"ياشوق أنا قلبي لهوف على الليالي المقبله
أخاف تطري لك ظروف وأخاف حبي تجهله ! "
أنتصف الثلث الاخير من النهار بالوقت الي فتّح عيونه ماحس بطول نومه من تعب السهر ..
مسك الخاتم الي بقرب مخدته اخذ نفس من أقصاه وهو يتأمله
لاحظ وجوده بأخر ليله لمحه طايح بنفس المكان
أبتسم وهو يتخيلها تدور له !
لمح عتمة الجو من الغيم المتراكم للحد الي ما يمكنه يتوقع الوقت رفع جواله وعينه للساعه الي تجاوزت الأربعه بخمسه وعشرين دقيقه فزّ وقت شاف كيف ممتليه الشاشه برسايلها وللمره الأولى باتصالها الي مر عليه وقت ..
فهم انها عرفت وتأكد ان خالد كلمّها قام يمسح وجهه
وهو ينتبه تحديداً للرسالتين المحوله
تنفّس بعمق وهو يحمد الله على التيسير الي متأكد
ان له خبيئه عند ربه عليه ! كيف تغيرت الامور في صالحهم
هالكثر بعد ما وصلوا لطرف الهاويه
طلّع يجفف شعره ويتجهز بعد ما رد عليها بالسؤال
جايك وينك الحين ؟ ووصله جوابها الي يعرفه زين
- نفس المكان ..
رفع خاتمها يخبيه بجيب ثوبه ، ماله نيّه يرجعه لكن
له نيّه يخليه قرب قلبه
نزل أيهم بخطوات خفيفه لحسن حظّه ما كان احد موجود
في هاللحظه ماوده ينشب بالتحقيق خصوصاً انه رجع الصباح ما شافهم .. يتوقع منها الغضب وزاد توقعه
من إشعالها المراسيل كانت في حالة إستنفار شديده
وصل وطلع بالخطوات الطويله الي يكرها
ما يدري كيف تتحمل بكل مرّه توصل أعلى هالمبنى !! جلس بطرف الدرج يرتب أنفاسه
ماوده يدخل مثل أول مره منهلك وهو داري بتهلكه زياده
كانت واقفه مكتفه يدينها بحزم مافكّت أعصابها من اللحظه الي طلع من عندها خالد وتركها للصمت تركها تحكم وتقضي في قضيتها
كانت مصدومه بشكل يقهرها غمضت عيونها بشدّه
وهي تتذكر كلامه وقت قال " بكره تعرفين بكره "
هذا مقصده !! يغضبها بمدخله عليه من طريق أبوها
كثر ماهي تحسّه لوي ذراع وتضييق
تمتمت بغيض وهي تهز اقدامها بسرعه بالغه
- تموت واموت ما حصل الي في بالك ..
رفعت جوالها تتصل عليه بعد ما يأست انه يرد
على الرسايل ياكثر قهرها وهي تتخيله يتعمد لأنها
تجاهلته قبل ! رمت جوالها وهي تلعنه من كل قلبها
ماتدري كيف بيكون ذهنها صافي وعندها محكمه بالظهر
مشت طالعه لمكتبها تجهز نفسها وتجهز ملفاتها
ومستنداتها وكل أمورها وتقابل موكلتها قبل تبدأ الجلسه ..
وقفّت تنزل شباكها بطريقه تسمح للهواء يدخل باندفاع
ودها بأي شي يبرد حرارة قلبها لكن ما كان الا يزيدها
إشتعال ، مرّت عليها الساعات ببطئ يعذبها مرّت عليها
الجلسه بصعوبه بالغه وهي تحاول تفصل حالتها النفسيه
ومشاعرها عن شغلها رجعت لمكتبها مرّه ثانيه وهو
اكثر قضية حاليا شاغلتها التفتت اتجاه صوت رسايله
ردت عليه وطلعت تسبقه وتسبق الوقت وتسبق كل
شي ما عاد فيها صبر للإنتظار
__________
بالشركة
يضحك من كل قلبه كيف كانت صدمتهم وقت
المناقصه كيف قدر تركي بفطنته يكشف حيلة
الشركه المنافسه لهم وجه عيونه لجدّه سلطان
يشوف الفخر بعيونه وهو يسمعه يقول
ماهي جديده عليك ياتركي ماهي جديده
بس يابوي ليتك قايل لنا حنا انصدمنا اكثر منهم
أردف عمّه محمد مأيد وهو صادق جدك وش بلاك
ما تعطينا خبر ؟ رجيتنا ماشفت وجيهنا كيف تقلبت
ماشفت وجه أبوك وصدمته
كمّل عبدالعزيز مواجه محمد انت شفت ؟
ما تلومني لنا شهر نستعد ونجهز وندرس خطتنا
زين ثم وقف وصار يتكلم بشي ما مر علي ولدي
وش جاه ما ادري ! ما قدرت اسأله ولا اقاطعه
التفت له يسأله : كيف عرفت ؟
جلس على مكتبه بإنشغال يدور لاوراق يحتاج
فيها توقيع جده : عبدالمجيد ، كنت شاك فيه من اول
عيا قلبي لا يأمنه كانت عيني عليه لين اما يطيح واتأكد ولا اصرف عنّه النظر وزي ما شفتوا لو بقينا على مخططنا الاول ما كان هذا حالنا لانه مسرب لهم وهم فعلياً
جايين على هذا الأساس ، عدلت على المخطط
بحيث يكون فيه ثغره ويوم شفته مقبل صديت عنه
على اساس اني اكلم لمحّت على اساس غيرت وعدلت
وعاد هو ما صدق خبر ومشت عليه
عقد عبدالعزيز حواجبه : كيف عرفت انه هو ؟
مد الاوراق لسلطان يوقعها والتفت يكمل كلامه
تذكر الليله الي تأخرنا فيها؟ وقت كنا طالعين حسيت فيه شي تحرك ما تيقنت لكن شكيت لسبب مجهول
ما كان فيه الا انا وانت والامن ما عاد وقت يتواجدون فيه
الموظفين بالذات بقسم الإداره انتظرت بعد ما رجعنا البيت و رجعت للشركه
ودخلت غرفة المراقبه وتتبعت الكاميرات ما كان
ودي انتظر ويصير شي او تنحذف خصوصاً
ان نظام الحساسات مابيسمح له يدخل بدون تصريح وبدون مايقفل كل أنظمة الشركه بما فيها الابواب لذلك فرصته كانت
معدومه في انه يدخل ويحذفها وفعلاً شكي كان بمحله دخلت المكتب وكلمت أيهم يرسل لي من يطبع
البصمات ..
مشى متوجه للخزنه يفتحها ويطلع منها ملف ابيض
مطابقة البصمات وتحليلها مدّه لمنتصف الطاوله
- وهذي أدله مُثبته لدخوله بعدنا واخذه لنسخه
من الدراسات وخطة المناقصه كامله
تابع بكلامه تحت نظرات الانبهار بالدقه في شغله
كلمت موظف الامن السيبراني ودخلت على نظام الشركة اتتبع اخر استخدام للاجهزه وبالفعل بعد ما طلعنا تم تشغيل النظام كيف فك الشفره ؟ ماعندي خبر لكن الاكيد ان عنده
وصول مُصرح تتذكرون وقت صارت المشكلة المالية
وتحول المبلغ لكن ماوصل الطرف الاخر ؟
لو تنبهوا المحاسبين وقتها كان ادركوا ان فيه
من دخل على نظام الشركة ودرس اسلوب الشركتين
وعرف اوقات التحويلات وعدّل على الحساب البنكي
وبسببه فضّت الشراكه بينا ، اربع شهور وهو من تحت لتحت
والخبر الاخير استعنت بأيهم وتتبعناه خارج اوقات
الدوام ومن تتوقعون وراه ؟ شد تركيزهم اكثر بسؤاله
واسهب بباقي جوابه
- الياسر الخبيث طلعت له شراكه معهم
وناوي يدخل علينا من تحت الطاوله بحيث مايكون
له ارتباط مباشر ..
أردف جده سلطان بالقول : الياسر أبو عبدالله ماغيره؟
ميّل راسه بالأيـه هو نفسه ، أيهم كان عنده بُعد نظر ما
يكره من عبث هالولد ونفسه الي كل مره يلمح له
انه واصل مكانه بسببك انت
مدد جسمه يستند على ذراعه وينهي كلامه
- وسلامتكم ..
