အိမ်ထဲသို့ ဖုန်တလူးလူးညစ်ပေတူးပုံစံဖြင့်ဝင်လာသော သားဖြစ်သူအား ဆူသင့်သလောက်ဆူကာမာန်ကာလုပ်လိုက်တော့ ခါတိုင်းလိုစကားများရတော့သည်။ သားသည် သူနောက်အိမ်ထောင်ပြုလိုက်သည်ကိုလုံးဝသဘောမကျ။အထူးသဖြင့်အခုလက်တွဲထားသော လက်တွဲဖော်ကိုသူလုံးဝမနှစ်သက်။ဒါကြောင့်အချိန်တိုင်းပြသနာရှာကာ လူပေလေးလုပ်နေတတ်သည်။ အခုလည်းမေးစရာမလို ဘယ်သူနဲ့ရန်ဖြစ်လာသလဲဆိုတာကိုသိနေသည်။ အရွယ်တစ်ခုရောက်နေပြီဖြစ်တာကြောင့် ငယ်စဥ်ကလိုရိုက်၍မဆုံးမချင်တော့သဖြင့် စကားနှင့်ပင်နားချခဲ့သော်လည်း ကျန်သည့်ကိစ္စများတွင်လိမ္မာသည့်လူပေလေးက Jeon Jungkookဟု အသံကြားလိုက်လျှင် တီကောင်ကိုဆားနှင့်တို့သလို ထွန့်ထွန့်လူး။
ဘာကြောင့်လဲ။ဘာလို့လဲ။ဘာလို့လက်မခံနိုင်တာလဲဟုမေးလိုက်တိုင်း မုန်းလို့ဟုသာ အသားကုန်အော်ပြောတတ်သည်။ဘာလ်ို့မုန်းရတာလဲ ထပ်မေးခဲ့ရင်လည်း မျက်လုံးလေးထောင့်ကပ်ကာ တစ်ခုခုအားအသည်းအသန်တွေးတော၍ငြ်ိမ်ကျသွားပြန်သည်။ သားဖြစ်သူကတစ်ဖက်သတ်အမုန်းကြီးနေတာလားဆို မဟုတ်။ ဟိုကလေးJeon Jungkookကလည်း သူ့မိခင်နဲ့တွဲသွားတွဲလာလုပ်နေသည့်အချိန်တုန်းကအကောင်း။မေမေစိတ်ချမ်းသာရင်ဖြစ်ပါတယ်ဆိုပြီး အလယ်တန်းကျောင်းသားအရွယ်နှင့်မလိုက်တည်ငြိမ်စွာပြောခဲ့သူက အိမ်သို့ခေါ်လာချ်ိန် လူပေလေးကိုညွှန်ပြကာ
'ဒါက သားရဲ့အကိုဖြစ်လာမယ့်သူလေ သားကညီလေးပေါ့' လို့မိတ်ဆက်ပေးလိုက်သည့်အခါ လူပေလေး၏အသံနည်းပါး ကျယ်လောင်စွာအာခေါင်ခြစ်၍အော်လိုက်သည်က
'ညီလေးမဖြစ်ချင်ဘူး!!!!!'
သူရော ဇနီးအသစ်ကပါအံ့ဩသွားရသည်။ အရာအားလုံးအဆင်ပြေပြေရှိနေလျက်မှ သားနှစ်ယောက်ကတစ်ယောက်မျက်နှာတစ်ယောက်မြင်သည်နှင့် သူ့ငါမလိုချင်၊ငါ့သူမလိုချင် ဟုဆိုကြကာလုံးထွေးသတ်ပုတ်ကြပါတော့သည်။ ငယ်ရွယ်သူတွေမို့ နေသားမကျသေးတာနေမှာပါဟုတွေး၍ နှစ်မိသားစုပေါင်းကာ တစ်ပင်ထူလိုက်သော်လည်းမျက်နှာချင်းဆိုင်သည်နှင့် တစ်ယောက်မဟုတ်တစ်ယောက်ကစကားနာထိုး ခနဲ့၍ခြေပါလက်ပါဖြင့်။ ရန်ပွဲပြီးတိုင်းနှစ်ယောက်လုံးကို ဆေးရုံသို့အပြေးအလွှားပို့ခဲ့ရပေါင်းလည်းအကြိမ်ရေမနည်း။
