🍒🥀 قصة عبير 🍒🥀 بالدارجة المغربية

🍒 الفصل 49 🍒

💟سندي أنتَ في الحياة💟

#عبير

#ياسمين_اكرام

🌺البارت:402

واقفة عبير في الكوزينة مزولة المونطو وبقات بسيرفيط مقطنة بالكري وفيها بعض الخطوط بالأسود واصلة لفخادها مع سروالها بالكري شعرها مجموع ومجبد كتقاد في طبيسلات داكشي لشرات وكتشوف في الكوزينة لكتشطح بروينا تلفتات شافت في فاتن لكتعمر في اتاي مدورا زيف على راسها تحتو دواور الحامض

رددت عبير بضيق :حيدي هذاك الزيف وشربي فانيدة الراس وليتي تباني في شكل معجبتينيش

تلفتات فاتن شافت فيها بعيون معصورين حمرين تحت عينيها سود وووجه صفر وفيه بقع من الحبوب تبسمات باستهزاء ورددت:تبدلت ياك (دارت البراد فوق الفورنو)اودي اش غادي ندير لولاد صعاب ومكينش العوين وعاد زيد مرضهم صعيب ويمرضو ليا بزوج بدقة وسي توفيق ميعقلش عليك في الليل كيقوليك ضبري راسك معاهم كيخرج يبات في الصالون ويخليني مضاربة معاهم نسكت واحد ينوض لاخر

تلفتات عبير وتكات على البوطاجي مربعة يديها:هاذو هوما الولاد كون غير جات خالتي حليمة بقات معاك ولا نتي مشيتي عندها هاد الفترة بينما نوضو سنينات وغادي يرجعو ماشاء الله عليهم راك عارفة فترة وغادي تدوز ...

سرطات ريقها فاتن رادة :مخاصمة معاها غير سكتي

باستغراب شافت فيها :علاش اش وقع

هزات يديها طالع ليها زعاف :ساعاتو الله حصلتها كتعمر في توفيق جالسا تقوليه شوف الدار وقنات كيف دايرين شوف حوايجك مسخين بحال انا لخاطري عصباتني ضرت فيها قدامو تاقلب عليا هوا نيت وجهو قالك مي متهضريهاش خليها تهضر لفي راسنا في راسنا ..

غمضات عبير وحلاتهم رددت :حيدي لبراد حيدي عارفة دراري صعاب ومحنينك ولكن مترخيش في راسك رجال صعاااب نص هكا ونص هكا ملي يجي من خدمتو يرتاح شويا ولصقيهم فيه وقومي براسك ودار جيبي شي مرا تعاونك باش تفرغي شويا ونقصي من ماكلة زنقا راه هي لخصرات ليك وجهك هكا ممزيانش ليك سيغتو نتي مولفا الخدمة وتشوفي راسك وليتي غيرمخشية ..

قربات عندها طبطبات ليها على كتفها نتي ختي متقلقيش من كلامي مبغيتش من بعد نسمع عليك خبار تضرني ونقول دارتها بيديها شحال من وحدا داتها في الولاد ونسات راسها لقات راجلها نساها وداتو ليها مرا خرا ميدخلكش لوسواس مي نتي اعتاني براسك باش ترتاحي نتي لولا وباش تخلي راجلك في صفك (سكتات لثواني عاد رجعت رددت) توفيق الله يعمرها دار متاقي الله وكيبغيك ولكن الإحتياط واجب ونعمة ..

تبسمات فاتن وتلفتات هزات البراد حطاتو في البلاطو مرددة:تبارك الله عليك كلامك حسيت بحال مرا كبيرا لكتقولو لي

رددت عبير هازة البلاطو :وهادي هي الدنيا وبالتجاربها كتقريك وتكبرك

حطو الفطور وتجمعو عليه طالقين البز ساجد وزيد فوق الأرض يتعافرو مع بعضهم واخا سخانة شاداهم الطيران قاتلهم عكس روميساء لمجلساها عبير في حضنها شادة بتي بان تاكل وتدور عينيها عليهم بحال لمرا الكبيرة ....