«من لما بديت نعرف واني عايشة فيها.. كلنا عايشين فيها
مع بعض ..ديما ضحك ومقالب وسهريات ..ماتوقعتش ولا تخيلت في يوم يصير فينا اللي صار.. اللي يشوفنا وقتها مستحيل يصدق شن يراجي فـ كل واحد فينا.. ممكن لو جي حد زمان وقالي بيصير فيكم هكي وهكي كنت لزيته وا...
#سانية_جدي🌹 #الفصل_الثاني «شطرٌ من القلب» #الحلقة_الحادية_والعشرون __________________________ : شن تقولي انتي؟!! مريم وهي تمسح في دموعها ويعاودوا ينزلوا: حني قدام العلوم تعالى بسرعة تربح.. : باهي صكري صكري.. نزلت التليفون وتلفتت ورا: شرف الدين جاي توا.. راوية بالله عليك خلاص هي عيونها ع عبيدة وبس: يا ريتني سمعت كلامك وخبرت مالاول يا ريتني يا مريم يا ريتني.. وانهدت تبكي وشعور الذنب يمزق في قلبها.. ليلى وهي تهدي فيها: خلاص شوفي الامن شدوه .. مريم شبحت لليلى بعدين قالت بخوف: ماجاش اسعاف ولا حاجة؟!! ليلى هزت راسها ودموعها تنزل من المنظر.. الولاد يقيموا فيه وهوا يديه الزوز ع جنبه والموس مزال مرشوق فيه.. اما التاني.. قاموه الامن ع تركينة راوية لما شافت بركة الدم في مكانه رعشت مع بعضها: حي عليا صفاله دمه.. يعطيه مايقربعه ان شاء الله ربي مايغيب عليه بلي.. مريم التفتت تشوف.. فيسع مارجعت غمضت عيونها.. ليلى تمسح في دموعها: شرف الدين جي.. توجهت انظارهم الزوز للي جاي من بعيد.. هو لما ماشاف التجمع قربله.. اول من شاف كان الولد اللي اضارب مع عبيدة..حالته حالة ووجهه كله مستزرق.. زاد قدم ويشوف خوه بهداكا المنظر.. جاه يجري: عبيدة! نوض معاي نرفعك للمستشفى نوض ..حي على امه الكلب! : الاسعاف في الطريق يا خوي.. شرف الدين شاف للي تكلم بعصبية: بنستنى لين دمه يكمل.. بالله زيد عليا غادي! ورجع لخوه جي بينوضه.. :باش مرة تانية تفكر باهي قبل لتمد مكسورتك على احمد الـ***** عبيدة رد بعصبية وهو داهش: قسمًا بالله يا كلب كلمة زايدة مانبدا جايبها الا بعمرك! واحد من الامن: بتسكتوا ولا شني انتم! شرف الدين معاش شبح قدامه لما تأكد ان العركة كانت بينه هو وعبيدة.. ناضله شده من حوايجه: تعالى جاي يا فرخ الربي تعالى! قبل مايضربه فكوهم الامن: هووووه انت وياه! شرف الدين يتحزز عليه وهو يقول بانفعال وغضب: تي ماتشبحش فيه شن داير؟!! خلص روحه منهم ومشاله يجري عطاه روسية: هادي باش تتعلم تبدا راجل! وخر ع وراه وهو دايخ ويديه ع راسه.. ع جية صحاب شرف الدين.. اللي كانوا جنبه لما كلماته مريم.. ماعرفوش خيره مشي هكي لكن ولعوا سيارتهم ولحقوه.. جوا زوز منهم شدوه وهو مزال يتكلم ويسب.. وعبيدة رغم الحالة اللي هو فيها والدنيا من جنبه.. لكن عاجبه اللي داره شرف الدين.. كان بوده يقتله مش يضربه وبس.. •مريم بقلق: مزال نيتهم في عراك وعبيدة ملوح! ورجعت تتصل بشرف الدين اللي مش لاهي بيها.. ليلى: اكيدة كلموا الاسعاف مستحيل بيخلوه هكي.. راوية تبكي: الله يكسر يديه ..حي عليا عبيدة بيموت بسببي.. مريم: قولي لا اله الا الله راوية معاش تفاولي بإذن الله بسيطة.. راوية وهي تتنقل بعيونها بيناتهم: علاش تبكي انتي وياها مالا اه!! وشرف الدين بدال مايسعف خوه لاهي بالجيفة هداكا! وقعدت تحاول تنزل الروشن بس المقبض مايتحركش لان عبيدة مصكر السيارة قبل لينزل.. زادت تبكي وعيونها عليه.. مريم معاش قدرت تشوف.. اما ليلى كانت تبكي عالصامت وتحاول تشرين ع بوها جو عيون عبيدة ع راوية اللي تبكي بهستيريا وهي تشوف فيه عايم بدمه.. :هات الفاشة جاي..قيم يدك يا خوي نحطهالك بمجرد نحى يده من مكان الاصابة قعد الدم زي الشيشمة بالرغم من وجود الموس.. الالم زاد ومكان الاصابة قعد ينمل بطريقة غريبة تعكرش وجهه..والولد حط الفاشة طول لعل وعسى تتحكم فالنزيف شوي اما راوية.. معاش تحملت التفتت ع ليلى حضنتها وقعدت تبكي بالصوت..وليلى تمسح ع ظهرها وتهدي فيها •شرف الدين: ورب العباد ماك بارد بيها ..تي اطلق امي النم اطلق! صاحبه: مش وقته يا شرف الدين وخوك دمه نزح.. الاولى تشبحله هوا يا راجل خيرك! كأنه كان مغيب واستاقض، فك يديه بقوة من صاحبه.. بعدين مشي لخوه لقي وجهه اصفر خاف: عبيدة.. تسمع فيا عبيدة.. رد بالك تصيخ خليك معاي لين نمشوا للمستشفى.. التفت ع الموجودين وهو يصيح بأعلى صوته: تي وين جد امها الاسعاف وين!! : قالوا جايين يا خوي والله ماني من تو نتصل.. هو وقف بعصبية: جاي بسيارتك وائل ولا؟! قيمه معاي اني مش مستني حد! عبيدة خلاص من كثر النزيف بدي راسه يدور.. جبد خوه من سوريته قربه ليه وقال بصوت هامس تعب: برا روح بالبناويت.. شرف الدين مسح ع وجهه: اسكت توا بس.. عبيدة: دير زي ماقلتلك اني اموري هانية.. برا بس شافله شرف الدين شوية..بعدين وقف وهو يقول: ارفعوه.. طاق فالحوش وجاي : ماتخممش.. مشي شرف الدين وهو يدور فالسيارة بعيونه.. ماطولش هلبا ع مالقاها لانها قدام الرصيف.. في ركبته هو ..وصلت سيارات الشرطة اللي استدعاهم امن الجامعة كون القصة قعد فيها سلاح مش ضرب عادي.. ومن الجهة التانية سيارة الاسعاف.. عبيدة فقد الوعي.. وقعد يسمع في سارينات الشرطة تبعد شوي شوي تحرك شرف الدين بالسيارة وهو يسب ويلعن.. بعدين التفت ع مريم جنبه: علاش تعارك معاه؟!! هي معاش عرفت ماتقول.. لو خبراته بالسبب الحقيقي احتمال كبير يدرس وينزل يكمل عقابه وتكبر القصة.. انقذتها ليلى لما ردت ع بوها اللي عاودلها بعد شاف مكالماتها: ايوا ليلى تبي حاجة يا بنتي؟!.. شن البكي اللي بجنبك هادا؟! انتي وين ليلى؟!! •🌹•🌹•🌹•🌹• خش من برا..لقاها تستنى فيه في الجنان قدملها وهو يقول: واتية؟! ثريا شادة شنطتها: اها من بدري نرجى فيك.. يحيى مشي وهي وراه يقول: معليش انشغلنا شوي اليوم ثريا باهتمام سألت: ان شاء الله خير حبيبي.. يحيى: لا خير شغل زي ديما.. مغير انتي عارفة باتي يريد كل حاجة تمشي بجوه ثريا تنهدت تنهيدة مصطنعة: اصله دقيق واجد هضا طبعه.. يحيى ركب السيارة.. وهي لفت من الجهة التانية باش تركب جنبه اول ماصكرت الباب تحرك وهو يقول: تحسيه يدور في رؤوف هي هادا اللي كانت تبي تحبده منها ..قالت بتساؤل: كيف؟! يحيى وهو يسوق: مش عاجبه كيف نشتغل قاعدة واضحة في وجهه يبرم وخلاص يمشي يمشي ويجي شوري.. بعدها حكاها لينا هك ثريا: عليك حق حتى انت، مسيبله الساحة فاضية وعمي مالقاش مفيته هو يشيل شغله وشغل جده اخرى.. يحيى مسح ع لحيته وبادي يحس في شعور مزعج تجاه خوه: شن يدير بيش قاعدين منعميين عنه هكي.. عليش شن زاد ربي فيه.. ثريا: فاطن.. وانت يانويرتي نية طيب لين مفسد.. يحيى سكت وهو يشبح للطريق قدامه.. اما ثريا اللي نفذت تعليمات سلفتها ع اتم وجه.. قررت اول ماتوصل حوش ماليها تتصل وتحكيلها المستجدات.. •🌹•🌹•🌹•🌹• درست الباص قدام بوابة السانية.. نزلوا منها البنات نور وعليا ومها ووصال وتغريد والتوأم.. بعد حطهم تحرك باش يوصل باقي الطالبات.. خشوا كلهم وهما يهدرزوا عن يومهم الدراسي وكيف فات.. اغلب الدوة كانت تذمر.. عليا وتغريد ووصال توجهوا لحياشهم.. اما الباقي كملوا الطريق.. طبست نور ع زهرة نابتة من الارض بروحها.. قطفتها ولما وقفت جوا عيونها ع بوها كيف خاش يجري لحوش جدها.. هي تعرف مشيته هادي كويس.. زاد اكد شكوكها عمها حسين وولده ايوب طالعين يجروا من حوشهم خشوا حتى هما غادي .. بلعت ريقها وقلبها قعد يدق بقوة.. مها بعقدة حواجب: خيره عمي حسين يجري؟! جيداء ماكانتش منتبهة: وين غيداء تأشر بصبعها: توا خش لحوش جدي.. نور شبحتلهم بعدين قالت: خفوا رجليكم خيركم وقفتوا.. مشوا البنات وهما ناويات حوش جدهم.. بس نور سبقتهم، كل اللي جابهولها فكرها ان جدها او حناها ترا شن صارلهم.. خافت ولقت روحها لا اراديًا تجري الصغيرات لما شافوها بالحالة هادي لحقوها وخوفها انتقللهم.. يحسابوها تعرف شي وداسة.. •الحاج منصور: فهمنا بالشوي يا طاهر! هو مسح ع وجهه وقال: تو كانت تكلم فيا ليلى وتقولي عبيدة تلاطم هو وواحد ضربه بموس.. ايوب: كيف كيف؟!! من هوا هادا؟! تي عبيدة مش متاع مشاكل يا عمي ودوة فاضية كلامك مايخشش الراس! حسين فنص في ولده: ضم فمك خلي نسمعوا زي الناس! ..رجع عيونه لخوه وكمل: وين قالك رفعوه؟! اما مستشفى يا طاهر؟!! الطاهر: شكلهم ماشيين بيه للطبي اقرب خطوة للجامعة.. ضيق ايوب عيونه وهو يفكر.. عبيدة ماعنده مايدير في الجامعة الا حاجة واحدة ..هي انه يروح بالبنات: تي باهي مش قلت ليلى يا عمي من معاها توا! الطاهر شبحله وهو يقول: شرف الدين جاهم.. الحاج منصور تحرك وهو يطق بزقيته ع الارض: غير فوتوا بس خل نفهموا الوضع مزبوط.. ولع السيارة يا ايوب فيسع طلع ايوب بيجيب مفتاح سيارته من الحوش.. حسين وهو متوتر: هاك مفتاحي.. طلعه من جيبه وحدفهوله.. هو تلقاه وفات يجري قدامهم التلاتة لحقوه وطلعوا كلهم من باب المربوعة البراني.. مابوش يعطوا علم لحد من النساوين لين يتبينوا من الوضع.. لكن نور اللي كانت واقفة جنب باب المربوعة الدخلاني سمعت كل نقاشهم.. خافت هلبا التوأم مافهموا شي لكن مها لا.. شبحت لنور لقتها حاطة يدها ع فمها ودموعها تنزل.. لما لقتها هكي عرفت انها فهمت صح بس ماقدرتش تتكلم خشت غيداء تجري للحوش.. شوية ورجعت تكر في رقية وتقوللها: زودي نور تبكي.. طلعت ووراها زمزم اللي كانت موجودة وقتها، اليوم دورها في وجبة الغدي وجت باش تنادي حماتها تجيب معاها الصفر رقية وين شافت بنت خوها بهالحالة جتها وهي تقول: نونا حبيبتي خيرك.. مها تعصر في يديها وعيونها ع زمزم وبس.. زمزم جبدتها وهي تقول بيصارة وتضحك: فاكين منك مقعدك نويره؟! نهارهم الاحرف غدوة تو يمشيلهم بوك.. ضحكت رقية.. جيداء: لا عمتي نور ترا شن سمعت في المربوعة مشي قعدت تبكي.. اختفت ضحكة رقية وجي فمكانها ملامح التوتر: شن سمعتي نونا؟!.. تلفتت للباقي وهي تسأل: قولولي حبيباتي زمزم قدمت للباب طقت مرتين مافيش رد، فتحاته لقتها فاضية .. قلبها انقبض: خيره عمي العفو قرب الغدي وطلع! نويره شن سامعة يا بنتي شغلتي بالي! من جاه جدكم.. مها الكلام يجي ع راس لسانها ويمشي.. متوترة بسبب وجود زمزم : وينكم.. بالكم بالغدي وقت.. رقية بصوت عالي: هيا يام شوية بس.. غيداء: يا نور قولي خيرك هكي هي شبحت لرقية وقعدت ترشف: عبيدة.. جت زمزم قدامها: قصدك جدك طلع على خاطر عبيدة؟! شن طراله الولد علاش مشوا حتى بلا مايعطونا علم.. عبيدة خيره يا بنتي تكلمي ماترعشيش مفاصلي الله يربحك! نور وهي تمسح فدموعها: سمعت بابا قال ضربوه بموس في الجامعة.. بعدين مشوا كلهم ورجعت تبكي.. زمزم فيها عقل وطار.. خشت تجري داخل: حي عليا ولدي حي..نقالي وين! طبست تقيم في مخاد الجلسة وهي ادور: وين مشي العازي! يا ربي ماتوريني فيه سو يا ربي احفظهولي.. رقية جت وراها: زمزم اذكري ربي ماهناك كان الخير.. التفتت وهي تقول بصوت عالي: بالك سامعة غلط يا نور! جت مها وهي تشبحلهم بخوف: حتى اني سمعت زيها.. عمي طاهر قالها بالحرف ويخي ايوب وعمي حسين كانوا هنايا وطلعوا جميع مع جدي قعمزت زمزم ع الجلسة وهي تمسح ع رجليها وقلبها نار: حليلك يا زمزم حليلك.. حليلك فيه حليلك في بكرك يا زمزم.. ونزلوا دموعها.. ع طلعة حليمة من الدار وهي عاقدة حواجبها: خيركم.. شن حسك تقولي على عبودة.. رقية عيونها حمر: عبيدة ضاربينه بموس يام.. خبطت حليمة ع صدرها: حي علينا! ..وين لقاه ولد الحرام اللي دار فيه هكي..بانفعال كملت: نوضي جيبي البلي اضربي على خوتك نوضي! هي ناضت تجري للدار اللي فيها الارضي.. مها مقعمزة ع حاشية الجلسة تشبح لمرت عمها وتبكي.. اما التوأم روحوا لحوشهم باش يقولوا لكلثوم اللي صار.. حليمة قعمزت بحدا زمزم وهي تقول: وحدي ربي زميزم مرات غير سمعتوا غلط.. من قالهالكم انتم يا بنيتي اصلا! شبحتلها زمزم والدموع تنزل من عيونها: البنات سمعوا طاهر يقول فيها لعمي وطلعوا بعدها لا طريق لا جرة.. حليمة: غير اصبري نتيكدوا تربحي ..بعيد السو عليه ان شاء الله في راس عدوه واللي يكرهوه يا ربي.. قامت راسها وكملت: يا بنت وين رحتي كبدي تمروجت ردوا عليك ولا مزال! طلعت رقية من الدار ودموعها تنزل بغزارة، بصوت مخنوق قالت: حقا انضرب يما قاعدين بيه فالطبي.. معاش تمالكت نفسها وهي تقول: حسه يقوللهم وضعه حرج نزف هلبا دم.. وقعدت تبكي.. خبطت زمزم رجليها بقوة: وووه عليا.. حليمة تغمرتها وقعدت تبكي: الله لا تربحه ولد الحرام.. الله لا تختم عليه ..غير ايامه يا ربي وحارف عامه.. زمزم تبكي بالصوت: ارفعوني ليه يا عمتي.. نبي نشوفه نبي نطمن كبدي نار راهي.. وين نقالي وينه هاتوه! مها ناضت ادورلها فيه وهي تبكي وشنطتها قاعدة ع كتوفها.. وحناها شادة كنتها ويبكوا الزوز.. رقية وقفت بسرعة لما تفكرت نور.. طلعت لقتها ع نفس حالتها هي لما شبحت عمتها جتها تجري حضنتها وزادت فالبكي: مش ميت ولا.. رقية وهي تمسح ع راسها وتبكي: اشششش مافيه شي جرح بسيط يا قلبي.. تعالي خشي داخل تعالي.. نور قعدت شادة فيها لين دخلتها للدار.. استمر الوضع كما هو عليه في حوش الحاج منصور.. دموع وخلاص.. زمزم جابتلها مها تليفونها.. بعد جربت ع راجلها وولدها مرارًا وماردوش ..هادا وين ولعت النار في قلبها حق.. •🌹•🌹•🌹•🌹• يتكلم بالتليفون وهو يسوق: بنك الدم مافيشي؟! الله يرفعه الكلب ولد الكلب! بوي وين؟! باهي باهي اني نحطهم فالسانية وجايك وانت شوف خليفة ولا حمزة نفس الفصيلة.. البنات كانوا يشبحوله بترقب وخوف وهما يستنوا فيه يكمل المكالمة.. نزل التليفون من ع وذنه وحدفه عالفودرة.. راوية جت بتتكلم قاطعتها ليلى وهي ترشف: اهو معاك شرف الدين افهم منه قالت كلامها وهي تمد فالتليفون لسلفها ..دار يده بالعكس خداه منها حطه ع وذنه: هاه.. تي فرخ حرام بقه بالموس في جنبه! ..سكت شوي يسمع في خوه بعدين قال وهو يحرك في يده اللي يسوق بيها بانفعال: ماندريش يا بشير علمي علمك! خشت فيها الشرطة وقصة يا راجل، اني حاجة وحدة نفهمها عبيدة تصرا فيه حاجة مامكفيني دمه الواطي! راوية قعدت تبكي: كيف تصرا فيه حاجة مش مفروض حاله باهي!..حطت يديها الزوز ع وجهها وهي تقول: مش مسامحة روحي بسبايبي هو بين الحياة والموت.. ليلى ضمتها وهي طبطب عليها: راوية ادعيله ينوض بالسلامة ماتقنطيش من رحمة ربي.. تلفتت مريم ورا وقالت ببكي: ويري باذن الله مافيش شي يخوف دم بس ناقصه سمعتي شرف الدين شن قال تو بيمشوله خليفة وحمزة.. راوية تشهق: انتي ماريتيشي يا مريم كيف تقولي دمه كله تبزع ولونه قعد اصفر.. عبيدة يا مريم هداكا اللي خبطة يده تهد الحيط شفته زي الجثة الهامدة.. قالتها وهي تأشر بصبعها السبابة ع روحها والدموع دايرات طريق ع خدودها.. شرف الدين: كلمهم انت يا بشير وبرا غادي.. تمام اني تو نشرين عليك كان صار شي وانت رد عالتليفون ماتشغلناش.. صكر الخط بعدين رجع التليفون لليلى ..هي خداته منه مريم تمسح في دموعها بكفوفها الزوز: شن قالك ايوب شرف الدين مرر صوابعه في شعره ورد: متسألونيش توا على شي ليلى: بتمشي انت وبشير للمستشفى؟! شرف الدين: بشير بيمشي لمركز الشرطة بوي وجدي غادي مريم بخوف: علاش شن يبوا فيهم! شرف الدين: وين نندري عليهم اني، اكيدة مكلمينهم ماهو الكلب هداكا قاموه بيحققوا معاه .. راوية بخوف: وعبيدة شرف الدين بغضب: خيره هو عبيدة يندري بالدنيا شن صاير فيها! لكن ساهل غير ينوض صحيح بس واني اللي نربيه فرخ الحرام هداكا .. رغم انه ماباش يقوللهم ع وضع عبيدة بالتفصيل لكن مريم من ردة فعله استشفت انه تعبان.. نزلت راسها وهي تبكي بدون صوت راوية بصوت باكي: انت ماشيله بعد تحطنا ولا، ارفعني معاك بالله عليك شرف هو شبحلها من المراية: وين نرفعك معاي هبلتي انتي! راوية رجعت تبكي بالصوت من تاني: بترفعني ونص مادخلنيش فيك نبي نشوفه بعيوني علاش الانانية هادي علاش انت بس تطمن وحني نقعدوا عالملال علاش! شرف الدين: يا راوية مش مكان بناويت غادي خيرك ماتبيش تفهمي! بعدين كان صارت حاجة نكلموكم بالتليفون مريم: ويري كلام شرف الدين صح.. هي بانفعال: لا مش صح! تعرف كان ماترفعنيش الا مانكلم عمتي زمزم توا نخليها توقف في البوابة تستناك وصحة ليك بعدها كان قدرت تقصها خطوة بلا ماترفع الكل! خيرتك وانت اختار يا شرف الدين! غمض عيونه وفتحهم وهو يقول: لا حول ولا قوة الا بالله، تو شن يسموا فيه هادا؟! تفاهموا معاها اني معاش متكلم! ليلى بهمس: ويري حرام شوفي حالته الولد حتى هو مشغول على خوه ماتجيش انتي تزيديه راوية شبحت لبنت عمها وهي تبكي: علاش ماحد فاهمني، عبيدة اللي صارله صارله بسببي اني وفي جرتي اني يا ناس! عقد حواجبه وطول شبح لمريم: كيف بسببها؟! انتوا تعرفوا علاش تعاركوا وداسات؟! مريم: راوية تتكلم هكي واضح علاش مش لازم نشرحلك.. شرف الدين: مريم قوليها فقش قسمًا بالله الزيت راقي لهني يا بنت عمي! واشر ع راسه.. هي شبحتله وقالت: عبيدة شن مشاه للعلوم لولاها هاه؟! من عنده غادي غيرها هي.. كملت بارتباك تحاول تخفيه: وحني نستنوا فيه شكله شاف الحقير هداكا نزله بدون مايقوللنا شي.. وفي خاطرها كانت تقول: «يا رب سامحني» هو كمل سواقته من سكات.. اما مريم، التفتت وراها.. مدت يدها ليد راوية شدتها.. غيرت عيونها لليلى لقتها تشبح لتليفونها تبعت في رسايل لبشير باش تطمن عليه •🌹•🌹•🌹•🌹• مركز شرطة الفرناج.. في مكتب احد الضباط موجودين الحاج منصور وولده حسين.. معاهم شخص تاني يبان عليه خمسيني بجنبه شاب صغير الضابط: هادا في صالحكم راهو، قولولنا وتعاونوا مع الشرطة لو تعرفوا علاش ولدكم هجم عليه! الحاج منصور بعقدة حواجب: يا فندي كان نعرفوا حاجة رانا قلناهالك مافيش من مسبت شواربنا هو غير عيونه لاهل احمد وقال: كيف بيصير توا؟! الراجل الخمسيني: زي ماقلت انت يا فندي ولدهم هو اللي بدي على ولدي واضحة من الغالط.. حسين شبحله: حني مش جايين نرموا الدوة هكي وخلاص كان هدا مانغلبش حتى اني.. خليك محضر خير يا خوي لين نفهموا القصة مزبوط الضابط: خلاص خلاص! شبح لاب احمد وكمل: عمي كان عندك حاجة ادافع بيها على ولدك قول لانه بينحبس في كل الاحوال.. هني ولده تكلم: وعلاش ينحبس هوا بس زي ماهادا ضرب حتى التاني ماقصرش ريته بعيونك وجهه مخليهوله خريطة! الضابط رد بحدة: حنى مش في شارع! اللي عارف حاجة يقولها يا اما راجوا عبيدة لين ينوض! سكت الكل..ع اطقطيقة الباب.. الضابط: ادخل انفتح وخش منه عنصر، ضرب التحية بعدين قال: فندي في واحد برا تبع اللي انضرب بالموس.. هو رد: دخله.. ضرب التحية من تاني وطلع، شوي وخش بشير للمكتب وهو يقول: شن صار؟! حسين شبح للضابط: خوه.. هو: تفضل قعمز.. بشير وقف بحدا كرسي جده: نبي نعرف شكون اللي ضارب خوي وعلاش عبيدة ماعنداش فالمشاكل يا فندي الموضوع فيه ان : والله سؤالك هادا امشي بيه لمخويك الرديف هو اللي هاجم فوسط الكلية! بشير قعد يمشي باتجاهه وهو يقول بعصبية: كان تبي تشبح الرديف نرقدك وين ماراقد هو توا! الضابط بحدة: ضم فمك انت وياه مؤسسة حكومية هادي! منصور خبط بزقيته ع الارض وبصوت عالي: بشير! الزوز سكتوا.. بشير وخر وقف في مكانه وهو يشبح للولد بحدة الضابط بعصبية: هي كلمة، يا تلزم حدك وتوزن كلامك يا الشيلا تراجي فيكم! ..وبنته كمل: احترم المكان اللي انت فيه! اب احمد شاف لولده بحدة.. اما حسين كان خايف يستفزوا بشير بالكلام وتكبر.. لهذا شافله وقال: امشي اطلع بشير: مانيش متحرك لين نعرف شن صار بالزبط! خوي مش قطوس باش يهدر دمه واحد من الشارع واني جوي تمام! منصور بحدة: شوره تساوت عندك انت ! معاش محترم كبير لا صغير! من امتى ترفع صوتك في حضوري وحضور بوك اه! برغم كان معصب بس ابتسم بخفة، زبط جده يلقح: نستنى فيكم البرا.. وتلفتت للباب، فتحه وطلع منه.. الضابط مسح ع وجهه وهو يقول: سامحونا حاج.. الكلام كان متوجه لمنصور بس المقصود بيه حتى حسين واب احمد.. هو هز راسه: سقدنا بس يا ولدي •🌹•🌹•🌹•🌹• في السانية.. خشت وسيلة للدار وهي تقول: مايردش.. خبطت زمزم ع رجليها ودموعها تنزل: لالالا مش بلاش هادم ابصر شن قايليلهم، مش معقولة ماحد يرد! حليمة: اضربوا عليهم اللي عندها رقم ماتقصرش، كيف يخلونا ندوروا فالكسبرة! اللي مقعمزات فالدار طلعوا نقالاتهم بيتصلوا، اللي بولدها واللي براجلها سعاد حاطة التليفون ع وذنها وبغضب: كان نعرف شكون المجرم هادا نمشي بروحي لومايته اللي جاباته وطلقاته للشارع يربيه! ذهيبة: خولة.. يا خولة! خشت خولة تجري بطاسة ميه في يدها مدتها لامها طول هي خدتها بعدين قربت سلفتها باش تشربهالها: هي سمي بالله يا زمزم .. هزت راسها وبصوت باكي قالت: مانبي شي ولا خاطري في شي غير خبر على ولدي يا ناس.. حليمة بنته: هي صل ع النبي بلا خياب! اللطف علينا مرات حتى فاق وحاله باهي انتي علاش تغششي فروحك وتفاولي عالراجل! خديجة قدمتلها وهي تزحف ع ركابها: زمزم تعوذي من الشيطان واشبحيلي ردت وهي ترشف: اعوذ بالله من الشيطان الرجيم.. خديجة بهدوء: اشربي جغمة ميه بلي قلبك ونوضي بشن فدتيه هكي انتي.. هي سكتت، ذهيبة مدتلها الطاسة وهي تسمي وخولة واقفة تشبح لمرت عمها بحزن.. •برا في الصالة.. تمشي وتجي ..يد تحت صدرها والتانية شادة بيها التليفون ع وذنها نادى الخط نادى لين فصل.. نزلاته من ع وذنها وهي تقول بقلق: مايقعدش مايردش كان مافي شي نجلاء قربتلها: شوفي ابراهيم تراهو وصل غادي.. مدتلها فريال التليفون وهي تقول: هاك جربي حظك بنمشي نشبح نور هي خداته منه ومشت باتجاه المربوعة.. اما فريال خشت لدار عمتها، لقت نور في حضن امها وراقدة ناضت كلثوم بعد نزلتلها راسها ع المخدة، فريال جابت بطانية حطتها عليها وهي تقول بهمس: قريب قتلت روحها بالبكي.. تنهدت كلثوم: عارفتيها انتي من ابسط حاجة ماتتحملش طلعوا من الدار مع بعض وفريال تقول: زعما جاته في مكان خطير؟! حليلي يا عمتي كلثوم كلثوم: بعون الله مافي كان الخير غير انتم معاش تتكلموا هكي قدام زمزم مش ناقصها..انتي مارد عليك حد؟! هي هزت راسها: ولا واحد لا بوي لا عمامي حتى الولاد عقدت حواجبها لما سمعت اصوات جاية من جهة الباب الرئيسي: شكون جي؟! العيلة كلها هنايا.. كلثوم: بالك حد من الجيران سمع.. ومشت باش تشوف مني.. ع طلعة سعاد من دار التقعميز تتكلم بيديها وتقول: هادا غير اول ماتوصل تكلمني يا جمعة! سيمافروات! تحسابني مانفهمش! يا راجل قولي كان عبيدة فيه حاجة امه بتخش في عقلها وتطلع! فريال لحقت عمتها طول لما سمعتها تتكلم هكي.. خشت للدار وجت بتصكرها وراها وقفتها في اخر لحظة.. هي لما لقتها فريال سكتت وخلتها تخش •بهية: تفضلوا خشوا.. قمرة: صحيتي.. ياسمين كانت تمرر في عيونها عالصالة اللي مقعمزة فيها عليا تبكي وجنبها وصال ومها.. قمرة: اميمته شن حالها؟! كلثوم بتنهيدة: ماهناك حال خالتي قمرة لا اتصلوا لا طمنونا.. قمرة هزت راسها.. خشت ومعاها ياسمين للدار وبدوا يسلموا بهية مشت دور في حماتها باش تخبرها بجية اهل خطيبها.. قعمزت ياسمين بجنبها خولة.. عيونها ع زمزم اللي حالها كان اهدى شوي من بكري وسلفاتها الكبار الزوز ع يمينها ويسارها.. قمرة: كيف صار يا وخيتي؟! حني سليمان ماحكالنا شي حده جابنا هنايا وهو يقولي يام ولد حسين الكبير ناخصينه بموس! حليمة وهي تمسح في عيونها بمنديلها الخاص: مانزيدوا عن اللي تعرفيه بحاجة.. مانا من تو نضربوا عليهم ومافيش من يرد يبرد قلبك.. يا وخيتي مانبوهمش يقولولنا كيف صار غير يطمنونا عليه طيب مش طيب شن صاير فيه! قمرة: ربي يطمنكم عليه ويشفيه، البكر ديما غير عن باقي خوته .. غيرت عيونها لزمزم وكملت: ادعيله يا زمزم انتي اميمته دعاك مستجاب ..وكلي ربي على اللي ضربه وماتحرقيش دمك سلم بنتي حليمة وهي ترشف: لساني طاب يا قمرة من بكري نكلم فيها وهي شي دموعها كملوا ولا قالت نسكت.. زمزم بدموع: حسبي الله ونعم الوكيل، اجعل ميمته ذوق ماذوقني ولدها اجعل ماصارلي يصرالها يا ربي.. وسيلة: زمزم ولدك اولى بالدعي.. خديجة بعقدة حواجب قالت: سادك خياب ساد! ..قامتها من يدها وكملت: نوضي معاي اغسلي وجهك هادا في بدال ماتدعي يروحلك سالم! وكلي ربي هو ياخد الحق يا زمزم.. تقول في كلامها وطالعة بيها وهي ساندتها باش تغسللها وجهها حليمة: وين كان مدسوسلنا هاليوم بس وين.. قمرة بأسف: الله غالب يا حلومه قدر ربي وان شاء الله اكبر المصايب.. الموجودات في الدار كلهم أمنوا ورا دعائها.. شوي وطلعت وسيلة من الدار.. ناديا شبحت لخولة: خولة.. هي شافتلها.. ناديا: بنتعبك دخليلي قيس داخل غير اني بنوض نصلي الظهر نسيته بكل هي وقفت طول: حاضر.. ذهيبة: مفيدة وين يا ناديا ردت وهي توقف بالشوي: تراجي في رقية بتخش للحمام هزت ذهيبة راسها.. وناديا كملت طريقها لوحدة من الديار باش تصلي.. فاتت من الصالة وين ما واقفة وسيلة ع بنتها عليا.. وسيلة وهي تتكلم من بين سنونها: عليا ماطلعينيش عن طوري! هي ردت: حالنا حال عصير حني! عبيدة بين الحياة والموت ومزال تبيني نفكر في الضيافة! مفضى بالك يما وخلاص ومشت من جنبها تمسح في دموعها بالكلينكس امها تبعتها بعيونها لين طلعت من الصالة وهي تعض ع شاربها: حي ع الفضايح حي الناس سمعتنا! مها: تو نمشي اني ووصال عمتي نديروا صفرة من حوشنا هي شبحتلهم: لا بنيتي صغار انتو ..غير بري دوري فريال ولا خولة قوليلهم قالتلكم وسيلة جيبوا للناس طواسي عصير وقفوا الزوز وهما يقولوا: حاضر.. اما هي.. رجعت للدار، ثواني وخشت عليهم بهية ورقية وراها.. كانت متوقعة جيتهم كون سليمان سمع منها هي.. •في الدار..خشت ناديا لقت سعاد كيف بتنهي مكالمتها مع راجلها طول جتها: شن قالك عمي جمعة؟!! فريال: حاله باهي؟! هي شبحتلهم الزوز وقالت: دخلوه للعمليات .. شهقت فريال.. سعاد فنصت فيها: فكينا يا فريال اني دايراتك عاقلة ومابيتش نلزك تنوضي تعيطي تقول مات بعيد وبر! ناديا: وكيف حاله توا؟!! شبحتلها سعاد وهي تقول: قاعدين يزيدوله فالدم على خبر اللي جابوه نزف هلبا والاسعاف ماوصلتش فيسع.. وبكره كملت: عطاهاله ماكنة الله لا تختم عليه! ناديا: بلغوا فيه اللي ضربه؟! سعاد ردت: بوي وحسين غادي لكن ماحد جاب منهم خبر.. فريال بقلق: كيف بتقولي لعمتي زمزم سعاد شبحتلها وهي تفكر: سيوره اللي هناك باين ماعليكمش نعرف كيف نجيبهالها اني.. ومشت لباب الدار فتحاته وطلعت •في المربوعة.. وين ماكانت نجلاء تتكلم مع ابراهيم: تمام حبيبي مع السلامة.. ع كلمتها انفتح الباب بقوة، كانت عليا جاية تبي تقعمز بروحها نزلت التليفون وشبحتلها.. هي بحدة وعيونها حمر: اما مصح وجهك! ولد خالك مش معروف شن صاير فيه وانتي جاية وتتمعشقي! ..بازدراء كملت: عديمة احساس نجلاء: هييه هيه ترا ضمي فمك وماتبديش تقولي شي صار وشي ماصارش! عليا: شن هوا اللي ماصارش يا حلوة! بتنكري شن قلتي تي سمعتك بوذني هادي اني ومزال ليك عين تزلزي! اصلًا الحق مش فيك الحق في الدلدول التافه خوي هو اللي فاتحلك طريق! ملة وحدة انتوا الزوز.. نجلاء بغضب: يا ماما الدلدول اللي مش عاجبك مسيب خدمته وواقف على راس عبيدة واني ماكلمته الا باش نسأل عليه، مش وحدة زيك تجي تنظر عليا توريني شن مفروض ندير ومانديرش! عبيدة مش انتي بس بنت عمه خفي علينا ترا! ضحكت عليا بهزوة وهي تقول: وقتي لفقتي كذبة! لكن تمشيها عليا دا بعدك سامعة! نجلاء استفزها الكلام وردت: مدامك هكي خودي مالا، ايه اني كلمته لاني استاحشته ونبي نسمع صوته.. مسحت ع ذقنها وهي تتحلف وتقول: راجيه يروح لما نقوله اختك تبكي على عبيدة وهو يفهم الباقي.. توسعوا عيونها ع الاخر.. بدون مقدمات نقزت ع نجلاء تضرب فيها: اني تقوليلي هكي يا كلبة يا حقيرة! تحسابي الكل زيك يتلصقوا اه! نجلاء تجبد فيها من شعرها ومش ملحقة معاها: جربي شوية الافتراء شن انتي بس ترمي التهم ع كيفك.. لا يا ماما انتي تبي عبيدة ووريني شن ديري بعد يسمع ابراهيم ويجي يقددك! عليا تضرب فيها وغلها من التوتر والخوف ع ولد عمها كله حطاته في نجلاء: تي خوووي هادا خوي يا مريضة! تعاليلي جاي تعالي والله خليقتك هادي اللي تمدي فيها لابراهيم لما نفسدهالك وريني بعدها كيف مزال بيشبح فيك يا كلبة! نجلاء قرصتها من يدها: والله نعيط ونلم عليك السانية الله! وقعدوا يضاربوا.. لكن عليا غالبة ع نجلاء، مسكينة ندمت عالساعة اللي فكرت تغيظها فيها.. لما معاش قدرت تقاوم قعدت تعيط انفتح الباب الخارجي متاع المربوعة خشوا منه مريم وراوية يتجاروا.. وين لقوهم راكبات في بعض جوا يفكوا فيهم مريم وهي تجبد في نجلاء: خيركم شن جاكم! عليا كانت مكتفتها راوية ومع هدا تحاول تتلافى نجلاء: نحي يا راوية نحي اني نربيها اليوم الحقيرة الكلبة! مريم: كباااار راكم كبار شن الحركات هادي! شن في بينكم باش اديروا هكي! نجلاء وخرت وهي تشبح في يديها اللي علموا من قرص عليا.. اما هي.. فكت روحها من راوية وقالت: الهانم خشيت عليها تتمعشق مع اللي سماه خوي لما واجهتها نكرت زعميته كلماته باش تطمن ع عبيدة تحسابه بيفوت عليا! وين عرفت روحها مكشوفة ناضت تقطف انتي تحبي عبيدة ومش عارفة شني!.. لعلمك عبيدة يحب راوية ومش امس ولا اليوم ليه سنين ..واني يا هانم حتى كان نحبه زي مامصورلك عقلك الخامر مش شابح فيا لا في غيري ..اشرت بيدها ع راوية وكملت: اهي اللي يبيها قدامك عينك حية وتحضري عرسهم ان شاء الله! راوية قامت حواجبها وخلاص فقدت اعصابها: تحشمي ع وجهك انتي وياها تحشمي!! تتعايطوا رعشتوني نحساب صارتله حاجة!الولد حالته حالة وانتوا هنايا وحدة اتفه من التانية! وطلعت من الباب التاني وهي تبكي.. مريم شبحتلهم بعصبية: قسمًا بالله ماعارفة شن نقول! الدوة هادي مكانها يا عليا! تلومي في نجلاء درتي احرف منها! بعدين شن كلفك ديري هكي اصلًا البنت قالت لا معناها لا خاشة عقلها شايفة شن فيه انتي! هي حست بقداش غلطت لما قالت سر مايحقلهاش تفشيه: ماقصديش نقوللها مش عارفة كيف طلعت وبكيتهالها مريم حطت يدها ع جبينها: نحيلي قصة عبيدة وراوية جانب..تصرفك كله من الاساس غلط وضربتك لبنت عمتك عيب يا عليا عييب! هي سكتت.. اما نجلاء قاعدة مصدومة من اللي سمعاته.. عبيدة يحب راوية.. كيف مالاحظتش من قبل.. تنهدت مريم.. : خيره صواتكم لبرا التفتوا التلاتة بخلعة.. مريم: امتى جيت انت؟! علي من الروشن: توا حطني الباص هني شكله بوي مكلمه.. غير حقا الدوة اللي قالتهالي تغريد عليا: وانت وين لقيتها تغريد علي بتضييقة عيون: ماهي برا يا فهيمة! نجلاء: كان مش حقا يا استاذ علاش جابوك هني اكيد مش محبة فوجهك.. مريم: ساد عرايك ارجوكم، رجعت عيونها لعلي وكملت: كان تقصد ع ضربة عبيدة ايه صح.. ولفت باش تخش داخل توسعوا عيون علي: كيف صار؟! عليا بتنهيدة وعيونها دمعوا: مانعرفوش ماحد رد علينا.. مسحت عيونها وكملت: راك تخش في نساوين الداخل علي: باهي بري جيبيلي ميه عطشان بنموت.. هي مشت باش تجيبله.. وهو شاف لاخته وقال: زعما خطيرة حالته؟! نجلاء تحط في شعرها ورا وذنها: ان شاء الله لا.. قاعد في العملية يزيدوله فالدم ضيق علي عيونه بشك وهو يقول: وانت منين تعرفي؟! على اساس ماحد رد عليكم! جمدت وهي تشبحله بخوف.. بلعت ريقها ومزال ساكتة علي: خيره فمك تسبت..تكلمي! نجلاء بتلعثم: منصور.. منصور اتصل بناديا توا كانت بحداي تكلم فيه بعدين طلعت تقوللهم علي: عليا كانت معاك علاش ماقالتش هكي ردت وقلبها يدق بسرعة: ماهو خشت قبلك بشوي.. بسرعة باش تغير الموضوع قالت: شن الصوت اللي برا، اشبح من جي هو تلفت بعدين قال: نزار وسراج روحوا من المدرسة نجلا: باهي اني بنخش اكيدة ماما دور فيا.. لفت بدون ماتشبح وراها، وخوها قعد يتبع فيها بعيونه لين اختفت من قدامهم.. •بعيد عنه، كانت بنت خاله تمشي في السانية وهي تتكلم بالتليفون ليلى: يعني شن بيصير توا.. : مبدئيًا دام الكلب هداكا ماقال شي لتوا حينحبس في كل الاحوال على خاطر الموس هي تنهدت: ان شاء الله يخلل غادي، اللي توجعك غدره غدر يا بشير لدرجة حني ماريناش امتى طلعه : فرخ الحرام! تي اللي مش فاهمة لتوا شن لمهم على بعض، الفرخ اصغر منه ويقرا في الكيمياء قالوا ..عبيدة صحابه كلهم نعرفهم تبع الهندسة ماعمراش جبدلي سيرة حد تاني ليلى حمحمت وقالت: مرات غير انت ماتعرفاش، بعدين مش شرط يكونوا صحاب يصيروا المشاكل ديما.. : وارد.. ع العموم حبيبي اني ماشي جنب الولاد توا ليلى: طمني بالله عليك :حاضر حاضر.. تصكر الخط ..وهي نزلت التليفون بعدين توجهت بخطوات سريعة لحوش جدها.. •🌹•🌹•🌹•🌹• في المستشفى الطبي.. متجمعين كلهم قدام غرفة العمليات الموجود فيها عبيدة.. طلع ممرض بزوز اكياس دم من احد الحجرات خش بيهم للعملية، بعده بدقيقتين طلع حمزة وهو يفتح في ذراعه ويصكر.. جاه منذر: تعالى قعمز هني.. هو مشي معاه ودار زي طلب منه ع جية منصور بباكو وطاسة بلاستيك: هاك اشربه كله جي بيصبله فالطاسة هو خدي الباكو فتح المغطى ..شرب نصه بعدين نزله وقال: من هوا صاحبنا منذر: وين نندري على جد اصله ..قالوا اسمه احمد ويقرا فالكيمياء بس هز حمزة راسه: بعدين ساهل.. ع الكراسي اللي مقابلينه مقعمز خليفة حتى هو شاد طاسة ويشرب.. بحداه ابراهيم وسليمان، اما الزبير مقعمز ع يمينه ويشبح لحجرة العمليات بترقب شرف الدين يمشي ويجي بتوتر: خيرهم معاش طلعوا هادم! ايوب وهو يهز فراسه: تو يشوف غير خل ينوض عبيدة بس سمعه الامين اللي قال: ايوب، صل عالنبي سلم ولدي حط كمال يده ع كتف ولده عمه وهمس: مش توا يا راجل اللقطة جت بين عيون الحاج منصور، وقف بعصبية وهو يقول: اشبح جاي انت وياه، اللي فيكم راجل نسمع بيه مداير حاجة هكي ولا هكي قسمًا بالله ومانحلف حانث السانية معاد يحلم يهبطها بشير: جدي!! حمزة ضرب رجل الكرسي برجله تعبيرًا عن الغضب.. شرف الدين بنرفزة: وتمشي في عظام عبيدة باردة هكي! سامحني يا جدي كلامك غلط حسين ناضله بعصبية: من هوا اللي كلامه غلط يا قليل الرباية! شدوه صبري وجمعة يهدوا فيه.. شرف الدين نزل راسه.. وبوه سلخه سلخ بالهزايب حمدي: ضاربه بموس مش حاجة ساهل يا جدي راهو الحاج منصور خبط بزقيته ع الارض وقال: مشيتوله وعطيتوه اللازم على قولتكم باهي وبعدها! نبدوا حني نلقوا في يدينا لاماليه باش مايحبسوش واحد فيكم ونقعدوا عمر كامل في عازته! هكي تبوا يصير ولا باش تستريحوا! .. منذر: يتحاسب يا جدي مايهربش بعملته تقول مادار شي هو شبحله وقال بعصبية: في دولة تحاسبه انت ماليكش علاقة! هونا قدمنا فيه بلاغ بيقعد شهر محبوس الزبير بهمس: وشوية يخي.. حمزة: حتى غادي كويس المهم ياكل العصا باش يعرف ربي واحد شرف الدين خبط الحيط بقهر ابراهيم بعصبية: مايجيش والله مايجي هكي! التفتله بوه وقال: يا صكر فمك يا درق وجهك من قدامي! هو قلب وجهه للجهة التانية.. وقف عمه بلقاسم وهو يمرر في عيونه عليهم كلهم ..تكلم بصوت مسموع للجميع وجدي: سمعتوا جدكم انظني! عقاب عمره الواحد ضنوته دخله الحبوس! سكتوا كلهم.. كلام بلقاسم حقيقي، لو داروا شي بالتأكيد حيلقوا عقوبته منصور الحفيد: خلاص يا جماعة في ناس مريضة مش وقته النقاش اهوا.. هدي الجو شوية.. والكل قعد يترقب وخلاص جي طارق طبس ع عمه وهو يوشوش: مش جدي زمان عنده صاحبه ولده يخدم فالجيش.. خليفة قام راسه بعد ماعقد حواجبه وقال بتساؤل: اما.. طارق: زمان يا راجل اني معاش نتفكره مليح.. في الثمانية وتسعين ولا تسعة وتسعين سكت خليفة شوية وهو يفكر بعدين قال: ايه ايه زبطه.. ملحق عليه انت؟! اني وكنت صغير لما توفى طارق: مش هدا موضوعنا، قلت بالك يتوصى بالفرخ اكيد عنده واسطة مايقعدش بلاش خليفة: شن جيب الجيش للشرطة.. بعدين الراجل كان يشبح جدك في الشارع مايعرفاش شن تحكي انت طارق: اقتراح وقلناه شن كفرنا! خليفة: خلاص الولد انحبس اطلع منها وقول لولاد عمامك شقلب طارق عيونه بملل.. •🌹•🌹•🌹•🌹• عودة للسانية.. بعد ماسمعوا اخر الاخبار من سعاد.. اكثر مازادوا انشغلوا مريم وليلى خضعوا لاستجواب تام، مع اقتصاص بعض التفاصيل.. اما راوية.. كانت شادة تليفونها تتصل وتعاود، من بوها لعمامها لولادهم بجنبها عمتها كيف صكرت من خطيبها.. هي شبحتلها باهتمام بالغ: طلع من العملية؟!! رقية تنهدت: مزال.. راوية بانفعال: شن هوا اللي يديروا فيه! مريم بهدوء: خدمتهم هما ادرى بيها يا ويري كيف مالا •برا من الدار.. تحديدًا الصالة تمشي وجنبها بنت جيرانهم ياسمين: غير بنحط غدي الولاد عارفة انتي فريال: مافيها ماتتعذري ساد من بكري مقعمزة.. وفتحت باب الحوش ..طلعوا منه، سقدتها فريال لين قربوا البوابة بحكم انها طالعة بلا حجاب وتخاف حد يشوفها ياسمين وهي تسلم عليها بالخد: ان شاء الله ربي يسمعكم عليه الاخبار الطيبة حبيبتي فريال: آمين، صحيتي ياسمينه ردت ياسمين بابتسامة: مادرت شي، شن يصير معاكم كلميني بالله وصاة وسع.. فريال: ولا يهمك.. التفتت هي قدام وكملت طريقها لبرا السانية..بينما فريال رجعت بخطواتها تجاه حوش جدها.. •اللي فوسطه موجودين العيلة..قمرة كانت قاعدة مع جارتها ماسيبتهاش بكل، كذلك وصلوا خوال عبيدة من حاجة نص ساعة الحوش زحمة ودوشة، وراوية حابسة روحها في دار جدها مع عمتها وبنت عمها ..ماخاطرها في حد.. الشعور بالذنب ينخر في قلبها نخر من غير تدعي لعبيدة وبس زمزم بعصبية: عقلك شن كان يقولك بس فهمني! زي انت زي بوك وخوتك ماواحد كلف ع روحه يفتح الخط يطمن قلبي! ..سكتت شوي تسمع فيه وهي عاقدة الحواجب بعدين قالت: مانعرفش! توا خلاص ماتكلمنيش حاجة وحدة خوك كيف حاله طلع من العملية ولا! .. كيف لتوا! الله لا تسامحك يا شرف الدين كان تطلع مدرق عليا حاجة! الكل في الدار كان يسمع بترقب.. حليمة بانت ملامح الاستنكار ع وجهها لما سمعت دعوة كنتها لكن مابتش تقول شي.. زمزم بخوف: وين صار قبل هالراي كان عندنا حني! معقولة ليه فوق الساعة تحت العملية..اسمع اول مايطلع الدكتور طول اتصل بيا سلم ولدي ماتخلينيش هكي صكرت منه بعدين حطت التليفون جنبها.. وحدة من خواتها: هاه شن قالك .. هي دموعها تجمعوا في عيونها قبل ماترد وتقول: قاعد ع حاله ماغير يدخلوله في الدم وخلاص.. انخنق صوتها وكملت: بزع دم اللي بزع دمه يا مولاي.. ضمتها خديجة ليها وهي تمسح ع ظهرها: وسعي بالك يا زمزم وسعي بالك.. اما باقي المقعمزات زاد قلقهم عليه شوي وناضت مفيدة من الدار.. وهي ماشية تلاقت مع ناديا جايبة ميه للدار.. كملت طريقها لدار عمتها فتحت الباب.. : نور اسمعي الكلمة وكولي خيرلك راهو! مفيدة شبحت لخولة ورجعت شبحت لنور: راهو عبيدة مافيه شي نويره حرام عليك امك حامل ومثقلة شغلتيلها بالها عليا: نور راك بكل يا بنتي يجي يوم وتقتلي روحك شن هالعزم اللي عندك هادا.. ابكي زي ماتبي حتى اني بكيت لكن كولي! هي ردت وعيونها حمر من اثر الدموع: انتم ماسمعتوش بابا كيف قالها وجدي يا بنات جدي طلع يجري.. مستحيل جدي يمشي لو الامر عادي مش عيلة اني تضحكوا عليا.. تنهدت مفيدة بقلة حيلة بعدين شافت لخولة: عطيتوا راوية شي؟! خولة: شن بنعطوها وهي حتى الميه الزرقة مانزلت من زورها لتو.. حطت طرف الكيكة المعلبة من يدها قدام نور بعدين ناضت: بنمشي نزيد نجرب ع كمال بالك يرد وين وصلت الباب مفيدة صكراته وشبحتلها: عمتي زمزم تو كيف صكرت من شرف الدين خولة باهتمام: وشن قاللها؟!! مفيدة: مزال تحت العملية يزيدوله فالدم وخلاص.. خولة حركت عيونها بقلق: يستر الله، مش زمان ولد فوزي انضرب بموس حتى هو لكن مانتفكرش صارله هكي.. تذكري امي روحت قالت خيطوه ع الواقف وطلع طول مفيدة: حسك خوفتيني.. حتى خوك تليفونه مصكر واللي نكلموه مايرد! التفتوا الزوز ع صوت خطوات رجلين تقرب منهم ..لقوها ليلى كانت في حوش حسين ..مع نزار وعلي وسراج وصلت فيهم وهي تقول: عييت نكذب ع كل واحد شكل.. مفيدة: معاش تطلعي من الدار وتليفونك صكريه لين يفيق عبيدة بالسلامة بعتالي هو يدير راي .. خولة: شوفي مريم هونا لابدة فالدار باش مايدورها حد ليلى: مالا حتى اني بنخش.. خولة: من توا.. خوالهم جوا فالاكيد يشدوك كيف وامتى هزت راسها بعدين فتحت باب الدار وخشت هربًا من الاسئلة.. ع وصلة فريال من برا.. لادت شوية بعدين جتهم: ماريتوش نقالي؟ الزوز ردوا: لالا.. ماندريش عليه قوست فمها باستغراب وهي تحاول تذكر وين حطاته.. فتحت باب دار رقية كبهت منه وهي تقول: بنات ماشبحتوش هاتفي.. نور هزت راسها بمعنى لا ردت عليا بقيمة حاجب: مش عطيتيه للست نجلاء مبكري؟! فريال: حيييي باهي اللي فكرتيني نسيت بكل، وينها هي عالعموم نبي نكلم حمزة عليا بتطنفير: وين نعلم بيها.. ليلى: شوفيها في دار جدي مرات غادي بحدا راوية مشت زي ماقالولها.. فتحت باب الدار وخشت: نجلاء وين حطيتي نقالي هي كانت متكية جنب خالتها.. قعمزت ع حيلها بعدين قعدت تتلمس في جيوبها: اهوا خودي.. طلعاته ومدتهولها.. راوية رشفت وهي تشبح لفريال: معاش كلمكم حد؟! هي هزت راسها: تؤ.. مسحت مريم ع وجهها بيديها: حتى بابا نضرب عليه من بكري بلا فايدة رقية بقلق: ان شاء الله خير.. اما راوية.. دموعها نزلوا مرة تانية قعدت مريم تهدي فيها.. وماطاحتش من فمها جملة «كله بسببي» فريال نزلت نقالها ع كوميدينو جدها باش تعاود تقيم شعرها كعكة التفتت نجلاء ع هزة التليفون.. وقتها النقالات صوت الهزة متاعهم عالي اكثر من توا: رسالة فريال هي كانت شادة التوكة بفمها..بعد لمت شعرها خدتها ربطاته بيها بعدين قامت التليفون فتحت المسج.. فلتت عيونه ووجهها علاته ملامح الفرحة: زودي يا رقية.. الاربعة استغربوا .. والمقصودة جت مقعمزة: خيرك؟! فريال تضحك: شوفي قلبتلها شاشة التليفون باش تقرا الرسالة اللي كان فحواها الآتي: «عبيدة طلع من العملية ووضعه مستقر، مانقدرش نكلمك توا بحداي الولاد» رقية شبحتلهم: طلع من العملية! انفرجوا اسارير راوية وهي تقول: الحمد لله الحمد لله التفت ع مريم والزوز حضنوا بعض بقوة وهما يضحكوا.. اما نجلاء ابتسمت بفرح وجت بتنوض تخبر الباقي.. بس سبقتها فريال وين زغرطت زغروطة طويلة.. عمتها قعدت تضحك عليها.. اول من خشت عليهم زمزم مش عارفة كيف ناضت ووصلت بعد سمعت الزغروطة.. رقية لما شافتها ناضت حضنتها وهي تقول بابتسامة: طيب في سلامته يا زمزم طلع من العملية وحاله باهي زمزم وهي حاضنتها: بشرك بالخير يا وخيتي بشرك بالجنة وشوية شوية كل اللي فالحوش كانوا في دار الحاج منصور يبوا يفهموا من اللي خبرهم ويستفسروا اكثر عن وضعه.. قعدوا يتبادلوا ع زمزم باش يحمدولها بسلامة ولدها.. اما حليمة.. بالها اللي كان مشغول ع حفيدها ارتاح اخيرًا..فاتت الكل واول من دوراته هي.. لقتها في حضن بنت عمها تبكي وتضحك.. فتحت يديها وقالت: راوية بنيتي.. تعالي يما طول مشت تجري لحضن حناها خشت فيه: حنينة عبيدة ماماتش يا حنينة الحمد لله.. حليمة ضم فيها: بعيد السو عليه يما معاش تبكي سلم بنيتي ولد عمك مافيه شي ناضت مريم لمرت عمها وهي تمسح في دموعها ومبتسمة.. مخلية حناها وكأن حالة راوية هادي اثبتت احتمال قداش ليه وارد وبقوة في دماغها.. •🌹•🌹•🌹•🌹• بالرجوع لاحد ابراج المستشفى الطبي.. كان الدكتور واقف ويشرحلهم عن حالة عبيدة.. : تو بيقعد حاجة اربع او خمس ساعات تحت الملاحظة..وبابتسامة كمل: لولا لطف ربي بيه الموس كاد يضر الكلية ولاقدر الله اضطرينا نستأصلوها لكن رغم عمق الجرح ماطالش الا غلافها الخارجي وقدرنا نسيطروا عالوضع الحمد لله.. حسين مسح ع وجهه وقال: الحمد لله.. باهي تو شن وضعه يا دكتور وامتى يفيق.. : مستقر الحمدلله زي ماقلتلكم هو فقد دم هلبا لهذا بنزيدوه كيس تاني .. اعطوه نص ساعة ساعة ويفيق ان شاء الله كمال: يقدر يطلع اليوم؟! : لا ..بعد غدوة حنحكتبله خروج اليومين هادم لازم يقعد تحت الرعاية الطبية جرحه مزال جديد خصوصًا ان الكلية نابها شي من الاذى ولو طفيف .. بعدين حيبدا يجيني كل يوم او يومين يغير عالجرح لمدة اسبوع عشرة ايام بس لو عندكم فالحوش طبيب او ممرض يكون احسن مادابينا مايتحركش هلبا الفترة الاولى.. هز حسين راسه: تمام بارك الله فيك دكتور.. رد بابتسامة: فينا اجمعين.. مشي.. بعده بدقايق جت ممرضة وطلبت يفضوا الممر امرهم الحاج منصور يروحوا .. وبالفعل ماقعد حد الا حسين والطاهر وبلقاسم.. وشرف الدين وبشير وخليفة وطارق والزبير •🌹•🌹•🌹•🌹• فاتوا الخمس ساعات .. عبيدة فاق بعد ساعة بالزبط لكن ماخلوا حد يخشله لعند انقضت المدة كاملة.. •وفي السانية .. بعد اطمنوا عليه وانه وضعه تمام كل من عندها حاجة فالحوش مشت تشطبها قبل ما الناس تسمع وتبدا تجي ليلى وهي تفضي في صفر الغدي الموجودات ع رخامة كوجينة زمزم: يا ريتني حطيته بكري لنزار والولاد.. بروحه مغطياته عمتي خولة تغسل فالطنجرة: عندك حق ماريتيش روحك كيف كنتي بكري هي ضحكت.. عليا تمص فالحلوة: حيه وحيه كان يعلم حمزة علاش الدعكة هادي كلها صارت، لما يمشي يملحه طريقة نباش القبور في حبسه فريال طلع في سكرية البن: يا وخيتي شن هالاجرام هادا يلود وبوخوصة في جيبه معقولة! قعدنا غابة! خولة: لكن صحة لايده عبيدة شعفه يقيم عينه في بنت ليلى ابتسمت وهي تقول: انتم ريتوا اللي داراته راوية.. فريال بضحكة وتحرك في سزوة القهوة: شورها حتى هي تبيه القردة .. ع خشة مريم سمعت كلمتها.. نور: اهو الصندوق الاسود جي اصل الحكاية كلها تلقوها عنده ابتسمت ابتسامة ظاهرها شي وباطنها اخر، ظاهرها تساير فيهم وباطنها ضيق.. سألت خولة بعقدة حواجب: هي وينها حقا البلغارية مريم تنهدت بعدين ردت: تقنع في عمي يرفعها تشوف عبيدة عليا: مش عمتي زمزم وحناي بس بيمشوا؟! مريم: صكرت راسها ماعتقدش يقوللها لا قاطع كلامهم سعاد لما جت: مرومه ولعي فحمة باش تبخري الحوش هيا فتحي من اول الممر: مريم بتطلع معانا يا سعاد.. هي عقدت حواجبها: وين؟! فتحي تنهد: للمستشفى راوية شادة قالت انضرب بسببي اني ..هوا مشيته كلها كلها غادي ع خاطر بيروح بيها.. سعاد شافت لبنت خوها: بري البسي مالا شن تراجي فيسع هي طلعت بخطوات سريعة ناوية حوشهم..فتحي طلع بعدها حتى هو يسخن السيارة بينما سعاد رجعت عيونها لنور وقالت: نور امشي انتي بخري.. شبحت لفريال وكملت: خفي يدك عمامك يستنوا.. ديري حتى لينا حني فريال شافتلها بتساؤل وهي تصب فالقهوة فالفناجين: مش قمرة روحت مبكري..من في مالا؟! سعاد: اللطف بنية خوي! خيرنا حني مش ماليين عينك، فاتت علينا قايلة مشومة بنمدوا عريقاتنا ونشربوا قهيوة نروقوا قبل ليخش حد! فريال بضحكة شبحتلها: احلى قهيوة بالزهر لاحلى سوسو ابتسمت سعاد ولفت طلعت.. ضحكت ليلى: عمتي سعاد عليها جو قسمًا بالله خولة بعد طول سكوت: زعما شن ردة فعل عبيدة بعد يلقى غزالته جاياته برجليها نور ابتسمت: يطير من الفرحة فريال قايمة الصفرة وطالعة بيها: عطاها ربي بنت عمكم هادي ماتوليش بكل! ضحكوا البنات عليها.. ونور قامت صفرة القهوة التانية رفعتها لامها ونساوين عمامها •🌹•🌹•🌹•🌹• في الشرق الحبيب.. كانت مريم مقعمزة في الصالة والارضي قدامها تكلم في بنتها الكبيرة.. بعيد منها شوي جمال مقعمز عالتلفزيون : ماروحش اوفا ردت وهي تاخد في برج تفاح بتاكله: لا .. حتى كان ماحكيته نا اليوم : شيلينا من اوفا كذا وخلينا في عقارب الشمس كناينك مريم: كنهن؟! : خلطتهن هضي مش بلاش يمي، منين جيتكم مبارح حقيت اسما معدية شور حوش يحيى.. مايتكرسن هك الا ويقعد في وراهن مصيبة عقدت مريم حواجبها: حتى نا لاحظتهن لي كم يوم : افطنيلهن يما هذينا شيطانات مريم: ماني عارفة كني هكي نا من دون الصبايا! جمال التفتلها: يمي مطول العشى هي قامت راسها وشبحتله: ساع نصبي نقول لزينات تسخنه.. هي بالسلامة توا رويمه خيك يريد عشاه بنشقاله بيه : بالسلامة يمي سلميلي عليه وعاللي يلاك كلهم.. مريم: يوصل..وانتي سلمي على غيث صكرت من بنتها.. بعدين مشت متوجهة للكوجينة وقلبها مش مريحها من ناحية كناينها ونادمة اشد الندم عالساعة اللي خطبتهم فيها لولادها..
يتبع... «لو عجباتك الحلقة اضغطي عالنجمة واعطيني رايك🤍» اسفة جدًا لان الحلقة قصيرة بعد غياب، بعون الله الجاية حتنزل غدوة او اللي بعده بالكثير..
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
