စိမ်းပြာရောင်မျက်ဝန်းတစ်စုံ၏ ညှို့ငင်ခြင်း

Ep - 18

ရင်းနှီးခဲ့ရသော ရပ်ဝန်းကလေးသို့ ချစ်ကြင်ရသော လူသားငယ်ကလေးနှင့် တွေ့ရန်လာရသည့် လမ်းတစ်လျှောက်တွင် လေပြည်ညင်းများသည်ပင် ချိုအီမွှေးပြန့်နေပါသည်။

ပိုင်ဇေခန့်တစ်ယောက် သူ့ အော်တိုဘီးအနက်ကလေးကို ကွင်းရှေ့ ထိုးရပ်လိုက်ချိန်မှာတော့ လင်းသုဇော်၏ ချက်ဗလက် မီးခိုးရောင်ကားလေး ရောက်နှင့်နေပြီကို တွေ့လိုက်ရသည်။

ကော်လာပါ ရှပ်အပြာ‌ဖျော့လက်တိုကို ဂျင်းအပြာဖျော့ဖြင့်တွဲဝတ်ထားပြီး ခေါင်းလျှော်စ ခပ်ဖွာဖွာဆံပင်ဖြင့် လူငယ်ဆန်နေလေသော ဤ ၂၈ နှစ်အရွယ် အမျိုးသားသည် သူ့ ညှို့မျက်ဝန်းပိုင်ရှင်ကလေးကို မြင်သည်နှင့် စကိတ်ကွင်းသို့ အပြေးနှင်လေသည်။

လင်းသုဇော်သည် ငယ်စဉ်ကလိုပင် ရှပ်နက်ပွ၊ကာဂိုပန့်အနက် ဖြင့် လွတ်လပ်ပေါ့ပါးစွာ စကိတ်စီးနေ၏။ ကြက်တောင်စည်းထားသော နီစွေးစွေးဆံစများက ထောင်နေလေတော့ ငှက်ပေါက်စကလေးလို ဖြစ်နေသည်။

ပိုင်ဇေခန့်ကို မြင်တော့ လက်လှမ်းပြသည်။
သူ ကွင်းထဲရှိ ညောင်ပင်ဝိုင်းတွင်ဝင်ထိုင်လိုက်သည်။ ခရေပင်မှ ညောင်ပင်ဝိုင်းထိ သူ့ခြေလှမ်းတွေ ရှေ့ရောက်နိုင်ခဲ့ပြီ။

" ဆောရီး ညီ ကိုယ်နောက်ကျသွားတယ် "

" ကျွန်တော်ကသာ စောရောက်နေတာပါဗျာ
  ဟူး ... မောလိုက်တာ "

နံဘေးဝင်ထိုင်လာသူကို အသင့်ယူလာသော ရေဘူးကမ်းပေးတော့ မတုံ့မဆိုင်းယူသောက်သည်။ သူ့မယ် အိတ်တစ်လုံး၊ဂစ်တာတစ်လက်ဖြင့် အိတ်ထဲတွင်လည်း ရေကအစ သရေစာများအဆုံး အစုံအစိပါဝင်သည်။

ပြောရရင် ဒါက သူတို့ရဲ့ first date ပဲလေ ..။

Coke နှင့် အာလူးကြော်ထုပ်များကို အိတ်ထဲမှထုတ်လိုက်ပြီး

"အာလူးကြော်က မာလာရှမ်းကော၊ BBQ ၊
Hot & Spicy အရသာတွေပဲရလာခဲ့တယ် ညီ ကြိုက်တာစားလေ coke တော့အဆင်ပြေတယ်မလား "

" ဟောဗျာ ... အများကြီးယူလာတာပဲ ပေါက်ပေါက်ရောပါသေးလားဗျ "

ကလေးငယ်၏ စနောက်မှုကြောင့် သူခေါင်းငုံ့ကာ ရှက်ပြုံးပြုံးမိသည်။