🍒🥀 قصة عبير 🍒🥀 بالدارجة المغربية

🍒 الفصل 51 🍒

💟سندي أنتَ في الحياة💟

#عبير

#ياسمين_اكرام

🌺البارت:417

التصرفيقة على اصولها كانت ..شدات ليها جهة خدها كامل مطبعة وغادا تميل الزروقية مع الوقت مغاديش تفلتها ..تنهدات و تكات كتغسل وتبرد دقتو ...خرجات كتجر رجليها دخلات الصالون فين كان الجمع واللمة دورات عينيها على ياسين لجالس و على الوليدات لجالسين يلعبو ..تحنات هزات روميساء من بينهم كتبسم من فوق خاطرها :شبعتي الكريشة اشنيولة دابا جا وقت النوم

ضحكات الصغيرة وحطات وجهاا على كتف عبير مرددة :واحا نس حدا ماما(واخا نعس حدا ماما)

هزات راسها بعدها وحطات يديها على خدها :ماما فيك ديدي سون دار كي ديدي (شكون دار ليك )

رددت كتبسم:والو غير ضربني الباب

بدات روميساء تراما وتقرب تنفخ على خد عبير بعدها حطات فمها كتبوس على خدها ..بعدات بعد ثواني تارمة عبير قدام هاد الكتبة من البرائة وصفاء يتنفس قلبها ويهدا عصابها رددت

روميساء :دابا معاديش تبئا ديدي ئطيتها بويسات(مغاديش تبقا عطيتها بوسات)

تخشاتها عبير فيها وكملات طريقها البيت الجلوس ..تكات على السداري تاركة الصغيرة تخشا حداها ..

حطات راسها على صدر عبير تركتها تدور يديهاا عليها وتبدا تطبطب عليها حتى حساتها ترخات وبدات تصدر شخيرات ..هزات عينيها السقف كتفكر في حذيفة لغيكون ربي لي عالم بيه والعصب كيجري ليه في دمو ... فضلات تبعد وتخليه حتى يبرد شويا حسن ليها وليه هي معصبة وهوا أكثر ملي غادي يتلاقاو غادي تكون شحنة السالبة وغادي يجرحو بعض بلا مايحسو ...

غمضات عينيها من تعب يوم الكبير .. وغاست في النوم مع روميساء ..فاقت على بوست كيدورو على خدها ويد كتمس شعرها ..

حلات عينيها سود مدهشرة معارفة واش الليل ولا نهار ..ومعارفاش هي فين ..تمركزات البسمة على شفايفها ملي شافت روميساء كتضحك ومعرية على سنيناتها ... لاحت الغطا للقات مليةح عليها ..هزاتها حطاتها فوقها كتدغدغ فيها تاطلق ضحكتها بكل حرية ...

قادات جلستها كتشوف من السرجم النهار لختفى وصوت الأذان المغرب كيتسمع ..رددت روميساء:فيا زوع اماما

شافت فيها عبير وجمعات وقفتها هازاها بين يديه خارجة كتصنت الأصوات لمختفية ..دخلات الحمام غسلات ليها ولروميساء نشفو بفوطة

خرجات كتبسم وتحرك في راسها الصغيرة لكتكلم وتعبر والهضرة كتخرج عوجة ليها وهي كتضارب معاها بغا تكلم بزز ...دازت الصالون لقات كلشي ناعس قضات عليهم تمارة وحتى الوليدات مخشين جامدين ...

توجهات لبيتها على امل تلقا حذيفة تهدن وبرد

حلات البالب بيد والصغيرة شاداها بيد ..