفت.. شوي وسمعت الرد من الدار: يا عيونها
غيداء: ماعرفناش نتصلوا بالارضي كلميلنا تغريد تجي
: غاااااالي والطلب رخيص
وبالفعل فتحت تليفونها باش تتصل بأمها تبعت تغريد هني
حليمة قربت من التوأم: شن فراولة هادي انتي وياها؟!
غيداء ابتسمت: دلع فريال الجديد حنينه وقالت مايناديني حد بغيره
حليمة قامت حواجبها بتعجب: العفو وهادا من وين طلع؟!
جيداء: حمزة سماهولها.. سمعت نور قالتها لنجلاء قالت كانت زعلانة خاطر قاعدة بلا اسم دلع مشي هوا قاللها فراولة وقال كلكم نادوها بيه
حليمة مازال رافعة حواجبها: اياااه..
وين جت بتلف تكمل طريقها قالت غيداء: حنينة مازال عندك الحلوى هديكا
حليمة بضحكة: قاعدة عندي وبنعطيهولكم انتم بس.. راجوني لين نجي
ومشت من جنبهم..
•🌹•🌹•🌹•🌹•
متكي على سيارة عمه .. حاط رجل فوق رجل ومربع يديه وهو يراقب فالعمال كيف يخدموا ويعطي فيهم في ملاحظات
عبيدة: لالا يا معلم.. ماتعبيليش الدنيا خلي الحوسة كلها هنايا
قالها وهو يأشر بيده
هز تليفونه في جيب سرواله.. طلعه بيده التانية ورد بدون مايشوف الاسم: هاااا
: عبيدة فاضي؟
تلقائيًا نبرة صوته تغيرت..نزل يده التانية وحطها ورا رقبته.. وقف على حيله وقال: علاش؟!
: غير بلا برادة قول
ابتسم: فاضي..ولو مش فاضي نفضالك
: باهي مليح .. تقدر تجي لحوش عمي بلقاسم نبيك
بلع ريقه ..وقلبه زادت دقاته ..الجملة اللي قالتها اثرت عليه هلبا: جايك
نزل التليفون وهو مبتسم عالجنب.. شبح ناحية العمال وقال: خمسة ونولي
واحد منهم رد عليه: خد وقتك يا معلم
مشي عبيدة.. بعد ماتبعد انفتح باب حوش جده وفي يد قعدت اطق بقوة
سمعوها حمزة وخليفة من الفيراندا.. وقف حمزة ونزل درجتين بدرجة ..شاف فريال مطلعة راسها ونور وراها مش باينة هلبا.. جاها بسرعة وهو يقول: خيرك تقربعي؟!
فريال ابتسمت ومدت صفرة فيها براد شاهي بطواسيه وحاجات حارة من الفطور: للعمال يا روحي.. اليوم عمتي زمزم مهناش حسبتهم نونا
واشرت براسها للجنب..
غير عيونه للجهة نفسها شاف نور..وهي دارتله باي من ورا فريال..
حمزة خدي الصفرة: مرة تانية عندك الخارب انتي وياها استعملوه .. غير عيونه لروشن المربوعة اللي عياط الولاد طالع منه: ولا كلمي هادم اللي مقعمزين فالمربوعة..
فريال: حاضر يا ودي
نور كانت تتفرج عليهم ومبتسمة بحب..
والمنظر نفسه شافاته حليمة وهي راجعة من الحمام وانقطع عندها الشك باليقين..
•🌹•🌹•🌹•🌹•
خشت مريم للكوجينة ورا راوية: شن تبي
راوية فتحت الفريز: كلمت عبيدة قتله يجيني
مريم جبدت كرسي وقعمزت: قصدك خديتوا موضوع الكيكة جديات
وابتسمت..
راوية طلعت الطاجين المرش: اممم.. بعد العصر شوره ناض ومشي للمحل.. مانندريش لين خش عليا بابا بالكيسة متاع المكونات وقالي جابهم عبيدة
وقفت مريم وشافت للطاجين: احلى من اللي درتيهولنا بكري
راوية ضحكت: بري بلا قطاف.. لوز وبندق مهروش لوحته فوقهم وكان الله ويبقى الله، مش حاجة ابداع يعني
مريم: اصلًا عارفتاك كان بتفتلكي حاجة بتعطيني اول وحدة
راوية مبتسمة: ريتي ..ماشاء الله عليك زابطة مايحتاجش حتى نقول
طقطق الباب.. ومريم قالت: هوا
مشت بتفتح.. وراوية طلعت وراها بالطاجين اللي حطاته في كيسة
عبيدة شبح قدامه: اهيا البلغارية جت.. اهلا بالحامل والمحمول
ضحكت راوية ومدتله الطاجين يشده.. ومريم قالت: شوف الجمال بالله شوف
عبيدة كان يشوف للجمال ولكن الجمال البشري اللي قدامه مش اللي بين يديه.. ليه ايام عليها وحتى لما يتلاقى معاها يقعد يتحاشى فيها قدر الامكان على خاطر الشهر الفضيل ..توا بالرسمي ماقدرش ينزل عيونه لين كحت مريم بقوة
حس عبيدة بالاحراج قدامها.. مهما كان
خدي الكيكة وراوية تشبحله بتعجب من حالته اللي تغيرت: هي نستأذنكم اني
مريم: خش.. حتى زهير وحمدي هني!
عبيدة: مرة تانية.. خليت العمال بروحهم.. مرر عيونه بيناتهم الزوز وهو يقول: سلام
لف وتحرك والزوز ردوا عليه: مع السلامة..
صكرت مريم الباب وخشت مع راوية اللي تقول: خيره حسيته ابصر كيف تغير جوه
مريم شادة ابتسامتها: اسأليه بروحك شن دراني اني يا ويري
وخشوا للصالة..
اللي في تركينتها مقعمزات مها ووصال.. والاخيرة كانت مرة مع مها وعشرة لا .. مركزة بكل حواسها مع زهير ..شن يدير كيف يهدرز حركاته وسكناته كل شي
بضجر نفضت قفطانها: وصال نوضي للدار نلعبوا!
وصال شبحتلها: خلينا هنايا نسمعوا الهدرزة
مها عقدت حواجبها بزعل: نوضي مبسلك مولية راهو!
وصال ابتسمت ووقفت: باهي هيا ماتزعليش.. شن رايك نطلعوا نشدوا القطاطيس اللي تحت الصنوبر
مها بحماس: هيا
وقفوا الزوز وطلعوا يجروا برا.. وصال مستمتعة وتلعب لكن زهير يدور هلبا في بالها.. مفهوم السوبر مان او الانسان الخارق والكامل عندها ولى هو وبس
•🌹•🌹•🌹•🌹•
عند عبيدة..
روح على عجل وطلب من خليفة يوقف على العمال..اي حاجة تخص راوية مايحبش يأجلها لبعدين.. لازم وقتي بالذات الماكلة يحس بلمسة يدها قاعدة فيها💞..
خش للحوش وللكوجينة طول.. خدي كاشيك ونحا الكيس وبعدين النايلون الملفوف بيه الطاجين.. خدي اول لقمة حطها في فمه وهو ياكل باستمتاع
ضحك بعد نزل الكاشيك بش يغرف مرة تانية: شن يصبرني عليك يا ويري بس!
•🌹•🌹•🌹•🌹•
في حوش صبري..
مقعمزات السلفات الزوز وقدامهم صفرة قهوة وحلويات والتلفزيون عالليبية..
وسيلة: لا ع البال ولا ع الخاطر
بهية: هو مسكين مريض من وقت متوقع في اي لحظة.. لكن شورنا على شان ليه سنين مع المرض ماستوعبناش وفاته وقلنا خلاص تعايش معاه شن بيديرله اكثر مادارله
وسيلة تنهدت: الموت ماتشاورش.. الله يرحمه ويغفرله
بهية: آمين.. سكتت شوي وكملت : رمضان السنة هادي سبحان الله صار فيه كل شي.. عيد الفاتح اول يوم وموضوع رقية وولد النعاس.. ووفاة الراجل هادا.. كملت بتضييقة عيون وضحكة: قلبي يقولي مازال بتصير فيه حاجة تانية
وسيلة: كانش بيان لرقيوه بس..
بهية هزت راسها موافقة للاحتمال اللي اقترحاته سلفتها بعدين قالت: مازال سريب حوايج العيد.. مشوبة الحق ..راوية من قبل رمضان وهي تقولي بناخد اكثر من لبستين اني بنبدا كلية ومش عارفة شني.. ذوقها صعب بنتي هادي واني وجيج المحلات كرهته حسني
وسيلة: بيبدوا بعد العيد على طول؟!
بهية: ان شاء الله
زفرت وسيلة وقالت: كان غير ربي يهدي ابراهيم ويسمع الكلام
بهية رشفت من فنجانها: مازال على رايه؟!
وسيلة بضيق: مش مخليلي حتى مجال للنقاش وين مانفتحله الموضوع ينوض ويسيبني
«وسيلة مقايلة للعيلة ان ابراهيم سيب على خاطر يدير فلوس اسرع زي ماقال بوه بالزبط.. الفرق ان صبري مايعلمش بالسبب الحقيقي عكس وسيلة اللي تندري.. وبهية لانها تعرف بالعلاقة بين نجلاء وولد خالها مافاتش عليها الكلام وزبطت طول علاش الولد دار هكي»
مالقتش شي تقوله غير: زيدي حاولي معاه وان شاء الله خير وخلاص
ووسيلة كأنها كانت تستنى في حد يشجعها طول ردت: بنراجي فرصة باهية ونشده ساد ماسكتتله
•🌹•🌹•🌹•🌹•
تاني يوم..
مع الساعة 11 مشت حليمة مع كناينها التلاتة اللي قعدوا امس.. اما مفيدة وناديا واللي حتى هما محسوبات ع الكناين.. قرروا يمشوا مع بعض بعد العصر شوية ويروحوا.. والكناين الكبار ناويات يرجعوا حتى هما بعد العصر
وبالفعل صلوا العصر وركبوا السيارات..
بدت الشمس اطيح ..وقعد الحاج منصور يسقي فالشجر كالمعتاد
ومعاه مريم وراوية مستلمات الورد ونباتات الزينة ..جنبهم لتين خلتها امها لعمتها ترد بالها منها
وداخل حوش الجد رقية مع باقي البنات يتعاونوا عالفطور..
التوأم وتغريد ياكلوا من اللي يطيب.. عكس مها ووصال اللي بدوا يصيموا تشبهًا بالكبار على قولتهم
من بداية السانية خشت سيارة عبيدة.. ضحك لما لمح البنات من بعيد يبخوا فالورد.. طلع يده من روشن السيارة وهو يحرك فيها بكيسة فيها مواد غذائية
منصور كان بعيد عنهم في شجر البرتقال..
مريم شافاته ظللت بيدها على عيونها وضحكت لما عرفت محتوى الكيسة.. وراوية زيها
•فات الوقت.. بعد الفطور روح منصور بمرته واخته.. صلوا التراويح العيلة كلهم فالجامع.. بعدين الحاج منصور وهالمرة معاه خليفة وولاده اللي بيمشي منهم للعزي ولوا غادي
ساعات بسيطة وروحوا..رجالة ونساوين
•في وحدة من السيارات..
روحت ذهيبة بعزوزتها معاها في سيارة حمدي كون الامين عنده مشوار تاني وماجاش للعزي اصلًا اليوم..
سبقت خديجة وركبت حليمة معاها😂.. المهم
كانوا يهدرزوا ومن موضوع لموضوع نطقت ذهيبة: هو الحق يا اللاي زي ماقتلك قبل ناوي بعد العيد.. ماندسش عليك الايام اللي فاتوا خممت ندورله لكن كمال هيبني منه وارتخيت
حليمة: لا دوريله لا اتعبي روحك ..حمزة مطروف العين بفريال يا حنة ومايبي جنس مراة غيرها
حمدي تفاجأ.. عارف طبعًا بغيّة خوه لكن اللي فاجأه حناه على حد علمه انها ماتعرفش..بس صاحبة نصيب الاسد من الصدمة هي ذهيبة: شن تقولي اللاي سامحيني راهو تخلطت عليا اني وشورني قعدت نسمع غلط ولا كيف!
حليمة ابتسمت بسمة خفيفة: سلامة وذانك.. سمعتي صح ولدك يبي بنت عمه صبري ونهار يكلم جده عليها قولي قالتها اللاي
ذهيبة ضحكت بعدم استيعاب: حمزة ولدي! حرام ماحسسني!
حليمة: زي اللي قبله ماحسس حد لين قال نبيها
انحمر وجه حمدي وتمتم: تو شن دخلني اني!
شبحتله حناه بربع عين: علي صوتك وليدي
زراته الضحك ورد: قتلك صح كلامك
التفتت حليمة قدام وذهيبة مازال مش مستوعبة.. كانت ديما متخيلة بنت هادية وصبورة لحمزة وهادم عكس مواصفات فريال تمامًا.. بس ماتقدرش تنكر انها فرحت هلبا باللي قالاته عزوزتها
•🌹•🌹•🌹•🌹•
مروا يومين.. جوا الرجالة فضوا رسمي في رقية.. واختاروا تكون جيتهم بعد التراويح باش مايغلبوش اهل الحوش بعشي وحوسة في رمضان..
قاعد مافيش تواصل بين رقية وخطيبها ..خليفة قاله للعيد
من بعد يوم الفضانية مروا خمس ايام برتم معتاد .. وبمرورهم انتهي النص الاول من رمضان..
يوم 15 رمضان..
بعد صلاة التراويح.. روحوا عيلة الحاج منصور من الجامع.. كل واحد خش حوشه لكن بالهم مشغول بشي.. وولاده باعتين اكثر شخص ليه قدرة على الاقناع وتغيير الآراء فالعيلة لبوهم
صبري بمسايرة: مش لازم تمشي لعند غادي بيبثوهم في الاذاعة يا بوي اسمعهم عالراديو معانا
الحاج منصور باعتراض: ابدًا.. شاف للفيراندا واشر بزقيته: هيا يا خليفة
نزل خليفة وعيونه على خوه.. اللي التفتله وهز راسه بقلة حيلة
الحاج منصور بعقدة حواجب: هيا يا ولد!
تحرك خليفة وركب سيارته.. والحاج منصور ركب في جنبه ..ولع وطلع.. قعد صبري بعيونه مع السيارة لين طلعت من البوابة بعدين تنهد وجي بيخش للمربوعة ..
جاه ولد خوه: ماقدرتش تقنعه؟!
صبري هز راسه بمعنى لا
منصور زفر: يمكن المرة هادي حظهم
صبري: نقولوا ان شاء الله.. شن نبوا حني اصلًا
خشوا الزوز للمربوعة وين ماموجودين باقي ولاد الحاج منصور
بلقاسم: ماباش ولا؟!
قعمز صبري: تعرفه بعد يصكر راسه عمرك ماتقدر عليه
فتحي: غير تفائلوا انتم بس
تنهد الطاهر..وحسين جبد راديو بوه المحطوط جنب الامين وفتحه
•🌹•🌹•🌹•🌹•
في حوش فتحي..
مريم مقعمزة في الصالة مع مرت عمها وبنت عمها وتقول بضيق: ماقدرتش نمشيلها المرة هادي خفت يصير زي ديما
راوية نفخت وهي شادة المخدة بين يديها: يا رب تصيب يا ربي يا ربي
مريم من قلب: يسمع منك يا ويري
بهية بابتسامة: حتى كان ماطلعش اسمهم فيها خيرة ماتكدروش روحكم وتكدروهم معاكم
التزموا البنات الصمت وهما يفكروا..
•🌹•🌹•🌹•🌹•
بينما عند حليمة .. زي عادتها مقعمزة في الدار وفاتحة على قناة السعودية .. معاها خديجة ورقية يهدرزوا..
بالنسبة للحفيدات ماحد منهم غادي..
•🌹•🌹•🌹•🌹•
في احد مساجد المنطقة الموجودة فيها السانية.. هو نفسه المسجد اللي حيكون فيه اعلان اسماء اللي طلعوا في قرعة الحج السنة في المنطقة هادي.. وكذلك بقية المناطق على نفس المنوال
هادي مش اول مرة يمشي الحاج منصور باش يحضر القرعة.. مشي قبل مرات عدييييدة.. روح منهم خائب
هادا علاش اولاده كانوا يبوه يسمع القرعة من الراديو ومايتعبش روحه لغادي ويصيرله زي كل عام.. بس هو ابى الا ويمشي
خليفة ماخشش ..جرب ينزل معاه السنة اللي قبلها ولما كملوا القائمة وماطلعش اسم الحاج منصور فيها شاف على وجه بوه ملامح ماقدرش يتحملهم.. قطعوا قلبه.. لهذا فضل القعاد فالسيارة المرة هادي
•داخل..
في عدد لا بأس بيه مقعمزين .. بعد وصول الحاج منصور بشوي بدوا يسموا فالاسماء.. هو كان مقعمز على كرسي ومتكي بيده على زقيته .. عيونه مانزلهمش من ع اللي يسمي .. ينبض قلبه بقوة بعد يسمع اسم زي اسمه وسرعان ماتضعف النبضات لما يسمع الاسم الثاني..
فاتت ساعة الا ربع.. وكاد الحاج منصور يفقد الامل..لكن
: منصور العارف سليم بلحاج
تعرفوا شعور انك ترجع للحياة في اللحظة اللي يفصلك فيها عن الموت شعرة وحدة؟!.. شعور الانقطاع ايام عن الميه والزاد وفجأة تلقاهم قدامك وانت على شفى حفرة من اليأس؟!.. كله مايساوي شي قدام اللي حسه الحاج منصور ساعتها وهو يسمع في اسمه من بين اللي حيحجوا البيت ..واخيرًا بعد سنين صبر طويلة معبية شوق للحرم اللي شافه من وراء الشاشات فقط..بعد سنين دعاء نهار وليل ربي ينوله ويزور بيته.. كل سنة تفوت كانت تنخصم من العمر.. يكبر فيهم ويزيد تخميمه يا هل ترى حنلحق نزور مكة بكامل صحتي ..واخر خمس سنين تغير السؤال لـ يا هل ترى حنلحق نزورها قبل ماياخد ربي امانته؟.. واليوم اخيرًا جاه الجواب من رب السماء الكريم الوهاب بأن ابشر.. ومش بس انت ..لا💞💞
: حليمة فتح الله رحومه الساقزلي

يتبع...
«لو عجباتك الحلقة اضغطي عالنجمة واعطيني رايك🤍»