ជម្រើសទី១ក្នុងបេះដូង

30

ខ្ញុំភ្លាត់មាត់ចេញមកទាំងមិនដឹងខ្លួន ពេលលឺរឿងមិនគួរអោយជឿរបស់នាង បើខ្ញុំមិនស្គាល់ហ្សែក ច្បាស់ខ្ញុំក៏ភ្ញាក់ផ្អើលដល់ថ្នាក់នេះ។

«គេមិនត្រូវការកូនដែលមិនកើតចេញពីផ្ទៃរបស់នាង...គេមិនត្រូវការកូននេះ គេបង្ខំអោយខ្ញុំរំលូតក្មេងនេះចេញ ហ៊ឺៗ»

នាងស្រាប់តែយំ ស្របពេលជង្គង់នៅសង្កត់លើការ៉ូរឹង ដោយមិនព្រមរំកិលទៅណា កែវភ្នែកពេញដោយទឹកភ្នែកមួយគូរនោះសម្លឹងខ្ញុំមិនព្រិច ព្យាយាមសុំការអាណិតពីខ្ញុំទាំងគ្មានការខ្មាស់អៀន។

«គេមិនមែនជាមនុស្សបែបនោះ...»

អះអាងបែបនេះ មិនបានមានន័យថាខ្ញុំនៅខាងគេឡើយ តែនេះជាការពិត ហើយខ្ញុំជឿថាគេគ្មានផ្លូវហារមាត់និយាយពាក្យព្រៃផ្សៃដល់ថ្នាក់នេះដល់ក្មេងមិនដឹងអី...

«ហឹស! រស់នៅជាមួយគេយូរដល់ម្លឹង នាងនៅល្ងង់មិនស្គាល់ស្រោមមុខរបស់គេទៀត?»

អេមីលី ក្រោកឈរវឹបញោចមាត់ទៅម្ខាងចម្អកមកខ្ញុំ រួចយកដៃជូតទឹកភ្នែកចេញហាក់ដូចជារឿងអម្បាញ់មិញគ្រាន់តែជាការលេងសើច មុននឹងទាញទូរស័ព្ទចុចទៅលេខអ្នកណាម្នាក់។ នាងបើកស្ពីកឃើរទូរស័ព្ទ ហើយតម្លើងសម្លេងលឺៗ មានចេតនាអោយខ្ញុំលឺការសន្ទនារវាងនាងនិងភាគីម្ខាងទៀត។

(អេមីលី! ខ្ញុំប្រាប់នាងហើយថាហាមរំខានខ្ញុំ!!)

(ហ្សែក! ខ្ញុំគ្មានផ្លូវធ្វើតាមសម្តីរបស់លោក! បើលោកចង់សម្លាប់កូននេះ សម្លាប់ខ្ញុំមុនទៅ!)

(បានហើយ! ខ្ញុំគ្មានពេលនិយាយរឿងអត់បានការជាមួយនាងទេ)

(រើសទៅ អ៊ិហ្សែក មិឃិអ៊ែល...រវាងរៀបការជាមួយខ្ញុំ និងសម្លាប់ខ្ញុំ លោកយកមួយណា?)

ខ្ញុំឈរស្តាប់ការសន្ទនាយ៉ាងរន្ធត់ចិត្ត តែក៏ប្រឹងសម្រួលទឹកមុខធម្មតាបំផុតតាមដែលអាចធ្វើបាន។ នេះជារឿងឆ្កួតស្អីទៅ? ហេតុអីមនុស្សធំដឹងក្តីអស់នេះ យកជីវិតក្មេងមិនទាំងទាន់នឹងកើតមកលេងសើចបែបនេះ?

(ខ្ញុំនឹងសម្លាប់នាងពិតមែន អេមីលី បើនាងមិនព្រមរំលូតក្មេងនោះចេញ)