سانية جدي

الحلقة الثامنة عشر

#سانية_جدي🌹
#الفصل_الثاني «شطرٌ من القلب»
#الحلقة_الثامنة_عشر
______________________________
نحت القوانطيات من ع يديها ..ابتسمت لما شافت الحنة كيف زادت صبغت.. لونها الداكن مع لون بشرتها هي الابيض داروا مزيج مفتن للعيون..
انخلعت لما انفتح باب دارها فجأة وكانت وراه امها
خديجة شبحت ليدين بنتها بقيمة حاجب: تو نوريك عليها هادي غير نفضالك بس، هيا غيري حوايجك واطلعي للحوش ضميه
ومشت عنها..
ضحكت مريم بعدين صكرت الباب وبدت تبدل في حوايجها..
«خديجة من الناس اللي مزال مقتنعة ومتمسكة بعادة البنت ماتحنيش، زايد انها تخاف ع بنتها من عيون الناس.. رغم انها ماتبالغش في نقشها حدها رسمات بسيطة جدًا او روس الاصابع لكن الحنة عليها تطلع حاجة تانية وملفتة للنظر هلبا بالذات لما بدت تكبر..طبعًا هي مساعدة امها جدًا😁
تعشق حاجة اسمها حنة تموت عليها موت»
غيرت حوايجها وظفرت شعرها سبولة.. بعدين طلعت اضم فالحوش اللي مافيه حد غيرها.. امها مشت لحوش جدها وبوها فالخدمة ..منذر قاعد فالكلية والصغار الزوز في حوش جدهم
تنشف في ارضية الممر وهي تفكر في عبيدة وراوية وفي سرها تقول: يا ربي شن ندير ..ساعدني يا رب من جهة مانقدرش نرخي بيه ومن التانية صاحبتي كارهة روحي اللي داسة عليها..
•🌹•🌹•🌹•🌹•
عند راوية..
قامت شنطة المكياج متاع امها وطلعت بيها من الدار: جيبي شكارة يا وصال
طلعت وصال من الكوجينة: هاك..
خدتها راوية وحطت فيها الشنطة
ع جية مها من الكوجينة تشرب في اميه.. وصال شبحتلها وهي قامت كتافها ونزلتهم
راوية لاهية بالشنطة: اسبقوني اني مرات نكلم مرومة
وصال شادة طرف شعرها وتحرك فيها: راوية عندك فلوس؟!
هي التفتتلها طول وعقدت حواجبها: علاش شن تبي فيهم
وصال نخصت مها اللي طول تكلمت: يوم الخميس نسينا فلوسنا مشي صاحبتنا خدتلنا نفص نفص..
وصال: نبوا نردوهملها ..مها خدت من عمي مزال اني
راوية وقفت ع حيلها.. خشت لدارهم وخدت شنطتها من ع الزيانة.. طلعت منها خمسين قرش وجت بيها لوصال: خودي
هي فنصت فيها: خمسين قرش بس!
راوية: النص بربع واني عطيتك حق زوز
وصال ابتسمت وخداته منها: خليهم دينار ويري مرات ننسى فلوسي حتى غدوة.. كلاكس عمي خليل ديما مفلوشني
راوية: بري هونها الشنطة خودي خمسين تاني بس تزيدي عليهم نوريك سامعة!
وصال: حاضر..
طلعت راوية من الحوش..
ووصال شافت لمها وهي تقول: هادا اللي طلع معاك! نفص نفص!
مها: احمدي ربك اللي ماقلتش حلوة لحاسة
ضحكت وصال.. بعدين مشت تجري خدت الفلوس من شنطة راوية..
وهما طالعات خشت سيارة فتحي للسانية مروح ببهية من السوق..
مها فنصت.. ووصال جبدتها وقفت بيها جنب الحوش
مها: حي كان يكبسونا يا وصال تمتلنا..
وصال وهي اتبع فالسيارة بعيونها قالت: ماشيين لحوش جدي شكلهم.. هاه ادرقوا ورا الشجر هادي فرصتنا..
وطلعت طلقة ومها في جرتها..
•🌹•🌹•🌹•🌹•
في حوش الحاج منصور..
خشت لدار عمتها وصكرتها وراها.. حطت الكيسة ع الزيانة وعاودت طلعت من جديد للصالة..
شرف الدين: شكلها بتبدا قصة هي.. طلعته مع بوي امس فالعشية اللي يوريهاله يطلعله فيها مية عيب وعلة
ابراهيم: فاتت عليك المباراة انت هادا علاش واجعك خاطرك
شرف الدين: تي دوري الابطال يا راجل والحيوان بشير متشمت
حليمة: مش يعاودوا فيها ولا؟! احضرها..
شرف الدين: مافيهاش بنة يا حناي بعد عرفت النتيجة..
حليمة حطت براد الشاهي ع النار قدامها: عجب انتم.. هدوكم كانوا شاداتلي المنجوه المصفرن وانتم هاكم بتهبلوا على خاطر نفار يجروا في جرة كرة.. عشبوا الوسعاية متاعنا وديروا زيهم مدام بطيروا عليها لهالدرجة!
قعدوا يضحكوا..
وخليفة قال: مهبولة وقالولها زغرطي.. لولا بوي يام يديروها ويديروا بوها هادم
طارق: ساعد روحك بس!
شرف الدين: يباري ليه ليه يا ولد العم
طارق: فرصة وحصلها..
راوية قعمزت ع طرف الجلسة وهي تسمع فيهم..
ع خشة رقية وخولة للصالة.. كانوا ينفضوا فالكاكاوية
خليفة: صنتها تضرب في الدماغ ضرب
خديجة: كيف عاد محمستها اللاي ..
وخدتها من يد رقية مدتها لحليمة اللي قالت: صحيتي خديج
خولة ورقية قعمزوا جنب بعض..
خليفة: ترا مدولي حفنة
راوية ناضت..
ابراهيم: حتى اني
هي غرفت بيدها ومدتلهم كمشة كمشة..
خليفة وهو ياكل: معاذ وين مالا
خديجة: معاذ اعطيه تلفزيون حق يقعمز قدامه هونه في دار التقعميز
ضحك خليفة بعدين غير عيونه لراوية: وانتي سكر وين توأمك
خولة: حقا مريم عمرها ماتقعد لتوا على حوش جدي
راوية قعمزت في مكانها: كلمتها قالت نشطب الحوش ونجي
ع خشة فتحي وبهية وهما يقولوا فالسلام.. ردوه الكل عليهم
بعدين قعمزوا وانضموا للهدرزة..
رقية: بوي وين؟!
ابراهيم ينقرش فالكاكاوية: رفعه حمزة ومعاه عمي صبري للسوق
شرف الدين حط يده ع ذقنه: تي هادا وجهي كان روحوا بحاجة
راوية: جدي ذوقه صعب يحب الحاجة الباهية
خولة ضحكت: المشكلة حمزة مش من النوع الصبور ..يستر الله وخلاص
فتحي: مع بوي يصبر غصب عنه.. مايضحكش الحاج والله بعدها يرقد الزقية على ظهره في نص المحل..
حليمة تعبي فالطواسي بالكاكاوية: لا خيره حميزه باله واسع غير انتوا مدايرين من الحبة قبة
بهية: سامحيني يا عمتي لكن سلامته فيه الوعارة هلبا وشديد
طارق: جدي جدي لا مشي لا جي نفس الطبايع والحركات..
راوية: صح..سبحان الله اكثر واحد يجيب منه في الطبع
رقية بضحكة: مرة نت عليا جاني صوته زي بوي قريب متت..
وقعدوا يهدرزوا ويضحكوا.. ماحسوش بالوقت لين قرب اذان المغرب
ناضوا الرجالة باش يستعدوا للصلاة..
اما النساوين ..قعمزوا في دار المعيشة
•🌹•🌹•🌹•🌹•
فتحت باب المحل ومزال شاداته بيدها وملتفتة الداخل: شكرًا عمي صالحين
رد عليها هو: العفو بنتي.. مرة تانية معاش تطلعوا بروحكم للكياس خطير قولوا لحد كبير يجيبكم
مها: حاضر تو مرة تانية عمي..
: وامشوا على حاشية الطريق ..ماتقصوش من توا استنوا تقربوا سانيتكم قبل..
وصال: اوامر تانية عمي
هو ضحك: لا.. بروا هي
طلعوا الزوز ومها في يدها كيسة فيها الحاجات اللي شروهم.. كانوا عبارة عن كم طرف حلوة ومصاصات..
وصال فتحت طرف وحطاته في فمها: نحبها هادي القارصة.. زي المشروب بنتها
مها طلعت وحدة تانية غلافها زي حبة الفراولة: هادي اطيب.. فتحتها وحطتها في فمها وهي تقول: كان نقعد عليها هي وبس مانقولش شي.. قعدت تمصمص فالحلوة في فمها باستمتاع بعدين كملت: يا ريت جيداء وغيداء قعدوا راه مشينا كلنا ومعانا تغريد
وصال: حناهم مريضة قالت عمتي رقية.. حتى نزار معاهم.. اصلًا التلاتة خوافات يتخايلوا في الولاد في الميه كان جبناهم معانا راهو نكدوا الجو..
مها تمشي: عندهم حق مرات.. تذكري هديكا المرة لما طلعنا بالخنبة واول ماخشينا الدكان لقينا بشير فيه
وصال قعدت تضحك: شدنا كل وحدة من شعرها وقامنا منه.. وكملت وهي تضحك: غيداء نهارها تعيط ع طول حسها وجعتها التسريحة
مها تضحك معاها: عمتي كلثوم بدال ماتهزبها ع المشية قالتلها من اليوم ضفيرة لوطا معاش متعبة روحي فيك..
وصال بعد كملت طرف الحلوى: انتي خليك مع جيداء تبكيله وتقول حلقه عالصفر عادي..
مها بضحكة: بشير قال لمرت عمي هادي مكانها مش عندكم جيبوها لحوش حسين بس..
وصال: لكن تخنس بزيادة تي من اول مانطلعوا من البوابة تبدا تنقرز.. وقعدت تعجب في جيداء: تلامحت حمزة ..حي هادا منذر.. سيارة خليفة خشت للشارع..عمي بلقاسم  طالع من سانية الصغير.. ايوب مش عارفة شني..
مها وقفت: زهير..
وصال ضحكت ومكملة تمشي: صح صح.. هكي تقول فيها صوتها يهرب تحسيه ولا كيف..
مها التفتت وكرتها من يدها وهي تقول بخوف: زهير ومنذر شوفي!
وبالفعل لفت وجهها.. ويجوا عيونها ع ولاد عمها الزوز كيف نازلين من الافيكو راس الشارع..
•🌹•🌹•🌹•🌹•
انفتح باب الحوش المردود وخشت مريم لابسة وشاح وردي ع راسها وخصلاتها الهاربات منه وضحوا انها كانت ادوش قبل لتجي..
وراها طول خشت فريال تضحك.. ووسيلة وتغريد حتى هي
ع اصواتهم طلعت راوية من دار التقعميز وهي تقول: ليا من بعد العصر نقول اهي تجي.. هادا غير بديري دورة سريعة وتلحقيني!
مريم: من حاجة لحاجة لقيت روحي منفضة الحوش
وسيلة: راك ناديتي على وحدة من البنات عاوناتك..
مريم: مافيشي شي اصلا عالخفيف وخلاص
وسيلة كملت طريقها للدار وراوية قالت: جبت مكياج ماما نبي نكسد عليكم
فريال: تتفكري رسمة عين بنت فوزي في عرس حمدي ومفيدة
راوية: ايه ساهلة..
فريال: على مادرت مابتش تجي معاي.. جربيهالي نبي نشوفها كيف تطلع على عيوني..
وجبدتها مشت بيها للدار.. ومريم وراهم تضحك
خولة لما شافتهم فايتات لحقتهم: على شن ناويات
مريم شافتلها: ويري بتفرد عدتها..
خولة قعمزت وهي تلف في شعرها فوق: شن متعلمة جديد يا فرخة
راوية تجبد فالشنطة من الشكاره: بنجرب مكياج هيفاء وهبي ع وحدة منكم..
ضحكت فريال: مصح وجهك.. شن هيفاء اللي بتجربيها علينا.. لا حني هيفاء ولا انتي بسام فتوح..
مريم: وااااك ع التحطيم.. عادي عند الله تلعب علينا يا صابت يا خابت
فريال: وكان صابت لما نخليك ديريلي مكياج عرسي..
خولة رقصت حواجبها وقالت: ايواه بدت فالجو هداكا..تي حمزة بروحه قاعد ماجابش سيرة عرس لا عزي اللي تهدرزي من راسك
ضحكوا مريم وراوية.. والاخيرة كانت اطلع في فرش المكياج وباقي حاجاته
فريال رمشت عيونها بطريقة اضحك: اني وياه واحد يا حنة خيرك حامقة..
راوية شدت قلم الايلاينر: هيا فراولة اجلي الحب شوية..
فريال قربت من بنت عمها.. وراوية ثبتت وجهها بيدها اليسار وباليمين بدت ترسم فالعين..
ومريم وخولة يتفرجوا..
كملت وحدة ومشت للتانية.. وهي ترسم كانت نوعًا ما سرحانة..
فريال: اللي مزهي بالك ان شاء الله يدوم.. لكن خليك معانا شوية وين ماشية فوق فوق بتقلبيلي ع كليوباترا..
ضحكوا كلهم.. وراوية قالت وهي تبعد عنها: لا مية مية ..يعطيك دعوة يهبل
خولة قربت منهم: ترا..
قعدت فريال تحرك في وجهها حركة بسيطة: شني
مريم باعجاب: مشت معاك يخي احلى من بنت فوزي..
هي وقفت بحماس: وسعوا وسعوا.. وقفت قدام المراية وابتسمت: حليلي وخلاص، يديك يلتفوا بالحرير يا بنيت عمي..
راوية مبتسمة وهي تشبحلهم التلاتة: وتوا من بتتفضل نجرب عليها مكياج هيفا..
خولة: اعفيني اني.. جهدي على قده والله ماخاطري نقعد نمسح ونغسل.. اهيا مريم انتيمك
ع كلمتها انفتح الباب وخشت رقية: شن ديروا يا ضرسانات
فريال التفتتلها: راوية نايض عليها البوري.. اجعنه بوري كل حبيب
ضحكت رقية..
وراوية حدفت الفرشة جنب رجلها: خزي يا نكارة.. بوري صار
فريال قعمزت: ايه بوري.. من لما جيت وانتي ابصر خيرك
مريم شبحت لراوية.. عارفة سبب تلخبيطتها ومتأكدة منه
راوية: يا لاش قلت بنجرب مكياج هيفا عليهم داروني مهبولة ونبي الملاكوبيا..
خولة: خاطري نتفرج عليك تميكجي ..اختاري وحدة منهم ونكتفهالك
رقية قعمزت بحدا مريم: جربيه على روحك..
راوية: لالا نبي نتفنن فيه..
رقية حركت عيونها لمريم: ماليك الا مريومة
مريم: فكوني كيف مدوشة..
فريال: صح والله.. فيك منها شوية في تدويرة الوجه وعيونك احلى منها واكبر.. يطلع عليك صدقيني..
راوية ابتسمت: جبتيها يا فراولة..
خولة اتكت ع جنبها بحيث تجي مقابلة مريم..
هي بقلة حيلة: تلاقيتوا عليا يعني!
رقية ضحكت وباستها ع خدها: تخايلي روحك عروسة تو تزهالك
هي ردت بضحكة: هداكا زمان كلا توا معاش تمشي عليا الدسكة
هما يتكلموا وراوية تختار فالالوان وتجرب على يدها.. بين شنطة امها وقجر رقية..
خولة: ديري بروڤة لعرس رورو مريومة خيرك..سليمان مستعجل مش بعيد يطب على جدي في هالفترة
رقية ابتسمت بعدين قالت: قداش ليه شاد يبي نتلاقوا.. واني مش عارفة كيف..
فريال: عندك حق.. شن بتقولي للي بيرفعك ماشية نشوف خطيبي!
ضحكوا البنات..
راوية واقفة قدام الزيانة وهي تفرك بصبعها من الوان الايشادو على ظهر يدها: غير كان بهادي تصحح وجهها ونصححوا حتى حني معاها..لكن المصيبة فيهم هما.. كلمة لا عندهم زي صباح الخير
مريم بضحكة: ماتقولش عمتهم..
فريال: عمة مين والناس نايمين..
خولة: مشروعك فاشل رورو.. كانش بحدا السور التالاني خمس دقايق
هي بتفكير: زعما؟!
مريم: اني عندي ليك راي.. شبحت لراوية وكملت: مش هياتم عزماتك على طلعة يوم التلات
خولة: من هياتم هادي؟!
راوية شبحت لخولة: بنت عم ماما اللي حكيتلكم عليها نهارها.. كلمتني بكري قالت ماشيين لسوق التلات وتبيني نجي معاكم
خولة: معانا؟! علاش وين تعرفنا هي..
راوية: شادة بتتعرف عليكم.. بالذات مريم بتموت ع ماتشوفها..
رقية بحيرة: مش عارفة.. هي فرصة ومش حتتكرر تاني
مريم: عن نفسي ماشية ليا هلبا متسخفة على خشته
خولة: قالتلك مفيدة مافي حاجة مافيه.. منها تغيري جو ومرات حتى تعجبك حويجة تاخديها بالوسع..
فريال دفت رقية من كتفها دفة خفيفة: توكلي على الله يا بنية سوق التلات على يوم التلات وبتبدي فالبتات..
ضحكوا كلهم..
وهي كملت بتنقريز: رورو الله يفتح عليك بنحصلوا طلعة في جرتك .. هالحيرة هادي حتى لما جوا يخطبوا فيك ماصارت!
راوية: على قولة خولة منها عيد ومنها قديد.. نتبضعوا وناكلوا
مريم بابتسامة مع غمزة كملت عليها: ونشوفوا غوالينا
راوية: والطريق اللي جابتنا تردنا..
رقية بعد اقتنعت بكلامهم قالت: باهي.. قولتكم هي مرة فالعمر خل نعيشوها زي هالناس
خولة: توا مرحلة اقناع السواقييين..
مريم: خليفة مايقول شي عادي يرفع..
رقية: مع سيارة خليفة نبوا اقل شي زوز سيارات..
راوية شبحت لفريال.. وشوي شوي حتى الباقيات شبحولها..
هي فالاول مافهمتش: خيركم سهمتوا! شن جاكم؟!
قريب دقيقة باش استوعبت.. فنصت عيونها وبانفعال قالت: لالالالا ماتفكروش حتى فيها.. والله مانقدر نقوله ولا نجي من ركنه شن ماتعرفيش حمزة انتي وياها..
خولة: انتي غير علينا يا هبلة .. مايقولك كان حاضر ونعم.. لو قنعتيه يقتنعوا الباقي
فريال: فرقت حاضر.. اني عيونه عليا الدبل.. لا ووين سوق التلات اللي يملا ويفرغ بالرجالة.. تبوني نستشهد بكري بكري شوركم!
راوية قربت منهم: غير حاولي فراولة
رقية: ماتضغطوش عليها يا بنات.. عندها الحق مستحيل يطلقها تمشي غادي .. والمشية زي مانشبح فيكم بيوقف فيها ..ماتسببولهاش عركة معاه على خاطر لا شئ
مريم: هو عائلات بس يا رورو..
رقية: وكان.. زينا حني عائلة ولا لكن اللي خاشين معانا شباب
فريال حست برقية انطفت بعد ماكانت متحمسة: لو نعرفه يرضى نخليه يمدني بالكف في سبيلك لكن انتي عارفتيه كيف حزار..
ضحكت رقية ع كلامها: واك منك انتي .. نبي نعرف كيف تقولي في كلام يضحك وماتضحكيش..
فريال قعدت تضحك: وتوا شني..
ضحكت رقية من جديد
مريم: اهيا لقيتها!
كلهم شبحولها.. وهي ابتسمت: نكلموا بابا ولا واحد من عمامي.. يا بيهم ورفعونا هما يا سيفوا عالولاد
رقية فرحت ..
خولة: وعلاش عمامي وجدي ربي يطول في عمره قاعد..
راوية ضحكت بتعجب: تي كيف ماخطرش ع بالنا جدو!
فريال وهي تصفق بحماس: ريتوا كيف انحلت..
مريم بابتسامة: بعد يتعشى ويتريح شوي نمشوله ويري..
هي ردت: خلاص تم
قعمزت خولة ع حيلها وتربعت: هيا راوية ابدي فيها
:الله اكبر..الله اكبر
كلهم بتتالي قالوا: صدق الحق..
ورقية وقفت: نوضوا صلوا قبل..
طلعت راوية تجري: اني الاولى
خولة وقفت ومشت بتاخد الملاية
مريم: متوضية اني..
فريال لرقية: ماقعدش غيري ني وياك.. هي للامام سر ..وبضحكة كملت: تراه الطابور تعبى..
ضربتها رقية ع ظهرها ضربة خفيفة، وطلعوا ورا بعض..
اما عليا.. كانت في حوشهم حابستها وسيلة تكتب في واجباتها المتراكمة وتقرا عندها اختبار..
•🌹•🌹•🌹•🌹•
قدام حوش الحاج منصور..في الوسعاية..
منذر: بالله وينكم عنهم يام وين!
خديجة بتفنيصة: بري للحوش تطلعي منه نقص رجليك! حسابك عند بوك تو تشوفي..
ع طلعة بهية من الباب كانت في المربوعة تبخر فيها: خيركم؟!
وطاحوا عيونها على بنتها وبنت سلفها كيف واقفات ومواطيات روسهم..زبطت اللي فيها
وقالت بعصبية: كنتي فالمحل؟!!!
وصال منزلة راسها وترعش..
منذر: عمتي بالله عليكم ردوا بالكم ..الفرخات هادم كان مايتأدبوش بنقلبلهم عالوجه التاني!
جت بهية تجري لبنتها..
وخديجة بنته قالت لمها: بري درقي خليقتك من قدامي! هادم هما الفلوس اللي بترديهم لصاحبتك صار! من امتى متعلمة الكذب اه!
منذر سمع شن قالت امه ويجن جنونه..
جي طول جبد مها من يدها ناوي يضربها..
زهير اللي كان ساكت ويسمع باستياء.. لما لقاه ناويها بجد وقف قدامه ونزله يده: صل ع النبي يا راجل عيلة راه
شبحت خديجة لمها اللي ترجف مع بعضها.. قربت وضمتها بلا ارادة
منذر بعصبية وهو يفنص: تي وين عيلة.. عمرها تلطاش العام راهو تلطاااااش.. من توا بادية تزلز علينا شن خلت لبعدين!
بهية: الغلط مش منها منذر هادم دباير بنتي
خديجة وهي شادة مها اللي بتموت من خوفها حالها حال صاحبتها: زي بعضهم الزوز صغار.. هزب وعارك عندك حق لكن مدان يد لا يا منذر..
نفض زهير ومشي باتجاه حوشهم وهو متعفلق: مزال نلمح فرخة فيهم طالعة برا من السانية ما تلوم الا روحها..عقابها يكدبوا على خاطر تسالي وعفن!
وكمل طريقه وهو يتمتم..
خديجة بعدت مها عنها وهي تقول بحدة: عاجبك هكي يا كلبة الكلاب عاجبك! تحركي قدامي يلا!
مها بخوف شبحتلها: ماما لا تربحي مانبيش حوشنا قاعد معصب وبابا ومنصور مهناش..
خديجة جبدتها من يدها تكركر فيها: هادا علاش واخدة راحتك انتي يا متاع العمايل! لما نشعفك واني خديجة يا كلبة..
تكر فيها وتهزب لسانها ماسكتش بكل.. لين خشوا حوش الحاج منصور
اما بهية.. اللي داراته حتى هي ماكانش بعيد من سلفتها: تو نوريك عليها يا وصال.. اني تحشميني هكي اني! قطعتي وجهي قدام ولاد عمك يجيبولي فيك من الشارع يا حيوانة! غير يروح بوك من الجامع نخبره، ذهبتيلي شيرتي وقت المغرب قريب يطلع واني ماركعت لتوا.. وبصوت اعلى كملت: تحركي يا جيبتي السودة تحركي!
وصال تبكي وخايفة.. زادت خافت لما هددتها تخبر بوها، عارفاته قداش يكره من يكسر كلمته
وصلوا الحوش.. فتحت بهية الباب بالمفتاح متاعها دخلت وصال قبل وهي تصرف ووين جت بتخش وقفها زهير..
: مرت عمي ترا شوية نبيك
بهية التفتتله ..صكرت الباب ع وصال بعدين جاته
وصال اللي لما سمعت صوته نست عملتها وقلبها قعد يدق.. مشت تجري للكوجينة فتحت روشنها باش تقدر تعرف شن بيقول لامها
بهية باستغراب: نحجبها؟!!
زهير: ايه حجبيها علاش شن فيها
بهية: مافيها شي غير قاعدة صغيرة يا زهير
زهير وكلمة منذر ترن في وذانه: تلطاش العام اظن بعد هكي خلاص.. نور لما تحجبت كانت اصغر منها واهي ماشاء الله عليها
بهية سكتت
زهير: شارع وقفاطين وشعر مايجيش ..اني نتكلم من باب حرص يا عمتي الدنيا فيها كل شي
بهية: مافيكش شك ولد عمها وزي وخيها..
زهير: راني بعدك بنمشي لعمتي خديجة نكلمها في نفس الموضوع.. مانبيكش تفهميني غلط
هي قاطعاته لما ردت: كلامك مافيشي ماينعاب..
زهير: خلاص امالا نستأذنك توا..
بهية: اذنك معاك
مشي زهير لطريقه.. وبهية خشت وهي تفكر في كلامه اللي اقتنعت بيه بشكل كبير
•تبعدت عن الروشن وهي مبتسمة بفرح.. طفلة وكيف بادية تكبر، دماغها يوهم فيها بإن اللي داره زهير من حبه ليها وغيرته عليها.. رغم انها سمعاته لما قال بيكلم حتى خديجة يعني الموضوع مايخصهاش هي بس..لكن عقلها الباطن مصر على الاوهام..
: وين مشيتي تعالي جاااي تعالي مزال ماريتي مني شي انتي قاعدة
استاقضت من حلمها الحلو ع صوت امها.. بلعت ريقها بخوف ومشتلها
•🌹•🌹•🌹•🌹•
بعد صلاة المغرب..
في صالة حوش الحاج منصور مقعمزة حليمة تكلم في سعاد ع الارضي.. جنبها وسيلة تكتّب لتغريد فالواجب وغادي منهم معاذ يلعب بسياراته
•اما في دار رقية..
راوية: تؤ كريمة ماما خفيفة هلبا
خولة: ديري وخلاص.. بشرة مريم صافية ماتحتاجش هلبا
هزت راوية راسها يمين ويسار: كان مش ثقيلة ماينفعش هو هكي يبي
فريال: اني راس مالي فير اند لفلي كان تبي بودرة نعطيك اشكال الوان..
رقية قايمة بطانيات المكيف بتحطهم في الغسالة: ليلى عندها قطع يهبلوا
مريم: منين نجيبوها ليلى تو
راوية: وووه يا قليبي تخيلت روحي ندير فيه شن يرقدني الليلة
فريال وكأن خطر عليها شي: حي كيف نسينا زمزومة..
خولة: حق والله.. عندها مكياج مانكسابوه حتى حني
رقية وهي تفتح فالباب: بري فيسع جيبي من عندها شن ناقصك وتعالي
وقفت راوية بحماس وطلعت ومريم مشت معاها..
اما خولة رجعت اتكت: اااه يا عظيماتي المتهتكات.. تعرفي عندي قراية لفوق راسي الاسبوع هادا .. والولاد ينقرزوا يبوني نقلبلهم ديارهم
فريال بضحكة: تبي مساعدة تفضلي
خولة زادت رفعت راسها لفريال وراها: جديات؟!
فريال وهي ترقص فحواجبها: ايه.. لكن من الدارين بناخد وحدة
خولة: وباهي من قال بيه.. وكملت تقول: عرف يختار حميزه
ضحكت فريال.. بس من داخل مجرد جبد سيرته يخلي قلبها يدق💖
• 🌹•🌹•🌹•🌹•
في حوش حسين..
طقطقوا البنات فتحلهم سراج عين مصكرة وعين مفتوحة
مريم: ان شاء الله مامشيتش للجامع
هو انخلع وعيونه قريب طلعوا: الساعة كم توا؟!
راوية: الساعة مغرب يا فالح.. حي عليك من عمي حسين وحي..تي حي عليك من جدي كان يسمع بيك راقد ومسيب صلاتك
هو خش يجري داخل باش يتوضى ويصلي فالحوش وهو يقول: حي على امي حي ..حي على زمزم حي.. وبصوت عالي كمل: يماااا وين الفوطة
جاه صوت زمزم من دار الاستقبال: وميه وعقرب عميه ناقصها امك طياح سعد هي! امشي دور في اما تركينة حادفها قداش بنقعد وراكم اني..
خشوا عليها مريم وراوية وهما يقولوا فالسلام
زمزم التفت: وعليكم السلام.. خشوا تعالوا
مريم: شكله توقيتنا مش مناسب زمزومة
زمزم: مافي شي مناسب في حوشي خودي راحتك
ضحكوا الزوز وراوية قالت: زمزومة نبي نخنب مكياجك شوية ونرده..
زمزم فنصت: ماتقوليش عرس ولد كريمة الاسبوع هادا! قلتلها اني ذهيبة انتي ملخبطة صكرت راسها! حليلي وين بندرق وجهي من المراة هي حتى على طيحة تجيني واني بنغيب في عرس بكريها..
مريم وهي تضحك: لا الاسبوع الجاي عمتي ماتخافيش..
راوية: بنكسد ع وجه مريومة بس بس
زمزم حطت يدها على صدرها: فلوشتوني عطيكم السلامة.. نبي نفهم شن هوا اللي بتزينيه فيها مريم .. ماسكارا وروج كله من ربي
مريم ابتسمت وبعتتلها بوسة في الهواء ..ردتهالها زمزم
وراوية قالت: نبي نمكيجها زي هيفاء وهبي وكريمة الاساس متاعي مش اوي
زمزم: قدامكم الدار فتشوا وخودوا شن تبوا ..غير ردبالك تمسحيه قبل لنشوفه
مريم: حاضر..
ومشوا الزوز تجاه دار النوم.. مخليينها هي اضم عالخفيف
خشوا وقعدوا يفتشوا في ادراج الزيانة ..
راوية: حيه هادا نفس الدرجة اللي دارتها اخر مرة
مريم: قصدك اللي ع المجلة ولا..
راوية: ايه.. بنرفعه معاي احلى من اللي كنت بنحطهولك
وهما يقربجوا وياخدوا ويحطوا في جيوب توتاتهم..
سمعوا صوت الولاد يتسهوكوا ع سراج، كيف خاشين من الجامع
طول ضموا كل شي ودرقوه «يتحشموا»بعدين جوا طالعات
لاقاهم شرف الدين: دار امي فيها كنز ولا شني.. دورة دورة خاشتلها وحدة
مريم انحرجت لما فهمت قصده.. لان ليلى حاكيتلها ع موقف المكياج
ومش هي بس فهمت.. حتى بشير وراوية
بشير ضربه عنفقة وهو يقول: تتصنت عليا يا كلب
شرف الدين: شن رايك.. قاعد معاي في نفس الدار ومجلي النوم من عيني هو وياها ومزال يسأل!
مريم مشت تجري وهي محرجة وتضحك ع بشير..
وراوية لحقتها بعد قالت: وووك من صحة وجهك
وقفت جنب مريم وكملت: شرف الدين هدا كارثة
مريم بضحكة: زي مايبي روحه.. دارها بلعاني هوا باش يخزرط بشير قدامنا..
كملوا طريقهم وراوية وقفت فجأة: راجي نقول لزمزومة طلعنا
مريم: لا بنسبقك نعاود نغسل وجهي باش تحطي طول
راوية: اوكي..
مشت مريم وراوية رجعت لدار الاستقبال.. خشتلها وقالت: حني طلعنا زمزومة صحيتي ع الحاجات
زمزم طفت ضي الدار وبتطلع: والله زيطوا زي ماتبوا ونزيط معاكم
راوية بضحكة: هي سلام توا
طلعت راوية للباب وزمزم توجهت للكوجينة..
تمشي وتتفقد في جيوبها وتهمس بضحكة: بنخليها زي البمبلة اليوم
لما قريب توصل الباب انخبطت في حاجة ردتها ورا بقوة..
كان عبيدة.. وحتى هو ماشافهاش
راوية وهي تفرك في جبهتها: راسي خيرك ماتشبحش قدامك
عبيدة: وانتي وين عيونك
راوية: انت فاضي وبتهدرز واني عندي ماندير
ومشت عنه وخلاته.. بعد ماتلخبط جوها من جديد
اما هو.. تنهد من قلبه.. رخي قرواطة اليونيفورم وهو يمشي باتجاه داره ومافيش في عقله وقلبه غير صورة راوية..
•🌹•🌹•🌹•🌹•
دارت راوية المكياج لمريم.. وطلع عليها احلى بهلبا من المتوقع
عجبها وطولت وهي قاعدة بيه..
بينما قصة الطلعة يوم التلات.. بعتوا البنات لوز وسكر لجدهم .. اللي قاللهم اعتبروا روحكم مشيتوا..
•خديجة: وقلتي لبوك؟!
مريم تنشف في وجهها من الميه: ايه بكري بعد العشي.. اصلًا هو واعدني بيه من قبل..شن رايك تمشي معانا
خديجة: بعدين يصير خير.. خل نمشي نشوف خوتك وراهم مدرسة غدوة
مريم: بري تريحي تو نشبحهم اني.. حقا مها خيرها ماجت تعشت بكري نحسابها مع وصال فالاول لين قلتي حابستيها
خديجة: اختك هادي سلامتها بتجيبلي البغدد.. طالعة اليوم مع بنت عمك بالدرقة لدكان صالحين
مريم قامت حواحبها: امتى صار؟!
خديجة: في العشية.. ويطربقوا عليهم منذر وزهير ..عاد خوك وعارفتيه كان فتح فمه شن يصكرهوله..
مريم: شيطانات بكل تشدي الميه ولا تشديهم
خديجة: زهير قالي نحجبها
مريم: براحتك ماما اهم شي ماتغصبيهاش عن تكرهه بس..
خديجة: سوا غصبتها ولالا عام تاني بتلبسه تحب ولا تكره..خدت نفس وزفراته بعدين قالت: هي بري شوفي خوتك وارقدي مش عندك محاضرات غدوة ولا؟!
هي هزت راسها: ايه زوز
خديجة: باهي بري سلم بنتي الساعة قريب اطق الطناش راهو
مريم مشت.. تأكدت من ازياء المدرسة متاعات مها ومعاذ وشناطيهم بعدين شدت مكانها وراحت في نوم عميق..
•🌹•🌹•🌹•🌹•
مكالمة هاتفية..
اسماء: ارجيني نطيبها لكي على نار هادية..
ثريا: عليش المراجاة ندقوا الحديد وهو حامي خير
شقلبت اسماء عيونها بملل: ريت هالساهلة الماهلة.. هضي ريما نا موتيتلها حاجة سمحة مغير عطيني طشة وقت.. وانكانك بتزري عليا عدي تفاهمي من راسك لراسها وخلي الجو يهلبك
ثريا قامت حاجبها: لا نرجى عليش مانرجى..
ابتسمت اسماء بمكر: نستاذنك توا تصبحي على خير
ثريا: وانتي من اهله..
صكروا الخط..
والزوز يقرموا في بعض في سرهم
•🌹•🌹•🌹•🌹•
الصبح..
خليفة يواسي في شعره بالكريمة على مراية السيارة.. لين جوا بنات خوته الزوز وركبوا
تحرك بيهم وطلع من السانية
مريم: بنوصلوا ويري قبل اليوم
خليفة وهو يسوق: شن المناسبة..
مريم ابتسمت بعد قامت كتافها ونزلتهم: هكي.. خاطري ندور بالسيارة
راوية: كذب في وحدة فالكلية لاصقة فيها زي القرادة مادابيها ماتمشيلهاش بكري
ضحكت مريم وهي تقول: حرام عليك
خليفة: ماتخافيش لوز وفية..
ابتسموا الزوز..
وبعد سكوت ثواني تكلمت راوية: حقا خلوفه
هو: هممم
راوية: نبوك ترفعنا لسوق التلات بعد غدوة
خليفة يلف فالدومان: طولتوا بيها
مريم: سيارة عمي فتحي وسيارتك مزال نبوا وحدة تانية بس
خليفة قام حواجبه: انتم منظمات اموركم وتخبروا بس ماتشاوروش.. عالعموم يصير خير من هني لبعد غدوة
راوية: لا خلوفه عطينا كلمة كان هدا مش عابيين عليك
مريم: ايه خلوفه .. قول باهي وعدنا حتى البنية
خليفة: اياااح هي فيها بنيات غيركم ولا شني؟! اسمعوا طلعوني من طبايخكم
راوية برجاء: هياتم بس والله الله ..
تغيروا ملامح وجهه.. وكيانه انقلب لمجرد سمع اسمها..
مريم: خليفة تسمع فينا
هو استاقض لروحه: شن قلتي
مريم بابتسامة: قتلك يهونوا بنات خوتك تخليها في خاطرهم
ابتسم وتنهد بدون مايحس: لا مايهونوش..
الزوز ابتسموا بفرح.. التفتت مريم لراوية وطقوا يديهم في يدين بعض وهما يضحكوا.. وعمهم يضحك عليهم
•🌹•🌹•🌹•🌹•
الساعة 11:00 صباحًا..
يمرر في عيونه ع العاملين عندهم واللي حاليًا يلقطوا في محصول التمر..
في نفس الوقت حاط تليفونه ع وذنه ويتكلم: صاحبي ماشي لتركيا بنوصيه يجيبها معاه من غادي خير..
ردت عليه بابتسامة: ربي يعاونك يا رب.. ايه حقا شن بنقولك
سليمان ابتسم: قولي وكثري من القول مدابيك
ضحكت بدون صوت وردت: مش تبي تشوفني.. بعد غدوة اني والعيلة بنمشوا لسوق التلات تعالى غادي كان هادا
سليمان حك لحيته بصبعه السبابة: عائلات بس
: جيب معاك اللاي ولا ياسمين
سليمان ابتسم: وانتي قلتيها.. خلاص بإذن الله موعدنا التلات
: تمام.. ايه احكيلي شن ادير حس دوشة بحداك
سليمان وهو مضيق عيونه بسبب الشمس اللي جاية عليهم: مع الخدام نلقطوا فالرطب
: ربي يساعدكم.. بعتتلنا منه ياسمين يوم الخميس بنته ماشاء الله حتى بوي عجبه
سليمان بضحكة: السور هادا شكلي بنزيده بلوكتين ولا تلاتة
: علاش بشن ضرك..
سليمان ويده في جيب التُب: مخرب عليا.. لما يكون عالي يبدا مشوار من السانية للسانية حتى كان اماليا بيسبقوني ويعطوك حاجة يتنبلوا ..
هي ضحكت..
•🌹•🌹•🌹•🌹•
من سانية النعاس لسانية بلحاج..
روح فتحي بعد مناوبة في مكان عمله..
دوش ومشي لحوش الحاج منصور لقي عيلة خوه الطاهر فاطرين غادي.. انضملهم بعدين روح لحوشه تاني باش يرقد ويرتاح شوية قبل الظهر
فتح باب الحوش وخش وهو ينادي: غريانية
جاوباته من دار بناتهم: في دار البناويت يا فتحي
كمل طريقه لين وصللها: نوضيني لما يذن الظهر
هي التفتت عليه: معاش مزال عليه.. استناه بالمرة وقيل بعدها مش خير
فتحي: مايصيرش منها التقييلة بنمشي نروح بمريم وراوية..
بهية كملت ترتيب سرير وصال وجت طالعة: لا كان هكي تريح امالا ساعتين احسن من بلاش
هما قاعدين يتكلموا شرين تليفونه.. قامه شاف الاسم بعدين فتح الخط: صباح الخير
: صباح النور عمي.. ان شاء الله غير مانوضتكش من نومك
فتحي: لا مزال ماحطيتش راسي
: غير اتصلت بنقولك مادورش البنات تو نروح بيهم اني بعدين
فتحي: مش حاير فيهم انت خدمتك حاكمة فيك
: كان عارف روحي مانلحقش راهو ما اتصلتش بيك..
فتحي باستسلام: باهي دير رايك
: ان شاء الله..هي السلام عليكم
فتحي: وعليكم السلام ورحمة الله
بهية سألت بعقدة حواجب: من؟!
فتحي بعد نزل التليفون من ع وذنه: عبيدة قالي بيروح بالبنات
هي ابتسمت: نيتك صافية
فتحي بضحكة: بيني وبينك فرحت، نحس فروحي متكسر وعيوني خلاص معاش نشبح في شي قدامي
بهية وهي تمشي: تو نديرلك قهوة اشربها بين ما اذن الظهر
خشت للكوجينة وطلعت السزوة من الدولاب..
وفتحي قعمز ع كرسي البار وهو يدلك في صدغه بصوابعه السبابة والوسطى
بهية: بنلبس وصال وشاح
فتحي قام عيونه فيها: شن خطر عليك
بهية تحط فالسكر في الميه: كبرت البنت خلاص لازم تلبسه
فتحي: هدا شي بينك وبينها تصرفي بمعرفتك
بهية: لا قررت خلاص..جسيت نبضها قبل لتطلع للمدرسة بكري حسيتها عادي مرحبة
فتحي: تسمع في الكلام بنتي مش زي الغريانيات يلبسولهم فيه بالسيف
هي ضحكت: العفو يا فتحي.. عمري 14 عام بس وقتها .. حتى بوي الله يرحمه اللي كان واعر قال قاعدة صغيرة عليه
فتحي: ماحطيتيه ع راسك لين هبلتيني
هي عاودت تضحك من تاني ..
•🌹•🌹•🌹•🌹•
كلية العلوم..
هياتم ماعندهاش اليوم.. وراوية كملت محاضراتها بكري..
وهي مقعمزة تفكرت كلام زميلتها الاسبوع اللي فات عن الطالب اللي يشرحلهم
مشت تجري للوحة الاعلانات، بعدين اذكرت انها ماتعرفش اسمه
طلعت تليفونها وهي تدعي «يا رب نطلع مخزنة رقمها»
وبالفعل لقاته.. طلبت الرقم وحطاته ع وذنها وهي تستنى فالخط ينفتح
: الو راوية
راوية: اهلين كيف حالك
: الحمد لله.. شني بتجي للمحاضرة
راوية: متصلة بيك ع خاطرها اصلًا.. وين انتم
: في قاعة ****** فوق في الدور التاني
راوية: تمام زبطها ..
: تلقيني نراجي فيك قدامها
راوية: صحيتي
: سلمك ولو..
صكرت منها ومشت وين مانعتتها.. لقتها قدام باب القاعة
سلموا والبنت قالت: حظك حلو يدير في مراجعة سريعة للاكتشرز اللي فاتوا..
ابتسمت راوية ابتسامة خفيفة وخشوا جميع..
العدد كان شوية وهو عاطي بالظهر يشرح عالسبورة..
مشوا الزوز وقعمزوا جنب بعض في اول صف.. وين ماكانت البنت قبل لتطلع لراوية
حطت يدها ع كتف راوية اللي من جهتها وقالت: اهيا البنية اللي حكيتلك عليها استاذ
التفت ولما شافها لا عرف يفرح لا يحافظ ع ملامح وجهه الجدية
بينما هي.. انصدمت ..ماتوقعتش ولا حتى 1‎%‎ يكون هو نفسه الولد اللي شادها في جرتها..
هو تنحنح ورجع للشرح .. لكن طول الوقت عيونه عليها هي بس لين خلى باقي الطلبة ينتبهوله
راوية اضايقت وحست بنفسها انكتم.. راجت عشرة دقايق باش ماتبينش ان في شي وناضت بتستأذن باش تطلع
قامت يدها وبكل جدية: عفوًا بنطلع ماليا جوني..
هو ابتسم ونزل الخطاط: مدامك خشيتي ماضيعيش عليك الفرصة، نصيحتي اقعدي واستفيدي
راوية فوق مانفسها: نقدر نطلع؟!
وفي خاطرها تبي تقوله ماليكش علاقة اصلًا.. بس تمالكت اعصابها بالسيف ع خاطر سمعتها وصورتها قدام زملائها وزميلاتها
هو تنهد بتصنع: تمام تفضلي
راوية قامت شنطتها وطلعت بدون حتى ماتودع زميلتها..
كانت متكنطية ع الاخر ..
هو تبعها بنظرات عيونه لين طلعت
: استاذ..
شبح للي تكلم بعدين استعاد تركيزه وهو يقول: وين وصلنا .. ايواه الفينول
وكمل شرحه..
•عندها هي..
من اول ما طلعت طلعت التليفون تشرين ع بوها كونه خليفة قبل ليحطهم قاللهم انه حيروح بيهم.. بس بوها قافل تليفونه
تأففت.. واتكت ع الحيط وهي طايرتلها..
راوية: «نمشي للعلوم خيرلي مرات يطلع ويلقاني يعشش»
وبالفعل وقفت ع حيلها ومشت متوجهة لبرا القسم وهي تدعي في خاطرها «يا رب فكني منه ثقيل الدم هادا»
•🌹•🌹•🌹•🌹•
بالرجوع للسانية..
مقعمز الحاج منصور ع طاولة السعف ومعاه حليمة وحسين والامين..
يهدرزوا عن مواضيع عامة..
حليمة: الجو بيبدا يصقع
حسين: صح ايه
الحاج منصور قال: البنيات يبوا يمشوا للسوق
الامين: خبرتني خولة.. ناويين سوق التلات
الحاج منصور: قالوا دبرلنا من يرفعنا
ضحكوا حسين والامين..
وحليمة قالت بابتسامة خفيفة: خايفات
منصور: عارف من شكون اني
وشبح لجهة معينة.. ولاده الزوز شافولها لقوا حمزة جاي من جهة حوشهم
لما وصلهم تكلم بصيغة سؤال: اتصلت قلت تبيني يا حاج..
منصور هز راسه: قعمز قعمز
جبد حمزة كرسي وقعمز.. ومنصور استرسل: باش تتفاهم انت وولاد عمك من بيرفع رقية والبناويت لسوق التلات
حمزة عيونه طلعوا وصيح: شني؟!!!
حليمة عضت شاربها.. والامين وحسين فنصوا فيه
هو ادارك نفسه..
منصور: جديدة النبرة يا حمزة
نزل راسه وقال: سامحنا جدي غير استغربت بس
منصور: علاش مستغرب اول مرة تسمع بالسوق والا كيف..
حمزة بحدة: جدي الخارب اللي يبوه التريس والنساوين فيه كتف بكتف يداعكوا.. بالعربي هكي معيز وضان الحكاية
منصور: شن عرفك.. ماشيله مالا؟!
حليمة ماقدرتش تشد روحها..قعدت تضحك عالهزاز..
حمزة وهو متمالك اعصابه: حقك عليا اول ماتخف الزحمة نرفعهم اني لكن توا لا.. مزال ماتخوخمتش باش نديرها
منصور: بنيات خاطرهم بيمشوا ماتحرمهمش
حمزة: غادي لا يا جدي لا..
خبط الحاج منصور بزقيته ع الارض: واني قلت اي واللي يقدرك عليه ربي ديره.. بتمشي كلمتك وتكسر كلمة جدك هكي ربوك يا راجل!
حسين والامين يسمعوا بس..
وحليمة مش طايقة في حمزة لكن مع منصور من يقدر يتكلم؟!
وقف وهو يمسح ع لحيته كنوع من تهدئة الاعصاب: حشاك جدي اللي تبيه اني فيه تو نرفعهم حاضر..
قال كلامه ومشي من جنبهم.. مايبيش يزيد يعاند جده لكن قاعد معصب من البنات..
يفكر وهو عاقد حواجبه: «كان نعرف من صاحبة الفكرة بس! نطقطقلها رقبتها! حبكت ع النم هادا خلاص طرابلس ضاقت!»
وكمل طريقه وهو يفور ويغلي
•حليمة: نزلت عليه هلبا يا حاج
منصور: مالا كيف تبيني نديرله!
حسين: امي حمزة واقطع الخبر
حليمة: كلهم يا حسونه..يسخفوا فيا لما تبدا تهزب فيهم  كلامك واعر يا حاج مرات
الامين وحسين تبادلوا النظرات وكأنهم يقولوا «مرات!»
الحاج منصور: خليه.. يلقى روحه
حليمة: والتانيين ولا بتناديهم هكي واحد واحد!
منصور: هما خايفات من حمزة اكثر شي واني ضمنتهولهم.. الباقي ساهلين..
•تبعدت من روشن الكوجينة وخشت تجري للحوش وهي تضحك بفرح
وقفت ع راس ليلى اللي رقدت في دار المعيشة من بعد الفطور: للوش ليلى.. نوضي صار من المشية
ليلى بنعاس: مشية شني في هالقوايل
رقية قعمزت: حقا ماتندريش انتي.. كملي نومك حبيبتي كملي
ليلى رجعت براسها ع المخدة وغمضت عيونها تاني..
اما رقية طلعت من الدار للكوجينة باش تحط غداها.. وهي تبتسم وتفكر في سليمان..
•🌹•🌹•🌹•🌹•
الساعة 1:55 مساءًا..
واقف في البركيدجو ..متكي ع سيارته من برا ويديه في جيوب سرواله الازرق كحلي متاع الخدمة، يستنى في مريم تجيه
بعد خمس دقايق بالزبط خشت للبركيدجو.. بس ما انتبهتلاش وين لانها كانت تشرح لشيماء في فقرة في شيت وحدة من المواد
فاتوا من جنب السيارة اللي هو كان متكي ع مؤخرتها بالجنب..
عبيدة ضحك وصفر..
الزوز انتبهوا وبتلقائية وجهوا عيونهم لمصدر الصوت اللي كان قريب هلبا..
شيماء لما شافاته ارتبكت.. وضحكته زادت دوختها
يا دوب طلع صوتها وهي تقول «سلام».. وجت بتمشي
بسبب ربكتها عترت وطاحوا شيتاتها ودنيتها كلها..
عبيدة: يا ستير..
مريم قربت لشيماء ساعدتها توقف
وهي محرجة ع الاخر، متمنية الارض تنشق وتبلعها
لاحظت مريم رعشة يديها عرفتها مرتبكة: عادي ماصار شي هاه
عبيدة حتى هو حس باحراجها.. نحى نظاراته الشمسية وقامهم ع راسه بعدين نزل قعد يلملها في حاجاتها .. يحساب روحه يخفف عنها فالتوتر مايندريش انه يزيد فيها..
مريم ابتسمت وهي تهمس: عادي ديما تصير مادوريش
شيماء هزت راسها ويادوبها ردت الابتسامة.. عيونها ع عبيدة كيف مطبس ويلم فالحاجات.. قعد قلبها يدق وفي نفسها تقول «يعطيني دي محلاه ومحلا ضحكته..هيبة يا ربي هو وحوايجه هادم..شكله طيار..اوووف اني وحوستي عيي يقيم يا روحي»
مريم: شيمااااء.. وين رحتي يا بنت
هي استاقضت.. لقت عبيدة مادلها الشيتات.. خدتهم
ولما جت بتشكره  شبحت لوجهه.. انسبهت مسكينة ولسانها ارتبط
عبيدة عقد حواجبه لما لقاها مبلمة فيه..
مريم كونها ع دراية بطبع شيماء.. نخصتها وهي تقول: هي سلامات توا
نزلت عيونها وفي خاطرها تهزب فروحها: سلامات..
ومشت تجري مولية للكلية..
اما عبيدة ومريم ركبوا السيارة وهو يقول: قصدك جاية معاك لهنايا باش بتولي من جديد غادي؟! رسمي البنت زي اللي فيها طقة
مريم ضحكت: يا بارد.. ديما بوها يشرين عليها قبل ليوصل بشوي باش تستناه فالبركيدجو لكن مش عارفة خيرها ولت.. يمكن نست حاجة
عبيدة يوخر باش بيطلع: فريال ماجتش مالا
مريم: لا جت لكن مزال للاربعة عندها اضافي.. بيجيها عمي صبري بعدين
هز عبيدة راسه بعدين نزل النظارات الشمسية من جديد ع عيونه وكمل سواقته باتجاه جامعة الفاتح..
•🌹•🌹•🌹•🌹•
حبيبة قلبه وقتها كانت في كلية العلوم..
باش يكمل نهارها الحلو طفي شحن تليفونها.. وقعدت هكي
تمشي وتجي وخلوقها في حكة..
شافت بالصدفة للكيمياء تلامحت الولد نفسه يقص في الطريق جايها..
طول تحركت من مكانها.. لكن هو من بكري يدور فيك يا راوية مهما هربتي مافيش فايدة
حاولت اتوهه بس ماقدرتش..
راوية بضيق: استغفر الله يا ربي.. حتى التليفون بلا شحن.. مش معقولة بنقعد نجري هكي!
هو جي قدامها فجأة وجاوبها: اسمعيني للاخر بس ووعد بعدها شن ماكان قرار نحترمه
راوية شبحتله من فوق للوطا باشمئزاز: واضح قراري مش محتاجة نسمع..
هو باصرار: واني مش متحرك لين تسمعيني..
هي شقلبت عيونها وجت بتمشي..
بس هو وقفها لما قال: تتحركي خطوة قبل ماتسمعي شن عندي نطبك ونهرب بيك قدام خلق ربي هادم كلهم
انصدمت.. ولاول مرة خافت منه
وهو مكمل: نديرها.. ولت نبرته اقل جدية لما قال: مانبي منك شي غير تسمعي بس بعدها انتي حرة
راوية تشبحله بحدة وغضب.. لكن مافيش قدامها غير تسمعه

يتبع....
«لو عجباتك الحلقة اضغطي عالنجمة واعطيني رايك🤍»