🍒🥀 قصة عبير 🍒🥀 بالدارجة المغربية

🍒 الفصل 53 🍒

💟سندي أنتَ في الحياة💟

#عبير

#ياسمين_اكرام

🌺البارت:431

تنفسات عبير بعمق ودازت من عليهم الكوزينة ..تبعوها حتى غبرات بسرعة البرق وشافو في بعضهم ..

رددت خديجة :غادي تكون سمعتنا

تنهدات بعدها عائشة مرددة بتبات:باينة من خطوتها ..موضوع الولاد ضار بنتي وبزاف وعارفاها هازا دقة وساكتة مبغات عشوب مبغات طبيب اختصاصي غير (هزات كفوفها وعينيها لسما)الله ينزل عليها رحمة سيدي ربي ويفرحها بشي وليد يقر عينيها بيه راه قلبها حليب ونتا شاهد عليها يكفي العذاب لداز عليها يارب لماعطيها من عندك وفرحها يارب راها مهدية ومرضية رددت كلام الله ومسحات على وجهها ..رددت خديجة كذالك بالدعاء...

تاركين عبير توجهات الكوزينة كتجر رجليها جمعات شعرها حلات الكوكوط لقات دجاج بزيتون خسرت وجهها رجعات غطاتها وتوجهات الثلاجة فتحاتها وتكات عليها معوجة فمها ..

سداتها بعدما عجباتها تاحاجة وخرجات راجعة البيت ..

من صبح والإنزعاج مرافقها مقلقة معصبة ومعارفة اش عندها وزاد كمل ليها هاد الموضوع لكانت طيلة الشهر محيداه من بالها كتدعي ولكن قلبها مسلم امرو الله تلهات بموضوع باها والخدمة وتمارتها ونساتو ...

دخلات البيت حذيفة جالس فوق الصلاية ماسك التسبيح بين يديه ..توجهات الصغيرة مسحات ليها يديها ووجهم لطلاتهم بالشوكولا ..حطاتها على الأرض كتخبط على مؤخرتها لمزال مربوطة بالكوشة رددت كتشوف فيها:غادي تمشي اروميساء عند الميمة تجلسي حداعم ملي ياكلو فادي توكلك وملي تبغي تنعسي قوليها ابدلك الكوشة ونعسي حداهم

حطات الصغيرة يديها على فمها مرددة:وتي (نتي)

دوراتها عندها كتقاد ليها في الكسيوة مرددة:انا نعس مريضة

حركات روميساء راسها وقربات باست لعبير جبينها ..تحنات باستها عبير على خدودها شويا عجبها ملمسها رطب وبلا ماتشعر كرشات عليها بعضة حتى زوكات والدموع كينقزو منها ..

بعدات عليها كتحكها ليها وترد :صافي صافي

وقف حذيفة توجه جيهتهم ..تحنا بغرابة شد الصغيرة ..شاف خدها مزوق بسنان ..هز راسو باستغراب في عبير لتقدمات كتزول في البيجاما تاركة غير الديباردور الأبيض بدونطيل ..تخشات في السرير ورمات عليها الغطا بعدما طلقات شعرها بنرفزة...

ردد حذيفة كيقرب عندها:اش هادشي اعبير مالك مع لبنت اش هاد الفعايل ديال الدراري الصغار ...

مجوباتوش بل لاحت الغطا على شعرها تركاتو يتنهد وكيطبطب على الصغيرة لكاسرة لبيت ببكاها ..

خرج كيسكت فيها ويبوس حتى بدات كتأن أنين خفيف ....

جالسين مجموعين على العشا الخفيق كيف دينا غير ليوم ناقصاهم عبير ...عينين حذيفة معلقة على روميساء لجالسة على رجل خديجة كتمضغ كيشوف العضة لمصورة ليها وبدات كتعطي الزروقية ..حول عينيه لعائشة لرددت:اش وقع لهاد البنت جهلات ولا مالها