Karma Ng Pagnanasa

KABANATA 15

RAUL's POV

Nandito ako ngayon sa loob ng servant's quarter at iniisip ang narinig kong usapan ng amo kong si Sandra Ysabelle at ni Luna, isa sa mga kasambahay dito sa malaking bahay ng pamilya Mondragon at kung umasta minsan ay parang ito na rin ang tumatayong mayordoma ng bahay.

Kanina nang makabalik ako ng malaking bahay galing sa paghatid kina Don Emilio at Rigo sa opisina ng mga ito ay hinanap ko agad si Marta, isa sa mga kasambahay ng pamilya Mondragon. Gusto ko itong kausapin tungkol kay Lavinia.

Napansin kong tahimik sa buong biyahe patungong university si Lavinia kanina. Usually ay madaldal ito at maraming kwento, kaya nakapagtatakang tahimik ito kanina. Naisip kong baka may problema sa university o may alitan sila ng boyfriend na si Justin. At si Marta ang makatutulong sa akin na malaman ang rason dahil alam kong close ito kay Lavinia.

Sinubukan kong hanapin si Marta sa buong kabahayan kahit doon sa mga lugar na hindi ko pwedeng puntahan. Malakas ang loob ko rahil alam kong walang ibang miyembro ng pamilya Mondragon ang naiwan sa loob ng malaking bahay maliban kay Sandra Ysabelle na siguradong nasa loob pa ng kwarto niya rahil matagal siyang mag-ayos ng sarili na halos inaabot ng dalawang oras.

Si Cecilia naman na asawa ni Rigo ay siguradong natutulog pa. Ito ang routine nito after magpahinga pagkatapos mag-breakfast. Usually ay higit dalawang oras itong natutulog at kung minsan ay gusto lang talagang mag-stay sa loob ng kwarto nilang mag-asawa buong maghapon.

Nang nasa itaas na ako ng malaking bahay ay hindi sinasadyang may narinig akong mahihinang boses na nag-uusap. Ang mga boses na iyon ay nanggagaling mula sa loob ng master's bedroom. Naagaw ng mga boses na iyon ang aking atensyon.

Napagdesisyunan kong makinig sa dalawang taong nag-uusap sa loob ng master's bedroom. Luminga muna ako sa paligid at nang masigurong walang ibang tao ay naglakad na ako palapit sa nakasaradong pintuan ng master's bedroom.

Sina Sandra Ysabelle at Luna ang nag-uusap.

Dinig na dinig kong may inililihim na sikreto si Sandra Ysabelle at alam ni Luna kung ano iyon. Natuklasan ko ring binibigyan ng monthly allowance ng asawa ni Don Emilio si Luna. Marahil ay kabayaran sa pananahimik ni Luna tungkol sa sikreto niya na ayaw niyang malaman ng kanyang asawa.

Nang marinig kong lalabas na ng master's bedroom si Luna ay nagmadali akong bumaba ng hagdan at lumabas mula sa malaking bahay patungo rito sa servant's quarter. Hinahabol ko pa ang aking paghinga nang makapasok ako rito sa loob ng servant's quarter.

Ang ibig sabihin pala ay napakaraming itinatagong sikreto ni Sandra Ysabelle. Maliban sa pagkamatay ng aking mga magulang na siya ang naging ugat ay may iba pa siyang itinatagong baho. Isa na nga rito ang natuklasan kong may inililihim siyang isang bagay mula sa kanyang asawa.

Siguradong isang malaking sikreto iyon na manganganib ang buhay ni Sandra Ysabelle kung sakaling mabunyag. Hindi naman siguro siya magbibigay ng allowance kay Luna buwan-buwan kada taon kung simpleng bagay lamang iyon.

At kung anuman ang sikretong iyon ni Sandra Ysabelle ay aking aalamin.

Tiningnan ko ang natutulog na si Jacob sa ibabaw ng kama nito. Ganito talaga ang oras ng tulog nito rahil night shift sa pagiging security guard ng property ng pamilya Mondragon. Minsan pa nga ay ginagawang driver sa umaga ng ibang miyembro ng pamilya kung halimbawang magkakaiba ang lakad nila.

Napailing ako. Buti na lang at may karagdagang sahod si Jacob bukod sa sahod nito bilang security guard. Hindi na rin masama. Kaso ano ang mangyayari kung malaman ni Don Emilio na kinakalantari ng asawa nito si Jacob?

At iyon ang isa pang sikreto ni Sandra Ysabelle na pwede kong gamitin laban sa kanya kapag kinailangan. Paniguradong malalagot siya kay Don Emilio kapag nalaman nitong pinipindeho niya ito.