وهَوى القلبُ في هَواهَا

الفصل التاسع ✿«اللقاء الأول»

والخمرُ يُسكِر من يُعاقر كأسهُ
و عيناكِ خمرٌ بِلا كُؤوس تُسكرُ

- لقائلِها
ــــــــــــــــــــــــــــــــــــــــــــــــــ

مرت عدة أيام على اجراءات نقل عمل الفتاتان لمركز الصفاء بعدما قدما طلب للنقل وتم الموافقة عليها.
جهزت شهد حقيبتها ومعها نادين في غرفتها فسألتها الأولى: هنسافر بأنهي مواصلة يا نادين؟

أغلقت نادين حقيبة سفرها ووضعتها على الأرضية ثم قالت: فيه أتوبيسات مخصوصة بتروح هناك هنروح الموقف الساعة تلاتة وهيتحرك بينا تلاتة ونص وهنوصل هناك بعد خمس ساعات هننزل هناك لشقة إيجار لقيت صفحة بتعلن عنها وسعرها عال العال وعلى قد اللي في جيبنا، متخافيش أنا مخططة لكل صغيرة وكبيرة.

ابتسمت لها شهد بحب بالغ وتقدمت منها لتضمها لصدرها بقوة وهي تقول بهيام: مش عارفة هحبك أكتر من كده إيه يا نادين، ربنا يديمك في حياتي، بدونك بجد مكنتش عارفة حياتي هتمشي إزاي؟
ربتت نادين على ظهرها لتمر ثوان معدودة ليدلف الغرفة هشام وهو يقول بمرح: بناتي الحلوين جهزتوا شنطكم.

ابتعدتا عن بعضهما وأومأت له نادين ايجابًا فتقدم نحوهم وقال: يعني لازم حكاية الأتوبيس دي ما إحنا معانا زنوبة شغالة ومش مقصرة معانا في حاجة.
عقدت شهد حاجبيه وقالت: مين زنوبة دي؟

ضحك كل من نادين وهشام عليها ليقول الأخير: دي العربية الصغيرة بتاعتنا أنا مسميها زنوبة، موديلها قديم بس عايشة ومستحملة، أصيلة ومتقولش لأ.
ضحكت شهد بقوة ثم قالت: تسلم يا عمو وتسلم زنوبة على مجهودها بس بجد مش عايزين نتعب حضرتك معانا وبعدين الأتوبيس هينزلنا على طول هناك في مواصلة واحدة، تسلم بجد.

ابتسم لها بحنان وربت على رأسها وهو يدعو لها بأن يعوضها بكرمه.
----------❥

في الناحية الأخرى حيث الصعيد.
كان حمزة يرتدي حلة سوداء تليق بجسده الرياضي الطويل، دلفت صفاء بابتسامة ممتنة لابنها على تنفيذ طلبها ثم قالت: تعرف إني مرتحتش نفسيًا غير دلوقتي؟

ضحك بخفة ثم تقدم نحوها واحتضن وجهها بكفيها وقال: عشانك أعمل أي حاجة في الدنيا، أنا عندي كام صفصف أسعدها؟، خليت ميعاد سفري أربعة العصر زي ما كنتِ عايزة، أي أوامر تانية يا فندم؟

ابتسمت له وهزت رأسها نفيًا ليقطع هدوءهم دخول يوسف وهو يتنفس بشدة نتيجة ركضه خوفًا من ألا يلحقه فقال حمزة: أنا برضو بقول فينك؟ إزاي أقعد مع أمي في هدوء وسلام من غير ما تيجي وتقاطعنا!؟

لم يكترث يوسف لما قاله وأمسك بساعدي حمزة وهو يقول برجاء سبقه اللوم: كده يا حمزة يكون عندك سفرية للقاهرة وأنا أخر من يعلم؟ طب بالله عليك خليني أنا اللي أوصلك وسيبك من السواق ده.