တရှပ်ရှပ်မြည်သံကလွဲ တိတ်ဆိတ်နေသောအခန်းသည် ပြတင်းပေါက်တွေပိတ်ထားမှုကြောင့် ပတ်ဝန်းကျင်ကအသံတွေတိုးမဝင်လာပဲ ပို၍တိတ်ဆိတ်နေသည်။တည်ငြိမ်နေသောလိုက်ကာစတွေကနေ နေရောင်ခြည်ကဖောက်ထွင်းချင်နေသည်ကြောင့် နေ့ခင်းဘက်အချိန်ဖြစ်သည်။နေ့အချိန်ဖြစ်သော်လည်း အခန်းမီးတွေနဲ့လင်းထိန်နေသည်ကြောင့် အခန်းပိုင်ရှင်သည် နေ့လားညလားကွဲပုံမပေါ်ပါ။မွေ့ယာပေါ်မှာကန့်လန့်ဖြတ်မှောက်ချပြီး လက်တစ်ဖက်ကမေးကိုထောက်ထား၍ ကျန်လက်တစ်ဖက်ကတော့စာရွက်တွေကိုလှန်နေသည်။တစ်ချက်တစ်ချက်တခစ်ခစ်ထရယ်မှုကြောင့် ကျောပြင်ငယ်လေးသည်လှုပ်ခါသွားပြီး ဆံပင်ပြာလေးတွေကလည်းဝဲခနဲ။
"ခင်ဗျားကပုံဆွဲလည်းတော်တာပဲလား...ကျွန်တော်မသိသေးတာတွေခပ်များများပဲ"
ထယ်ယောင်းသည် ဂျောင်ကုပေးလိုက်သောပုံပြင်စာအုပ်မူရင်းတွေကို အိမ်ပြန်ရောက်လာကတည်းက အခန်းထဲဝင်ပြီးဖတ်နေတာဖြစ်သည်။စာအုပ်ထဲရှိရုပ်ပြပုံလေးတွေက ဂျောင်ကုကိုယ်တိုင်ဆွဲထားမို့ အံ့အားသင့်နေတာဖြစ်၏။ဖတ်ပြီးသားစာအုပ်တွေက ဘေးတစ်ဖက်တစ်ချက်စီမှာပြန့်ကျဲနေပြီး ထပ်ဆင့်ထားတဲ့စာအုပ်တွေကတော့ မဖတ်ရသေးတာတွေဖြစ်သည်။သူအိမ်ပြန်ရောက်လာတုန်းက အမေကစိတ်ထဲမပါပဲ ဖက်ငိုသေးသည်။အခန်းထဲထိလိုက်လာပြီး ဘယ်တွေသွားနေလဲလို့လိုက်မေးနေတာကြောင့် အခန်းထဲကတွန်းထုတ်ပြီး စာအုပ်ပဲဖတ်နေလိုက်သည်။စာဖတ်တယ်ဆိုတာ သူ့စတိုလ်မဟုတ်သော်လည်း ဒီပုံပြင်တွေကတော့ သူ့ကိုအတော်ဆွဲဆောင်ထားတာမို့ အိပ်ဖို့ပင်မေ့လျော့သွားသည်။
"ဆံပင်ကွေးကွေးလေးတွေနဲ့ဗစ်ထိုရီ"
ထယ်ယောင်း စာအုပ်ကိုပိတ်ချပြီး ပက်လက်လှန်၍မျက်နှာကျက်အဖြူကို အကြောင်းအရင်းနဲ့စွာငေးကြည့်သည်။ခုနကလေးတင်ဖတ်လိုက်သော 'ဗစ်ထိုရီ' ဆိုသောပုံပြင်တွင် ဇာတ်ကောင်ကဆံပင်ကောက်ကောက်လေးတွေနှင့် မက်မွန်ပွင့်တွေကြားမှာအိပ်ပျော်သွားပြီး လှပတဲ့အိပ်မက်အရှည်ကြီးကိုမက်နေတာကို အပိုင်းဆက်အတိုတွေဖြင့်ရေးထားသည်။ထိုဆံပင်ကောက်ကောက်လေးက လက်ရှိဖြစ်နေတဲ့ဆိုးရွားတဲ့ဘဝကိုမေ့ထားပြီး အိပ်မက်ထဲမှာ စိတ်ကူးယဥ်၍ပျော်နေတဲ့ပုံစံဖြစ်သည်။လက်တွေ့မှာမိဘမဲ့ဆို အိပ်မက်ထဲမှာမိသားစုနဲ့ ၊ လက်တွေ့မှာဆင်းရဲလျှင် အိပ်မက်ထဲမှာချမ်းချမ်းသာသာနဲ့။သို့သော်လက်တွေ့မှာ သူ့ဘေး၌ရှိသော ဂျွန်နသန်ဆိုတဲ့သူငယ်ချင်းကတော့ သူ့အိပ်မက်ထဲတွင်မပါပေ။ဂျွန်နသန်ကိုအရမ်းချစ်တယ်ဆိုပြီး အိပ်မက်ထဲတွင်မထည့်ထားတာက ဘယ်လိုအဓိပ္ပါယ်လဲ?ပြီးတော့ အဆုံးသတ်စာမျက်နှာမှာ စာဖတ်သူကလေးတစ်ဦးအနေနဲ့ နားလည်ရခက်တဲ့စာကြောင်းအချို့ကိုရေးထားသေးတယ်။ 'ဒီအိပ်မက်ရှည်ကြီးကိုမက်စေချင်သူက ဂျွန်နသန်ပါ ဗစ်ထိုရီ...လှပတဲ့အိပ်မက်တွေထဲမှာ ငါမပါလည်းမင်းပျော်နေတာကို စိတ်ချချင်တယ်' ဟု လက်ရေးခပ်သော့သော့ဖြင့်ရေးထားသည်။