🍒🥀 قصة عبير 🍒🥀 بالدارجة المغربية

🍒 الفصل 60 🍒

💟سندي أنتَ في الحياة💟

#عبير

#ياسمين_اكرام

🌺البارت:489

تبسمات عبير مرددة:عقل صغر هوا هذا معندنا مانديرو من غير نحضيو واخا تقول راه تقبلات الوضع ولكن الإحتياط والعسة كيف قلتي واجب ....

حرك راسو حذيفة ووقف مردد نمشي ندي هادشي ونشوف الوالدة وخالتي ..

حركات راسها باه مرددة:الله يرضي عليك مافياش نيت ما نوض نتكا تا لعشيا ونخرجو ندورو شويا نتحرك

تبسم وهز البلاطو تاركها سرحات رجليها فوق الفوتو كتشوف في التلفزة يديها محطوطة على بطنها وعينيها مرة مرة تمشي جهة رجليها لبتقيشرات بيضين منصفين مغطين ..

نفخات وهزات عينيها في حذيفة لداخل يكمل الجميع رددت بهدوء:عفا حبيبي عطيني التيليكومونض نقلب هادشي جاب لي الخنقة ..

تبسم بود وهز ها من جنب التلفازة ..حطها حداها وكمل جميع طابلة تاركها تقلب في القنوات ...

تحط الغدا تجمعو حدا عبير كيتغداو ويتفرجو حذيفة كال شويا وجمع يديه مع يالاه واكل اما عبير دخلات طول وعرض في طبسيل الدجاج تاكل وتزيد ..

وقفات شادة على كرشها مرددة :ليوم مانضتش نوض نغسل واخا غير هاد الطبسيل عيت بالجلسة ...

هزات الطبسيل وتمشات كيف البطة خلات الكل يتبسم عليها ردد حذيفة كيحك عينيه:الله يسمح لينا منكم

خبطات خديجة حذيفة لكتافو ببسمة مرددة:عاد وليتي تقولها تاشفتي بعينيك

تبسم ويالاه بغا يرد عليها قاطعاتو روميساء

مخنزرة في خديجة:ميمة علاس تضلبي لي بابا علاس

شاف حذيفة في خديجة مبسم مردد:هانتي تشوفي عندي ما يحامي ليا مبقيتش حيط قصير ليك اخديجة

شافت فيها خديجة وجرتها من حضن خديجة فين جالسة حتى حطتها في حضنها وجرت ليها وذنيها مرددة:ياك ابنتي وليتي تخرجي في عينيك

رددت روميساء:مضلبيس بابا زين مضلبيس طلطي وذي واتيني طلطي اميمة نونة(مضربيش باب زوين مضربيش طلقي وذني وعتيني طلقي اميمة الحنونة)

طلقات منها خلاتها ليها حمرا نزلات من حضنها ومشات عند باها هزها بين حضنوكيشوف ليها وذنها لرجعات حمرا هز عينيه في مو مردد:مالك الواليدة على هاد الجرة

رددت خديجة جامعة يديها:ضسرات عندك هاديك لبنت خاصها شويا العصا الا بقات هكا مانتوما في خير وغادي تهلكم

تخشات في باعا كعناد منها دخلات عبير هازة باش تمسح الطابلة شافت فيها عائشة مرددة:سكنتب في الكوزينة اش درتي

رددت عبير محنية كتمسح وتنفس بعمق :غسلت الطبسيل ويالاه يالاه ثقاليت وتالخدمة مبقيتش قادة ندفع مالادي نتهنا تالمن بعد الولادة