سانية جدي

الحلقة الحادية عشرة

#سانية_جدي🌹
#الفصل_الأول «سانيتنا»
#الحلقة_الحادية_عشرة
__________________________
حطت قدامه القائمة اللي تبيها من السوق: هلك اليوم رحلتهم
خالد خدي الورقة وقال: شن الجديد
اسماء: مافش جديد مغير بننشدك من اللي بيشيلهم للمطار
خالد: يحيى
هي قامت حواجبها: اممم.. وعليش مش انت ولا مايجيش عليك هذا وانت الكبير يا باتي وغامين عليك هكي
خالد تنهد وقال: نابيدي معاش فهمتك شن تبي، مرة تبي العلاقة رسمية معاهم ومرة تبيني نشيل المسؤولية .. ساولتك بالله يا ولية اثبتي على راي!
اسماء: مغير افهمني، نا القصد من كلامي ان باتك ناوي على خبر شين .. ماتحقش فيه مسلم كل حاجة لخوك الصغير .. هو الوحيد اللي يطمر عنده في اسرار العمل واخرى حتى جدك عاطيه رزقكم اللي في***** يتحكم فيه على مزاجه ونحن مانندروا الفلوس كلها تمشي شور جدك ولا عاد يلهط منها خوك اللي فيه النصيب.. اسمعني يا خلوده خوك هضا داهية عارف كيف يجيب هلك شوره ومعاه هذكي ريما ..ماهو منو اللي جابله صفاء غيرها والعطيب فالح كمل معاها ومع خطيبته وعطى ديما لخوها بيش يضمن الرزق ليه مية فالمية
خالد شبحلها وهو عاقد حواجبه: ماظنيتش لهالدرجة.. بعدها الراجل جا وخطب اوحده ماحد قاله!
اسماء برفعة حاجب وزادت قربت لراجلها: طيب واجد انت يا خلوده.. قولي منو يلي فتح الموضوع مع هلك؟ رؤوف ولا مش رؤوف؟!.. وهضا راجل اختك مش رفيقه من قبل ولا! هو هكي بيضمن حصة ديما من ورث باتك بعد عمر طويل ان شاء الله تحت ايده ..هضا مغير اللفعة ريما اللي صارعتنا برؤوف والفرخ جمال مايحتاجش ندويلك انت اكثر واحد تعرف كان خيه حبيبه يقوله موت يموت.. قامت حواجبها ورسمت ملامح البراءة على وجهها: قعدت مفيت انت ويحيى ومش صعيب عليه يخلي باتك يعزقكم برا ..
خالد لما انجابت سيرة جمال تكنطى.. من لما وقف في وجهه يوم تعارك مع ريما وهو باغضه واكيد السبب شيطانة الرجيم اللي حاويها: معنى حكيك ان رؤوف يبي يبرم عالرزق بالشراكة مع نسيبه؟!
هي ابتسمت: صحة لك .. خوك هضا يا خلوده من طول عمره يشتغل من تحت لتحت مايوريك ايش يبي يدير ..لعند يفجعك ويطلعك ايدك على راسك وهو يضحك عليك.. وخرت براسها على الكنبة وكملت: وقيسه يحيى فهمه وتما يمسح فالجوخ هضا عليش متنازل وموديهم المطار
خالد استفزه كلامها وعصب: ياه الا هضي والله! يحلم يدير اللي فراسه ونا حي هو ولا غيره!
وطلع من الحوش وهو يصرف: لعند هنا واوقف يا رؤوف! مش كل حاجة تبي تاخذها!
نزل الدروج متوجه للسوق ومازال معصب.. وبين عيونه يتعاود كل موقف كان متولي فيه عبدالرؤوف زمام الامور في الشغل وكل كلمة مدح وثناء من بوهم عليه.. قبل كان يشوف فيها عادية وزي ماهي فالحقيقة بس توا تولد الحقد في داخله تجاه خوه..
بينما مرته بعد ولعت هالشرارة.. حطت رجل على رجل وقالت بعد زفرت: الله لا يهنيني كان هنيتك يا عبدالرؤوف!
•اكيد واضح وجليّ سبب كره اسماء لسلفها.. فلوس واملاك الصادق اللي في نظرها هو مهيمن عليهم والمتحكم الاول في كل شي يخصهم.. تبي تحوله من طريقها وتخلي خالد مكانه بأي طريقة.. حسب تفكيرها انه واخد اكبر من حجمه فالعيلة بالذات وان كلمته ليها وزنها عند بوه وجده اصحاب القرار في كل شي ..وهدا اللي مخوفها هلبا ..
•🌹•🌹•🌹•🌹•
في العاصمة..
قايمة شعرها كعكة فوق وواقفة قدام الفريز الارضي في الكوجينة تتأكد ان كل شي تمام وجاهز لاستقبال الشهر الكريم..
: فاصوليا..حمص..خبزة مرحية..بازيليا..جبنة..صالصة..فراولة.. هزت راسها وكملت: كله تمام
صكرت الفريز..بعدين طفت ضي الكوجينة وطلعت منها
وهي تمشي اذكرت الراجل المتقدم لخطبتها وقعدت تفكر بينها وبين نفسها «زعما يستاهل نوافق عليه؟.. وامي وبوي باهي منو بيهم؟»
قطع عليها حبل افكارها صوت انثوي يقول: رورو وين سرحانة
رقية استاقضت وشافت قدامها لقت ليلى في يدها سلة باين منها هلبا شيش زي متاعات الميه: هنا يا قلبي.. قربت سلمت عليها: شن الجو
ليلى بابتسامة: غدوة رمضان وتسألي عالجو..اكيد فايح
رقية ضحكت وغيرت عيونها للسلة: شن جايبة معاك؟!
ليلى توجهت بخطواتها للكوجينة ورقية معاها: درت عسل وجبتلك حصتك عارفاتك عيونك بسبوسة كل يوم
رقية سبقتها وفتحت الثلاجة: نجيهولي العسل اللي يدير في عسل
ليلى تحط فالشيش فالتلاجة وهي مبتسمة بحب.. الكلمة هادي ديما مربوطة عندها بيه هو، وكيف لا وكانت هي اول كلمة غزل صريحة يقولهالها💖..
التفتت لعمتها وهي تصكر في باب التلاجة: مالا حناي وجدي وين؟!
رقية طالعة من الكوجينة: مهناش حناك رافعها عمك تزور مراة مريضة.. وجدك برا يسقي فالشجر
وهما ماشيات تجاه دار المعيشة شرين تليفون ليلى.. قاماته شافت الاسم ابتسمت من قلبها
رقية شافاته حتى هي: اكيدة بيعيد عليك بشوره خشي ردي
ليلى مشت بخطوات متسارعة لدار عمتها خشت وصكرتها عليها بعد فتحت الخط وبصوت ناعم قالت: آلو
ورقية كملت طريقها للدار وهي مبتسمة.. فتحت التلفزيون وقعدت تتفرج ع اعلانات القنوات عن البرامج الرمضانية
سمعت صوت خفيف..كتمت التلفزيون وركزت .. الصوت ولى اصوات كل مالها تقرب ..لين بانوا عليها اصحابها نجلاء والزبير
وقفت بفرح وقالت: شن المفاجآت هادي انت وياها!
قدمت تسلم عليهم ..نجلاء حضنتها وقالت: كل سنة وانتي طيبة رورو
رقية بادلتها الحضن وباستها على خدها: وانتي بخير وصحة وسلامة حبيبتي
نجلاء قبل ماتنزل يديها من ع خالتها نخصتها في ظهرها واشرت بعيونها جهة اليمين..
رقية فهمتها.. بعدتها عنها وكملت بابتسامة: تعالى جاي انت تعالى من لما خدمت مع بوك وقعدت زي هلال العيد، قداش ليك موسم ماجيت قول
الزبير قدملها وهو يضحك وضمها ليه: اصبري تحجي بايت عندكم اصلًا
رقية بفرح: قول والله، في شن خاطرك تفطر غدوة حبيبي.. اطلب وتمنى
نجلاء قربت منهم وهي تضحك في ضحكة صفرة ونخصت خالتها من جديد.. هني رقية استاقضت
الزبير: والله توا مافي بالي حاجة كان خطر بعدين تو نجيك
رقية بابتسامة: ماشي.. مالا ماشفتش الشباب؟!
الزبير: ماقابلني حد واني خاش شكلهم يطخوا فالنوم
رقية: لا ابدًا.. بكري شوي مشوا للنخلة
هو قام حاجبه باستغراب: معقولة ما انتبهتلهمش؟!
نطت نجلاء: شكلك..لاني لمحتهم اني
الزبير: مية مية تو نمشيلهم.. تلفت يمين ويسار وقال: وين حناي مالا ماسلمتش عليها؟!
نجلاء «اوووف»
رقية ردت: مهناش ماشية مشوار وجدك البرا تلقاه
هز راسه ولف طالع من الدار.. حط صاكوه الصغير في دولاب خليفة وكمل طريقه بعدها للباب الرئيسي فتحه وطلع بدون مايصكره
لما تأكدت اخته انه طلع جت تجري لخالتها من جديد: ابراهيم قاعد ولا فالمحل؟!
رقية: لا قاعد عطاه راحة صاحب المحل.. قربت من بنت اختها وقالت بهمس: ان شاء الله قاعدة مخاصمك من هداكا اليوم؟!
نجلاء بضيق: لا مش هكي يا رقية، لكن قعد يتكلم معاي فوق من نفسه
رقية: نجلاء حبيبتي ابراهيم معاش يبي حد يفتح معاه الموضوع هو بروحه ماصدق يتخطاه.. ماتنسيش انه كان متمسك بيه هلبا وخاطره فيه مايجيش يا قلبي تفكريه كل دقيقة والتانية
هي نزلت راسها وتنهدت: اني لانه واجعني شفتي قداش نسبته اللي جابها حرام يقعد هكي
رقية بجدية: كان تبيه يكمل معاك لوحيها الفكرة هادي من بالك .. يا انتي يا القراية وليك حرية الاختيار
هي خافت: لا خلاص اساسًا توبة مازال نجيب سيرتها
رقية ابتسمت: باهي شن تبي توا؟ نكلمهولك باش تراضيه
نجلاء نقزت على رقية باستها بقوة: تهبلي يا خويلة! كلميه خليه يجي هنايا واني نتصرف
رقية ضحكت: غالي والطلب رخيص
طلعت من الدار باش تجيب تليفونها ونجلاء لحقتها.. على طلعة ليلى من الدار التانية ..وقفت في بابها تصكر فالتليفون بعد كملت جبدت باب الدار وراها ومشت ادور في عمتها.. سمعت اصوات الهدرزة بكري وتوقعت ان واحد من الاحفاد جي
ع تولاية رقية ونجلاء من الكوجينة ورقية ادور في رقم ولد خوها
سلمت ليلى على نجلاء وعيدوا على بعض.. بعدين
ليلى: رورو بشير بيعيد عليا جاي توا للمربوعة.. كان جي جدي يعني
رقية شبحتلها: ولا يهمك.. وكملت بضحكة: اليوم برعاية العشاق
ضحكوا الزوز وليلى مشت بسرعة للمربوعة وهي تساوي فروحها..
بينما رقية فجأة قالت بهمس: فتح فتح.. حطت التليفون ع وذنها وكملت تقول: ايوا ابراهيم شن الجو..
نجلاء لصقت وذنها على التليفون من برا باش تسمع
: مليح شن جوكم انتو..
رقية: مش حلو.. تو معقولة لين نتصل بيك في بدال ماتجي تعيد عليا يا هيما
وغمزت لنجلاء اللي ابتسمت
: والله ماهكي.. تو من هيا اول وحدة قلتلها عندي عطلة بنرقد!
مافقتش الا على صوت التشريينة متاعك عندك علم؟
نجلاء اضايقت.. من يوم نتيجته وبعد مكالمتهم معاش يهدرز هلبا زي قبل ويحكيلها في تفاصيل يومه..
رقية وهي تمسح بيدها على كتف نجلاء لانها حست بيها: وخيتي نجيهولي ربي مايحرمني صوتك..عارفاتك اني غير نبصر
: اصلًا جاي بلا ماتقولي غير ندوش بس
رقية خافت ابراهيم يعطل ويكمل الحاج منصور لفته عالسانية قبل مايتصالح مع نجلاء: غير يا ودي تعالى عيد بعدين الدوش ساهل
: خمسة ونكون عندك
رقية ابتسمت: ماشي
صكرت الخط ونزلت التليفون بعدين شافت لنجلاء: اهو جاي حبيب القلب
نجلاء ابتسمت بسعادة
•🌹•🌹•🌹•🌹•
: ماما بنمشي لمريم تبي شي قبل مانطلع؟!
: لالا بري
طلعت راوية بعد لبست شبشبها وصكرت وراها الباب
قعدت تمشي وهي تمرر في عيونها على السانية ..وماحستش بروحها الا قدام حوش عمها بلقاسم..طقطقت كدا مرة مافتحوش.. استغربت
على صوت التطقطيق كبهت ناديا من البلكونة: راوية كيف حالك.. كل عام وانتي بخير
هي قامت راسها وابتسمت: الحمد لله.. وانتي ومنصور والحلوين بألف خير
ناديا عارفتها شن بتسأل لهذا جاوبت طول: قاعدين قاعدين غير اكيدة ماسمعوش التخبيط.. التفتت على باب البلكونة وراها ونادت: للو..
راوية اشرت بالتليفون في يدها: حتى شرينت على مريومة ماتردش
ناديا: قتلك شكلهم لاهيين.. نزلت عيونها لوطا وقت حست بخطوات رجلين: ماما بري جيبي مفتاحي عارفتيه ولا
لتين هزت راسها
وامها كملت: باهي حبيبتي جيبيه ونزليه لعميمة راوية
لتين شبحت من فتحات البلكونة وابتسمت بعدين ولت داخل جري: حااضر
راوية تشبح فوق: مش لازم اتعبيها الكركوبة على قول نزار.. لوحيهولي من عندك عادي
ضحكت ناديا: اني باعتتهالك خصيصًا باش تخش معاك من بكري مهبلتني بننزل بننزل واني حايسة حتى الباب مافضيت نفتحهولها.. خوديها معاك نشطب ولاحقتكم باش بالمرة نمشي لحوش جدي حتى هما
راوية: تم
ع جية لتين: هيا ماما تعالي افتحي الباب
مشت ناديا وفتحت لبنتها الباب وهي تقول: بالشوية ماما
نزلت لتين تجري وطلعت من دار الدروج لين وصلت في راوية ومدتلها شكة المفاتيح اللي كان من بينهم نسخة من مفتاح حوش بلقاسم: حودي
ضحكت راوية وخداته منها بعدين طبست باستها ووقفت على حيلها مرة تانية.. فرزت المفتاح اللي تبيه ..حطاته في قفل الباب ولفاته مرة وحدة جهة المين انفتح
سبقتها لتين وهي اتبع في صوت الدوشة.. وراوية وخرت كم خطوة وحدفت المفتاح لبلكونة ناديا وهي تقول بصوت عالي: صحيتي ندوش
ردت عليها ناديا بضحكة: مش بيناتنا
خشت راوية لحوش عمها وهي تسمع في اصوات جاية من دار المعيشة
: للو من جابك؟
: شكون فتحلها الباب زعما؟
وفي اصوات تانية عالية هلبا جاية من تلفزيون الصالة
وصلت في دار المعيشة وهي مبتسمة قالت: السلام عليكم..
فالدار خديجة ومها ومريم..
طلقت مريم لتين ووقفت لبنت عمها.. حضنوا بعض وهما مبتسمات وعيدوا
بعدين سلمت على مرت عمها اللي سألتها: تراك خبطتي لين عييتي ولا
راوية بعدت عنها وضحكت وهي ماشية لمها اللي تتعارك مع مخدة تلبس فيها في غلافها: بيديا الزوز
وطقت يدها في يد مها بعدين مشت قعمزت جنب صاحبتها
مريم ولتين في حضنها: ناديا طلعلتك شكلها
هي ردت: يا لولاها هي والكركوبة هادي راني قعدت لغدوة نخبط
مريم: عسل هالناديا عسل ماعمري قابلتني كنة زيها
ابتسمت خديجة
راوية: قلتلها لين شكيت فيكم طالعين
خديجة وهي تصكر فالسوستة متاع الغلاف: وين عندنا بنطلعوا يوم الموسم يا بنيتي.. حركت راسها وكملت: تسمعي فالتلفزيون لينا قريب ساعة هكي
ضحكت راوية: حسها رأيت الحقيقة خلف البصر
كلهم ضحكوا ومريم قالت: عاد جدي اخر مرة صب جام غضبه عليهم معاش قدروا يحضروه غادي
خديجة: عنده حق رجالة هادم ومقعمزين زي الصغار عالرسوم!
راوية بضحكة: لكن حلو مرة جربت نحضر منه حلقة من كثر الانسجام لما تمت وجعني خاطري
ضحكوا البنات وامهم بعدين خديجة قالت: والله الا شكلكم انتو الزوز ناويات حوش جدكم اني مستغربة اللي مقعدكم لتوا شنو
الزوز شبحوا لبعض وابتسموا بعدين رجعوا شافوا لخديجة ومريم قالت: ماهو كنت نعاون فيك والحمد لله كملنا وحتى ويري كان عندها مادير مع مرت عمي
خديجة ضيقت عيونها: نفهم من كلامك انكم ناويات تنوضوا ومتفقات من الصبح؟
ضحكوا
وهي ابتسمت
وقفت راوية ومدت يدها لمريم نهضتها.. والاخيرة قامت معاها الوشاح اللي ملوح ع المندار
مها سيبت اللي في يدها: ماما بنمشي حتى اني من بكري ماطلعتش
خديجة شبحتلها: كملي قبل.. سادك من اللعب كبرتي توا عاونيني حتى شوي بعدها كيفك ديري شن تبي
تأففت مها وقعمزت باحباط
اما لوز وسكر.. طلعوا من الدار وهما يهدرزوا ولتين تمشي في جنبهم وتسمعلهم
فاتوا من قدام الصالة اللي فيها ولاد عمهم من منذر وانزل لوطا قدام التلفزيون..
مريم تساوي فالوشاح ع راسها: جبتي امساكيتك؟
راوية وهي ترقص فحواجبها: يا سلام .. وطلعت طرف الامساكية الملفوفة ع شكل اسطواني من الشنطة الصغيرة اللي لابستها
مريم ابتسمت وخشت لدارها وراوية ولتين وراها..فتحت الدولاب وطلعت الامساكية متاعها حتى هي: ماشفتيش عمتي زمزم اليوم
راوية مقعمزة على طرف السرير: مريومة الصيام قاعد مابداش .. اليوم كله معاك اني خيرك
مريم وقفت ع حيلها: مش قلتي بعتاتك امك بكري لحوش عمي طاهر!.. باهي يا ستي مش زمزومة الولاد ماقابلكش منهم حد
راوية قعدت تذكر ثواني وقالت: لا الحق.. ممكن ايوب لمحته ماشي لحوش جدي ..
مريم: اممم.. باهي هيا نمشوا
وقفت راوية وطلعوا من الدار ولتين شادة في يد عمتها
فجأة قالت: استني استني ..هو اني ماشفتاش لكن بعتلي رسائل يعيد عليا ويتبرد..السي عبيدة سلطان زمانه
مريم بابتسامة قالت: خزي عليك يا ويري
راوية بضحكة: تي نبصر وهوا عارفني قداش نعزه
هني لتين تكلمت: حتى هو يحبك يا ويري
عقدت راوية حواجبها.. هي قالت نعزه والبنت ردت بـ يحبك!
مريم وجهها انصفر « سكتت سنين يا عبيدة وفالاخر تفضحك الشبر ونص هادي»: اكيد يحبها للو ويحبنا كلنا بالاخص انتي يا كلبوزة
وشبحت لبنت عمها
كانت ساكتة.. فكرت شوية بس بعدين طردت كل شي من دماغها
مريم تنحنحت: صار عبيدة وايوب بس
راوية: ايه .. هيا مريومة قبل لجدي يخش للحوش
هي تنفست الصعداء ..هكي معناها راوية ماوقفتش عند كلام لتين
ابتسمت.. وسرعت خطواتها مجاراة لبنت عمها
•🌹•🌹•🌹•🌹•
في المربوعة..
قالت بابتسامة فرح: محلاها يا بشوره معاش بنحيها من يدي شكلي
بشير: مش من قيمتك ورب عيونك يا عسل
ضحكت بخجل وقالت: شن صار في البني
هو ابتسم: بنفوت المرة هادي يا بنت عمي.. تنهد وكمل: بنبدا نجيب العمال بعد الفطور يخدموا ما كتب ربي وبعدها ساهل
هزت ليلى راسها بعدين قالت: باهي في شن خاطرك غدوة .. حاجة معينة عالفطور مثلًا
بشير ربع يديه: والله شن بنقولك.. خاطري في عسل اني بروحه هكي مامعاه شي
هي رقي الدم كله لوجهها وتحشمت: مصح والله وجهك يا بشير!
وتوجهت للباب تفتح فيه وبتطلع
هو بضحكة: خيرك تعفلقتي.. للوشة.. عسلي المصفى تعالي جاي يا بنت
ليلى شافتله: ماهو تزود فيها بكلامك انت
بشير جاها: تي شن قلت اني هما كلمتين درتي منهم راس مال! اللي وصلني من معلومات انكم بنات حواء تحبوا كلام الغزل
ضحكت ليلى: معلوماتك صح لكن في حدود المعقول
بشير ابتسم: بركاتك يا شيخة زمزم كان هدا مانشوفش فالعسل قدامي توا وفوقها يضحكلي..
ليلى ضحكت مرة تانية لكن هالمرة بخجل..
وفجأة سمعوا صوت دقات خفيفة عالروشن..
بشير التفت للروشن ورجع عيونه لليلى: اني بنطلع توا يا عيوني خير مايجي جدي ومعاش يصبح علينا صبح
هي وخرتله وهو فتح الباب.. وين جي بيطلع ابتسملها وقال: كل سنة وانتي مع بشير ان شاء الله
ومشي بسرعة قبل مايخش منصور..
وخلاها مبتسمة وهي تهمس: آمين
بعدين تحركت وخشت داخل
•بينما في الكوجينة..
مصكر بابها الخارجي وهما الزوز واقفين قدام بعض..
نجلاء مذبلة عيونها: هيا يا هيما.. فكنا من الزعل عارفني نيتي شنو
ابراهيم بقيمة حاجب: خرفي يا حليمة! شن دخل النية توا؟! اني قتلك يا نجلاء صكري على امه الموضوع اهوا اعتبريه ماكانش من الاساس وانتي فيك يا وادي..وكمل بتضييقة عيون: لاحظتي ان كل هدرزتنا قعدت عليه؟!
هي نزلت عيونها وسكتت بعدين قالت: باهي اسفة
ابراهيم حط يديه في نصه وزفر: مانبيكش تتأسفي وحطيها في دماغك الحاجة اللي نديرها على خاطرك مانندمش عليها ولو شن كان
نجلاء قامت راسها بابتسامة: كل عام وانت بخير
ضحك ابراهيم: والله لنحبك للوح.. وانتي طيبة نوجه
•خشوا الزوز مع عمتهم من برا..
مريم: حراسات اليوم رورو
رقية قايمة لتين وتبوس فيها: مانحكيلك.. اخر يوم بعدها شهر كامل ممنوع التواصل حتى بالعيون
راوية: منظرك فالفيراندا وانتي تعسي مش عادي..
ضحكت وقالت: شن نقوللهم لا؟! قلبي مايطاوعنيش
مريم شبحت لعمتها: و موضوعك معاش صار فيه جديد
راوية حتى هي شبحتلها
رقية: غير بروا ديروا حاجتكم ونهدرزوا حتى ليلى اكيدة خشت الداخل.. وقفت في مكانها نزلت لتين وقالت وعيونها جهة ممر الكوجينة: هادم شورهم قاعدين يهدرزوا بنمشي نشوفهم
مشت رقية للممر
ومريم وراوية كملوا طريقهم والاخيرة تقول: الكوجينة جاية متركنة لاقيينها عصافير الكناري زي الرحمة
ضحكت مريم ضحكة خفيفة: وكان كبسهم حد يقوللها مديلي ميه
راوية قعدت تقرقر: وووه والله الا رسمي هادي كيف نسيتها
وقفوا قدام دار جدهم.. فتحوا الباب وخشوا وهما مازال يضحكوا
فتحت راوية شنطتها وطلعت الامساكية ومعاها الشريط اللاصق
ومريم كذلك امساكيتها في يدها.. وبدوا الزوز يعلقوا فيهم على باب دار جدهم.. زي عادتهم كل سنة ويطلبوا منه يوم يشوف الاوقات من متاع مريم مرة ومرة من متاع راوية..
مريم تلصق في احد اطراف الامساكية: بيصادف اول يوم مع عيد الفاتح 9/1
راوية: اي.. محلاه الجو الزينة متاع الفاتح واجواء رمضان
مريم كملت متاعتها ووخرت تشوف فيها مايلة او لا: كان نطلعوا نديروا دورة في البلاد غدوة.. ماتتفوتش صراحة
راوية ترد فالشريط اللاصق للشنطة وهي تقول بتفكير: زعما؟! لكن ما اعتقدش نلحقوا
مريم طفت ضي الدار: للأسف.. يلا ان شاء الله يوم تاني مش مشكلة
راوية طقت يدها في يد مريم: وهوا كده
لتين زعميتها كانت ادير معاهم قالت: عادي ترفعوني معاكم؟
مريم شافتلها ودارتلها حركة بوجهها: مانطلعش بلا نيتي كلبوزتي
ابتسمت راوية..
ومشوا التلاتة لدار المعيشة لقوا ليلى توري لعمتها شن جابلها بشير.. ونجلاء داكة راسها معاهم
مريم ابتسمت: شني هادا للوش
راوية جتهم: وسعولي وسعوا.. جو عيونها اول شي ع الحديدة الفضة: تهبل يعطيه دعوة في ذوقه طلع خطير
رقية وليلى الزوز شبحولها بتفنيصة
قعمزت مريم جنب صاحبتها: دعوة خير طبعًا معاش تفنصوا فيها
راوية حضنت مريم..
ليلى قامت حواجبها: اشي اشي!
رقية بضحكة ردت: حتى هما لوز وسكر يا حنة
بعدوا البنات عن بعض ونجلاء قالت وعيونها عالباب متاع الدار اللي يفتح فالصالة: وينه جدي رقية ماخشش..
راوية تمعضت ملامحها وهمست: الله عالبرادة مازال خاطرها
نخصتها مريم بمرفقها وماقدرتش تشد الضحكة
كلهم فهموها بس داروا روحهم ماسمعوا شي.. وهي انحرجت هلبا وقعدت تقرص فراوية بدون ماينتبهوا
رقية: شفته جاي من جهة التوت ماجي في بالي انه مش خاش ..اصلًا خلاص غدوة رمضان على الخير شدوا مصاحفكم وصلاياتكم ماحد ضامن روحه يعيش عام تاني.. وحتى خلوهم يستاحشوكم شوية
مريم قالت بابتسامة: صح
راوية: وانتي باهي مش قلتي بتهدرزي لما نقعمزوا
ليلى: ايه فكرتيني فكرك بالشهادة.. مبكري سمعت بابا قال تلاقى مع سليمان في الجامع ونشده شن صار معاكم
مريم: معناها شوي تانية ويخش علينا
ليلى شبحت لمريم وهزت راسها موافقة لكلامها.. اما رقية بان على وجهها التوتر والحيرة
لين سألتها نجلاء: خالتي شن رايك انتي؟!
رقية مررت عيونها عليهم بعدين قالت: الحق اني صليت استخارة كدا مرة وحسيت روحي ارتحت لكن مازال مشوبة على خاطر جدكم وحناكم
مريم: خيرهم جدي وحناي يا رورو حني كلنا وين مشينا؟!
راوية كملت عليها: ومش تقولي تقنع فيا لكن بالنسبة للقصة هاديا جدو وحنينة في عيوننا مانتوصوش عليهم هادم الحبايب
ليلى: والحمد لله لامنا صور واحد مش حتى بعاد
رقية ابتسمت بحب: ربي يحفظكم يا قليباتي ..امتى كبرتوا بسرعة هكي بس!
ضحكوا كلهم ونجلاء سألت مرة تانية: وشن بتردي عليهم توا رورو
مريم: شن بترد غير باهي باين في عيونها اصلًا
هي سكتت.. وهما فهموا وحضنوها في مرة..
ولتين اللي كانت مستمعة بس ويديها تحت وجهها دارت زيهم لما حضنوها..
: يا عيلة
راوية: عمي طاهر
رقية توترت.. وليلى ردت: هني بابا في الدار
سمعوا صوت خطواته تقرب لين خش عليهم وهو يقول: السلام عليكم..
نجلاء وقفت تسلم على خالها وهو قال: ريت الزبير لكن مانحسابكش جيتي معاه
نجلاء ابتسمت: خاطري نرمضن معاكم العام هادا
الطاهر ببصارة: وسعاد كيف بدير خليتيها بروحها
ليلى ومريم ورقية زرتهم الضحكة.. اما راوية همست لمريم: اللي يسمع.. يحسابها زي خولة عمي يا ناري
ردت عليها بنفس الصوت: اسكتي يا بنتي خيرك
هي سكتت وملامح الضحك باينات على وجهها.. ونجلاء ولت لمكانها بعد ضحكت هديكا الضحكة الصفرة متاع المسايرة..
الطاهر قعمز: ايه شن اموركم..
وقعد يهدرز مع بنات خوه واخته عن قرايتهم اللي حتبدا بعد العيد ومرة مرة يناشب لتين.. لين طلب من رقية يكلمها بروحها.. ناضت معاه وطلعوا من الدار
بعدهم ناضت مريم ومعاها راوية بدير شاهي يعدوا بيه العشية
•🌹•🌹•🌹•🌹•
في حوش الامين..
خشت خولة للدار لقت امها تلمع في شاشة التلفزيون: ماما اني بندوش ونمشي لحوش جدي تبي حاجة؟!
ذهيبة شبحتلها: راجيني حتى اني نطلع معاك ليا يومين ماريتش اللاي وعمي
خولة لفت ومشت تجاه الباب: كملي ووتي روحك على ما حممت ولبست
مشت هي طلعت حوايجها وفوطتها وخشت الحمام.. ربع ساعة ونزلوا حمدي ومفيدة من فوق
خشوا الزوز على ذهيبة وهما يقولوا: السلام عليكم
ذهيبة ابتسمت: وعليكم السلام.. اهلين
حمدي قدملها وعيد عليها بعدين عيدت مفيدة
ذهيبة: قعمزوا خيركم، ولا طالعين؟!
مفيدة: لا اني جاياتك لكن حمدي قال عنده مشوار
حمدي حك وذنه بمفتاح السيارة: بنخطم على حوش جدي الاول وبنطلع كان تبي حاجة يام ولا ناقصاتك حاجة نجيبها معاي
ذهيبة بابتسامة: صحيت وليدي كثر عليك الخير حني ماناقصنا شي شطبنا خلاص
ابتسم حمدي وقال: مالا انستوا بعض..
وطلع من الدار وسط اصواتهم متتالية: في امان الله.. في حفظ الله
مفيدة التفتت لذهيبة: هاتي عليك عمتي نكمل
مدتلها ذهيبة الملمع والفوطة وهي تقول: الله يربحك يا بنتي
ومشت قعمزت ع المندار..
مفيدة بدت تمسح وتلمع في طاولة التلفزيون: خولة في حوش جدي يا عمتي؟!
ذهيبة: لا خشت ادوش قبل غير تطلع بنمشوا حتى حني معاها
على جية كمال من برا وقف في باب الدار: السلام عليكم.. اووو مفيدة هني شن الاخبار
هي ردت بابتسامة: مليحة الحمد لله ..مبارك رمضانك وكل عام وانت بخير
كمال رد بابتسامة: اجمعين يا رب ورمضانك .. حرك راسه وشاف وراه جهة الصالة وممر الديار: شن مالا الاولاد مهناش؟!
ذهيبة: زهير في حوش عمك بلقاسم وحمزة من نهار فتح المحل معاش يقعد فالحوش بكل
مفيدة: ربي يعاونه ويفتح عليه
ذهيبة: آمين يا رب.. الحق اني نخمم بيني وبين روحي بعد العيد نبدا ندورله
كمال ومفيدة تلقائيًا شافوا لبعض وهو قال: يام كيف ادوريله وهوا ماحطش حتى بلكة وحدة على وطى؟!
ذهيبة شافتله: مش قال بعد العيد بنعول عالحوش.. وعلي ماحصلتله بنية تستاهله يكون مداير شوط حتى انك تلقى بنت حلال وبيتية واعر ويبي وقت
مفيدة ماعلقتش تخدم وهي ساكتة.. عارفة سلفها ليه الكلام الاول والاخير
لكن كمال مازال يناقش: لكن حمزة مايحبش من يسيف عليه ويغصوره بالذات حاجة هو مش راضي بيها ولا قال ديروهالي.. وكمل كلامه يقول: مش قالك لما نبي نخطب تو نقولك؟! استنيه يام خير مايتعفلق ويفوت الزواج بكل
ذهيبة خافت يديرها حق: خوك وادرى بيه حتى مني..تنهدت وكملت: خلاص امالا نراجوه على حسابه حني
كمال ابتسم براحة.. وامه قالت موجهة كلامها لكنتها: شن مفيدة ماسمعناش رايك
هي ابتسمت وشبحتلها: والله ياعمتي اني اللي نعرفه نهار سلفي يطرب ويقول نبي هادي نفرحله ونعول في عرسه ونقيمهوله بس
ذهيبة عجبها الكلام وابتسمت.. على خشة خولة بعد جففت شعرها من الميه: فوفو امتى نزلتي؟!
مفيدة بابتسامة: مالياش هلبا
كمال: بنمشي نبدل حوايجي وانتي ديريلي نص دحي من الايدين هادم
وتوجه لداره مخلي اخته تقول: باهي .. وطلعت من جنب امها ومرت خوها وهي تقول: اسبقوني انتم راد الله عليا
•🌹•🌹•🌹•🌹•
في حوش جدهم..
وقتها حناهم كيف خاشة مع عمهم من برا..
خشوا لدار المعيشة لقوا فيها الطاهر ورقية مع البنات
حليمة قعمزت على المندار وحطت تزدانها يسارها: اااه يا عظيماتي
الطاهر عقد حواجبه: تحسي في حاجة يام؟!
حليمة اتكت وهي تفك فالشاربة اللي لابستها: لا يا اميمتي مش وجاع هادا كبر
كلهم باصوات متفاوتة: ربي يطول بعمرك.. ربي يحفظك لينا ويعطيك صحيحتك
حليمة: ان شاء الله.. ان شاء الله
ليلى وقفت: هاتي حنينة نرفع عبايتك للدار
حليمة بدت تفك فالبطم وهي تقول: اي والله تربحي يا بنيتي
حولت العباية ومدتها لحفيدتها هي والشاربة.. ووين جت فايتة من جنب خليفة شفشفلها شعرها عالسريع وهي تضحك وتساوي فيه بيأس من انه يبطل هالعادة: والله عرفتك بديرها
خليفة ضحك بعدين التفت لنجلاء اللي مقعمزة وحاطة رجليها ع بعض: نوضي جيبيلي ميه مصقعة
هي وقفت ونفس الشي لما فاتت من جنبه شفشفلها شعرها ..قعدت تتأفف
رقية بضحكة وصوت مسموع: يا مدقنة مش دارها لليلى قدامك علاش ماطرتيش بسرعة
هي ماردتش وكملت طريقها تتأفف
طاهر وقف ضحك والتفت لامه: اليوم تلاقيت مع سليمان النعاس يام
رقية عرفاته بيفتح الموضوع وجهها تحمرط.. العالم ربي كيف قدرت ترد عليه بروحه بكري وتوا معاه امها وخوها التاني.. من الحشم لين سخنت
حليمة: وشن قالك
الطاهر: سألني على رد رقية
حليمة بروحها تبي تاخد الجواب من رقية لكن مش قدام خوتها عارفتها تتحشم: حتى امه شرينت عالارضي الصبح.. شبحت لرقية وكملت: بيخناها مع الناس يا بنتي قولي جوابك هيا
رقية قعدت تفرك في يديها ببعض
•جت مريم بصفرة الشاهي والسفنز ووراها راوية ولتين.. شافتهم ليلى اللي كانت واقفة جنب باب دار التقعميز وتتصنت ..بعد حطت العباية في الدولاب وجت ماقدرتش تخش قعدت برا تسمع..
قعدت تأشرلهم وتفنص باش يقعدوا في مكانهم ومايقدموش للدار.. هما فهموا..لكن قربوا شوية باش يوصلهم الصوت حتى هما.. واخر شي نجلاء جت بلقامة ميه كبيرة ..التفتتلها راوية وحطت صبعها السبابة على فمها بمعنى اسكتي.. عقدت حواجبها وقدمت باش تسمعهم شن يتصنتوا بالزبط..
•الطاهر شبح لرقية بعدين رجع بعيونه لامه: نشدتها قبلك يام ونقولوا على بركة الله
خليفة قام حواجبه وابتسم: مبارك مبارك
حليمة بفرحة حضنت بنتها: مبروك عليك يا بنيت روحي ان شاء الله عالخير يا ربي
هي كانت قريب تتبخر من الحشم.. اول ماطلقتها امها طلعت من الدار تجري وخليفة يضحك عليها
لاقوها بنات خوتها واختها.. ليلى قدرت تلحقها بعد خشت للدار لكن التانيات لا كونهم واقفات من الجهة التانية ومجبورات يفوتوا من قدام الباب وبهكي حينكشفوا..
اضطروا يخشوا بالصفرة كأنهم مايندروا بشي..
•🌹•🌹•🌹•🌹•
بعد المغرب..
طلعت من حوشهم هي وامها وخواتها الزوز..
هي صكرت الباب وامها تقول لاختها: البسي باهي في رجليك الشبشب متاع خوك معاش نلقاه عندك!
جيداء دارت زي ماقالتلها امها وسيبت شبشب خوها نزار القديم..
نور: خسارة اليوم الحلقة الاخيرة بتفوتنا
كلثوم تمشي شوي شوي: صلاتك اهم.. والحلقة نلحقوا عليها فالاكيد يجيبوا اعادة فالليل لان غدوة رمضان خلاص.. وكملت بعقدة حواجب وهي شاكة في كلامها الاخير: ولا؟!
نور ضحكت عليها بدون ماتلاحظ.. اصلًا وقتها من هوا اللي مايحضرش فالمسلسل الكبار والصغار..
جيداء: تعرفي نور تشبهلك يا نور
هي فرحت وقالت بحبور: حاااق؟!!
غيداء شافت لتوأمها بعدين لنور: لالا ابدًا نويره احلى بوين منها
ردت جيداء عليها: تي لاااا نحكي عالطبايع مسكسكات الزوز
تمعضت ملامح وجه نور وضربت اختها بخفة ع قفاها وهي تقول: ماركك
كلثوم: اختك مش مسكسكة نور هويدية وفي حالها مش كان رقيقة معناها محلولة فم.. حتى الحرافة ماقالش ربي بيها
جيداء مربعة يديها قدام صدرها وتمشي جنب امها وخواتها: ممكن نور هادي مش مسكسكة لكن نور هديكا ماحد يقنعني بالعكس لين ادره الكبد اللي ديره فيها شريفة شوية
ضحكت كلثوم وقالت: فوتوا بسرعة هيا
•في حوش جدهم..
الحاج منصور بعد روح من الجامع جي وقعمز جنب حليمة في دار المعيشة..
والحفيدات عارفات حناهم بتتكلم مع جدهم مرة تانية عن موضوع رقية وولد النعاس لهذا فضلوا يخلوهم براحتهم..
الحاج منصور وعيونه عالتلفزيون المفتوح ع قناة السعودية اللي تبث فأول صلاة تراويح من الحرم: العام الجاي بإذن الله يبدا يجي رسمي في الصيف
حليمة حتى هي تتفرج: ايه .. شبحتله وكملت: قتلك يا حاج رقية صلت وتريحت والموضوع توا في يدك شن نرد على المراة؟!
منصور نزل طاسة الشاهي: انتي شن رايك يا حليمة.. نساوين وادرى ببعضكم بنتك تقدر تتلايم معاهم والا لا
هي ردت: الحاجة قمرة ماشاء الله عليها شن عندي بنقول فيها ساد عشرة عمر وجيران من قديم
هز منصور راسه وقال مضيف لكلامها: ايه والله النعاس راجل طيب وبالنسبة لولده هدرزت عليه امس مايشكي من شي حتى كلامه لوطا لوطا ورازن
حليمة: وانت وين لقيته يا حاج
منصور رشف من الطاسة بعدين قال: بعد صلاة الفجر شفته في الجامع بعدين قتله ولع سيارتك كانك جايبها وبرا بينا لجردينة عندي معاك كلمتين ..ركبنا وتوكلنا على الله
حليمة: معناها نقوللهم باهي
هز منصور راسه بمعنى اي وهو يتفرج على بث الصلاة..
•في دار رقية..
مريم تساوي للتين في شعيراتها: شن ندير غدوة زعما؟!
راوية: طاجين جبن متاعك يجنن
مريم قعمزت على حيلها: خلاص امالا الحاضر يعلم الغايب مش نلقى وحدة مدايراته غدوة
خولة: غير نوضوا وتوا رواحكم ولما نروحوا نوزعوا المهام
ناضوا كلهم.. ومشت كل وحدة لحوشهم
وفي الكوجينة كانت ذهيبة وبهية ورقية يهدرزوا عن خطبتها
•ومع قرب الساعة 9 كانوا عيلة الحاج منصور واتيين وفي طريقهم للجامع الموجود في بداية زنقتهم.. ماعدا كلثوم وحليمة لانهم مايقدروش حيصلوها فالحوش بالراحة..وناديا بسبب صغارها..
الله يبارك كانوا عدد كبير..ومش هما بس الشارع كله معبي ناس متوجهة لنفس وجهتهم..باش يأدوا صلاة التراويح الاولى لهالسنة
النساوين يمشوا قدام ومعاهم الصغيرات.. والصبايا ورا متأخرات بسبب الهدرزة
فريال: بديري مقابلة رورو؟!
رقية شبحتلها: طبعًا! كيف ناخده واني ماعمري شفته ولا نعرف تفكيره كيف
فريال تنخص فيها وتغمز بخبث: ماعمرك شفتيه ولا تبي تشوفيه زين
رقية ضربتها بخفة: مصح وجهك والله حتى كان قبل شفته ناسية ومش مركزة!
نور بتساؤل: امتى تبيه يجي رورو؟!
هي بحيرة ردت: والله ماعارفة تو بوي والولاد يحددوا يوم
ليلى: زعما يديرولك بيان قبل العيد؟!
مريم بتفكير: نحس اي.. مدام هوا ماكملش حوشه ومع استعجالهم واضح يبوا شي رسمي واشهار قبل مايحددوا العرس
البنات اقتنعوا بكلامها..
خولة بضحكة وعيونها على جهة معينة: غير بالله خليكم مع نجلاء وابراهيم ..الهم حتى في الصلاة مش مريحين رواحهم استغفر الله يا ربي
وتصكها فريال ضحكة رنانة.. خلت عمتها وبنات عمامها يتجمدوا من الخوف..
الخوف من حمزة اللي حافظ ضكتها حفظ وطول قربلهم وهاج فيهم بلا مقدمات: صكري فمك انتي وياها في شارع راك!!
هما تصنموا وفريال لين استصفرت.. اما هو كمل بتهديد يقول: يمين بالله نسمع صوت وحدة فيكم ندبحها بلا قبلة.. وكمل بزجر: خفي رجلك وساد من السهوكة مانبيش نخرط عليكم!
ومشي تبعد وهو يغلي عليها غلي وكان يلقى يعرف شكون سمع ضحكتها ويصمله وذانه.. ماقدرش يبعد هلبا وقعد ع مسافة قريبة منهم..
فريال حطت يدها على فمها بالقوة: يعطيني بكشة فيه يعطيني ساكتة تسكتي!
عليا شادة في يدها وتوشوش: تي اسكتي فكينا لا يجي يخلطنا كلنا المرة هادي!
•طارق: حي عليها حي
شرف الدين: يستاهلوا مسح كبدي
بشير: كل دقيقة تفوت ومايعترفلهاش تزيد نسبة الخسائر البشرية في السانية
ضحكوا طارق وشرف الدين
اما هو كان يمشي وجت قدامه رشادة متوسطة.. حدفها برجله طيرها زي الصاروخ فاتت من قدام البنات واستقرت جنبهم على طرف الطريق..
مريم وراوية شادات في بعض ويضحكوا بدون مايحس عليهم حد .. والاخيرة قالت: قريب جت في خليقتي!
مريم: ماتبيها الا فريال دمغة باهية بالك تحس
وكملوا طريقهم للجامع.. البنات يا ناري الهدرزة في رقابيهم وقفت
اخيرًا وصلوا.. الولاد مع عمامهم وجدهم خشوا لمصلى الرجالة والنساوين لمصلى النساء..
تزامن وصولهم مع ارتفاع اذان العشي.. خدوا نساوين عيلة الحاج منصور مكاناتهم .. البنات كانوا يهدرزوا بالشوية وامهاتهم تلاقوا مع الجارات وقعدوا يعيدوا على بعض..
خولة: معاش بنشوف هالمنظر ليوم خمسطاش
رقية ابتسمت: مازال غدوة
«خولة ماتقدرش تمشي للتراويح بحكم انها بنت وحدة ومسؤولة عن حوشهم ..ماعدا الايام اللي يفطروا فيها في حوش جدهم تتعاون مع بنات عمها ومايجيش الكيد عليها بروحها»
فريال تشبح جهة الباب: حماتك جاية رقية
رقية وخولة التفتوا لقوا ياسمين جاية تجاههم بالفعل..
وصلت فيهم وقالت: السلام عليكم.. كل عام وانتم بخير
هما ابتسموا وردوا عليها بتفاوت: وعليكم السلام.. وانتي بخير.. كل سنة وانتي طيبة
قعمزت جنبهم وكملت بابتسامة: كيف الحال
فريال: مليح وفوق الريح.. شن امالا جيتوا بالسيارة؟!
ياسمين: ايه ماهو امي ضروري المشي بالراحة والصلاة ماتراجيش .. وكملت: وحني وراكم يعني مازال مشوار والجامع ابعد علينا
رقية التفتت وقعدت ادور بعيونها لين شافت قمرة مقعمزة وقدامها شيشة اميه وواقفة تصلي في تحية المسجد..
راجتها لين كملت وناضت وهي تقول: نمشي نسلم على خالتي قمرة
وتحركت باتجاهها..
فريال غمزت وتوشوش في ياسمين: كنة بعد هكي فساد ولا.. قايمتلكم القدر قبل حتى ماتوصل فيكم
خولة ضحكت بخفة وياسمين ابتسمت ..والتلاتة يتفرجوا ع رقية بعد سلمت على قمرة كيف قعدوا يهدرزوا .. ومش بس هما التلاتة حتى باقي البنات عيونهم عليها
نجلاء: باين عليها طيبة العزوزة
مريم بابتسامة: تستاهل رورو
•🌹•🌹•🌹•🌹•
في العاصمة المصرية..
شقة في وحدة من البنايات وسط المدينة..
فتحت الشنطة وقعدت اطلع فالحوايج منها باش ترتبهم.. لما كملت وجت بتوقف حست بوخزة في ظهرها وبانت على وجهها ملامح الالم
على خشة بنتها عليها وهي تضحك: كنت نحكي مع ريما قالتلك يا ريتني ما ازوجت
ردت مريم بألم وهي تتحامل على روحها: ربي يحفظلها راجلها من هنا وغادي تسافر هي وياه من غير سو
ديما عقدت حواجبها: ماما كنك.. قربتلها بسرعة: تحسي في حاجة؟!
هي هزت راسها بمعنى لا وقعمزت عالسرير: مافيا بصيرة مغير من كثر ماقمعزت قيسه اظهري وجعني
ديما بقلق: متأكدة؟! بالك نكلم العيال يشيلوك للمستشفى نطمنوا
مريم برفض: قتلك لا يا بنتي كنك..
: حاضر يا جدي يوصل سلامك وحتى انت سلم عاللي عندك
كملت مريم بتحذير بعد سمعت صوت ولدها: ديري بالك تجيبي سيرة قدام باتك وخيينك
ديما وافقت على مضض ومازال في عيونها قلق على امها..
•🌹•🌹•🌹•🌹•
بدوا المصلين يطلعوا من الجامع بعد كملت الصلاة..
ياسمين لبست في رجليها بسرعة وطلعت وهي تنادي: فريال..
هي التفتت وقالت: نعم
ياسمين وصلت فيها ومررت عيونها على باقي البنات اللي وقفوا يستنوا في فريال.. انحرجت وقالت: نبيك 5 دقايق
استغربت.. والبنات فهموا انها تبيها بروحها لكن مايقدروش يمشوا ويخلوها تروح بروحها..
فريال التفتتلهم: اسبقوني
رقية تحشمت شن ماقالت توا بتبان تلز في ياسمين
لكن خولة قربت وهمست في وذن بنت عمها: قوليلها تكلمك عالارضي ولا تتصل بيك بعدين كان عندها رقمك
فريال بتفنيصة: البنت تشبح اطلعوا واني ندبر راسي!
ليلى كانت بعيونها معاهم ولما جت خولة قامت كتافها ونزلتهم بقلة حيلة..
ليلى التفتت للباقي وقالت: فوتوا هي
تحركوا كلهم..
وفريال شافت لياسمين: شن ياسمينة ..وكملت ببصارة: كان حاطة في راسك تقرمي رقية حي عليك نقطعك بسنوني ..حني عكس العمة وبنت خوها المتعارف عليهم في ليبيا
وقعدت تضحك بعدين قالت: حي عليا اني علقت ومعاش خليتلك فرصة معاي.. قوليلي في شن تبيني
ياسمين ضحكت بارتباك وقالت: بنسألك عن ولد عمتك الزبير
فريال ربعت يديها: الزبير؟! خيره
ياسمين ابتسمت: هونا كان معانا في الكلية لحقتله على اخر سنة
فريال حركت يدها: اوهوووه معناها قديم الكلام لان الزبير ليه سنتين اظن متخرج
ياسمين ارتبكت: ايه.. اصلًا هوا ماكانش في نفس قسمي اني تمويل ومصارف والزبير ادارة اعمال
فريال ساكتة وتسمع فيها
وهي كملت: والمدة اللي فاتت سمعت انه حصل افاد وبيطلع برا ..حقا الكلام؟!
فريال قامت كتافها ونزلتهم: مش عارفة يمكن حقا واني مانعلمش لو تبي نسألهولك عادي
ياسمين فنصت: لا شن تسأليه ردي بالك تو يقول هادي خيرها تقصقص عليا! اني غير لاني متلاقية معاه في سنة اولى ومهدرزين هادا علاش لما سمعت انه اسمه طلع في الافادات قلت نستفسر .. وبضحكة كملت: جيت بنسأل اخته هديكا نجوى اسمها ولا؟!
فريال ضحكت: شن نجوى هادي يعطيك السلامة ..نجلاء نجلاء
ياسمين: ايواه نجلاء غير تحشمت البنية ماجتش بيني وبينها هدرزة قبل نشوف فيها في مناسباتكم بس واهو طلعت حتى الاسم مودراته باهي اللي ماكلمتها
ضحكت فريال مرة تانية.. وياسمين قالت بابتسامة: المهم نبيك تسلميلي عليه هلبا لما تشوفيه
فريال رقصت حواجبها: شكله ربي يحبك الزبير مرمضن معانا رسمي السني.. يعني سلامك مسافة الطريق للسانية ويوصله
ياسمين مازال مبتسمة: مش تنسي لكن! السلام امانة
فريال ابتسمت مع غمزة: بإذن الله.. هي توا باي اكيدة البنات حتى وصلوا
ياسمين: سامحيني اخرتك
ردت عليها وهي طالعة من الباب: لا تأخير لا شي..
مشت وخلت ياسمين اطلع في تليفونها باش تشرين على خوها يقرب السيارة لجهة النساوين..
•وبرا سور الجامع..
اول ماطلعت لقاته متكي عالحيط على جهة بعيدة عن النساوين اللي يطلعوا.. حاط السبسي في فمه ويدخن واول ماشافها طلعت نحاه ولوحه لوطا بعدين عفس عليه..
غيرت عيونها وشافت لبعيد.. الطريق معبية ناس ماشاء الله لكن عيلتها مش باينين فالافق.. زبطت ان حمزة قاللهم حيراجيها ويروح بيها
قرب منها وقال: تحركي شن تستني..
فريال مشت وهو في جنبها: شن كنتي اديري داخل بروحك وفوقها مسقدة بنات عمك؟!
فريال «شن يخلصني من لسانك توا»: بنت جيراننا تبيني
حمزة بعقدة حواجب: من بنت جيرانكم؟!!
فريال: تو شن دخلك.. وتداركت كلمتها بضحكة صفرة: نبصر بوحميز راهو ماتاخدهاش بجديات.. اهو نقولك هادا يا ولد عمي العزيز بنت عيت النعاس اللي يسكنوا ورانا بالزبط كانت تسأل فيا على الزبير ..بتقولي علاش اهو جاياتك بالكلام هي قارية معاه وتسأل شن صاير فيه بعد تخرج .. وضربت يديها في بعض: وهادي القصة ومافيها بس بس
حمزة ضحك على طريقتها فالكلام بعدين قال: علاش اديري هكي معاي؟!
هي ردت باستغراب: يا سيدي ربي شن درت! انت بالذات ماينلعبش معاك الغلطة عندك بورطة
حمزة يشبحلها: تبي تهبليني زايد ناقص
فريال شهقت: حشا.. تبي حناي تجر عليا بموس اللحم متاع جدي!
هو تنرفز.. البنت ماتبيش تفهم بالتلميحات.. حتى الكلام المبطن اهو جربه ومالقاش فايدة..
كان حيفصل عليها لكن شاف جده قدامهم بمسافة قريبة والباين انه يهدرز مع واحد من جيرانه وحاليًا ينهي فالحديث..
مشي الشباني والحاج منصور التفت وشافهم، سأل: خيركم مش مع الباقي
حمزة يحاول يتحكم في اعصابه: الهانم كانت تضرب فاللقني!
ومشي كمل قدام
لا جده ولا فريال استغربوا.. كان حيدير هكي مع اي وحدة من بنات عمامه التانيات..
منصور: شورنا بنترافقوا
فريال تعنقت ذراعه وقالت بضحكة: غير من عنده حظي بس
ضحك الحاج منصور.. وكملوا طريقهم للسانية
•🌹•🌹•🌹•🌹•
فات اليوم وتسحروا عيلة الحاج منصور مستقبلين اول ايام الشهر المبارك..
ومن بعد الظهر تخلطت روايح الورد في السانية مع روايح الماكلة اللي بدت تتجهز للفطور..
•خلصت شعرها وقاماته كعكة فوق وشداته كويس بس بطريقة حلوة.. جت للكوجينة وخدت الطاجين اللي موتياته من امس وهي تقول: وين وصال؟!
بهية ردت وهي توتي فالمفروم وتغسل فيه: ادوش
راوية طلعت من الكوجينة: هي سلام مالا
بهية بصوت عالي: اسمعي كان عارفتيها مش ذوق عام ديري حاجك تانية
راوية فتحت باب الحوش: اطمني خديت الطريقة من فريال مجربتها قبلي واللي ذاقوها عجبتهم
وطلعت وتوجهت لحوش جدها
•اما بالنسبة لصاحبتها الوضع كان مشابه..
واقفة على المراية وتشوف لشعرها المجدول ومشدود كويس وتفوح منه ريحة زيت الزهر.. ابتسمت وخدت الملاية لبستها وهي طالعة فاتت من قدام الكوجينة.. فيها خديجة وناديا يهدرزوا ويوتوا فالفطور وعالطاولة مها تقرضلهم فالفلفل
معاذ في الصالة عالتلفزيون عاد الكل مشغول ماحد بيضاقيه ويغير واخد راحته.. وقيس في التركينة راقد
وهي اطلع في شبشبها من الجزامة سمعت صوت فالمربوعة
كبهت وقعدت تضحك بدموعها: هادا شنو؟!
كان منصور مقعمز فيها ومكسد عالتلفزيون ولتين حتى هي مكسدة امها مسقدتها من الكوجينة.. جابت التوكات من دار عماتها وبدت ادير لبوها في نافورات.. وساعدها شعر منصور الناعم والكثيف
منصور ضحك بقلة حيلة: شفتي بالله وين وصل بيا الحال
مريم مسحت دمعة نزلت من عينها وهي تضحك: شن يا للو معاش في الا شعر بابا خلاص
لتين مدت لبوها مراية باش يشوف روحه وردت على مريم: ماهو زي اللي ديرلي فيهم ماما حلوات
منصور حرك راسه يمين يسار وهو يشوف لانعكاسه فيها بعدين اشر على جهة معينة وقال: نسيتي هادي يا بابا معقولة هكي
لتين شهقت وجابت توكة تانية بسرعة: افسة افسة بابا
منصور خدي يدها اللي على كتفه وباسها: عاودي من جديد هي
مريم ابتسمت على منظرهم بعدين منصور سأل: بري لمنذر تأكديلنا منه حي ولا ميت بالك يجي يطير عليا الكساد شوي!
مريم: منذر هادا حاله من يوم خش طب.. يا اما يقرا يا اما راقد صيفًا شتاءًا
منصور: هو يا انه يدلع ومدايره سبلة يا انه خلاص دماغه انضرب وقعد بلهون في جرة القراية
ضحكت وردت: التانية هي الصح.. هي اني نخليك تكمل تسريحتك ضحك هو
وهي تحركت ناحية باب الحوش
•في حوش الامين.. ذهيبة مقعمزة لوطا وقدامها طاولة خشبية وتوتي في عوالة المحشي عليها
وكنتها وبنتها يخدموا عالباقي ويتبادلوا في اطراف الحديث
خولة تقرض فالبطاطا: حتى اني امس مارقدتش لين حضرتها غسلت ماعين السحور وتربعت قدام التلفزيون
ذهيبة: حمدي في الخدمة امالا؟!
مفيدة توتي فالشربة عالنار: ايه يوم بيوم توا
خولة وقفت بصونية متاع البطاطا: احسن هكي
على خشة زهير: اسمعوا ديروا في حسابكم نبي سباقيتي مبكبكة عالفطور مش تنسوا
وطلع..
خولة: خوتي كان ماخالفوش مايبدوش هما.. الناس تفرح في رمضان مفتكة من الماكلة الغليظة الا اني!
مفيدة: كله باجره
ذهيبة: احمدي ربك حمزة ماتكلمش اليوم شن شروط زهير قدام شروطه
هي قالت من القلب: الحمد لله حمدًا كثيرًا طيبًا مباركًا فيه
ضحكوا امها ومرت خوها
•ومن حوش الامين لحوش الطاهر..
كلثوم ماخلوهاش بناتها تخش الكوجينة خايفات عليها قريب تخش السابع ومع تقدم شهور الحمل تزيد عندها الدهشة.. والكوجينة في رمضان تنضغط بزيادة
استغلت فضوتها واستأنفت الختمة اللي بدت فيها بعد الفجر..
راجلها كيف خش بيقيل بعد قري ماتيسر حتى هو.. نزار صلى الظهر ورقد .. اما طارق
: خيرك تقرضي فيها هكي! طايحة على يدك ولا كيف شن الشدة المعوجة هادي!
ليلى وقفت تقطيع: مافهمتش كيف تبيني نقرضها!
طارق يشرح بيديه: هكي يقرضوا الناس مش شادتها بالجنب تحسابي روحك شادة قلم وكراسة!
التفت لنور لقاها تغسل فالدجاج: كديه باهي مش يقعد بزفرته عارفتيني مانتحملش
نور تأففت: امتى عمرك شميته مزفر في حوشنا؟!
طارق يمرر في عيونه بين خواته وشن يديروا: مرات صايمات تبدوا تلبزوا وديروا كيف مايجي
جيداء اطلع فالخلاط من الدولاب بتضرب العصير: طارق يحسابكم خشيتوا امس للاسلام.. وشبحتله بضحكة: مش اول مرة يصيموا راهو
وتجيها ضربة على ظهرها لين قعدت تكح
وخواتها يضحكوا ..على طارق طبعًا
نور همست لليلى: البنت اهيا ديما كلمتها على راس لسانها
ليلى عالهزاز..
طارق بحدة: يا شيخة الصيام حتى عن طولة اللسان راهو!
جيداء: وعن طولة اليد
غيداء قامت حواجبها: اوووو
هو وخر وشبحلها بطرف عينه وقال: مش هكي يديروا راه مش هكي
الاربعة بصوت واحد: طارق اطلع!
•ومن اخر السانية لاولها وين مافي حوش صبري..
فريال عاصبة التستمال على راسها واطيب بكل حيوية ما كأنهاش صايمة زي الباقي: علياااا.. علولتي.. علايش
وسيلة بضحكة: اضرب
شوي وجت عليا وصوتها المتذمر سابقها: ها ها! مش تفاهمنا عليا الحوش علاش تعذبوا فيا هكي! مرة تانية تبوني تعالولي غادي كان بنقعد هنايا بنفطر عارفة روحي
وسيلة قامت حاجبها: ماصام غير زويلك ماهو! يلا بلاش دلع امشي ضمي الحوش نبيه يلمع لمع
طلعت عليا وهي تخبط فالارض برجليها..
فريال حطت يدها في نصها وقعدت تهز: نستني حتى في شن نبيها الدعوة.. قامت واحد من حواجبها وقعدت تفكر وهي تحرك في حدقات عيونها: امممم ..لا اله الا الله.. لا اله الا الله.. شن كنت نبيها ادير يا ربي..
ع خشة ابراهيم: قاللكم بوي وين الكاتشافيتي
فريال نقزت في مكانها بقهر: تي علاااااش كانت على راس لساني!! ابراهيم بملل: صوتك يا فريال راسي
هي التفتت للي دير فيه: بروا والله لدرهوا الكبد حسستوني ابصر شن صاير فيكم!! المشكلة رمضان يجي ببركته وماتحسش بيه لكن انتم مافهمتش خيركم تسكروا من زبيبة!
ابراهيم يكلم فأمه: شن يام حتى انتي مش عارفتها وين؟!
وسيلة بتنهيدة: برا هونا تلقاها في درج المدخل
طلع ابراهيم ووسيلة قالت: افتحيلنا قرآن في الراديو
•بالنسبة لحوش الحاج منصور..
خليفة متمدد تحت المكيف في المربوعة في سابع حلم والزبير مع بوه فالخدمة..حليمة كملت قراية قرآن وقعمزت ع التلفزيون تتفرج على الحرم وهي مرة تسبح مرة تستغفر مرة تصلي على النبي.. والانسة نجلاء اللي راقدة بعد الفجر في بعد لتوا ماناضتش..
راجلها الحاج منصور مقعمز برا على طاولة السعف.. داير نظاراته على عيونه وفاتح مصحفه.. عادةً لما يبي يقرا القرآن لازم يقعمز برا يرتاح ويخشع
وفي كوجينة حوشه بنته مع حفيداته الاثنين الاحب لقلبه..
راوية حطت الطاجين على الرخامة وفتحت الثلاجة بطلع مكونات الكيكة الباردة اللي ناوية ديرها على الفطور وبتبدا بيها باش تحطها في الفريز وتفتك منها
اما مريم..كيف بتحول ملايتها وقفتها رقية اللي كانت حاطة راسها في سلة الخضرة وفي يدها تلات حبات بصل: مريومة يا قلبي بري جري جري جيبيلي راسين بصل من عمتك زمزم.. مشت بسرعة للدولاب طلعت صونية بلاستك وهي تقول: تؤ كيف نسيت ماكتبتاشي في القائمة!
مريم خداته منها وقالت: حاضر
رقية: حضرلك الخير
طلعت مريم .. وراوية بخبث قالت: انتي تنسي حاجة يا رورو! .. تنهدت بتصنع وكملت: اللي واخد عقلك هالعام يتهنى بيه
رقية ضحكت: الهي في كيكتك يا كيكة انتي الهي
•🌹•🌹•🌹•🌹•
في حوش العم حسين..
لقت مريم باب الحوش مردود، خشت بعد طقت تلات مرات
:شيط الله ريقكم باهي! خودوا الدعي في هالرمضان!
مريم ضحكت وكملت طريقها للكوجينة
خشت وهي تقول: السلام عليكم مرت عمي
زمزم التفتت: وعليكم السلام مرومة
مريم حطت الصونية ع الرخامة: خيرك شن في
زمزم: هادم ولادي يا حنة! اللي نقوله برا ادعس جيبلي طماطم حكة من دكان الحاج صالحين راس الشارع يقولي ماعنديش جهد! لكن خليهم ..خليهم يتوسدوا المخاد تو ينفعوهم!
مريم بضحكة: ولا يهمك تو نجيبلك اني بوي امس جاب سبيزة رمضان كاملة وجابلنا زوز صناديق طماطم
زمزم: حتى عمك جاب لكن شوره انذهبت شيرته ونسي الطماطم.. حطت اللي في يدها وقالت: هيييه! سامحيني يا مرومة نسيت حتى نسألك علاش جيتي
مريم بابتسامة: لالا عادي.. رقية تبي راسين بصل نقص عليها
زمزم رجعت تقرض فاللحم وهي تأشر ع السلة بعيونها: اهي السلة خودي خمسة بالاحتياط
مريم ابتسمت ومشت بصونيتها للسلة
زمزم: ريتيهم بالله مافيش واحد تحشم على خليقته وقال انوض حتى على خاطر رقبة امي اللي انبحت! بعدين يجيني بوهم وين الفطور وخيره عطل من كثر العينة هادا علاش!
مريم خدت شن تبي ووقفت على حيلها وهي تقول: تو نقول لراوية تجي تساعدك منها تكملوا بسرعة وتجوا غادي بكري
زمزم التفتتلها: اديري فيا صورة معروف يا مرومة .. وراك تنسي تبعتي معاها الطماطم الله يربحك
هي ردت بابتسامة وهي طالعة: حاااااضر
زمزم اتمتم: هادا حال اللي ماعندهاش بنية! اه يا مرارتي وخلاص!
عشرة دقايق وجتها راوية.. جايبة طاجينها والحاجات اللي بدير بيهم كيكتها والاهم حكتين الطماطم: السلام عليكم.. شن الجو اليوم زمزومة
زمزم: شوفت عينك ماتنشديش بكل على جوي
ضحكت راوية وخدت الفتاحة فتحت وحدة من حكاك الطماطم: هاتي شن بديري نحطهولك
زمزم قعدت توري فيها شن ادير.. وراوية تلقط من اول مرة وقعدت حتى بدون ماتوجهها تلقائيًا تفهم.. خف توتر زمزم وارتخت عن بكري وهي تشوف في راوية كيف تتحرك بخفة وتكمل في كل شي بسرعة
راوية تمسح فالرخامة من بقايا الحوسة: الولاد كلهم راقدين؟!
زمزم ردت: زي عادك بيهم كل عام خايف يكبروا
راوية: وعمي وين ماقابلنيش في حوش جدي
هي التفتت للباب لما حست بحركة: عمره طويل
حسين: المرة هادي راوية عندك
راوية ابتسمت لعمها: كيف حالك عمي رمضانك مبروك ان شاء الله
حسين ردلها الابتسامة: ورمضانك بنيتي .. جبد كرسي وقعمز وهو يقول: هاه شن دارت معاك البلغارية يا زمزم
زمزم بابتسامة: الله يفتح عليها شبه كله داراته ..معاي يد بيد .. اشرت بصبعها على صونية: الشيش بروحها كله .. طفت الغاز تحت طنجرة الزيت وكملت: وهادي اخر قلية شوف يا حسونه بالله كيف التلبيسة كلها شكل واحد
حسين ابتسم: الله يبارك الله يبارك واكيد البنة خير وخير
انحرجت راوية من مدحهم وقالت: حتى انتي درتيه معاي شوفي لونه كيف جي زي الذهب ومش محروق
زمزم: لا يا ويري القلي حتى تغريد نجيبها اتكمه مافيش اسهل منه
حسين وقف وقال: شوفي وجهها كيف ولى خلاص خلاص مش مليح ومانيش واكل منه بعدين
ضحكوا كلهم..وحسين قال: هي اني بنمشي لامي تبوا شي؟!
زمزم سيبت اللي في يدها وجاته: حقا تعالى جاي راك ناسي الطماطم يا باشا اليوم لولا مرومة وراوية راني قعدت نصفق في يدياتي!
حسين: اييييه راح من بالي بكل واني نقول شن ناسي
وهي كملت بعتاب: حتى ولادك ماقصروش ضبحت لين طاح سعدي ولا واحد رق قلبه وناضلي
راوية: معاش تخممي مادام وصل الموضوع لعمي حسين يشدوا رواحهم بس
ضحك وطلع وهو يعاود في كلمته: ماتبوا شي؟!
ردت زمزم: سلامتك
بعدين التفتت لراوية وكملت بعد شدت ذقنها بيدها: شن مازاللنا توا؟!
راوية مررت عيونها على الرخامة والغاز: تشطيبات بس انتي بري كان بديري حاجة تانية ولا بتقري قرآن واني نبدا في الكيكة
زمزم بعتتلها بوسة في الهوا: نجيها الغزالة.. خلاص نمشي ننشر حوايج الولاد ع الحبل مش معطلة
راوية: على حسابك زمزومة
بدت راوية ادير في كيكتها حطت طبقة البشكوط بعد غطستها فالنسكافيه والميه بعدين حطت طبقة الكريمة .. وفوقها البشكوط بعده طبقة حليب محلى اضافة من عندها.. واخير شي بعد البشكوط تاني الشكلاطة.. سخنتها في حمام مائي بعدين بدت تحط فيها من فوق
: يام وين الشياتة؟!
ووقف في مكانه لما شافها.. طريقة رفعة شعرها ومنظرها وهي سارحة في خدمتها حلو هلبا.. تفاجأ بوجودها قبل اكثر شي في رمضان يجوا فريال او ليلى يساعدوا امه ..السنة هادي الكل عارف ان ليلى معاش حتقدر تجي وفريال لو كانت جت راهو دوشتها قلبت الدنيا لهذا هو ماتوقع وجود حد غير امه وقعد يتمشى فالحوش بالكانتيرا وشرط التوتة.. وحوالين رقبته الفوطة واضح كيف طالع من الحمام
منظره هادا صدم راوية وانحرجت لدرجة وجهها انحمر وطول غيرت عيونها عنه.. حتى هو تحشم وطول طلع تلاقى مع امه جاية: هييييه ان شاء الله خشيت عالبنت بالمنظر اهوا!!
عبيدة: تي وين نعلم عليها اني يما! ..وكمل بعد مرر يده في شعره باحراج: راك وقضتي النم!
هي قامت حواجبها بهزوة: وين لقيتكم اني باش نوقضكم يا فالح اه! لكن حساباتكم عند بوكم يا ويلكم منه
ومشت عنه وخلاته.. نفخ بملل ومشي لداره لبس تيشرته الملوح ع حافة السرير.. وقف عالزيانة وجي بياخد الشياتة تفكر انه مشي يدور فيها اصلًا.. تأفف بعدها استغفر وبعثر شعره كيف مايجي
طلع من الدار واذكر منظر راوية بعد تحشمت منه.. حرك راسه باش يطرد صورتها من باله وهو يقول في سره «انّي صائم.. انّي صائم»
كان ناوي يدير عليهم طلة فالكوجينة بس غير رايه.. لاحظ ان مشاعره مع مرور الوقت بدت تبان عليه ومعاش قدر يسيطر على نفسه ..خاف تكشفه قبل ليصارحها ..واستقر في الاخير ان يطلع يتمشى فالسانية ويشوف واحد من الولاد لعل وعسى نايضين
•🌹•🌹•🌹•🌹•
اذن المغرب وفطروا الصايمين..
حوش الحاج منصور كان عامر بحس اولاده واحفاده.. التموا الرجالة في المربوعة والشباب مدايرين جوهم فالفيراندا اما النساوين تقسموا بين الدار والصالة..
الاجواء كانت دافية.. اصوات الضحك والهدرزة وطقات الكواشيك عالصواني وهات هادي ومدلي من هديكا يبعثوا في الراحة في قلب الحاج منصور.. لمتهم حواليه عنده بالدنيا
هو وخر: ان شاء الله من عام لعام
اولاده باصوات متتالية: امين.. ان شاء الله.. بوجودك فوق روسنا
وقف الحاج منصور باش يغسل يديه.. واول ماكمل طلع باش يأم بيهم الصلاة..
تقدمهم في اول المربوعة وكلهم وراه.. كبر وبدا فالصلاة ..كمل الفاتحة وأمّن وكلهم أمّنوا وراه..
وقتها رقية كانت تنزل فالصفر من الفيراندا هي ومريم ونجلاء وراوية كون الباقي قاعدين يصلوا .. لما فاتت من جنب المربوعة سمعت تأمينتهم واصواتهم اللي اتحدت عالكلمة هادي.. ابتسمت وفي سرها دعت ربي يحفظهم كلهم..
•بعد ماصلى الكل رجال ونساء.. بدوا الصبايا في الكابوس المتمثل على هيئة حاجة اسمها ماعين
مريم تفضي فالصواني: فيسع دورة ويذن العشي راهو الوقت بدي صيف معاش زي زمان
ليلى قربتلها: صار باعتة ويري لحوش عمي حسين
هي ابتسمت ويتوشويش: نبيها تزيد توطد العلاقات مع زمزومة هي راس المال عاد
ليلى: ووه عليا مفلحك انتي ومقواك
مريم فنصت ومازال تهمس وعيونها على راوية: اسكتي تو تنتبه.. بعتالي شن هوا اللي درته حرام عليك ماترفعينيش الشايدة بلا فايدة!
رقية: نونا هاتي الطواسي جنبك
نور مدتهملها..
رقية شبحت لفريال: فريالو الصفر بسرعة اطليهم وهاتي نمصمص
سيبت فريال اللي في يدها وقالت: في خاطري يا ناس يندارلي دلع زي هالبشر اني الوحيدة في المعمورة اسمها مايتدلعش!
مفيدة ترد فالعصاير فالثلاجة: ندلعوا فيك شن ماندلعوش مش نقولولك فريالو
هي التفتت على بنت عمها: فريالو! مسمية الواو متاع قطع الملام هادي تدليعة!
ضحكوا البنات
ونور فكرت شوي بعدين قالت: شن رايك في فوفو
فريال: صحيتي على المشاركة يا عيوني لكن للأسف مفيدة سبقتني عليه
خولة: فيرو!
هي نطت: هادا بالذات لا! زمان قري معاي فرخ سحنون اسمه فاروق نتفكر امه ديما تجي وماتقوله كان فيرو اعي.. الحمد لله قعد معانا عام وحول كان هدا راه نحيت مرارتي من جرته
البنات ضحكوا تاني
اما هي سيبت اللي في يدها وقالت: مالا والله مامحركة حاجة لين ادبرولي في اسم دلع في التو والساعة
هما يحسابوها تبصر زي عادتها
رقية رجعت تمصمص فالصفر: مديلي اللي بعدها
فريال باصرار: حلفت اني وانتم تصرفوا الموضوع عندكم
خولة مررت عيونها على بنات عمها بعدم تصديق: تدوي جديات هادي ولا شني؟!
راوية: شكلها
عليا: غير هيا بلاش جو زايد ورانا تراويح تبي من يصليها
فريال عطت الرخامة بظهرها وقالت بكل برود: قدامه اللي بيدير اما اني عارفين البطمة اللي تولعني ايواااه
: فراولة
كلهم التفتوا لباب الكوجينة متاع الجنان.. شافوا حمزة خاش وفي يده مالقي فاضي جاي بيعبيه.. سمع الجزء الاخير من كلامهم
مريم ابتسمت لكن حبت تسأل بلعاني: شن قلت حمزة؟!
هو قدم وحط المالقي على الرخامة وعيونه في عيون فريال وبس: مش قالت دلعوني دلعتها ..من اليوم معاش حد يناديها الا فراولة
راوية ابتسمت وجت جنب مريم تهمس: الله محلاهم.. يطلع منه حمزة
مريم بابتسامة: حبيت حبيت
وفريال اخيرًا بدر منها ردة فعل.. ضحكت بالصوت وعيونها لمعت ..لمعة خلت قلبه حمزة يهبل من فرحته لانه هو السبب فيها..
قالت بصوت كله فرح: واخيرًا جي من يحققلي احلامي اخيرًا.. حليلي وخلاص والله الا تهبل انت ومافيش منك زوز!
خولة رقصت حواجبها وهمست: الوي!
وحي على قلب حمزة شن صار فيه بعد قالت كلامها..سرعة دقاته قريب توازي سرعة الضوء..
مسح على وجهه وقال وهو بيطلع: الدلع وحصلتيه.. تنحنح وكمل: عبوا المالقي تو يجي معاذ يرفعه
طلع لانه معاش قدر يقعد اكثر من هكي..
واول ما ادرق..
رقية: فراولة يا فراولة
ليلى بضحكة خبيثة: يا حليلي من الفراولة اني
راوية: نبي منها قاااابية..
رقية بضحكة ضربت فريال بكتفها: شن الدلع المقوم اللي حصلتيه هادا اه
مفيدة: لا ومن مني فوقها من حمزة
خولة: بحبحي يا بنت عمي حتى اني اخته ماطلتها منه
فريال توترت من كلامهم.. ولاول مرة تتأثر في وجوده لسبب تاني غير الخوف لكن فرحتها بالدلع متاعها نستها: حولوا هكي راهو قريب نرقص اني.. ولا نقوللكم والله لنرقصها!
مريم بضحكة: الحلفان بالشبردق بسلامتك
قعدت فريال تحرك في كتافها وتضحك وهما يضحكوا عليها.. والصابون عبى الدنيا
عليا تعبي فالمالقي وتضحك: اشرتعت الفراولة
ع خشة نجلاء كانت تحضر في مسلسل ينعرض بعد الفطور على طول.. لما شافت منظرهم والدنيا المفرعسة قالت باستغراب شديد: قالتلكم خالتي بهية كملوا بسرعة وقت عالصلاة.. بعدين كملت: حقا خيركم انتوا وشن قصة الفراولة شكون جابها؟!
نور جبدتها من يدها بضحكة: تعالي نحكيلك تعالي
•🌹•🌹•🌹•🌹•
في الصالة..
حليمة مقعمزة وحواليها الكناين يهدرزوا..
خديجة: على كلام بلقاسم الدوة الرسمية بعد المقابلة وهادا الصح مرات مايتفاهموش نكونوا عالبر وماتصيرش الاحراجات بالذات وحني جيران
حليمة: اني ماعندي مانزيد على كلام خديج نفس الكلام قاله عمكم كان هناك حاجة بتصير بعد يشوفها وتشوفه
وسيلة: هكي خير على قولة خديجة نفتكوا من الاحراجات مع الناس
ذهيبة كانت مقعمزة وتشبح لخديجة برفعة حاجب..
بهية: باهي امتى المقابلة يا عمتي ولا ماقررتوش
حليمة شبحتلها: والله يا بنيتي مفروض اخر الحفظة هادي ..اشبح
كلثوم بابتسامة: ربي يجيبلها اللي فيها الخيرة
كلهم: آمين..
•🌹•🌹•🌹•🌹•
بعد مرور تلاتة ايام ..يوم الخميس..
طول هالايام كانت فريال فرحانة بدلعها واللي يناديها بغيره يا ويله.. وحمزة عاجبه هلبا كيف الاسم اللي سماهولها هوا قعد مهم عندها💖
ومن غير هكي ماكانش في شي يذكر صار..
بما ان اليوم خميس..الاحفاد التموا في حوش جدهم زي مايديروا عند نهاية كل اسبوع وهادي عادة ماتتغيرش في قانونهم حتى في رمضان بل بالعكس تحلى فيه اكثر واكثر..
والخميس هادا كان غير شوية باعتبار الصبح الحاج منصور بلغ بنته ان المقابلة حتكون الليلة بعد التراويح.. يومتها فاطرين عندهم عيلة بلقاسم وعيلة صبري وسعاد
•خشت للكوجينة وهي تفرك في يديها ببعض وتمرر في عيونها ع الصفرة متاع القهوة بتوتر
مريم: زيدي شوي للفنجان التاني
فريال دارت زي ماقالتلها بعدين قالت: خلاص ولا
جتها راوية: اصبري لحظة
وعاودت ترتيب الحلو فالصونية بطريقة احلى: تمام هكي
سعاد زادت تأكدت من الصفرة وهزت راسها برضا
انفتح باب الكوجينة وكان الزبير: شن القهوة واتية؟!
فريال شافتله: ايه
هو رد: هيا رقية
قامت مريم الصفرة ومدتها لعمتها لما حستها متوترة..
خدتها منها وطلعت مع ولد اختها من الباب الداخلي.. كان علي يستنى فيهم فالممر خصيصًا باش يقول: الله عليها رورو كبرت وبدت عروسة يا حليلي اني
هي زادت توترت والزبير دفه وهو يقول بضحكة: برا يا راجل متفهك!
هو ضحك ومشي.. والزبير كمل مع خالته ..وين وصلوا باب المربوعة الدخلاني جي الزبير بيطق لكن سبقه خليفة بفتحة الباب
كان ناوي يستعجلهم: هي خشي
هي خدت نفس وزفراته وسمت بالله وخشت.. ولحقها خوها بعد صكر الباب وراه

يتبع...
«لو عجباتك الحلقة اضغطي على النجمة واعطيني رايك🤍»