سانية جدي

الحلقة الثالثة عشر

#سانية_جدي🌹
#الفصل_الأول «سانيتنا»
#الحلقة_الثالثة_عشر
__________________
: هالنهار عليه ندور ..هالنهار ربيع منور
وقعدت تزغرط..
عليا تضحك: الله يا ربي اكيدة حنينة فرحانة بطير!
وسيلة بابتسامة: فوق العشرة سنين راهم مش شوية.. الحمد لله جبر ربي بخاطرهم
صبري: ماريتوش بوي.. وجهه لين نور
ابتسموا كلهم.. والفرحة تلمع في عيونهم
•🌹•🌹•🌹•🌹•
في حوش الحاج منصور..
مريم وراوية لما جي فتحي وخبرهم طاروا طول غادي..
لقوا عمهم خليفة مع حناهم قاعد وهي فرحانة وتردد «الحمد لله.. واسع كرمك يا ربي»
جنبها رقية وخديجة حتى هما فرحانات.. خشولها حفيداتها الزوز
وهي تلقتهم بالاحضان: والله كان نلقى نضبط الخلق كلهم اليوم.. تعالوا العقبة ليكم
هما خشوا في حضنها وهي تغمرتهم..
البنات يضحكوا بفرح..بعدين قعدوا يباركولها
مريم مبتسمة: مبارك حنينة حبيبتي صبرتوا ونلتوا..
راوية: اخيرًا بتشوفوا الكعبة عالواقع، ربي يدوم فرحتكم
حليمة باستهم الزوز على خدودهم وهي تقول: زين مهيّل فيكم صورة ومنطق لميتوه..
هي من فرحتها قعدت تعبر عن مشاعرها ..الله يرزقنا جميعًا زي هالفرحة💞..
خليفة يتفرج: حناهم شن بتقولي عليهم عاد.. غير عيونه ليهم الزوز: تجامل فيكم وفرحانة بس
حليمة شافتله: هي ياسرك يا خليفة اليوم بالذات مش وقت الملاغة الزايدة
رقية ضحكت.. وخديجة كانت مبتسمة.. المشهد كله لطيف ويجسد فرحة من قوتها عجزوا عن التعبير عنها وطلعت في تصرفاتهم وكلامهم ومن عيونهم..
حليمة رجعت عيونها لحفيداتها وابتسمت: هي بروا لجدكم تراه خش لداره
وقفوا الزوز.. وطلعوا وهما يوشوشوا بحماس وفرح
خديجة: حتى اني بنوض لعمي نباركله
رقية مبتسمة: خلي لوز وسكر ياخدوا حصتهم قبل ماناكلوش معاهم حني
خليفة ضحك: مشت فيك حتى انتي
رقية: راكب عليهم ..كيف خطر في بالك بس
هما يهدرزوا.. وحليمة معلقة عيونها فالتلفزيون.. شوقها لمكة زاد عن قبل ومن توا بدت تحسب فالايام اللي يفصلوها عن اجمل واقع حتعيشه في حياتها..
على خشة بهية تقول فالسلام وهي مبتسمة..
•🌹•🌹•🌹•🌹•
في دار الحاج منصور..
كان كيف خاشلها ويمشي بمساعدة زقيته.. فرحان واساريره انفرجوا من السعادة ..كيف قعمز وتكا الزقية جنبه
خشوا الزوز من باب الدار وهما مبتسمات.. لما شافهم ضحك من قلبه وقال: عارفكم بتجوا اول وحدات..
قدمتله مريم الاولى.. باست راسه وهي تقول: مبارك عليك جديده والله حاسة روحي كأني اني اللي بنحج.. خشت في حضنه وكملت: فرحت هلبااااا
راوية كانت تتفرج بابتسامة.. بعدين جت قعمزت في جنب جدها وحضناته هي التانية: عندك علم يا جدي ماقدرناش نفتحوا الراديو ونسمعوا.. خفت مايطلعش اسمكم بعدها مايخلصهم مني واحد اللي دايرين رواحهم مشرفين
ضحك الحاج منصور ومريم ضحكت معاه
راوية بابتسامة حب: ان شاء الله مش اخر مرة جدي حبيبي ..نحس فروحي بنطير للسمي من الفرحة وطاة ربي مش سايعتني!
هو كان فرحان بفرحتهم ليه..
مريم بعدت عنه وابتسمت بشقاوة: ايه جديدي شن بتجيبلنا معاك ناوي..
راوية رفعت حواجبها: نبوا حاجة محرزة هادي حجة لبيت الله راهو يا حاج منصور
مريم وعيونها توسعوا بعدين ضحكت بحماس: حي يا جدي بيبدا اسمك حاج بالحاق قول وفعل!
راوية شبحتلها ورجعت عيونها لجدها اللي قال: اييييه الحمد لله اللي طعمنا وكتبهالنا من قال بعد السنين هادي كلها.. وكمل بابتسامة: ان شاء الله يوصلنا الله فيها طيبين ليكم مني اللي تبوه من غادي
ابتسموا بحب ومريم قالت: سلامتكم..مانبوش غيرها
راوية مبتسمة: حجتكم بروحها احلى هدية مش حنكسبوا اغلى منها
وهو كان يسمع بابتسامة
•🌹•🌹•🌹•🌹•
ومع مرور الدقايق امتلي حوش الحاج منصور باولاده واحفاده يباركوا وفرحانين.. كلهم يعرفوا انه يسجل من بداية التسعينات ومايحالفش فيه الحظ.. حاولوا اولاده يقنعوه بالعمرة لكن هو رفض يا اما حجة قبل يا لا.. مصكر دماغه وحليمة قالت رايي من راي شبانيا.. سلموا الامر بيد الله وقعدوا يستنوا بأمل ما انقطعش لين الحمد لله حالف الحظ اخيرًا..
•حطت صفرة السحور قدام خوتها ومشت بتجيب الميه..
حمزة قام الكاشيك وكلي اول لقمة بعد سمى
على خشة كمال خوه كان يتوضى.. قعمز معاهم عالسفرة وهو يقول: مش مصدق لتوا ان اسم جدي وحناي طلع فالقرعة..
زهير: علاش مش مصدق ..هو صح عطل الموضوع لكن فُرجت فالنهاية
ابتسم كمال وحمزة قال بعد بلع: قداش ليا ماريتش جدي هكي.. لما خشيت عليه مبكري عيونه يضحكوا نورة الحج باينة عليه من توا
ضحكوا خوته..
على جية خولة بالميه قالت: شن يضحك فيكم
حمزة شافلها: امي وبوي مايبوش ولا كيف؟!
ردت عليه: بوي من بكري تسحر ورقد وامي خدت تمرات وطاسة ميه ماخاطرهاش قالت..
قعمزت معاهم عالصفرة وخدت كاشيك..
زهير يحرك فالمكرونة ويقص في قرن الفلفل بالكاشيك: ماحسيتوش بيها تشبح لحمزة وتبتسم مرة مرة
كمال هز راسه بمعنى حتى اني..
حمزة وقف ماكلة وقام حاجبه: اشكرى اشكرى فكونا من حدف الكلام
واختهم تاكل وتسمع باهتمام..
زهير شبحله: من الاخر يا بوحميز شاك انها خنستلك
حمزة رجع ياكل: مش مدرقه اني.. كله قباله
خولة: مادابيك اصلًا تكون عارفة وعندها خلفية باش لما تفتح الموضوع قدام تكون متسهلة
كمال رقص حواجبه: خوخة ..يا خوخة مافيش صاعب على سبع البرومبة الا حاجة وحدة.. هو وشطارته كان يقدر عليها
حمزة ابتسم عالجنب: ارقد وماتخمم في شي يا كموله غير ضم الفلوس متاع النوبة باش ماتقولش ماوقضتكش.. وخليك واتي في اي لحظة
زهير ضحك وخولة ابتسمت وقامت حواجبها بحركة كأنها تقول ياعيني
كمال ياكل: انت تكم امورك والباقي عليا..
•🌹•🌹•🌹•🌹•
عند عيلة عمهم حسين..
بشير كان تعبان بسبب البني والعمال.. رقد بعد خدي طاسة اميه
اما خوته..
كل واحد براي واذواقهم مختلفة لابعد حد.. وكله على راس زمزم
واقفة فالكوجينة وقدامها صفر صغار الحجم: سراااااج.. تعال قيم سحورك.. وكملت وهي اتمتم: باهي اللي بوكم متسحر مع جدكم كان هدا معاش تحز لبعد الفجر.. حطت الطاسة من يدها والتفتت للباب وهي تنادي بأعلى صوتها: سرااااااج يا سفتول!
خش عليها ايوب لابس توتة شرط وشعره مبلول.. لما شافاته شهقت: نهاري مشطشط خيرك مدوش في هاللوايل! ..عقدت حواجبها وقالت بجدية: تعرف نلقاك فاتح المكيف نوريك! فكني من الرعايش ترا
ايوب يمرر في عيونه عالصفر وثبتهم على صفرة سراج الوحيدة الجاهزة لتوا: مايصيرلي شي اصلًا غدوة من الصبح بنطلع للكلية
توسعوا عيون زمزم وهي تقول: يا غبارتي وخلاص! تبوا تقتلوني بالعرق شوركم!
بينما هي تصرف هو قال: يام احسبيني مع سراج شكله مليح الطباهج
زمزم فقدت اعصابها: وعلاش ماتقولش كان توا! شن نسأل ونعاود من بكري اني اه! امتى بنلحق نعاود نديره الهم استغفر الله نعمة ربي .. وكملت بانفعال: قريب اطلعوني من الملة انتوا!!
طلع ايوب وهو يضحك.. خش لدار التقعميز لقي فيها شرف الدين يقلب فالتلفزيون بملل وعبيدة متلوح قبالة المكيف بكانتيرا وفي يده التليفون وابتسامة خفيفة جدًا ماتنشافش الا للي يركز مزينة وجهه..
انبلط بلط عالمندار وخوه قاله: بالشوية يا كلب
ايوب حدف عليه ريموت التلفزيون التاني جي على كتفه ..خدي شرف الدين المخدة وخبطه بيها على راسه
ايوب جو عيونه بالصدفة ع عبيدة اللي قاعد بنفس حاله الاول.. وكأنه الطحنة ماتصيرش حداه وحتى لما عم الهدوء ماحسش.. اشر بحواجبه عليه
شرف الدين التفت بعدين رجع عيونه لايوب اللي قال: شن في مافي؟!
وغمز..
شرف الدين قعمز في مكانه وقال: البنك المركزي هادا خليكم بعاد عنه ..اللي يبيه يديره
ايوب بضحكة: تي بخدمتك يا راجل ومازال تاخد منه ..وجهك زينقو كلا انت
شرف الدين مشى بيده على شعره اللي طول شوي كونه ماحلقش من اول رمضان: خوك هادا معبي لوح عليك الدوة الفاضية ..خل ندلع قبل لتجي بنت امها وتلف عليه وعلى جيبه
ضحك ايوب ..على خشة سراج بصفرته بعد شيط ريق امه باش جاها..
ايوب قدمله طول وبشهية قال: بتنجال وكوسة متشطشط فالزيت.. قلبي الصغير لا يتحمل
سراج: برا روح هونا عشاك غادي يا متاع بنتسحر عالخفيف.. برا ماتحلمش
ايوب ولا كأنه يسمع وشرف الدين تسهف حتى هو على منظر الطباهج وريحته ..زحف وقربلهم
سراج مالقاش مهرب..استسلم وقعمز زي الولد الطيب
ايوب بعد غمس بالخبزة قال: حقا يا عبيدة
ماردش..
ايوب: عبيدة هوووووه
التفت عبيدة ورد: خيرنا
ايوب طنش انه كان سرحان وماباش يناشبه: شن حقا كلام عريسنا بتبدا تخدم فالمطار وجو..
«عبيدة تخرج العام هادا من هندسة الطيران»
رد عليه بعد قعمز: تقدر تقول ايه..
سراج ياكل ويسمع فيهم.. وشرف الدين ابتسم.. اكثر من حيستفيد هو😂..
عبيدة حك رقبته وهو يشبح للصفرة..بعدين جي وانضم لخوته
المنظر هدا شافاته امهم بعد خشت بصفرته هو.. فنصت عيونها وقالت: مدامكم تبوا طباهج علاش ترهنوا فيا!!.. شبحت لشكشوكة الدحي بالقرقوش اللي دارتهوله وقالت: من بياكلها النعمة توا!!
شرف الدين وفمه معبي قعد يأشرلها بيده تحط الصفرة لوطا..
حطتها بنفاذ صبر وهي تقول: بغددتوني!
وطلعت بضم الماعين..
شرين تليفون شرف الدين.. مد يده للمندار وراه وشده بصوابعه الخنصر والبنصر والابهام
عبيدة ياكل: شكون؟!
فتح هو الخط وقال: طارق.. هااا ولد العم..هي تو نبعت سيرجو
المقصود شبحله بتفنيصة.. وهو اشرله يطلع يفتح الباب
وقف بعد قال: ان شاء الله سم كان تاكلوا عليا
ايوب حط في فمه لقمة كبيرة: ملّح..
صكر شرف الدين ورجع ياكل: قتله عبيدة يتوحم عالشكشوكة شوره خدي بعضه وجي يجري
ايوب بضحكة: اكيد ليلى ابصر شن مبلبزة هادا علاش جالي..
عبيدة تنهد بتصنع: وينك يا بشوره تجي تسمع.. وشبح لايوب مكمل: مرت خوك يا تافه
شرف الدين بغمزة: مش حُبًا في بشير لكن تلقيح متاع قدام تريصوا في دوتكم عالكبيدة..
ضحكوا الزوز ..
•🌹•🌹•🌹•🌹•
في حوش فتحي.. هو ومرته وبنته الصغيرة يتسحروا في دار التقعميز وفاتحين التلفزيون يهدرزوا ويحضروا مع السحور..
ودار بناته فيها بنته الكبيرة مع بنت عمها مريم..
مدايرات صفرة صغيرة فيها خفيف ..على وجوههم اقنعة ويتبادلوا فالكلام..
مريم: حايرة شن نشري وشن نخلي..
راوية تاكل: اني من رايي تركبي تركيب ماتاخديش كامل الا لبسة وحدة، باش اديري منهم كدا قطعة فهمتي.. انتي غير اختاري اللي يناسبك سراويل وقمصان وخلي الاوشحة والقربج التاني عليا نركبهملك اني.. ايه حقا وخودي عباية ولا اتنين تستحقيهم.. جلباب وبالطو يكون لونه يمشي مع اي شي باش ماتحيريش في تركيب الالوان معاه حتى هو.. وكملت بضحكة دلع: لكن لو بتشريه لون جريئ ماعنديش مشكلة نسقهولك اني
مريم بضحكة وفي يدها زيتونة بتحطها في فمها: وووه شن هادا كله تقول بنبتت!
راوية: زيدي اهزي مريومة.. ماشفتيش ليلى اول سيم كيف تبهدلت.. هدا غير وصوها البنات لكن دارت زيك بالزبط وقعدت تلحق بعدين شي لقاته وعشرة لا..
مريم اقتنعت: فكيني من التشحوير.. فكرت شوية بعدين كملت كلام: كله محلول لكن البالطوات ما اعتقدش ينزلوهم من توا مزال الشتي..
راوية: صح اي.. يلا مع 11 تو نفكرك ونطلعوا نلقطوا قطع .. وكملت تقول بحماس: عارفة انتي كل البضاعة كوم وبضاعة الشتي كوم تاني.. فضاعة!
مريم ضحكت بخفة بعدين قالت: زعما امتى نمشوا؟!..
راوية قامت كتافها ونزلتهم بعدم معرفة
مريم تحرك في حدقات عيونها وهي توزن فيها فدماغها: اممم.. تو نشوفوا البنات كان هدا يا اما اتفقنا وطلعنا كلنا يومين على بعض يا اما كل وحدة ادير رايها..
راوية: احسن راي.. كان هدا نرحم ماما من الطلوع تحسيها ماخاطرهاش .. وبضحكة كملت: اولامس تقولي انتي ذوقك حلو كان نوصيك تاخديلي بدلة العيد بروحك تهني..
ضحكت مريم وقالت: تعرفي بعد خطرها بيان رورو يوم سبعة وعشرين الطلعة الجماعية صايرة هكي ولا هكي.. طمني عمتي بهية معناها
راوية نزلت يدها اللي فيها كسرة خبزة: من الفرحة بقصة الحج نسيته! حي عليك يا راوية مازال نبوا قفاطين نسيت موضوعهم بكل!
مريم حتى هي راح عن بالها وقالت: زعما نلقوا في رمضان..بضاعة المناسبات ديما قبله او بعده
راوية: مادخلنيش لو كان نمشي لسانيتهم نخليهم يدبرولي في قفطان
بنت عمها قعدت تضحك
وهي مكملة وفي طيف ضحكة على فمها: ماقاللهم حد يخطبوا في رمضان خلي يتحملوا!
فجأة ضوت شاشة تليفونها وشرين بنغمة الرسالة.. مريم كانت لاهية تاكل وماقامتش عيونها للتليفون
بس راوية كأنها تفكرت حاجة ناسيتها.. قامت التليفون وهي تقول: تؤ.. فتحت الشاشة وخشت عالمسج قراته وبدت تكتب فالرد: تعرفي عبيدة بعتلي ونسيته لهيت معاك
مريم ابتسمت ابتسامة حلوة وشبحتلها: شن قالك
راوية بعد كملت كتيبة نزلت الهاتف جنبها: يسأل عن مشية السوق شن بيصير فيها ومع من بنطلعوا.. ضحكت وكملت: خايف يوقع عليه الاختيار..مست براس بنانها الماسك تشوفه فيه جف او لا ومكملة: المهم قعدنا نهدرزوا وسأل ع القراية وهكي ..شقلبت عيونها وميلت فمها بابتسامة وهي تقول: طبعًا مايخلاش الامر من برادته عارفة انتي..
مريم كانت تسمع باهتمام وهي تتفحص في ملامح بنت عمها.. تمنت تلمح لمعة في عيونها او ابتسامة فيها حاجة مختلفة ..اي شي يدل على ميولها لعبيدة بالذات بعد قعد يتقرب منها بزيادة الفترة الاخيرة تمهيدًا للاعتراف..
لكن مالاحظت على راوية شي..
•🌹•🌹•🌹•🌹•
انفتح باب الحوش وتصكر..
خش ونحى من رجليه بعدين كمل طريقه وحاس بالتعب والارهاق.. في رمضان وبسبب الزحمة اضطر يداوم اكثر من المُتفق عليه لكن رب عمله مابخسش حقه ودارله زيادة..
فريال بعد روحت من حوش جدها سخنت حاجات من الفطور ورقدت طول.. وتغريد عالتلفزيون..
اما صبري ووسيلة وعليا.. الزوز في الصالة مدايرين صفرة حاجات حارة وشربة..
خش عليهم ابراهيم: السلام عليكم.. صحة سحوركم
ردوا عليه بتفاوت: وعليكم السلام.. سلمك
وسيلة: زود تسحر والله الا شكلك ماكليت حاجة من الفطور
ابراهيم: زحمة اليوم كتف فالكتف
صبري شرب طاسة العصير: ربي يعاونكم
وسيلة وابراهيم: آمين
مشي للحمام غسل وجي قعمز معاهم..
عليا بعد كلت لين انبشمت: اااه الحمد لله.. بنوض نرقد شوية يذن الفجر فيقوني
ووخرت عن الصفرة..
صبري: مرة اتنين التالتة بالميه..
ضحك ابراهيم..
وعليا ردت: حاضر بابا.. وعد انوض طول
ومشت تجري باش تلحق ترقد ساعة..
صبري ابتسم: ماسمعتش بجدك وحناك مالا؟!
ابراهيم سيب طرف الطاجين وقام عيونه في بوه بحواجب معقودة: خيرهم؟!!.. ارتخوا ملامح وجهه وقال كأنه تذكر شي: تي اليوم خمسطاش!! قصدك طلعوا فالقرعة ولا اني فهمت غلط!
قالها بنبرة فرح..
بوه رد عليه وهو مبتسم: فهمت صح ..الحمد لله ربي حن عليهم وطلعوا الزوز مع بعض
ابتسم ابراهيم بسعادة وقال: سبحان الله..
ورجع ياكل ومرة مرة يسأل في بوه عن ردة فعلهم بعد عرفوا وجده وحناه.. وصبري يسرد فاللي صار بالتفصيل وعلى لسان خليفة عاود كيف كانت حالة منصور بعد طلع من الجامع..
ابراهيم ياكل ويسمع وهو مستمتع.. بعدين صبري بدا هوا يسأل في ابراهيم عن المحل وصاحبه وشن اموره معاهم كعادته ديما.. وولده يرد عليه..
وسيلة لقتها فرصة ذهبية لا يمكن تتكرر.. جوه حلو وفي حضور بوه تقدر تنزل عليه اكثر ..ماترددتش لحظة وقالت: ابراهيم ولدي..
شبحلها هو وسألها بعيونه بمعنى خيرك.. فمه كان مشغول بالاكل
وسيلة مسحت على رجليها: مش مفكر تتراجع عن قرارك سلم ولدي وتسجل فالكلية.. اهي امورك متيسرة الحمد لله وقلت الراجل معاش يقدر يستغنى عليك .. بعدين مش اول واحد يقرا ويخدم مش هالحاجة الصعبة..
صكرت عليه من كل الجهات.. معاش خلتله حجة
صبري اقتنع بكلام مرته وغير عيونه لولده: صح كلام امك.. تقدر اديرهم الزوز تاخد شهادة وتخدم مابيتعاركوا
ابراهيم طارتله وتكنطى.. فهم حركة امه لكن قال بهدوء عكس ماهي توقعت: في فرق.. ماهو اني شن قلتلكم قبل ..خاطري ندير تجارة ونبزنس منها مانبيهاش لمجرد مصروف يطلعلي مانمشي بيه يومي .. زي عمي جمعة يعني
وسيلة قامت حاجبها والدموع في عيونها: والزبير مش زيك! الولد قري وخدم مع بوه ماطرت عليه حاجة ..العلم كويس يا ولدي
ابراهيم يحرك فالرز الابيض بالكاشيك بدون مايحط عيونه في عيون امه: الزبير مش زيني يام ..هو لقي حاجة وجي شدها لكن اني مازال قدامي مشوار طويل ماينفعش نخلط عليه سريب كلية ..وبمرارة كمل: لا ومش اي كلية والسلام.. كلية الطب!
صبري فضل ينهي النقاش لما عرف ولده متمسك بقراره: خلاص دير اللي تريحك لكن عيني عليك ديما راهو..
وسيلة معاش قدرت تزيد حرف.. خدت طرف الخبزة المحشية ونتشت منه..مضغاته وهي متألمة على حال ولدها وين كان ووين صار.. نزلت اللقمة في بطنها زي السم..
اما هو.. كمل ماكلته رغم النية اللي طارت.. لكن ماقدرش ينوض.. اولًا باش مايثيرش غضب امه وثانيًا لان بوه مايحبش اللقطات هادي اللي يسمي فيهم.. دلع وتنتوير
•🌹•🌹•🌹•🌹•
من اجواء رمضان في ليبيا لاجواء رمضان في مصر..
بعد التراويح عيلة الصادق كانوا يدهوروا فالاسواق.. معروفة مصر في رمضان عالم تاني.. بضعوا وديما اللي تزهى في عينها تاخدها.. ماتعودتش تشد ايدها كبرت بالطريقة هادي..اصغر وحدة والمدللة فالعيلة
وهي تتبضع فكرت في راجلها وابتسمت بحب.. شافت حواليها لقت امها قريبة منها وتتفحص في البضايع.. اما خوها اللي جايبهم كان بعيد شوي لكن عيونه معاهم
بوها عنده عزومة سحور شبيهة باجتماع العمل.. النوعية هادي من العزايم تصير باش يا اما يتناقشوا حول صفقة ما او لغرض يتعرفوا المعازيم من رجال الاعمال على بعض وتنشأ بين اللي يتفاهموا منهم علاقة عمل ليها خطط مستقبلية.. يعني حاجات روتينية للصادق مهما دار روحه في عطلة مايقدرش يتفلت منهم.. طبيعة شغله تحكم عليه..
بالنسبة لخوها جمال كان مع اصحابه ..قعد اكثر وقته يطلع معاهم وانسجم معاهم المرة هادي اكثر كونها ثاني مرة ومرحلة التعارف عدت خلاص.. معروفين الشباب ينطلقوا مع بعض بالسرعة بالذات ولاد بلادي😁..
الاجواء حلوة لكن عبدالرؤوف مانعهم من اكل الشارع منعًا باتًا اما معلب او لا.. توسلت ديما وحتى من مريم سهفها المنظر لكن هو شي شي..
عبدالرؤوف: ماعندكنش مشكلة تفضلن اشرن اللي تريدنها! لكن تحملن شن يجيكن من وراها.. تي عفن عفن كان تحقن كيف يديروا فيه تعافن البلاد كلها!
ديما فيها طبع ..ماتتحملش حساسة بزايد.. لما تخيلت قعدت تتباوع
مريم شدتها: هيييه.. ناعلي
عبدالرؤوف فلت عيونه: كنك.. خدي شيشة الاميه من يد امه وقعد يفتح فيها بسرعة: امسكي روحك فكينا عاد قدام خوتنا المصاروة
كان يقول هكي بغرض تنسى اللي تخيلاته .. فتح الشيشة ومدهولها تشرب منها
شربت وحست روحها احسن.. رجعتهوله وهي تقول: خلاص حاسة روحي احسن
مريم تتفحص فيها بعيونها: متأكدة؟! مش كلام وتفوتي فينا بيه
هي ابتسمت: والله كويسة الحمد لله.. غيرت عيونها لرؤوف اللي صكر الشيشة: الله يسامحك بس
ضحك: تي شن دويت نا.. تميتي تخوفي فيا قريب نحبسك فالحوش ..تتأثري من كل حاجة ونحنا مش مفرطين فيك
مريم ابتسمت..وديما كذلك..
كملوا طريقهم وهما يهدرزوا..ديما حرمت تشبح جهة اكشاك الماكلة وعبدالرؤوف حرم يجبد اي سيرة اصلًا..
خشوا لمول وقعدوا يدهوروا فيه.. ديما تاخد وتشري وعبدالرؤوف يخلص وراها ..لما يشوف حاجة مميزة وحلوة طول ياخدها لصفاء.. الفضة المميزة متاع مصر واللبس والهدايا.. حسب ريما حتى هي..واخيرًا وقف قدام محل خاص بملابس الاطفال
التفت لامه وقال: بالك بتاخدي شي حاجة لعيال يحيى وخالد
مريم شافتله وابتسمت: ايه اكيد..
خشت للمحل وقعدت توازي.. عبدالرؤوف بتلقائية التفت جهة ديما لما معاش سمع صوتها.. لقاها واقفة على بعد خطوات منه قدام محل رجالي.. لما التفتت تفاجئت بعيون خوها عليها.. طول نزلت راسها ووجها تلون بلون الطماطم من الاحراج..
كانت حتبرر لكن هو سبقها وقال: تمي هنا عند نجيك..ماشي؟!
دوب ماهزت راسها..
مشي عبدالرؤوف للمحل اللي كانت اخته تتفرج عليه.. وهي باحراج قعدت اتمتم: كيف مازال بنحط عيني في عينه! متاع كشايف نا من يومي!
وقفت تأنيب نفسها لما لمحت امها تأشرلها تجي.. مشتلها طول
وعبدالرؤوف.. خش للمحل واختار ساعة رجالية قنينة وفخمة.. غلفها وحطوهوله في كيسة وخدي لروحه كم حاجة.. بعد كمل مشي لمحل الاطفال لقي امه واخته حايرات شن ياخدوا وشن يخلوا.. ابتسم عالجنب ابتسامة خفيفة وحلوة هلبا..
•🌹•🌹•🌹•🌹•
ومن صبح تاني يوم كانت سعاد عند اماليها خاشة بالحلو والزغاريط.. لما سمعت ماصدقتش وذانها خدت بعضها هي وبنتها اللي روحت اليوم اللي قبله وولدها الصغير.. ومشت طول غادي قعدت للعصر وروحت مافطرتش معاهم على خاطر معزومة مع راجلها عند صحابه..
•🌹•🌹•🌹•🌹•
اليوم اللي بعده..
الساعة 11:20 صباحًا.. جامعة ناصر..كلية الاقتصاد والعلوم السياسية..
طلعت من القاعة بعد كملت المحاضرة وجنبها صاحبتها يمشوا ويهدرزوا..
:اخرتها يطلع من الشيت ونندموا على الجية هادي..
ياسمين: اني مش حارقة اعصابي بنجي نحضر وخلاص جاوبت باهي ماجاوبتش نخلي روحي باردة.. وبالنسبة للكوجينة قداش ليا نكعور ونعطي للاعور
ضحكت صاحبتها بعدين قالت: نسقطوا المادة بكرامتنا خير واضح ناوينا اللي شن بيقول عليه فمي.. يحسابها فلاحة
ياسمين: تسقطي عينك والله مارايحة غير عليك..تصفيها حتى عالحافة خير ماتقعدلك والله اعلم السيم الجاي شن تلقي قدامك..
تنهدت البنت: لولا درجات الحضور ماقصيتها خطوة
ياسمين: يلا مازال وحدة ونتسقدوا على حالنا ..
وهما يمشوا طالعات لبرا ..لفت نظر ياسمين واحد لابس سروال جينز ازرق ومن فوق تيشرت ابيض فوقه جاكة خفيفة قهوية وفي رجليه سبيدرو ابيض.. خاش لواحد من الاقسام مع ولد تاني في جنبه
لما تأكدت من هويته ابتسمت بعقدة حواجب..
وصاحبتها سألت: خيرك تشبحي غادي؟!
ياسمين رجعت عيونها قدام: شفت حفيد عيت جيرانا..
:باه؟!
ياسمين شادة دفاترها وتحرك في يدها عليهم: استغربت جيته وهو قداش ليه متخرج.. ابتسمت وشبحت لصاحبتها: هداكا اللي فالسيم الاول سلمت عليه.. اشقر وضعيف شوية
:ايه ايه تفكرته.. مرات جاي بيقدم على امتحان الماجستير ولا بيبدا معيد
ياسمين مبتسمة: اني سمعت انه بيكمل برا
:خلاص امالا جاي ياخد وراق من هنايا.. وبتذمر كملت: الواحد يفرح طلع منها الا غصب عنك تولي!
ياسمين ضحكت عليها..
•🌹•🌹•🌹•🌹•
في السانية..
يومتها الجو سخون شوية..
بدوا النساوين ينقص الحماس عندهم وينخفض عدد الانواع الحاضرة على سفرة الفطور يوم عن يوم..
رقية كانت شادة مصحفها وتقرا فالختمة اللي فاتت نصها .. بوها وامها في دار المعيشة يهدرزوا والتلفزيون عالجماهيرية هالمرة..
خليفة في الخدمة مالاش هلبا طالع..
كملت قراءة صكرت المصحف وناضت رداته في المكتبة.. بعدين خشت للدار وهي تقول: ماتبيش حاجة معينة اليوم بوي..
هز الحاج منصور راسه: كله خير وبركة..
حليمة: كان هدا ديري فركاسي ومعاه شربة عدس وكفتة بالبصلة.. ساد
سمعوا صوت الباب المردود ينفتح..رقية طول قالت: هادي وحدة من البنات
وبالفعل ماهي الا ثواني وخشت عليهم خولة.. سلمت على حناها وجدها وبعد قعمزت شوية ناضت مع عمتها بتفرم اللحم
خولة متكية بيد عالرخامة والتانية في نصها وتسمع لرقية اللي تقول: اني تفاهمت مع خليفة لكن نبوا سيارة تانية مع سيارته مش عارفة شكون من الاولاد بيقوله
خولة: حمزة لا تربحوا قولوا لاي حد غيره
ضحكت رقية وقالت: كلمي عمك بعد يروح
انفتح باب الكوجينة وخشت منه فريال وصوتها سابقها: من بتكلموا انتي وياها..
رقية ابتسمت: نحكوا على طلعة السوق
فريال قعمزت على ركابة الدولاب: اكرولنا حتى مصري يرفعنا المهم نمشوا ..
الزوز قعدوا يضحكوا وخولة قالت: غير شن لازنا بس
فريال وقفت ومشت للدواليب: خاطري في باسطي.. متاعي القنين هداكا اللي زي النشافة ونحط عليه مربى المشمش متاعي.. بشهية كملت: حي وحي
رقية: صايمين يا قردة معاش تدوي هكي..
خولة: غير اسمعوا .. وصيتكم راهو!
رقية: تو نكلم خليفة حاضر
قعدوا يهدرزوا وفريال معاهم وهي اطلع في مكونات الباسطي..
سمعوا صوت حد مع حناهم وجدهم بعدين اختفي وجي في مكانه صوت خطوات كل مالها تقرب.. لين بان صاحبها: شن فطورك رقية
التفتوا التلاتة وكان حمزة.. يبان طايرتله وحواجبه قريب تخش في بعضها ..حالته الطبيعية وقت الصيام
رقية استغربت وجوده في هالوقت من النهار: مش فالمحل مفروض توا حميزه
هو رد: زهير شاد اليوم..
رقية وقفت الفرامة وابتسمت: يا سيدي بندير شربة عدس وكفتة وفركاسي ومرات نزيد مبطن
هز حمزة راسه وهي كملت: فاطر هنا؟!
حمزة: مرات.. شن بديري انتي؟!
قال كلامه موجهه لخولة اللي ردت: طبيخة بازيليا وقارب حار وسويسرول دجاج..ومفيدة بتنزل خبيزة طن وشيش طاووق
حمزة: ديري منه صونية وجيبيه هنايا بعدين
خولة: حاضر..
هدا كله تسمع فيه فريال وهي تحوس على كيكتها.. باين انهم فاطرين هنا الليلة
فجأة وبدون مقدمات طفت لامبة الكوجينة..
رقية قامت راسها باستغراب: شكله التاكو نزل ..غيرت عيونها لولد خوها وكملت: شوفه حميزه
طلع هو من الكوجينة ويسمع في اصوات جده وحناه يتسائلوا عن الضي..
خولة: هي مالا ني بنروح عاجنة بريوش يادوب نلحق نديره.. بايات على قولتك فراولة
مشت هي للباب ورقية وفريال ردوا عليها: بايات.. مع السلامة
رقية عقدت حواجبها: خيره لتوا مافتحش التاكو؟!
فريال شادة المضرب الكهربائي وتستنى امتى يولع الضي بش تشغله: اهو صابرين
•🌹•🌹•🌹•🌹•
: وصال امشي شوفي التاكو كله فوق ولا في وحدات نازلات
وصال نزلت من على كرسي الكوجينة اللي نظام بار وخشت لراوية: اربطيلي حزام قفطاني
راوية بانزعاج: غير بري توا الكيكة تبي الفريز!
بهية: فيسع يا بنتي سقدينا.. حتى بوك مهناش
مشت وصال وهي اطنفر وفي خاطرها «اهم حاجة كيكة عبيدة اني لا وليت!»
مشت وين مافي مفاتيح الكهرباء ..دققت غيهم كويس لقت كل شي طبيعي وزي العادة مما يعني انه مش ماس كهربائي زي ماظنوا
جتهم تنقز وهي تقول: كلهم فوق ماما
بهية عقدت حواجبها: كيف هادي؟!.. غيرت عيونها لبنتها الكبيرة وكملت: ترا امشي انتي راوية
وصال: كبيرة اني راهو شن تحسابوني عيلة تتأكدوا مني!
مشت راوية ولقت نفس اللي لقاته وصال.. جت قالت لامها
بهية: اطلعي شوفي باقي السانية.. زعما كلنا ولا شني؟!
راوية خدت طاجين الكيكة الباردة اللي كيف كملت تجهيزها: بنرفعها معاي هادي مرات عندهم ضي نحطها غادي
لما طلعت راوية برا الحوش شافت حمزة وجدها كيف خاشين من بوابة السانية.. مشتلهم تجري: جدي جدي.. عندكم ضي؟!
التفت الحاج منصور وقال: لا قاص يا بنتي يصلحوا في بالو ليتريك راس الشارع.. قالوا نص ساعة ويفتحوه
راوية تأففت: قصدي شن الجو اللي يديروا فيه معقولة يقصوه في رمضان شن الاستهتار هادا!
منصور: تصليح عادي .. بري انتي تريحي فيما جي باهيو
ابتسمت راوية وتنهدت: ان شاء الله..
كمل هو طريقه لحوشه اللي سبقه ليه حمزة.. وهي ولت لحوشهم بتقول لامها اللي عرفاته..
•خش حمزة للكوجينة وتلقاته رقية طول: وينك لتوا حميزه؟!!
حمزة: يصلحوا في بالو ضي نص ساعة بالكثير ويجيكم
فريال عقدت حواجبها وقالت: شن هيا؟!.. شبحت للصونية متاع المكونات وهي تقول: بيقعدوا هادو هكي ولا شني؟! يخربوا!
رقية: اضربيه بيدك وخلاص.. وهما التانيين وقت تصليحاتهم!.. غيرت عيونه للفرامة الكهربائية وندمت انها ما استعملتش اليدوية..
فريال: والله ماعندي ليها جهد ..تبي ساعة باليد باش يذوب السكر!
خدت الصونية باستسلام بعد طلعت المشبك اليدوي..بدت تخلط وتخلط..
حمزة بدون مايشوفلها: جيبي جاي
فريال شبحتله.. بعدين مدت الصونية وهي مبتسمة بفرح: قصدك بديرها عليا؟!!
حمزة قعد يخلط بعدين قال: مانحبش التنقريز..
رقية تتفرج ومبتسمة وفي خاطرها تقول: كان تشوفك المسكينة خولة
كمل في خمس دقايق
فريال خدت منه الصونية وهي تشبح فالقوام: الله يبارك حتى كان درتها بالمضرب الكهربائي راهي ماطلعت هكي.. التفتتله وقالت: شكرًا بوحميز
حمزة: العفو..
وطلع من جنبهم للمربوعة..
بعده على طول خشت راوية وهي تضحك بعدم تصديق: هادا نفسه حمزة اللي طول الصيام يدور في راس من يعشش خلط الكيكة!
فريال ضحكت: ريتي ولا حتى اني انصدمت.. هو فالصيام ماينقربش ولا يحب يكلم حد
راوية مبتسمة ابتسامة ليها معنى: ايييه.. وغيرت الموضوع تقول: شن العفسة هادي اللي داروها فينا؟!
رقية: اسكتي بالله خطر عليهم التصليح كان اليوم
راوية: اني درت الكيكة وحطيتها فالفريز وخلاص.. امتى مايجي تجمد
فريال ضافت الدقيق والخميرة عالخليط: مازال المغرب تو تجمد بالراحة
رقية: غريبة مش معاك مريومة
راوية قعمزت على ركابة الدولاب: اليوم عمتي خديجة بتعلمها ادير الضولمة بروحها هادا علاش.. اما اني ماما قالت نوعين مع الشربة يجي الضي ونمشيلها..جو عيونها عالفرامة وصونية الهبرة المغطية جنبها: تشحيطة يا رقية
ضحكت رقية وردت: الله غالب ماعنديش حمزة يدير عني اني..
راوية ضحكت..
فريال تصب فالخليط فالطاجين: الراجل كسب اجري والله يدي تتشنج كان هدا.. مش زي انتي
رقية بضحكة: ايه لا مش زيني بكل بكل
فريال شدت الطاجين: تو هادي وين بنحطها.. قامت راسها لعمتها وبنت عمها بتساؤل: شن رايكم نفتح كوشة الغاز اللي فوق فالمخزن؟!
رقية: ريحي روحك فراولة تو الضي على جية.. كوشة الغاز واعرة وتبي من معاك فيها
وبالفعل على كلمتها ولع الضي.. رقية ولعت المفرمة طول وفريال مشت تجري للكوشة بتعلقها فالضي..
اما راوية طلعت من باب الكوجينة ومنه لباب الحوش بتروح تعاون امها.. وكل ماتذكر منظر حمزة كيف يضرب فالمكونات تضحك
•🌹•🌹•🌹•🌹•
في بنغازي..
صفاء وخواتها وامها فالكوجينة يوتوا فالفطور..
برنية: اااه.. نا بنعدي نصلي العصر حتى انتن كملن بيش تصلنه مايرجاش العصر بالذات
ومشت طلعت برا الكوجينة..
: قطعي رقيق رقيق..
:باهي
صفاء غطت الطنجرة: راكن تنسن طاجين البيتزا متاع بوبكر ..عارفتنه مايحبش الجبنة
: يييي قبل راح عن بالي
: اسمعن..
خواتها اللي شبحتلها واللي انتبهت معاها بسمعها..
: حسيت بوبكر هالايام من بعد الفطور يقفل عليه الدار ويبقى بالساعات جوا
صفاء: يكلم في مرته طبيعي
: لا صفيوه انظني اختك قصدها انه مولي يكلم فيها واجد غير عن اول ماعقد عليها
صفاء بتفكير: اممم صح.. في البداية كان عادي
: خلن عنكن بوبكر توا واشقن بالفطور خير ماباتي يورينا بروحه متعقد اليوم..
صفاء قعدت تتحرك باستعجال ..وخواتها مش اقل منها
•🌹•🌹•🌹•🌹•
على الفطور..
موجود في حوش الحاج منصور عيلة صبري وعيلة منصور وعيلة حسين.. ونور كذلك جت قبل الفطور بشوي ..
والهدرزة كلها كانت عن عملة الضي اليوم..
بعد صلوا المغرب حطولهم العشي..
•في الكوجينة..
فريال: الحمل محليك يا ندو..
ناديا ابتسمت: حقا؟!
نور تتفرج عليها وتاكل في طرف كيكة اسفنجية: تهبلي طالع عليك كأنك اول مرة
ناديا قرصتها من خدها: انتي اللي تهبلي يا غزالة..
فريال: هيا تعالوا نتعشوا زمزومة مدايرة حتة رز بلاو حاجة ماصارتش
ناديا تشهت.. وطلعوا الزوز مع بعض
اما نور قعدت تاكل فالكيكة طرف ورا طرف لين انفتح باب الكوجينة اللي على برا وخشوا منه مريم وراوية يضحكوا وفي يديهم صواني..
نور: تعالوا ذوقوا هادي زي الريشة تهبل
راوية: عمايل يدين حمزة ولد عمك
نور وقفت مضغ وشافتلها بعدم فهم..
ومريم تضحك..توا كيف كانت راوية تحكيلها: يا حنة..
وقالتلها شن دار حمزة الصبح..
راوية: بكري حسيتها زي اللي انتبهتله
نور بضحكة: طيب فينا
راوية شافتلها: مش متأكدة لكن ردة فعلها المرة هادي مش زي قبل
مريم ابتسمت ورقصت حواجبها: مرات..كان حنينة ورقت
نور بصدمة: احلفي؟!! وووه حناي مايفوت عليها شي وانتي تحسابيها ماتندري بحاجة! كيف زبطوها عرفت انتوا؟!
مريم: يا حنة شورها عمتي ذهيبة جبدتلها سيرة خطبة حمزة وحناي قالتلها ولدك يبي فريال .. بضحكة كملت: صبرت يومين وشدت خولة تتأكد منها
راوية كملت على مريم: طبعًا خولة توقعتها تسأل وقالتلها الكلام صاير وحمزة يبي الفراولة
نور حطت يدها مكورة على فمها وتضحك: افلام
هما الزوز ضحكوا..
•ومن بعد العشي جي وقت التراويح طلعوا العيلة كلهم باش يصلوا..
ولما روحوا ..قاللهم خليفة ان الطلعة حتكون غدوة فالنهار باش ياخدوا راحتهم.. يفطروا فالسيارات ويكملوا فالليل.. والبنات وافقوا بكل سرور
•🌹•🌹•🌹•🌹•
في نفس الوقت في بنغازي..
ڤيلا الصادق العقوري اللي حاليًا مافيها حد غير الخدامة زينات.. رادة بالها منها واضم فيها..
كانت في دار التقعميز تلمع فالروشن متاعها.. كملت وكان اخر شي خلاص قبل ماتبخر..
تحركت للكوجينة حطت فحمة حجرية عالنار ووقفت تراجي فيها
فجأة سمعت صوت الارضي يشرين فالصالة.. طلعت بخطوات سريعة وتوجهتله.. لما وصلت فالطاولة اللي هو محطوط عليها قامت السماعة وردت: الو..
: ايوا السلام عليكم
زينات: وعليكم السلام ورحمة الله.. مين معايا؟!
: هادا رقم مريم ولا؟!
زينات: ايوا ده رقم بيت البيه صادق ومراته مريم..
: سلم فمك هو هادا الصادق.. معليشي ناديلي على مريم نبي نكلمها ضروري
زينات: الست مريم مسافرة مع جوزها وولادها..
: ان شاء الله مافيش سو بس؟!
زينات: لأ مسافرين اجازة كده ومش راجعين لحد اخر الشهر لو في حاجة ضروري تقدري تقوليلي واما ترجع حبلغها
: خسارة.. باهي لما تروح قوليلها اتصلت بيك وردة الهمالي.. ضروري هلبا
زينات: حاضر بس حضرتك مين يعني بلا مؤاخذة ماتفهمينيش غلط.. مثلا صاحبتها او كده يعني على شان بس اقولها
: انتي غير قوليلها وردة الهمالي تو تزبط بروحها.. واكدي عليها تكلمني ضروري ماشي؟!
زينات: ان شاء الله..
: هي السلام عليكم
زينات: وعليكم السلام..
نزلت السماعة ردتها مكانها.. ومشت باش تجيب الفحمة وتبدا تبخر
•🌹•🌹•🌹•🌹•
اليوم اللي بعده.. طلعوا حفيدات الحاج منصور مع عمتهم للسوق واللي رفعهم خليفة وعبيدة..
اختاروا مع عمتهم قفطانها وخدوا كل شي لازم ..بعدين التفتوا لرواحهم وشروا حوايج العيد.. ومريم وراوية خدوا للكلية كذلك
كان يومهم طويل هلبا.. طالعين من العشرة الصبح وماروحوش للسانية الا قرب الفجر..
نزلوا الاكياس وخشوا لحوش جدهم..
حليمة تمرر في عيونها على وجوههم: حليلي باين فيكم التعب..
خليفة: اني بنرقد خلاص..
ومشي طلع من حداهم..
رقية تأشر: ترا تأكدي من الكيسة متاع الصنة جبناها ولالا..
مريم قعدت تفتش فالاكياس هي ونور..
وفريال قالت بضحكة: حاطة فيها رقم يخلع
ضحكوا البنات والتعب غالب عليهم.. متلوحات على بعضهم
مريم اشرت لرقية بالكيسة..والاخيرة هزت راسها
حليمة: نوضوا كان بتتسحروا بالكم الاذان قريب!
خولة: خدينا فالطريق يا حناي ..
هزت حليمة راسها
رقية: انتم من دارلكم السحور؟!
حليمة: نساوين خوتك، طلعوا قبلكم بشوي.. عقدت حواجبها وقالت وهي تتفرج على حفيداتها: راوية وين؟!
شدوا البنات ضحكتاهم وهي ركزت عليهم..
فريال وهي مبتسمة: اهو نقولك يا حلومه ..راوية زي بشكوط الشاهي لدنا شوية الوجه راح احمر والعيون بيتسكروا.. اول ما روحنا درسلها عبيدة على حوشهم نزلها غادي بالسيف..
حليمة: صايمة وحتى ماكلتها تنقيش البنت هادي..
رقية فكت وشاحها وقالت: هادا غير حوايج الضيافة بياخدوهم خديجة وسعاد كان هدا راحت ليل..
ليلى: اني مازالي غدوة بنطلع بالتوامه ناخدلهم
حليمة شافتلها: انتي اميمتك مرزنة يا رويحتي ربي يسهل عليها ان شاء الله
ردوا باصوات متفاوتة: آمين..
على خشة عليا في يدها كيكة اسفنجية تاكل فيها.. جت وقعمزت جنب نور وهي تسأل في حناها: شكون دار الكيكة هادي حنينة؟!
حليمة: ماندري.. يا كلثوم يا زمزم وحدة منهم بقولي
عليا قربت لنور وبضحكة خفيفة وشوشت: كيكة حمزة ولت الوصفة رقم واحد
نور بتفنيصة ضحكت: اسكتي تو تطرف على وذنه يورينا!
والتفتوا الزوز لما بدوا البنات يوروا في حليمة شن شروا وانضمولهم..ناضت كل وحدة لحوشهم بأكياسها بعد صلوا الفجر..واتفقوا يجوا ينفضوا الحوش بعد غدوة..
ويجي بعد غدوة.. ويلتموا البنات في حوش جدهم باش يضموه ويجهزوا للبيان.. بينما الكناين كل وحدة في حوشها ادير في نوع حلو باش يقدموه.. الولاد واللي قصدي بيهم العشاق منهم يحاولوا يبتعدوا قدر الامكان عن اي منطقة يتواجدوا فيها سلطانات قلوبهم💞..
بالنسبة للزبير مزال اقامة في حوش جده.. واليوم جوا امه وخوته
•في المخزن..
مريم وراوية ونجلاء ينكتوا فيه..
راوية تكح: شن هوا اللي قالت عمتي نزلوه؟!
مريم تنفض فالشرشاف المغطيات بيه الماعين: قعاد مسقي..وتبينا نقربوا الطناجر الكبار للباب
نجلاء تحرك في يدها قدام وجهها: التراب خش في عيوني
مريم شافتلها: بالك على خاطر دار خزين؟!.. وكملت: نجلاء بلا دلع عاونينا باش ننزلوا فيسع!
راوية زفرت بنفاذ صبر ومشت لصواني مستفات فوق بعض: مريومة هادم متاع مسقي؟!
نجلاء جت تشوف فيهم ..ومريم قالت: اعتقد اي.. مش غارقات هلبا ولا؟!
راوية: ايه
مريم: نزلوهم معناها..
وجت للمقفول الكبير باش تغير مكانه..
راوية قربتلها: هاتي نقيم معاك نحركوه وحدة وحدة
قاموه الزوز بجهدهم.. ومشوا بيه جنب الباب..
نجلاء وقتها بادية تنزل في صواني المسقي لوطا..
مريم وخرت وقالت: ويري كان تنزلي تجيبي المكانس فيسع فيسع.. وصيت نجلاء عارفتيها مخفوقة شكلها نستهم
راوية وهي طالعة بضحكة قالت: مالقيتي من توصي حتى انتي..
هي مشت ومريم بدت تحول فالماعين المستفات على سكفاريات حديد.. اغلبهم كان يا اما للمناسبات او قديم هلبا لحناهم..
نزلت مجموعة.. في هالوقت راوية ركبتلها بالمكانس بعدين قالت: جبتي مناشف؟!
مريم التفت: لالا..كله وصيت عليه نجلاء
راوية: ننزل نجيبهم ونجيب ملمع
مريم بصوت مسموع: ردي بالك تجيبي واحد صنته قوية
راوية من الدروج: حاضر..
نزلت راوية ونجلاء ركبت من جديد جابت باقي الصواني..
مريم شبه كملت السكفاريات.. وهي تحول فالماعين شافت صندوق كبير شوي وشكله مميز.. عقدت حواجبها باستغراب
لما جت بتحركه ماقدرتش..
خشوا عليها نجلاء وراوية مع بعض
مريم لما حست بيهم التفت: تعالوا شوفوا
الزوز قربولها وراوية قالت: شن هادا؟!
مريم قوست فمها بعدم معرفة ورجعت ابتسمت: مش عارفة لكن عجبني شكله من برا..
نجلاء: اول مرة نشوفه.. وبفضول كملت: زعما شن فوسطه؟! افتحي مريم
مريم حطت يدها على الصكارة متاعته وفتحتها..بان عليهم سرفيز اكل كامل..
مريم ابتسمت باعجاب: كأنه من القرون الاوروبية القديمة.. ايام الملكة فيكتوريا
نجلاء تتفرج وحتى هي عجبها: اني مانعرفش فالتاريخ لكن باين عليها قديم بس يهبل
راوية ابتسمت: صح، شكله متاع حنينه..
مريم شبحتلهم: تعالوا نسألوها عليه.. حتى الباكو متاعه مش زي تحسيه مميز هلبا
راوية: نكملوا المخزن وننطلقولها
مريم صكرت الصندوق وهي تقول: هكي بيصير
وبدوا التلاتة يضموا ويكنسوا..
•لوطا..
فريال في دار الاستقبال تنكت فيها.. والصالة مستلماتها عليا ونور
رقية صكروا عليها البنات في دارها.. مدايرة ماسك لشعرها ووجهها وتقرا فالاذكار..
دار التقعميز كملوها من الصبح .. وتوا فيها حناهم اللي تراقب من مكانها..
خولة وليلى في الكوجينة قالباتها قلب..
وسعاد تعاون فيهم: اتنين في واحد منها حتى انفضوا للعيد مرة واحدة ..شن مازال فيه هو الشهر
ليلى تمصمص فالماعين اللي طلتهم خولة: فيسع يفوت سبحان الله.. ولامس بس اول صلاة تراويح
سعاد: ان شاء الله من عواده
الزوز قالوا: آمين.. ان شاء الله
سعاد تمدلهم في صواني المسقي اللي نزلتهم نجلاء باش يغسلوهم: شن بدير امك يا خولة..
خولة ردت: والله مانعرف يا عمتي ماسألتها
سعاد قامت حاجبها بعدم تصديق: العفو كيف ماتعرفيش امك شن بدير!
خولة تنهدت: على عينك حني امتى فضينا لينا قريب اسبوع نجروا وماندروا ..
ليلى تنحنحت: عارفة انتي يا عمتي بنية وحدة كل شي في راسها حتى حني لولا بيان رورو راهو معادش نشوفوها للعيد.. وخيينها بسلامتهم مايعرفوش يتحركوا الا بيها
سعاد ارتخت بكلام ليلى وقالت: ربي يعاونها.. وكملت باستعجال: اغسلوا باهي وخفوا يديكم شن ماورانا غير الكوجينة!
الزوز قالوا: حاضر
وهي طلعت وبصوت عالي تقول: زيدي حطي مطهر يا نور..
خولة بقلة صبر قالت: مصرة الا اني نكذب.. يا وخيتي مانعرفش! شن تبيني نقول الفجي!
ليلى بضحكة: عمتك وواخدة عليها وانتي بالذات وضعك خاص معاها تموت فيك بزيادة
ضحكت خولة وهي تحرك فراسها..
ليلى تبي تغير الموضوع: ماقتلكش لقيت ياسمين امس فالمحلات
خولة شبحتلها: الله، شورهم ماكملوش حوايج رورو قاعدين
ليلى: ايه لقيتها هيا وخواتها..
وكملوا يهدرزوا مع بعض وهما يضموا..
•🌹•🌹•🌹•🌹•
قبل المغرب بشوي كملوا البنات حوستهم..
مريم وراوية قرروا يركبوا للفيراندا يسيقوها ويديروا عليها دورة
مريم جبدت الطوبو متاع الميه وركبت بيه الدروج وهي تقول: ماما الفترة هادي راسها وراس مفيدة كل كبيرة وصغيرة اديرها لما تنزل لوطا تبي تعرفها..
راوية تحول في اصيصات الزرع: والله قصتهم عويصة امك وعمتي ذهيبة، قصدي علاش هادا كله بس!
مريم تنهدت وهي تقول بصوت واضح: من اللي لوطا تفتح الشيشمة
سمعوها وصال ومها اللي كانوا فالوسعاية يقطفوا فالورد ويهدرزوا بحماس عن بيان عمتهم.. مشت مها فتحت الميه ورجعت لمكانها..
ومريم قعدت تحرك فالطوبو بحيث توصل الميه في كل مكان: يستر الله عاد في هالبيان.. وكملت بضيق: اللي مسخفتني مفيدة جاية بيناتهم الزوز
راوية تصب فالصابون عالارضية: شوفي نقولك حاجة مريومة.. اول شي لو قعد الموضوع لعمتي خديجة وعمتي ذهيبة راهو النسب هادا ماصارش من الاساس.. لكن كلنا عارفين يا قلبي ان الكلام في يد عمامي مايقدروش يمشوا كلمتهم عليهم.. وكملت بضحكة: بعدين جدو لا سلطة فوق سلطته في السانية والله مايقدروا معاه
ضحكت مريم وهي ماشية بالطوبو جهة شجرة كبيرة متاع ورد جوري احمر.. تنبت من لوطا وراكبة لعند سياج الفيراندا مغطية عليه من وحدة من الجهات..منظرها حلو بالمرة
قعدت ترش فيها بالميه وتقول: هادا اللي مطمني اصلًا.. بعدين بصوت عالي قالت: صكروا الميه خلاص
ناضت هالمره وصال طفتها ورجعت جنب مها..
اما مريم حطت الطوبو لوطا وين ماكان.. بين حوش جدها وحوش عمها حسين
بعدين ركبت فوق بتكد مع راوية وهي تعاود تقيم في شعرها اللي زاد طول عن قبل وقرب يوصل لنص فخذها..
•في هالوقت داخل..
خديجة كيف خشت ومعاها ناديا بس بدون صغارها اللي قعدوا مع بوهم فالحوش..
في يدها حافظة كبيرة فيها زوز انواع حلو فوق بعض يفصلهم ورق المونيوم.. ووراها كنتها بوحدة زيها
كانوا جايات بيحطوهم فالكوجينة لكن وقفتهم فريال اللي كيف مدوشة: اوووه مرت عمي العسولة وكنتها اللي اعسل منها
ضحكوا الزوز وهي قربت منهم: شن جبتوا حليلي الروجيم مشي فالدايمات..
خديجة بضحكة حطتهم على الدولاب وهي تقول: وووه يا فراولة انتي عليك جو مش عادي.. افتحي بروحك وشوفي.. درتهم اني وكنينتي العسل على قولتك
ضحكوا الزوز وناديا حطت الحافظة التانية جنب اختها..
ناديا: مافي حد مالا فراولة
فريال: سوسو بس ..البنات روحوا لفطاويرهم ومريم وراوية اكيد شبحتوهم وانتم خاشات
خديجة توجهت داخل وناديا قعدت مع فريال شوية يهدرزوا شن داروا بكري بعدين لحقوا خديجة للدار..
ربع ساعة وخشت مفيدة.. سلمت وقعمزت
فالاول تهدرز مع الباقي بعدين قربتلها امها وهمست: شكلك مش عابية تحني على بيان عمتك؟!
مفيدة: حنة شن يام الله يهديك، كانش بعد البيان
خديجة عقدت حواجبها وقالت: كيف بعد البيان؟! انتي عروسة حتى عام ماكملتيه مفروض الحنة ماتتنحاش من ع ظوافرك ومايشوفك حد الا بيها.. قامت حاجبها وكملت: مايطلع هالراي الا من عزوزتك هادا مش كلام بنتي بكل!
مفيدة: يام والله عمتي ماليها علاقة.. هي بروحها من لما طارت اخر مرة تبي تعاودهالي لكن الوحم خدي حصته فيا وبعدين خش رمضان معاش فضينا اللي هادا يعزم وينادي واخر شي موضوع رقية من فضانية لبيان معاش واتى
خديجة سكتت وتنهدت بقلة حيلة.. حطت يديها على بعض وقعدت تسمع للهدرزة بين سعاد وفريال ورقية تسمع وتضحك..
مفيدة بان الضيق في وجهها.. قربتلها ناديا وقالت بتساؤل: خيرك؟!
مفيدة شافتلها وهمست بدون ماحد يلاحظ: نفس الموال هو في غيره عندنا حني!
ناديا حطت يدها على يد حماتها وابتسمت بود: كبريها تكبر صغريها تصغر.. اسمعي ولوحي وراك ماتغششيش روحك
هي تنهدت تنهيدة مكتومة..
:الله اكبر..الله اكبر
حليمة: صدق الحق.. هيا كان بتحطوا الفطور وقت
وقفت رقية وفي جرتها فريال ومفيدة وناديا..بينما نجلاء كانت راقدة من التعب
على خشة مريم وراوية من برا.. وبعدهم مها ووصال اللي بعتهم جدهم باش يعجلوا بالفطور..
•🌹•🌹•🌹•🌹•
الساعة 11:00 ليلًا..
قدام حوش حسين..
من بعد خشوا العشر الاواخر بشير وعبيدة وقفوا خدمة لبعد العيد..
فتح باب الحوش لابس وبيطلع.. لما شافه كمال صفرله من بعيد
قام بشير راسه وقال: خيرك درستها غادي يا راجل
كمال قدمله: وراي ماندير.. مدله مفتاح السيارة وقال: منور بشوره
هو خداه منه وقال: بالك مزال تستحقها
كمال رد عليه: لالا صاحبي يستنى فالبوابة خلاص نجيب العروسة من الورشة..
من روشن الكوجينة نادت زمزم: بشير طلعت؟!
ضحك هو وقرب من الروشن: لالا يام
مدتله زمزم طرف كيكة مزين بالشكلاطة واللوز المجروش: خود مالا درتها بنمشي بيها لحوش جدك وديتك بيها..
هو شدها وكانت سخونة وريحتها تهبل: تعال ولد العم شوف الدلع هادا
زمزم كبهت من الروشن: حي انت هني.. وخرت ومشت بتجيب طرف تاني وهي تقول: والله ماسمعت حسك.. تعال تعال ذوق كيكة عمتك زمزم مش خير من الخلابيط الجديدة
ضحك كمال وقدم خدي منها الطرف اللي مداته من الروشن..
قال بصوت سمعه بشير بس: شن قصتكم هالايام مع كيكة حمزة..
بشير استغرب: شن تفترش انت التاني؟!
كمال ابتسم لزمزم وقال: سلم ايديك مرت عمي جت في وقتها..
ابتسمت زمزم وقالت: صحيحة وسبع عوافي..
بعدين خدت باقي الكيكة اللي غلفتها وسكرت ضي الكوجينة وطلعت منها..
بشير شبح لكمال: ماقتليش.. شن قصدك بيها كيكة حمزة؟!
كمال ابتسم وحكاله..
بشير ضحك بصدمة: اكذب غيرها مستحيلة حمزة بالذات الحال حال صيام والدخان مهناش
كمال مبتسم: بتصدق صدق بتقعد اقعد المهم هادا اللي صار
وكلي باقي الطرف في فم واحد..
بشير: ومنين عرفت انت
كمال: عرفت وخلاص.. شبحله وغمز: مافي شي يخفى عليا فالسانية هادي ..وكمل وهو يقول بالفصحى: كبيرًا كان او صغيرًا
بشير بضحكة: مالا عندك واسطة مع جماعة قل اعوذ برب الناس
كمال قعد يضحك عليه بعدين قال: سلام توا الولد يستنى فيا
بشير تبعه بعيونه وهو يقول: سلام
ومشي باتجاه سيارته اللي جابله كمال مفتاحها
•🌹•🌹•🌹•🌹•
في حوش جدهم..
ركبوا نجلاء ومريم وراوية جابوا الصندوق اللي بكري..
نزلوه بيناتهم وخشوا بيه الدار على حناهم..
هي لما شافاته قالت: وين طحتوا فيه هادا؟!
مريم: لقيناه فالمخزن مبكريكا وحني انفضوا.. فتحناه وعجبنا هلبا قلنا اكيدة ليك انتي حنينة
نجلاء: ماعمرناش ريناه حني بكل
راوية: شني حنينة متاعك ولا؟!
رقية ابتسمت: حتى اني جاني فضول نعرف.. على قد مالوحنا ماعين واثاث قدم عمرك مادورتي الا هادا توصي عليه هلبا
البنات زاد فضولهم.. سعاد وخديجة وزمزم كانوا يعرفوا عنه اما الكناين الصغار وفريال لا..
حليمة ابتسمت: هادا جايني هدية من مالطا
البنات ابتسموا بمفاجأة..
وراوية سألت: شكون جابهولك حنينة؟!
حليمة بابتسامة باين فيها الحزن: من وخيي الله يرحمه ويوسع عليه..كل مايسافر هو وعويلته يحسبني في حاجة ضروري .. وفي مرة من المرات جابلي هادا من مالطا ..وهييييه اول ماوصلني كان نلقى لا حد يقربه ولا يمسه على قد ماعجبني.. يخي قعدت فترة ما استعملتاش لين مرة عزمته الله يرحمه مع مرته وبنته هداكا اليوم بس فتحته.. بعدها قعدت كل مرة لما يجوني ضيوف نطلعه واللي يشوفه يحل فمه فيه.. يوم من الايام واني نغسل فيه قريب انكسرت مني طاسة خفت عليه منها رديته لصندوقه ودسيته معاش طلعته بكل ..تنهدت بعدين كملت: عزيز عليا هلبا بالذات بعد توفى وخيي ماقعدلي منه شي غير هالطاقم..
الكل كان منسجم فالقصة.. بالذات اللي اول مرة يسمعوها..
مريم: مش قلتي متزوج وعنده حتى بنت وينهم توا؟!
حليمة بحزن: مريته توفت بعده بعام ولا اثنين وبنته بعد جاها مكتوبها وتزوجت معاش نشبح فيها زي قبل.. انشغلت بحياتها وحتى الجي انقطع بكل بعد توفوا اميمتها ووبيها ..ومع الوقت لحقوا اخبارها ومعاش سمعت عليها خير ولا شر
تأثروا البنات بالقصة.. بالذات وان عيون حناهم باين فيها شوق لخوها وعيلته وقداش مكانتهم كبيرة في قلبها..
فريال باش تغير الجو قالت: كان ابراهيم واللي بياخدها مايجيبليش واحد زيه يروح معاش نعرفه
ضحكوا كلهم.. ونجلاء وجهها تلون..
مريم تتفرج بابتسامة على الطقم: يهبل يا حناي خوك الله يرحمه كان ذواق..
حليمة ابتسمت: هوا ليك يا مرومة وبعد يجي نصيبك ان شاء الله ارفعيه معاك
كلهم تفاجؤوا.. ومريم باحراج قالت: لا مش هكي قصدي حناي، بعدين هادا من ريحة خوك كيف تعطيهولي.. لالا مستحيل ناخده سامحيني حنينه
حليمة: قلنا خوديه واسكتي كيف عندي كيف عندك عارفة لمن عطيته اني..واهو قاعد مدسوس في حوشي لين يجي صاحب النصيب ماتخافيش
رقية بابتسامة: خلاص مرومة حناك قالت خوديه
مريم جت لحناها وباستها على راسها: ربي يحفظك لينا يا غالية
ضحكت حليمة..
وراوية قالت: تبي تزوجك حناي مريومة..
كلهم ضحكوا..
وزمزم قالت: سعدوده وخلاص بهالغزالة اللي بتجيه بسرفيزها
ناديا: صدقتي عمتي زمزم.. من يحصلها مريومة بس غير من زينها الله واحد
فريال: راجي اول واحد يا مريم بتسقدك معاه حناي بتوتك اللي عليك..
كلهم ضحكوا وحليمة قالت: ماناقص والله.. مانعطوهاش للي يجي مرومة والله ليحفوا عليها الخطابة وخليها تدلع مايطلع كان عليها..
ضحكوا كلهم مرة تانية..
وهي بتذوب في حوايجها من الاحراج..
راوية بضحكة: خلاص غيروا الموضوع صاحبتي تتحشم
نجلاء: حقا شن بديروا عشي يوم البيان
خديجة: رشتة كسكاس ان شاء الله
نجلاء: ديروا حاجة تانية ديما نديروا فيها الرشتة في 27!
حليمة: مايجيش.. هادا سبر ضروري نقفلوا في سبعة وعشرين
نجلاء: باهي ديروا كسكسي ولا رز
سعاد: ضروري رشتة وكان مافيش بعدها يشوفوا الراي الاخر مش طول هكي..
مفيدة: محلاها الرشتة عن الباقي مازال اطيب وابن وحاجة تستر
شبحت رقية لنجلاء وقالت: كان ماتبيهاش تو نديرولك كسكاس صغير كسكسي..
هي فرحت: سلم خويلة يا ربي!
مريم وراوية شبحوا لبعض وكأنهم يقولوا بنظرات العيون «صحة الوجه»😂
فريال: كلا اني نبي قصعة بحالها وماتسدنيش..
كلهم قعدوا يضحكوا..
•🌹•🌹•🌹•🌹 •
ويفوتوا الايام تباعًا من هاليوم..
ويجي يوم البيان واللي هو نفسه يوم 27 رمضان..
حوش الحاج منصور تفوح منه روايح البخور.. صلوا المغرب وبدوا البنات يلبسوا ..اما عمتهم مشت للمزين
كل شي كان جاهز في انتظار العروسة توصل ومن بعدها اهل العريس.. جزء من الجيران كان حاضر في سانية الحاج منصور وجزء حيجي مع عيلة العريس..
وبالفعل توصل رقية في سيارة خوها.. وولاد خوتها واختها قلبولها الشارع بالكلاكسات والتنوير كأنه دخولها مش بيانها..
..داخل البنات اول ماسمعوا صوت الكلاكسات طلعوا يجروا
وقفوا فم باب حوش جدهم.. والضيوف قعدوا داخل شوي مدرقين لكن يشوفوا ويسمعوا
شوي وبانت عليهم السيارات ورا بعضها خاشة من بوابة السانية..
زغرطوا بهية وفريال..
على جية مها بالدربوكة من داخل مدتها لخولة اللي طول خدتها وبدت اطق عليها بكل قوتها في لحن يهبل..
فريال تصفق: الحوت علينا ماننعدوا.. كيف عروق النجم نهدوا
ردوها وراها كلهم وزغرطت ذهيبة..
: اياااااي
زمزم: الله واحد الله عليهم ..ياعوينة ماضريهم
ردوها وراها مرتين.. والتنوير من رواشن السيارات قالب الدنيا
زغرطوا النساوين..
راوية تحرك في يدها فوق: يا نور العين يا مقوانا ..ان شاء الله الدعوة تخطانا
عاودوها وراها كدا مرة وهما يعيطوا بحماس..
درسوا السيارات فالوسعاية والكناين قعدوا يزغرطوا
نزلوا الولاد من السيارات وكملوا وصلة الالعاب النارية..
خديجة بصوت عالي: سلم ضني خوتك يا للا.. يحادوا فيك تقول غزلة
وع هالشتاوة البنات زادوا شاشوا.. اما الشباب قالبينها رسمي
والجيران منسجمين معاهم ويغنوا..
خولة وهي ادربك: سلم بوك فتحلك جيبه..قال اللي تبيه نجيبه
ليلى: حييييي
نجلاء تصفق: خوالي يا محلاك خوال.. اللي مافيهم قولة قال
عيطوا البنات..
خليفة فتح لاخته الباب من داخل.. وشوي وجي حمزة لابس سروال جينز وتيشرت اكحل.. شد يدها وقعد يساعد فيها تنزل
امه لما شافاته قعدت تصفق وتقول: العقبة لعرسك يا الطويل ..نهيموا فيه نهار وليل
الولاد زادوا فالتطربيق.. والبنات عيطوا بصوت عالي وهما يردوا ورا ذهيبة..
نزل حمزة رقية بعدها نزلت سعاد وخدتها منه قدمت بيها..
مريم لما شافتها جاية قعدت تغني: توحد لما تشوف الزين ..توحد راك تاخد بالعين
ردوها وراها كلهم وبنات عمها قعدوا ينقزوا..
واستمروا يرددوا فيها لين خشوا بيها داخل الحوش..
هني حولتلها سعاد الكاب.. قعدوا كلهم يزغرطوا
عطوا المجال لحليمة لما شافوها متجهتلهم
هي وين شافت بنتها قعدت تزغرط.. ورقية تغمرتها طول
كلثوم بدت تصفق: حوشنا ثريه على ثريه.. مداما اميمتنا حية
ردوها وراها كلهم..
طلقت حليمة بنتها.. وليلى قعدت تغني: اششيه عليها هيا ..اششيه زهر واميه
ردوها وفريال قالت وهي تمرر في عيونها على الضيوف: اششيه على جيراني اششيه عسل حقاني..
شاشوا الموجودات.. وقاموها بالتصفيق والتزغريط
مريم تهمس لراوية بضحكة: تعرف كيف تنشطهم يعطيهالها
راوية غمزت وهي تصفق: معليشي حتى هي فراولة
سعاد: اللي شعره صفاه الشيب ..ان شاء الله عالعيلة مايغيب
حفيدات الحاج منصور ردوها بعياط وخولة قريب تشرك الدربوكة..
بهية: سعد اللي حازك يا بية.. اللي زينك مهناكش زيه
ردوها كلهم وراها.. ووسيلة زغرطت..
طقت خولة بقوة على الدربوكة وهي داهشة.. معلنة نهاية الوصلة هادي ..
قعدوا الجيران يسلموا عليها ويباركوا..
نور: نبي نشوف رورو ماشفتهاش زين ولا سلمت عليها
مفيدة: هيا اهو بندخلوها للدار خشي معاها..
قدمت خديجة بابتسامة: معليشي يا عيلة بندخلوا العروسة ترتاح شوية
: خودوا راحتكم
اشرت خديجة بعيونها.. قدمت فريال وخششتها للدار.. والصغار كلهم لحقوها بالاضافة لنور..
قعمزوا الناس.. والكناين معاهم يهدرزوا..
•في الكوجينة..
مريم بابتسامة: طالعة تقتل رورو الله يبارك
راوية: لقطة الفم مش عادية اللي دارتهولها فنانة
عليا مادة شواربها بعدم رضا: ماحصلناش نسلموا عليها من هالبشر اللي هادة تقول حني البرانية!
ضحكوا البنات..
على خشة خولة مشت طول للشيشمة حطت يديها تحتها
ليلى: قمتيها خوخة الله لا تغيبك..
خولة: كلنا فرحانين برورو ماشبحتوش رواحكم برا كيف قلبتوا الدنيا.. التفتت ومررت عيونها عليهم وهي تقول: وين الزمزامة اللي كانت معاي
مريم بضحكة: اكيدة برا تلقيها تهدرز
على خشة ذهيبة للكوجينة وهي تقول: هيا سلم بنياتي خلوا صفر العصير واتيات عالصب بس واطلعوا الناس برا تسأل عليكم
ردوا عليها بتتالي: حاضر.. باهي
هي طلعت.. وخشت بعدها نجلاء
قعدوا البنات يستفوا فالطواسي في صفراهم ويتبادلوا فالحديث..
لين كبهت عليهم نور من باب الكوجينة: شكلهم وصلوا يا بنات..
•وبالفعل وصلوا امالي العريس.. وقتها الولاد كانوا خلاص مبعدين سياراتهم عن الوسعاية قدام حوش الحاج منصور ..
خشوا السيارات وهما يكلكسوا.. درسوا وقعدوا النساوين ينزلوا بسوابيت البيان..
داخل الموجودين التموا والدربوكة هالمرة في يد فريال..
خشوا النساوين وهما يزغرطوا.. حطوا السوابيت في صالة الحوش وبدوا يشتوا..
اخت سليمان الكبيرة: سلم وخيي فتح الدار.. جاب بيانك بالدولار
ردوها وراها نساوين عيلتها وهما يزغرطوا
فريال وهي ادربك: اللي حاز اعميمتنا ارتاح..خلال ذهب في حجره طاح
ردوها كلهم بحماس..وسعاد زغرطت
خالته تصفق: يا بنية سعدك مامنه ..اللي جيتي لقميره كنة
عاودوها وراها وهما يزغرطوا
مفيدة: بروحه جانا ماجيناه.. عرف يختار خوال ضناه
زغرطت زمزم ..وردوها كلهم
ياسمين: حصلتيه رفيع القيمة.. شاطر ومكمل تعليمه
عيطوا بنات عيلتهم وردوها وراها..
مريم: كان اعطيتونا النوار.. اعطيناكم ياسمين الدار
خولة: اياااااي
ردوها كلهم بحماس..ووسيلة وفريال زغرطوا
وحدة من عماته غنت: الزين اللي عينك حازاته.. رضي ولدين حنون خواته
عيطوا بناتهم وردوها بحماس
فريال: امه جاباته يوم مطر.. اللي حصلها هالقمر
زغرطوا نساوين عمامها والكل ردها وراها كدا مرة..
وحدة من نساوين خوته: امك جاباتك ليلة عيد.. اللي حصلتي هالصنديد
زغرطت ياسمين..
وزمزم ردت: هادا حوش ترابه راوي.. مايطلع كان القلعاوي
عيطوا عيلة رقية.. وتعالت الزغاريط وهما يردوا فالشتاوة بحماس
بدت الحرب الحلوة تهدا لما شتت وحدة من خوات سليمان:
سلم بوها طاب عطانا.. تفاحة من وسط جنانه
ردوها وراها كلهم
ذهيبة تصفق: بوها قال صغيرة راهي..غير سلومه راجل باهي
عاودوها وراها مرتين
وحدة من الجيران: الغالي يا زينة يبيك..جاب تريسه تموا فيك
زغرطوا.. والعيلتين ردوها وراها كدا مرة..
وسيلة: صيته عالي وزاد تعلى ..اللي ناسب خوتك يا للا
قوت فريال الطقة والكل يرد ورا وسيلة فالشتاوة..
خالة سليمان: بولحية عالخد خفيفة.. حام وجاب غزالة كيفه
قعدوا يردوا وراها وهما يصفقوا بحماس
وختمتها خديجة لما غنت: مبروك علينا وعليكم.. حطينا يدينا في يديكم
زغرطوا النساوين .. ووقفت فريال طق عالدربوكة
بدوا بعدها يسلموا على بعض.. والسلام بين قمرة وحليمة كان حار .. دخلوهم داخل.. ومشوا مريم وراوية وليلى للكوجينة باش يوتوا العصير والشكلاطة
اما الباقي خدوا السوابيت للدار اللي جنب دار رقية
•فتحت الباب خشت وصكراته وراها..
رقية بضحكة: شن اللي قلتوه هادا!
خولة: نظمنالك امورك
نور: اللي يقولوها تردوا باقوى منها
ضحكت خولة ورجعت شافت لعمتها: شن الجو رورو خمس دقايق وبتطلعي راه
رقية بان عليها التوتر.. خدت نفس وزفراته وهي تقول: كويس نوعًا ما
انفتح الباب هما شبحوله.. خشت منه ناديا وهي مبتسمة وتقول فالسلام
ردوه كلهم..
وهي صكرت الباب وسألت: امتى طلعوا الصغيرات؟!
رقية: اول ماسمعوا الزغاريط شيطوا قعدت معاي كان للو.. وشبحتلها بابتسامة
لتين غطت وجهها باحراج خلتهم كلهم يضحكوا
بينما امها قدمت بابتسامة: الله يبارك عليك طلعاتك طلعة مش عادية..
رقية ابتسمت بفرح: حقا نديوه؟!
ناديا تتفرج على طلة رقية ومبتسمة: ماشاء الله عليك طلقة لا قوة الا بالله ماتوقعتش تبدع معاك هكي
نور ابتسمت بحب: رقية حلوة اصلًا عبارة زينتها شوية بس
قرصتها عمتها من خدها بعدين باست صوابعها وهي مبتسمة
على جية سعاد: هي شن رقيوه تطلعي خلاص..
رقية ناضت من على كرسي الشكماجة.. نور طلعت بلتين وناديا سبقت رقية وهي وراها
اما خولة راجتهم كلهم يطلعوا بعدين سكرت الضي وجبدت باب الدار قبل لتطلع..
خشت رقية على الضيوف.. والانظار توجهت كلها ليها كانت طالعة جميلة هلبا.. بقفطانها الفوشي وتسريحة شعرها ومكياجها.. عجبت شيابينها ع الاخر
قعدت تسلم عالموجودين كلهم واخر شي قعمزت على الكرسي المخصص ليها..
البنات كان يقدموا فالضيافة ويهدرزوا مع بنات الجيران..
الناس لاحظت العلاقة المميزة بين زمزم وكنتها.. وكيف تساويلها في سلسلة الطاقم اللي لابساته كأنها بنتها ..عاد زمزم هي وبنات سلفها زي الصاحبات من غير شي..
واللي يجذب اكثر كيف الحفيدات واقفات لعمتهم تقول اختهم.. رادات البال من كل شي ..
شوية وناضت رقية باش تلبس قفطانهم اللي جابوه بعدين طلعت
من جديد.. وهالمرة بانت احلى بالقفطان الكبير بلونه الفيروزي
راوية ساوتلها قصتها: احسن شي دارتلك المكياج بالوان ترابية باش يمشي مع القفطانين
رقية: شن صار فالعشي؟!
مريم: ماما وعمتي سعاد يسقوا فيه وبنجيبوه
تنفست رقية براحة وكملت طريقها .. اول ماخشت زغرطوا وهي مشت للكرسي متاعها.. شوي وجتها قمرة بالطاقم والدبلة والساعة
بعد لبستهوملها زغرطوا من جديد وبدوا يشتوا
وهالمرة خولة وفريال شكلوا احلى ثنائي وماخلوش مجال لحد معاهم بكل..
شوي وبدوا البنات يخشوا بقعاد العشي.. كان رشتة كسكاس ومعاه اربعة انواع حار بالاضافة للسلايط والمسير..
بدوا يحطوا والحوش كان زحمة..كناين الحاج منصور قعمزوا مع ضيوفهم عالعشي..
اما البنات مازال يدخلوا فالصفر..
جت بهية بصونية صغيرة في صفرة ومعاها شوكة وحار.. وصلت بيها لرقية وحطت الطاولة الصغيرة قدامها وعليها الصفرة
طرحتلها فوطة على القفطان وهي تقول بهمس: هي كولي شوي شوي باش مايتلبزش مكياجك
قبل ماتبعد بهية جت وحدة من خوات سليمان المتزوجات بكاشيكها في يدها وحكة المشروب وهي مبتسمة
لما وصلت فيهم قالت: بنتعشى مع خطيبة خوي اليوم
ابتسمتلها بهية: على راحتك.. راجي نجيبلك كرسي بس
وقبل ماتضبح على وحدة من البنات وقفتها المراة: لا مش ضروري والله حتى هكي
بهية فنصت بابتسامة: مايجيش نهاري!
: حني جيران قبل مانبدوا نسابة مش بيناتنا
ردت بهية باستسلام: زي ماتبي.. تبوا شي نادوا عليا
ونزلت من جنبهم.. بينما المراة شبحت لرقية وبابتسامة قالت: الله يبارك عليك اليوم عيني ماضرك غزالة مصورة
ابتسمت رقية بخجل وردت: سلمك يا ربي.. قامت الشوكة وقالت: هي تفضلي كولي
خدت من الرشتة بكاشيكها سمت بالله وكلت..بعد دقايق من الهدرزة العادية نطقت حماتها: رقيوه
شبحتلها رقية وهي تمسح في فمها بالمنديل
مدتلها المراه ورقة صغيرة مطبقة: خودي
مدت يدها وشدتها وشبه فهمت شن فيها ومن من مبعوتة..
حماتها كملت بهمس وهي مبتسمة: سليمان قبل مانطلع عطاهولي وقالي من يدك ليدها.. اكيدة عرفتي شن فيها هو يبيك تبعتيله رسالة بس باش يزبط رقمك وبعد العيد باذن الله بيتصل بيك زي ما اتفق مع خوك
رقية بخجل وصوتها يادوب طالع: ان شاء الله
ابتسمت حماتها.. وكملوا عشاهم مع بعض
وبعيد عنهم شوي.. مقعمزة ذهيبة مع جاراتهم تتعشى لكن عيونها طول الوقت في جهة تانية..
ناضت وهي تقول: عن اذنكم شوية ونجي
: اذنك معاك يا حنة
طلعت ذهيبة ..تلاقت مع كنتها جاية بتخش بصفرة اخيرة
وقفتها واشرت لمريم اللي واقفة بعيد شوي وتهدرز مع راوية وفي يدهم صونية حار
مدت الصونية لبنت عمها ومشت تجري: نعم
ذهيبة: خودي من اختك دخليها داخل مرومة
دارت مريم زي ما امرتها مرت عمها وخشت بالصفرة
ذهيبة شبحت لكنتها: خيرك ماتقعمزي تتعشي؟!
مفيدة: يتعشوا الناس بعدين حني ساهل يا عمتي
ذهيبة بجدية: ماحد لايم عليك وبطنك قدامك.. قعمزي وتعشي سلم كنتي اهم بنات عمك يهنوا.. تحركت قدامها ومشت وهي تقول : تعالي وراي
مفيدة لحقتها وهي تتنهد باستسلام
طلعت مريم ومشت لمكانها وهي تقول: تعالي نمشوا للكوجينة نشوفوا الباقي
هزت راوية راسها لان فمها معبي ومشوا مع بعض..
•في الكوجينة..
خشت ذهيبة لقتهم يجهزوا في طواسي القهوة ويعبوا فيها بالنسكافيه
قالت بعد مررت عيونها عالرخامات: معاش في قصاع خولة؟!
بنتها حطت فازو النسكافيه عالدولاب: واتي مافيش لكن كان تبي نسقيلك
ذهيبة شافت للمقفول ..خدت صونية نظيفة وتوجهتله: تو نسقي بروحي
خولة ولت تعبي فالفناجين.. وجنبها فريال تستف فالحلو
على خشة نور..كانت رافعة صفرة للبنيات الصغار حطتهولهم في الدار وصكرت عليهم..
كملت ذهيبة.. دارتها صونية مدلعة معرم فوقها اللحم .. بعدين حطتها في صفرة ومن كل شي حطت معاها وهي تتكلم وتقول: غدوة صيام وانتي مش حتى بروحك وفوقها ماتبيش تقعمزي تتعشي.. كملت والتفتت مدتلها الصفرة: مش لازم مع الناس المهم تعشي باهي وقيمي صحتك
البنات يسمعوا ويديروا.. ذهيبة مش جديد عليها التصرف هادا ..من يوم جابتها وهي رادة بالها منها ومن ماكلتها بالذات بعد حملت..
مفيدة بعد خدت الصفرة لقت فيها زوز كواشيك استغربت..
لكن زال استغرابها لما عزوزتها تكلمت من جديد: فريال
هي التفتت: عيونها
ذهيبة ابتسمت ابتسامة مافهمتش فريال معناها: بري تعشي مع مفيدة نشبح فيك من بكري ماحطيتي حاجة في فم.. امشي تحركي قبل مايسطل
البنات شدوا الابتسامة بالسيف.. وفريال ضحكت بعد سيبت اللي فيدها: مانقولش لا
ومشت طلعت مع ومفيدة ..ذهيبة بعد تأكدت انهم قعمزوا خلاص ولت للضيوف
خولة: هيييه قعدنا غير حني.. عمتي خديجة ماقعمزتش الا وناديا قبلها وامي توا جاية بروحها مدايرة صفرة كناينها
راوية تحرك فيديها: نسيتي زمزومة اللي وين ماتتحرك في ركنها ليلى وجابتها تتعشى اول وحدة
مريم ضحكت وجت تستف فالحلو مكان فريال: كملي انتي وياها احسن ماناكلوا على روسنا من عمتي سعاد
عليا تنشف في كواشيك القهوة: نبي ننخطب حتى اني مداما الحكاية فيها دلال هكي
نور ضحكت.. وعليا شبحتلها عالجنب.. بعدين شبحتلهم كلهم لقتهم يضحكوا
قالت باستياء: مبيخكم باهي!
هما قعدوا يديروا ويناشبوا في عليا..اما نجلاء كانت تعاون فيهم وتفكر بينها وبين روحها« زعما خالتي وسيلة يجي يوم وتعاملني هكي؟!»
•بعد العشي ..قدموا الفواكه واخيرا النسكافيه والحلو.. قعمزوا بعدها عيلة العريس شوية وروحوا.. وزيهم الجيران اللي حضروا
وكمل البيان على خير..
•🌹•🌹•🌹•🌹•
اليوم اللي بعده..
نزلت طيارة الصادق وعيلته في مطار بنغازي
اللي استقبلهم هالمرة خالد بطلب من مرته اسماء..
وصلوا الڤيلا ولقوا كناينهم الزوز في استقبالهم..
ركبت زينات الشناطي فوق.. روحوا الكناين وركبوا اهل الحوش بيرتاحوا
مع عشية نفس اليوم جت ريما وراجلها..وصلت هي وعمها ضو جايب جدها في نفس الوقت
خش الكوني مع ولده وراجل حفيدته للمربوعة بعدين جاهم الصادق
اما داخل..
كانت ريما تضبط في امها واختها وتتحمدلهم بالسلامة
قالت بعد قعمزت عالصالون: رايفت عليكم واجد
مريم: مالا نحن شن نقولوا..
ديما: كيف كملت عام متزوجة نبوا واجد بيش نتعودوا انها معاش شورنا خلاص
ريما ضحكت وحدفتها بمخدة الكنبة: اتحنطي اهاا!
ضحكوا ديما ومريم..
على نزلة عبدالرؤوف من فوق.. مدوش ولابس سروال رصاصي وقميص ابيض
ريما وقفت وجاته: اوفا يا غالي
هو ابتسم لما شافها وجاها خداها في حضنه: الاريل ..امتى جيتي
ضحكت ريما بعدين بعدت عنها: الحمد لله على السلامة.. ماليش واجد واصلة
عبدالرؤوف بابتسامة: الله يسلمك.. نزلك غيث وعدى؟!
ريما: لا خش للمربوعة مع جدي وعمي
هو هز راسه هزة خفيفة بعدين طلعلهم..
وهي ولت جنب امها واختها تقول: تو رؤوف وجدي معاد تفض سهاريهم..المشكلة نا مش بايتة ونريد نحقه مرايفة عليه
مريم: العيد مزال عليه يومين ساع تجي وتباتي وتسهري معاه عند تبطلي
ريما: مالا عقارب الشمس هذنكي مانزلنش؟!
ديما: من حيشن سلمن معاد حقيناهن
مريم تنهدت: غيرن السيرة الله يربحكن فكننا من النكد
سكتوا الزوز..
على نزلة جمال من فوق.. جاهم وابتسم لما شاف ريما: جيتي يا الاريل
وقفتله ريما ومشت حضناته: جموله الحمد لله على السلامة يا خيي
بعدوا عن بعض وهو رد: الله يسلمك.. شن اخبارك
ريما بابتسامة: الحمد لله .. شن جو مصر معاك.. مررت عيونها على وجهه وكملت: طالق الشيانة ولا ايش.. كنك مش محلق اشعرك؟!
جمال مسح عليه: عجبني منظره هك.. حسيته ماشي معاي اكثر
ريما: نجك لي صح صقع بكل..اين شي اديره انت واوفا يطلع عليكم سمح
ضحك جمال.. ومريم قالت: راجل اختك وعمك ضو وجدك في المربوعة عدي كان بتسلم عليهم وليدي
جمال: هيا طالع.. رجع عيونه لريما وقال: كلمي زينات ماتحسبنش فالقهوة نبي شاهي خضر
ريما: حاضر..
مشي جمال.. وهي ولت قعمزت: دودتي عدي احكيلها نا اظهري ماني عارفة كنه اليوم
ناضت ديما للكوجينة.. ومريم سألت بقلق: كنك اسم الله ايش جد عليك؟!
ريما: قيسني بعد درت حملة عالحوش منين حركت المكتبة اوحدي
مريم عقدت حواجبها: وكنك تحركي فيها وحدك يا بنتي!
ريما: هضا هو يمي ..غيث فالعمل ونا ماني مراجيته عند يروح بيش نضم حوشي
مريم: مفروض دقيتي لزينات تجي تساعدك!.. وكملت تقول: ساع ندوي لباتك نا يجيبلك وحدة تقعد معاك
ريما: لا يمي فكيني يزعل غيث.. نا كان نبي تو نحكيله وهو يديرلي وحدة لكن الحمد لله مش محتاجتها لتوا
مريم تنهدت وهي تقول: براحتك يا بنتي
ريما ابتسمت: ايه شن جو مصر.. احكيلي بالتفصيل
قبل ما امها ترد خشت عليهم اسماء وهي مبتسمة: السلام عليكم..
مشت تسلم على ريما وهي تقول: ماعليش ركبت فجأة مغير كنت نرقد فالعيال
مريم: لا عادي..
وريما تشبحلها من فوق للوطا ببغض.. بينما هي تسرقلها في نظرات مكر
•🌹•🌹•🌹•🌹•
انقضوا اليومين اللي مازال في رمضان.. وهل عيد الفطر
معيدين وديما عيد معيدين..
معيدين وديما عيد معيدين..
ملتمين.. معيدين..
وفرحانين.. معيدين..
نهني كل المخلصين معيدين..
كلمات الاغنية هادي كانت طالعة من حناجر حفيدات الحاج منصور الصغيرات..
يغنوا فيها وهما يصفقوا بكفوفهم المحنية وقفاطينهم الملونة والحلوة.. والشعرات اللي تتحرك مع حركتهم مزينة باحلى ربطات
ومش بس من حناجرهم تنسمع .. بل حتى التلفزيون داخل مفتوح على الجماهيرية وتصدح الحان الاغنية منه..
البنات والكناين طارحات باحلى حلة.. والحاجة حليمة بقفطان انيق وشاربة وريحة زيت الزهر الزاكي اللي متعودة تدهن بيه في يديها وشعرها يفوح..
بس مهما كانت طلة البنات حلوة.. مستحيل تتفوق فالعيد على طلة الشباب بالزبون الليبي .. بالذات لو كانوا الله يبارك مجموعة زي احفاد الحاج منصور.. منظرهم وهما مروحين من الصلاة مع عمامهم وجدهم اللي لابس الجبة الطرابلسية وطاقية البسكل خلاب بمعنى الكلمة..
قعدوا يعيدوا على بعض..
ولوز وسكر كان ليهم الاسبقية فالوصول لجدهم..
مريم باست يده وراسه بعدين حضناته: كل عام وانت بخير جديدي من العايدين الفايزين
الحاج منصور بابتسامة: وانتي بخير وصحة ..
راوية دارت زيها وقالت بابتسامة: كل سنة وانت طيب جدي حبيبي
الحاج منصور مبتسم: وانتي طيبة ان شاء الله
لتين كانت واقف جنب مريم اللي قامتها وبضحكة قالت: للو بتعيد عليك يا جدي
ضحك الحاج منصور وقال: اووو المدورة..
لتين مبتسمة: كل عام وانت طيب جدي الكبير
منصور باسها ومسح على شعرها: وانتي طيبة يا مدورة.. راجي شوية
دخل يده من فتحة الجبة وطلع ربطة فلوس من الفرملة.. خدي منهم عشرة ومدهم للتين: خودي هي عيدك من جدك
ضحكت بفرح ومريم نزلتها لوطا.. طول مشت تجري بتوريها لامها زي كل عام
ومريم ورواية يضحكوا عليها..
منصور مد عشرين عشرين ليهم الزوز وهو مبتسم: هي خودوا حتى انتم عيدكم
ابتسموا وخدوا منه الفلوس بعدين خشوا في حضنه الزوز.. وهو يضحك عليهم ويقول: باهي باهي.. هي بروا نادوا على التانيات
الزوز قالوا: حاضر
وخشوا يكلموا بنات عمهم باش يجوا ياخدوا العيدية حتى هما💖..
مشي الحاج منصور قعمز فالمربوعة.. واولاده بعد عيدوا داخل انضموله
•داخل..
الكناين قريب يكملوا تجهيز الفطور..
والاحفاد صوت ضحكهم مع حناهم واصل لبرا..
هو كان يدور فيها بعيونه.. بالذات بعد شاف باقي البنات طلعوا لجدهم فالمربوعة وهي مش معاهم.. استغرب
وهو ماشي سمع صوت يقول «كيكة حمزة يا سي»
عقد حواجبه ومشي وين مافي الصوت.. وصل ممر الكوجينة اللي كان فيه شرف الدين وطارق.. وقدامهم معاذ بعتوه يجيبلهم كيكة
كانوا يضحكوا وهما ياكلوا فيها.. معاذ مشي من جنبهم بعد ادى مهمته
وهو جاهم وقال: شن تفترش انت وياه؟!
الزوز شبحوله واللقمة وقفت في الرقبة..
حمزة: نسمع فيكم؟!.. على شن تتسهوكوا بالزبط!
شرف الدين شاف لطارق.. والاخير قاله بعيونه بما معناه «لا مفر»
حمزة بنفاذ صبر وهو يتنقل بعيونه بيناتهم الزوز: بتتكلموا ولا كيف؟!!
شرف الدين: خوك كمال نشرها حني برا الموضوع يا ولد العم..
طارق: خلاص خلاص نحكوله حني وامرنا لله..
حمزة شبحلهم بنظرة تخوف.. خلتهم يحطوا اللي هناك بسرعة قبل ماينفجر
شرف الدين: حني قالولنا حمزة دار كيكة عن فراولة
فنص فيه وعيونه يطلع منهم الشرار..
طارق: زلة لسان يا راجل قصده فريال..
شرف الدين شد ضحكته وكمل: الخلاصة البناويت سموها كيكة حمزة ووصلت فينا التسمية بس بس..
طارق شبح لحمزة: هي بروحها شايفة الموضوع عادي بوحميز.. ماتكبرهاش
شرف الدين: كان نلقى حتى اني يسموا عليا كيكة ماعنديش مشكلة..
هما زعميتهم يقنعوا فيه ان هيبته ماضاعتش قدام المحبوبة بعد سمعت باسم الكيكة الجديد..
لكن هو من كلامهم كله ركز على حاجة وحدة: كيف شايفة الموضوع عادي؟!!
شرف الدين قوس فمه وحرك راسه حركة خفيفة: لما تنجبد السيرة قدامها تقول عادي تكلمت قدامه ساعدني
حمزة غمض عيونه وفتحهم: هي هكي قالت؟!!
رد طارق بعد استوعب: ماهو..
حمزة قاطعه: شن قالت تاني؟!!
شرف الدين حتى هو زبط ان حمزة بيبدا يعصب .. ويصب عالنار بنزينة: بالحرف الواحد.. ونزيدك، قالت كأنه خوي مارضاليش التعب
هو هني خلاص.. بلغ عنده السيل الزبى ..صبره تم ووصل لاقصى مراحل غضبه..
تحرك من قدامهم وعيونه نظرتهم تخوف..
كان يدور في وحدة من البنات.. ويشوف مريم وراوية طالعات من الصالة وفلوسهم في يديهم
جاهم طول.. وقف قدامهم وقال: وينها؟!!
مريم عقدت حواجبها: مني؟!
حمزة بعصبية: بنت عمك الحمارة!
بلعت مريم ريقها بتوتر وردت عليه: بقولي في الفيراندا
ما ان كملت كلمتها فات من جنبهم زي الريح متوجه للباب..
راوية تبعاته بعيونها بعدين ردتهم لبنت عمها: خيره زعما؟!
مريم مستغربة استغراب شديد: مانعرفش يا ويري.. لكن متعفلق هلبا شكله
: مرومة تعالي انفخيلي نبولتي
ردت بصوت عالي: جاية للو.. تعالي ننفخوا للصغار وبعد تجي فريال نسألوها
تحركت من مكانها وراوية في جرتها
•وفي الفيراندا كانت فريال.. تفرش في حصيرة باش يفطروا الولاد فيها.. بلبسة العيد اللي كانت عبارة عن سروال اسود محشي فيه تيشرت بنفس اللون.. الحزام كان ذهبي على هيئة حلقات وفيه طرف نازل.. لابسة سلسلة حتى هي ذهيبة وخراصات وحديدة..
فوق التيشرت في طرف طويل وكم كامل طوله لعند نهاية السروال مزركش وغالب عليه الاخضر والبرتقالي.. لابسة كندرة حاطية كحلة وشعرها قايماته كله كودة فوق بطريقة عشوائية باش يساعدها فالضم..
هو يركب درجتين بدرجة ومعصب عالاخر.. لما شافها تسارعوا دقات قلبه.. بس ابدًا ماخفتش العصبية ولو شوي
حست بيه قامت راسها.. ابتسمت بارتباك لما شافاته وهي تقول في خاطرها «حييي تو بيهزبني عالركبة هني»
قررت تسبقه وقالت: كل عام وانت بخير بوحميز..
حمزة جاها وهو يقول: حمارة انتي حمارة ناقصينك وذان بس!!
فريال ضحكت باستغراب وعيونها عالحصيرة اللي تخربت بعد مشي عليها: حمزة بالشوية كنت نساوي فيه الحصير
هو بغضب قال: تي شن مالك بأمه الزفت خليك مع اللي واقف قدامك وحاسباته عرصة!!!
هي خافت ووخرت: خيرك حمزة الدنيا عيد
هو زاد قدملها: لانك حمارة وماتفهميش.. راسك هادا فيه تبن مش دماغ زي الناس!
فريال: حمزة عن الغلط
حمزة: انتي تبي اطلعي عفاريتي عليك ولا كيف!! لشن تبي توصلي فهميني!! ضحك بهزوة وكمل: صار زي خوك ودرت الكيكة عنك يا حمارة!!
هي فمهت ان تكنطى من لقطة الاسم طول قعدت تبرر: والله ماطلعتها لواحد مانعرفش من قاللهم!
مسح على شعره وشبح لعيونها وهو يقول بعصبية ويقدملها: اني في شن وانتي في شن!! تبيني نعجنك طريحة انتي والله لتجري عليها!
هي توخر والخوف تملكها كلها.. نظرات عيونه وصوته خلوها توصل لذروة الرعب..
وهو مكمل يقول: تعرفي كان نقدر نديرها مانوخرش.. لكن انتي صحة ليك خليتيني نكبد في خليقتك ومعاش نطول لا سمي ولا وطى
انصدمت.. ماستوعبتش.. واي مرادف لكلمة انصعقت ينطبق على فريال توا..
قامت عيونها لعيونه وقعدت تشبحله زي المسبوهة
هو زاد قرب منها وكمل: مايمشيش معاك كان هكي .. خفت الحدة في صوته لما قال: ميت فيك اني ومنتهي خلاص
هي قعدت بنفس الوضعية..
عقد حمزة حواجبه لما حسها بترتخي..
وفي لحظة غمضت عيونها وفقدت الوعي.. وهو تلقاها
•🌹•🌹•🌹•🌹•
شرق ليبيا..
الاجواء ماتقلش جمالًا عن اللي في طرابلس.. بغض النظر عن نساوين خالد ويحيى
مقعمزات النساوين في الصالة يهدرزوا..
خشت زينات طول لمريم طبست عليها: في وحدة عايزاكي ع التليفون
مريم شبحتلها وناضت معاها..
بعد طلعوا قالت: من هي؟!
زينات: ماعرفش.. اصل هيا نفسها اتصلت في رمضان لما كنتوا مسافرين وكانت عايزاكي ضروري بس انا نسيت واما افتكرت مبارح وجيت ابلغك لقيتك نايمة..
هي استغربت ..
وصلت قدام طاولة التليفون وقامت السماعة اللي كانت محطوطة جنبه.. والخدامة كملت طريقها للكوجينة باش تكمل شغلها
مريم حطت السماعة على وذنها: الو..
: مريم.. كل عام وانتي بخير يا وخيتي
مريم عقدت حواجبها .. اللهجة هادي قداش ليها ماسمعتها: الصوت مش غريب عليا ولا طريقة الدوة.. قولي انتي من وفرحيني الله يربحك
: اني وردة يا مرومة.. وردة الهمالي ربيبة خالتك الله يرحمها
مريم ردت بنبرة فيها رعشة : قولي الله نا وردة !
: والله العلي العظيم اني وريده ..ايام شارع الهايتي والبدالي الرسمية يا مرومة!
مريم ماكانتش مكذبتها وانما مكذبة وذانها اللي سمعوا صوت شخص ليها سنين طويلة عليه.. لما قالتلها وريده وهو الاسم اللي كانت تقوللها فيه مريم بانت في صوتها نبرة الفرح: وريده وحق الله انتي وريده!.. وكملت بعتاب: يا ناعلي وينك كل هالسنين وين اختفيتي ..هضا غير موصيتك وعاطيتك رقم هاتف حوشي بيش معاش ننقطعوا على بعضنا!
: عندك الحق يا مرومة ..لكن بعد روحتي انتي لبنغازي بيوم بس اختي دارت حادث وتوفت وبعدها بايام حوشنا انحرق..والورقة اللي فيها رقمك مابتقعد والحوش بكبره راح هبي
تأثرت مريم باللي سمعاته.. بالذات بموت اخت وردة اللي كانت في عمر الزهور وقتها: الله يرحمها ويغفرلها ويكرم نزلها يا خيتي.. سامحيني بالله عليك مغير من ريافي حكيت هك ..
: معذورة يا مرومة.. حتى رقم حوشك هادا ماحصلته الا بستين حيلة من واحد شوره صاحب راجلك هنايا فالخمس وعنده حتى الارضي متاعكم.. لما قالولي هكي طول خديته منهم وماطاقني صبر اتصلت في نفس اليوم
مريم ابتسمت بمفاجأة: اجوزتي خمسي يا وريده!
هي ضحكت وقالت: ايه يا حنة القلب الاحرف صارلي زيك حتى اني.. قوليلي بالله وطمنيني عليك كيف حالك وحال صغيويرتك.. قداش عندك توا
ابتسمت مريم: الحمد لله في خيار الخير.. اللي حقيتيني حامل بها في عزا مينتي اخر العنقود
: مش قلتهالك ولا! قتلك بنية لا دكتور لا فري بطنك كانت واضحة بطن بنت تعيط عياط
مريم قعدت تضحك من قلبها وهي تسمع في صديقة مراهقتها بعدين سألتها هي بدورها: وانتي ايش درتي عويلة من الخمسي
: يا حنة عندي زوز بنيات وزوز وليدات..
ردت بابتسامة: ماشاء الله.. ربي يحفظم لكي ويفرحك بيهم
: آمين يا رب ويفرحك بصغارك ان شاء الله
وقعدوا يهدرزوا .. كل وحدة تحكي للتانية شن صار معاها طول سنين الغياب.. بالتفاصيل..
بعدين وردة قالت: اسمعي مرومة اني راهو من يوم تزوجت شرطت عالراجل يدورك ..وهو سايرني وقعد ينشد على من يعرف راجلك فالخمس وطرابلس.. لين الحمد لله طاح فالراجل اللي قتلك عليه في رمضان..
مريم مبتسمة: ايه هضوما تعرفنا عليهم في سبه شغل الصادق بعدها تمينا صحاب واجد
: وسبحان الله يا مرومة في نفس اليوم اللي جابلي فيه راجلي رقم تليفونكم سمعت خبر من بوي في طرابلس
لما قالت طرابلس مريم قلبها قريب وقف: خبر ايسما يا وريده نادخيلتك ماتفجعينش!
ضحكت وردة وقالت: بنفجعك لكن فجعة حلوة على قولتك.. وكملت بابتسامة: اللي بنقولهولك يخص عمتك يا مريم
دمعوا عيون مريم وقالت بصوت باين فيه الحنين: حسني قلبي والله حسني قلبي ..كنها عمتي كنها الللا حليمه ..قوليلي وبلي خاطري
: عمتك حليمة طلعت في قرعة الحج هي وشبانيها واني وين راجلي جاب الرقم طول اتصلت باش نبشرك ..تساخير من المولى اني مانحصل كيف نوصل فيك الا بعد نسمع خبر عن عمتك ..سبحانه رايدلك تطمني على احبابك كلهم..
قلب مريم من السعادة قريب وقف.. ضحكت بفرح وقالت: بشرك الله بالجنة يا وريده ..اجعنك فرحانة وطربانة ديما يا خيتي.. حطت يدها على صدرها وكملت: يا رحيم يا ربي.. يا كريم يا ربي.. بعد هالسنين هضي كلها يا وريده بعد سنين ونا مشتاقة شبحكم كلكم يا خيتي .. اااه يا ربي اااه ..
ونزلوا من عيونها الدموع.. فرح وحزن وشوق

يتبع...
«لو عجباتك الحلقة اضغطي عالنجمة واعطيني رايك🤍»