سانية جدي🌹

الحلقة الثامنة والثلاثون

#سانية_جدي🌹
#الفصل_الثالث «جسدٌ هنا وروحٌ هناك»
#الحلقة_الثامنة_والثلاثون
___________________________
«اني والمواعيد خطان متوازيان لا يلتقيان😁»
صكرت حافظة المسير الكبيرة وطلعتها بمساعدة سلفتها قدام الكوجينة وين مافي الشمس زارقة
وسيلة: مفروض طيبناه ابكر من هكي
مريم الساقزلي: الشمس حارة ساع يطبخ بسرعة..
بهية: هو هادا بنعبوا عالشمس وخلاص
رجعت مريم تسقي فالرز وتحط فاللحم فوقه هي وذهيبة
وبهية طلعت باش تشوف شن صار فالصفر
وحدة من الجارات: شن يا خديجة ساد هكي..
شبحتلها خديجة: لا زيدي زيدي صكريلي عالخمسطاش قصعة سلم وخيتي..
•وفي ممر الكوجينة المطرح كله صفر صفر
ريما تمسح فيهم وتفرش فالشنتروات وليلى تحط فالكواشيك
ع جية نور لابسة توتة وبرنوصها ع راسها في رقبتها معلقة كاميرا ولد عمها
وقفت قدامهم وقالت: ابلة ريما عادي تصوري؟!
ردت عليها بابتسامة لطيفة: مانقدرش يا سمحة
هزت نور راسها بتفهم وابتسمت: ليلى اشبحي هني
ضحكت ريما وليلى تلفتت عالكاميرا وهي تبتسم..خدت نور اللقطة اللي كان باين فيها الصفر وليلى ومن تالي وسيلة كيف طالعة من الكوجينة..
خدت اكتر من صورة بعدين توجهت للكوجينة دارت نفس الشي للنساوين صورتهم
وطلعت من جديد مشت للصالة وين مافي الحاجة حليمة تخدم فالشاهي وتهدرز ع ديما اللي اطبق فالمناشف
نور وقفت بعيد شوي عليهم: ديما..حنينه..
انتبهولها الزوز
نور بابتسامة حطت الكاميرا قدام عينها: ابتسموا خل نصوركم
قربت ديما من حليمة قعمزت جنبها وميلت راسها ع كتفها وابتسمت
ضغطت نور ع الزر وجت لقطة تهبل ودافية هلبا..
حليمة: هاتي جاي نشبحوا نويره
قدمت نور لحناها وجت ع جنبها التاني..
•🌹•🌹•🌹•🌹•
ورا حوش بلقاسم..
حصيرة فوقها سلتات وقدامهم بريمس وطاولة خشبية صغيرة ..صونية ليموني حجم كبير مغطية بصفرة وغادي منها صونية تانية بس اصغر شوية مغطية كويس
الطاولة وراها خولة تفرد فالعجينة والبريمس لمريم اطيب عليه
عالسلتة مقابيلهم مقعمزة مفيدة وقدامها طاولة خشبية اكبر من متاع خولة ادير عليها في بوريك الجبدة اللي ورثت اتقانها ليه من امها
عالجهة التانية فريال قدامها صفرة كبيرة ولوح تقطيع وبجنبه طنجرة تيفال مغطية..مقابلتها ناديا
مفيدة: بجديات ماخطرش في بالي ولا واحد فالمية
خولة وهي تطرح في عجينة الفطيرة من ورا الورقة المقصوصة بشكل دائري: تراهنوا ان حاكيلهم.. عالاقل حمدي ومنصور وحمزة مستحيل مايكونوش يندروا..
مفيدة تفرق فالحشوة عالعجينة: هما يعرفوا لكن مش حيعاودوا نهائي
ناديا وهي تلف فالشاورما: منصور كتوم هلبا بالذات في حاجة زي هادي يقولك سر امني عليه صاحبه مانقدرش نخونه
قامت خولة العجينة بالورقة متاعها وحطتها فالطاجين: ورق الغلافات هادا زي الرحمة..خدت شيشة الزيت وبدت تصب فالصفرة قدامها: لكن توقعت حمدي يقولك منصور ديما حاجة ماتخصاش مايتصرفش منه ليه وحمزة تركيبته غريبة مانعرفش نتوقعه لكن الحق هو عارف عنده الجزيرة ماظنيتش طار عقله للدرجة هادي..
ضحكوا كلهم
وفريال وهي تحط في حشوة الدجاج عالفطيرة قالت: باهي شن رايك يا حماتي العسوله ان ملمحلي عالموضوع
مريم بضحكة وهي تقلب فالفطيرة: والله يا خولة حمزة خلاص راهو من زمان هايم يابال توا ..الراجل عاشق متيّم مأسور في فراولة تبيه يدس عليها؟! قولي حاجة يستوعبها العقل..
ضحكوا مفيدة وناديا وخولة قالت: صدقتي يومها لمحت شعرة بيضا في راسه مسكين
فنصت فريال وحدفتها بالمنشف: بري بري! غزالي سيد الشباب معليشي فوتيه ع وحدة تانية مش فراولة اللي حافظة قداش في رمش في جفونه..قاتلك شعرة بيضا!..شقلبت عيونها بغرور مصطنع وهي حاطة ظهر يدها الملبزة تحت ذقنها ومكملة تقول: حبيبي اني اللي ماجابه جياب شعره اسود من ظلامك يا ليل..وبحب كملت: مايطلع كان عليه زين الزينين..
مفيدة بضحكة: يا نهار ازرق ع قولتك انتي ذبتي علينا
مريم: فراااولة الفطيرة يبست راهو شن بنمدوا للناس..
خولة: خاسرة فينا الرقاق ماهو ..اقسم بالله ع هالصونية هادي ماني زايدة عاجنة
فريال وهي تضحك: تي هانا نديروا يا دراه الكبد..
ناديا شبحت جهة حوش الحاج منصور من بعيد بعدين شبحت للحافظة: الخيمة من فيها
قالت كلامها وهي تلف فطروف الشاورما بالفويل
مريم: عليا وابصر من معاها تاني مبكري شبحتهم..وحدة منهم ماعرفتهاش وجهها غريب عليا
ناديا: هادي ماتكون الا بنت خالة مرت فاضل الجهاني.. وتنادي فيها اروى
مفيدة: غير استنوا استنوا، اما من كناين عيت الجهاني بالزبط؟!
تلفتتلها ناديا: هونا مش وخدوا اخر زوز من ولادهم لما اني جبت قيس وحدة منهم هادي غير تسكن بعيد شوي نتفكر حماتها فالحجاج قالت في حالها حتى العيلة معاهم بالرسميات..
خولة بقيمة حواجب: بالرسميات مع العيلة وجاية وجايبة معاها بنت خالتها! حتى حمواتها نفسهم ماجوا من اليوم!! الكلام مش لبعضه بكل..
مريم: لكن قنينة البنية خدومة هلبا ومش متعدية حدودها اهو ليها من بكري جاية برا من الخيمة ماطلعت والحوش داخل ماخشتش ابدًا اللي ديرها عليا ديرها معاها وخلاص
فريال: صح حدها الخيمة محزمة وتلوي..
خولة: جابتها معاها مرة فالحج راهو
مفيدة: صحة ليك تذكري اني من الزحمة نسيت اللي جي واللي لا
هزت خولة راسها: تؤتؤ، ماننساهاش لاني من لما ريتها مارتحتلهاش نهائي..البنت فيها حاجة تنفرك منها..
ناديا: عادية ومؤدبة ماشاء الله عليها
مريم: اني ماريتهاش فالحج الحق..نزلت طرف الفطيرة حطاته مع خوته وردت فوقهم المغطى: لكن نأيد ناديا
خولة: ماخشتش راسي، فوق ما اماليها طالقينها بعمرها هادا في حوش البرانية لا زيادة باعتتها لعرس بروحها وهي راقدة في حوشها! اهو ليها قريب ساعتين لا من اتصل ولا من دور وين امها وين بوها!
فريال: اهو حني يصير عرس فالجيهة من الجمعة للجمعة نعسكروا مني اللي يقوللنا روحوا ياسر..
خولة: في فرق تو كان دارتها وحدة من خوات فاضل ايه معاك..جيران وعشرة عمر قديمة لكن هادي شن بنت اخت كنتهم اللي هي بروحها قاعدين نتلخبطوا بينها وبين سلفتها! اني حايرة في اماليها كيف طالقينها ع حل احبالها هكي!
•في من حيستغرب كلام خولة ويشوفه مبالغة او فظاظة..بس هي مش هكي ابدًا لربما تشابهها مع خوها حمزة ماكانش فالشكل بس حتى فالطبع..مايحبش الغلط ولا يتحمله مهما كان بسيط وتافه في نظر البعض..يقوله رايه وبكل صراحة وزي مايقولوا مايعبر مع الحق حد..الشي التاني اللي يملكه حمزة هو العين الثاقبة من اول لقاء ليه مع الشخص يكون عنه انطباع طول وولا يمكن يتغير هالانطباع وغالبًا ..غالبًا يكون صح، وخولة هالمرة كان ليها عين ثاقبة بخصوص اروى..
مفيدة: كان باهية ليهم وكان عافنة ليهم مرات مخليينها عند بنت خالتها ع خاطر ظرف  كان هادا ماعتقدش يجيبوهالها وعارفينها قاعدة عند متاعينها هالفترة..شن مافيش غيرها
ناديا: تلقيها اساسًا كسدت وجاية بالجو..بضحكة كملت: زمان كنا نديروا فيها اني وخواتي
ع جية راوية كانت في حوش بلقاسم..شادة ببخشة غليظة طاجين فيه بوريك..جت بيه قرباته لمفيدة: كويس هكي ولا نزيد نحمره..
مفيدة تمرر فعيونها عالطاجين: ساده المهم طاب تو نحيه في صفرة وماتغطيشي طول ديري عليه منشف باش تقعد تقرميشته
مشت راوية مولية بالطاجين وهي تقول: تمام..
ناديا وهي تبع فيها بعيونها قالت: حسيتها مش متقبلة موضوع عمي خليفة بكل
فريال: كان اني نحس فروحي كرهتها بعد اللي سمعته امس.. عندها حق ..نفخت وكملت: مكبوب سعد خلوفه كان طاح في عقرب الريح هادي
ضحكت مفيدة بخفة: اني ماستغربتش شوق مايديروا البنات وياما منهم سمعنا حكاياتهم كيف تزوجوا رجالتهم..هياتم مش اول وحدة
خولة بترقيصة حواجب: اصلًا الدوة توا مافيش من وراها فايدة واضح يا حناتي عمكم طابس فيها ليه وقت
مريم: نتوقعه يخطبها قريب..
فريال سيبت اللي فيدها: حقاااا ع سيرة الخطبة.. تو بالله عليكم بالله عليكم مش مريم الشرقاوية تحسوها حاطة العين!
ابتسمت مفيدة: امممم حتى انتي لاحظتيها؟!
ضحكت فريال: بنظفوا سمعتنا مالا كيف..
ناديا: ع مني؟!
خولة شبحت لمريم المقعمزة جنبها وهي تقول: ع مريومه يا حنة
فريال: سميتها عاد..
هي تلخبطت وقالت: الله يا ربي اللي يسمعك يقول حق مسمييني عليها
رجعت فريال تلف فالشاورما وهي تحرك فكتفها كأنها ترقص: ماتفرقش يا عينيا خلينا فالمضمون
مفيدة: من غير بصارة راهو واضح هلبا حتى مبكري بعد جيت سمعتها تسأل في ماما ع قرايتك..
ابتسمت ناديا: الحق الله يبارك عليهم الام والبنات كويسات وترتاحيلهم من لما تشوفيهم
خولة: ومتواضعات ماعندهمش عالطواقة
مفيدة وهي تلف فالبوريك: اني لما قالي حمدي بوهم دبلوماسي انصدمت..
مريم: انتم مصدقات اللي تقولوا فيه؟! تتكلموا كأنه جديات!
مفيدة: غير ركزي شوية مريومه حتزبطي
تفكرت فالحج في يوم كانوا يفطروا وقت ريما قالت لامها تاخد مريم كنة، الكل توقعه بصارة وجو لا اكثر..بطنها وجعتها لمجرد تخيلت شي زي هكي
رجعت اطيب فالفطيرة من فم ساكت
فريال: باهي تراهنوا انها تفتح موضوعها قبل ليروحوا لبنغازي
خولة تفطح فالعجينة قامت حاجبها: نراهن..
ناديا بابتسامة وعيونها ع مريم: خل نكملوا بسرعة مزال في الطاولات والكراسي يبوا مساواة
•🌹•🌹•🌹•🌹•
بعد الغدي في سانية النعاس..
ياسمين فتحت لصغار خوتها وخواتها التلفزيون وصكرت عليهم في وحدة من الديار بعدين مشت لدار امها فتحتها خشت وصكرتها وراها خدت بخاخة ميه مرقية وبدت ترش بيها ع السوابيت اللي يحلوا العين المغمضة فيهم كل شي ماناقصتهم حاجة حتى من البدلة الصغيرة بدال الوحدة داورلها زوز بكنادرهم وشناطيهم..
انفتح الباب تاني وكانت وحدة من خواتها لابسة عباية ووشاح وفي يدها شنطة سفر صغيرة: ياسمينه انتي هني
هي تلفتت: ايه خالتي قالتلي نبخ السوابيت
اختها: باهي تمام اني بنطلع للمزين توا ردي بالك من الصغار بالله عليك..
ياسمين: بري وقت عليك مش اول مرة تخليهم معاي..مزال ماجابوش القفة؟!
اختها: اهو توا مشولها قبل يبوها امس مع باقي الحاجات لكن امي قالت ماتباتش من محلها لسانية بلحاج طول
قامت ياسمين حواجبها ونزلتهم بتعجب: عليك اسبار..
سمعوا صوت كلاكس سيارة
طلعت اخت ياسمين باستعجال وهي تقول: عطلت عليه، زي ماوصيتك وخيتي
ياسمين طلعت بعدها وبدت تصكر في باب الدار بالمفتاح: حاضر حاضر
وهكي كان حال اغلب المتزوجات فالحوش ..كل شوي يشرين تليفون ولا كلاكس سيارة وتطلع وحدة او زوز لين فضي الحوش الا من العزايز الكبار اللي حيتجهزوا هني والصبايا..
خشت ياسمين لوسط حوشهم اللي كان كبير هلبا وين مافي باقي بنات العيلة يدربكوا ويغنوا
بالنسبة للجارات كلهم روحوا بعد الغدي بيوتوا رواحهم باش يحضروا القفة في حوش العروس
اول ماخشت بدوا يغنولها: العقبة ليها هالحفيانة.. وتجيها قفة مليانة
ضحكت ياسمين بعدين بدت ترقص وناضت بنت خالتها ترقص معاها..
•وبرا قدام المربوعة واقفة امها مع خوتها
قمرة: تفاهمتوا مع اللحام اللي بيذبح قلتوله قداش تبوا بالزبط؟!
سليمان: كله واتي يام وزي ماقلتي
قمرة: عارف الزحمة يا سليمان مدابينا مانتحشموش مع حد
سليمان: قلتله يذبح بالزايد واللي يقعد يتفرق صدقة
هزت قمرة راسها: هكي خير..
تكلم واحد من خوته: جماعة النوبة حتى هما واتيين
سليمان: نوبة ****** راهو..
خوه: ايه ايه هما طمن بالك
خوهم التاني خبط كتف سليمان بخفة: اني عليا جماعة الفن تلات واربعا
ابتسمله سليمان: بارك الله فيك
وقمرة تتفرج بسعادة كل شي في عرس ولدها ماشي زي الساعة
ع جية راجلها بزقيته: الشيخ اللي بيقرا الفاتحة يا سليمان شن صار فيه
هو بدون مايقيم عيونه في بوه: احمم كون هاني يا حاج كلمناه وزدنا اكدنا عليه
هز النعاس راسه: باهي باهي ربي يتمم على خير
قمرة بابتسامة: آمين ان شاء الله..
•🌹•🌹•🌹•🌹•
وفي سانية الحاج منصور
مشوا كل من بهية ووسيلة وكلثوم وناديا للمزينات استعدادًا لاستقبال القفة اللي بتجي مع الساعة ستة
قعدوا المسؤولات عن عشي امالي العريس.. خديجة وذهيبة بالاضافة لبعض الجارات
زمزم حجزت ليوم النجمة ويوم الحفلة بس اللي هما اكثر رسمية اما اليوم حتحطلها راوية بنت سلفها مكياجها..
مفيدة بحكم هي فشهرها والخطوة بحسابها طلبت من سميرة المزينة تجيها وهي لانهم صاحبات وقبلها جيران وافقت طول..طبعًا حتاخدها هي وريما وثريا
وفي الديار ماينسمع الا صوت الاستشوار وسوستات القفاطين وعلب المكياج تنفتح وتتسكر..
•في دار الحاج منصور
تتكلم بالتليفون وهي مبتسمة: كل شي تمام الحمدلله
: متأكدة؟ كان هادا نخليهم يوخروا نص ساعة تانية مش مشكلة..
ضحكت رقية بخفة: لالا صدقني كله واتي وانتم مش جايين طول ولا
: بندوروا قريب ونولوا ..ضحك وكمل: قالولي عروستك حدفة رشادة وحني نبوا نديروا جو بالسيارات قلتلهم تم
ضحكت رقية
هو ابتسم وقاللها: اني كان نلقى تفوت الايامات بسرعة ونلقاك بحداي يا رقية ماعمري كنت متلهف لحاجة زي توا تصدقي..
اعتلت خدودها حمرة خجل وقلبها كان يدق بسعادة
•🌹•🌹•🌹•🌹•
وصلوا اللي كانوا فالمزينات وبعدهم بحاجة ربع ساعة سمعوا صوت الكلاكسات قالب الدنيا..
اللي فالخيمة كلهم وقفوا.. والبنات من فتحات الخيمة يبيتوا
بدا الصوت متاع السيارات يقرب والولاد برا يطربقوا فالالعاب النارية، طلعت بهية بخاخات مية الزهر مدتهم لراجلها «مكركبات من لوطا لو تزبطوهم وفيهم زي العمود طويل ورقيق يكونوا اما فجرة او نحاس»
خشوا السيارات للسانية وطلعوا الرجالة من الصالة الفوقية
درسوا قريب عالخيمة وبدوا النساوين ينزلوا وينزلوا فالسوابيت وهما يزغرطوا وداخل مستقبلينهم بنفس الطريقة..
نزلوا جماعة النوبة وبدوا يضربوا ..طارق ومنذر وزهير يرشوا فالزهر
: على اول مانبدا البادي.. بالصلاة على الهادي..
تجمعوا حوالينهم بالتصفير والتصفيق
وبدوا هما بوصلتهم
:مع ريح الهوا والشوق.. نسلم عليكم..مشتاق ليكم.. وقبل المساااء.. ودي نجيكم
كانت البداية كما المعتاد برتم بطيئ والموجودين يردوا معاهم بانسجام.. يا ودي حتى داخل سيبوا كل شي وقعدوا يسمعوا بس النوبة وما ادراك ما النوبة
: يا غالييين عليا..انتم شذى عمري.. وانتم زها عيني.. يلي بعيدين.. بعد الوطا عالشمس ونجوم الثريا..
عبيدة يسمع ويرد معاهم بكل مشاعره.. حس الكلمات تعبر عنه مع اللي عاشقها ..كل ماقال وصلت قلبها خلاص تزيد تتبعد والله اعلم هل فعلًا حيجي يوم ويصير مراده ولا يطلع ابعد حتى من الشمس ونجوم الثريا..
وحال ابراهيم مش خير من حال عبيدة بل اقسى وامر بالذات وهو في عمره هادا..مراهق شاب مندفع في مشاعره.. كان حب يحب بقوة وكان انوجع ينوجع بقوة..
:ويزهى دليلي لما نجييكم..ومشتاق ليكم.. قبل المساااء.. ودي نجيكم.. نسلم عليكم
يردد خليفة وهو عايش حالة من المشاعر الحلوة واللي صاحبتهم هي وحدة معروفة من.. زي حالة طارق ولد خوه اللي يرش في مية الزهر وقلبه في ربيع البدايات..بدايات هداكا الشعور اللي كان فات فيه وخش قلب الواحد يستعمره خلاص
: انا بينكم ومعاكم..الاقسام حلوة والزمان مواتي.. انا بينكم ومعاكم..يا ضي عمري زاهيات اوقاتي.. وماتنحسب الايام.. بوجودكم كيف السحاب تمر.. وانتم هوا وانسام.. وانتم ربيع وورد واغصان وزهر.. ونلقانكم ضي الزمن..ونلقاني لعيونكم عطشان
يسمع حمزة وحاس بسعادة مابعدها سعادة..واخيرًا واتى الزمان وولت فريال معاه برغم كل شي صار لكن فرحة قلبه بيها وهو يسمع فهالابيات اللي فعلًا تعنيه لا توصفها حروف.. مش غير هو..حتى بشير وسليمان وان كان مش موجود معاهم توا لكن مافيش فرحان في هاليوم زيه💕
واستمرت النوبة تضرب ومنصور يصور بكاميرا الديجيتال متاعه وهو مبتسم..
بدت الحكية تسخن والرتم يتصاعد: صلى الله على نبينا ..وصلى الله على نبينا..وعلى نبينا..محمد شيخ المدينة
خشوا الولاد كلهم يرقصوا والدنيا انقلبت.. حتى من جمال اللي عجبوه الاجواء هلبا لقي روحه لا اراديًا خاش معاهم ويرقص
: وعلى الهادي وصلى الله على الهادي..وعلى الهادي..محمد سيد الاسيادي ..حويته علينا ماشاء الله حويته علينا..حويته علينا ماشاء الله حويته علينا..حويته علينا والحاسد خمسة فعينه
منصور يصور ويضحك والموجودين فوسط النوبة بيهبلوا
كان عبدالرؤوف واقف يتفرج وهو مبتسم ومرة مرة يضحك ضحكة خفيفة..بس تصدقوا رغم ان هالابيات تحرك حتى اللي ماعمره حب ولا عنده حد في حياته لكن هو ما اثرتش فيه ماحس بشي من قبيل اللي حسوه خليفة وولاد خوته.. ماخطرتش عليه صفاء نهائي
ممكن لانه ماوصلش معاها لمرحلة الحب..من طرفه
وممكن لانه حاليًا عقله مشغول بشي تاني.. بالريحة اللي تفوح وتقوى فالجو..فالاول مانتبهش لمنذر والباقي وهما يرشوا لين تنطرت عليه نقطات وقتها عرف مصدر الصنة اللي لخبطت صفو باله وقطعت انسجامه مع النوبة..
هي نفسها هديكا الصنة المرتبطة في ذاكرته بصاحبة الوجه الحسن
عقد حواجبه بانزعاج وعدم رضا ..تلفت جو عيونه ع خوه الاكبر منه واقف بروحه ويبان سارح وطول الوقت يجامل مجامله.. استغرب هلبا حاله تبدل عن امس
:والشي والشاااااا ..اشطح ماتقولش لا
وبدي الهبال على اصوله..
•في هالاثناء خشت سيارة من بوابة السانية رواشنها كانوا مفتوحات
عواطف: نوبة مليحة باين عليها
جلال يسوق ويشبح قدامه: قايمينها الله يبارك
فيروز كانت حاطة صوابعها وهما مثنيات قدام فمها وتتفرج عالشباب الحاضرين كيف يردوا ويرقصوا مدايرين جو حلو
لما قربوا حوش الحاج منصور تلامحت طارق فوسطهم مرة يرقص ومرة يبخ في مية الزهر هدا غير صوته العالي وهو يغني مع النوبة
: يانا منه يانا منه..نقراش صباعه بالحنة..
سخنوا الشباب واللي مارقصش قبل خش يرقص
هادا كله وفيروز عيونها على طارق بس..هو من النوعية اللي مع النوبة ينسوا انفسهم ويهيجوا لين يعرفوها هياجة.. وهالمرة زادوه مشاعره اللي قاعدة تتنامى في قلبه
زي مشاعرها هي اللي خلت دقات قلبها البكر تتسارع
ضحكت بدون صوت وهي تتفرج ع حركاته
: يانا منه يانا منه..هو غالي مانصبر عنه.. قاسي ماعنداش محنة.. طول الليل انا نستنى.. في جي الغالي نتمنى..صباعه ومفاتيح الجنة
واللي جوه اطلع طول زي مايقولوا هو حمزة قلبها قلب ع راسه.. لعيون رقية وناس تانية قرب موعد وصاله بيهم
الناس التانية اللي حاليًا يتفرجوا عليه من فتحات الخيمة وهما هايمين💓
شوي وطلعت لتين من الخيمة جاها معاذ كان يحسابها ادور في بوها لكن هي فالحقيقة طالعة ترقص
خشت وخش معاها وعمامها دارولها جو مش عادي خلوا الكل يتحمس معاهم.. عياط ع تصفيق وتصفير وفرقة النوبة ماقصرتش
ترقص هي وقيس ومعاذ وبوها يصور فيها ويضحك.. جوا بشير وشرف الدين قعدوا يحدفوا فيها فوق وهي تضحك والشباب الموجودين يعيطوا..
عبدالرؤوف يتفرج ويضحك.. البنت خدت قلبه
لما حس الانظار كلها عليها خاف ..خش بيناتهم وبدال مايتلقاها بشير خطف خداها هو وطلعها
عمامها فهموه وتصرفه هادا ريح جدها هو بروحه خاف عليها
عبدالرؤوف وقف بيها قريب ع منصور: مش ساد كليتي عليهم الجو يا عمو بعدها نا نريد نسهري معاكي ماحقيتك بكل
لتين وهي داهشة: نسهري؟!
قعد عبدالرؤوف يضحك بعدين غير عيونه لمنصور وبصوت عالي بش يسمعه قال: حرام عليك يا منصور العين حق..
هو رد عليه ومزال شاد الكاميرا: نرقي فيها ومستودعها ربي
ابتسم عبدالرؤوف بعدين نزلها وقال: تو عدي خشي جوا ماتطلعش بكل عند نا نعيطلك ولا ندزلك شي حد ماشي يا عسل
شبحت لتين لبوها بعدين شبحتله وهزت راسها بمعنى باهي..قامت يدها اشرتله بباي ومشت طول للخيمة
وعبدالرؤوف بعيونه معاها وياقداش تمنى لو ربي يرزقه يومًا ما ببنت زيها ع قد ماذابت في وسط قلبه من داخل..
استمرت الهياجة والنوبة كل مالها تحمي فالاجواء اكثر، بس في احد الموجودين كان مش عاجباته حركات لتين نهائي ..ايه جدها من امها عبدالله اللي وصل مع وصول اهل العريس بالزبط.. عزموه بلقاسم والحاج منصور لعشي القفة وهو باعتباره يعزهم هلبا جي
كان مستاء بشكل كبير وهو يشوف في حفيدته ترقص وسط الدائرة خصوصًا مافيش بنات غيرها وزاد استفزه بوها اللي فنظره يتصرف بتسيب وقل مسؤولية..
الابيات بدوا يثيروا في امتعاض الحاج منصور ..مش هو بس اغلب اللي فعمره حاضرين ماعجبهمش بالذات امتى بدت الرومانسية تزيد فالابيات..خصوصًا الكوني اللي امتعاضه بان فملامح وجهه
ولد النعاس الكبير اشر للنوبة بإن خلاص..هما استاجبوا وفي خلال دقيقة وقف الضرب
وبدوا الضيوف يركبوا للصالة..
•🌹•🌹•🌹•🌹•
داخل
السوابيت محطوطات عالوطا والنساوين يغنوا عليهم..دخلوا ذهيبة ومعاها كلثوم سابات البدلة الكبيرة باش يلبسوا رقية.. افلح زوز من كناين حليمة في تلبيس العربي خديجة وذهيبة ومن بعدهم كلثوم.. وطبعًا ذهيبة وخديجة مايجتمعوش
حلي الباب على وسعيته..والغالي جاب سوابيته
بدت خالة سليمان بالغني واللي جايين معاهم ردوا وراها
خديجة: العين قالت يامرحب بيه اللي جانا وجاب كساويه..
ردوها وراها
وحدة من خواته: نور العين كبير ويسوى ..جايب شوق كراهب كسوة
زغرطوا عيلة النعاس وعاودوها..
مفيدة وهي تصفق: ليلة عيد امه جاباته ..هاللي حط عليك بتاته
قووا الزمزامات الطقة والباقي يردوا ورا مفيدة
مرت خو سليمان: يامبروك عليك ذهوبك ..عالزينين نزل مكتوبك
مريم الساقزلي: اللي جبتوها ترد معاها ..نريدوا منكم غير هناها
زغرطت ريما والباقي ردوا ورا امها بحرارة..
:حني وادينا وادي شوق ..اللي تجينا تزهى وتروق
خوات سليمان زغرطوا وزادوا سخنوا وهما يكرروا فالبيت..
بهية: هي زينة والزين سلاسل ..ياسعد اللي فيها واصل
عاودوا بيتها مرتين وهما يصفقوا
اخت سليمان الكبيرة: خديتي من عيت النعاس.. ذهب صافي مافيه نحاس
قلبوها اهل العريس بالتصفيق وكرروا الشتاوة اكثر من مرة بحماس
وكان رد عيلة بلحاج على لسان ناديا: رضي من ربه والوالدين.. اللي حاز رقيوه يا عين..
عيطوا البنات والباقي ردوا ورا ناديا..
مرت خوه: مبروك عليك المتعلي..وخي العين ذهب عصملي
زغرطوا خواته وخالاته
ريما تصفق وهي تقول: هاللي حازك ياتفاحة ..شامخ كيف نخيل الواحة
راوية: ايااااه..
عمة سليمان يديها فوق: راهي دارك دار هنية ..غير كوني زينة يا بنية
ردوا وراها الشتاوة وهما يزغرطوا..
زمزم: الزينة كيف عروق السدرة.. تعرف كل قدير وقدره
كرروها كدا مرة بحماس..
وحدة من خوات سليمان قررت تبدا هي بتهدئة هالحرب الباردة😁: يامبروك عليك الكسوة ..يابنت العيلة اللي تسوى
ردوها كلهم وراها هالمرة..
كلثوم: هي زينة والزين خداته..مقدم خير على اللي جاته
زادت طقات الدربوكة والبنات يردوا معاها ويصفقوا
: يازينة زيدي في غلاه.. اللي جاك وسيب قرباه
نشطوا النساوين وهما يرددوا معاها فالبيت
وردت وسيلة: سلم الحاج عطاها كنة.. عارفها ماتخيب ظنه
عاودوها..
قمرة: يا بنية كان جيتي لامك ..مشكورة ماوالي ذمك
زغرطوا نساوين العيلتين..
مريم الساقزلي: صيته عالي وزاد تعلى ..اللي ناسب باتك يا للا
ردوا كلهم وراها وهما يصفقوا بحماس..
اخيرًا ختمتها زمزم لما غنت: مبروك علينا وعليكم..حطينا يدينا في يديكم..
وتعالت الزغايط بعدها..
•🌹•🌹•🌹•🌹•
من بعد هالشوط الناري طلعوا رقية مغطية بحولي الحصيرة وتحته سروال بدلة الجلوة..
ع يمينها ويسارها ناديا وريما مصدرات
وقدامها نور وعليا بالمرايا ووصال شادة المبخرة بدوا يلودوا فيها والزمزامات يغنولها، سبع مرات بعدين قعمزوها عالبمبر وجابوا قدامها القفة.. ساعدتها زمزم باش تحط يدها فيها وهي بدت تغرف وتلوح وراها في التستمال اللي شاداته خديجة..كملت زغرطوا كلهم وبدي الغني من جديد..
شوية ودخلوا رقية داخل بنات خوتها.. بينما ريما وناديا قعمزوا
طلعوا الضيافة تباعًا وكل مرة حد ينوض يرقص عالزمزامات.. الجو كان مش عادي والبنات لهوا بالضيافة بعدين بتطليع العشي
•برا وقدام باب الكوجينة
مدرسة كنتر راكبين في صندوقها زهير وابراهيم، منذر يمدلهم في الصواني وهما ياخدوا منه ويستفوا..
ع جية حمدي: شني مازلتوا؟! قاللكم عمي طاهر هيا وقت عالناس
زهير: نطلعوا يا حمدي قدامك قاعدين ماكملناش..
حمدي: سقدوا الجو شتي يوصل مصقع بعدها!
منذر من برا الباب: هيا يام قداش مزال؟!
خديجة بصوت عالي مغطية عليه الدوشة: اصبر شوية نذوره.. بالله يا حوا مدي للبنات فالممر قوليلهم سلفروا هادم..وقت وقت
مشت الجارة وقفت باب الكوجينة اللي يفتح عالحوش: تعالوا اهم الصواني
ناضوا ليلى وراوية جابوهم ورجعوا وين ماكانوا..قعدوا يلفوا فيهم بالفويل باستعجال
فيروز ونور وديما يسلفروا في صواني الحار والفواكه وفريال تحسب ومش مبطلة رقيص بين الدقيقة والتانية
ع جية ناديا تمشي بالشوي: ارفعوا الاول الاول يا بنات..النساوين كلهم طق فيهم خلاص..
ليلى: تمام خلاص بري تعشي انتي يا ناديا
ناديا: نشوف الصغار وين بس من بكري ماقابلونيش
فريال: خداهم منصور خلاص بري كولي مدامه سخون سايري الناس..
راوية: ليان مريومه رادة بالها منها هي وعرفة ماتغفلش فيهم تخشلهم كل ربع ساعة
: فراولة مفتاح الدار
فريال: وااااك على فراولة فرقت حالها.. علت صوتها: باااهي
ومشت بسرعة وهي قايمة طرف قفطانها واطقطق بالكعب: طلعولهم تو يخشولنا هنايا
ضحكوا
خديجة من الكوجينة: هيا يا بنات شن صار فيكم..
وقفت راوية باستعجال خدت الوشاح والعباية لبستهم بسرعة عالاحتياط وبدت ترفع فالصواني للكوجينة وليلى معاها
وين خشت شافت ثريا تحط فالفلفل المقلي فوق المكرونة المبوخة ..تخدم بقلب ورب واللي ساعدها تخش هالخشة لما كانت في حوش اهلها تعودت اطيب بكميات كبيرة وفي المناسبات وهدا شي مايعرفوشي عنها شيابينها طلع كان توا ومعروف علاش..
راوية مش طايقتها بكل خير شر نافرة منها ومش قادرة ترتاحلها نهائيًا
وصلت جنب باب الكوجينة حطت الصونية في عتبته وخدت من ليلى اللي بعدها
طارق: انتي بلغارية شوفيلنا كان في قصعة قاعدة هني ولا هني
منذر: خل نوصلوا هادم يا راجل ونروحوا ناكلوا جميع خيرك اناني النم..
راوية: حالكم باهي حني لتوا ماحطينا لقمة في فم وانتوا تتكلموا بالعشي التاني والتالت
كمال: ياسرك حسد..
ضحكت راوية
ابراهيم كان يتلقى من منذر بدون مايعلق ولا يقول كلمة اساسًا هادا حاله من يومين
شوي وجي عبيدة فيده كاشيك وكمام سوريته الخضرا الداكنة مثنيات: شن ماحصلتوش؟!
هي اول ماسمعت صوته سيبت اللي فيدها وانسحبت تحت عيون ليلى وكمال..
الاخير غير عيونه لولد عمه لقاه يشبح للباب مكان ماكانت واقفة وهو مضيق عيونه.. شبحله وكأنه يسأل فيه اللي صار توا حق؟!
ضم كمال شواربه بقلة حيلة ..بلع عبيدة ريقه وهو مضايق بعدين لف ومشي بكل
حرك طارق راسه باستغراب وهو متكي عالكنتر كأنه يقول «خيره»
اشرله كمال بمعنى فوته..
خديجة بصوت مسموع: وينكم طلعوا الحار والسلايط خفوا رواحكم!
انتبهت ليلى وتوجهت لبرا الكوجينة
راوية قعمزت تلف في ماتبقى من حوافظ الفاكهة: ارفعوا انتم تو اني نكمل هني..
شبحتلها ليلى شوية بعدين قامت اخر صونية ومشت بيها
وقفت نور وناضوا معاها فيروز وديما..شبه تعودوا يتحركوا في هالحوش براحة وحرية
عطت راوية لديما العباية والوشاح بينما فيروز طلعت عادي
كانت لابسة قفطان ابيض عليه جاكة بنفس لونه حواشي كمامها خطوط ذهبية طوله حاير مخصر بحزام ذهبي رقيق ورقبته دائرية مش مكشوفة ..شعرها مفريل ومفتوح الجزء القدامي بس مرفوع شوي ومدايرتله لقطة حلوة..مش حاطة مكياج
مشوا تلاتتهم كل وحدة فيدها صفرة..
خشوا للكوجينة نور وليلى طول توجهوا لبابها
ديما تلامحت ان في ولاد واقفين معاش قدمت اكثر بينما فيروز كملت طريقها وجل انتباهها ع خطواتها ..خايفة تزلق وتفسد الدنيا وايضًا خايفة ع بقعة تتنطر من هني ولا هني ع قفطانها اللي لونه مايتحملش
ديما لما لقتها مكملة وقريب توصل الباب زبطتها ماتندريش.. مشت بسرعة وهي تتخطى في الصواني والطناجر وقايمة عبايتها فوق بيدها..
شدت فيروز بالشوية من مرفقها: فيروز في رجالة برا
هي فنصت وشبحت قدامها فاللحظة اللي وخرت فيها ليلى عن الباب.. جت عينها في عين طارق..تحشمت وادرقت جنب ديما وهي تقول بهمس: درقيني ديما درقيني خو نور شافني!
جت ليلى: ترا الصفرة يا جارة القمر
مدتها وليلى خدتها بدورها ومشت
فيروز باحراج: نبي نطلع
ديما بتوشويش: هم صدار الباب انكان هلبنا دغري يحقونا، اصبري عند يعدوا..
سكتت فيروز وهي تتفرج عالنساوين كيف لاهيات لعل وعسى تتشتت شوي عن الموقف اللي سببلها اضطراب
من جهة تانية كان طارق مضايق لابعد حد حس بشعور يلسع زي النار وسط صدره.. تخيل لو شافها حد تاني مع ان تأكد من العكس ماهو شاف للولاد ولقاهم اللي هادا لاهي.. وزاد ضايقه انه يحسابها طالعة عادي فالنهاية لبستها مش مبينة شي هي ماتبينش فيه في الايام العادية عدا جزء من رجليها ..
منذر: نوارة بيضيها معانا ودسيلنا صونيتين تلاتة فالدولاب
ضحكت نور: باهي حاضر
ابراهيم من فوق الكنتر: اني مانبيش من توا
طارق: حتى اني ماتنادوش عليا
شبحوله باستغراب ومنذر قال: من امتى وليت حراج هكي؟! قلتلك استنانا نروحوا ونقعمزوا جميع علاش الجو اللي دير فيه توا!
طارق متلخبط ومش فاهم شعوره: يا ودي مش عليك النية طارت..
مشي للصالة باش ينزل الصفر تحت عيون المستغربين في حالته.. ولاد عمامه وخواته..
وعلى طول اول ماستفوا كل شي فالسيارة انطلقوا بيها تجاه سانية النعاس باش يرفعولهم العشي ليهم ولضيوفهم كما جرت العادة عند اهالي العاصمة..
•🌹•🌹•🌹•🌹•
الساعة  2:30 صباحًا..
خشت هي وامها للحوش بعد روحوا من العرس ع رجليهم هما ومجموعة جارات
عواطف تنحي فكندرتها: رجليا تنفخوا من الكعب
فيروز بضحكة: مش منك ماما رقصتي عالزمزامات رقيص يهبل
ضحكت عواطف: ناشطات يخلوك تنوضي غصب عنك
طلع جلال من الكوجينة لما سمع اصواتهم: روحتوا
جوا عيونه ع عواطف كانت منحية العباية وقاعدة ببدلتها وتسريحتها والمكياج.. تلقائيًا ابتسم واعجابه بان فعيونه
فيروز ركزت ع بوها ابتسمت بخجل وانسحبت طول لدارها..خشت وصكرت الباب وراها بدت تحول فالكندرة بعدين الاكسسوارات وهي مزال مبتسمة، بس لحظة نظرات عيون بوها لامها شافت زيهم في وقت سابق من هالليلة..
حست بحرارتها ارتفعت فجأة والدم كله تجمع في وجهها.. نحت الجاكة متاع القفطان بعدين لبستها تاني ومشت بخطوات مرتبكة وقفت قدام المراية..
: فيروووز.. فيروزتي بابااا تعالي وينك
استاقضت ومشت للباب فتحاته وطلعت، وصلت لوين ماكانوا امها وبوها واقفين قدام باب دارهم
عواطف بهمس: خليتها لين تخش وتو ناديتها.. بنتك كبرت وبدت تفهم راهو!
جلال بابتسامة: الله غالب وين ريتك انذهبت شيرتي ما استاقضتش بيها الا بعد سمعت صوت الباب تصكر
غيرت عواطف عيونها عنه وهي تضحك بدون صوت..
فيروز حمحمت بابتسامة: نعم بابا فاش تبيني؟!
هو انتبه لشكل وجهها وشد ضحكته: تعالي بنوري بنتي حبيبة بوها حاجة
عواطف اللي كانت مبتسمة زبطاته ابصر شن جايبلها
خش للدار ولحقوه الزوز
جلال: افتحي الدرج اللي بجنب راسي بابا
دارت زي ماقاللها واول ماشافت شن فوسطه توسعت ابتسامتها وعيونها لمعوا بفرح شديد
القجر كان فاضي الا من باكو تليفون وقتها كان احدث موديل نازل فالسوق ومايشداش الا المعبي..
تلفتت وعيونها مدمعات: هادا ليا بابا؟!
جلال يشوفلها بحب كبير: ليك يا نوارة حوش بابا ..يا ضي عيون بابا
هي مشت تجري ضماته وبدت تبكي وتقول: شكرًا.. شكرًا اني نحبك هلبا
جلال كان حاضنها بقوة وهو مبتسم لفرحتها.. وكأنها يعتذر بطريقته عن اخر مرتين رفعها فيهم لعماتها وشن سببولها من اذى نفسي..
عواطف تتفرج عليهم ودموعها فعيونها..
•يقعد الاب الحب الاول والاصدق في قلب البنت.. الرجل الوحيد اللي يعطي بدون مايستنى ياخد اللي مستعد يقدم عمره بس باش هي ماتنضرش منها شعرة.. بالذات اللي زي جلال يعبروا عن حبهم لصغارهم بشتى الطرق اولهم الكلام اللي عادة اغلب الاباء مايحبذوش استعماله.. جلال اللي يقلب فالدنيا ع خاطر وحيدته وكان طلبت نجمة من السمي يجيبهالها.. بس للأسف مافي حد كامل ونقطة ضعف جلال الى جانب عيلته ..خواته وامه
مع ذلك مستحيل يجي في هالدنيا حد يحب فيروز قده.. ولا مرات تنكسر القاعدة ويجي.. ويدير اللي حتى بوها ماداره ع خاطرها .. ولا حتى امها ولا اي من اللي يحبوها..شي مجنون وصعب
اييييه هو اصلًا من امتى الحب يخضع لحكم العقل؟
•🌹•🌹•🌹•🌹•
عند امالي العروس..
مقعمزين في الفيراندا
ولاد حسين كلهم عدا بشير وايوب .. ومنذر وزهير وطارق وابراهيم وعلي ونزار
والبنات خولة ومريم وعليا ونور
علي: تي مش رقصت بس الفرخة دوخت الشعب كله
ضربه عبيدة ع ظهره: لساااانك
والبنات يضحكوا بكتمان..
شرف الدين: وين باقي العصابة
نور بتلقائية: داخل..قالوا بيرقدوا
فنصوا فيها البنات
قام ابراهيم حاجبه لما استنتج شن اخته ادير حاليًا.. بس نزار دار الحولة ولا كأنه سمع شي
وطارق اللي بالعادة ديما مفسد ع اخته وخطيبها كان سارح.. شكل فيروز بكري لخبطه هلبا رغم انها ماتغيرتش هلبا عن حالتها العادية لكن اللون الابيض النقي طالع عليها بطريقة مختلفة..كأنه انخلق بس ليها وغيرها مايطلعش عليه..لون يعبر عنها وعن رقة وجودها في حياته..حياته هي شن دخلها فحياته؟!
شرف الدين بصوت عالي نسبيًا: يا غيبة كموله
قعدوا كلهم يضحكوا وهو فاق وقعد يمرر فعيونه عليهم: نستاهل اللي قاعد مارقدتش لتوا
وناض من بحداهم..ناشبه عبيدة: غير لا غير تربح
وهو شاد ضحكته
عليا بضحكة: خيره؟!
ابراهيم شبحلها بربع عين: نوضي ارقدي ياسرك سهر مش كل شي تسألي عليه
ربعت يديها وسكتت..
زهير: مزال في من حلاوات مبكري؟
مريم: تو شن بنقولك
خولة: في لكن نجوم السمي اقربلك منهم
سراج: براااا.. مشناك انتي بالذات كزمة وقطاعة ارزاق من يومك
شده زهير من تيشرته: تعالالي جاي تعالى
ابتسمت خولة بنصر والباقي يتفرجوا ويضحكوا
عبيدة: تستاهل استحليتها فيك..
سراج بانزعاج: تي باااهي حول غادي
طلقه زهير وهو يضحك..
خولة: من الكزمة توا يا حبيب رويحته..
شبحلها ع جنب والباقي قاعدين يضحكوا
نزار: راوية اليوم فايتتنا بالطويل
شرف الدين: مزاجية ولسانها مدب.. بضحكة كمل: اللي بياخدها بيردهالنا من تاني يوم اهو قلتلكم
قامت مريم حاجبها وبتضييقة عيون قالت: زيد خفف عليها ذنوب احسن مادير
علي قعد يضحك، وابراهيم يشبحله بحدة وخاطره ينوض يعطيه طريحة..
عبيدة: مريم بالله شاهيك هداكا
ابتسمت وجت بتنوض: اعطوني عشرة دقايق بس
الوحيدة المركزة مع عبيدة غير مريم المرة هادي خولة
وعقلها يقوللها في شي غلط، وكلام بنت عمها اللي قالتهولها سابقًا مرة عن مرة يقل اقتناعها بيه
••••قبل فترة مش طويلة••••
بعد ايامات بسيطة من المشكلة اللي صارت بين الزبير وحمزة.. تحديدًا لما كان حمزة ماشي للكلية يشوف فريال وبالصدفة لمح الزبير بعدها قال لعبيدة يروح بالبنات..
طول الطريق كانت خولة حايرة فاللي قالاته مريم للبنت معاهم «فاضي راهو» ..ممكن تصدقها في اي وحدة اديرها فصاحبتها الا مريم
والانكى واللي زاد حيرها اكثر رد فعل راوية
اول ما وصلوا السانية حطها عبيدة قدام حوشهم ..دوشت وبدلت ودارت الغدي بعدين معاش طاقها صبر خلاص تبي تفهم
جت للارضي الموجود ع طاولة في صالة الحوش وضربت رقم حوش عمها بلقاسم ..نادى مرتين وانفتح الخط: الو
خولة: مها وين مريم ضبحيلي عليها
: تبي مريم..مريم طلعت مش عارفة بالك لحوش جدي ولا حوش عمي فتحي
خولة: باهي حبيبتي صكري هي
نزلت السماعة حطتها مكانها بعدين مشت للكوجينة نقصت عالطنجرة وقررت ادور ع مريم بروحها وخلاص، كانت تبي تعرف بشدة شن صار؟!
لفت مالية صوف ع بيجامتها وطلعت ناوية حوش جدها
فالطريق تلامحت حد بين الشجر توقعتها تكون هي خصوصًا ومها قالت كيف طالعة..طول توجهتلها ولما قربت توصل زادت تأكدت وين سمعت صوتها تقول: يا عمري اني.. غير من دار فيك هكي بس
ومعاذ يرد عليها: بالك ناتشاته قطوسة
مريم بألم: جناحه راح فيها..
معاذ: شن رايك نوروه لمنذر بعد يروح
هي ضحكت بالصوت: يعطيك السلامك، حبيبي منذر بيولي دكتور يعاين الناس مش دكتور بيطري متاع الحيوانات
معاذ باستغراب: وشن الفرق عادي..
كيف جت بترد عليه قاطعهم صوت خولة: شن اديروا
وقفت مريم ع حيلها وعيونها مزالوا عالعصفور: طلعت نتمشى شوية لقيت معاذ مع العصفور هادا جناحه مكسور على ما اعتقد
قامه معاذ بين يديه وهو يقول: نمشي نقول لخليفة نرفعوه للعيادة
مريم كانت عارفة خولة ع شن بتسألها لهذا ردت: برا لكن رد بالك عليه ماتحركاش هلبا..تلفتت لخولة وكملت مبتسمة: ايه خوخة في فمك كلام
قعدوا يتمشوا مع بعض وخولة تقول: فهميني اللي درتوه مبكريكا فالكلية شن؟! معاش فهمت اني اللي نخرط ولا انتوا
مريم بنفس الابتسامة: كنت نبي نشوفها كيف تغار بس
قامت حواجبها بعدم اقتناع: والباين عندي ماغارتش البنت تخطبله عيني عينك
مريم: انتي عارفة راوية مش بسهولة تعترف بحاجة زي هادي حتى بينها وبين روحها، حتاخد وقتها..
خولة: يعني هو لتوا ماصارحهاش؟!
بلعت ريقها وقالت بكذب: امممم
•قعدت ساكتة وتفكر باين عليه مضايق وهو فعلًا كذلك
هارب من تفسير تصرفاتها..ماهو من طول عمرهم يتناقروا ويتعاركوا لكن الزعل مايطولش..هل قصدها.. غمض عيونه وفتحهم باش يطرد الاحتمالات المخيفة هادي من راسه لا مستحيل تكون تبيه يفقد فيها الامل بطريقة غير مباشرة..
خولة وهي تشبح فيه وجعها عالاخر ..قبل كانت تحساب راوية تدلع عليه لكن لا شكله في شي تاني ..ضمت شفايفها وفي خاطرها دعت «ربي يخليها من قسمك»
غيرت عيونها لابراهيم لما لقاته ناض من مكانه
منذر: وين ماشي انت التاني؟!
رد وهو ينزل من الدرجات: بنرقد..تصبحوا على خير
ردوا عليه بتفاوت: وانت من اهل الخير.. وانت من اهله
عدا علي اللي همس بصوت خافت: احسن..
سمعاته عليا عطاته شبحة زي السم هو ردهالها ونور مررت عيونها بيناتهم بحزن
الموقف هادا جي بين عيون زهير ركز على علي وعليا.. الزوز عمرهم ماتعداش 16 عام شن يعرفوا عن الكراهية والقطيعة.. هادم نفسهم اللي ياما لعبوا وقروا جميع تشاركوا في عدم اكتراثهم بالمدرسة وتحايلوا باش يتهربوا منها..بس للأسف ديما اللي يديروه الكبار يحصدوه صغارهم وهادي النتيجة..مش طايقين بعض
تنهد تنهيدة مكتومة بعدين تلفت ع خولة لما سألت: سيارة شكون المدرسة غادي
واشرت ع جهة بعينها..
تلفت نزار وجاوبها: واحد من الشراقة يا عبدالرؤوف يا يحيى يا بوهم
عليا شافت وين مايشبحوا توسعوا عيونها: العالية هادي قصدكم ليهم؟! هادا اللي يقول اني كاسب سيارة ولا بلاش.. مررت عيونها عالولاد وهي تقول: واحد منكم ياخدلنا وحدة زيها مادخلنيش
علي كان شاد ورقة من شجرة الورد قطفها يلف فيها ع صبعه ومنسحب من الهدرزة
منذر: عندك حقها هاتي من غدوة تلقيها قدامك..
خبط شرف الدين كتف عبيدة بيده وهو يقول: مايديرها حد كان الكاصة
عبيدة: ايه وين رقية
ضحكوا فيما عاد نور اللي جاوباته: داخل
والمرة هادي مافيهاش كيف انشركوا بالضحك..وهي تحشمت نزلت تجري وخشت للحوش..
•🌹•🌹•🌹•🌹 •
داخل..
•دار الحاج منصور اللي كانت مصكرة بالمفتاح
: طيب اللي سمعنا صوتك
ضحكت بصوت خافت: لهيت بالسهرية بعد روحوا امالي العريس
: امممم، زي ما اتفقنا لبس يعري اكثر مايغطي لا.. حركة هلبا لا ركحي فراولة تسمعي فيا
تحمرط وجهها وهي تسمع ..عارفاته يقصد بالحركة الرقيص.. قعمزت ع حيلها واتكت ع سنادة السرير، بصوت يادوب طالع ردت عليه: باهي..وفي خاطرها كملت «غير اعبى»
هو نفخ الدخان بعدها ضحك: فراولة حبي..
حطت يدها ع قلبها اللي حساته بيطلع: ياسر بنموت
: فكينا يا عيوني خيرك وليتي منكدة هكي
قامت حاجبها وقالت: لا هادي سامحني فيها اني والنكد مانتلاقوش.. نزلاته وبنبرة مشاكسة قالت: الا في حالة وحدة
هو فهم قصدها طول: اااااخ كان نحصل عليك لسان المصريات هادا نجبده من وين ماينبت..
يتكلم وشاد ضحكته هي ضحكت وقالتله: اطلقها علاش شادها.. ريت من المنكدي ولا ريت.. بزعل مصطنع قالت: شوره بالك هلبا في قطع حسي!
ضحك بعدين جبد من الدخان ونفخه وهي تسمع في صوت انفاسه وقلبها متناغم معاهم..الرجالة اللي زي حمزة كل مافيهم طاغي وتأثيرهم قوي..
قاللها بنبرة برغم خشونتها الا انها مليانة مشاعر: والله مابالي في حاجة غيرك
دق قلبها بعنف ..فصلت عليه بعدين شدت الهاتف بيديها الزوز وحطاته ع صدرها وهي تتنفس بقوة.. قلبها حاساته بيطلع ويمشيله يحضنه ..مشاعره وصلوها وخلوها تزيد تغرق فيه..
حست بتليفونها يهز تحت يديها قاماته لقتها رسالة نصية..زاد هداكا القلب فالهبال وهي فتحت الرسالة اللي كان فحواها «نحبك»
بابتسامة حب هيمانة قالت: اني اللي نحبك والله ونموت فيك
•الانثى لما تلقى رجل يعشقها بهالقوة حتحبه لا محالة وتولي سعادتها منوطة بوجوده وحياتها واقفة عليه..هادي فطرة غالبية النساء
بس في منهم تلقى رجل يحبها حد الموت بس لانها مقتنعة بشي معين ماتعطيش لنفسها وللطرف الاخر فرصة ..واللي زي هكي صعب تتغير نظرتهم او يقتنعوا لين يخوضوا تجربة فالحياة تعلمهم هلبا حاجات ويكون وقتها خلاص فات الاوان..
راوية بابتسامة: محلاه القفطان يقتل يجلط يهوس
بهية ابتسمت: كسوة مقومة الحق حتى العربي جابوه فضة كاملة وحرير اصلي..
راوية بضحكة: اصلًا من صنته واضح وحنينه قالتها بكري
صكرت بهية الضي وهي تقول: بتروحي معاي ولا بتباتي
راوية طلعت ورا امها: مش عارفة، احتمال نبات فالحوش باش نقدر نقيم راسي غدوة هني اكيد هدرزة صباحي
بهية: تو نخليلك الباب مفتوح..
راوية: باهي..
بهية بصوت مسموع لكل من فالصالة: تصبحوا على خير
ردوا عليها كلهم وهي كملت طريقها للباب وشنطة الفجرة متاعها فيدها وراوية شادة بورزة الردي..فاتوا من قدام دار التقعميز المصكرة وهما يحكوا عن خوالها اللي حيوصلوا يوم الاربعاء العشية
•مقعمزة في زاوية الدار وتتكلم بالهاتف: ايه ورورو عزمتها عالعرس..
: السكوتي تحته كوتي على راي الغالية.. سكت شوي بعيدن ضحك
ليلى وهي مبتسمة بعقدة حواجب: ضحكني معاك
: حبيبي تفكرتي المرة اللي جيتك فيها فالكلية ..هي مرة يتيمة طبعًا
شدت ليلى ضحكتها: وااااك منك ومن لسانك، ايه نتفكر خيرها
: تي يومها نحساب روحي ريت خليفة غادي بعتالي قلت لالا شن بيجيبه مزال بكري عالمرواح اتاريه جاي يحب ويتمعشق..
ليلى تحفظت ع جزئية ان كله مخطط من هياتم مش صدفة وقعدت تضحك بكتمان: وانت خيرك مستكثرها عليه تقول اول واحد يدير هكي
: مش قصة مستكثرها لكن.. ضحك بتعجب وكمل: مش خاشة دماغي خليفة خلاص نوي والله الا كنت نقول هادا بيحضر احفادي وهو مزال يقاوم
ضحكت ليلى بتفنيصة: كان يسمعك يحرج منك حي عليك
هدى ضحك شوي شوي بعدين قال: ايه يا عسلي شن جو السهرية نسمعوا فيكم بكري قريب تطلعوا عالكياس
بدت ليلى تحكيله عالاجواء بصفة عامة..
وفي زاوية تانية من زوايا الدار مقعمزة عمتها حتى هي تهدرز مع خطيبها
: شن رايك فالدبش عجبك؟!
رقية مبتسمة وعيونها ع عرفة اللي راقد عالمندار مقابيلها: كل شي ماشاء الله العيلة والناس كلهم حلوا فمهم فيها
ابتسم ورد: باهي الحمد لله ماشي من قدرك لكن
ضحكت ضحكة خجل خفيفة
وهو كمل كلام: ايه يا حلوة ماقلتيليش وين تبي نسافروا.. باش نحجز هوا هداكا مفروض بعد الاسبوع باذن الله طيارتنا..
رقية بابتسامة وهي فرحانة، كل شي يديره لازم ياخد رايها قبل وهادا مريحها هلبا: الحق يا سليمان
: الحق يا عيون سليمان ايه
عضت ع شاربها وهي متحشمة عالاخر ..تلفتت بعيونها جهة بنت خوها لقتها مش معاها تهدرز وتتبوسم حتى هي ع حالها
: رقية وينك.. الووو
تنحنحت: معاك سليمان معاك..
هو قال بابتسامة: ايه ماقلتيش وين خاطرك نسافروا شهر العسل
رقية: خاطري في سوريا ولا الاردن لكن الاكثر ولو حصلت حجز زي ماتبي سوريا
سمعت ضحكته يقول: شكلك تحبي باب الحارة هلبا
ضحكها اللي قاله وردت: والله ماصارت، هو صح نحضر فيه لكن عالجو وخلاص وممكن لان خدينا عليه رمضان مايكملش بلاه.. راهو شبه اني الوحيدة فالحوش ماندورش فيه مليح
: غريبة بجديات اني مستحيل نفوتله حلقة حتى المشاوير من توا اعرفي في شهر رمضان مستحيل انوض ع خاطر شي من عالمسلسل اي حاجة تبيها يا اما قبل المغرب يا اما بعد الحلقة
ضحكت ضحكة خفيفة: مش مستغربة عندنا العرض..بابتسامة كملت تقول: المهم هو هادا المكان اللي في بالي
: سوريا سوريا حاضر
ابتسمت وردت: حضرلك الخير ان شاء الله
•🌹•🌹•🌹•🌹•
: حاسة ظهري تقول لوحة يا ناس
تلفتت خالتها اللي كانت تلبس في قفطانها متاع الحوش: من الساعة خمسة وانتي بالصدرة وحضرتي السهرية بيها هداكا هو يا بنتي
: رجليا حتى هما حالة من الكندرة
ردت اختها وهي تلف في شعرها عالمراية: رقصتي قريب وصلتي السمي راك
هي وكان اسمها «كريمة»: عرس سلومه شحمة الكبيدة حالفة مانقعمز بكل سبع ايام
ابتسمت ياسمين اللي كانت ترد فالذهب في شناطيه بعدين قالت: زحمة لقيتوا..
خالتهم: ايه باهي الاحباب كلهم حاضرين ماغاب حد ..مشت تجاه الباب وهي تقول: هي نوضوا يا حناتي كان بديروا ترديدة للناس
طلعت وبناويت اختها اللي هادي استعجلت فحركتها
ع خشة اختهم الكبيرة «تماضر» وين لقتهم بروحهم فالدار ردتها وخشت وهي تتكلم بالشوي: سعاد مش باينة بكل بكري لا هي لا بنتها..
قامت ياسمين راسها
كريمة: مش مش باينة هي مهناش اصلًا ..سكتت مشوار وقالت: شورها الدوة اللي سمعتها مرت خوكم في منها
ياسمين: دوة شني؟!
تماضر: فاطمة جارتكم هوني حضرت الكسكسي في سانية بلحاج اليوم اللي بعده مش جتنا..هدرزت هي ووداد وقالتلها سعاد ماجتش لعرس اختها ومش باينلها جي
انصدمت ياسمين، الموضوع هادا انفتح قبلها بليلة بين خواتها بس هي وقتها ماكانتش معاهم وماعندهاش ادنى فكرة..
اختهم الثالثة «إنعام»: فالبداية مابيتش نصدق راهو هادي سعاد منصور قداش ماشدوها فجرتها زمان من كثر ماديما في حوش ماليها بتغيب على عرس اختها علاش؟!
كريمة: يصيروا المشاكل
ياسمين: مش خالتي سعاد وماليها.. بالك عندهم حد مريض في متاعينها متغششين عليه ولا ميتلهم حد..وهادي فاطمة ماتعبوش على كلامها عارفينها تموت في التفتفيت وتكبير الدواوي
انعام: ماعمره يجي دخان بلا نار ياسمينه
تماضر: اني سمعت خديجة تقول حالة وفاة لقريبهم هدا علاش ماجتش..صدقيني واضحة ترقيعة كان هادا راجلها مايحضرش
قعدت ياسمين تفرك فيديها ببعض وهي تفكر
وخواتها مستمرات يتناقشوا..
كريمة: الناس تدوي يا لطيف وخلاص كل واحد يحط سبب شكل
تماضر بقلق: كبدي ع مرت خوكم توا ماشاغلني غيرها..
بان ع وجه خواتها الضيق
ياسمين: راس هالاخت وماتحضرش عرسها..بكدر كملت: مسكينة فرحتها مغصوصة
انعام: من بعد عرس ولد لامين خطبتين في جرة بعض وختمها الحجاج الناس ماتصليش على نبيها..
انفتح باب الدار وخشت امهم كيف مبدلة رداها وتربط فالتستمال على راسها: شديروا قارنات الروس هني نوضوا قعمزوا مع الناس وديروا واجبهم! كان في حاجة قعدت من سهرية بكري طلعوا حطوا في صفر خواتكم شارقات بروحهم
«قمرة عندها 6 بنات..اللي شفتوهم توا بالاضافة لزوز تانيات عفاف وبدور كلهم متزوجات عدا ياسمين»
تماضر: حاضر يام كنا نغيروا بس..
ياسمين: يام شن صاير عند عيت بلحاج؟! علاش خالتي سعاد مش غادي؟!
شبحتلها قمرة وبهمس قالت: اصصصص، وامك وين تعلم! هادا باش انتوا مقعمزاتلي هني! نوضوا ومعاش تدووا فيه الموضوع هادا حتى بينكم وبين رواحكم..بتكشيخة كملت: بدال ماتسكتوا اللي يوشوشوا ع مالي كنتكم! نوضي انتي وياها هيا سلم بنتي واللي بيجبد منكم كلام اعرفوا شن تردوا عليه ..فتحت الدولاب: حليمة منين كانت جويرتي ماعمري قرضتها في قفاها ولا خليت من يقرضها واني حاضرة توا بعد زدت قربتها نديرها!! ..صكراته بعد طلعت حكة المسك وهي تقول: هنوني وباحترامكم سامعاتووو! كلمة برا الطريق لا الناس فرحانة لوخيكم ماتوجعوا حد..
وقفت كريمة وهي تقول: ربايتك يام ماتوصيش
انعام: معناها تماضر لحقي عاللي فالكوجينة واني وياك كريمة نطلعوا..تلفتت ع ياسمين وكملت: جيبي الدربوكة التانية وتعالي خل نهيجوا شوية..
طلعوا التلاتة وامهم لحقتهم ماقعد حد غير ياسمين اللي طلعت الدربوكة وطلعت بيها وهي تخمم شن هالشي اللي يشد سعاد عن اهلها لو كان راجلها تراهو مش موجود .. ووصلت للسؤال اللي يلف قلبها ويدور عليه..في هالحالة الزبير حاضر ولالا؟!
تنهدت بعدين شدت الدربوكة بجنبها وخشت للدار وهي اطق عليها
•🌹•🌹•🌹•🌹•
واللي كانت حديث الكل اليوم في حوشها ليها قريب خمسة ساعات بنفس الوضعية..مقعمزة ع سريرها وتبكي وكل ماتحاول تهدا تتفكر مكالمة وحدة من حمواتها ليها
سعاد ببكي: الله لا تهنيلك بال يا كلبة يا الله اجعني متشمتة فيها زي مامتشمتة فيا يعطيها دعية وضربة قوية.. ااااه مش سادني قهرتي مش سادني! ..خبطت بيدها ع فخذها: الله لا تربحك يا ولد ذهيبة انت وامك
شدت بين عيونها بيدها اليمين اللي ساندتها عاليسار ورجعت تبكي بحرقة: سامحيني يا وخيتي سامحيني يا رقيوه..
ولان الحوش هدوء مجرد انفتح باب الحوش سمعت صوته وناضت بحرارة جبدت باب الدار فتحاته وطلعت بخطوات متسارعة وقفت ع راسه وهو كيف بينحي كندرته
جمعة ماكانش مستغرب حالتها وعيونها المنفوخة اللي استغربه كلامها
سعاد بانفعال: هكي يا جمعة! اللي يصير بين وبيني اماليا تمشي بيه تجري تعاوده لامك وخواتك! ..قعدت تأشر بيدها وتقول: خليتني مهزلة ضحكتهم عليا وشمتتهم فيا في مرتك ام صغارك! هم من قبل باهيين يابال حصلوا فيا فرصة!
استنتج اللي صار، هو ماحكاش مباشرة ليهم قال لبوه يبي مشورته ومع انه حرص عليه مايقول لحد لكن شكله خبر امه وهي بدورها خبرت خواته..
غمض عيونه باستياء وهو يستغفر
سعاد زادت فالبكي: علاش يا جمعة علاش ..علاش تهد فيا اني مهدودة من غادي مهدودة من غادي..
ضمها ليه وهو يطبطب ع ظهرها ويهدي فيها وهي مستمرة تعاتب فيه
نجلاء كانت في دارها تسمع فيهم وهي تكتم فشهقاتها..عارفة طبع امها وتفكيرها اكيدة توا زادت نقمت ع خوالها اللي لولاهم ماقدروش خوات جمعة يتشمتوا فيها..
حاطة راسها على يديها فوق ركابها المثنيات وقلبها زي من واخده يعصر فيه لاخر قطرة دم
نجلاء بصوت مكتوم: كل يوم يبعدوا فيك عني يا ابراهيم كل مانقول خلاص فات وقت وبردت الحكاية يجي مايطينها ..ابتسمت بألم: اصلًا انت كرهتني خلاص..
غطت وجهها بيديها ورجعت تبكي بقوة..
•هادا كله والزبير راقد في داره، كمل يومه فالخدمة ومن التعب بعد روح راح فالنوم طول
•🌹•🌹•🌹•🌹•
: هادم صغار اختي بايتين عندنا مانحكيلكش عالازعاج طبعًا
خليفة بضحكة وهو يمشي وحاط يده التانية في جيب سرواله: قبل نبي نهدرز عليك لكن شكلهم بيفسدوا عليا..
ابتسمت وقالت: امممم..على حسب مرات انت بتصبر
خليفة مبتسم: وكان ماصبرتش
بدلع: الله غالب عليا شن عندي بندير..
سمع صوت جاي من الكوجينة والواضح انها حركة نفر واحد توجهلها
: خويله نبي الحمام
ضحك خليفة: نوضي دخليه الحمام يا خويله
: يدلل حبيب خويله..اسبقني حبيبي جاية وراك
خليفة: احممم، تو شن لزمتها حبيبي هادي ولد راهو يا هياتم عودوه عالشدة ماتنعنعوشي..
بصوت ناعم ردت عليه: تريس محصحص يضبحوا عليهم هكي جت ع حبيب خويلته اللي قاعد عيل..
خليفة زعميته يكشخ: تي ياااسر يا بنت مش وقتها هادي مزال عليها
هي فهماته كويس وابتسمت: بنصكر نشوفه ونجي
وقف فروشن الكوجينة وهو يقول: نستنى فيك..راجاها تصكر بعدين نزل الهاتف وقال بصوت مسموع: لوز يا لوز
تلفتت ويدها ع صدرها: خلعتني
وضحكت..
قام حواجبه ونزلهم: نشم في صنة طيبة
مريم: نديرلهم في شاهي نحسبك؟!
شبح يمينه وقال: تبدي احسن وحدة كان خليتيهم ستة..
مريم: حاااضر
خليفة بابتسامة: يوتى شريني عليا
ردت عليه: تم..
دارلها حركة بخشمه بعدين مشي ع تركينة باش يعاود لهياتم
دارت مريم الشاهي وريحته فاحت في كل الحوش
ع خشة ثريا لابسة قفطان خوش تلت ارباع وطوله فوق الكاحل بشوي نمري شعرها لافاته وشاداته بتوكة شدادة والذهب يلمع في اليدين والرقبة والوذان: اااه هضا وين تريحت..
مشت مريم للروشن صكرت البرسيانة متاعه وهي تقول بابتسامة: الصدرة اتعب
وقفت ثريا عالرخامة جنب الغاز وعلى فمها ابتسامة ودودة: فيش اطيبي؟! شاهي؟!
جت صكرت تحته النار: اي بالقرفة والقرنفل..
ثريا: بنته غبقت الحوش كله سمح باين عليه
مريم بابتسامة: تو ندخللكم منه خشي استريحي انتي
قالتلها برفض: لا عند نخشوا جميع، هاتي انظملك الكبابي بيش تصبي دغري..
لما لقتها مصرة قالت: على راحتك، تلقيهم في الدولاب اللي تحت الكوشة
مشت ثريا زي ماقالتلها فتحاته وطلعت تلاتة باكوات بنفس التشكيلة كل واحد فيه 12 طاسة..بدت تستف فيهم فالصفر اللي مجهزتهم مريم مسبقًا: ايش تعرفي تسوي اخرى..
مريم بابتسامة وهي تصب فالشاهي: اغلبية ماكلتنا
ثريا: المبوخ وحاجات التقلية
ضحكت: سامحيني شن هيا التقلية؟!
ثريا بضحكة: يا حنة التقلية سمعت امك بدري تحكي عليها بصلة
ابتسمت مريم وهي توتي لخليفة فصفرته: اهاا..تعلمتهم الحمد لله
ثريا: المحاشي بصفة عامة والعصبان
حستها مدققة استغربت فيها هلبا مع ذلك جاوبت: ايه نعرف مش هداكا الصعوبة هو..
ابتسمت ثريا: ماشاء الله وتقولي الاغلبية انتي كله باين عليك تعرفي تسويه
ضحكت مريم بخجل بعدين ردت : لا والله في حاجات لتوا ماقدرتش نجيبهم..
ثريا: بشواش عليك تو اتعلمي دابينك تعرفي الاساسي
في اللحظة هادي خشت ديما وبعدها بشوي راوية الزوز استغربوا في وجود ثريا مع مريم لكن ديما زي اللي بدت تفهم علاش..كلام ريما سابقًا ماراحش من بالها
وخرت مريم خصلات هاربات من الضفيرة ورا وذنها: ويري بالله طلعي الصفرة هادي للفيراندا..
ماقدرتش ترفض قدام ديما وثريا رفعتها وطلعت بيها
ثريا بابتسامة: كنك ديما تريدي شي؟!
مريم شبحتلها وابتسمت
وهي ردت تقول: لا مغير امي نشدت عنك نحسابوك فالحمام
ثريا: كنت نسهري مع مريم.. شافتلها وكملت: حكاويها سماح
هي ابتسمت
ديما تراقب فالمشهد ..عيونها على مريم وفي خاطرها تقول «حتى انكان ماجيتي نصيب جمال ربي مايحطك في عيلة كيفهم»
فاقت من سرحانها لما كلمتها: ديما بنتعبك ادخلي الصفرة هادي بحدا النساوين داخل
قالت بابتسامة: مافش تعب هاتيها..
خدتها ديما وطلعت وثريا طلعت وراها بعدين وقفت فم الكوجينة: تعالي مريم
مريم: صحة ماعنديش نية
ابتسمت ابتسامة لطيفة: براحتك..
ومشت
هي خشت للصالة وراوية جت من جهة المربوعة خشت الكوجينة
شافتها مريم اللي كانت ادور ع تليفونها: مارفعتيهاش ولا..
هزت راسها بمعنى لا: عطيتها لنور
مريم: راوية عيب..
راوية: ماسمعتيش كلامه يا مريم جارح اخي عليه
مريم: هادا عبيدة معقولة ماشي يشفعله عندك بكل؟! بعتالي انتوا صغار عم شن بتتنافسوا؟
سكتت شوية بعدين قالت: بالك يفهم..
مريم شبحتلها مطولًا بعدين هزت راسها وقالت: تليفونك معاك؟! متاعي مش عارفة وين جت حدفته
حطت يدها في جيب توب التوتة: من بتكلمي
طلعاته ومدتهولها خداته منها: خليفة يجي يرفع الشاهي قبل ليصقع..
راوية وعيونها عالصفرة: هو ومني
قوست فمها بعدم معرفة وهي تضغط ع ازرار الهاتف: مندريش عليه بالك حد من عمامي قاعد نايض..
راوية: مرات الشراقة حتى هما
مريم حطت الهاتف ع وذنها: مرات.. الو خلوفه ..الشاهي واتي راهو..طاولة السعف؟ فوق فالمخزن..ايه..بتجي من باب الكوجينة؟ باهي مانحطلك معاه شي؟..ضحكت: حاضر..نزلت الهاتف وقالت: ويري فيسع حافظة المقروض..
خدت راوية مترد ومشت عباته مشكل من المربوعة اللي كان مفتاحها عندها..ولت للكوجينة وحطاته فالصفرة
مريم ابتسمت: كيف بنلحقك نقولك زيدي نوعين
غمزتلها راوية وضحكت بغرور مصطنع: ماتوصيش حريص
قعدوا يستنوا شوية بعدين بدوا يسمعوا في اصوات هدرزة رجالة متداخلة..
: من اسمح نا ولا عمك كمال
راوية بضحكة مكتومة همست: للو
هي ابتسمت
: بابا..
ضحكوا برا ..
وداخل ضحكت مريم حب..
مشت راوية وقفت ورا البرسيانة..جاهم خليفة بطاولة السعف وكراسيها
: كان ضبحت عليا نزلت معاك
: مادورش..
مريم بتفنيصة: راوية تعالي جاي
تلفتتلها وحطت سبابتها قدام فمها
حركت مريم راسها بعدين رجعت تشوف فالصفرة ..انفتح باب الكوجينة وخش خليفة: عطلت ولا.. شاف راوية واقفة عالروشن مشالها: شديري غادي انتي..
ضحكت بدون صوت وبهمس ردت عليه: نتفرج
فنص فيها: وتقوليلي فيها عادي هكي! خلاص عليكم انتوا معاش تتحشموا!
نزلت عيونها باحراج ومريم تصب فالشاهي وتسمع فيهم وهي تضحك
: لنقني بنروح بها يا منصور
: احتي لا..
: لسان وقلة احسان ولدك هادا
راوية: من من ولاد خالتي مريم اللي تكلم توا خلوفه..
وقف جنبها بعدين قال: عبدالرؤوف
راوية: والتاني اللي مقعمز بحدا ايوب..
خليفة: جمال خوه الصغير..
هزت راسها: وين خوهم التاني باه؟!
لوالها خليفة يدها وهو يقول: لالا..انتي استانستي بالهلبا..استانستي يا سكررر
كانت تتوجع وهي تضحك
مريم: ياسر خليفة يدها حرام عليك!
جاها ومزال شاد راوية دار معاها نفس الشي: كان قعدتي ساكتة خيرلك..
مريم بملامح الم ع وجهها: الشاهي صقع
خليفة: عاودي سخنيه شن المشكلة
راوية بانزعاج: خليييفة..
قعد شادهم وهما يقاوموا لين خلاص دمعوا عيونهم
طلقهم وقال: دلوعات لين فايت فيكم
راوية: غير جدو رقد كان هادا والله مانرتاح لين نخبره..
قالتها وهي تتحسس فيدها بوجع
ضحك وقام صفرة الشاهي بيد وحدة
مريم: دخل الصغار على طريقك امهم بايتة هنايا..
فتح الباب بيده التانية: مش حيخشوا مدامه بوهم برا
مريم قدمتله: تختخهم ..سكتت بعدين قالت بتردد: العين تكسر الحجر ولتين مطلوقة بطبعها وتحب تهدرز..تو قداش ليها معاهم برا..
شبح خليفة لراوية: غارت صاحبتك..
راوية: ماحد يستاهل تغار منه وهي عارفة
جت جنب راوية وابتسمت: يس
خليفة يضحك: باهي تو نحاول.. لكن عيب راهو اللي قلتيه مريومه عبدالرؤوف هادا خايف عليها قريب زي بوها ماخلى شن قري عليها الراجل..ذكر الله ماطاحش من لسانهم بكل زي هو زي خوه
وجهها ولى احمر احراجًا: مش قصدي لكن انت عارف مش كل الناس تذكر في ربها..وللو الله يبارك عليها حبابة بشكل
قرصها من خشمها: انتي مش عاطيينك بكل ع هالحال قلبك رهيّف ماينفعش تكوني ام..
زاد احمرار وجهها وعيونها نزلتهم
خليفة: حي عالوجه كيف ولى حي..طمااااطم..ضحك بتضييقة عيون: لوز كبرت وبدت تتحشم قصدكم!
راوية شادة ضحكتها: خليفة ياسر..
توجه للباب وهو يضحك ..طلع وصكره وراه
مريم زفرت
راوية بضحكة: خليفة ويكون رايق
مريم: بكللل!
•عبدالرؤوف: عليش بس متعبين رواحكم
كمال: تعب شني يا راجل..
قعمز خليفة وعيونه ع لتين كيف واقفة قدام جمال وتهدرز عليه: شن للو وقت عالنوم راهو
خدي منصور طاسة الشاهي ومد لولده كعكة تمر: مابتش..
لتين شبحت لخليفة: نبي نقعد بحدا عمو عبدالرؤوف وعدني يحكيلي سر
ايوب: لالا مافيش منها الدوة
شبحتله
جمال: تمي معايا نا نحكيلك موش مغير سر اسرار
ابتسمت بحماس: باه..
وخليفة قال: مرومه قالت جيبولي للو ..تبيها تحرج منك؟!
سكتت شوي وهي حاطة صبعها ع خدها تفكر من جدها
كمال يضحك بدون صوت..
بعد سكوت دام ثواني تكلمت اخيرًا: ناديها خلوفه تطلع بحدانا في مكان
•فنصت بصدمة: نهار ابيض! منه جد خليفة؟!!
طلعت من الكوجينة ووجهها نار وراوية لحقتها: مش عارفة كيف طلعت منه قبل مستحيل مافيهمش
مريم وهي توخر فشعرها عن وجهها اللي مولي من لون الطماطم زي ماقال عمها..تمالكت نفسها وقالت: بتباتي هني؟
راوية: تؤ مانبيش نسهر..
هزت راسها: استنيني ناخد وشاحي ونطلعوا جميع كان هادا..
راوية: نستناك مالا شن..
ابتسمت وخشت داخل..جاباته وطلعت..شدوا يدين بعض ومشوا الزوز للباب الرئيسي كان مفتوح وصوت الهدرزة فالفيراندا واصلهم
راوية حتى بالغلط ماشبحتش غادي لكن عبيدة قلبه قبل عيونه تعلقوا فيها..
كملوا الزوز طريقهم لحوش فتحي وعيون عبيدة تلحق في المتربعة ع عرش قلبه..
ما استاقضش الا بصوت زهير يقوله: عبيدة..وين مشيت
تنحنح ودوب ما ابتسم: قاعد..
•🌹•🌹•🌹•🌹•
فاتت هالليلة وجي صبحها..
الساعة 9:00
منصور والكوني يدهوروا فالسانية.. والصادق كان مع ولاد عمة مرته في الصالة يفطروا ويهدرزوا..
•انفتح باب حوش حسين
طلع منه شرف الدين وحوالين رقبته فوطة شاد واحد من اطرافها وينشف بيها فشعره..شبح يساره شوية.. ضيق عيونه باش يزيد يشوف..حمزة جهة النخلة مدرس سيارته ومقعمز فيها لكن فاتح الباب ويدير فمكالمة..عرفها مش مع فريال من ملامح وجهه
غيرهم عنه للجهة التانية شاف طارق وبشير واقفين ابصر شن يهدرزوا ..عقد حواجبه وين صدح صوت اغنية عالي
تلفت لقي القيطون مقيوم وفريال واقفة فالخيمة قدام المنظومة يد في نصها ويد تقلب بيها فالاغاني.. وحداها الصغار يتجاروا
عالجهة اللي مستفات فيها طاولات امس مقعمزة نور فوق تلاتة منهم الكاميرا حوالين رقبتها وعيونها مع الصغار مرة تضحك مرة تصورهم ..لمحت بطرف عينها شرف الدين جايهم
قدم لين وصل جنب فريال: نحي هكي نحي..
هي وخرت وحطت يدها التانية في نصها: تفضل ورينا
طلعت ليلى من باب الحوش في يدها شبشب واحد من الصغار..شافت سلفها يبربش فالمنظومة حطت الشبشب برا واتكت فالباب وربعت يديها..
في نفس الوقت جوا منذر وزهير من جهة حياشهم
منذر: الفسيو متاعكم مش زي متاعنا في اختلاف
زهير: قول اختلافات..قبل كنت ناوي انزلها مع موادي توا باش السيم الجاي نلهى بغيرها.. مرر يده في شعره للخلف: بالك نتخرجوا قبل الدفعة..
ابتسم منذر: تو نسألك ياسين صاحبي خدي فيها كورس السنة اللي فاتت كانه يعطوا لجماعة الصيدلة..
زهير: ياسين ياسين متاع زمان؟!
ضحك بخفة وقال: ايه
زهير: الله مقدم ايامه..راهو اللي كان عنده تومية يقروا معاك انت وخولة في نفس الفصل..
منذر بضحكة: يسرى ايه
ضحك زهير وتلفت قدامه: كانت صاحبتها راس.. بالله عقلت ولا قاعدة في عماها الاول
ضربه بقبضة يده ع ذراعه ضربة خفيفة: عقلت ولت ماشاء الله ونزيدك من الشعر بيت خشت طب حتى هي..
زهير بشي من الدهشة: لالا!
منذر وصوته باينة فيه الضحكة: وتصفي اعلى من خوها زيادة
حط زهير يديه في جيوب سرواله وقال: يهدي من يشاء.. المهم كلمه واعبى بيا ياسين يعرف وين يحط رجله كانه قاعد زي زمان..ضيق عيونه وين شاف علي خاطم من الجهة المقابلة وناوي الخيمة هو ونزار..
شرف الدين يرقص ويدير فحركات بالفوطة وفريال متكية عالمنظومة تتفرج عليه وتضحك
وليلى في باب الحوش زيها.. من جنب ليلى طلعت عليا تجري على صوت الاغنية تحبها ماهو ..شافت شرف الدين كيف يرقص وعلي ونزار مشاركينه ونور تصور فيهم فيديو..
خشت شدت يدين مها بنت عمها وقعدت ترقّص فيها..
طارق: ابصر شن في فالخيمة
بشير بضحكة: تعالى تعالى..
ونفس الشي داروه لوز وسكر وهما جايات من حوش فتحي
وصلوا مع وصول زهير ومنذر من الجهة التانية ونزلة كمال من الفيراندا..
فريال انسجمت علت الصوت لاخر الشي
وشرف الدين يغني مع الاغنية: حبيّب عيني مايرضى يوم يخليني..يتعب من الابعاد يجيني بش نرضى يا ناس عليييه..
صفر علي بصوت عالي
طارق: تي حي عالفرخ نزار حي غير شوفه شوفه كيف يلوي! شرف يا تاااافه..
وقعد يضحك بعدين خش معاهم وهو قايم يديه فوق: اللي مهبلني اهو جيييي..
ليلى منسجمة تتفرج جت جنبها رقية من داخل لما شافتهم ضحكت بمفاجأة: شن يديروا هادم!
شبحتلها بضحكة بعدين شبحت قدامها لقت كمال يشيّش فيهم غيرت عيونها لبشير لقاته يفنص.. تلاشت ضحكتها وانتبهت لروحها كانت لابسة توتة كحلة فيها من فوق لون فوشي وكتيبة بالابيض.. سروالها ضيق نوعًا ما والتوب متاعها قصير لنص الفخذ.. خشت تجري ورقية تضحك عليها
قعدوا مريم وراوية يصفقوا..هدا كله توثق فيه كاميرا منصور بايادي نور بنت عمه
في عز ماكانت راوية تصفق شمت ريحة عطر تميزها كويس وحست بنسمة تحركت لما فات بجنبها وجاكته حركت الهواء حواليها
هالمرة ماكانش لابس بالطو فوق اليونيفورم انما جاكة حتى هي زرقة كحلية والنظارات فوق راسه..
حط كمال صوابعه في فمه وصفر تصفيرة تصم الاذان وهو يشبح بربع عين لراوية
استمرت تصفق وتشبحله كيف خش وسط خوه وولاد عمه يغني مع المنظومة وهو قايم يده اليمين فوق ..شبحلها غيرت عيونها لنزار..
مريم وكمال ورقية معاهم عالخط
عبيدة يغني وعيونه مانحاهمش منها: اللي نهواه.. وماعنديش الروح معاه ومايحلى الميعاد بلاه..
بشير بصوت عالي: نفرح كان قالولي جيييي..
شرف الدين رافع يديه لمستوى كتافه ويرقص فرقيص هياجة: اللي مهبلني اهو جي.. يغار عليا نغار عليه
فريال بصوت عالي: هادا هو هادا هو.. هادا هو اللي نبوه
جيداء تصفق: هادا هو الجو الصح.. هادا هو اللي يصلح
خش بشير معاهم وعلي مش مغيب جهد هو وكمال ينشطوا فيهم ليه ليه..
مريم تضحك وراوية عندها المسألة اثبات وجود تبي تستكرده ومعاش تنسحب في حضوره.. هي فعلًا وجعها كلامه منه هو بالذات اللي ماعمره عودها كان عالدلع وغير شن تبي..لكن زي ماسبق واسرّت لبنت عمها عندها غاية تانية تبي تحققها
وحتى هو عنده غاية مايبيش يستسلم ولا يسلم لين يوصلها.. جي جنبها في غفلة شد وحدة من يديها جبدها بقوة خلاها تقدم خطوتين..شهقت تحساب روحها بطيح وبمجرد ما رجعت توازنت شافتله بحدة وجت بتمشي..
هو قعد ضاغط ع يدها ويضحك ويغني: عزيز وغالي.. حبي الاول حبي التالي..وبضحكة كمل: هي كملي الباقي بلغارية
ولا عبراته حدها تحاول تفك يدها اللي اختفت داخل يده..
كمال يضحك: يغار عليها.. يزيد دلالها.. يقهر في حسادها هي
شافتهم فريال حطت يديها حوالين فمها وقالت: نوناااااا..صوري بالله عليك هنايا.. في لقطة مش عااااادية
انتبهت عليا..طلقت يدين مها اللي كملت رقيص وهي قعدت بعيونها مع عبيدة وراوية..
وجهت نور الكاميرا عليهم بابتسامة
رقية حاطة يدها بين راسها وبين حديدة الجهة الثابتة من الباب ..عيونها حتى هي عليهم وفي خاطرها تقول «يا ناري بيدو ميت فيها..ربي يلطف بحال قلبك وخلاص..غيرت عيونها لفريال كانت لابسة توتة مستورة من فوق طرفين رابطة الطرف الخارجي حوالين خصرها وقايمة شعرها كعكة مبعثرة تضحك وتخبط برجلها عالارض خبطات خفيفة..هادا اللي تقدر اديره فوجود الولاد..ضحكت رقية: كان يشبحك حمزة»
قاطعها زهير لما جاها: رورو خيرك بعيدة تعالي فالوسط زودي
رقية بضحكة: اص اص ماعنديش جهد ليهم..
شدها من يديها وبدي يوخر ويكر فيها معاه: غير تعالي
تعاود المقطع تاني وعبيدة يغني معاه: عزيز وغالي.. حبي الاول حبي التالي.. سكت وهي ولا كأنها..عقد حواجبه بمزح: تي هيااااا
مريم تبيهم يتصالحوا قالت: هي زعلانة وانت غلطان
حط كمال صوابعه في فمه وصفر بصوت عالي.. ماحد سمعه غير فريال اللي كانت تشبح للجهة نفسها..مدت يدها للمنظومة نقصت فيها
تلفتولها..
منذر: خيرك
طارق: يا لولا هداكا الراجل
ضحك شرف الدين وزيه نزار بس علي التزم الصمت.. وهي غيرت عيونها عنهم ووجهها احمر: كمال عاوز يتكلم..
ورجعت اتكت بيدها عالمنظومة
رقية شبحتله كان واقف قريب ع عبيدة وراوية ومريم زبطاته بيلبسهم..
وجهوا الباقي انتباههم لنفس الجهة
وكمال قام يده: منورة مرت خوي
هي قريب ذابت فحوايجها..
•خديجة بضحكة: خيرهم سكتوا زعما؟!
وسيلة توتي في صفر فطور النساوين هي وزمزم..ماسمعتهاش وماكانتش معاهم
زمزم مشت للروشن وقفت فيه: مش باين عليا الخيمة متقيتهم من هني.. ضحكت وقالت: سلم والله روشن الممر..
وطلعت من الكوجينة مشت لين وصلت الروشن اللي يطل بالزبط عالخيمة..بانوا عليها كلهم
ع طلعة بهية من الحمام كانت تسيق فيه وبالمرة توضت ..وين لقت زمزم واقفة فالروشن استغربت وجتها طول: شن في؟!
هي تلفتتلها: فالاول نسمعوا فالدنيا بتتقلع دورة لا حس لا مس جيت نشبحهم خيرهم
بهية: تلقي خيط المنظومة انظر شكون عفس عليه انسل..
: عبيدة ترا شن بيقول اسمعوه
شافوا الزوز للروشن بتلقائية لما سمعوا شن قال كمال..
عبيدة يشبحله بغل وكان يلقى ينقز عليه والاخير مبتسمله باستفزاز..
الباقي وجهوا نظرهم لعبيدة والوضعية اللي كان واقف بيها ع راوية.. شاد يدها وقريب منها هلبا ..الوحيد من بين اللي مايعرفوش حس في حاجة مش طبيعية هو بشير
اما عليا حطت يديها قدام فمها وهمست بضحكة: اوووبا
طارق: متعاركين ولا؟!
مريم مرتبكة خايفة حد يلاحظ: ايه..
علي: الصفرة هادي ماعندهاش صاحب مش عارف كيف متحملتيها
شبحتله راوية بحدة
وهو ضحك قصدًا يناشب فيها: زيدي فنصي بالك عيونك مزال في مكانهم ماطلعوش..
ضحكوا..
رقية بضحكة: تحرج منك خالتك بهية راهو
علي: لالا خالتي بهية اعسل مرت خال فالدنيا وديما مع الحق..
وشبح لراوية بنفس النظرة
جيداء حطتله يديها في نصها وقامت هداكا الحاجب وهي تهز: معناها برا بات في حوشهم مرة تانية ..ايه حقا مرت خالك بهية ماعندهاش حد يقعد نايض لبعد العشرة مش زي مرت خالك كلثوم ترقد ع كيفك وتنوض ع كيفك..
شبحولها الكل بصدمة وهو مفنص وخلاص😂
نور شادة الكاميرا: جيداء عيييب شن الدوة هادي
والباقي هادا وين ضحكوا..
طارق كان واقف وراها حط يده ع فمها وقال: كملوا شن كنتوا تقولوا
الصغار قعدوا يضحكوا عليها وهي تحاول تفك روحها لكن عبث خوها حاصل عليها زين
منذر قام حواجبه ونزلهم لعلي: فالسنون..
رقية تضحك: غير خل نسمعوا عبيدة
زهير: هيا يا غالي اتحفنا
كمال: قولهالها طيري هيا..
مريم وراوية ورقية جمدوا في اماكنهم..وهو بتلقائية قاله: شن هي!!
شد كمال ضحكته بصعوبة بعد مالعب ع اعصاب ولد عمه.. مرر عيونه عالجميع وعبيدة شاد روحه بالسيف
عليا تتفرج باستمتاع وعيونها قلوب ..تأثير المسلسلات التركية😁
اخيرًا نطق: اسف..
زفروا مريم ورقية براحة بينما راوية قاعدة تحاول تفك يدها منه بدون جدوى..نظراتهم وترتها وهي اللي ماتبيش من يعرف بهالحب الميت من قبل ولادته..
ابتسم عالجنب وشبحلها..نزلت عيونها طول
فريال بدت تخبط بيدها ع المنظومة وهي تقول: قولها..قولها..قولها
وتردد فيها ..الصغار طول داروا زيها هما ونور وعليا
كمال يصفق معاهم: قولها..قولها
انضموله الباقي
رقية: حي عليكم حي كان يسمعكم جدكم نهاركم اللي دوروا فيه..خبطت يدها بخفة ع فخذها وقالت: فراااولة اه منك يا متاع العمايل
شبحتلها وضحكت بغمزة ورجعت تخبط عالمنظومة وتردد مع الباقي بس اضافت: قولها بالله عليك..قولها ربي يخليك
فريال اللي حاليًا محرومة تعيش لحظات زي هادي مع حمزة من غير ماتحس بنفسها تبي تسهل ع كل اثنين..
عبيدة بصوت عالي ومزال عيونه عليها: تحسابوني متحشم؟ مدامني غلطت فيها نقولهالها بدال المرة مليون
بشير: اووووووو..
زهير بطل هتاف وضحك بدهشة: لالا ماتقولوهاش!..تلفت جنبه لرقية: رورو!
رقية تستغبى: خيرك..
شبح قدامه وابتسم بعدين قال: سلامتك..
نحى عبيدة يده التانية من جيبه خدي بيها يد راوية..هي حست بدفاوة يديه..كان دفي مشاعر لكن للأسف ماوصلوش لمكانهم..قلب راوية
اللي ابدًا ماعجبتهاش لقطته وكيف شد يديها بهالطريقة
عبيدة: اسف يا عيون الفستك..
شرف الدين: سامحي خوي يا صفرة خيرلك
كمال: تو انت من كلمك اطلع منها براني راااك..
بشير شاف لكمال وخلاص تأكد من اللي فهمه..ضحك
راوية: مسامح خلاص ..فكت يديها من بين يديه بعدين ربعتهم قدام صدرها ..شبحتله وكملت: مع ان كلامك واعر زي السم يا باش مهندس
زاد قدملها خطوة..طبس راسه ليها وحط يديه في جيوب سرواله وبابتسامة قال: قلنالك اسفين
هني نور وقفت تسجيل الفيديو ومشت بسرعة قربت منهم وخدت لقطة ثابتة.. جت حلوة بالمرة..هو بلبس الخدمة اللي زايده النص وهي بسروال اسود فيه الوسعة وفانيليا خضرة زيتونية رقبتها كبيرة ومثنية ع برا وشعرها الملموم كعكة فوق..كانت واصلة لنص ذراعه فالطول وهو اساسًا جهامة طول فعرض منظرهم مع بعض جي لطيف💓
معلومة ع احفاد الحاج منصور..غالبيتهم ماشيين فالطول هلبا وراثة عندهم لانه جدهم نفسه كان طويل في شبابه..
•كانت مضيقة عيونها وهي تشوفلهم، شوي والحواجب انقاموا بتلقائية «تاريتك هادا علاش يا ولدي..لحقت خوك فيسع»
ابتسمت.. ام ومستحيل اتوه ع ولدها ..تحس بيه وتفهمه خصوصًا فالمواضيع هادي
حتى امها هي شكت..حست ولد سلفها مش خالي ..تنهدت وهي تقول: حطيتوا الفطور
زمزم: مزال
بهية: خل نمشي نعاون مالا..
مشت وزمزم اتبع فيها بعيونها بعدين ضحكت: كلثوم وتوا بهية.. قامت حاجبها وكملت: اشبح شن يطلع مع المعفنين التانيين..غيرت عيونها للروشن تاني: البلغارية يا عبيدة..معقولة ما انتبهتش.. ضحكت مرة تانية وهي تشبح فراوية كيف تتكلم معاه: ياغبيني عليك يما مابتتمرمد..
•برا..
فريال علت الصوت تاني..ورجعت تقلب لين وصلت في اغنية لنانسي عجرم.. ابن الجيران
كمال بضحكة: خليها هادي خليها مرت خوي..
طارق جي بيطلع يشده بشير معاش يطلقه ..كبده دم عليه وجت الفرصة لعنده
البنات وعمتهم ما انتبهوش ..وعلى جهة تانية مزال عبيدة واقف ع راوية
هي قالت: خلاص بنخش جعانة..
عبيدة: اممم.. شبح لساعته وكمل: حتى اني بنطلع من غير فطور
راوية: مش عندكم كافيتيريا غادي كول منها
ضحك عالجنب بعدين قاللها: باهي بري وصحتين
ضحكت: هي تعالي مريومه..
مشت مريم معاها وهو معاهم بعيونه مش منتبه للدوشة جنبه لين قاطع سرحانه كمال: بدينا نسرحوا يا طيري وحالتنا ولت خطيرة
استاقض شبحله وجي بيشده خواه كمال
عبيدة: دماغك ميت فيه حمار ولا شن! تي قريب فضحت امي يا راجل!
كمال بابتسامة: بدال ماتشكرني يا طيري ماكان العشم والله.. تي لولاي من بعد ربي راك تحلم تسمع صوتها ولا تلمح خيالها.. اني لقيت قلبك تعبان سخفت عليك..
عبيدة خبطه ع ذراعه: سافل ونذل وحيوان
ابتسم كمال: طالعلك
هو ضحك..
وشوي شوي اللي هادا طلع من الخيمة باش يفطروا ماقعد حد غير البنات وسرعان ماخشوا حتى هما وخلوا المنظومة والعة
•🌹•🌹•🌹•🌹•
يمشي ويتكلم بالتليفون: كيف ماوصيتك
: تم هاني رؤوف واحكي لخالي بإذن الله نا راد بالي زين والشغل ماشي كاينه مصبي عليه هو
ابتسم عبدالرؤوف بسمة خفيفة بعدين قال: مفتاح المكتب عندك ورمز الكمبيوتر قلته لك نا عادك كيف نفسي..
: تسلم بونسيب..
تلفت عبدالرؤوف شاف بوه جاي باتجاهه: تمام بوبكر نا بنعدي تو الامور كلها سيبتها عندك انت تصرف
: ماشي بالسلامة..
صكر الخط ع وصلة الصادق فولده: كنت تحكي مع ولد عمتك؟!
هز راسه بمعنى اي: نطمن عالشغل
ابتسم الصادق: انقنك صقر ..تميت تقنع فيا بيك واجد يا رؤوف واجد
ضحك بخفة: باتي لنقنك اعفيني نا دوبني ملحق
«عبدالرؤوف بالاضافة لخدمته مع بوه وادارة مصالح جده وقرايته اللي رجعلها مؤخرًا..عنده تجارته الخاصة في السيارات واخد وكالة احدى الشركات المعروفة»
الصادق: نا قاعد ماقلت شي..وبابتسامة كمل: لكن كيف ماتبي يا صقر ربي يعاونك
عبدالرؤوف ابتسم: اجمعين..
الصادق: ايه، شن يخبر بوبكر
عبدالرؤوف: كله تمام ماتشغلش بالك
هز الصادق راسه: العيل هذا كيف مانحق فيك انكان استمر هكي له مستقبل كبير واجد
عبدالرؤوف: حتى نا نقول هكي
مرر الصادق عيونه عالسانية: حسيتها اعجباتك..
عبدالرؤوف: مهتمين بها.. تعجب اكيد
شبحله الصادق وضحك: امك تريد تاخد منها لجمال..
عقد عبدالرؤوف حواجبه وفيسع ذاكرته القوية ما اسعفاته باليوم اللي تلا مرواحتهم من طرابلس لما امه بدت تتعدد في محاسن وحدة من البنات ..توا بس فهم سبب تصرفها الغريب وقتها!
الصادق: ايش رايك انت
عبدالرؤوف: ماعندي راي يا باتي..العرب عز الناس والموضوع هذا يفصل فيه جمال اوحده رايي لا بيقدم ولا بيوخر
ابتسم الصادق..
•🌹•🌹•🌹•🌹•
عند ابوبكر..
بعد كمل مكالمته مع عبدالرؤوف مشي متوجه بطريقه لمكتب الصادق اللي حاليًا موجود فيه خالد ..هو ماخاطراش يحتك بيه لكن مجبور خصوصًا توا في غياب بوه
قال في نفسه «تحمل يا بوبكر وامسك روحك، هذا مستقبلك فكر فيه وبس رد بالك يا بوبكر ..دابينا خالي راضي علي الباقي مايهمش خله يدير ايش يبي»
كمل مشي وفي طريقه تلاقى مع واحد يخدم معاهم صبحوا ع بعض بعدين..
ابوبكر: بريّك ماحقيتليش خالد قاعد ولا طلع؟!
رد عليه: تو كيف جايك من حذاه قاعد
ابتسم ابوبكر: صحيت
مشي الراجل وهو كمل طريقه لين وصل مكتب الادارة..وقف ثواني وهو يستغفر ويحاول يضبط نفسه قدر الامكان
مسح عوجهه وهو يقول في خاطره «الصبر»..في وقفته هادي سمع شي المفروض مايسمعاش..بس شاء الله لحكمة منه سبحانه
كان صوت خالد منفعل ويحاول يتحكم فيه.. يمشي ويجي والتليفون ع وذنه: كيف نبي نجيبه نا يا يحيى احكي! لالالا مانطلبش منه تي واضحة كنك يارا! ..بانفعال وغل كمل: نا ولد عمتك هذ من يومتي مانحبله فسخة!
تغيروا ملامح وجه بوبكر شد ع قبضته بعصبية وهو يتمالك في نفسه بقوة..سبب واحد مخليه مزال واقف انه مضطر يخش ويتكلم مع خالد بخصوص بضاعة من واحد من المصانع بيسلموها للموزعين ولازم التسليم يكون غدوة..
خالد قعمز عالكرسي ومزال يتكلم: بلكي في مكان اخرى غير مكتب خوك؟!!..تكنطى وكمل بعد خبط الطاولة بيده: وشنو توا بنتم نبرم على روحي عند يردوا!!
توسعوا عيون ابوبكر بصدمة ..قاده تفكيره لشي واحد ان خالد ناوي يلعب من ورا بوه..كيف بالزبط مش عارف «هذا انهبل في عقله ولا ايش بالضبط!»
قعد يفكر شن نية خالد..معقولة يخنبهم..لكن لا هو مش ناقص واللي يخلص فيه مش مبلغ بسيط..ويقدر ياخد قداش مايبي لو طلب من الصادق..
قعد يفكر الحكاية مش حكاية فلوس..شكلها حكاية منصب
بلع ريقه لما خطر في باله شي.. مشابه للي خطر عليه قبل..قعد واقف مكانه وحاير..حاير هلبا
استاقض من هالحيرة لما سمع خالد ينهي فالمكالمة مع خوه..فوت دقيقتين بعدين خش..
•🌹•🌹•🌹•🌹•
في السانية..
داروا النساوين فطورهم فالخيمة وبعده فتحوا القفة وفرقوا الحلوة عالصغار..ومع الظهريات بدوا يطلعوا البنات مع رقية للسيارات وجهتهم الحمام
ومعاهم من بنات جيرانهم تلاتة.. بالاضافة لفيروز والبنية اروى..
فيروز روحت من المدرسة غيرت بسرعة وحطها بوها في السانية بعدين تسقد ع حاله
كانت تمشي وحاسة بتوتر السيارات كيف مدرسات والاصوات تصدح بـ هيا ووقت..
ناهيك عن الكلاكسات اللي شبه ماوقفوش بكل
كملت طريقها للخيمة خشتلها بعدين منها طول لباب الحوش سمعت الدوشة طالعة منه..طقت مرتين ع طلعة مريم لابسة عباية مخصرة لونها نيلي ووشاح بنفس اللون لما شافتها ابتسمت وجتها..سلموا ع بعض بعدين قالت مريم: خشي داخل بحدا نور والبنات رقية مزال ماطلعتش..
ابتسمت فيروز وبدت تنحي في بوتها
في هاللحظة قام طارق القيطون وهو يقول بصوت عالي: تي وينكم!
انتفضت فيروز من صوته وقريب فقدت توازنها شدت مريم يدها في اخر لحظة..
هو فز لا اراديًا: بسم الله
مريم: ماصار شي عادي عادي
فيروز خلاص تمنت الارض تبلعها من الاحراج
مريم حست بيها تلفتتله: خلاص برا انت تو نجوا..
شبح لفيروز شوية بعدين ابتسم ولف ع وراه مشي..
ع جية خولة: تعالي طلعي السابات مريومه.. ابتسمت وين شافت فيروز وقالت: يا هلا بجارة القمر.. خيركم واقفات هنايا خشوا الداخل!
فيروز: انحي بوتي بس..خشوا تو نلحقكم
مريم بابتسامة: باهي خلاص توا مش برانية انتي..
بادلتها الابتسامة.. هما مشوا وهي طبست ع حذائها
ع جيته هو تاني: مريم قتلـ..
ووقف لما لقاها بروحها هو اصلًا رجعته مالهاش سبب غير يزيد يشوفها
لكن هي بعد موقف امس مش قادرة تكون عادية..اساسًا هي امتى كانت عادية ديما خجلانة
حولت البوت وكيف جت بتخش هاربة منه وقفها: قوليلهم يسقدوا رواحهم..
يادوب ردت عليه: باهي
وخشت
هو ماقدرش مايقولهاش: فيروز
تقول خبطها ضي لما نطق اسمها..وهو نفس الشي..اسمها في فمه حس بيه حلو منساب..محلاه محلى نطقه هكي قال في نفسه
مع ذلك كمل كلامه عادي وعيونه يشوفولها رغم انها مطبسة راسها ومدرق شعرها ملامحها عنه: ردي بالك على روحك..
قامت راسها بتلقائية وشبحتله..فهماته يقصد على ليلة امس ..شعور غريب تسللها لاول مرة اطيل النظر فعيونه هكي
لكن فيسع مانزلتهم وخشت بدون ماترد
طارق تنهد ..عيونه جوا على بوتها المسند ع جنب.. ابتسم بعدين فاق: خيرني نتنهد النهارات الحرف!
حك حاجبه ..وقف شوية ومشي راجع ادراجه وقلبه داخل صدره ينبض بقوة..
•🌹•🌹•🌹•🌹•
جهة شجر التوت
وسيلة: اني عجزت معاه يا صبري معاش عرفت ماندير بالك انت تعرفله حل..
هز صبري راسه وهو يمرر فعيونه عالسانية حواليه: تو نتفاهم معاه حتى اني حاسه مش مزبوط مع الناس ومش معاهم
وسيلة تنهدت بقلة حيلة: تعبني يا صبري والله عقلي معاش عليا في جرته اليوم قريب بزعت طاسة الشاهي تفور ع رجل المراة..
صبري: خلاص قتلك خليه عليا ..سكت شوي بعدين قال وهو مضيق عيونه بشك: انتي عارفة علاش حاله منقلب هالقلبة؟!
هربت وسيلة بعيونها عنه
ضم شفايفه وهو يشوفلها بتمعن: تو مش وقته ولا مكانه يفوت العرس على خير وليا معاك انتي وياه تقعميزة.. اللي هو فيه مش بلاش الولد مذهوبة شيرته حتى خدمته بدي مرخي فيها نهار يمشي ونهار يفوت!
وسيلة بقلق: ياني وخلاص سيب القراية وتو حتى الخدمة بيخطلي فيها!
صبري: خشي توا وساهل ماتخمميش فيه قتلك
شبحتله: راهو مش راضية عليه كان مزال يعفس في مستقبله اكتر ماعفس..نزلت دمعة مستحها طول: ياسر ماضحكناله قبل قولهاله يا صبري..
صبري: وسيلة صلي عالنبي اني قلت مايقعدش يعني مايقعدش خلاص اطمني!
هزت راسها
وهو كمل كلامه: بنمشي للرجالة شوفيلنا الشاهي..
وسيلة: ان شاء الله
مشوا كل واحد لجهة ووسيلة وهي مولية لحوش شيابينها كانت تخمم «من الاول الغلط غلطي اني حليتله وسايرته فوق الحد كان مفروض خليته يفوتها من البداية.. راس ولد هو راس ولد وبيقعد من دون جيله»
دموعها كانت تنزل ..اول ماوصلت باب الكوجينة خدت نفس..مسحت دموعها بطرف منديل في جيب فانيلتها الطويلة.. رداته فيها بعدين زفرت وفتحت الباب
•🌹•🌹•🌹•🌹•
طلعوا السيارات من السانية في موكب واحد تترأسهم سيارة خليفة برقية ومعاها فريال وكلثوم..فاتحلهم الاغاني وهما يهيجوا عليها وفريال كان تلقى اطير..
باقي السيارات وراهم قلبوا الطريق قلب بالكلاكسات والالعاب النارية.. اول شي داروا بيها دورة في المنطقة وفاتوا من شارع سانية العريس
ويلي ماسمعش بعرس رقية بلحاج اليوم سمع
بعد لفوا لفتهم ويديهم بالكذب ماتنحتش من عالكلاكس.. كملوا الجولة وتوجهوا للمركز اللي بدير فيه رقية حمامها..
نزلوا البنات كلهم ونزلوا دربوكتهم وسابات البودري ومواد التنظيف.. خشوا وقعدوا يستنوا فيها.. بعد طلعت بدت مرت خوها تلبس فيها فالردي
كلثوم: خلاص يا رقية قطعتي روحك بالبكي..
رقية ترشف: ينزلوا بروحهم يا كلثوم..تمنيتها معاي توا مكانها باين بيناتكم
كلثوم: تعوذي من الشيطان وعيشي فرحتك راهي مرة ومش حتتكرر.. اللاي تخمم عليك يا رقية شن بتقول وين تخشي عليها عيونك منفخات هكي
هي شدت دموعها بالقوة وقالت بنبرة مخنوقة: مش قادرة..
تنهدت كلثوم ورجعت تلبس فيها
واول ماكملتلها
وخرتكم خطوة وابتسمت وهي تقول: الله يبارك يا رقيوه ماشاء الله عليك قمر مصور..
ابتسمت رقية من بين دموعها: سلمك
كلثوم جتها بابتسامة: حطيه في فمك وهي سمي بالله واطلعي
خدت السواك من يد مرت خوت حكت بيه سنونها بعدين حطاته في فمها
شدت طراف الردي بيدها وطلعت وكلثوم وراها بكيسة فيدها ..اول ماقابلت رقية على البنات..
خولة ضحكت بحب: الله يبارك يا رورو
مريم شادة دموعها بالسيف: تهبلي يا عمري
راوية يديها ضامتهم لبعض وحاطتهم تحت ذقنها وهي مبتسمة من قلبها وحتى هي دموعها ع حافة الجفون: يا سعده سليمان بيك..
عليا بفرح: غيّرك يا رورو
ليلى تتأمل فعمتها بابتسامة: صح كلام عليا، مطلعك حلوة بالمرة
نور دموعها سيل ع خدودها: ماعمري ريت وحدة لابسة البودري احلى منك..
رقية ضمتها ودموعها نزلوا..
ديما تتفرج بابتسامة وفيروز زيها.. ومش بعيد من حالهم الباقي
وقفت فريال وجت فكتهم من بعض: هي دموع مانبوش ..دموع لاااا..وجهت نظرها لرقية وكملت بضحكة حب: واكل منك حتة يا رورو
وضمتها بقوة.. رقية لفت يديها ع بنت خوها وهي تقول من بين دموعها: ربي يحضرني اليوم اللي نشوفك لابستيه..
فريال: آميييين..
ضحكوا كلهم..بعدين قامت راوية الدربوكة وقعدت تغني وادربك: عروسة طلعت من الحمام.. ان شاء الله يواتوها الايام
هما بدوا يصفقوا ويردوا وراها
كلثوم قامت يديها بابتسامة: وعروستنا تقول حمامة..لبست بوخطين توامه
زغرطت فريال..والباقي يصفقوا ويعاودوا فالشتاوة
خولة: اللهم صل عالنبي..على لباس البودري..
هما يغنوا ويصفقوا ورقية تمرر فعيونها المعبيات دموع عليهم..فقدت نجلاء بيناتهم
ديما: الزينة لبست بودريها..كمل يا مولاي عليها..
شبحتلها رقية وابتسمت والباقي ردوا بيتها وراها اكثر من مرة..
وشاركوهم فالتصفيق زباين تانيين
مريم والدموع فعيونها: لبست بودري نجيها ..ان شاء الله الايام تواتيها
ردوا وراها..
فريال تصفق: لبس البودري والحنة..ربي مايحرمنا منه
قعدوا بنات عمامها يضحكوا وهي ولا معدلة..
وبعد شوط مقوم..وناضوا كلهم باش يطلعوا زي ماجوا
رقية مغطية وجهها برداها شعرها مش باين منه شي..الاتفاق ان سيارة خليفة تكون مدرسة قدام باب المركز بالزبط باش تطلع منه وتركب طول
بس اللي صار اول ما اتصل بشير بليلى: ايه خلاص كملت.. لا توا طالعين حبيبي..تمام ..مع السلامة
صكرت ونزلت التليفون
كلثوم: شن قالك جوا؟!
ليلى بخجل: ايه برا..
كلثوم: هي مالا
نزلوا من الدروج وهما يتكلموا
فيروز: صوت نوبة ولا..
نور: ايييه،شكله عرس قريب
ديما: طقتهم سمحة واجد
•عليا: شوره عرس الاسبوع هادا
اروى: وقريب هلبا..
عليا: اششش حسهم بدوا..
•قدام تمشي رقية مع كلثوم وبنات جيرانهم
وخلفهم بمسافة بسيطة
فريال: ماشاء الله شوره هلبا اعراس معانا وحني جايين رينا خيمة واسراب في ****** وتوا نوبة هني
خولة: ربي يدوم الافراح..
راوية: زعما فاتحة؟!
ليلى: يا اما فاتحة ولا قفة ..ومرات حمام..
مريم كانت تسمع ومبتسمة لكن سرعان ماتوسعوا عيونها وقالت بضحكة: حي
ماطولوش ع مافهموا وسرعوا خطواتهم للباب
وبرا.. النوبة واقفين في نص الكياس ويضربوا الكل متلقطين عليها..حتى الواقفين فالشارع
انفتح باب المركز وبان جزء من الردي البودري.. هي لما شافت الزحمة وسيارة خوها مهناش وخرت
لكن جاها حمزة وقال: رقية
كلثوم: شن في يا حمزة؟! انتم جايبين النوبة ولا كيف..
هو شد يد رقية: ايه مرت عمي حني..مرت عمي مانبيش نلمح وحدة طالعة يا مرت عمي
هزت كلثوم راسها
واروى همست لعليا: يمااا يخوف!
عليا ردت عليها بنفس الصوت: هادا خطيب فريال اختي اللي غدوة فاتحتهم
تقول هكي باش لو يعني اروى حاطة شي فراسها تنحيه بسرعة..اروى فهمت عليها وضحكت بصمت
وحبيبة حمزة دوب مالمحاته..قلبها رفرف وقدمت الاولى باش تتفرج
طلع بعمته وهو مزال شاد يدها وهي مغطية وجهها بطراف الردي ومتفاجأة ع فرحانة
جوهم باقي الولاد..بدوا يناشبوا في رقية ويضحكوا..وهي مسكينة متحشمة من عند غادي ووجهها بلون رداها..
وشوي وبدت النوبة تسرع في الرتم واللحن تغير
قام حمزة يده اللي فيد رقية وقعد يرقّص فيها ويده التانية واصلة مستوى كتفه..
•مريم ويديها ع فمها: محلاها اللقطة بجديات محلاها
خولة: انتي شوفيهم كيف مغطيينها عالعيون ويرقصوا.. يا واقي يا ربي احفظ..
وحدة من البنات: حرام عليهم هكي..
كلثوم بضحكة وتتفرج بانسجام: الحافظ ربي ان شاء الله
راوية: نور صوري زين!
نور تتفرج ومبتسمة بحماس مع النوبة: نصور هاني..
رقية كانت تبان من جهتهم بس
اما فريال..رايحة وذايبة في عالم حمزة «ياناس حتى لما يرقص شخصية شن هالراجل يا ربي..تنهدت تنهيدة هيام مكتومة: هلبا على قليبي يا حمزة اقسم بالله»
وبدون ماتحس حطت يدها ع صدرها جهة القلب..شافتها مريم ابتسمت ورجعت عيونها برا
قاعدين يرقصوا ويشطحوا مع النوبة ..علي يهيج بيد ويطربق بالتانية هو وسراج
رقية ماكانتش تتحرك هلبا دوبها تهز كتافها ومرات تقدم في رجليها وتوخر..
ديما تتفرج ومعجبة عالاخر..لما تمرر في عيونها بانت عليها الفرقة تضرب وفي شخص واقف معاهم يحطلهم في الفلوس من ربطة كبيرة..ضحكت بدهشة: رؤوف..
فيروز ابتسمت: خوك؟!
هزت ديما راسها وهي تتفرج
عليا طول زبطاته نفس اللي خبط في مريم فلتت منها ضحكة: يرشقلهم..
اروى: واني نقول علاش نشطوا..
ضحكوا اربعتهم
بس عيون فيروز لا اراديًا تتوجه لطارق..كل ماتحولهم عنه يرجعوا غصب عن ارادتها
وهما برا بيجنحوا..خلوا كل من موجود فالمركز وحواليه يطلعوا يتفرجوا
جمال ومجموعة شباب يهيجوا بحدا النوبة ويحيى كان يجامل مجاملة عقله مش هني وعيونه مع خوه وخلاص..
خوه عبدالرؤوف اللي وين جت القفة امس شاف واحد من خوت سليمان يرشق والنوبة تنشط معاه..قعدت اللقطة في باله وقرر يديرها
ومزال الولاد يرقصوا حوالين رقية ويرددوا مع النوبة وهي فوسطهم شادة يد حمزة ودموعها تنزل زي السيل على خدودها..فرح على حزن ..لكن وين تشوف حمزة قدامها حمزة اللي غدوة حيقرا فاتحته ع فريال حب عمره وشوق سنينه.. تحس بقلبها تعبى وفاض سعادة وتزيد الدموع في غزارتها
بدا متاع الطبل يضرب عليه والباقي يغنوا: ليه سنين يراجي فيها.. سنين يراجي فيها..سنين يراجي فيها.. حالف ماياخد خاطيها
وهالمرة فعلًا انقلبت الدنيا..والمقطع تغنى مخصوص لفراولة
كانت حاسة روحها طايرة.. من قوة اللي تحس بيه عيونها دمعوا
جتها ليلى ضمتها وهي تضحك وتردد مع اللي برا: سنين يراجي فيها.. سنين يراجي فيها.. حالف ماياخد خاطيها
راوية: وووووه..
جوا عيون مريم على المكان اللي فيه الرجالة شافت عبدالرؤوف وهو يحط للفرقة فالفلوس.. يتحرك والشمس جاية عليه
قريب منها..حوار كان يدور قريب منها بين زبونات جايات مع بعض..
: شوفي الغزال اللي يرشق للنوبة
: نهار مساوي هادا شن، خيره ماعندناش منها النوعية هادي يا وخيتي..
: تشوفوا واحد تنسوا التاني..بلي وخلاص
: هييييه في يده دبلة ريتوا
: هدا يستاهل ياخد اربعة حرام وحدة بس تحوز الزين هادا كله.. قده يا ناس قده تقول ممثل..
: ومش متخوفق
ركزت ولاول مرة تشوفه وسيم هكي..والرصانة واضحة عليه من مشيته..
رجعت عيونها لعمتها وولد عمها لما سمعت صوت الغني يعلى
: الله الله الله..قولوا ماشاء الله
ابتسمت ابتسامة حلوة
•🌹•🌹•🌹•🌹•
في حوش اهل ناديا..
امها تترجى في اختها الصغيرة تنوض تاكل
غزلان برفض: يا ماما النية متصكرة والله العظيم حتى الميه نحس فيها قريب تحصل هنايا
واشرت ع رقبتها..
ربيعة: بتقعدي هكي يا غزلان! تربحي بنتي ماتوجعيليش قلبي ..عقدت حواجبها وكملت: تقتلي روحك راهو ماينفعك حد بعدها ..بوك تحسابيه كان درتي هكي بيرضخلك!
نزلت غزلان عيونها وبضيق قالت: متأملة يديرها بعد كلمه منصور.. قامت عيونها بلهفة لامها: يما بوي عمره مانزل كلمة منصور لوطا..نزلت من عينها دمعة وهي تقول: اتصلي بيه قوليله يزيد يحاول معاه مرة تانية..يكلم حتى باقي النسايب..مرات كان ضغطوا عليه يرضى..وتوالت الدمعات: بالله عليك ماما اني مانبيش نتزوج نبي نقرا زي صاحباتي..
حضنتها ربيعة وبنبرة باكية: شن في يدي نديرلك يا بنيتي ..كان تعرفي حاجة قوليلي ..قوليلي
زادت غزلان فالبكي..
ومن باب الدار واقفة اختها الكبيرة..تشبح ودموعها تنزل بانهمار
اختها نوضت عليها اوجاعها ..فكرتها ببوها كيف غصبها يومًا ما ع شي هي ماتبيشي بشدة
•🌹•🌹•🌹•🌹•
بالرجوع لوين ماموجودين عيلة بلحاج
كانوا خلاص بيركبوا السيارات ويروحوا..
فيروز ماشية هي ونور باتجاه سيارة كمال..معاهم ديما ادور ع سيارة خوها
بس لحظة، هو مستحيل يفوت فرصة زي هادي
نادى عليها بصوت عالي: نوووور
تلفتت
اشرلها بيده تجي..هي فهمت وقالت: شوره سيارة كمال معبية..تعالوا
فيروز تشبح فيه كيف لف وركب سيارته
ديما وقفت وشافتلها: فيروز..كنك مصبية.. ابتسمت وكملت: هيا
شبحتلها بعدين شبحت قدام تاني ومشت بخطوات مترددة..ديما قعدت تشبحلها ومبتسمة
سمعت كلاكس..تلفتت لقتها سيارة عبدالرؤوف فوسطها هو ويحيى
مشت باتجاهها طول..
•وفي سيارة طارق..
نور: خسارة يا ريتها جت معانا..
طارق يسوق: مني..الشرقاوية
نور: ايه..
فيروز تسمع وساكتة
ابتسم طارق وقال: شن تبوا نفتحلكم
نور بضحكة: اي شي المهم مانقعدوش ساكتين..تلفتت براسها شوية: ولا روزي..
ابتسمتلها فيروز وهي متوترة..حاسة بعيونه عليها
فتح المسجل قعدت نور تصفق معاه وتغني وطارق يكلكس ورا باقي السيارات
شوي وتخطاته سيارة ايوب مركب معاه الولاد التلاتة..علي وسراج ونزار
طلع سراج يده من الروشن شاد بيها طوبو تنوير كيف ولعه
مع فوتتهم من جنب طارق بدا يطربق
فيروز الروشن متاعها مفتوح شوية انخلعت من الصوت
طارق عيونه ماتنحوش منها طول انتبه..طلع نصه الفوقي من الروشن وهو يقول بصوت عالي: شد الوسع يا ايوووب..بناويت يا راجل
نور: راك اطيح ..وبخوف: الطريق يا طارق الطريق
فيروز خافت ولقت روحها تقول: خش طارق!
استجابلها رجع مكانه «رسمي طلع اسمي حلو»
سرقلها نظرة من المراية وابتسم..هي وجهها تغير للون الاحمر وعيونها نزلتهم
نور: النوبة والجو اللي درتوه يهبللل..
طارق مبتسم وسعادة غامراته في وجودها: هدية حمزة
ورجع يكلكس
وهي التالي حاسة بشي بادي يتغير فيها..مش عارفاته شن لكن متأكدة مية فالمية سببه «ابن الجيران»💕
•السيارات طابور وفي سيارة انضمتلهم في الاخير..سيارة الزبير.. كان مبتسم ودموعه في عيونه ويده ماتحولتش من على الكلاكس بكل
تفكر قداش مرة وين يهدرزوا بالجو ع عرس رقية..حتى قبل ماتنخطب
كان يقول «بنجيبلك نوبة سبع ليالي نخلي طرابلس كلها تسمع»
بعدها يبدوا يضحكوا وهي تقرصه من خده وتقول «كمل فلوسك وتقعد كنة اختي بلاش»
يضحكوا تاني..
ماكانش في يوم يتوقع انه يبتعد هكي عن عيلته.. عن خالته في اهم ايام حياتها
خاش الطابور زيه زي اي واحد فالطريق حب يشارك الشعب افراحه.. مع ذلك كان حاس بسعادة ورضا اللي قدر حتى لو بشكل بسيط يكون موجود..
وين قربوا يخشوا الجيهة لف ورجع بدون ماينتبهله حد غير عبيدة ..هو اللي كلمه وخبره عن المكان واللي بيديروه كله
مش حنكذب لو قلتلهم ان الزبير حاليًا فرحان..ماكانش يتوقع نهائي ان حيقدر يجي في يوم زي هادا ويشوفها
ايه اللي زي الزبير.. قنوعين قد مايجيهم تلقيهم راضيين وسعيدين زيادة..وراهي مش فلاحة منهم لكن طبع ونفسية وقلب كبير
واللي زيهم ديما الله سبحانه وتعالى يكون داسلهم هدية.. عوض..جبر
ومعروف جبر الله كيف..يليق بيه وبعظيم شأنه
•🌹•🌹•🌹•🌹•
الساعة 3:15 مساءًا
يغسلوا في ماعين الرشتة..ناديا وخولة وليلى ومعاهم الجارات
بينما داخل الحوش النساوين جزء يتفرجوا من كاميرا منصور على فيديوات الحمام
وجزء يحشي فالعصبان لعشي الليل
عداها هي كانت من تركينة لتركينة في جرة ولد خوها
مريم: قيس اسمع الكلمة.. قيس حبيبي تعالى بس.. تو اطيح يا قيس
والولد مدامه الطريق قدامه وهو يجري ويضحك باستمتاع..
ضحكت غصب عنها: تقول عندك متعة في حرق دمي! قيسسسس.. معاذ لحق عليه جيبهولي هادا بيخليني نجري وماندري..
مشاله معاذ وبعد جهد جهد قدر يشده جنب الفيراندا
وصلت فيهم مريم وهي تواسي فوشاحها ع راسها وداهشة: انت مايقدر عليك حد كان نصوره..اشبحلي هكي نواسيلك القرواطة زي معاذ
شبح لعمه وشبحلها تاتي بعدين قدم: باه..
ضحكت وبدت ترتبله في بدلته.. سمعت صوت حاجات يتشكشكوا وراها تلفتت وابتسمت: محلاكم الله يبارك
التوأم وتغريد فرحوا..كانوا لابسات العربي التلاتة لان العشية الربيع
قدمت غيداء: هادم اللي خداهالهم منصور فالعيد الصغيرة مرومه..
مريم وهي تخلل فصوابعها فشعر قيس الغزير: ايه حبيبتي..
معاذ: مالبسناهمش قبل..
ابتسمت تغريد: طالعين حلوين هلبا
جيداء: احلى شي انهم زي بعض..
تغريد: يهبل قفطانك للو..منفوخ زي الاميرات
ابتسمت لتين: حتى انتي تهبلي
مريم: من لبسكم
غيداء: فراولة.. شوفي حتى دارتلنا روج
ومدت شواربها
ضحكت مريم بعدين وقفت ع حيلها: نجيه ياربي..هي تعالوا لنونا باش نقوللها تصوركم
شدت يد قيس والباقي مشوا معاها ..هي تهدرز عليهم ووين لفوا شافت حد واقف ع دروج الفيراندا سكتت ونزلت عيونها
كيف جت بتمشي للخيمة وقفها صوت مرا: مريم حبيبتي كذا تعالي
هي شبحتلها كانت كيف جاية من الحوش لابسة قفطان شامواه متاع مناسبات وعليه وشاح..في يدها نقالها
قدمت وابتسمتلها: تبي حاجة خالتي؟!
الصغار خدوا بعض وسبقوها
غيرت مريم عيونها جهة الفيراندا وهي مبتسمة: جمال.. جموله..انزل يمي مافي حد براني..
هو امتى سمع صوت انثى تانية مع امه لا رفع عينه ولا تحرك اصلًا غير لما ناداته
•🌹•🌹•🌹•🌹•
داخل..
في دار التقعميز
راوية وديما ونور وعليا يعبوا في باكوات الحلو ..مش متاع الليلة متاع غدوة
كانت معاهم فيروز بس هي حاليًا تكلم فأمها بالتليفون: ساعة تانية ونروح ماما..
: كملي اللي ديروا فيه وتعالي طول الوقت فيسع يفوت ومافيش عشية ..هداكا هو كان بتوتي روحك
فيروز تنهدت: حاضر..هي باي توا ماما
:مع السلامة
صكرت منها ونزلت الهاتف بعدين ولت للبنات
راوية: حاجة صح تليفونك ..بابتسامة كملت: تسمعي بيه الاخبار الطيبة
ردتهالها فيروز: تسلمي يا رب..جابهولي بابا مبارح..مدتهولها وكملت: خودي تفرجي عليه
خداته وعليا قالت: مبارك جارة القمر
ابتسمت فيروز: الله يبارك فيك
نور: مزال مصرة ابلة عواطف؟
فيروز بضيق: امممم..
ديما تحط في الحلو فالباكو وتصكر فيه ..ضمت شواربها وقالت: خسارة
كانت تبي هلبا فيروز تحضر السهرية هني.. زادوا تقربوا من بعض فالعرس..
راوية مدت التليفون لفيروز: تبيديه بالهني.. بعدها وقفت: كملوا هادو واني بنجيب باقي الباكوات
هي طلعت وتغريد خشت: نونا تعالي صورينا
لما شافوها ديما وفيروز ابتسموا..
وقفت نور ونفضت يديها: جاية نجيب الصوارة بس..
عليا طرف تحطه فالباكو وطرف في فمها: عين الجمل كملت..نمشي نزيد..
وقفت وخدت السطل في يدها
وهكي صفت ع فيروز وديما.. الزوز سرحانات
لين تنهدت ديما من غير ماتحس ع روحها
شبحتلها فيروز وقالت: خيرك
احمروا خدودها وابتسمت: شي..وبخجل قالت: خطر علي بوبكر
فيروز بابتسامة ونبرة تساؤل: راجلك..
هزت ديما راسها فوق ولوطا هزة خفيفة
فيروز بعد طول سكوت قالت بصوت طاغي عليه الاحراج: نسألك سؤال
ديما: اكيد
تكلمت بدون ماتحط عيونها في عيون ديما: انتي..يعني..غمضت عيونها بشدة وفتحتهم تاني وهداكا الوجه قريب ينفجر من الاحمرار: تحبيه؟!
ياه هالكلمة شن دارت في ديما..هي عارفة هالشي في قرارة نفسها ومتأكدة منه لكن ماعمره حد سألها وخلاها تتواجهه مع مشاعرها..تسارعت دقات القلب وخلت لمعة حلوة بالمرة تبان في عيونها..ضحكت بخجل وردت: اها..
فيروز وين شافت حالة ديما هادي خطرت عليها طارق.. توترت: كيف عرفتي روحك تحبيه..وخرت شعرها ورا وذنها: قصدي شن اللي خلاك تتأكدي..
ديما بابتسامة: من حيشن حكالي باتي راهو ولد عمتك خطبك ونا في دنيا غير الدنيا يا فيروز، نا كيف مادويتلك مرة قبل..كنت مانعرفش واجد ومانحقش فيه مفيت فالمناسبات والاعياد لكن سبحان الله هذكي اللحظة بعد خشيت داري اذكرت كل لحظة جمعتنا وحسيت باحساس حلو بكل..حطت يدها ع صدرها وبحب كملت: ومن ساعتها ونا بديت نحبه..انكان قالوا اسمه نفز ونسرح فيه واجد ..تميت نتوتر لو حقيته ولا سمعت صوته لكن توتر سمح ..نزلت يدها وشبحت لبنصرها: ومن بعد الفاتحة وين خش علي ولبسني الدبلة خلاص..ضحكت وكملت: معاد تميت نحق في غيره قلبي تعبى به وعيوني ..وعند تو كان حكينا عالارضي تلقيني منكسفة وصاير في خبر..ابتسمت تاني وقلبها داخل ينبض بإسمه: تأثيره علي قوي وموش عارفة كيف نبي نوصفه لكي يا فيروز
الحقيقة ماكانتش تحتاج توصف هلبا..لان فيروز بالفعل بادية تعيش شعور مشابه ولهالسبب سألت..
لاحظتها كيف سرحانة وتخمم: فيروز.. ابتسمت وضيقت عيونها: انتي تحبي؟
ردت طول: لا مش هكي مايمشيش بالك بعيد.. تنهدت وكملت: اني سألت نبي نعرف شن هو الاحساس بس
ديما زبطتها مش ناوية تفصح اكثر..ماحبتش اضايقها ابتسمت: ان شاء الله تعيشيه مع يلي يستاهلك
فيروز بابتسامة: ان شاء الله..
•🌹•🌹•🌹•🌹•
واقفة بجنب بنت خال بوها وهي متحشمة..هو كان محرج بس مش زيها طبعه مرن ..قدم بخطواته لين وصلهم
قال وعيونه لوطا: السلام عليكم
ردت مريم السلام
وامه قالت بابتسامة: هذي مريم بنت خالك بلقاسم..
قام راسه وضحك عالجنب بخفة وحواجبه مرفوعات: عمة لتين صاح؟!
امه: عليك نور اها هي بعينها..غيرت عيونها لمريم وكملت: هذا جمال اصغر واحد في عيالي قبل ديما
هي قامت عيونها ليه وقالت بابتسامة بسيطة: بالجودة..
تفاجأ جمال وهادا وين تفكر هدرزة امه قبل عنها ..وقتها توقعها تبالغ فقط باش تخليه يرضى..لكن اللي شافه تو اكدله انه وصف امه ماكان شي ..
احرجوها نظراته هلبا..مخلطات اعجاب ع مفاجأة
كانت بلبسة كاملة موحدة اللون خوخية فيها زركشة بسيطة وعلى راسها وشاح ابيض مغطي شعرها كله الا المنابت من قدام اللي كانوا ديما متمردات.. وجهها صافي مافيشي نقطة مكياج..غير هكي كان عندها هالة من الجاذبية حواليها
امه لما حساته طول النظر ليها تكلمت: عدي بنتي انكان تريدي اديري شي حاجة..عطلناك
مريم تشوفلها هي وبس: لا خالتي حشاك.. احممم نستأذنكم
امه: اذنك معاكي..
جمال استاقض ونزل عيونه محرج وهو يحك في حاجبه بإبهامه: تفضلي
مشت مريم وطول امه شافتله: لنقنك سمطتها يا ولدي..
ماباش يشبحلها لانه متحشم
مريم: ويش رايك فيها..
رد بصراحة: احمم ماشاء الله غزال الريم..ربي يحفظها لهلها
شدت ابتسامتها ومابتش تكثر عليه: ييييي نسيت عليش كلمتك..
جمال شبحلها ومزال مريم وزين مريم بين عيونه: تو تذكري ونا تاملك هن..
ضحكت امه وهو ضحك معاها
•🌹•🌹•🌹•🌹•
مع انتهاء ربيع الصغار اللي كان فالعشية فرقوا فيه عليهم الحلوة والمكسرات وغيره..روحوا اماليهم باش يتجهزوا لسهرية الليل..فاللي بيمشي لحوش العريس زي عواطف وبنتها وفاللي وجهته سهرية العروس..
ابتداءًا من الليلة بتزحم والبنات بيتفننوا في طلاتهم..العروسة عمتهم عاد
حليمة مقعمزة في صدر الخيمة بحولي حب الرمان اللي طالع عليها الله يبارك تهدرز ع ضيوفها
وكناينها يستقبلوا..كل وحدة طالعة احلى من التانية.. لكن خديجة قلعتهم كلهم هالمرة الى جانب ان العمر مايبانش فيها مهما تكبر كانت من النوعية الواقفة لروحها عناية بالشعر والبشرة وحتى جسمها تحاول تحافظ عليه.. ومريم طلعتلها في الحاجة هادي
لبست بدلة رسمية متاع قونة ودجاكة للركبة لونها سكري معدسة وشعرها داراته تسريحة فوق من تحت يدين مريم..تنحط جنب كنتها تبان اختها الكبيرة..
وطبعًا ذهيبة كانت تشبحلها من فوق للوطة والحاجب مقيوم..بعدين غيرت عيونها عنها
وخديجة يا ارض اشتدي ما حدا ادي..تمشي وتسلم وترحب بالناس وهي مبتسمة
ع طلعة ثريا من الحوش لابسة قفطان موف من غير سيور..صدره معبي فص ومن لوطا كلوش وشعرها دايراته تسريحة بسيطة مع مكياج قوي..طالعة تهبل
قدمت طول لخديجة وابتسامة مرسومة على وجهها: الله يبارك يا خالتي خديجة عيني عليك باردة ماتنعطي عمرك بكل..
خديجة: عويناتك هادم يا ثريا صحيتي ..
ابتسمت ثريا
وخديجة كملت: تعالي قعمزي ..اهو الكرسي فاضي
مشت قعمزت: سلمتي..
جي كرسيها جنب صاحبات رقية متاع الجامعة زمان
مشت خديجة تسلم على باقي الصف
: سلفتك هادي شورها ماتكبرش بكل يا ذهيبة
قامت ذهيبة حاجبها وبشي من الحدة قالت: اممم
شوي وبدوا البنات يطلعوا من الحوش..اولهم خولة بقفطانها الاسود الشامواه بكم واحد قصير لنص الفخذ ومعاه صندلي ذهبي شعرها قايماته ذيل حصان ومدايرة نفخة لقصتها ..ركزت بالايلانر على عيونها زاد برز حدتهم
بعدها طلعت ليلى لابسة سروال شارلستون جينز حاشية فيه كت برتقالي وعليه سورية شيفون بنفس اللون شعرها مدايراته ذيل حصان حتى هي ومنزلة خصلتين كبار من قدام  مكثرة من الاكسسوارات..ومكيجة عيونها بالبيج مع البرتقالي الغامق عكس عاللبسة بطريقة حلوة
زمزم لما رتها خشت نادت عليها: للوشة..
جتها طول: نعم عمتي
زمزم: نبي نشوف لبستك..ابتسمت وكملت: اشيه اشيه الله يبارك كلا ولدي طاح واقف..
تحشمت وابتسمت بخجل..شوي وشافت مفيدة جاية من داخل كانت تمشي ويدها ورا ظهرها ..لابسة قفطان مدامي بسيط وشعرها فارداته ع طوله مع مكياج خفيف
مشتلها طول باش تجيبلها كرسي..خداته مفيدة وقعمزت في صفة صاحبات عمتها..عندها بيهم معرفة سطحية قرت نفس الشعبة معاهم فالكلية مع اختلاف السنوات
ذهيبة ماعجبهاش منظر مفيدة نهائي..اللي مايعرفهاش ومايشوفش بطنها مستحيل بتوقع انها متزوجة من بساطة طلتها..
قلبت وجهها للجهة التانية جوا عيونها في ريما خاشة مع امها على سنقة عشرة طالعة تهبل، زادت تنرفزت من كنتها
بعدهم جت فريال بالدرابيك في يديها..لابسة جمبسوت لماع كله وفيه من النص حزام اسود ..كم كامل لكن ثانياته بطريقة حلوة.. وشعرها رافعاته كعكة فوق منزلة منها خصلات ..ومكياجها كان ابداع تفننت فيه راوية.. طلعها شي من الخيال
ذهيبة وين رتها طلقت زغروطة..تبعتها زغروطة حليمة
ضحكت فريال العيون لوطا وهداكا القلب مابطلش دق ..مشت باش تحط الدرابيك وتفتح المنظومة..
اللي شافوا اللقطة ضحكوا..وفاللي كان مبتسم
الا خديجة..ماتقبلتش اللي صار بكل.. هي شافت وجه ذهيبة لما خشت بنتها كيف تغير وتوا تزغرط على فريال ..واضحة زي عين الشمس
ايه طارتلها من مفيدة لكن الزغروطة ماكانتش نكاية اطلاقًا .. فريال تعتبر عروس وفاتحتها غدوة طبيعي حاجة زي هادي..بس للاسف خديجة فهمتها بطريقة تانية
وقعدت تقول مقعمزة على نار لولا ان هالعرس عرس رقية راهي ليها وقت نايضة وواخدة بنتها معاها للحوش..خدت نفس وقالت في خاطرها «معليشي خلي يفوت هالعرس على خير بس وطبك عندي يا ذهيبة»
ومزال البنات يطلعوا..
هالمرة نور ديما وعليا..ديما بقفطان اخضر دانتيل طوله للركبة وكمامه مشبكات للمرفق شعرها مفرود ومفير وفي رقبتها لابسة طاقم البيان متاعها..مكياج دارتلها ريما شوية ايلاينر وروج بس
نور لابسة قفطان وردي كومي مزخرف بالعدس ع الجهة اليمين وفيه نفخة من لوطا.. شعرها مفتوح حتى هي لكن مفيراته ومسرحاته تاني باش يعطي منظر حلو ولبست مشبك من لون العدس فالقفطان..مكياج ماحطتش وطلعت ناعمة وكيوتة جدًا
ع عكس عليا بقونة امريكية قصيرة فيها مسحات تحتها شخشير لحمي اسود ومن فوق  لابسة فانيليا خفيفة كحلة رقبتها سبعة وكمامها واسعات من النهاية ..كانت لما تتحرك بيها يبان جزء من البطن.. شعرها جايباته عالجنب ومدايرة روج ومسكارا فقط..
اللبسة بينتها اكبر من عمرها الشي اللي ماعجبش امها وفريال لكن تغاضوا
واخر من خش الخيمة مريم وراوية والزوز طالعات احلى من بعض..
مريم بقفطان ازرق ملكي مفصل عالجسم طوله لقبل الركبة بشوي وحزامه منه فيه..قصة الصدر مربعة تربيع والكتاف فيهم لقطة كأنهم مرفوعات شوي ..كمامه واسعات ومشدودات عند الرسغ معاه صندلي فضي مرصع بالكريستال ومن فوق طاقم فضة..شعرها ماتفتحش فيه نهائي في التجمعات طبقًا لاوامر امها ولانها تفضل تظفره.. وجهها حطت عليه لمسات بسيطة
كانت طالعة اية من الجمال..بالاضافة للاحمر كان في الازرق الملكي والموف والاخضر هادم لما يتلاقوا مع بياض بشرة مريم وسواد شعرها وملامحها يديروا كوارث..
وزادت خشت راس ثريا اكثر واكثر..مش ثريا بروحها حتى ريما وامها
لكن نجمة الحفلة الليلة هي راوية.. بقفطانها الفوشي ومن عند الصدر باين كأنه تحت القفطان صدرية لونها اسود وفيها فص تلمع كلها ..كان من غير سيور وطوله لنص الفخذ لبست معاه كندرة كحلة ودارت شعرها بطريقة حلوة..اما مكياجها فكان حكاية بروحه
طلعت وراها امها وعمتها لابسة البودري وتدرج
تعالت الزغاريط وبدت رقية تلف عالخيمة وتسلم بالوحدة..وبهية بدشداشتها تبخر في الحاضرات وبدت اول شي بحليمة ومريم بنت خوها..
كملت رقية سلامها وقعمزت مع صاحباتها ومفيدة..
بدت السهرية وكل مرة حد ينوض يرقص عالمنظومة بعدها بدوا يفرقوا فالضيافة وكملوا..
قعمزوا البنات فالخيمة.. شوي وانفتحت اغنية ناشطة
فريال معاش تحملت ونست وصايا حمزة ومايجي منهم
ناضت خدت وشاح حزمت بيه وخشت ترقص.. ورقيص فريال مانحكيلكمش ..فضيعة مايقدر حد ينافسها..ترقص في رقيص مش عادي قعمزتهم كلهم
وهي مستمرة..
مريم بابتسامة: نوضي خوخة
وقفت خولة: اعطوني وشاح
اعطتها ريما ..لفاته حواليها وخشت ترقص وهي تربط فيه
بدوا يرقصوا الزوز مع بعض ويتفننوا.. والخيمة تتفرج
تحمسوا..وصار فيها تنحاية الكنادر.. عيطوا البنات
ورقية تشبح فيهم ومبتسمة..
راوية: نوضوا معاهم..
ليلى: مع فريال وخولة من يطلعله يا حنة..تشبحيش فيها كلها هفتت
مريم: كان قعمزوا انوض
وضحكت..ضحكوا معاها
راوية بغرور مصطنع: اني غير خايفة نغطي عليهم كان هادا مشيت
ضحكوا تاني..
•ريما: الله يبارك يرقصن في رقيص يمسح عالكبد..
ناديا مبتسمة: فنانات..
شوي ووقفت مفيدة..خشت معاهم ..ترقص بالجو ماعندهاش جهد لكن ع خاطر عمتها
رقية فرحت عالاخر..
اشرت راوية لنور تصكر المنظومة جاية جنبها..دارت نور زي ماقالتلها بنت عمها
وراوية خدت الدربوكة بدت تغني: هاللي ترقص هي وياهم.. ان شاء الله ماتقعدش بلاهم..
التلاتة يرقصوا مع بعض بطريقة تهبل..بدوا يصفقوا الحضور مع الدربوكة
ومريم غنت: هاللي ترقص بجنينها.. ان شاء الله المولى يعينها
عاودوها وراها كدا مرة ..ناضت معاهم ناديا
خديجة: نجيها ونجي فارسها..هاللي فالحوش مونسها..
ابتسمت ناديا وهي تسمع فالشتاوة تتكرر بصوت عالي..
طلعت خولة من اللايدة خدت الدربوكة التانية وقعمزت بعد فكت الوشاح من ع خصرها..ولو كانت فالرقيص فنانة بس في التدربيك مجرمة..
رقصوا مشوار بعتالي قعمزوا مفيدة وناديا اللي غنت قبلها: يا مبروك عليك اعراسك.. فرحانة ولميتي ناسك
اللي تعرف تزغرط زغرطت والباقي ردوها..
ليلى: الطير اللي فارد جنحانه..خيرناه اختار غلانا..
عيطوا البنات وهما يردوا فيها بحماس..جت فريال لعمتها نوضتها وناضوا معاها صاحباتها
راوية وخولة نزلوا عالدربوكة..
وعليا تغني: ايديكم ايديكم..كان رقيوه تعز عليكم
قعدوا يكرروا فيها بحماس.. ورقية فالوسط ترقص يد شابكتها مع صاحبتها والتانية مع فريال
بعدين قعمزوا صاحباتها هما وفريال وخلولها الساحة
في هاللحظة ناضت ذهيبة..
زغرطوا خولة وفريال وزمزم..
شدت يدين رقية وقعدوا يرقصوا
مريم: صلوا عالنبي وارعوهم..راكم بالعين تخودوهم
ردوها وراها..وتنوض زمزم
عيطوا بنات سلافها ..وبخشتها ولعت الاجواء شوشت سلفاتها غصب عنهم ناضوا ..صوتها كان يصدح: نور العين وضيها.. والعقبة لوخيها..
وهما يرددوا..
شوي وقعمزوا الكناين داهشات
قعدت كان زمزم..
مريم الساقزلي: سعد اللي حازك يا ودة ..غير الصبح معاك يسده
عاودوها اكثر من مرة..
خشت فريال تاني وبنوضتها خشوا الباقي كلهم مع رقية..ليلى وعليا ونور ومريم ..
ثريا: الله يبارك يا عليك بنات..كيف خناق الماجارات
زغرطوا وهما يعاودوا فيها وراها
مريم وهي ترقص: هم هادوم بنات بلحاج..كيف حرامات الحجاج
شاشوا كلهم وشيشوا الخيمة باللي فيها ..راوية صفرت ومفيدة عاودت شتاوة اختها..رقيصهم كان يحلى اكثر واكثر
شوية رقية قعمزت وهما مزال يغنولها..بعدها بدوا يرجعوا لكراسيهم وهادا وين ارتاحات حليمة ماتبيهمش ينوضوا مع بعض
ماقعد حد غير زمزم وليلى يرقصوا مع بعض
فريال: يا بنية شورك مخطوبة..حتى رقصك دوبة دوبة
ضحكت وبنات عمامها دايريلها جو وهما يصيحوا..
شوي وفكت الوشاح بعدين قعمزت وزمزم حتى هي..
شتوا على رقية كم شتاوة تانية..
بعدين قالت نور: دليني خولة..
: ايه هيا..
ديما: شن هي؟!
عليا: اغنية
ابتسمت ديما
وخولة بدت ادربك بلحن معين ..راوية تعبت مدت الدربوكة لفريال بعد قعمزت هي خدتها وشاركت خولة..
بدت ناديا بابتسامة: دليني يا منة هي ..دليني يا منة هي..دليني كانك زعلانة قوليلي يا منة هي..
عاودوا غنوها: دليني يا منة هي..دليني يا منة هي..دليني كانك زعلانة قوليلي يا منة هي
ليلى: زوز محارم يا منة هي..زوز محارم يا منة هي..زوز محارم وحدة حرير ووحدة بلسم يا منة..والقعدة مع الغالي تقسم يا منة
زادت حرارة التصفيق وعاودوا تاني البيت الاول.. واكثر من متفاعل الصبايا
ديما تصفق معاهم ومنسجمة اخر انسجام
خولة ادربك: عيني الكحلة يا منة هي..عيني الكحلة يا منة هي..عيني الكحلة لو كان نزيد نكحلها يا منة هي..نكحلها..وعرب تاجورا نرحلها يا منة هي
فريال سخنت: ايوااااه
والباقي يرددوا فالبيت الاول..
ناضت مريم ترقص ..
راوية تغني ويغنوا معاها اللي حافظين: شعري الاكحل يا منة هي..شعري الاكحل يا منة..شعري الاكحل لو كان نزيده المردومة يا منة هي..المردومة مانخلي عزري في الحومة يا منة هي
كانت ترقص والعيون عليها..رقيصها حلو بالمرة غير عن رقيصها بكري.. ناعم وفيه انوثة طاغية وهي بانت اكثر كونها بروحها فالوسط
مفيدة: ضفرة شعري يا منة هي..ضفرة شعري يا منة هي.. ضفرة شعري لو كان نحل ونطلقها يامنة هي..نطلقها ..مرت السلطان نطلقها يا منة هي..
عيطوا ومريم وجهها ولا احمر
سألت وحدة من صاحبات رقية وعيونها على مريم: اختك مفيدة ولا
هي ابتسمت: ايه..مريم
: ماشاء الله عليها جميلة بشكل، مخطوبة هيا؟!
مفيدة: لا مش مخطوبة صغيرة راهي عمرها تسعاطاش العام
رقية تلفتتلهم: تحكوا ع مريومه؟!
: قلتلها عجبتني مانحسابش عندها اخت كبيرة هكي.. ابتسمت وكملت: ربي يحفظها
ردوا الزوز بتتالي: تسلمي..ويحفظلك احبابك
ولوا يصفقوا لكن ثريا اللي طاح في وذنها كلامهم خافت حد يسبقها على مريم ..
•ريما وهي تصفق: الله يبارك
مريم الساقزلي ابتسمت
مالت ريما ع امها: بحتي في العيون..ماتواطنش من عليها بكل..يا خوفي تنخطب البنت يمي وتريح منا
مريم تصفق ومبتسمة: انكان لخيك فيها قسم ياخدها بإذن الله..
شبحتلها شوي بعدين ابتسمت وولت تصفق معاهم: صح
مريم شافت الاعجاب فعيون ولدها واضح..وهي اهم شي عندها حاليًا يرضى والباقي فنظرها مقدور عليه ..وزي ماقالت لو كان مريم قسمه حياخدها..
في اثناء حديثهم مريم قدمت لراوية وهي ترقص شدتها من يدها نوضتها وقعدت تغني: شعري الاصفر يا منة هي.. شعري الاصفر يا منة هي..شعري الاصفر لو كان نزيده صفورية يا منة هي.. صفورية مانخلي عزري مع بنية يا منة هي
•🌹•🌹•🌹•🌹•
من جهة تانية..
نزل وهو شاد مترد كبير فاضي ..لف حوالين الحوش وصل باب الكوجينة فتحه وخش
بانت عليه من الممر صفر العشي كيف معرمات فوق بعض ضحك
حط المترد عالرخامة وبدي رحلة التفتيش عن سطل المقروض..
وهو يفتش عتر في صونية مسلفرة فيها عصبان زايد لما يحطوا فالعشي بكري كلي منها وكمل باقي الرحلة لكن مالقي شي
عبيدة: اكيدة داسينه في دار الكنز..
فكر يتصل بيهم ..لكن مستحيل يردوا هدا لو تليفوناتهم معاهم من الاصل
لف وطلع مشي لين وصل جنب الخيمة ناوي يكلم حد من الصغار يخش يناديهومله..
بعتالي ضربه شاهد العقل..رقية احتمال كبير تليفونها يكون في يدها
طول جبد هاتفه وبدا يدور ع رقمها
في عز ماهو غاطس..انقام طرف القيطون واللي قاماته جيداء وقعدت واقفة فيه وهي تضحك..كانت تلعب مع باقي البنات يجروا من الخيمة لبرا منها وهكذا
تلقائيًا بعد فاتوا من جنبه الصغار قام راسه.. وياريته ماقامه
انقطع عن الدنيا ومافيها معاش يشبح في شي غيرها ولا يسمع في غير نبضات قلبه العنيفة..قلبه اللي زاد تولع بيها اكثر اكثر
ياااه شن صاير فيه وهو يشوف فيها توا.. في عز برودة الليل حس بحرارته شيطت.. اول مرة يشوفها بكامل انوثتها ..ماستوعبش امتى كبرت هكي..مش ناقصه ذهاب شيرة..من وهي بنوتة تقرا سادس خداته من نفسه فما بالك وهي امرأة ومش اي امرأة..وحدة كلها فتنة في فتنة💓
حركاتها فيهم دلع سلب اللي قعد من عقله..تتمايل ع طقة الدربوكة اللي هو اصلًا مايسمعش فيها..الراجل قعد مطموس وعيونه جاحظة
مافاقش الا بعد مانزلت جيداء القيطون ولحقت التانيين جري بدون ماتنتبه لوجوده
رمش عيونه وقام حواجبه وهو يمسح ع شعره ونزل بيده ع رقبته من الخلف.. نسي بالمرة هو وين وشن جاي يبي..الشي الوحيد اللي قاعد متفكره هو راوية
حاول يطرد صورتها ماقدرش..ولسان حال قلبه يقوله خليني هايم💓
قعد يمشي ويمشي لعل الصقع يطفي شوي من نار مشاعره..مسح بيديه ع وجهه وقلبه مزال ع حاله ماباش يهدا
تنهد تنهيدة طويلة وفي خاطره يقول «الصبر يارب..عطيني الصبر»
ولا صار من مقروض لا غنته..
•🌹•🌹•🌹•🌹•
فاتت الليلة من اجمل مايكون عالعيلتين..والمواضيع كانت زخ المطر على التلاتة.. خولة ومريم وراوية
بس ختامها عالبعض ماكانش حلو
مع الساعة 2:30 خشت الحوش هي وراجلها وعزوزتها
حمدي يصكر فالباب: بوي شوره رقد..
نحت ذهيبة من رجليها وهي تقول: روح بكري قال راسه يسطر فيه
تتكلم وعيون مفيدة عليها..اللي تعرفه انها كانت ناوية تبات الليلة في حوش الحاج منصور باش يسهروا ع تجهيز حاجات فاتحة حمزة لكن اللي صار فعلًا انها روحت..اكيد في سبب ورا مرواحة عزوزتها وقلبها يقوللها هالسبب يخصها هي
حمدي: هي يام تصبحي على خير
ذهيبة: قدامك كل خير ولدي..شبحتلها: مفيدة اقعدي نبيك شوية
حمدي قبل ليمشي: احممم بعد تكملي اركبي طول
ماكانش حاط في باله شي نهائي، من بعد فاتوا اول شهور زواجهم بسلام اطمن على عكس مرته اللي ولا مرة قدرت ترتاح من هالناحية..
ذهيبة: خشي تعالي
وبالفعل خشت مفيدة وراها..
•🌹•🌹•🌹•🌹•
الليل مطوله وفات على فيروز اطول
تتقلب في سريرها وكلام ديما يتكرر داخل راسها..
تنفخ بضيق وتحاول ترقد لكن ترجع من اول وجديد تفكر
•لما هي تخمم في كلام ديما طارق كان يخمم فيها
ناض من سريره وتوجه للكوجينة باش يشرب اميه
لقي فيها نزار مع علي مطبسين ع صونية مرش كبيرة فيها مالفي فضل من تقديم الليلة..
ابتسم لا اراديًا..وقدملهم: شديروا
نزار بعد بلع: شوفة عينك..تبي؟
نزل عيونه للصونية..البلاسيه متاع المالفي مكتوب عليه «حلويات العالم» ..توسعت ابتسامته لما تفكر هداكا النهار
تنهد وقال: صحتين
مشي للتلاجة فتحها وخدي شيشة ميه كبيرة رفعها معاه للدار..
تبعوه علي ونزار بنظرات استغراب..ماهتموش هلبا ولوا طول ياكلوا..فالمالفي💕
•🌹•🌹•🌹•🌹•
وياااه على ليل عبيدة شن يفوته من ليل
يتقلب على نيران عشقه لام عيون الفستك
على قد ماحاول يغصب روحه عالنوم شي شي.. هجره وخلاه مع عذابه
والعاشق مايعرفلاش النوم طريق
•بس زي مافي العاشق المتعذب في العاشق الملهوف المتولع
حمزة..مارقد غمضة خايف تغفى عينه ويطلع حلم.. مش صابر على مايوصل يوم غدوة ماغير يرحي فالدخان سبسي ورا التاني.. حتى هي رقدت من التعب وخلاته ساهر ليله لعيونها💓
صبر سنين معقولة مش قادر على ساعات!
لكن مراجاة السنين هادي والله ماتجي شي قدام الساعات القليلة اللي تفصله عن نوال اكثر ماتمنى في حياته كلها..والمجرب يعرف
•🌹•🌹•🌹•🌹•
وحتى في بنغازي في من ساهر
لكن علاش.. هو بس يعلم من بعد الله
فتحت اخته باب المربوعة لقاته مزال مقعمز فيها..حاط يده ورا راسه ويشبح للفراغ يبان يفكر
لما حس بيها قام عيونه وقال: كنك؟!
صفاء: انت اللي كنك..
ابوبكر: ماكني شي جوي سمح..عدي ارقدي
صفاء: متعارك مع ديما؟!
ابوبكر: قلنا مافي شي يا صفاء ماتسكنيش..
صفاء: باهي كنك ماتعشيت ..ماتقولش كليت برا انت اللي دقيت بدري وطلبت الرز بالخلطة
ابوبكر: مضغوط فالشغل طارت نيتي.. عدي جيبيلي بطانية وفراش بنرقد هن
زاد استغراب صفاء «ياناعلي قيسها عركة كبيرة..لكن ديما هادية كيف هك»
هزت راسها وقالت: باهي..
هو قعد يشبح للمكان اللي كانت واقفة فيه مطولًا.. خايف بسببه تخرب حياتها.. مش خافي عليه حب اخته لخطيبها
وحتى هو يحب مرته ..برغم من هكي مستمر يحط في وجوده معاها عالمحك
والفرصة ماتنعطاش مرتين يا ابوبكر..
•🌹•🌹•🌹•🌹•
ثريا حتى هي مش مرتاحة في نومها مدامها ماتكلمتش ع مريم..
ولهذا اول شي داراته بعد ناضت ودوشت وصلت..خدت خديجة بروحها في دار رقية وفتحت معاها الموضوع
ثريا: موش شكرانية في خوي لكن هذا كلام الحق..راجل كامل مكمل والكمال لله..ونا على قد ماعجبتني مريم وحبيتها وديتها به مودة..والله انكان قالت باهي تعيش معيشة ماتحلم بها ولية ..شقته فوق هلي وبسيارته وشغله ..
خديجة كانت تسمع ومتفاجأة بس مع ذلك ردت: والله يا بنتي اني وخيك وماليك مانعرفهم باش نشكر ولا نذم وانتي الله يبارك عليك لكن بنتي مزال صغيرة وتبي تكمل قرايتها..
ثريا: تجوز صغيرة خير الها يا خالتي خديجة والقراية ويش تبي فيها انكان خدت صلاح ماتنقصها حاجة
خديجة من الاول رافضة اساسًا مافكرتش ولو لثانية.. والسبب طبعًا البعد ..كذلك استشفت من كلام ثريا وكأنها متفضلة على بنتها لما طلبتها لخوها ..وفهمت طبيعة الحياة اللي ممكن تعيشها بنتها لو فعلًا وافقت.. هي امس ردت عائلات تحلم كل بنية تعيش بينهم.. هني وراحة ..هدا غير الجيران.. اكيد مش باش تجي فالاخير تحط بنتها في جحيم بعيد عن عيونها
ابتسمت وقالتلها: لا اني ولا بوها نرضوا نعطوها قبل لتكمل قراية
سكتت ثريا شوية تفكر بعدين قالت: يديرلها خطبة بسيطة ويرجاها عادي..
خديجة: يا بنتي انتم بعاد واني بنعطي بنتي باش نرتاح مش باش يقعد بالي مشغول ونشتاق شبحها مرات بالسنين
ثريا: تجيك وتعديلها والنقالات موجودة..
خديجة: مش زي .. وانتي عارفة..هني عالاقل تصير فيها حاجة لا قدر الله تستحقني تلقاني فوق راسها لكن تمشي لبنغازي ويقعد عقلي عندها ..هزت راسها يمين ويسار: صعب هلبا..
ثريا بابتسامة مجاملة: مغير احكيلها انتي واسمعي رايها يمكن هي ماعندهش مشكلة..
خديجة برد قاطع: نصيبه مش عندنا يا بنتي ربي يجيبله اللي خير منها ان شاء الله
يادوب هزت راسها وقالت بالسيف وهي قايمة حاجبها: ان شاء الله
فتحت خديجة باب الدار وطلعت للصالة قعمزت مع عزوزتها وسلفاتها الزوز ومريم..
بعدها خشت ثريا وواضح وجهها مقلوب
شافتها ناديا وهي جاية من الكوجينة تخض في رضاعة بنتها: ثريا تعالي افطري!
ردت وهي خاشة لدار التقعميز: صحة وعيت كبدي زاعمة مانقدش ناكل
استغربت ناديا في نبرتها الحادة ..كملت طريقها لبنتها
ريما انتبهت وشبه زبطت اللي صار..
وخديجة.. زادت تأكدت ان قرارها صح مليون فالمية..
حليمة كسرت من السفنز: فاش كانت تبيك
خديجة تصب فالشاهي لروحها: كلمتني في مريم..
تفاجئوا اللي عالصفرة كلهم
حليمة بعقدة حواجب: وانتي شن رديتي عليها!
نزلت خديجة البراد وقالت: شن بنرد يا اللاي ..صكرتلها الموضوع عارفتيني بناتي برا طرابلس مانعطيهمش ..كانهي مفيدة نهار اللي مانشوفهاش نتصل نتفقدها..رشفت من طاستها وكملت: لا يا اللاي بنغازي لا مايهونش عليا نفارقها
تنهدت حليمة بارتياح: خير مادرتي..
برغم انها مش محبذة وحدة من حفيداتها تتزوج بعيد بعد تجربتها مع بنت خوها الا انها مش رافضة بشكل كلي مريم رباية يدها وتهنيهم على بنتهم..اللي رافضاته اي شي يجي من ثريا وعندها حق
رجعوا يفطروا ووجه مريم الساقزلي بان عليه الاحباط..
ايه خديجة حست من تصرفاتها طول الايام اللي فاتوا انه بنتها عاجبتهم وقالت هكي قصدًا باش تصكر قدامها الطريق من توا وتجنبها وتجنب نفسها الاحراج

يتبع...